ADVERTISEMENT

ADVERTISEMENT

ദ്വിദിന സഹവാസ ക്യാന്പ്

എടത്വ: തലവടി ഗവ. വൊക്കേഷണല്‍ ഹയര്‍ സെക്കൻഡറി സ്‌കൂള്‍ നാഷണല്‍ സര്‍വീസ് സ്‌കീം ദ്വിദിന സഹവാസ ക്യാന്പ് നിനവ് 2025 ജില്ലാ പഞ്ചായത്ത് വികസന സ്ഥിരസമിതി അധ്യക്ഷ ബിനു ഐസക് രാജു ഉദ്ഘാടനം ചെയ്തു.

സ്‌കൂള്‍ പ്രസിഡന്‍റ് എസ്. ശ്രീകുമാര്‍ അധ്യക്ഷത വഹിച്ചു. ഗവ. ഹയര്‍ സെക്കൻഡറി സ്‌കൂള്‍ പ്രിന്‍സിപ്പല്‍ വി. സാജിത, വൊക്കേഷണല്‍ ഹയര്‍ സെക്കൻഡറി സ്‌കൂള്‍ പ്രിന്‍സിപ്പല്‍ ഇന്‍ ചാര്‍ജ് ജോമോന്‍ ജോസഫ്, എന്‍എസ്എസ് ജില്ലാ ക്ലസ്റ്റര്‍ കോ-ഓര്‍ഡിനേറ്റര്‍ നിയാമോള്‍, അധ്യാപകരായ ബി. ശ്രീരഞ്ജിനി, മെര്‍ലിന്‍ മാത്യു, എന്‍എസ്എസ് വോളന്‍റിയേഴ്സുമാരായ എന്‍.എ. ആരോമല്‍, അപര്‍ണ സുനില്‍ എന്നിവര്‍ പ്രസംഗിച്ചു.

ADVERTISEMENT

ചന്പക്കുളത്ത് കുഴിയും കടന്ന് പാലത്തിലേക്ക്

ചമ്പക്കുളം: ചമ്പക്കുളം പള്ളി പാലത്തിന്‍റെ കിഴക്കേ കരയിലെ അപ്രോച്ച് റോഡ് തകർന്ന് അപകടാവസ്ഥയിൽ. മങ്കൊമ്പ് ചമ്പക്കുളം റോഡിൽനിന്നു പാലത്തിലേക്ക് തിരിയുന്ന ഭാഗം തകർന്നുകിടക്കുന്നത് വേഗത്തിൽ എത്തുന്ന വാഹനങ്ങൾക്ക് അപകടക്കെണി ഒരുക്കുന്നു. ചമ്പക്കുളം പാലം തുറന്നുകൊടുത്ത കാലം മുതൽ വർഷാവർഷം അപ്രോച്ച് റോഡുകൾ തകരുന്നതും ഇടവേളകളിൽ മരാമത്ത് ജോലികൾ ചെയ്ത് സംരക്ഷിച്ചുവരുന്നതുമാണ്. നിരവധി വാഹനങ്ങളും ആയിരക്കണക്കിന് സ്കൂൾ കുട്ടികൾ കാൽനടയായും സൈക്കിളിലും യാത്ര ചെയ്യുന്ന പാലത്തിന്‍റെ കുത്തനെ ഉള്ള ഇറക്കത്തിലെ വലിയ കുഴികളിൽ വീണ് വിദ്യാർഥികൾക്കു പരിക്കു പറ്റുന്നത് പതിവായി മാറിയിരിക്കുന്നു. ഈ ഭാഗത്തെ അറ്റകുറ്റപ്പണികൾ കഴിഞ്ഞ മാർച്ച് മാസത്തിൽ ചെയ്തതാണെങ്കിലും മൂന്നുമാസം പോലും അത് നിലനിന്നില്ല. വീണ്ടും വലിയ കുഴികൾ രൂപപ്പെടുകയായിരുന്നു. ചമ്പക്കുളം പാലത്തിന്‍റെ അപ്രോച്ച് റോഡ് ഇടിഞ്ഞു താഴ്ന്നതിന് ഇരുകരകളിലും ഓരോ സ്പാൻ കൂടി നിർമിക്കണം എന്ന ആവശ്യത്തിന് പാലത്തോളം തന്നെ പഴക്കമുണ്ട്. എന്നാൽ, നാളിതുവരെ ഇത് യാഥാർഥ്യമായിട്ടില്ല. കുട്ടനാട്ടിലെ ഏറ്റവും പുരാതന ദേവാലയവും ബസിലിക്കയുമായ ചമ്പക്കുളം കല്ലൂർക്കാട് പള്ളിയിലെ പ്രധാനതിരുനാൾ നാളെ ആരംഭിക്കും. നിരവധി തീർഥാടകരും വിശ്വാസികളുമാണ് പാലത്തിലൂടെ 12 ദിവസം നീണ്ടുനിൽക്കുന്ന തിരുനാളിന് എത്തുക . ഇത് കൂടുതൽ അപകടത്തിന് കാരണമാകുമെന്നാണ് നാട്ടുകാരുടെ പരാതി. എത്രയും വേഗം പാലത്തിന്‍റെ കിഴക്കേ കരയിലെ റോഡിലെ കുഴി അടയ്ക്കുന്നതിനുവേണ്ട നടപടി പൊതുമരാമത്ത് വകുപ്പിന്‍റെ ഭാഗത്തുനിന്ന് ഉണ്ടാവണമെന്നും ദീർഘകാല അടിസ്ഥാനത്തിൽ ഇവിടത്തെ ദുരിതം അവസാനിപ്പിക്കുന്നതിന് ചമ്പക്കുളം പള്ളിപ്പാലത്തിന്‍റെ ഇരുകരകളിലും ഓരോ സ്പാൻ കൂടി നിർമിക്കണമെന്നുമാണ് നാട്ടുകാരുടെ ആവശ്യം.

സുനാമി കോളനി റോഡിൽ വെള്ളക്കെട്ട്

ഹരിപ്പാട്: സുനാമി കോളനിയിലേക്കുള്ള റോഡിലെ വെള്ളക്കെട്ട് ദുരിതമാകുന്നു. ആറാട്ടുപുഴ ഒൻപതാം വാർഡ് പെരുമ്പള്ളി വേൾഡ് വിഷൻ സുനാമി റോഡിലെ കോളനിയിലേക്കുള്ള വെള്ളക്കെട്ടാണ് താമസക്കാർക്കും പ്രദേശവാസികൾക്കും ദുരിതമാകുന്നത്. രണ്ടു ഭാഗമായുള്ള കോളനിയിലെ വടക്കുവശത്തെ വീടുകളിലേക്കെത്താനുള്ള ഏക വഴിയിലാണ് വെള്ളം നിറഞ്ഞുകിടക്കുന്നത്. മഴക്കാലം മുഴുവനും ഇതാണ് അവസ്ഥ. കെട്ടിനിൽക്കുന്ന അഴുക്കുവെള്ളത്തിലൂടെയുള്ള യാത്രമൂലം കാലിൽ വ്രണങ്ങളുമുണ്ടാകുന്നു. താഴ്ന്നുകിടക്കുന്ന റോഡിൽ വെള്ളം നിറഞ്ഞു സമീപത്തെ വീടുകളിലേക്കും കയറുന്നുണ്ട്. മുൻപ് ഒഴുകിമാറിയിരുന്ന സ്ഥലം മണ്ണിട്ടുയർത്തിയതോടെയാണ് ദുരിതമേറിയത്.

കരാറുകാരന്‍റെ അനാസ്ഥ; തകഴി ആശുപത്രി റോഡ് തഥൈവ

അമ്പലപ്പുഴ: നാട്ടുകാരുടെ പ്രതിഷേധത്തെത്തുടർന്ന്, വർഷങ്ങളായി തകർന്നുകിടന്ന റോഡിന്‍റെ നിർമാണമാരംഭിച്ചെങ്കിലും മൂന്നുദിവസം കഴിഞ്ഞപ്പോൾ നിർമാണം നിലച്ചു. തകഴി ആശുപത്രി റോഡിന്‍റെ നിർമാണമാണ് പണമനുവദിച്ചിട്ടും കരാറുകാരൻ പൂർത്തിയാക്കാത്തത്. ദൗത്യം പദ്ധതിയുടെ ഭാഗമായി മൂന്നുകോടി രൂപ ചെലവിൽ തകഴി കുടുംബാരോഗ്യകേന്ദ്രത്തിന് പുതിയ കെട്ടിടം യാഥാർഥ്യമാകുകയാണ്. ഇതിന്‍റെ നിർമാണപ്രവർത്തനങ്ങൾ അവസാനഘട്ടത്തിലാണ്. എന്നാൽ, ആശുപത്രിയിലേക്ക് എത്താനുള്ള റോഡ് കുണ്ടും കുഴിയുമായി കാൽനടയാത്രയ്ക്കു പോലും സാധ്യമാകാത്ത തരത്തിൽ തകർന്നുകിടക്കുകയായിരുന്നു. വയോജനങ്ങളടക്കം നൂറിലേറെപ്പേർ നിത്യേന ചികിത്സതേടിയെത്തുന്ന ആശുപത്രിയിലേക്കുള്ള വഴി മഴപെയ്താൽ തെന്നിവീഴുന്ന സ്ഥിതിയായിരുന്നു. തകഴി റെയിൽവേ ഗേറ്റടച്ചാൽ സംസ്ഥാന പാതയിലെത്താനുള്ള ഏക മാർഗം കൂടിയാണ് ഈ റോഡ്. ഇത് തകർച്ചയിലായിട്ട് പത്തു വർഷം പിന്നിടുകയാണ്. പ്രളയാനന്തര പുനർനിർമാണപദ്ധതിയിൽപ്പെടുത്തി 2.19 കോടി രൂപയുടെ രുപരേഖ തയാറാക്കി. ഇതു പ്രകാരം 2022 സെപ്റ്റംബറിൽ ആരംഭിച്ച നിർമാണ ജോലികളാണ് മൂന്നുകൊല്ലമായിട്ടും എങ്ങുമെത്താത്തത്. തകഴി, കരുമാടി, പടഹാരം പ്രദേശങ്ങളിലായി നാലു വാർഡുകളിലെ ജനങ്ങൾക്ക് ഏറ്റവും അത്യാവശ്യമായ യാത്രാമാർഗവും കൂടിയാണിത്. കരാറുകാരന്‍റെ അനാസ്ഥയാണ് റോഡിന്‍റെ ഈയവസ്ഥയ്ക്ക് കാരണമായത്. ഏതാനും മാസം മുൻപ് എംഎൽഎയുടെ സാന്നിധ്യത്തിൽ യോഗം ചേർന്നപ്പോൾ ഓഗസ്റ്റ് 15നകം നിർമാണം പൂർത്തിയാക്കാമെന്ന് കരാറുകാരൻ ഉറപ്പുകൊടുത്തിരുന്നു. റോഡിനായി 2021ലെ തിരുവോണനാളിൽ ടാഗോർ കലാകേന്ദ്രം നിരാഹാരസമരവും 2024ൽ ദേശീയ മനുഷ്യാവകാശസമിതി ജനകീയസമരവും സംഘടിപ്പിച്ചിരുന്നു. ഇതിനു പിന്നാലെ ഒരുമാസം മുൻപ് വിവിധ സംഘടനകളുടെ നേതൃത്വത്തിൽ റോഡ് ഗതാഗതയോഗ്യമാക്കാനായി പ്രതിഷേധവും സംഘടിപ്പിച്ചിരുന്നു. തുടർന്ന് രണ്ടു ദിവസം പിന്നിട്ടപ്പോൾ റോഡു നിർമാണത്തിനു തുടക്കമായി. എന്നാൽ, ദിവസങ്ങൾ പിന്നിട്ടപ്പോൾ വീണ്ടും നിർമാണം നിലച്ചു. കരാറുകാരന് സർക്കാർ പണമനുവദിച്ചിട്ടും നിർമാണം നിലച്ച അവസ്ഥയാണെന്നാണ് നാട്ടുകാരുടെ പരാതി. ഇതിൽ പ്രതിഷേധിച്ച് വീണ്ടും സമരത്തിനിറങ്ങാനാണ് നാട്ടുകാരുടെ തീരുമാനം.

സ്വർണപ്പാളി വിവാദം: ഹൈക്കോടതി നിരീക്ഷണത്തിൽ അന്വേഷണം വേണമെന്ന് കൊടിക്കുന്നിൽ സുരേഷ്

ചെങ്ങന്നൂർ: കേരളം ഭരിക്കുന്നത് അമ്പലം വിഴുങ്ങി സർക്കാരാണെന്ന് കൊടിക്കുന്നിൽ സുരേഷ് എംപി ആരോപിച്ചു. ശബരിമലയിലെ സ്വർണപ്പാളി കാണാതായ സംഭവത്തിൽ യഥാർഥ പ്രതികളെ പുറത്തുകൊണ്ടുവരണമെങ്കിൽ ഹൈക്കോടതിയുടെ നേതൃത്വത്തിൽ അന്വേഷണം നടത്തണമെന്ന് അദ്ദേഹം ആവശ്യപ്പെട്ടു. ചെങ്ങന്നൂരിൽ മാധ്യമപ്രവർത്തകരോട് സംസാരിക്കുകയായിരുന്നു അദ്ദേഹം. ഉദ്യോഗസ്ഥരും ദേവസ്വം ബോർഡും അടങ്ങുന്ന -തിരുട്ടുസംഘമാണ് സ്വർണമോഷണം നടത്തിയത്. ഈ തിരുട്ടുസംഘത്തിന്‍റെ സംരക്ഷകനാണ് മുഖ്യമന്ത്രി. അതുകൊണ്ടാണ് അദ്ദേഹം മൗനം തുടരുന്നത്. സ്ത്രീപ്രവേശന സമയത്ത് ആചാരലംഘനം നടത്താൻ കാട്ടിയ ആവേശം അയ്യപ്പന്‍റെ സ്വത്ത് നഷ്ടപ്പെട്ടപ്പോൾ മുഖ്യമന്ത്രിക്ക് ഉണ്ടായില്ല. ശബരിമലയിലെ സ്വർണപ്പാളി മോഷ്ടിക്കപ്പെട്ടത് എങ്ങനെയാണ്, ആരൊക്കെ ചേർന്നാണ് പദ്ധതി ആസൂത്രണം ചെയ്തത് എന്നിവയടക്കം അന്വേഷണവിധേയമാക്കണമെന്നും കൊടിക്കുന്നിൽ സുരേഷ് എംപി ആവശ്യപ്പെട്ടു.

പരുമല പെരുന്നാൾ, പന്തലിന് കാൽ നാട്ടി

മാന്നാർ: പരിശുദ്ധ പരുമല തിരുമേനിയുടെ 123-ാം ഓര്‍മപ്പെരുന്നാളിന്‍റെ പന്തല്‍കാല്‍നാട്ട് കര്‍മം നടത്തി. പരുമല സെമിനാരി മാനേജര്‍ ഫാ. എല്‍ദോസ് ഏലിയാസ്‌ കാൽനാട്ടുകർമം നിര്‍വഹിച്ചു. നിരണം ഭദ്രാസന സെക്രട്ടറി ഫാ. അലക്‌സാണ്ടര്‍ ഏബ്രഹാം, പരുമല സെമിനാരി അസി. മാനേജര്‍മാരായ ഫാ. ജെ. മാത്തുക്കുട്ടി, ഫാ. ഗീവര്‍ഗീസ് മാത്യു, പരുമല കൗണ്‍സില്‍ അംഗങ്ങളായ മാത്യു ഉമ്മന്‍ അരികുപുറം, പി.എ. ജോസ് പുത്തന്‍പുരയില്‍, മനോജ് പി. ജോര്‍ജ് പന്നായികടവില്‍, ആശുപത്രി കൗണ്‍സില്‍ അംഗങ്ങളായ തോമസ് ജോണ്‍, അലക്‌സ് തോമസ് അരികുപുറം തുടങ്ങിയവര്‍ പങ്കെടുത്തു.

സിബിഎസ്ഇ ജില്ലാ സഹോദയ കലോത്സവത്തിനു തുടക്കമായി

അമ്പലപ്പുഴ: സിബിഎസ്ഇ ജില്ലാ സഹോദയ കലോത്സവത്തിനു തുടക്കമായി. സഹോദയ സ്കൂൾസ് കോംപ്ലക്സ് 19-ാമത് ജില്ലാ കലോത്സവം 2025 കളർകോട് ചിന്മയ വിദ്യാലയത്തിൽ ആരംഭിച്ചു. പിറവം ആദിശങ്കര നിലയം ആചാര്യൻ സ്വാമി ശാരദാനന്ദ സരസ്വതി ഉദ്ഘാടനം നിർവഹിച്ചു. സഹോദയ പ്രസിഡന്‍റ് ഡോ. എ. നൗഷാദ് അധ്യക്ഷനായി. ആലപ്പുഴ ചിന്മയ വിദ്യാലയ പ്രിൻസിപ്പൽ ഡോ. ആർ.എസ്. രേഖ സ്വാഗതം പറഞ്ഞു. ചിന്മയ വിദ്യാലയ പ്രസിഡന്‍റ് ഡോ. കെ. നാരായണൻ, സഹോദയ വൈസ് പ്രസിഡന്‍റ് സെൻ കല്ലുപുര, സെക്രട്ടറി ആശ യതിശ്, എക്സിക്യൂട്ടീവ് അംഗങ്ങളായ സവിത എസ്. ചന്ദ്രൻ, ഗീതാ വി. പ്രഭു എന്നിവർ സന്നിഹിതരായിരുന്നു. ആശാ യതിശ് നന്ദി പറഞ്ഞു. ആദ്യദിനം രചനാമത്സരങ്ങളോടെ 12 വേദികളിലായി 42 ഇനങ്ങൾ പൂർത്തിയായി. 53 സ്കൂളുകളിൽനിന്നായി മൂവായിരത്തിൽപരം മത്സരാർഥികൾ പങ്കെടുക്കുന്നു. കലോത്സവം 11ന് സമാപിക്കും.

കാടുവിട്ട് വാനരൻ, നാട്ടുകാർക്കു കൗതുകം

അമ്പലപ്പുഴ: കാടുവിട്ട് നാട്ടിലിറങ്ങിയ വാനരൻ നാട്ടുകാർക്കു കൗതുകമാകുന്നു. കഴിഞ്ഞ ഒരാഴ്ചയായി പുന്നപ്രയുടെ വിവിധപ്രദേശങ്ങളിലാണ് കുരങ്ങൻ വികൃതികാട്ടുന്നത്. വിശപ്പും ദാഹവും മൂത്താൽ വീടുകളിലെ മതിലിൽ വന്നിരിക്കും. എറിഞ്ഞുകൊടുക്കുന്ന ഭക്ഷണസാധനങ്ങൾ ഇരുകൈ നീട്ടി വാങ്ങി സ്ഥലം വിടും. കുപ്പിവെള്ളം കൊടുത്താലും വാങ്ങും. ഇടയ്ക്കു കാക്കക്കൂട്ടം വളയുന്നതാണ് കുരങ്ങന്‍റെ ഭീഷണി. തീരദേശ പാളത്തിലൂടെ ഓടുന്ന ദീർഘദൂര ട്രെയിനിനു മുകളിൽ കയറിയിരുന്നാണ് കുരങ്ങുകൾ നാട്ടിൻപുറത്തെത്തുന്നത്. ആളൊഴിഞ്ഞ പ്രദേശങ്ങളിലാണ് കൂടുതലായും തമ്പടിക്കുന്നത്.

പി.ഡി. ലൂക്ക് അനുസ്മരണം

ചമ്പക്കുളം: കേരളത്തിലെ മികച്ച സഹകാരിയും അധ്യാപകനും വള്ളംകളി ദൃക്‌സാക്ഷിവിവരണക്കാരനുമായിരുന്ന പി.ഡി. ലൂക്കിന്‍റെ 21-ാമത് അനുസ്മരണ സമ്മേളനവും പുരസ്‌കാര സമര്‍പ്പണവും പി.ഡി. ലൂക്ക് ഫൗണ്ടേഷന്‍റെ നേതൃത്വത്തില്‍ ഒന്പതിന് രാവിലെ 11ന്് മങ്കൊമ്പ് ബ്രൂക്ക്‌ഷോര്‍ ഓഡിറ്റോറിയത്തില്‍ നടക്കും. കേരള കോണ്‍ഗ്രസ് ഡെപ്യൂട്ടി ചെയര്‍മാൻ കെ. ഫ്രാന്‍സിസ് ജോര്‍ജ് എംപിഉദ്ഘാടനം ചെയ്യും. വള്ളംകളി, വഞ്ചിപ്പാട്ട് എന്നിവയിലെ സമഗ്രസംഭാവനയ്ക്ക് സി.കെ. സദാശിവന്‍, നാടക സിനിമ സീരിയല്‍ നടനായ പ്രമോദ് വെളിയനാട് എന്നിവര്‍ക്ക് പുരസ്‌കാരങ്ങള്‍ നല്കും. വിവിധ മേഖലകളില്‍ മികച്ച പ്രകടനം കാഴ്ചവച്ചവരെ യോഗത്തില്‍ ആദരിക്കുമെന്ന് ഭാരവാഹികള്‍ വാര്‍ത്താസമ്മേളനത്തില്‍ അറിയിച്ചു. പി.ഡി. ലൂക്ക് ഫൗണ്ടേഷന്‍ ചെയര്‍മാന്‍ ബാബു പാറക്കാടന്‍ അധ്യക്ഷത വഹിക്കുന്ന യോഗത്തില്‍ കേരള കോണ്‍ഗ്രസ് ജില്ലാ പ്രസിഡന്‍റും പി.ഡി. ലൂക്ക് ഫൗണ്ടേഷന്‍ രക്ഷാധികാരിയുമായ ജേക്കബ് ഏബ്രഹാം, കൈനകരി ചാവറഭവന്‍ ഡയറക്ടര്‍ ഫാ. തോമസ് ഇരുമ്പുകുത്തിയില്‍, കൈനകരി പഞ്ചായത്ത് പ്രസിഡന്‍റ് എം. സി. പ്രസാദ്, ജോബിന്‍ എസ്. കൊട്ടാരം, പ്രവീണ്‍ ഇറവങ്കര, എ.കെ. ജോസഫ്, ജോസ് കാവനാടന്‍, ജോസ് കൊച്ചുകളപ്പുരയ്ക്കല്‍ എന്നിവര്‍ പ്രസംഗിക്കും.

വോട്ടര്‍പട്ടികയില്‍ പേരുചേര്‍ക്കാന്‍ 14 വരെ അവസരം

ആലപ്പുഴ: തദ്ദേശസ്വയംഭരണ സ്ഥാപനങ്ങളിലേക്ക് നടക്കാനിരിക്കുന്ന പൊതുതെരഞ്ഞടുപ്പിനു മുന്നോടിയായി വോട്ടര്‍പട്ടികയില്‍ പേരു ചേര്‍ക്കുന്നത് ഉള്‍പ്പെടെയുള്ള അപേക്ഷകളും ആക്ഷേപങ്ങളും 14 വരെ www.sec.kerala.gov.in എന്ന വെബ്സൈറ്റില്‍ ഓണ്‍ലൈനായി നല്‍കാം. 2025 ജനുവരി ഒന്നിനോ അതിനുമുമ്പോ 18 വയസ് തികഞ്ഞവര്‍ക്ക് വോട്ടര്‍പട്ടികയില്‍ പേരു ചേര്‍ക്കാം. വോട്ടര്‍പട്ടികയില്‍ പേര് ചേര്‍ക്കുന്നതിന് ഫോറം നാലും വോട്ടര്‍ പട്ടികയിലെ വിവരങ്ങള്‍ തിരുത്തുന്നതിന് ഫോറം ആറിലും ഒരു വോട്ടറുടെ പേരുവിവരം ഒരു വാര്‍ഡില്‍ നിന്നും മറ്റൊരു വാര്‍ഡിലേക്ക് മാറ്റുന്നതിന് ഫോറം നമ്പര്‍ ഏഴിലും അപേക്ഷ നല്‍കാം. അന്തിമ വോട്ടര്‍പട്ടിക 25ന് പ്രസിദ്ധീകരിക്കും. പൊതുജനങ്ങള്‍ ഈ അവസരം പരാമാവധി പ്രയോജനപ്പെടുത്തണമെന്ന് ജില്ലാ തെരഞ്ഞെടുപ്പ് ഉദ്യോഗസ്ഥന്‍ കൂടിയായ ജില്ലാ കളക്ടര്‍ അറിയിച്ചു.

തുറവൂർ-കുമ്പളങ്ങി റോഡിന് ശാപമോക്ഷം; അറ്റകുറ്റപ്പണി ആരംഭിച്ചു

തുറവൂർ: തുറവൂർ- കുമ്പളങ്ങി റോഡിന് ശാപമോക്ഷം. റോഡിന്‍റെ അറ്റകുറ്റപ്പണി ആരംഭിച്ചു. കോടികൾ അനുവദിച്ചിട്ടും രാഷ്‌ട്രീയ വടംവലിയിൽ നിർമാ ണം നടത്താതെ ജനങ്ങളെ വലച്ച റോഡിന്‍റെ നിർമാണ പ്രവൃ ത്തികളാണ് ഇന്നലെ ആരംഭിച്ചത്. തിരക്കേറിയ തുറവൂർ -കുമ്പളങ്ങി റോഡിനാണ് പൊതുമരാമത്ത് വകുപ്പ് ആവശ്യപ്പെട്ട് കോടികൾ അനുവദിച്ചിട്ടും റോഡ് പണിനടത്താതിരുന്നത്. മഴയുടെ കാരണം പറഞ്ഞ് റോഡ് നിർമാണം നടത്താത്തത് യഥാർഥ ത്തിൽ എംപിയും ഭരണകക്ഷി പാർട്ടി നേതാക്കളുമായുള്ള രാഷ്ട്രീയ വടംവലിയാണെന്നാണ് ജനങ്ങൾ പറയുന്നത്. വൻകുഴികളിൽ നിറഞ്ഞ ഈ റോഡിലൂടെ സഞ്ചരിക്കുന്ന യാത്രക്കാരുടെ നടുവൊടിയുകയാണ്. നിരവധി കെഎസ്ആർടിസി, സ്വകാര്യബസുകൾ സർവീസ് നടത്തുന്ന റോഡിന്‍റെ ശോച്യാവസ്ഥ പരിഹരിക്കുന്നതിന് ടാറിംഗ് നടത്താതെ വർഷങ്ങളായി കുഴിയടയ്ക്കൽ നാടകം മാത്രമാണ് നടക്കുന്നത്. എ.എം. ആരിഫ് എംഎൽഎയായിരിക്കെ എട്ടു വർഷം മുമ്പാണ് തുറവൂർ - കുമ്പളങ്ങി റോഡിൽ അവസാനമായി ടാറിംഗ് നടത്തിയത്. കുറച്ചുകാലങ്ങൾക്കു ശേഷം തകർന്നു തുടങ്ങിയ റോഡിൽ ലക്ഷങ്ങൾ ചെലവഴിച്ച് ഇടയ്ക്കിടെ അറ്റകുറ്റപ്പണി നടത്തിയെങ്കിലും യാതൊരു പ്രയോജനവുമുണ്ടായില്ല. തകർച്ചയിലായ റോഡിൽ മാസങ്ങൾക്കു മുൻപ് രൂപപ്പെട്ട കുഴികൾ കാലവർഷം ആരംഭിച്ചതോടെ വലുതായി.

അത്തിക്കയം പാലം ഇനി രാത്രിയിലും തിളങ്ങും

അത്തിക്കയം: ശബരിമല ഇടത്താവളത്തോടു ചേർന്നുള്ള അത്തിക്കയം പാലത്തിൽ മണ്ഡലകാലത്ത്‌ വൈദ്യുതി വകുപ്പിന്‍റെ അനുമതിയോടെ താത്കാലിക വെളിച്ച സംവിധാനം ഒരുക്കകയായിരുന്നു പതിവ്‌. കഴിഞ്ഞ മണ്ഡലകാലത്ത്‌ വൈദ്യുതി വകുപ്പ്‌ അനുമതി നിഷേധിച്ചു. തുടർന്ന് നാറാണംമുഴി ഗ്രാമപഞ്ചായത്ത്‌ ഭരണസമിതി പദ്ധതി ആവിഷ്കരിച്ച്‌ പാലത്തിൽ സ്ഥിരമായി വെളിച്ച സംവിധാനം ഒരുക്കാനുള്ള തീരുമാനം എടുത്തു. സംസ്ഥാന സാങ്കേതിക കമ്മിറ്റിയുടേതടക്കം അനുമതി വാങ്ങിയാണ് ഈ പദ്ധതി നടപ്പിലാക്കിയത്. ഗ്രാമപഞ്ചായത്ത് പ്രസിഡന്‍റ് സോണിയ മനോജ് സ്വിച്ച് ഓൺ കർമം നിർവഹിച്ചു. തുടർന്ന് നടന്ന യോഗത്തിൽ ഗ്രാമപഞ്ചായത്ത്‌ വികസനകാര്യ സ്ഥിരം സമിതി അധ്യക്ഷ ഓമന പ്രസന്നന്‍റെ അധ്യക്ഷതയിൽ സോണിയ മനോജ്‌ ഉദ്ഘാടനം ചെയ്തു. ബ്ലോക്ക്‌ പഞ്ചായത്ത്‌ അംഗങ്ങളായ ഗ്രേസി തോമസ്‌, സിബി താഴത്തില്ലത്ത്‌, ഗ്രാമപഞ്ചായത്ത് അംഗങ്ങളായ തോമസ് ജോർജ്, സാംജി ഇടമുറി, റോസമ്മ വർഗീസ്‌, ആസുത്രണ സമിതി ഉപാധ്യക്ഷൻ ഷിബു തോണിക്കടവിൽ, ജോർജ് ജോസഫ്‌, എ. കെ. ലാലു, ജയിംസ്‌ കക്കാട്ട്കുഴി, രാജേന്ദ്രൻ, ജയിംസ്‌ രാമനാട്ട്, ഡി. ഷാജി,സുനിൽ യമുന എന്നിവർ പ്രസംഗിച്ചു.

സ്‌കൂള്‍ റേഡിയോ പദ്ധതി ഉദ്ഘാടനം ഒന്പതിന്

എടത്വ: സെന്‍റ് മേരീസ് ഗേള്‍സ് ഹൈസ്‌കൂള്‍ ഇനി സ്മാര്‍ട്ടാവുന്നു. സ്‌കൂള്‍ റേഡിയോ എന്ന സ്വപ്ന പദ്ധതി സാക്ഷാത്്‍കാരത്തിലേക്ക്. സ്‌കൂള്‍ ലിറ്റില്‍ കൈറ്റ്സ് ക്ലബ്ബിന്‍റെ തനത് പ്രവര്‍ത്തനമായ സ്‌കൂള്‍ റേഡിയോയായ സെന്‍റ് മേരീസ് ലിറ്റില്‍ കൈറ്റ്സ് സ്മാര്‍ട്ട് സ്വരം റേഡിയോ പ്രക്ഷേപണത്തിന്‍റെ ഉദ്ഘാടനം 9ന് ഉച്ചയ്ക്ക് 1.30ന് ഫൊറോനാ പള്ളി പാരിഷ് ഹാളില്‍ നടക്കും. കുട്ടനാട്ടിലെ ആദ്യ സ്‌കൂള്‍ റേഡിയോ എന്ന പ്രത്യേകതയോടെയാണ് എത്തുന്നത്. ഹെഡ്മിസ്ട്രസ് പ്രിയ ഫിലിപ്പ്, റേഡിയോ കോ-ഓര്‍ഡിനേറ്റര്‍ എബി ടോം സിബി, ഷാലറ്റ് മരിയ ജോര്‍ജ്, ഷിന്‍റു ജോസഫ് എന്നിവര്‍ പരിപാടികളെക്കുറിച്ച് വിശദീകരിച്ചു. ചലച്ചിത്ര പിന്നണി ഗായിക വൈഗാ ലക്ഷ്മി ഉദ്ഘാടനം നിര്‍വഹിക്കും. മാനേജര്‍ ഫാ. ഫിലിപ്പ് വൈക്കത്തുകാരന്‍ അധ്യക്ഷത വഹിക്കും. തലവടി മുന്‍ എഇഒ സന്തോഷ് മുഖ്യപ്രഭാഷണം നടത്തും. മീഡിയ വില്ലേജ് ഡയറക്ടര്‍ ഫാ. ജോഫി പുതുപ്പറമ്പ്, റേഡിയോ മീഡിയ വില്ലേജ് പ്രോഗ്രാം കോ-ഓര്‍ഡിനേറ്റര്‍ വിപിന്‍ രാജ് എന്നിവര്‍ മുഖ്യാതിഥികളായി എത്തും. ബ്ലോക്ക് പഞ്ചായത്ത് പ്രസിഡന്‍റ് ജിന്‍സി ജോളി, പഞ്ചായത്ത് പ്രസിഡന്‍റ് ആന്‍സി ബിജോയ്, ബിനു ഐസക് രാജു, ജയിന്‍ മാത്യു, അനുപമ, തലവടി അശോകന്‍, ജയന്‍ ജോസഫ് പുന്നപ്ര എന്നിവര്‍ പ്രസംഗിക്കും.

ട്രാവലര്‍ നിയന്ത്രണം തെറ്റി മുട്ടാര്‍ റോഡിലേക്കു വീണു

എടത്വ: നീരേറ്റുപുറം ജംഗ്ഷനു സമീപം ട്രാവലര്‍ പിന്നോട്ട് തിരിക്കുന്നതിനിടെ നിയന്ത്രണം തെറ്റി താഴ്ചയിലെ മുട്ടാര്‍ റോഡിലേക്ക് വീണു. ഇന്നലെ വൈകിട്ടാണ് സംഭവം. നീരേറ്റുപുറം ജംഗ്ഷനു സമീപം കാര്‍ സ്റ്റാന്‍ഡില്‍നിന്ന് ട്രാവലര്‍ പിന്നോട്ട് തിരിക്കുന്നതിനിടെ നിയന്ത്രണം തെറ്റി നീരേറ്റുപുറം മുട്ടാര്‍ റോഡിലേക്ക് പിന്‍ഭാഗം ഇടിച്ചുവീഴുകയായിരുന്നു. താഴെ പാര്‍ക്ക് ചെയ്തിരുന്ന സ്‌കൂട്ടറിനും സാരമായ കേടുപാടുകള്‍ സംഭവിച്ചിട്ടുണ്ട്. ഡ്രൈവര്‍ അപകടം കൂടാതെ രക്ഷപ്പെട്ടു.

കത്തോലിക്കാ കോണ്‍ഗ്രസ് അവകാശ സംരക്ഷണ യാത്രയ്ക്ക് 22ന് അതിരൂപതയില്‍ സ്വീകരണം

ചങ്ങനാശേരി: ഭിന്നശേഷി നിയമനവുമായി ബന്ധപ്പെട്ട് നിലവിലുള്ള വിഷയങ്ങള്‍ എത്രയും വേഗം പരിഹരിക്കണമെന്നും നിയമന അംഗീകാരം അധ്യാപകരുടെ ന്യായമായ അവകാശമാണെന്നും ചങ്ങനാശേരി അതിരൂപത വികാരി ജനറാള്‍ മോണ്‍. ആന്‍റണി എത്തയ്ക്കാട്ട്. ഈ വിഷയത്തില്‍ വിഭാഗീയത സൃഷ്ടിക്കുന്ന തരത്തിലുള്ള പ്രസ്താവനകള്‍ നടത്തുന്നത് ഒരിക്കലും ഉചിതമല്ലെന്നും അദ്ദേഹം കൂട്ടിചേര്‍ത്തു. കത്തോലിക്ക കോണ്‍ഗ്രസ് അതിരൂപതാ നേതൃസംഗമം ഉദ്ഘാടനം ചെയ്യുകയായിരുന്നു വികാരി ജനറാള്‍. അതിരൂപത പ്രസിഡന്‍റ് ബിജു സെബാസ്റ്റ്യന്‍ അധ്യക്ഷനായിരുന്നു. കത്തോലിക്ക കോണ്‍ഗ്രസ് ഗ്ലോബല്‍ പ്രസിഡന്‍റ് പ്രഫ. രാജീവ് കൊച്ചുപറമ്പിലിന്‍റെ നേതൃത്വത്തില്‍ 13 മുതല്‍ 24 വരെ കാസര്‍ഗോഡ് മുതല്‍ തിരുവനന്തപുരത്തേക്ക് “സമുദായ ശക്തീകരണം രാഷ്‌ട്ര പുരോഗതിക്ക്, നീതി ഔദാര്യമല്ല അവകാശമാണ്’’ എന്നീ മുദ്രാവാക്യങ്ങള്‍ ഉയര്‍ത്തി സംഘടിപ്പിക്കുന്ന അവകാശ സംരക്ഷണ യാത്രയ്ക്ക് 22ന് ചങ്ങനാശേരി അതിരൂപതയുടെ വിവിധ കേന്ദ്രങ്ങളായ ഏറ്റുമാനൂര്‍, കോട്ടയം, ആലപ്പുഴ, രാമങ്കരി, ചങ്ങനാശേരി എന്നിവിടങ്ങളില്‍ സ്വീകരണം നല്‍കാന്‍ നേതൃയോഗം തീരുമാനിച്ചു. യാത്രയുടെ വിജയത്തിനായി സി.ടി. തോമസ്, സെബാസ്റ്റ്യന്‍ പുല്ലാട്ടുകാല, കെ.എസ്. ആന്‍റണി, സൈബി അക്കര, ബാബു വള്ളപ്പുര, ജേക്കബ് നിക്കോളാസ്, എന്‍.എ. ഔസേപ്പ്, ജോസി ഡൊമിനിക് എന്നിവരുടെ നേതൃത്വത്തില്‍ വിവിധ കമ്മിറ്റികള്‍ക്ക് രൂപം കൊടുത്തു. 24ന് തിരുവനന്തപുരം സെക്രട്ടേറിയറ്റ് പടിക്കല്‍ നടത്തുന്ന ധര്‍ണയില്‍ അതിരൂപതയിലെ എല്ലാ ഇടവകകളുടെയും പങ്കാളിത്തം ഉറപ്പാക്കാന്‍ വേണ്ട ക്രമീകരണങ്ങള്‍ക്കു രൂപംകൊടുത്തു. ഗ്ലോബല്‍ പ്രസിഡന്‍റ് പ്രഫ. രാജീവ് കൊച്ചുപറമ്പില്‍ മുഖ്യപ്രഭാഷണം നടത്തി. അതിരൂപതാ ഡയറക്ടര്‍ ഫാ. സാവിയോ മാനാട്ട്, അതിരൂപത ജനറല്‍ സെക്രട്ടറി ബിനു ഡൊമിനിക്, ട്രഷറര്‍ ജോസ് വെങ്ങാന്തറ, ഭാരവാഹികളായ സി.ടി. തോമസ്, ജോര്‍ജുകുട്ടി മുക്കത്ത്, രാജേഷ് ജോണ്‍, ടോമിച്ചന്‍ അയ്യരുകുളങ്ങര, അഡ്വ. മനു ജെ. വരാപ്പള്ളി, സെബാസ്റ്റ്യന്‍ വര്‍ഗീസ്, കുഞ്ഞ് കളപ്പുര, കെ.എസ്. ആന്‍റണി, സൈബി അക്കര, സേവ്യര്‍ കൊണ്ടോടി, സെബാസ്റ്റ്യന്‍ പുല്ലാട്ടുകാലാ, പി.സി കുഞ്ഞപ്പന്‍, ജെസി ആന്‍റണി, സിസി അമ്പാട്ട്, ലിസി ജോസ്, ജോസി ഡൊമിനിക്, സിനി പ്രിന്‍സ്, ലിസി ജോസ് എന്നിവര്‍ പ്രസംഗിച്ചു.

തൊഴിലുറപ്പ് പദ്ധതിയെ കൊല്ലാൻ ആരെയും അനുവദിക്കില്ല: കെ.സി. വേണുഗോപാൽ

ഹരിപ്പാട്: നാടിന്‍റെ ഹൃദയത്തിൽനിന്നുണ്ടായതാണ് മഹാത്മാഗാന്ധി ദേശീയ ഗ്രാമീണ തൊഴിലുറപ്പ് പദ്ധതിയെന്നും അതിനെ കൊല്ലാൻ ആരെയും അനുവദിക്കില്ലെന്നും കെ.സി. വേണുഗോപാൽ എംപി പറഞ്ഞു. ചിങ്ങോലി ഗാന്ധി സേവാ സാംസ്‌കാരിക വേദി തൊഴിലുറപ്പ് പദ്ധതി തൊഴിലാളികൾക്ക് നൽകിയ തൊഴിൽ ഉപകരണങ്ങളുടെ വിതരണോദ്ഘാടനം നിർവഹിക്കുകയായിരുന്നു അദ്ദേഹം. കോൺഗ്രസ് കൊണ്ടുവന്നതാണ് തൊഴിലുറപ്പ് പദ്ധതി. അത് മുന്നോട്ടു പോകേണ്ടതും തൊഴിലാളികളുടെ ജീവിതം ഭദ്രമാക്കേണ്ടതും പാർട്ടിയുടെ ഉത്തരവാദിത്വമാണ്. തൊഴിലുറപ്പ് പദ്ധതി യുപിഎ സർക്കാരിന്‍റെ അഴിമതിയുടെ സ്മാരകമാണെന്നാണ് നരേന്ദ്രമോദി ഒരുകാലത്ത് പറഞ്ഞത്. ഇന്ത്യ കണ്ട ഏറ്റവും വലിയ ദാരിദ്ര്യനിർമാർജന പദ്ധതിയാണ് തൊഴിലുറപ്പെന്നും കോവിഡു കാലത്ത് പട്ടിണിയില്ലാതെ മുന്നോട്ടു പോകാൻ കഴിഞ്ഞത് ഈ പദ്ധതി മൂലമാണെന്നും പിന്നീട് അദ്ദേഹത്തിന് പാർലമെന്‍റിൽ മാറ്റിപ്പറയേണ്ടിവന്നുവെന്നും കെ.സി. വേണുഗോപാൽ പറഞ്ഞു. സാംസ്‌കാരിക വേദി ചെയർമാൻ ജേക്കബ് തമ്പാൻ അധ്യക്ഷനായി. കെപിസിസി ജനറൽ സെക്രട്ടറി എം. ലിജു മുഖ്യപ്രഭാഷണം നടത്തി. സാംസ്‌കാരിക വേദി ജനറൽ കൺവീനർ രഞ്ജിത്ത് ചിങ്ങോലി, ബിജു തണൽ, ആജീർ നാണമ്പാട്ട്, അനിൽ ചിങ്ങോലി, എ.കെ. രാജൻ, എം.പി. പ്രവീൺ, പദ്മശ്രീ ശിവദാസൻ, ഷംസുദീൻ കായിപ്പുറം, പി. സുകുമാരൻ, മുഞ്ഞിനാട്ട് രാമചന്ദ്രൻ, വി. ഷുക്കൂർ, എം.എ. കലാം, പി.ജി.ശാന്തകുമാർ എന്നിവർ പ്രസംഗിച്ചു.

പുതമൺ പാലം നിർമാണം യുദ്ധകാലാടിസ്ഥാനത്തിൽ

റാന്നി: പുതമൺ പാലത്തിന്‍റെ പണികൾ യുദ്ധകാലാടിസ്ഥാനത്തിൽ പൂർത്തീകരിച്ച് ശബരിമല മണ്ഡലകാലത്തിനു മുന്പായി തുറന്നു നൽകാൻ നിർദേശം. ശബരിമലയിലേക്കുള്ള പ്രധാന പാതകളിലൊന്നായ കോഴഞ്ചേരി - കീക്കൊഴൂർ - റാന്നി പാതയിൽ കഴിഞ്ഞ രണ്ടുവർഷമായി പാലത്തിന്‍റെ തകർച്ചമൂലം യാത്ര ദുരിതത്തിലാണ്. പാലം പണി അടിയന്തരമായി പൂർത്തീകരിക്കാനുള്ള നിർദേശം നൽകിയതായി മന്ത്രി മുഹമ്മദ് റിയാസും പ്രമോദ് നാരായൺ എംഎൽഎയെ നിയമസഭയിൽ അറിയിച്ചു. പാലത്തിന്‍റെ ഡെക്ക് സ്ലാബ് കോൺക്രീറ്റ് അടിയന്തരമായി പൂർത്തീകരിക്കുന്ന വിധത്തിൽ പ്രവൃത്തി ക്രമീകരിച്ചിട്ടുണ്ട്. തുടർന്ന് പാലത്തിന്‍റെ പൂർത്തീകരിച്ച അപ്രോച്ച് റോഡിൽ ജിഎസ്ബി വിരിച്ച് വാഹനഗതാഗതത്തിനു താത്കാലികമായി തുറന്നുകൊടുക്കത്തക്ക വിധമാണ് പ്രവൃത്തികൾ ക്രമീകരിച്ചിരിക്കുന്നതിന് നിർദ്ദേശം നൽകിയിരിക്കുന്നത്. ശബരിമല പാതയിലെ പാലം എന്ന നിലയിൽ പ്രത്യേകമായി ശ്രദ്ധിക്കുന്നതിന് പാലം വിഭാഗം എൻജിനീയർക്ക് നിർദേശം നൽകിയിട്ടുള്ളതായും മന്ത്രി പറഞ്ഞു. പാലം നിർമിക്കുന്നതിനായി 2.05 കോടി രൂപയായിരുന്നു അനുവദിച്ചിരുന്നത്. എന്നാൽ പ്രവൃത്തി ടെൻഡർ ചെയ്തപ്പോൾ 20 ശതമാനം അധികത്തിലാണ് കരാറുകാരൻ പ്രവൃത്തി ഏറ്റെടുത്തത്. നിർമാണം മൂന്നു പ്രാവശ്യം ടെൻഡർ ചെയ്യേണ്ടി വന്നു. പിന്നീട് പ്രത്യേക മന്ത്രിസഭ കൂടി പുതിയ തുകയ്ക്ക് അനുമതി നൽകിയ ശേഷമാണ് നിർമാണ ജോലികൾ ആരംഭിച്ചത്. അനുവദിച്ച തുകയേക്കാൾ വളരെയധികം തുക അധികമായി വേണ്ടി വന്നതിനാലാണ് മന്ത്രിസഭയുടെ അംഗീകാരം ആവശ്യമായി വന്നത്. ഒരുവർഷം മുന്പാണ് ജോലികൾ ആരംഭിച്ചത്. 11 മീറ്റർ വീതി റാന്നി- ബ്ലോക്ക്പടി - മേലുകാവ് - കോഴഞ്ചേരി റോഡിലെ പുതമൺ പെരുന്തോടിന് കുറുകെയുള്ള പാലം അപകടാവസ്ഥയിൽ ആയതോടെയാണ് പുതിയ പാലം നിർമിക്കുന്നത്. 2023 ജനുവരി 26നാണ് പഴയ പാലത്തിനു ബലക്ഷയം കണ്ടെത്തിയത്. തുടർന്ന് ഗതാഗതം തടഞ്ഞു. ചെറുവാഹനങ്ങൾ മാത്രം കടത്തിവിട്ടുകൊണ്ടായിരുന്നു ആദ്യം നിയന്ത്രണം. പിന്നീട് 30 ലക്ഷം രൂപ ചെലവിൽ താത്കാലിക പാത നിർമിച്ച് ഗതാഗതം അനുവദിച്ചു. 70 വർഷത്തിലധികം പഴക്കമുള്ള പാലം അപകടാവസ്ഥയിലാണെന്ന കണ്ടെത്തലിനേ തുടർന്നാണ് പുതിയ പാലം എന്ന നിർദേശം പൊതുമരാമത്ത് വകുപ്പ് അംഗീകരിച്ചത്. നിലവിലെ പാലം പുതുക്കി പ്പണിയുന്നതിനു പകരമായി പുതിയ പാലം എന്ന നിർ‌ദേശം പൊതുമരാമത്ത് വകുപ്പും അംഗീകരിച്ചു. എട്ട് മീറ്റർ വീതം നീളമുള്ള രണ്ട് സ്പാനുകളോടു കൂടിയ സബ്മേഴ്‌സിബി പാലമാണ് വിഭാവനം ചെയ്തിരിക്കുന്നത്. 7.50 മീറ്റർ വാഹനഗതാഗതവും ഇരുവശത്തും ഒന്നര മീറ്റർ വീതം ഫുട്പാത്തും ഉൾപ്പെടെ 11 മീറ്ററാണ് പാലത്തിന്‍റെ വീതി. നിലവിൽ പാലത്തിന്‍റെ പൈലുകളുടെയും പൈൽ ക്യാപ്പുകളുടേയും നിർമാണം പൂർത്തിയാക്കിയിട്ടുണ്ട്. റോഡിന്‍റെ ഇരുകരകളിലും ഉള്ള അബട്ട്മെന്‍റിന്‍റെയും മധ്യത്തിലുള്ള പിയറിന്‍റെയും നിർമാണവും പൂർത്തീകരിച്ചു. അപ്രോച്ച് റോഡിന്‍റെ സംരക്ഷണഭിത്തിയുടെ നിർമാണവും പുരോഗമിക്കുകയാണ്. തോടിന്‍റെ അടിത്തട്ടിൽ അപ്രോൺ നിർമാണവും പുരോഗമിക്കുകയാണ്. കാലവർഷം ശക്തിയായതോടെ പെരുന്തോട്ടിൽ വെള്ളം അടിക്കടി ക്രമാതീതമായി ഉയർന്നതാണ് പ്രവൃത്തിയുടെ പുരോഗതിയെ സാരമായി ബാധിച്ചത്.

സംസ്ഥാന സീനിയര്‍ ബാസ്‌കറ്റ്‌ബോള്‍: ആലപ്പുഴയെ റൂഷിനും ടെസയും നയിക്കും

ആലപ്പുഴ: സംസ്ഥാന സീനിയര്‍ ബാസ്‌കറ്റ്‌ബോള്‍ ചാമ്പ്യന്‍ഷിപ്പില്‍ ജില്ലാ പുരുഷ, വനിതാ ടീമുകളെ റൂഷീനും ടെസയും നയിക്കും. പുരുഷ ടീം: റുഷീന്‍ ഷുക്കൂര്‍-ക്യാപ്റ്റന്‍, ഡിനോയ് പി. ഡൊമിനിക്, കാര്‍ത്തിക് ബാബു, ആര്‍. ആല്‍ഫി, ആല്‍ബിന്‍ ടി. വര്‍ഗീസ്, നിരഞ്ജന്‍ എസ്. നായര്‍, അന്‍സിഫ് ഫാസില്‍ സി, നിയോ ജോണ്‍ വിന്‍സെന്‍റ്, വി.എസ്. ബ്ലസണ്‍, പി.എം. ഗൗതം, വി. അനന്ദകൃഷ്ണന്‍, എസ്. പ്രതാപ്. കോച്ച്: മുഹമ്മദ് ഷനാസ്. വനിതാ ടീം: ടെസ ഹര്‍ഷന്‍- ക്യാപ്റ്റന്‍, ഒലിവിയ ടി. ഷൈബു, സ്വപ്ന മരിന്‍ ജിജു, അഭിരാമി കെ.എ, ജെസ്‌ലി പി.എസ്, ഗംഗാ രാജഗോപാല്‍, സുഭദ്ര ജയകുമാര്‍, ശിവാനി അജിത്ത്, അനീഷ ഷിബു, അനഘ.ആര്‍, നിള ശരത്, സല്‍മ നൗറിന്‍ എം. കോച്ച്: റോജാമോള്‍ ജി. പരിശീലന ക്യാമ്പിനുശേഷം ടീം അംഗങ്ങള്‍ക്ക് മെഡിവിഷന്‍ മാനേജിംഗ് ഡയറക്ടര്‍ ബിബു പുന്നൂരാന്‍ ജേഴ്‌സികള്‍ വിതരണം ചെയ്തു. പട്ടണചത്വരത്തിലെ ബാബു ജെ. പുന്നൂരാന്‍ ബാസ്‌കറ്റ്‌ബോള്‍ സ്റ്റേഡിയത്തില്‍ നടത്തിയ ചടങ്ങില്‍ എഡിബിഎ പ്രസിഡന്‍റ് റോണി മാത്യു അധ്യക്ഷത വഹിച്ചു. സെക്രട്ടറി ജോണ്‍ ജോര്‍ജ്, പിആര്‍ഒ തോമസ് മത്തായി കരിക്കംപള്ളില്‍, എം. ബിനു, ഇ. നൗഷാദ് എന്നിവര്‍ പങ്കെടുത്തു. 69-ാം സംസ്ഥാന സീനിയര്‍ സ്റ്റേറ്റ് ബാസ്‌കറ്റ്‌ബോള്‍ ചാമ്പ്യന്‍ഷിപ്പ് 2025 തൃശൂര്‍ കുന്നംകുളം ജവഹര്‍ സ്‌ക്വയര്‍ ഇന്‍ഡോര്‍ സ്റ്റേഡിയത്തില്‍ ഒക്ടോബര്‍ 7 മുതല്‍ 12 വരെ സംഘടിപ്പിക്കും.

കടത്തുവള്ളം യാത്രയായി, പാലം എന്ന സ്വപ്നം ബാക്കി

പൂച്ചാക്കല്‍: ചുടുകാട്ടുംപുറം - ഉളവയ്പ് നിവാസികളുടെ ഏക ആശ്രയമായ കടത്തുവള്ളം നിലച്ചിട്ട് വര്‍ഷങ്ങള്‍ കഴിയുന്നു. പാലം വരും എന്നത് വാഗ്ദാനം മാത്രവുമായി. തൈക്കാട്ടുശേരി പഞ്ചായത്തിലെ ചുടുകാട്ടുംപുറത്തുനിന്ന് ഉളവയ്പിലേക്കുള്ള കടത്തുവള്ളമായിരുന്നു ഏക ആശ്രയം. വര്‍ഷങ്ങള്‍ക്ക് മുന്‍പ് ഈ ഫെറിയില്‍ പഞ്ചായത്തുവക കടത്തുവള്ളം സര്‍വീസ് നടത്തിയിരുന്നതാണ്. വല്യാറ പാലം വന്നതോടെ കടത്തുവള്ളം പഞ്ചായത്ത് നിര്‍ത്തിവച്ചു. തൈക്കാട്ടുശേരി പഞ്ചായത്തിന്‍റെ ഒന്നും രണ്ടും വാര്‍ഡുകള്‍ ചേര്‍ന്നതാണ് ഉളവയ്പ് മേഖല. ഉളവയ്പ് നിവാസികള്‍ക്ക് ഔദ്യോഗികമായ എല്ലാ ദൈനംദിന കാര്യങ്ങള്‍ക്കും തൈക്കാട്ടുശേരിയില്‍ എത്തേണ്ടതുണ്ട്. വില്ലേജ്, പഞ്ചായത്ത് ഓഫീസ് തുടങ്ങിയ സര്‍ക്കാര്‍ സ്ഥാപനങ്ങള്‍ തൈക്കാട്ടുശേരി ഭാഗത്താണ് പ്രവൃര്‍ത്തിക്കുന്നത്. നിലവില്‍ വല്യാറ പാലം വഴിയോ പള്ളിവെളി വഴി ചുറ്റിത്തിരിഞ്ഞോ ആണ് ഉളവയ്പിലെ ജനങ്ങള്‍ തൈക്കാട്ടുശേരിയില്‍ എത്തുന്നത്. ഒരുപാട് ചുറ്റിക്കറങ്ങി വേണം വല്ലാറ പാലം വഴി തൈക്കാട്ടുശേരിയില്‍ എത്തിപ്പെടാന്‍. ഉളവയ്പ്-ചുടുകാട്ടുംപുറം ഫെറി വഴി കടത്തുവള്ളം സര്‍വീസുണ്ടെങ്കില്‍ എളുപ്പം തൈക്കാട്ടുശേരിയില്‍ എത്താന്‍ കഴിയുമെന്നാണ് ഉളവയ്പു നിവാസികള്‍ പറയുന്നത്. ഈ ഭാഗത്ത് കായലിന് ചെറിയ ദൂരമേയുള്ളൂ എന്ന സവിശേഷതയുമുണ്ട്. നിലവില്‍ ആളുകള്‍ നടന്നുപോകുന്ന വല്യാറപ്പാലം തകര്‍ച്ചയിലുമാണ്. കഴിഞ്ഞവര്‍ഷത്തെ ബജറ്റില്‍ വല്യാറപ്പാലം പുനര്‍നിര്‍മിക്കാന്‍ തുക ഉള്‍പ്പെടുത്തിയിരുന്നെങ്കിലും പ്രവൃത്തികളൊന്നും നടന്നിട്ടില്ല.

മൗലവിയെ ആക്രമിച്ച പ്രതി അറസ്റ്റിൽ

പൂച്ചാക്കൽ: അരൂക്കുറ്റി വടുതല കണ്ണാറപ്പള്ളി അസി. ഇമാം അസീസ് മൗലവിയെ ആക്രമിച്ച പ്രതിയെ അറസ്റ്റ് ചെയ്തു. വടുതല പുത്തൂർ പള്ളാക്കൽ ചിറയിൽ സരിനെ(24)യാണ് പൂച്ചാക്കൽ പോലീസ് അറസ്റ്റ് ചെയ്തത്. കഴിഞ്ഞ മൂന്നാം തീയതിയാണ് മൗലവിയെ പ്രതി ആക്രമിച്ചത്. സരിൻ മദ്യപിച്ച് മാതാപിതാക്കളുമായി വഴക്കുണ്ടാക്കുന്നതിനിടയിൽ മൗലവി നോക്കി നിൽക്കുന്നത് കണ്ടത് ഇഷ്ടപ്പെടാത്തതാണ് പ്രതി ആക്രമിക്കാൻ കാരണം. ഈ സംഭവവുമായി ബന്ധപ്പെട്ട് സോഷ്യൽ മീഡിയകളിലും മറ്റും മതസ്പർദ്ധ വളർത്തുന്ന രീതിയിലുള്ള പോസ്റ്റുകളും കമന്‍റുകളും ശ്രദ്ധയിൽപ്പെട്ടിട്ടുണ്ടെന്നും അത്തരക്കാർക്കെതിരേ കർശനമായ നിയമനടപടി സ്വീകരിക്കുമെന്നും പൂച്ചാക്കൽ പോലീസ് ഇൻസ്പെക്ടർ പി.എസ്. സുബ്രഹ്മണ്യൻ അറിയിച്ചു. കോടതിയിൽ ഹാജരാക്കിയ പ്രതിയെ 14 ദിവസത്തേക്ക് റിമാൻഡ് ചെയ്തു. പൂച്ചാക്കൽ സ്റ്റേഷൻ ഇൻസ്പെക്ടർ പി.എസ്. സുബ്രഹ്മണ്യൻ, എസ്ഐമാരായ ദിലീപ് കുമാർ, സജി ജോസഫ്, സീനിയർ സിവിൽ പോലീസ് ഓഫീസർമാരായ ജോബി കുര്യാക്കോസ്, കലേഷ്, പ്രവീൺ, ലിജോമോൻ എന്നിവർ ചേർന്നാണ് പ്രതിയെ പിടികൂടിയത്.

റേഷൻ വ്യാപാരികളുടെ വേതന പരിഷ്കരണം നടപ്പാക്കണം

ചേർത്തല: റേഷൻ വ്യാപാരികളുടെ വേതന പരിഷ്കരണത്തിനായി നിയോഗിച്ച കമ്മിറ്റിയുടെ ശുപാർശ നടപ്പാക്കണമെന്ന് കേരള സ്റ്റേറ്റ് റേഷൻ റീട്ടെയിൽ ഡീലേഴ്സ് അസോസിയേഷൻ ചേർത്തല താലൂക്ക് കമ്മിറ്റി യോഗം ആവശ്യപ്പെട്ടു. 70 വയസ് കഴിഞ്ഞ വ്യാപാരികളെ ആനുകൂല്യം നൽകാതെ പിരിച്ചുവിടുന്നത് പുനഃപരിശോധിക്കുക, ക്ഷേമനിധിയുടെ പ്രവ്രത്തനം കാര്യക്ഷമമാക്കുക, ഗുണനിലവാരമുള്ള ഭക്ഷ്യധാന്യങ്ങൾ വിതരണത്തിനായി എത്തിക്കുക, റേഷൻ വ്യാപാരികളുടെ വേതന പരിഷ്കരണം നടപ്പാക്കുക തുടങ്ങിയ ആവശ്യങ്ങളും യോഗം ഉന്നയിച്ചു. സംസ്ഥാന വൈസ് പ്രസിഡന്‍റ് തൈക്കൽ സത്താർ ഉദ്ഘാടനം ചെയ്തു. താലൂക്ക് പ്രസിഡന്‍റ് ഇ.വി. തിലകൻ അധ്യക്ഷത വഹിച്ചു. ആർ. രാജുമോൻ, എൻ. രാജീവ്, ജയചന്ദ്രൻ, വി. രാഹുലേയൻ, അജി കടക്കരപ്പള്ളി തുടങ്ങിയവർ പ്രസംഗിച്ചു.

ബ്രോഷർ പ്രകാശനം ചെയ്തു

ചെങ്ങന്നൂര്‍: ലില്ലി ലയണ്‍സ് സ്‌പെഷല്‍ സ്‌കൂളിന്‍റെ ആഭിമുഖ്യത്തില്‍ ഡോ. എ.പി. ശ്രീകുമാര്‍ മെമ്മോറിയല്‍ തെക്കന്‍ കേരള ഭിന്നശേഷി ബാഡ്മിന്‍റണ്‍ ടൂര്‍ണമെന്‍റ് ചെങ്ങന്നൂരില്‍ നടക്കും. തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം ജില്ലകളിലെ ഭിന്നശേഷി വിദ്യാലയങ്ങളിലെ വിദ്യാര്‍ഥികളെ ഉള്‍പ്പെടുത്തി 18ന് ടൂര്‍ണമെന്‍റ് നടക്കും. ആണ്‍കുട്ടികള്‍ക്കും പെണ്‍കുട്ടികള്‍ക്കുമായി സിംഗിള്‍സ്, ഡബിള്‍സ്, മിക്‌സഡ് ഡബിള്‍സ് എന്നീ വിഭാഗങ്ങളില്‍ മത്സരങ്ങള്‍ നടക്കും. ടൂര്‍ണമെന്‍റിലെ ഒന്നാം സ്ഥാനക്കാര്‍ക്ക് ഡോ. എ. പി. ശ്രീകുമാര്‍ മെമ്മോറിയല്‍ എവര്‍ റോളിംഗ് ട്രോഫിയും 5,000 രൂപ അവാര്‍ഡും രണ്ടാം സ്ഥാനക്കാര്‍ക്ക് ആന്‍ഡ്രിയ മെമ്മോറിയല്‍ ട്രോഫിയും 2,500 രൂപയും ലഭിക്കും. മത്സരത്തില്‍ പങ്കെടുക്കുന്നതിനുള്ള ടൂര്‍ണമെന്‍റിന്‍റെ ബ്രോഷര്‍ കൊടിക്കുന്നില്‍ സുരേഷ് എംപി പ്രകാശനം ചെയ്തു. പങ്കെടുക്കാന്‍ താത്പര്യമുള്ളവര്‍ ഒക്ടോബര്‍ 13നകം രജിസ്‌ട്രേഷന്‍ ചെയ്യണം. കൂടുതല്‍ വിവരങ്ങള്‍ക്കും രജിസ്‌ട്രേഷനും ഫോണ്‍: 97479 82434, 81138 15855 ഇ മെയില്‍: [email protected]

കെജിഒഎ ദക്ഷിണ മേഖല വജ്രജൂബിലി സംഗമം

കായംകുളം: കേരള ഗസറ്റഡ് ഓഫീസേഴ്സ് അസോസിയേഷൻ വജ്രജൂബിലി മേഖലാ സംഗമം നടത്തി. കായംകുളം താമരശേരി കൺവൻഷൻ സെന്‍ററിൽ നടന്ന സംഗമം കവി മുരുകൻ കാട്ടാക്കട ഉദ്ഘാടനം ചെയ്തു. കെജിഒഎ സംസ്ഥാന പ്രസിഡന്‍റ് എസ്.ആർ. മോഹനചന്ദ്രൻ അധ്യക്ഷത വഹിച്ചു. സംസ്ഥാന സെക്രട്ടറി എം. എൻ. ശരത്ചന്ദ്രൻ ലാൽ സംഘടനാ ചരിത്രം അവതരിപ്പിച്ചു. സ്വാഗത സംഘം ചെയർപേഴ്സൺ യു. പ്രതിഭ എംഎൽഎ, സംസ്ഥാന ജനറൽ സെക്രട്ടറി എം. ഷാജഹാൻ, വൈസ് പ്രസിഡന്‍റ് സി.കെ. ഷിബു എന്നിവർ പ്രസംഗിച്ചു.

ജില്ലാതല വന്യജീവി വാരാഘോഷം: സമ്മാനങ്ങള്‍ വിതരണം ചെയ്തു

ആലപ്പുഴ: ജില്ലാതല വന്യജീവി വാരാഘോഷം 2025ന്‍റെ ഭാഗമായി ആലപ്പുഴ സോഷല്‍ ഫോറസ്ട്രി ഡിവിഷന്‍റെ ആഭിമുഖ്യത്തില്‍ എല്‍പി, യുപി, ഹൈസ്‌കൂള്‍, കോളജ് വിഭാഗം വിദ്യാര്‍ഥികള്‍ക്കായി നടത്തിയ വിവിധ മത്സരങ്ങളിലെ വിജയികള്‍ക്ക് സമ്മാനങ്ങള്‍ വിതരണം ചെയ്തു. ആലപ്പുഴ സോഷ്യല്‍ ഫോറസ്ട്രി കൊമ്മാടി ഓഫീസില്‍ നടന്ന പരിപാടി നഗരസഭാ അധ്യക്ഷ കെ.കെ. ജയമ്മ ഉദ്ഘാടനം ചെയ്തു. മത്സരങ്ങളിലെ വിജയികള്‍ക്കുള്ള കാഷ് അവാര്‍ഡും സര്‍ട്ടിഫിക്കറ്റ് വിതരണവും നഗരസഭാധ്യക്ഷ നിര്‍വഹിച്ചു. വിദ്യാര്‍ഥികള്‍ക്കായി പെന്‍സില്‍ ഡ്രോയിംഗ്, വാട്ടര്‍ കളര്‍ പെയിന്‍റിംഗ്, ഉപന്യാസം, ക്വിസ്, പ്രസംഗം എന്നീ ഇനങ്ങളില്‍ മത്സരങ്ങള്‍ രണ്ട്, മൂന്ന് തീയതികളില്‍ നടത്തിയിരുന്നു.ആകെ 384 പേര്‍ പങ്കെടുത്തു. കളപ്പുര വാര്‍ഡ് കൗണ്‍സിലര്‍ ജ്യോതി പ്രകാശിന്‍റെ അധ്യക്ഷതയില്‍ ചേര്‍ന്ന യോഗത്തില്‍ അസിസ്റ്റന്‍റ് ഫോറസ്റ്റ് കണ്‍സെര്‍വേറ്റര്‍ സുമി ജോസഫ്, കൊമ്മാടി വാര്‍ഡ് കൗണ്‍സിലര്‍ മോനിഷ ശ്യാം, സോഷ്യല്‍ ഫോറസ്ട്രി ചെങ്ങന്നൂര്‍ റെയിഞ്ച് ഫോറസ്റ്റ് ഓഫീസര്‍ പി.കെ. രാജേഷ് എന്നിവര്‍ പ്രസംഗിച്ചു. അളകനന്ദ, ദേവദര്‍ശന്‍ (ശ്രീ ശങ്കര ഇംഗ്ലീഷ് മീഡിയം സ്‌കൂള്‍ ചേര്‍ത്തല), അഭിന്‍ സുരേഷ് (ഗവ. ബിഎച്ച്എസ് ഹരിപ്പാട്), മാനസമീര (ജിഎച്ച്എസ്എസ് ഹരിപ്പാട്) എന്നിവര്‍ പെന്‍സില്‍ ഡ്രയിംഗിനും ദിഗ. ഡി. ജി (ജിഎല്‍പിഎസ് നടുവട്ടം), പി. അവന്തിക (എസ്എസ് ഇംഗ്ലീഷ് മീഡിയം സ്‌കൂള്‍ ചേര്‍ത്തല), അയാന ഫാത്തിമ (കാര്‍മല്‍ അക്കാദമി എച്ച്എസ്എസ് ആലപ്പുഴ), മാനസമീര (ജിഎച്ച്എസ്എസ് ഹരിപ്പാട്) എന്നിവര്‍ വാട്ടര്‍ കളറിംഗിനും ഒന്നാം സമ്മാനം നേടി. ഉപന്യാസ രചനയില്‍ ഗായത്രി. എസ് (ജിജിഎച്ച്എസ്എസ് ചേര്‍ത്തല), നിരഞ്ജന കൃഷ്ണ (എസ്എൻറ്റി എച്ച്എസ്എസ് ചേര്‍ത്തല), ക്വിസ് മത്സരത്തില്‍ നവതേജ് കിരണ്‍, അഭിനവ് കൃഷ്ണ (പിജിഎച്ച്എസ്എസ്), അദ്വൈത് ആര്‍ (എന്‍എസ്എസ് എച്ച്എസ്എസ് കരുവാറ്റ), പ്രസംഗമത്സരത്തില്‍ അലീന ഷാജി (സെന്‍റ് ആന്‍സ് പബ്ലിക് സ്‌കൂള്‍), വേദലക്ഷ്മി.എസ് (ജിഎംഎച്ച്എസ്എസ് അമ്പലപ്പുഴ) എന്നിവര്‍ ഒന്നാം സമ്മാനം നേടി.

താമരപ്പള്ളിപ്പടി- അട്ടക്കുഴി കളീക്കൽപ്പടി റോഡ് തകർന്നു

ചെങ്ങന്നൂര്‍: തിരുവന്‍വണ്ടൂര്‍ പഞ്ചായത്തിനെയും പാണ്ടനാട് പഞ്ചായത്തിനെയും തമ്മില്‍ ബന്ധിപ്പിക്കുന്ന താമരപ്പള്ളിപ്പടി- അട്ടക്കുഴി കളീക്കല്‍പ്പടി റോഡ് സഞ്ചാരയോഗ്യമല്ലാത്ത നിലയില്‍. മാസങ്ങളായി തകര്‍ന്നുകിടക്കുന്ന റോഡിന്‍റെ ശോച്യാവസ്ഥ യാത്രക്കാര്‍ക്ക്, പ്രത്യേകിച്ച് കാല്‍നട യാത്രക്കാര്‍ക്ക്, വലിയ ദുരിതമാണ് സൃഷ്ടിക്കുന്നത്. അശാസ്ത്രീയ നിര്‍മാണവും ഫണ്ട് പ്രതിസന്ധിയും തിരുവന്‍വണ്ടൂര്‍ പഞ്ചായത്തിന്‍റെ 13-ാം വാര്‍ഡും പാണ്ടനാടിന്‍റെ രണ്ടാം വാര്‍ഡും അതിര്‍ത്തി പങ്കിടുന്ന അരക്കിലോമീറ്ററിലധികം വരുന്ന റോഡിന്‍റെ 80 ശതമാനവും തകര്‍ന്നിരിക്കുന്നത് തിരുവന്‍വണ്ടൂര്‍ പഞ്ചായത്ത് ഭാഗത്താണ്. നാട്ടുകാരുടെ നിരന്തര പരാതിയെത്തുടര്‍ന്ന് റോഡ് ആരംഭിക്കുന്ന താമരപ്പള്ളിപ്പടി മുതല്‍ വെറും 130 മീറ്റര്‍ നീളത്തില്‍ മാത്രം റോഡ് കോണ്‍ക്രീറ്റ് ചെയ്തിട്ടുണ്ട്. എന്നാല്‍, ആറു മീറ്ററോളം വീതിയുള്ള റോഡിന്‍റെ മധ്യഭാഗത്ത് വെറും മൂന്നുമീറ്റര്‍ വീതിയില്‍ മാത്രമാണ് കോണ്‍ക്രീറ്റ് നടത്തിയത്. റോഡിന്‍റെ ഇരുവശങ്ങളും മണ്ണിട്ടുയര്‍ത്തി സുരക്ഷിതമാക്കാത്തതാണ് പ്രധാന പ്രശ്‌നം. ഏകദേശം ഒരാള്‍ ഉയരത്തില്‍ പാര്‍ശ്വഭാഗങ്ങള്‍ ഉയര്‍ത്തിയാല്‍ മാത്രമേ എതിരേ വരുന്ന വാഹനങ്ങള്‍ക്ക് സുഗമമായി കടന്നുപോകാന്‍ സാധിക്കൂ. നിലവിലെ അശാസ്ത്രീയ റോഡുനിര്‍മാണം കാരണം ഈ ഭാഗത്ത് പതിവായി അപകടങ്ങളുണ്ടാകുന്നു. വലിയ വാഹനങ്ങള്‍ വരുമ്പോള്‍ ഒരു ടൂ വീലറിനു പോലും സുഗമമായി കടന്നുപോകാന്‍ കഴിയാത്ത അവസ്ഥയാണ്. ഫണ്ടിന്‍റെ അപര്യാപ്തതയാണ് റോഡുനിര്‍മാണം പൂര്‍ത്തിയാക്കാന്‍ സാധിക്കാത്തതിന് അധികൃതര്‍ കാരണമായി ചൂണ്ടിക്കാട്ടുന്നത്. വഴിവിളക്കുകളും വെളിച്ചമില്ലാത്ത പാതയും റോഡ് തകര്‍ച്ചയ്ക്കു പുറമേ, ഈ ഭാഗത്തെ വഴിവിളക്കുകള്‍ കത്താത്തതും നാട്ടുകാര്‍ക്ക് ദുരിതമായിരിക്കുകയാണ്. വഴിവിളക്കുകള്‍ തെളിയുന്നില്ലെന്ന് കാട്ടി തിരുവന്‍വണ്ടൂര്‍ പഞ്ചായത്തില്‍ നാട്ടുകാര്‍ പരാതി നല്‍കിയിട്ട് മാസങ്ങള്‍ കഴിഞ്ഞിട്ടും ഒരു നടപടിയും ഉണ്ടായിട്ടില്ല. 2018ലെ പ്രളയത്തിനുശേഷം ഇവിടെ രണ്ടു സോളാര്‍ ലൈറ്റുകള്‍ സ്ഥാപിച്ചിരുന്നു. ഇവ കുറച്ചുകാലം പ്രകാശിച്ചെങ്കിലും പിന്നീട് നാളിതുവരെ പ്രവര്‍ത്തിച്ചിട്ടില്ല. ഇതുസംബന്ധിച്ച് പ്രദേശവാസി പഞ്ചായത്ത് അധികൃതര്‍ക്ക് വിവരാവകാശം നല്‍കി. 2024 സെപ്റ്റംബര്‍ ഒന്‍പതിനു പഞ്ചായത്ത് കമ്മിറ്റിയുടെ തീരുമാനപ്രകാരം, അടുത്ത റിവിഷന്‍ സമയത്ത് അട്ടക്കഴി പാടത്തുള്ള റോഡ് സൈഡില്‍ സ്ഥാപിച്ചിട്ടുള്ള സോളാര്‍ ലൈറ്റ് പ്രവര്‍ത്തനക്ഷമമാക്കുന്ന പദ്ധതി രൂപീകരിക്കുന്നതിന് അംഗീകാരം നല്‍കിയിട്ടുണ്ടെന്നായിരുന്നു മറുപടി. ഈ തീരുമാനം എടുത്ത് ഒരുവര്‍ഷം കഴിഞ്ഞിട്ടും പഞ്ചായത്ത് കമ്മിറ്റിയുടെ ഭാഗത്തുനിന്ന് യാതൊരു നടപടിയും ഉണ്ടായിട്ടില്ല. രാത്രിയില്‍ ജോലി കഴിഞ്ഞ് എത്തുന്നവര്‍ തകര്‍ന്ന റോഡിലൂടെ വെളിച്ചമില്ലാതെ വീട്ടിലെത്താന്‍ ഏറെ ക്ലേശിക്കുകയാണ്. തുടര്‍ നടപടിക്കു വേണ്ടി പ്രദേശവാസി ഇപ്പോള്‍ കളക്ടര്‍ക്കു പരാതി നല്‍കിയിരിക്കുകയാണ്. റോഡുനിര്‍മാണം പൂര്‍ത്തിയാക്കി അപകടങ്ങള്‍ ഒഴിവാക്കണമെന്നും വഴിവിളക്കുകള്‍ അടിയന്തരമായി നന്നാക്കണമെന്നുമാണ് നാട്ടുകാരുടെ പ്രധാന ആവശ്യം.

ചന്ദനമരം കൃഷി വ്യാപനം: നിയമത്തില്‍ മാറ്റമില്ലെന്ന് വനംവകുപ്പ്

പത്തനംതിട്ട: സംസ്ഥാനത്തെ സ്വകാര്യ ഭൂമിയില്‍ ചന്ദനമരം നട്ടുവളര്‍ത്താനുള്ള പ്രത്യേക പദ്ധതി വനംവകുപ്പിനില്ല. ചന്ദനമരങ്ങള്‍ നട്ടുവളര്‍ത്തിയാല്‍ വനംവകുപ്പിന്‍റെ അനുമതിയില്ലാതെ വെട്ടിമാറ്റാനാകില്ലെന്നും അധികൃതർ. സ്വകാര്യ ഭൂമിയില്‍ ചന്ദനമരം നട്ടുവളര്‍ത്താന്‍ പ്രോത്സാഹിപ്പിക്കുന്ന പ്രത്യേക പദ്ധതികള്‍ നിലവില്‍ ഇല്ലെന്ന് കഴിഞ്ഞദിവസം നിയമസഭയില്‍ വനംമന്ത്രി എ.കെ. ശശീന്ദ്രനും വ്യക്തമാക്കുകയുണ്ടായി. എന്നാല്‍ ഒരു കോടി ചന്ദനത്തൈകള്‍ സംസ്ഥാനത്ത് വിതരണം ചെയ്യാന്‍ ഉദ്ദേശിക്കുന്നതായും മന്ത്രി പറയുന്നു. ഇതിലൂടെ കര്‍ഷകര്‍ നട്ടുവളര്‍ത്തുന്ന തൈകള്‍ മരമായി കഴിഞ്ഞാല്‍ വനംവകുപ്പ് ഏറ്റെടുത്ത് വില്പന നടത്തുകയും പണം കര്‍ഷകനു കൈമാറാനുമാണ് ആലോചിക്കുന്നത്. നിലവിലെ നിയമത്തില്‍ ചില ഇളവുകള്‍ കര്‍ഷകര്‍ക്ക് അനുകൂലമായി നല്‍കിയേക്കും. ഇത് മുന്നില്‍ക്കണ്ട് ചില സ്വകാര്യ ഏജന്‍സികള്‍ വ്യാപകമായി തൈ വില്പനയ്ക്ക് ഇറങ്ങിയിട്ടുമുണ്ട്. ചന്ദനമരം വില്പനാവകാശം വനംവകുപ്പിനു തന്നെ കഴിഞ്ഞ മാര്‍ച്ച് 29നു പുറത്തിറക്കിയ ട്രീ ബാങ്കിംഗ് സംബന്ധിച്ച ഉത്തരവ് പ്രകാരം സ്വകാര്യ വ്യക്തികള്‍ക്കും നട്ടുവളര്‍ത്താന്‍ ചന്ദനമരത്തിന്‍റെ തൈകള്‍ നല്‍കിവരുന്നുണ്ട്. ഇതിനായി സ്വകാര്യ വ്യക്തികളും വനംവകുപ്പും തമ്മില്‍ ഉടമ്പടി വയ്ക്കുകയും അതിന്‍റെ അടിസ്ഥാനത്തില്‍ ചന്ദനം നട്ടുവളര്‍ത്തി 15 വര്‍ഷങ്ങള്‍ക്കുശേഷം ഇവ വനംവകുപ്പിലേക്ക് ഏറ്റെടുത്ത് നിയമാനസൃതം വില്പന നടത്തി, ഉടമസ്ഥര്‍ക്ക് അര്‍ഹമായ തുക നല്‍കുന്നതുമാണ് പദ്ധതി. വില്പന ഓണ്‍ലൈന്‍ ലേലത്തിലൂടെ സ്വകാര്യവ്യക്തികളില്‍ നിന്നും 2012ലെ ചട്ടങ്ങള്‍ പ്രകാരം ശേഖരിക്കുന്ന ചന്ദനത്തടികള്‍ സര്‍ക്കാര്‍ അംഗീകൃത ചന്ദന ഡിപ്പോയിലെത്തിച്ച് ഓണ്‍ലൈനായി പൊതുലേലത്തിലൂടെ വിറ്റഴിക്കുകയാണ് രീതി. നിലവില്‍ മറയൂര്‍ ചന്ദന ഡിപ്പോയില്‍ തടികള്‍ ചെത്തിയൊരുക്കി ക്ലാസിഫൈ ചെയ്തു ലോട്ടുകളാക്കി ഓണ്‍ലൈന്‍ ലേലം മുഖേന വിറ്റഴിക്കുകയാണ്. വില്പന വിലയില്‍ നിന്നും ചന്ദനം മുറിക്കുന്നതിനും കടത്തുന്നതിനും തൊലി ചെത്തി ഒരുക്കി വൃത്തിയാക്കി ലേലം ചെയ്യുന്നതിനും ചെലവാകുന്ന തുകയും നിയമാനുസൃത നികുതികളും കിഴിച്ച് ബാക്കി മുഴുവന്‍ തുകയും ഉടമസ്ഥനും നല്‍കുന്നതാണ് രീതി. പണം ലഭ്യത അനുസരിച്ച് ചന്ദനമരത്തിന്‍റെ വില വനംവകുപ്പ് നല്‍കുന്നതാകട്ടെ ഫണ്ടിന്‍റെ ലഭ്യത അനുസരിച്ചാണ്. 2021 മുതല്‍ സ്വകാര്യ ഭൂമിയിലെ ചന്ദനമരങ്ങള്‍ ശേഖരിച്ച ഇനത്തില്‍ ഏഴ് പേര്‍ക്ക് പണം നല്‍കാനുണ്ടെന്നാണ് നിയമസഭയില്‍ വ്യക്തമാക്കപ്പെട്ടത്.

പ്രസിഡന്‍റ്- സെക്രട്ടറി പോര് വീയപുരത്ത് കേരളോത്സവം മുടങ്ങി

ഹരിപ്പാട്: സംസ്ഥാന സര്‍ക്കാരും യുവജനക്ഷേമ വകുപ്പും സംയുക്തമായി പഞ്ചായത്തുകളില്‍ യുവതീ യുവാക്കളുടെ കലാ-കായിക കഴിവുകളെ പരിപോഷിപ്പിക്കുന്നതിന് നടത്തുന്ന കേരളോത്സവം ജനപ്രതിനിധികളും ഉദ്യോഗസ്ഥരും തമ്മിലുള്ള പോരുകാരണം നടന്നില്ല. വീയപുരം പഞ്ചായത്തിലെ പ്രസിഡന്‍റ്- സെക്രട്ടറി പോരാണ് കേരളോത്സവത്തില്‍ മത്സരാര്‍ഥികള്‍ ആരും എത്താതിരിക്കാന്‍ കാരണമെന്ന് അറിയുന്നു. 3, 4, 5 തീയതികളില്‍ പായിപ്പാട് ആശ്വാസകേന്ദ്രം, വീയപുരം ഹയര്‍ സെക്കന്‍ഡറി സ്‌കൂള്‍, കാരിച്ചാല്‍ സെന്‍റ് മേരീസ് സ്‌കൂള്‍ എന്നിവിടങ്ങളില്‍ നടത്താനായിരുന്നു സംഘാടകസമിതി തീരുമാനം. ഇതിനുള്ള നോട്ടീസും മറ്റ് പ്രചാരണ പരിപാടികളും നടന്നിരുന്നു. ഓണ്‍ലൈനില്‍ പേര് രജിസ്റ്റര്‍ ചെയ്തത് ഒരാള്‍ മാത്രം അതും കലാമത്സരത്തിന്. ഉദ്ഘാടന സമ്മേളനത്തില്‍ പ്രസിഡന്‍റും മറ്റു ചില മെംബർമാരും മത്സരത്തില്‍ പങ്കെടുത്തില്ല. ജനപ്രതിനിധികളായ പി. ഓമന, പി.എ. ഷാനവാസ്, പി.ഡി. ശ്യാമള എന്നിവരും സെക്രട്ടറി ഉള്‍പ്പെടെയുള്ള ഉദ്യോഗസ്ഥരും സിഡിഎസ് അംഗങ്ങളും ഹരിത കര്‍മസേനാംഗങ്ങളും മാത്രമാണ് പങ്കെടുത്തത്. ഇവരില്‍ മത്സരത്തില്‍ പങ്കെടുക്കേണ്ട പ്രായക്കാര്‍ ആരും തന്നെയില്ലെന്നാണ് പിന്നാമ്പുറ സംസാരം. പഞ്ചായത്ത് വാഹനത്തിന് ഇന്ധനം അടിച്ചതില്‍ അഴിമതിയുണ്ടെന്ന കണ്ടെത്തലോടെ ബില്ല് മാറുന്നതിനെ പറ്റിയുള്ള പ്രശ്‌നങ്ങളാണ് പ്രസിഡന്‍റ് സെക്രട്ടറി പോരിനു കാരണം. സെക്രട്ടറി ആരും അറിയാതെ ആദ്യം 15 ദിവസവും പിന്നീട് വീണ്ടും 15 ദിവസവും കൂടി അവധിയെടുത്തത് പഞ്ചായത്തിന്‍റെ പദ്ധതിപ്രവര്‍ത്തനങ്ങളെ ബാധിക്കുമെന്ന് വിലയിരുത്തലുണ്ടായിരുന്നു. ഇത് പത്രവാര്‍ത്തയായതോടെ പോര് ശക്തമായി. പ്രസിഡന്‍റ് നേരിട്ട് പത്രസമ്മേളനം നടത്തി സെക്രട്ടറിയെ വിമര്‍ശിച്ചിരുന്നു. രണ്ടുപേരും തമ്മില്‍ വാക്കേറ്റമുണ്ടായി. പ്രസിഡന്‍റിന്‍റെ സ്വാധീനം ഉപയോഗിച്ച് സെക്രട്ടറിയെ സ്ഥലംമാറ്റാന്‍ തീരുമാനിച്ചു. പുതിയ സെക്രട്ടറി രാവിലെ ചാര്‍ജെടുത്തു. എന്നാല്‍, പഴയ സെക്രട്ടറിയുടെ സ്വാധീനം ഉപയോഗിച്ച് അന്ന് ഉച്ചയ്ക്കുതന്നെ സെക്രട്ടറിയായി വീയപുരത്ത് വീണ്ടും ചാര്‍ജെടുത്തു. ഇത് പ്രസിഡന്‍റിനെ ചൊടിപ്പിച്ചു. പിന്നീട് കേരളോത്സവത്തിന്‍റെ സംഘാടകസമിതി കൂടിയെങ്കിലും സെക്രട്ടറി പങ്കെടുത്തില്ല. കേരളോത്സവത്തിന്‍റെ ചെലവിനായി 50,000 രൂപ അനുവദിക്കാമെന്ന് സെക്രട്ടറിയെ ഫോണില്‍ക്കൂടി അറിയിച്ചു. പദ്ധതിപണം ആയതിനാല്‍ അഡ്വാന്‍സ് തരാന്‍ കഴിയില്ലെന്ന് സെക്രട്ടറി നിലപാടെടുത്തു. തനത് ഫണ്ടില്‍ ഉള്‍പ്പെടുത്തി 15,000 രൂപ അഡ്വാന്‍സ് തരാമെന്ന് സെക്രട്ടറി അറിച്ചു. ചാര്‍ജ് ഓഫീസറുടെ കൈകാശില്‍ സ്‌പോര്‍ട്‌സ് ഐറ്റങ്ങള്‍ വാങ്ങി. നോട്ടീസും ഫ്‌ളക്‌സും അടിച്ചു. സ്‌കൂള്‍ ഗ്രൗണ്ടുകള്‍ വൃത്തിയാക്കി. പ്രോഗ്രാമിനു വേണ്ടി ഉദ്യോഗസ്ഥര്‍ എത്തി. എന്നാല്‍, ജനപ്രതിനിധികളോ മത്സരാര്‍ഥികളോ എത്തിയില്ല. തദ്ദേശതെരഞ്ഞെടുപ്പ് പടിവാതുക്കല്‍ എത്തിനില്‍ക്കെ ചില ജനപ്രതിനിധികളും ഉദ്യോഗസ്ഥരും തമ്മില്‍ നിലനില്‍ക്കുന്ന പോര് അവസാപ്പിക്കണമെന്ന ആവശ്യം ശക്തമാകുകയാണ്. അതേസമയം, മാറ്റിവച്ച കേരളോത്സവം ഉടന്‍ നടത്തണമെന്നാവശ്യപ്പെട്ട് വൈസ് പ്രസിഡന്‍റ് പി.എ. ഷാനവാസ് നാളെ രാവിലെ പത്തിന്പഞ്ചായത്ത് ഓഫീസ് പടിക്കല്‍ പ്രതിഷേധ സമരം നടത്തും.

ജോസ് ജോണ്‍ വെങ്ങാന്തറയ്ക്ക് സ്വീകരണം

കുട്ടനാട്: കാരുണ്യപ്രവര്‍ത്തകന്‍ ജോസ് ജോണ്‍ വെങ്ങാന്തറയ്ക്ക് സ്വീകരണം നല്‍കി. കത്തോലിക്കാ കോണ്‍ഗ്രസിന്‍റെ നേതൃത്തില്‍ നടത്തിയ സ്വീകരണ സമ്മേളനത്തില്‍ കര്‍ദിനാള്‍ മാര്‍ ജോര്‍ജ് കൂവക്കാട്ട് പൊന്നാട അണിയിച്ച് ആദരിച്ചു. ചടങ്ങില്‍ കത്തോലിക്കാ കോണ്‍ഗ്രസ് പ്രസിഡന്‍റ് കുഞ്ഞുമോന്‍ തുമ്പൂങ്കല്‍ അധ്യക്ഷത വഹിച്ചു. ചങ്ങനാശേരി അതിരൂപത വികാരി ജനറാള്‍ മോണ്‍. മാത്യു ചങ്ങങ്കരി, ഫാ. ജോസഫ് വാണിയപ്പുരയ്ക്കല്‍, ഫാ. സാവിയോ മാനാട്ട്, ഓള്‍ ഇന്ത്യ കാത്തലിക് സംസ്ഥാന വൈസ് പ്രസിഡന്‍റ് സൈബി അക്കര, കത്തോലിക്കാ കോണ്‍ഗ്രസ് അതിരൂപത പ്രസിഡന്‍റ് ബിജു സെബാസ്റ്റ്യന്‍, ബിനു ഡൊമിനിക്, വ്യാപാരി വ്യവസായി ഏകോപനസമിതി ജില്ല സെക്രട്ടറി ടോമിച്ചന്‍ അയ്യരുകുളങ്ങര, മദര്‍ തെരേസാ ഫൗണ്ടേഷന്‍ ചെയര്‍മാന്‍ ലാലി ഇളപ്പുങ്കല്‍, കെഎല്‍എം ചങ്ങനാശേരി അതിരൂപത ജനറല്‍ സെക്രട്ടറി പി.ജെ. സെബാസ്റ്റ്യന്‍, ഔസേപ്പച്ചന്‍ ചെറുകാട് എന്നിവര്‍ പ്രസംഗിച്ചു.

യുവാവിനെ മുറിയിൽ പൂട്ടിയിട്ട് മർദിച്ച പ്രതികൾ പിടിയിൽ

ഹരിപ്പാട്: യുവാവിനെ സൗഹൃദം നടിച്ച് വീട്ടിലേക്ക് ക്ഷണിച്ച് മുറിയില്‍ മണിക്കൂറുകളോളം പൂട്ടിയിടുകയും ക്രൂരമായി മര്‍ദിക്കുകയും ചെയ്ത കേസിലെ പ്രതികളെ പിടികൂടി. വിഷ്ണു എന്ന യുവാവാണ് മര്‍ദനത്തിനിരയായത്. കൊലക്കേസ് പ്രതിയായ യദുകൃഷ്ണന്‍, നിരവധി കൊലപാതക ശ്രമക്കേസിലെ പ്രതിയായ ഫാറൂഖ്, ഇവരോടൊപ്പം ഉണ്ടായിരുന്ന അശ്വിന്‍ എന്നിവരെയാണ് ഹരിപ്പാട് ഐഎസ്എച്ച്ഒ മുഹമ്മദ് ഷാഫിയുടെ നേതൃത്വത്തിലുള്ള സംഘം പിടികൂടിയത്. കഴിഞ്ഞദിവസം ഉച്ചയ്ക്ക്‌ ജോലി കഴിഞ്ഞ് ബൈക്കില്‍ വന്ന വിഷ്ണുവിനെ ഡാണാപ്പടിയില്‍ യദുകൃഷ്ണന്‍ കൈകാണിക്കുകയും ലിഫ്റ്റ് അഭ്യര്‍ഥിക്കുകയും ചെയ്തു. ഇറങ്ങേണ്ട സ്ഥലം എത്തിയപ്പോള്‍ വീട്ടിലേക്ക് ക്ഷണിച്ചു. വീട്ടിലെത്തിയപ്പോള്‍ വിഷ്ണുവിനെ മറ്റ് രണ്ടുപേര്‍ എത്തി മുറിയില്‍ പൂട്ടിയിടുകയും ഇവര്‍ എല്ലാവരും കൂടിച്ചേര്‍ന്ന് ക്രൂരമായി മര്‍ദിക്കുകയായിരുന്നു. ആ സമയം റൂമില്‍ 15 വയസ് പ്രായമുള്ള രണ്ടു കുട്ടികളും ഉണ്ടായിരുന്നു. ഇവരെയും പ്രതികള്‍ ഉപദ്രവിക്കുന്നുണ്ടായിരുന്നു. വിഷ്ണുവിന്‍റെ ഫോണും ബൈക്കിന്‍റെ താക്കോലും വാങ്ങി വസ്ത്രമെല്ലാം ഊരിപ്പിക്കുകയും ചെയ്തു. വിഷ്ണുവിന്‍റെ കഴുത്തില്‍ കിടന്ന രണ്ടു പവന്‍റെ സ്വര്‍ണമാലയും കൈയില്‍ കിടന്ന അരപ്പവന്‍റെ മോതിരവും കാതില്‍ കിടന്ന റിംഗും ഒരു സ്മാര്‍ട്ട് വാച്ചും പ്രതികള്‍ ഊരിയെടുത്തു. 15,000 രൂപ തന്നാല്‍ വിട്ടയയ്ക്കാമെന്ന് പറഞ്ഞപ്പോള്‍, പണം കൈയിലില്ലെന്ന് പറഞ്ഞ വിഷ്ണുവിനോട് ആരോടെങ്കിലും പറഞ്ഞ് ഗൂഗിള്‍ പേയില്‍ അയയ്ക്കാന്‍ ആവശ്യപ്പെട്ടു. വേറെ എന്തെങ്കിലും പറഞ്ഞാല്‍ കൊന്നുകളയുമെന്ന് പ്രതികള്‍ ഭീഷണിപ്പെടുത്തി. അങ്ങനെ നാലു പേരുടെ കയ്യില്‍നിന്നും പണം അവര്‍ നല്‍കിയ നമ്പരിലേക്ക് അയപ്പിച്ചു. എന്നിട്ടും വിഷ്ണുവിനെയും അവിടെ ഉണ്ടായിരുന്ന മറ്റ് രണ്ടുപേരെയും ഉപദ്രവിക്കുന്നത് തുടര്‍ന്നുകൊണ്ടിരുന്നു. ഇതിനിടെ യദുകൃഷ്ണനും അശ്വിനുമായി വാക്കുതര്‍ക്കമായി. യദുകൃഷ്ണന്‍ കമ്പിവടികൊണ്ട് അയാളെ അടിച്ചു. മര്‍ദനത്തെ തുടര്‍ന്ന് അവിടെ നിന്നും ഇറങ്ങി ഓടിയ അശ്വിനെ പിടിക്കാന്‍ വേണ്ടി ഫാറൂഖും യദുകൃഷ്ണനും കൂടി പിറകെ ഓടി. ഈ അവസരം മുതലെടുത്ത് മുറിയില്‍ ഉണ്ടായിരുന്ന പിള്ളേരും വിഷ്ണുവും ഓടി രക്ഷപ്പെടുകയായിരുന്നു. രാത്രി 11 മണിയോടെ പ്രധാന റോഡില്‍ എത്തിയശേഷം കൂട്ടുകാരെ വിളിക്കുകയായിരുന്നു. മര്‍ദനത്തില്‍ വിഷ്ണുവിന്‍റെ ചെവിയില്‍നിന്നു രക്തം വന്നു. തലയ്ക്കും പരിക്കുപറ്റി. ആലപ്പുഴ മെഡിക്കല്‍ കോളജില്‍ ചികിത്സതേടി. പ്രധാന പ്രതിയായ യദുകൃഷ്ണന്‍, പണം കൊടുക്കാ ഇയാള്‍ക്ക് സമാനരീതിയിലുള്ള മൂന്നു കേസുകളും കൊലപാതക കേസ് ഉള്‍പ്പെടെ 11 കേസുകളും ഉണ്ട്. അടുത്തിടെയാണ് ഇയാള്‍ ജാമ്യത്തിലിറങ്ങിയത്. പോലീസ് സാഹസികമായാണ് ഇയാളെ പിടികൂടിയത്. ഫാറൂക്ക് ഇതേ പോലെ പിടിച്ചുപറി, തട്ടിക്കൊണ്ടുപോകല്‍ കേസിലെ പ്രതിയാണ്. ഇയാള്‍ക്ക് കൊലപാതക ശ്രമം ഉള്‍പ്പെടെ നിരവധി കേസുകളുണ്ട്. മാസങ്ങള്‍ക്കു മുമ്പ് ഹരിപ്പാട് അമ്പലത്തിനു മുന്നില്‍ ഒരു ചെറുപ്പക്കാരനോട് പണം ചോദിച്ചു കൊടുക്കാത്തതിന്‍റെ പേരില്‍ അയാളെ കുത്തിയ കേസില്‍ ഇയാള്‍ ജയിലിലായിരുന്നു. ഐഎസ്എച്ച്ഒ മുഹമ്മദ് ഷാഫി, എസ്‌ഐ ഷെജ, എഎസ്‌ഐമാരായ ഷിഹാബ്, പ്രിയ, സിപിഒമാരായ നിഷാദ്, ശ്രീജിത്ത്, സജാദ്, രാകേഷ്, അമല്‍, അഭിജിത്, ശ്രീനാഥ് എന്നിവരടങ്ങുന്ന സംഘമാണ് അന്വേഷണം നടത്തി പ്രതിയെ പിടി കൂടിയത്.

കെഎസ്ആർടിസി സൂപ്പർ ഫാസ്റ്റ് ഡിവൈഡറിൽ ഇടിച്ചുകയറി

അമ്പലപ്പുഴ: കെഎസ്ആര്‍ടിസി സൂപ്പര്‍ ഫാസ്റ്റ് ഡിവൈഡറില്‍ ഇടിച്ചുകയറി മൂന്നു യാത്രക്കാര്‍ക്ക് നിസാര പരിക്ക്. ദേശീയപാതയില്‍ പുന്നപ്ര മാര്‍ക്കറ്റ് ജംഗ്ഷനു സമീപം ഇന്നലെ പുലര്‍ച്ചെ ആറോടെയായിരുന്നു അപകടം. തിരുവനന്തപുരത്തുനിന്ന് നിലമ്പൂരിലേക്കു പോയ ബസാണ് അപകടത്തില്‍പ്പെട്ടത്. ഇവിടെ നിര്‍മാണം പുരോഗമിക്കുന്ന അടിപ്പാതയ്ക്കു സമീപം ദേശീയ പാതയോട് ചേര്‍ന്ന് സ്ഥാപിച്ചിരിക്കുന്ന ഡിവൈഡറിലേക്കാണ് ബസ് ഇടിച്ചുകയറിയത്. കനത്ത മഴയില്‍ ബ്രേക്ക് പിടിച്ചപ്പോള്‍ നിയന്ത്രണം തെറ്റിയതാണ് അപകടകാരണമായതെന്ന് ഡ്രൈവര്‍ വിനേദ് പറഞ്ഞു. 12 യാത്രക്കാരുണ്ടായിരുന്നു. നിസാര പരിക്കേറ്റ മൂന്നു യാത്രക്കാരെ ആലപ്പുഴ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു.

റോഡ് മതിയോ, ഓട വേണ്ട; പ്രതിഷേധം ശക്തം

ഹരിപ്പാട്: ചേപ്പാട് പഞ്ചായത്തിലെ 12-ാം വാര്‍ഡില്‍ കാട്ടൂര്‍ കണ്ണാട്ട് റോഡിനെ ചൂളത്തെരുവ് റോഡുമായി ബന്ധിപ്പിക്കുന്ന കോലടത്തു തറയില്‍ ചക്കനാട്ട് റോഡിന്‍റെ പുനര്‍നിര്‍മാണത്തില്‍ ഓടകൂടി നിര്‍മിക്കാനുള്ള പഞ്ചായത്ത് അധികൃതരുടെ ശ്രമത്തിനെതിരേ നാട്ടുകാരുടെ പ്രതിഷേധം ശക്തമാകുന്നു. ഏകദേശം മുന്നൂറ് മീറ്റര്‍ നീളമുള്ള റോഡിന് ഗ്രാമപ്രദേശത്തെ റോഡുകള്‍ക്ക് നിഷ്‌കര്‍ഷിച്ചിട്ടുള്ള ശരാശരി വീതി മാത്രമേയുള്ളൂ. ഇതിന്‍റെ ഒരു വശത്തുകൂടി ഓട നിര്‍മിക്കാനുള്ള പഞ്ചായത്ത് മെംബറുടെ പിടിവാശി ഉപേക്ഷിക്കണമെന്നാണ് നാട്ടുകാരുടെ ആവശ്യം. അശാസ്ത്രീയമെന്ന് നാട്ടുകാര്‍ നിലവിലെ വീതി കുറഞ്ഞ റോഡിന്‍റെ വശത്ത് ഓട നിര്‍മിക്കുന്നത് അനാവശ്യവും അപ്രായോഗികവും അശാസ്ത്രീയവുമാണെന്ന് നാട്ടുകാര്‍ ഒന്നടങ്കം പറയുന്നു. എതിര്‍വശത്തുനിന്നും കാറോ സ്‌കൂള്‍ ബസോ വന്നാല്‍ സ്‌കൂട്ടര്‍ യാത്രക്കാരനുപോലും സൈഡ് കൊടുക്കാന്‍ സാധിക്കാത്ത അവസ്ഥയാണ് റോഡിലുള്ളത്. ഇതിനിടയില്‍ ഓട നിര്‍മിക്കുന്നത് ഗതാഗതത്തെ കൂടുതല്‍ ദുഷ്‌കരമാക്കും. നാട്ടുകാരുടെ ശക്തമായ വിയോജിപ്പ് വകവയ്ക്കാതെ രണ്ടുദിവസം മുന്‍പ് തൊഴിലുറപ്പ് തൊഴിലാളികളെയും ജെസിബിയും ഉപയോഗിച്ച് ഓടയ്ക്കുവേണ്ടി കുഴിയെടുത്തിരുന്നു. ഇതില്‍ പ്രതിഷേധിച്ച് പൗരസമിതി അംഗങ്ങളായ രഞ്ജിത് കൊയ്പ്പള്ളില്‍, ഹരീഷ് കുമാര്‍ പൊരീക്കല്‍, വിജയകുമാരക്കുറുപ്പ് മഞ്ഞാടിയില്‍, രഘുനാഥന്‍ ചെറുവല്ലൂര്‍ വടക്കതില്‍, ജയശ്രീ സദാശിവന്‍ കണ്ണങ്കര, സജീവ് തുരുത്തിയില്‍ കിഴക്കതില്‍ എന്നിവര്‍ കുഴിയില്‍ വാഴനട്ട് പ്രതിഷേധിച്ചു. കഴിഞ്ഞ ദിവസങ്ങളില്‍ മണ്ണെടുത്ത കുഴിയില്‍ വീണ് ഒരു സ്‌കൂട്ടറും ഓട്ടോറിക്ഷയും കാറും അപകടത്തില്‍പ്പെട്ടിരുന്നു. മറ്റ് വാഹനങ്ങള്‍ക്ക് സൈഡ് കൊടുക്കുമ്പോഴാണ് അപകടങ്ങള്‍ സംഭവിച്ചത്. ഫണ്ട് ദുര്‍വിനിയോഗവും അഴിമതി ആരോപണവും ഏകദേശം 160 മീറ്റര്‍ ദൂരം ഓടയ്ക്കുവേണ്ടി മണ്ണെടുത്ത ഈ ഭാഗത്ത് ഒരുകാലത്തും വെള്ളക്കെട്ടോ നീരൊഴുക്കോ ഉണ്ടായിട്ടില്ല എന്ന് നാട്ടുകാര്‍ ചൂണ്ടിക്കാട്ടുന്നു. ഈ സാഹചര്യത്തില്‍ ഓടയ്ക്കുവേണ്ടി പണം ചെലവഴിക്കുന്നത് പഞ്ചായത്ത് ഫണ്ടിന്‍റെ ദുര്‍വിനിയോഗമാണെന്നും ഇതില്‍ അഴിമതി സംശയിക്കുന്നതായും പ്രദേശവാസികള്‍ ആക്ഷേപം ഉന്നയിച്ചു. വൈദ്യുത പോസ്റ്റുകള്‍ ഭീഷണി പൊട്ടിപ്പൊളിഞ്ഞുകിടക്കുന്ന റോഡിന്‍റെ പുനര്‍നിര്‍മാണം എത്രയും വേഗത്തില്‍ പൂര്‍ത്തിയാക്കണമെന്നാണ് നാട്ടുകാരുടെ പ്രധാന ആവശ്യം. ഓടനിര്‍മാണവുമായി മുന്നോട്ട് പോവുകയാണെങ്കില്‍ റോഡ് സൈഡിലെ വൈദ്യുത പോസ്റ്റുകള്‍ മാറ്റി സ്ഥാപിക്കാന്‍ റോഡില്‍ സ്ഥലമില്ലാത്തതിനാല്‍ അവ ഓടയ്ക്കുള്ളില്‍ത്തന്നെ നിലനിര്‍ത്തേണ്ടി വരുമെന്നും നാട്ടുകാര്‍ പറയുന്നു. ഓടയും വൈദ്യുത പോസ്റ്റുകളും യാത്രക്കാര്‍ക്കും നാട്ടുകാര്‍ക്കും ഭീഷണിയാകുമെന്നും അവര്‍ ആശങ്കപ്പെടുന്നു. അനാവശ്യമായി ഓടനിര്‍മിക്കാനുള്ള തീരുമാനത്തില്‍നിന്ന് പഞ്ചായത്ത് അധികൃതര്‍ പിന്മാറണമെന്നും റോഡിന്‍റെ വീതി കുറയ്ക്കാതെ പുനര്‍നിര്‍മാണം പൂര്‍ത്തിയാക്കണമെന്നുമാണ് നാട്ടുകാര്‍ ഒറ്റക്കെട്ടായി ആവശ്യപ്പെടുന്നത്.

ഹൗസ്ബോട്ട് കേന്ദ്രത്തിന്‍റെ പ്രവർത്തനം ഉടൻ; പ്രതീക്ഷയോടെ വിനോദസഞ്ചാരികൾ

പൂച്ചാക്കല്‍: അരൂക്കുറ്റിയില്‍ സംസ്ഥാന വിനോദസഞ്ചാരവകുപ്പിന്‍റെ നേതൃത്വത്തിലുള്ള ഹൗസ് ബോട്ട് കേന്ദ്രത്തിന്‍റെ പ്രവര്‍ത്തനം ഉടന്‍ തുടങ്ങും. അനുബന്ധ ജോലികള്‍ പുരോഗമിക്കുകയാണ്. പദ്ധതി പൂര്‍ത്തിയാകുന്നതോടെ വിനോദസഞ്ചാര മേഖലക്ക് ഏറെ സാധ്യതകളാണ് ഉണ്ടാകുക. ജില്ലയുടെ വടക്കെ അതിര്‍ത്തിയായ അരൂക്കുറ്റി ഫെറിയില്‍ ഹൗസ് ബോട്ട് കേന്ദ്രത്തിന്‍റെ ഉദ്ഘാടനം കഴിഞ്ഞ് വര്‍ഷങ്ങള്‍ കഴിഞ്ഞിട്ടും പ്രവര്‍ത്തനം തിടങ്ങിയിരുന്നില്ല. നിര്‍മാണം പൂര്‍ത്തിയാക്കി വര്‍ഷങ്ങള്‍ കഴിഞ്ഞിട്ടും പ്രവര്‍ത്തനം തുടങ്ങാത്തതിനാല്‍ സാമൂഹ്യവിരുദ്ധരുടെ ശല്യം മൂലവും അല്ലാതെയും കേടുപാടുകള്‍ സംഭവിച്ച ടൈലുകള്‍, ക്ലോസ്റ്റുകള്‍, പെയിന്‍റിംഗ് എന്നിവയുടെ ജോലികളാണ് ഇപ്പോള്‍ നടക്കുന്നത്. കേന്ദ്രത്തിനു സമീപത്തുള്ള 60 സെന്‍റ് സ്ഥലം എക്‌സൈസ് വകുപ്പിന്‍റെ ഉടമസ്ഥതയിലുള്ളതാണ്. ഈ സ്ഥലം കൂടി കിട്ടിയാലേ വാഹന പാര്‍ക്കിംഗിനും മറ്റും സ്ഥലം ലഭിക്കുകയുള്ളൂ. സ്ഥലം വിട്ടുകിട്ടുന്നതിനായി രണ്ടു വകുപ്പുകള്‍ തമ്മില്‍ ചര്‍ച്ചകള്‍ നടന്നുവരികയാണ്. എക്‌സൈസ് വകുപ്പിന്‍റെ സ്ഥലം ലഭിച്ചാല്‍ മാത്രമേ അരൂക്കുറ്റിയുടെ ടൂറിസം വികസന ലക്ഷ്യം സാധ്യമാകൂ. 1.65 ലക്ഷം രൂപയാണ് കേന്ദ്രസര്‍ക്കാരിന്‍റെ മെഗാ സര്‍ക്യൂട്ട് ടൂറിസം പദ്ധതിയില്‍ നീക്കിവച്ചത്. എന്നാല്‍, സ്ഥലം ലഭിക്കാത്തതോടെ പദ്ധതി പൂര്‍ണമായും നടപ്പായിട്ടില്ല. കേരള ഇന്‍ഫ്രാസ്ട്രക്ചര്‍ ഡവലപ്‌മെന്‍റ് കോര്‍പറേഷന്‍റെ നേതൃത്വത്തിലായിരുന്നു ടെര്‍മിനല്‍ നിര്‍മാണം. കായല്‍ ടൂറിസം പദ്ധതിയുടെ സാധ്യതകളേറെയുണ്ടിവിടെ. കൊച്ചിയില്‍നിന്ന് വിനോദസഞ്ചാരികള്‍ക്ക് കായല്‍മാര്‍ഗവും റോഡ് മാര്‍ഗവും അരൂക്കുറ്റിയില്‍ എത്താന്‍ കഴിയും. അതും അരമണിക്കൂര്‍കൊണ്ട്. ആഡംബരക്കപ്പലുകളില്‍ എത്തി ഒരു ദിവസം മാത്രം കരയില്‍ തങ്ങുന്ന സഞ്ചാരികള്‍ക്ക് ഇവിടം ഏറെ അനുകൂലവുമായിരുന്നു. ഒപ്പം കായല്‍ തുരുത്തുകളുടെ സൗന്ദര്യവും ഇവിടെ ആസ്വദിക്കാനാകും. ഈ ടെര്‍മിനലില്‍നിന്ന് നോക്കിയാല്‍ കാണാവുന്ന മൂന്ന് ചെറു ദ്വീപുകളുണ്ട്. 15 ഓളം ബോട്ടുകള്‍ അടുപ്പിക്കാന്‍ സൗകര്യം ഉണ്ട്. യാത്രക്കാര്‍ക്ക് ഉപയോഗിക്കുന്നതിനായി ആധുനിക സൗകര്യങ്ങളോടു കൂടിയ ടോയ്‌ലെറ്റുകള്‍, ഒന്നാം നിലയില്‍ ഇരു ഭാഗത്തും കാഴ്ചകള്‍ ആസ്വദിക്കാനുള്ള വാച്ച് ടവര്‍, വിശ്രമിക്കാനുള്ള സ്ഥലം എന്നിവയുണ്ട്. ഫ്രാന്‍സില്‍ നിന്നെത്തിച്ച ടെന്‍സൈല്‍ റൂഫിംഗ് ആണ് ഈ ടെര്‍മിനലിന്‍റെ മറ്റൊരാകര്‍ഷണം. ടെര്‍മിനലിനന്‍റെ മധ്യഭാഗത്താണിത്. അരൂക്കുറ്റി വൈക്കം സത്യാ ഗ്രഹത്തിന്‍റെ ഭാഗമായിരുന്ന തന്തെ പെരിയാര്‍ ഇ.വി. രാമസ്വാമി നായ്ക്കര്‍ക്ക് അദ്ദേഹം ജയില്‍വാസം അനുഭവിച്ച അരൂക്കുറ്റിയില്‍ ഉയരുന്ന സ്മാരകം അഞ്ചുമാസത്തിനകം പൂര്‍ത്തിയാകും. പെരിയാറിന്‍റെ പ്രതിമ, മ്യൂസിയം, ഹാള്‍, പാര്‍ക്ക് എന്നിവ ഇവിടെ ഒരുക്കും. മറ്റ് വിനോദസഞ്ചാര പദ്ധതികളും നടപ്പാക്കും. പെരുമ്പളം പാലം ഡിസംബറില്‍ പൂര്‍ത്തിയാകുന്നതോടെ അരൂക്കുറ്റി, പെരുമ്പളം മേഖലയിലേക്ക് കൂടുതല്‍ വിനോദ സഞ്ചാരികള്‍ക്ക് കടന്നുവരാനാകും. ദേശീയപാതയില്‍ ഉയരപ്പാത നിര്‍മാണവും പുരോഗമിക്കുകയാണ്. ഇതോടെ ജില്ലയുടെ വടക്കേ അതിര്‍ത്തിയായ അരൂക്കുറ്റി വിനോദസഞ്ചാര പ്രധാന്യമുള്ള ഇടമായി മാറുമെന്നാണ് പ്രതി ക്ഷിക്കുന്നത്.

രണ്ടാംകൃഷി: ഇലകരിച്ചിൽ സാധ്യതയെന്ന് മുന്നറിയിപ്പ്

മങ്കൊമ്പ്: രണ്ടാം കൃഷിയിറക്കിയിരിക്കുന്ന പാടശേഖരങ്ങളിൽ നെൽച്ചെടികളിൽ ബാക്ടീരിയ മൂലമുണ്ടാകുന്ന ഇലകരിച്ചിൽ രോഗത്തിന് സാധ്യതയെന്ന് മങ്കൊമ്പ് നെല്ലുഗവേഷണകേന്ദ്രം മുന്നറിയിപ്പു നൽകി. നെല്ലോലകളുടെ ഇരുവശങ്ങളിലൂടെ ഓറഞ്ച് കലർന്ന മഞ്ഞനിറത്തിൽ താഴേക്ക് വ്യാപിക്കുന്ന കരിച്ചിലാണ് രോഗലക്ഷണം. സാന്തോമോണസ് ഒറൈസയെന്ന ബാക്ടീരിയയാണ് രോഗം പരത്തുന്നത്. ഇലയിൽ മഞ്ഞനിറത്തിലുള്ള നീണ്ട പുള്ളിക്കുത്തുകൾ പ്രത്യക്ഷപ്പെട്ട് ഇലയുടെ അറ്റത്തുനിന്നു താഴേക്ക് തണ്ടിനരികിലൂടെയോ, അരികിലൂടെ മാത്രമോ വളഞ്ഞുപുളഞ്ഞ രേഖകൾ രൂപപ്പെടുകയും ക്രമേണ ആ ഭാഗം കരിഞ്ഞുപോകുകയും ചെയ്യുന്നു. ചിനപ്പ് പൊട്ടുന്ന സമയത്താണ് രോഗം ബാധിക്കുന്നതെങ്കിൽ നടുനാമ്പുകരിഞ്ഞ് ചെടി കരിഞ്ഞുപോകുന്നു. തണ്ടുതുരപ്പന്‍റെ ആക്രമണത്തോട് സാമ്യം തോന്നുമെങ്കിലും നടുനാമ്പു വലിക്കുമ്പോൾ ഊരിപ്പോകുന്നില്ലെങ്കിൽ ബാക്ടീരിയ മൂലമുള്ള ഇലകരിച്ചിലാണെന്ന് ഉറപ്പിക്കാം. നെല്ലിന്‍റെ കൊതുമ്പു പരുവത്തിലാണ് രോഗബാധ ഉണ്ടാവുന്നതെങ്കിൽ ഇലകരിച്ചിലും രോഗതീവ്രതയും കൂടുന്നു. വിതച്ച് 40 മുതൽ 50 ദിവസം വരെ പ്രായമായ നെൽച്ചെടികളെയാണ് ഇലകരിച്ചിൽ ബാക്ടീരിയ പ്രതികൂലമായി ബാധിക്കുന്നത്. വെയിലും മഴയും രോഗം കൂട്ടും ഇടവിട്ടുള്ള നല്ല വെയിലും മഴയും രോഗവ്യാപനത്തിന് ആക്കം കൂട്ടും. രോഗമുണ്ടന്നു സംശയിക്കുന്ന ചെടി പറിച്ചെടുത്ത് ചെളി കഴുകിയതിനുശേഷം ഒരു കത്തികൊണ്ട് തണ്ടോ ഇലയോ മുറിച്ച ഭാഗം ഒരു ചില്ലുഗ്ലാസിലെ വെള്ളത്തിൽ കുറച്ചുസമയം ഇളകാതെ മുക്കിവയ്ക്കുമ്പോൾ മുറിവിൽനിന്നു പാലുപോലെയുള്ള ദ്രാവകം ഒലിച്ചിറങ്ങിയാൽ ബാക്ടീരിയൽ ഇലകരിച്ചിലാണെന്ന് ഉറപ്പിക്കാം. മഴക്കാലത്ത് ശക്തമായ കാറ്റുമൂലം നെല്ലോലകൾ തമ്മിൽ കൂട്ടിയുരയുമ്പോൾ ഉണ്ടാവുന്ന മുറിവിലൂടെ രോഗഹേതുവായ ബാക്ടീരിയ ചെടിക്കുള്ളിൽ കടന്ന് രോഗം പരത്തുന്നു. മുൻപു രോഗം ബാധിച്ചിടങ്ങളിൽ ജാഗ്രത കഴിഞ്ഞ കൃഷിയിൽ ബാക്ടീരിയ മൂലമുള്ള ഇലകരിച്ചിൽരോഗം വന്ന പാടത്ത് ഇത്തവണത്തെ കൃഷിയിലും രോഗം വരാനുള്ള സാധ്യത കൂടുതലാണ്. ഈ പാടങ്ങളിൽനിന്നു ജലസേചനത്തിനായി വെള്ളം കയറ്റിയിറക്കുമ്പോൾ രോഗം മറ്റു പാടങ്ങളിലേക്കും പടരും. നടീൽ സമയത്ത് ഞാറിന്‍റെ അറ്റം മുറിക്കുന്നത്, അധികമായ ജലസേചനം, കളകൾ, താമസിച്ചുള്ള മൂന്നാം വളപ്രയോഗത്തിൽ അമിത നൈട്രജൻ എന്നിവ രോഗവ്യാപനത്തിന്‍റെ തീവ്രത കൂട്ടുന്ന ഘടകങ്ങളാണ്. തുടക്കത്തിലേ ശ്രദ്ധിച്ചാൽ ജൈവമാർഗത്തിലൂടെ രോഗത്തെ പ്രതിരോധിക്കാൻ സാധിക്കും. രാസവളം ഉപയോഗിക്കരത്സ്യൂഡോമോണസ് ഫ്‌ളൂറസെൻസ് ഉപയോഗിച്ച് (10 ഗ്രാം ഒരു കിലോ വിത്തിന് എന്ന തോതിൽ) വിത്തുപരിചരണം ചെയ്യുന്നത് രോഗത്തെ പ്രതി രോധിക്കാൻ സഹായിക്കുമെന്ന് മങ്കൊമ്പ് നെല്ല് ഗവേഷണ കേന്ദ്രം പ്രൊഫസറും മേധാവിയുമായ ഡോ.എം. സുരേന്ദ്രൻ പറഞ്ഞു. രോഗലക്ഷണങ്ങൾ കണ്ടാൽ പച്ചച്ചാണകം 20 ഗ്രാം ഒരു ലിറ്റർ വെള്ളത്തിൽ കലക്കി അഞ്ചു മണിക്കൂറിനുള്ളിൽ തെളിയൂറ്റി രോഗംബാധിച്ച ഭാഗത്ത് തളിക്കണം. ബ്ലീച്ചിങ് പൗഡർ ഏക്കറിന് രണ്ടു കിലോഗ്രാം ചെറിയ കിഴികളിലാക്കി, തുമ്പുകളിൽ വെള്ളം കയറുന്ന സമയത്തോ വെള്ളം കെട്ടി നിർത്തുന്ന സമയത്തോ കൃഷിയിടങ്ങളിൽ കെട്ടിയിടണം. രോഗം ആദ്യം വരിനെല്ലിനെ ആക്രമിക്കുകയും പിന്നീട് നെല്ലിലേക്കു വ്യാപിക്കുകയും ചെയ്യുന്നു. അതിനാൽ, വരിനെല്ലിന്‍റെ ആധിക്യമുള്ള പാടങ്ങളിൽ എത്രയുംപെട്ടെന്ന് വരിനെല്ലിനെ നശിപ്പിച്ചുകളയേണ്ടതാണ്. കൂടുതൽ വിവരങ്ങൾക്കും സഹായത്തിനുമായി മങ്കൊമ്പ് നെല്ലുഗവേഷണകേന്ദ്രവുമായി ബന്ധപ്പെടണം. ഫോൺ- 0477- 2702245, 9447565946 എന്നീ നമ്പരുകളിൽ ബന്ധപ്പെടാം.

കല്ലൂർക്കാട് ബസിലിക്കയിൽ ദർശനത്തിരുനാൾ

ചമ്പക്കുളം: കല്ലൂര്‍ക്കാട് സെന്‍റ് മേരീസ് ബസിലിക്കയില്‍ പുഷ്പറോസ് മാതാവിന്‍റെ ദര്‍ശനത്തിരുനാളും കര്‍ത്താവിന്‍റെ ജനന ജൂബിലി ആഘോഷവും എട്ടുമുതല്‍ 19 വരെ നടക്കും. എട്ടിന് വൈകുന്നേരം നാലിന് ബസിലിക്ക റെക്ടറും കപ്ലോന്‍ വികാരിയുമായ ഫാ. ജയിംസ് പാലയ്ക്കല്‍ കൊടിയേറ്റും. 4.15ന് ജപമാല, ലദീഞ്ഞ്, വിശുദ്ധ കുര്‍ബാന, പ്രസംഗം, പുഷ്പ റോസ മാതാവിന്‍റെ പുഷ്പമുടി വെഞ്ചരിപ്പ്. തുടര്‍ന്നുള്ള ദിവസങ്ങളില്‍ രാവിലെ 5.45ന് ആരാധന, സപ്രാ, വിശുദ്ധ കുര്‍ബാന വൈകുന്നേരം നാലിന് ജപമാല, ലദീഞ്ഞ്, വിശുദ്ധ കുര്‍ബാന, പ്രസംഗം. 12ന് ആവിലായിലെ വിശുദ്ധ അമ്മത്രേസ്യായുടെ തിരുനാള്‍ദിനം രാവിലെ 6.15ന് സപ്രാ, വിശുദ്ധ കുര്‍ബാന, 9.15ന് ഖുദ്ആ, വിശുദ്ധ കുര്‍ബാന, വൈകുന്നേരം നാലിന്് ജപമാല, ലദീഞ്ഞ്, വിശുദ്ധ കുര്‍ബാന പ്രസംഗം, പ്രദക്ഷിണം. 16ന് വൈകുന്നേരം അഞ്ചിന് വിശുദ്ധ കുര്‍ബാന, പ്രസംഗം തിരുവല്ല ആര്‍ച്ച്ബിഷപ് തോമസ് മാര്‍ കുറിലോസ്. 17ന് വൈകുന്നേരം നാലിന് വാഴ്ച. 4.50ന് വിശുദ്ധ കുര്‍ബാന, പ്രസംഗം-ചങ്ങനാശേരി ആർച്ച്ബിഷപ് മാര്‍ തോമസ് തറയില്‍. 18ന് വൈകുന്നേരം 5.45ന് ദിവ്യകാരുണ്യ ആരാധനയും പരിശുദ്ധ കുര്‍ബാനയുടെ പ്രദക്ഷിണവും ഫാ. ജോസഫ് വാണിയപ്പുരയ്ക്കല്‍, കപ്ലോന്‍ വികാരി വാഴ്ച, ഫ്യൂഷന്‍ മ്യൂസിക്. 19ന് പ്രധാന തിരുനാള്‍ ദിനം രാവിലെ 5.30നും 7.30 നും വിശുദ്ധ കുര്‍ബാന, 10ന് തിരുനാള്‍ കുര്‍ബാന, വചനസന്ദേശം, തിരുനാള്‍ പ്രദക്ഷിണം. വൈകുന്നേരം അഞ്ചിന് റംശാ, കൊടിയിറക്ക്. ജൂബിലിവര്‍ഷം പ്രമാണിച്ച് ദര്‍ശനത്തിരുനാളിനോടനുബന്ധിച്ച് ഒമ്പതിന് രാവിലെ 8.30 മുതല്‍ ഉച്ചയ്ക്ക് ഒന്നുവരെ അഖണ്ഡ ജപമാലയും 10, 13, 14, 15 തീയതികളില്‍ രാവിലെ 10 മുതല്‍ 12 വരെ വചന ഉപാസനയും നടത്തും. 10ന് മരിച്ചവരുടെ അനുസ്മരണ ദിനമായും 11ന് രോഗീദിനമായും ആചരിക്കും. തിരുനാള്‍ ദിവസങ്ങളില്‍ കല്ലൂര്‍ക്കാട് പുഷ്പ റോസ് മാതാവിന്‍റെ പുഷ്പമുടി സമര്‍പ്പണത്തിനുള്ള സൗകര്യവും ഉണ്ടായിരിക്കും.

ഹരിത കാമ്പസ് പ്രഖ്യാപനം

ചെങ്ങന്നൂർ: സ്വച്ഛ് സർവേക്‌ഷൻ കാമ്പയിന്‍റെ ഭാഗമായ സ്വച്ഛോത്സവത്തിൽ ഗവ. വനിത ഐറ്റിഐയെ ഹരിത കാമ്പസായി പ്രഖ്യാപിച്ചു. കഴിഞ്ഞ ഒരുവര്‍ഷത്തെ ഹരിതപ്രോട്ടോക്കോള്‍ പ്രകാരമുള്ള പ്രവര്‍ത്തനങ്ങളുടെ ഭാഗമായിട്ടാണ് ചെങ്ങന്നൂര്‍ നഗരസഭ, ഹരിത കേരള മിഷന്‍ എന്നിവയുടെ സഹകരണത്തോടെ ചെങ്ങന്നൂര്‍ ഗവ.വനിത ഐടിഐയെ ഹരിത കാമ്പസായി പ്രഖ്യാപിച്ചത്. നഗരസഭാധ്യക്ഷ ശോഭ വര്‍ഗീസ് ഉദ്ഘാടനം ചെയ്തു. കൗൺസിലർ മനു എം. കൃഷ്ണൻ അധ്യക്ഷത വഹിച്ചു. നഗരസഭ വൈസ് ചെയർമാൻ കെ. ഷിബുരാജന്‍ ഹരിത കാമ്പസ് പ്രഖ്യാപനം നടത്തി. ആരോഗ്യ സ്റ്റാന്‍സിംഗ് കമ്മിറ്റി ചെയര്‍പേഴ്സണ്‍ റ്റി.കുമാരി ഹരിത സര്‍ട്ടിഫിക്കറ്റ് പ്രിന്‍സിപ്പൽ സജിമോന്‍ തോമസിന് കൈമാറി. സീനിയര്‍ സൂപ്രണ്ട് ജി. ശ്രീകുമാര്‍, നഗരസഭ സീനിയര്‍‌ പബ്ലിക്ക് ഹെല്‍ത്ത് ഇന്‍സ്പെക്ടര്‍ സി. നിഷ, രാധാകൃഷ്ണക്കുറുപ്പ്, പ്രസന്ന ശശി, ടി.ബി. രാജീവ്, ഡി. ധനേഷ് എന്നിവര്‍ പ്രസംഗിച്ചു.

വരുംതലമുറ നാട്ടില്‍തന്നെ ജോലികള്‍ കണ്ടെത്തണം: മാര്‍ തോമസ് തറയില്‍

ആലപ്പുഴ: നമ്മുടെ സമൂഹത്തെ ശക്തിപ്പെടുത്തുന്നതിനായി വരുംതലമുറ നാട്ടില്‍തന്നെ ജോലികള്‍ കണ്ടെത്തണമെന്നും സഭയെക്കുറിച്ച് അഭിമാനബോധം എല്ലാവരിലും ഉണ്ടാവണമെന്നും ചങ്ങനാശേരി ആര്‍ച്ച്ബിഷപ് മാര്‍ തോമസ് തറയില്‍. ആലപ്പുഴ ഫൊറോന കൗണ്‍സില്‍ ഉദ്ഘാടനം ചെയ്യുകയായിരുന്നു അദ്ദേഹം. സഭ ചെയ്യുന്ന കാരുണ്യപ്രവൃത്തികള്‍ കാണാതെ പോകരുതെന്ന് ഓര്‍മിപ്പിച്ച അദ്ദേഹം സഭ വരുംതലമുറയ്ക്കായി ഒരുക്കി വച്ചിരിക്കുന്ന സൗകര്യങ്ങള്‍ ഉപയോഗപ്പെടുത്തി നമ്മുടെ സമുദായത്തെ മുന്‍പോട്ട് കൊണ്ടുപോകണമെന്നും കൂട്ടിച്ചേര്‍ത്തു. സമുദായബോധം എന്നത് വര്‍ഗീയതയല്ലെന്നും അഭിമാനമാകണമെന്നും അദ്ദേഹം കൂട്ടിച്ചേര്‍ത്തു. പരസ്പരം വളര്‍ത്തുകയും അതുവഴി ഒരുമിച്ച് വളരുകയും ചെയ്യുക എന്ന തത്വം സമുദായം പ്രാവര്‍ത്തികമാക്കണം. ഇത് വ്യക്തിഗതമായ ഉയര്‍ച്ചയ്ക്കും കൂട്ടായ പുരോഗതിക്കും നിര്‍ണായകമാണെന്ന് അദ്ദേഹം ഓര്‍മിപ്പിച്ചു. നമ്മുടെ മനുഷ്യവിഭവം വേണ്ട വിധത്തില്‍ വിനിയോഗിക്കാന്‍ കഴിയണമെന്നും സാമുദായിക നിലനില്‍പ്പിന് സഹായകമായ നിലപാടുകളില്‍ ഊന്നി മുന്നോട്ടുപോകാന്‍ നാം ശ്രദ്ധിക്കണമെന്നും അദ്ദേഹം പറഞ്ഞു. ആലപ്പുഴ ഫൊറോന വികാരി ഫാ. മാത്യുനടമുഖത്ത് യോഗത്തില്‍ അധ്യക്ഷത വഹിച്ചു. പ്രീസ്റ്റ് കൗണ്‍സില്‍ സെക്രട്ടറി ബിജു മണവത്ത് സ്വാഗതം പറഞ്ഞു. ഫൊറോന കൗണ്‍സില്‍ സെക്രട്ടറി റോയ് പി. വേലിക്കെട്ടില്‍ റിപ്പോര്‍ട്ട് അവതരിപ്പിച്ചു. ദീപിക ജനറല്‍ മാനേജർ (സര്‍ക്കുലേഷന്‍) ഫാ. ജിനോ പുന്നമറ്റം സമുദായ ശക്തീകരണം എന്ന വിഷയം അവതരിപ്പിച്ചു. അതിരൂപത പാസ്റ്റര്‍ കൗണ്‍സില്‍ സെക്രട്ടറി രേഖ മാത്യു, ജോയി ജോൺ സണ്‍, ജോസഫ് കളപ്പുരയ്ക്കല്‍, സൗമി എന്നിവര്‍ യോഗത്തില്‍പ്രസംഗിച്ചു.

രജതജൂബിലിക്ക് വർണാഭമായ തുടക്കം

ചെങ്ങന്നൂർ: ചെറിയനാട് ദേവസ്വം ബോർഡ് ഹയർ സെക്കൻഡറി സ്കൂളിന്‍റെ ഹയർ സെക്കൻഡറി വിഭാഗത്തിന്‍റെ രജതജൂബിലി ആഘോഷ പരിപാടികൾക്ക് വർണാഭമായ തുടക്കം. ചെറിയനാട് മാമ്പള്ളി പടി ജംഗ്ഷനിൽനിന്ന് ആരംഭിച്ച സാംസ്കാരിക ഘോഷയാത്രയോടെയാണ് ആഘോഷങ്ങൾക്കു തുടക്കമായത്. കൊടിക്കുന്നിൽ സുരേഷ് എംപി സമ്മേളനം ഉദ്ഘാടനം ചെയ്തു. ചെയർമാൻ ടി.സി. സുനിൽ കുമാർ അധ്യക്ഷത വഹിച്ചു. ചെറിയനാട് പഞ്ചായത്ത് പ്രസിഡന്‍റ് പ്രസന്ന രമേഷൻ മുഖ്യപ്രഭാഷണം നടത്തി. പ്രതിഭകളെ ചെങ്ങന്നൂർ ബ്ലോക്ക് പഞ്ചായത്ത് പ്രസിഡന്‍റ് കെ.എം. സലിം ആദരിച്ചു. ജനറൽ കൺവീനറും സ്കൂൾ പ്രിൻസിപ്പലുമായ എസ്. ജയന്തി, പ്രോഗ്രാം കമ്മിറ്റി ചെയർമാൻ പി. ഉണ്ണികൃഷ്ണൻ നായർ, ടി.എ. സ്വർണമ്മ, മനോജ് മോഹൻ, ജി. വിവേക്, ഒ.ടി. ജയമോഹൻ, എം. രജനീഷ്, ബിജു രാഘവൻ, അഡ്വ. ദിലീപ് ചെറിയനാട്, ഉണ്ണി മണ്ണാടിക്കൽ, കെ.ജി. മുരളി എന്നിവർ പ്രസംഗിച്ചു. 11ന് രാവിലെ 10ന് നടക്കുന്ന സമാപന സമ്മേളനം മന്ത്രി വി.എൻ. വാസവൻ ഉദ്ഘാടനം ചെയ്യും. തിരുവിതാംകൂർ ദേവസ്വം പ്രസിഡന്‍റ് പി.എസ്. പ്രശാന്ത് അധ്യക്ഷനാകും. പതിനൊന്നു വരെ നീണ്ടുനിൽക്കുന്ന ആഘോഷങ്ങളുടെ ഭാഗമായി നാടൻപാട്ട് ശില്പശാല, മോട്ടിവേഷൻ ക്ലാസ്, കാർഷിക സെമിനാർ, സാഹിത്യ സമ്മേളനം, വയലാർ അനുസ്മരണം, വിദ്യാഭ്യാസ സെമിനാർ എന്നിവ നടക്കുമെന്ന് പ്രിൻസിപ്പൽ എസ്. ജയന്തി, ഹെഡ്മിസ്ട്രസ് വി.എസ്. ലക്ഷ്മി, പിടിഎ. പ്രസിഡന്‍റ് ടി.സി. സുനിൽകുമാർ, പ്രോഗ്രാം കമ്മിറ്റി ചെയർമാൻ പി. ഉണ്ണികൃഷ്ണൻ നായർ എന്നിവർ പറഞ്ഞു.

കുട്ടനാട്ടിൽ പരിശീലനം നടത്താൻ നീന്തൽക്കുളമില്ലാതെ വിദ്യാർഥികൾ

ചമ്പക്കുളം: വെള്ളംകൊണ്ടു സമ്പന്നമായ കുട്ടനാട്ടിലെ പഞ്ചായത്തുകളില്‍ ഒന്നില്‍പോലും 25 മീറ്റര്‍ നീന്താന്‍ തക്ക സൗകര്യമുള്ള ഒരു നീന്തല്‍ക്കുളമില്ല. നിരവധി നീന്തല്‍ താരങ്ങളെയും തുഴച്ചില്‍ താരങ്ങളെയും രൂപപ്പെടുത്തിയിട്ടുള്ള ഈ നാടിന്‍റെ ദയനീയ ചിത്രമാണിത്. പ്രകൃതിദത്തമായ നിരവധി സൗകര്യങ്ങളുണ്ടായിട്ടും നാളിതുവരെയും ഒരു നീന്തല്‍ക്കുളം രൂപപ്പെടുത്താനുള്ള പദ്ധതിപോലും വിഭാവനം ചെയ്യാനാകാതെപോയതിനെ ഓര്‍ത്ത് കുട്ടനാട്ടുകാര്‍ ഇന്നും സങ്കടത്തിലാണ്. പന്ത്രണ്ട് പഞ്ചായത്തുകളിലും പ്രകൃതി ഒരുക്കി നല്കിയിരിക്കുന്ന നിരവധി നദികളും കുളങ്ങളും കനാലുകളും ഉണ്ടെങ്കിലും ഒരു ചെറു നീന്തല്‍ക്കുളം പോലും തയാറാക്കാന്‍ സാധിക്കാതെ പോയതില്‍ തദ്ദേശ സ്വയംഭരണ സ്ഥാപനങ്ങളുടെ ഭരണനേതൃത്വങ്ങളും മറ്റ് ഉത്തരവാദിത്വപ്പെട്ട സ്ഥാനങ്ങളിലിരുന്നവര്‍ക്കും ഇതിന്‍റെ ഉത്തരവാദിത്വത്തില്‍നിന്ന് മാറിനിൽക്കാനാവില്ല. നീന്തല്‍ താരങ്ങളായി കേന്ദ്ര -സംസ്ഥാന സര്‍ക്കാര്‍ ജോലികളിലും പ്രതിരോധ സേനകളിലും ജോലിക്കു കയറിയിട്ടുള്ളവര്‍ നിരവധിയാണ്. ലഭ്യമായ പരിമിത സൗകര്യങ്ങള്‍ പരമാവധി ഉപയോഗിച്ച് പഴയ തലമുറ നേട്ടം കൊയ്‌തെടുത്തെങ്കില്‍ നിലവിലെ അസൗകര്യങ്ങളും സാഹചര്യങ്ങളും കണക്കിലെടുത്ത് കുട്ടികളെ നീന്താന്‍ കുട്ടനാട്ടിലെ നദികളിലേക്കു വിടാന്‍ ഇന്നു മാതാപിതാക്കള്‍ മടിക്കുകയാണ്. സാഹചര്യങ്ങള്‍ക്കനുസരിച്ച് പുതിയ തലമുറയ്ക്കു സൗകര്യം ഒരുക്കി നല്കാന്‍ ഇപ്പോള്‍ യാതൊരു ശ്രമവും നടക്കുന്നില്ല. കുട്ടനാട്ടില്‍ നിരവധി വിദ്യാലയങ്ങളുണ്ടെങ്കിലും ഒരു കുട്ടിക്കു പോലും ജില്ലാ സംസ്ഥാനതലത്തില്‍ മത്സരത്തില്‍ പങ്കെടുക്കാന്‍ പരിശീലനം നേടാന്‍ ഒരു നീന്തല്‍ക്കുളം പോലും ഇന്നു ലഭ്യമല്ല. എന്നാല്‍കൂടി ഇവിടെയുള്ള കുട്ടികള്‍ മികച്ച പ്രകടനം നടത്തി നേട്ടങ്ങള്‍ കൊയ്യുന്നു. കുട്ടനാട്ടലെ പല പഞ്ചായത്തുകളിലും വലിയ ചെലവു കൂടാതെ മികച്ച നീന്തല്‍ക്കുളങ്ങള്‍ രൂപപ്പെടുത്താന്‍ സൗകര്യങ്ങളുണ്ടെങ്കിലും അതിനുള്ള നടപടി ബന്ധപ്പെട്ടവരുടെ ഭാഗത്തുനിന്ന് ഉണ്ടാകുന്നില്ല എന്നതാണ് നാട്ടുകാരുടെ പരാതി. പ്രകൃതിതന്നെ ഒരുക്കിനൽകിയിരിക്കുന്ന സൗകര്യങ്ങളെ ഒന്നു ക്രമീകരിക്കാന്‍ പോലുമാകാത്ത സ്ഥിതിയാണ് ഇന്നു കുട്ടനാടിന്‍റേത്. കുട്ടനാട്ടില്‍നിന്നും നിരവധി ദേശീയ, അന്തര്‍ദേശീയ താരങ്ങള്‍ ഉണ്ടാകാനുള്ള സാധ്യതകള്‍ ഉണ്ടെങ്കിലും അതിനുള്ള അടിസ്ഥാന സൗകര്യങ്ങള്‍ ഒരുക്കിനല്കാന്‍ തദ്ദേശ സ്വയംഭരണ സ്ഥാപനങ്ങളോ മറ്റ് ഉത്തരവാദിത്വപ്പെട്ടവരോ വേണ്ട ഇടപെടല്‍ നടത്താത്തതുമൂലം ഒരു തലമുറയുടെ സാധ്യതകളെയാണ് നാം ഇല്ലാതാക്കുന്നത്. സിബി ജോസ് കാര്‍മല്‍ (ഇന്‍റര്‍ നാഷണല്‍ നിന്തല്‍ താരം) നെടുമുടി പഞ്ചായത്ത് ഓഫീസിനു സമീപത്ത് കുട്ടികള്‍ നീന്തല്‍ പരീശീലനം നേടിയിരുന്ന മഠത്തില്‍തോട് മലിനമായതിനാലും വെള്ളം കുറവായതിനാലും ഉപയോഗിക്കാനാവാത്ത അവസ്ഥയിലാണ്. നിരവധി കുട്ടികളാണ് ഇവിടെ സ്വന്തം നിലയില്‍ പരിശീലനം നടത്തിവന്നിരുന്നത്.

കാർഷികമേഖലയിൽ വിസ്മയമായി വി. വിജയൻ

മുഹമ്മ: റിട്ട. ബാങ്ക് ഉദ്യോഗസ്ഥൻ വടക്കനാര്യാട് വസുമതിയിൽ വി. വിജയന് കൃഷി ജീവവായു പോലെയാണ്. മണ്ണിനെ പ്രണയിച്ചും പരിപാലിച്ചും വിജയൻ കൊയ്യുന്ന നേട്ടങ്ങൾ കണ്ണും മനവും കവരുന്നതാണ്. ഒരേക്കർ വരുന്ന വിജയന്‍റെ പുരയിടമാകെ പാവൽ, പടവലം, പപ്പായ, പയർ, മഞ്ഞൾ, ഇഞ്ചി, ചേമ്പ് തുടങ്ങിയ പച്ചക്കറിയിനങ്ങളുടെ നിറവാണ്. വിവിധയിനം വാഴകളാലും സമൃദ്ധമാണ്. പുലർച്ചെ മുതൽ വിജയൻ കൃഷിയിടത്തിലുണ്ടാകും. പശുക്കളെ കറന്ന് തീറ്റ നൽകിയാൽ പിന്നെ കാർഷിക വിളകളോടുള്ള സല്ലാപം തുടങ്ങുകയായി. കായ്ഫലം കൊണ്ട് കുനിയുന്ന റെഡ് ലേഡി പപ്പായയും സ്വർണമുഖി ഏത്തവാഴകളും വിജയന്‍റെ മനസിൽ നിറയ്ക്കുന്നത് അതിരറ്റ സന്തോഷമാണ്. മനം നിറയെ ജൈവ കൃഷിയോടുള്ള പ്രണയമായതിനാൽ പശുവിൻ ചാണകവും പച്ചിലവളവുമാണ് പ്രധാനമായി ഉപയോഗിക്കുന്നത്. നല്ല വരുമാനമുണ്ടാക്കാൻ കൃഷിയിലൂടെ കഴിയുമെന്നാണ് വിജയന്‍റെ സാക്ഷ്യം. റെഡ് ലേഡി പപ്പായ കിലോയ്ക്ക് 50 രൂപ നിരക്കിലാണ് വിറ്റത്. കൃഷിഭവൻ നൽകിയ 100 തൈകൾ നട്ടതിനു പുറമേ വീട്ടിൽ മുളപ്പിച്ച പപ്പായ ചുവടുകളും കൃഷിക്ക് ഉപയോഗിച്ചു. എല്ലാ തൈകളും നല്ല കായ്ഫലം നൽകി. ആകർഷകമായ വരുമാനമാണ് പപ്പായ കൃഷിയിലൂടെ നേടിയത്. കാച്ചിൽ കൃഷിയും നേട്ടമായി. ഒരു കിലോ കാച്ചിൽ 100 രൂപ നിരക്കിലാണ് വിറ്റത്. ഒരു ചുവടിൽനിന്ന് 25 കിലോ കാച്ചിൽ വരെ കിട്ടി. കാച്ചിലും പപ്പായയും മാത്രം കൃഷി ചെയ്താലും നല്ല വരുമാനം ഉണ്ടാക്കാൻ കഴിയുമെന്നാണ് വിജയന്‍റെ അനുഭവ സാക്ഷ്യം. ഓണവിപണി മുന്നിൽ കണ്ടുള്ള കൃഷിയാണ് ഇത്തവണ നടത്തിയത്. സ്വർണമുഖി ഏത്തവാഴകളാണ് കൂടുതലായി നട്ടത്. എട്ടുപടല വരെയുള്ള കുലകൾ കിട്ടി. 30 കിലോ വരെ തൂക്കമുള്ള കുലകൾ ചൂടപ്പം പോലെയാണ് മാർക്കറ്റിൽ വിറ്റുപോയത്. കരിക്ക് കൃഷിയിലും വിജയൻ മികവ് തെളിയിക്കുന്നു. സമൂഹത്തിനായി ഒരു കരുതൽ മനസിൽ വച്ചാണ് വിജയൻ കരിക്ക് കൃഷിയിൽ ശ്രദ്ധിക്കുന്നത്. കച്ചവടക്കാർക്ക് വിലയ്ക്കാണ് കരിക്ക് നൽകുന്നതെങ്കിൽ രോഗികളായവർക്ക് കരിക്ക് സൗജന്യമാണ്. വിജയന് കൃഷിയോടുള്ള കമ്പം ചെറുപ്പം മുതലേ ഉള്ളതാണ്. കേരള ബാങ്കിൽ സീനിയർ മാനേജരായി ജോലി നോക്കുമ്പോഴും വിജയൻ കൃഷിയെ നെഞ്ചോടുചേർത്തു. ജോലിയുടെ ഇടവേളകൾ മുഴുവനും കൃഷിക്കായി നീക്കിവച്ചിരുന്നു. സർവിസിൽനിന്ന് വിരമിച്ചശേഷം മുഴുവൻ സമയ കർഷകനായി. കൃഷി നൽകുന്ന നല്ല പാഠങ്ങൾ യുവതലമുറയ്ക്ക് പകർന്ന് നൽകാനും വിജയൻ മനസ് വയ്ക്കുന്നു. മണ്ണഞ്ചേരി കൃഷിഭവന്‍റെ മികച്ച കർഷകനുള്ള അവർഡ് ഇക്കൊല്ലം ലഭിച്ചത് വിജയനാണ്. പി.സി. വർഗീസ് ഫൗണ്ടേഷന്‍റെ മികച്ച കർഷകനുള്ള അവാർഡും വിജയനെ തേടിയെത്തി. പി.സി. വർഗീസ് മെമ്മോറിയൽ എവറോളിംഗ് ട്രോഫിയും കാഷ് അവാർഡും കാർഷിക മികവിനുള്ള അംഗീകാരമായി വിജയനാണ് ലഭിച്ചത്.

എസി റോഡ് നിർമാണത്തിൽ വൻ അഴിമതിയെന്ന് കെ.സി. വേണുഗോപാല്‍

അമ്പലപ്പുഴ: ആലപ്പുഴ- ചങ്ങനാശേരി റോഡ് നിര്‍മാണത്തില്‍ വലിയ അഴിമതിയാണ് നടന്നതെന്നും ലോകബാങ്കിന്‍റെ പണം ദുരുപയോഗിച്ചു നടത്തിയ ധൂര്‍ത്തുമാത്രമാണ് റോഡിന്‍റെ നിര്‍മാണമെന്നും കെ.സി. വേണുഗോപാല്‍ എംപി. 621 കോടി രൂപയ്ക്ക് ആരംഭിച്ച പദ്ധതി കുട്ടനാട്ടിലെ വെള്ളപ്പൊക്കത്തെ അതിജീവിക്കാന്‍ ഉദ്ദേശിച്ചിട്ടുള്ളതായിരുന്നു. എന്നാല്‍, മഴവന്നപ്പോള്‍ റോഡില്‍ എപ്പോഴും വെള്ളമാണ്. ഒരു കിലോമീറ്റര്‍ ഉണ്ടാക്കാന്‍ 37 കോടി രൂപ ചെലവഴിച്ചു. റീബില്‍ഡ് കേരള നടപ്പിലാക്കുന്ന പദ്ധതിയില്‍ നടന്നത് പണം കൊള്ള മാത്രമാണ്. പദ്ധതി ആരംഭിച്ച് അഞ്ചു വര്‍ഷമായിട്ടും ഫലം കണ്ടില്ല. ഊരാളുങ്കല്‍ സൊസൈറ്റി നിര്‍മാണം നടത്തുന്ന പദ്ധതിയില്‍ ഫണ്ട് വിനിയോഗത്തിന്‍റെ കാര്യത്തില്‍ അടിമുടി ദുരൂഹതയാണ്.പിണറായി സര്‍ക്കാരിന്‍റെ കാലത്ത് ഊരാളുങ്കല്‍ ലേബര്‍ കോണ്‍ട്രാക്ട് സൊസൈറ്റിയുടെ പേരില്‍ നല്‍കിയിട്ടുള്ള എല്ലാ നിര്‍മാണ കരാറുകളും അന്വേഷിക്കാന്‍ സര്‍ക്കാര്‍ തയാറാകണമെന്നും കെ.സി. വേണുഗോപാല്‍ ആവശ്യപ്പെട്ടു. ദേശീയപാതയായി പ്രഖ്യാപിച്ച എ സി റോഡ് അതിന്‍റെ നവീകരണത്തിനുള്ള വിശദമായ പ്രോജക്ട് റിപ്പോര്‍ട്ട് തയാറാക്കുന്നതിനിടയിലാണ് സംസ്ഥാന സര്‍ക്കാര്‍ റോഡില്‍ നിര്‍മാണം ആരംഭിച്ചത്. 24 കിലോമീറ്റര്‍ റോഡ് നവീകരിക്കുന്നതിനായി കണക്കാക്കിയ അടങ്കല്‍ തുക 209 കോടി രൂപ കൂട്ടി 880.72 കോടി രൂപയായി ഉയര്‍ത്തിയത് മാത്രമാണ് ആകെ നടന്നത്. ആദ്യം നീക്കിവച്ചതിനേക്കാള്‍ 209 കോടിയിലേറെ രൂപ അധികമായി നല്‍കിയിട്ടും റോഡ് നിര്‍മാണം ഇതുവരെ പൂര്‍ത്തിയാക്കാന്‍ കഴിഞ്ഞിട്ടില്ലെന്നും വേണുഗോപാല്‍ കുറ്റപ്പെടുത്തി. മോദിക്ക് ആദാനിയെ പോലെയാണ് പിണറായിക്ക് ഊരാളുങ്കല്‍. ശബരിമലയില്‍ എട്ടുകോടി ചെലവഴിച്ചപ്പോള്‍ ആ തുക നിക്ഷേപിച്ചത് ഊരാളുങ്കലിന്‍റെ അക്കൗണ്ടിലാണ്. സര്‍ക്കാരിന് ലഭിക്കാവുന്ന കമ്മീഷന്‍ മുഴുവന്‍ അടിച്ചു മാറ്റാന്‍ വേണ്ടിയിട്ടാണ് പല റോഡുകളും ഒരേ സമയം പണി തുടങ്ങിയിരിക്കുന്നത്. കേരളത്തിലെ ജനങ്ങളില്‍നിന്ന് കോടാനുകോടി രൂപയുടെ വെട്ടിപ്പാണ് നടന്നിരിക്കുന്നത്. ഇത് അഴിമതിയില്‍ മുങ്ങിക്കുളിച്ച സര്‍ക്കാരാണ്. അമ്പലം, റോഡ്, പാലം എന്നിവയെല്ലാം വിഴുങ്ങുന്നുവെന്നും വേണുഗോപാല്‍ പരിഹസിച്ചു.റോഡ് നിര്‍മാണം പിആര്‍ വര്‍ക്കായി കൊണ്ടു നടന്ന പിണറായി സര്‍ക്കാര്‍ മലപ്പുറത്തെ റോഡിന്‍റെ തകര്‍ച്ചയോടെ അത് ഉപേക്ഷിച്ചു. റോഡുകള്‍ക്ക് പുറമെ നിര്‍മിക്കുന്ന പാലം തകര്‍ന്നു വീഴുന്നു. ഇവ തകരുന്നിനു മുന്‍പു വരെ അതില്‍ മേനിപറഞ്ഞവര്‍ അതിനുശേഷം ഉത്തരവാദിത്വത്തില്‍ പങ്കില്ലെന്ന് പറയുന്ന കാഴ്ചയാണ് കേരളം കണ്ടതെന്നും കെ.സി. വേണുഗോപാല്‍ പരിഹസിച്ചു.

കുട്ടനാട്ടിലെ ജനങ്ങളെ സര്‍ക്കാര്‍ വഞ്ചിച്ചു: അപു ജോൺ ജോസഫ്

കുട്ടനാട്: ആരോഗ്യമേഖലയെ മുച്ചൂടും തകര്‍ക്കുന്ന സംസ്ഥാന സര്‍ക്കാരും കഴിവുകെട്ട മന്ത്രിയും ഭരിക്കുന്നടിത്തോളം കാലം പാവപ്പെട്ട ജനങ്ങള്‍ക്ക് രക്ഷയില്ലെന്നും കുട്ടനാട്ടിലെ ജനങ്ങള്‍ക്ക് മെച്ചപ്പെട്ട ചികിത്സാ സൗകര്യം ലഭ്യമാക്കാതെ സംസ്ഥാന സര്‍ക്കാര്‍ വഞ്ചിച്ചുവെന്ന് കേരള കോണ്‍ഗ്രസ് സംസ്ഥാന കോ-ഓര്‍ഡിനേറ്റര്‍ അപു ജോണ്‍ ജോസഫ്. കുട്ടനാട് താലൂക്ക് ആശുപത്രിയുടെ ശോച്യാവസ്ഥ പരിഹരിക്കണമെന്ന് ആവശ്യപ്പെട്ട് കേരള കോണ്‍ഗ്രസ് കുട്ടനാട് നിയോജക മണ്ഡലം കമ്മിറ്റിയുടെ നേതൃത്വത്തില്‍ നടത്തിയ പ്രതിഷേധ ധര്‍ണ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. പാര്‍ട്ടി സംസ്ഥാന വൈസ് ചെയര്‍മാന്‍ റെജി ചെറിയാന്‍ മാര്‍ച്ച് ഫ്‌ളാഗ് ഓഫ് ചെയ്തു. നിയോജക മണ്ഡലം പ്രസിഡന്‍റ് കെ.ആര്‍. ശ്രീകുമാര്‍ അധ്യക്ഷനായി. ജില്ലാ പ്രസിഡന്‍റ് ജേക്കബ് ഏബ്രഹാം മുഖ്യപ്രഭാഷണം നടത്തി. പാര്‍ട്ടി ഉന്നതാധികാരസമിതി അംഗങ്ങളായ ജോസ് കോയിപ്പള്ളി, സണ്ണി തോമസ് കളത്തില്‍, റോയി ഊരാംവേലി, സാബു തോട്ടുങ്കല്‍, ജോബിള്‍ പെരുമാള്‍, ബിജു ചെറുകാട്, പ്രകാശ് പനവേലി, സി.ടി. തോമസ്, ജോസ് കാവനാട്, തോമസ്‌കുട്ടി മാത്യു, ജയ്സ് വെട്ടിയാര്‍, ലാല്‍ വയലാര്‍, വേണുഗോപാല്‍ എന്നിവര്‍ പ്രസംഗിച്ചു.

നിയമനം അംഗീകരിക്കില്ലെന്ന് എ.എ. ഷുക്കൂർ

മങ്കൊമ്പ്: നീലംപേരൂർ പഞ്ചായത്തിൽ നിയമവിരുദ്ധമായി തസ്തിക സൃഷ്ടിച്ച് ഇഷ്ടക്കാരെ നിയമിക്കാനുള്ള നീക്കം അനുവദിക്കില്ലെന്ന് കെപിസിസി ജനറൽ സെക്രട്ടറി എ.എ. ഷുക്കൂർ. നീലംപേരൂർ ബഡ്‌സ് റീഹാബിലിറ്റേഷൻ സെന്‍ററിൽ ഇല്ലാത്ത അസിസ്റ്റന്‍റ് അധ്യാപക തസ്തിക സൃഷ്ടിക്കാനുള്ള പഞ്ചായത്ത് ഭരണസമിതിയുടെ നീക്കത്തിനെതിരേ നീലംപേരൂർ മണ്ഡലം യുഡിഎഫ് കമ്മിറ്റിയുടെ നേതൃത്വത്തിൽ നടത്തിയ പ്രതിഷേധ ധർണ ഉദ്ഘാടനം ചെയ്യുകയായിരുന്നു അദ്ദേഹം. താത്കാലിക ജീവനക്കാർക്ക് സ്ഥാനക്കയറ്റം അനുവദനീയമല്ലെന്നും പുരുഷജീവനക്കാരെ ബഡ്‌സ് റീഹാബിലിറ്റേഷൻ സെന്‍ററുകളിൽ നിയമിക്കാനാവില്ലെന്നും നിലപാടെടുത്ത മുൻ പഞ്ചായത്ത് സെക്രട്ടറിയെ അടുത്തയിടെ സ്ഥലം മാറ്റിയിരുന്നു. പുതിയ സെക്രട്ടറിയും പക്ഷെ നിയമനത്തെ എതിർക്കുകയാണുണ്ടായത്. മണ്ഡലം യുഡിഎഫ് ചെയർമാൻ എം. വിശ്വനാഥപിള്ള അധ്യക്ഷത വഹിച്ചു. കെ. ഗോപകുമാർ, സി.വി. രാജീവ്, ബോബൻ തയ്യിൽ, വിജയകുമാർ പൂമംഗലം, എ.പി. ആനന്ദരാജൻ, ജോബ് ചെറിയാൻ, സിബിച്ചൻ തറയിൽ തുടങ്ങിയവർ പ്രസംഗിച്ചു.

മിന്നലേറ്റ് മരംവെട്ട് തൊഴിലാളി മരിച്ചു

ഹരിപ്പാട്: മിന്നലേറ്റ് മരംവെട്ട് തൊഴിലാളി മരിച്ചു. തുലാംപറമ്പ് സൗത്ത് ഡാണാപ്പടി വലിയപറമ്പില്‍ പടീറ്റതില്‍ ബിനു തമ്പാന്‍ (47) ആണ് മരിച്ചത്. ഗുരുതരമായി പരിക്കേറ്റ വെട്ടുവേനി പടിക്കിലേത്ത് വടക്കേതില്‍ മഹേഷ്‌കുമാറിനെ (40) പരുമല സ്വകാര്യ ആശുപത്രിയില്‍ പ്രവേശിപ്പിച്ചു. ഇന്നലെ രാവിലെ പതിനൊന്നോടെയായിരുന്നു സംഭവം. വീയപുരം പത്താം വാര്‍ഡില്‍ (കാരിച്ചാല്‍) സച്ചിന്‍ വില്ലയിലെ മാര്‍ട്ടിന്‍റെ അക്വേഷ്യ, ആഞ്ഞിലി മരങ്ങളിലെ ശിഖരങ്ങൾ ബിനു തമ്പാനും മഹേഷും കൂടി ഇറക്കിക്കൊണ്ടിരിക്കെ രണ്ടു പേര്‍ക്കും മിന്നലേക്കുകയും രണ്ടു പേരും നിലത്തുവീഴുകയുമായിരുന്നു. താഴെനിന്ന് ജോലിചെയ്തിരുന്ന മൂന്നുതൊഴിലാളികള്‍ ഇവരെ ഉടന്‍തന്നെ ഹരിപ്പാട് താലൂക്ക് ആശുപത്രിയില്‍ എത്തിച്ചെങ്കിലും ബിനു തമ്പാന്‍റെ ജീവന്‍ രക്ഷിക്കാനായില്ല. മരത്തിന്‍റെ മുകളില്‍നിന്നു മതിലില്‍ വീണ് തലയ്ക്കു ഗുരുതരമായി പരിക്കേറ്റ മഹേഷിനെ പരുമലയിലെ സ്വകാര്യ ആശുപത്രയില്‍ പ്രവേശിപ്പിച്ചിരിക്കുകയാണ്. ബിനു തമ്പാന്‍റെ മൃതദേഹം വണ്ടാനം മെഡിക്കല്‍ കോളജില്‍ പോസ്റ്റ്‌മോര്‍ട്ടം നടത്തി. സംസ്‌കാരം ഇന്ന് മൂന്നിന്. ഭാര്യ: റീന. മക്കള്‍: സ്‌നേഹ ബിനു, അലന്‍ ബിനു.

കാറിടിച്ച് പരിക്കേറ്റ് ചികിത്സയിൽ കഴിഞ്ഞ വിദ്യാര്‍ഥി മരിച്ചു

അമ്പലപ്പുഴ: കാറിടിച്ചു പരിക്കേറ്റ് ചികിത്സയില്‍ കഴിഞ്ഞ വിദ്യാര്‍ഥി മരിച്ചു. നീര്‍ക്കുന്നം വെള്ളം തെങ്ങില്‍ അബ്ദുള്‍ സലാമിന്‍റെ മകന്‍ സഹിലാണ് (8) മരിച്ചത്. വെള്ളിയാഴ്ച ഉച്ചയ്ക്ക് ദേശീയ പാതയില്‍ പുന്നപ്ര മാര്‍ക്കറ്റ് ജംഗ്ഷനിലായിരുന്നു അപകടം. ബന്ധുവായ ഐഷയ്ക്കൊപ്പം സൈക്കിളില്‍ പോകുമ്പോള്‍ നിയന്ത്രണം തെറ്റിയ കാറിടിച്ചാണ് അപകടം സംഭവിച്ചത്. തുടര്‍ന്ന് ഇരുവരെയും ആലപ്പുഴ മെഡിക്കല്‍ കോളജ് ആശുപത്രിയില്‍ പ്രവേശിപ്പിച്ചു. ശനിയാഴ്ച പുലര്‍ച്ചെയാണ് സഹില്‍ മരിച്ചത്. പുന്നപ്ര ഗവ. ജെബി സ്‌കൂളിലെ നാലാം ക്ലാസ് വിദ്യാര്‍ഥിയാണ്.

ഭിന്നശേഷി അധ്യാപക നിയമനവുമായി ബന്ധപ്പെട്ട അനിശ്ചിതത്വം ഒഴിവാക്കണം

എടത്വ: ഭിന്നശേഷി അധ്യാപക നിയമനവുമായി ബന്ധപ്പെട്ട് ക്രിസ്ത്യന്‍ മാനേജ്‌മെന്‍റുകളെ വെല്ലുവിളിക്കുകയും ആക്ഷേപിക്കുകയും ചെയ്യുന്ന സര്‍ക്കാര്‍ രീതി അവസാനിപ്പിക്കണമെന്ന് കേരള കോണ്‍ഗ്രസ് സംസ്ഥാന ജനറല്‍ സെക്രട്ടറി തോമസുകുട്ടി മാത്യു ചീരംവേലില്‍. കേരള കോണ്‍ഗ്രസ് എടത്വ മണ്ഡലം എക്‌സിക്യൂട്ടീവ് കമ്മിറ്റി ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. മണ്ഡലം പ്രസിഡന്‍റ് ബാബു സേവ്യര്‍ അധ്യക്ഷത വഹിച്ചു. ഉന്നതാ ധികാരസമിതി അംഗം റോയി ഊരാംവേലില്‍, സംസ്ഥാന ജനറല്‍ സെക്രട്ടറി റ്റെഡി സക്കറിയ, പഞ്ചായത്ത് പ്രസിഡന്‍റ് രേഷ്മാ ജോണ്‍സണ്‍, പഞ്ചായത്തംഗം പി.സി. ജോസഫ്, വറീച്ചന്‍ കേളഞ്ചേരി, തങ്കച്ചന്‍ കവലയ്ക്കല്‍, അശോകന്‍ വൈപ്പിശേരി, കുഞ്ഞുമോന്‍ വാതപ്പള്ളി, ജറിന്‍ ജോസഫ് എന്നിവര്‍ പ്രസംഗിച്ചു.

വൈശ്യംഭാഗം പാലത്തിൽ ലൈറ്റുകൾ സ്ഥാപിച്ചു

അമ്പലപ്പുഴ: കഞ്ഞിപ്പാടം വൈശ്യംഭാഗം പാലത്തില്‍ ലൈറ്റുകള്‍ സ്ഥാപിച്ചു. അമ്പലപ്പുഴ വടക്ക്, നെടുമുടി പഞ്ചായത്തുകളെ തമ്മില്‍ ബന്ധിപ്പിക്കുന്ന പാലത്തില്‍ അമ്പലപ്പുഴ വടക്ക് പഞ്ചായത്താണ് 2025-26 പദ്ധതിയില്‍ 4.2 ലക്ഷം രൂപ ചെലവില്‍ ലൈറ്റുകള്‍ സ്ഥാപിച്ചത്. മനുഷ്യാവകാശ പ്രവര്‍ത്തകര്‍ താഴ്ചയില്‍ നസീറും മറ്റു സംഘടനകളും പഞ്ചായത്തിന് നിവേദനം നല്‍കിയതിന്‍റെ അടിസ്ഥാനത്തിലാണ് ഇപ്പോള്‍ പഞ്ചായത്ത് ലൈറ്റുകള്‍ സ്ഥാപിച്ചത്. ഇരുവശങ്ങളിലായി 28 ലൈറ്റുകളാണ് സ്ഥാപിച്ചിട്ടുള്ളത്. എച്ച്. സലാം എംഎല്‍എ ഇതിന്‍റെ സ്വിച്ച് ഓണ്‍ കര്‍മം നിര്‍വഹിച്ചു. അമ്പലപ്പുഴ വടക്ക് പഞ്ചായത്ത് പ്രസിഡന്‍റ് എസ്. ഹാരിസ് അധ്യക്ഷനായി. നെടുമുടി പഞ്ചായത്ത് പ്രസിഡന്‍റ് മിനി മന്മധന്‍ നായര്‍, അമ്പലപ്പുഴ വടക്ക് പഞ്ചായത്ത് വൈസ് പ്രസിഡന്‍റ് പി.എം. ദീപ, പഞ്ചായത്ത് സ്ഥിരം സമിതി അധ്യക്ഷരായ പ്രജിത്ത് കാരിക്കല്‍, ലേഖാമോള്‍ സനില്‍, അഗം റസിയാബീവി എന്നിവര്‍ പങ്കെടുത്തു.

മെഡിക്കല്‍ കോളജിന് പുതിയ ബസ് വാങ്ങാന്‍ ഫണ്ട് അനുവദിച്ചു

ആലപ്പുഴ: മെഡിക്കല്‍ കോളജിലെ വിദ്യാര്‍ഥികള്‍ക്കായി ബസ് വാങ്ങാന്‍ 30 ലക്ഷം രൂപയുടെ ഭരണാനുമതി. രാജ്യസഭാംഗം സന്തോഷ് കുമാര്‍ എംപിയുടെ എംപി ഫണ്ടില്‍നിന്നാണ് രൂപ വകയിരുത്തിയത്. പിടിഎ നല്‍കിയ നിവേദനത്തെത്തുടര്‍ന്നാണ് ബസ് വാങ്ങാന്‍ ഭരണാനുമതി ലഭിച്ചത്. 2025-2026 വര്‍ഷത്തെ എംപി ഫണ്ടില്‍ ഉള്‍പ്പെടുത്തിയാണ് തുക അനുവദിച്ചിരിക്കുന്നത്. 2026 മാര്‍ച്ച് 30ന് മുന്‍പായി നടപടിക്രമങ്ങള്‍ പാലിച്ച് ബസ് വാങ്ങാന്‍ മെഡിക്കല്‍ കോളജ് പ്രിന്‍സിപ്പലിനു ജില്ലാ കളക്ടര്‍ നിര്‍ദേശം നല്‍കി. പുതിയ ബസ് വാങ്ങാന്‍ ഫണ്ട് അനുവദിച്ച രാജ്യസഭാംഗം സന്തോഷ് കുമാറിനെ മെഡിക്കല്‍ കോളജ് പിടിഎ യോഗം അഭിനന്ദിച്ചു.

യുവതിയുടെ ചികിത്സാധന സമാഹരണത്തിന് കരുതൽ ഉച്ചയൂണ് കൂട്ടായ്മയുടെ പായസ ചലഞ്ച്

ഹരിപ്പാട്: കാൻസർ ബാധിതയായ യുവതിയുടെ ജീവൻ നിലനിർത്താൻ പണം കണ്ടെത്താനായി മധുരമൂറുന്ന പായസവുമായി ഒരു കൂട്ടം കാരുണ്യപ്രവർത്തകർ ഒത്തുകൂടി. മണിക്കൂറുകൾകൊണ്ട് സമാഹരിച്ചത് 1,31, 200 രൂപ. പത്തിയൂർ പഞ്ചായത്ത് ഒന്നാം വാർഡ് പാലപ്പള്ളി തെക്കതിൽ രാജന്‍റെ മകൾ രാജലക്ഷ്മി (21) യുടെ ചികിത്സയ്ക്കു പണം കണ്ടെത്തുന്നതിനായാണ് ഹരിപ്പാട് കരുതൽ ഉച്ചയൂണ് കൂട്ടായ്മ പ്രവർത്തകർ ഗാന്ധി ജയന്തി ദിനത്തിൽ ഈ ദൗത്യം ഏറ്റെടുത്തത്. മുതുകുളം ഉമ്മർമുക്കിൽ രാവിലെ 10 മുതൽ രാത്രി എട്ടു വരെയായിരുന്നു ഇതിനായി പഴയകാല ഓർമ പുതുക്കി അരിയും പയറും ചേർത്ത പായസം നൽകിയത്. ഒട്ടേറെ സുമനസുകളാണ് രാജലക്ഷ്മിയുടെ ചികിത്സയ്ക്കായി ഒന്നിച്ചത്. ഇതിന്‍റെ വിളംബരമായി സെപ്റ്റംബർ 29ന് രാമപുരം ക്ഷേത്രത്തിൽ നവാഹം അവസാനിച്ച ദിവസം ചന്ദനത്തിരി നൽകി ഭിക്ഷയെടുത്തിരുന്നു. രണ്ടു മണിക്കൂർകൊണ്ട് അര ലക്ഷം രൂപ ഇതിലൂടെ സമാഹരിച്ചിരുന്നു. കരുതൽ ഉച്ചയൂണ് കൂട്ടായ്മാ ചെയർമാൻ ഷാജി കെ. ഡേവിഡിന്‍റെ നേതൃത്വത്തിൽ പഞ്ചായത്തംഗങ്ങളായ രാജീവ്, ശാലിനി അനിവാസൻ ബൈജു, സബിത, കരുതൽ ഉച്ചയൂണ് കൂട്ടായ്മാ പ്രവർത്തകരായ ഉണ്ണികൃഷ്ണൻ, ജോസ്, ബാബു, സിന്ധു, ശ്രീദേവി, ജോമോൻ, റിയാസ്, സുഭാഷ്, അഷ്റഫ് കാട്ടിൽ, ഉണ്ണി, ലത ടീച്ചർ എന്നിവർ ഇതിൽ പങ്കെടുത്തു.

കെഎസ്ആർടിസി ബസ് ഡിവൈഡറിൽ ഇടിച്ചുകയറി; 12 പേർക്കു പരിക്ക്

തുറവൂർ: കെഎസ്ആർടിസി ബസ് ഡിവൈഡറിൽ ഇടിച്ചുകയറി 12 പേർക്കു പരിക്ക്. ഇന്നലെ ഉച്ചയ്ക്ക് പന്ത്രണ്ടോടെ ദേശീയപാതയിൽ പട്ടണക്കാട് പോലീസ് സ്റ്റേഷനു മുന്നിലായിരുന്നു അപകടം. അങ്കമാലിയിൽനിന്ന് ചേർത്തലയിലേക്കുള്ള യാത്രയ്ക്കിടെ പൊന്നാംവെളിയിൽ എതിർദിശയിൽ വന്ന വാഹനത്തിലിടിക്കാതിരിക്കാൻ ഇടത്തോട്ടു തിരിച്ചപ്പോൾ ബസ് നിയന്ത്രണം തെറ്റി സർവീസ് റോഡും ദേശീയപാതയും തമ്മിൽ വേർതിരിക്കുന്ന ഡിവൈഡറിൽ ഇടിച്ചുകയറുകയായിരുന്നു. അപകടത്തിൽ തിരുമലഭാഗം കൃഷ്ണവിലാസത്തിൽ മനീഷ (49), കഞ്ഞിക്കുഴി കൈതക്കാട്ട് ജ്യോതി (52), തൈക്കാട്ടുശേരി കുട്ടച്ചിറ വെളിയിൽ വിനോദ് (51), വെട്ടയ്ക്കൽ മറ്റത്തിൽ വീട്ടിൽ രത്നമ്മ (69), നെട്ടുർ കൃഷ്ണകൃപയിൽ അശ്വതി (49), എഴുപുന്ന കിഴക്കേത്തറ സ്വപ്ന (45), കുത്തിയതോട് വടക്കേത്തറ വീട്ടിൽ അംബിക (63), പട്ടണക്കാട് ചീനവെളി വീട്ടിൽ കവിത (48), പട്ടണക്കാട് അഭിഷേക് നിവാസിൽ രശ്മി (42), കലവൂർ അഞ്ചുതൈയിൽ അമ്മിണി (60), ബസ് ഡ്രൈവർ കോഴിക്കോട് മേക്കര വീട്ടിൽ മോഹൻദാസ് (55), കണ്ടക്ടർ മൂവാറ്റുടുപുഴ, പാണാലുകുടിയിൽ അണുൺ(35)എന്നിവരെയാണ് പരിക്കുകളോടെ തുറവൂർ ഗവ. ആശുപത്രിയിലെത്തിച്ച് പ്രാഥമിക ശുശ്രൂഷ നൽകിയത്. ഇതിൽ മനീഷയ്ക്കും അശ്വതിക്കും പരിക്ക് ഗുരുതരമായതിനാൽ എറണാകുളത്തെ സ്വകാര്യ ആശുപത്രിയിലേക്കു മാറ്റി. ജനങ്ങളും പട്ടണക്കാട് പോലീസും ചേർന്നാണ് പരിക്കേറ്റവരെ ആശുപത്രിയിലെത്തിച്ചത്. പട്ടണക്കാട് പോലീസ് കേസെടുത്തു.

കെവിഎം നേതൃത്വത്തില്‍ പ്യാസര അപ്പാരൽ

ചേര്‍ത്തല: കെവിഎം ഹെൽത്ത് ആൻഡ് എഡ്യൂക്കേഷൻ പ്രൈവറ്റ് ലിമിറ്റഡിന്‍റെ നേതൃത്വത്തിൽ പ്യാസര അപ്പാരൽ പ്രവർത്തനം ആരംഭിച്ചു. യൂണിഫോം ഉൾപ്പെടെയുള്ള വിവിധ വസ്ത്രങ്ങൾ തയാറാക്കുന്ന സ്ഥാപനമാണ് പ്യാസര അപ്പാരൽ. അത്യാധുനിക സജീകരങ്ങളോടെ എക്സ്പോർട്ട് ക്വാളിറ്റിയിൽ വസ്ത്രങ്ങളും യൂണിഫോമുകളും മിതമായ നിരക്കിൽ നിർമിച്ചുനൽകുന്നു. ആശുപത്രി, വ്യവസായ, വിദ്യാഭ്യാസ സ്ഥാപനങ്ങൾ തുടങ്ങിയവയ്ക്കാവശ്യമായ യൂണിഫോമുകളാണ് ഇവിടെ തയാറാക്കുന്നത്. മാനേജിംഗ് ഡയറക്ടർ സരസ്വതി പ്യാരിലാൽ ഉദ്ഘാടനം നിർവഹിച്ചു. മാനേജിംഗ് ഡയറക്ടർ ഡോ. വി.വി. പ്യാരിലാൽ, ഡയറക്ടർമാരായ അഡ്വ. ജി. രാജേഷ്, അനുപമ പ്യാരിലാൽ, ജനറൽ മാനേജർ ബിജി സുരേഷ്, ഫാക്ടറി മാനേജർ എസ്. ശശികുമാർ, ചീഫ് ഓപ്പറേറ്റിംഗ് ഓഫീസർ ഡോ. ഫ്രാൻസിസ് പീറ്റർ, ചീഫ് പിആർഒ ഡോ. കൃഷ്ണൻ നമ്പൂതിരി, ചാർട്ടേർഡ് അക്കൗണ്ടന്‍റ് സുമയ്യ എന്നിവർ പങ്കെടുത്തു.

കൈതത്തോട് ജലമേള: നെപ്പോളിയന്‍ ജേതാവ്

എടത്വ: മുട്ടാര്‍ ചലഞ്ച് ക്ലബിന്‍റെ ആഭിമുഖ്യത്തില്‍ നടന്ന എട്ടാമത് ജലോത്സവത്തില്‍ വെപ്പ് എ വിഭാഗത്തില്‍ തലവടി ടീം നെപ്പോളിയന്‍ ബോട്ട് ക്ലബ് തുഴഞ്ഞ നെപ്പോളിയന്‍ വള്ളം ഒന്നാം സ്ഥാനം കരസ്ഥമാക്കി. രണ്ടാം സ്ഥാനം എംബിസി മേപ്രാല്‍ തുഴഞ്ഞ ആശാ പുളിക്കീക്കളം നേടി. വെപ്പ് ബി വിഭാഗത്തില്‍ കൊണ്ടാക്കല്‍ ബോട്ട് ക്ലബിന്‍റെ പിജി കരിപ്പുഴ ഒന്നാം സ്ഥാനവും സഹോദര ബോട്ട് ക്ലബ് തലവടി തുഴഞ്ഞ പുന്നത്ര പുരയ്ക്കന്‍ രണ്ടാം സ്ഥാനവും നേടി. ഇരുട്ടുകുത്തി വിഭാഗത്തില്‍ സൗഹൃദ ബോട്ട് ക്ലബ് പള്ളത്തുരുത്തി തുഴഞ്ഞ കുറുപ്പുപറമ്പന്‍ ഒന്നാം സ്ഥാനം നേടി. സിറ്റി ബോട്ട് ക്ലബ് കെവി ജട്ടി തുഴഞ്ഞ ദാനിയേല്‍ രണ്ടാംസ്ഥാനം കരസ്ഥമാക്കി. ഫൈബര്‍ വെപ്പുവള്ളങ്ങളില്‍ സെന്‍റ് ആന്‍റണി ഒന്നാംസ്ഥാനവും പുത്തന്‍കണ്ടത്തില്‍ രണ്ടാം സ്ഥാനവും നേടി. ജലമേള കുട്ടനാട് എംഎല്‍എ തോമസ് കെ. തോമസ് ഉദ്ഘാടനം ചെയ്തു. ജലോത്സവ സമിതി ചെയര്‍മാന്‍ തോമസുകുട്ടി മാത്യു അധ്യക്ഷത വഹിച്ചു. തലവടി പഞ്ചായത്ത് പ്രസിഡന്‍റ് ഗായത്രി ബി.നായര്‍ മാസ്ഡ്രില്‍ സല്യൂട്ട് സ്വീകരിച്ചു. വെളിയനാട് ബ്ലോക്ക് പഞ്ചായത്ത് പ്രസിഡന്‍റ് പി.കെ. വേണുഗോപാല്‍ ജലഘോഷയാത്ര ഫ്ളാഗ് ഓഫ് ചെയതു. ആര്‍സി ചാരിറ്റബിള്‍ ട്രസ്റ്റ് ചെയര്‍മാന്‍ റജി ചെറിയാന്‍ സമ്മാനദാനം നിര്‍വ്വഹിച്ചു. ജനറല്‍ കണ്‍വീനര്‍ കെ.പി. കുഞ്ഞുമോന്‍, ചലഞ്ച് ക്ലബ് പ്രസിഡന്‍റ് ജോബിന്‍ ജെ. പൂയപ്പള്ളി, ലിജു കണിച്ചേരില്‍, പഞ്ചായത്തംഗം ഏബ്രഹാം ചാക്കോ, സിനിമാനടന്‍ പ്രമോദ് വെളിയനാട്, ഷാജി കറുകത്തറ, സിജോയ് ചാക്കോ, കെ.കെ. പ്രസന്നന്‍, അഭിലാഷ് കട്ടത്തറ എന്നിവര്‍ പ്രസംഗിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]