തു​റ​വൂ​ർ: കു​ട്ടി​ക​ൾ എ​ല്ലാ​വ​രും ഒ​രു​പോ​ലെ​യ​ല്ല. ഓ​രോ​രു​ത്ത​ർ​ക്കും അ​വ​ര​വ​രു​ടെ​താ​യ പ്ര​ത്യേ​ക​ത​ക​ൾ. സ്പെ​ഷ​ൽ സ്കൂ​ളി​ലെ കു​ട്ടി​ക​ളും അ​തു​പോ​ലെ വ്യ​ത്യ​സ്ത​മാ​യ പ്ര​ത്യേ​ക​ത​ക​ൾ ഉ​ള്ള​വ​ർ. അ​വ​രെ പ്ര​ത്യേ​ക രീ​തി​യി​ൽ പ​രി​ശീ​ലി​പ്പി​ക്കു​വാ​നും ജീ​വി​തം സ​ന്തോ​ഷ​മാ​യി മു​ന്നോ​ട്ടു കൊ​ണ്ടു​പോ​കാ​നും സ​ഹാ​യി​ക്കു​ന്ന​താ​ണ് സാ​ൻ​ജോ സ​ദ​ൻ സ്പെ​ഷ​ൽ സ്കൂ​ൾ.

സാ​ൻ​ജോ സ​ദ​ൻ എ​ന്ന പേ​രി​ൽ തു​റ​വൂ​ർ ക​വ​ല​യ്ക്ക് തെ​ക്കു​ഭാ​ഗ​ത്ത് പ്ര​വ​ർ​ത്തി​ക്കു​ന്ന ഈ ​സ്പെ​ഷ​ൽ സ്കൂ​ൾ പ​ല കാ​ര്യ​ങ്ങ​ൾ കൊ​ണ്ടും സ്പെ​ഷ​ൽ ത​ന്നെ. സാ​ധാ​ര​ണ കു​ട്ടി​ക​ളെ​പ്പോ​ലെ സാ​ധാ​ര​ണ രീ​തി​യി​ൽ ചെ​യ്യാ​ൻ ക​ഴി​യാ​ത്ത സ്കൂ​ളി​ലെ കു​ട്ടി​ക​ൾ പ​ക്ഷേ അ​വ​രു​ടെ സാ​ൻ​ജോ സ​ദ​ൻ സ്കൂ​ൾ കോ​മ്പൗ​ണ്ടി​ൽ ഉ​ണ്ടാ​ക്കി​യി​രി​ക്കു​ന്ന പ​ച്ച​ക്ക​റി​ത്തോ​ട്ടം ക​ണ്ടാ​ൽ എ​ല്ലാ​വ​ർ​ക്കും അ​സാ​ധാ​ര​ണ​മാ​യി തോ​ന്നും.

എ​ഫ്സിസി എ​റ​ണാ​കു​ളം പ്രൊ​വി​ൻ​സി​ൽ​പ്പെ​ട്ട സാ​ൻ​ജോ സ​ദ​ൻ സ്പെ​ഷ​ൽ സ്കൂ​ൾ ജി​ല്ല​യി​ലെ ത​ന്നെ ഇ​ത്ത​രം സ്കൂ​ളു​ക​ളി​ൽ മി​ക​ച്ച​താ​ണ്. അ​തി​ന് പ്ര​ധാ​ന തെ​ളി​വു​ക​ളി​ലൊ​ന്നാ​ണ് ഇ​വി​ട​ത്തെ പ​ച്ച​ക്ക​റി കൃ​ഷി. സ്കൂ​ളി​ലെ കു​ട്ടി​ക​ളു​ടെ തോ​ട്ട​ത്തി​ലെ പ​ണി​ക​ൾ ന​ട​ക്കു​ന്ന​ത് എ​ഫ്സി​സി സി​സ്റ്റേ​ഴ്സി​ന്‍റെ​യും ടി​ച്ചേ​ഴ്സി​ന്‍റെ​യും നേ​തൃ​ത്വ​ത്തി​ൽ. തു​റ​വൂ​ർ മേ​ഖ​ല​യു​ടെ വി​വി​ധ ഭാ​ഗ​ത്തു​നി​ന്നുവ​രു​ന്ന കു​ട്ടി​ക​ൾ എ​ഫ്സി​സി സി​സ്റ്റേ​ഴ്സി​ന്‍റെയും മ​റ്റു ടീ​ച്ചേ​ഴ്സി​ന്‍റെ​യും ശി​ക്ഷ​ണ​ത്തി​ൽ സ​ന്തോ​ഷ​പൂ​ർ​വം ക​ഴി​യു​ന്നു.

ഉ​ല്ലാ​സ വേ​ള​യി​ൽ പ​ച്ച​ക്ക​റി കൃ​ഷി ചെയ്യാ ൻ കുട്ടികളെ പ്രേരിപ്പിച്ച പ്രി​ൻ​സി​പ്പ​ൽ സി​സ്റ്റ​ർ ലി​സ​യു​ടെ പ്ര​ചോ​ദ​ന​ത്തി​ൽ വി​വി​ധ​യി​നം പ​ച്ച​ക്ക​റി​ക​ൾ ന​ട്ടു​വ​ള​ർ​ത്തി അവർ പ​രി​പാ​ലി​ക്കു​ന്നു. അ​തു​വ​ഴി കു​ട്ടി​ക​ൾ​ക്ക് കി​ട്ടു​ന്ന ആ​ന​ന്ദം വ​ള​രെ വ​ലു​തെ​ന്ന് സി​സ്റ്റ​ർ ലി​സ ജോർജ് പ​റ​യു​ന്നു. വി​ള​വെ​ത്താ​റാ​യ പ​ച്ച​ക്ക​റി​ക​ൾ തൊ​ട്ട് വി​ള​വ് ക​ഴി​ഞ്ഞ​തും പു​തി​യ​താ​യി തൈ​ക​ൾ ന​ട്ട് പാ​ക​മാ​യി വ​രു​ന്ന​തു​മെ​ല്ലാം സാ​ൻ​ജോ സ​ദ​ൻ സ്പെ​ഷ​ൽ സ്കൂ​ൾ പ​ച്ച​ക്ക​റി​ത്തോ​ട്ട​ത്തി​ലു​ണ്ട്.

നി​റ​യെ പാ​വ​ലും പ​ട​വ​ല​വും പ​യ​റും മു​ള​കും തു​ട​ങ്ങി വി​വി​ധ പ​ച്ച​ക്ക​റി​ക​ൾ ധാ​രാ​ള​മാ​യി ഇ​വി​ടെ വി​ള​ഞ്ഞി​രി​ക്കു​ന്നു. കു​ട്ടി​ക​ളു​ടെ പ​ഠ​ന​വും വ്യ​ക്തി​ത്വ​വി​ക​സ​ന​ത്തി​നു​മൊ​പ്പം ഈ ​കാ​ര്യ​ങ്ങ​ളി​ൽ കൂ​ടി വ്യാ​പ​രി​ക്കാ​ൻ സ​ഹാ​യി​ക്കു​ന്ന​ത് കു​ട്ടി​ക​ളു​ടെ മാ​താ​പി​താ​ക്ക​ളും വ​ലി​യ കാ​ര്യ​മാ​യ​ണ് കാ​ണു​ന്ന​ത്. പ​ച്ച​ക്ക​റി കൃ​ഷി​യി​ൽ മാ​ത്ര​മ​ല്ല പ​ല​ത​രം ക​ളി​ക​ളി​ലും ക​ലാ​മ​ത്സ​ര​ങ്ങ​ളി​ലും ഈ ​സ്പെ​ഷ​ൽ സ്കൂ​ളി​ലെ കു​ട്ടി​ക​ൾ മി​ക​ച്ച രീ​തി​യി​ൽ പ്ര​ക​ട​ന​ങ്ങ​ൾ ന​ടത്തുന്നു.