ADVERTISEMENT

ADVERTISEMENT

പെരുമ്പാവൂർ ഉപജില്ലാ സ്‌കൂൾ കലോത്സവത്തിന് തുടക്കം

പെരുമ്പാവൂർ : ഉപജില്ലാ സ്‌കൂൾ കലോത്സവത്തിന് വെങ്ങോല ശാലേം സ്‌കൂളിൽ പ്രൗഢോജ്വലമായ തുടക്കം. രചന മത്സരങ്ങളും സ്റ്റേജ് മത്സരങ്ങളും ഒരുപോലെ പെരുമ്പാവൂർ ഉപജില്ല കലോത്സവത്തിന്‍റെ ആദ്യ ദിനത്തിൽ ആരംഭിച്ചു. പെരുമ്പാവൂർ ഉപജില്ലാ വിദ്യാഭ്യാസ ഓഫീസർ ഒ.കെ. ബിജിമോൾ പതാക ഉയർത്തി.

റിസപ്ഷൻ കമ്മിറ്റി കൺവീനർ കെ.എ. നൗഷാദ്, സ്കൂൾ മാനേജർ അനീഷ് ജേക്കബ്, ഗ്രാമ പഞ്ചായത്തംഗം കെ.ഇ. കുഞ്ഞുമുഹമ്മദ്, പബ്ലിസിറ്റി കമ്മിറ്റി കൺവീനർ എം.ഐ. മുഹമ്മദ് റാഫി , ജനറൽ കൺവീനർ പ്രിൻസിപ്പൽ രാജേഷ് മാത്യു, ഹെഡ്മിസ്ട്രസ് പ്രീത മാത്യു, സ്‌കൂൾ ബോർഡ് ചെയർമാൻ എൽദോ കുര്യക്കോസ്, പ്രോഗ്രാം കമ്മിറ്റി കൺവീനർ ആർ. പ്രീത തുടങ്ങിയവർ സംസാരിച്ചു.

കലോത്സവത്തിന്‍റെ ഔപചാരികമായ ഉദ്ഘാടനം ഇന്ന് വൈകിട്ട് മൂന്നിന് ബെന്നി ബെഹനാൻ എംപി നിർവഹിക്കും. എൽദോസ് കുന്നപ്പിള്ളി എംഎൽഎ അധ്യക്ഷത വഹിക്കും. പി.വി. ശ്രീനിജിൻ എംഎൽഎ ലോഗോ പ്രകാശനവും സമ്മാനദാനവും നടത്തും. കലോത്സവം ശനിയാഴ്ച സമാപിക്കും.

ADVERTISEMENT

കേരളത്തില്‍ നടക്കുന്നത് തിരുട്ട് ഗ്രാമത്തെ പോലും നാണിപ്പിക്കുന്ന കളവെന്ന് യുഡിഎഫ് നേതൃയോഗം

കൊച്ചി : തിരുട്ട് ഗ്രാമത്തെ പോലും നാണിപ്പിക്കുന്ന കളവാണ് കേരളത്തില്‍ മുഖ്യമന്ത്രിയും സംഘവും നടത്തുന്നതെന്ന് യുഡിഎഫ് ജില്ലാ നേതൃയോഗം. അയ്യപ്പന്‍റെ സംരക്ഷണത്തിനുവേണ്ടി കൂടി വിശ്വാസികള്‍ വോട്ട് ചെയ്യുന്ന തെരഞ്ഞെടുപ്പുകളാണ് കേരളത്തില്‍ ഇനി നടക്കാന്‍ പോകുന്നതെന്ന് യോഗം ഉദ്ഘാടനം ചെയ്ത കെ ബാബു എംഎല്‍എ പറഞ്ഞു. സ്വര്‍ണം കണ്ടാല്‍ മോഷ്ടിക്കാതിരിക്കാന്‍ സര്‍ക്കാരിനും സിപിഎമ്മുകാര്‍ക്കും കഴിയാത്ത നിലയിലായെന്നും അദ്ദേഹം പറഞ്ഞു. ജില്ലാ ചെയര്‍മാന്‍ ഡൊമിനിക് പ്രസന്‍റേഷന്‍ അധ്യക്ഷനായി. ഈ മാസം 25 നകം യുഡിഎഫ് നിയോജക മണ്ഡലം കണ്‍വന്‍ഷനുകളും 30 നകം മണ്ഡലം കണ്‍വന്‍ഷനുകളും നടത്താന്‍ യോഗം തീരുമാനിച്ചു. തദ്ദേശ തെരഞ്ഞെടുപ്പില്‍ ജില്ലയില്‍ യുഡിഎഫ് വന്‍ വിജയം നേടുമെന്നും യോഗം വിലയിരുത്തി. ഡിസിസി പ്രസിഡന്‍റ് മുഹമ്മദ് ഷിയാസ്, മുസ്ലിം ലീഗ് സംസ്ഥാന ജനറല്‍ സെക്രട്ടറി മുഹമ്മദ് ഷാ, യുഡിഎഫ് ജില്ലാ കണ്‍വീനര്‍ ഷിബു തെക്കുംപുറം, കേരള കോണ്‍ഗ്രസ് വര്‍ക്കിംഗ് ചെയര്‍മാന്‍ പി.സി.തോമസ്, കെപിസിസി ജനറല്‍ സെക്രട്ടറി വി.പി.സജീന്ദ്രന്‍, ഡെപ്യൂട്ടി ചെയര്‍മാന്‍ ടി.യു.കുരുവിള, എൻ.വേണുഗോപാല്‍ എന്നിവര്‍ പ്രസംഗിച്ചു.

കാപ്പചുമത്തി ജയിലിലടച്ചു

പെരുമ്പാവൂർ: വധശ്രമക്കേസ് പ്രതിയെ കാപ്പചുമത്തി ജയിലിലടച്ചു. കൊമ്പനാട് മേയ്ക്കപ്പാല പ്ലാച്ചേരി വീട്ടിൽ അജിത്ത്(32)നെയാണ് കാപ്പ ചുമത്തി വിയ്യൂർ സെൻട്രൽ ജയിലിലടച്ചത്. കുറുപ്പംപടി, കോടനാട്, കോതമംഗലം പോലീസ് സ്റ്റേഷൻ പരിധിയിൽ കൊലപാതകശ്രമം, ദേഹോപദ്രവം, സ്ത്രീകൾക്കെതിരെയുള്ള കുറ്റകൃത്യങ്ങൾ തുടങ്ങി നിരവധി കേസുകളിൽ പ്രതിയാണ് ഇയാൾ. സെപ്റ്റംബറിൽ കോതമംഗലത്തുവച്ച് ജിജോ ആന്‍റണിയെ സംഘം ചേർന്ന് കൊലപ്പെടുത്താൻ ശ്രമിച്ച കേസിൽ പ്രതിയായതിനെ തുടർന്നാണ് നടപടി. റൂറൽ എസ്പി എം. ഹേമലതയുടെ റിപ്പോർട്ടിന്‍റെ അടിസ്ഥാനത്തിൽ ജില്ലാ കളക്‌ടർ ജി. പ്രിയങ്കയാണ് ഉത്തരവിട്ടത്. കുറുപ്പംപടി സിഐ ടി.എൽ. സ്റ്റെപ്റ്റോ ജോൺ, കോടനാട് എസ്ഐ കെ. ഉണ്ണികൃഷ്ണൻ, എഎസ്ഐ സി.എം. ഷാജി, സീനിയർ സിപിഒ ശ്രീജിത്ത് രവി, അരുൺ കെ. കരുണൻ, സിപിഒ ഗിരീഷ് രാജു എന്നിവരടങ്ങുന്ന സംഘമാണ് അറസ്റ്റ് ചെയ്തത്.

മെമ്മറി കാര്‍ഡ് വിവാദം: അമ്മയില്‍ തെളിവെടുപ്പ്

കൊച്ചി: താരസംഘടന അമ്മയിലെ മെമ്മറി കാര്‍ഡ് വിവാദത്തില്‍ തെളിവെടുപ്പുമായി കമ്മീഷന്‍. അമ്മ പ്രസിഡന്‍റ് ശ്വേതാമേനോന്‍ ഉള്‍പ്പെടുന്ന അഞ്ചംഗ സമിതിയാണ് പരാതി ഉന്നയിച്ചവരില്‍ നിന്നും സംഘടനാ മുന്‍ഭാരവാഹികളില്‍ നിന്നും വിവരങ്ങള്‍ ശേഖരിക്കുന്നത്. രണ്ടുദിവസമായി കലൂരിലെ അമ്മ ഓഫീസില്‍ നടക്കുന്ന തെളിവെടുപ്പ് ഇന്ന് പൂര്‍ത്തിയാകും. രണ്ടു മാസത്തിനുള്ളില്‍ കമ്മീഷന്‍ റിപ്പോര്‍ട്ട് ജനറല്‍ബോഡിക്ക് മുമ്പാകെ സമര്‍പ്പിക്കും. നിയമപരമായ നടപടി സ്വീകരിക്കേണ്ട സാഹചര്യം ഉണ്ടായാല്‍ അത്തരത്തില്‍ നീങ്ങാനുമാണ് നിലവിലെ നീക്കം. നടന്‍ മോഹന്‍ലാലില്‍ നിന്നടക്കം സമിതി വിവരങ്ങള്‍ തേടിയതായാണ് സൂചന. അമ്മ എക്‌സിക്യൂട്ടീവ് അംഗം ജോയ് മാത്യു, ദേവന്‍, ശ്രീലത നമ്പൂതിരി, ശ്രീലത പരമേശ്വരന്‍ എന്നിവര്‍ ഉള്‍പ്പെടെയുള്ള അഞ്ചംഗ സമിതിയാണ് മൊഴിയെടുക്കുന്നത്. മീടു ആരോപണത്തിന്‍റെ പശ്ചാത്തലത്തില്‍ മലയാള സിനിമയിലെ നടിമാര്‍ നേരിട്ട ലൈംഗീകാതിക്രമങ്ങളെക്കുറിച്ച് തുറന്നുപറയാന്‍ നടി കുക്കു പരമേശ്വരന്‍ വിളിച്ച യോഗത്തില്‍ നടിമാരുടെ അനുഭവങ്ങള്‍ പകര്‍ത്തിയ മെമ്മറി കാര്‍ഡ് സംബന്ധിച്ചാണ് പരാതികള്‍ ഉയര്‍ന്നത്. 14 താരങ്ങളാണ് ഇതുസംബന്ധിച്ച് പരാതികള്‍ ഉന്നയിച്ചത്. ഇവരെ വിളിച്ചു വരുത്തിയാണ് മൊഴി രേഖപ്പെടുത്തുന്നത്. മെമ്മറി കാര്‍ഡിലെ ചില സംഭാഷണങ്ങള്‍ കഴിഞ്ഞയിടെ പുറത്തുവന്നിരുന്നു. ഇതോടെയാണ് അന്ന് യോഗത്തില്‍ പങ്കെടുത്തവര്‍ ആരോപണവുമായി രംഗത്തെത്തിയത്. മെമ്മറി കാര്‍ഡ് ദുരുപയോഗം ചെയ്‌തോ എന്നതില്‍ ആശങ്കയുണ്ടെന്ന് നടി പൊന്നമ്മ ബാബു ഉള്‍പ്പെടെയുള്ള പറഞ്ഞിരുന്നു. അമ്മ സംഘടന തെരഞ്ഞെടുപ്പില്‍ കുക്കു പരമേശ്വന്‍ മത്സരരംഗത്തേക്ക് എത്തിയതോടെ ആരോപണം വീണ്ടും കടുത്തു. തെരഞ്ഞെടുപ്പിന് പിന്നാലെ പുതിയ ഭരണസമിതി വന്നതോടെ മെമ്മറി കാര്‍ഡ് വിവാദത്തില്‍ അന്വേഷണ കമ്മിറ്റി രൂപീകരിക്കുകയായിരുന്നു. പരാതിയുമായി രംഗത്തെത്തിയ നടി ഉഷ ഹസീന അടക്കമുള്ളവര്‍ മുഖ്യമന്ത്രി, ഡിജിപി, വനിതാ കമ്മീഷന്‍ എന്നിവിടങ്ങളിലും അമ്മയിലും പരാതി നല്‍കിയിരുന്നു.

പീഡനം: ആണ്‍സുഹൃത്ത് അറസ്റ്റില്‍

കൊച്ചി: യുവതിയെ പീഡിപ്പിച്ച ആണ്‍സുഹൃത്തിനെ പാലാരിവട്ടം പോലീസ് അറസ്റ്റ് ചെയ്തു. ഇടുക്കി മുരിക്കാശേരി സ്വദേശി അനന്തു(20)വിനെയാണ് അറസ്റ്റ് ചെയ്തത്. പീഡന സമയത്ത് ഇയാള്‍ക്കൊപ്പം ഉണ്ടായിരുന്ന മറ്റൊരു സുഹൃത്തിനെ കണ്ടെത്താനായി പോലീസ് അന്വേഷണം ആരംഭിച്ചു. 19കാരിയായ യുവതി അനന്തു അടക്കം രണ്ട് ആൺ സുഹൃത്തുക്കള്‍ക്കൊപ്പമാണ് പാലാരിവട്ടത്തെ അപ്പാര്‍ട്ടുമെന്‍റില്‍ താമസിച്ചിരുന്നത്. കഴിഞ്ഞ സെപ്റ്റംബര്‍ 27ന് അനന്തു മറ്റൊരു സുഹൃത്തിന്‍റെ സാന്നിധ്യത്തില്‍ യുവതിയെ ലൈംഗികമായി പീഡിപ്പിച്ചെന്നാണ് പരാതി. കൂടെയുണ്ടായിരുന്ന സുഹൃത്ത് യുവതിയെ മര്‍ദിച്ചതായും പരാതിയിൽ പറയുന്നു. തുടര്‍ന്ന് നാട്ടിലേക്കു പോയ യുവതി തിരിച്ചെത്തി കഴിഞ്ഞ ദിവസമാണ് പോലീസില്‍ പരാതി നല്‍കിയത്. പ്രതിയെ ചോദ്യം ചെയ്യലിനു ശേഷം കോടതിയില്‍ ഹാജരാക്കുമെന്ന് പാലാരിവട്ടം പോലീസ് പറഞ്ഞു.

ചെല്ലാനത്ത് ‘മത്തി ചാകര‌’

കുട്ട കിട്ടാനില്ലെന്ന് മത്സ്യത്തൊഴിലാളികൾ ഫോർട്ടുകൊച്ചി: ചെല്ലാനം ഹാർബറിൽ മത്തി ചാകര. ടൺകണക്കിന് മത്തിയാണ് ഈ ദിവസങ്ങളിൽ ചാകരയായി ലഭിച്ചത്. 10 സെന്‍റീമീറ്റർ നീളമുള്ള ചാളയാണ് ലഭിക്കുന്നത്. മത്സ്യലഭ്യത വർധിച്ചതോടെ നിറയ്ക്കാനുള്ള പ്ലാസ്റ്റിക് കുട്ട ലഭിക്കാത്തതിനാൽ ഹാർബറിൽ മണിക്കൂറോളം സ്തംഭനത്തിലുമായി. 40 കിലോഗ്രാം തൂക്കം ഭാരമുള്ള കുട്ടകളിലാണ് ബോട്ടിലിൽനിന്നും മത്തി ഹാർബറിൽ നിരത്തുന്നത്. ഒരുകിലോഗ്രാം 25 രൂപയ്ക്കാണ് കച്ചവടം ഉറപ്പിക്കുന്നത്. ഒക്ടോബർ മുതൽ ഡിസംബർ വരെയുള്ള തുലാവർഷത്തിലാണ് മത്സ്യ ചാകര വരുന്നത്. ആവശ്യത്തിലേറെ മത്തി കിട്ടുന്നതിനാൽ മത്സ്യം പൊടിക്കാനായി കൊണ്ടുപോകാറുണ്ടെന്ന് മത്സ്യത്തൊഴിലാളികൾ പറഞ്ഞു. ഹാർബർ സജീവമായതോടെ വാഹനങ്ങളുടെ വരവും കൂടിയിട്ടുണ്ട്. റോഡ് പൊട്ടിപ്പൊളിഞ്ഞ് വലിയ ഗർത്തങ്ങൾ രൂപപ്പെട്ടിരിക്കുന്നതിനാൽ യാത്രാക്ലേശവും രൂക്ഷമാണ്. ഹാർബറിലേക്കുള്ള റോഡ് അടിയന്തരമായി നന്നാക്കി മത്സ്യത്തൊഴിലാളികൾക്ക് കച്ചവടം നടത്താനുള്ള അവസരം ഉണ്ടാക്കി തരണമെന്ന് മത്സ്യത്തൊഴിലാളിയായ ഒ.എഫ്. സെബാസ്റ്റ്യൻ പറഞ്ഞു.

മദ്യലഹരിയില്‍ ഡ്രൈവിംഗ് : മറ്റു വാഹനങ്ങളിൽ ഇടിച്ച ആഡംബര കാർ പിടികൂടി

കൊച്ചി: മദ്യലഹരിയില്‍ യുവാവ് ഓടിച്ച ആഡംബര കാര്‍ വഴിയരികില്‍ നിര്‍ത്തിയിട്ടിരുന്ന കാറുകള്‍ ഇടിച്ചുതെറിപ്പിച്ചു. അപകടത്തിനു ശേഷവും യാത്രതുടർന്ന യുവാവിനെ പോലീസ് പിന്‍തുടര്‍ന്ന് പിടികൂടി. എറണാകുളം രവിപുരത്ത് ഞായറാഴ്ച രാത്രിയോടെയായിരുന്നു സംഭവം. മദ്യലഹരിയില്‍ കൊട്ടാരക്കര സ്വദേശി നിജീഷ് ഓടിച്ച ആഡംബര കാറാണ് അപകടത്തിനു വഴിവച്ചത്. അപകടത്തില്‍ ആളപായമില്ല. നിജീഷിന്‍റെ വാഹനം മറ്റൊരു വാഹനത്തെ മറികടക്കുന്നതിനിടെ റോഡരികിൽ നിർത്തിയിട്ടിരുന്ന കാറുകള്‍ക്കു പിന്നില്‍ ഇടിക്കുകയായിരുന്നു. അപകടത്തിൽ ടയറടക്കം തകര്‍ന്നിട്ടും നിജീഷ് നിര്‍ത്താതെ മുന്നോട്ടുപോയി. അപകടത്തില്‍പ്പെട്ട വാഹനത്തിന്‍റെ ആളുകളും പോലീസും പിന്നാലെയെത്തിയാണ് ഇയാളെ പിടികൂടിയത്. സൗത്ത് പോലീസ് അറസ്റ്റ് ചെയ്ത നിജീഷിനെ പിന്നീട് ജാമ്യത്തില്‍ വിട്ടയച്ചു. സംഭവത്തിന്‍റെ സിസി ടിവി ദൃശ്യങ്ങള്‍ പുറത്തുവന്നിരുന്നു.

ഉയരാന്‍ ഒരുങ്ങി : ഇടപ്പള്ളി-അരൂര്‍ എലിവേറ്റഡ് ഹൈവേ

കൊച്ചി: പലവിധ കാരണങ്ങളാല്‍ തടസങ്ങളില്‍ കുടുങ്ങിയ ഇടപ്പള്ളി-അരൂര്‍ എലിവേറ്റഡ് ഹൈവേയുടെ പുതുക്കിയ അലൈന്‍മെന്‍റിന് അംഗീകാരം ലഭിച്ചതോടെ നിര്‍മാണ പ്രവര്‍ത്തനങ്ങളുടെ സുപ്രധാന ഘട്ടങ്ങളിലേക്ക് കടക്കാനൊരുങ്ങി ദേശീയപാത അഥോറിറ്റി. വിശദമായ പദ്ധതി രേഖ (ഡിപിആര്‍) തയാറാക്കുന്നതിനായി ടെണ്ടര്‍ ക്ഷണിച്ചിരിക്കുകയാണ്. ഈ മാസം അവസാനത്തോടെ കണ്‍സള്‍ട്ടന്‍റിനെ കണ്ടെത്തും. ആറ് മാസത്തിനുള്ളില്‍ ഡിപിആര്‍ തയാറാക്കി മൂന്നര വര്‍ഷംകൊണ്ട് നിര്‍മാണം പൂര്‍ത്തീകരിക്കാനാണ് ലക്ഷ്യമിടുന്നതെന്നും ദേശീപാത അഥോറിറ്റിയിലെ മുതിര്‍ന്ന ഉദ്യോഗസ്ഥന്‍ പറഞ്ഞു. ഇടപ്പള്ളി ഒബ്‌റോണ്‍ മാളിനു മുന്നില്‍ നിന്ന് തുടങ്ങി അരൂര്‍ വരെ 14.64 കിലോമീറ്റര്‍ ആകാശപാതയാണ് നിര്‍മിക്കുന്നത്. 45 മീറ്ററില്‍ ആറുവരിയാകും വീതി. നിലവില്‍ മേല്‍പ്പാലങ്ങളുള്ള വൈറ്റില, കുണ്ടന്നൂര്‍ ജംഗ്ഷനുകളില്‍ നിലവിലുള്ള പാലത്തിന് സമാന്തരമായി വരുന്നതിനാല്‍ വീതി ഇത്ര ഉണ്ടായേക്കില്ല. പാലാരിവട്ടം പൈപ്പ് ലൈന്‍ ജംഗ്ഷനില്‍ നിലവിലുള്ള മേല്‍പ്പാലത്തിനും മുകളിലൂടെ 32 മീറ്റര്‍ ഉയരത്തിലാകും ആകാശപാതയുടെ അലൈന്‍മെന്‍റ്. ഈ ഭാഗത്ത് കാക്കനാട്ടേക്കുള്ള പിങ്ക് മെട്രോ ലൈന്‍ കടന്നുപോകുന്നത് ആദ്യ അലൈന്‍മെന്‍റില്‍ ഉണ്ടായിരുന്നില്ല. മെട്രോ പാതകൂടി കണക്കിലെടുത്തുള്ള പുതിയ അലൈന്‍മെന്‍റ് പ്രകാരമാണ് നിര്‍മാണം. സംസ്ഥാനത്തെ ഏറ്റവും കൂടുതല്‍ തിരക്കുള്ള ബൈപ്പാസുകളിലൊന്നാണ് അരൂര്‍-ഇടപ്പള്ളി ഇടനാഴി. പ്രതിദിനം ഒരു ലക്ഷത്തിലേറെ വാഹനങ്ങള്‍ ഇതുവഴി കടന്നുപോകുന്നതായാണ് കണക്ക്. അടുത്ത വര്‍ഷം പകുതിയോടെ തുറവൂര്‍-അരൂര്‍ എലിവേറ്റഡ് ഹൈവേ പൂര്‍ത്തീകരിക്കുമ്പോള്‍ ബൈപ്പാസിലൂടെയുള്ള വാഹനഗതാഗതം ഇതിലും കൂടും. അതുകൂടി കണക്കിലെടുത്താണ് 45 മീറ്റര്‍ വീതിയില്‍ ബൈപ്പാസില്‍ ആകാശപാത വിഭാവനം ചെയ്തത്. എലിവേറ്റഡ് ഹൈവേ പൂര്‍ത്തിയാകുന്നതോടൊപ്പം ഇടപ്പള്ളി ജംഗ്ഷനിലെ ഗതാഗതക്കുരുക്ക് ഒഴിവാക്കാനുള്ള ക്രമീകരണങ്ങളും നടക്കുകയാണ്. ഇതിന്‍റെ ഭാഗമായി ആകാശപാത ആരംഭിക്കുന്നതിനു തൊട്ടുമുന്നിലായി കുരുശുപള്ളിക്ക് എതിര്‍വശം അണ്ടര്‍ പാസിന്‍റെ നിര്‍മാണങ്ങള്‍ നടന്നുവരുന്നുണ്ട്. ഇടപ്പള്ളി ജംഗ്ഷനില്‍ നിന്ന് ചേരാനെല്ലൂര്‍ ഭാഗത്തേക്ക് തിരിയേണ്ട വാഹനങ്ങള്‍ ദേശീയപാത 544 ല്‍ നിന്ന് ഇടത്തേക്ക് തിരിഞ്ഞ് സര്‍വീസ് റോഡിലൂടെ പുതുതായി നിര്‍മിക്കുന്ന അടിപ്പാതവഴി യൂടേണ്‍ എടുത്ത് എന്‍എച്ച് 66 ല്‍ പ്രവേശിക്കാം. അങ്ങനെ ജംഗ്ഷനിലെ സിഗ്നല്‍ പൂര്‍ണമായും ഒഴിവാക്കി ആകാശപാതയിലൂടെ വരുന്ന വാഹനങ്ങള്‍ക്ക് എന്‍എച്ച് 66 ലേക്കും എന്‍എച്ച് 544 ലേക്കും തടസമില്ലാതെ പ്രവേശിക്കാന്‍ കഴിയുന്ന വിധമാണ് ഇവിടെ ക്രമീകരണങ്ങള്‍ ഒരുക്കുന്നത്.

ഓൺലൈൻ തട്ടിപ്പ് : വാഴക്കാല സ്വദേശിക്ക് 80.78 ലക്ഷം നഷ്ടമായി

തൃക്കാക്കര: ഓൺലൈൻ ട്രേഡിംഗിലൂടെ അധിക വരുമാനം വാഗ്ദാനം ചെയ്ത് 80.78 ലക്ഷം തട്ടിയെടുത്ത സംഭവത്തിൽ തൃക്കാക്കര പോലീസ് കേസെടുത്തു. വാഴക്കാല സ്വദേശി എം.ജെ. ജോസിന്‍റെ പരാതിയിലാണ് കേസെടുത്തത്. പരാതിക്കാരന്‍റെയും ഭാര്യയുടെയും അക്കൗണ്ടുകളിൽ നിന്നും 80,78,000 രൂപ പ്രതികൾ ആവശ്യപ്പെട്ട ഏഴ് ബാങ്ക് അക്കൗണ്ടുകളിലേക്ക് ട്രാൻസ്ഫർ ചെയ്യുകയായിരുന്നു. 17 തവണകളായാണ് ട്രാൻസ്ഫർ ചെയ്തത്. പിന്നീട് ലാഭവിഹിതമെന്ന വ്യാജേന നാലുലക്ഷം രൂപ പരാതിക്കാരന്‍റെ ഭാര്യയുടെ അക്കൗണ്ടിലേക്ക് തിരികെ നൽകി. പിന്നീട് ലാഭവിഹിതവും പണവും കിട്ടാതായതോടെയാണ് പരാതിക്കാരൻ പോലീസിനെ സമീപിക്കുകയായിരുന്നു. മുളവുകാട് വീട്ടമ്മയ്ക്ക് നഷ്ടപ്പെട്ടത് ആറുലക്ഷം വൈപ്പിൻ: ഓൺലൈൻ ട്രേഡിംഗ് തട്ടിപ്പിൽ മുളവുകാട് പൊന്നാരിമംഗലം സ്വദേശിയായ വീട്ടമ്മയ്ക്ക് നഷ്ടമായത് 6,11,000 രൂപ. സമൂഹ മാധ്യമത്തിലൂടെ പരിചയപ്പെട്ട യുപി സ്വദേശിയായ ഗൗതം അഗർവാൾ എന്നയാളാണ് വീട്ടമ്മയെ കബളിപ്പിച്ചു ലക്ഷങ്ങൾ കവർന്നത്. സംഭവത്തിൽ വീട്ടമ്മ മുളകാട് പോലീസിൽ പരാതി നൽകി. ഫിൻ വേവ്സ് സെക്യൂരിറ്റീസ് എന്ന് ട്രേഡിംഗ് സ്ഥാപനത്തിന്‍റെ പ്രതിനിധിയാണെന്ന് പറഞ്ഞാണ് ഇയാൾ വീട്ടമ്മയെ കബളിപ്പിച്ചത്. സ്ഥാപനത്തിൽ പണം നിക്ഷേപിക്കുകയാണെങ്കിൽ വലിയ ലാഭ വിഹിതം ലഭിക്കുമെന്ന് പറഞ്ഞ് വീട്ടമ്മയെ പ്രലോഭിപ്പിച്ചു. തുടർന്ന് സമൂഹ മാധ്യമം വഴി ഇയാൾ അറിയിച്ച വിവിധ അക്കൗണ്ടുകളിലേക്ക് കഴിഞ്ഞ ജൂൺ മുതൽ സെപ്റ്റംബർ വരെയുള്ള കാലയളവിൽ 16 തവണകളായാണ് പണം അയച്ചത്. എന്നാൽ പറഞ്ഞതുപോലെ ലാഭവിഹിതമോ മുതലോ ലഭിക്കാതെ വന്നതോടെയാണ് വീട്ടമ്മ പോലീസിൽ പരാതി നൽകിയത്. തട്ടിപ്പുകാരനായ യുപി സ്വദേശിക്കെതിരെ കേസ് രജിസ്റ്റർ ചെയ്ത് അന്വേഷണം ആരംഭിച്ചു.

140.03 ഗ്രാം ചരസുമായി യുവാവ് അറസ്റ്റിൽ

കൊച്ചി: നഗരത്തിൽ വൻ ലഹരിമരുന്നു വേട്ട. വില്പനയ്ക്കെത്തിച്ച 140.03 ഗ്രാം ചരസുമായി യുവാവ് അറസ്റ്റിൽ. എറണാകുളം പച്ചാളം മുക്കുപറമ്പിൽ മാവേലി ഹൗസിൽ അർഫീൻ വിൻസെന്‍റി (20) നെയാണ് ഡാൻസാഫ് സംഘം അറസ്റ്റ് ചെയ്തത്. ഹിമാചൽ പ്രദേശിൽ നിന്നും ചരസ് കൊണ്ടുവന്ന് ഇയാൾ എറണാകുളത്ത് യുവാക്കൾക്കിടയിൽ കച്ചവടം ചെയ്യുന്നതിനിടെയാണ് പോലീസ് പിടികൂടിയത്. പ്രതിയുടെ രാസ ലഹരി വില്പനയിലെ കൂട്ടാളികളെക്കുറിച്ച് പോലീസ് അന്വേഷണം ആരംഭിച്ചു.

തദ്ദേശ തെരഞ്ഞെടുപ്പ് : സീറ്റ് കിട്ടുമോ, സീറ്റ്...

പശ്ചിമകൊച്ചിയിൽ പുരുഷന്മാരുടെ നെട്ടോട്ടം ഫോർട്ടുകൊച്ചി: തദ്ദേശ സ്വയം ഭരണ തെരഞ്ഞെടുപ്പിൽ കൊച്ചി നഗരസഭയിലെ പശ്ചിമകൊച്ചി മേഖലയിലെ ഭൂരിഭാഗം ഡിവിഷനുകളും സ്ത്രീ സംവരണമായതോടെ സീറ്റില്ലാതെ വലയുകയാണ് പുരുഷന്‍മാര്‍. കൊച്ചി നഗരസഭയിലെ 76 ൽ 30 ഡിവിഷനുകളുള്ള പശ്ചിമ കൊച്ചിയിൽ 18 ഡിവിഷനുകൾ സ്ത്രീ സംവരണത്തിലാണ് . അതിലൊന്ന് പട്ടികജാതി സ്ത്രീ സംവരണവും.12 സീറ്റുകളാണ് ജനറൽ വിഭാഗത്തിലുള്ളത്. ഇത് മുന്നണി നേതൃത്വത്തെ ആശങ്കയിലാക്കിയിരിക്കുകയാണ്. നഗരസഭയിലെ 30 ഡിവിഷനുകളും ചെല്ലാനം , കുമ്പളങ്ങി ഗ്രാമപഞ്ചായത്തുകളും പശ്ചിമ കൊച്ചിയുടെ ഭാഗമാണ്.നിലവിൽ പശ്ചിമ കൊച്ചിയിൽ നഗരസഭ സീറ്റ് സംവരണത്തിൽ 60 ശതമാനവും സ്ത്രീ സംവരണമായി .40 ശതമാനം മാത്രമാണ് ജനറൽ സീറ്റായുള്ളത്. പശ്ചിമ കൊച്ചിയിൽ നിലവിലുള്ള നഗരസഭ കൗൺസിലിലെ സ്ഥിരം സമിതി അധ്യക്ഷന്‍ ടി.കെ അഷറഫ് മത്സരിച്ച രണ്ടാം ഡിവിഷന്‍ വനിതാ സംവരണമായി. നേരത്തേ മത്സരിച്ചിരുന്ന അഞ്ചാം ഡിവിഷന്‍ ഇല്ലാതായി. ഇതോടെ പള്ളുരുത്തിയിലെ തഴുപ്പ് ഡിവിഷനില്‍ മത്സരിക്കുമെന്നാണ് സൂചന. മറ്റൊരു സ്ഥിരം സമിതി അധ്യക്ഷനായ വി.എ ശ്രീജിത്തിന്‍റെ ഡിവിഷനും വനിതാ സംവരണമായി. ശ്രീജിത്ത് സമീപത്തെ മറ്റൊരു ജനറല്‍ സീറ്റില്‍ ജനവിധി തേടിയേക്കും. ടൗണ്‍ പ്ളാനിംഗ് കമ്മിറ്റി ചെയര്‍മാന്‍ ജെ. സനിൽമോന്‍റെ ഡിവിഷനും സംവരണമായി മാറി. സനില്‍ മോന്‍ ചുള്ളിക്കല്‍, അമരാവതി എന്നീ ഡിവിഷനുകളില്‍ ഏതെങ്കിലും ഒന്നില്‍ ജനവിധി തേടിയേക്കും. പ്രതിപക്ഷ നേതാവ് ആന്‍റണി കുരീത്തറയുടെ ഡിവിഷനും സംവരണമായി.ആന്‍റണി കുരീത്തറയും സമീപത്തെ മറ്റേതെങ്കിലും ജനറല്‍ വാര്‍ഡില്‍ മത്സരിച്ചേക്കുമെന്നാണ് വിവരം. കൗണ്‍സിലര്‍ ബെനഡിക്ട് ഫെർണാണ്ടസ് മൂന്ന് തവണ മത്സരിച്ച് ജയിച്ചയാളാണ്.

ഫയർ ഹൈഡ്രന്‍റുകൾ മൂടപ്പെട്ട നിലയിൽ : കൊച്ചിക്കു തീപിടിച്ചാൽ അണയ്ക്കൽ അസാധ്യം

കൊച്ചി: തീപിടിത്തത്തെ പ്രതിരോധിക്കാന്‍ കൊച്ചി നഗരത്തില്‍ ജലശേഖരണ സംവിധാനം തീരെയില്ല. വിവിധ നിര്‍മാണങ്ങള്‍, റോഡിന്‍റെ വീതിയും ഉയരവും കൂട്ടല്‍, കാന നിര്‍മാണവും പരിഷ്‌കാരങ്ങളും തുടങ്ങി പല കാരണങ്ങളാല്‍ ഫയർ ഹൈഡ്രന്‍റുകളെല്ലാം മൂടപ്പെട്ട നിലയിലാണ്. ഹൈഡ്രന്‍റുകള്‍ കൃത്യമായി പരിപാലിക്കുന്നതിലും അറ്റകുറ്റപ്പണി നടത്തുന്നതിലും വീഴ്ച സംഭവിച്ചതോടെ നഗരത്തിലെവിടെയും ജലശേഖരണത്തിനു സൗകര്യമില്ലാതായ അവസ്ഥയിലുമാണ്. കണ്ണൂര്‍ തളിപ്പറമ്പിലെ തീപിടിത്തത്തിന്‍റെ പശ്ചാത്തലത്തില്‍ കൊച്ചിയില്‍ ചേര്‍ന്ന അഗ്നിശമനസേനാ ഉദ്യോഗസ്ഥരുടെ യോഗത്തിലാണ് ഇതുസംബന്ധിച്ച ചര്‍ച്ചകള്‍ നടന്നത്. കൊച്ചി നഗരത്തില്‍ മാത്രമല്ല, ജില്ലയിയുടെ വിവിധ ഭാഗങ്ങളില്‍ സ്ഥാപിച്ചിട്ടുള്ള ഹൈഡ്രന്‍റുകളുടെയും അവസ്ഥ സമാനമാണെന്ന് ഉദ്യോഗസ്ഥര്‍ പറയുന്നു. നഗരത്തിലെ പ്രധാന മാര്‍ക്കറ്റ് പ്രദേശങ്ങള്‍ക്ക് പുറമേ, മൂവാറ്റുപുഴ, കോതമംഗലം, പെരുമ്പാവൂര്‍, തൃക്കാക്കര എന്നിവിടങ്ങളിലെ മാര്‍ക്കറ്റുകളിലും ഫയര്‍ ഹൈഡ്രന്‍റുകള്‍ ആവശ്യമാണെന്നും കൊച്ചി കോര്‍പറേഷന്‍ പരിധിയിലെ എല്ലാ പ്രധാന സ്ഥലങ്ങളിലും അവ സ്ഥാപിക്കേണ്ടിവരുമെന്നും അഗ്നിശമനസേനാ ഉദ്യോഗസ്ഥര്‍ പറയുന്നു. നിലവിലെ സാഹചര്യം കണക്കിലെടുത്ത് ഫയര്‍ ഹൈഡ്രന്‍റുകള്‍ സ്ഥാപിക്കാനും ജലവിതരണം ഉറപ്പാക്കാനും ആവശ്യപ്പെടുന്ന റിപ്പോര്‍ട്ട് വൈകാതെ അഗ്നിശമനസേന തദ്ദേശസ്വയംഭരണ സ്ഥാപനങ്ങള്‍ക്ക് സമര്‍പ്പിക്കും. ഉണങ്ങിയ പുല്ലുകള്‍ക്ക് തീപിടിക്കുന്നത് ഉള്‍പ്പെടെ ജില്ലയില്‍ പ്രതിവര്‍ഷം 1,000 ത്തിലധികം തീപിടുത്ത സംഭവങ്ങളാണ് റിപ്പോര്‍ട്ട് ചെയ്യപ്പെടുന്നത്. കണ്ണൂരിലെ സംഭവം മുന്നറിയിപ്പായി കണ്ട് സുരക്ഷാ കാര്യങ്ങളില്‍ വേണ്ട മുന്നൊരുക്കം നടത്താനാണ് അധികൃതരുടെ തിരക്കിട്ട നീക്കം. അതേസമയം നഗരത്തില്‍ നിലവിലെ സാഹചര്യത്തില്‍ വെള്ളത്തിനു കുതിപ്പു കുറവായതിനാല്‍ ഫയര്‍ ഹൈഡ്രന്‍റുകള്‍ പ്രായോഗികമല്ലെന്നും പ്രത്യേക പൈപ്‌ലൈന്‍ വേണ്ടിവരുമെന്നുമാണ് ജല അഥോറിറ്റിയുടെ നിലപാട്.

അരിമില്ലിലെ ഫർണസിൽ വീണ് ഇതരസംസ്ഥാന തൊഴിലാളി മരിച്ചു

പെരുമ്പാവൂർ : അരിമില്ലിലെ ഫർണസിൽ വീണ് ഇതരസംസ്ഥാന തൊഴിലാളി മരിച്ചു. ബീഹാർ സ്വദേശി രവി കിഷൻ (20) ആണ് മരിച്ചത്. ഓടയ്ക്കാലി തലപ്പുഞ്ചയിൽ പ്രവർത്തിക്കുന്ന റൈസ് കോ എന്ന കമ്പനിയിൽ ഇന്നലെ ഉച്ചയ്ക്ക് 12.30 യോടെയാണ് സംഭവം. 50 അടിയോളം ഉയരത്തിലുള്ള, ടാങ്കിലാണ് തൊഴിലാളി അകപ്പെട്ടത്. ടാങ്കിന് മുകളിലെ ഷീറ്റ് വൃത്തിയാക്കുന്നതിനിടെ ഷീറ്റ് തകർന്ന് ടാങ്കിലേക്ക് വീഴുകയായിരുന്നു എന്നാണ് വിവരം. പെരുമ്പാവൂരിൽ നിന്നെത്തിയ ഫയർ ഫോഴ്‌സ് സംഘം 15 അടി താഴ്ചയിൽ ഉമിത്തീയിൽ അകപ്പെട്ട, രവി കിഷനെ റോപ്പ് ഉപയോഗിച്ച് പുറത്തെടുത്ത് പെരുമ്പാവൂർ താലൂക്ക് ആശുപത്രിയിൽ എത്തിച്ചെങ്കിലും രക്ഷിക്കാനായില്ല. എഫ്ആർഒമാരായ ശ്രീക്കുട്ടൻ, അഭിലാഷ്, ഉമേഷ്, ധനേഷ്, അരുൺ, എസ്‌ടിഒ ടി.കെ.സുരേഷ് , ടി.കെ. ജയറാം , കെ.എ. ഉബാസ് , അനിൽ കുമാർ, ഗോപകുമാർ എന്നിവരാണ് രക്ഷാപ്രവർത്തനം നടത്തിയത്.

കാർ കെഎസ്ആര്‍ടിസി ബസിലിടിച്ച് ദന്പതികൾക്ക് പരിക്ക്

മൂവാറ്റുപുഴ: കാര്‍ കെഎസ്ആര്‍ടിസി ബസിലിടിച്ച് അപകടം. ഇന്നലെ രാവിലെ 11.30 ഓടെ മീങ്കുന്നം സെന്‍റ് ജോസഫ് പള്ളിക്ക് സമീപമുണ്ടായ അപകടത്തില്‍ കാര്‍ യാത്രികരായ ദമ്പതികള്‍ക്ക് പരിക്കേറ്റു. പാലക്കുഴ തടത്തില്‍പുത്തന്‍പുര മത്തായി (60), ഭാര്യ ലിസി മത്തായി (57)എന്നിവര്‍ക്കാണ് പരിക്കേറ്റത്. ഇവരെ മൂവാറ്റുപുഴയിലെ സ്വകാര്യ ആശുപത്രിയില്‍ പ്രവേശിപ്പിച്ചു. മൂവാറ്റുപുഴ നിന്നും കൂത്താട്ടുകുളത്തേക്ക് പോവുകയായിരുന്ന കാര്‍ എതിര്‍ദിശയിലെത്തിയ കെഎസ്ആര്‍ടിസി സ്വിഫ്റ്റ് ബസുമായി ഇടിക്കുകയായിരുന്നു. കെഎസ്ആര്‍ടിസി ബസിൽ 42ഓളം യാത്രക്കാർ ഉണ്ടായിരുന്നു. ഇവർക്ക് പരിക്കില്ല. അപകടത്തെ തുടര്‍ന്ന് മൂവാറ്റുപുഴ കൂത്താട്ടുകുളം എംസി റോഡില്‍ ഗതാഗതം ഭാഗികമായി തടസപ്പെട്ടു. മൂവാറ്റുപുഴ അഗ്നിരക്ഷാ സേനയും, പോലീസും, നാട്ടുകാരും ചേര്‍ന്ന് വാഹനം റോഡില്‍നിന്ന് നീക്കിയതോടെയാണ് ഗതാഗതം പുനഃസ്ഥാപിച്ചത്. വാഹനത്തില്‍ നിന്നും റോഡിലേക്ക് പതിച്ച ഓയിലും ഫയര്‍ഫോഴ്‌സ് അധികൃതര്‍ നീക്കം ചെയ്തു. ഇടിയുടെ ആഘാതത്തില്‍ കാര്‍ പൂര്‍ണമായും തകര്‍ന്നിട്ടുണ്ട്.

അന്തേവാസികൾക്ക് മോട്ടിവേഷനുമായി സബ് ജയിലിൽ സെമിനാർ

ആലുവ : കേരള പ്രിസൺസ് ആൻഡ് കറക്ഷണൽ സർവീസസ് വിഭാഗവും കെസിബിസിയുടെ ജയിൽ മിനിസ്ട്രിയും ചേർന്ന് ആലുവ സബ് ജയിൽ അന്തേവാസികൾക്കായി മോട്ടിവേഷണൽ സെമിനാർ നടത്തി. സബ് ജയിൽ സൂപ്രണ്ട് പി .ആർ . രാജേഷ് ഉദ്ഘാടനം ചെയ്തു. ഫാക്കൽറ്റി അംഗം അഡ്വ. ചാർളി പോൾ ലഹരിയും കുറ്റകൃത്യങ്ങളും എന്ന വിഷയത്തിൽ ആദ്യ സെമിനാർ നയിച്ചു. അസിസ്റ്റന്‍റ് സൂപ്രണ്ട് ഷോൺ വർഗീസ്, സിസ്റ്റർ ഡോളിൻ മരിയ, സിസ്റ്റർ ലീമ സേവ്യർ എന്നിവർ പ്രസംഗിച്ചു. മൂന്ന് മാസം നീണ്ടുനിൽക്കുന്ന പ്രോഗ്രാമിൽ വിദഗ്ധർ ക്ലാസുകൾ നയിക്കും.

കിടപ്പുരോഗികൾക്ക് കട്ടിലുകൾ വാങ്ങാൻ സഹായവുമായി വിദ്യാർഥികൾ

അങ്കമാലി: കിടപ്പു രോഗികൾക്ക് ആവശ്യമായ കട്ടിലുകൾ നൽകുന്നതിനുള്ള സാമ്പത്തിക സഹായം അങ്കമാലി വിശ്വജ്യോതി സ്കൂളിലെ സോഷ്യൽ നേച്ചർ ക്ലബ്, സമരിറ്റൻ ടാസ്ക് ഫോഴ്സ് ഭാരവാഹികളിൽ നിന്ന് മഞ്ഞപ്ര ഗ്രാമപഞ്ചായത്ത് പ്രസിഡന്‍റ് വത്സലകുമാരി വേണുവും കനിവ് ഭാരവാഹികളും ചേർന്ന് ഏറ്റുവാങ്ങി. ചടങ്ങിൽ കനിവ് യൂണിറ്റ് സെക്രട്ടറി എം.പി. തരിയൻ അധ്യക്ഷത വഹിച്ചു. രാജീവ് ഏറ്റിക്കര, അഡ്വ.ബിബിൻ വർഗീസ്, ജോളി പി. ജോസ്, സിസ്റ്റർ ലിൻസി, കെ. ജയലക്ഷ്മി, രാജു അമ്പാട്ട്, സുമലക്ഷ്മി, അഡ്വ. എ.വി. സൈമൺ, കെ.എൻ. പ്രകാശൻ പിള്ള എന്നിവർ പ്രസംഗിച്ചു. വിശ്വജ്യോതി സ്കൂളിലെ സോഷ്യൽ നേച്ചർ ക്ലബ്, സമരിറ്റൻ ടാസ്ക് ഫോഴ്സ് അംഗങ്ങളായ വിദ്യാർഥികൾ വിശിഷ്ടാതിഥികളായി പങ്കെടുത്തു.

കൊയ്ത്തുത്സവത്തിനു തുടക്കമായി

പെരുമ്പാവൂർ: ഒക്കൽ ഗ്രാമപഞ്ചായത്തിലെ ചേലാമറ്റം പാടശേഖരത്തിലെ 80 ഏക്കറോളം വരുന്ന സ്ഥലത്തെ നെൽക്കൃഷി കൊയ്ത്തുത്സവം എൽദോസ് കുന്നപ്പിള്ളി എംഎൽഎ ഉദ്ഘാടനം ചെയ്തു. പാടശേഖരസമിതി പ്രസിഡന്‍റ് സണ്ണി ചുള്ളിയുടെ അധ്യക്ഷതയിൽ ചേർന്ന ചടങ്ങിന് കൂവപ്പടി ബ്ലോക്ക് പഞ്ചായത്ത് മെമ്പർ ടി.ജെ. ബാബു, ഒക്കൽ ഗ്രാമപഞ്ചായത്ത് മെമ്പർ എൻ.ഓ. സൈജൻ, കൃഷി ഓഫീസർ പി.പി. ഹുസൈൻ, പാടശേഖരസമിതി ട്രഷറർ ജോബി പത്രോസ് മറ്റ് കർഷകർ തുടങ്ങിയവർ പങ്കെടുത്തു.

ടൗൺ ബസ് സ്റ്റാൻഡ് പോസ്റ്റ് ഓഫീസ് പൂട്ടുന്നു

ആലുവ: ആലുവ റെയിൽവേ സ്റ്റേഷനിലെ തപാൽ സംവിധാനം അടച്ചുപൂട്ടിയതിന് പിന്നാലെ ടൗൺ ബസ് സ്റ്റാൻഡ് പോസ്റ്റ് ഓഫീസും അടയ്ക്കാൻ നിർദേശം. 2019 ൽ ജില്ലാ ആശുപത്രി പരിസരത്തേക്ക് മാറ്റിയ പോസ്റ്റ് ഓഫീസ് ഇപ്പോൾ മാഞ്ഞൂരാൻ ബിൽഡിംഗിലാണ് പ്രവർത്തിക്കുന്നത്. വരുമാനം കുറഞ്ഞ പോസ്റ്റോഫീസുകൾ അടച്ചുപൂട്ടാനുള്ള നീക്കത്തിൻറെ ഭാഗമായാണ് തപാൽ ഓഫീസുകളുടെ എണ്ണം കുറയ്ക്കുന്നത്. സാധാരണക്കാരായ ജനങ്ങൾക്ക് ലഭിച്ചുകൊണ്ടിരിക്കുന്ന പോസ്റ്റോഫീസ് സേവനങ്ങൾ നിരാകരിക്കുന്ന, ഈ ഉത്തരവ് പിൻവലിച്ച്, ആലുവ ടൗൺ ബസ് സ്റ്റാൻഡ് പോസ്റ്റ് ഓഫീസ് നിലനിർത്തണമെന്ന് അൻവർ സാദത്ത് എംഎൽഎ കേന്ദ്ര പോസ്റ്റൽ വകുപ്പു മന്ത്രി ജ്യോതിരാദിത്യ സിന്ധ്യക്ക് കത്തെഴുതി ആവശ്യപ്പെട്ടു.

മാര്‍ത്തോമ്മ ഭവന്‍ സംരക്ഷണ കൂട്ടായ്മ ഇന്ന്

കൊച്ചി: കളമശേരി മാര്‍ത്തോമ്മ ഭവനിലെ പത്തോളം കന്യാസ്ത്രീകള്‍ക്ക് സഞ്ചാരസ്വാതന്ത്ര്യവും സുരക്ഷിതത്വവും ഉറപ്പു വരുത്തണമെന്ന് ആവശ്യപ്പെട്ട് ക്രൈസ്തവ സഭകളുടെ കൂട്ടായ്മയായ ആക്ട്‌സിന്‍റെ ആഭിമുഖ്യത്തില്‍ എറണാകുളത്ത് മാര്‍ത്തോമ്മ ഭവന്‍ സംരക്ഷണ കൂട്ടായ്മ നടത്തുന്നു. ഇന്ന് രാവിലെ 10 ന് കണയന്നൂര്‍ താലൂക്ക് ഓഫീസിന് മുമ്പില്‍ നടക്കുന്ന കൂട്ടായ്മയില്‍, മാത്യൂസ് മാര്‍ അന്തീമോസ് മെത്രാപ്പോലീത്ത, യൂഹാനോന്‍ മാര്‍ പോളികാര്‍പോസ് മെത്രാപ്പോലീത്ത, ബിഷപ് മാത്യൂസ് മാര്‍ സില്‍വാനിയോസ്, ആക്ട്‌സ് പ്രസിഡന്‍റ് ബിഷപ് റവ. ഉമ്മന്‍ ജോര്‍ജ്, കെസിബിസി ഡപ്യൂട്ടി സെക്രട്ടറി റവ.ഡോ. തോമസ് തറയില്‍, മാര്‍ത്തോമാ സഭ വികാരി ജനറല്‍ റവ. ഡോ. സി.എ. വറുഗീസ്, ശാന്തിഗിരി ആശ്രമം ജനറല്‍ സെക്രട്ടറി സ്വാമി ഗുരുരത്‌നം ജ്ഞാന തപസ്വി, സിബിസിഐ ലെയ്റ്റി സെക്രട്ടറി വി. സി. സെബാസ്റ്റ്യന്‍, മലങ്കര ഓര്‍ത്തഡോക്‌സ് സഭാ സെക്രട്ടറി അഡ്വ. ബിജു ഉമ്മന്‍, ഡിസിസി പ്രസിഡന്‍റ് മുഹമ്മദ് ഷിയാസ്, ബിജെപി നേതാവ് എ.എന്‍. രാധാകൃഷ്ണന്‍ തുടങ്ങിയവർ പങ്കെടുക്കും. ഈ നീതി നിഷേധത്തിന് അടിയന്തര പരിഹാരമുണ്ടാകുന്നില്ലെങ്കില്‍ യോജിക്കാവുന്ന പ്രസ്ഥാനങ്ങളുമായി ചേര്‍ന്ന് കേരളപ്പിറവി ദിനമായ നവംബര്‍ ഒന്ന് മുതല്‍ അനിശ്ചിത കാല സമരം ആരംഭിക്കുമെന്ന് ആക്ട്‌സ് ജനറല്‍ സെക്രട്ടറി ജോര്‍ജ് സെബാസ്റ്റ്യനും സെക്രട്ടറി കുരുവിള മാത്യൂസും പറഞ്ഞു.

അരൂരിൽ രണ്ട് വാഹനങ്ങൾ വഴി മുടക്കി, ഗതാഗതം സ്തംഭിച്ചത് മണിക്കൂറുകൾ

അരൂര്‍: ദേശീയപാതയില്‍ രണ്ട് വാഹനങ്ങള്‍ വഴി മുടക്കിയതിനെ തുടര്‍ന്ന് അരൂരില്‍ വന്‍ ഗതാഗതക്കുരുക്ക്. ഇന്നലെ പുലര്‍ച്ചെ അഞ്ചിന് ചേര്‍ത്തല ഭാഗത്തേക്ക് പോകുകയായിരുന്ന ചരക്ക് ലോറി അരൂര്‍ക്ഷേത്രം ജംഗ്ഷനില്‍ ആക്‌സില്‍ ഒടിഞ്ഞ് ഗതാഗതതടസം ഉണ്ടായതിനു പിന്നാലെ തോപ്പുംപടിയില്‍ നിന്നും ചേര്‍ത്തലയ്ക്ക് പോകുന്ന കെഎസ്ആര്‍ടിസി ബസ് ലോറിയുടെ തൊട്ടുമുന്നില്‍ ബ്രേക്ക് ഡൗണും ആയതോടെ ഗതാഗതക്കുരുക്ക് രൂക്ഷമായി. ക്ഷേത്രം ജംഗ്ഷനില്‍ നിന്നും തെക്കോട്ട് പോകേണ്ട വാഹനങ്ങള്‍ അരൂര്‍ ബൈപ്പാസ് മുതല്‍ ഗതാഗതക്കുരുക്കില്‍പ്പെട്ടു. 10.30 ഓടെ ഗതാഗതക്കുരുക്ക് ഭാഗികമായി പരിഹരിച്ചു.

കെസിവൈഎം കലോത്സവം : എറണാകുളം ഫൊറോനയ്ക്ക് ഓവറോൾ കിരീടം

കൊച്ചി : കെസിവൈഎം എറണാകുളം-അങ്കമാലി അതിരൂപത സമിതി സംഘടിച്ച കര്‍ദിനാള്‍ മാര്‍ ജോസഫ് പാറേക്കാട്ടില്‍ അനുസ്മരണ കലോല്‍സവം അരങ്ങ് 2025 സമാപിച്ചു. 327 പോയന്‍റുമായി എറണാകുളം ഫൊറോന ഒന്നാം സ്ഥാനം കരസ്ഥമാക്കി. പറവൂര്‍, കാഞ്ഞൂര്‍, മൂഴിക്കുളം ഫൊറോനകള്‍ക്കാണ് യഥാക്രമം രണ്ടും മൂന്നും, നാലും സ്ഥാനങ്ങൾ തൃക്കാക്കര മൈനര്‍ സെമിനാരി റെക്ടര്‍ റവ.ഡോ. മാര്‍ട്ടിന്‍ കല്ലുങ്കല്‍ എറണാകുളം ഫൊറോനയ്ക്ക് ഓവറോള്‍ ട്രോഫി സമ്മാനിച്ചു. കെസിവൈഎം എറണാകുളം-അങ്കമാലി അതിരൂപത വൈസ് പ്രസിഡന്‍റ് മെല്‍വിന്‍ വില്‍സണ്‍ അധ്യക്ഷത വഹിച്ചു. സൂരജ് ജോണ്‍സ് പൗലോസ്, ഫാ.ജിനോ ഭരണികുളങ്ങര, ഫാ. എബിന്‍ ചിറക്കല്‍ എന്നിവര്‍ വിജയികള്‍ക്ക് ട്രോഫികള്‍ വിതരണം ചെയ്തു. ജോസഫ് സാജു, കെ.മാര്‍ട്ടിന്‍, ജിസ്‌മോന്‍ ജോണ്‍, ജോര്‍ജ് മാത്യു, അന്‍മോള്‍ പീറ്റര്‍ എന്നിവര്‍ പ്രസംഗിച്ചു.

സെന്‍റിനറി സ്മാരക ഫുട്ബോൾ: ആലുവയും കോതമംഗലവും ഏറ്റുമുട്ടും

ആലുവ: സെന്‍റ് മേരീസ് ഹൈസ്കൂൾ സെന്‍റിനറി സ്മാരക ഫുട്ബോൾ ടൂർണമെന്‍റിന്‍റെ ഫൈനലിൽ കോതമംഗലം മാർ ബേസിൽ ഹയർ സെക്കൻഡറി സ്കൂളും ആതിഥേയരായ ആലുവ സെൻറ് മേരീസ് ഹൈസ്കൂളും ഏറ്റുമുട്ടും. ഇന്ന് വൈകിട്ട് നാലിനാണ് മത്സരം. മറുപടിയില്ലാത്ത നാല് ഗോളുകൾക്ക് പെരുമ്പാവൂർ ആശ്രമം സ്കൂളിനെ പരാജയപ്പെടുത്തിയാണ് കോതമംഗലം മാർ ബേസിൽ ഹയർ സെക്കൻഡറി സ്‌കൂൾ ഫൈനലിലെത്തിയത്. ഒന്നിനെതിരെ മൂന്നു ഗോളുകൾക്ക് വാഴക്കുളം ഗവ. ഹയർ സെക്കൻഡറി സ്കൂളിനെയാണ് ആലുവ സെന്‍റ് മേരീസ് ഹൈസ്കൂൾ പരാജയപ്പെടുത്തിയത്.

ടർഫ് പദ്ധതി: പ്രതിഷേധത്തെ തുടർന്ന് നിർമാണം നിർത്തിവച്ചു

ആലുവ: ആലുവ മുനിസിപ്പൽ ഗ്രൗണ്ട് ടർഫ് പദ്ധതിയുടെ നിർമാണ പ്രവർത്തികൾ ഒരു സംഘം പ്രഭാത സവാരിക്കാർ തടഞ്ഞു. ഇതേ തുടർന്ന് ഗ്രൗണ്ടിലെ മണ്ണ് ഇളക്കാനെത്തിയ ജെസിബി തിരികെ കൊണ്ടുപോയി. കരാറുകാരൻ രാവിലെ ജെസിബി എത്തിച്ച് മണ്ണ് ഇളക്കുന്നതായി വിവരം ലഭിച്ചതിനെ തുടർന്നാണ് പ്രതിഷേധക്കാരെത്തിയത്. ഇതോടൊപ്പം സിപിഎം പ്രവർത്തകരുമെത്തിയാണ് നിർമാണം തടഞ്ഞത്. സംഭവമറിഞ്ഞ് പോലീസും സ്ഥലത്തെത്തി നിർമാണം താത്കാലികമായി നിർത്തിവയ്പിച്ചു.കഴിഞ്ഞയാഴ്ച നിർമാണോദ്ഘാടന വേദിയിലേക്ക് പ്രതിഷേധക്കാർ മാർച്ച് നടത്തിയത് സംഘർഷത്തിൽ കലാശിച്ചിരുന്നു. കുപ്പിയേറിൽ കോൺഗ്രസ് പ്രവർത്തകന് പരിക്കേറ്റതിനെ തുടർന്ന് പ്രതിഷേധക്കാരിൽ ഒരാൾ റിമാൻഡിലാണ്. ടർഫ് ആക്കിയാൽ ഫുട്ബോൾ ഒഴികെ മറ്റൊരു കായിക വിനോദത്തിനും ഗ്രൗണ്ട് ഉപയോഗിക്കാൻ കഴിയില്ലെന്നും പ്രഭാതസവാരി നിരോധിക്കുമെന്നുമാണ് ആരോപണം.

ഗ്രീന്‍ ഹെല്‍ത്ത് സമ്മിറ്റ് ആൻഡ് എക്‌സ്‌പോ 25ന്

കൊച്ചി: റോട്ടറി ഡിസ്ട്രിക്ട് 3205 കൊച്ചിന്‍ സെന്‍ട്രലിന്‍റെ ഗ്രീന്‍ ഹെല്‍ത്ത് സമ്മിറ്റ് ആൻഡ് എക്‌സ്‌പോ പാലാരിവട്ടം ഹൈവേ ഗാര്‍ഡന്‍ കണ്‍വന്‍ഷന്‍ സെന്‍ററില്‍ 25ന് നടക്കും. വിവിധ മേഖലകളില്‍ നിന്നുള്ള ആരോഗ്യ- ക്ഷേമ പ്രാക്ടീഷണര്‍മാര്‍ പങ്കെടുക്കും. എംഎല്‍എമാരായ ഉമാ തോമസ്, കെ.എന്‍. ഉണ്ണികൃഷ്ണന്‍ റോട്ടറി ജില്ലാ ഗവര്‍ണര്‍ ഡോ. ജി എന്‍ രമേശ് എന്നിവര്‍ ചേര്‍ന്ന് സെമിനാര്‍ ഉദ്ഘാടനം ചെയ്യും. പ്രഫ. ഡോ. ഉഷി മോഹന്‍ദാസ് മുഖ്യപ്രഭാഷണം നടത്തും. കൂടുതല്‍ വിവരങ്ങള്‍ക്ക് 9847062016, 9048099957 എന്നീ നമ്പറുകളില്‍ ബന്ധപ്പെടാവുന്നതാണെന്ന് റോട്ടറി ഡിസ്ട്രിക്ട് ചെയര്‍ പോസിറ്റീവ് ഹെല്‍ത്ത് ഡോ. എ. ശ്രീകുമാര്‍ അറിയിച്ചു.

സെന്‍റ് റീത്താസിന് പിന്തുണയും ഐക്യദാർഢ്യവും പ്രഖ്യാപിച്ചു

ഫോർട്ടുകൊച്ചി: കേരള ലേബർ മൂവ്മെന്‍റ് കൊച്ചി രൂപത പള്ളുരുത്തി സെന്‍റ് റീത്താസ് സ്കൂളിന് ഐക്യദാർഢ്യം പ്രകടിപ്പിച്ച് കോൺവന്‍റ് സന്ദർശിച്ചു. രൂപതാ ഡയറക്ടർ ഫാ. പ്രസാദ് കണ്ടത്തിപ്പറമ്പിലിന്‍റെ നേതൃത്വത്തിലാണ് പ്രവർത്തകർ കോൺവന്‍റിൽ സന്ദർശനം നടത്തിയത്. പ്രസിഡന്‍റ് ആൽബി ഗോൺസാൽവിസ്, ജനറൽ സെക്രട്ടറി റോണി റിബല്ലോ, കോ ഓർഡിനേറ്റർ ഡിക്സൻ മനീക്ക്, വനിത ഫോറം പ്രസിഡന്‍റ് ബെറ്റ്സി ബ്ലെയ്സ്, തോമസ് കുരിശിങ്കൽ, അലക്സ് പനഞ്ചിക്കൽ, ഫ്രാൻസിസ് അത്തിപ്പൊഴി, ജോസഫ് അഴിക്കകം എന്നിവരും കെഎൽഎം സെന്‍റ് ലോറൻസ് യൂണിറ്റ് അംഗങ്ങളും സന്ദർശക സംഘത്തിലുണ്ടായിരുന്നു.

ജനറല്‍ ആശുപത്രിയില്‍ മരുന്നുകള്‍ നല്‍കി

കൊച്ചി: ജീവന്‍ രക്ഷാ ചാരിറ്റി ആന്‍ഡ് സര്‍വീസ് സൊസൈറ്റി എറണാകുളം ജനറല്‍ ആശുപത്രിയില്‍ 229-മത് മരുന്ന് വിതരണം നടത്തി. സൊസൈറ്റി പ്രസിഡന്‍റ് അഡ്വ. ജോര്‍ജ് ജോസഫ് അധ്യക്ഷത വഹിച്ചു. നിര്‍ധനരായ കാന്‍സര്‍ രോഗികള്‍ക്ക് പ്രതിമാസം നല്‍കിവരുന്ന അര ലക്ഷം രൂപയുടെ ജീവന്‍ രക്ഷാ മരുന്നുകള്‍ അഡ്വ. ബെഞ്ചമിന്‍ പോള്‍, സിഐസിസി ജയചന്ദ്രന്‍ എന്നിവര്‍ ചേര്‍ന്നു കാന്‍സര്‍ വിഭാഗം മേധാവി ഡോ. ബാലമുരളി കൃഷ്ണയ്ക്ക് കൈമാറി. ഡോ. പി.എസ്. രഘുത്തമന്‍, പി.എസ്. അരവിന്ദാക്ഷന്‍ നായര്‍, എ.എല്‍. തോമസ് എന്നിവര്‍ പ്രസംഗിച്ചു.

മുടക്കുഴയിൽ വൈസ് പ്രസിഡന്‍റ് അവിശ്വാസത്തിൽ പുറത്ത്

പെരുമ്പാവൂർ : മുടക്കുഴ ഗ്രാമ പഞ്ചായത്ത് വൈസ് പ്രസിഡന്‍റ് രജിത ജെയ്മോനെതിരെ ഭരണകക്ഷിയായ യുഡിഎഫിലെ ചില അംഗങ്ങളും സിപിഎമ്മും ചേർന്ന് അവതരിപ്പിച്ച അവിശ്വാസം പാസായി. യുഡിഎഫ് അംഗം ഡോളി ബാബു അവതരിപ്പിച്ച അവിശ്വാസത്തിലാണ് രജിത ജയ്‌മോന്‍ പുറത്തായത്. എളമ്പകപ്പിള്ളി സൗത്ത് വാര്‍ഡിലെ കോണ്‍ഗ്രസ് അംഗമാണ് രജിത. 13 അംഗ ഭരണസമിതിയിലെ ഏഴുപേര്‍ വോട്ടെടുപ്പില്‍ പങ്കെടുത്തു. ആറുപേര്‍ വിട്ടുനിന്നു. ബ്ലോക്ക് സെക്രട്ടറി എം.ജി. രതിയായിരുന്നു വരണാധികാരി. രജിതയ്ക്കെതിരേയുള്ള അവിശ്വാസത്തെ അനുകൂലിച്ച മുൻ വൈസ് പ്രസിഡന്‍റ് റോഷ്നി എൽദോയെ യുഡിഎഫ് പുറത്താക്കി. നിലവിലെ പ്രസിഡന്‍റ് യുഡിഎഫിലെ പി.പി. അവറാച്ചനെതിരെ യുഡിഎഫിലെ തന്നെ രജിത ഉൾപ്പടെയുള്ള ആറ് അംഗങ്ങളും സിപിഎം അംഗങ്ങളും ചേർന്ന് ഒരു മാസം മുൻപ് അവിശ്വാസത്തിന് നോട്ടീസ് നൽകിയിരുന്നു. എന്നാൽ രജിത ഉൾപ്പടെ മൂന്ന് അംഗങ്ങളെ യുഡിഎഫ് നേതൃത്വം ഇടപെട്ട് പിന്തിരിപ്പിച്ചിരുന്നു. അതിനാൽ അന്ന് അവറാച്ചനെതിരേ കൊണ്ടുവന്ന അവിശ്വാസം പരാജയപ്പെടുകയായിരുന്നു. ഇതിന്‍റെ പകപോക്കൽ എന്ന നിലയിലാണ് ഇന്നലെ രജിതയ്ക്കെതിരേ അവിശ്വാസം കൊണ്ടുവന്നത്. പഞ്ചായത്ത് ഭരണസമിതിയിൽ യുഡിഎഫിന് ഒൻപതും സിപിഎമ്മിന് മൂന്നും ബിജെപിക്ക് ഒരംഗവുമാണുള്ളത്. പ്രസിഡന്‍റിനെതിരേ അവിശ്വാസം കൊണ്ടുവന്ന മൂന്നു പേരെ യുഡിഎഫ് നേരത്തെ പുറത്താക്കിയിരുന്നു.

ലോക ഷെഫ് ദിനം ആചരിച്ചു

കൊച്ചി: ചാവറ കള്‍ച്ചറല്‍ സെന്‍ററിന്‍റെ കീഴില്‍ പ്രവര്‍ത്തിക്കുന്ന ചാവറ ഇന്‍സ്റ്റിറ്റ്യൂട്ടില്‍ ഹോട്ടല്‍ മാനേജ്‌മെന്‍റ് വിഭാഗം ലോക ഷെഫ് ദിനം ആചരിച്ചു. ഇതോടനുബന്ധിച്ച് വിദ്യാര്‍ഥികള്‍ക്കായി പാചകം മത്സരം സംഘടിപ്പിച്ചു. സൗത്ത് ഇന്ത്യ ഷെഫ് അസോസിയേഷന്‍ എക്‌സിക്യൂട്ടീവ് കമ്മിറ്റി മെമ്പര്‍ ജോര്‍ജ് കെ. ജോര്‍ജ് ഉദ്ഘാടനം ചെയ്തു. ചാവറ മാട്രിമണി എക്‌സിക്യൂട്ടീവ് ഡയറക്ടര്‍ ജോണ്‍സണ്‍ സി. ഏബ്രഹാം യോഗത്തില്‍ അധ്യക്ഷത വഹിച്ചു. സിഗ്‌നേച്ചര്‍ പ്രോപ്പര്‍ട്ടി ലിമിറ്റഡ് എക്‌സിക്യൂട്ടീവ് ഷെഫ് അമല്‍ കമല്‍, ഗോയിതേ ഇന്‍റര്‍നാഷണല്‍ കൊച്ചി സെന്‍റര്‍ ഹെഡ് ഡോ. ജോസഫ് സെബാസ്റ്റ്യന്‍, ചാവറ കള്‍ച്ചറല്‍ സെന്‍ററിന്‍റെയും ചാവറ ഇന്‍സ്റ്റിറ്റ്യൂട്ടിന്‍റെയും ഫിനാന്‍സ് ഓഫീസര്‍ ഫാ. മാത്യു കിരിയാന്തന്‍, ചാവറ ഇന്‍സ്റ്റിറ്റ്യൂട്ട് ഡയറക്ടര്‍ ഫാ. ബിജു വടക്കേല്‍ എന്നിവര്‍ പ്രസംഗിച്ചു. പാചക മത്സരത്തില്‍ ടിഫിയ, മഹേശ്വരിഎന്നിവര്‍ ഒന്നാം സ്ഥാനവും വിദ്യ, സിനിജ എന്നിവര്‍ രണ്ടാം സ്ഥാനവും വനമാല, ഈസലിന്‍ എന്നിവര്‍ മൂന്നാം സ്ഥാനവും കരസ്ഥമാക്കി.

കല്ലിട്ട പെരുന്നാൾ

എടയ്ക്കാട്ടുവയൽ: കാനായിക്കോട് സെന്‍റ് മേരീസ് ഓർത്തഡോക്സ് സുറിയാനി പള്ളിയിൽ പരുമല തിരുമേനിയുടെ ഓർമപ്പെരുന്നാളും കല്ലിട്ട പെരുന്നാളും 25 ,26 തീയതികളിൽ നടക്കും. 25ന് രാവിലെ 6.30 ന് പ്രഭാത പ്രാർഥന. 7. 30 ന് കുർബാന തുടർന്ന് കൊടി ഉയർത്തൽ. വൈകിട്ട് 5.15ന് സന്ധ്യാനമസ്കാരം, ആറിന് പ്രദക്ഷിണം. 26ന് പ്രഭാത പ്രാർഥനയ്ക്ക് ശേഷം 7.30 ന് കുർബാന, പ്രദക്ഷിണം എടയ്ക്കാട്ടുവയൽ ജംഗ്ഷനിലെ കുരിശും തൊട്ടിയിലേക്ക്. തുടർന്ന് നേർച്ച വിളമ്പ്.

ഗാന്ധിയൻ ഗ്രന്ഥങ്ങൾ നൽകി

വാഴക്കുളം: ഗാന്ധിയൻ ആശയങ്ങളുടെ പ്രചാരണത്തിനായി പൂർണോദയ ട്രസ്റ്റ് കദളിക്കാട് വിമലമാതാ ഹയർ സെക്കൻഡറി സ്കൂളിന് ഗാന്ധിയൻ ഗ്രന്ഥങ്ങൾ സംഭാവന നൽകി. കുട്ടികളുടെ ഗാന്ധിയൻ പഠനത്തിന് 7500 രൂപയുടെ പുസ്തകങ്ങളാണ് പൂർണോദയ ട്രസ്റ്റ് മാനേജിംഗ് പാർട്ണർ ഡോ. വിൻസെന്‍റ് മാളിയേക്കൽ സ്കൂൾ പ്രിൻസിപ്പൽ സിസ്റ്റർ റെജിന് കൈമാറിയത്. ഗാന്ധിയൻ ആശയങ്ങളുടെ പ്രചാരണത്തിന്‍റെ ഭാഗമായുള്ള പ്രസിദ്ധീകരണത്തിന്‍റെ മുപ്പത്തിയേഴാം വാർഷികത്തോടനുബന്ധിച്ചാണ് ട്രസ്റ്റ് പുസ്തകങ്ങൾ നൽകിയത്. അധ്യാപകരായ സുമ ഔസേപ്പച്ചൻ, നീതു ജോസഫ് തുടങ്ങിയവർ ചടങ്ങിൽ പങ്കെടുത്തു.

നിധി കമ്പനി സോണൽ കോൺഫറൻസ് 25ന്

കോതമംഗലം: നിധി കമ്പനികളുടെ എറണാകുളം ജില്ല സോണൽ കോൺഫ്രൻസ് 25ന് കോതമംഗലത്ത് നടക്കും. രാവിലെ 10.30 ന് കോതമംഗലം കറുകടം പ്രാഡ റെസിഡൻസിയിൽ നടക്കുന്ന പൊതുസമ്മേളനം ആന്‍റണി ജോൺ എംഎൽഎ ഉദ്ഘാടനം നിർവഹിക്കും. സോണൽ പ്രസിഡന്‍റ് എം.വി. മോഹനൻ അധ്യക്ഷത വഹിക്കും. സെക്രട്ടറി കെ.ഒ. വർഗീസ്, ജോയിന്‍റ് സെക്രട്ടറി ജോബി ജോർജ്, സ്വാഗതസംഘം ചെയർമാൻ വി.എസ്. തങ്കപ്പൻ, ജനറൽ കൺവീനർ എം.യു. ബേബി, സംസ്ഥാന കമ്മിറ്റി അംഗം യു.ടി. രാജൻ എന്നിവർ പ്രസംഗിക്കും. തുടർന്നു നടക്കുന്ന വാർഷിക പൊതുയോഗം അസോസിയേഷൻ സംസ്ഥാന പ്രസിഡന്‍റ് ഡേവീസ് എ. പാലത്തിങ്കൽ ഉദ്ഘാടനം ചെയ്യും. സംസ്ഥാന ജനറൽ സെക്രട്ടറി എ.എ. സലീഷ് മുഖ്യപ്രഭാഷണം നടത്തും. കോമ്പൗണ്ടിംഗ് സംബന്ധിച്ച വിഷയങ്ങളിലെ ചർച്ചക്ക്‌ വൈസ് പ്രസിഡന്‍റ് ഇ.എ. ജോസഫ് നേതൃത്വം നൽകും. സ്വാഗതസംഘം വൈസ് ചെയർമാൻമാരായ ടി.ബി. ജോഷി, അഗസ്റ്റസ് സിറിൽ, സംസ്ഥാന കമ്മിറ്റി അംഗം സേവ്യാർ ജിൻസൺ, സോണൽ വൈസ് പ്രസിഡന്‍റുമാരായ എം.പി. മത്തായി, സി. രാജഗോപാൽ, ഡോ. കെ. പത്മനാഭൻ, മുൻ സോണൽ പ്രസിഡന്‍റ് ജെന്നി എം. ജോർജ് എന്നിവർ പ്രസംഗിക്കും. ബിസിനസ് പെർഫോമൻസ് അവാർഡ്, വിദ്യാഭ്യാസ അവാർഡ്, ചികിത്സ സഹായധനം എന്നിവയുടെ വിതരണം, മുതിർന്ന അംഗങ്ങളെ ആദരിക്കൽ, കലാപരിപാടികൾ, കുടുംബ സംഗമം എന്നിവയും നടത്തും. ജില്ലയിലെ നൂറിൽപരം നിധി കമ്പനികളുടെ മാനേജിംഗ് ഡയറക്‌ടർമാർ, ഡയറക്ടേഴ്സ്, ജീവനക്കാർ, കുടുംബാംഗങ്ങൾ എന്നിവർ ചടങ്ങിൽ പങ്കെടുക്കുമെന്ന് സോണൽ പ്രസിഡന്‍റ് എം.വി. മോഹനൻ, സെക്രട്ടറി കെ.ഒ. വർഗീസ്, വൈസ് പ്രസിഡന്‍റ് ഡോക്ടർ കെ. പത്മനാഭൻ, സ്വാഗതസംഘം ചെയർമാൻ വി.എസ്. തങ്കപ്പൻ, കൺവീനർ എം.യു. ബേബി ജിൻസൻ സേവിയർ എന്നിവർ പത്രസമ്മേളനത്തിൽ അറിയിച്ചു.

വയോധികയുടെ മാല പൊട്ടിച്ച പ്രതി റിമാൻഡിൽ

കോതമംഗലം: കോതമംഗലം പുതുപ്പാടിയിൽ വയോധികയുടെ സ്വർണമാല പൊട്ടിച്ച പ്രതി റിമാൻഡിൽ. പശ്ചിമബംഗാൾ ബർദ്ധമാൻ മന്‍റേശ്വർ കുസുംഗ്രാം ഹസ്മത്ത് ഷേഖി(28) നെയാണ് മണിക്കൂറുകൾക്കുള്ളിൽ കോതമംഗലം പോലീസ് പിടികൂടിയത്. ചൊവ്വാഴ്ച വൈകിട്ട് ആറോടെ പുതുപ്പാടി സ്കൂളിന് സമീപം വാഴാട്ടിൽ ഏലിയാമ്മ (82) യുടെ ഒന്നര പവന്‍റെ മാലയാണ് കവർന്നത്. വീടിന്‍റെ സിറ്റൗട്ടിൽ ഇരിക്കുകയായിരുന്ന വയോധികയുടെ അടുത്തെത്തിയ ഹസ്മത്ത് പറമ്പിൽ പാമ്പുണ്ടെന്ന് പറഞ്ഞ് വീട്ടമ്മയെ പുറത്തേക്ക് ഇറക്കുകയായിരുന്നു. യുവാവ് കൈ ചൂണ്ടി കാണിക്കുന്നിടത്തേക്ക് ശ്രദ്ധതിരിച്ച വയോധികയുടെ മാല പൊട്ടിച്ച് കടന്നു കളയുകയായിരുന്നു. മൂവാറ്റുപുഴയിൽ നിന്നാണ് പ്രതിയെ കസ്റ്റഡിയിലെടുത്തത്. ഇൻസ്പെക്ടർ പി.ടി. ബിജോയിയുടെ നേതൃത്വത്തിൽ എസ്. ഐമാരായ ആൽബിൻ സണ്ണി, എം.എസ്. മനോജ്, സീനിയർ സിപിഒ സുഭാഷ് ചന്ദ്രൻ എന്നിവരാണ് അന്വേഷണ സംഘത്തിലുണ്ടായിരുന്നത്.

വഴിയിൽ കളഞ്ഞുകിട്ടിയ സ്വർണാഭരണങ്ങൾ തിരികെ ഏൽപ്പിച്ച് ചുമട്ടുതൊഴിലാളികൾ

കൂത്താട്ടുകുളം: വഴിയിൽ കളഞ്ഞുകിട്ടിയ നാലര പവൻ സ്വർണാഭരണം തിരികെ നൽകി കൂത്താട്ടുകുളത്തെ സിഐടിയു ചുമട്ടുതൊഴിലാളികൾ മാതൃകയായി. ടൗണിലെ കുഴൽനാട്ട് സ്റ്റോഴ്സിന് മുൻവശത്തുനിന്നും ഇന്നലെ രാവിലെ പ്ലാസ്റ്റിക് കവറിൽ പൊതിഞ്ഞനിലയിൽ ഒരു മാലയും വളയുമാണ് തൊഴിലാളികൾക്കു ലഭിച്ചത്. ഈ കടയിൽ സാധനങ്ങൾ കയറ്റിക്കൊണ്ടിരുന്ന ചുമട്ടുതൊഴിലാളികളായ ടി.കെ.സന്തോഷ്, ജെ. പ്രകാശ്, വി.ആർ. സിജു, സിബി പൗലോസ്, സജിത് എബ്രഹം എന്നിവർ സ്വർണം കൂത്താട്ടുകുളം പോലീസ് സ്റ്റേഷനിൽ ഏൽപ്പിച്ചു. പുതുവേലിയിൽ ഓട്ടോറിക്ഷ ഓടിക്കുന്ന പട്ടുമാക്കിയിൽ സജിമോൻ മാത്യു മകളുടെ വിവാഹ ആവശ്യത്തിന് സ്വർണം പണയം വയ്ക്കാനാണ് ടൗണിലെത്തിയത്. ഇതിനിടെ കുഴൽനാട്ട് സ്റ്റോഴ്സിൽ കാലിത്തീറ്റ വാങ്ങാൻ കയറി. ഇതിനിടെ ഫോൺ വന്ന് വീട്ടിലേക്ക് തിരികെ പോയി. പിന്നീടാണ് സ്വർണം നഷ്ടമായത് അറിഞ്ഞത്. ഇദ്ദേഹം പരാതിയുമായി സ്റ്റേഷനിലെത്തിയപ്പോൾ സ്വർണം കിട്ടിയ കാര്യം പോലീസുകാർ അറിയിച്ചു. മൂന്നര പവന്‍റെ മാല, ഒരു പവൻ വള എന്നിവയാണ് പൊതിയിലുണ്ടായിരുന്നത്. എസ്ഐമാരായ സി.ആർ. രഞ്ജിമോൾ, പി.സി. ജോബി, എഎസ്ഐമാരായ ജോജി സെബാസ്റ്റ്യൻ, സി.ആർ. സുരേഷ്, എസ്‌സിപിഒ ഇ.പി. ബിജുമോൻ എന്നിവർ ചേർന്ന് തൊഴിലാളികളുടെ സാന്നിധ്യത്തിൽ സ്വർണം ഉടമയ്ക്ക് കൈമാറി.

സിപിഐ ജില്ലാ സെക്രട്ടറിക്ക് സിപിഎം സ്വീകരണം

മൂവാറ്റുപുഴ: സിപിഐ എറണാകുളം ജില്ലാ സെക്രട്ടറിയായി തെരഞ്ഞെടുക്കപ്പെട്ട എൻ. അരുണിന് സിപിഎം ഏരിയ കമ്മിറ്റി ഓഫീസിൽ സ്വീകരണം നൽകി. സിപിഎം ജില്ലാ സെക്രട്ടറിയേറ്റ് അംഗം പി.ആർ മുരളീധരൻ ഏരിയ സെക്രട്ടറി അനീഷ് എം മാത്യു എന്നിവരാണ് സ്വീകരിച്ചത്. മുൻ എംഎൽഎ എൽദോ ഏബ്രഹാം , സജി ജോർജ് , ഫെബിൻ പി. മൂസ എന്നിവർ പങ്കെടുത്തു

കാറുകൾ കൂട്ടിയിടിച്ച് ആറു പേർക്ക് പരിക്ക്

കൂത്താട്ടുകുളം: എംസി റോഡിൽ വൈക്കം കവലയ്ക്ക് സമീപം കാറുകൾ കൂട്ടിയിടിച്ച് ഉണ്ടായ അപകടത്തിൽ ആറു പേർക്ക് പരിക്ക്. ഇന്നലെ ഉച്ചയ്ക്ക് ഒന്നിനാണ് അപകടം നടന്നത്. ഇരു ദിശകളിൽ നിന്നും എത്തിയ വാഹനങ്ങൾ തമ്മിൽ കൂട്ടിയിടിക്കുകയായിരുന്നു. മൂന്നാർ സന്ദർശിച്ച് കോട്ടയം ഭാഗത്തേക്കു പോവുകയായിരുന്ന ഹരിയാന സ്വദേശികളായ അച്ചിൻ ഖന്ന (48), ഭാര്യ പൂജ (50) മക്കൾ സുഹാന (16), സായിഷ (12) എന്നിവർക്കും ഏതിർ ദിശയിൽ വന്ന കാറിലെ യാത്രികരായ എറണാകുളം വൈറ്റില സ്വദേശി ആഹാസ് (32), പത്തനംതിട്ട സ്വദേശി മെറിൻ (25) എന്നിവർക്കുമാണ് പരിക്കേറ്റത്. അപകടത്തിൽ പരിക്കേറ്റവരെ കൂത്താട്ടുകുളം ദേവമാത ആശുപത്രിയിൽ പ്രവേശിപ്പിച്ചു. ആരുടെയും പരിക്ക് ഗുരുതരമല്ല. കൂത്താട്ടുകുളം അഗ്നിരക്ഷാസേന സ്ഥലത്തെത്തിയാണ് രക്ഷാപ്രവർത്തനം നടത്തിയത്. അപകടകാരണം വ്യക്തമല്ല. അപകടത്തെ തുടർന്ന് ഗതാഗതം ഭാഗികമായി തടസപ്പെട്ടു. റോഡിന്‍റെ നടുവിൽ കിടന്ന വാഹനം അഗ്നിരക്ഷാ സേനാംഗങ്ങൾ സമീപവാസികളുടെ സഹായത്തോടെയാണ് നീക്കം ചെയ്തത്. പിന്നീട് റോഡിൽ അവശേഷിച്ചിരുന്ന ഓയിലും ചില്ലുകളും സേന കഴുകി വൃത്തിയാക്കി. അസിസ്റ്റന്‍റ് സ്റ്റേഷൻ ഓഫീസർ എം. അനിൽകുമാറിന്‍റെ നേതൃത്വത്തിൽ, സീനിയർ ഫയർ ആൻഡ് റെസ്ക്യൂ ഓഫീസർമാരായ വി.കെ. ജീവൻകുമാർ, എം. ശ്യാംമോഹൻ, അഗ്നിരക്ഷാസേന ഓഫീസർമാരായ രാജേഷ് കുമാർ, സി.എസ്. അനീഷ്, അനന്ത പുഷ്പൻ, വൈശാഖ്, മാനസ്, അഭിലാഷ്, സന്തോഷ്, സജിമോൻ സൈമൺ എന്നിവരാണ് രക്ഷാപ്രവർത്തനങ്ങൾ നടത്തിയത്.

തങ്കളത്ത് ഹൈപ്പർമാർക്കറ്റിൽ മോഷണം

കോതമംഗലം: തങ്കളത്ത് ഹൈപ്പർമാർക്കറ്റിൽ മോഷണം. 55,000 രൂപയോളം നഷ്ടമായി. ചൊവ്വാഴ്ച്ച രാത്രി തങ്കളം മൂലൻസ് ഹൈപ്പർമാർക്കറ്റിലാണ് കടയുടെ സമീപത്തെ ഇടവഴിയിലൂടെ എത്തിയ മോഷ്ടാവ് തകര ഷീറ്റ് അറുത്ത് മാറ്റി അകത്ത് കടന്നത്. ഫാൻസി ഐറ്റം വിൽക്കുന്ന ഭാഗത്തെ കൗണ്ടറിൽനിന്ന് നാൽപ്പതിനായിരം രൂപയും മുൻവശത്തെ കൗണ്ടറുകളിൽ ഒന്നിൽനിന്ന് പതിനയ്യായിരം രൂപയുമാണ് നഷ്ടമായത്. മുഖം മുഴുവൻ മറച്ച നിലയിൽ ഹൈപ്പർമാർക്കറ്റിനകത്ത് കടന്ന മോഷ്ടാവിന്‍റെ ദൃശ്യങ്ങൾ ലഭിച്ചിട്ടുണ്ട്. കോതമംഗലം പോലീസ് കേസെടുത്ത് അന്വേഷണം ആരംഭിച്ചു.

കനത്ത മഴ: കിണറും മതിലും ഇടിഞ്ഞുവീണു

കോതമംഗലം: കഴിഞ്ഞ ദിവസങ്ങളിൽ പെയ്ത കനത്ത മഴയില്‍ കോതമംഗലം കുടമുണ്ടയില്‍ വീട്ടുമുറ്റത്തെ കിണറും മതിലും ഇടിഞ്ഞുവീണു. കുന്നുംപുറത്ത് ശശിയുടെ വീട്ടിലെ കിണറും മതിലുമാണ് ഇടിഞ്ഞുവീണത്. സമീപത്തെ പറമ്പില്‍ നിന്നും മഴവെള്ളം എത്തിയതോടെ ഏകദേശം ആറടി ഉയരമുള്ള മതില്‍ 50 അടി നീളത്തിലാണ് ഇടിഞ്ഞുവീണത്. ഇതോടെ മുറ്റത്തെ കിണറിന്‍റെ കെട്ടും മോട്ടോറുമടക്കം കിണറിനുള്ളിലേക്ക് വീണു. 25 അടിയോളം താഴ്ചയുണ്ടായിരുന്ന കിണര്‍ പകുതിയും മൂടിപ്പോയ നിലയിലാണ്. നഷ്ടപരിഹാരമാവശ്യപ്പെട്ട് പല്ലാരിമംഗലം വില്ലേജില്‍ അപേക്ഷ നല്‍കിയെങ്കിലും പഞ്ചായത്തില്‍ അപേക്ഷ നല്‍കാന്‍ അധികൃതര്‍ ആവശ്യപ്പെട്ടു. ഇതേത്തുടര്‍ന്ന് പല്ലാരിമംഗലം പഞ്ചായത്ത് അധികൃതര്‍ക്ക് അപേക്ഷ നല്‍കിയിട്ടുണ്ടെന്ന് വീട്ടുടമ പറഞ്ഞു.

സൗജന്യ നേത്ര-ദന്ത പരിശോധന ക്യാമ്പ്

മൂവാറ്റുപുഴ: ലയണ്‍സ് ക്ലബിന്‍റെ ആഭിമുഖ്യത്തിൽ 25ന് സൗജന്യ നേത്ര-ദന്തല്‍ പരിശോധന ക്യാമ്പ് സംഘടിപ്പിക്കുന്നു. ഭവാനി ഫൗണ്ടേഷന്‍ കാലടിയുടെയും അമൃത ആശുപത്രിയിയുടെയും അന്നൂര്‍ ഡെന്‍റല്‍ കോളജിന്‍റെയും സഹകരണത്തോടെയാണ് ക്യാമ്പ് സംഘടിപ്പിക്കുന്നത്. രാവിലെ ഒന്പത് മുതല്‍ ഉച്ചയ്ക്ക് ഒന്ന് വരെയാണ് ക്യാമ്പ്. അമൃത ആശുപത്രിയില്‍ സൗജന്യ തിമിര ശസ്ത്രക്രിയ ക്യാമ്പില്‍ പങ്കെടുക്കുന്നവര്‍ക്ക് നടത്തുന്നതാണ്. ദന്തല്‍ വിഭാഗത്തില്‍, ക്ലീനിംഗ്, പല്ലു പറിക്കുന്നത് താല്‍ക്കാലിക ഫില്ലിംഗ് എന്നിവ സൗജന്യമായി മൂന്നുമാസത്തിനുള്ളില്‍ അന്നൂര്‍ കോളജില്‍ ചെയ്യാന്‍ സാധിക്കുമെന്ന് മൂവാറ്റുപുഴ ലയണ്‍സ് ക്ലബ് ഭാരവാഹികളായ പ്രസിഡന്‍റ് ജയ ബാലചന്ദ്രന്‍, സെക്രട്ടറി നീന സജീവ്, ട്രഷറര്‍ ബീന സുരേഷ് എന്നിവര്‍ പറഞ്ഞു.

പെരുമാംകണ്ടം സെന്‍റ് ജൂഡ് നഗറില്‍ യൂദാശ്ലീഹായുടെ തിരുനാള്‍ നാളെ മുതല്‍

മൂവാറ്റുപുഴ: പെരുമാംകണ്ടം സെന്‍റ് ജൂഡ് നഗറില്‍ വിശുദ്ധ യൂദാശ്ലീഹായുടെ തിരുനാള്‍ നാളെ മുതല്‍ 26 വരെ ആഘോഷിക്കുമെന്ന് വികാരി ഫാ. ജോസ് കിഴക്കേയില്‍ അറിയിച്ചു. തിരുനാളിനൊരുക്കമായുള്ള ബൈബിള്‍ കണ്‍വന്‍ഷനും നടക്കും. ഇന്നു രാവിലെ 5.30ന് കുര്‍ബാന, നൊവേന, വൈകുന്നേരം നാലിന് ജപമാല സമര്‍പ്പണം, 4.30ന് കുര്‍ബാന, നൊവേന റവ. ഡോ. സ്റ്റാന്‍ലി കുന്നേല്‍, ബൈബിള്‍ കണ്‍വന്‍ഷന്‍ ഫാ. ജെയിംസ് കക്കുഴി. നാളെ രാവിലെ 5.30ന് കുര്‍ബാന, നൊവേന, വൈകുന്നേരം 4.30ന് ജപമാല സമര്‍പ്പണം, കൊടിയേറ്റ്, തിരുനാള്‍ കുര്‍ബാന, നൊവേന, സന്ദേശം റവ. ഡോ. ജോര്‍ജ് പുന്നക്കോട്ടില്‍, ഉണ്ണിയപ്പം നേര്‍ച്ച. 25ന് രാവിലെ 5.30നും 10നും കുര്‍ബാന, നൊവേന, 11 മുതല്‍ 12.30 വരെ ദിവ്യകാരുണ്യ സന്നിധിയില്‍ ജപമാല രഹസ്യങ്ങളുടെ ധ്യാനവും ആരാധനയും. 12.30ന് പാല്‍ക്കഞ്ഞി നേര്‍ച്ച, വൈകുന്നേരം 4.30ന് വാഹന വെഞ്ചരിപ്പ്, 4.45ന് ലദീഞ്ഞ്, അഞ്ചിന് ആഘോഷമായ തിരുനാള്‍ കുര്‍ബാന. സന്ദേശം ഫാ. റോയി കണ്ണഞ്ചിറ, ഏഴിന് ജപമാല, തിരിപ്രദക്ഷിണം, സമാപന പ്രാര്‍ഥന, നെയ്യപ്പം നേര്‍ച്ച. 26ന് രാവിലെ 5.30ന് കുര്‍ബാന, സന്ദേശം, നൊവേന, രശ്മികിരീടം എഴുന്നള്ളിക്കല്‍, ഏഴിന് കുര്‍ബാന, 10.30ന് കുര്‍ബാന, സന്ദേശം, നൊവേന, 11.30നും വൈകുന്നേരം നാലിനും രശ്മികിരീടം എഴുന്നള്ളിക്കല്‍, 4.45ന് ലദീഞ്ഞ്, അഞ്ചിന് ആഘോഷമായ തിരുനാള്‍ കുര്‍ബാന ഫാ. മാത്യു ചെറുപറമ്പില്‍, തിരുനാള്‍ സന്ദേശം റവ. ഡോ. ബെന്നോ പുതിയാപറമ്പില്‍, പ്രദക്ഷിണം, സമാപന ആശീര്‍വാദം, തിരുശേഷിപ്പ് വണക്കം.

കുമിൾരോഗം ബാധിച്ച് കോതമംഗലം താലൂക്കിൽ ഇഞ്ചികൃഷി നശിക്കുന്നു

കാരണം വായുവിൽക്കൂടി പകരുന്ന പൈറിക്കുലാറിയ കുമിൾ കോതമംഗലം: കോതമംഗലം താലൂക്കിലെ വിവിധ സ്ഥലങ്ങളിൽ കുമിൾ രോഗംമൂലം ഇഞ്ചികൃഷി നശിക്കുന്നു. തീവ്ര വ്യാപന ശേഷിയുള്ളതും വായുവിൽക്കൂടി പകരുന്നതുമായ പൈറിക്കുലാറിയ കുമിൾ രോഗമാണ് ഇഞ്ചികൃഷിയെ ബാധിച്ചിരിക്കുന്നത്. താലൂക്കിൽ ഏക്കര്‍ കണക്കിന് സ്ഥലത്തെ ഇഞ്ചി കൃഷിയാണ് മൊത്തമായി നശിച്ചിട്ടുള്ളത്. കോട്ടപ്പടി, വാരപ്പട്ടി, കവളങ്ങാട് പഞ്ചായത്തുകളിലാണ് രോഗവ്യാപനം ആദ്യം ശ്രദ്ധയില്‍പ്പെട്ടത്. പ്രദേശത്തെ കൃഷി ഉദ്യോഗസ്ഥരും കർഷകരും വിവരം അറിയിച്ചതിനെ തുടര്‍ന്ന് കൃഷി അസിസ്റ്റന്‍റ് ഡയറക്ടർ പ്രിയാമോൾ തോമസിന്‍റെ നേതൃത്വത്തിലുള്ള സംഘം പ്രദേശം സന്ദർശിച്ചു. തുടർന്ന് ഓടക്കാലി കൃഷി വിജ്ഞാന കേന്ദ്രത്തിലെ ശാസ്ത്രജ്ഞരെ എത്തിച്ച് നടത്തിയ പഠനത്തിലാണ് പൈറിക്കുലാറിയ രോഗം ആണെന്ന് സ്ഥിരീകരിച്ചത്. ഇഞ്ചിയുടെ ഇലയില്‍ പുള്ളിക്കുത്തുകളായാണ് രോഗം പ്രത്യക്ഷപ്പെടുന്നത്. പിന്നീട് അതിവേഗം തണ്ടിലേക്ക് വ്യാപിച്ച് കരിഞ്ഞ് അഴുകും. മരുന്ന് പ്രയോഗം വൈകിയാൽ ഫലമില്ല രോഗവ്യാപനം കണ്ടെത്തിയാല്‍ ഉടനടി മരുന്ന് പ്രയോഗം നടത്തണം. വൈകിയാല്‍ ഫലമുണ്ടാകില്ല. തുടക്കത്തിലെ മരുന്ന് ചെയ്യാന്‍ കഴിയാതിരുന്ന കൃഷികളാണ് നശിച്ചിട്ടുള്ളത്. പൈറിക്കുലാറിയ രോഗം നെല്ല്, ഗോതമ്പ് തുടങ്ങിയ മറ്റു പല വിളകളേയും ബാധിക്കാറുണ്ടെങ്കിലും ഇഞ്ചി കൃഷിയെ ഇത്ര വ്യാപകമായി പിടികൂടുന്നത് ശ്രദ്ധയിൽപ്പെടുന്നത് ആദ്യമായാണ്. പ്രതിവിധിയുണ്ട് പ്രതിവിധിയായി പ്രോപ്പിക്കോണസോൾ ലിറ്ററിന് ഒരു എംഎൽ, ടെബുകോണസോൾ 1.5 എംഎൽ, കാർബൻഡാസിം രണ്ട് ഗ്രാം, സാഫ് രണ്ട് ഗ്രാം എന്നീമരുന്നുകൾ കൃത്യമായ അനുപാതത്തിൽ വെള്ളത്തിൽ കലർത്തി സ്പ്രേ ചെയ്യുവാനാണ് കൃഷിവകുപ്പ് അധികൃതർ നിർദേശിക്കുന്നത്. ഇഞ്ചിവിത്ത് നടുന്നതിന് മുൻപ് കുമിൾനാശിനി ഉപയോഗിച്ച് പരിപാലനം നടത്തുന്നത് രോഗം വരാതിരിക്കാൻ സഹായകമാണ്. ഇതിനായി ഒരു ലിറ്റർ വെള്ളത്തിൽ രണ്ടു ഗ്രാം സാഫ് ചേർത്ത് ലായനി ഉപയോഗിക്കാവുന്നതാണ്. നടുമ്പോൾ നീർവാർച്ച ഉറപ്പാക്കണം. കൂടാതെ ട്രൈക്കോഡർമ ചേർത്ത് സമ്പുഷ്ടികരിച്ച ചാണകപ്പൊടി ഉപയോഗിക്കുന്നതും രോഗബാധ ഉണ്ടാകാതിരിക്കാൻ സഹായകമാണ്. ഇഞ്ചി നട്ട് നാലുമാസം കഴിയുമ്പോൾ രോഗ പ്രതിരോധത്തിനായി ഏതെങ്കിലും കമിൾനാശിനി ഉപയോഗിക്കുന്നതും രോഗ പ്രതിരോധത്തിന് സഹായിക്കുന്നു. രോഗ ലക്ഷണം കാണുമ്പോൾ തന്നെ രോഗബാധയുള്ള ഭാഗങ്ങൾ നീക്കം ചെയ്ത ശേഷം ശേഷം കുമിൾനാശിനി പ്രയോഗം നടത്തേണ്ടത് വളരെ അത്യാവശ്യമാണെന്നും കൃഷി അസിസ്റ്റന്‍റ് ഡയറക്ടർ പറഞ്ഞു. കോതമംഗലം താലൂക്കിലും സമീപ താലൂക്കുകളിലും വ്യാവസായികാവശ്യങ്ങൾക്കും, വീട്ടാവശ്യങ്ങൾക്കും നടത്തിയിട്ടുള്ള ഇഞ്ചികൃഷിയിൽ രോഗവ്യാപനം ഉണ്ടായിട്ടുള്ളതായാണ് അറിയുന്നത്. കൃഷി നാശം നേരിടുന്ന കർഷകർക്ക് നഷ്ടപരിഹാരം നൽകാൻ കൃഷി വകുപ്പും തദ്ദേശ സ്വയംഭരണ സ്ഥാപനങ്ങളും നടപടി സ്വികരിക്കണമെന്നാണ് കർഷകരുടെ ആവശ്യം

ഇരുചക്രവാഹനമിടിച്ച് ക്ഷീരകര്‍ഷകന്‍ മരിച്ചു

കാഞ്ഞൂര്‍: വീട്ടിലേക്കുള്ള സാധനങ്ങള്‍ വാങ്ങിച്ച് നടന്നുപോകവേ പിന്നില്‍നിന്ന് വന്ന ഇരുചക്ര വാഹനമിടിച്ച് ക്ഷീരകര്‍ഷകന്‍ മരിച്ചു. കാഞ്ഞൂര്‍ തെക്കേ അങ്ങാടി കീഴേത്താന്‍ വീട്ടില്‍ പരേതനായ യോഹന്നാന്‍ മകന്‍ ജോണ്‍ (68 ) മരിച്ചത്. ചൊവ്വാഴ്ച വൈകിട്ടാണ് അപകടമുണ്ടായത്. തുടര്‍ന്ന് ആലുവയിലെ സ്വകാര്യ ആശുപത്രിയില്‍ ചികിത്സയിലായിരുന്നു. സംസ്‌കാരം ഇന്ന് വൈകുന്നേരം 4.45ന് കാഞ്ഞൂര്‍ സെന്റ് മേരീസ് ഫൊറോന ദേവാലയത്തില്‍. പുതിയേടം ക്ഷീരോല്‍പാദക സഹകരണ സംഘം ഭരണ സമിതി അംഗമായിരുന്നു. ഭാര്യ: ലിസി കിടങ്ങൂര്‍ ചുണ്ടനായി കുടുംബാംഗമാണ്. മക്കള്‍: ഹണി മേരി ജോണ്‍, ജോമോന്‍ ജോണ്‍. മരുമകന്‍: പ്രവീണ്‍.

മഴയിൽ വീട് തകർന്നുവീണു

പനങ്ങാട്: ശക്തമായ മഴയിൽ വീട് തകർന്ന് വീണു. കുമ്പളം പഞ്ചായത്തിലെ ഒന്നാം വാർഡിൽ നൂറ്കണ്ണിയിൽ കുഞ്ഞമ്മ കാർത്തികേയന്‍റെ വീടാണ് ഇന്നലെ പുലർച്ചെ 4.30 ഓടെ തകർന്ന് വീണത്. മകൻ ബൈജു തലനാരിഴയ്ക്കാണ് രക്ഷപ്പെട്ടത്. ഫാനിന്‍റെ ശബ്ദവ്യത്യാസം കേട്ട് ഓഫ് ചെയ്യാൻ എഴുന്നേറ്റ സമയം ഓടുകളും മറ്റും തലയിലേയ്ക്ക് വീഴുന്നത് കണ്ട് പുറത്തേയ്ക്ക് ഓടി രക്ഷപ്പെടുകയായിരുന്നു. മാതാവ് വീട്ടിലുണ്ടായിരുന്നില്ല.

നടൻ ശ്രീനിവാസനെ നെല്ല് അളന്ന് നൽകി ആദരിച്ചു

ഉദയംപേരൂർ: നെൽകർഷകരെ ആത്മാർഥമായി സ്നേഹിക്കുന്ന നടൻ ശ്രീനിവാസനെയും ധ്യാൻ ശ്രീനിവാസനെയും കേരള ദർശന വേദിയുടെ നേതൃത്വത്തിൽ ഒരു പറ നെല്ല് അളന്ന് നൽകി ആദരിച്ചു. വേദി ചെയർമാൻ എ.പി. മത്തായിയുടെ നേതൃത്വത്തിൽ ശ്രീനിവാസന്‍റെ വീട്ടിൽ നടത്തിയ ചടങ്ങിൽ കാലടി സംസ്കൃത സർവകലാശാല വൈസ് ചാൻസലർ ഡോ. എം.സി. ദിലീപ് കുമാർ, ശ്രീനിവാസനെ പൊന്നാടയണിയിച്ചു. എംജിഎം സ്കൂൾ പ്രിൻസിപ്പൽ വി. ഉമ, ദർശന വേദി സെക്രട്ടറി കുമ്പളം രവി, ടോമി മാത്യു, കണ്ടനാട് പാടശേഖര കർഷകൻ മനു ഫിലിപ്പ്, എൻ.കെ. മത്തായി തുടങ്ങിയവർ പങ്കെടുത്തു.

ആശാവർക്കർമാരുടെ സമരത്തിന് പിന്തുണയുമായി പ്രതിഷേധ സദസ്

വൈപ്പിൻ: ആശാ വർക്കർമാരുടെ സമരത്തിന് ഐക്യദാർഢ്യം പ്രഖ്യാപിച്ച് ഐക്യദാർഢ്യ സമിതിയുടെ ആഭിമുഖ്യത്തിൽ പ്രതിഷേധ സദസ് സംഘടിപ്പിച്ചു. കാളമുക്കിൽ നടന്ന പ്രതിഷേധം ഐഎൻടിയുസി ദേശീയ സെക്രട്ടറി കെ.പി. ഹരിദാസ് ഉദ്ഘാടനം ചെയ്തു. മെച്ചപ്പെട്ട സേവന വേതന വ്യവസ്ഥകൾ ആവശ്യപ്പെടുന്ന തൊഴിലാളികളോട് നിഷേധാത്മകമായ സമീപനം സ്വീകരിക്കുന്നത് തൊഴിലാളികളുടെ സർക്കാർ എന്ന അവകാശപ്പെടുന്ന ഇടതുപക്ഷ സർക്കാരിനു ഭൂഷണമല്ലെന്ന് കെ. പി. ഹരിദാസ് ചൂണ്ടിക്കാട്ടി. ഇടപ്പള്ളി ബ്ലോക്ക് പഞ്ചായത്ത് പ്രസിഡന്‍റ് സരിത സനിൽ അധ്യക്ഷയായി. സമരസഹായ സമിതി ജില്ലാ വൈസ് ചെയർമാൻ വി.പി. ജോർജ് , സമിതി മേഖലാ നേതാക്കളായ വിവേക് ഹരിദാസ്, എം.ബി. ജയഘോഷ്, പോൾ ടി. സാമുവൽ, കെ.കെ . ശോഭ, എ. റെജീന, എൻ. മോഹൻകുമാർഎന്നിവർ സംസാരിച്ചു.

റോ റോ കട്ടപ്പുറത്ത് തന്നെ; ഫോർട്ടുകൊച്ചി- വൈപ്പിൻ റൂട്ടിൽ യാത്രാക്ലേശം രൂക്ഷം

ഫോർട്ടുകൊച്ചി: ഫോർട്ടുകൊച്ചി വൈപ്പിൻ സർവീസ് നടത്തുന്ന സേതു സാഗർ ഒന്ന് യന്ത്രത്തകരാറിനെ തുടര്‍ന്ന് പ്രവര്‍ത്തനം നിലച്ചതോടെ ഫോർട്ട് കൊച്ചി-ഫോർട്ട്‌ വൈപ്പിൻ റൂട്ടിൽ റോറോ സർവീസിനെ ആശ്രയിക്കുന്നവര്‍ ദുരിതത്തിലായി. ഫോർട്ടുകൊച്ചി റോറോ ജെട്ടിയിൽ നിന്നും ആസ്പിൻ വോൾ വരെയും ഫോർട്ട് വൈപ്പിൻ ജെട്ടിയിൽ നിന്നും ഗോശ്രീ പാലം വരെയും മണിക്കൂറുകൾ ക്യൂവിൽ കിടക്കുന്ന വാഹനങ്ങൾ മൂലം വലിയ ഗതാഗതക്കുരുക്കാണ് അനുഭവപ്പെടുന്നത്. അടിയന്തരമായി റോറോയുടെ അറ്റകുറ്റപ്പണികൾ നടത്തി റോറോ സർവീസ് ആരംഭിക്കണമെന്ന് പ്രതിപക്ഷ നേതാവ് അഡ്വ. ആന്‍റണി കുരീത്തറ ആവശ്യപ്പെട്ടു. റോറോ സർവീസുമായി ബന്ധപ്പെട്ട കണക്കുകൾ പരിശോധിക്കുന്നതിന് കോർപറേഷൻ നിയോഗിച്ച ചാർട്ടേഡ് അക്കൗണ്ടന്‍റ് കണക്കുകൾ പൂർണമല്ലെന്നും കെഎസ്ഐഎൻസി കണക്കുകളിൽ പൊരുത്തക്കേട് ഉണ്ടെന്നുറിപ്പോർട്ട് നൽകിയതായും പ്രതിപക്ഷ നേതാവ് അഡ്വ. ആന്‍റണി കുരീത്തറ ആരോപിച്ചു. കൊച്ചി നഗരസഭയുടെ റോറോ സർവീസ് കോർപറേഷൻ ഏറ്റെടുത്ത് നടത്തണമെന്നും അദ്ദേഹം ആവശ്യപ്പെട്ടു.

സീപോര്‍ട്ട്-എയര്‍പോര്‍ട്ട് റോഡ്: എച്ച്എംടി, എന്‍എഡിഎ ഭൂമി കൈമാറി

കളമശേരി: സീപോർട്ട്- എയർപോർട്ട് റോഡിന്‍റെ രണ്ടാം ഘട്ട നിർമാണത്തിനായി എച്ച്എംടിയുടേയും എൻഎഡിയുടേയും ഭൂമി പദ്ധതി നിർവഹണ ഏജൻസിയായ റോഡ്‌സ് ആൻഡ് ബ്രിഡ്ജസ് ഡെവലപ്‌മെന്‍റ് കോർപറേഷന് കൈമാറി. റോഡ് നിർമാണം രണ്ട് പതിറ്റാണ്ടിലേറെ തടസപ്പെടുന്നതിന് കാരണമായ ഭൂമി പ്രശ്നം ഇതോടെ പൂർണമായി പരിഹരിക്കപ്പെട്ടതായി മന്ത്രി പി. രാജീവ് പറഞ്ഞു. ഈ ഭാഗത്തെ റോഡ് നിർമാണം ഉടനെ ആരംഭിക്കുമെന്നും അദ്ദേഹം പറഞ്ഞു. സംസ്ഥാന സർക്കാർ നടത്തിയ നിരന്തരമായ ഇടപെടലിന്‍റെ ഫലമായാണ് റോഡ് നിർമാണം പൂർത്തിയാക്കാൻ വഴിയൊരുങ്ങുന്നതെന്നും മന്ത്രി പറഞ്ഞു. സീപോർട്ട്- എയർപോർട്ട് റോഡ് നിർമാണത്തിലെ രണ്ടാം ഘട്ടത്തിൽ ഉൾപ്പെടുന്ന എച്ച്എംടി മുതൽ എൻ‌എഡി വരെയുള്ള ഭാഗത്തിനാണ് എച്ച്എംടി ഭൂമി ആവശ്യമായി വന്നത്. തൃക്കാക്കര നോർത്ത് വില്ലേജിലെ ബ്ലോക്ക് അഞ്ചിൽ ഉൾപ്പെട്ട 1.4015 ഹെക്ടർ ഭൂമിയാണ് കൈമാറിയത്. ഭൂമിക്കുള്ള വില സുപ്രീം കോടതി നിർദ്ദേശപ്രകാരം ബാങ്കിൽ നിക്ഷേപിച്ചിരുന്നു. ഭൂമി ഏറ്റെടുക്കലിനായി അനുവദിച്ച 37,90,90662 രൂപയാണ് ഇപ്രകാരം കൈമാറിയത്. ദേശസാൽകൃത ബാങ്കിൽ തുക കെട്ടിവെക്കുന്നതിനുള്ള സംസ്ഥാന സർക്കാരിന്‍റെ അപേക്ഷ സുപ്രീം കോടതി നേരത്തെ അനുവദിച്ചിരുന്നു. സീപോർട്ട്- എയർപോർട്ട് റോഡ് വികസനത്തിനായി എൻഎഡിയിൽ നിന്ന് വിട്ടു കിട്ടേണ്ട 2 .4967 ഹെക്ടർ ഭൂമിയും കൈമാറി. ഭൂമി വിലയുൾപ്പെടെ 32. 26 കോടി രൂപ സംസ്ഥാന സർക്കാർ നേരത്തെ അനുവദിച്ചിരുന്നു. സ്ഥല വിലയായി കേന്ദ്ര പ്രതിരോധ മന്ത്രാലയം കണക്കാക്കിയ 23.11 കോടി രൂപയും എൻഎഡി തൊരപ്പ് റോഡ് വീതി കൂട്ടി നിർമിക്കുന്നതിന് 8.16 കോടി രൂപയും ചുറ്റുമതിൽ നിർമാണത്തിന് 99. 43ലക്ഷം രൂപയും ഉൾപ്പെടെയാണ് ധനകാര്യ വകുപ്പ് അനുവദിച്ചിരുന്നത്. എച്ച്എംടി - എൻഎഡി ഭാഗത്തെ റോഡ് നിർമാണത്തിനായി 17.31 കോടി രൂപയുടെ ഭരണാനുമതി നൽകി കഴിഞ്ഞ മാസം സർക്കാർ ഉത്തരവ് പുറപ്പെടുവിച്ചിരുന്നു. ഈ ഭാഗത്തിന്‍റെ ടെൻഡർ നടപടികൾ പുരോഗമിക്കുകയാണ്. എച്ച്എംടി ഭാഗത്ത് 45 മീറ്റർ വീതിയിൽ 600 മീറ്റർ നീളത്തിലാണ് റോഡ് നിർമിക്കുക. എൻഎഡിയുടെ ഭാഗത്തെ സ്കെച്ച് നേരത്തെ തയാറാക്കിയതിനാൽ തുടർ നടപടികൾക്ക് കാലതാമസമുണ്ടാവില്ല. ഇതോടൊപ്പം വീതി കൂട്ടി നിർമിക്കുന്ന എൻഎഡി തൊരപ്പ് റോഡിന്‍റെ ടെൻഡറും ഉടനുണ്ടാകും. എൻഎഡി-മഹിളാലയം ഭാഗത്തിന്‍റെ ടെൻഡർ ഡിസംബറിൽ പുറപ്പെടുവിക്കും. 6.5 കി.മീറ്റർ ദൈർഘ്യമുള്ള ഈ ഭാഗത്തെ ഭൂമി ഏറ്റെടുക്കൽ പൂർത്തീകരണത്തിലേക്ക് എത്തുകയാണ്.

മഴ... മാലിന്യം ... തൃക്കാക്കര ചീഞ്ഞുനാറുന്നു

കാക്കനാട്: മഴയെപഴിചാരിമാലിന്യനീക്കംനടത്താതെ തൃക്കാക്കര നഗരസഭ. ഹരിതകർമസേനയിലെ വനിതകൾ 43 ഡിവിഷനുകളിൽ നിന്നായി ശേഖരിച്ചു കൊണ്ടുവരുന്ന ഭക്ഷണാവശിഷ്ടമടക്കമുള്ള ജൈവ മാലിന്യങ്ങൾ നഗരസഭാകാര്യാലയത്തിനു സമീപമുള്ള മാലിന്യസംഭരണിയിൽ കുട്ടിയിട്ടിരിക്കുകയാണ്. കനത്ത മഴയത്ത് ഇവയെല്ലാം റോഡിലേക്ക് ഒഴുകി പരക്കുന്നതു പതിവായിട്ടും നഗരസഭാ ആരോഗ്യ വിഭാഗം അധികൃതർ വേണ്ടത്ര ജാഗ്രതകാണിക്കുന്നില്ലെന്ന്പ്രതിപക്ഷ കൗൺസിലർമാരും പ്രദേശവാസികളും പറയുന്നു. സംസ്ഥാനത്ത് ഏറ്റവും കൂടുതൽ റവന്യൂ വരുമാനമുള്ള നഗരസഭയാണ് തൃക്കാക്കരയെങ്കിലും കുറ്റമറ്റ രീതിയിൽ മാലിന്യ സംസ്കരണത്തിന് നാളിതുവരെ ഇവിടെ സംവിധാനങ്ങളൊന്നും ഒരുക്കിയിട്ടില്ല. ഓണക്കാലത്ത് കൊണ്ടുവന്ന് നിക്ഷേപിച്ച ജൈവ മാലിന്യങ്ങളും സംഭരണിയിൽ ചീഞ്ഞഴുകി ദുർഗന്ധം വമിപ്പിക്കുന്നു. ഇതിനിടയിൽ വലിയ കുഴികുത്തി സംഭരണിക്കു സമീപം തന്നെ ഈ ജൈവ മാലിന്യം കുഴിച്ചു മുടാൻ അധികൃതർ നടത്തിയ ശ്രമങ്ങൾ പ്രതിപക്ഷ കൗൺസിലർമാർ ചേർന്ന് തടഞ്ഞു. മാലിന്യം സംഭരണിക്കു സമീപം കുഴിച്ചുമൂടാൻ നീക്കം നടത്തിയിട്ടില്ലെന്നും, മാലിന്യത്തിൽ നിന്നുള്ള സ്ലറി വെള്ളം റോഡിലേക്കും മറ്റും ഒഴുകിപ്പരക്കാതിരിക്കാൻ വേണ്ടി കുഴികുത്തി അതിലേക്ക് ഒഴുക്കി വിടുകയുമായിരുന്നുവെന്ന് നഗരസഭാധ്യക്ഷ രാധാമണിപ്പിള്ള ആരോഗ്യ സ്ഥിരം സമിതി അധ്യക്ഷൻ വർഗീസ് പ്ലാശ്ശേരി എന്നിവർ പറഞ്ഞു. അതേസമയം കാരണം കൂടാതെ ഹരിത കർമസേനാംഗത്തെ ജോലിയിൽ നിന്നും മാറ്റി നിർത്തിയെന്ന ആരോപണവുമായി പ്രതിപക്ഷ കൗൺസിലർമാരിൽ ചിലരും രംഗത്തുവന്നു. വീടുകളിൽ നിന്നും ഫ്ലാറ്റുകളിൽ നിന്നും ഭക്ഷണാവശിഷ്ടം എടുക്കാൻ നിയോഗിക്കപ്പെട്ടിട്ടുള്ള ഹരിത കർമസേനാംഗം ചട്ടവിരുദ്ധമായി പണം വാങ്ങിയെന്നും, കെ സ്മാർട്ടിലടക്കം കബളിപ്പിക്കപ്പെട്ടവപ്പെട്ടവർ പരാതി നൽകിയെന്നും ഇതേ തുടർന്ന് ഇനിയൊരറിയിപ്പുണ്ടാകുന്നതുവരെ ഒരു വനിതാ അംഗത്തെ ജോലിയിൽ നിന്നും മാറ്റി നിർത്താൻ ആരോഗ്യവിഭാഗംനോട്ടീസ് നൽകിയിട്ടുണ്ടെന്നും നഗരസഭാ സെക്രട്ടറി അറിയിച്ചു. നഗരസഭയുടെ ലെറ്റർഹെഡിൽ അമിത നിരക്ക് ആവശ്യപ്പെട്ട് ആരോപണവിധേയയായ ഹരിതകർമസേനാംഗം കത്തുനൽകിയെന്നും ഇതു ചട്ടവിരുദ്ധമാണെന്നും നഗരസഭാധ്യക്ഷയും പറയുന്നു. ഹരിത കർമസേനാംഗങ്ങളുടെ സ്വകാര്യ ഗൂഗിൾ പേ നമ്പറിലേക്ക് പണം സ്വീകരിക്കുന്നതിന് അധികൃതർ അനുമതി നൽകുന്നത് എന്തിനാണെന്ന മറുചോദ്യമാണ് ഇതേക്കുറിച്ചന്വേഷി ച്ചപ്പോൾ ഒരു ഹരിത കർമ്മസേനാംഗം പ്രതികരിച്ചത്.

പെരുന്പാവൂർ സ്‌കൂള്‍ കലോത്സവവേദിയിലേക്ക് എത്തിച്ചേരാനുള്ള റോഡ് തകര്‍ച്ചയില്‍

പെരുമ്പാവൂര്‍: പെരുന്പാവൂർ ഉപജില്ലാ സ്‌കൂള്‍ കലോത്സവം നടക്കുന്ന വെങ്ങോല ശാലേം സ്‌കൂളില്‍ എത്തിച്ചേരാനുള്ള ഏക മാര്‍ഗമായ ഓണംകുളം - ഊട്ടിമറ്റം പിഡബ്ല്യൂഡി റോഡ് തകര്‍ന്ന് കിടക്കുന്നതിനാല്‍ കലോത്സവ സ്ഥലത്തേക്ക് എത്തിചേരാന്‍ ബുദ്ധിമുട്ടായി. എൺപതില്‍പ്പരം സ്‌കൂളില്‍ നിന്നായി ആയിരക്കണക്കിന് വിദ്യാര്‍ഥികള്‍ ഉള്‍പ്പടെയുള്ളവര്‍ കലോത്സവത്തിന് എത്തിച്ചേരും. 30 വര്‍ഷത്തിലേറെയായി റീ ടാറിംഗ് ഉള്‍പ്പടെയുള്ള അറ്റകുറ്റപ്പണികള്‍ നടത്തിയിട്ട്. റോഡ് പൊട്ടിപ്പൊളിഞ്ഞ് വലിയ കുഴികള്‍ രൂപപ്പെട്ട് കാല്‍നടക്ക് പോലും കഴിയാതെ വന്നതിനാല്‍ ബസ് സര്‍വീസുകള്‍ വരെ നിര്‍ത്തിവെച്ചു. ജനങ്ങള്‍ നിരവധി നിവേദനങ്ങള്‍ സമര്‍പ്പിക്കുകയും സെക്രട്ടേറിയറ്റ് പടിക്കല്‍ വരെ സമരങ്ങള്‍ നടത്തുകയും ചെയ്തെങ്കിലും ഫലമൊന്നുമുണ്ടായില്ല. മുന്‍ പഞ്ചായത്ത് അംഗം ശിവന്‍ കദളി നവകേരള സദസില്‍ പരാതിയും നല്‍കിയിരുന്നു. നിരവധി സമരങ്ങള്‍ നടത്തിയതിനെ തുടര്‍ന്ന് റോഡ് റണ്ണിംഗ് കോണ്‍ട്രാക്ട് വ്യവസ്ഥയില്‍ നവീകരണം നടത്തുന്നതിന് ഒന്നേകാല്‍ കോടിയോളം രൂപ അനുവദിക്കുകയും, റോഡിന്‍റെ ചില ഭാഗങ്ങളില്‍ കോണ്‍ക്രീറ്റ് കട്ടകള്‍ വിരിച്ചു തുടങ്ങുകയും ചെയ്തിരുന്നു. നവകേരള പദ്ധതിയില്‍ ഉള്‍പ്പെടുത്തി ഉന്നത നിലവാരത്തില്‍ നവീകരിക്കുന്നതിനായി ഏഴ് കോടി രൂപ അനുവദിച്ചതായി പ്രഖ്യാപനം ഉണ്ടായതോടെ കട്ടവിരിക്കല്‍ പണി നിര്‍ത്തി വച്ചു. മാസങ്ങള്‍ കഴിഞ്ഞിട്ടും ഏഴ് കോടിയുടെ പദ്ധതി ആരംഭിച്ചില്ല. നടന്നുകൊണ്ടിരുന്ന പ്രവര്‍ത്തി നിര്‍ത്തിയെങ്കിലും പുതിയ പദ്ധതി ആരംഭിക്കാത്തതാണ് പുതിയ പ്രതിസന്ധിക്ക് കാരണം. ഇതു സംബന്ധിച്ച് അന്വേഷിച്ചപ്പോള്‍ ഏഴ് കോടിയുടെ പദ്ധതി ടെൻഡര്‍ നടപടികള്‍ പോലും നടത്തിയിട്ടില്ലെന്നാണ് അറിഞ്ഞത്. ഏഴ് കോടി അനുവദിച്ചതും ഭരണ-പ്രതിപക്ഷ പാര്‍ട്ടികള്‍ ബോര്‍ഡുകള്‍ മല്‍സരിച്ച് വച്ചതൊഴിച്ചാല്‍ മറ്റൊന്നും ഉണ്ടായില്ല. ടെൻഡര്‍ നടപടികള്‍ പഞ്ചായത്ത് തിരഞ്ഞെടുപ്പ് വിജ്ഞാപനത്തിന് മുന്‍പ് ഉണ്ടായില്ലെങ്കില്‍ കൂടുതല്‍ കാലതാമസത്തിന് ഇടയാകും. വെങ്ങോല സര്‍ക്കാര്‍ ആശുപത്രി, മൃഗാശുപത്രി, വെങ്ങോല സ്‌കൂള്‍ എന്നിവിടങ്ങളിലേക്കുള്ള റോഡാണിത്. നിരവധി ബസ്സുകള്‍ ഈ റോഡിലൂടെ സര്‍വീസ് നടത്തുന്നതാണ്. റോഡ് നവീകരണത്തില്‍ അധികൃതര്‍ അനാസ്ഥ കാണിക്കുന്നു. അവഗണന തുടര്‍ന്നാല്‍ നിര്‍ത്തിവച്ച സമര പരിപാടികള്‍ പുന:രാരംഭിക്കുമെന്ന് മുന്‍പഞ്ചായത്ത് അംഗം ശിവന്‍ കദളി അറിയിച്ചു.

അങ്കമാലി ഉപജില്ലാ സ്കൂൾ കലോത്സവത്തിന് തിരിതെളിഞ്ഞു

അങ്കമാലി: ഉപജില്ലാ സ്കൂൾ കലോത്സവം മൂക്കന്നൂർ സേക്രഡ് ഹാർട്ട്‌ ഓർഫനേജ് ഹൈസ്കൂളിൽ ആരംഭിച്ചു. റോജി എം. ജോൺ എംഎൽഎ ഉദ്ഘാടനം നിർവഹിച്ചു. മൂക്കന്നൂർ ഗ്രാമപഞ്ചായത്ത് പ്രസിഡന്‍റ് കെ.വി.ബിബീഷ് അധ്യക്ഷത വഹിച്ചു. എറണാകുളം ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടൻ മുഖ്യപ്രഭാഷണവും സ്കൂൾ മാനേജർ ബ്രദർ വർഗീസ് മഞ്ഞളി അനുഗ്രഹ പ്രഭാഷണവും നടത്തി. കറുകുറ്റി പഞ്ചായത്ത് പ്രസിഡന്‍റ് ലതിക ശശികുമാർ, മഞ്ഞപ്ര പഞ്ചായത്ത് പ്രസിഡന്‍റ് വത്സലകുമാരി വേണു, പഞ്ചാ. മെമ്പർമാരായ ഗ്രേസി ചാക്കോ, എൻ.ഒ. കുരിയച്ചൻ, ജസ്റ്റി ദേവസിക്കുട്ടി, സിനി മാത്തച്ചൻ, ബിജു പാലാട്ടി, ജയ രാധാകൃഷ്ണൻ, പി.വി. മോഹനൻ, കെ.എസ്. മൈക്കിൾ, പോൾ പി. ജോസഫ്, ജൊഫീന ഷാന്‍റോ തുടങ്ങിയവർ പ്രസംഗിച്ചു.

തുറവൂർ പള്ളിയിൽ മിഷൻ ഞായർ ആചരിച്ചു

അങ്കമാലി : തുറവൂർ സെന്‍റ് അഗസ്റ്റിൻസ് പള്ളിയിൽ ജീവകാരുണ്യ പ്രവർത്തനങ്ങൾക്കായി മിഷൻ ഞായർ ആചരണം നടത്തി. വികാരി ഫാ. പോൾ കോട്ടയ്ക്കൽ ഉദ്ഘാടനം ചെയ്തു. വൈസ് ചെയർമാൻ ജോയ് പടയാട്ടിൽ അധ്യക്ഷത വഹിച്ചു. ഫാമിലി യൂണിറ്റ് കേന്ദ്ര സമിതിയുടെയും, ഭക്ത സംഘടനകളുടെയും നേതൃത്വത്തിലാണ് മിഷൻ ഞായർ സംഘടിപ്പിച്ചത്. ഉത്പന്നങ്ങളുടെ ലേലം , വിവിധ തരം ഫുഡ് സ്റ്റാളുകൾ , ഭക്ത സംഘടനാ സ്റ്റാളുകൾ , ഗെയിംസ് , ബിരിയാണി ചലഞ്ച് എന്നിവ ഉണ്ടായിരുന്നു. സഹവികാരി ഫാ. സോളമൻ കരേടൻ, മദർ സുപ്പീരിയർ സിസ്റ്റർ ഡിവോഷ്യാ എസ്ഡി എന്നിവർ ചേർന്ന് ഉത്പന്നങ്ങളുടെ സ്റ്റാളിന്‍റെ ഉദ്ഘാടനം നിർവഹിച്ചു. ഇടവക ട്രസ്റ്റിമാരായ ജോസഫ് വടക്കുംഞ്ചേരി , ബിനോയ് തളിയൻ , സെൻട്രൽ കമ്മറ്റി ജനറൽ സെക്രട്ടറി സിൽവി ബൈജു , ട്രഷറർ വിജു വളപ്പിലാൻ , ജോയിന്‍റ് സെക്രട്ടറിമാരായ ബാബു വടക്കുംതല , ജെസി ജോസഫ്, സിസ്റ്റർ അൽഫി ജോസ്, ഡോണോ ദേവസിക്കുട്ടി , ജ്വലിത്ത് ജോർജ് , സിമി ജോസഫ് ,ലിസ ബാബു , ത്രേസ്യാമ്മ പൗലോസ് , ബ്രൈറ്റോ അഗസ്റ്റിൻ തുടങ്ങിയവർ പ്രസംഗിച്ചു.

സ്പെഷൽ കാമ്പയിൻ 5.0ൽ പങ്കാളികളായി എഫ്‌സിഐ കേരള മേഖല

കൊച്ചി: ഫുഡ് കോർപറേഷൻ ഓഫ് ഇന്ത്യ (എഫ്‌സി‌ഐ), കേരള മേഖല സ്പെഷൽ കാമ്പയിൻ 5.0ൽ പങ്കാളികളായി. ഗാന്ധി ജയന്തിയോടനുബന്ധിച്ച് എഫ്‌സി‌ഐ കേരള മേഖലയിൽ ആരംഭിച്ച കാമ്പയിനിൽ ഓഫീസുകളിലും ഗോഡൗണുകളിലും പരിസര പ്രദേശങ്ങളിലും ശുചീകരണ പ്രവർത്തനങ്ങൾ നടത്തി. മാസം 31 വരെ നീളുന്ന കാമ്പയിൻ പൊതു ഓഫീസുകളിലെ ശുചിത്വം, രേഖകളുടെ ഫലപ്രദമായ മാനേജ്മെന്‍റ്, മെച്ചപ്പെട്ട ജോലി സംസ്കാരം എന്നിവ പ്രോത്സാഹിപ്പിക്കുന്നതിനായാണ് കേന്ദ്രസർക്കാർ സംഘടിപ്പിച്ചിരിക്കുന്നത്.

ഓഞ്ഞിത്തോട് കൈയേറ്റം : നാല് ചെറുപാലങ്ങൾ പൊളിച്ചു മാറ്റുന്നു

ആലുവ: കടുങ്ങല്ലൂർ, ആലങ്ങാട് പഞ്ചായത്തുകളിലൂടെ ഒഴുകുന്ന ഓഞ്ഞിത്തോട് കൈയേറി പൊതുമരാമത്ത് വിഭാഗം നിർമിച്ച നാല് പാലങ്ങൾ പൊളിച്ചുകളയണമെന്ന ഓഞ്ഞിത്തോട് സംരക്ഷണ സമിതിയുടെ വർഷങ്ങളായുള്ള ആവശ്യം നടപ്പിലാക്കുന്നു. ആദ്യഘട്ടത്തിൽ ഏലൂക്കര-കയൻറിക്കര പാലമാണ് ഉടൻ തന്നെ പൊളിച്ചുപണിയുന്നത്. ഇതിനായി പ്രധാനമന്ത്രി ഗ്രാമീണ സടക് യോജന (പിഎംജിഎസ്‌വൈ) പദ്ധതി വഴിയാണ് ചെലവ് കണ്ടത്തുന്നത്. കടുങ്ങല്ലൂർ പഞ്ചായത്തിലെ ഏലൂക്കര വരട്ടുപുഴയിൽ നിന്ന് ആരംഭിച്ച് ആലങ്ങാട് പഞ്ചായത്ത് വഴി കടുങ്ങല്ലൂർ പഞ്ചായത്തിലെ എടയാർ മേഖലയിലെ പെരിയാറിൽ തിരികെ ചേരുന്ന തോടിന് ഏകദേശം 7.5 കിലോമീറ്റർ ആണ് നീളം. 2022 മാർച്ചിൽ നടത്തിയ സർവേയിൽ മൂന്ന് ഏക്കറോളം തിരിച്ചു പിടിച്ചിരുന്നു. എന്നാൽ അതിർത്തിക്കല്ലിടാൻ വീണ്ടും രണ്ടു വർഷമെടുത്തു. പാലങ്ങൾ, കെട്ടിടങ്ങൾ, കലുങ്കുകൾ, വൃക്ഷങ്ങൾ, മതിലുകൾ തുടങ്ങിയവ ഇനി പൊളിച്ചു നീക്കേണ്ടതുണ്ട്. 40 മീറ്ററിലുണ്ടായിരുന്ന തോടിന് ഇപ്പോൾ നാലു മീറ്ററാണ് വീതി. പഴയപടിയാക്കാൻ കൈയേറ്റം ഒഴിവാക്കുക മാത്രമല്ല ആഴവും കൂട്ടണം. പായലും അഴുക്കും എക്കലും മാലിന്യവും നീക്കി ഇരുവശത്തും പാർശ്വഭിത്തി കെട്ടാനും സർക്കാരിന് പദ്ധതിയുണ്ട്. പുനരുദ്ധാരണ പ്രവർത്തികൾക്കായി മന്ത്രി പി. രാജീവ് 1.4 കോടി രൂപ അനുവദിച്ചിട്ടുണ്ട്.

തിരുനാളാഘോഷം

വല്ലം ഫൊറോന പള്ളിയില്‍ പെരുമ്പാവൂര്‍: വല്ലം ഫൊറോന പള്ളിയില്‍ വിശുദ്ധ അമ്മത്രേസ്യായുടെ തിരുനാള്‍ 23 മുതൽ 26 വരെ ആഘോഷിക്കുമെന്ന് വികാരി ഫാ. സെബാസ്റ്റ്യന്‍ മാടശേരി പത്രസമ്മേളനത്തിൽ അറിയിച്ചു. തിരുനാളിനോടനുബന്ധിച്ചുള്ള നൊവേന 13ന് തുടങ്ങി. നാളെ രാവിലെ ഏഴിന് വികാരി ഫാ. സെബാസ്റ്റ്യന്‍ മാടശേരി തിരുനാള്‍ കൊടിയേറ്റും. തുടര്‍ന്ന് കുര്‍ബാന. വൈകിട്ട് ആറിന് കുര്‍ബാന, നൊവേന, ലദീഞ്ഞ്, ഫാ. ലിധിന്‍ ചെങ്ങോട്ടുതറയില്‍ കാര്‍മികത്വം വഹിക്കും. 24ന് രാവിലെ ഏഴിന് കുര്‍ബാന, ഫാ. ജിജോ കളപ്പുരയ്ക്കല്‍ കാര്‍മികത്വം വഹിക്കും. തുടര്‍ന്ന് പന്തല്‍ വെഞ്ചിരിപ്പ്, ഓഹരി നെയ്യപ്പം ചുടല്‍. വൈകിട്ട് ആറിന് കുര്‍ബാന, നൊവേന, ലദീഞ്ഞ് ഫാ. സുശീല്‍ കിഴക്കേക്കുന്നേല്‍ കാര്‍മികത്വം വഹിക്കും. 25-ന് രാവിലെ ഏഴിന് കുര്‍ബാന. ഫാ. ജോര്‍ജ് പുത്തന്‍പറമ്പില്‍ കാര്‍മികത്വം വഹിക്കും. 9.30-ന് വി. അമ്മത്രേസ്യായുടെ തിരുശേഷിപ്പും തിരുസ്വരൂപവും എഴുന്നള്ളിച്ചുവയ്ക്കല്‍, തുടര്‍ന്ന് പാട്ടുകുര്‍ബാനയ്ക്ക് ഫാ. ജസ്‌ലിന്‍ തെറ്റയില്‍ കാര്‍മികത്വം വഹിക്കും. ഫാ. ജസ്റ്റിന്‍ കൈപ്രമ്പാടന്‍ വചനസന്ദേശം നല്‍കും. തുടര്‍ന്ന് കുട്ടികളെ എഴുത്തിനിരുത്തല്‍ -ആര്‍ച്ച് ബിഷപ് മാര്‍ ആന്‍റണി കരിയില്‍ കാര്‍മികത്വം വഹിക്കും. വൈകിട്ട് 4.30-ന് സമൂഹബലി, വചന സന്ദേശം, തുടര്‍ന്ന് അങ്ങാടി പ്രദക്ഷിണം, തുടര്‍ന്ന് കരിമരുന്ന് വിസ്മയം. 26ന് രാവിലെ 5.30-ന് കുര്‍ബാന, 10-ന് പാട്ടുകുര്‍ബാന ഫാ. ലിന്‍റോ കാട്ടുപറമ്പില്‍ കാര്‍മികത്വം വഹിക്കും, ഫാ. ജോണ്‍സണ്‍ കൂവേലി വചന സന്ദേശം നല്‍കും. തുടര്‍ന്ന് പ്രസുദേന്തി വാഴ്ച്ച, അങ്ങാടി പ്രദക്ഷിണം. വൈകിട്ട് നാലിന് ആവിലാസ്പര്‍ശം-പരീക്ഷ ഒരുക്ക ശുശ്രൂഷ ഫാ. വക്കച്ചന്‍ കൂമ്പയില്‍ കാര്‍മികത്വം വഹിക്കും. അഞ്ചിന് കുര്‍ബാന ഫാ. അലന്‍ കാളിയങ്കര കാര്‍മികത്വം വഹിക്കും. പള്ളിചുറ്റി പ്രദക്ഷിണം, രൂപം എടുത്തുവയ്ക്കല്‍. തുടര്‍ന്ന് കുന്നലകാടന്‍സ് അവതരിപ്പിക്കുന്ന മെഗാ ഫ്യൂഷന്‍ ചെണ്ടമേളം. 27ന് മരിച്ചവരുടെ ഓര്‍മദിനം. രാവിലെ 6.30-ന് കുര്‍ബാന. എട്ടാമിടം നവംബര്‍ ഒന്ന്, രണ്ട് തീയതികളില്‍ ആഘോഷിക്കും. അസി. വികാരി ഫാ. ജിഫിന്‍ മാവേലി, ജന. കണ്‍വീനര്‍ ആന്‍റണി ഇടപ്പുളവന്‍, ജോയിന്‍റ് കണ്‍വീനര്‍മാരായ പാപ്പച്ചന്‍ കരോട്ടപ്പുറം, ജോണി രോട്ടപ്പുറം, കൈക്കാരന്‍മാരായ സാബു ചുള്ളി, ലിയോ പോള്‍ ആപ്പാടന്‍, ഷിജന്‍ ഉതുപ്പാന്‍, പ്ലിസിറ്റി കണ്‍വീനര്‍ പീയൂസ് തോമസ് കോച്ചിലാന്‍ എന്നിവര്‍ പത്രസമ്മേളനത്തിൽ പങ്കെടുത്തു. മൂക്കന്നൂർ സെന്‍റ് മേരീസ് ഫൊറോന പള്ളിയിൽ അങ്കമാലി : മൂക്കന്നൂർ സെന്‍റ് മേരീസ് ഫൊറോന പള്ളിയിൽ പരിശുദ്ധ വ്യാകുല മാതാവിന്‍റെ തിരുനാൾ 24,25,26 തീയതികളിൽ ആഘോഷിക്കും. തിരുനാൾ കൊടിയേറ്റം 24ന് വൈകീട്ട് 5.30-ന് അതിരൂപത വികാരി ജനറാൾ റവ. ഡോ. ജിമ്മി പൂച്ചക്കാട്ട് നിർവഹിക്കും. ലദീഞ്ഞും വിശുദ്ധ കുർബാനയും ഉണ്ടാകും. രാത്രി ഏഴിന് സെലിബ്രിറ്റി സ്റ്റാർ സിംഗേഴ്സിന്‍റെ ഗാനമേള നടക്കും. 25-ന് രാവിലെ 5.30-നും 6.45-നും ദിവ്യബലി, വൈകീട്ട് 4.45-ന് തിരുസ്വരൂപം എഴുന്നള്ളിക്കൽ, അഞ്ചിന് ആഘോഷമായ വിശുദ്ധ കുർബ്ബാനക്ക് ഫാ ജെസ്റ്റിൻ പാലിമറ്റം കാർമികത്വം വഹിക്കും . ഫാ. ബോസ്കോ ഞാളിയത്ത് പ്രസംഗിക്കും. ഭരണി പ്പറമ്പ് കപ്പേളയിലേക്ക് പ്രദക്ഷിണം, തുടർന്ന് ആകാശ വിസ്മയം, വാദ്യമേളം, ഫ്യൂഷൻ എന്നിവ നടക്കും. 26ന് തിരുനാൾ ദിനം പ്രമാണിച്ച് രാവിലെ 6.45 നും 9.30-നും 11.30-നും വിശുദ്ധ കുർബ്ബാന, വൈകീട്ട് അഞ്ചിന് ആഘോഷമായ പാട്ടുകുർബാന - ഫാ. പോൾസൺ പെരേപ്പാടൻ, പ്രസംഗം - ഫാ. സനു പുതുശേരി, തുടർന്ന് തെക്ക് വടക്കേ അങ്ങാടി പ്രദക്ഷിണം, വാദ്യമേളം, ഫ്യൂഷൻ എന്നിവയാണ് പരിപാടികൾ. പാലാരിവട്ടം സെന്‍റ് ജോൺ ദി ബാപ്റ്റിസ്റ്റ് പള്ളിയിൽ പാലാരിവട്ടം: സെന്‍റ് ജോൺ ദി ബാപ്റ്റിസ്റ്റ് പള്ളിയിൽ വിശുദ്ധ റാഫേൽ മാലാഖയുടെ തിരുനാൾ 24 മുതൽ 26 വരെ ആഘോഷിക്കും. 24 ന് രാവിലെ 10.30 ന് ദിവ്യബലി, നൊവേന, വൈകിട്ട് അഞ്ചിന് പ്രസുദേന്തി വാഴ്ച. തുടർന്ന് കൊടിയേറ്റ്. ദിവ്യബലിക്ക് ഫാ .സെബാസ്റ്റ്യൻ കുരിശുവീട്ടിൽ കാർമികത്വം വഹിക്കും. ഫാ. സാവിയോ ആന്‍റണി തെക്കേപാടത്ത് പ്രസംഗിക്കും. 25 ന് വൈകുന്നേരം അഞ്ചിന് ഫാ.മാർട്ടിൻ തൈപ്പറമ്പിലിന്‍റെ കാർമികത്വത്തിൽ ദിവ്യബലി. ഫാ. ഷെറിൻ ചെമ്മായത്ത് പ്രസംഗിക്കും. തിരുനാൾ ദിനമായ 26ന് വൈകിട്ട് 5.30ന് ആഘോഷമായ ദിവ്യബലിക്ക് ഫാ.സിജൻ മണുവേലിപ്പറമ്പിൽ കാർമികനാകും. പ്രസംഗം: ഫാ.എബിൻ ജോസ് വാരിയത്ത്തിരുനാൾ ഏറ്റെടുത്തു നടത്തുന്നത് 20 പേർ അടങ്ങുന്ന യുവ തേജസ് അംഗങ്ങളാണെന്ന് വികാരി ഫാ.ജോജി കുത്തുകാട്ട് അറിയിച്ചു.

രക്തദാന ക്യാമ്പ് നടത്തി

കോതമംഗലം: സർവീസിലിരിക്കെ ജീവൻ നഷ്ടപ്പെട്ട പോലീസ് ഉദ്യോഗസ്ഥരെ അനുസ്മരിച്ച് പോലീസ് ഡിപ്പാർട്ട്മെന്‍റ് സംസ്ഥാനതലത്തിൽ നടപ്പാക്കുന്ന മെഗാ രക്തദാന ക്യാമ്പ് സംരക്ഷ പെരുമ്പാവൂർ ഡിവൈഎസ്പി ഓഫീസിൽ നടത്തി.കോതമംഗലം സെന്‍റ് ജോസഫ് ധർമഗിരി ആശുപത്രിയുടെ സഹകരണത്തോടെയാണ് രക്തദാന ക്യാമ്പ് നടത്തിയത്. പെരുമ്പാവൂർ മേഖലയിലെ വിവിധ സ്റ്റേഷനുകളിൽ നിന്നുള്ള പോലീസ് ഉദ്യോഗസ്ഥരും, പൊതുജനങ്ങളും ഉൾപ്പെടെ നിരവധി പേർ രക്തദാനത്തിൽ പങ്കാളികളായി. ഇൻസ്പെക്ടർമാരായ ജി.പി മനുരാജ്, ജോസി എം. ജോൺസൻ, എം.എസ്. ശിവൻ, സെന്‍റ് ജോസഫ് ഹോസ്പിറ്റൽ അസിസ്റ്റന്‍റ് നഴ്സിംഗ് സൂപ്രണ്ട് സിസ്റ്റർ റോസിൻ, പിആർഒ ജിറ്റോ ഷൈജു, ബ്ലഡ്‌ ബാങ്ക് ഇൻചാർജ് സിസ്റ്റർ സ്റ്റെല്ല മരിയ, സിസ്റ്റർ സോഫിൻ എന്നിവർ നേതൃത്വം നൽകി.

വല്ലം ഫൊറോന പള്ളിയില്‍ തിരുനാളിനു നാളെ കൊടിയേറും

പെരുമ്പാവൂര്‍: വല്ലം ഫൊറോന പള്ളിയില്‍ വിശുദ്ധ അമ്മത്രേസ്യായുടെ തിരുനാള്‍ 23 മുതൽ 26 വരെ ആഘോഷിക്കുമെന്ന് വികാരി ഫാ. സെബാസ്റ്റ്യന്‍ മാടശേരി പത്രസമ്മേളനത്തിൽ അറിയിച്ചു. തിരുനാളിനോടനുബന്ധിച്ചുള്ള നൊവേന 13ന് തുടങ്ങി. നാളെ രാവിലെ ഏഴിന് വികാരി ഫാ. സെബാസ്റ്റ്യന്‍ മാടശേരി തിരുനാള്‍ കൊടിയേറ്റും. തുടര്‍ന്ന് കുര്‍ബാന. വൈകിട്ട് ആറിന് കുര്‍ബാന, നൊവേന, ലദീഞ്ഞ് ഫാ. ലിധിന്‍ ചെങ്ങോട്ടുതറയില്‍ കാര്‍മികത്വം വഹിക്കും. 24ന് രാവിലെ ഏഴിന് കുര്‍ബാന, ഫാ. ജിജോ കളപ്പുരയ്ക്കല്‍ കാര്‍മികത്വം വഹിക്കും. തുടര്‍ന്ന് പന്തല്‍ വെഞ്ചിരിപ്പ്, ഓഹരി നെയ്യപ്പം ചുടല്‍. വൈകിട്ട് ആറിന് കുര്‍ബാന, നൊവേന, ലദീഞ്ഞ് ഫാ. സുശീല്‍ കിഴക്കേക്കുന്നേല്‍ കാര്‍മികത്വം വഹിക്കും. 25ന് രാവിലെ ഏഴിന് കുര്‍ബാന. ഫാ. ജോര്‍ജ് പുത്തന്‍പറമ്പില്‍ കാര്‍മികത്വം വഹിക്കും. 9.30ന് വി. അമ്മത്രേസ്യായുടെ തിരുശേഷിപ്പും തിരുസ്വരൂപവും എഴുന്നള്ളിച്ചുവയ്ക്കല്‍, തുടര്‍ന്ന് പാട്ടുകുര്‍ബാനയ്ക്ക് ഫാ. ജസ്‌ലിന്‍ തെറ്റയില്‍ കാര്‍മികത്വം വഹിക്കും. ഫാ. ജസ്റ്റിന്‍ കൈപ്രമ്പാടന്‍ വചനസന്ദേശം നല്‍കും. തുടര്‍ന്ന് കുട്ടികളെ എഴുത്തിനിരുത്തല്‍ ആര്‍ച്ച് ബിഷപ് മാര്‍ ആന്‍റണി കരിയില്‍ കാര്‍മികത്വം വഹിക്കും. വൈകിട്ട് 4.30ന് സമൂഹബലി, വചന സന്ദേശം, തുടര്‍ന്ന് അങ്ങാടി പ്രദക്ഷിണം, തുടര്‍ന്ന് കരിമരുന്ന് വിസ്മയം. 26ന് രാവിലെ 5.30ന് കുര്‍ബാന, 10ന് പാട്ടുകുര്‍ബാന ഫാ. ലിന്‍റോ കാട്ടുപറമ്പില്‍ കാര്‍മികത്വം വഹിക്കും, ഫാ. ജോണ്‍സണ്‍ കൂവേലി വചന സന്ദേശം നല്‍കും. തുടര്‍ന്ന് പ്രസുദേന്തി വാഴ്ച്ച, അങ്ങാടി പ്രദക്ഷിണം. വൈകിട്ട് നാലിന് ആവിലാസ്പര്‍ശം-പരീക്ഷ ഒരുക്ക ശുശ്രൂഷ ഫാ. വക്കച്ചന്‍ കൂമ്പയില്‍ കാര്‍മികത്വം വഹിക്കും. അഞ്ചിന് കുര്‍ബാന ഫാ. അലന്‍ കാളിയങ്കര കാര്‍മികത്വം വഹിക്കും. പള്ളിചുറ്റി പ്രദക്ഷിണം, രൂപം എടുത്തുവയ്ക്കല്‍. തുടര്‍ന്ന് കുന്നലകാടന്‍സ് അവതരിപ്പിക്കുന്ന മെഗാ ഫ്യൂഷന്‍ ചെണ്ടമേളം. 27ന് മരിച്ചവരുടെ ഓര്‍മദിനം. രാവിലെ 6.30ന് കുര്‍ബാന. എട്ടാമിടം നവംബര്‍ ഒന്ന്, രണ്ട് തീയതികളില്‍ ആഘോഷിക്കും. അസി. വികാരി ഫാ. ജിഫിന്‍ മാവേലി, ജന. കണ്‍വീനര്‍ ആന്‍റണി ഇടപ്പുളവന്‍, ജോയിന്‍റ് കണ്‍വീനര്‍മാരായ പാപ്പച്ചന്‍ കരോട്ടപ്പുറം, ജോണി രോട്ടപ്പുറം, കൈക്കാരന്‍മാരായ സാബു ചുള്ളി, ലിയോ പോള്‍ ആപ്പാടന്‍, ഷിജന്‍ ഉതുപ്പാന്‍, പ്ലിസിറ്റി കണ്‍വീനര്‍ പീയൂസ് തോമസ് കോച്ചിലാന്‍ എന്നിവര്‍ പത്രസമ്മേളനത്തിൽ പങ്കെടുത്തു.

ദേശീയ തപാൽ ദിനാചരണം നടത്തി

കോതമംഗലം: വൈസ്മെൻ ക്ലബ് ഓഫ് നെല്ലിമറ്റം ഡയമണ്ട്സ് ദേശീയ പോസ്റ്റൽ ദിനാചരണവും, മൈ സ്റ്റാമ്പ് പദ്ധതിയുടെ ഭാഗമായി പുതിയ സ്റ്റാമ്പ് പ്രകാശനവും നടത്തി. പ്രസിഡന്‍റ് ഷാജി മാത്യു അധ്യക്ഷത വഹിച്ചു. വൈസ്മെൻ ഡിസ്ട്രിക്ട് ഗവർണർ മിൽസൺ ജോർജ് ഉദ്ഘാടനം നിർവഹിച്ചു. ക്ലബിന്‍റെ പേരിൽ ആരംഭിച്ച സ്റ്റാമ്പിന്‍റെ പ്രകാശനം ആലുവ പോസ്റ്റൽ ഡിപ്പാർട്ട്മെന്‍റ് മാർക്കറ്റിംഗ് എക്സിക്യുട്ടിവ് ഷിനു അലിയാർ നിർവഹിച്ചു. കവളങ്ങാട് പഞ്ചായത്ത് പ്രസിഡന്‍റായി ചുമതലയേറ്റ ഷിബു വടവരമ്പത്തിനെയും, നെല്ലിമറ്റം പോസ്റ്റ് ഓഫീസിൽ കഴിഞ്ഞ 12 വർഷം സേവനം ചെയ്ത വി.ടി. സുധയെയും ആദരിച്ചു. വൈസ് മെൻ ഇന്‍റർനാഷണൽ കമ്മിറ്റി അംഗം ലൈജു ഫിലിപ്പ് , ടോമി ചെറുകാട്ട്, ബിനോയി പോൾ, ബേബിച്ചൻ നിധീരിക്കൽ, ജോർജ് എടപ്പാറ, ലിസി ടോമി എന്നിവർ പ്രസംഗിച്ചു.

കോൺഗ്രസ് പദയാത്ര നടത്തി

പോത്താനിക്കാട്: കോൺഗ്രസ് പോത്താനിക്കാട് മണ്ഡലം കമ്മിറ്റിയുടെ നേതൃത്വത്തിൽ പഞ്ചായത്തിലുടനീളം നടത്തിയ ജനപക്ഷ യാത്രയുടെ സമാപന സമ്മേളനം ഡിസിസി പ്രസിഡന്‍റ് മുഹമ്മദ് ഷിയാസ് ഉദ്ഘാടനം ചെയ്തു. ജാഥാ ക്യാപ്റ്റൻ ഷാജി ചെനയപ്പിള്ളിയുടെ നേതൃത്വത്തിൽ പറമ്പഞ്ചേരിയിൽ നിന്നാരംഭിച്ച യാത്രയ്ക്ക് മാത്യു കുഴൽനാടൻ എംഎൽഎ പതാക കൈമാറി. കോൺഗ്രസ് മഞ്ഞള്ളൂർ ബ്ലോക്ക് പ്രസിഡന്‍റ് സുബാഷ് കടയ്ക്കോട്ട്, പോത്താനിക്കാട് പഞ്ചായത്ത് പ്രസിഡന്‍റ് സജി കെ. വർഗീസ്, ആശ ജിമ്മി തുടങ്ങിയവർ പ്രസംഗിച്ചു. മൂവാറ്റുപുഴ : കേന്ദ്ര സംസ്ഥാന സര്‍ക്കാരുകളുടെ ജനദ്രോഹ നയങ്ങള്‍ക്കെതിരെ കോണ്‍ഗ്രസ് വാളകം മണ്ഡലം പ്രസിഡന്‍റ് ജോളി മോന്‍ ചുണ്ടയിലിന്‍റെ നേതൃത്വത്തിൽ ജനപക്ഷ യാത്ര വാളകം പഞ്ചായത്തിന്‍റെ വിവിധ പ്രദേശങ്ങളില്‍ നടത്തി. കാൽനടയായി നടത്തിയ യാത്ര കടാതി പാലം ജംഗ്ഷനില്‍ ഡീന്‍ കുര്യാക്കോസ് എംപി ഉദ്ഘാടനം ചെയ്തു. പദയാത്രയില്‍ മാത്യൂ കുഴല്‍നാടന്‍ എംഎല്‍എ, കെപിസിസി സെക്രട്ടറി കെ.എം. സലിം, ബ്ലോക്ക് പ്രസിഡന്‍റ് സാബു ജോണ്‍, വൈസ് പ്രസിഡന്‍റ് കെ.ഒ ജോര്‍ജ്, പഞ്ചായത്ത് പ്രസിഡന്‍റ് കെ.പി. അബ്രഹാം, ബിനോ കെ. ചെറിയാന്‍, സാബു പി. വാഴയില്‍, ഒ.വി ബാബു, തുടങ്ങിയവർ പങ്കെടുത്തു.

ബസിടിച്ച് വൈദ്യുത പോസ്റ്റ് തകര്‍ന്നു

മൂവാറ്റുപുഴ: എസ്എന്‍ഡിപി ജംഗ്ഷനിൽ ബസ് ഇടിച്ച് റോഡരികിലെ വൈദ്യുത പോസ്റ്റ് തകര്‍ന്നു. യാത്രക്കാർക്ക് ആർക്കും പരിക്കില്ല. ഇന്നലെ രാവിലെയായിരുന്നു സംഭവം. കെഎസ്ഇബി ഉദ്യോഗസ്ഥര്‍ സ്ഥലത്തെത്തി ഒടിഞ്ഞ പോസ്റ്റ് നീക്കം ചെയ്ത് പുതിയത് സ്ഥാപിച്ചു. പിഒ ജംഗ്ഷന്‍ മുതല്‍ കച്ചേരിത്താഴം വരെയുള്ള നാലുവരി വാഹന ഗതാഗതം ആരംഭിച്ചതും മീഡിയനും ഇരുവശങ്ങളിലും അഞ്ചടിയിലേറെ ഉയരത്തില്‍ ഇരുമ്പ് കൈവരികൾ സ്ഥാപിച്ചതും അപകടത്തിനു കാരണമാകുന്നുവെന്ന് നാട്ടുകാർ ആരോപിച്ചു.

വിവാദങ്ങൾക്കൊടുവിൽ കൂത്താട്ടുകുളത്തെ മിനി മാസ്റ്റ് ലൈറ്റ് ഉദ്ഘാടനം ചെയ്തു

കൂത്താട്ടുകുളം : ഉദ്ഘാടനത്തിന് മണിക്കൂറുകൾക്ക്‌ മുൻപ് മിനി മാസ്റ്റ് ലൈറ്റിന്‍റെ സപ്പോർട്ടിംഗ് പോസ്റ്റ് മാറ്റിസ്ഥാപിച്ചു. സിപിഎമ്മിന്‍റെ കൊടിമരത്തിന് മറവായ വൈദ്യുതി പോസ്റ്റാണ് പരാതിയെ തുടർന്ന് മാറ്റി സ്ഥാപിച്ചത്. കൂത്താട്ടുകുളം അരഞ്ഞാണിതാഴത്ത് ഫ്രാൻസിസ് ജോർജ് എംപി യുടെ പ്രാദേശിക വികസന ഫണ്ട് ഉപയോഗിച്ച് സ്ഥാപിച്ച മിനി മാസ്റ്റ് ലൈറ്റിലേക്ക് വൈദ്യുതി എത്തിക്കുന്നതിന് സ്ഥാപിച്ചിട്ടുള്ള പോസ്റ്റാണ് മാറ്റി സ്ഥാപിച്ചത്. ഇന്നലെ വൈകുന്നേരം ആറിന് ഉദ്ഘാടനം നടത്താനിരിക്കെയാണ് കെഎസ്ഇബിയുടെ നടപടി. ഈ ലൈറ്റ് ഇന്നലെ ഉദ്ഘാടനം ചെയ്യാൻ കഴിയില്ല എന്നാണ് കെഎസ്ഇബി ഉദ്യോഗസ്ഥർ വാർഡ് കൗൺസിലറെ അറിയിച്ചത്. പോസ്റ്റ് മൂലം സമീപമുള്ള സിപിഎമ്മിന്‍റെ കൊടിമരം മറഞ്ഞുപോകും എന്ന് സിപിഎം നേതൃത്വം കെഎസ്ഇബി എഇയ്ക്ക്‌ രേഖാമൂലം പരാതി നൽകിയിട്ടുണ്ടെന്നും പോസ്റ്റ് മാറ്റി സ്ഥാപിച്ചശേഷമേ മിനി മാസ്റ്റ് ലൈറ്റിലേക്ക്‌ വൈദ്യുതി നൽകാൻ കഴിയുകയുള്ളൂ എന്നുമായിരുന്നു കെഎസ്ഇബിയുടെ ആദ്യ നിലപാട്. പിന്നീട് കെഎസ്ഇബിയുടെ പ്രവർത്തിയെ വാർഡ് മെമ്പർ ചോദ്യം ചെയ്തതിന്‍റെ അടിസ്ഥാനത്തിൽ പോസ്റ്റ് മാറ്റി സ്ഥാപിച്ച് ഉദ്ഘാടനത്തിനുള്ള സൗകര്യം ഒരുക്കുകയായിരുന്നു. അതിനിടെ നഗരസഭാ പ്രദേശത്ത് സ്ഥാപിച്ചിട്ടുള്ള രാഷ്ട്രീയപാർട്ടികളുടെ കൊടിമരങ്ങളും ഫ്ലക്സ് ബോർഡുകളും നഗരസഭാ പരിധിയിൽ നീക്കം ചെയ്യണമെന്ന ഹൈക്കോടതി ഉത്തരവ് നിലനിൽക്കെയാണ് കെഎസ്ഇബി ഇത്തരത്തിലുള്ള ഒരു പ്രവർത്തി ചെയ്യുന്നതെന്ന് വാർഡ് കൗൺസിലർ പ്രിൻസ് പോൾ ജോൺ പറഞ്ഞു.

ശാസ്ത്ര സാങ്കേതിക മേള: ആയവന ഗവ. ടെക്‌നിക്കല്‍ ഹൈസ്‌കൂളിന് ‍ഉന്നത വിജയം

മൂവാറ്റുപുഴ : ആയവന ഗവ. ടെക്‌നിക്കല്‍ ഹൈസ്‌കൂളിന് സംസ്ഥാന ശാസ്ത്ര സാങ്കേതിക മേളയില്‍ ഉന്നത വിജയം. കൃഷ്ണപുരം ഗവ. ടെക്‌നിക്കല്‍ ഹൈസ്‌കൂളില്‍ നടന്ന ഏഴാമത് അഖിലകേരള ശാസ്ത്ര സാങ്കേതിക മേളയില്‍ ഇലക്ട്രിക്കല്‍ വിഭാഗത്തില്‍, പത്താം ക്ലാസ് വിദ്യാര്‍ഥിയായ എല്‍ഡിന്‍ എല്‍സന്‍ എ ഗ്രേഡും ഗണിതശാസ്ത്ര വിഭാഗത്തില്‍ മുഹമ്മദ് സീനാനും, ആദര്‍ശ് വിമലും എ ഗ്രേഡുകള്‍ കരസ്ഥമാക്കി. ഓട്ടോമൊബൈല്‍ വര്‍ക്കിംഗ് മോഡല്‍ വിഭാഗത്തില്‍ എല്‍വിന്‍ ഷിജോ, ത്രെഡ് പാറ്റേണ്‍ വിഭാഗത്തില്‍ മാത്യൂസ് ബിജുവും എ ഗ്രേഡുകള്‍ കരസ്ഥമാക്കിയതോടൊപ്പം പ്രൊഡക്ട് യൂസിംഗ് വേസ്റ്റ് മെറ്റീരിയല്‍ വിഭാഗത്തില്‍ ഗോവിന്ദ സുരേഷും ബി ഗ്രേഡ് നേടി.

വോട്ടർപട്ടികയിൽ നിന്ന് കന്യാസ്ത്രീകളെ ഒഴിവാക്കാൻ ശ്രമിക്കുന്നതായി പരാതി

കൂത്താട്ടുകുളം : നഗരസഭയിലെ വോട്ടർ പട്ടികയിൽ നിന്ന് കന്യാസ്ത്രീ സമൂഹത്തെ ഉൾപ്പെടെ മനപൂർവം ഒഴിവാക്കാൻ ശ്രമിക്കുന്നതായി പരാതി. നഗരസഭയിലെ ഏഴാം ഡിവിഷനിൽ ദേവമാതാ കോൺവെന്‍റിലെ പതിമൂന്ന് കന്യാസ്ത്രീകളെയും സമീപത്തു തന്നെയുള്ള കരുണാഭവനിലെ അന്തേവാസിയെയുമാണ് പട്ടികയിൽ നിന്ന് ഒഴിവാക്കാൻ ശ്രമിക്കുന്നതായി പരാതി ഉയർന്നിരിക്കുന്നത്. നിലവിൽ പ്രസിദ്ധീകരിച്ചിട്ടുള്ള വോട്ടർ പട്ടികയിൽ പെടുന്ന കന്യാസ്ത്രീകൾ അടക്കമുള്ള 14 പേർ ഇവിടുത്തെ സ്ഥിരതാമസക്കാരല്ല എന്ന് കാണിച്ച് ഡിവൈഎഫ്ഐ പ്രവർത്തകർ നഗരസഭാ സൂപ്രണ്ടിന് പരാതി നൽകിയിരുന്നു. പരാതിയുടെ അടിസ്ഥാനത്തിൽ 14 പേരെയും നഗരസഭയിൽ വിളിച്ചുവരുത്തി ബയോമെട്രിക്കൽ സംവിധാനങ്ങൾ ഉപയോഗിച്ച് രേഖകൾ പരിശോധിക്കുകയും പരാതി തള്ളുകയും ചെയ്തു. നിലവിൽ വീണ്ടും ഇതേ 14 പേർക്കെതിരെ ഡിവൈഎഫ്ഐ നേതൃത്വം പരാതി നൽകിയിരിക്കുകയാണ്. പരാതി ലഭിച്ച സാഹചര്യത്തിൽ വീണ്ടും രേഖകൾ പരിശോധിക്കുന്നതിന് ഇവർ നഗരസഭയിൽ ഹാജരാകണം എന്നാണ് നഗരസഭാധികൃതർ അറിയിച്ചിട്ടുള്ളത്. ഹാജരാക്കാത്ത പക്ഷം പുതിയ പട്ടികയിൽ നിന്ന് ഇവരെ ഒഴിവാക്കും. ഇത്തരത്തിലുള്ള നടപടികൾ വളരെയധികം ബുദ്ധിമുട്ടുകൾ ഉണ്ടാക്കുന്നുണ്ടെന്ന് ദേവമാതാ കോൺവെന്‍റിലെ മദർ സുപ്പീരിയർ സിസ്റ്റർ ആൻസി എസ്എബിഎസ്, വാർഡ് കൗൺസിലർ റോയി ഇരട്ടയാനിക്കൽ എന്നിവർ പറഞ്ഞു. കളക്ടർ ഉൾപ്പെടെയുള്ളവർക്ക് പരാതി നൽകാൻ ഒരുങ്ങുകയാണ് ഇവർ.

പ്ലൈവുഡ് കമ്പനികളിലെ മാലിന്യ പ്രശ്‌നം: പട്ടികജാതി കമ്മീഷന്‍ തെളിവെടുത്തു

മൂവാറ്റുപുഴ : പായിപ്ര മാനാറി പ്രദേശങ്ങളിലെ പ്ലൈവുഡ് കമ്പനികളിലെ മാലിന്യ പ്രവാഹത്തിനെതിരെ ജനരോഷം ശക്തമായതോടെ പട്ടികജാതി കമ്മീഷൻ തെളിവെടുപ്പ് നടത്തി. ബ്ലോക്ക് പഞ്ചായത്തംഗം എം.എ. റിയാസ്ഖാന്‍റെ പരാതിയുടെ അടിസ്ഥാനത്തിലായിരുന്നു പട്ടികജാതി കമ്മീഷന്‍റെ തെളിവെടുപ്പ്. കമ്മീഷന്‍ അംഗം പി.കെ. വാസുവിന്‍റെ നേതൃത്വത്തിലാണ് പൊതുജനങ്ങളുടെ പരാതികൾ നേരിട്ട് കേട്ടത്. തുടര്‍ന്ന് പായിപ്ര പഞ്ചായത്തിലെത്തിയ കമ്മീഷന്‍ പഞ്ചായത്ത് സെക്രട്ടറി, പൊല്യൂഷന്‍ കമ്മീഷന്‍, മെഡിക്കല്‍ ഓഫീസര്‍ എന്നിവരില്‍ നിന്നും വിവരങ്ങള്‍ ശേഖരിച്ചു. 30 ദിവസത്തിനകം പഞ്ചായത്തും, പൊല്യൂഷന്‍ കമ്മീഷനും, മെഡിക്കല്‍ ഓഫീസറും പട്ടികജാതി കമ്മീഷന് റിപ്പോര്‍ട്ട് നല്‍കണമെന്ന് നിര്‍ദേശവും നല്‍കി. ബ്ലോക്ക് പഞ്ചായത്തംഗം എം.എ. റിയാസ്ഖാന്‍, പികെഎസ് സംസ്ഥാന ട്രഷറര്‍ വി.ആര്‍. ശാലിനി, പഞ്ചായത്ത് സെക്രട്ടറി ബൈജു ബേബി, പൊല്യൂഷന്‍ ഉദ്യോഗസ്ഥന്‍ നോബി ജോണ്‍, പട്ടികജാതി വികസന ഓഫീസര്‍ പി. ചിത്ര, സിപിഎം ലോക്കല്‍ സെക്രട്ടറി ബാബു ബേബി, പായിപ്ര സഹകരണ ബാങ്ക് പ്രസിഡന്‍റ് കെ.എസ്. രങ്കേഷ്പഞ്ചായത്ത് സെക്രട്ടറി കെ.എം. രാജമോഹനന്‍ എന്നിവരും സ്ഥലത്തുണ്ടായിരുന്നു. photo: പായിപ്ര, മാനാറി പ്രദേശങ്ങളിലെ പ്ലൈവുഡ് കമ്പനികളിലെ മാലിന്യ പ്രവാഹത്തിനെതിരെ ലഭിച്ച പരാതിയുടെ അടിസ്ഥാനത്തില്‍ പട്ടികജാതി കമ്മീഷന്‍ അംഗം ടി.കെ. വാസുവിന്‍റെ നേതൃത്വത്തില്‍ തെളിവെടുപ്പ് നടത്തുന്നു

കോണ്‍ഗ്രസിന് മുഖ്യമന്ത്രിയുടെ ഒളിയമ്പ് : ഉമ്മന്‍ചാണ്ടിയുടെ പേര് പറഞ്ഞ് മറുപടി

കൊച്ചി: രണ്ടു പതിറ്റാണ്ട് മുടങ്ങിയും ഇഴഞ്ഞും നീങ്ങിയ കൊച്ചി കോര്‍പറേഷന്‍ പുതിയ ആസ്ഥാന മന്ദിരത്തിന്‍റെ നിര്‍മാണ പൂര്‍ത്തീകരണത്തിന്‍റെ ക്രെഡിറ്റ് തനിക്കോ ഈ കൗണ്‍സിലിനോ മാത്രം അവകാശപ്പെട്ടതല്ലെന്ന് മേയര്‍ എം. അനില്‍കുമാര്‍ പറഞ്ഞ അതേ വേദിയില്‍ കോൺഗ്രസിനെതിരേ മുഖ്യമന്ത്രിയുടെ ഒളിയമ്പ്. അതിനു കോണ്‍ഗ്രസ് മറുപടി നല്‍കിയാകട്ടെ, മുന്‍ മുഖ്യമന്ത്രി ഉമ്മന്‍ചാണ്ടിയുടെ പേര് എടുത്തു പറഞ്ഞും. കോര്‍പറേഷന്‍ എല്‍ഡിഎഫ് ഭരണ സമിതി കഴിഞ്ഞ അഞ്ച് വര്‍ഷക്കാലം ചെയ്ത വികസന പ്രവര്‍ത്തനങ്ങളായിരുന്നു മുഖ്യമന്ത്രി പിണറായി വിജയന്‍ പ്രസംഗത്തില്‍ ഊന്നിപ്പറഞ്ഞത്. 2006ല്‍ പുതിയ കോര്‍പറേഷന്‍ ആസ്ഥാന മന്ദിരത്തിനായി സ്ഥലം വാങ്ങുമ്പോള്‍ എത്രയും വേഗം നിര്‍മാണം പൂര്‍ത്തീകരിക്കണമെന്നതായിരുന്നു ലക്ഷ്യം. എന്നാല്‍ നിശ്ചയിച്ച സമയത്ത് പൂര്‍ത്തീകരിക്കാന്‍ കഴിഞ്ഞില്ല. ഇപ്പോള്‍ നിര്‍മാണം പൂര്‍ത്തീകരിക്കാന്‍ കഴിഞ്ഞു. മുടങ്ങിയതിന്‍റെ കാരണങ്ങള്‍ ഇപ്പോള്‍ വിശദീകരിക്കേണ്ടതില്ല എന്നും മുഖ്യമന്ത്രി പറഞ്ഞു. 20 വര്‍ഷങ്ങള്‍ക്ക് മുന്‍പ് 30 ലക്ഷം വില ഉണ്ടായിരുന്ന ഭൂമി ജിസിഡിഎയില്‍ നിന്ന് ഒരു ലക്ഷം രൂപയ്ക്ക് വാങ്ങി നല്‍കിയത് ഉമ്മന്‍ചാണ്ടി മുഖ്യമന്ത്രിയായിരുന്ന കാലത്താണെന്നും ഡിപിആറിലെ പിഴവ് മൂലം ഉണ്ടായ തടസം പരിഹരിക്കാന്‍ തുക വര്‍ധിപ്പിച്ചുള്ള എസ്റ്റിമേറ്റ് അംഗീകാരിച്ചത് കോണ്‍ഗ്രസ് ഭരണകാലത്താണെന്നുമാണ് മുഖ്യമന്ത്രിക്ക് മറുപടിയായി ഹൈബി ഈഡന്‍ എംപി പറഞ്ഞത്. തുടര്‍ന്ന് പ്രസംഗിച്ച മന്ത്രി പി.രാജീവും യുഡിഎഫ് ഭരണസമിതികളെ "കുത്തി' സംസാരിച്ചു. ആസ്ഥാന മന്ദിര നിര്‍മാണത്തില്‍ അവകാശം ഉന്നയിക്കുന്നവര്‍ നിര്‍മാണം മുടങ്ങിയതിന്‍റെ ഉത്തരവാദിത്വംകൂടി ഏറ്റെടുക്കണമെന്നായിരുന്നു മന്ത്രിയുടെ പരാമര്‍ശം. ഇതിനുള്ള മറുപടി കൂടിയായിരുന്നു ഉമ്മന്‍ചാണ്ടിയുടെ പേര് പരാമര്‍ശിച്ചുകൊണ്ടുള്ള ഹൈബി ഈഡന്‍റെ പ്രസംഗം. നിര്‍മാണത്തിന് തുടക്കമിട്ട് സ്ഥാപിച്ച ഫലകം കണ്ടെടുത്ത് പുതിയ ആസ്ഥാന മന്ദിരത്തിനു മുന്നില്‍ തന്നെ പ്രദര്‍ശിപ്പിക്കണമെന്ന് തുടര്‍ന്ന് പ്രസംഗിച്ച കോണ്‍ഗ്രസ് എംഎല്‍എമാരും ആവശ്യപ്പെട്ടു.

റവന്യൂ ജില്ലാ ശാസ്ത്രമേള: ലോഗോ ക്ഷണിച്ചു

കോതമംഗലം: എറണാകുളം റവന്യൂ ജില്ലാ ശാസ്ത്ര മേള 2025 -26 ആൻഡ് വിഎച്ച്എസ്ഇ സ്കിൽ ഫെസ്റ്റിന് ലോഗോ ക്ഷണിച്ചു. 30, 31 നവംബർ ഒന്ന് തീയതികളിൽ കോതമംഗലം സെന്‍റ് ആഗസ്റ്റിൻസ് ജിഎച്ച്എസ്എസ്, മാർ ബേസിൽ എച്ച്എസ്എസ്, സെന്‍റ് ജോർജ് എച്ച്എസ്എസ്, ശോഭന എച്ച്എച്ച്എസ് എന്നിവിടങ്ങളിൽ ജില്ലാ ശാസ്ത്രമേളയും കോട്ടപ്പടി മാർ ഏലിയാസ് എച്ച്എസ്എസിൽ വിഎച്ച്എസ്ഇ സ്കിൽ ഫെസ്റ്റും നടത്തും. റവന്യൂ ജില്ല ശാസ്ത്രമേളയ്ക്കായി ജില്ലയിലെ എല്ലാ ഗവൺമെന്‍റ്, എയ്ഡഡ്, അംഗീകൃത അൺഎയ്ഡഡ് സ്കൂൾ വിദ്യാർഥികൾക്ക് ലോഗോ മത്സരത്തിൽ പങ്കെടുക്കാം. ശാസ്ത്രമേളയിലെ വിവിധ ഇനങ്ങളുമായി ബന്ധപ്പെട്ട പ്രതീകങ്ങൾ ഉൾപ്പെടുത്തിയാകണം ലോഗോ തയാറാക്കേണ്ടത് എറണാകുളം ജില്ലയുടെതായ പ്രതീകവും ഉൾപ്പെടുത്താം. സ്കൂളുകളിൽ നൽകിയിട്ടുള്ള ഉബുണ്ടു ഓപ്പറേറ്റിംഗ് സിസ്റ്റം അടിസ്ഥാനമാക്കി സ്വതന്ത്ര സോഫ്റ്റ്‌വേർ ഉപയോഗിച്ച് വേണം ലോഗോ തയാറാക്കാൻ. ലോഗോയുടെ വലിപ്പം 720x480 പിക്സൽ സൈസിൽ ആയിരിക്കണം. തയാറാക്കുന്ന ലോഗോയുടെ എഡിറ്റ് ചെയ്യാവുന്ന തരത്തിലുള്ള ഫയൽ നാളെ [email protected] എന്ന ഈമെയിലിലേക്ക് അയക്കണം. ലോഗോയിൽ നിർബന്ധമായും റവന്യു ജില്ല ശാസ്ത്രമേള 2025-26, 2025 ഒക്ടോബർ 30, 31, നവംബർ ഒന്ന് ഉൾപ്പെടുത്തിയിരിക്കണം. ലോഗോ തയാറാക്കിയ കുട്ടിയുടെ പേര്, സ്കൂൾ, ഫോൺ നമ്പര്, കുട്ടിയുടെ ഫോട്ടോ എന്നിവ നിർബന്ധമായും നൽകിയിരിക്കണമെന്ന് എറണാകുളം ജില്ല വിദ്യാഭ്യാസ ഉപഡയറക്ടർ അറിയിച്ചു.

എസ്എൻഡിപി സ്കൂളിലും വൈദിക മഠത്തിലും മോഷണം

ആലുവ: എസ്എൻഡിപി ഹയർ സെക്കൻഡറി സ്കൂളിലും പ്രവേശന കവാടത്തിന് സമീപത്തെ വൈദിക മഠത്തിലും മോഷണം. നിലവിളക്കിൻെറ ഒരു ഭാഗം, ഭണ്ഡാരത്തിലെ തുക, സിസിടിവി കാമറയുടെ ഭാഗങ്ങൾ, സ്കൂൾ ബസിന്‍റെ ജിപിഎസ് എന്നിവയാണ് മോഷണം പോയത്. സ്കൂൾ വളപ്പിലെ വൈദിക മഠത്തിന്‍റെ വാതിൽ കുത്തിത്തുറന്ന് ശ്രീനാരായണ ഗുരുദേവ പ്രതിഷ്ഠയ്ക്ക് മുമ്പിലെ നിലവിളക്കിന്‍റെ മുകൾ ഭാഗമാണ് ഊരിയെടുത്തത്. ഭണ്ഡാരത്തിൽ നിന്ന് പണവും എടുത്തു. സ്കൂൾ പ്രിൻസിപ്പലിന്‍റെ ഓഫീസ് പൂട്ട് തകർത്ത് അകത്തു കടന്ന മോഷ്ടാവ് സിസിടിവി കാമറയുടെ ഡിവിആർ, ഇന്‍റർനെറ്റ് കണക്ഷൻ മോഡം എന്നിവയും മോഷ്ടിച്ചു. ഹെഡ്മിസ്ട്രസ് ഓഫീസിന്‍റെ പൂട്ട് പൊളിച്ച് അകത്ത് കടന്നെങ്കിലും ഒന്നും നഷ്ടമായില്ല. സ്കൂൾ മുറ്റത്ത് പാർക്ക് ചെയ്തിരുന്ന ഒന്നാം നമ്പർ സ്കൂൾ ബസിന്‍റെ ജിപിഎസും മോഷ്ടാവ് അഴിച്ചെടുത്തു. ഇന്നലെ രാവിലെ സ്കൂൾ ജീവനക്കാരെത്തിയപ്പോഴാണ് മോഷണ വിവരം അറിയുന്നത്. ഒരേ രീതിയിലാണ് പൂട്ടുകൾ തകർത്ത് വാതിൽ തുറന്നിരിക്കുന്നത്. ആലുവ ടൗൺ പോലീസ് അന്വേഷണം തുടങ്ങി.

വികസനകാര്യത്തില്‍ വിവേചനമില്ല, ഇനി ഉണ്ടാവുകയുമില്ല: മുഖ്യമന്ത്രി

കൊച്ചി: വികനസത്തിന്‍റെ ഗുണഫലം ജനങ്ങള്‍ക്ക് ലഭിക്കുന്നതില്‍ ഇതുവരെ വിവേചനം ഉണ്ടായിട്ടില്ലെന്നും ഇനിയങ്ങോട്ട് ഉണ്ടാവുകയില്ലെന്നും മുഖ്യമന്ത്രി പിണറായി വിജയന്‍. കൊച്ചിയുടെ സമഗ്രവികസനത്തിനായുള്ള ഒട്ടേറെ പദ്ധതികളാണ് നഗരസഭയുടെ നേതൃത്വത്തില്‍ നടത്തിവരുന്നതെന്നും കൊച്ചി കോര്‍പറേഷന്‍റെ പുതിയ ആസ്ഥാന മന്ദിരോദ്ഘാടനം നിര്‍വഹിച്ചു പ്രസംഗിക്കവേ മുഖ്യമന്ത്രി പറഞ്ഞു. സംസ്ഥാനത്തിന്‍റെ വികസന ക്ഷേമ പ്രവര്‍ത്തനത്തിന്‍റെ അതേ കാഴ്ചപ്പാടാണ് കൊച്ചി കോര്‍പറേഷന്‍ ഭരണസമതിക്കുമുള്ളത്. കോര്‍പറേഷന്‍റെ പുതിയ ആസ്ഥാന മന്ദിരം, തുരുത്തി കോളനിക്കാര്‍ക്കുള്ള പാര്‍പ്പിട സമുച്ചയം തുടങ്ങി മുടങ്ങിക്കിടന്ന പല വികസന, ക്ഷേമ പദ്ധതികളും ഈ ഭരണസമിതി പൂര്‍ത്തിയാക്കി. നവംബര്‍ ഒന്നോടെ അതിദരിദ്രരില്ലാത്ത സംസ്ഥാനമായി കേരളം മാറുകയാണെന്നും ലോകത്തു തന്നെ ചുരുക്കം രാജ്യങ്ങള്‍ക്ക് മാത്രമേ ഈ നേട്ടം അവകാശപ്പെടാനുള്ളൂ എന്നും മുഖ്യമന്ത്രി പറഞ്ഞു. പുതിയ ആസ്ഥാന മന്ദിരത്തിന് മുന്നില്‍ നാട മുറിച്ച് ഉദ്ഘാടനം ചെയ്ത ശേഷമാണ് ഉദ്ഘാടന പ്രസംഗത്തിനായി വേദിയിലെത്തിയത്. ചടങ്ങില്‍ മേയര്‍ എം. അനില്‍കുമാര്‍ അധ്യക്ഷത വഹിച്ചു. മന്ത്രി പി. രാജീവ് മുഖ്യപ്രഭാഷണം നടത്തി. ഹൈബി ഈഡന്‍ എംപി, എംഎംഎല്‍എമാരായ ടി.ജെ. വിനോദ്, കെ.ജെ. മാക്‌സി, കെ. ബാബു, ഉമ തോമസ്, കെ.എന്‍. ഉണ്ണികൃഷ്ണന്‍, ജിസിഡിഎ ചെയര്‍മാന്‍ കെ.ചന്ദ്രന്‍പിള്ള, മുന്‍ മേയര്‍മാരായ സി.എം. ദിനേശ്മണി, കെ.ജെ. സോഹന്‍, ടോണി ചമ്മണി, സൗമിനി ജെയിന്‍, ഡെപ്യൂട്ടി മേയര്‍ കെ.എ. അന്‍സിയ, സ്ഥിരം സമിതി അധ്യക്ഷര്‍ തുടങ്ങിയവര്‍ പ്രസംഗിച്ചു. പഴയ കെട്ടിടത്തെ ചൊല്ലി തര്‍ക്കം കൊച്ചി: കൊച്ചി കോര്‍പറേഷന്‍റെ പുതിയ ആസ്ഥാന മന്ദിരം പ്രവര്‍ത്തനമാരംഭിക്കുമ്പോള്‍ പഴയ കെട്ടിടം എന്തു ചെയ്യണമെന്ന കാര്യത്തില്‍ തര്‍ക്കം തുടങ്ങി. കെട്ടിടം പൈതൃക മ്യൂസിയമായി നിലനിര്‍ത്തണമെന്ന ആവശ്യവുമായി ഒരു വിഭാഗം മുന്നോട്ടു വന്നിട്ടുണ്ട്. ജനറല്‍ ആശുപത്രിയുടെ വികസനത്തിനായി വിട്ടുനല്‍കണമെന്ന് പറയുന്നവരുമുണ്ട്. ഈ ആവശ്യവുമായി ജനറല്‍ ആശുപത്രി അധികൃതർ തന്നെ മുന്നോട്ട് വന്നതായാണ് വിവരം. ഇന്നലെ പുതിയ ആസ്ഥാന മന്ദിരത്തിന്‍റെ ഉദ്ഘാടന വേളയില്‍ പ്രസംഗിച്ച ഹൈബി ഈഡന്‍ എംപിയും ഇക്കാര്യം ഉന്നയിച്ചു. കഴിഞ്ഞ ദിവസം പുതിയ കൗണ്‍സില്‍ ഹാളില്‍ നടത്തിയ പത്രസമ്മേളനത്തില്‍ മാധ്യമ പ്രവര്‍ത്തകര്‍ ഇക്കാര്യം ചൂണ്ടിക്കാട്ടിയപ്പോള്‍ കോര്‍പറേഷന്‍റെ സ്വത്ത് ആര്‍ക്കും വിട്ടുനല്‍കാന്‍ തയാറല്ലെന്ന നിലപാടാണ് സ്വീകരിച്ചത്. മാത്രമല്ല ഒട്ടേറെ ചരിത്ര പ്രാധാന്യമുള്ള കെട്ടിയമായതിനാല്‍ പൈതൃക മ്യൂസിയമായി മാറ്റണമെന്ന ആവശ്യത്തോടുള്ള പിന്തുണയും അദ്ദേഹം പ്രകടിപ്പിച്ചു.

ഓൺലൈൻ ട്രേഡിംഗിലൂടെ 25 കോടി തട്ടിയ കേസ്: അന്വേഷണ സംഘം ഹൈദരാബാദിലേക്ക്

കൊച്ചി: ഓൺലൈൻ ട്രേഡിംഗിലൂടെ എറണാകുളം സ്വദേശിയിൽനിന്ന്‌ 25 കോടി രൂപ തട്ടിയെടുത്ത കേസിൽ വിശദമായ അന്വേഷണത്തിനായി പോലീസ് സംഘം ഹൈദരാബാദിലേക്ക്. കോഴിക്കോടുകാരായ പ്രതികള്‍ കൈവശം വച്ചിരുന്ന വാടക അക്കൗണ്ടുകളില്‍ ചിലത് മുമ്പ് കൈകാര്യം ചെയ്തിരുന്നത് ഹൈദരാബാദ് കേന്ദ്രീകരിച്ച് പ്രവര്‍ത്തിക്കുന്ന സൈബര്‍ തട്ടിപ്പ് സംഘമാണെന്ന് പോലീസ്‌ കണ്ടെത്തിയിരുന്നു. ഈ സംഘത്തിന് തട്ടിപ്പുമായി ബന്ധമുണ്ടോയെന്ന് വിശദമായി പരിശോധിക്കുന്നതിനായി അന്വേഷണ സംഘം ഉടൻ ഹൈദരാബാദിലേക്ക് തിരിക്കും. കേസിന്‍റെ ആദ്യഘട്ടത്തില്‍ ഹൈദരാബാദ് കേന്ദ്രീകരിച്ച് പ്രവര്‍ത്തിക്കുന്ന സംഘത്തിന്‍റെ സാന്നിധ്യം കൊച്ചി സിറ്റി സൈബർ പോലീസ് സംശയിച്ചിരുന്നു. ഹൈദരാബാദിലുള്ള സംഘവുമായി പ്രതികൾ ഫോൺ വിളികൾ നടത്തിട്ടുണ്ടോയെന്നതടക്കം പരിശോധിച്ചു വരികയാണ്.ഇവർ കൈകാര്യം ചെയ്‌ത ബാങ്ക്‌ അക്ക‍ൗണ്ട്‌ വിവരങ്ങളുടെ പരിശോധനയും പുരോഗമിക്കുന്നു. തായ്‌ലൻഡ്‌, ഹോങ്കോംഗ് എന്നിവിടങ്ങളിൽ പ്രതികൾ എത്തിയെന്ന് സൂചന ലഭിച്ചതിന്‍റെ അടിസ്ഥാനത്തിൽ പ്രതികളുടെ വിദേശ ബന്ധവും പോലീസ് അന്വേഷിക്കുന്നുണ്ട്. കേസിലെ പ്രധാന പ്രതികളും കോഴിക്കോട്‌ സ്വദേശികളുമായ പി .കെ റഹീസ്‌ (39), വി. അൻസാർ (39), സി.കെ അനീസ്‌ റഹ്‌മാൻ (25) എന്നിവർ റിമാൻഡിലാണ്‌. ഇവരെ കസ്റ്റഡിയിൽ വാങ്ങി കൂടുതൽ ചോദ്യം ചെയ്യാനൊരുങ്ങുകയാണ്‌ അന്വേഷണസംഘം. ക്യാപിറ്റലിക്‌സ് എന്ന വെബ്സൈറ്റ് വഴി ട്രേഡിംഗ് നടത്തി ഉയർന്നലാഭം ലഭിക്കുമെന്ന് വിശ്വസിപ്പിച്ച് 90 തവണകളായി 25 കോടി രൂപയാണ് സംഘം എറണാകുളം സ്വദേശിയിൽ നിന്ന്‌ തട്ടിയെടുത്തത്‌. 40 ബാങ്ക് അക്ക‍ൗണ്ടുകളുടെ വിവരങ്ങൾ, 250 സിംകാർഡുകൾ, 40 മൊബൈൽ ഫോണുകൾ, നിരവധി ലാപ്ടോപ്പുകളും കംപ്യൂട്ടറുകളും നിരവധി ഡെബിറ്റ് കാർഡുകളും പ്രതികൾ കുറ്റകൃത്യത്തിനായി ഉപയോഗിച്ച കോഴിക്കോട്ടെ ഫ്ലാറ്റിൽനിന്ന്‌ പിടിച്ചെടുത്തിരുന്നു.

അമ്മത്തൊട്ടിലിനു സമീപം ഉപേക്ഷിക്കപ്പെട്ട കുഞ്ഞ് ആശുപത്രിയില്‍ തന്നെ

കൊച്ചി: എറണാകുളം ജനറല്‍ ആശുപത്രിക്ക് സമീപത്തുള്ള അമ്മത്തൊട്ടിലിനടുത്ത് ഉപേക്ഷിക്കപ്പെട്ട ആണ്‍കുഞ്ഞ് ആശുപത്രിയില്‍ തുടരുന്നു. നിലവില്‍ കുഞ്ഞിന് മറ്റ് ആരോഗ്യപ്രശ്‌നങ്ങളൊന്നുമില്ല, ജനറല്‍ ആശുപത്രിയിലെ മുലപ്പാല്‍ ബാങ്കില്‍നിന്ന് കുഞ്ഞിന് പാല്‍ കൊടുക്കുന്നുണ്ട്. മൂന്നുദിവസം കൂടി ആശുപത്രിയില്‍ തുടരേണ്ടിവരും. അതിനുശേഷം സിഡബ്ല്യുസിക്ക് കൈമാറും. പിന്നീട് സ്‌പെഷലൈസ്ഡ് അഡോപ്ഷന്‍ ഏജന്‍സിക്ക് കൈമാറും. മറ്റു നടപടികള്‍ പൂര്‍ത്തിയാക്കി നിശ്ചിത സമയപരിധിക്ക് ശേഷം അവകാശികള്‍ ആരും എത്തിയില്ലെങ്കില്‍ ദത്ത് നല്‍കാനുള്ള നടപടികളിലേക്ക് നീങ്ങും. തിങ്കളാഴ്ച രാവിലെ 6.30ഓടെയാണ് അമ്മത്തൊട്ടിലിനരികിലെ പ്ലാവിന്‍ചുവട്ടില്‍ ബെഡ്ഷീറ്റില്‍ പൊതിഞ്ഞ നിലയില്‍ ജനറല്‍ ആശുപത്രിയിലെ കാവല്‍ക്കാരന്‍ കെ. വിഷ്ണു കുഞ്ഞിനെ കണ്ടെത്തിയത്. 2.60 കിലോഗ്രാം ഭാരമുള്ള കുഞ്ഞിനെ ഉടന്‍ തീവ്രപരിചരണ വിഭാഗത്തിലേക്ക് മാറ്റുകയായിരുന്നു.

കഞ്ചാവുമായി യുവാവ് പിടിയില്‍

കൊച്ചി: കഞ്ചാവുമായി മലപ്പുറം സ്വദേശി അബ്ദുള്‍ സാലിഹി(21)നെഎറണാകുളം നോര്‍ത്ത് പോലീസ് അറസ്റ്റ് ചെയ്തു. കലൂര്‍ പൊറ്റക്കുഴി കൈപ്പിള്ളി ലൈന്‍ റോഡിന് സമീപത്ത് നടത്തിയ പരിശോധനയിലാണ് ഇയാൾ പിടിയിലായത്. പ്രതിയുടെ പക്കൽനിന്ന് 887 ഗ്രാം കഞ്ചാവ് പിടിച്ചെടുത്തു. നോര്‍ത്ത് എസ്‌ഐ പി. പ്രദീപിന്‍റെ നേതൃത്വത്തിലുള്ള അന്വേഷണ സംഘമാണ് പ്രതിയെ പിടികൂടിയത്.

റെയില്‍വേ പാലത്തിനു താഴെ അവശനിലയില്‍ കണ്ടെത്തിയ ആളെ ആശുപത്രിയിലാക്കി

കൊച്ചി: എറണാകുളം വെണ്ടുരുത്തി റെയില്‍വേ പാലത്തിനു താഴെ അവശനിലയില്‍ കണ്ടെത്തിയ ആളെ ഫയര്‍ഫോഴ്‌സും പോലീസും ചേര്‍ന്ന് ആശുപത്രിയിലെത്തിച്ചു. കന്യാകുമാരി സ്വദേശി പി.എഫ്. ഷാജി(59)യെയാണ് എറണാകുളം ജനറല്‍ ആശുപത്രിയില്‍ പ്രവേശിപ്പിച്ചത്. ഇദ്ദേഹത്തിന് മാനസികപ്രശ്‌നമുള്ളതായി സംശയിക്കുന്നുവെന്ന് പോലീസ് പറഞ്ഞു. ഇന്നലെ രാവിലെ 10.50നാണ് റെയില്‍വേ പാലത്തിലെ പില്ലര്‍ ആറിനു താഴെ ഒരാള്‍ അവശനിലയില്‍ കിടക്കുന്ന വിവരം പോലീസ് കണ്‍ട്രോള്‍ റൂമില്‍ എത്തിയത്. ഉടന്‍ പോലീസ് ഉദ്യോഗസ്ഥര്‍ അവിടെ എത്തിയെങ്കിലും കായലിനു കുറുകെയുള്ള റെയില്‍പ്പാലത്തിന്‍റെ തൂണിലെ ഇടുങ്ങിയ സ്ഥലത്ത് അബോധാവസ്ഥയില്‍ കിടന്നിരുന്ന ആളെ അവിടെ നിന്ന് പുറത്തെത്തിക്കുക ദുഷ്കരമായിരുന്നു. തുടര്‍ന്ന് ഫയര്‍ഫോഴ്‌സിനെ വിവരം അറിയിച്ചു. 11.15ഓടെ മട്ടാഞ്ചേരി, ക്ലബ് റോഡ് എന്നിവിടങ്ങളില്‍ നിന്നെത്തിയ ഫയര്‍ഫോഴ്‌സ് അംഗങ്ങള്‍ വടംകെട്ടി റെയില്‍വേ പാലത്തിന്‍റെ താഴെയിറങ്ങി. തുടര്‍ന്ന് വലയില്‍ ഇരുത്തി റോപ്പിലൂടെ വലിച്ച് അര മണിക്കൂറിനകം ഇദ്ദേഹത്തെ പാലത്തിനു മുകളില്‍ എത്തിക്കുകയായിരുന്നു. പോലീസ്, ആംബുലന്‍സില്‍ ജനറല്‍ ആശുപത്രിയില്‍ എത്തിച്ചു. ബന്ധുക്കള്‍ ആരുമില്ലെന്നാണ് ഷാജി പോലീസിനോട് പറഞ്ഞത്.

ഫിഷ് ഫ്രൈയുമായി പൂരപ്പറമ്പിൽ; പിഴ ചുമത്തി പുറത്താക്കി

ചോറ്റാനിക്കര: ക്ഷേത്ര ദർശനത്തിനെത്തിയ ഇതര സംസ്ഥാനക്കാരായ ഭക്തർ ഫിഷ് ഫ്രൈയുമായി ഭക്ഷണം കഴിക്കാനിരുന്നത് ചോറ്റാനിക്കരയിൽ നാടകീയ രംഗങ്ങൾ സൃഷ്ടിച്ചു. ആന്ധ്രയിൽ നിന്നെത്തിയ ഭക്തരാണ് ചോറ്റാനിക്കര ക്ഷേത്രത്തിലെ പൂരപ്പറമ്പിൽ ഇന്നലെ മീൻ വറുത്തത് കൂട്ടി ഭക്ഷണം കഴിക്കാൻ തയാറെടുത്തത്. ഇത് കണ്ട് സമീപത്തെ ലോഡ്ജ് ഉടമ അവരെ വിലക്കിയെങ്കിലും അവർ ചെവിക്കൊണ്ടില്ല. ഇതോടെ ക്ഷേത്ര ജീവനക്കാരി സംഭവം മാനേജരെ അറിയിച്ചു. ദേവസ്വം ജീവനക്കാരും മാനേജരും സ്ഥലത്തെത്തിയപ്പോൾ ഒരു പാത്രം നിറയെ മീൻ വറുത്തതെടുത്ത് ഭക്ഷണം കഴിക്കാനുള്ള തയാറെടുപ്പിലായിരുന്നു സംഘം. ക്ഷേത്രം മതിൽക്കകത്ത് ഇതൊന്നും അനുവദനീയമല്ലെന്ന് പറഞ്ഞപ്പോൾ അറിയാതെ പറ്റിയതാണെന്ന് മറുപടി. വിവരമറിഞ്ഞ് പോലീസും സ്ഥലത്ത് എത്തി. കുറ്റക്കാർക്ക് എതിരെ ദേവസ്വം ഫൈൻ ചുമത്താൻ തീരുമാനിച്ചതോടെ ഭക്തരെ അനുകൂലിച്ചും ചിലർ രംഗത്തെത്തി. ഇത് ചെറിയ വാക്കുതർക്കത്തിനും കാരണമായി. പിന്നീട് ഇവിടം ശുചിയാക്കാനുള്ള തുക പിഴ ചുമത്തി ഇവരെ പുറത്താക്കുകയായിരുന്നു. അതേസമയം ക്ഷേത്രത്തിന്‍റെ പ്രധാന പാർക്കിംഗ് ഗ്രൗണ്ടായ പൂരപ്പറമ്പ് മതിൽ കെട്ടി തിരിക്കണമെന്ന് കോടതി വിധിയുണ്ടെങ്കിലും ദേവസ്വം നടപ്പാക്കാത്തതാണ് ഇത്തരം അനിഷ്ട സംഭവങ്ങളുണ്ടാകാൻ കാരണമെന്നാണ് പറയുന്നത്.

കടവന്ത്ര-പനമ്പിള്ളിനഗര്‍ മെട്രോ ഫീഡര്‍ ബസ് സർവീസ് ഇന്ന് മുതല്‍

കൊച്ചി: മെട്രോ ഇലക്ട്രിക് ഫീഡര്‍ ബസിന്‍റെ കടവന്ത്ര-പനമ്പിള്ളി നഗര്‍-കെ.പി വള്ളോന്‍ റോഡ് സര്‍ക്കുലര്‍ സര്‍വീസ് ഇന്ന് ആരംഭിക്കും. രാവിലെ എട്ട് മുതല്‍ വൈകുന്നേരം 7.50 വരെയാണ് സര്‍വീസ്. കടവന്ത്ര മെട്രോ സ്റ്റേഷനു മുന്നില്‍ നിന്നാരംഭിച്ച് മനോരമ ജംഗ്ഷന്‍ വഴി പനമ്പള്ളി നഗര്‍ റോഡ്, ജസ്റ്റീസ് കൃഷ്ണയ്യര്‍ റോഡ്, കെ.പി. വള്ളോന്‍ റോഡ്, എസ്എ റോഡ് വഴിയാണ് സര്‍വീസ്.

കൊച്ചി മെട്രോ രണ്ടാം ഘട്ടം : സ്ഥലമെടുപ്പ് സമയബന്ധിതമായി പൂര്‍ത്തിയാക്കണം: ജില്ലാ കളക്ടര്‍

കൊച്ചി: കൊച്ചി മെട്രോയുടെ രണ്ടാം ഘട്ട വികസത്തിന്‍റെ ഭാഗമായുള്ള സ്ഥലമേറ്റെടുപ്പ് നടപടികള്‍ സമയബന്ധിതമായി പൂര്‍ത്തിയാക്കണമെന്ന് ജില്ലാ കളക്ടര്‍ ജി. പ്രിയങ്ക. ജവഹര്‍ലാല്‍ നെഹ്‌റു ഇന്‍റര്‍നാഷണല്‍ സ്റ്റേഡിയം മുതല്‍ കാക്കനാട് ഇന്‍ഫോപാര്‍ക്ക് വരെയുള്ള കൊച്ചി മെട്രോയുടെ രണ്ടാം ഘട്ടത്തിലെ വിവിധ സ്റ്റേഷനുകള്‍ക്ക് ആവശ്യമായ സ്ഥലമേറ്റെടുപ്പ് നടപടികളുടെ പുരോഗതി വിലയിരുത്താന്‍ വിളിച്ചുചേര്‍ത്ത യോഗത്തിലാണ് ജില്ലാ കളക്ടര്‍ ഈ നിർദേശം നല്‍കിയത്. ചെമ്പുമുക്ക്, പടമുകള്‍ സ്റ്റേഷനുകള്‍ക്ക് വേണ്ടിയുള്ള സ്ഥലമേറ്റെടുപ്പ് നടപടികള്‍ സമയക്രമം നിശ്ചയിച്ച് പൂര്‍ത്തിയാക്കണം. ചിലവന്നൂര്‍, ഇടപ്പള്ളി കനാലുകളുടെ നവീകരണത്തിന്‍റെ ഭാഗമായി പുറമ്പോക്ക് കൈയേറ്റങ്ങള്‍ ഒഴിപ്പിക്കുന്നത്തിന് ആവശ്യമായ നടപടികള്‍ സ്വീകരിക്കണം. മൂലേപ്പാടം, പുറവങ്കര, പൈപ്പ്‌ലൈന്‍, കതൃക്കടവ്, ബിടിഎസ് റോഡ് എന്നിവിടങ്ങളിലെ മലിനജല ശുദ്ധീകരണ പ്ലാന്‍റുകള്‍ക്ക് വേണ്ടിയുള്ള സ്ഥലമെടുപ്പ് നടപടികളും സമയബന്ധിതമായി പൂര്‍ത്തിയാക്കാനും ജില്ലാ കളക്ടര്‍ ഉദ്യോഗസ്ഥര്‍ക്ക് നിര്‍ദേശം നല്‍കി. കാക്കനാട് കളക്ടറേറ്റില്‍ ചേര്‍ന്ന യോഗത്തില്‍ കൊച്ചി മെട്രോ ലിമിറ്റഡിലെയും സര്‍വേ, റവന്യു വകുപ്പുകളിലെയും ബന്ധപ്പെട്ട ഉദ്യോഗസ്ഥര്‍ പങ്കെടുത്തു.

90 ശതമാനം വനിതാ സംവരണം : ആദ്യഘട്ട സ്ഥാനാർഥി പട്ടിക പുറത്തുവിട്ട് ട്വന്‍റി 20

കിഴക്കമ്പലം: തദ്ദേശ സ്ഥാപനങ്ങളിലേക്കുള്ള തെരഞ്ഞെടുപ്പ് പ്രഖ്യാപിക്കുന്നതിന് വളരെ മുമ്പേ സ്ഥാനാര്‍ഥികളെ പ്രഖ്യാപിച്ച് ട്വന്‍റി 20 പാര്‍ട്ടി. കിഴക്കമ്പലം ഗ്രാമപഞ്ചായത്തിലെ 21 വാര്‍ഡിലെയും വാഴക്കുളം ബ്ലോക്ക് പഞ്ചായത്തിലെ മൂന്ന് ഡിവിഷനുകളിലെയും എറണാകുളം ജില്ലാ പഞ്ചായത്ത് വെങ്ങോല ഡിവിഷനിലെയും അടക്കം 25 സ്ഥാനാര്‍ഥികളെയാണ് ഒന്നാം ഘട്ടമായി പ്രഖ്യാപിച്ചത്. 90 ശതമാനം സ്ത്രീ സംവരണം ഉറപ്പാക്കിയാണ് സ്ഥാനാര്‍ഥി നിര്‍ണയം പൂര്‍ത്തിയാക്കിയത്. കിഴക്കമ്പലം പഞ്ചായത്ത് പാര്‍ട്ടി എക്‌സിക്യൂട്ടീവ് കമ്മിറ്റിയാണ് ഇന്നലെ കിഴക്കമ്പലം ഗ്രാമ പഞ്ചായത്തിലെ സ്ഥാനാര്‍ഥികളെ പ്രഖ്യാപിച്ചത്. കേരള ചരിത്രത്തില്‍ ആദ്യമായാണ് രാഷ്ട്രപുനര്‍നിര്‍മാണ പ്രക്രിയയ്ക്ക് ഇത്രയധികം വനിതാ പങ്കാളിത്തം ഒരു രാഷ്ടീയ പാര്‍ട്ടി ഉറപ്പാക്കുന്നതെന്ന് പാര്‍ട്ടി അധ്യക്ഷന്‍ സാബു എം.ജേക്കബ് പറഞ്ഞു. പാര്‍ട്ടി മത്സരിക്കുന്ന മുഴുവന്‍ പഞ്ചായത്തുകളിലെയും ഒന്നാംഘട്ട പ്രചാരണം പൂര്‍ത്തിയാക്കി. പോസ്റ്റര്‍ പ്രചാരണം, വാള്‍പെയിന്‍റിംഗ്, നോട്ടീസ് വിതരണം, മൈക്ക് അനൗണ്‍സ്‌മെന്‍റ് തുടങ്ങിയവ പൂര്‍ത്തിയാക്കിയതായി സാബു വ്യക്തമാക്കി. മാങ്ങയാണ് പാര്‍ട്ടിയുടെ തെരഞ്ഞെടുപ്പ് ചിഹ്നം. സ്ഥാനാർഥികളുടെ പേരുവിവരം ജില്ലാ പഞ്ചായത്ത് വെങ്ങോല ഡിവിഷൻ: സജന നസീര്‍ വാഴക്കുളം ബ്ലോക്ക് പഞ്ചായത്ത് ചേലക്കുളം ഡിവിഷന്‍ (10) - നിഷ അലിയാര്‍, കിഴക്കമ്പലം ഡിവിഷന്‍ (11) - മറിയാമ്മ ജോണ്‍, പുക്കാട്ടുപടി ഡിവിഷന്‍ (12) - പി.എം.അസ്മ. കിഴക്കമ്പലം പഞ്ചായത്ത് അമ്പുനാട് (1) - കെ.ജി. പ്രീതി , മലയിടംതുരുത്ത് (2) - ബീന ജോസഫ്, മാക്കീനിക്കര (3) - ചിന്നമ്മ പൗലോസ്, കാരുകുളം (4) - മേരി ഏലിയാസ്, കാവുങ്ങപറമ്പ് (5) - ടി.എസ്. സുജിത മോള്‍, ചേലക്കുളം (6) - കെ.എന്‍. പ്രതിമ , കുമ്മനോട് (7) - ഇ.ആര്‍. രാജന്‍ , ചൂരക്കോട് (8) - ജോബി മാത്യു, ചൂരക്കോട് വെസ്റ്റ് (9) - വി.സി. മിനി , ഞാറള്ളൂര്‍ (10) - ദീപ ജേക്കബ്, കുന്നത്തുകുടി (11) - പ്രസീല എല്‍ദോ, വിലങ്ങ് (12) - അമ്പിളി വിജില്‍, പൊയ്യക്കുന്നം (13) - ബിനി ബിജു, കിഴക്കമ്പലം (14) - ജിന്‍സി അജി, പഴങ്ങനാട് (15) - ഷീബ ജോര്‍ജ്, മാളേയ്ക്കമോളം (16) - രാധാമണി ധരണീന്ദ്രന്‍, താമരച്ചാല്‍ (17) - ലിന്‍റ ആന്‍റണി, ഊരക്കാട് (18) - ജിന്‍സി ബിജു, കാനാമ്പുറം (19) - കെ.വി. രാജു , പൂക്കാട്ടുപടി (20) - ജിബി മത്തായി, പുക്കാട്ടുപടി നോര്‍ത്ത് (21) - എം.എം. റഹിം. photo: കിഴക്കമ്പലം പഞ്ചായത്തിലെ ട്വന്‍റി 20 സ്ഥാനാര്‍ഥികള്‍

കാൽനടയാത്രികൻ ലോറിയിടിച്ച് മരിച്ചു

തൃപ്പൂണിത്തുറ: മിനി ബൈപ്പാസിൽ കാൽനടയാത്രക്കാരൻ ലോറിയിടിച്ച് തത്ക്ഷണം മരിച്ചു. തൃപ്പൂണിത്തുറ ശ്രീവെങ്കടേശ്വര സ്കൂളിന് എതിർവശത്ത് താമസിക്കുന്ന പൂണിത്തുറ അയ്യങ്കാളി റോഡ് കളരിക്കത്തറയിൽ വീട്ടിൽ എം.എ. സാബു (56) ആണ് മരിച്ചത്. ഇന്നലെ ഉച്ചയ്ക്കായിരുന്നു അപകടം. പൂണിത്തുറ ഗാന്ധിസ്ക്വയർ മിനി പാർക്കിന് സമീപത്തുകൂടി നടന്നു പോകവെ ഗ്യാസ് സിലിണ്ടർ കയറ്റി വന്ന ലോറി ഇടിക്കുകയായിരുന്നു. കൊച്ചി കോർപറേഷൻ ഹരിത കർമ സേനാംഗമാണ്. സംസ്കാരം ഇന്ന് ഉച്ചയ്ക്ക് 12ന് തൃപ്പൂണിത്തുറ പൊതുശ്മശാനത്തിൽ. ഭാര്യ: രാജി, മക്കൾ: സാന്ദ്രാ സാബു, സാഗർ സാബു. മരുമകൻ: മുഹമ്മദ് തൻസീർ.

മഞ്ഞപ്പിത്തം ബാധിച്ച് മരിച്ചു

അങ്കമാലി: മഞ്ഞപ്പിത്തം ബാധിച്ച് വീട്ടമ്മ മരിച്ചു. മുന്നൂര്‍പ്പിള്ളി പന്തല്ലൂക്കാരന്‍ ഫിനിയുടെ (കാര്‍ഷിക ബാങ്ക് ഉദ്യോഗസ്ഥന്‍, അസോ. സംസ്ഥാന കമ്മിറ്റിയംഗം, കോണ്‍ഗ്രസ് അങ്കമാലി ബ്ലോക്ക് കമ്മിറ്റി ജനറല്‍ സെക്രട്ടറി) ഭാര്യ സിസി ഫിനി (36) ആണ് മരിച്ചത്. സംസ്‌കാരം നടത്തി. തൃശൂര്‍ ചെന്ത്രാപ്പിന്നി പുലിക്കോട്ടില്‍ കുടുംബാംഗമാണ് പരേത. മക്കള്‍: ആന്‍സിയ (പുഷ്പഗിരി സ്‌കൂള്‍), ആല്‍ഫിയ.

പുഴയിൽ കാണാതായ യുവാവിന്‍റെ ‌മൃതദേഹം കണ്ടെത്തി

വരാപ്പുഴ: സുഹൃത്തുക്കൾക്കൊപ്പം പുഴയിൽ കുളിക്കുന്നതിനിടെ കാണാതായ യുവാവിന്‍റെ മൃതദേഹം കണ്ടെത്തി. ചേരാനല്ലൂർ വിഷ്ണുപുരം തുണ്ടിപ്പറമ്പിൽ മുരളിയുടെ മകൻ രാഹുൽ മുരളി (26) ആണ് മരിച്ചത്. സംസ്കാരം നടത്തി. കടമക്കുടി നേവി പാലത്തിനു സമീപം തിങ്കളാഴ്ച വൈകുന്നേരമായിരുന്നു സംഭവം. കൂട്ടുകാരുമൊത്ത് കുളിക്കുന്നതിനിടെ സമീപത്തുള്ള തൂമ്പ് കുഴിയിലേക്കു തെന്നിനീങ്ങിയ രാഹുലിനെ കാണാതാകുകയായിരുന്നു. തുടർന്ന് അഗ്നിരക്ഷാ സേന നടത്തിയ തെരച്ചിലിൽ ഇന്നലെ ഉച്ചയോടെയാണ് മൃതദേഹം കണ്ടെത്തിയത്. അമ്മ: ദീപ.

റോഡ് റോളര്‍ കയറ്റി എയര്‍ഹോണുകൾ തവിടുപൊടി

കൊച്ചി: വാഹനങ്ങളില്‍ നിയമവിരുദ്ധമായി ഘടിപ്പിച്ചിരുന്ന എയര്‍ഹോണുകള്‍ മോട്ടോര്‍ വാഹനവകുപ്പ് പിടിച്ചെടുത്തു നശിപ്പിച്ചു. ജില്ലയില്‍ നടത്തിയ പ്രത്യേക ഡ്രൈവിന്‍റെ ഭാഗമായി പിടികൂടിയ 250ഓളം എയര്‍ ഹോളുകളാണ് മോട്ടോര്‍ വാഹനവകുപ്പ് ഉദ്യോഗസ്ഥരുടെ നേതൃത്വത്തില്‍ ജെസിബി ഉപയോഗിച്ച് നശിപ്പിച്ചത്. ഗതാഗത മന്ത്രിയുടെ നിര്‍ദേശത്തെ തുടര്‍ന്ന് ഇന്നലെ ഉച്ചയോടെ എറണാകുളം കെഎസ്ആര്‍ടിസിക്ക് സമീപം എഎല്‍ ജേക്കബ് പാലത്തിന് സമീപത്തായിരുന്നു നടപടികള്‍. ജെസിബിയില്‍ റോഡ് റോളര്‍ ഘടിപ്പിച്ചാണ് പിടിച്ചെടുത്ത എയര്‍ഹോണുകള്‍ ഉപയോഗശൂന്യമാക്കിയത്. ഇത് രണ്ടാം തവണയാണ് ജില്ലയില്‍ എയര്‍ ഹോണുകള്‍ പിടിച്ചെടുത്ത് നശിപ്പിക്കുന്നത്. കഴിഞ്ഞ് 13ന് ആരംഭിച്ച പ്രത്യേക പരിശോധനകള്‍ ജില്ലയില്‍ തുടരുകയാണ്. എയര്‍ ഹോണ്‍ പിടികൂടുന്ന വാഹനങ്ങള്‍ക്ക് എംവിഡി പിഴിയും ചുമത്തുന്നുണ്ട്. കഴിഞ്ഞയിടെ എയര്‍ഹോണ്‍ മുഴക്കി പാഞ്ഞ 211 വാഹനങ്ങള്‍ മോട്ടര്‍ വാഹന വകുപ്പ് പിടികൂടിയിരുന്നു. ഇവരില്‍ നിന്ന് 4,48,000 രൂപ പിഴയും ചുമത്തി. ഏതാനും മാസം മുമ്പ് എയര്‍ഹോണ്‍ വിമുക്ത നഗരമെന്ന ലക്ഷ്യത്തോടെ മോട്ടര്‍ വാഹന വകുപ്പും പോലീസും നടത്തിയ പരിശോധനയില്‍ ഒട്ടേറെ വാഹനങ്ങള്‍ കുടുങ്ങിയിരുന്നു. പരിശോധനകള്‍ കുറഞ്ഞതോടെ വാഹനങ്ങളില്‍ വീണ്ടും എയര്‍ഹോണുകള്‍ സ്ഥാനം പിടിക്കുന്നുണ്ടെന്നാണ് കണ്ടെത്തൽ. പരിശോധനയിൽ കണ്ടെത്താനാകാത്ത വിധമാണ് ചില വാഹനങ്ങളില്‍ ഇവ ഘടിപ്പിച്ചിട്ടുള്ളതെന്ന് ഉദ്യോഗസ്ഥര്‍ പറഞ്ഞു. അനുവദനീയ ഡെസിബെലില്‍ കൂടുതല്‍ ശബ്ദമുള്ള എയര്‍ഹോണ്‍ വില്‍ക്കുന്ന സ്ഥാപനങ്ങള്‍ക്കെതിരെ നടപടിയെടുക്കുന്നത് സംബന്ധിച്ചും എംവിഡിയുടെ പരിഗണനയിലാണ്.

വേദി കണ്ടും നിയമാവലി കേട്ടും ഞെട്ടി മത്സരാർഥികൾ; കളരിപ്പയറ്റിൽ കല്ലുകടി

തൃപ്പൂണിത്തുറ: സ്കൂൾ ഗെയിംസിന്‍റെ ചരിത്രത്തിൽ ആദ്യമായി മത്സരയിനമാക്കിയ കളരിപ്പയറ്റിൽ സർവത്ര കല്ലുകടി. തൃപ്പൂണിത്തുറ ലായം കൂത്തമ്പലത്തിൽ ജില്ലാ കളരിപ്പയറ്റ് ചാമ്പ്യൻഷിപ്പിനൊപ്പം സ്കൂൾ തല കളരിപ്പയറ്റിന്‍റെ ഉപജില്ലാ, ജില്ലാ മത്സരങ്ങൾ നടത്തിയതും നിയമാവലിയിലെ ആശയക്കുഴപ്പവുമാണ് തർക്കത്തിലും ബഹളത്തിലും കലാശിച്ചത്. സ്കൂൾ ഗെയിംസിന്‍റെ ഭാഗമായ കളരിപ്പയറ്റ് മത്സരം ഉപജില്ലാ തലത്തിലുള്ളത് ഇന്നലെ രാവിലെയും ജില്ലാ തലത്തിലുള്ളത് ഉച്ചയ്ക്ക് ശേഷവും തൃപ്പൂണിത്തുറ ലായം കൂത്തമ്പലത്തിൽ നടക്കുമെന്നായിരുന്നു കുട്ടികളെയും രക്ഷിതാക്കളെയും അറിയിച്ചിരുന്നത്. ഇതനുസരിച്ച് രാവിലെ ഒമ്പതിന് തുടങ്ങുമെന്നറിയിച്ചിരുന്ന മത്സരങ്ങളിൽ പങ്കെടുക്കാൻ വിവിധ സ്ഥലങ്ങളിൽ നിന്ന് വിദ്യാർഥികൾ നേരത്തെ തന്നെയെത്തിയിരുന്നു. ഇവിടെയെത്തിപ്പോഴാണ് എറണാകുളം ജില്ലാ സ്പോർട്സ് കൗൺസിലിന്‍റെയും ജില്ലാ കളരിപ്പയറ്റ് അസോസിയേഷന്‍റെയും ആഭിമുഖ്യത്തിൽ ഇന്നലെ നടക്കുന്ന ജില്ലാ കളരിപ്പയറ്റ് ചാമ്പ്യൻഷിപ്പിനൊപ്പമാണ് സ്കൂൾ ഗെയിംസ് മത്സരങ്ങളും നടക്കുന്നതെന്നറിഞ്ഞത്. വേദിയിൽ സംഘാടകരെ കാണാതെ വിഷമത്തിലായ കുട്ടികളും രക്ഷിതാക്കളും ബഹളം വച്ചപ്പോഴാണ് 10.30 ഓടെ രജിസ്ട്രേഷൻ തുടങ്ങിയത്. സ്കൂൾ കായികമേളയിൽ അണ്ടർ 17, 19 വിഭാഗങ്ങളിൽ ചുവടുകൾ, മെയ് പയറ്റ്, നെടുപടി പയറ്റ് എന്നീയിനങ്ങളിൽ മത്സരങ്ങൾ, സ്കൂൾ ഗെയിംസ് ഫെഡറേഷൻ ഓഫ് ഇന്ത്യ നിഷ്ക്കർഷിച്ചിരിക്കുന്ന നിയമാവലി പാലിച്ചാണ് നടത്തേണ്ടതെന്നാണ് പറഞ്ഞിരുന്നത്. എന്നാൽ ഉപജില്ലാ മത്സരങ്ങൾ തുടങ്ങാൻ മണിക്കൂറുകൾ ബാക്കി നിൽക്കെയാണ് ഇന്ത്യൻ കളരിപ്പയറ്റ് ഫെഡറേഷന്‍റെ ഇവന്‍റ്സ് റൂൾ ബുക്ക് പ്രകാരമാണ് മത്സരങ്ങൾ നടക്കുന്നതെന്ന വിവരം കുട്ടികളറിഞ്ഞത്. മൂവ്മെന്‍റ് സിലബസ് ഇല്ലാത്ത ഒരിടത്തും പബ്ലിഷ് ചെയ്തിട്ടില്ലാത്ത ഈ നിയമപ്രകാരം വിധി നിർണയിക്കാൻ സാധിക്കില്ലെന്നും വിവേചനപരമായ വിധി നിർണയത്തിന് സാധ്യതയുണ്ടെന്നും സ്കൂൾ കുട്ടികൾ വാദിച്ചു. അതേസമയംതന്നെ കളരിപ്പയറ്റ് അസോസിയേഷന്‍റെ കീഴിൽ പരിശീലനം നടത്തുന്ന കുട്ടികൾക്ക് സ്കൂൾ ഗെയിംസിൽ മികച്ച പ്രകടനം നടത്താൻ സാധിക്കുമെന്നും ആക്ഷേപമുയർന്നു. ഇതേച്ചൊല്ലി കൂത്തമ്പലം മത്സരവേദിയിൽ പലതവണ ബഹളമുണ്ടായതിനെ തുടർന്ന് ഹിൽപാലസ് പോലീസും സ്ഥലത്തെത്തി. ഉപജില്ലാ മത്സരങ്ങൾക്ക് ശേഷം ഉച്ചയ്ക്ക് മുതൽ കളരിപ്പയറ്റ് ചാമ്പ്യൻഷിപ്പിന്‍റെ യോഗവും നടന്നതിന് ശേഷമാണ് ജില്ലാതല മത്സരങ്ങൾ തുടങ്ങിയത്. ഇതിനിടെ മത്സരത്തിന് എത്തിയ പല വിദ്യാർഥികളും മത്സരിക്കാതെ തിരിച്ചു പോയി. സംസ്ഥാന സ്കൂൾ ഗെയിംസിന് കൊടി ഉയരാൻ മണിക്കൂറുകൾ മാത്രം അവശേഷിക്കുമ്പോഴാണ് ജില്ലാതല മത്സര നടത്തിപ്പ് വിവാദത്തിലായത്. സംഭവത്തിൽ പൊതുവിദ്യാഭ്യാസ ഡയറക്ടർക്ക് കുട്ടികൾ പരാതി നൽകിയിട്ടുണ്ട്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]