പൗരസ്ത്യ കാര്യാലയം പൗരസ്ത്യ കാര്യാലയം മാർ തട്ടിലിനൊപ്പം ഒന്പത് പുതിയ അംഗങ്ങൾ
Thursday, October 24, 2024 2:09 AM IST
കൊച്ചി: സീറോമലബാർ സഭയുടെ മേജർ ആർച്ച്ബിഷപ് മാർ റാഫേൽ തട്ടിലിനെ പൗരസ്ത്യ സഭകൾക്കായുള്ള കാര്യാലയത്തിലെ അംഗമായി ഫ്രാൻസിസ് മാർപാപ്പ നിയമിച്ചു. മാർ തട്ടിലിനെ കൂടാതെ ലോകത്തിന്റെ വിവിധ ഭാഗങ്ങളിൽനിന്നുള്ള ഒന്പത് മെത്രാന്മാർ കാര്യാലയത്തിലെ അംഗങ്ങളായി നിയമിതരായിട്ടുണ്ട്.
കത്തോലിക്കാ സഭയിലെ പൗരസ്ത്യ റീത്തുകളിൽപ്പെട്ട വ്യക്തിസഭകളുമായി ബന്ധപ്പെട്ട കാര്യങ്ങളിൽ തീരുമാനങ്ങളെടുക്കാൻ മാർപാപ്പയെ സഹായിക്കുന്ന കാര്യാലയമാണിത്. കർദിനാൾ ഡോ. ക്ലൗദിയോ ഗുജറോത്തിയാണ് കാര്യാലയത്തിന്റെ പ്രീഫെക്ട്.
മേജർ ആർച്ച്ബിഷപ്പിനു നൽകിയിരിക്കുന്ന ഈ നിയമനം സീറോമലബാർ സഭയോടുള്ള ഫ്രാൻസിസ് മാർപാപ്പയുടെ കരുതലിന്റെയും ആഗോളസഭയിൽ സീറോമലബാർ സഭയ്ക്കുള്ള പ്രാധാന്യത്തിന്റെയും അടയാളപ്പെടുത്തലായാണു വിലയിരുത്തപ്പെടുന്നത്.