വയനാട് ദുരന്തം: സ്വമേധയാ കേസെടുത്ത് ഹൈക്കോടതി
Friday, August 9, 2024 2:21 AM IST
കൊച്ചി: വയനാട് ഉരുള്‍പൊട്ടല്‍ ദുരന്തത്തില്‍ സ്വമേധയാ കേസെടുത്ത് ഹൈക്കോടതി. പ്രകൃതിദുരന്തങ്ങള്‍ തടയാന്‍ സമഗ്രമായ പരിഷ്‌കാരങ്ങളും നിയമനിര്‍മാണവും നടത്തണമെന്ന് സര്‍ക്കാരിന് ഹൈക്കോടതി നിര്‍ദേശം നല്‍കി.
ഉരുള്‍പൊട്ടല്‍ സംബന്ധിച്ച് മാധ്യമവാര്‍ത്തകളുടെയും ഹൈക്കോടതിക്കു ലഭിച്ച കത്തിന്‍റെയും അടിസ്ഥാനത്തിലാണ് ജസ്റ്റീസ് എ.കെ. നമ്പ്യാര്‍, ജസ്റ്റീസ് വി.എ. ശ്യാംകുമാര്‍ എന്നിവരുള്‍പ്പെട്ട ഡിവിഷന്‍ ബെഞ്ച് സ്വമേധയാ കേസെടുത്തത്.
പ്രകൃതിദുരന്തം തടയാനുള്ള കാര്യങ്ങള്‍ ആലോചിക്കണമെന്ന് അഡ്വക്കറ്റ് ജനറലിനെ വിളിച്ചുവരുത്തി കോടതി നിര്‍ദേശം നല്‍കി. വയനാട് ജില്ലയിലെ മുപ്പയ്‌നാട് പഞ്ചായത്തില്‍ ക്വാറിക്ക് അനുമതി നിഷേധിച്ച പഞ്ചായത്തിന്‍റെ നടപടി റദ്ദാക്കിയ സിഗിള്‍ ബെഞ്ച് ഉത്തരവിനെതിരായ പഞ്ചായത്തിന്‍റെയും പൗരസമിതിയുടെയും അടക്കമുള്ള അപ്പീലുകള്‍ പരിഗണികക്കവേയാണ് ഉരുള്‍പൊട്ടലില്‍ കേസെടുക്കാന്‍ നിര്‍ദേശിച്ചത്.
മഴയെയും പ്രകൃതിയെയും പിടിച്ചുനിര്‍ത്താന്‍ മനുഷ്യനു കഴിയില്ല. മൈനിംഗ്, പ്രളയം അടക്കമുള്ള കാര്യങ്ങള്‍ നിയന്ത്രിക്കാന്‍ നിയമപരമായി എന്തെല്ലാം ചെയ്യാന്‍ കഴിയുമെന്ന് ആലോചിക്കണം. കേരളത്തിന്‍റെ ചില പ്രദേശങ്ങള്‍ പരിസ്ഥിതിലോല മേഖലകളാണ്.
ഇവിടെ സുസ്ഥിര വികസനമടക്കം സാധ്യമാണോയെന്ന കാര്യത്തില്‍ പുനര്‍വിചിന്തനം അനിവാര്യമായ ഘട്ടമാണിതെന്നും ഡിവിഷന്‍ ബെഞ്ച് ഓര്‍മിപ്പിച്ചു.
ഇനിയും പ്രകൃതിദുരന്തങ്ങള്‍ ഉണ്ടാകാതിരിക്കാന്‍ നിയമനിര്‍മാണ സഭയും എക്‌സിക്യൂട്ടീവും ജുഡീഷറിയും കൂട്ടായി ആലോചിച്ചു തീരുമാനമെടുക്കണമെന്നും കോടതി ആവശ്യപ്പെട്ടു. ഹര്‍ജി ഇന്നു വീണ്ടും പരിഗണിക്കും.