ADVERTISEMENT

ADVERTISEMENT

ഈസ്റ്റര്‍ ദിനാഘോഷം ജില്ലാ ജയിലില്‍

ആലപ്പുഴ: ഫ്രണ്ട്‌സ് ഓഫ് റിന്യൂവല്‍ ഇന്ത്യയുടെ നേതൃത്വത്തില്‍ ആലപ്പുഴ ജില്ലാ ജയിലില്‍ ഈസ്റ്റര്‍ ദിനാഘോഷം നടത്തി. കെസിബിസി കമ്മീഷന്‍ എക്‌സിക്യൂട്ടീവ് മെമ്പര്‍ ഉമ്മച്ചന്‍ ചക്കുപുരയ്ക്കല്‍ അധ്യക്ഷത വഹിച്ചു. ഫാ. പയസ് ആറാട്ടുകുളം ഉദ്ഘാടനം ചെയ്തു.

വിശുദ്ധ കുർബാനയ്ക്ക് ഫാ. സോണി നേതൃത്വം നല്‍കി. ഓള്‍ ഇന്ത്യ കാത്തലിക് യൂണിയന്‍ സംസ്ഥാന ജനറല്‍ സെക്രട്ടറി ബാബു അത്തിപ്പൊഴിയില്‍, ജയില്‍ വെല്‍ഫെയര്‍ ഓഫീസര്‍ ജയചന്ദ്രന്‍, കാരുണ്യ ചാരിറ്റബിള്‍ ട്രസ്റ്റ് ചെയര്‍മാന്‍ പി.എല്‍. വര്‍ഗീസ്, സിസ്റ്റര്‍ എല്‍സി, സിസ്റ്റര്‍ അല്‍ഫോന്‍സാ, സെലിന്‍ ജോസഫ്, എം.ജെ. സാബു, സാവിയോ പീറ്റര്‍ എന്നിവര്‍ പ്രസംഗിച്ചു.

ADVERTISEMENT

കഞ്ചാവ് വില്പന ചോദ്യം ചെയ്തതിനു കാന്‍സർ രോഗിയായ ഗൃഹനാഥനു വെട്ടേറ്റു

അമ്പലപ്പുഴ: കഞ്ചാവ് വില്പന ചോദ്യം ചെയ്തതിന്‍റെ വൈരാഗ്യത്തില്‍ വീടുകയറി അക്രമം. കാന്‍സർരോഗിയായ ഗൃഹനാഥന് വെട്ടേറ്റു. അമ്പലപ്പുഴ വടക്ക് 15-ാം വാര്‍ഡ്‌‌ വളഞ്ഞവഴി പുതുവല്‍ നീര്‍ക്കുന്നം വിനോദ്കുമാറി(48) നാണ് വെട്ടേറ്റത്. അക്രമം അറിഞ്ഞുചെന്ന അയല്‍വാസിയായ സുധാകരനും മര്‍ദനമേറ്റു. കഴിഞ്ഞദിവസം വൈകിട്ടോടെയായിരുന്നു സംഭവം. പ്രദേശവാസിയായ മയക്കുമരുന്ന് വില്പനക്കാരനായ യുവാവാണ് അക്രമത്തിനു പിന്നിലെന്ന് അമ്പലപ്പുഴ പോലീസിനു നല്‍കിയ പരാതിയില്‍ പറയുന്നു. മയക്കുമരുന്നു വില്പന നടത്തുന്നതിനെ വിനോദിന്‍റെ മകന്‍ അനിമോന്‍ മുമ്പ് ചോദ്യം ചെയ്തിരുന്നതായി പറയുന്നു. ഇതിന്‍റെ വൈരാഗ്യത്തില്‍ വീടിന് മുമ്പില്‍ നില്‍ക്കുകയായിരുന്ന അനിമോനുമായി അക്രമി വാക്കേറ്റം നടത്തുകയും മര്‍ദിക്കുകയും ചെയ്തു. കാന്‍സര്‍ ബാധിച്ച് കിടപ്പിലായ പിതാവിനോട് വിവരം പറയാന്‍ മുറിക്കുള്ളിലേക്കു കയറിയ അനിമോനെ മാരകായുധവുമായെത്തിയ യുവാവ് അക്രമിക്കുന്നത് കണ്ട് തടയാന്‍ ശ്രമിക്കുന്നതിനിടെ വിനോദിന്‍റെ കാലിനു വെട്ടേല്‍ക്കുകയായിരുന്നു. ഇതിറഞ്ഞ് ഓടിയെത്തിയ അയല്‍വാസി സുധാകരനെയും യുവാവ് മര്‍ദിച്ചു. പ്രതി ഒളിവിലാണ്.

ബിന്ദുവിന്‍റെ തിരോധാനം: നുണപരിശോധന നടത്തണമെന്ന ഹർജി 22 ലേക്കു മാറ്റി

ചേർത്തല: കടക്കരപ്പള്ളി ആലുങ്കൽ ബിന്ദു പത്മനാഭന്‍റെ തിരോധാനത്തിൽ പ്രതിയെന്ന് ക്രൈംബ്രാഞ്ച് സംശയിക്കുന്ന സെബാസ്റ്റ്യനെ നുണപരിശോധനയ്ക്ക് വിധേയനാക്കണമെന്ന് ആവശ്യപ്പെട്ട് കോടതിയിൽ നൽകിയ ഹർജി 22ലേക്കു മാറ്റി. സെബാസ്റ്റ്യൻ കോടതിയിൽ ഹാജരാകാതിരുന്നതാണ് കാരണം. ബിന്ദുവി ന്‍റെ എസ്എസ്എൽസി ബുക്ക്, ഡ്രൈവിംഗ് ലൈസൻസ് എന്നിവ വ്യാജമായി തയാറാക്കിയതിലും 2013ൽ ബിന്ദുവിന്‍റെ പേരിൽ ഇടപ്പള്ളിയിലെ ഭൂമി വ്യാജ പ്രമാണം ഉണ്ടാക്കി കൈമാറ്റം നടത്തിയ കേസിലുമാണ് സെബാസ്റ്റ്യ നെ പ്രധാന പ്രതിയാക്കി കേസെടുത്തത്. 2006 മുതൽ ബിന്ദുവിനെ കാൺമാനില്ലായിരുന്നു. എന്നാൽ, താൻ 2007ൽ ബിന്ദുവിനെ കാറിലും ഓട്ടോറിക്ഷയിലും ചേർത്തല കെഎസ്ആർടിസി ബസ് സ്റ്റാൻഡിൽ കൊണ്ടുവന്നുവിട്ടു എന്നു പറയുന്നതിലെ വൈ രുദ്ധ്യം മൂലമാണ് ക്രൈംബ്രാഞ്ച് സെബാസ്റ്റ്യനെ നുണപരിശോധനയ്ക്ക് വിധേയമാക്കുന്നത്. ബിന്ദു വിനെ കാണാതായ 2006 മുതൽ അവരുടെ ബാങ്ക് അക്കൗണ്ട് ഇതുവരെ പ്രവർത്തിച്ചിട്ടില്ലെന്ന് അന്വഷണ ഉദ്യോഗസ്ഥർ പറയുന്നു. 2017 ലാണ് വിദേശത്തുള്ള സഹോദരൻ പ്രവീൺ ചേർത്തല പോലീസിൽ പരാതി നൽകുന്നത്. ആദ്യഘട്ടത്തിൽ പട്ടണക്കാട് പോലീസും പിന്നീട് കുത്തിയതോട് പോലീസും തുടർന്ന് ജില്ലാ നർകോട്ടിക് സെൽ ഡിവൈഎസ്‌പിയും അന്വേഷണം നടത്തി. കേസ് ക്രൈംബ്രാഞ്ചിനു കൈമാറിയതോടെ എട്ട് ഉദ്യോഗസ്ഥരാണ് കേസ് അന്വേഷണം നടത്തിയത്. ഇതിനോടകം 80 ഓളം ആളുകളുടെ മൊഴികളാണ് രേഖപ്പെടുത്തിയിട്ടുള്ളത്. സംഭവത്തിൽ മൂന്നു കേസുകൾ രജിസ്റ്റ‌ർ ചെയ്ത് വിവിധ ഘട്ടങ്ങളിൽ 11 പ്രതികളെ പോലീസ് അറസ്റ്റ് ചെയ്തിരുന്നു. തുടർ അന്വേഷണം നടത്തിയിട്ടും ബിന്ദുവിനെക്കുറിച്ച് കാര്യമായ വിവരമൊന്നും ലഭിച്ചില്ല. ജീവിച്ചിരിപ്പുണ്ടോയെന്നു പോലും നിലവിൽ വ്യക്‌തതയില്ല. പോലീസിന്‍റെ യും ക്രൈംബ്രാഞ്ചിന്‍റെയും അന്വേഷണത്തിൽ ബിന്ദു പത്മനാഭൻ 2003 മുതൽ സെബാസ്റ്റ്യനുമായി അടുത്തബന്ധം പുലർത്തിയിരുന്നതായും പല തവണ സെബാസ്റ്റ്യന്‍റെ പള്ളിപ്പുറത്തെ വീട്ടിൽ ബിന്ദു ചെന്നതായും മൊഴി ലഭിച്ചിരുന്നു. ബിന്ദുവിന്‍റെ മാതാപിതാക്കളുടെ മരണശേഷം ഏറ്റവും കൂടുതൽ അടുപ്പമുണ്ടായിരുന്നത് സെബാസ്റ്റ്യൻ മാത്രമായിരുന്നെന്നും കണ്ടെത്തിയിട്ടുണ്ട്. സെബാസ്റ്റ്യന്‍റെ പ്രധാന സഹായിയും ഓട്ടോറിക്ഷാ തൊഴിലാളിയുമായിരുന്ന പള്ളിപ്പുറം സ്വദേശിയുടെ മരണത്തിലും ദുരൂഹത ഉണ്ടായിരുന്നു. സെബാസ്റ്റ്യന്‍റെ ജീവിത പശ്ചാത്തലം ദുരൂഹമാണെന്നും വിവിധ അന്വേഷണ ഉദ്യോഗസ്ഥർക്ക് ഇയാൾ നൽകി മൊഴികളിൽ വ്യക്‌തത വരുത്താനാണ് നുണപരിശോധന നടത്തണമെന്ന് ആവശ്യം ഉന്നയിക്കുന്നതെന്നും ക്രൈംബ്രാഞ്ച് അന്വേഷണ ഉദ്യോഗസ്ഥൻ പറഞ്ഞു. അന്വഷണത്തിൽ തൃപ്തി ഉണ്ടെന്ന് വിദേശത്ത് ജോലി ചെയ്യുന്ന പ്രവീൺ പറയുന്നു. ആദ്യമായി പരാതി നൽകാൻ പോലീസ് സ്റ്റേഷനിൽ പോകുമ്പോൾ സെബാസ്റ്റനുമായി പ്രവീൺ സംസാരിച്ചിരുന്നു. എന്നാൽ, ബിന്ദുവിനെക്കുറിച്ച് ഒന്നും അറിയില്ലെന്നും ഫോൺ നമ്പർ പോലുമില്ലെന്നാണ് സെബാസ്റ്റ്യൻ അന്ന് പറഞ്ഞത്. ബിന്ദുവിന്‍റെ പേരിലുള്ള ഇടപ്പള്ളിയിലെ സ്ഥലം വിറ്റു കിട്ടിയതിലെ 25 ലക്ഷം രൂപ ചേർത്തലയിലെ ഒരു ബാങ്കിൽ നിക്ഷേപിച്ചിട്ടുണ്ടെന്നും സെബാസ്റ്റ്യന്‍റെ പിന്നിൽ ആരെക്കെയോ ഉണ്ടെന്നും പ്രവീൺ പറയുന്നു.

രാമങ്കരി പഞ്ചായത്ത് വൈസ് പ്രസിഡന്‍റ് തെരഞ്ഞെടുപ്പ്: സിപിഎമ്മിനെ തോല്പിച്ച് സിപിഐയിലെ രമ്യാമോള്‍

ആലപ്പുഴ: രാമങ്കരി പഞ്ചായത്ത് വൈസ് പ്രസിഡന്‍റ് തെരഞ്ഞെടുപ്പില്‍ സിപിഎമ്മിനെ തോല്‍പ്പിച്ച് സിപിഐ. സിപിഎം, സിപിഐ സ്ഥാനാര്‍ഥികള്‍ തമ്മില്‍ നടന്ന മത്സരത്തിലാണ് സിപിഐയിലെ രമ്യാമോള്‍ സജീവ് വൈസ് പ്രസിഡന്‍റായി തെരഞ്ഞെടുക്കപ്പെട്ടത്. സിപിഎമ്മിലെ മോള്‍ജി രാജേഷിനെയാണ് രമ്യ പരാജയപ്പെടുത്തിയത്. 13 അംഗ ഭരണസമിതിയില്‍ പ്രസിഡന്‍റിന്‍റെ വോട്ട് അസാധുവായി. രമ്യ സജീവിന് ഏഴു വോട്ടും മോള്‍ജിക്ക് അഞ്ചു വോട്ടുമാണ് ലഭിച്ചത്. യുഡിഎഫ് അംഗങ്ങള്‍ സിപിഐക്ക് അനുകൂലമായി വോട്ട് ചെയ്തു. യുഡിഎഫിന്‍റെ വൈസ് പ്രസിഡന്‍റായിരുന്ന ഷീന രാജപ്പന്‍ രാജിവച്ച ഒഴിവിലാണ് തെരഞ്ഞെടുപ്പ് നടന്നത്. യുഡിഎഫിലെ ധാരണ പ്രകാരം അവസാനത്തെ ആറുമാസം കോണ്‍ഗ്രസ് അംഗത്തിന് പ്രസിഡന്‍റ്, വൈസ് പ്രസിഡന്‍റ് പദം നല്‍കാനായിരുന്നു രാജി. സിപിഐ സ്ഥാനാര്‍ഥി രംഗത്ത് എത്തിയതോടെ യുഡിഎഫ് മത്സരത്തില്‍നിന്നു പിന്മാറുകയായിരുന്നു.

വിൽപ്പനയ്ക്ക് സൂക്ഷിച്ച വിദേശമദ്യം പിടികൂടി

ചാരുംമൂട്: താമരക്കുളത്ത് വീട്ടിൽ അനധികൃതമായി സൂക്ഷിച്ച ഏഴു ലിറ്റർ വിദേശമദ്യം എക് സൈസ് പിടികൂടി. നൂറനാട് എക്സൈസ് റേഞ്ച് ഇൻസ്പെക്ടർ എ.പി. ഷിഹാബിന്‍റെ നേതൃത്വത്തിൽ നടത്തിയ പരിശോധനയിലണ് പിടികൂടിയത്. താമരക്കുളം മേക്കും മുറി തുണ്ടുവിളയിൽ വസന്തകുമാർ എന്നയാളുടെ വീട്ടിൽനിന്നാണ് വിദേശമദ്യം പിടികൂടിയത്. മദ്യം കൈവശം വച്ച കുറ്റത്തിന് നൂറനാട് എക്സൈസ് ഇയാൾക്കെതിരേ കേസെടുത്തു. ഉത്സവങ്ങൾ പ്രമാണിച്ച് വിൽപ്പനയ്ക്കായി വൻതോതിൽ മദ്യം വീട്ടിൽ സൂക്ഷിച്ച് ആവശ്യക്കാർക്ക് ബൈക്കിൽ എത്തിച്ചു കൊടുക്കുകയായിരുന്നു ഇയാളുടെരീതിയെന്ന് എക്സൈസ് ഉദ്യോഗസ്ഥർ പറഞ്ഞു.

കിണറ്റിൽ കുടുങ്ങിയ മുര്‍ഖനെ പിടികൂടി

എടത്വ: കിണറ്റില്‍ കുടുങ്ങിയ മുര്‍ഖന്‍ പാമ്പിനെ പിടികൂടി. തലവടി പഞ്ചായത്ത് 11 -ാം വാര്‍ഡില്‍ ചിറയകാട്ട് ബൈജുവിന്‍റെ വീട്ടിലെ കിണറ്റില്‍ കുടുങ്ങിയ മൂര്‍ഖന്‍ പാമ്പിനെയാണ് പിടികൂടിയത്. പാമ്പ് കിണറ്റില്‍ വീണുകിടക്കുന്നത് ശ്രദ്ധയില്‍പ്പെട്ട വീട്ടുകാര്‍ എടത്വ പോലീസില്‍ വിവരം അറിയിച്ചു. പോലീസ് ഇടപെട്ടതിനെത്തുടര്‍ന്ന് കരുവാറ്റ സ്വദേശിയായ സ്‌നേക് റെസ്‌ക്യു ടീമിലെ ഫാ. ചാര്‍ളിയാണ് പാമ്പിനെ സാഹസികമായി പിടികൂടി വനം വകുപ്പിനു കൈമാറിയത്.

ഡോ. ജോഷ്വാ മാര്‍ ഇഗ്നാത്തിയോസിന് പൗരസ്വീകരണം 28ന്

മാവേലിക്കര: മാവേലിക്കര ബിഷപ് ഡോ. ജോഷ്വാ മാര്‍ ഇഗ്നാത്തിയോസിന് മാവേലിക്കരയില്‍ പൗരസ്വീകരണം നല്‍കുന്നു. 28ന് വൈകിട്ട് 3.30ന് മാവേലിക്കര താലൂക്ക് സഹകരണ ബാങ്ക് ഓഡിറ്റോറിയത്തില്‍ നടക്കുന്ന സ്‌നേഹാദര സമര്‍പ്പണ സമ്മേളനം വി.എം. സുധീരന്‍ ഉദ്ഘാടനം ചെയ്യും. എം.എസ്. അരുണ്‍കുമാര്‍ എംഎല്‍എ അധ്യക്ഷത വഹിക്കും. കൊടിക്കുന്നില്‍ സുരേഷ് എംപി ഉപഹാര സമര്‍പ്പണം നടത്തും. കെ. ജയകുമാര്‍ ഐഎഎസ്, പത്തനാപുരം ഗാന്ധിഭവന്‍ സെക്രട്ടറി ഡോ. പുനലൂര്‍ സോമരാജന്‍, നഗരസഭാ ചെയര്‍മാന്‍ നൈനാന്‍ സി. കുറ്റിശേരില്‍, ശുഭാനന്ദാശ്രമം ട്രസ്റ്റ് സെക്രട്ടറി സ്വാമി ഗീതാനന്ദന്‍, മാവേലിക്കര ടൗണ്‍ ഇമാം ജനാബ് അബ്ദുല്‍ സത്താര്‍ മൗലവി, ഡോ. ഷാഹിദ കമാല്‍ എന്നിവര്‍ പങ്കെടുക്കുമെന്നും സംഘാടക സമിതി ചെയര്‍മാന്‍ മുരളീധരന്‍ തഴക്കര, ജനറല്‍ കണ്‍വീനര്‍ അഡ്വ.കെ. സുരേഷ്‌കുമാര്‍ എന്നിവര്‍ അറിയിച്ചു.

ഇന്ന് പ്രത്യാശയുടെ ഉയിർപ്പുതിരുനാൾ

ആലപ്പുഴ: പ്രത്യാശയുടെ സന്ദേശവുമായി വിശ്വാസി സമൂഹം ഇന്ന്‌ ഈസ്റ്റര്‍ ആഘോഷിക്കുന്നു. ജില്ലയിലെ പള്ളികൾ ഉയിർപ്പ് തിരുനാൾ ആഘോഷിക്കാൻ ഒരുങ്ങി. ക്രിസ്തു കുരിശിലേറിയശേഷം മൂന്നാം നാൾ ഉയിർത്തെഴുന്നേറ്റതിന്‍റെ ഓർമപുതുക്കലാണ് ഈസ്റ്റർ. അൻപത് നോമ്പാചരണത്തിന്‍റെ അവസാനം കൂടിയാണ് ഈസ്റ്റർ. ഈസ്റ്റർ പ്രത്യാശയുടെയും പുതുക്കലിന്‍റെയും സമയമായതിനാൽ, വിശ്വാസികൾ പരസ്പരം ഈസ്റ്റർ ആശംസിക്കുകയും സമ്മാനങ്ങൾ കൈമാറുകയും ചെയ്യുന്നു. ജില്ലയിലെ വിവിധ പള്ളികളില്‍ ശുശ്രൂഷകളും പ്രാര്‍ഥനയും നടന്നു. ആലപ്പുഴ മൗണ്ട് കാർമൽ കത്തീഡ്രൽ മുതൽ തങ്കി, പൂങ്കാവ്, ചമ്പക്കുളം, എടത്വ, അർത്തുങ്കൽ, തുന്പോളി തുടങ്ങി എല്ലാ പള്ളികളിലും ഉയിർപ്പിന്‍റെ പ്രത്യേക പ്രാർഥനാ ശുശ്രുഷകളും വിശുദ്ധ കുർബാനയും നടക്കുന്നു.

ഈസ്റ്റർ പ്രത്യാശയുടെ തിരുനാൾ: ജോഷ്വാ മാർ ഇഗ്നാത്തിയോസ്

മാവേലിക്കര: ഈസ്റ്റർ പ്രത്യാശയുടെയും സന്തോഷത്തിന്‍റെയും സമാധാനത്തിന്‍റെയും തിരുനാളാണെന്നു മാവേലിക്കര ബിഷപ് ഡോ. ജോഷ്വാ മാർ ഇഗ്നാത്തിയോസ്. മരണം ജീവിതത്തിന്‍റെ അവസാനമല്ലെന്നും നിത്യജീവിതത്തിലേക്കുള്ള കവാടമാണെന്നും ഈസ്റ്റർ ഓർമപ്പെടുത്തുന്നു. കാരുണ്യം പാപത്തിനുമേലും നന്മ തിന്മയ്ക്കുമേലും സത്യം അസത്യത്തിനുമേലും ജീവിതം മരണത്തിനുമേലും വിജയം വരിച്ചു. ദൃശ്യമായതു മാത്രമാണ് യാഥാർഥ്യം എന്നും അദൃശ്യമായവ മിഥ്യയാണെന്നും ചിന്തിക്കുന്ന വർത്തമാന കാലഘട്ടത്തിൽ ഉയിർപ്പ് തിരുനാളിന് ഏറെ പ്രസക്തിയുണ്ട്. കലഹങ്ങളില്ലാത്ത, യുദ്ധങ്ങളില്ലാത്ത, ഭിന്നതകളില്ലാത്ത, അവസ്ഥയല്ല ഈ സമാധാനം. അതിനെല്ലാം ഉപരിയായി യേശു തന്നെയാണ് ഈ സമാധാനം. പീഡനങ്ങൾക്കും സഹനങ്ങൾക്കും മധ്യേയാണ് യേശു നൽകുന്ന സമാധാനത്തെ നാം കണ്ടെത്തേണ്ടത്. ഈ സമാധാനത്തെക്കുറിച്ചു ധ്യാനിക്കാനും സമാധാനം സ്വന്തമാക്കാനും ഈസ്റ്റർ നമ്മെ ക്ഷണിക്കുന്നു. മനുഷ്യ ദൃഷ്ടിയിൽ പരാജയമെന്നും നിരാശാജനകമെന്നും അസമാധാനം വിതയ്ക്കുന്നതെന്നും തോന്നിച്ച യേശുവിന്‍റെ മരണം ഉത്ഥിതന്‍റെ പ്രത്യാശയിലേക്കും സന്തോഷത്തിലേക്കും സമാധാനത്തിലേക്കുമാണ് നമ്മെ നയിച്ചതെന്നും ബിഷപ് ജോഷ്വാ മാർ ഇഗ്നാത്തിയോസ് ഈസ്റ്റർ സന്ദേശത്തിൽ പറഞ്ഞു.

തങ്കി പള്ളിയില്‍ പീഡാനുഭവ സ്മരണയിൽ ദുഃഖവെള്ളി ആചരിച്ചു

ചേര്‍ത്തല: ക്രിസ്തുവിന്‍റെ പീഡാനുഭവ സ്മരണാശുശ്രൂഷകളില്‍ പങ്കെടുക്കാന്‍ തീര്‍ഥാടനകേന്ദ്രമായ തങ്കി സെന്‍റ് മേരീസ് ഫൊറോന പള്ളിയില്‍ പതിനായിരങ്ങള്‍ എത്തി. പെസഹാ വ്യാഴാഴ്ച രാത്രി 12ന് പള്ളിയില്‍ പ്രത്യേക കല്ലറയില്‍ സൂക്ഷിച്ചിരിക്കുന്ന അദ്ഭുത തിരുസ്വരൂപം ബിഷപ് ഡോ. ജോസഫ് കരിയിലും രൂപതയിലെ അനേകം വൈദികരും പ്രര്‍ഥാനാ ചടങ്ങുകള്‍ക്കുശേഷം മുല്ലപ്പൂപ്പന്തലില്‍ പൊതുവണക്കത്തിനായി കിടത്തിയപ്പോള്‍ മുതല്‍ നാടിന്‍റെ നാനാഭാഗത്തുനിന്നും ഇതരസംസ്ഥാനങ്ങളില്‍നിന്നും വിശ്വാസികള്‍ എത്തിക്കൊണ്ടിരുന്നു. ദുഃഖവെള്ളിയാഴ്ച വൈകിട്ട്‌ നടന്ന നഗരികാണിക്കലില്‍ നാനാജാതിമതസ്ഥര്‍ പങ്കെടുത്തു. വിശ്വാസികള്‍ തളിര്‍ വെറ്റില, വേപ്പില, പൂക്കള്‍ എന്നിവ വിതറി ആദരവ് പ്രകടിപ്പിച്ചു. പ്രദക്ഷിണവഴിയില്‍നിന്ന് ലഭിക്കുന്ന വെറ്റിലയും മറ്റും മാറാരോഗത്തിനുപോലും ഫലപ്രദമാണെന്നാണ് വിശ്വാസം. അര്‍ധരാത്രിക്കുശേഷം നടന്ന കബറടക്കത്തിലും പങ്കെടുത്താണ് വിശ്വാസികള്‍ മടങ്ങിയത്. പീഡാനുഭവ ശുശ്രൂഷകള്‍ക്ക് വികാരി ഫാ. ജോര്‍ജ് എടേഴത്ത്, സഹവികാരിമാരായ ഫാ. സിബി കിടങ്ങേത്ത്, ഫാ. റിന്‍സന്‍ കാളിയത്ത്, ഫാ. ലോബോ ലോറന്‍സ് ചക്രശേരി, ഫാ. നിഖില്‍ ജൂഡ് കിത്തോതറ എന്നിവരും വിവിധ റീത്തുകളിലെ വൈദികരും പങ്കെടുത്തു. ഇന്നലെ രാത്രി 11ന് ഉയര്‍പ്പ് ദിവ്യബലി, തീ, തിരി-വെള്ളം, പ്രദക്ഷിണം എന്നിവ നടന്നു. എടത്വ പള്ളിയില്‍ നഗരികാണിക്കല്‍ എടത്വ: സെന്‍റ് ജോര്‍ജ് ഫൊറോനാ പള്ളിയില്‍ നഗരികാണിക്കലിലും തിരുസ്വരൂപ ചുംബനത്തിലും പങ്കെടുത്തത് നൂറുകണക്കിന് വിശ്വാസികള്‍. വികാരി ഫാ. ഫിലിപ്പ് വൈക്കത്തുകാരന്‍ മുഖ്യകാര്‍മികത്വം വഹിച്ചു. അസി. വികാരിമാരായ ഫാ. കുര്യന്‍ പുത്തന്‍പുര, ഫാ. ജോസഫ് കാമിച്ചേരി, ഫാ. സെബാസ്റ്റ്യന്‍ മനയത്ത്, ഫാ. സെബാസ്റ്റ്യന്‍ മഞ്ചേരിക്കളം, ഫാ. ജോസഫ് വേമ്പേനിക്കല്‍ എന്നിവര്‍ സഹകാര്‍മികരായിരുന്നു. ദുഃഖവെള്ളിയിലെ തിരുക്കര്‍മങ്ങള്‍ രാവിലെ ആറിന് ആരാധനയോടെയാണ് ആരംഭിച്ചത്. 2.30ന് വിവിധ വാര്‍ഡുകളില്‍ നിന്നുമുള്ള കുരിശിന്‍റെ വഴി പള്ളിയില്‍ എത്തിച്ചേര്‍ന്നു. 4.30ന് നഗരികാണിക്കലും തുടര്‍ന്ന് തിരുസ്വരൂപ ചുംബനവും നടന്നു.

കോക്കമംഗലം പള്ളിയിൽ പുതുഞായര്‍ തിരുനാള്‍ ചേര്‍ത്തല: ക്രിസ്തു ശിഷ്യനായ മാര്‍ത്തോമാശ്ലീഹാ സ്ഥാപിച്ച കോക്കമംഗലം മാര്‍ത്തോമാശ്ലീഹാ തീര്‍ഥാടന ദേവാലയത്തിലെ പുതുഞായര്‍ ദര്‍ശന തിരുനാള്‍ 21ന് തുടങ്ങും. തിരുനാളിന്‍റെ ഒരുക്കങ്ങള്‍ പൂര്‍ത്തിയായതായി പള്ളി വികാരി ഫാ. ആന്‍റണി ഇരവിമംഗലം, തിരുനാള്‍ കണ്‍വീനര്‍ മാത്യു കണ്ണാട്ട് കളം, വൈസ് ചെയര്‍മാന്‍ തോമസ് മങ്കുഴിക്കരി, മറ്റ് ഭാരവാഹികളായ തോമസ് പേരെമഠം, സിജോ കണ്ടത്തില്‍, ജിജോ കര്‍ത്താനം എന്നിവര്‍ പത്രസമ്മേളനത്തില്‍ പറഞ്ഞു. 21ന് സമര്‍പ്പിത ദിനമായും 22ന് കുടുംബ ദിനമായും 23ന് പൂര്‍വിക സ്മൃതി ദിനമായും ആചരിക്കും. ആരാധനാ ദിനമായ 24ന് രാവിലെ നടത്തുന്ന തിരുക്കര്‍മങ്ങള്‍ക്കും ദിവ്യകാരുണ്യ ആരാധന പ്രതിഷ്ഠയ്ക്കും മോണ്‍. ആന്‍റണി നരികുളം നേതൃത്വം നല്‍കും. വൈകുന്നേരം 4.30ന് പൊതു ആരാധന, പ്രദക്ഷിണം, തുടര്‍ന്ന് നടത്തുന്ന തിരുനാള്‍ കൊടിയേറ്റിന് വികാരി ഫാ. ആന്‍റണി ഇരവിമംഗലം മുഖ്യകാര്‍മികനാകും. ഏഴിന് ഡ്രാമാസ്‌കോപ്പിക് ബൈബിള്‍ നാടകം. 25ന് രാവിലെ ഏഴിന് ദിവ്യബലി, വൈകുന്നേരം 5.45ന് ഇടവക ദിനാഘോഷം, വേസ്പര ദിനമായ 26ന് രാവിലെ ഏഴിന് ദിവ്യബലി, വൈകുന്നേരം 4.30ന് തിരി, തിരുസ്വരൂപം വെഞ്ചരിപ്പ്, ദിവ്യബലി, വേസ്പര, പ്രദക്ഷിണം. പുതുഞായര്‍ തിരുനാള്‍ ദിനമായ 27ന് രാവിലെ 6.30നും 10.30നും ദിവ്യബലി, വൈകുന്നേരം അഞ്ചിന് തിരുനാള്‍ പാട്ടുകുര്‍ബാന, ഏഴ് പൊന്‍കുരിശുകളുടെ അകമ്പടിയില്‍ തിരുനാള്‍ പ്രദക്ഷിണം, തുടര്‍ന്ന് ലൈറ്റ് ആന്‍ഡ് സൗണ്ട് ഷോ. എട്ടാമിടമായ മേയ് നാലിന് രാവിലെ 6.30ന് ദിവ്യബലി. പരുമല പള്ളിയിൽ മാന്നാർ: പരുമല സെമിനാരിയില്‍ നടന്ന ദുഃഖവെള്ളിയാഴ്ച ശുശ്രൂഷകള്‍ക്ക് ഡോ. ഏബ്രഹാം മാര്‍ സെറാഫിം പ്രധാന കാര്‍മികത്വം വഹിച്ചു. ദേവാലയത്തിനു ചുറ്റുമുള്ള പ്രദക്ഷിണത്തിലും സ്ലീബാ വന്ദനത്തിനും നൂറുകണക്കിന് വിശ്വാസികള്‍ പങ്കുചേര്‍ന്നു. പരുമല സെമിനാരി മാനേജര്‍ ഫാ. എല്‍ദോസ് ഏലിയാസ്, ഫാ. ജെ. മാത്തുക്കുട്ടി എന്നിവര്‍ ക്രമീകരണങ്ങള്‍ക്കു നേതൃത്വം നല്‍കി.

കുരിശിന്‍റെ വഴിയിൽ തീർഥാടന യാത്ര നടത്തി ബ്രദർ മാത്യു ആൽബിൻ

അമ്പലപ്പുഴ: യേശുവിന്‍റെ പീഡാനുഭവങ്ങളുടെ ഓര്‍മപുതുക്കി പതിവുമുടക്കാതെ കുരിശിന്‍റെ വഴിയില്‍ പങ്കെടുത്ത് ബ്രദര്‍ മാത്യു ആല്‍ബിന്‍. ചേര്‍ത്തല തങ്കി ഫെറോന പള്ളിയിലേക്കും പൂങ്കാവ് പള്ളിയിലേക്കും മാത്യു ആല്‍ബിന്‍ യാത്ര നടത്തി. ചണച്ചാക്കിന്‍റെ വസ്ത്രമണിഞ്ഞ് കുരിശുമേന്തിയായിരുന്നു യാത്ര. മതസൗഹാര്‍ദത്തിന്‍റെ പ്രതീകമായി ദേശീയപാതയിലൂടെ കളര്‍കോട് തെക്കെ മഹല്ലിലും കണിച്ചുകുളങ്ങര ദേവീക്ഷേത്രത്തിലും എത്തി പ്രാര്‍ഥിച്ചു. പൂങ്കാവ് പള്ളിയിലേയും തങ്കി പള്ളിയിലേയും വിശുദ്ധ കുര്‍ബാനയിലും ശാന്തി ഭവന്‍ ട്രസ്റ്റി ബ്രദര്‍ മാത്യു ആല്‍ബിന്‍ പങ്കെടുത്തു.

ഹെറോയിനുമായി ഇതരസംസ്ഥാന തൊഴിലാളി പിടിയിൽ

മാന്നാർ: ഹെറോയിനുമായി ഇത ര സംസ്ഥാന തൊഴിലാളി പോ ലീസ് പിടിയിൽ. ചില്ലറ വിൽപ്പനയ്ക്കായി കൊണ്ടുവന്ന രണ്ടു ഗ്രാം ഹെറോയിനുമായി വെസ്റ്റ് ബംഗാൾ മാൾഡ സ്വദേശി മുബാറക് അലി (38) യെയാണ് മാന്നാർ പോലിസും ആലപ്പുഴ ജില്ലാ ഡാൻസാഫ് ടീമും ചേർന്ന് പിടി കൂടിയത്. ആലപ്പുഴ ജില്ലാ പോലീസ് മേധാവിയുടെ നിർദേശപ്രകാരം ലഹരിക്കെതിരേ കർശന പരിശോധനകൾ നടന്നുവരുന്നതിനിടെ മാന്നാർ പന്നായി പാലത്തിന് സമീപം സംശയാസ്പദമായി കണ്ട മുബാറക് അലിയെ പരിശോധിച്ചപ്പോഴാണ് ചെറിയ പ്ലാസ്റ്റിക് കവറിൽ പൊതിഞ്ഞ നിലയിൽ ഹെറോയിൻ കണ്ടെത്തിയത്. പിടി കൂടിയ ഹെറോയിന് വിപണിയിൽ ഇരുപതിനായിരം രൂപയ്ക്കടുത്ത് വില വരുമെന്ന് പൊലീസ് പറഞ്ഞു. ആലപ്പുഴ ജില്ലാ ഡാൻസാഫ് ടീമും മാന്നാർ പോലീസ് ഇൻസ്പെക്ടർ ഡി. രജീഷ് കുമാർ, എസ്ഐ സി.എസ്. അഭിറാം, പ്രൊബേഷൻ എസ്ഐ ജോബിൻ, വനിതാ എഎസ്ഐ തുളസിഭായി, സി പിഒ മാരായ ഹരിപ്രസാദ്, മുഹമ്മദ് റിയാസ്, ഹോം ഗാർഡ് എം.വി. ഹരികുമാർ എന്നിവരടങ്ങിയ സംഘമാണ് പരിശോധന നടത്തിയത് .

കായംകുളം നഗരത്തിൽ പാന്‍മസാല കടകള്‍ പൊളിച്ചുനീക്കി

കായംകുളം: പാന്‍മസാല കടകളുടെ മറവില്‍ വ്യാപകമായി ലഹരി ഉത്പന്നങ്ങള്‍ വിപണനം ചെയ്യുന്നുവെന്ന പരാതികളുടെ അടിസ്ഥാനത്തില്‍ കായംകുളം പോലീസ് നഗരസഭയിലെ ആരോഗ്യ വിഭാഗവുമായി ചേര്‍ന്ന് നടത്തിയ പരിശോധനയില്‍ അനധികൃതമായി പ്രവര്‍ത്തിച്ചു വന്ന 12 പാന്‍മസാല കടകള്‍ പൊളിച്ച് നീക്കം ചെയ്തു. ലഹരിമുക്ത കായംകുളം പദ്ധതിയുടെ ഭാഗമായാണ് നടപടി. കായംകുളം ഡിവൈഎസ്പി ബാബുക്കുട്ടന്‍റെ മേല്‍നോട്ടത്തില്‍ സിഐ അരുണ്‍ ഷാ, എസ്‌ഐമാരായ സന്തോഷ്, മുഹമ്മദ് ബഷീര്‍, പോലീസുദ്യോഗസ്ഥരായ റിയാസ്, സജു, കായംകുളം മുനിസിപ്പല്‍ സെക്രട്ടറി സനില്‍, ഹെല്‍ത്ത് സൂപ്പര്‍വൈസര്‍ ശ്രീകുമാര്‍, പബ്ലിക് ഇന്‍സ്‌പെക്ടര്‍ ഷിബു, ഹെല്‍ത്ത് വിഭാഗത്തിലെ മറ്റ് ഉദ്യോഗസ്ഥര്‍ എന്നിവരുടെ നേതൃത്വത്തിലാണ് പരിശോധന നടത്തി നടപടി സ്വീകരിച്ചത്. വരുംദിവസങ്ങളില്‍ പഞ്ചായത്തുകളും മറ്റും കേന്ദ്രീകരിച്ച് കൂടുതല്‍ പരിശോധന നടത്തുമെന്ന് കായംകുളം പോലീസ് അറിയിച്ചു.

ഹൈബ്രിഡ് കഞ്ചാവ് കേസ്: പ്രതികളെ കസ്റ്റഡിയില്‍ വാങ്ങും

പ്രതികള്‍ക്ക് സ്വര്‍ണക്കടത്ത് പെണ്‍വാണിഭ-സിനിമ മേഖലയുമായുള്ള ബന്ധത്തെ കുറിച്ച് കൂടുതല്‍ വിവരങ്ങള്‍ ശേഖരിക്കുകയാണ് അന്വേഷണസംഘം ആലപ്പുഴ: ആലപ്പുഴയിലെ ഹൈബ്രിഡ് കഞ്ചാവ് കേസില്‍ പ്രതികളെ മൂന്നു ദിവസത്തേക്ക് കസ്റ്റഡിയില്‍ അനുവദിച്ചു. പ്രതികള്‍ക്ക് സ്വര്‍ണക്കടത്ത് പെണ്‍വാണിഭ സിനിമ മേഖലയുമായുള്ള ബന്ധത്തക്കുറിച്ച് കൂടുതല്‍ വിവരങ്ങള്‍ ശേഖരിക്കുകയാണ് അന്വേഷണസംഘം. ഹൈബ്രിഡ് കഞ്ചാവ് കേരളത്തിലെത്തിച്ച സുല്‍ത്താന്‍ അക്ബര്‍ അലിയുടെ വാട്‌സ്ആപ്പ്, ഇന്‍സ്റ്റഗ്രാം ചാറ്റുകളില്‍നിന്ന് ആറു കിലോ കഞ്ചാവ് എത്തിച്ചെന്നാണ് എക്‌സൈസ് കണ്ടെത്തല്‍. ഇതില്‍ ജില്ലയിലേക്ക് കൊണ്ടുവന്ന മൂന്നു കിലോ മാത്രമാണ് പിടിച്ചെടുത്തത്. ബാക്കി മൂന്നു കിലോ എവിടെയാണ് വിതരണം ചെയ്തതെന്ന് കണ്ടെത്തണം. മാത്രമല്ല ജില്ലയില്‍ ആര്‍ക്കാണ് കഞ്ചാവ് എത്തിച്ചതെന്നും വ്യക്തമല്ല. ഇതുള്‍പ്പെടെയുള്ള പ്രധാന ചോദ്യങ്ങള്‍ക്ക് ഉത്തരം കണ്ടെത്താനാണ് പ്രതികളെ തിങ്കളാഴ്ച മുതല്‍ കസ്റ്റഡിയില്‍ ചോദ്യം ചെയ്യണമെന്ന് എക്‌സൈസ് ആവശ്യപ്പെട്ടത്. ആലപ്പുഴ ചീഫ് ജുഡീഷല്‍ മജിസ്ട്രേറ്റ് കോടതി കസ്റ്റഡി അനുവദിച്ചു. പ്രത്യേക ചോദ്യാവലി തയാറാക്കിയാണ് എക്‌സൈസ് അസിസ്റ്റന്‍റ് കമ്മീഷണറുടെ നേതൃത്വത്തില്‍ പ്രതികളെ ചോദ്യം ചെയ്യുക. ഫോറെന്‍സിക് പരിശോധനയ്ക്ക് അയയ്ക്കും മുന്‍പ് അന്വേഷണ ഉദ്യോഗസ്ഥന് നേരിട്ട് പ്രതികളുടെ മൊബൈല്‍ ഫോണുകള്‍ പരിശോധിക്കാന്‍ അനുമതി നല്‍കണമെന്ന് എ ക്‌സൈസ് കോടതിയില്‍ ആവശ്യപ്പെട്ടിരുന്നു. തുടര്‍ന്ന് കേസിലെ പ്രതികളായ തസ്‌ലിമ സുല്‍ത്താന, ഭര്‍ത്താവ് സുല്‍ത്താന്‍ അക്ബര്‍ അലി, ഫിറോസ് എന്നിവരുടെ ഫോണുകള്‍ എക്‌സൈസ് കസ്റ്റഡിയില്‍ വാങ്ങി പരിശോധിച്ചു. നിര്‍ണായകമായ ചില ചാറ്റുകള്‍ അന്വേഷണസംഘത്തിന് ലഭിച്ചിട്ടുണ്ടെന്നാണ് സൂചന. ഇതിന്‍റെ അടിസ്ഥാനത്തിലാണ് പ്രതികളെ കസ്റ്റഡിയില്‍ വാങ്ങി ചോദ്യം ചെയ്യുന്നത്. തുടര്‍ന്ന് പ്രതികള്‍ വെളിപ്പെടുത്തിയ സിനിമ നടന്മാരെയും വിളിച്ചു വരുത്തി ചോദ്യം ചെയ്യും. പ്രതികള്‍ എറണാകുളത്ത് താമസിച്ച ഹോട്ടലുകളിലെയും വാഹനം വാടകയ്ക്ക് എടുത്ത സ്ഥാപനത്തിലെയും സിസിടിവി ദൃശ്യങ്ങള്‍ ഉള്‍പ്പെടെ അന്വേഷണസംഘം ശേഖരിച്ചിട്ടുണ്ട്.

പാര്‍ക്കിംഗ് നിരക്ക് കൂട്ടിയിട്ടും വെയിലും മഴയുമേറ്റ് വാഹനങ്ങള്‍

ചെങ്ങന്നൂര്‍: ചെങ്ങന്നൂര്‍ റെയില്‍വേ സ്റ്റേഷന്‍ ഉള്‍പ്പെടെയുള്ള പ്രധാന സ്റ്റേ ഷനുകളില്‍ പാര്‍ക്കിംഗ് നിരക്ക് വര്‍ധിപ്പിക്കാന്‍ റെയില്‍വേ തീരുമാനിച്ച് മാസങ്ങള്‍ പിന്നിട്ടിട്ടും യാത്രക്കാരുടെ വാഹനങ്ങള്‍ക്ക് സുരക്ഷിത ഇടം ഒരുക്കാന്‍ അധികൃതര്‍ തയാറാകുന്നില്ലെന്ന പരാതി ശക്തം. ഫെബ്രുവരിയിലാണ് പാര്‍ക്കിംഗ് നിരക്ക് 20 മുതല്‍ 30 ശതമാനം വരെ വര്‍ധിപ്പിക്കാന്‍ റെയില്‍വേ തീരുമാനിച്ചത്. വര്‍ധന ഉടന്‍ പ്രാബല്യത്തില്‍ വരുമെന്ന് അധികൃതര്‍ അറിയിക്കുകയും ചെയ്തു. പുതുക്കിയ നിരക്കനുസരിച്ച്, ഇരുചക്ര വാഹനങ്ങള്‍ക്ക് രണ്ടു മണിക്കൂര്‍ വരെ 10 രൂപയും (നിലവില്‍ അഞ്ചു രൂപ) എട്ടു മണിക്കൂര്‍ വരെ 20 രൂപ യും (നിലവില്‍ 15 രൂപ), 24 മണിക്കൂര്‍ വരെ 30 രൂ പയുമാണ്(നിലവില്‍ 20 രൂപ) ഈടാക്കുന്നത്. ഹെല്‍മെറ്റ് പ്രത്യേകം സൂക്ഷി ക്കണമെങ്കില്‍ അതിനു 10 രൂപ അധികം നല്‍കണം. 24 മുതല്‍ 48 മണിക്കൂര്‍ വരെയുള്ള ഇരുചക്ര വാഹന പാര്‍ക്കിംഗ് നിരക്ക് 50 രൂപയില്‍നിന്ന് 60 രൂപയായി ഉയര്‍ന്നു. ഇതേ സമയപരിധിയില്‍ കാറിന്‍റെ നിരക്ക് 100 രൂപയില്‍നിന്ന് 180 രൂപയായി വര്‍ധിച്ചു. 2017 ലാണ് ഇതിനു മുന്‍പ് റെയില്‍വേ പാര്‍ക്കിംഗ് ഫീസ് പരി ഷ്‌കരിച്ചത്. എട്ടു വര്‍ഷത്തിനു ശേഷമാണ് ഇപ്പോള്‍ നിരക്ക് വര്‍ധിപ്പിക്കുന്നത്. നിര്‍ത്തുന്ന ട്രെയിനുകളുടെ എണ്ണം, യാത്രക്കാരുടെ എണ്ണം എന്നിവയുടെ അടിസ്ഥാന ത്തില്‍ സ്റ്റേഷനുകളെ വി വിധ വിഭാഗങ്ങളായി തിരിച്ചിട്ടുണ്ട്. തിരുവനന്തപുരം ഡിവിഷനു കീഴില്‍ ഒന്നാം കാറ്റഗറിയില്‍ ഉള്‍പ്പെടുന്ന ചെങ്ങന്നൂരില്‍ ഇരുചക്ര വാഹനങ്ങള്‍ക്ക് ഒരു മാസത്തെ പാര്‍ക്കിംഗ് നിരക്ക് 360 രൂപയില്‍ നിന്ന് 600 രൂപയായി ഉയര്‍ത്തിയിട്ടുണ്ട്. എന്നാല്‍, നിരക്ക് വര്‍ധിപ്പിച്ചതിന് ആനുപാതികമായി സൗകര്യങ്ങള്‍ സ്റ്റേഷനില്‍ ലഭ്യമല്ലെന്നാണ് യാത്രക്കാരുടെ പ്രധാന പരാതി. പഴയ ശുചിമുറി സമുച്ചയത്തിനു സമീപത്തും പില്‍ഗ്രിം ഷെല്‍ട്ടറിനു സമീപത്തുമുള്ള തുറസായ സ്ഥലങ്ങളിലാണ് ഇപ്പോഴും വാഹനങ്ങള്‍ പാര്‍ക്ക് ചെയ്യുന്നത്. മരത്തണലില്‍ നിര്‍ത്തിയിടുന്ന വാഹനങ്ങളില്‍ പക്ഷികള്‍ കാഷ്ഠിക്കുന്നത് പതിവായതോടെ വാഹനങ്ങള്‍ വൃത്തികേടാകുന്നതു യാത്രക്കാര്‍ക്ക് ദുരിതമാകുന്നു. ഇരുചക്രവാഹനങ്ങള്‍ സൂക്ഷിക്കുന്ന ഭാഗത്തെങ്കിലും മേല്‍ക്കൂര നിര്‍മിക്കണമെന്ന ആവശ്യം വര്‍ഷങ്ങളായി ഉയരുന്നുണ്ട്. എന്നാല്‍ റെയില്‍വേ പാര്‍ക്കിംഗ് സ്ഥലത്തിന്‍റെ കരാർ നല്‍കുകയാണ് പതിവായി ചെയ്യുന്നത്. അതിനാല്‍ സ്ഥിരം നിര്‍മാണങ്ങള്‍ അനുവദിക്കാന്‍ കഴിയില്ലെന്നാണ് റെയില്‍വേയടെ നിലപാട്. താത്കാലികമായി പടുത വലിച്ചുകെട്ടിയെങ്കിലും വാഹനങ്ങള്‍ സംര ക്ഷിക്കാന്‍ നടപടി സ്വീകരിക്കണമെന്നാണ് യാത്രക്കാരുടെ ആവശ്യം. അതേസമയം, മേല്‍ക്കൂര നിര്‍മിക്കാന്‍ കരാറുകാര്‍ക്ക് നിര്‍ദേശം നല്‍കിയിട്ടുണ്ടെന്ന് കൊമേഴ്സ്യല്‍ വിഭാഗം ഉദ്യോഗസ്ഥര്‍ പറഞ്ഞു. ചെങ്ങന്നൂരിനു പുറമേ സമീപത്തുള്ള ചെറിയനാട് റെയില്‍വേ സ്റ്റേഷനിലെ പാര്‍ക്കിംഗും തുറസായ സ്ഥലത്താണ്. എന്നാല്‍ ഇവിടെ കരാര്‍ പുതുക്കിയിട്ടില്ലാത്തതിനാല്‍ നിലവില്‍ പാര്‍ക്കിംഗ് സൗജന്യമാണ്. ഉയര്‍ന്ന പാര്‍ക്കിംഗ് നിരക്ക് ഈടാക്കുമ്പോഴും അടിസ്ഥാന സൗകര്യ ങ്ങള്‍ ഒരുക്കാത്ത റെയില്‍വേയുടെ നടപടി യാത്രക്കാര്‍ക്കിടയില്‍ വലിയ പ്രതിഷേധത്തിന് കാരണമാകുന്നുണ്ട്. എത്രയും പെട്ടെന്ന് വിഷയത്തില്‍ റെയില്‍വേ അധികൃതര്‍ നടപടി സ്വീകരിക്കണമെന്നാണ് യാത്രക്കാരുടെ ആവശ്യം.

തിരുവാഭരണ മോഷണം: കീഴ്ശാന്തി പിടിയില്‍

അരൂര്‍: എഴുപുന്ന ശ്രീനാരായണപുരം ശ്രീ മഹാവിഷ്ണു ക്ഷേത്രത്തിലെ തിരുവാഭരണം മോഷണം പോയ സംഭവത്തില്‍ കീഴ് ശാന്തിയെ അരൂര്‍ പോലീസ് അറസ്റ്റ് ചെയ്തു. കൊല്ലം ഈസ്റ്റ് കല്ലട രാം നിവാസില്‍ രാമചന്ദ്രന്‍ പോറ്റിയാണ് (42) പിടിയിലായത്. ഇയാളില്‍നിന്നു തിരുവാഭരണത്തിലെ കിരീടം പോലീസ് കണ്ടെടുത്തു. ഈ മാസം പതിനാലിനാണ് വിഗ്രഹത്തില്‍ ചാര്‍ത്തിയിരുന്ന തിരുവാഭരണം മോഷണംപോയത്. അതോടൊപ്പം കീഴ്ശാന്തിയെയും കാണാതായി. തുടര്‍ന്നാണ് ക്ഷേത്ര കമ്മിറ്റി അരൂര്‍ പോലീസില്‍ പരാതി നല്‍കിയത്. കേസെടുത്ത് അന്വേഷണം ആരംഭിച്ച പോലീസിന് ഇയാളെക്കുറിച്ചുള്ള വിവരങ്ങള്‍ കമ്മിറ്റിക്കാരുടെ കൈയില്‍ ഇല്ലാത്തത് കൂടുതല്‍ തലവേദനയായി. അടുത്ത ദിവസം ബാക്കിയുള്ള ആഭരണങ്ങള്‍ പരിശോധിച്ചപ്പോള്‍ അത് മുക്കുപണ്ടമാണെന്ന് കണ്ടെത്തിയത് പോലീസിനെ കൂടുതല്‍ ആശയക്കുഴപ്പത്തിലാക്കി. അന്വേഷണത്തിനിടെ പ്രതി എറണാകുളം ജില്ല വിട്ട് പോയിട്ടില്ല എന്ന് ബോധ്യമായതിനെത്തുടര്‍ന്ന് എറണാകുളത്തെത്തി തെരച്ചില്‍ തുടരുകയായിരുന്നു. രണ്ടുദിവസത്തെ എറണാകുളത്തെ തുടര്‍ച്ചയായ തെരച്ചിലിനൊടുവില്‍ പ്രതിയെ ദര്‍ബാര്‍ ഹാള്‍ ഗ്രൗണ്ടിനു അടുത്തുള്ള ശിവക്ഷേത്രത്തിനു സമീപത്തുനിന്നു പിടികൂടി. അതിനിടെ ഇയാള്‍ തേവര ഫെഡറല്‍ ബാങ്കില്‍ സ്വര്‍ണം പണയം വച്ചതായി പോലീസ് കണ്ടെത്തി. പണം മുഴുവനും ഇയാള്‍ ഷെയര്‍ ട്രേഡിംഗില്‍ മുടക്കിയതായും പിന്നീട് സൂചന ലഭിച്ചു. പ്രതിയെ ഇന്നു കോടതിയില്‍ ഹാജരാക്കും.

ഇടിമണ്ണിക്കൽ വെഡ്ഡിംഗ് ഫെസ്റ്റിവലിൽ വമ്പിച്ച ഓഫറുകൾ

കോട്ടയം: ലൈറ്റ് വെയ്‌റ്റ് വെഡ്ഡിംഗ് സ്വർണാഭരണങ്ങളുടെ ഏറ്റവും പുതിയ ട്രെൻഡിന്‍റെ ധാരാളം കളക‌്ഷനുകളുമായി ഇടിമണ്ണിക്കൽ ഗോൾഡ് ആൻഡ് ഡയമണ്ട്സിൽ വെഡ്ഡിംഗ് ഫെസ്റ്റിവൽ ആരംഭിച്ചു. മാലകൾ, കമ്മലുകൾ, നെക്ക്ളെസുകൾ, ഫ്ളവർ ബാംഗിൾ, ഫ്ളെക്സിബിൾ ബാംഗിൾ എന്നിവയുടെ പുതിയ കളക‌്ഷനുകളോടൊപ്പം, 50,000 രൂപ മുതലുള്ള ഡയമണ്ട് സെറ്റുകളും ഏറ്റവും പുതിയ കളക‌്ഷനുകളുമാണ് ഫെസ്റ്റിവലിൽ ഒരുക്കിയിരിക്കുന്നത്. 30 ദിവസം നീണ്ടുനിൽക്കുന്ന ഈ ഫെസ്റ്റിവലിൽ സ്വർണാഭരണങ്ങൾക്ക് പണിക്കൂലിയിൽ 50% വരെ കിഴിവും, അതോടൊപ്പം ഡയമണ്ട് ക്യാരറ്റിന് 15,000 രൂപ വരെ കിഴിവും ലഭിക്കും. ടർക്കിഷ്, ഇറ്റാലിയൻ തുടങ്ങി ലൈറ്റ് വെയിറ്റ് ജ്വല്ലറിയിലെ ലോകോത്തര ഡിസൈനുകളും, പുതിയ ട്രെൻ‌ഡുകളും ഇടിമണ്ണിക്കൽ വെഡിംഗ് ഫെസ്റ്റിവലിൽ ഒരുക്കിയിട്ടുണ്ട്. ട്രെൻഡി വെഡ്ഡിംഗ് സെറ്റുകൾ, സ്റ്റൈലിഷ് ലൈറ്റ് വെയ്‌റ്റ് ആഭരണങ്ങൾ, ലേറ്റസ്‌റ്റ് ഡയമണ്ട് ആഭരണങ്ങൾ എന്നിവയുടെ വിപുലമായ ഷോറുമാണ് ഇടിമണ്ണിക്കൽ ഗോൾഡ് ആൻഡ് ഡയമണ്ട്സ്. ഒരു പവൻ മുതൽ നാലു പവൻ വരെയുള്ള എക്സ്ക്ലൂസീവ് വെഡിംഗ് സെറ്റും കൂടാതെ റോസ് ഗോൾഡ്, ചെട്ടിനാട്, കേരള ട്രഡീഷണൽ, ആന്‍റിക്, റോയൽ ആന്റിക് തുടങ്ങിയവയുടെ പുതിയ ധാരാളം കളക്ഷൻസും കോട്ടയം, ചങ്ങനാശേരി, കറുകച്ചാൽ ഷോറൂമുകളിൽ എത്തിച്ചേർ ന്നിട്ടുണ്ട്. 97459 00917. ഇടിമണ്ണിക്കൽ ഗോൾഡ് ആൻഡ് ഡയമണ്ട്സ് വെഞ്ച്വറായ കോട്ടയം ശാസ്ത്രി റോഡിലുള്ള അമേരാ ഗോൾഡ് ആൻഡ് ഡയമണ്ട്സിലും പുതിയ ട്രെൻഡ് കളക്ഷനുമായി വെഡിംഗ് ഫെസ്റ്റ് ഓഫർ ആരംഭിച്ചിരിക്കുന്നു. 9745227111.

ടിപ്പർ തോട്ടിലേക്ക് മറിഞ്ഞു; ഡ്രൈവർ രക്ഷപ്പെട്ടു

എടത്വ: ഭാരം കയറ്റിവന്ന ടിപ്പർലോറി നിയന്ത്രണംവിട്ട് തോട്ടിലേക്ക് തലകീഴായി മറിഞ്ഞു. ഡ്രൈവർ അദ്ഭുതകരമായി രക്ഷപ്പെട്ടു. എടത്വ പഞ്ചായത്ത് 15-ാം വാർഡിൽ തായങ്കരി വടകര ജെട്ടിക്ക് സമീപമാണ് അപകടം. തായങ്കരി എസ്എൻഡിപി പാലം മുതൽ വടകര ജെട്ടി വരെ റോഡുപണി നടക്കുന്നതിനാൽ ലോറി പിറകോട്ട് തിരിക്കുന്നതിനിടെയാണ് നിന്ത്രണം വിട്ട് തോട്ടിലേക്ക് മറിഞ്ഞത്. ഡ്രൈവർ ലോറിയിൽനിന്ന് ചാടിയതിനാൽ പരിക്കേൽക്കാതെ രക്ഷപ്പെട്ടു.

സഹകരണസംഘത്തിലെ സാന്പത്തിക ക്രമക്കേട്; പ്രതികരിക്കാത്തതിൽ നേതൃത്വത്തിനെതിരേ കോൺഗ്രസിൽ പ്രതിഷേധം

അന്പലപ്പുഴ: ലക്ഷങ്ങളുടെ സാമ്പത്തിക ക്രമക്കേട് നടന്ന സിപി എം നേതൃത്വത്തിലുള്ള സഹകരണ സംഘത്തിനെതിരേ പ്രതികരിക്കാത്ത കോൺഗ്രസ് നേതൃത്വത്തിനെതിരേ പാർട്ടിക്കുള്ളിൽ പ്രതിഷേധം. സേവ് യുഡിഎഫ് കൂട്ടായ്മ എന്ന പേരിൽ രൂപീകരിച്ച പുതിയ കൂട്ടായ്മയുടെ നേതൃത്വത്തിലാണ് കോൺഗ്രസിനെതിരേ പ്രചാരണം നടക്കുന്നത്. അമ്പലപ്പുഴ സർവീസ് സഹകരണ സംഘം 105-ാം നമ്പറിനു കീഴിലുള്ള കൊപ്പാറക്കടവിനു സമീപം പ്രവർത്തിക്കുന്ന എക്കോ ഷോപ്പിലെ ജീവനക്കാരിയായ അർച്ചനാ ആനന്ദാണ് ലക്ഷങ്ങളുടെ സാമ്പത്തികത്തട്ടിപ്പ് നടത്തിയത്. തട്ടിപ്പ് കണ്ടെത്തിയതിനെത്തുടർന്ന് ജീവനക്കാരിയെ സസ്പെൻഡ് ചെയ്തു. പിന്നീട് ഇവർ 11 ലക്ഷം രൂപയോളം തിരിച്ചടച്ചു. എങ്കിലും പോലീസിൽ പരാതി നൽകാൻ സംഘം അധികൃതർ തയാറായില്ല. സസ്പെൻഷൻ കാലാവധി കഴിയുന്ന ജീവനക്കാരിയെ തിരിച്ചെടുക്കാനാണ് നീക്കം.എംഎൽഎ ഇടപെട്ടാണ് ജീവനക്കാരിയെ തിരിച്ചെടുക്കാൻ നീക്കം നടത്തുന്നതെന്ന്‌ സി പി എം നേതാക്കൾതന്നെ പറയുന്നു. എന്നിട്ടും മുഖ്യ പ്രതിപക്ഷമായ കോൺഗ്രസ് ഈ വിഷയത്തിൽ മൗനം പാലിക്കുന്നതിനെതിരേയാണ് സേവ് കൂട്ടായ്മ ലഘുലേഖയുമായി സമൂഹ മാധ്യമങ്ങളിലൂടെ പ്രചരണം നടത്തുന്നത്. എംഎൽഎയ്ക്ക് സംരക്ഷണമൊരുക്കുന്ന തരത്തിലാണ് അമ്പലപ്പുഴ മണ്ഡലത്തിൽ കോൺഗ്രസ് നേതൃത്വം പ്രവർത്തിക്കുന്നതെന്നും സേവ് യുഡിഎഫ് കൂട്ടായ്മ ആരോപിക്കുന്നു. ഇതിനു മുൻപ് സ്ഥലം വാങ്ങിയതിലും ക്രമക്കേട് നടന്നിട്ടും കോൺഗ്രസ് പ്രതികരിച്ചിരുന്നില്ല. ജീവനക്കാരിയുടെ അഴിമതി പുറത്തുവന്ന് ആഴ്ചകൾ പിന്നിട്ടിട്ടും ജീവനക്കാരിയെ തിരിച്ചെടുക്കാൻ നീക്കം നടന്നിട്ടും ഒരു സമരം പോലും സംഘടിപ്പിക്കാൻ കോൺഗ്രസ് തയാറാകാത്തതിനെതിരേ അണികളിൽ പ്രതിഷേധമുയർന്നിട്ടുണ്ട്. എംഎൽഎയുമായുള്ള ഒത്തു തീർപ്പ് രാഷ്‌ട്രീയത്തിന്‍റെ ഭാഗമായാണ് കോൺഗ്രസ് നേതൃത്വം സംഘത്തിലെ അഴിമതി ഉൾപ്പെടെ പല വിഷയങ്ങളിലും സമരം നടത്താത്തതെന്നാണ് സേവ് യു ഡിഎഫ് ആരോപിക്കുന്നത്. ഈ വിഷയത്തിൽ മൗനം പാലിക്കുന്ന കോൺഗ്രസ് നേതൃത്വത്തിനെതിരേ സമൂഹ മാധ്യമങ്ങളിലൂടെയും രൂക്ഷമായ വിമർശനമാണ് ഉയരുന്നത്.

തങ്കി പള്ളിയിൽ പതിനായിരങ്ങൾ

ചേർത്തല: ക്രിസ്തുവിന്‍റെ പീഡാനുഭവസ്മരണ ശുശ്രൂഷകളിൽ പങ്കെടുക്കാൻ പ്രസിദ്ധ തീർഥാടന കേന്ദ്രമായ തങ്കി ഫൊറോന പള്ളിയിൽ പതിനായിരങ്ങൾ എത്തിക്കൊണ്ടിരിക്കുന്നു. അദ്ഭുത പീഡാനുഭവ തിരുസ്വരൂപം തൊട്ടുവണങ്ങാൻ ഇതര സംസ്ഥാനങ്ങളിൽ നിന്നുൾപ്പെടെ പതിനായിരങ്ങളാണ് ഇന്നലെ മുതൽ പളളിയങ്കണത്തിൽ കാത്തുനിന്നത്. ഇന്നലെ രാത്രി 12ന് കൊച്ചി രൂപത അപ്പസ്തോലിക് അഡ്മിനിസ്ട്രേറ്റർ ബിഷപ് ഡോ. ജയിംസ് റാഫേൽ ആനാപറമ്പിലിന്‍റെയും കൊച്ചി രൂപത മുൻ ബിഷപ് ഡോ.ജോസഫ് കരിയിലിന്‍റെയും മുഖ്യ കാർമികത്വത്തിൽ ദേവാലയത്തിന്‍റെ വലതുഭാഗത്തെ ഗ്ലാസ് പേടകത്തിൽനിന്നു പ്രത്യേക പ്രാർഥനകളോടെ തിരുസ്വരൂപം പുറത്തിറക്കി പള്ളിയങ്കണത്തെ മുല്ലപ്പന്തലിൽ പ്രതിഷ്ഠിച്ചു. കൊച്ചി രൂപതയിലെ വിവിധ ദേവാലയങ്ങളിലെ വൈദികർ സഹകാർമികത്വം വഹിച്ചു. ഇന്ന് രാത്രി 12 വരെ പന്തലിൽ വിശ്വാസികൾക്ക് തിരുസ്വരൂപം തൊട്ടു വണങ്ങാം. ഇന്നലെ വൈകുന്നേരം ദിവ്യബലിക്കും കാൽകഴുകൽ ശുശ്രൂഷയ്ക്കു ശേഷം നടന്ന മാനവമൈത്രീ ദീപക്കാഴ്ച കേന്ദ്രമന്ത്രി ജോർജ് കുര്യൻ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് ജയിംസ് ചിങ്കുതറ, കണ്ടമംഗലം ക്ഷേത്രസമിതി പ്രസിഡന്‍റ് അനിൽകുമാർ അഞ്ചംതറ, തങ്കിക്കവല മസ്ജിദ് കമ്മിറ്റിയംഗം എം.എ. കരിം, കിഴക്കേ കൊട്ടാരം ദേവസ്വം പ്രസിഡന്‍റ് ജയചന്ദ്രൻ കമലദളം എന്നിവർ പ്രസംഗിച്ചു. ഇന്നലെ രാവിലെ നേർച്ചക്കഞ്ഞിക്ക് അരിയിടൽ ചടങ്ങ് അരൂർ എംഎൽഎ ദലീമ ജോജോ നിർവഹിച്ചു. നേർച്ചക്കഞ്ഞി വിതരണം ഇന്നു രാത്രി 12 വരെ തുടരും. പിടിയരി സമർപ്പണം, മലര് നേർച്ച, നേർച്ചപ്പായസം, പാച്ചോർ നേർച്ച എന്നിവയ്ക്ക് പ്രത്യേക സൗകര്യമൊരുക്കിയിട്ടുണ്ട്. ഇന്നു രാവിലെ മുതൽ കുരിശിന്‍റെ വഴി, 10ന് കല്ലറജപം, പുത്തൻ പാന, മൂന്നു മുതൽ പീഡാനുഭവ ശുശ്രൂഷകൾ. അഞ്ചിന് നഗരി കാണിക്കൽ പ്രദക്ഷിണം. രാത്രി 12ന് കബറടക്കം.

ത്യാഗസ്മരണയിൽ ഇന്ന് ദുഃഖവെള്ളി

ആലപ്പുഴ: യേശുവിന്‍റെ കുരിശുമരണത്തെയും അതിന്‍റെ ത്യാഗസ്മരണകളെയും ലോകമെമ്പാടും ആചരിക്കുന്ന പുണ്യദിനമായ ദുഃഖവെള്ളിയുടെ കർമങ്ങൾ ഇന്ന് ദേവാലയങ്ങളിൽ നടക്കും. പ്രസിദ്ധ തീര്‍ഥാടന കേന്ദ്രമായ പൂങ്കാവ് പള്ളിയില്‍ ഇന്ന് നഗരികാണിക്കല്‍ ചടങ്ങ് നടക്കും. പൂങ്കാവ് പള്ളിയില്‍ സൂക്ഷിച്ചിരിക്കുന്ന കര്‍ത്താവിന്‍റെ പീഡാനുഭവ തിരുസ്വരൂപം വഹിച്ചുകൊണ്ട് പള്ളിയങ്കണത്തില്‍ നടത്തുന്ന വിലാപയാത്രയാണ് നഗരികാണിക്കല്‍. തുടര്‍ന്ന് പ്രസിദ്ധമായ ഉരുള്‍ നേര്‍ച്ച നടക്കും. പെസഹാ വ്യാഴാഴ്ചത്തെ തിരുക്കര്‍മങ്ങള്‍ക്ക് വികാരി ഫാ. സേവ്യര്‍ ചിറമേല്‍ മുഖ്യകാര്‍മികത്വം വഹിച്ചു. തുടര്‍ന്ന് പ്രസിദ്ധമായ ദീപുക്കാഴ്ചാ സമര്‍പ്പണം കെ.സി വേണുഗോപാല്‍ എംപി പ്രഥമ ദീപം തെളിച്ച് ഉദ്ഘാടനം ചെയ്തു. പി.പി. ചിത്തരഞ്ജന്‍ എംഎല്‍എ ചടങ്ങില്‍ പങ്കെടുത്തു. ഇന്നു പുലര്‍ച്ചെ നാലുമുതല്‍ മുതല്‍ ഉച്ചയ്ക്ക് ഒന്നുവരെ പള്ളിയില്‍ തുടര്‍ച്ചയായി കുരിശിന്റെ വഴി നടക്കും. തുടര്‍ന്ന് രണ്ടുവരെ പുത്തന്‍പാന, അമ്മാനം വായന തുടങ്ങിയ ചടങ്ങുകളും നടക്കും. പുലര്‍ച്ചെ അഞ്ചുമുതൽ രണ്ടുവരെ നേര്‍ച്ചക്കഞ്ഞി വിതരണം നടക്കും. നേര്‍ച്ചക്കഞ്ഞി വെഞ്ചിരിപ്പ് കൃപാസനം ഡയറക്ടര്‍ റവ.ഡോ. ജോസഫ് വലിയവീട്ടില്‍ നിര്‍വ്വഹിക്കും. വൈകുന്നേരം മൂന്നിന് പീഡാനുസ്മരണം, വചനപ്രഘോഷണ കര്‍മം, കുരിശാരാധന, ദിവ്യകാരുണ്യസ്വീകരണം എന്നിവ നടക്കും. ഫാ. ജോയി ജെ. ഒഎഫ്എം പീഡാനുഭവ പ്രസംഗം നടത്തും. എട്ടു മുതല്‍ നടക്കുന്ന കുരിശിന്‍റെ വഴിയില്‍ ഡോ ജോഷി മയ്യാറ്റില്‍ ധ്യാനപ്രസംഗം നടത്തും. പഴവങ്ങാടി പള്ളിയിൽ ആലപ്പുഴ: നൂറ്റാണ്ടുകളായി പഴവങ്ങാടി മാർ സ്ലീവാ തീർഥാടന പള്ളിയിൽ നടന്നുവരുന്ന ദുഃഖവെള്ളിയാഴ്ചയിലെ തിരുസ്വരൂപ നഗരികാണിക്കൽ ഇന്നു നടക്കും. നഗരികാണിക്കൽ ഇന്നു രാവിലെ 6 മുതൽ ഉച്ചയ്ക്ക് 12 വരെ വിശുദ്ധ കുർബാനയുടെ ആരാധന നടക്കും. വൈകുന്നേരം നാലിനാണ് ഇന്നത്തെ പ്രധാന ശുശ്രൂഷകൾ ആരംഭിക്കുന്നത്. രാത്രി 9ന് കബറടക്ക ശുശ്രൂഷയോടുകൂടെ തിരുക്കർമങ്ങൾ സമാപിക്കും. പീഡാനുഭവ ശുശ്രൂഷകൾക്ക് വികാരി ഫാ. സിറിയക് കോട്ടയിൽ, അസിസ്റ്റന്‍റ് വികാരിമാരായ ഫാ. മണിലാൽ ക്രിസ്, ഫാ. യോഹന്നാൻ കട്ടത്തറ, ഫാ. മൈക്കിൾ വെട്ടുകല്ലേൽ എന്നിവർ നേതൃത്വം നൽകും. മുട്ടം പള്ളിയിൽ മുട്ടം സെന്‍റ് മേരീസ് ഫൊറോന പള്ളിയിൽ പെസഹ ദിനത്തിൽ ദിവ്യബലി മധ്യേ നടന്ന കാൽകഴുകൽ ശുശ്രൂഷയിൽ വികാരി റവ.ഡോ. ആന്‍റോ ചേരാംതുരുത്തി, സഹവികാരി ഫാ.ബോണി കട്ടയ്ക്കകത്തൂട്ട് എന്നിവർ കാർമികത്വം വഹിച്ചു. ഇന്നു രാവിലെ 6.30ന് പീഡാനുഭവ തിരുക്കർമങ്ങൾ തുടങ്ങും. ദിവ്യബലി, കുരിശുരൂപ വന്ദനം, വൈകുന്നേരം നാലിന് ആഘോഷമായ കുരിശിന്‍റെ വഴി, ഫാ.ജോഷി വാസുപുരത്തുകാരൻ പീഡാനുഭവ സന്ദേശം നൽകും. തുടർന്ന് നഗരം ചുറ്റി വിലാപയാത്ര, തിരുസ്വരൂപ വണക്കം, കബറടക്കം. നാളെ രാവിലെ 6.30ന് പുത്തൻ വെള്ളം വെഞ്ചരിപ്പ്, ദിവ്യബലി, രാത്രി 10.30ന് ഉ യിർപ്പ് കുർബാന. പള്ളിപ്പുറം പള്ളിയിൽ പള്ളിപ്പുറം സെന്‍റ് മേരീസ് ഫൊറോന പള്ളിയിൽ പെസഹാദിന കാൽകഴുകൽ ശുശ്രൂഷയ്ക്ക് വികാരി റവ.ഡോ. പീറ്റർ കണ്ണമ്പുഴ, സഹവികാരി ഫാ. അമൽ പെരിയപ്പാടൻ, റെസി. പ്രീസ്റ്റ് ഫാ.ജോസഫ് മക്കോതകാട്ട്, ഫാ. മാത്യു കൂട്ടുങ്കൽ, ഫാ. അഖിൽ തിരുത്തനത്തി എന്നിവർ കാർമികത്വം വഹിച്ചു. ഇന്നു രാവിലെ 6.30ന് പീഡാനുഭവ വായന, വിശുദ്ധ കുർബാന സ്വീകരണം, ആഘോഷമായ കുരിശിന്‍റെ വഴി, വിശുദ്ധ കുരിശു ചുംബനം, നേർച്ചക്കഞ്ഞി വിതരണം. ഉച്ചകഴിഞ്ഞ് 3.30ന് നഗരികാണിക്കൽ. പള്ളിപ്പുറത്തിന്‍റെ വിവിധ ഭാഗങ്ങളിൽനിന്നു പരിഹാര പ്രദക്ഷിണമായി ഒറ്റപ്പുന്ന, തവണക്കടവ് വഴി പള്ളിപ്പുറം പള്ളിയിൽ എത്തിച്ചേരും. തുടർന്ന് പീഡാനുഭവ സന്ദേശം - ഫാ.ലിതിൻ തങ്കച്ചൻ.

കഞ്ചാവ് ബീഡി വലിച്ച ബസ് ഡ്രൈവർ പിടിയിൽ

ചേർത്തല: കഞ്ചാവ് ബീഡി വലിക്കുന്നതിനിടെ സ്വകാര്യബസ് ഡ്രൈവറെ എക്സൈസ് സംഘം അറസ്റ്റുചെയ്തു. ചേർത്തല സ്വകാര്യ ബസ്‌സ്റ്റാൻഡിനു തെക്കേ അരികിൽ നിന്ന് കഞ്ചാവ് ബീഡി വലിക്കുകയായിരുന്ന മാരാരിക്കുളം വടക്ക് പഞ്ചായത്ത് 18-ാം വാർഡ് തെക്കേവീട് ജെഫി(32) നെയാണ് ചേർത്തല റേഞ്ച് എക്സൈസ് ഇൻസ്പെക്ടർ പി.എം. സുമേഷും സംഘവും അറസ്റ്റ് ചെയ്തത്. ഇയാളുടെ പക്കൽനിന്ന് എട്ടു ഗ്രാം കഞ്ചാവും കണ്ടെടുത്തു. ജെഫിൻ സ്ഥിരമായി ലഹരി ഉപയോഗിച്ച് അപകടകരമാംവിധം ബസ് ഓടിക്കുന്നതായി യാത്രക്കാരിൽ നിന്നു ലഭിച്ച പരാതിയുടെ അടിസ്ഥാനത്തിലാണ് എക്സൈസ് സംഘം പരിശോധന നടത്തിയത്. കഴിഞ്ഞ ദിവസം മറ്റൊരു സ്വകാര്യ ബസ് തൊഴിലാളികളിൽനിന്നു നിരോധിത പുകയില ഉത്പന്നങ്ങൾ പോലീസ് പിടികൂടിയിരുന്നു.

പൂങ്കാവ് പള്ളിയില്‍ ഇന്ന് ദീപക്കാഴ്ച

ആലപ്പുഴ: പൂങ്കാവ് പള്ളിയില്‍ ഭക്തിസാന്ദ്രമായ പെസഹാരാവിന് ആത്മീയ ശോഭപകരുന്ന ദീപക്കാഴ്ച ഇന്നു നടക്കും. പെസഹാതിരുക്കര്‍മങ്ങള്‍ വൈകുന്നേരം ആറിന് ആരംഭിക്കും. വികാരി ഫാ. സേവ്യര്‍ ചിറമേല്‍ മുഖ്യ കാര്‍മികനായിരിക്കും. ഫാ. സെബാസ്റ്റ്യന്‍ പള്ളിപ്പറമ്പ് ഒസിഡി വചനപ്രഘാഷണം നടത്തും. തുടര്‍ന്ന് പരിശുദ്ധ കുര്‍ബാനയുടെ സ്ഥാപനം. കര്‍ത്താവിന്‍റെ തിരുസ്വരൂപം കല്ലറ ദേവാലയത്തില്‍ വയ്ക്കും. തുടര്‍ന്ന് വട്ടക്കല്ലില്‍ പ്രത്യേകം തയാറാക്കിയ മുല്ലപ്പന്തലില്‍ പൊതുവണക്കത്തിന് പ്രതിഷ്ഠിക്കും. രാത്രി എട്ടുമുതലാണ് ദീപക്കാഴ്ച ആരംഭിക്കുന്നത്. കെ.സി. വേണുഗോപാല്‍ എംപി പ്രഥമദീപം തെളിക്കും. പി.പി. ചിത്തരഞ്ജന്‍ എംഎല്‍എ ആമുഖ പ്രസംഗം നടത്തും. പെസഹാവ്യാഴാഴ്ച രാത്രി നേര്‍ച്ചക്കഞ്ഞിവയ്പ്പിന് തീ കൊളുത്തുന്നത് കൃപാസനം ഡയറക്ടര്‍ റവ. ഡോ. ജോസഫ് വലിയവീട്ടിലാണ്. രാത്രി 12ന് തുടങ്ങുന്ന കുരിശിന്‍റെവഴിയില്‍ ഫാ. സെബാസ്റ്റ്യന്‍ ഒസിഡി ധ്യാനപ്രസംഗം നടത്തും. വിശുദ്ധവാര തിരുക്കര്‍മങ്ങളുടെ തല്‍സമയ സംരക്ഷണം ഇന്‍റര്‍നെറ്റ് വഴി ഉണ്ടായിരിക്കും. പൂങ്കാവിലെത്തിച്ചേരുന്ന തീര്‍ഥാടകര്‍ക്കു വേണ്ടി കെഎസ്ആര്‍ടിസി, പ്രൈവറ്റ് ബസുകള്‍ പ്രത്യേക സര്‍വീസ് നടത്തും. ഫാസ്റ്റ്, സൂപ്പര്‍ ഫാസ്റ്റ് ബസുകള്‍ക്ക് പൂങ്കാവില്‍ പ്രത്യേക സ്റ്റോപ്പുകള്‍ ഉണ്ടായിരിക്കും. വാഹനങ്ങള്‍ക്ക് പ്രത്യേക പാര്‍ക്കിംഗ് സൗകര്യം ഒരുക്കിയിട്ടുണ്ട്. പോലീസിന്‍റെ കണ്‍ട്രോള്‍ റൂം തുറന്നിട്ടുണ്ട്.

തങ്കിപ്പള്ളിയിൽ ഇന്ന് മാനവമൈത്രീ ദീപം തെളിയും

ചേര്‍ത്തല: പെസഹാ വ്യാഴാഴ്ചയായ ഇന്ന് തീര്‍ഥാടന കേന്ദ്രമായ തങ്കി സെന്‍റ് മേരീസ് ഫൊറോനാ പള്ളിയില്‍ മാനവമൈത്രീ ദീപം തെളിയും. എട്ടു പതിറ്റാണ്ടിന് മുമ്പ് തങ്കി പള്ളിയില്‍ കര്‍ത്താവിന്‍റെ അദ്ഭുത തിരുസ്വരൂപം കൊണ്ടുവന്നപ്പോള്‍ നാട്ടിലെ ജനങ്ങള്‍ നിലവിളക്ക് കത്തിച്ച് രാപകല്‍ പ്രാര്‍ഥിച്ചുകൊണ്ടിരുന്നു. അക്കാലത്ത് സുലഭമായിരുന്ന തേങ്ങ ഉപയോഗിച്ച് ചക്കില്‍ ആട്ടിയ വെളിച്ചെണ്ണയാണ് ഉപയോഗിച്ചിരുന്നത്. ഈ വിളക്കില്‍ നിന്നെടുത്ത എണ്ണ വിശ്വാസികള്‍ മാറാരോഗങ്ങള്‍ക്കു പോലും ഔഷധമായി ഉപയോഗിക്കും. അതിന്‍റെ ഓര്‍മയ്ക്കായാണ് നാനാജാതി മതസ്ഥര്‍ ചേര്‍ന്ന് ദീപക്കാഴ്ച ഒരുക്കുന്നത്. ഇന്നു വൈകുന്നേരം ഏഴിന് കേന്ദ്രമന്ത്രി ജോര്‍ജ് കുര്യന്‍ ഉദ്ഘാടനം ചെയ്യും. കണ്ടമംഗലം ദേവസ്വം പ്രസിഡന്‍റ് അനില്‍കുമാര്‍ അഞ്ചംതറ, ചേര്‍ത്തല മുസ്‌ലിം ജമാഅത്ത് സെക്രട്ടറി എം.എ. കരീം, കിഴക്കേകൊട്ടാരം ദേവസ്വം പ്രസിഡന്‍റ് ജയചന്ദ്രന്‍ കമലദളം തുടങ്ങിയവര്‍ പങ്കെടുക്കും. വൈകുന്നേരംനടക്കുന്ന തിരുവത്താഴ ബലിക്ക് വികാരി ഫാ.ജോര്‍ജ് എടേഴത്ത് മുഖ്യകാര്‍മികത്വം വഹിക്കും. ഫാ. ജോഷി മയ്യാറ്റില്‍ വചനപ്രഘേഷണം നടത്തും. തുടര്‍ന്ന് നേര്‍ച്ചക്കഞ്ഞി വെഞ്ചരിപ്പ്, ആരാധന. രാത്രി 12ന് അദ്ഭുത തിരുസ്വരൂപം ചുംബനത്തിനായി പള്ളിയങ്കണത്തെ മുല്ലപ്പൂ പന്തലില്‍ കിടത്തും. കൊച്ചി രൂപത അപ്പസ്‌തോലിക് ബിഷപ് ഡോ. ജയിംസ് റാഫേല്‍ ആനാപറമ്പില്‍, മുന്‍ കൊച്ചി ബിഷപ് ഡോ. ജോസഫ് കരിയില്‍ എന്നിവര്‍ മുഖ്യ കാര്‍മികത്വം വഹിക്കും.

പുന്നപ്ര വെട്ടിക്കരി പാടശേഖരത്തെ നെല്ലെടുക്കാൻ ആളില്ല

അമ്പലപ്പുഴ: കൊയ്ത്തു കഴിഞ്ഞു ദിവസങ്ങളായിട്ടും നെല്ലെടുക്കാന്‍ ആളില്ല. മഴയെ പേടിച്ച് കര്‍ഷകര്‍ ആശങ്കയിലാണ്. 20 ലക്ഷത്തില്‍പ്പരം രൂപയുടെ നെല്ലാണ് കെട്ടിക്കിടക്കുന്നത്. പുന്നപ്ര വെട്ടിക്കരി പാടശേഖരത്തെ കര്‍ഷകരാണ് നെഞ്ചില്‍ കനലുമായി ആശങ്കയോടെ നില്‍ക്കുന്നത്. 480 ഏക്കറുള്ള ഈ പാടശേഖരത്ത് 235 കര്‍ഷകരാണുള്ളത്. ഏതാനും ദിവസം മുന്‍പ് ഇവിടെ കൊയ്ത്ത് പൂര്‍ത്തിയാക്കി. ഒരേക്കര്‍ കൊയ്യുന്നതിന് 2100 രൂപ നിരക്കില്‍ യന്ത്രമുപയോഗിച്ചാണ് കൊയ്ത്ത് പൂര്‍ത്തിയാക്കിയത്. കൊയ്ത നെല്ലെല്ലാം പാടശേഖരത്തിന്‍റെ പല ഭാഗങ്ങളിലായി കൂട്ടിയിട്ടിരിക്കുകയാണ്. ഈ പാടശേഖരത്തെ നെല്ലെടുക്കാന്‍ സിവില്‍ സപ്ലൈസ് മൂന്നു മില്ലുകളെയാണ് ചുമതലപ്പെടുത്തിയത്. ഇതില്‍ ഒരു മില്ല് തുടക്കത്തില്‍ത്തന്നെ സംഭരണത്തില്‍നിന്ന് പിന്‍മാറായിരുന്നു. മറ്റ് രണ്ടു മില്ലുകാരില്‍ ഒരു മില്ലിന്‍റെ ഏജന്‍റ് ഇവിടെയെത്തി നെല്ല് നോക്കിയ ശേഷം മടങ്ങിപ്പോയി. എന്നാല്‍, സംഭരണത്തില്‍ ഇതുവരെ ഒരു തീരുമാനവുമായിട്ടില്ലെന്നാണ് കര്‍ഷകര്‍ പറയുന്നത്. 700 ഓളം ക്വിന്‍റല്‍ നെല്ലാണ് മഴഭീഷണിയില്‍ പാടശേഖരത്ത് വിവിധയിടങ്ങളിലായി കൂട്ടിയിട്ടിരിക്കുന്നത്. ഉപ്പുവെള്ള ആശങ്കയ്ക്കിടെയാണ് കര്‍ഷകര്‍ മാസങ്ങള്‍ നീണ്ട അധ്വാനത്തിനൊടുവില്‍ കൃഷി പൂര്‍ത്തിയാക്കിയത്. ഒട്ടും ഈര്‍പ്പമില്ലാത്ത നെല്ല് മഴയില്‍ നനയിച്ച് ഈര്‍പ്പത്തിന്‍റെ പേരില്‍ കിഴിവ് കൂടുതല്‍ ആവശ്യപ്പെടാനുള്ള ഏജന്‍റുമാരുടെ തന്ത്രങ്ങളുടെ ഭാഗമായാണ് സംഭരണം വൈകിക്കുന്നത്. വേനല്‍ മഴ ഇടയ്ക്കിടെ ശക്തമാകുന്നതിനാല്‍ കൊയ്ത നെല്ലെല്ലാം മഴയില്‍ നശിക്കുമെന്ന ആശങ്കയിലാണ് കര്‍ഷകര്‍. ഏക്കറിന് നാല്‍പ്പതിനായിരം രൂപയോളം ചെലവിട്ടാണ് കര്‍ഷകര്‍ കൃഷി പൂര്‍ത്തിയാക്കിയത്. മില്ലുടമകളുടെ ഏജന്‍റുമാരും പാഡി ഓഫീസര്‍മാരും തമ്മിലുള്ള ഒത്തുകളിയുടെ ഭാഗമായാണ് ഈ പാടശേഖരത്തുള്‍പ്പെടെ എല്ലാ പാട ശേഖരത്തും സംഭരണം വൈകിക്കുന്നതെന്നാണ് കര്‍ഷകരുടെ ആരോപണം. കൂടുതല്‍ കിഴിവ് കര്‍ഷകര്‍ നല്‍കുന്നതുവരെ വില പേശല്‍ തന്ത്രവുമായാണ് ഏജന്‍റുമാരെത്തുന്നത്. ഇനി മഴ ശക്തമാകുമ്പോള്‍ നനയുന്ന നെല്ല് കൂടുതല്‍ കിഴിവോടെ വാങ്ങാനാണ് ഏജന്‍റുമാരുടെ നീക്കം. സിവില്‍ സപ്ലൈസ് ഉദ്യോഗസ്ഥരും ഇതിനായി കൂട്ടുനില്‍ക്കുകയാണെന്ന് കര്‍ഷകര്‍ കുറ്റപ്പെടുത്തി.

ലഹരിമുക്ത വനിതാ സ്ക്വാഡിന് രൂപം നൽകി

കായംകുളം: ലഹരിമുക്ത നാടിന് പിന്തുണയുമായി കായംകുളം നഗരസഭ പതിനാലാം വാർഡിനെ ലഹരിമുക്ത പ്രദേശമാക്കി മാറ്റാൻ കോൺഗ്രസ് വനിതാ സ്ക്വാഡിന് രൂപം നൽകി. കുടുംബസംഗമം കെപിസിസി ജനറൽ സെക്രട്ടറി എ.എ. ഷുക്കൂർ ഉദ്ഘാടനം ചെയ്തു. മഹാത്മാഗാന്ധിയും ജവഹർലാൽ നെഹ്റുവും സ്ഥാപിച്ച ജനാധിപത്യ മതേതര ആശയങ്ങളെ ഇല്ലാതാക്കാനാണ് നരേന്ദ്രമോദിയുടെ നേതൃത്വത്തിലുള്ള ബിജെപി ഫാസിസ്റ്റ് ഭരണകൂടം ശ്രമിക്കുന്നതെന്നും രാജ്യത്ത് ഇന്ന് കാണുന്ന എല്ലാ വികസനങ്ങളും നേടിയെടുത്ത് ഇന്ത്യയെ ലോകത്ത് നിർണായക ശക്തിയാക്കിതും പാവപ്പെട്ടവനെ ദാരിദ്ര്യത്തിൽനിന്നു കരകയറ്റിയതും ഇന്ത്യൻ നാഷണൽ കോൺഗ്രസ് ആണെന്നും അദ്ദേഹം പറഞ്ഞു. കെപിസിസി സെക്രട്ടറി ഇ. സമീർ മുഖ്യപ്രഭാഷണം നടത്തി. അൻസാരി കോയിക്കലേത്ത് അധ്യക്ഷത വഹിച്ചു. ചിറപ്പുറത്ത് മുരളി, റ്റി. സൈനുലാബ്ദീൻ, പി.സി. റെഞ്ചി, ബിജു നസറുള്ള, ബിജു കണ്ണങ്കര, ഷെരീഫ് തുടങ്ങിയവർ പ്രസംഗിച്ചു.

കൊയ്ത്ത് കഴിഞ്ഞ് ആഴ്ചകളായിട്ടും നെല്ലെടുക്കുന്നില്ല; കർഷകർ പ്രതിസന്ധിയിൽ

ചാരുംമൂട്: കൊയ്ത്ത് കഴിഞ്ഞ് ആഴ്ചകൾ ആയിട്ടും നെല്ലെടുത്ത് മാറ്റാത്തതിനെത്തുടർന്ന് ചുനക്കര ചൂരല്ലൂർ പാടശേഖരത്തിലെ കർഷകർ പ്രതിസന്ധിയിൽ. കൊയ്ത്ത് കഴിഞ്ഞ് മൂന്നാഴ്ചയായിട്ടും സപ്ലൈകോ ഇടപെട്ട് നെല്ലെടുത്തുമാറ്റാത്തതാണ് കർഷകരെ ദുരിതത്തിലാക്കിയിരിക്കുന്നത്. മില്ലുകാരുമായുള്ള ചർച്ചയിൽ നെല്ലെടുക്കുമ്പോഴുള്ള കിഴിവിന്‍റെ കാര്യത്തിൽ തീരുമാനമുണ്ടാകാത്തതാണ് കാരണം. കൃഷിവകുപ്പും കർഷകരുടെ രക്ഷയ്ക്കെത്തിയിട്ടില്ല. നെല്ല് ചാക്കുകളിലാക്കി കർഷകരുടെ വീടുകളിലും മറ്റും സൂക്ഷിച്ചിരിക്കുകയാണ്. വേനൽമഴ തുടർച്ചയായി പെയ്യുന്നതിനാൽ ഈർപ്പം കാരണം നെല്ലുകിളിർത്ത് കേടാവുമോയെന്ന ആശങ്കയിലാണ് കർഷകർ. കൃഷിയിറക്കിനുശേഷം ചുരല്ലൂർ പാടശേഖരത്തിലെ നെൽകൃഷിക്ക് വെള്ളം കിട്ടാത്തത് പ്രതിസന്ധി സൃഷ്ടിച്ചിരുന്നു. ഒരുവർഷം മുമ്പ് തകർന്ന കെഐപി കനാൽ നന്നാക്കി വെള്ളം തുറന്നുവിട്ടതോടെയാണ് കൃഷി രക്ഷപ്പെട്ടത്. കൊയ്ത്തുകഴിഞ്ഞ് നല്ല വിളവു ലഭിച്ചിട്ടും നെല്ലെടുക്കാൻ ആളില്ലാതായതോടെ കർഷകർ വീണ്ടും ബുദ്ധിമുട്ടിലായിരിക്കുകയാണ്. ചുരല്ലൂർ പാടശേഖരത്തിലെ 80 ഏക്കറിലാണ് കൃഷി ചെയ്തിരുന്നത്. ഇതിൽ 60 ഏക്കറിലെ 17 കർഷകരുടെ കൊയ്ത്ത് കഴിഞ്ഞു. 400 ക്വിന്‍റൽ നെല്ലാണ് കർഷകരുടെ വീടുകളിൽ, കൊടുക്കാനായി ചാക്കുകളിലാക്കി അട്ടിയിട്ടുവച്ചിരിക്കുന്നത്. മണിരത്ന നെൽവിത്താണ് കൃഷിയിറക്കിയിരുന്നത്. കുട്ടനാട് മങ്കൊമ്പിലെ പാഡി ഓഫീസിന്‍റെ നിർദേശപ്രകാരം മൂന്നു മില്ലുകാർ വന്ന് യന്ത്രമുപയോഗിച്ച്‌ നെല്ലു പരിശോധിച്ച് സാംപിളെടുത്തിരുന്നു. മെച്ചപ്പെട്ട ഉണങ്ങിയ നെല്ലാണെന്ന് അവർ കർഷകരോടു പറഞ്ഞിരുന്നു. ഉടൻ എത്താമെന്ന് പറഞ്ഞ് പോയെങ്കിലും ചുരല്ലൂർ പാടശേഖരത്തിലെ നെല്ലെടുക്കുന്നത് ഒഴിവാക്കിയെന്നാണ് പിന്നീട് അവർ അറിയിച്ചത്. കർഷകർ മില്ലുടമകളുമായി പലപ്രാവശ്യം ബന്ധപ്പെട്ടപ്പോൾ നെല്ല് എടുക്കണമെങ്കിൽ ഒരു ക്വിന്‍റൽ നെല്ലിന് നാലു കിലോ നെല്ല് കിഴിവ് തരണമെന്ന് ആവശ്യപ്പെട്ടു. കുട്ടനാടിനെ അപേക്ഷിച്ച് മാവേലിക്കരയിലെയും ചുനക്കരയിലെയും നെല്ലിന് അരി കൂടുതൽ കിട്ടുന്നതുകൊണ്ട് മുൻവർഷങ്ങളിൽ കിഴിവ് ചോദിച്ചിരുന്നില്ലെന്ന് കർഷകർ പറയുന്നു.

വെളിയനാട് ആശുപത്രി കെട്ടിടനിർമാണം അടിയന്തരമായി പൂർത്തീകരിക്കണം

മങ്കൊമ്പ്: വെളിയനാട് സാമൂഹ്യാരോഗ്യ കേന്ദ്രത്തിന്‍റെ പൊളിച്ചുനീക്കിയ കെട്ടിടത്തിനുപകരം ആധുനിക സൗകര്യങ്ങളോടു കൂടിയ പുതിയ കെട്ടിടം പണി അടിയന്തരമായി ആരംഭിക്കണമെന്ന് കേരള കോൺഗ്രസ് ജില്ലാ പ്രസിഡന്‍റ് ജേക്കബ് ഏബ്രഹാം ആവശ്യപ്പെട്ടു. ഈ ആവശ്യമുന്നയിച്ചു കേരള കോൺഗ്രസ് വെളിയനാട് മണ്ഡലം കമ്മിറ്റി ആശുപത്രിക്കു മുൻപിൽ നടത്തിയ പ്രതിഷേധ ധർണ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. ദിവസവും നൂറുകണക്കിനു രോഗികൾ ചികിത്സയ്ക്കായി എത്തുന്ന ആശുപത്രിയിൽ ഡോക്ടർമാർക്കു രോഗികളെ പരിശോധിക്കാനോ, കിടത്തി ചികിത്സിക്കാനോ, രോഗികൾക്കു കാത്തിരിക്കാനോ, യാതൊരു അടിസ്ഥാന സൗകര്യങ്ങളുമില്ല. ആശുപത്രിയിൽ ആവശ്യത്തിനുള്ള ജീവനക്കാരുമില്ല. പുറത്തുനിന്നു പണം കൊടുത്തു മരുന്നുവാങ്ങാൻ നിവൃത്തിയില്ലാത്തവർക്കുപോലും അത്യാവശ്യമുള്ള മരുന്നു ലഭ്യമല്ലെന്നും അദ്ദേഹം കുറ്റപ്പെടുത്തി. പാർട്ടി ഉന്നതാധികാര സമിതിയംഗം സാബു തോട്ടുങ്കൽ അധ്യക്ഷത വഹിച്ച യോഗത്തിൽ നിയോജക മണ്ഡലം പ്രസിഡന്‍റ് കെ.ആർ. ശ്രീകുമാർ, ചാക്കോച്ചൻ മൈലന്തറ, സനൽ മൂലയിൽ, സണ്ണി കൽക്കിശേരി, അനു ഏബ്രഹാം, ജോയി പുത്തൻതറ, തങ്കച്ചൻ മണ്ണാരുചിറ, ഡായി പത്തിൽ, ജോയി വലിയപറമ്പിൽ, ജയിംസ് സർപ്പത്തിൽ എന്നിവർ പ്രസംഗിച്ചു.

കാഞ്ചനാഭായിക്ക് വിഷുക്കൈനീട്ടമായി സ്നേഹഭവനം

കായംകുളം: നിർധനകുടുംബത്തിന് വിഷുക്കൈനീട്ടമായി സ്നേഹഭവനത്തിന്‍റെ താക്കോൽ കൈമാറി. കെ.സി. വേണുഗോപാൽ എംപിയുടെ ഇടപെടലിൽ കാഞ്ചനാഭായി എന്ന വീട്ടമ്മയ്ക്കാണ് പ്രവാസി വ്യവസായി വി.ടി. സലീം വീട് നിർമിച്ചുനൽകിയത്. സ്നേഹഭവനത്തിന്‍റെ താക്കോൽ ദാനം കെ.സി. വേണുഗോപാൽ എംപി നിർവഹിച്ചു. കരിയിലകുളങ്ങര പുത്തൻറോഡ് ജംഗ്ഷനിൽ നടന്ന ചടങ്ങിൽ വിഷുക്കൈനീട്ടമായി 101 അമ്മമാർക്ക് വിഷുക്കോടി വിതരണവും കായിക കലാരംഗത്ത് മികവ് തെളിയിച്ച പ്രതിഭകൾക്കുള്ള ഉപഹാര സമർപ്പണവും എംപി നിർവഹിച്ചു. ബ്ലോക്ക് കോൺഗ്രസ് പ്രസിഡന്‍റ് ടി. സൈനുലാബ്ദീൻ അധ്യക്ഷത വഹിച്ചു. മഹാദേവൻ വാഴശേരിൽ, കെ.പി. ശ്രീകുമാർ, ജോൺസൺ ഏബ്രഹാം, അഡ്വ. ഇ. സമീർ, ഷൈനു ക്ലെയർ മാത്യു എന്നിവർ പ്രസംഗിച്ചു.

വേനലിൽ മനം കുളിർപ്പിക്കാൻ താജുദ്ദീന്‍റെ പൊട്ടുവെള്ളരിയും ജ്യൂസും

പൂച്ചാക്കല്‍: വേനല്‍ച്ചൂടിന് ആശ്വാസം പകരാന്‍ പൊട്ടുവെള്ളരിയും ജ്യൂസുമായി താജുദ്ദീന്‍ ഇത്തവണയും വഴിയോരത്തുണ്ട്. പാണാവള്ളി പഞ്ചായത്ത് ഒന്നാം വാര്‍ഡില്‍ ജുനൈസ് മന്‍സില്‍ താജുദ്ദീനാണ് കഴിഞ്ഞ പത്തുവര്‍ഷമായി ചേര്‍ത്തല അരൂക്കുറ്റി റോഡില്‍ പുതിയ പാ ലത്തിനു സമീപം പൊള്ളുന്ന ചൂടിൽ മനം കുളിര്‍ക്കാന്‍ പൊട്ടുവെള്ളരിയും ജ്യൂസും വില്പന നടത്തുന്നത്. കൊടുങ്ങല്ലൂര്‍, മാള എന്നിവിടങ്ങളിലെ കൃഷിയിടങ്ങളില്‍ നിന്നാണ് താജുദ്ദീന്‍ പൊട്ടുവെള്ളരി ശേഖരിച്ച് വില്പനയ്ക്ക് എത്തിക്കുന്നത്. കേരളത്തില്‍ ഭൗമ സൂചികാ പദവി ലഭിച്ച കാര്‍ഷിക വിളയാണ് കൊടുങ്ങല്ലൂരിലെ പൊട്ടുവെള്ളരി. നാട്ടിന്‍പുറങ്ങളില്‍ കൂടുതലും കൃഷി ചെയ്യുന്ന വെള്ളരി വര്‍ഗങ്ങള്‍ കറിവയ്ക്കാനും സാലഡ് ആയും പച്ചയ്ക്കും കഴിക്കാനുമൊക്കെയാണ് ഉപയോഗിക്കുന്നതെങ്കില്‍ പൊട്ടുവെള്ളരി ജ്യൂസായിട്ടാണ് ഉപയോഗിക്കുന്നത്. പൊട്ടുവെള്ളരി ജ്യൂസ് കുടിക്കാന്‍ നിരവധി ആളുകളാണ് ഇവിടെ എത്തുന്നത്. പാകമായ ഒരുകിലോ പൊട്ടുവെള്ളരി 60 രൂപയാണെങ്കില്‍ ജ്യൂസിന് 30 രൂപയാണ് വില. എന്നാല്‍, വീണ്ടും ജ്യൂസ് ആവശ്യപ്പെട്ടാല്‍ അത് സൗജന്യമായി നല്‍കാനും താജുദീന് മടിയില്ല. പൊട്ടുവെള്ളരി ജൂസിനോടൊപ്പം തണ്ണിമത്തൻ ജ്യൂസും ഇവിടെ ലഭ്യമാണ്. ഭാര്യ സബീനയും താജുദ്ദീന് സഹായത്തിനായി ഒപ്പമുണ്ട്.

നാലര നൂറ്റാണ്ടിന്‍റെ ആചാരമായ അവൽനേർച്ച ഇന്ന് ചെങ്ങന്നൂർ പഴയ സുറിയാനി പള്ളിയിൽ

ചെങ്ങന്നൂർ: നാലര നൂറ്റാണ്ടിന്‍റെ ചരിത്രം പേറുന്ന അവൽ നേർച്ച പഴയ സുറിയാനി പള്ളിയിൽ ഇന്നു രാവിലെ പത്തിന് നടക്കും. നാലര നൂറ്റാണ്ടുകൾക്കുമുൻപ് മുക്കത്ത് തറവാട്ടിലെ അക്കാമ്മ വല്യമ്മച്ചി തുടങ്ങിയതാണ് ഈ ആചാരം. പെസഹാവ്യാഴാഴ്ച തനിക്ക് കഴിക്കാനായി മടിക്കുത്തിൽ കൊണ്ടുവരുന്ന അവൽ വിശുദ്ധ കുർബാനയ്ക്കു ശേഷം മറ്റുള്ളവരുമായി പങ്കിട്ടാണ് കഴിച്ചിരുന്നത്. അക്കാമ്മ വല്യമ്മച്ചിയുടെ കാലശേഷം ; 1901ൽ മുക്കത്ത് കുടംബയോഗം രൂപീകരണത്തെത്തു ടർന്ന് പിൻതലമുറക്കാർ നേർച്ചയായി അവൽ വിതരണം നടത്തിവരുന്നു. അവലിനുള്ള തേങ്ങാ തിരുമ്മുന്നത് ഒറ്റത്തടിയിൽ തീർത്ത എട്ടുനാക്കുള്ള ചിരവ ഉപയോഗിച്ചാണ്. ഈ ചിരവ പെസഹായുടെ തലേ ദിവസം മാത്രമാണ് പുറത്തെടുക്കുന്നത്. മുന്നൂറ്റി അൻപതു കിലോ അവൽ, വിശ്വാസികളുടെ വീടുകളിൽനിന്ന് ശേഖരിക്കുന്ന ആയിരത്തി അഞ്ഞൂറ് തേങ്ങ, 350 കിലോ ശർക്കര, മറ്റു സുഗന്ധ വ്യഞ്ജനങ്ങൾ എന്നിവ ഉപയോഗിച്ചാണ് അവൽ തയാറാക്കുന്നത്. എട്ടു നാക്കുള്ള ചിരവയിൽ തേങ്ങ തിരുമ്മുന്നതിനായി ജാതിമതഭേദമെ ന്യേ ധാരാളംപേർ ഇവിടെ എത്താറുണ്ട്. ഇന്നലെ വൈകുന്നേരം തുടങ്ങിയ ജോലികൾ ഇന്നു രാവിലെ ആറിന് അവസാനിക്കും. വിശു ദ്ധ കുർബാനയ്ക്കുശേഷം വൈദികൻ ആശീർവദിച്ച അവൽ വിശ്വാസികൾ പ്രത്യേകം കരുതുന്ന മേൽമുണ്ടിലാണ് സ്വീകരിച്ചുവരുന്നത്. മുക്കത്ത് കുടുംബയോഗം പ്രസിഡന്‍റ് പുന്നൂസ് ജോർജ് മൂത്തേടത്ത്, സെക്രട്ടറി ജോർജ് ജോസ് നമ്പുമഠം, ട്രഷറർ ഈപ്പൻ കെ. ഫിലിപ്പ് കപ്ലാശേരിൽ തുടങ്ങിയവർ നേതൃത്വം നൽകും.

കാലാവസ്ഥാ വ്യതിയാനം; കർഷകർ ആശങ്കയിൽ

ഹരിപ്പാട്: ഭാഗികമായി മഴ ആരംഭിക്കുകയും നദികളിൽ ജലനിരപ്പ് നേരിയ തോതിൽ ഉയരുകയും ചെയ്തതോടെ നെൽകർഷകർ ആശങ്കയിലായി. വീയപുരം കൃഷിഭവൻ പരിധിയിലെ ചേക്കാമായിക്കേരി ഹരിപ്പാട് കൃഷിഭവൻ പരിധിയിലെ മഞ്ഞപ്പള്ളി പാടശേഖരങ്ങൾ ഉൾപ്പെടെ ഹെക്ടർ കണക്കിന് പാടശേഖരങ്ങളിലെ നൂറുകണക്കിന് കർഷകരാണ് ആശങ്കയിൽ കഴിയുന്നത്. വിളവെടുക്കണമെങ്കിൽ ഉദ്ദേശം ഒരുമാസത്തോളം ഇനിയും പിന്നിടണമെന്നിരിക്കെ അപ്പർ കുട്ടനാടൻ പാടശേഖരങ്ങളിൽ ഏതാനും ദിവസങ്ങളായി ഉച്ചയ്ക്കുശേഷം ശക്തമായ മഴയാണ് ലഭിക്കുന്നത്. തണ്ണീർമുക്കം ബണ്ടിന്‍റെ ഷട്ടറുകൾ തുറന്നതോടെ നദികളിൽ നേരിയ തോതിലുള്ള ജലനിരപ്പ് ഉയർന്നു തുടങ്ങിയതും ഓരിന്‍റെ സാന്നിധ്യം അനുഭവപ്പെടാൻ സാധ്യത ഏറിയതുമാണ് കർഷകരെ ആശങ്കയിലാക്കുന്നത്. പാടശേഖരങ്ങളുടെ പുറം ബണ്ടുകളുടെ അപര്യാപ്തത മൂലം ഏറെ വൈകി മാത്രമേ ഈ പാടശേഖരങ്ങളിൽ കൃഷിയിറക്കാൻ കഴിയൂ. ഡിസംബർ അവസാനവാരമോ ജനുവരി ആദ്യ വാരമോ ആണ് ഇവിടെ വിതയിറക്കുന്നത്. ഇതിനകം തന്നെ കർഷകർ ഏക്കറിന് 35,000 രൂപയിലധികം വിനിയോഗിച്ചു കഴിഞ്ഞു. മുടക്കിയ തുകയെങ്കിലും തിരികെ ലഭിക്കുമോ എന്ന ആശങ്കയും കർഷകർ പരസ്പരം പങ്കുവയ്ക്കുന്നുണ്ട്. ഒന്നാം കുട്ടനാട് പാക്കേജിൽ 1840 കോടിയുടെ പദ്ധതികൾ പ്രഖ്യാപിച്ചതിൽ കാർഷിക മേഖലയുടെ കെട്ടുറപ്പിനും സംരക്ഷണത്തിനുമാണ് പ്രാമുഖ്യം നൽകിയിരുന്നതെങ്കിലും അപ്പർ കുട്ടനാട്ടിലെ പുഞ്ചപ്പാടങ്ങളിൽ കാർഷിക നവീകരണ പദ്ധതികളുടെ യാതൊരു അലയൊലികളും ഉണ്ടായില്ല എന്നതാണ് പാടശേഖരസമിതികൾ പങ്കുവയ്ക്കുന്നത്. പാടശേഖരങ്ങളുടെ പുറംബണ്ടുകൾ സംരക്ഷിച്ചാൽ രണ്ടു കൃഷി ചെയ്യാൻ പറ്റുന്ന ഏക്കറിൽ 20 മുതൽ 30 ക്വിന്‍റൽ നെല്ല് വരെ വിളയുന്ന പാടശേഖരങ്ങളാണ് അധികവും. ഹാർബർ എൻജിനിയറിംഗ് പദ്ധതിയിൽ പെടുത്തിയിട്ടെങ്കിലും പാടശേഖരങ്ങളുടെ പുറംബണ്ടുകൾ സംരക്ഷിക്കാൻ അധികൃതർ തയാറായില്ലെങ്കിൽ അപ്പർ കുട്ടനാട്ടിലെ ഹെക്ടർ കണക്കിന് വരുന്ന നെൽപ്പാടങ്ങൾ തരിശുനിലങ്ങളായി മാറുമെന്നും കർഷകരും പാടശേഖര സമിതികളും പറയുന്നു.

എവറസ്റ്റ് ബേസ് ക്യാന്പ് കീഴടക്കി മോൻസിജോൺ

നൗഷാദ് മാങ്കാംകുഴി ചാരുംമൂട്: ഹിമാലയം കീഴടക്കിയതിനു പിന്നാലെ എവറസ്റ്റ് ബേസ് ക്യാമ്പും കീഴടക്കി അഭിമാന നേട്ടം കൈവരിച്ചിരിക്കുകയാണ് അമ്പത്തൊന്നുകാരനായ മോന്‍സി ജോണ്‍. പ്രകൃതി സ്‌നേഹിയായ വെട്ടിയാര്‍ ജെയ്മി ഭവനത്തില്‍ മോന്‍സി ജോണ്‍ എവറസ്റ്റ് ബേസ് ക്യാമ്പ് കീഴടക്കണമെന്ന ജീവിതത്തിലെ തന്‍റെ വലിയ ആഗ്രഹമാണ് ഇപ്പോള്‍ സഫലീകരിച്ചിരിക്കുന്നത്. മോന്‍സിഉള്‍പ്പെടുന്ന ഒമ്പതംഗ സംഘം ഏപ്രില്‍ ഒന്നിനാണ് എവറസ്റ്റ് ബേസ് ക്യാമ്പ് ലക്ഷ്യമിട്ട് നേപ്പാള്‍ കാഠ്മണ്ഡുവിലേക്കു യാത്ര പുറപ്പെട്ടത്. കഴിഞ്ഞ വെള്ളിയാഴ്ചയാണ് മോന്‍സിയും സംഘവും ബേസ് ക്യാമ്പ് കീഴടക്കിയത്. മാങ്കാംകുഴി ജംഗ്ഷനില്‍ ഫര്‍ണ്ണീച്ചര്‍ വ്യാപാരം നടത്തുന്ന മോന്‍സി ജോണ്‍ ഒഴിവ് ദിനങ്ങള്‍ പരിസ്ഥിതി സംരക്ഷണത്തിനു വേണ്ടി മാറ്റിവയ്ക്കുന്ന പ്രകൃതി സ്‌നേഹിയാണ്. കേരളത്തിലെ വിവിധ ജില്ലകളില്‍ സംഘടിപ്പിക്കുന്ന മാരത്തണിലും മോന്‍സി പങ്കെടുക്കാറുണ്ട്. കഴിഞ്ഞ ഏഴുവര്‍ഷമായി നെല്ലിയാമ്പതി കേന്ദ്രീകരിച്ച് നാരായണ സ്വാമിയുടെ നേതൃത്വത്തില്‍ പ്രവര്‍ത്തിക്കുന്ന നേച്ചര്‍ ഗാര്‍ഡ്സ് ഇനിഷിയേറ്റിവ് എന്‍ജിഐ എന്ന പരിസ്ഥിതി കൂട്ടായ്മയില്‍ അംഗമായി പ്രവര്‍ത്തിച്ചു വരികയാണ്. എല്ലാമാസവും ഒരു ഞായറാഴ്ച നെല്ലിയാമ്പതിയില്‍ ഒത്തുകൂടുന്ന ഈ കൂട്ടായ്മ കേരളത്തിലെ വിവിധ ജില്ലകളിലെ ടൂറിസ്റ്റ് കേന്ദ്രങ്ങള്‍ ഉള്‍പ്പെടെ സന്ദര്‍ശിച്ച് സഞ്ചാരികള്‍ വലിച്ചെറിയുന്ന പ്ലാസ്റ്റിക് വസ്തുക്കളും മാലിന്യങ്ങളും ശേഖരിച്ച് മാലിന്യമുക്തമാക്കാനുള്ള പ്രവര്‍ത്തനങ്ങളില്‍ പങ്കാളിയായി വരികയാണ്. മോന്‍സിയുടെ പരിസ്ഥിതി സംരക്ഷ പ്രവര്‍ത്തനങ്ങള്‍ക്കും യാത്രകള്‍ക്കും ഭാര്യ ജെയ്മി മോന്‍സി, മക്കളായ മെറിന്‍, മെബിന്‍ ഉള്‍പ്പെടുന്ന കുടുംബത്തിന്‍റെ വലിയ പിന്തുണയുമുണ്ട്.

വീട്ടമ്മയെ ചുറ്റികയ്ക്ക് അടിച്ചു കൊന്നു; സഹോദരങ്ങൾ പിടിയിൽ

പൂച്ചാക്കല്‍: വീട്ടമ്മയെ ചുറ്റികയ്ക്ക് അടിച്ചുകൊന്നു. അരൂക്കുറ്റി പഞ്ചായത്ത് ഒന്നാം വാ ര്‍ഡില്‍ പുന്നത്താഴെ ശരവണന്‍റെ ഭാര്യ വനജ (50) ആണ് മരണപ്പെട്ടത്. കഴിഞ്ഞദിവസം രാത്രി പത്തിനാണ് സംഭവം. കേസുമായി ബന്ധപ്പെട്ട് അയല്‍വാസികളായ സഹോദരങ്ങളെ പൂച്ചാക്കല്‍ പോലീസ് പിടികൂടി. അരൂക്കുറ്റി പഞ്ചായത്ത് മൂന്നാം വാര്‍ഡില്‍ പുളിന്താഴത്ത് നികര്‍ത്തില്‍ വിജീഷ്, ജയേഷ് (42) എന്നിവരാണ് പിടിയിലായത്. സംഭവത്തെപ്പറ്റി പോലീസ് പറയുന്നത് ഇങ്ങനെ: ആറുമാസം മുമ്പ് പ്രതികളുടെ പിതാവിനെതിരേ വനജയുടെ സഹോദരന്‍ ബാബു പൂച്ചാക്കല്‍ പോലീസില്‍ പരാതി നല്‍കിയിരുന്നു. ഇതിലുള്ള വിരോധത്തിലാണ് പ്രതികള്‍ വനജയുടെ വീട്ടില്‍ അതിക്രമിച്ചുകയറി ആക്രമണം നടത്തിയത്. ജയേഷ് വനജയുടെ തലയ്ക്ക് ചുറ്റികയ്ക്ക് അടിക്കുകയായിരുന്നു. വിജേഷ് വനജയുടെ ഭര്‍ത്താവ് ശരവണനെ ചുറ്റികകൊണ്ട് കൈക്കും നെഞ്ചിനും അടിച്ചു. തടയാനെത്തിയ വനജയുടെ മകന്‍ ശരത്തിനെ ചുറ്റികകൊണ്ട് അടിച്ചു. വനജയെ എറണാകുളത്തെ സ്വകാര്യ ആശുപത്രിയില്‍ എത്തിച്ചെങ്കിലും മരണം സംഭവിച്ചു. ശരവണന്‍, ശരത്ത് എന്നിവര്‍ ചേര്‍ത്തല താലൂക്ക് ആശുപത്രിയില്‍ ചികിത്സയിലാണ്.

വീണ്ടും മാവേലിക്കര നഗരസഭ പിടിച്ചു കോൺഗ്രസ്

മാവേലിക്കര: കടുത്ത രാഷ്ട്രീയ മത്സരങ്ങൾക്ക് ഇടയിൽനിന്നു ചാണക്യ ബുദ്ധിയോടെ കോൺഗ്രസ് വീണ്ടും മാവേലിക്കര നഗരസഭാ ചെയർമാൻ പദവി നിലനിർത്തി. കോൺഗ്രസ്-9, ബിജെപി-9, ജനാധിപത്യ കേരള കോൺഗ്രസ്-1, സിപിഎം സ്വതന്ത്രൻ-1, സിപിഎം-7, സ്വതന്ത്രൻ-1 എന്നിങ്ങനെയാണ് കക്ഷിനില. കോൺഗ്രസ് പിന്തുണയോടെ അധികാരത്തിൽ ഏറിയ സ്വതന്ത്രനായ കെ.വി. ശ്രീകുമാർ കോൺഗ്രസ് നൽകിയ അവിശ്വാസത്തെത്തുടർന്ന് പുറത്തായിരുന്നു. ഇതിനെത്തുടർന്ന് നടന്ന നഗരസഭാ ചെയർമാൻ തെരഞ്ഞെടുപ്പിൽ ജനാധിപത്യ കേരള കോൺഗ്രസ് അംഗം ബിനു വർഗീസിന്‍റെ പിന്തുണയോടെയാണ് കോൺഗ്രസ് സ്ഥാനാർഥി നൈനാൻ സി. കുറ്റിശേരിൽ ചെയർമാനായത്. നിലവിൽ ചെയർമാനായിരുന്ന കെ.വി. ശ്രീകുമാർ സിപിഎമ്മിനെ പിന്തുണയ്ക്കുകയും ചെയ്തു. ചെയർമാൻ തെരഞ്ഞെടുപ്പിലെ സിപിഎം സ്ഥാനാർഥി ലീലാ അഭിലാഷിന് 9 വോട്ടുകളും ബിജെപി സ്ഥാനാർഥി എച്ച്. മേഘനാഥിന് 9 വോട്ടുകളും ലഭിച്ചപ്പോൾ കോൺഗ്രസ് സ്ഥാനാർഥി നൈനാൻ സി. കുറ്റിശേരിലിന് 10 വോട്ടുകൾ ലഭിക്കുകയായിരുന്നു. നഗരസഭയിലെ ചെയർമാൻ തെരഞ്ഞെടുപ്പിലേക്ക് നൈനാൻ സി. കുറ്റിശേരിലിന്‍റെ പേര് അനി വർഗീസ് നിർദേശിക്കുകയും ലളിത രവീന്ദ്രനാഥ് പിന്തുണയ്ക്കുകയുമായിരുന്നു. വിപ്പ് ലംഘിച്ചാണ് ബിനു വർഗീസ് കോൺഗ്രസിനെ പിന്തുണച്ചത്. നിലവിൽ വികസനകാര്യ ചെയർമാനായിരുന്ന നൈനാൻ ചെയർമാനായതോടെ ഒഴിവുവരുന്ന സ്റ്റാൻഡിംഗ് കമ്മിറ്റി ചെയർമാൻ തെരഞ്ഞെടുപ്പിൽ കോൺഗ്രസിന് നഷ്ടമുണ്ടാകാനാണ് സാധ്യത. നിലവിൽ ഒരു സ്റ്റാഡിംഗ് കമ്മിറ്റിയിലും അംഗമല്ലാതിരുന്ന കെ.വി.ശ്രീകുമാർ വികസനകാര്യ സ്റ്റാൻഡിംഗ് കമ്മിറ്റിയിലേക്ക് കോപ്റ്റ് ചെയ്യപ്പെടും. ഇതോടെ വികസന കാര്യസ്റ്റാൻഡിംഗ് കമ്മിറ്റിയിൽ കോൺഗ്രസ്- 2, സിപിഎം-2, സ്വതന്ത്രൻ-1 എന്നിങ്ങനെയാകും കക്ഷിനില. സ്വതന്ത്രനായ കെ.വി. ശ്രീകുമാർ എടുക്കുന്ന നിലപാടായിരിക്കും വികസനകാര്യ സ്റ്റാൻഡിംഗ് കമ്മിറ്റി ചെയർമാൻ ആരായിരിക്കും എന്ന് തീരുമാനിക്കുക. നിലവിൽ ചെയർമാൻ തെരഞ്ഞെടുപ്പിൽ സിപിഎമ്മിന് ഒപ്പം നിന്ന കെ.വി. ശ്രീകുമാർ അങ്ങനെ തുടരുകയാണെങ്കിൽ കോൺഗ്രസിന് വികസനകാര്യ സ്റ്റാൻഡിംഗ് കമ്മിറ്റി നഷ്ടമാകും. ജനവിരുദ്ധതയ്ക്ക് ഏറ്റ തിരിച്ചടിയാണ് യുഡിഎഫ് വിജയം: അനി വർഗീസ് മാവേലിക്കര: കേന്ദ്ര-കേരള സർക്കാരുകളുടെ ജനവിരുദ്ധതയ്ക്ക് ഏറ്റ തിരിച്ചടിയാണ് നഗരസഭയിൽ യുഡിഎഫിനുണ്ടായ വിജയമെന്ന് ബ്ലോക്ക് കോൺഗ്രസ് പ്രസിഡന്‍റ് അനി വർഗീസ് പറഞ്ഞു. മുൻ ചെയർമാൻ കെ.വി.ശ്രീകുമാറിനെ ഉപയോഗിച്ച് നഗരസഭയിൽ വികസന മുരടിപ്പ് സൃഷ്ടിക്കാൻ ശ്രമിച്ച സിപിഎമ്മിന് കരണത്തേറ്റ അടികൂടിയാണ് ഇത്. ചെയർമാൻ തെരഞ്ഞെടുപ്പോടെ ആർക്കൊപ്പമായിരുന്നു കെ.വി. ശ്രീകുമാറെന്ന് മാവേലിക്കര നിവാസികൾക്ക് മനസിലായിട്ടുണ്ട്. നാലേകാൽ വർഷവും കോൺഗ്രസിനൊപ്പം നിന്ന് സിപിഎമ്മിനുവേണ്ടി പണിചെയ്യുകയായിരുന്നു അദ്ദേഹം. ബിജെപിയുടെ ആശീർവാദവും ഈ കുൽസിത പ്രവർത്തിക്ക് ശ്രീകുമാറിനുണ്ടായിരുന്നു. അതുകൊണ്ടുതന്നെയാണ് അവിശ്വാസത്തിൽ വോട്ട് ചെയ്യാതെ ബിജെപി വിട്ടുനിന്നതും. നേരിന്‍റെ രാഷ്ട്രീയമാണ് കോൺഗ്രസും യുഡിഎഫും പിന്തുടരുന്നതെന്നും ബിജെപിക്കും-സിപിഎമ്മിനുമുള്ള മറുപടി അടുത്ത തെരഞ്ഞെടുപ്പിൽ ജനം നൽകുമെന്നും അനി വർഗീസ് പറഞ്ഞു. നഗരസഭയിൽ കുതിരക്കച്ചവടം: സിപിഎം മാവേലിക്കര: നഗരസഭയിൽ അധ്യക്ഷസ്ഥാനത്തേക്ക് നടന്ന തെരഞ്ഞെടുപ്പിൽ ഒരു വിഭാഗം കോൺഗ്രസ് നടത്തിയത് നെറികെട്ട കുതിരക്കച്ചവടമാണെന്ന് സിപിഎം മാവേലിക്കര ഏരിയ കമ്മിറ്റി പ്രസ്താവനയിൽ പറഞ്ഞു. ലീല അഭിലാഷായിരുന്നു ഇടതുപക്ഷ ജനാധിപത്യമുന്നണി സ്ഥാനാർഥി. എൽഡിഎഫും ജനാധിപത്യ കേരള കോൺഗ്രസും നിയമപരമായി നൽകിയ വിപ്പ് ലംഘിച്ച് നഗരസഭാ കൗൺസിലറായ ജനാധിപത്യ കേരള കോൺഗ്രസിലെ ബിനു വർഗീസ് കോൺഗ്രസ് സ്ഥാനാർഥി നൈനാൻ കുറ്റിശേരിക്ക് വോട്ട് ചെയ്തു. കോൺഗ്രസ് സ്ഥാനാർഥിയിൽ നിന്ന് ലക്ഷക്കണക്കിന് രൂപ വാങ്ങിയാണ് ബിനു വർഗീസ് രാഷ്ട്രീയ നെറികേട് കാട്ടിയത്. എന്ത് നെറികെട്ട നിലയിലുള്ള രാഷ്ട്രീയ പ്രവർത്തനമാണ് മാവേലിക്കരയിലെ ഒരു വിഭാഗം കോൺഗ്രസ് നേതാക്കൾ നടത്തുന്നത് എന്നതിന്‍റെ ഉത്തമ ഉദാഹരണമാണ് തെരഞ്ഞെടുപ്പിൽ പ്രകടമായത്. വിപ്പ് ലംഘിച്ച് വോട്ട് ചെയ്തതിന് ബിനു വർഗീസിനെതിരേ നിയമപരമായ നടപടികൾ സ്വീകരിക്കുമെന്നും പ്രസ്താവനയിൽ പറഞ്ഞു.

മുത്തപ്പസംഘം 25-ാം വര്‍ഷവും മലയാറ്റൂരിലേക്ക്

എടത്വ: മുത്തപ്പസംഘത്തിന്‍റെ നേതൃത്വത്തില്‍ എടത്വായില്‍നിന്ന് മലയാറ്റൂരിലേക്ക് കാല്‍നടയായി 25-ാം വര്‍ഷവും യാത്ര തിരിച്ചു. എടത്വ സെന്‍റ് ജോര്‍ജ് ഫൊറോനാ പള്ളി വികാരി ഫാ. ഫിലിപ്പ് വൈക്കത്തുകാരന്‍റെ കാര്‍മികത്വത്തില്‍ നടന്ന പ്രത്യേക പ്രാര്‍ഥനയ്ക്കുശേഷമാണ് മലയാറ്റൂരിലേക്ക് മുത്തപ്പ സംഘം യാത്ര തിരിച്ചത്. ചങ്ങംകരി സെന്‍റ് ജോസഫ്, ചമ്പക്കുളം കല്ലൂര്‍ക്കാട്, പള്ളാത്തുരുത്തി സെന്‍റ് തോമസ്, ആലപ്പുഴ മൗണ്ട് കാര്‍മല്‍ കത്തീഡ്രല്‍, പട്ടണക്കാട് സെന്‍റ് ജോസഫ് ചാപ്പല്‍, അരൂര്‍ സെന്‍റ് അഗസ്റ്റിന്‍, കളമശേരി സെന്‍റ് ജോസഫ്, ചുവര സെന്‍റ് മേരീസ്, കാലടി സെന്‍റ് ജോസഫ് എന്നീ പള്ളികളില്‍ ദര്‍ശനം നടത്തിയ ശേഷം മുത്തപ്പ സംഘം 17ന് രാവിലെ മലയാറ്റൂര്‍ കുരിശുമല കയറും. 25 വര്‍ഷമായി തുടരുന്ന കാല്‍നട തീര്‍ഥയാത്രയ്ക്ക് തോമസ് വര്‍ക്കി ആലപ്പാട്, വിനില്‍ തോമസ് വേഴക്കാട് എന്നിവരാണ് നേതൃത്വം നല്‍കുന്നത്.

കുരിശിന്‍റെവഴിക്ക് അനുമതി നിഷേധിച്ചതിൽ പ്രതിഷേധം

കുട്ടനാട്: ഓശാന ഞായറോടനുബന്ധിച്ച് രാജ്യ തലസ്ഥാനമായ ഡൽഹി സേക്രഡ് ഹാർട്ട് പള്ളിയിൽ കുരിശിന്‍റെ വഴിക്ക് അനുമതി നിഷേധിച്ച ഡൽഹി പോലീസ് നടപടി മതസ്വാതന്ത്ര്യത്തിനു മേലുള്ള കടന്നുകയറ്റമാണെന്നും ക്രൈസ്തവ ആചാരങ്ങൾക്ക് വിലക്ക് ഏർപ്പെടുത്തുന്നതി നു പിന്നിൽ രഹസ്യ അജണ്ടയുള്ളതായി സംശയിക്കുന്നതായും കത്തോലിക്ക കോൺഗ്രസ് ആരോപിച്ചു. കുരിശിന്‍റെ വഴിക്ക് അനുമതി നിഷേധിച്ചതിൽ പ്രതിഷേധിച്ച് കത്തോലിക്ക കോൺഗ്രസ് ചങ്ങനാശേരി ഫൊറോനയിൽ ഉൾപ്പെട്ട വിവിധ ഇടവക യൂണിറ്റുകളുടെ സഹകരണത്തോടെ സംഘടിപ്പിച്ച പ്രതിഷേധ പ്രാർഥന കൂട്ടായ്മ കത്തോലിക്കാ കോൺഗ്രസ് ചങ്ങനാശേരി അതിരൂപത സെക്രട്ടറി സൈബി അക്കര ഉദ്ഘാടനം ചെയ്തു. പ്രസിഡന്‍റ് കുഞ്ഞുമോൻ തൂമ്പുങ്കൽ അധ്യക്ഷത വഹിച്ചു. ജനറൽ സെക്രട്ടറി ഔസേപ്പച്ചൻ ചെറുകാട്, കെ.എസ്. ആന്‍റണി കരിമറ്റം, കെ.പി. മാത്യു, തോമസുകുട്ടി മണക്കുന്നേൽ, ലിസി ജോസ്, ജോയിച്ചൻ പാണ്ടിശേരി, ഷാജി മരങ്ങാട്, ജോഷി കൊല്ലാപുരം തുടങ്ങിയവർ പ്രസംഗിച്ചു.

യുവാവിനെ തട്ടിക്കൊണ്ടുപോയ പ്രതികൾ അറസ്റ്റിൽ

മാന്നാർ: യുവാവിനെ തട്ടിക്കൊണ്ടുപോയി മോചനദ്രവ്യം ആവശ്യപ്പെട്ട് ക്രൂരമായി മർദിച്ച് കൊലപ്പെടുത്താൻ ശ്രമം. സംഭവവുമായി ബന്ധപ്പെട്ട് നാലു പ്രതികളെ പോലീസ് അറസ്റ്റ് ചെയ്തു. മാന്നാർ കുരട്ടിക്കാട് മഞ്ഞിപ്പുഴ വീട്ടിൽ പ്രശാന്തി(35)നെയാണ് തട്ടികൊണ്ടുപോയി മർദിച്ചത്. സംഭവുമായി ബന്ധപ്പെട്ട് കോട്ടയം പാമ്പാടി കൂരോപ്പട വട്ടോലിക്കൽ വീട്ടിൽ രതീഷ് ചന്ദ്രൻ (44), കോട്ടയം വെസ്റ്റ് വേളൂർ കരയിൽ വലിയ മുപ്പതിൽചിറ വീട്ടിൽ വി.കെ. നിഖിൽ (38), കോട്ടയം വെസ്റ്റ് വേളൂർകരയിൽ കൊച്ചുചിറയിൽ വീട്ടിൽ കെ. മനു ബേബി (34), കോട്ടയം പാമ്പാടി കൂരോപ്പട കണമല വീട്ടിൽ സഞ്ജയ് സജി (27) എന്നിവരെ മാന്നാർ പോലീസ് അറസ്റ്റ് ചെയ്തു. ചെങ്ങന്നൂർ ഡിവൈഎസ്പി എം.കെ. ബിനുകുമാറിന്‍റെ നിർദേശ പ്രകാരം മാന്നാർ പോലീസ് ഇൻസ്പെക്ടർ ഡി. രജീഷ്കുമാർ, എസ്ഐ സി.എസ്‌. അഭിരാം, ഗ്രേഡ് എസ്ഐ സുദീപ്, എഎസ്ഐ റിയാസ്, സീനിയർ സിപിഒമാരായ അജിത്, സാജിദ്, ശ്രീകുമാർ തുടങ്ങിയവരടങ്ങിയ സംഘമാണ് പ്രതികളെ പിടികൂടിയത്. ഇവർ സഞ്ചരിച്ചിരുന്ന ഇന്നോവ കാറും കസ്റ്റഡിയിൽ എടുത്തു. പ്രതികൾ നിരവധി ക്രിമിനൽ കേസുകളിൽ ഉൾപ്പെട്ടിട്ടുള്ളവരാണ്. ക്വട്ടേഷൻ ആക്രമണം, അടിപിടി, മോഷണം, അബ്കാരി തുടങ്ങി നിരവധി കേസുകൾ വിവിധ സ്റ്റേഷനുകളിലായി ഉണ്ടെന്ന് പോലീസ് പറഞ്ഞു. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.

മികച്ച പഞ്ചായത്തായി പുന്നപ്ര തെക്ക് പഞ്ചായത്ത്

അമ്പലപ്പുഴ: മാലിന്യമുക്ത നവകേരളം കാമ്പയിന്‍റെ ഭാഗമായി തിരുവനന്തപുരത്ത് സംഘടിപ്പിച്ച ക്ലീൻ കേരള കോൺക്ലേവ് സംസ്ഥാനത്തെ മികച്ച മൂന്നാമത്തെ പഞ്ചായത്തായി പുന്നപ്ര തെക്ക് പഞ്ചായത്തിനെ തെരഞ്ഞെടുത്തു. 9 മുതൽ 13 വരെ തിരുവനന്തപുരം കനകക്കുന്ന് പാലസിൽ നടന്ന വിവിധ പരിപാടികളുടെ ഭാഗമായി 14 ജില്ലകളിൽനിന്നു മികച്ച പഞ്ചായത്തുകളായി തെരഞ്ഞെടുത്ത പതിനാല് പഞ്ചായത്തുകളുടെ വീഡിയോ അവതരണവും റിപ്പോർട്ട് അവതരണവും കഴിഞ്ഞ് ജഡ്ജിൻ പാനലിന്‍റെ ചോദ്യോത്തര സെക‌്ഷനുശേഷമാണ് സംസ്ഥാനത്തെ മികച്ച മൂന്നു പഞ്ചായത്തുകളെ പ്രഖ്യാപിച്ചത്. സംസ്ഥാന ഗവർണർ പുരസ്കാരങ്ങൾ വിതരണം ചെയ്തു. പുന്നപ്ര തെക്ക് പഞ്ചായത്ത് പ്രസിഡന്‍റ് പി.ജി. സൈറസ്, സെക്രട്ടറി ആർ. സൗമ്യാ റാണി, ആരോഗ്യ സ്റ്റാൻഡിംഗ് കമ്മിറ്റി ചെയർമാൻ എൻ.കെ. ബിജുമോൻ എന്നിവർ ചേർന്നാണ് ഗവർണറിൽനിന്ന് അവാർഡ് ഏറ്റുവാങ്ങിയത്. മാലിന്യമുക്ത നവ കേരളത്തിന്‍റെ ഭാഗമായി പഞ്ചായത്ത് നടപ്പിലാക്കിയ ജനക്ഷേമകരമായ നിരവധി കാമ്പയിനുകൾക്കുള്ള അംഗീകാരമാണിത്. ഉറവിടമാലിന്യ സംസ്കരണ ഉപാധികൾ ഇല്ലാത്ത വീടുകളെ സർവേയിലൂടെ കണ്ടെത്തി അതിന്‍റെ അടിസ്ഥാനത്തിൽ 5864 വീടുകൾക്ക് ബയോബിൻ ബയോഗ്യാസ് എന്നിവ നൽകി. അജൈവ മാലിന്യ ശേഖരണത്തിൽ 100% കൈവരിച്ചു. ആധുനിക ക്രിമിറ്റോറിയം നിർമാണം പൂർത്തീകരിച്ചു. മാർക്കറ്റ് കെട്ടിടവും ടേക്ക് എ ബ്രേക്കും പൂർത്തീകരിച്ചു. ആധുനിക ടോയ്‌ലറ്റ് ബ്ലോക്കോടുകൂടി ക്ലാസ് മുറി നിർമിച്ചു നൽകി. എല്ലാ അയൽകൂട്ടങ്ങളും ഹരിത അയൽകൂട്ടങ്ങളായി പ്രഖ്യാപിച്ചു. പഞ്ചായത്തിലെ എല്ലാ സ്ഥാപനങ്ങളും ഗവൺമെന്‍റ്, ഗവൺമെന്‍റ് ഇതര സ്ഥാപനങ്ങളും ഹരിത കാമ്പസുകളായി പ്രഖ്യാപിച്ചു. റസിഡൻസ് അസോസിയേഷനുകൾ വായനശാലകൾ ഇവയെല്ലാം ഈ കാമ്പയിന്‍റെ ഭാഗമായി ചേർന്നു. ഗ്രാമത്തിലെ 17 റോഡുകൾ ഹരിത മനോഹരമായ പാതയോരങ്ങളാക്കി. റോഡുകൾ കൃത്യമായ ഇടവേളകളിൽ ക്ലീനിംഗ് വിധേയമാക്കി. ഇങ്ങനെ നിരവധിയായ പ്രവർത്തനങ്ങൾ സംഘടിപ്പിച്ചതിനാണ് അവാർഡിനായി പുന്നപ്ര തെക്ക് പഞ്ചായത്തിനെ തെരഞ്ഞെടുത്തത്.

ഓൺലൈൻ തട്ടിപ്പ് പ്രതികളെ പിടികൂടി

‌ചേർത്തല: ഓൺലൈൻ തട്ടിപ്പുമായി ബന്ധപ്പെട്ട നേപ്പാൾ സ്വദേശികൾ അടക്കം നാലുപേരെ ചേർത്തല പോലീസ് അറസ്റ്റ് ചെയ്തു. ഇതരസംസ്ഥാന നിവാസികളായ അജിത്ത് ഘട്ക, അഭിനീത് യാദവ്, സഞ്ജയ് ദുബെ, പ്രിൻസ് ദേവ് എന്നിവരാണ് ചേർത്തല പോലീസിലെ പ്രത്യേക അന്വഷണ സംഘത്തിന്‍റെ പിടിയിലായത്. 2024ൽ ചേർത്തല പോലീസ് സ്റ്റേഷനിൽ രജിസ്റ്റർ ചെയ്ത കേസിലാണ് അറസ്റ്റ്. ചേർത്തല എസ്ഐ അനിൽകുമാറിന്‍റെ നേതൃത്വത്തിലുള്ള സംഘം ഉത്തർപ്രദേശ് കേന്ദ്രീകരിച്ച് നടത്തിയ അന്വേഷണത്തിൽ രണ്ടു യുപി സ്വദേശികൾ അറസ്റ്റിലാവുകയും റിമാൻഡ് ചെയ്യപ്പെടുകയും ചെയ്തിരുന്നു. അവരെ ചോദ്യം ചെയ്തതിൽ നിന്നും ലഭിച്ച വിവരത്തിന്‍റെ അടിസ്ഥാനത്തിൽ നടത്തിയ അന്വേഷണത്തിലാണ് രണ്ടു യുപി സ്വദേശികളും രണ്ടു നേപ്പാൾ സ്വദേശികളും പിടിയിലായിട്ടുള്ളത്. ഇന്ത്യയിലെ വിവിധ സംസ്ഥാനങ്ങളിൽ ഓൺലൈൻ തട്ടിപ്പ് നടത്തി അതുവഴി ലഭിക്കുന്ന പണം വിദേശ കമ്പനികളുടെ അക്കൗണ്ടുകളിലേക്ക് എത്തിക്കുകയാണ് ഇവരുടെ രീതി. ഒന്നരമാസത്തിന് മുമ്പ് യുപി യിൽനിന്ന് അറസ്റ്റ് ചെയ്ത സഹിൽ, ശുഭം ശ്രീനിവാസ്തവ് എന്നിവരെ ചോദ്യം ചെയ്തതിൽ നിന്നാണ് യുപി സ്വദേശിയായ അഭിനീത് യാദവ് എന്നയാൾക്കും സഞ്ജയ് ദുബെ എന്നയാൾക്കും തട്ടിപ്പിൽ നിർണായക പങ്കുണ്ടെന്ന് മനസിലാക്കിയത്. തുടർന്ന് ചേർത്തലയിലെ പോലീസ് ഇരുവരെയും ഉത്തർപ്രദേശിലെ ഹാഷിയാന എന്ന സ്ഥലത്തുനിന്നും കസ്റ്റഡിയിലെടുക്കുകയായിരുന്നു. തുടർന്ന് ഇരുവരെയും ചോദ്യം ചെയ്യുകയും കൈയിലുള്ള ഡിജിറ്റൽ ഡിവൈസുകൾ പരിശോധിച്ചതിൽ നിന്നും പിടിയിലായ നേപ്പാൾ സ്വദേശികൾക്കാണ് ഇവർ രാജ്യത്ത് തട്ടിപ്പ് നടത്തി സമ്പാദിക്കുന്ന പണവും അതിനായി ഉപയോഗിക്കുന്ന ബാങ്ക് അക്കൗണ്ട് ഡീറ്റെയിൽസും കൈമാറുന്നതെന്ന് ബോധ്യപ്പെടുകയും ചെയ്തു. തുടർന്ന് നേപ്പാൾ സ്വദേശികൾ രഹസ്യമായി താമസിക്കുന്ന സ്ഥലം കണ്ടുപിടിച്ച് ഇരുവരെയും പിടികൂടുകയായിരുന്നു. നേപ്പാൾ സ്വദേശികളുടെ പക്കൽ നിന്നും തട്ടിപ്പിനായി ശേഖരിച്ച വിവിധ ബാങ്ക് പാസ് ബുക്കുകളും കണ്ടെടുത്തിട്ടുണ്ട്. ചോദ്യം ചെയ്തതിൽനിന്നും ഇന്ത്യയിലെ വിവിധ സംസ്ഥാനങ്ങളിൽ ഇത്തരത്തിൽ തട്ടിപ്പ് നടത്തി ശേഖരിക്കുന്ന ബാങ്ക് പാസ് ബുക്ക്, അക്കൗണ്ട് ഡീറ്റെയിൽസ് എന്നിവയെല്ലാം ടെലഗ്രാം ഗ്രൂപ്പ് വഴി വിദേശ രാജ്യത്ത് നിയന്ത്രിക്കപ്പെടുന്ന കമ്പനികളാണ് കൈകാര്യം ചെയ്യുന്നതെന്ന് കണ്ടെത്തി. പ്രതികളെ ജില്ലാ ജയിലിൽ റിമാൻഡ് ചെയ്യുകയും തുടർന്ന് കൂടുതൽ അന്വേഷണത്തിനായി കസ്റ്റഡിയിൽ വാങ്ങുകയും ചെയ്യും. ഇതോടൊപ്പം ചേർത്തല സ്വദേശിയെ കബളിപ്പിച്ച് 90 ലക്ഷം രൂപ തട്ടിയെടുത്ത മറ്റൊരു കേസിലെ പ്രധാന പ്രതിയായ ഗുജറാത്ത്, ജുനഗഢ് സ്വദേശിയായ ഗോസ്വാമി സുമിത്ഗിരി എന്നയാളെയും കസ്റ്റഡിയിൽ എടുത്തിട്ടുണ്ടെന്നും സുചനയുണ്ട്. ചേർത്തല എഎസ്പി ഹരീഷ് ജയിനിന്‍റെ നേതൃത്വത്തില്‍ ചേര്‍ത്തല പോലീസ് സ്റ്റേഷന്‍ ഇന്‍സ്പെക്ടര്‍ എസ്എച്ച്ഒ ജി. അരുണ്‍, എസ്ഐ അനിൽകുമാർ, എസ്ഐമാരായ ആദർശ്, ബിനു, എസിപിഒമാരായ സതീഷ്, സുധീഷ്, അനീഷ്, സിപിഒമാരായ ഭരത്, കോണ്‍സ്റ്റന്‍റൈന്‍, ലിജോ, ധൻരാജ് ഡി. പണിക്കർ എന്നിവരും അന്വഷണ സംഘത്തിലുണ്ടായിരുന്നു.

മൂല്യവർധനവിലൂടെ കേരകർഷകരുടെ വരുമാനം വർധിപ്പിക്കണം: മന്ത്രി പ്രസാദ്

കാർത്തികപ്പള്ളി: കാർഷിക ഉത്പന്നങ്ങൾ മൂല്യവർധിത ഉത്പന്നങ്ങളാക്കി മാറ്റി കേരകർഷകരുടെ വരുമാനം വർധിപ്പിക്കണമെന്ന് കൃഷിമന്ത്രി പി. പ്രസാദ് പറഞ്ഞു. കൃഷിവകുപ്പ് കാർത്തികപ്പള്ളി പഞ്ചായത്തിൽ നടപ്പിലാക്കിയ കേരഗ്രാമം പദ്ധതിയുടെ രണ്ടാം വർഷ പ്രവർത്തനങ്ങൾ ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. കാർഷിക ഉത്പന്നങ്ങൾ മൂല്യവർധിത ഉത്പന്നങ്ങളാക്കി മാറ്റുന്നതിലൂടെ, ഉത്പന്നങ്ങളുടെ വില നിർണയിക്കാനുള്ള അവകാശം കർഷകന് ലഭിക്കും. ഇങ്ങനെ ഉത്പാദിപ്പിക്കുന്ന ഉത്പന്നങ്ങൾക്ക് പ്രാദേശികമായി വിപണി കണ്ടെത്താനുള്ള ശ്രമമുണ്ടാകണമെന്നും മന്ത്രി പറഞ്ഞു. നാളികേര കൃഷിയുടെ പ്രാധാന്യവും ഉത്പാദനക്ഷമതയും വർധിപ്പിച്ച് കർഷകരുടെ സമഗ്ര പുരോഗതി ലക്ഷ്യമാക്കിയാണ് സംസ്ഥാന സർക്കാർ കേരഗ്രാമം പദ്ധതി ആവിഷ്കരിച്ച് നടപ്പിലാക്കുന്നത്. കാർത്തികപ്പള്ളി കേരഗ്രാമം പദ്ധതി വഴി പഞ്ചായത്തിലെ കേരകർഷകരെ ഒരുമിച്ചണിനിരത്തി പഞ്ചായത്ത് ഭരണസമിതിയുടെയും പഞ്ചായത്തുതല കേര സമിതിയുടെയും നേതൃത്വത്തിൽ വാർഡിലെ കേര സമിതികൾ രൂപീകരിച്ചാണ് പദ്ധതി നടപ്പാക്കുന്നത്. സംയോജിത വളപ്രയോഗം, രോഗകീടനിയന്ത്രണം തുടങ്ങിയ വിവിധ ഘട്ടങ്ങൾ ഉൾപ്പെടുത്തി കേരഗ്രാമം പദ്ധതിയുടെ ഒന്നാംവർഷം പൂർത്തീകരിച്ചിരുന്നു. രണ്ടാം വർഷ പ്രവർത്തനങ്ങളുടെ ഉദ്ഘാടന വേദിയിൽ മികച്ച കർഷകരേയും മുതിർന്ന കർഷകത്തൊഴിലാളികളെയും ആദരിച്ചു. തോട്ടുകടവ് ഗവ. യുപി സ്കൂളിൽ നടന്ന ചടങ്ങിൽ രമേശ് ചെന്നിത്തല എംഎൽഎ അധ്യക്ഷനായി. കാർത്തികപ്പള്ളി പഞ്ചായത്ത് പ്രസിഡന്‍റ് ഗിരിജാ ഭായ്, ജില്ലാ പഞ്ചായത്ത് സ്ഥിരം സമിതി അധ്യക്ഷൻ അഡ്വ. ടി.എസ്. താഹ, കാർത്തികപ്പള്ളി പഞ്ചായത്ത് വൈസ് പ്രസിഡന്‍റ് ആർ. അമ്പിളി, ജില്ലാ പഞ്ചായത്തംഗം ജോൺ തോമസ്, കൃഷി ഡെപ്യൂട്ടി ഡയറക്ടർ എൽ പ്രീത, കൃഷി അസി. ഡയറക്ടർ ബെറ്റി വർഗീസ്, കാർത്തികപ്പള്ളി കേരഗ്രാമം പ്രസിഡന്‍റ് കെ.എൻ. തമ്പി, സെക്രട്ടറി വടക്കടം സുകുമാരൻ, കൃഷി ഓഫീസർ ഡി. ഷാജി, മറ്റ് ജനപ്രതിനിധികൾ, രാഷ്ട്രീയപാർട്ടി പ്രതിനിധികൾ, ഉദ്യോഗസ്ഥർ തുടങ്ങിയവർ പങ്കെടുത്തു.

ബംഗളൂരുവിൽ അപകടത്തിൽ യുവാവ് മരിച്ചു

മങ്കൊമ്പ്: കുട്ടനാട് സ്വദേശിയായ യുവാവ് ബംഗളൂരുവിൽ അപകടത്തിൽ മരിച്ചു. രാമങ്കരി പഞ്ചായത്ത് മണലാടി മഠത്തിൽപറമ്പിൽ ഷൈനി ഫ്രാൻസിസിന്‍റെ മകൻ എബിൻ പോളാ(22) ണു മരിച്ചത്. ഞായറാഴ്ച രാവിലെ 8.30ന് ഗരിവാൾ സിറ്റിയിൽ എബിൻ സഞ്ചരിച്ചിരുന്ന ബൈക്കിൽ കാറിടിച്ചായിരുന്നു അപകടം. മൃതദേഹം നാട്ടിലെത്തിച്ചു സംസ്‌കാരം നടത്തി.

റെയിൽവേ ക്രോസ് ബാറിലിടിച്ച് ബൈക്ക് യാത്രികൻ മരിച്ചു

അമ്പലപ്പുഴ: റെയിൽവേ ക്രോസ് ബാറിലിടിച്ച് ബൈക്ക് യാത്രികൻ മരിച്ചു. മാന്നാർ കുട്ടമ്പേരൂർ അലിൻഡ് സ്വിച്ച് ഗിയർ ഡിവിഷൻ ഒൻപതാം വാർഡിൽ മാന്നാർ ക്ഷീരോത്പാദക സഹകരണസംഘത്തിനു എതിർവശം തോപ്പിൽ കിഴക്കേതിൽ സജി-അജിത ദമ്പതികളുടെ മകൻ രാഹുൽ സജി (27) ആണ് അപകടത്തിൽ മരിച്ചത്. തകഴി റെയിൽവേ ഗേറ്റിൽ ചൊവ്വാഴ്ച വൈകിട്ടായിരുന്നു അപകടം. ചാനൽ കോപ്പിയർ എന്ന സ്വകാര്യ സ്ഥാപനത്തിൽ ജോലി ചെയ്യുന്ന യുവാവ് മാന്നാറിലേക്ക് പോകുന്നതിനിടെയായിരുന്നു അപകടം. ട്രെയിൻ വരുന്നതിനായി ഗേറ്റ് അടയ്ക്കുന്നതിനിടെ ക്രോസ് ബാറിലിടിച്ചാണ് അപകടമുണ്ടായത്. അവിവാഹിതനാണ്. സഹോദരന്‍ രാകേഷ്.

പുന്നപ്രയുടെ തീരപ്രദേശങ്ങളിൽ ശക്തമായ കടൽ കയറ്റം

അമ്പലപ്പുഴ: പുന്നപ്ര തെക്ക്, വടക്ക് പഞ്ചായത്തുകളുടെ തീരപ്രദേശങ്ങളിൽ ശക്തമായ കടൽ കയറ്റം. വേലിയേറ്റത്തെത്തുടർന്ന് മീറ്ററുകളോളം തിരമാലകൾ കരയിലേക്ക് ഇരച്ചുകയറി. പുന്നപ്ര വിയാനി, ചള്ളി, നർബോന, പറവൂർ ഗലീലിയ, വാടക്കൽ അറപ്പ പൊഴി, മത്സ്യഗന്ധി ഭാഗങ്ങളിലെല്ലാം കടൽത്തീരം കവർന്നു. കഴിഞ്ഞ രണ്ടു ദിവസമായി കടലേറ്റം തുടരുകയാണ്. പലയിടത്തും കടലോരത്തുനിന്ന കാറ്റാടി ഉൾപ്പെടെയുള്ള മരങ്ങൾ നിലംപൊത്തി. കരയ്ക്കിരുന്ന പൊന്തുകളും ചെറിയ വള്ളങ്ങളും തിരമാലയുടെ ശക്തിയിൽ ഒഴുക്കിൽപ്പെട്ടെങ്കിലും മത്സ്യത്തൊഴിലാളികൾ തന്നെ സുരക്ഷിത സ്ഥാനത്തെത്തിച്ചു വാടക്കൽ അറപ്പ പൊഴി ഭാഗത്തും പുന്നപ്ര തെക്ക് ഒന്നാം വാർഡ് നമ്പർ ബോനകുരിശടിക്കു സമീപവുമാണ് കൂടുതൽ മരങ്ങൾ നിലംപൊത്തിയത്. ഈ ഭാഗങ്ങളിൽ കിലോമീറ്ററുകളോളം കടൽ ഭിത്തിയില്ല. വിയാനി ഭാഗത്ത് തീരദേശ റോഡു വരെ തിളപ്പു കയറ്റമുണ്ടായി. കടൽക്ഷോഭം ഭയന്ന് മത്സ്യബന്ധന യാനങ്ങൾ കടലിൽ ഇറക്കിയില്ല. തോട്ടപ്പള്ളിയിലെ കടൽ കരിമണൽ ഖനനം മൂലം തീര ശോഷണം സംഭവിക്കുന്നതാണ് അപ്രതീക്ഷിത കടൽകയറ്റത്തിനു കാരണമെന്നാണ് ഈ മേഖലയിലുള്ളവർ പറയുന്നത്. പുലിമുട്ടോടുകൂടിയ കടൽഭിത്തി നിർമിക്കണം അമ്പലപ്പുഴ: അതിരൂക്ഷമായ കടൽ കയറ്റം നേരിടുന്ന പുന്നപ്ര വിയാനി മുതൽ വാടക്കൽ വരെയുള്ള പ്രദേശങ്ങളിൽ പുലിമുട്ടോടുകൂടിയ കടൽഭിത്തി നിർമിക്കണമെന്നു ലാറ്റിൻ ഫ്രറ്റേർണിറ്റി കോൺഗ്രസ് സംസ്ഥാന കമ്മിറ്റി ആവശ്യപ്പെട്ടു. പൊന്തിലെ മത്സ്യബന്ധനം നിരോധിക്കാനുള്ള നീക്കത്തിനെതിരേ പ്രതിഷേധം സംഘടിപ്പിക്കാനും യോഗം തീരുമാനിച്ചു. സംസ്ഥാന പ്രസിഡന്‍റ് ഡോ.കെ.എസ്. മനോജ് അധ്യക്ഷത വഹിച്ചു. ജനറൽ സെക്രട്ടറി ടെൻസൺ ജോൺകുട്ടി, സോളമൻ അറയ് ക്കൽ, എം.എ. നെൽസൺ, പ്രിറ്റി തോമസ്, ക്ലീറ്റസ് കളത്തിൽ, തോമസ് കണ്ടത്തിൽ, പി.ജെ. വിൽസൺ, ജോൺകുട്ടി പാടാകുളം, സുജ അനിൽ, പി.എം. ജോസി, സി.എസ്. പ്രവീൺ, സോളമൻ പഴമ്പാശേരി, വി.ജെ. ജേക്കബ്, സി. എലിയോൺ തുടങ്ങിയവർ പ്രസംഗിച്ചു.

ഭിന്നശേഷി പെൺകുട്ടിയെ പീഡിപ്പിക്കാൻ ശ്രമിച്ച പ്രതി പിടിയിൽ

മാന്നാർ: പ്രായപൂർത്തിയാകാത്ത ഭിന്നശേഷി പെൺകുട്ടിയെ പീഡിപ്പിക്കാൻ ശ്രമിച്ച കേസിൽ യുവാവ് അറസ്റ്റിൽ. ചെന്നിത്തല ഗോകുൽ നിവാസിൽ ഗോകുൽ കൃഷ്ണ(33)നെയാണ് മാന്നാർ പോലീസ് അറസ്റ്റ് ചെയ്തത്. 2022ൽ ആണ് കേസിനാസ്പദമായ സംഭവം. പെൺകുട്ടിയുടെ കുടുംബവുമായി അടുത്ത ബന്ധം പുലർത്തിയിരുന്ന പ്രതി മാതാപിതാക്കൾ ഇല്ലാത്ത നേരം വീട്ടിലെത്തുകയും പെൺകുട്ടിയെ പീഡിപ്പിക്കാൻ ശ്രമിക്കുകയുമായിരുന്നു. മൂന്നുവർഷത്തിനു ശേഷമാണ് സംഭവം പുറത്തറിയുന്നത്. പെൺകുട്ടി പഠിക്കുന്ന സ്കൂളിൽ കുട്ടികൾക്ക് നടത്തിയ കൗൺസലിംഗിലാണ് പെൺകുട്ടി മൂന്നുവർഷം മുൻപ് നടന്ന സംഭവം പറഞ്ഞത്. തുടർന്ന് സ്കൂൾ അധികൃതർ ശിശുക്ഷേമ സമിതിയിൽ വിവരം അറിയിക്കുകയും ശിശുക്ഷേമ സമിതി പോലീസിൽ അറിയിക്കുകയും ചെയ്തു. മാന്നാർ പോലീസ് ഇൻസ്പെക്ടർ ഡി. രജീഷ് കുമാറിന്‍റെ നേതൃത്വത്തിൽ അന്വേഷണം നടത്തി. എസ്ഐ സി.എസ്. അഭിരാം, വനിത എഎസ്ഐ സ്വർണരേഖ, സീനിയർ സിപിഒമാരായ സാജിദ്, അജിത്, സിപിഒ ഹരിപ്രസാദ് എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്തത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

ചികിത്സാസഹായവും വിഷുക്കൈനീട്ടം വിതരണവും

ഹരിപ്പാട്: മുട്ടം സാന്ത്വനം ചാരിറ്റബിൾ സൊസൈറ്റിയുടെ നേതൃത്വത്തിൽ ചികിത്സാസഹായവും വിഷുക്കൈനീട്ടം വിതരണവും നടത്തി. കാൻസർ, കിഡ്നി രോഗികൾക്ക് ചികിത്സാസഹായ വിതരണവും ചെയ്തു. കാർത്തികപ്പള്ളി ഐഎച്ച്ആർഡി കോളജ് പ്രിൻസിപ്പൽ ഡോ.എൽ. ഷാജി ഉദ്ഘാടനം ചെയ്തു. സാന്ത്വനം പ്രസിഡന്‍റ് ജോൺ തോമസ് അധ്യക്ഷത വഹിച്ചു. വസഥം പകൽവീട് അംഗങ്ങൾക്കുള്ള വിഷുക്കൈനീട്ടം സമർപ്പണം നങ്ങ്യാർകുളങ്ങര ബഥനി സെൻട്രൽ സ്കൂൾ പ്രിൻസിപ്പൽ സിസ്റ്റർ ആഗ്നറ്റ് ഐഒസി വിതരണം ചെയ്തു. ചേപ്പാട് പഞ്ചായത്ത് ആരോഗ്യ വിദ്യാഭ്യാസ സമിതി ചെയർമാൻ കെ. വിശ്വപ്രസാദ് വിഷുദിന സന്ദേശം നടത്തി. എൻ. കരുണാകരൻ, എം.കെ. മണികുമാർ, രഘുനാഥ് കളത്തിൽ എന്നിവർ പ്രസംഗിച്ചു.

തങ്കി പള്ളിയിൽ നേർച്ചക്കഞ്ഞി വിതരണത്തിന് മൺചട്ടികളെത്തി

ചേർത്തല: തീർഥാടന കേന്ദ്രമായ തങ്കി പള്ളിയിൽ വിശുദ്ധവാര നാളുകളിൽ നേർച്ചക്കഞ്ഞി വിതരണത്തിന് മൺചട്ടികളെത്തി. ഗതകാല സ്മരണകളുണർത്തിയാണ് എല്ലാവർഷവും ഇവിടെ മൺചട്ടികളിൽ കഞ്ഞി വിളമ്പുന്നത്. വെള്ളിയാഴ്ചകളിലും മറ്റു പ്രധാന ദിവസങ്ങളിലും പള്ളിയില്‍ നേർച്ചക്കഞ്ഞി വിതരണം ഉണ്ടെങ്കിലും വിശുദ്ധവാര നാളുകളിൽ മാത്രമാണ് മണ്‍ചട്ടികളിൽ വിതരണം നടത്തുന്നത്. മറ്റു ദിവസങ്ങളിൽ സ്റ്റീൽ പാത്രങ്ങളാണ് ഉപയോഗിക്കുന്നത്. 1936ൽ വീട്ടമ്മമാർ പിടിയരികൂട്ടി ലഭിച്ച പണം ഉപയോഗിച്ചാണ് പള്ളിയിലേക്ക് ക്രിസ്തുവിന്‍റെ അദ്ഭുത തിരുസ്വരൂപം വാങ്ങിയത്. തുടർന്ന് പ്രാർഥനയിലും ഉപവാസത്തിലും വിശ്വാസികൾ രാപകൽ കഴിഞ്ഞപ്പോൾ ചില ഉദാരമതികൾ പള്ളിമുറ്റത്ത് കഞ്ഞിവച്ച് വിതരണം ചെയ്തു. ഇതുകഴിച്ച പലർക്കും രോഗസൗഖ്യം ലഭിച്ചെന്നാണ് വിശ്വാസം. അക്കാലത്ത് മൺചട്ടികളായിരുന്നു പ്രധാനം. ഇതിന്‍റെ സ്മരണയിൽ ഇന്നും മൺചട്ടികളിൽ കഞ്ഞി വിതരണം ചെയ്യുന്നു. ആലുവയിലെ കളിമൺപാടത്ത് തങ്കി പള്ളിയിലേക്കായി ഇത്തവണ 5000 ചട്ടികളാണ് നിർമിച്ച് എത്തിച്ചത്. കളിമണ്ണിന്‍റെ ദൗർലഭ്യവും കൂലി കൂടുതലും മൂലം സ്റ്റീൽ പാത്രത്തെക്കാൾ വില കൊടുത്ത് ഇവ വാങ്ങുന്നത് സമ്പന്നമായ പൈതൃകം നിലനിർത്താനാണെന്ന് വികാരി ഫാ. ജോർജ് എടേഴത്ത് പറഞ്ഞു. 500 ലധികം ചാക്ക് അരിയാണ് നേർച്ചക്കഞ്ഞിക്കായി എത്തിച്ചിട്ടുള്ളത്. ഒരേസമയം ആയിരത്തിലധികം പേർക്ക് കഞ്ഞി കുടിക്കാനുള്ള സൗകര്യം ഒരുക്കിയിട്ടുണ്ട്. ഇവിടെ എത്തുന്നവർക്ക് നിമിഷനേരം കൊണ്ട് കഞ്ഞി വിതരണം ചെയ്യാനുള്ള ക്രമീകരണങ്ങളാണ് ഏർപ്പെടുത്തിയിട്ടുള്ളത്. പെസഹാവ്യാഴം രാവിലെ 7.30ന് നേർച്ചക്കഞ്ഞി തയാറാക്കുന്നതിനുള്ള അരിയിടൽ കർമം ദലീമ ജോജോ എംഎൽഎ നിർവഹിക്കും. നേർച്ചക്കഞ്ഞി വിതരണത്തിന്‍റെ ചുമതലയുള്ള ജോബ് പാലച്ചുവട്ടിലിന്‍റെ നേതൃത്വത്തില്‍ ആയിരത്തില്‍പരം വോളന്‍റിയർമാർ പ്രവർത്തിക്കുന്നു. മാലിന്യങ്ങൾ കൈകാര്യം ചെയ്യാൻ പഞ്ചായത്തിന്‍റെ ഹരിത കർമസേനയും പ്രവർത്തിക്കുന്നുണ്ട്.

കടന്നൽ കുത്തേറ്റ് തെങ്ങിനു മുകളിൽ കുടുങ്ങിയ ആളെ അഗ്നിരക്ഷാസേന രക്ഷിച്ചു

കായംകുളം: കടന്നല്‍ കുത്തേറ്റ് തെങ്ങിനു മുകളില്‍ കുടുങ്ങിയ ആളെ അഗ്‌നിരക്ഷാസേന രക്ഷിച്ചു. കായംകുളം കീരിക്കാട് തെക്ക് ഐക്യ ജംഗ്ഷനു സമീപം വെളുത്തേടത്ത് സന്തോഷ് കുമാറിന്‍റെ പുരയിടത്തിലെ തേങ്ങയിടാന്‍ കയറിയ ഇതരസംസ്ഥാന തൊഴിലാളിയാണ് കടന്നല്‍ കുത്തേറ്റ് തെങ്ങിനു മുകളില്‍ കുടുങ്ങിയത്. വിവരം അറിഞ്ഞെത്തിയ കായംകുളം അഗ്‌നിരക്ഷാസേനയിലെ അസി. സ്റ്റേഷന്‍ ഓഫീസര്‍ സജിത്ത് ലാലിന്‍റെ നേതൃത്വത്തില്‍ എത്തിയ സംഘത്തിലെ ഫയര്‍ ആന്‍ഡ് റെസ്‌ക്യൂ ഓഫീസര്‍ ഷിജു ടി. സാം ലാഡര്‍ ഉപയോഗിച്ച് തെങ്ങില്‍ കയറി തെങ്ങിന്‍റെ പൊത്തിലെ കടന്നല്‍ കൂടിന്‍റെ വാതില്‍ തുണി ഉപയോഗിച്ച് മൂടിക്കെട്ടുകയും വെളിയില്‍ ഉണ്ടായിരുന്ന കടന്നല്‍ കൂട്ടത്തെ ഹിറ്റ് ഉപയോഗിച്ച് തുരത്തുകയും ചെയ്തു. ശേഷം വളരെ സഹസികമായി ചത്തിസ്ഗഡ് സ്വദേശിയായ വിക്കി(21)യെ ലാഡര്‍ ഉപയോഗിച്ചു സുരക്ഷിതമായി താഴെ എത്തിച്ചു. കടന്നലിന്‍റെ കുത്തേറ്റ ഇയാളെ ഉടന്‍തന്നെ കായംകുളം താലൂക്ക് ആശുപത്രിയില്‍ പ്രവേശിപ്പിച്ചു.

നെല്ല് സംഭരിക്കാൻ കാലതാമസം, കർഷകർ പ്രതിഷേധിച്ചു

മാന്നാര്‍: കൃഷിവകുപ്പിനും സിവില്‍ സപ്ലൈസ് വകുപ്പിനും പുല്ലുവിലപോലും കൽപ്പിക്കാതെയാണ് മില്ലുടമകളുടെ നെല്ല് ശേഖരണ ഏജന്‍റുമാര്‍ എത്തുന്നതെന്ന് കര്‍ഷകര്‍. ഈ രണ്ടു വകുപ്പിനെയും നോക്കുകുത്തിയാക്കി കൊണ്ടാണ് ഇത്തരക്കാര്‍ നെല്ല് ശേഖരിക്കാനായി എത്തുന്നത്. മാന്നാര്‍ പഞ്ചായത്തിലെ ഇടപുഞ്ച പടിഞ്ഞാറ് പാടശേഖരത്തില്‍ വിളവെടുപ്പ് കഴിഞ്ഞ് കര്‍ഷകര്‍ അവരുടെ നെല്ല് നല്ല രീതിയില്‍ ഗുണനിലവാരത്തോടുകൂടി തയാറാക്കിയെങ്കിലും ഒരാഴ്ചയ്ക്കുശേഷമാണ് നെല്ല് സംഭരണത്തിനായി എത്തിയത്. രണ്ടു വകുപ്പുകളുടെയും ഉദ്യോഗസ്ഥര്‍ ഇവരുമായി ബന്ധപ്പെട്ടെങ്കിലും അവര്‍ ഒരോ കാരണങ്ങള്‍ പറഞ്ഞ് നീട്ടികൊണ്ടു പോകുകയായിരുന്നു. ഈ ഏജന്‍റുമാര്‍ തീരുമാനിക്കുന്നതുപോലെ മാത്രം നെല്ലെടുപ്പ് നടക്കുന്ന അവസ്ഥയാണ്. ഈപ്രവണത മാറ്റിയില്ലെങ്കില്‍ കര്‍ഷകര്‍ക്ക് വളരെയധികം ബുദ്ധിമുട്ടുകള്‍ തുടര്‍ന്നുള്ള നെല്ല് സംഭരണത്തില്‍ നേരിടേണ്ടി വരും. നെല്ലിന്‍റെ കിഴിവും മറ്റ് കാര്യങ്ങളുമെല്ലാം ഇവര്‍ തന്നെയാണ് തീരുമാനിക്കുന്നത്. പല പ്രതിസന്ധികളെയും മറികടന്ന് കൃഷി നടത്തി വിളവെടുപ്പ് നടത്തിയ ശേഷവും ശേഖരണത്തിനായി വീണ്ടും കാത്തിരിക്കുന്ന രീതി അവസാനിപ്പിക്കണമെന്നാണ് കര്‍ഷകരുടെ ആവശ്യം. ഈ രീതിവരും വര്‍ഷത്തെ നെല്‍കൃഷിയെ തന്നെ ബാധിക്കുമെന്നാണ് കര്‍ഷകര്‍ പറയുന്നത്.

അരങ്ങൊഴിഞ്ഞത് ഷേക്‌സ്പിയർ നാടകങ്ങളുടെ പ്രചാരകൻ

മങ്കൊമ്പ്: വിടപറഞ്ഞത് ഷേക്‌സ്പിയർ നാടകങ്ങളെ കുട്ടികൾക്കു പരിചയപ്പെടുത്തിയ, നാടകത്തെ സ്‌നേഹിച്ച അധ്യാപകൻ. കുട്ടനാടിന്‍റെ ഷേക്‌സ്പിയർ എന്നറിയപ്പെടുന്ന ഊരുക്കരി ജോസഫ് കുഞ്ഞ് സാർ നൊച്ചുവീട്ടിൽ അരങ്ങൊഴിഞ്ഞു. പാഠപുസ്തകങ്ങളുടെ ഏടുകൾക്കപ്പുറം, കലയുടെയും സാഹിത്യത്തിന്‍റെയും ലോകത്തേക്ക് തന്‍റെ ശിഷ്യന്മാരെ നയിച്ച മാതൃകാധ്യാപകനായിരുന്നു അരങ്ങൈാഴിഞ്ഞ ജോസഫ്കുഞ്ഞ് സാർ. ചമ്പക്കുളം സെന്‍റ് മേരീസ് ഹയർ സെക്കൻഡറി സ്‌കൂളിൽ അധ്യാപകനായിരിക്കെയാണ് നാടകപ്രവർത്തനങ്ങളിലേക്കു തിരിഞ്ഞത്. വിശ്വ നാടകകൃത്തായ ഷേക്‌സ്പിയറിന്‍റെ ഏഴു നാടകങ്ങൾ ഒൻപതു വർഷങ്ങൾ തുടർച്ചയായി കുട്ടികളെക്കൊണ്ട് അരങ്ങിൽ അവതരിപ്പിച്ചു. നാടകങ്ങളുടെ അവതരണത്തിനായി അദ്ദേഹം സെന്‍റ് മേരീസ് സ്‌കൂളിൽ സ്ട്രാട്ഫ്രട്ട് സ്റ്റേജ് എന്ന നാടക തിയറ്റർ രൂപീകരിച്ചു. ഊണിലും ഉറക്കത്തിലും ഷേക്‌സ്പിയർ നാടകങ്ങളായിരുന്നു അദ്ദേഹത്തിന്‍റെ മനസിലെന്ന് ഒപ്പം സേവനം ചെയ്ത അധ്യാപകർ സാക്ഷ്യപ്പെടുത്തുന്നു. ചങ്ങനാശേരി അതിരൂപത കോർപറേറ്റ് മാനേജ്‌മെന്‍റ് വിവിധ സ്‌കൂളുകളിൽ ഫിസിക്‌സ് അധ്യാപകനായിരുന്നു. 2023 മാർച്ചിൽ ചമ്പക്കുളം സെന്‍റ് മേരീസ് ഹയർ സെക്കൻഡറി സ്‌കൂളിൽനിന്നാണ് വിരമിച്ചത്. മിത്രക്കരി സെന്‍റ് സേവ്യേഴ്‌സ് സൺഡേ സ്‌കൂൾ ഹെഡ്മാസ്റ്റർ, യുവദീപ്തി ഭാരവാഹി, അധ്യാപക സംഘടന പ്രവർത്തകൻ എന്നീ നിലകളിലും പ്രവർത്തിച്ചിട്ടുണ്ട്. 2022ലെ അഖിലേന്ത്യാ ടീച്ചേഴ്‌സ് ഫെഡറേഷന്‍റെ ഗുരുശ്രേഷ്ഠ അവാർഡിന് അർഹനായിരുന്നു.

ഓണ്‍ലൈന്‍ തട്ടിപ്പ്: രണ്ടുപേർ പിടിയിൽ

ചേര്‍ത്തല: വ്യാപാരിയെ വെര്‍ച്വല്‍ അറസ്റ്റ് ചെയ്ത് 61.40 ലക്ഷം ഓണ്‍ലൈനായി തട്ടിയെടുത്ത കേസില്‍ രണ്ടു പേര്‍കൂടി പിടിയില്‍. നേപ്പാള്‍ സ്വദേശികളെയും ഉത്തര്‍പ്രദേശ് സ്വദേശികളെയുമാണ് പോലീസ് സംഘം അവരുടെ തട്ടകത്തിലെത്തി കീഴടക്കിയത്. പ്രധാന പ്രതികളായ നേപ്പാള്‍ സ്വദേശികളെ ഡല്‍ഹിയില്‍ നിന്നാണ് പിടികൂടിയത്. നേപ്പാള്‍ മൊറാംഗ് ജില്ലക്കാരായ പ്രിന്‍സ്‌ ദേവ് (24), അജിത്ത് ഖഡ്ക (26) എന്നിവരെയാണ് കഴിഞ്ഞദിവസം അരൂര്‍ എസ്‌ഐ ബിനുവിന്‍റെ നേതൃത്വത്തിലുള്ള സംഘം നേപ്പാളിലെത്തി പിടികൂടിയത്. ഇതിനൊപ്പം ഇവരുമായി ബന്ധപെട്ട ഉത്തര്‍പ്രദേശ് സ്വദേശികളായ രണ്ടു പേരെ ചേര്‍ത്തല എസ്ഐ പി. അനില്‍കുമാറിന്‍റെ നേതൃത്വത്തിലുള്ള സംഘവും പിടികൂടിയിട്ടുണ്ട്. പ്രതികളെ ചേര്‍ത്തലയിലെത്തിച്ചു ചോദ്യം ചെയ്തുവരികയാണ്. ഇവരെ അടുത്തദിവസം കോടതിയില്‍ ഹാജരാക്കും. കേസില്‍ നിലവില്‍ 11 പേര്‍ പിടിയിലായിട്ടുണ്ട്. 2024 ജൂണിലാണ് ചേര്‍ത്തലയിലെ വ്യാപാരിയായ പുല്ലൂരിത്തികരി വീട്ടില്‍ റോയ് പി ആന്‍റ ണിയെ കബളിപ്പിച്ച് പണം തട്ടിയത്. ടെലിഫോണ്‍ റെഗുലേറ്ററി അഥോറിട്ടി ഓഫ് ഇന്ത്യ, മുബൈ പോലീസ് എന്നീ പേരുകളിലാണ് തട്ടിപ്പു നടത്തിയത്. ചേര്‍ത്തല പോലീസാണ് അന്വേഷണം നടത്തുത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]