ലബോറട്ടറി ഓണേഴ്സ് അസോ. ജില്ലാ സമ്മേളനം നാളെ : Deepika.com Nattu Visesham

ശ്രീനാരായണ ധർമ മീമാംസാ പരിഷത്ത് ഇന്നു കുണ്ടറയിൽ

കൊല്ലം: ശ്രീ നാരായണ ധർമ സംഘം ട്രസ്റ്റ് ശിവഗിരിമഠം ഗുരുധർമ പ്രചാരണ സഭ ജില്ലാ കമ്മിറ്റിയുടെ ആഭിമുഖ്യത്തിലുള്ള ശ്രീനാരായണ ധർമ മീമാംസാ പരിഷത്ത് ഇന്ന് കുണ്ടറ ഗുരുദേവ ഓഡിറ്റോറിയത്തിൽ നടക്കും. രാവിലെ 9.30 ന് ദാർശനിക സമ്മേളനം ട്രസ്റ്റ് പ്രസിഡന്‍റ് സച്ചിദാനന്ദ സ്വാമികൾ ഉദ്ഘാടനം ചെയ്യും. ജനറൽ സെക്രട്ടറി ശുഭാംഗാനന്ദ സ്വാമികൾ ആചാര്യ പ്രഭാഷണം നടത്തും. ഡോ. സി.എൻ. സോമരാജൻ, ജി. പദ്മാകരൻ, എം.എച്ച്.റഹിം, നെടുങ്ങോലം രഘു തുടങ്ങിയവരെ ആദരിക്കും. ഉച്ചകഴിഞ്ഞ് 3.30 ന് സംഘടനാ സമ്മേളനം ഗുരുധർമ പ്രചാരണ സഭ കേന്ദ്ര സെക്രട്ടറി അസംഗാനന്ദ ഗിരി സ്വാമികൾ ഉദ്ഘാടനം ചെയ്യും. ധർമവ്രത സ്വാമികൾ അനുഗ്രഹ പ്രഭാഷണം നടത്തും. കെ. ടി. സുകുമാരൻ മുഖ്യപ്രഭാഷണം നിർവഹിക്കും.

ഡോ. .വന്ദനാദാസ് കൊലക്കേസ്: ക്രോസ് വിസ്താരം ഇന്നും തുടരും

കൊല്ലം: കൊട്ടാരക്കര താലൂക്ക് ആശുപത്രിയിലെ അത്യാഹിത വിഭാഗത്തില്‍ വച്ച് ഡോ. വന്ദനദാസിനെ പ്രതി സന്ദീപ് കുത്തുന്നത് നേരിട്ടു കണ്ടതായി പ്രോസിക്യൂഷന്‍ വിഭാഗം ഒന്നാം സാക്ഷി മുഹമ്മദ് ഷിബിന്‍ കോടതിയില്‍ ആവര്‍ത്തിച്ചു. കൊല്ലം അഡീഷണല്‍ സെഷന്‍സ് ജഡ്ജി പി.എന്‍. വിനോദ് മുമ്പാകെ നടന്ന ക്രോസ് വിസ്താരത്തില്‍ പ്രതിഭാഗം വാദങ്ങള്‍ തള്ളിയ ഷിബിന്‍, പ്രോസിക്യൂഷന്‍ സാക്ഷിമൊഴിയില്‍ ഉറച്ചുനിന്നു. ആശുപത്രി അത്യാഹിത വിഭാഗത്തില്‍ പോലീസും പ്രതിയും തമ്മില്‍ നടന്ന പിടിവലിക്കിടയില്‍ വന്ദനയ്ക്ക് അബദ്ധത്തില്‍ കുത്തേറ്റതാണെന്നും കുത്താന്‍ ഉപയോഗിച്ചത് പ്രോസിക്യൂഷന്‍ ഹാജരാക്കിയ കത്രിക അല്ലെന്നുമുള്ള പ്രതിഭാഗം വാദത്തെ, മുഹമ്മദ് ഷിബിന്‍ നിഷേധിച്ചു. കൊട്ടാരക്കര താലൂക്ക് ആശുപത്രിയില്‍ മതിയായ ചികിത്സ നൽകിയിരുന്നെങ്കില്‍ വന്ദനയുടെ ജീവന്‍ രക്ഷിക്കാന്‍ സാധിക്കുമായിരുന്നുവെന്നും പ്രതിഭാഗം വാദം ഉയര്‍ത്തി. ഇതിനെയും ഷിബിന്‍ നിഷേധിച്ചു. അത്യാഹിത വിഭാഗത്തില്‍ പ്രതി സന്ദീപ് ഭീകരാന്തരീക്ഷം സൃഷ്ടിച്ചു കൊണ്ടിരുന്ന സാഹചര്യത്തില്‍ അവിടെ ചികിത്സ നൽകാന്‍ സാധിക്കുമായിരുന്നില്ലെന്നും ഷിബന്‍ പറഞ്ഞു. ക്രോസ് വിസ്താരം ഇന്നും തുടരും. പ്രോസിക്യൂഷന് വേണ്ടി സ്പെഷല്‍ പബ്ലിക് പ്രോസിക്യൂട്ടര്‍ പ്രതാപ് ജി. പടിക്കല്‍, അഭിഭാഷകരായ ശ്രീദേവി പ്രതാപ്, ശില്‍പ ശിവന്‍, ഹരീഷ് കാട്ടൂര്‍ എന്നിവരും പ്രതിഭാഗത്തിനായി അഡ്വ. ബി.എ ആളൂരും ഹാജരായി.

ഇഗ്നോ സബ്സെന്‍റര്‍ പൂട്ടി ജീവനക്കാർ വിവാഹത്തിനുപോയി; വിദ്യാര്‍ഥികള്‍ വലഞ്ഞു

കൊല്ലം: ഇന്ദിരാഗാന്ധി നാഷണല്‍ ഓപ്പണ്‍ യൂണിവേഴ്സിറ്റിയുടെ (ഇഗ്നോ) സബ് സെന്‍റര്‍ പൂട്ടി ജീവനക്കാര്‍ വിവാഹത്തിന് പോയതോടെ വിവിധ ആവശ്യങ്ങൾക്കെത്തിയ വിദ്യാർഥികൾ മണിക്കൂറുകളോളം വലഞ്ഞു. കൊല്ലം എസ്എന്‍ കോളജിന് സമീപമുള്ള സബ് സെന്‍ററിലെ ഉദ്യോഗസ്ഥരാണ് ഓഫീസ് പൂട്ടിയിട്ട ശേഷം വിവാഹത്തിന് പോയത്. എല്ലാ ദിവസവും രാവിലെ 10നാണ് ഓഫീസ് പ്രവര്‍ത്തനം ആരംഭിക്കുന്നത്. ജില്ലയിലെ വിവിധ ഭാഗങ്ങളിൽ നിന്നും സമീപ ജില്ലകളിൽ നിന്നും വളരെ ദൂരത്ത് നിന്നുൾപ്പെടെ നിരവധി വിദ്യാർഥികളാണ് സെന്‍ററിലെത്തിയത്. കോഴ്‌സുമായി ബന്ധപ്പെട്ട പ്രോജക്ടുകളും അസെെൻമെന്റുകളും സബ്മിറ്റ് ചെയ്യാനായെത്തിയ വിദ്യാർഥികളും ഇക്കൂട്ടത്തിലുണ്ട്. 30ന് മുന്‍പ് സബ്മിറ്റ് ചെയ്യാനുള്ളവരായിരുന്നു ഇവരിൽ ഏറെപ്പേരും. സെന്‍റർ അടച്ചിട്ടതിനെത്തുടർന്ന് രാവിലെ എത്തിയ ഒട്ടേറെ വിദ്യാര്‍ഥികളും രക്ഷിതാക്കളുമാണ് വലഞ്ഞത്. എന്നാല്‍ ഓഫീസ് അടച്ചിട്ടതിനെ തുടര്‍ന്ന് രക്ഷിതാക്കളടക്കം കടത്തിണ്ണകളിലും റോഡിലും കാത്തിരിക്കേണ്ട അവസ്ഥയായിരുന്നു. നിരവധി പേര്‍ കാത്തുനിന്ന് മടുത്ത് തിരികെ പോകുകയായിരുന്നു. കഷ്ടപ്പെട്ട് പ്രോജക്ട് ചെയ്തിട്ട് പെരുവഴിയില്‍ നില്‍ക്കേണ്ട അവസ്ഥ വന്നത് വിചിത്രമെന്ന് വിദ്യാര്‍ഥികള്‍ പ്രതികരിച്ചു. ജീവനക്കാര്‍ ഓഫിസ് പൂട്ടി വിവാഹത്തിന് പോയെന്നാണ് വിശദീകരണം. അതേസമയം ഉച്ചയോടെ അധികൃതര്‍ തിരിച്ചെത്തി ഓഫീസ് തുറക്കുകയും ചെയ്തു.

കല്ലടയാറ് കടന്ന് ആനക്കൂട്ടം വീണ്ടും ജനവാസ മേഖലയിൽ

കുളത്തൂപ്പുഴ :ജനവാസ മേഖലയിൽ വീണ്ടും കാട്ടാനക്കൂട്ടം എത്തി കൃഷി നാശം വരുത്തി. വാഴ,കമുക്, തെങ്ങ് ,പ്ലാവ്, ഉൾപ്പെടെ നശിപ്പിച്ചിട്ടാണ് ആനക്കൂട്ടം മടങ്ങിയത് .പുലർച്ചെ കർഷകർ കൃഷി സ്ഥലത്ത് എത്തിയപ്പോഴാണ് കൃഷിയിടങ്ങൾ ആനക്കൂട്ടം നശിപ്പിച്ച നിലയിൽ കണ്ടത്. ഉടനെ അഞ്ചൽ റേഞ്ചിൽ പെട്ട കളംകുന്ന്സെക്ഷൻ വനപാലകരെ അറിയിക്കുകയും സെക്ഷൻ ഫോറസ്റ്റ് ഓഫീസർ ഉല്ലാസ് ,ബീറ്റ് ഫോറസ്റ്റ് ഓഫീസർമാരായ ശ്രീകുമാർ ,രമ്യ ,റിസർവ് ഫോറസ്റ്റ് വാച്ചർമാരായ അനൂപ് ഭാസ്കർ,ജയശ്രീ ,എന്നിവർ എത്തുകയും കർഷകർക്കുണ്ടായ നാശങ്ങൾ കണക്കെടുക്കുകയും ചെയ്തു. വന്യജീവി ജനവാസ മേഖലയിൽ ഇറങ്ങി കൃഷിയിടങ്ങൾ നശിപ്പിക്കുന്നത് ഇതിനു വേണ്ട നഷ്ടപരിഹാര നടപടികൾ സ്വീകരിക്കുമെന്നും സൗരോജ്ജ വേലികൾ സാധിക്കാൻ വേണ്ട കാര്യങ്ങൾ ചെയ്യുമെന്നും അഞ്ചൽ റേഞ്ച് ഫോറസ്റ്റ് ഓഫീസർ അജിത് കുമാർ ജനങ്ങൾക്ക് ഉറപ്പു നൽകി. ഈ പ്രദേശത്തിന് തൊട്ടു മുകളിൽ കൂടിയാണ് അന്തർ സംസ്ഥാനപാതയായ തിരുവനന്തപുരം തെങ്കാശി റോഡിൽ കൂടി അനേക വാഹനങ്ങൾ കടന്നുപോകുന്നത് . വന്യമൃഗങ്ങളായ ആനയെയും കാട്ടുപോത്തിനെയും നിയന്ത്രിക്കാൻ കഴിഞ്ഞില്ലെങ്കിൽ വൻ അപകടങ്ങൾ ഈ പ്രദേശങ്ങളിൽ സംഭവിക്കുമെന്ന് നാട്ടുകാർ മുന്നറിയിപ്പ് നൽകുന്നു . രാത്രികാലങ്ങളിൽ ഈ പ്രദേശത്തോടെ സഞ്ചരിക്കുന്നവർ ജാഗ്രത പാലിക്കണമെന്നും ഇവിടത്തെ താമസക്കാർ മുന്നറിയിപ്പ് നൽകുകയാണ്.

ലഹരിക്കെതിരെ സിറ്റി പോലീസിന്‍റെ കര്‍മ പദ്ധതി 'മുക്ത്യോദയം' രൂപരേഖ പ്രകാശനം ചെയ്തു

കൊല്ലം: സിറ്റി പോലീസിന്‍റെ ആഭിമുഖ്യത്തില്‍ വിവിധ വകുപ്പുകളെ ഏകോപിപ്പിച്ച് ലഹരിക്കെതിരെ നടത്തുന്ന കര്‍മ പദ്ധതി 'മുക്ത്യോദയം' രൂപരേഖ പ്രകാശനം ചെയ്തു. കൊല്ലം പ്രിന്‍സിപ്പല്‍ ഡിസ്ട്രിക്റ്റ് ആന്‍റ് സെഷന്‍സ് ജഡ്ജിയുടെ ചേംബറില്‍ പ്രിന്‍സിപ്പല്‍ ഡിസ്ട്രിക്റ്റ് ആന്‍റ് സെഷന്‍സ് ജഡ്ജ് പി.മായാദേവി ഹൈക്കോടതി ജഡ്ജി ദേവന്‍ രാമചന്ദ്രന് രൂപരേഖ കൈമാറി കൊണ്ടാണ് പ്രകാശനം നിർവഹിച്ചത്. കൊല്ലം സിറ്റി പോലീസ് കമ്മീഷണര്‍ കിരണ്‍ നാരായണന്‍റെ സാന്നിദ്ധ്യത്തിലായിരുന്നു പ്രകാശനം.ഡിമാന്‍റ് റിഡക്ഷന് ആവശ്യമായ പ്രവര്‍ത്തനങ്ങള്‍, കുട്ടികളോടുളള അവഗണനയ്ക്കെതിരായി രക്ഷിതാക്കള്‍ക്കുളള ബോധവല്‍ക്കരണം, ദുര്‍ബല മേഖലകളെയും ദുര്‍ബല വിഭാഗങ്ങളെയും തിരിച്ചറിയുക, സ്കൂള്‍- കോളജ് പ്രൊട്ടക്ഷന്‍ ഗ്രൂപ്പുകളുടെ ചുമതലകളും പ്രവര്‍ത്തനങ്ങളും, പ്രായാനുസൃതമായി പരിശീലനത്തിനും ബോധവല്‍ക്കരണത്തിനുമാവശ്യമായ ഗുണമേന്മയുളള മൊഡ്യൂള്‍ തയാറാക്കല്‍, മാസ്റ്റര്‍ ട്രെയിനേഴ്സിനും കൗണ്‍സിലര്‍മാര്‍ക്കുമുളള പരിശീലനം, ദുര്‍ബല മേഖലകളില്‍ ലഹരിക്ക് അടിമപ്പെട്ടവര്‍ക്കായി എല്ലാ വെള്ളിയാഴ്ചകളിലും ഹെല്‍പ്പ് ഡെസ്ക്ക്, ബോധവല്‍ക്കരണ പരിപാടികള്‍, 'നോ ടു ഡ്രഗ്, ഫാമിലി ഹെവർ' എന്ന നാമധേയങ്ങളില്‍ സോഷ്യല്‍ മീഡിയാ കാമ്പയിനുകള്‍, നയരൂപീകരണ ത്തിനും നിയമനിര്‍മാണത്തിനും ആവശ്യമായ നിര്‍ദ്ദേശങ്ങള്‍, സഹായി' ഹെല്‍പ്പ് ലൈന്‍, ലഹരി ഉപയോഗത്തിലേക്ക് പുതുതലമുറ കടന്നുപോകുവാനുളള മൂലകാരണങ്ങളുടെ സമഗ്രമായ ഉന്മൂലനം, സ്കൂള്‍ പഠനം ഉപേക്ഷിക്കുന്നവര്‍ക്ക് തുടര്‍ പഠനസൗകര്യം ഒരുക്കല്‍ തുടങ്ങി ലഹരിക്കെതിരായി സമഗ്ര കർമ പദ്ധതിയാണ് 'മുക്ത്യോദയം'ലക്ഷ്യമിടുന്നത്. വിമുക്തി, ജില്ലാ മെന്‍റല്‍ ഹെല്‍ത്ത് പ്രോജക്റ്റ് വിഭാഗം, ക്യൂ എസ് എസ് എസ് , തദ്ദേശസ്വയം ഭരണ സ്ഥാപനങ്ങള്‍, എന്‍ ജി ഒ കള്‍ തുടങ്ങി നിരവധി വിഭാഗങ്ങളെ കൂട്ടിയോജിപ്പിച്ചാണ് കൊല്ലം സിറ്റി പോലീസ് ലഹരിയ്ക്കെതിരായി സമഗ്രമായ കര്‍മപദ്ധതി ആവിഷ് കരിച്ചിരിക്കുന്നത്. ചടങ്ങില്‍ കൊല്ലം സിറ്റി, റൂറല്‍ പോലീസ് ജില്ലകളിലെയും എക്സൈസിലേയും ഉയർന്ന ഉദ്യോഗസ്ഥര്‍ സംബന്ധിച്ചു.

ചെറുമഴ പെയ്താലും ചണ്ണപ്പേട്ട പ്രദേശം മുങ്ങും

അഞ്ചല്‍ : കോടികള്‍ ചിലവഴിച്ചു ആലഞ്ചേരി ചണ്ണപ്പേട്ട പാതയുടെ നിര്‍മാണം അധികൃതര്‍ പൂര്‍ത്തീകരിച്ചു. പക്ഷേ പാതയുടെ നിര്‍മ്മാണം പൂര്‍ത്തീകരിച്ചുവെങ്കിലും ഓടയുള്‍പ്പടെ നിര്‍മിക്കാതെയുള്ള അശാസ്ത്രീയത നാട്ടുകാരെയും വ്യാപാരികളെയും വലിയ ബുദ്ധിമുട്ടിലാക്കിയിരിക്കുകയാണിപ്പോള്‍. ചെറിയ ഒരു മഴപെയ്താല്‍ പോലും റോഡില്‍ വലിയ രീതിയില്‍ വെള്ളക്കെട്ട്. ഇനി മഴ പെയുന്നത് അല്‍പ്പസമയം നീണ്ടാല്‍ കടകളിലേക്ക് ഉള്‍പ്പടെ വെള്ളം ഇരച്ചുകയറും. കാല്‍നട ഇരുചക്ര വാഹന യാത്രികള്‍ ശരിക്കും ബുദ്ധിമുട്ടിലാകും. വാഹനങ്ങള്‍ പോകുമ്പോള്‍ വെള്ളം തെറിക്കുന്നതും പതിവ്. മഴമേഘം കാണുമ്പോഴേ സ്ഥാപനങ്ങള്‍ പൂട്ടി വ്യാപാരികള്‍ പോവുകയാണിപ്പോള്‍. പലതവണ ബന്ധപ്പെട്ട അധികൃതരോടു പരാതി പറഞ്ഞിട്ടും നടപടി ഉണ്ടായിട്ടില്ല. പഞ്ചായത്ത് അധികൃതര്‍ അടിയന്തിരമായി ഇക്കാര്യത്തില്‍ ഇടപെട്ട് ആവശ്യമായ നടപടികള്‍ സ്വീകരിക്കണം എന്നാണ് നാട്ടുകാരും വ്യാപാരികളും പറയുന്നത്. പാതയുടെ ന്നവീകരണ പ്രവര്‍ത്തികള്‍ നടക്കുന്ന വേളയില്‍ത്തന്നെ ആശാസ്ത്രീയതചൂണ്ടികാട്ടിയിരുന്നു. പക്ഷേ അധികൃതര്‍ ഇക്കാര്യം ഗൗരവമായി എടുക്കാത്തതാണ് ബുദ്ധിമുട്ടുകള്‍ക്ക് പ്രധാന കാരണമെന്നും നാട്ടുകാര്‍ ആരോപിക്കുന്നു.

പരിശുദ്ധ ഫ്രാൻസിസ് പാപ്പാ പ്രത്യാശയുടെ തീർഥാടകൻ: ബിഷപ് സെൽവിസ്റ്റർ പൊ ന്നുമുത്തൻ

പുനലൂർ: ആഗോള കത്തോലിക്ക തിരുസഭയുടെ പരമാധ്യക്ഷനായ ഫ്രാൻസിസ് പാപ്പായുടെ ആത്മശാന്തിക്കായുള്ള ദിവ്യബലി പുനലൂർ സെന്‍റ് മേരിസ് കത്തീഡ്രൽ ദേവാലയത്തിൽ പുനലൂർ രൂപത മെത്രാൻ സെൽവിസ്റ്റർ പൊന്നുമുത്തന്‍റെ മുഖ്യ കാർമികത്വത്തിൽ നടന്നു. ഈ ഭൂമിയിൽ മനുഷ്യൻ പ്രത്യാശയുടെ തീർഥാടകരാണെന്നും പ്രത്യാശ നമ്മെ നിരാശരാക്കുന്നില്ലെന്നും ഫ്രാൻസിസ് പാപ്പായുടെ വിയോഗം ദുഃഖം ആണെങ്കിലും അദ്ദേഹത്തിന്‍റെ ജീവിതം പ്രത്യാശയും പ്രതീക്ഷയും നൽകുന്നതാണെന്ന് അനുസ്മരണ സന്ദേശത്തിൽ ബിഷപ്ഓർമപ്പെടുത്തി.ഫാ. ക്രിസ്റ്റി ജോസഫ് ആമുഖ അനുസ്മരണ പ്രഭാഷണം നടത്തി. വികാരി ജനറൽ മോൺ.സെബാസ്റ്റ്യൻ വാസ്, മോൺ.ജോസഫ് റോയി, രൂപത ചാൻസിലർ റവ.ഡോ.റോയി ബി.സിംസൺ എന്നിവർ സഹകാർമികരായിരുന്നു.ഫാ. ജോൺസൺ ജോസഫ്, ഫാ. വിപിൻ മാർട്ടിൻ എന്നിവർ ദിവ്യബലിയുടെ ക്രമീകരണങ്ങൾക്ക് നേതൃത്വം നൽകി.

ദൈവ കരുണയുടെ മുഖമായിരുന്നു ഫ്രാൻസിസ് പാപ്പ: ബിഷപ് പോൾ ആന്‍റണി മുല്ലശേരി

കൊല്ലം: ദൈവ കരുണയുടെ മുഖമായിരുന്നു ഫ്രാൻസിസ് പാപ്പാ എന്ന് കൊല്ലം ബിഷപ് പോൾ ആന്‍റണി മുല്ലശേരി. ദൈവത്തിന്‍റെ നിർവചനം കരുണയാണെന്നാണ് ഫ്രാൻസിസ് പാപ്പാ പഠിപ്പിച്ചത്. ഓരോ ക്രൈസ്തവനും ദൈവ കരുണയുടെ മുഖം ആകാൻ വിളിക്കപ്പെട്ടവരാണെന്നും അദ്ദേഹം ഓർമിപ്പിച്ചു. ഫ്രാൻസിസ് പാപ്പായുടെ കബറടക്കത്തിന് മുന്നോടിയായി കൊല്ലം രൂപതയുടെ തങ്കശേരി ഇൻഫന്‍റ് ജീസസ് കത്തീഡ്രലിൽ നടന്ന സമ്മേളനത്തിൽ അനുശോചന സന്ദേശം നൽകുകയായിരുന്നു ബിഷപ്. ദിവ്യബലിക്ക് ശേഷം ബിഷപ് പോൾ ആന്‍റണി മുല്ലശേരിയുടെ അധ്യക്ഷതയിൽ നടന്ന അനുശോചന സമ്മേളനത്തിൽ കൊല്ലത്തെ രാഷ്ട്രീയ സമുദായിക രംഗത്തെ പ്രമുഖർ പങ്കെടുത്തു. മന്ത്രി ജെ.ചിഞ്ചു റാണി, കൊല്ലം മേയർ ഹണി ബെഞ്ചമിൻ,സിപിഎം ജില്ലാ സെക്രട്ടറി എസ്. സുദേവൻ, കെപിസിസി നിർവാഹ സമിതി അംഗം അഡ്വ. ബിന്ദു കൃഷ്ണ, ബിജെപി ജില്ലാ പ്രസിഡന്‍റ് പ്രശാന്ത്, മുൻമേയർ പ്രസന്ന ഏണസ്റ്റ്, ഫാ. ഡോ. ബൈജു ജൂലിയൻ, ജോർജ് .ഡി. കാട്ടിൽ, സ്റ്റാൻലി, അനിൽ ജോൺ ഫ്രാൻസിസ്, ലെസ്റ്റർ കാർഡോസ് എന്നിവർ അനുസ്മരണ പ്രഭാഷണങ്ങൾ നടത്തി.

പഹൽഗാമിൽ നടന്ന ഭീകരത ഓരോ ഭാരതീയനെയും ദുഃഖത്തിലാക്കി: ജസ്റ്റീസ് ദേവൻ രാമചന്ദ്രൻ

കൊല്ലം: പഹൽഗാമിൽ നടന്ന ഭീകരത ഓരോ ഭാരതീയന്‍റെയും ഹൃദയം ദുഃഖത്തിലാക്കിയെന്ന് ജസ്റ്റിസ് ദേവൻ രാമചന്ദ്രൻ. അഖില കേരള അഭിഭാഷക കലോത്സവം കൊല്ലത്ത് ഉദ്‌ഘാടനം ചെയ്ത് പ്രസംഗിക്കുകയായിരുന്നു ദേവൻ രാമചന്ദ്രൻ. ഇന്നലെ രാവിലെ പഹൽഗാം ഭീകരതയിൽ മരണപ്പെട്ട വ്യക്തിയുടെ കുടുംബാംഗങ്ങളെ സന്ദർശിച്ച കാര്യം അദ്ദേഹം അനുസ്മരിച്ചു. പഹൽഗാമിൽ നടന്ന ഭീകരത മൂലം സമ്മിശ്ര വികാരത്തോടെയാണ് വേദിയിൽ നിൽക്കുന്നത്. പഹല്‍ഗാം സംഭവം ഭാരതത്തിനേറ്റ നോവാണ്. ഓരോ ഭാരതീയന്‍റെയും ഹൃദയം ദുഃഖത്തിലാഴ്ന്നിരിക്കുകയാണ്. എങ്കിലും പതറാതെ നാം ജീവിതം മുന്നോട്ട് കൊണ്ടു പോകണം - ജസ്റ്റിസ് പറഞ്ഞു. കേരളത്തിലെ കലാരംഗത്ത് ഒരു നാഴികക്കല്ലായി മാറുന്ന ഒന്നാണ് കൊല്ലത്ത് തുടക്കമിടുന്ന സംസ്ഥാന തല അഭിഭാഷക കലോത്സവം എന്ന് ഉദ്ഘാടന പ്രസംഗത്തിൽ ജസ്റ്റിസ് ദേവൻ രാമചന്ദ്രൻ പറഞ്ഞു. തൊഴിൽ സമ്മർദത്തിൽ പെട്ട് സമയം ഇല്ലാത്ത അവസ്ഥയിൽ ജീവിക്കുന്ന അഭിഭാഷകർക്ക് ഇത്തരം കലാമത്സര വേദികൾ സന്തോഷം പകരും. തനിക്ക് ഈ മഹാ കലോത്സവം ഉദ്ഘാടനം ചെയ്യാൻ സാധിച്ചത് മഹാഭാഗ്യമായി കരുതുന്നു. ഇതിന് അവസരമൊരുക്കിയ കൊല്ലം ബാർ അസോസിയേഷനെക്കുറിച്ച് അഭിമാനം കൊള്ളുന്നതായും ജസ്റ്റിസ് പറഞ്ഞു. കൊല്ലം ബാർ അസോസിയേഷൻ പ്രസിഡന്‍റ് അഡ്വ .ഓച്ചിറ എൻ. അനിൽകുമാർ അധ്യക്ഷത വഹിച്ചു. കൊല്ലം ജില്ലാ ജഡ്ജ് പി. മായാദേവി മുഖ്യാതിഥിയായിരുന്നു. ചീഫ് ജുഡീഷ്യൽ മജിസ്ട്രേറ്റ് നൈന , കൊല്ലം ഡെപ്യൂട്ടി മേയർ എസ്.ജയൻ, ബാർ കൗൺസിൽ അംഗങ്ങളായ അഡ്വ. പി.സന്തോഷ് കുമാർ, അഡ്വ പി.സജീവ് ബാബു, ജില്ലാ സർക്കാർ വക്കീൽ അഡ്വ. വിളയിൽ. എ. രാജീവ്, അസോസിയേഷൻ പ്രതിനിധി രാധാകൃഷ്ണപിള്ള, ബാർ അസോസിയേഷൻ സെക്രട്ടറി അഡ്വ. എ.കെ.മനോജ്, ഡയറക്ടർ ബോർഡ് അംഗം അഡ്വ. അമ്പിളി ജബാർ എന്നിവർ പ്രസംഗിച്ചു. തുടർന്ന് ഭരതനാട്യം മത്സരം നടന്നു. എംടി നഗര്‍, പി. ജയചന്ദ്രന്‍ നഗര്‍, വി. സാംബശിവന്‍ നഗര്‍, ഒ.എന്‍.വി. നഗര്‍, സച്ചി നഗര്‍ എന്നീ വേദികളില്‍ 21 ഇനങ്ങളിലായി നടക്കുന്ന മത്സരങ്ങളില്‍ 300-ഓളം പേരാണ് പങ്കെടുക്കുന്നത്. ഏറ്റവും കൂടുതല്‍ പോയിന്‍റ് നേടുന്ന ബാര്‍ അസോസിയേഷന് അഡ്വ. വൈക്കം നാരായണപിള്ള സ്മാരക എവര്‍ റോളിംഗ് ട്രോഫിയും രണ്ടാം സ്ഥാനത്ത് എത്തുന്നവര്‍ക്ക് അഡ്വ. പി. വിജയരാഘവന്‍ സ്മാരക എവര്‍ റോളിംഗ് ട്രോഫിയും നൽകും. സമാപന സമ്മേളനം നാളെ വൈകുന്നേരം നാലിന് ആനന്ദവല്ലീശ്വരം എന്‍ എസ് എസ് ഹാളില്‍ കേരള ഹൈക്കോടതി ജഡ്ജി പി.ബി. സുരേഷ്‌കുമാര്‍ ഉദ്ഘാടനം ചെയ്യും.

ഫ്രാൻസിസ് മാർപാപ്പ അനുസ്മരണവും വിലാപയാത്രയും നാളെ

കൊട്ടാരക്കര: ആഗോള കത്തോലിക്ക സഭയുടെ തലവൻ കാലം ചെയ്ത ഫ്രാൻസിസ് മാർപാപ്പയുടെ അനുസ്മരണാർഥം നടത്തപ്പെടുന്ന വിലാപയാത്രയും അനുസ്മരണ സമ്മേളനവും പരിസരപ്രദേശങ്ങളിലേയും വിവിധ കത്തോലിക്ക ഇടവകകളുടെ യും നേതൃത്വത്തിൽ 27ന് വൈകുന്നേരം നടക്കും. നാലിന് സെന്‍റ് മൈക്കിൾസ് കത്തോലിക്ക പളളി അങ്കണത്തിൽനിന്ന് ആരംഭിക്കുന്ന വിലാപ യാത്ര പുലമൺ സെന്‍റ് മേരീസ് കത്തോലിക്ക പള്ളിയിൽസമാപിക്കും. അഞ്ചിന് നടക്കുന്ന അനുസ്മരണ സമ്മേളനം ഓർത്തഡോക്സ് സഭയുടെ അടൂർ -കടന്പനാട് ഭദ്രാസനാധ്യക്ഷൻ സഖറിയാസ് മാർഅപ്രേം മെത്രാപ്പൊലീത്ത ഉദ്ഘാടനം ചെയ്യും. മലങ്കര മാർത്തോമ സുറിയാനി സഭയുടെ കൊട്ടാരക്കര -പുനലൂർ ഭദ്രസനാധ്യക്ഷൻ തോമസ് മാർ തീത്തോസ് എപ്പിസ്കോപ്പ മുഖ്യപ്രഭാഷണം നടത്തും. ഗീവർഗീസ് നെടിയത്ത് റന്പാന്‍റെ അധ്യക്ഷതയിൽ നടക്കുന്ന സമ്മേളനത്തിൽ കൊടിക്കുന്നിൽ സുരേഷ് എംപി,അഡ്വ.ഉണ്ണികൃഷ്ണൻ മേനോൻ എന്നിവർ അനുസ്മരണ പ്രഭാഷണം നടത്തും. പരിപാടികൾക്ക് ജയിംസ് പാറവിള കോർ എപ്പിസ്കോപ്പ ,ഫാ.ഗീവർഗീസ് എഴിയത്ത്,ഫാ.വിനീത്,ഫാ.ജോൺസൺ,ഫാ.ജോർജ് ഭട്ടശേരിൽ ജോസഫ് ജോൺ തച്ചിരഴികത്ത്, മാത്തുക്കുട്ടി തെക്കേടത്ത് എന്നിവർ നേതൃത്വം നൽകും.

പഴയേരൂർ മലങ്കര കത്തോലിക്ക പള്ളിയിൽ തിരുനാളും ഇടവക ദിനവും

പഴയേരൂർ : സെന്‍റ്ജോർജ് മലങ്കര സുറിയാനി കത്തോലിക്കാ പള്ളിയിൽ വിശുദ്ധ ഗീവർഗീസ് സഹദായുടെ തിരുനാളും ഇടവക പെരുന്നാളും 27 മുതൽ മേയ് ഒന്നുവരെ നടത്തും.തിരുനാളിനോട് അനുബന്ധിച്ച് നൊവേന, സന്ധ്യാ നമസ്കാരം,വചന പ്രഘോഷണം,ദിവ്യകാരുണ്യ ആരാധന, ചെമ്പെടുപ്പ് റാസ, കുട്ടികളുടെ പ്രഥമ ദിവ്യകാരുണ്യ സ്വീകരണം, ആഘോഷപൂർവമായ വി. കുർബാന, നേർച്ചവിളമ്പ് എന്നിവയും നടത്തും. 27 ന് രാവിലെ 6.15 ന് പ്രഭാത പ്രാർഥനയും, വി. കുർബാനയും, തിരുനാൾ കോടിയേറ്റും. 28 ന് വൈകുന്നേരം നാലിന് വി. കുമ്പസാരം,അഞ്ചിന് നൊവേന, സന്ധ്യാ പ്രാർഥന, തുടർന്ന് വി. കുർബാന.29 മുതൽ മേയ് ഒന്നു വരെ വൈകുന്നേരം അഞ്ചിന് നൊവേന, സന്ധ്യാപ്രാർഥന, വി. കുർബാന, വചനപ്രാഘോഷണവും, ദിവ്യകാരുണ്യ ആരാധനയും. മേയ് രണ്ടിന് വൈകുന്നേരം അഞ്ചിന് നൊവേന,സന്ധ്യാ പ്രാർഥന, വി. കുർബാന, തുടർന്ന് ഭക്തസംഘടനകളുടെ വാർഷികം, നേർച്ചവിളമ്പ്. മൂന്നിന് വൈകുന്നേരം അഞ്ചിന് ഏഴംകുളം ഹോളി ഫാമിലി മലങ്കര സുറിയാനി കത്തോലിക്കാ പള്ളിയിൽ നൊവേന,സന്ധ്യാപ്രാർഥന, വി. കുർബാന, തുടർന്ന് ആഘോഷമായ തിരുനാൾ റാസയും, ചെമ്പെടുപ്പും ഏഴംകുളം പള്ളിയിൽ നിന്ന് ആരംഭിച്ചു പഴയേരൂർ പള്ളിയിൽ എത്തിചേരും. നാലിന് രാവിലെ എട്ടിന് പ്രഭാതപ്രാർഥന, ആഘോഷമായ വി.കുർബാന, കുട്ടികളുടെ പ്രഥമ ദിവ്യകാരുണ്യ സ്വീകരണവും,മേജർ അതിരൂപത വികാരി ജനറാൾ റൈറ്റ്. റവ. ഡോ. വർക്കി ആറ്റുപുറത്ത്‌ കോർ എപ്പിസ്കോപ്പ അർപ്പിയ്ക്കും.തുടർന്ന് നേർച്ചവിളമ്പും, കൊടിയിറക്കവുംനടക്കുമെന്ന് വികാരി ഫാ. ഷോജി വെച്ചുർ കരോട്ട്, ട്രസ്റ്റി സാറമ്മചാക്കോ വൈരമൺ, സെക്രട്ടറി എം. കെ. തോമസ് മൂഴിയ്ക്കൽ എന്നിവർ അറിയിച്ചു .

കാര്‍ഷിക നവോ ഥാന യാത്ര ഇന്ന് ജില്ലയില്‍

കൊട്ടാരക്കര: ഭാരതീയ കിസാന്‍ സംഘ് സംസ്ഥാന അധ്യക്ഷന്‍ ഡോ.അനില്‍ വൈദ്യമംഗലം നയിക്കുന്ന കാര്‍ഷിക നവോഥാന യാത്ര ഇന്ന് ജില്ലയില്‍ പര്യടനം നടത്തും. രാവിലെ കൊട്ടാരക്കര മണികണ്ഠനാല്‍ത്തറയില്‍ സ്വീകരണ സമ്മേളനം നടക്കും. സ്വാഗത സംഘ അധ്യക്ഷന്‍ ഏരൂര്‍മോഹനനന്‍ അധ്യക്ഷനാകും. സംസ്ഥാന അധ്യക്ഷന്‍ ഡോ.അനില്‍ വൈദ്യമംഗലം മുഖ്യപ്രഭാഷണം നടത്തും. സംസ്ഥാന സമിതി അംഗങ്ങളായ ബാബു പുലുവീടന്‍, എന്‍.ശിവരാജന്‍പിള്ള എന്നിവര്‍ പ്രസംഗിക്കും.സദാനന്ദപുരം, വാളകം, അഞ്ചല്‍, കോട്ടുക്കല്‍ , ആയൂര്‍, ചടയമംഗലം, നിലമേല്‍ എന്നിവിടങ്ങളില്‍ യാത്ര പര്യടനം നടത്തും. സ്വീകരണ സമ്മേളനങ്ങളില്‍ മാതൃകാകര്‍ഷകരെ അനുമോദിക്കുകയും കൃഷിയുമായി ബന്ധപ്പെട്ട കേന്ദ്രങ്ങള്‍ സന്ദര്‍ശിക്കുകയും ചെയ്യും. കാര്‍ഷിക കേരളത്തിന്‍റെ തനിമയും നാട്ടിന്‍പുറത്തിന്‍റെ നന്മയും തിരിച്ചുവരവിന്‍റെ പാതയിലാണ്. കര്‍ഷകനെ മറന്ന് ഇനി ഒരടിമുന്നോട്ട് പോകാനാവില്ല. ജൈവകൃഷിയും പച്ചപ്പും ശുദ്ധജലവും മനുഷ്യജീവിതത്തിന് അത്യാവശ്യമാണ്. എല്ലാവരും കര്‍ഷകരാവുന്ന എല്ലായിടവും കൃഷിയിടമാകുന്ന നല്ലകാലത്തിലേയ്ക്കുള്ള മടങ്ങിപ്പോക്കാണ് കാര്‍ഷിക നവോഥാനയാത്രയെന്നും സ്വീകരണത്തിനുള്ള ഒരുക്കങ്ങള്‍ പൂര്‍ത്തിയായതായും ജില്ലാ ജനറല്‍ സെക്രട്ടറി സജീഷ് വടമണ്‍ അറിയിച്ചു.

പിഡബ്ല്യുഡി ഫണ്ട് ഉപയോഗിച്ച് സംരക്ഷണഭിത്തി നിർമാണം യുഡിഎഫ് പ്രവർത്തകർ തടഞ്ഞു

കുളത്തൂപ്പുഴ : പിഡബ്ല്യുഡി ഫണ്ട് ഉപയോഗിച്ച് സംരക്ഷണഭിത്തി നിർമാണം യുഡിഎഫ് തടഞ്ഞു. മലയോര ഹൈവേയിൽ റോഡിന്‍റെ അശാസ്ത്രീയ നിർമാണ പിഴവുമൂലം ഉണ്ടായിക്കൊണ്ടിരിക്കുന്ന അപകടങ്ങൾക്ക് പരിഹാരം കാണാൻ കഴിയാത്ത പിഡബ്ല്യുഡി, കരുതലും കൈത്താങ്ങലും പദ്ധതിയിലൂടെ മലയോര ഹൈവേ റോഡ് സൈഡിൽ ഉള്ള സ്വകാര്യ വ്യക്തിയുടെ സംരക്ഷണഭിത്തി നിർമാണത്തിന് ഏകദേശം 25 ലക്ഷം രൂപ അനുവദിച്ച് പണികൾ ആരംഭിക്കുകയായിരുന്നു. ചന്ദനക്കാവിൽ മലയോര ഹൈവേയുടെ സംരക്ഷണഭിത്തി എന്ന നിലയിൽ നടന്നുവന്ന നിർമാണ പ്രവർത്തികളാണ് യുഡിഎഫ് കുളത്തൂപ്പുഴ മണ്ഡലം കമ്മിറ്റിയുടെ നേതൃത്വത്തിൽ തടഞ്ഞു . കുളത്തുപ്പുഴ ഗ്രാമപഞ്ചായത്ത് അംഗവും സിപിഎം ലോക്കൽ കമ്മിറ്റി മെമ്പറുമായ വ്യക്തിയുടെ വസതിക്ക്‌ മുന്നിൽ നടന്നുവന്ന സംരക്ഷണ ഭിത്തി നിർമാണം പൊതുമരാമത്ത് ഫണ്ട്‌ ഉപയോഗിച്ചു നിർമിക്കുന്നു എന്ന്ആരോപിച്ചാണ് കോൺഗ്രസ് പ്രവർത്തകർ പ്രവർത്തികൾ തടഞ്ഞത്. മലയോര ഹൈവേയുടെ വിവിധ ഭാഗങ്ങളിൽ നിരവധിയായ പ്രശ്നങ്ങൾ നിലനിൽക്കെ ആണ് സ്വന്തംപാർട്ടിയിൽ പെട്ട അംഗത്തിന്‍റെ വീടും വസ്തുവും സംരക്ഷിക്കാൻ 25 ലക്ഷം രൂപ അനുവദിച്ച ത്. മുഖ്യമന്ത്രിയുടെ കരുതലും കൈത്താങ്ങലും എന്ന പദ്ധതിയിൽ വൻഅഴിമതിനടന്നിട്ടുണ്ടെന്നുംഈപ്രവർത്തികൾ ചെയ്യുന്നത് മൂലം മലയോര ഹൈവേ ഏറ്റെടുത്തിരുന്ന റോഡിന്‍റെ വീതി കുറയുകയും ചെയ്തിട്ടുണ്ട്. ഭരണപക്ഷ പാർട്ടിഇടപെട്ടാണ് ഇത്തരം കാര്യങ്ങൾ ചെയ്തതെന്നും കോൺഗ്രസ് നേതാക്കൾആരോപിച്ചു. ഈപ്രവർത്തികൾ നിർത്തിവെച്ച് കുറ്റക്കാർക്കെതിരെ നടപടി സ്വീകരിക്കണമെന്നും അല്ലാത്തപക്ഷം വൻ ബഹുജന പ്രക്ഷോഭങ്ങൾ ആരംഭിക്കുമെന്നും നേതാക്കൾ പറഞ്ഞു . നേതാക്കളായ സാബു അബ്രഹാം, റോയ് ഉമ്മൻ, കെ .കെ. കുര്യൻ, സൈനബ ബീവി,നാസർക്കാൻ, അൻസാർ,സന്തോഷ്‌ കുമാർ സുഭിലാഷ് കുമാർ, സിസ്സിലി ജോബ്, റീന ഷാജഹാൻ, തുടങ്ങിയവർ നേതൃത്വം നൽകി.

ദളിത് കുടുംബങ്ങൾക്ക് റോഡിനു സ്ഥലം വിട്ടു നൽകി എൻഎസ്എസ് കരയോഗം

പി .എ.പത്മകുമാർ കൊട്ടാരക്കര: ദളിത് കുടുംബങ്ങൾക്ക് റോഡ് ഒരുക്കി നൽകി എൻഎസ്എസ് കരയോഗം. പൂവറ്റൂറൂർ 655 ാം നമ്പർ ദേവിവിലാസം എൻ എസ് കരയോഗമാണ് നാടിനാകെ മാതൃകയായ റോഡ് നിർമിച്ചത്. കരയോഗം വക പൂവറ്റൂർ ഹയർ സെക്കനൻഡറി സ്കൂളിനു സമീപം പതിനഞ്ചോളം ദളിത് കുടുംബങ്ങൾ താമസിച്ചു വരുന്നുണ്ട്.ഇവർക്ക് വാഹനമെത്തിച്ചേരാൻ റോഡില്ല. കഷ്ടിച്ച് ഒരാൾക്ക് മാത്രം സഞ്ചരിക്കാവുന്ന ഒരു നടപ്പാത മാത്രമാണുള്ളത്. ഒരാൾക്ക് അസുഖം വന്നാൽ കസേരയിൽ ചുമന്നു വേണം റോഡിലെത്തിക്കാൻ. പഞ്ചായത്തിൽ നിന്ന് വീട് ലഭിച്ചാൽ സാധനസാമിഗ്രികൾ റോഡിലിറക്കിയ ശേഷം തലച്ചുമടായി കൊണ്ടു പോകണം. കാലങ്ങളായി ഈ ദുരിതമനുഭവിക്കുന്ന ദളിത് കുടുംബങ്ങൾ റോഡിനായി സ്ഥലം വിട്ടു നൽകാൻ പലരേയും സമീപിച്ചെങ്കിലും നിരാശയായിരുന്നു ഫലം. അങ്ങനെയാണ് ദേവിവിലാസം എൻഎസ്എസ് ഭാരവാഹികളെ 'സമീപിക്കുന്നത്. കൂടി ആലോചിച്ച ശേഷം അറിയിക്കാം എന്നായിരുന്നു മറുപടി. അവർ കൂടിയാലോചിച്ചു. റോഡിന് സ്ഥലം വിട്ടു നൽകാൻ ധാരണയായി. ഇതിനായി സ്കൂൾമതിൽ ഇടിച്ചുനിരത്തേണ്ടി വന്നു.അഞ്ച് സെന്‍റോളം ഭൂമി വിട്ടു നൽകി.ഇപ്പോൾ വലിയ വാഹനങ്ങൾക്ക് കടന്നു പോകാൻ കഴിയുംവിധം മൂന്നു മീറ്റർ റോഡാണ് ഇവിടെ നിർമിക്കുന്നത്. സ്കൂൾമതിൽ ഇടിക്കുന്നതിനും പുനർനിർമിക്കുന്നതിനും ഭൂമി വിട്ടു നൽകിയതുമായി 10 ലക്ഷത്തോളം രൂപ കരയോഗത്തിനു ചെലവഴിക്കേണ്ടി വന്നതായി പ്രസിഡന്‍റ് വിനോദ് കുമാറും സെക്രട്ടറി വിശ്വനാഥനും പറഞ്ഞു. പാവപ്പെട്ട കുടുംബങ്ങളുടെ ആത്മസംതൃപ്തിക്ക് മുന്നിൽ ഇതൊന്നും വലിയ കാര്യമല്ലെന്നാണ് ഇരുവരുടെയും അഭിപ്രായം. മുൻപ് പൂവറ്റൂരിൽ പ്രാഥമിക ആരോഗ്യ കേന്ദ്രം സ്ഥലം വിട്ടുനൽകിയത് ഇവരാണ്. കരയോഗ നേതൃത്വത്തിൽ ആരംഭിച്ച പൂവറ്റൂർവായനശാല പൊതു ജനങ്ങൾക്കായി വിട്ടു നൽകിയും മാതൃകയായി.

പഹൽഗാം ഭീകരാക്രമണം: ആശ്രയ പ്രതിഷേധ റാലി നടത്തി

കൊട്ടാരക്കര : ഭാരതത്തെ നടുക്കിയ പഹൽഗാം ഭീകരാക്രമണത്തിൽ ജീവൻ വെടിഞ്ഞവർക്ക് ആദരാഞ്ജലികൾ അർപ്പിച്ചും സ്നേഹസഹോദര്യത്തിന്‍റെയും നാനാത്വത്തിൽ ഏകത്വത്തിന്‍റെയും മാതൃകാരാജ്യമായ ഈ മണ്ണിലൊരിക്കലും തീവ്രവാദം വളരാൻ അനുവദിക്കില്ലെന്നും ആഹ്വാനം ചെയ്ത് കലയപുരം ആശ്രയ സങ്കേതത്തിന്‍റെയും അനാഥരില്ലാത്ത ഭാരതത്തിന്‍റെയും ആശ്രയ എഫ് എം 90 റേഡിയോയുടെയും സംയുക്താഭിമുഖ്യത്തിൽ കൊട്ടാരക്കരയിൽ ജനകീയ പ്രതിഷേധ റാലി സംഘടിപ്പിച്ചു . കൊട്ടാരക്കര പ്രൈവറ്റ് ബസ് സ്റ്റാൻഡിൽ നിന്നും ആരംഭിച്ച മൗനജാഥ പുലമൺ ജങ്ഷൻ , ചന്തമുക്ക്‌ എന്നിവിടങ്ങളിലൂടെ സഞ്ചരിച്ച് മഹാഗണപതിക്ഷേത്ര മൈതാനിയിൽ സമാപിച്ചു . ആശ്രയ ജനറൽ സെക്രട്ടറി കലയപുരം ജോസ് ജനകീയ പ്രതിഷേധ സദസിന്‍റെ ഉദ്ഘാടനം നിർവഹിച്ചു . ആശ്രയ വൈസ് പ്രസിഡന്‍റ് പട്ടാഴി ജി.മുരളീധരൻ മാസ്റ്റർ മുഖ്യപ്രഭാഷണം നടത്തി . ആശ്രയ ഡയറക്ടർ ബോർഡ് അംഗങ്ങളായ എം. സിറാജുദീൻ, ജോൺ കുരികേശു, ആശ്രയ ട്രഷറർ കെ. ജി.അലക്സാണ്ടർ , അനാഥരില്ലാത്ത ഭാരതം ജില്ല പ്രസിഡന്‍റ് പെരുംകുളം രാജീവ് , ജില്ല ട്രഷറർ അലക്സ് മാമ്പുഴ, അനാഥരില്ലാത്ത ഭാരതം കൊട്ടാരക്കര മുനിസിപ്പാലിറ്റി യൂണിറ്റ് ട്രഷറർ രാജൻ,ജുബിൻ സാം, മിനി ജോസ്, ലീമ, ലത തുടങ്ങിയവർ റാലിയ്ക്ക് നേതൃത്വം നൽകി . കറുത്ത തുണികൊണ്ട് വാ മൂടികെട്ടിയാണ് എല്ലാവരും ജാഥയിൽ പങ്കെടുത്തത് . ആശ്രയയുടെയും അനാഥരില്ലാത്ത ഭാരതം പ്രസ്ഥാനത്തിന്‍റെയും സംസ്ഥാന നേതാക്കൾ, പൊതുജനങ്ങൾ , ആശ്രയ സങ്കേതത്തിലെ താമസക്കാർ , ശിശുഭവനിലെ കുട്ടികൾ , ആശ്രയ സ്റ്റാഫ് അംഗങ്ങൾ , ജോബ്സ് അക്കാദമിയിലെ വിദ്യാർഥികൾ തുടങ്ങിയവർ റാലിയിൽ പങ്കാളികളായി . ദേശീയോദ്ഗ്രഥന പ്രതിജ്ഞയോട് കൂടി യോഗം സമാപിച്ചു .

കൊല്ലം മേഖല റെയിൽവേ വികസനത്തിന് നിർദേശങ്ങളുമായി കൊടിക്കുന്നിൽ

കൊല്ലം: റെയിൽവേ കൊല്ലം മേഖലയുടെ ഇൻഫ്രാസ്ട്രക്ചറും റീജിയണൽ കണക്റ്റിവിറ്റിയും വർധിപ്പിക്കാൻ നിർദേശ ങ്ങളുമായ കൊടിക്കുന്നിൽ സുരേഷ് എംപി. മധുര റെയിൽവേ ഡിവിഷൻ ജനറൽ മാനേജരുമായി നടത്തിയ യോഗത്തിൽ കൊടിക്കുന്നിൽ സുരേഷ് എംപി വിവിധ ആവശ്യങ്ങൾ ആണ് ഉന്നയിച്ചിരിക്കുന്നത്. അടിസ്ഥാന സൗകര്യ വികസനം, പുതിയ ട്രെയിൻ സർവീസുകൾ, സ്റ്റേഷൻ നവീകരണങ്ങൾ, യാത്രക്കാർക്കുള്ള സൗകര്യങ്ങൾ ഉയർത്തുന്നതിനുള്ള നിർദേശങ്ങൾ തുട ങ്ങിയവ ഡവിഷണൽ മാനേ ജരുടെ ശ്രദ്ധയിൽപ്പെടുത്തി. കൊല്ലം-പുനലൂർ ഇരട്ടിപ്പിക്കൽ പദ്ധതി (ഘട്ടം ഒന്ന്) പുനരുജ്ജീവിപ്പിക്കേണ്ടതി െ ന്‍റ അടിയന്തര ആവശ്യവും അദ്ദേഹം ആവർത്തിച്ചു. കൊല്ലത്ത് നിന്ന് മധുര വഴി ബാംഗ്ലൂർ, ഹൈദരാബാദ്, വിശാഖപട്ടണം എന്നിവിടങ്ങളിലേക്ക് എക്സ്പ്രസ് ട്രെയിനുകൾ ആരംഭിക്കാൻ അദ്ദേഹം നിർദേശിച്ചു. മധുരയ്ക്കും തിരുവനന്തപുരത്തിനും ഇടയിൽ പുനലൂർ വഴി പുതിയ വന്ദേ ഭാരത് എക്‌സ്‌പ്രസ് സർവീസ് ആരംഭിക്കണം. ചെങ്കോട്ട-ചെന്നൈ സെൻട്രൽ എക്‌സ്‌പ്രസ് തിരുവനന്തപുരം നോർത്തിലേക്ക് ദിവസേന നീട്ടുന്നതും താംബരം-ചെങ്കോട്ട എക്‌സ്‌പ്രസ് ത്രിവാര ഷെഡ്യൂളിൽ തിരുവനന്തപുരം നോർത്തിലേക്കും ചെങ്കോട്ട-മയിലാടുതുറൈ എക്‌സ്‌പ്രസ് തിരുവനന്തപുരത്തേക്ക് പ്രതിദിന സർവീസായി നീട്ടുന്നതും പരിഗണിക്കണം. തീരദേശ, തീർഥാടന ബന്ധങ്ങൾ മെച്ചപ്പെടുത്തുന്നതിനായി മധുര-രാമേശ്വരം പാസഞ്ചർ ദിവസവും കൊല്ലത്തേക്ക് നീട്ടാനും അദ്ദേഹം ശിപാർശ ചെയ്തു. ജില്ലയ്ക്കുള്ളിലെ ഗതാഗതം സുഗമമാക്കുന്നതിന് കൊല്ലം-പുനലൂർ സർക്കുലർ സർവീസ്, വിദ്യാർഥികൾക്കും തൊഴിലാളികൾക്കുമായി കൊല്ലം-തിരുച്ചെന്തൂർ മെമു, വ്യാവസായിക മേഖലകളിലേക്കുള്ള പ്രവേശനം ശക്തിപ്പെടുത്തുന്നതിനായി പുനലൂർ, മധുര, പഴനി വഴി കൊല്ലം-കോയമ്പത്തൂർ അല്ലെങ്കിൽ പോടന്നൂർ എക്സ്പ്രസ് സർവീസ് എന്നിവ ഇതിൽ ഉൾപ്പെടുന്നു. കൊല്ലം-നാഗപട്ടണം-നാഗൂർ പ്രതിദിന സർവീസ് ആരംഭിക്കുക, കൊല്ലം-മധുര-എസ്എംവിടി ബാംഗ്ലൂർ എക്‌സ്പ്രസ്, എറണാകുളം-വേളാങ്കണ്ണി എക്‌സ്‌പ്രസി െ ന്‍റ ഫ്രീക്വൻസി പ്രതിദിന സർവീസായി വർധിപ്പിക്കുക എന്നിവയാണ് മറ്റ് നിർദ്ദേശങ്ങൾ.പ്രാദേശിക യാത്രക്കാരുടെ ആവശ്യങ്ങളോട് പ്രതികരിച്ചുകൊണ്ട് പുലമൺ (കൊട്ടാരക്കര ടൗൺ), കുരി എന്നിവിടങ്ങളിൽ പുതിയ ഹാൾട്ട് സ്റ്റേഷനുകൾ സ്ഥാപിക്കണമെന്ന് അദ്ദേഹം റെയിൽവേ അധികൃതരോട് അഭ്യർത്ഥിച്ചു. പാലരുവി എക്‌സ്‌പ്രസ്, പുനലൂർ-കന്യാകുമാരി എക്‌സ്‌പ്രസ് തുടങ്ങിയ ജനപ്രിയ ട്രെയിനുകൾ കുരി സ്റ്റേഷനിൽ സ്റ്റോപ്പ് അനുവദിക്കണമെന്ന് നിർദേശിക്കുകയും ചെയ്തു. 2025–26 ലെ കേന്ദ്ര ബജറ്റിൽ അമൃത് ഭാരത് സ്റ്റേഷൻ സ്കീമിന് (എബിഎസ്) കീഴിൽ കൊട്ടാരക്കര റെയിൽവേ സ്റ്റേഷൻ ഉൾപ്പെടുത്തണംു. പ്ലാറ്റ്‌ഫോമുകളുടെ വിപുലീകരണം, മൂന്നാം പ്ലാറ്റ്‌ഫോമി െ ന്‍റ നിർമ്മാണം, പുതിയ ഫുട്ട് ഓവർബ്രിഡ്ജ്, പുതിയ സ്റ്റേഷൻ കെട്ടിടം എന്നിവ ഉൾപ്പെടുന്ന സമഗ്രമായ പുനർവികസന പദ്ധതിയാണ് കൊടിക്കുന്നേൽ നിർദേശിച്ചിരിക്കുന്നത്.

മഴക്കാല പൂർവ ശുചീകരണം, രോഗപ്രതിരോധം ഊർജിതമാക്കണം : മന്ത്രി കെ.എൻ.ബാലഗോപാൽ

കൊല്ലം: മഴക്കാലം എത്തും മുമ്പേ ശുചീകരണ പ്രവർത്തനങ്ങളും വ്യാപിക്കാൻ ഇടയുള്ള രോഗങ്ങളും മുൻകൂട്ടി കണ്ട് പ്രതിരോധ നടപടികൾ ഊർജിതമാക്കണമെന്ന് മന്ത്രി കെ. എൻ .ബാലഗോപാൽ. കൊട്ടാരക്കര നിയോജകമണ്ഡലത്തിലെ മുന്നൊരുക്കം മിനി സിവിൽസ്റ്റേഷൻ ഹാളിൽ അവലോകനം ചെയ്യുകയായിരുന്നു അദ്ദേഹം. മഴ നേരത്തെയാകാൻ സാധ്യതയുണ്ട്. അതുകൊണ്ട് എല്ലാ നടപടികളും വേഗത്തിലാക്കണം. എംസി റോഡിലെ വിവിധ ഭാഗങ്ങൾ, കൊട്ടാരക്കര ടൗൺ, കോടതി വളപ്പ്, നെടുവത്തൂർ പഞ്ചായത്തിലെ തേവലപ്പുറം, കുളക്കട ആറിന്‍റെ തീരം, നെല്ലിക്കുന്ന്, വെളിയം തുടങ്ങിയ വെള്ളക്കെട്ട് ഉണ്ടാകുന്ന റോഡുകളിൽ ജലം കെട്ടിനിൽക്കുന്നത് ഒഴിവാക്കുന്നതിനുള്ള നടപടികൾ സ്വീകരിക്കണം. കെഐപി കനാലിലെ ചോർച്ച ഉണ്ടാകുന്ന ഭാഗങ്ങളിൽ അറ്റകുറ്റപ്പണികൾ ഊർജിതമാക്കണം. മലയോരമേഖലകളിൽ മഴപെയ്യുമ്പോൾ ഉണ്ടാകുന്ന അപകടങ്ങൾ, വൈദ്യുത കമ്പി പൊട്ടിവീണു ഉണ്ടാകുന്ന അപകടങ്ങൾ എന്നിവ തടയുന്നതിന് പ്രതിരോധ മാർഗങ്ങൾ സ്വീകരിക്കണം. വെള്ളം കയറുന്ന തോടിന്‍റെയും ആറിന്‍റെയും തീരങ്ങളിൽ ശരിയായ പരിശോധന നടത്തി വെള്ളപ്പൊക്കം തടയുന്നതിന് ജലസേചന വകുപ്പിനും , ഓടകളിലെ മാലിന്യം നീക്കുന്നതിനും അറ്റകുറ്റപ്പണി ഊർജിതമായി നടത്തുന്നതിനും ബന്ധപ്പെട്ട മരാമത്ത് ഉദ്യോഗസ്ഥർക്കും മന്ത്രി നിർദേശം നൽകി. പോലീസ്, ഫയർഫോഴ്സ്, എൻ എച്ച്, കെഎസ്ഇബി, ആരോഗ്യം, ത്രിതല പഞ്ചായത്തുകൾ തുടങ്ങിയ വിവിധ വകുപ്പുകൾ സ്വീകരിച്ച മഴക്കാലപൂർവ മുന്നൊരുക്കങ്ങൾ മന്ത്രിയുടെ നേതൃത്വത്തിൽ പരിശോധിച്ചു. വിവിധ വകുപ്പുകൾ ഉന്നയിച്ച മഴക്കാലപൂർവ്വ മുന്നൊരുക്കങ്ങൾക്ക് തടസം നിൽക്കുന്ന പ്രശ്നങ്ങൾക്ക് അടിയന്തരപരിഹാരം കാണുന്നതിനുള്ള നടപടികൾക്ക് നിർദ്ദേശവും നൽകി. റൂറൽ എസ് പി സാബു മാത്യു , കൊട്ടാരക്കര മുനിസിപ്പൽ ചെയർമാൻ ഉണ്ണികൃഷ്ണ മേനോൻ, കൊട്ടാരക്കര ബ്ലോക്ക് പ്രസിഡന്‍റ്അഭിലാഷ്, വെളിയം ഗ്രാമപഞ്ചായത്ത് പ്രസിഡന്‍റ്പ്രശാന്ത്, നെടുവത്തൂർ ഗ്രാമപഞ്ചായത്ത് പ്രസിഡന്‍റ് ് വി.കെ ജ്യോതി, കരീപ്ര പഞ്ചായത്ത് പ്രസിഡന്‍റ് സുവിധ, മൈലം പഞ്ചായത്ത് പ്രസിഡന്‍റ് ബിന്ദു ജി നാഥ്, വിവിധ വകുപ്പ്തല ഉദ്യോഗസ്ഥർ തുടങ്ങിയവർ പങ്കെടുത്തു.

കുളത്തൂപ്പുഴ സെന്‍റ് പോൾസ് സിഎസ്ഐ പള്ളി സഭാദിനവും കൺവൻഷനും

കുളത്തൂപ്പുഴ : കിഴക്കൻ മലയോര മേഖലയിൽ സ്ഥിതിചെയ്യുന്ന സെന്‍റ് പോൾസ് സി എസ് ഐ ഇടവകയുടെ 44-ാ മത് സഭാദിനവും ആത്മീയ കൺവൻഷനും ഇന്നുമുതൽ തുടങ്ങും. പള്ളി വികാരി റവ. പോൾ ഡേവിഡിന്‍റെ അധ്യക്ഷതയിൽ കൂടുന്ന കൺവൻഷൻ യോഗത്തിൽ റവ .ഷിബിൻ ശിശു മണി (സെന്‍റ് പോൾസ് മാർത്തോമാ ചർച്ച് അഞ്ചൽ) തിരുവചന സന്ദേശം നൽകും. നാളെ വൈകുന്നേരം 6.30ന് റവ .ടിബിൻ ജോസഫ് മാത്യു (സെന്‍റ് മാർക്ക് സി എസ് ഐ ചർച്ച് ചന്ദനക്കാവ്) വിന്‍റെ അധ്യക്ഷയിൽ ചേരുന്ന കൺവൻഷനിൽ റവ .സനിൽ രാജ് സൈമൺ തിരുവചന സന്ദേശം നൽകും. 27ന് രാവിലെ 9 .30 മുതൽ സഭാദിന സ്തോത്ര ആരാധനയും വിശുദ്ധ ആരാധനയും സ്ഥിരീകരണ ശുശ്രൂഷയുംനടക്കും. കൊല്ലം കൊട്ടാരക്കര മഹാ ഇടവക ബിഷപ് ഇൻ ചാർജ് വി. എസ്. ഫ്രാൻസിസ് നേതൃത്വം നൽകും. ഇടവക വികാരി റവ.പോൾ ഡേവിഡ്, ഇടവക സെക്രട്ടറി കെ.ഐ.ആൻഡ്രൂസ്, (സിഎസ്ഐ ആത്മായ സെക്രട്ടറി തിരുനെൽവേലി മഹാഇടവക) ഡോ.ഡി.എസ്.ജയ്സിംഗ, കൺവൻഷൻ കൺവീനർ പോൾ സുബ്രഹ്മണ്യൻ തുടങ്ങിയവർ പ്രസംഗിക്കും.തുടർന്ന് സഭയിലെ മുതിർന്നവരെ ആദരിക്കൽ ചടങ്ങും സ്നേഹവിരുന്നും നടക്കും.

ദുരന്ത നിവാരണം; ഹ്രസ്വകാല സർട്ടിഫിക്കറ്റ് കോഴ്സ് അവതരിപ്പിച്ച് അമൃത വിശ്വവിദ്യാപീഠം

അമൃതപുരി (കൊല്ലം) : പ്രായോഗിക പഠനത്തിലൂടെ ദുരന്ത പ്രതിരോധ ശേഷി വർധിപ്പിക്കുന്നതിനായി ഹ്രസ്വകാല സർട്ടിഫിക്കറ്റ് കോഴ്സ് അവതരിപ്പിച്ച് അമൃത വിശ്വവിദ്യാപീഠം. അമൃതപുരി കാമ്പസിലെ അമൃത സ്‌കൂൾ ഫോർ സസ്റ്റയിനബിൾ ഫ്യൂച്ചേഴ്‌സ്, യുനെസ്കോ ചെയർ ഓൺ എക്സ്പീരിയൻഷൽ ലേർണിംഗ്‌ ഫോർ സസ്റ്റയിനബിൾ ഇന്നോവേഷൻ ആൻഡ് ഡെവലപ്പ്മെന്‍റിന്‍റെസഹകരണത്തോടുകൂടിയാണ് ഹ്രസ്വകാല കോഴ്സ് ആരംഭിച്ചത്. പ്രായോഗിക പരിശീലനത്തിലൂടെ ദുരന്ത പ്രതിരോധശേഷിയും സാമൂഹിക ഉത്തരവാദിത്തവും വളർത്തിയെടുക്കുകയാണ് പൂർണമായും ഓഫ്‌ലൈൻ രീതിയിൽ സംഘടിപ്പിക്കുന്ന സർട്ടിഫിക്കറ്റ് കോഴ്‌സിലൂടെ ലക്ഷ്യംവെക്കുന്നത്. ദുരന്ത നിവാരണസേനാ അംഗങ്ങൾ, അധ്യാപകർ, യുവജന നേതാക്കൾ, വിദ്യാർഥികൾ എന്നിവർക്കാണ് ആദ്യഘട്ടത്തിൽ പരിശീലനം നൽകുന്നത്. നാലുദിവസം നീണ്ടുനിൽക്കുന്ന സർട്ടിഫിക്കറ്റ് കോഴ്‌സിൽ കാലാവസ്ഥയെക്കുറിച്ചും പ്രകൃതി ദുരന്തങ്ങളെക്കുറിച്ചും അവയെ പ്രതിരോധിക്കേണ്ട രീതിയെക്കുറിച്ചും ബോധവത്കരണം നടത്തുന്നതോടൊപ്പം അത്യാധുനിക രീതികളും ഉപകരണങ്ങളും ഉപയോഗിച്ച് ദുരന്തങ്ങളെ പ്രതിരോധിക്കുന്നതിനുള്ള പരിശീലനവും നൽകും. ഇതിനുപുറമേ ദുരന്തനിരീക്ഷണ സംവിധാനവും പ്രഥമ ശുശ്രൂഷാ രീതികളും കോഴ്‌സിലൂടെ പരിചയപ്പെടുത്തും.സുസ്ഥിര വികസന സൂചിക, കേന്ദ്ര - സംസ്ഥാന സർക്കാരുകളുടെ ദുരന്ത നിവാരണ പദ്ധതികൾ, മാർഗനിർദേശങ്ങൾ എന്നിവ അടിസ്ഥാനമാക്കിയാണ് കോഴ്‌സിന്‍റെ ഘടനയും പ്രവർത്തനവും രൂപപ്പെടുത്തിയിട്ടുള്ളത്. ആദ്യ ബാച്ചിൽ കേരളം, തമിഴ്‌നാട്, കർണാടക സംസ്ഥാനങ്ങളിൽ നിന്നായി 25പേരുണ്ട്.

കുരീപ്പുഴ ശ്രീകുമാർ സാഹിത്യോത്സവവും സാംബശിവൻ അനുസ്മരണവും സംഘടിപ്പിച്ചു

കൊല്ലം : കൊല്ലം കോർപറേഷന്‍റെ ആഭിമുഖ്യത്തിൽ കലാസാംസ്കാരിക രംഗത്തെ പ്രമുഖരെ പങ്കെടുപ്പിച്ച് സംഘടിപ്പിച്ച സാഹിത്യോത്സവം സർഗധാര 2025 ന്‍റെ ഉദ്ഘാടനവും സാംബശിവൻ അനുസ്മരണവും കവി കുരീപ്പുഴ ശ്രീകുമാർ നിർവഹിച്ചു. ചിന്നക്കടയിലെ സാംബശിവൻ സ്ക്വയറിൽ നടന്ന പരിപാടിയിൽ മേയർ ഹണി ബെഞ്ചമിൻ അധ്യക്ഷയായി. ഡെപ്യൂട്ടി മേയർ എസ്. ജയൻ, വികസനകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ എസ്.ഗീതകുമാരി, ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ എം.സജീവ്, ആരോഗ്യകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ യു.പവിത്ര, നഗരാസൂത്രണകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ സുജാ കൃഷ്‌ണൻ, മരാമത്തുകാര്യ സ്റ്റാൻഡിംഗ് കമ്മിറ്റി ചെയർമാൻ സജീവ് സോമൻ, നികുതി അപ്പീൽ കാര്യ സ്റ്റാൻഡിംഗ് കമ്മിറ്റി ചെയർമാൻ അഡ്വ.എ.കെ.സവാദ്, വിദ്യാഭ്യാസ കായികകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ എസ്.സവിതാദേവി, മുൻമേയർ പ്രസന്ന ഏണസ്റ്റ്, കൗൺസിലർമാരായ ജോർജ് ഡി. കാട്ടിൽ, ടി.ജി.ഗിരീഷ്, കോർപറേഷൻ സെക്രട്ടറി ഡി.സാജു തുടങ്ങിയവർ പങ്കെടുത്തു. വസന്തകുമാർ സാംബശിവൻ 'റാണി' കഥാപ്രസംഗം അവതരിപ്പിച്ചു.

‘പനിനീര്‍ പൂവിനെ വരവേല്‍ക്കാം’പദ്ധതിയുമായി ശാസ്താംകോട്ട പഞ്ചായത്ത്

കൊല്ലം : നാട്ടറിവുകളും പരമ്പരാഗതബോധ്യങ്ങളും ശാസ്ത്രീയ അടിത്തറയോടെ നാളെയുടെ തലമുറയ്ക്കായി സമര്‍പ്പിക്കുകയാണ് ശാസ്താംകോട്ട ബ്ലോക്ക് പഞ്ചായത്ത്. നവജാത ശിശുക്കളുടെ പ്രാഥമികപരിചരണവും ആരോഗ്യസുരക്ഷയും ഉറപ്പാക്കിയാണ് പുതുമാതൃകയുടെ തുടക്കം. ബ്ലോക്ക് പരിധിയിലെ ഏഴ് പഞ്ചായത്തുകളിലെ ആദ്യപ്രസവത്തിന് തയാറെടുക്കുന്ന ബിപിഎല്‍ കുടുംബത്തില്‍പ്പെട്ട ഗര്‍ഭിണികള്‍ക്ക് ആരോഗ്യ പരിശോധന, കൗണ്‍സിലിംഗ്, പ്രസവശേഷം അമ്മയ്ക്കും കുഞ്ഞിനും പരിരക്ഷ, ഔഷധ വിതരണം എന്നിവ ലക്ഷ്യമിട്ട് നടപ്പിലാക്കുന്ന ‘പനിനീര്‍ പൂവിനെ വരവേല്‍ക്കാം' പദ്ധതിയാണ് ഗുണകരമായമാറ്റത്തിന് വഴിയൊരുക്കുന്നത്. അന്യംനിന്നുപോയ നാട്ടറിവുകള്‍ പ്രയോജനപ്പെടുത്താനും കുടുംബാംഗങ്ങളുടെ കരുതലും പിന്തുണയും അമ്മയാകുന്ന സ്ത്രീക്ക് ലഭ്യമാക്കുന്നതിനുമാണ് പദ്ധതി. തെരഞ്ഞെടുത്ത വനിതകള്‍ക്ക് ഒരുമാസത്തെ പരിശീലനം നല്‍കി ‘ധാത്രി ബ്രിഗേഡ്‌സ്' രൂപീകരിച്ച് സേവനം ലഭ്യമാക്കും. സുരക്ഷിതമായ ഗര്‍ഭകാലം, അമ്മയുടെയും കുഞ്ഞിന്‍റെയും ശാരീരിക- മാനസികാരോഗ്യം എന്നിവ കുടുംബാംഗങ്ങളുടെ കൂടി ഉത്തരവാദിത്വമാണെന്ന സന്ദേശം എല്ലാവരിലും എത്തിക്കുകയാണ്. ബ്ലോക്ക്പരിധിയിലെ ഡോക്ടര്‍മാരുടെയും വനിതാ-ശിശുവികസന വകുപ്പിന്‍റെയും സഹായത്തോടെ കൈപുസ്തകവും തയാറാക്കി വിതരണം ചെയ്യുന്നുണ്ട്. ഗര്‍ഭിണിയായി ഒമ്പതാം മാസം മുതല്‍ തുടങ്ങുന്ന പരിചരണം പ്രസവശേഷം 15 ദിവസം വരെയാണ് നല്‍കുക. സര്‍ക്കാര്‍ ആയുര്‍വേദ വനിത ഡോക്ടര്‍മാരുടെ നിര്‍ദേശപ്രകാരം പ്രസവാനന്തരം കഴിക്കേണ്ട ആയുര്‍വേദ മരുന്നുകള്‍ ഉള്‍പ്പെടെ 2500 രൂപ വില വരുന്ന സാധനങ്ങളുടെ കിറ്റും സൗജന്യമായി ലഭ്യമാക്കുന്നു. 2021-ല്‍ ആസൂത്രണ കമ്മിറ്റി ഉപാധ്യക്ഷനായിരുന്ന ദിനേശ് മുന്നോട്ടുവെച്ച ആശയമാണ് 'പനിനീര്‍ പൂവിനെ വരവേല്‍ക്കാം'. നവജാത ശിശുക്കളുടെ പരിചരണം കൂടാതെ, ബ്ലോക്ക്പരിധിയിലെ വനിതകള്‍ക്ക് തൊഴില്‍ലഭ്യമാക്കല്‍ കൂടിയാണ് സാധ്യമാക്കുന്നത്. ഏഴ് പഞ്ചായത്തിലെ 25നും 40 നും മധ്യേ പ്രായമുള്ള സ്ത്രീകള്‍ക്കാണ് സ്വയംതൊഴില്‍പരിശീലനം നല്‍കിയത്. നിലവില്‍ ആറ് ‘ധാത്രി ബ്രിഗേഡ്‌സ്' ഇവിടെയുണ്ട്. ഇവര്‍ക്ക് പ്രതിദിനം 500 രൂപ വീതം വേതനവും നല്‍കുന്നു. വനിതാ ഘടകപദ്ധതിയില്‍ ഉള്‍പ്പെടുത്തി ആദ്യവര്‍ഷം 2,50,000 രൂപ ചെലവഴിച്ച് ബ്ലോക്ക് പരിധിയിലുള്ള 34 ഗുണഭോക്താക്കള്‍ക്ക് സേവനം ഉറപ്പാക്കി. കഴിഞ്ഞ നാലു വര്‍ഷങ്ങളായി 12 ലക്ഷത്തോളം രൂപ ചെലവഴിച്ച് 284 പേര്‍ക്കാണ് സേവനം നല്‍കിയതെന്ന് പ്രസിഡന്‍റ് ആര്‍. സുന്ദരേശന്‍ പറഞ്ഞു.

അഞ്ചലില്‍ മുഖ്യമന്ത്രിക്ക് നേരേ കരിങ്കൊടി

അഞ്ചല്‍ : അഞ്ചലില്‍ മുഖ്യമന്ത്രിയുടെ വാഹനവ്യൂഹത്തിന് നേരേ കരിങ്കൊടി കാണിച്ചു യൂത്ത്കോണ്‍ഗ്രസ് പ്രവര്‍ത്തകർ. പത്തനംതിട്ടയിലെ പൊതുപരിപാടിക്ക് ശേഷം മടങ്ങിവരവേ അഞ്ചല്‍ ബൈപ്പാസില്‍ വച്ചായിരുന്നു മുഖ്യമന്ത്രിക്ക് നേരെ കരിങ്കൊടി കാണിച്ചത്. വിവിധ ഇടങ്ങളിലായി മാറിനിന്ന യൂത്ത് കോണ്‍ഗ്രസ് പ്രവര്‍ത്തകര്‍ മുഖ്യമന്ത്രിയുടെ വാഹനാവ്യൂഹം എത്തിയതോടെ മുദ്രാവാക്യം വിളിച്ചുകൊണ്ടു റോഡിലേക്ക് ചാടുകയും കരിങ്കൊടി കാണിക്കുകയുമായിരുന്നു. സ്ഥലത്ത് ഉണ്ടായിരുന്ന സ്പെഷല്‍ ബ്രാഞ്ച് പോലീസുകാര്‍ യൂത്ത് കോണ്‍ഗ്രസ് പ്രവര്‍ത്തകരെ തടയാൻ ശ്രമിച്ചെങ്കിലും ഫലമുണ്ടായില്ല. തൊട്ടുപിന്നാലെ എത്തിയ പുനലൂര്‍ ഡിവൈഎസ്പിയുടെ നേതൃത്വത്തിലുള്ള പോലീസ് സംഘം ബലപ്രയോഗത്തിലൂടെ ഏഴോളം വരുന്ന പ്രവര്‍ത്തകരെ കസ്റ്റഡിയില്‍ എടുക്കുകയും അഞ്ചല്‍ പോലീസ് സ്റ്റേഷനിലേക്ക് മാറ്റുകയും ചെയ്തു. യൂത്ത് കോണ്‍ഗ്രസ് നേതാവും ബ്ലോക്ക് പഞ്ചായത്ത് അംഗവുമായ ഷെറിന്‍റെ നേതൃത്വത്തിലായിരുന്നു കരിങ്കൊടി പ്രതിഷേധം നടത്തിയത്.

വിവരസാങ്കേതിക വിദ്യയുടെ കടന്നുകയറ്റം ഉണ്ടായത് രാജീവ് ഗാന്ധിയുടെ ഭരണകാലത്ത്: എം.ലിജു

കൊല്ലം : മുൻ പ്രധാനമന്ത്രി രാജീവ് ഗാന്ധിയുടെ ഭരണകാലഘട്ടത്തിലാണ് ഭാരതത്തിൽ വിവരസാങ്കേതിക വിദ്യയുടെ കടന്നു കയറ്റം ഉണ്ടായതെന്ന് കെപിസി സി സംഘടന ജനറൽ സെക്രട്ടറി എം.ലിജു. ആഭ്യന്തര ബാഹ്യ ശക്തികളുടെ ഇടപെടലിനെ തുടർന്നാണ് രാജീവ് ഗാന്ധിയെ ദുർബലപ്പെടുത്തിയത്. പരിചയസമ്പന്നരായ പട്ടാളക്കാരെ ഒഴിവാക്കിയതിന്‍റെ ഫലമാണ് ഭീകരാക്രണമെന്നും ലിജു പറഞ്ഞു. രാജീവ് ഗാന്ധി സാംസ്കാരിക സമിതിയുടെ ഇരുപത്തിയഞ്ചാം വാർഷികം കൊല്ലം പ്രസ് ക്ലബിൽ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. രാജീവ് ഗാന്ധി സാംസ്കാരിക സമിതി പ്രസിഡന്‍റ് സജിവ് പരിശവിള അധ്യക്ഷത വഹിച്ച യോഗത്തിൽ രക്ഷാധികാരി ആർ. രാജശേഖരൻ, ദേശീയ സെക്രട്ടറി സാബു ബെനഡിക്ട്, ഫാ. ജോളി ഏബ്രഹാം, ഫാ.ബിനു തോമസ്, ഹരീഷ് ചവറ, വി. ടി. കുരീപ്പുഴ, ജേക്കബ് എസ്. മുണ്ടപ്പുളം, പൂജ ശിഹാബ്, സൈമൺ അലക്സ്, ഡി. ഗീതാകൃഷ്ണൻ, അഡ്വ.എം.ജി. ജയകൃഷ്ണൻ, ആർ. പ്രകാശൻ പിള്ള, അഡ്വ.ടി.സി.വിജയൻ, ഡോ. ബിജു നെൽസൺ, സിനു. പി. ജോൺസൺ, പി. ബാബുരാജൻ, അൽഫോൺസ് ഫിലിപ്പ്, സുരേഷ് പോറ്റി, എസ്. ഷാനവാസ്, ഷീബ റോയ്സ്റ്റൺ, സുധീർ തോട്ടുവാൽ എന്നിവർ പ്രസംഗിച്ചു.

വേട്ടുതറ അടിപ്പാത സമരസമിതി നേതാക്കൾക്കെതിരേ ആക്രമണശ്രമം

ചവറ : നീണ്ടകര വേട്ടുതറയിൽ അടിപ്പാത സമര നേതാക്കൾക്കെതിരേ ലോറി ഡ്രൈവറുടെ ഭീഷണിയും ഉണ്ടായതായി പരാതി. സമരം 486 ദിവസം പിന്നിട്ടപ്പോഴാണ് നേതാക്കൾക്കെതിരേ ഭീഷണി ഉയർന്നിരിക്കുന്നത്. നാഷണൽ ഹൈവേ അഥോറിറ്റിയുടെ നിസംഗതയെ തുടർന്ന് സംയുക്ത സമരസമിതിയുടെ നേതൃത്വത്തിലാണ് പ്രതിഷേധ സമരം നടക്കുന്നത്. തെക്കുംഭാഗം പഞ്ചായത്തിൽ നിന്നുമാണ് നാഷണൽ ഹൈവേയുടെ രണ്ട് റീച്ചിന്‍റെ നിർമാണത്തിനായി അഷ്‌ടമുടി കായൽ ഖനനം ചെയ്ത് മണ്ണ് കൊണ്ടുപോകുന്നത്. സമരപന്തലിന്‍റെ മുന്നിൽ സമര പ്രചരണ പോസ്റ്റർ പതിക്കുന്നതിനിടയിൽ ഹൈവേ നിർമാണത്തിന് മണ്ണ് കയറ്റി പോയ ലോറി ഡ്രൈവർ സമരസമിതി അംഗങ്ങളുമായി വാക്കേറ്റമുണ്ടാവുകയും സമരസമിതി നേതാവും തെക്കുംഭാഗം പഞ്ചായത്ത് മുൻ പ്രസിഡന്‍റുമായ ബീനാ ദയനെ ആക്രമിക്കാൻ മുതിരുകയും ചെയ്തു. തെക്കുംഭാഗം പഞ്ചായത്ത് പ്രസിഡന്‍റ് തങ്കച്ചി പ്രഭാകരൻ, സിപിഎം തെക്കുംഭാഗം ലോക്കൽ കമ്മിറ്റി സെക്രട്ടറി ബാജി സേനാഥിപൻ, പഞ്ചായത്തംഗങ്ങളായ പ്രദീപ് എസ് പുല്യാഴം, മീന, അപർണ , രാജഗോപാൽ,സീതാലക്ഷ്മി, സിന്ധുമോൾ, മഞ്ജു, ബി കെ വിനോദ്, കെ .ആർ .രവി എന്നിവരുടെ നേതൃത്വത്തിൽ സമര പന്തലിൽ സമരം തുടരവേ മണ്ണ് കയറ്റി വന്ന മറ്റ് മൂന്ന് ലോറികൾ കൂടി സമരപന്തലിന്‍റെ മുന്നിൽ നിറുത്തിയിട്ട് ഗതാഗത തടസം സൃഷ്‌ടിച്ച് സമാധാനപരമായി സമരംനടത്തി കൊണ്ടിരുന്ന സമരസമിതിക്കാരെ ഭീഷണിപ്പെടുത്തുകയും ചെയ്തു. ലോറി ഡ്രൈവർ അസഭ്യം പറഞ്ഞ് ഭീഷണിപ്പെടുത്തിയ ബീനാ ദയനെ ദേഹാസ്വസ്ഥത്തെ തുടർന്ന് നീണ്ടകര താലൂക്ക് ആശുപത്രിയിൽ പ്രവേശിപ്പിച്ചു. മണ്ണ് കയറ്റിയ ലോറികൾ നിരത്തിയിട്ട് ഹൈവേയിൽ ഗതാഗതം തടസപ്പെടുത്തിയ ലോറി ഡ്രൈവറെ ചവറ പോലീസ് സ്‌റ്റേഷനിലേക്ക് കൊണ്ടുപോയി. സമരസമിതിയിലെ സ്ത്രീകളെ അപമാനിച്ച ഡൈവർക്കെതിരെ സമര സമിതി നേതാക്കൾ സ്റ്റേഷനിൽ പരാതി നൽകി. സമരപന്തലിന് സമീപം ആക്രമണം നടത്തിയ ലോറി ഡ്രൈവർക്കെതിരെ അന്വേഷണം നടത്തി ശക്തമായ നിയമനടപടികൾ സ്വീകരിക്കണമെന്ന് സമരസമിതി നേതാക്കൾ ആവശ്യപ്പെട്ടു.

ഭീകരതയെ തോൽപ്പിക്കണം: പി.ജർമിയാസ്

രാമൻകുളങ്ങര : പഹൽഗാമിൽ നിഷ്കളങ്കരായ വിനോദസഞ്ചാരികളെ വെടിവെച്ചുകൊന്ന ഭീകരതയെ തോൽപ്പിക്കണമെന്ന് കെപിസിസി സെക്രട്ടറി അഡ്വ. പി.ജർമിയാസ്. പഹൽഗാം ഭീകരാക്രമണത്തിൽ പ്രതിഷേധിച്ച് ശക്തികുളങ്ങര സൗത്ത് മണ്ഡലം കോൺഗ്രസ് കമ്മിറ്റി നടത്തിയ നൈറ്റ് മാർച്ച് ഉദ്ഘാടനം ചെയ്ത് പ്രസംഗിക്കുകയായിരുന്നു ജർമിയാസ്. ശക്തികുളങ്ങര സൗത്ത് മണ്ഡലം കോൺഗ്രസ് കമ്മിറ്റി പ്രസിഡന്‍റ് സച്ചു യേശുദാസ് അധ്യക്ഷത വഹിച്ച പ്രതിഷേധയോഗത്തിൽ ചവറ ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് മേച്ചേഴത്ത് ഗിരീഷ്, കൊല്ലം ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് ഡി.ഗീതാ കൃഷ്ണൻ,ബ്ലോക്ക് വൈസ് പ്രസിഡന്‍റ് നിസാർ കലദിക്കാട്, കേരള സ്റ്റേറ്റ് സർവീസ് പെൻഷനേഴ്സ് അസോസിയേഷൻ സംസ്ഥാന ട്രഷർ ടി. ഗോപാലകൃഷ്ണൻ നായർ, മത്സ്യത്തൊഴിലാളി കോൺഗ്രസ് ജില്ലാ പ്രസിഡന്‍റ് എസ്.എഫ്.യേശുദാസ്, യൂത്ത് കോൺഗ്രസ് ജില്ലാ കോർഡിനേറ്റർ കൃഷ്ണപ്രസാദ്, യദുകൃഷ്ണൻ, ചിറ്റൂത്തറ ഉണ്ണികൃഷ്ണൻ, സലിം കുലക്കട തുടങ്ങിയവർ പ്രസംഗിച്ചു.

കെഎംഎംഎല്ലിന് സമീപ പ്രദേശത്തെ മലിനീകരിക്കപ്പെട്ട ഭൂമി ഏറ്റെടുക്കുന്നത് സംബന്ധിച്ച് ചര്‍ച്ച നടത്തി

ചവറ : കെഎംഎംഎല്ലിന് സമീപ പ്രദേശത്തെ മലിനീകരിക്കപ്പെട്ട ഭൂമി ഏറ്റെടുക്കുന്നത് സംബന്ധിച്ച് ഒന്നാംഘട്ടമായി ഏറ്റെടുക്കേണ്ടിവരുന്ന 76 ഏക്കര്‍ ഭൂമിയുടെ മാര്‍ക്കറ്റ് വില ശേഖരിക്കുവാന്‍ ജില്ലാ കളക്‌ടറെ ദേവിദാസിനെ യോഗം ചുമതലപ്പെടുത്തി. മന്ത്രി പി.രാജീവിന്‍റെ ചേംബറില്‍ മന്ത്രി കെ.എന്‍.ബാലഗോപാലിന്‍റെ സാന്നിധ്യത്തില്‍ നടന്ന യോഗത്തിലായിരുന്നു തീരുമാനം. നെഗോഷബിള്‍ പര്‍ച്ചേസ് പ്രകാരം ഭൂമി വിട്ടുനല്‍കുന്നതിന് ഭൂഉടമകളുടെ അഭിപ്രായം തേടുന്നതിനും അടുത്ത യോഗത്തില്‍ വിവരം അറിയിക്കുന്നതിനും ചവറ എംഎല്‍എ സുജിത് വിജയന്‍പിളളയെ ചുമതലപ്പെടുത്തി. വിഴിഞ്ഞം പോര്‍ട്ട്, വല്ലാര്‍പാടം കണ്ടെയ്നര്‍ ടെര്‍മിനല്‍ എന്നിവയുടെ വികസനസാധ്യതകള്‍ പരിഗണിച്ച് കൊച്ചി - തിരുവനന്തപുരം വികസനകോറിഡോറിന്‍റെ ഭാഗമായി ലോജിസ്റ്റിക് പാര്‍ക്ക് നിര്‍മിക്കുവാന്‍ സാധിക്കുമോ എന്ന് പരിശോധിക്കുവാന്‍ കിന്‍ഫ്രയെ ചുമതലപ്പെടുത്തി. കെഎംഎംഎല്‍ എംഡി. പി. പ്രദീപ് കുമാര്‍, കിന്‍ഫ്ര ഉന്നതഉദ്യോഗസ്ഥര്‍, റവന്യൂവകുപ്പ് ഉദ്യോഗസ്ഥര്‍, വ്യവസായവകുപ്പ് ഉദ്യോഗസ്ഥര്‍ തുടങ്ങിയവര്‍ യോഗത്തിൽ പങ്കെടുത്തു.

പരിവർത്തനത്തിനു സാധ്യതയില്ല; പ്രതിക്കു പരമാവധി ശിക്ഷ

തിരുവനന്തപുരം: വിനീത കൊലക്കേസിൽ കോടതി പ്രതിക്കു തൂക്കുകയർ വിധിച്ചത് പ്രതിയുടെ സാമൂഹിക ജീവിതത്തേക്കുറിച്ചു വിശദമായി പരിശോധിച്ചതിനു ശേഷം. മനഃപരിവർത്തനം നടത്താൻ കഴിയാത്ത കൊലപാതക പരന്പര നടത്തുന്നയാളാണ് പ്രതിയെന്നായിരുന്നു വിശദമായ പഠനം നടത്തി സമർപ്പിച്ച റിപ്പോർട്ടുകളുടെ പൊതുസാരാംശം. കേസ് അപൂർവങ്ങളിൽ അപൂർവമാണന്നുള്ള പ്രോസിക്യൂഷൻ വാദത്തെ തുടർന്നാണു പ്രതിയുടെ ജീവിതത്തിന്‍റെ സാമൂഹിക വിലയിരുത്തൽ പഠനത്തെക്കുറിച്ചുള്ള വിവിധ റിപ്പോർട്ടുകൾ കോടതി ശേഖരിച്ചത്. പ്രതിയുടെ പരിഷ്കരണ- പരിവർത്തന സാധ്യതകളെ കുറിച്ച് തിരുവനന്തപുരം ജില്ലാ കളക്ടർ അനുമാരി, പ്രതിയുടെ കുറ്റകരമായ മു പ്രവൃത്തികളെക്കുറിച്ച് സിറ്റി പോലീസ് കമ്മീഷണർ തോംസൻ ജോസ്, പ്രതിയുടെ മാനസികാരോഗ്യ നില പരിശോധിച്ച് പേരൂർക്കട മാനസികാരോഗ്യ ആശുപത്രി സൂപ്രണ്ട് ഡോ. പ്രീതി ജയിംസ്, ജയിലിനുള്ളിലെ പ്രതിയുടെ സ്വഭാവവും പെരുമാറ്റവും സംബന്ധിച്ച് തിരുവനന്തപുരം, പാളയംകോട്ട ജയിൽ സൂപ്രണ്ടുമാർ, പ്രതിയുടെ സ്ഥാവര ജംഗമ സ്വത്തുക്കളുടെ വിശദാംശങ്ങളെ സംബന്ധിച്ച് നാഗർകോവിൽ റവന്യു അഥോറിറ്റി, കന്യാകുമാരി, തിരുവനന്തപുരം ജില്ലാ പ്രൊബേഷൻ ഓഫീസർമാർ എന്നിവർ വിവിധ റിപ്പോർട്ടുകൾ മുദ്രവച്ച കവറുകളിൽ നൽകിയിരുന്നു. ജീവപര്യന്തം ശിക്ഷയാണു വിധിക്കുന്നതെങ്കിൽ ശിക്ഷാ ഇളവിനു പ്രതി അർഹനാണന്നും ഭാവിയിൽ സമാനമായ കുറ്റകൃത്യങ്ങളിൽ ഏർപ്പെടില്ലെന്നും ഉറപ്പു വരുത്താനാവില്ലന്നുമുള്ള പ്രോസിക്യൂഷൻ വാദം കോടതി അംഗീകരിച്ചു. ഒരു പരന്പര കൊലയാളി എന്ന നിലയിൽ പ്രതി സമൂഹത്തിന് ഭീഷണിയാണ്. നിരപരാധികളായ മനുഷ്യരെ ദാരുണമായ അന്ത്യത്തി ൽ നിന്നു രക്ഷിക്കാനുള്ള ഏക മാർഗം വധശിക്ഷയാണന്ന് പ്രോസിക്യൂഷൻ ശക്തമായ നിലപാടെടുത്തിരുന്നു. പ്രതിയുടെ പ്രായം പരിഗണിക്കണമെന്ന പ്രതിഭാഗം വാദം കോടതി തള്ളി.

അന്പലമുക്ക് വിനീത കൊലക്കേസ്: പ്രതി രാജേന്ദ്രനു വധശിക്ഷ

വധശിക്ഷയ്ക്കു പുറമേ ജീവപര്യന്തം കഠിനതടവും തിരുവനന്തപുരം: പേരൂർക്കട അന്പലമുക്കിൽ അലങ്കാരച്ചെടി വില്പനശാലയിലെ ജീവനക്കാരിയായിരുന്ന നെടുമങ്ങാട് കരിപ്പൂർ ചരുവള്ളികോണത്ത് വിനീതയെ(38) കുത്തിക്കൊലപ്പെടുത്തിയ കേസിലെ പ്രതിക്കു വധശിക്ഷ. കൂടാതെ ജീവപര്യന്തം കഠിനതടവും വിവിധ വകുപ്പുകളിലായി 8,10,500 രൂപ പിഴയും വിധിച്ചു. കന്യാകുമാരി തോവാള വെള്ളമടം രാജീവ് നഗറിൽ രാജേന്ദ്രനെ (42) ആണു തൂക്കിക്കൊല്ലാൻ വിധിച്ചത്. വധശിക്ഷയ്ക്കു പുറമേ മരണം ഉണ്ടാക്കിയുള്ള കവർച്ചയ്ക്കു ജീവപര്യന്തം കഠിനതടവും നാലു ലക്ഷം രൂപ പിഴയും കുറ്റകരമായ വസ്തു കൈയേറ്റത്തിനു മൂന്നുമാസം കഠിനതടവും 500 രൂപ പിഴയും തെളിവു നശിപ്പിച്ചതിന് ഏഴു വർഷം കഠിനതടവും പതിനായിരം രൂപ പിഴയും ശിക്ഷ വിധിച്ചു. പിഴകൾ ഒടുക്കിയല്ലെങ്കിൽ മൂന്നു വർഷം കൂടി കഠിനതടവ് അനുഭവിക്കണമെന്ന് 600 പേജുള്ള വിധിന്യായത്തിൽ തിരുവനന്തപുരം ഏഴാം അഡിഷണൽ സെഷൻസ് ജഡ്ജ് പ്രസൂണ്‍ മോഹൻ ഉത്തരവിട്ടു. പിഴത്തുകയിൽ നിന്നും നാലു ലക്ഷം രൂപ വിനീതയുടെ കുട്ടികൾക്കു നൽകണം. കൂടാതെ കുട്ടികൾക്കും മാതാപിതാക്കൾക്കും ലീഗൽ സർവീസ് അഥോറിറ്റിയിൽ നിന്നും നഷ്ടപരിഹാരം നൽകണമെന്നും കോടതി ഉത്തരവിട്ടു. കൊല്ലപ്പെട്ട വിനീതയുടെ 14 ഉം 11 ഉം വയസായ രണ്ടു മക്കൾ വിനീതയുടെ മാതാപിതാക്കളോടൊപ്പമാണ് കഴിയുന്നത്. വിധി പറയുന്നതു കേൾക്കാൻ വിനീതയുടെ മാതാപിതാക്കളും കുട്ടികളും കോടതിയിൽ എത്തിയിരുന്നു. ശിക്ഷയേക്കുറിച്ചുള്ള കോടതിയുടെ ചോദ്യങ്ങൾക്ക് 70 വയസ് കഴിഞ്ഞ അമ്മയ്ക്ക് ഏക ആശ്രയം താനാണന്നും പോലീസിനെ ഭയന്ന് സഹോദരൻ പ്രഭുവും സഹോദരി സുബ്ബലക്ഷ്മിയും അമ്മയെ കാണാൻ പോലും കൂട്ടാക്കാറില്ലന്നും പ്രതി കോടതിയോടു പറഞ്ഞു. ശിക്ഷയേക്കുറിച്ച് പ്രോസിക്യൂഷന്‍റെയും പ്രതിയുടെയും വാദങ്ങളും കോടതി കേട്ടു. പ്രതി കൊടും കുറ്റവാളിയാണന്നും കവർച്ചയ്ക്കായി തമിഴ്നാട്ടിലും കേരളത്തിലും പ്രതി നടത്തിയ നാലു കൊലപാതകങ്ങളിൽ മൂന്നു പേരും സ്ത്രീകളായിരുന്നുവെന്നും സ്പെഷൽ പബ്ലിക് പ്രോസിക്യൂട്ടർ എം.സലാഹുദീൻ പറഞ്ഞു. പ്രോസിക്യൂഷനു വേണ്ടി സ്പെഷൽ പബ്ലിക് പ്രോസിക്യൂട്ടർ എം. സലാഹുദ്ദീൻ, ദേവിക മധു, ജെ. ഫസ്ന, ഒ.എസ്. ചിത്ര എന്നിവർ ഹാജരായി. തിരുവനന്തപുരം സിറ്റി പോലീസ് കമ്മീഷണറായിരുന്ന ജി. സ്പർജൻ കുമാറിന്‍റെ മേൽനോട്ടത്തിൽ കന്േ‍റാണ്‍മെന്‍റ് എ സിയായിരുന്ന വി.എസ്. ദിനരാജ്, പേരൂർക്കട സിഐ ആയിരുന്ന വി.സജികുമാർ, ജുവനപുടി മഹേഷ് ഐപിഎസ്, സബ് ഇൻസ്പക്ടർമാരായ എസ്. ജയകുമാർ, ആർ. അനിൽകുമാർ, മീന എസ്. നായർ, സീനിയർ സിവിൽ പോലീസുകരായ ആർ. പ്രമോദ്, നൗഫൽ റഫീഖ്, ഷംനാദ്, അരുണ്‍ എന്നിവരുടെ നേതൃത്വത്തിലുള്ള പ്രത്യേക പോലീസ് സംഘമാണ് അന്വേഷണം നടത്തി കുറ്റപത്രം സമർപ്പിച്ചത്.

നക്ഷത്രസത്ര ഇഷ്‌ടിയാഗം ഇന്നു മുതൽ

കൊല്ലം: ശ്രീരാമചന്ദ്ര വൈദിക പീഠത്തിന്‍റെ ആഭിമുഖ്യത്തിലുള്ള നക്ഷത്ര സത്ര ഇഷ്‌ടിയാഗം ഇന്നു മുതൽ മേയ് മൂന്നുവരെ വടക്കേവിള വലിയ കൂനമ്പായിക്കുളം ഭദ്രകാളി ക്ഷേത്രത്തിൽ നടക്കും. ഇതിന്‍റെ ഭാഗമായി കീർത്തനാലാപന സദസ്, നാമജപ ഘോഷയാത്ര, യാഗാശ്വ പ്രദക്ഷിണം, ആധ്യാത്മിക സാംസ്കാരിക കലാപരിപാടികൾ, ജീവകാരുണ്യ പ്രവർത്തനങ്ങൾ, വിശിഷ്‌ട വ്യക്തികളെ ആദരിക്കൽ എന്നിവ നടക്കും. പത്രസമ്മേളനത്തിൽ ശ്രീ രാമചന്ദ്ര വൈദിക പീഠം ജനറൽ സെക്രട്ടറി സുജിത് സുകുമാരൻ, മുടപ്പിലാപ്പിള്ളി വാസുദേവ സോമയാജിപ്പാട് എന്നിവർ പങ്കെടുത്തു.

വാര്‍ഷികാഘോഷങ്ങളുടെ മറവില്‍ പിണറായി സര്‍ക്കാര്‍ കോടികള്‍ ധൂര്‍ത്തടിക്കുന്നു : എം.എം.നസീര്‍

അഞ്ചല്‍ : ഇടതുസര്‍ക്കാരിന്‍റെ നാലാം വാര്‍ഷികാഘോഷങ്ങളെ മറയാക്കി പിണറായി വിജയനും സംഘവും നടത്തുന്നത് കോടികളുടെ ധൂര്‍ത്തൂം അഴിമതിയുമാണെന്ന് കെപിസിസി ജനറല്‍ സെക്രട്ടറി എം.എം.നസീര്‍. അലയമണ്‍ കോണ്‍ഗ്രസ് മണ്ഡലം കമ്മിറ്റിയുടെ നേതൃത്വത്തില്‍ നിത്യോപയോഗ സാധനങ്ങളുടെ വിലവർധന നിയന്ത്രിക്കുക, തദ്ദേശഭരണ സ്ഥാപനങ്ങളുടെ പദ്ധതി വിഹിതം വെട്ടിക്കുറച്ചത് പുനസ്ഥാപിക്കുക തുടങ്ങിയ ആവശ്യങ്ങള്‍ ഉന്നയിച്ചു ചണ്ണപ്പേട്ടയില്‍ സംഘടിപ്പിച്ച കൂട്ടധര്‍ണ ഉദ്ഘാടനം ചെയ്ത് പ്രസംഗിക്കുകയായിരുന്നു എം.എം.നസീര്‍. യോഗത്തില്‍ വാര്‍ഡ് പ്രസിഡന്‍റുര്‍ക്ക് ജില്ല കോണ്‍ഗ്രസ് നേതൃത്വം തയാറാക്കിയ തിരിച്ചറിയല്‍ കാര്‍ഡുകളും വിതരണം ചെയ്തു. മണ്ഡലം പ്രസിഡന്‍റ് എം.എം.സാദിക് അധ്യക്ഷത വഹിച്ചു. ഏരൂർ സുഭാഷ്, കെ.ജി.സാബു, ചാർലി കോലത്ത്, എച്ച്.സുനിൽ ദത്ത്, ജേക്കബ് മാത്യു, സജീനഷിബു, ബിനു സി. ചാക്കോ, ഡോ.നദിയ എസ്. ജലീൽ എന്നിവര്‍ പ്രസംഗിച്ചു.

പറവകൾക്കൊരു തണ്ണീർക്കുടം പദ്ധതി തുടങ്ങി

കൊല്ലം :പറവകൾക്ക് തണ്ണീർക്കുടം ഒരുക്കി കൊല്ലം വിമല ഹൃദയ ഗേൾസ് ഹയർസെക്കൻഡറി സ്കൂളിലെ എസ്പിസി കേഡറ്റുകൾ. കൊടുംവേനലിൽ പക്ഷികൾക്ക് ദാഹം അകറ്റാൻ കൊല്ലം ആശ്രമം മൈതാനിയിൽ നടന്ന പറവകൾക്കൊരു തണ്ണീർക്കുടം പദ്ധതിയുടെ ഉദ്ഘാടനം ജില്ലാ കളക്‌ടർ ദേവിദാസ് നിർവഹിച്ചു. ക്രൈംബ്രാഞ്ച് ഡിവൈഎസ്പി വി.വിനോദ്, അഞ്ചാലുംമൂട് ഇൻസ്പെക്‌ടർ ആർ.ജയകുമാർ, കൊല്ലം കോർപറേഷൻ ക്ഷേമകാര്യ സ്റ്റാൻഡിംഗ് കമ്മിറ്റി ചെയർമാൻ എം .സജീവ്, ബിജോയ്, സിപിഒ പ്രമീള എന്നിവർ പങ്കെടുത്തു.

സിവിൽ സർവീസ് ജേതാവിനെ മന്ത്രി കെ.എൻ.ബാലഗോപാൽ അനുമോദിച്ചു

കൊട്ടാരക്കര : സിവിൽ സർവീസ് പരീക്ഷയിൽ 47-ാം റാങ്ക് നേടിയ വയയ്ക്കൽ സ്വസ്തിയിൽ ജി.പി.നന്ദനയെ മന്ത്രി കെ.എൻ.ബാലഗോപാൽ വീട്ടിലെത്തി അനുമോദിച്ചു. ഡിവൈഎഫ്ഐ സംസ്ഥാന ട്രഷറർ എസ്.ആർ.അരുൺ ബാബു, സിപി എം കൊട്ടാരക്കര ഏരിയ സെക്രട്ടറി പി.കെ.ജോൺസൻ, വാളകം ലോക്കൽ സെക്രട്ടറി കെ.പ്രതാപ്കുമാർ, നെടുവത്തൂർ ഏരിയ കമ്മിറ്റിയംഗം എൽ.ബാലഗോപാൽ, വെട്ടിക്കവല ബ്ലോക്ക് പഞ്ചായത്ത് സ്ഥിരംസമിതി അധ്യക്ഷ ബെൻസി റെജി, പഞ്ചായത്തംഗം പ്രിയ ആസ്തികൻ, ഉമ്മന്നൂർ സഹകരണ ബാങ്ക് പ്രസിഡന്‍റ് എൻ.ദേവരാജൻ, മുൻ പഞ്ചായത്ത് പ്രസിഡന്‍റ് ജി.മുരളീധരൻ പിളള, സിപി എം ലോക്കൽ കമ്മിറ്റിയംഗങ്ങളായ കെ.പ്രമോദ്, ഒ.നൗഷാദ്, ഷംസുദീൻ, ജി.രതീഷ് എന്നിവരും മന്ത്രിയോടൊപ്പം ഉണ്ടായിരുന്നു. 2024-ൽ രണ്ടാമത്തെ ശ്രമത്തിലാണ് നന്ദന ഈ നേട്ടം കൈവരിച്ചത്.

ലോക വെറ്ററിനറി ദിനാഘോഷം ; ടോക് ഷോ സെമിനാര്‍ നാളെ

കൊല്ലം : മൃഗസംരക്ഷണവകുപ്പും ഇന്ത്യന്‍ വെറ്ററിനറി അസോസിയേഷനും സംയുക്തമായി ആചരിക്കുന്ന ലോക വെറ്ററിനറി ദിനാഘോഷങ്ങള്‍ക്ക് 26ന് കൊല്ലത്ത് തുടക്കമാകും. ഉച്ചയ്ക്ക് 12ന് ശ്രീനാരായണ സാംസ്‌കാരിക സമുച്ചയത്തില്‍ മന്ത്രി ജെ. ചിഞ്ചുറാണി ഉദ്ഘാടനം ചെയ്യും. നാടുകയറുന്ന കാട്ടുമൃഗങ്ങള്‍ ജനജീവിതത്തിന് ഭീഷണിയാകുന്നതും കാട്ടു പന്നികളുടെ കൃഷിനശീകരണവും വന്യമൃഗ ആവാസ വ്യവസ്ഥയുടെ കോട്ടങ്ങളുടെ കാരണങ്ങളുമുള്‍പ്പെടുത്തി സംഘടിപ്പിക്കുന്ന ടോക് ഷോ രാവിലെ 10ന് മേയര്‍ ഹണി ബെഞ്ചമിൻ ഉദ്ഘാടനം ചെയ്യും. പഞ്ചായത്ത് പ്രസിഡന്‍റുമാര്‍, റവന്യൂ, വനം, മൃഗസംരക്ഷണ വകുപ്പുകളിലെ ഉന്നത ഉദ്യോഗസ്ഥര്‍, മൃഗക്ഷേമ പ്രവര്‍ത്തകര്‍, മാധ്യമപ്രവര്‍ത്തകര്‍, വന്യമൃഗ ആക്രമണത്തില്‍ മരിച്ചവരുടെ ബന്ധുക്കള്‍ എന്നിവര്‍ പങ്കെടുക്കും. ചര്‍ച്ചയിലെ നിര്‍ദേശങ്ങള്‍ സര്‍ക്കാരിന് സമര്‍പ്പിക്കും.

ചട്ടമ്പി സ്വാമി സമാധി വാര്‍ഷികവും പന്മന ആശ്രമ തീര്‍ഥാടനവും നാളെ മുതല്‍

ചവറ : ചട്ടമ്പിസ്വാമിയുടെ സമാധി വാര്‍ഷികവും പന്മന ആശ്രമ തീര്‍ഥാടനവും നാളെ മുതല്‍ 29 വരെ നടക്കുമെന്ന് ആശ്രമ മഠാധിപതി സ്വാമി കൃഷ്ണമയാനന്ദ തീര്‍ഥ പാദര്‍, ജനറല്‍ സെക്രട്ടറി എ.ആര്‍.ഗിരീഷ് കുമാര്‍ എന്നിവര്‍ അറിയിച്ചു. നാളെ പന്മന ആശ്രമ സ്ഥാപകന്‍ കുമ്പളത്ത് ശങ്കുപ്പിള്ളയുടെ അനുസ്മരണ ദിനം നടത്തും. രാവിലെ 10.30 ന് മുന്‍ പ്രതിപക്ഷ നേതാവ് രമേശ് ചെന്നിത്തല പരിപാടി ഉദ്ഘാടനം ചെയ്യും. ആശ്രമ മഠാധിപതി സ്വാമി കൃഷ്ണ മയാനന്ദ തീര്‍ഥപാദര്‍ അധ്യക്ഷനാകും. സിപിഎം ദേശീയ ജനറല്‍ സെക്രട്ടറി എം.എ.ബേബി മുഖ്യാതിഥിയാകും. എന്‍. കെ .പ്രേമചന്ദ്രന്‍ എംപി മുഖ്യപ്രഭാഷണം നടത്തും. കുമ്പളത്തിന്‍റെ കര്‍മ പഥങ്ങള്‍ എന്ന വിഷയത്തില്‍ എഴുത്തുകാരന്‍ ഡോ. എസ്. രമേശ് കുമാര്‍ അനുസ്മരണ പ്രഭാഷണം നടത്തും. തുടര്‍ന്ന് ഓട്ടന്‍ തുള്ളല്‍. രാത്രി ഏഴിന് ആനന്ദ സംഗീതം. 27ന് നിര്‍മലാനന്ദ ഗിരി അനുസ്മരണ ദിനം ശാസ്ത്ര സാങ്കേതിക സംഗമമായി നടത്തും. രാവിലെ 10ന് സുജിത് വിജയന്‍പിള്ള എംഎല്‍എ ചടങ്ങ് ഉദ്ഘാടനം ചെയ്യും. കേരള അക്കാദമി ഓഫ് സയന്‍സസ് പ്രസിഡന്‍റ് പ്രഫ. ഡോ.ജി.എം. നായര്‍ അധ്യക്ഷനാവും. കേരളാ യൂണിവേഴ്‌സിറ്റി ഓഫ് ഹെല്‍ത്ത് സയന്‍സ് മുന്‍ വൈസ് ചാന്‍സിലര്‍ ഡോ.എം.കെ.സി.നായര്‍, കേരള സര്‍വകലാശാല സിന്‍ഡിക്കേറ്റംഗം ഡോ.എസ്. നസീബ്, ചവറ സര്‍ക്കാര്‍ കോളജ് സുവോളജി മേധാവി ഡോ. രശ്മി വിജയന്‍, രജനി വിജയകുമാര്‍ തുടങ്ങിയവര്‍ പങ്കെടുക്കും. 28ന് ആശ്രമം മുന്‍ മഠാധിപതി സ്വാമി പ്രണവാനന്ദ തീര്‍ഥപാദര്‍ അനുസ്മരണദിനം യുവജന സമ്മേളനമായി നടത്തും. രാവിലെ 10.30ന് മുന്‍ ഡിജിപി ജേക്കബ് പുന്നൂസ് ഉദ്ഘാടനം ചെയ്യും. ആര്‍എസ്പി സംസ്ഥാന സെക്രട്ടറി ഷിബു ബേബി ജോണ്‍ അധ്യക്ഷനാകും. വര്‍ധിച്ചു വരുന്ന അധാര്‍മികത, യുവജനങ്ങളും രാഷ്ട്രീയ നിര്‍മിതിയും എന്ന വിഷയത്തില്‍ ഡോ. എന്‍. ഗോപാലകൃഷ്ണന്‍ നായര്‍, പ്രഫ. ബി. കാര്‍ത്തികേയന്‍ എന്നിവര്‍ പ്രസംഗിക്കും .വൈകുന്നേരം 6.30 ന് ഭരണി നക്ഷത്ര വിശേഷാല്‍ പൂജകള്‍. രാത്രി ഏഴിന് തോല്‍പ്പാവക്കൂത്ത്.29ന് ചട്ടമ്പി സ്വാമി സമാധി വാര്‍ഷിക ദിനം നടക്കും. രാവിലെ ഒന്‍പതിന് തീര്‍ഥപാദ പരമ്പരയിലെ ആചാര്യന്‍ പ്രജ്ഞാനാനന്ദ തീര്‍ഥ പാദര്‍ ദീപം തെളിയിക്കും. രാവിലെ 10.30 ന് മഹാ സമാധി സമ്മേളനം ദക്ഷിണേന്ത്യയിലെ ആദ്യത്തെ മഹാമണ്ഡലേശ്വര്‍ ആനന്ദ വനം ഭാരതി സ്വാമി ഉദ്ഘാടനം ചെയ്യും. ആശ്രമ മഠാധിപതി സ്വാമി കൃഷ്ണമയാനന്ദ തീര്‍ഥപാദര്‍ വിദ്യാധിരാജ സന്ദേശം നല്‍കും. അധ്യാത്മാനന്ദ സരസ്വതി സ്വാമി, വേദാമൃതാനന്ദ പുരി സ്വാമി, ബോധേന്ദ്ര തീര്‍ഥ സ്വാമി, വിജയാനന്ദ സരസ്വതി ദേവി എന്നിവര്‍ പ്രസംഗിക്കും. ഉച്ചയ്ക്ക് 2.30 ന് മഹാ സമാധി ദിവ്യജ്യോതിരാനയനം പന്മന മനയില്‍ ശ്രീ ബാലഭട്ടാരക വിലാസം സംസ്‌കൃത സര്‍ക്കാര്‍ ഹയര്‍സെക്കന്‍ഡറി സ്‌കൂള്‍ പരിസരത്തെ സമാധി സ്മാരക മണ്ഡപത്തില്‍ നിന്നും സമാധി പീഠത്തിലേക്ക് പ്രയാണം നടത്തും. തുടര്‍ന്ന് സമാധി പീഠത്തില്‍ ജ്യോതി സമര്‍പ്പണം, കളഭാഭിഷേകം, പുഷ്പാഭിഷേകം. രാത്രി ഏഴിന് തോരണ യുദ്ധം കഥകളി എന്നിവയാണ് പരിപാടി.

വിദ്യാര്‍ഥിക്കു ഇടിമിന്നലേറ്റു

മടത്തറ : വിദ്യാർഥിക്ക് ഇടിമിന്നലേറ്റു. ചോഴിയക്കോട് മിൽപ്പാലം മൂന്നുമുക്ക് അമ്പാടിയിൽ വീട്ടിൽ സുധി (17) ക്കാണ് പരിക്കേറ്റത്. കഴിഞ്ഞ ദിവസം വൈകുന്നേരം നാലിന് വീടിനോട് ചേർന്ന ചായക്കടയിൽ ഇരുന്നു ചായ കുടിക്കുന്ന സമയത്ത് ആയിരുന്നു സംഭവം. മഴയ്ക്ക് മുമ്പേ ഉണ്ടായ ശക്തമായ ഇടിമിന്നലേറ്റ സുധിയുടെ ശരീരത്തിന്‍റെ ഒരു ഭാഗം പൂർണമായും തളർന്നു. വീട്ടുകാരും സമീപത്തുണ്ടായിരുന്ന പഞ്ചായത്ത്‌ അംഗം ഷീലാ സത്യനും ചേര്‍ന്ന് സുധിയെ കടയ്ക്കൽ താലുക്ക് ആശുപത്രിയില്‍ പ്രവേശിപ്പിച്ചു. സുധിയുടെ ആരേഗ്യസ്ഥിതി ഗുരുതരമായതിനാൽ പിന്നീട് പാരിപ്പള്ളി മെഡിക്കൽ കോളജ് ആശുപത്രിയിൽ കൊണ്ടു പോയി. ഇടിമിന്നലിൽ ആന്തരികഅവയവങ്ങൾക്കാണ് പരിക്ക് പറ്റിയതെന്നു ബന്ധുക്കള്‍ പറഞ്ഞു. ആവശ്യമെങ്കില്‍ സുധിയെ തിരുവനന്തപുരം മെഡിക്കല്‍ കോളജ് ആശുപത്രിയിലേക്ക് മാറ്റുമെന്ന് ആശുപത്രി അധികൃതർ വ്യക്തമാക്കി .

സ്വയംതൊഴില്‍ വായ്പ

കൊല്ലം : ജില്ലയില്‍ സ്ഥിരതാമസക്കാരായ 18 നും 55 നും ഇടയില്‍ പ്രായമുള്ള തൊഴില്‍ രഹിതരായ വനിതകള്‍ക്ക് സ്വയം തൊഴില്‍ വായ്പയ്ക്ക് അപേക്ഷിക്കാം. പട്ടികജാതി, പട്ടികവര്‍ഗ വിഭാഗക്കാര്‍ക്ക് നാല് വര്‍ഷത്തേക്ക് എട്ട് ശതമാനം പലിശ നിരക്കിലും പിന്നാക്ക വിഭാഗം, പൊതുവിഭാഗക്കാര്‍ക്ക് അഞ്ച് വര്‍ഷത്തേക്ക് എട്ട് ശതമാനം പലിശയ്ക്കും ന്യൂനപക്ഷ വിഭാഗക്കാര്‍ക്ക് അഞ്ച് വര്‍ഷത്തേക്ക് ആറ് ശതമാനം പലിശ നിരക്കിലും വസ്തു / ഉദ്യോഗസ്ഥ ജാമ്യ വ്യവസ്ഥയില്‍ വായ്പ അനുവദിക്കും. www.kswdc.org ല്‍ നിന്നും അപേക്ഷ ഫോം ലഭിക്കും. അനുബന്ധരേഖകള്‍ സഹിതം വനിത വികസന കോര്‍പറേഷന്‍, ജില്ലാ ഓഫീസ്, രണ്ടാം നില, എന്‍.തങ്കപ്പന്‍ മെമ്മോറിയല്‍ ഷോപ്പിംഗ് കോംപ്ലക്‌സ്, ക്ലോക്ക് ടവറിനു സമീപം, ചിന്നക്കട, കൊല്ലം 691001 വിലാസത്തില്‍ നേരിട്ടോ തപാല്‍ മുഖേനയോ ലഭ്യമാക്കണം. ഫോണ്‍: 9188606806.

വിദേശമദ്യ വില്പന കേസ് : പ്രതിയെ വെറുതെവിട്ടു

കൊല്ലം: അനധികൃതമായി വിദേശമദ്യം കൈവശം വച്ച് വ്യാവസായിക അടിസ്ഥാനത്തിൽ വില്പന നടത്തിയെന്ന കേസിലെ പ്രതിയെ കോടതി വെറുതേ വിട്ടു.തെക്കൻ മൈനാഗപ്പള്ളി നടയിൽ കിഴക്കതിൽ വീട്ടിൽ സത്യാനന്ദനെയാണ് കുറ്റക്കാരനല്ലെന്ന് കണ്ട് കരുനാഗപ്പള്ളി അസി.സ്റ്റന്‍റ് സെഷൻസ് ജഡ്ജ് സന്തോഷ് ദാസ് വെറുതെവിട്ടത്. 2016 ജൂലൈ 24ന് തേവലക്കര - കല്ലുകടവ് റോഡിൽ കളിയിലവിള കോളനിയിൽ വച്ച് വിദേശ മദ്യവുമായി പ്രതിയെ പിടികൂടി എന്നായിരുന്നു ശാസ്താംകോട്ട എക്സൈസ് റേഞ്ച് ഇൻസ്പെക്‌ടർ ടി.രാജീവ് ചാർജ് ചെയ്ത കേസ്. പ്രതിക്കുവേണ്ടി അഭിഭാഷകരായ എ.നൗഷാദ്, എം.ഷാനവാസ് കണ്ടനാട്, കെ.സൈഫുദീൻ എന്നിവർ കോടതിയിൽ ഹാജരായി.

അഭിഭാഷക കലോത്സവം ഇന്നു മുതൽ

കൊല്ലം: കൊല്ലം ബാർ അസോസിയേഷന്‍റെ ആഭിമുഖ്യത്തിലുള്ള അഖില കേരള അഭിഭാഷക കലോത്സവം ഇന്നു മുതൽ 27 വരെ കൊല്ലത്ത് നടക്കും. കലോത്സവ ഉദ്ഘാടനം ഇന്ന് വൈകുന്നേരം നാലിന് ഹൈക്കോടതി ജഡ്ജി ദേവൻ രാമചന്ദ്രൻ നിർവഹിക്കും. സംസ്ഥാനത്തെ 30 ബാർ അസോസിയേഷനുകളെ പ്രതിനിധീകരിച്ച് 300-ൽ അധികം പേർ 21 ഇനങ്ങളിലെ മത്സരങ്ങളിൽ പങ്കെടുക്കും. ആനന്ദവല്ലീശ്വരം വിദ്യാധിരാജ ഓഡിറ്റോറിയം, ബാർ അസോസിയേഷൻ ഹാൾ, ലൈബറി ഹാൾ, കളക്‌ടറേറ്റ് മൂന്നാം നിലയിലെ ആത്മാഹാൾ എന്നിവയാണ് വേദികൾ. മത്സരങ്ങളിൽ ഏറ്റവും കൂടുതൽ പോയിന്‍റ് നേടുന്ന ബാർ അസോസിയേഷന് അഡ്വ. വൈക്കം നാരായണപിള്ള എവർ റോളിംഗ് ട്രോഫിയും രണ്ടാം സ്ഥാനക്കാർക്ക് അഡ്വ. പി. വിജയരാഘവൻ സ്മാരക എവർ റോളിംഗ് ട്രോഫിയും സമ്മാനിക്കും. മേയർ ഹണി ബഞ്ചമിൻ, പ്രിൻസിപ്പൽ ജില്ലാ ജഡ്ജ് പി. മായാദേവി, എം. നൗഷാദ് എംഎൽഎ, പി.സി. വിഷ്ണുനാഥ് എംഎൽഎ, ബാർ കൗൺസിൽ അംഗങ്ങളായ പി. സന്തോഷ് കുമാർ, പി.സജീവ് ബാബു തുടങ്ങിയവർ പങ്കെടുക്കും. 27ന് വൈകുന്നേരം നാലിന് സമാപന സമ്മേളനം ഹൈക്കോടതി ജഡ്ജ് ജസ്റ്റിസ് പി.ബി.സുരേഷ് കുമാർ ഉദ്ഘാടനം ചെയ്യും. തുടർന്ന് ഇൻഡസ്ട്രിയൽ ട്രൈബൂണൽ ജഡ്ജ് സുനിത വിമലിന്‍റെ ഭരതനാട്യം, കൊല്ലം ബാറിലെ അഭിഭാഷകരുടെ നാടകവും ഇതര കലാപരിപാടികളും അരങ്ങേറും. പത്രസമ്മേളനത്തിൽ സംഘാടക സമിതി ചെയർമാൻ അഡ്വ.ഓച്ചിറ എൻ .അനിൽ കുമാർ, ജനറൽ കൺവീനർ അഡ്വ. എ.കെ. മനോജ്, മീഡിയ കമ്മിറ്റി കൺവീനർ അഡ്വ. ജി. മോഹൻരാജ്, അഡ്വ. പ്രിജി, അഡ്വ. ബി.എൻ.ഹസ്കർ എന്നിവർ പങ്കെടുത്തു.

ഫ്രാൻസിസ് മാർപാപ്പ അനുസ്മരണവും കരിന്തോട്ടുവാ സെന്‍റ്മേരീസ് പള്ളി മൂറോൻ കൂദാശയും

കരിന്തോട്ടുവാ : മലങ്കര കത്തോലിക്കാ സഭ പുതുതായി നിർമിച്ചിരിക്കുന്ന കരിന്തോട്ടുവാ സെന്‍റ്മേരീസ്പള്ളി മൂറോൻ കൂദാശകർമം ഫ്രാൻസിസ് മാർപാപ്പയുടെ അനുസ്മരണാർഥം ഇന്ന് ഉച്ചകഴിഞ്ഞ് മൂന്നിന് മാവേലിക്കര ഭദ്രാസന അധ്യക്ഷൻ ഡോ.ജോഷ്വാ മാർ ഇഗ്നാത്തിയോസ്, പുത്തൂർ രൂപതാ അധ്യക്ഷൻ ഗീവർഗീസ് മാർ മക്കാറിയോസ്, തിരുവനന്തപുരം അതിരൂപത സഹായ മെത്രാൻ ഡോ.മാത്യൂസ് മാർ പോളി കാർപ്പസ്, മാർത്തോമ സഭ അടൂർ ഭദ്രാസനം എപ്പിസ്കോപ് മാത്യൂസ് മാർ സെറാഫിം എന്നിവർ ചേർന്ന് നിർവഹിക്കും. കാലം ചെയ്ത ബെനഡിക്‌ട് മാർ ഗ്രിഗോറിയസ് 1962-ൽ സ്ഥാപിച്ച ഈ പള്ളിയ്ക്ക് അംഗീകാരം നൽകിയത് പോൾ ആറാമൻ മാർപാപ്പയായിരുന്നു. ആറു പതിറ്റാണ്ടിനിപ്പുറം കാലം ചെയ്ത ഫ്രാൻസിസ് മാർപാപ്പയുടെ അനുഗ്രഹാശിസുകളും പ്രാർഥനകളും നിറഞ്ഞുനിൽക്കുന്ന പുണ്യ മുഹൂർത്തത്തിൽ കരിന്തോട്ടുവാ സെന്‍റ് മേരീസ് പള്ളി മൂറോൻ കൂദാശ ചെയ്തു ഇന്ന് ദേശത്തിനായി സമർപ്പിക്കും. കൊടിക്കുന്നിൽ സുരേഷ് എംപി, കോവൂർ കുഞ്ഞുമോൻഎംഎൽഎ , മത മേലധ്യക്ഷൻമാർ, വിവിധ സാമൂഹിക, രാഷ്‌ട്രീയ സാംസ്കാരിക പ്രവർത്തകർ തുടങ്ങിയവർ ചടങ്ങിൽ പങ്കെടുക്കും.

പോഷന്‍ പക്വാഡ ജില്ലാതല സമാപന സമ്മേളനം

കൊല്ലം : പോഷന്‍ പക്വാഡ-2025 ജില്ലാതല സമാപന സമ്മേളനം ഇത്തിക്കര ബ്ലോക്ക് പ്രസിഡന്‍റ് എം.കെ. ശ്രീകുമാര്‍ ഉദ്ഘാടനം ചെയ്തു. പോഷൻ അഭിയാന്‍ പദ്ധതിയുടെ ഭാഗമായി എട്ട് മുതല്‍ 22 വരെ നടന്ന കാന്പയിന്‍ അങ്കണവാടി, ബ്ലോക്ക് പഞ്ചായത്ത്, പഞ്ചായത്ത് തലങ്ങളില്‍ ബോധവത്കരണ ക്ലാസുകളും ക്യാമ്പുകളും വര്‍ക്ക്‌ഷോപ്പുകളും സംഘടിപ്പിച്ചു. ചെറുധാന്യങ്ങള്‍, പോഷകനിലവാരമുള്ള ഭക്ഷണ ശൈലി തുടങ്ങിയവയെക്കുറിച്ച് അവബോധം സൃഷ്‌ടിക്കുന്ന കാമ്പയിന്‍ സമാപനത്തോടനുബന്ധിച്ചു പോഷകാഹാര പ്രദര്‍ശനം, പോസ്റ്റര്‍ കാമ്പയിന്‍, ഗര്‍ഭിണികള്‍, മൂലയൂട്ടുന്ന അമ്മമാര്‍, അഞ്ച് വയസ് വരെയുള്ള കുട്ടികള്‍, പോഷക അപര്യാപ്തതയുള്ള കുട്ടികള്‍ എന്നിവര്‍ക്ക് വേണ്ടിയുള്ള മെഡിക്കല്‍ ക്യാമ്പ്, ബോധവത്കരണ ക്ലാസ് തുടങ്ങിയവ സംഘടിപ്പിച്ചു. ചാത്തന്നൂര്‍ ശ്രീഭൂതനാഥ ക്ഷേത്രം മുതല്‍ ഇത്തിക്കര ബ്ലോക്ക് വരെ റാലിയും സംഘടിപ്പിച്ചു. ഇത്തിക്കര ബ്ലോക്ക് ഐസിഡിഎസില്‍ നടന്ന പരിപാടിയില്‍ വൈസ് പ്രസിഡന്‍റ് നിര്‍മല വര്‍ഗീസ്, ബ്ലോക്ക് പഞ്ചായത്ത് അംഗം സദാനന്ദന്‍ പിള്ള, ജില്ലാ ഐസിഡിഎസ് സെല്‍ പ്രോഗ്രാം ഓഫീസര്‍ ആര്‍ .നിഷ നായര്‍, പി.ആര്‍. കവിത തുടങ്ങിയവര്‍ പങ്കെടുത്തു.

സംഘർഷത്തിൽ യുവാവ് മരിച്ച സംഭവം; ഓട്ടോറിക്ഷാ ഡ്രൈവർ അറസ്റ്റിൽ

പുനലൂർ : സംഘർഷത്തിൽ പരിക്കേറ്റ് ചികിത്സയിലായിരുന്ന യുവാവ് മരിച്ച സംഭവത്തിൽ ഓട്ടോറിക്ഷ ഡ്രൈവറെ പുനലൂർ പോലീസ് അറസ്റ്റ് ചെയ്തു. ഓട്ടോറിക്ഷ ഡ്രൈവർ കരവാളൂർ തിരുവഴിമുക്ക് ഷിബു മൻസിലിൽ സിയാദ് (34) ആണ് പിടിയിലായത്. കരവാളൂർ പടിഞ്ഞാറ്റിൻകര മനോജ് വിലാസത്തിൽ മനോജ് തോമസ് (44) മരിച്ച സംഭവത്തിലാണ് ഇയാൾ അറസ്റ്റിലായത്. സംഭവം സംബന്ധിച്ച് പോലീസ് പറയുന്നത്: പെസഹാ വ്യാഴാഴ്ച കരവാളൂർ പുത്തൂത്തടം മുക്കിൽ വച്ച് മനോജ് തോമസും സിയാദും ഉൾപ്പെടെ മദ്യപിച്ചു പിരിഞ്ഞു. രണ്ടാമതും മദ്യപാനത്തിനായി മനോജ് സിയാദിനെ വിളിക്കാൻ വന്നപ്പോൾ ഇരുവരും തമ്മിൽ ചീത്തവിളയും അടിയും ഉണ്ടായി. ഈ സമയം മനോജ് ഒരു ഓട്ടോയിൽ കയറി രക്ഷപ്പെട്ടു. പിന്നാലെ മറ്റൊരു ഓട്ടോറിക്ഷയിൽ എത്തിയ സിയാദ് തിരുവഴിമുക്കിൽ വച്ച് ഓട്ടോറിക്ഷ തടഞ്ഞു നിർത്തി മനോജിനെ അടിക്കുകയും ചവിട്ടുകയും ചെയ്തു. മനോജിന്‍റെ തുടയിൽ ചവിട്ടേറ്റ് ശക്തമായ ക്ഷതം ഉണ്ടായി. ഈ ക്ഷതം മുലം കിഡ്നിക്കും തലച്ചോറിനും ഏറ്റ തകരാറാണ് മരണത്തിന് ഇടയാക്കിയതെന്നാണ് പോസ്റ്റ് മോർട്ടം റിപ്പോർട്ടിൽ പറയുന്നു. മർദനം വിവരം മനോജ് വീട്ടുകാരിൽ നിന്നും മറച്ചുവെച്ചു. ശാരീരിക അവശത അനുഭവപ്പെട്ട മനോജ് പുനലൂർ താലൂക്ക് ആശുപത്രിയിൽ ചികിത്സക്ക് ശേഷം വീട്ടിൽ തിരികെ എത്തി കഴിഞ്ഞ ദിവസം രാത്രി ഒമ്പതരയോടെ മരിച്ചു. മരണത്തിൽ ബന്ധുക്കളുടെ സംശയത്തെ തുടർന്നു പുനലൂർ എസ്എച്ച്ഒ ടി രാജേഷ് കുമാറിന്‍റെ നേതൃത്വത്തിൽ പോലീസ് അന്വേഷണം നടത്തി. പ്രതിയെ പിടികൂടുകയായിരുന്നു. പ്രതിയെ പുനലൂർ കോടതിയിൽ ഹാജരാക്കി റിമാൻഡ് ചെയ്തു.

കളക്‌ടറേറ്റില്‍ സുരക്ഷാ സംവിധാനങ്ങൾ ഇപ്പോഴും പഴയപടി

കൊല്ലം: കളക്‌ടറേറ്റിലേക്ക് ഇത് രണ്ടാംതവണയാണ് ബോംബ് ഭീഷണി സന്ദേശം ലഭിക്കുന്നത്. കളക്ടറുടെ ഔദ്യോഗിക മെയിലിലേക്കാണ് ഭീഷണി സന്ദേശം രണ്ടുതവണയും എത്തിയത്. പോലീസിന്‍റെ യും ഡോഗ്, ബോംബ് സ്‌ക്വാഡുകളുടെയും നേതൃത്വത്തില്‍ മണിക്കൂറുകള്‍ നീണ്ട പരിശോധനകള്‍ നടത്തിയിട്ടും ഒന്നും കണ്ടെത്താനാകാത്തത് ആശ്വാസമാണെങ്കിലും ഇത് ആശങ്കകൾ വര്‍ധിപ്പിക്കുന്നു. ജമ്മു കാഷ്മീരിലെ തീവ്രവാദ ആക്രമണത്തിന് പിന്നാലെയെത്തിയ ഭീഷണി കളക്‌ടറേറ്റിലെ ജീവനക്കാരേയും വിവിധ ആവശ്യങ്ങൾക്ക് ജില്ലാ ഭരണകൂടത്തിന്‍റെ ആസ്ഥാനത്ത് എത്തുന്നവരെയും ഭീതിയിലാഴ്ത്തി. കഴിഞ്ഞ മാര്‍ച്ച് 18നും സമാന തരത്തില്‍ ഇ മെയിലിലൂടെ ഭീഷണി സന്ദേശമെത്തിയിരുന്നു. അന്ന് രാവിലെയെത്തിയ മെയില്‍ ഉദ്യോഗസ്ഥരുടെ ശ്രദ്ധയില്‍പെട്ടില്ല. പിന്നീട്, വൈകുന്നേരം അഞ്ചിനാണ് ഭീഷണി മെയില്‍ ഉദ്യോഗസ്ഥര്‍ കണ്ടത്. തുടര്‍ന്ന്, കളക്‌ടറുടെ നിര്‍ദേശപ്രകാരം മെയില്‍ പോലീസിനു കൈമാറി. ഇതിനു പിന്നാലെയാണ് പോലീസും ഡോഗ് സ്‌ക്വാഡും പരിശോധന നടത്തിയത്. അന്നേദിവസം തിരുവനന്തപുരം കളക്‌ടറേറ്റിലെ ഭീഷണി സന്ദേശത്തെത്തുടര്‍ന്ന് രാവിലെ കൊല്ലത്തും പരിശോധന നടത്തിയിരുന്നു. മെയില്‍ ശ്രദ്ധയില്‍പെട്ട ശേഷം രാത്രി വീണ്ടും പരിശോധന നടത്തുകയായിരുന്നു. എന്നാല്‍, അസ്വാഭാവികമായി ഒന്നും കണ്ടെത്താന്‍ സാധിച്ചില്ല. അടിക്കടി വിവിധ കളക്‌ടറേറ്റുകളിലേക്കും സര്‍ക്കാര്‍ ഓഫീസുകലിലേക്കും വരുന്ന ബോംബ് ഭീഷണി സന്ദേശങ്ങളുടെ ഉറവിടം കണ്ടെത്തുന്നതില്‍ അന്വേഷണ വിഭാഗം പരാജയപ്പെടുകയാണ്. ഇത് കാരണമാണ് വ്യാജ സന്ദേശങ്ങള്‍ തുടര്‍ക്കഥയാകുന്നതെന്നാണ് ആക്ഷേപം. അതേസമയം, ജില്ലയുടെ ഭരണസിരാകേന്ദ്രമായ കളക്‌ടറേറ്റും പ്രധാന ഓഫീസുകളും ജില്ലാ കോടതിയുമെല്ലാം പ്രവര്‍ത്തിക്കുന്ന സിവില്‍ സ്റ്റേഷന്‍ വളപ്പിലെ സുരക്ഷാ ക്രമീകരണങ്ങള്‍ ഇപ്പോഴും പേരിന് മാത്രമേയുള്ളൂ. 2016-ലെ ബോംബ് സ്‌ഫോടനത്തിന് ശേഷം സുരക്ഷ പരിശോധനകള്‍ ശക്തമാക്കിയെന്ന് പറയുന്നുണ്ടെങ്കിലും ഇത് ഒട്ടും കാര്യക്ഷമമല്ല. രാവിലെയും വൈകുന്നേരവും മാത്രമേ വഴിപാട് പോലെ പരിശോധനകള്‍ നടക്കുന്നുള്ളൂ. മറ്റുള്ള സമയങ്ങളില്‍ നിരീക്ഷണം പോലും നടക്കുന്നില്ലെന്നതാണ് വാസ്തവം. കളക്‌ടറേറ്റില്‍ മെറ്റല്‍ ഡിറ്റക്‌ടര്‍ ഉള്‍പ്പടെ സ്ഥാപിക്കുമെന്ന പ്രഖ്യാപനങ്ങള്‍ ഉണ്ടായിരുന്നെങ്കിലും ഇത് ഇപ്പോഴും ഫയലില്‍ ഉറങ്ങുകയാണ്. ആര്‍ക്കും ഏതുസമയത്തും എവിടെയും ചെന്നു കേറാവുന്ന അവസ്ഥയാണു നിലവിലുള്ളത്. കളക്‌ടറേറ്റ് സമുച്ചയത്തിലേക്ക് കൊണ്ടുവരുന്ന സാധനങ്ങളുടെ സുരക്ഷാ പരിശോധന നടത്താന്‍ സംവിധാനങ്ങളില്ല. സുരക്ഷാ കാമറകള്‍ സ്ഥാപിച്ചിട്ടുണ്ടെങ്കിലും ഭൂരിഭാഗവും പ്രവര്‍ത്തന രഹിതമാണ്. കളക്‌ടറേറ്റ് വളപ്പില്‍ നടന്ന സ്‌ഫോടനത്തെ തുടര്‍ന്നാണ് സമുച്ചയത്തില്‍ ആധുനിക കാമറകള്‍ സ്ഥാപിക്കാന്‍ തീരുമാനിച്ചത്. 2019-ല്‍ പണം അനുവദിക്കുകയും പിന്നാലെ കാമറ സ്ഥാപിക്കുകയുമായിരുന്നു. എന്നാല്‍ ഇത് കൃത്യമായി പരിപാലിക്കുന്നതില്‍ വീഴ്ചയുണ്ടായി.

കളക്‌ടറേറ്റിന് വീണ്ടും ബോംബ് ഭീഷണി : ഉറവിടം കണ്ടെത്താൻ പോലീസ്

കൊല്ലം: ജില്ലാ കളക്‌ടറേറ്റില്‍ വീണ്ടും ബോംബ് ഭിഷണി സന്ദേശമെത്തി. കളക്‌ടര്‍ എന്‍.ദേവിദാസിന്‍റെ ഔദ്യോഗിക ഇ- മെയിലിലേക്കാണ് ഭീഷണി സന്ദേശം എത്തിയത്. കളക്‌ടര്‍ സിറ്റി പോലീസ് കമ്മിഷണറെ വിവമറിയിച്ചതിനെത്തുടര്‍ ന്ന് പോലീസും ബോംബ് സ്‌ക്വോഡും ഡോഗ് സ്‌ക്വോഡും കളക്‌ടറേറ്റിലും പരിസരത്തും പഴുതുകൾ അടച്ചുള്ള വിശദമായ പരിശോധന നടത്തി. രണ്ട് മണിക്കൂറോളം പരിശോധന നടത്തിയിട്ടും അസ്വാഭാവികമായി ഒന്നും കണ്ടെത്താനായില്ല. ഇന്നലെ രാവിലെ 7.30ഓടെയാണ് മെയില്‍ എത്തിയത്. കളക്്‌ടറുടെ ഓഫീസില്‍ ഉദ്യോഗസ്ഥരെത്തിയ ശേഷം രാവിലെ 10.30ഓടെയാണ് സന്ദേശം കാണുന്നത്. ഉടന്‍ തന്നെ കളക്‌ടറെ വിവരമറിയിക്കുകയും കളക്‌ടര്‍ സിറ്റി പോലീസ് കമ്മീഷണര്‍ക്ക് വിവരം കൈമാറുകയുമായിരുന്നു. തമിഴ്‌നാട്ടില്‍ നര്‍ക്കോട്ടിക് കേസില്‍ അറസ്റ്റിലായവരെ വിട്ടയക്കണമെന്നാവശ്യപ്പെട്ടായിരുന്നു ബോംബ് ഭീഷണി. അകാരണമായി പിടിച്ചുവച്ചിരിക്കുന്ന ഇവരെ ഉച്ചകഴിഞ്ഞ് രണ്ടിന് മുമ്പ് മോചിപ്പിച്ചില്ലെങ്കില്‍ കൃത്യം രണ്ടിന് തന്നെ ബോംബ് പൊട്ടുമെന്നും സന്ദേശത്തിലുണ്ട്. കഴിഞ്ഞ മാസം 18നും സമാനരീതിയില്‍ ബോംബ് ഭീഷണി സന്ദേശമെത്തിയിരുന്നു. അന്ന് ഇ- മെയില്‍ സന്ദേശം വളരെ വൈകിയാണ് ശ്രദ്ധയിൽപ്പെട്ടത്. അന്നും മണിക്കൂറുകള്‍ നീണ്ട പരിശോധന നടത്തിയെങ്കിലും ഒന്നും കണ്ടെത്താന്‍ കഴിഞ്ഞില്ല. ഇപ്പോഴത്തെ ഭീഷണിയെ തുടര്‍ന്നും മണിക്കൂറുകള്‍ നീണ്ട കർശന പരിശോധനയാണ് നടത്തിയത്. കളക്്‌ടറേറ്റിന് ഉള്ളിലേക്ക് ആളുകളെ കടത്തി വിട്ടത് പോലീസ് പരിശോധനയ്ക്ക് ശേഷമായിരുന്നു. ജമ്മു കാശ്മീരിലെ തീവ്രവാദി ആക്രമണത്തിന്‍റെപശ്ചാത്തലത്തിലും കളക്‌ടറേറ്റില്‍ നേരത്തെ ബോംബ് സ്‌ഫോടനം നടന്നതിനാലും ബോംബ് ഭീഷണികളെ ഗൗരവമായാണ് അധികൃതർ കാണുന്നത്. ഭീഷണി സന്ദേശമെത്തിയ മെയില്‍ ഐഡിയുടെ ഉറവിടം കണ്ടെത്താനുള്ള ശ്രമത്തിലാണ് പോലീസ്. ആശങ്ക ഒഴിവായെന്ന് കളക്‌ടര്‍ കൊല്ലം : കളക്‌ടറേറ്റില്‍ ഉച്ചയോടെ ബോംബ് പൊട്ടുമെന്ന് വന്ന ഇ-മെയില്‍ സന്ദേശ പശ്ചാത്തലത്തില്‍ നടത്തിയ പരിശോധനയില്‍ ആശങ്ക ഒഴിവായെന്ന് ജില്ലാകളക്‌ടര്‍ എന്‍. ദേവിദാസ്. രാവിലെയാണ് കളക്‌ടറേറ്റിലേക്ക് സന്ദേശമെത്തിയത്. തുടര്‍ന്ന് പരിശോധന നടത്തി സുരക്ഷ ഉറപ്പാക്കാന്‍ സിറ്റി പോലീസ് കമ്മീഷണര്‍ക്ക് നിര്‍ദേശം നല്‍കി. പോലീസിന്‍റെ ഡോഗ് - ബോംബ് സ്‌ക്വാഡുകള്‍, തീവ്രവാദവിരുദ്ധ സുരക്ഷാസേന എന്നിവ കളക്‌ട്രേറ്റും പരിസരവും വിശദമായി പരിശോധിച്ചു. സംശയകരമാംവിധം ഒന്നും കണ്ടെത്താനായില്ല. ഭീഷണി കണക്കിലെടുത്തു ഗൗരവകരമായ അന്വേഷണമാണ് നടത്തുന്നത്. സന്ദേശത്തിന്‍റെ ഉറവിടം കണ്ടെത്താനുള്ള ശ്രമം തുടരുന്നു. നിലവില്‍ സുരക്ഷിതമായ സാഹചര്യമാണുള്ളത്. കര്‍ശനനിരീക്ഷണം തുടരുമെന്ന് ജില്ലാകളക്‌ടര്‍ അറിയിച്ചു.

നിധി ആപ്‌കെ നികത് അദാലത്ത് 28ന്

കൊല്ലം: എംപ്ലോയീസ് പ്രോവിഡന്‍റ് ഫണ്ട് ഓർഗനൈസേഷൻ കൊല്ലം മേഖലാ കാര്യാലയ ആഭിമുഖ്യത്തിൽ നിധി ആപ്‌കെ നികത് അദാലത്ത് 28 രാവിലെ ഒമ്പത് മുതൽ ഉച്ചയ്ക്ക് ഒന്ന് വരെ കൊല്ലം സാവിത്രി ഹാൾ, പബ്ലിക് ലൈബ്രറിയിലെ നടത്തും. പരാതി പരിഹരിക്കൽ, പി എഫിൽ പുതുതായി രജിസ്റ്റർ ചെയ്ത സ്ഥാപനങ്ങൾക്കുള്ള നിർദേശങ്ങൾ, ഇ പി എഫ് ഒ യുടെ പുതിയ പദ്ധതികൾ എന്നിവ വിശദീകരിക്കും.

പ്രവർത്തക യോഗം വിലയിരുത്തി

കൊല്ലം :സാഹിത്യവും സാംസ്കാരിക പ്രവർത്തനവും സവർണ വിഭാഗത്തിന്‍റെതാണെന്ന ചിന്താഗതിക്ക് മാറ്റമുണ്ടാകാത്തോളം രാജ്യപുരോഗതി കൈവരിക്കാൻ കഴിയില്ലെന്ന് ഡോ. ബി ആർ .അംബേദ്കർ സ്റ്റഡി സെന്‍റർ പ്രവർത്തക യോഗം വിലയിരുത്തി. രാഷ്ട്രീയ നേതാക്കന്മാർ സാംസ്കാരിക പ്രവർത്തകർ സാഹിത്യകാരന്മാർ പലരുടെയും വിചാരം രാജ്യത്തിന്‍റെ സാഹിത്യസൃഷ്ടിയും സാംസ്കാരിക സൃഷ്ടിയും സവർണ വിഭാഗങ്ങളിൽ നിന്നുണ്ടായതാണെന്നുള്ള ചിന്ത യാഥാർഥ്യം മനസിലാക്കാതെയാണ്.ഇതിഹാസ ഗ്രന്ഥങ്ങളായ രാമായണവും മഹാഭാരതവും രചിച്ചത് വാല്മീകിയും വേദവ്യാസനും ആണ്. അവർ ഏത് വിഭാഗത്തിൽ പെട്ടവരാണ് എന്ന് ചിന്തിക്കണം. രാജ്യത്തെ സാംസ്കാരിക പൈതൃകങ്ങൾ ദ്രാവിഡ കാലഘട്ടത്തിലുള്ളതാണ്. ലോകം കണ്ട ഏറ്റവും ഉന്നത ശ്രേഷ്ഠൻ ഡോ. ബി .ആർ .അംബേദ്കറാണ് ഇന്ത്യൻ ഭരണഘടന രൂപകൽപ്പന ചെയ്തിട്ടുള്ളത്. ദലിത് സാഹിത്യത്തെയും ദലിത് സാമൂഹിക സാംസ്കാരിക പ്രവർത്തകരേയും മാറ്റി നിർത്താനുള്ള ശ്രമങ്ങളെ ശക്തമായി പ്രതിരോധിക്കാൻ പൊതു സമൂഹം തയാറാകണമെന്ന് യോഗം ആവശ്യപ്പെട്ടു.ഡോ.ബി.ആർ അംബേദ്കർ സ്റ്റഡി സെന്‍റർ പ്രസിഡന്‍റ്ബോബൻ ജി നാഥ് അധ്യക്ഷത വഹിച്ചു.

കെഎസ്ആർടിസി കൺട്രോളിംഗ് ഇൻസ്പെക്ടർക്കെതിരേ കേസെടുത്തു

കൊല്ലം: കേന്ദ്ര മന്ത്രി സുരേഷ് ഗോപിക്കെതിരെ സാമൂഹ്യ മാധ്യമങ്ങളിൽ മോർഫ് ചെയ്ത ചിത്രങ്ങൾ പ്രചരിപ്പിച്ച സംഭവത്തിൽ കേസെടുത്തു. ഈസ്റ്റർ ദിനത്തിൽ സാമുദായിക ഭിന്നത സൃഷ്ടിക്കുവാൻ കൊല്ലം ഡിപ്പോയിലെ കെഎസ്ആർടിസി ജനറൽ കൺട്രോളിംഗ് ഇൻസ്പെക്ടർ അനിൽ വി ആർ ഫ്രണ്ട്സ് എന്ന വാട്സ്ആപ്പ് ഗ്രൂപ്പിൽ പ്രചരിപ്പിച്ച ചിത്രങ്ങൾ ഉൾപ്പെടെ ചൂണ്ടിക്കാണിച്ചുകൊണ്ട് ലോക്സഭാ സ്പീക്കർക്കും കേന്ദ്ര ആഭ്യന്തരവകുപ്പിനും ഉൾപ്പെടെ പരാതി കൊടുത്തതിന്‍റെ അടിസ്ഥാനത്തിലാണ് കൊല്ലം ഈസ്റ്റ് പോലീസ് കേസെടുത്തിരിക്കുന്നത്. യുവമോർച്ച കൊല്ലം ജില്ലാ പ്രസിഡന്‍റ്പ്രണവ് താമരക്കുളം നൽകിയ പരാതിയിന് മേൽ ആയിരുന്നു പോലീസ് കേസ് എടുത്തത്.

കമ്പനിപടിയ്ക്കൽ വിശദീകരണ യോഗം നടത്തി

ചവറ : കെ എം എം എൽ കമ്പനിയിലെ ഡിസിഡബ്ല്യൂ തൊഴിലാളികളുടെ തൊഴിൽ സംരക്ഷണത്തിനും അവകാശങ്ങൾ നേടിയെടുക്കാനും അണിനിരക്കണമെന്നു ആവശ്യപ്പെട്ടു കമ്പനി പടിയ്ക്കൽ വിശദീകരണ യോഗം നടന്നു. ടൈറ്റാനിയം ജനറൽ വർക്കേഴ്സ് യൂണിയൻ സിഐടിയു ആഭിമുഖ്യത്തിൽ നടന്ന വിശദീകരണയോഗം ജില്ലാ സെക്രട്ടറി എസ്. ജയമോഹൻ ഉദ്ഘാടനം ചെയ്തു. യോഗത്തിൽ സിപിഎം ഏരിയ കമ്മിറ്റി അംഗം എം. വി. പ്രസാദ് അധ്യക്ഷനായി. ജില്ലാ കമ്മിറ്റി അംഗം ആർ. രവീന്ദ്രൻ, സിഐടിയു സംസ്ഥാന കമ്മിറ്റി അംഗം ടി. മനോഹരൻ, ഏരിയ പ്രസിഡന്‍റ് ആർ. സുരേന്ദ്രൻ പിള്ള, ജില്ലാ കമ്മിറ്റി അംഗം വി. സി. രതീഷ് കുമാർ, ഏരിയ കമ്മിറ്റി അംഗം ജെ. അനിൽ, കെ. വി. ദിലീപ്കുമാർ, എൻ. ആർ. ബിജു, എസ്. സന്തോഷ് എന്നിവർ പ്രസംഗിച്ചു.

ഇ.വി.കൃഷ്ണപിള്ളയുടെ ഓർമയ്ക്കായി ശാസ്താംകോട്ടയിൽ ഗ്രന്ഥശാല

കൊല്ലം: ഇ.വി.കൃഷ്ണപിള്ളയുടെ ഓർമയ്ക്കായി ശാസ്താംകോട്ട ബ്ലോക്ക് പഞ്ചായത്ത് ഒരുക്കിയ ഗ്രന്ഥശാല മന്ത്രി പി.പ്രസാദ് ഉദ്ഘാടനം ചെയ്തു. ശാസ്താംകോട്ട ബ്ലോക്ക് പഞ്ചായത്ത് വാർഷിക പദ്ധതിയിൽ ഉൾപ്പെടുത്തിയാണ് ഗ്രന്ഥശാല ബ്ലോക്ക് സമുച്ചയത്തിൽ സജീകരിച്ചത്. കുന്നത്തൂർ പഞ്ചായത്തിൽ ജനിച്ച പ്രശസ്ത ഹാസ്യ സാഹിത്യകാരനായ ഇ.വി കൃഷ്ണപിള്ളയുടെ നാമധേയത്തിലാണ് ഗ്രന്ഥശാല ഒരുക്കിയത്.ബ്ലോക്ക് പഞ്ചായത്തിന്‍റെനേതൃത്വത്തിൽ സംഘടിപ്പിച്ച പുസ്തക സമാഹരണ യജ്ഞത്തിലൂടെയും വാർഷിക പദ്ധതിയിൽ ഉൾപ്പെടുത്തി പുസ്തകങ്ങൾ വാങ്ങിയും ഗ്രന്ഥശാലക്കായി സമാഹരിച്ചിട്ടുണ്ട്. സർക്കാർ സർവീസ് ഗ്രന്ഥങ്ങൾ, മത്സര പരീക്ഷാ സഹായികൾ, റഫറൻസ് ഗ്രന്ഥങ്ങൾ, വിവിധ പത്ര മാസികകൾ ഉൾപ്പടെ 1500ലധികം ശേഖരണങ്ങളുണ്ട്. കോവൂർ കുഞ്ഞുമോൻ എംഎൽഎ അധ്യക്ഷനായി. ബ്ലോക്ക് പഞ്ചായത്ത് വൈസ് പ്രസിഡന്‍റ് പി. പുഷ്പകുമാരി, താലൂക്ക് ലൈബ്രറി കൗൺസിൽ സെക്രട്ടറി എസ്.ശശികുമാർ, ബ്ലോക്ക് പഞ്ചായത്ത് സെക്രട്ടറി കെ. ചന്ദ്രബാബു, സ്റ്റാൻഡിങ് കമ്മിറ്റി ചെയർമാൻമാരായ കെ.സനിൽകുമാർ, എസ്.ഷീജ, വി.രതീഷ്, ഗ്രാമപഞ്ചായത്ത് പ്രസിഡന്‍റുമാർ, വിവിധ ഗ്രന്ഥശാല പ്രതിനിധികൾ, ബ്ലോക്ക് പഞ്ചായത്ത് അംഗങ്ങൾ എന്നിവർ പങ്കെടുത്തു.

ക്ഷേത്ര വിഗ്രഹത്തില്‍ നിന്നും സ്വര്‍ണതാലി മോഷ്ടിച്ച പൂജാരി പിടിയില്‍

കൊല്ലം :ക്ഷേത്ര വിഗ്രഹത്തില്‍ നിന്നും സ്വര്‍ണതാലി മോഷ്ടിച്ചെടുത്ത പൂജാരി പോലീസ് പിടിയിലായി. ഉമയനല്ലൂര്‍, സുധാമണിയാലയം വീട്ടില്‍ സുദര്‍ശനന്‍ മകന്‍ ഉണ്ണി എന്ന ശ്രീഹരി (23) ആണ് ഇരവിപുരം പോലീസിന്‍റെ പിടിയിലായത്. കഴിഞ്ഞ ഒന്പതിന് പാട്ടിയഴികം ശ്രീഭദ്ര ഭഗവതി ക്ഷേത്രത്തിലെ സ്ഥിരം പൂജാരി അവധിയില്‍ ആയതിനാല്‍ പകരക്കാരനായി എത്തിയ ഇയാള്‍, പൂജ കഴിഞ്ഞ് വിഗ്രഹത്തില്‍ ചാര്‍ത്തിയിരുന്ന രണ്ട് ഗ്രാമോളം വരുന്ന സ്വര്‍ണതാലി മോഷ്ടിച്ച് കടന്ന് കളയുകയായിരുന്നു. മോഷണം ശ്രദ്ധയില്‍പ്പെട്ട ക്ഷേത്ര ഭാരവാഹികള്‍ പോലീസില്‍ നല്‍കിയ പരാതിയുടെ അടിസ്ഥാനത്തില്‍ കേസ് രജിസ്റ്റര്‍ ചെയ്ത് നടത്തിയ അന്വേഷണത്തില്‍ പ്രതിയെ കണ്ടെത്തി പിടികൂടുകയായിരുന്നു. ഇരവിപുരം ഇന്‍സ്പെക്ടര്‍ രാജീവിന്‍റെ നേതൃത്വത്തില്‍ എസ്ഐ മാരായ ജയേഷ്, സിദ്ദീഖ്, സിപിഒ മാരായ രജിത്, രാജീവ് എന്നിവരടങ്ങിയ സംഘമാണ് പ്രതിയെ അറസ്റ്റ് ചെയ്തത്.

യുവതിയുടെ ആത്മഹത്യ : ഭര്‍ത്താവ് ഒരുവര്‍ഷത്തിനുശേഷം പിടിയില്‍

അഞ്ചല്‍ : ഏരൂര്‍ പഞ്ചായത്തിലെ രണ്ടേക്കര്‍മുക്ക് സ്വദേശിനി അശ്വതിയുടെ ആത്മഹത്യയുമായി ബന്ധപ്പെട്ട് ഭര്‍ത്താവ് അറസ്റ്റില്‍. ഏരൂര്‍ മയിലാടുംകുന്ന് ബംഗ്ലാംമുകളില്‍ സനു സോമന്‍ (36) ആണ് അറസ്റ്റിലായത്. 2024 ഫെബ്രുവരി 16 നാണ് വീട്ടിലെ കിടപ്പുമുറിയില്‍ അശ്വതിയെ തൂങ്ങിമരിച്ച നിലയില്‍ കണ്ടെത്തിയത്. അസ്വാഭാവിക മരണത്തിന് ഏരൂര്‍ പോലീസ് കേസെടുക്കുകയും ചെയ്തിരുന്നു. എന്നാല്‍ മകളുടെ പെട്ടെള്ള മരണത്തില്‍ മാതാപിതാക്കള്‍ ഉള്‍പ്പടെയുള്ള ബന്ധുക്കള്‍ക്ക് ചില സംശയങ്ങള്‍ ഉണ്ടായിരുന്നു. മകളുടെ ആത്മഹത്യക്ക് കാരണം ഭര്‍ത്താവ് ആണെന്ന സംശയമുണ്ടായിരുന്നുവെങ്കിലും തെളിവുകള്‍ ഒന്നും ലഭിക്കാതിരുന്നതിനാല്‍ ഈവിവരം പോലീസില്‍ അറിയിച്ചിരുന്നില്ല. മകളുടെ മരണത്തില്‍ ദുരൂഹതയുണ്ടെന്ന സംശയം പോലീസിനെ അറിയിച്ചിരുന്നുവെങ്കിലും മൊബൈല്‍ ഫോണ്‍ ഉള്‍പ്പടെയുള്ളവ പരിശോധിക്കാനോ സനുവിനെ ചോദ്യചെയ്യാനോ തെളിവുകള്‍ ശേഖരിക്കാനോ ഏരൂര്‍ പോലീസ് അന്ന് കൂട്ടാക്കിയില്ല. ഇതോടെ മകളുടെ മരണത്തില്‍ പോലീസ് അന്വേഷണം തൃപ്തികരമല്ലെന്നു ചൂണ്ടിക്കാട്ടി മാതാപിതാക്കള്‍ മുഖ്യമന്ത്രിക്കും ഉന്നത പോലീസ് ഉദ്യോഗസ്ഥര്‍ക്കും പരാതി നല്‍കി. തുടര്‍ന്നു അന്വേഷണം പുനലൂര്‍ ഡിവൈഎസ്പി ഏറ്റെടുക്കുകയായിരുന്നു. ഇതിനിടയില്‍ അശ്വതിയുടെ മകള്‍ കളിക്കുന്നതിനിടെ അശ്വതിയുടെ മൊബൈല്‍ ഫോണിന്‍റെ ലോക്ക് മാറ്റിയതോടെയാണ് മകളുടെ ആത്മഹത്യക്കുപിന്നില്‍ മരുമകന്‍ സനു സോമന്‍ ആണെന്ന തരത്തില്‍ ചില ശബ്ദ സന്ദേശങ്ങള്‍ മാതാപിതാക്കള്‍ക്ക് ലഭിക്കുന്നത്. ഈതെളിവുകള്‍ സഹിതം അശ്വതിയുടെ മാതാപിതാക്കള്‍ വീണ്ടും പോലീസിനെ സമീപിച്ചു. ഇതോടെ കുടുങ്ങുമെന്ന് ഉറപ്പായ സനുസോമന്‍ വിദേശത്തേക്ക് പോയി. എന്നാല്‍ അടുത്തിടെ നാട്ടിലെത്തിയ സനുവിനെ പുനലൂര്‍ ഡിവൈഎസ്പിയുടെ നേതൃത്വത്തിലുള്ള പ്രത്യേക സംഘം കഴിഞ്ഞ ദിവസം പിടികൂടുകയായിരുന്നു. ആത്മഹത്യ പ്രേരണ, സ്ത്രീധന പീഡന നിരോധന നിയമം ഉള്‍പ്പടെയുള്ള വകുപ്പുകള്‍ ചുമത്തിയാണ് ഇയാളുടെ അറസ്റ്റ് പോലീസ് രേഖപ്പെടുത്തിയത്. മരിക്കുന്നതിന് തൊട്ടുമുമ്പും അശ്വതി കടുത്ത മാനസിക പീഡനത്തിനിരയായി എന്നാണ് പോലീസ് കണ്ടെത്തല്‍. വൈദ്യ പരിശോധനയ്ക്ക് ശേഷം പ്രതിയെ കോടതിയില്‍ ഹാജരാക്കി

Deepika.com

The Largest Read Malayalam Internet Daily

Quick Links

Rashtra Deepika LTD

Deepika.com

The Largest Read Malayalam Internet Daily

Local News

Quick Links

Rashtra Deepika LTD