ഓണത്തിനു സമ്മാനവുമായി വിഴിഞ്ഞം ഫയർ ഫോഴ്സും

വിഴിഞ്ഞം: അശരണർക്ക് ഓണസമ്മാനവുമായി വിഴിഞ്ഞം ഫയർ ഫോഴ്സും. മുട്ടയ്ക്കാട് കൃപാ തീരത്തിലെ അന്തേവാസികൾക്കാണ് ഓണമുണ്ണാനുള്ള അരി ഉൾപ്പെടെയുള്ള വസ്തുക്കളുമായി ഉദ്യോഗസ്ഥർ എത്തിയത്. സ്റ്റേഷനിൽ ഓണാഘോഷം നടത്തുന്നതിന് മുൻപ് പാവങ്ങളെ സഹായിക്കണം എന്ന പതിവ് ഇക്കുറിയും അധികൃതർ തെറ്റിച്ചില്ല.

സ്റ്റേഷൻ ഓഫീസർ പ്രമോദ്, അസിസ്റ്റന്‍റ് സ്റ്റേഷൻ ഓഫീസർ ഷാജി, സീനിയർ ഫയർമാൻമാരായ രാജേഷ്, സന്തോഷ് എന്നിവർ അഭയ കേന്ദ്രത്തിൽ എത്തി ശേഖരിച്ച വസ്തുക്കൾ കൈമാറി.

ADVERTISEMENT

കരകുളത്തെ അതിദാരിദ്ര്യ മുക്ത പഞ്ചായത്തായി പ്രഖ്യാപിച്ചു

നെടുമങ്ങാട്: നെടുമങ്ങാട് നിയോജക മണ്ഡലത്തിലെ ആദ്യ അതിദാരിദ്ര്യ മുക്ത പഞ്ചായത്തായി കരകുളം പഞ്ചായത്തിനെ തെരഞ്ഞെടുത്തു. മന്ത്രി ജി.ആര്‍. അനില്‍ പ്രഖ്യാപനം നടത്തി. സര്‍വേയിലൂടെ കണ്ടെത്തിയ അതിദാരിദ്രര്‍ക്ക് അടിസ്ഥാന രേഖകള്‍ ഉള്‍പ്പെടെ പാര്‍പ്പിടം, ഭക്ഷണം, മരുന്ന് എന്നിവയെല്ലാം നല്‍കിക്കൊണ്ടാണ് പദ്ധതി നടപ്പിലാക്കിയത്. പ്രഖ്യാപന ചടങ്ങില്‍ പഞ്ചായത്ത് പ്രസിഡന്‍റ് യു.ലേഖാറാണി അധ്യക്ഷത വഹിച്ചു. പഞ്ചായത്ത് വൈസ് പ്രസിഡന്‍റ് പി.സുനില്‍, വി. രാജീവ്, ഉഷാകുമാരി, വീണാരാജീവ് തുടങ്ങിയവര്‍ സംസാരിച്ചു.

ഓണാഘോഷവും സംയുക്ത സമ്മേളനവും

നെടുമങ്ങാട്: അരുവിക്കര വൈഎംസിയുടെ നേതൃത്വത്തിൽ സംഘടിപ്പിച്ച ഓണാഘോഷവും സംയുക്ത സമ്മേളനവും അഡ്വ. ജി. സ്റ്റീഫൻ എംഎൽഎ ഉദ്ഘാടനം ചെയ്തു. ജമന്തിപ്പൂക്കളുടെ വിളവെടുപ്പും 150 നിർധന കുടുംബങ്ങൾക്ക് ഓണക്കിറ്റു നൽകുന്നതിന്‍റെ വിതരണവും ഇതോടനുബന്ധിച്ചു നടന്നു. തിരുവനന്തപുരം വൈഎംസിഎ പ്രസിഡന്‍റ് അഡ്വ. ഇടിക്കുള സക്കറിയ അധ്യക്ഷത വഹിച്ചു. മുഖ്യാതിഥിയായി തിരുവനന്തപുരം റൂറൽ അഡിഷണൽ സൂപ്രണ്ട് ഓഫ് പോലീസ് ജെ.കെ. ദിനിൽ ഓണ സന്ദേശം നൽകി. അരുവിക്കര പഞ്ചായത്ത് പ്രസിഡന്‍റ് ആർ. കല കർഷകരെ ആദരിച്ചു.അത്തപ്പൂക്കളമത്സര വിജയികൾക്ക് അരുവിക്കര സർക്കിൾ ഇൻസ്പെക്ടർ മുരളി കൃഷ്ണ കാഷ് അവാർഡ് വിതരണം ചെയ്തു. നെടുമങ്ങാട് ബ്ലോക്ക് മെമ്പർ വിജയൻ നായർ, റവ. ജി സ്റ്റുവർട്ട്, സത്യാനന്ദൻ, ജെ. ശോഭന ദാസ്, ബിറ്റി വർഗീസ്, എസ്.വി. മോഹൻ, എ. ക്രിസ്തുധരൻ എന്നിവർ പങ്കെടുത്തു വൈഎംസിഎ ഡയറക്ടർ ബോർഡ് മെമ്പർ ഡോ. ആർതർ ജേക്കബ് സ്വാഗതവും ഡോ. തോമസ് ഫിലിപ്പ് നന്ദിയും പറഞ്ഞു.

പാച്ചല്ലൂർ ജലഘോഷയാത്രയും ഓണം വാരാഘോഷവും: അവലോകന യോഗം ചേർന്നു

തിരുവല്ലം: പാച്ചല്ലൂർ പൊഴിക്കരയിൽ അഞ്ചുമുതൽ ഏഴുുവരെയുള്ള തിയതികളിൽ സംഘടിപ്പിക്കുന്ന ഓണം വാരാഘോഷത്തിന്‍റെ ഭാഗമായി അവലോകന യോഗം ചേർന്നു. ടൂറിസം വകുപ്പും ജില്ലാ ടൂറിസം പ്രമോഷൻ കൗൺസിലും വെള്ളാർ വാർഡ് ജനകീയ സമിതിയും സംയുക്തമായാണ് പരിപാടികൾ സംഘടിപ്പിക്കുന്നത്. സംഘാടകസമിതി ചെയർമാനും നഗരസഭ കൗൺസിലറുമായ പനത്തുറ പി. ബൈജു അധ്യക്ഷത വഹിച്ചു. പോലീസ്, കോസ്റ്റ്ഗാഡ്, ഫയർഫോഴ്സ്, ജലഗതാഗത വകുപ്പ്, ആരോഗ്യ വകപ്പ്, നഗരസഭ അധികൃതർ തുടങ്ങിയവർ യോഗത്തിൽ പങ്കെടുത്തു. കൗൺസിലർ എസ്.എം. ബഷീർ, എ.ജെ. സുകാർണോ, തിരുവല്ലം എസ്ഐ നൗഷാദ്, കോസ്റ്റ് ഗാർഡ് എസ്ഐ സുരേഷ്, ഇറിഗേഷൻ വകുപ്പ് എഇ ഉണ്ണികൃഷ്ണൻ, ആരോഗ്യ വകുപ്പ് എച്ച്ഐ രാജ്കുമാർ, നഗരസഭ എച്ച്ഐ അനുരൂപ് എന്നിവർ പ്രസംഗിച്ചു. വിവിധ സബ് കമ്മിറ്റികളും രൂപീകരിച്ചു. ആറിനു വൈകുന്നേരം നാലിനു മന്ത്രി വി. ശിവൻകുട്ടി ഉദ്ഘാടനം ചെയ്യുന്ന ജലഘോഷയാത്രയിൽ ജനപ്രതിനിധികളും വിവിധ സാമൂഹിക-സാമുദായിക -സാംസ്കാരിക രംഗത്തെ പ്രമുഖരും പങ്കെടുക്കും. അഞ്ചുനു വൈകുന്നേരം അഞ്ചിനു തിരുവനന്തപുരം നളന്ദ അവതരിപ്പിക്കുന്ന നാടൻപാട്ടും, ആറിനു വൈകുന്നേരം നാലിനു ചെണ്ടമേളവും തുടർന്ന് തിരുവനന്തപുരം വേഴ്സ് അവതരിപ്പിക്കുന്ന ഗാനമേളയും അഞ്ചിനു മജലഘോഷയാത്രയും ഉണ്ടായിരിക്കും. ‌ ഏഴിന് വൈകുന്നേരം അഞ്ചുമുതൽ പൊഴിക്കരയിലുള്ള നിശാ വേദിയിൽ തിരുവാതിര, കൈകൊട്ടിക്കളി, സിനിമാറ്റിക് ഡാൻസ് എന്നിവ സംഘടിപ്പിച്ചിട്ടുണ്ടെന്നും സംഘാടകസമിതി ഭാരവാഹികൾ അറിയിച്ചു. കോ-ഓഡിനേറ്റർ ഡി. ജയകുമാർ പരിപാടി വിശദീകരിച്ചു. ജനറൽകൺവീനർ എസ്. ഉദയരാജ് സ്വാഗതവും പ്രോഗ്രാം കമ്മിറ്റി കൺവീനർ എസ്. പ്രശാന്തൻ നന്ദിയും പറഞ്ഞു.

ഓട്ടോയില്‍ കടത്താന്‍ ശ്രമിച്ച നാലു കിലോ കഞ്ചാവുമായി യുവതി പിടിയില്‍

വലിയതുറ: ഓണത്തിനു മുന്നോടിയായി വില്‍പ്പനയ്ക്കായി ഓട്ടോയില്‍ കടത്താന്‍ ശ്രമിച്ച നാലു കിലോ കഞ്ചാവുമായി യുവതിയെ തിരുവനന്തപുരം ഡാന്‍സാഫ് സംഘം പിടികൂടി. വലിയവേളി സ്വദേശിനി ബിന്ദു (30) ആണ് സംഘത്തിന്‍റെ പിടിയിലായത്. കഴിഞ്ഞ ദിവസം വേളി ടൂറിസ്റ്റ് വില്ലേജ് വഴി ഓട്ടോയില്‍ കഞ്ചാവ് കടത്താന്‍ ശ്രമിക്കവേയാണ് ഇവര്‍ പിടിയിലായത്. വെട്ടുകാട് ബാലനഗറില്‍ നിന്നും വലിയ വേളിയിലേയ്ക്ക് പോകാനെന്നു പറഞ്ഞാണ് ഇവര്‍ ഓട്ടോയില്‍ കയറിയതെന്ന് ഓട്ടോ ഡ്രൈവര്‍ പോലീസ് അധികൃതർക്കു മൊഴി നൽകിയിട്ടു ണ്ട്. തിരുവനന്തപുരം സിറ്റി ഡാന്‍സാഫ് സംഘത്തിനു ലഭിച്ച രഹസ്യ വിവരത്തിന്‍റെ അടിസ്ഥാനത്തിലാണ് വാഹന പരിശോധന നടത്തിയതും കഞ്ചാവ് പിടികൂടിയതും. ബിന്ദുവിന്‍റെ ഭര്‍ത്താവ് കാര്‍ലോസ് മുമ്പ് കഞ്ചാവു കേസുകളില്‍ പ്രതിയാണ്. കഞ്ചാവ് ലഭിച്ചതിന്‍റെ ഉറവിടത്തെക്കുറിച്ച് വിശദമായി ചോദ്യം ചെയ്ത ശേഷം ബിന്ദുവിനെ കോടതിയില്‍ ഹാജരാക്കുമെന്നു ബന്ധപ്പെട്ട അധികൃതര്‍ വ്യക്തമാക്കി. ഓണത്തിനു മുന്നോടിയായി കടലോര മേഖലകളില്‍ കഞ്ചാവും മദ്യവും ലഹരിമരുന്നു കടത്തും വില്‍പ്പനയും ഗണ്യമായി നടക്കുന്നതായി പ്രദേശവാസികള്‍ പറയുന്നു. വെട്ടുകാട്, വലിയതുറ, ശംഖുംമുഖം, കൊ ച്ചുവേളി, വലിയവേളി തുടങ്ങിയ സ്ഥലങ്ങളില്‍ പോലീസ് പടോളിംഗ് ശക്തമാക്കണമെന്നാണ് സമീപവാസികള്‍ ആവശ്യപ്പെടുന്നത്. ശംഖുംമുഖം ബീച്ചിലും പരിസരങ്ങളിലും ലഹരി മരുന്നു മാഫിയാകള്‍ തമ്പടിച്ചിരിക്കുന്നതായും സൂചനകള്‍ ലഭിക്കുന്നുണ്ട്.

രാഹുൽഗാന്ധിക്ക് ഐക്യദാർഢ്യം പ്രഖ്യാപിച്ച് കോൺഗ്രസ് പ്രകടനം നടത്തി

വെള്ളറട: രാഹുൽ ഗാന്ധി നയിക്കുന്ന വോട്ടര്‍ അധികാര്‍ യാത്രക്ക് ഐക്യദാർഢ്യം പ്രഖ്യാപിച്ച് കോൺഗ്രസ് മാരായമുട്ടം മണ്ഡലം കമ്മിറ്റിയുടെ മാരായമുട്ടം ഹൈസ്‌കൂള്‍ ജംഗ്ഷനില്‍നിന്നും ആരംഭിച്ച് മാരായമുട്ടം ജംഗ്ഷന്‍ വരെ പ്രകടനം നടത്തി. മണ്ഡലം പ്രസിഡന്‍റ് ബിനില്‍ മണലുവിളയുടെ നേതൃത്വത്തില്‍ നടത്തിയ പ്രകടനം മാരായമുട്ടത്ത് കര്‍ഷക കോണ്‍ഗ്രസ് സംസ്ഥാന വൈസ് പ്രസിഡന്‍റ് എം.എസ്. അനില്‍ ഉദ്ഘാടനം ചെയ്തു. ബ്ലോക്ക് നേതാക്കളായായ അഡ്വ. ഷിബു ശ്രീധര്‍, മണ്ണൂര്‍ ശ്രീകുമാര്‍, വടകര ജയന്‍, അരുവിക്കര മണികണ്ഠന്‍, തത്തിയൂര്‍ സുരേന്ദ്രന്‍, മലക്കുളങ്ങര ജോണി, ശ്രീരാഗം ശ്രീകുമാര്‍, അനന്തന്‍ മാരായമുട്ടം, കാക്കണം ജീബു, ഇടഞ്ഞി സുരേഷ് തൃപ്പവൂര്‍ അഖില്‍, കോട്ടയ്ക്കല്‍ മധു, കാക്കണം ബാബു, റെജി കരിക്കത്തുക്കുളം, കോട്ടയ്ക്കല്‍ സന്തോഷ്, ചുള്ളിയൂര്‍ അനീഷ്, വടകര രാജീവ്, തുളസി ധരന്‍ ആശാരി, വടകര രാജേഷ്, ചുള്ളിയൂര്‍ അഭിജിത്ത്, തോപ്പില്‍ അജീഷ്, കാക്കണം രതീഷ്, സുരേഷ്, ജെസ്റ്റിന്‍ എന്നിവര്‍ സംസാരിച്ചു.

ആക്‌സില്‍ പൊട്ടിയ കാര്‍ സ്കൂട്ടറും ഓട്ടോറിക്ഷയും ഇടിച്ചുതെറിപ്പിച്ചു

വെള്ളറട: ആക്‌സില്‍ പൊട്ടിയതിനെത്തുടർന്നു നിയന്ത്രണം നഷ്ടപ്പെട്ട കാർ രണ്ടു വാഹനങ്ങളെ തകര്‍ത്തു. ചെറിയ കൊല്ലയ്ക്കും ഉണ്ടന്‍കോടിനും സമീപത്തുവച്ചു നിയന്ത്രണം നഷ്ടപ്പെട്ട കാറാണ് ഓട്ടോറിക്ഷയും സ്കൂട്ടറും ഇ‌ടിച്ചു തെറിപ്പിച്ചശേഷം നിന്നത്. ചെറിയ കൊല്ലയില്‍നിന്നും കാരക്കോണത്തേക്കു പോവുകയായിരുന്ന കെഎല്‍. 19 എഫ് 6336 നമ്പര്‍ കാറാണ് അപകടം സൃഷ്ടിച്ചത്. ആദ്യം കാരകോണത്തുനിന്നു വെള്ളറടയിലേക്ക് വരികയായിരുന്ന പൂജപ്പുര സ്വദേശി രാജേഷ് ഓടിച്ചിരുന്ന ഓട്ടോയെ ഇടിച്ചു മറിച്ചശേഷം റോഡിന്‍റെ വലതുവശത്തുകൂടി ഒതുങ്ങി പോവുകയായിരുന്ന സ്‌കൂട്ടര്‍ യാത്രികന്‍ സുരേഷിനെയും ഇടിച്ചു വീഴ്ത്തി. ഗുരുതരമായി പരിക്കേറ്റ സുരേഷിനെ ഉടന്‍തന്നെ കാരക്കോണം മെഡിക്കല്‍ കോളജ് ആശുപത്രിയിൽ പ്രവേശിപ്പിച്ചു. കാര്‍ വേഗത കുറവായിരുന്നുവെങ്കിലും വലതുവശത്തെ ആക്‌സില്‍ പൊട്ടിയതാണ് അപകടത്തിനു കാരണമായത്. നടുറോഡില്‍ നടന്ന അപകടത്തെ തുടര്‍ന്ന് വെള്ളറട കാരക്കോണം റോഡിൽ വാഹന ഗതാഗതം തടസടപ്പെട്ടു. വെള്ളറട എസ്ഐ പ്രമോദിന്‍റെ നേതൃത്വത്തിലുള്ള പോലീസ് സംഘം മേല്‍നടപടികള്‍ സ്വീകരിച്ചശേഷം അപകടത്തില്‍പെട്ട വാഹനങ്ങളെ റോഡുവക്കിലേക്കു മാറ്റി ഗതാഗതം പുനഃസ്ഥാപിച്ചു.

വാർഷികാഘോഷവും ഓപ്പോൾ പദ്ധതി ഉദ്ഘാടനവും

പൂവാർ: പൂവാർ റോട്ടറി ക്ലബിന്‍റെ അഞ്ചാമത് വാർഷികവും ഓണാഘോഷവും ഓപ്പോൾ പദ്ധതി ഉദ്ഘാടനവും മുൻ ചീഫ് സെക്രട്ടറിയും കവിയും സാഹിത്യകാരനുമായ വി. ജോയ് നിർവഹിച്ചു. നെയ്യാറ്റിൻകര ഗ്രേസ് ഗാർഡനിൽ അഡ്വ. എ അജികുമാറിന്‍റെ അധ്യക്ഷത വഹിച്ചു. റവന്യൂ ഡിസ്ട്രിക്ട് ഡയറക്ടർ ഷാജ് ശ്രീധരൻ, ഡിസ്ട്രിക്ട് ഓപ്പോൾ പ്രോജക്ട് ചെയർമാൻ ജോഷ് ജോസഫ്, അസിസ്റ്റന്‍റ് ഗവർണർ ജി.ആർ. വിജീഷ് കുമാർ, ചാർട്ടർ പ്രസിഡന്‍റ് രാജൻ വി. പൊഴിയൂർ, സെക്രട്ടറി ഭക്തവത്സലൻ, ട്രഷറർ രാജു സെൽവരാജ്, ഓപ്പോൾ പദ്ധതി ചെയർപേഴ്സൺ അനിത ഡിനി, വൈസ് പ്രസിഡന്‍റ് സി.പ്രഭാകരൻ, ജോയിന്‍റ് സെക്രട്ടറി കുമാർ മണിയൻ, എ. അനിൽകുമാർ, അയിര സുനിൽകുമാർ, സിദ്ധാർഥ കുമാർ, ഡോ. ഹരിത ജെ. ആർ, എൻ. ദിവാകരൻ, പെരിങ്ങമ്മല എം. അജേഷ് എന്നിവർ സംസാരിച്ചു. ചടങ്ങിൽ പുതിയ പ്രസിഡന്‍റായി ഡിനി ദർബലിനെ തെരഞ്ഞെടുത്തു. ഓപ്പോൾ പദ്ധതിയുടെ ഭാഗമായി നിർധന കുടുംബാംഗവും വനിതാ ഡ്രൈവറുമായ വി. ബിനിത ബാബുവിന് മിനി ടിപ്പർ ലോറി കൈമാറി. നിർധനർക്കുള്ള വീട് മെയിന്‍റനൻസ് ഫണ്ട്, പത്തോളം കാൻസർ രോഗികൾക്ക് ചികിത്സാ ധനസഹായം, കെഎസ്ആർടിസി പൂവാർ ഡിപ്പോയ്ക്ക് വാട്ടർപ്യൂരിഫയർ, വിദ്യാർഥിക്ക് ലാപ്പ്ടോപ്പ് എന്നിവയും കൈമാറി.

കല്ലിയൂർ വൈസ് പ്രസിഡന്‍റ് തെരഞ്ഞെടുപ്പ്

നേമം: കല്ലിയൂര്‍ പഞ്ചായത്തില്‍ വൈസ് പ്രസിഡന്‍റ് തെരഞ്ഞെടുപ്പു ഇന്നു നടക്കും. വൈസ് പ്രസിഡന്‍റായിരുന്ന എല്‍. ശാന്തിമതിയെ തെരഞ്ഞെടുപ്പ് കമ്മീഷന്‍ അയോഗ്യയാക്കിയാക്കിയതിനെ തുടര്‍ന്നാണ് തെരഞ്ഞെടുപ്പ്. ബിജെപി ഭരണസമിതിക്കെതിരേ സിപിഎം കൊണ്ടുവന്ന അവിശ്വാസ പ്രമേയത്തിന് അനുകൂലമായി വോട്ടു ചെയ്തതിനെ തുടര്‍ന്നാണ് കോണ്‍ഗ്രസംഗം എല്‍. ശാന്തിമതിയെ അയോഗ്യയാക്കിയത്. അവിശ്വാസം വിജയിച്ചതോടെ സിപിഎമ്മിനു ഭരണം ലഭിച്ചു. ബിജെപി ഭരണ സമിതിക്കെതിരേ സിപിഎം കൊണ്ടുവന്ന അവിശ്വാസ പ്രമേയത്തിന് അനുകൂലമായി ബിജെപിയിലെ പൂങ്കുളം വാര്‍ഡ് അംഗം സുധര്‍മയും കൂറുമാറി വോട്ടു ചെയ്തിരുന്നെങ്കിലും സുധര്‍മ്മയ്‌ക്കെതിരായ കേസ് തള്ളുകയായിരുന്നു. 21 അംഗങ്ങളുള്ള പഞ്ചായത്തില്‍ പതിനൊന്നു പേരുടെ പിന്തുണയാണ് സിപിഎമ്മിനു ലഭിച്ചത്. കോണ്‍ഗ്രസിന്‍റെ ശേഷിക്കുന്ന ഏക അംഗം വിട്ടുനില്‍ക്കാനാണ് സാധ്യത. ഭരണപക്ഷമായ എല്‍ഡിഎഫിനു പത്തും ബിജെപിക്ക് ഒന്‍പതും കോണ്‍ഗ്രസിന് ഒന്നുമാണ് നിലവിലെ അംഗബലം.

നെടുമങ്ങാ‌ട് ഓണം വാരാഘോഷം : ആവേശംതീർത്ത് വിളംബര ഘോഷയാത്ര

നെടുമങ്ങാട്: ഓണാഘോഷ പരിപാടികളുടെ പ്രചരണാര്‍ഥം സംസ്ഥാന സര്‍ക്കാരും സംസ്ഥാന ടൂറിസം വകുപ്പും നെടുമങ്ങാട് നഗരസഭയും സംയുക്തമായി സംഘടിപ്പിച്ച ഓണം വിളംബര ഘോഷയാത്ര കാണികളിൽ ആവേശമുണർത്തി. മന്ത്രി ജി.ആര്‍. അനില്‍ ഘോഷയാത്രയ്ക്ക് നേതൃത്വം നല്‍കി. റോളര്‍ സ്‌കേറ്റിംഗിന്‍റെ ചടുലതയില്‍ ആരംഭിച്ച ഘോഷയാത്രക്ക് ഭീമാകാരമായ ബൊമ്മ കളിയും പൂക്കാവടിയും പുലിക്കളിയും തെയ്യവും കഥകളി ഉള്‍പ്പെടെയുള്ള വിവിധ കലാരൂപങ്ങളും അഴകു പകർന്നു. നാട്ടിന്‍പുറത്തെ ഐതിഹ്യ കഥകളിലെ രൂപങ്ങളും, മാവേലിയും വാമനനും ഘോഷയാത്ര യുടെ ഭാഗമായി. കരാട്ടെ, കളരി അടക്കമുള്ള ആയോധന കലകള്‍ കാണികളില്‍ ആവേശം സൃഷ്ടിച്ചപ്പോള്‍ ബാന്‍ഡ്, ചെണ്ട, ശിങ്കാരി മേളങ്ങള്‍ യാത്രയ്ക്ക് താളം പകർന്നു. തിരുവാതിര, മോഹിനിയാട്ടം, നാടോടി നൃത്തം ഉള്‍പ്പടെയുള്ള നൃത്ത രൂപങ്ങളോടൊപ്പം കോല്‍ക്കളിയും, ബ്രേക്ക് ഡാന്‍സും രഥയാത്രയും ഘോഷയാത്രയിൽ അണിനിരന്നു. ആന വേഷത്തിൽ അരിക്കൊമ്പനായി കലാകാരന്മാർ എത്തിയ കാഴ്ച കാണികളില്‍ നവ്യാനുഭവം പകർന്നു. നെടുമങ്ങാട് നഗരസഭയുടെ 39 വാര്‍ഡുകളും വിളംബര ഘോഷയാത്രയില്‍ അണിചേര്‍ന്നു. ജനപ്രതിനിധികള്‍, റസിഡന്‍സ് അസോസിയേഷനുകള്‍, വിവിധ വിദ്യാലയങ്ങള്‍, സര്‍ക്കാര്‍ സ്ഥാപനങ്ങള്‍, കുടുംബശ്രീ അംഗങ്ങള്‍, ഹരിതകര്‍മ സേനാ പ്രവര്‍ത്തകര്‍, തൊഴിലുറപ്പ് തൊഴിലാളികള്‍ എന്നിവര്‍ ജാഥയുടെ ഭാഗമായി. നഗരസഭയുടെ മുന്നില്‍നിന്ന് ആരംഭിച്ച ഘോഷയാത്ര കല്ലിംഗല്‍ ഗ്രൗണ്ടില്‍ സമാപിച്ചു.

"സർക്കാർ തീരുമാനം പിൻവലിയ്ക്കണം'

വെഞ്ഞാറമൂട്: 20 വർഷത്തിൽ കൂടുതൽ പഴക്കമുള്ള സ്വകാര്യ വാഹനങ്ങളുടെ ഫിറ്റ്നസ് പുതുക്കുന്നതിനുള്ള രജിസ്ട്രേഷൻ ഫീസ് പത്തിരട്ടിയായി വർധിപ്പിച്ചത് പിൻവലിക്കണമെന്ന് കേരള സ്റ്റേറ്റ് യൂസ്ഡ് വെഹിക്കിൾ ഡീലേഴ്‌സ് ആൻഡ് ബ്രോക്കേഴ്സ് അസോസിയേഷൻ തിരുവനന്തപുരം ജില്ലാ സെക്രട്ടേറിയറ്റ് കമ്മിറ്റി സർക്കാരിനോട് ആവശ്യപ്പെട്ടു. സാധാരണക്കാരുടെ ചെറുകിട വാഹനങ്ങൾക്കു ഫീസ് വർധനവിലൂടെ ജനങ്ങൾക്ക് അധിക സാമ്പത്തിക ബാധ്യത സൃഷ്ടിക്കുന്നു. ആയതിനാൽ സർക്കാരിന്‍റെ നടപടി പുന പരിശോധിച്ചില്ലെങ്കിൽ ശക്തമായ പ്രതിഷേധവും നിയമനടപടികളും സ്വീകരിക്കാനാണു കമ്മിറ്റി തീരുമാനിച്ചിട്ടുള്ളതാതെന്നും ഭാരവാഹികൾ പറഞ്ഞു. സംസ്ഥാന ജോയിന്‍റ് സെക്രട്ടറി എച്ച്. നാസിം, ജില്ലാ പ്രസിഡന്‍റ് ഉദയകുമാർ, ജില്ലാ ജനറൽ സെക്രട്ടറി ഷിഹാസ് വെഞ്ഞാറമൂട് ജില്ലാ ട്രഷറർ അയ്യൂബ് റാവുത്തർ എന്നിവർ യോഗത്തിൽ പങ്കെടുത്തു.

ഓണക്കാല ഉല്ലാസ-തീർഥാടന യാത്രകളുമായി വെഞ്ഞാറമൂട് കെഎസ്ആർടിസി

വെഞ്ഞാറമൂട്: ഓണക്കാല ഉല്ലാസ - തീർത്ഥാടന യാത്രകളുമായി വെഞ്ഞാറമൂട് കെഎസ്ആർടിസി. 435 ഓളം ട്രിപ്പുകളാണു ചുരുങ്ങിയ കാലയളവിൽ നടത്തിയത്. ഇത്തവണ ഓണകാലത്ത് ഒട്ടനവധി ട്രിപ്പുകളാണ് സാധാരണക്കാരെ പരിഗണിച്ചു ക്രമീകരിച്ചിരിയ്ക്കുന്നത്. 11, 18 തീയതികളിൽ ആറന്മുള വള്ളസദ്യ, ആറിനു വയനാട്, തേക്കടി, വാഗമൺ, പൊന്മുടി യാത്രകളും ഏഴിന് ഇലവീഴാപ്പൂഞ്ചിറ, രാമയ്‌ക്കൽമേട്, സൂര്യകാന്തിപാടം, കുംഭാവുരുട്ടി യാത്രകളും പത്തിന് ഓക്സിവാലി - സൈലന്‍റ് വാലി യാത്രകളും 13നു കെജെ റോയൽസ് ഹൗസ് ബോട്ട് യാത്ര യാത്രയും ഉണ്ടായിരിക്കും. 14ന് തെന്മലയിലേക്കാണ് യാത്ര സംഘടിപ്പിക്കുന്നത്.

ചാല ക്ഷേത്രത്തിലെ കാണിക്കവഞ്ചി കവര്‍ച്ച; മോഷ്ടാവിനെപ്പറ്റി സൂചനയില്ല

പേരൂര്‍ക്കട: ചാല ക്ഷേത്രത്തിലെ കാണിക്കവഞ്ചി കവര്‍ച്ചയുമായി ബന്ധപ്പെട്ട് മോഷ്ടാവിനെ ഇനിയും പിടികൂടാനായില്ല. ചാല മുത്തുമാരിയമ്മന്‍ ക്ഷേത്രത്തിലെ കാണിക്കവഞ്ചിയാണു കഴിഞ്ഞ ഞായറാഴ്ച മോഷ്ടാവ് കവര്‍ന്നത്. ക്ഷേത്രകോമ്പൗണ്ടിലുണ്ടായിരുന്ന കാണിക്കവഞ്ചിയാണ് മോഷ്ടാവ് എടുത്തുകൊണ്ടുപോയത്. വഞ്ചിയില്‍ 3000-ഓളം രൂപയാണ് ഉണ്ടായിരുന്നതെന്നു ക്ഷേത്രഭാരവാഹികള്‍ പോലീസില്‍ നല്‍കിയ പരാതിയില്‍ പറഞ്ഞിരുന്നു. സിസിടിവി ദൃശ്യങ്ങള്‍ പരിശോധിച്ചപ്പോള്‍ മോഷ്ടാവ് ക്ഷേത്രത്തിനു സമീപത്തേക്ക് നടന്നുവരുന്ന ദൃശ്യം മാത്രമാണ് ലഭിച്ചത്. പരിശോധനയില്‍ ഇയാള്‍ അന്യസംസ്ഥാനക്കാരനാണെന്നും പോലീസ് സ്റ്റേഷന്‍ പരിധിയിലെ മോഷ്ടാക്കളുടെ ലിസ്റ്റില്‍ പെടുന്നയാള്‍ അല്ലെന്നുമാണ് ഫോര്‍ട്ട് പോലീസ് പറയുന്നത്. മോഷ്ടാവിനെ കണ്ടെത്താനുള്ള അന്വേഷണം പോലീസ് ഊര്‍ജിമാക്കിയിരിക്കുകയാണ്.

ബോധ് രാജ് നേപ്പാളിലേക്ക് മടങ്ങുന്നു; സിക്ക് ചാരിറ്റി കേന്ദ്രത്തിന്‍റെ കൈത്താങ്ങിൽ

തിരുവനന്തപുരം: ബന്ധുക്കളോട് പിണങ്ങി നാടുവിട്ട ബോധ് രാജ് ഇന്നു ബന്ധുക്കൾക്കൊപ്പം കേരളത്തിൽ നിന്നു നേപ്പാളിലേക്ക് മടങ്ങും. തിരിച്ചു പോകാൻ മാർഗമില്ലാതെ പ്രതിസന്ധിയിലായ ഇദ്ദേഹത്തിനു സഹായമായതു വട്ടപ്പാറ സിക്ക് ചാരിറ്റി കേന്ദ്രത്തിന്‍റെ ഇടപെടലാണ്. ഇക്കഴിഞ്ഞ ജൂണിലാണ് നേപ്പാൾ സ്വദേശിയായ ബോധ് രാജ് ഭാര്യയോടും മക്കളോടും പിണങ്ങി നാടുവിട്ടത്. ജോലി തേടിയെത്തിയത് തിരുവനന്തപുരത്ത്. എന്നാൽ ജോലി അന്വേഷിച്ചു നടക്കുന്നതിനിടയിൽ അദ്ദേഹത്തിന്‍റെ പേഴ്സ് നഷ്ടപ്പെട്ടു. ഐഡി കാർഡടക്കമുള്ള രേഖകൾ അതിലായിരുന്നു. ഐഡി കാർഡില്ലാത്തതിനാൽ ജോലിക്കു കയറാനായില്ല. വീട്ടിലേക്കു തിരിച്ചു പോകും കഴിഞ്ഞില്ല. ഇതോടെ കഴുത്തിൽ മുറിവേൽപ്പിച്ച് ആത്മഹത്യയ്ക്കു ശ്രമിച്ച ഇദ്ദേഹത്തെ നാട്ടുകാർ ചേർന്നു മെഡിക്കൽ കോളജ് ആശുപത്രിയിലെത്തിച്ചു. തുടർന്നു സുഖം പ്രാപിച്ച ബോധ് രാജിനെ ജനറൽ ആശുപത്രിയിലേക്ക് മാറ്റി. ഇവിടെ വച്ചു പരിചരിച്ച നഴ്സുമാരോട് നാട്ടിൽ പോകണമെന്നു പറഞ്ഞു. തുടർന്നു ജനറൽ ഹോസ്പിറ്റലിലെ സൈക്യാട്രിക് സോഷ്യൽ വർക്കർ സന്ധ്യ സോണിയുടെ ഇടപെടലിനെ തുടർന്ന് ഇദ്ദേഹത്തെ സിക്ക് ചാരിറ്റി കേന്ദ്രത്തിൽ പ്രവേശിപ്പിക്കുകയായിരുന്നു. ഇതിന്‍റെ പ്രവർത്തകർ നേപ്പാളിലെ ഇയാളുടെ ബന്ധുക്കളുമായി ബന്ധപ്പെടുകയും കഴിഞ്ഞ ദിവസം അവർ തലസ്ഥാനത്ത് എത്തിച്ചേരുകയും ചെയ്തു. നിയമപരമായി അദ്ദേഹത്തെ ബന്ധുക്കൾക്കു കൈമാറുകയും ചെയ്തു. ഇതോടെ ബോധ് രാജിനും ആശ്വാസമായി.

തൊളിക്കോട് പഞ്ചായത്തിൽ ഓണക്കിറ്റിന് അമിതവില ഈടാക്കിയെന്ന് ആരോപണം

വിതുര: ഓണം വിപണന മേളയുടെ ഭാഗമായി തൊളിക്കോട് പഞ്ചായത്ത് സിഡിഎസ് കുടുംബശ്രീയുടെ നേതൃത്വത്തിൽ വിതരണം ചെയ്ത ഓണക്കിറ്റിന് അമിത വില ഈടാക്കിയെന്ന് ആരോപണം. കുടുംബശ്രീ ജില്ലാ മിഷന്‍റെ നിർദേശാനുസരണം സംരംഭകരെ പ്രോത്സാഹിപ്പിക്കുകയെന്ന ലക്ഷ്യത്തോടെ പ്രാദേശികമായി ഉത്പാദിപ്പിച്ച പലചരക്ക് വിഭവങ്ങൾ ഉൾപ്പെടെ ഉൾപ്പെടുത്തി 750 രൂപയ്ക്കാണ് കിറ്റ് വിതരണം ചെയ്തു തുടങ്ങിയത്. സിഡിഎസിനു കീഴിലെ വിവിധ എഡിഎസുകളുടെ പരിധിയിലെ കുടുംബശ്രീ യൂണിറ്റുകൾ നിർബന്ധമായും ഒരു കിറ്റെങ്കിലും വാങ്ങണമെന്നായിരുന്നു നിബന്ധന. പഞ്ചായത്തിൽ ആകെ 382 യൂണിറ്റുകളാണ് ഉള്ളത്. കിറ്റ് കൈയിൽ കിട്ടിയവർ കടയിൽ നിന്നും വാങ്ങുന്നതിനേക്കാൾ കൂടുതൽ ലാഭം ഉണ്ടാകുമെന്ന് കരുതി. എന്നാൽ കിറ്റിലെ സാധനങ്ങൾ പരിശോധിച്ചവർ ഞെട്ടി. 750 രൂപയുടെ കിറ്റിൽ വിപണി വില കണക്കാക്കിയാൽ 600 താഴെ രൂപയുടെ സാധനങ്ങൾ മാത്രമേയുള്ളൂ. അരി ഉൾപ്പെടെ 18 പല ചരക്ക് സാധനങ്ങളാണ് ഉണ്ടായി രുന്നത്. 19-ാമത്തെ ഇനമായി കിറ്റും ഉൾപ്പെടുത്തി. ഇതിന് 40 രൂപയാണ് ഈടാക്കിയത്. കിറ്റ് കൈയിൽ ക്കിട്ടിയ പലരും തിരിച്ച് ഏൽപ്പിച്ചതോടെയാണു സംഭവം വിവാദമായത്. പിന്നാലെ 750 രൂപയുടെ കിറ്റിന്‍റെ വില സിഡിഎസ് അംഗങ്ങൾ യോഗം ചേർന്ന് 650 ആയി കുറച്ചു. എങ്കിലും ലാഭമില്ലെന്നാണ് പരാതി. ഓണക്കിറ്റ് വിതരണത്തിനു പിന്നിലെ അഴിമതി പുറത്തു കൊണ്ടുവരണമെന്നും വിശദമായ അന്വേഷണം നടത്തണമെന്നും പഞ്ചായത്ത് അംഗവും മഹിളാ കോൺഗ്രസ് സംസ്ഥാന സെക്രട്ടറിയുമായ ഷെമി ഷംനാദ് ആവശ്യപ്പെട്ടു. ഓണക്കിറ്റിലെ അഴിമതി ചൂണ്ടിക്കാട്ടി കുടുംബശ്രീ ജില്ലാ മിഷനു തുരുത്തി എഡിഎസ് അംഗം സജീന ഷാജഹാൻ പരാതിയും നൽകിയിട്ടുണ്ട്. ഓണക്കിറ്റിലെ വിഭവങ്ങളുടെ വില നിശ്ചയിച്ചത് സംരംഭകരാണെന്നും ഇക്കാര്യത്തിൽ സിഡിഎസ് ഇടപെട്ടിട്ടില്ലെന്നും സിഡിഎസ് ചെയർപെഴ്സൺ ഷംന നവാസ് പറഞ്ഞു. വില കൂടുതലാണെന്ന് പരാതി വന്നതോടെ ഉടൻ തന്നെ സിഡിഎസ് നടപടി എടുത്ത് വില കുറച്ചു. മൊത്ത വ്യാപാര വില ഉയർത്തിക്കാട്ടി ഓണക്കിറ്റിന് അമിതി വിലയാണെന്ന തരത്തിൽ ചിലർ പ്രചാരണം നടത്തുന്നുണ്ടെന്നും അവർ ആരോപിച്ചു.

നെയ്യാറ്റിൻകര മേലാരിയോട് വിശുദ്ധ മദര്‍ തെരേസാ തീര്‍ഥാടന തിരുനാളിന് ഏഴിനു തുടക്കം

നെയ്യാറ്റിന്‍കര: മദര്‍ തെരേസയുടെ നാമഥേയത്തിലെ ആദ്യ ദേവാലയമായ നെയ്യാറ്റിന്‍കര രൂപതയിലെ മേലാരിയോട് വിശുദ്ധ മദര്‍ തെരേസാ തീര്‍ഥാടന തിരുനാളിന് ഏഴിനു തുക്കമാവും. വൈകുന്നേരം 6.30ന് ഇടവക വികാരി ഫാ. കെ.പി. ജോണ്‍ കൊടിയേറ്റുകര്‍മം നിർവഹിക്കും. എട്ടിനു മാതാവിന്‍റെ ജനന തിരുനാള്‍ ദിനത്തില്‍ രാവിലെ ഒന്പതു മുതല്‍ ലീജിയന്‍ ഓഫ് മേരി സംഘടിപ്പിക്കുന്ന അഖണ്ഡ ജപമാല, വൈകുന്നേരം ദിവ്യബലിയെ തുടര്‍ന്ന് മാതാവിന്‍റെ തിരുസ്വരൂപം വഹിച്ച് ആഘോഷമായ തിരുസ്വരൂപ പ്രദക്ഷിണം എന്നിവയുണ്ടാകും. 13 ന് വൈകുന്നേരം ദിവ്യബലിയെ തുടര്‍ന്ന് ആഘോഷമായ ചപ്രദക്ഷിണം. 14ന് ദിവ്യബലിയെ തുടര്‍ന്ന് ആഘോഷമായ ദിവ്യകാരുണ്യ പ്രദക്ഷിണം. നെയ്യാറ്റിന്‍കര രൂപതയിലെ വിവിധ വൈദികര്‍ തിരുകര്‍മ്മങ്ങളില്‍ മുഖ്യ കാര്‍മികത്വം വഹിക്കും. തിരുനാള്‍ ദിനങ്ങളില്‍ വൈകുന്നേരം അഞ്ചു മുതല്‍ ബൈബിള്‍ പാരായണം, ജപമാല, ലിറ്റിനി, നൊവേന ദിവ്യബലി എന്നിവയുണ്ടാവും. വിശുദ്ധ മദര്‍ തെരേസയുടെ തിരുശേഷിപ്പു വണങ്ങി പ്രാര്‍ഥിക്കാനുളള പ്രത്യേക ക്രമീകരണം പളളിയില്‍ ഒരുക്കിയിട്ടുണ്ടെന്ന് വികാരി അറിയിച്ചു.

പുല്ലുവിള മേഖലയിൽ തെരുവുനായ ആക്രമണം: 15 പേർക്കു കടിയേറ്റു

പൂവാർ: തീരദേശത്തെ പേടിയുടെ മുൾമുനയിൽ നിർത്തി രാത്രിയിൽ തെരുവു നായയുടെ തേർവാഴ്ച. ഏഴു വയസുകാരി ഉൾപ്പെടെ പതിനഞ്ചോളം പേരെ കടിച്ച് പരിക്കേൽപ്പിച്ചു. നിരവധി പേർ കടിയേൽക്കാതെ രക്ഷപ്പെട്ടതു തലനാരിഴയ്ക്ക്. പലരുടെയും പരിക്ക് ഗുരുതരമെന്ന് ആശുപത്രി അധികൃതർ അറിയിച്ചു. പുല്ലുവിള സ്വദേശികളായ മിഥുൻ (16), പനിയമ്മ (64), സുവർണ്ണ (ഏഴ്), ആന്‍റണി (52), കൊച്ചുപള്ളി സ്വദേശികളായ ദീപ (22), സൗമ്യ (28), ഗോര പ്രസാദ് (32), ജ്ഞാനമ്മ (73), ബിജു (48), ലോർദോൻ ജോൺ ബ്രിട്ടോ, റജി, അടിമലത്തുറ സ്വദേശി പീറ്റർ, പള്ളം സ്വദേശി റൈസൺ (54) എന്നിവർക്കാണ് കടിയേറ്റത്. വൈകുന്നേരം ആറു മണി മുതൽ രാത്രി ഒൻപതര വരെ കടിയേറ്റവർ പുല്ലുവിള പ്രാഥമികാരോഗ്യ കേന്ദ്രത്തിൽ ചികിത്സക്കായി എത്തി. ഇവരെയെല്ലാം കൂടുതൽ ചികിത്സക്കായി തിരുവനന്തപുരം ജനറൽ ആശുപത്രിയിലേക്ക് മാറ്റി. വൈകുന്നേരം ആറോടെ പള്ളം മേഖലയിലാണ് തെരുവുനായ ആദ്യമെത്തിയത്. റൈസനെ കടിച്ചു പരിക്കേൽപ്പിച്ച ശേഷം നാലു കിലോമീറ്ററിനുള്ളിൽ കണ്ണിൽ കണ്ടവരെയെല്ലാം തെരുവുനായ കടിച്ചുപറിച്ചു. ആൾക്കാരുടെ കാലിലും മുതികിലും പുറകിലും വയറിലുമെല്ലാമാണ് കടിയേറ്റത്. പുറത്തിറങ്ങി നടക്കുന്ന കൂടുതൽ പേരെ ഇനിയും കടിക്കാൻ സാധ്യതയുണ്ടെന്നും അധികൃതർ പറയുന്നു. മൂന്നരമണിക്കൂറുകൊണ്ട് ഇത്രയും പേരെ കടിച്ച നായ നിരവധി തെരുവുനായകളെയും ആക്രമിച്ചതായി നാട്ടുകാർ പറയുന്നു. ‌ ചാരക്കളറിലുള്ള നായയാണ് കടിച്ചതെന്ന് ആക്രമണത്തിനിറയായവർ പറയുന്നു. വിവരം ഡിഎംഒ ഉൾപ്പെടെയുള്ള അറിയിച്ചതായി പുല്ലുവിള മെഡിക്കൽ ഓഫീസർ മിനി പറഞ്ഞു.

കുറ്റിച്ചലിൽ മകന്‍റെ മർദനമേറ്റ് അച്ഛൻ മരിച്ചു

സംഭവം കുടുംബ വഴക്ക് പരിഹരിക്കാനെത്തിയപ്പോൾ കുറ്റിച്ചൽ: കുടുംബ വഴക്കു പരിഹരിക്കാനെത്തിയ അച്ഛൻ മകന്‍റെ മർദനമേറ്റു മരിച്ചു. കുറ്റിച്ചൽ ചപ്പാത്ത് വഞ്ചിക്കുഴിയിലാണ് സംഭവം. വഞ്ചിക്കുഴി മാർത്തോമാ പള്ളിക്കു സമീപം താമസിക്കുന്ന രവീന്ദ്രനാണു മകന്‍റെ മർദനമേറ്റ് കൊല്ലപ്പെട്ടത്. സംഭവത്തിൽ മകൻ നിഷാദ് നെയ്യാർ ഡാം പോലീസ് അറസ്റ്റു ചെയ്തു. കോടതിയിൽ ഹാജരാകിയ നിഷാദിനെ റിമാൻഡു ചെയ്തു. കുടുംബവഴക്കാണ് കൊലപാതകത്തിലേക്ക് കലാശിച്ചതെന്നാണ് പോലീസ് പറയുന്നത്. തിങ്കളാഴ്ച രാത്രി 10 മണിയോടെയായിരുന്നു സംഭവം. രാത്രി മദ്യപിച്ച് വീട്ടിലെത്തിയ നിഷാദ് ഭാര്യയും അമ്മയുമായി വാക്കുതർക്കത്തിലേർപ്പെട്ടു. തുടർന്നു നിഷാദ് ആത്മഹത്യയ്ക്കും ശ്രമിച്ചു. ഇതിനെ തുടർന്നു വഴക്കു പരിഹരിക്കാനെത്തിയ രവീന്ദ്രന്‍റെ നെഞ്ചിൽ നിഷാദ് ചവിട്ടി വീഴ്ത്തുകയായിരുന്നു. പിന്നാലെ വീട്ടുകാർ പോലീസിനെ വിളിച്ചു വരുത്തി. പോലീസ് എത്തുന്ന സമയം വരെയും നിഷാദ് രവീന്ദ്രനെ മർദിച്ചുവെന്നാണ് വിവരം. ആക്രമണത്തിൽ ഗുരുതരാവസ്ഥയിലായ രവീന്ദ്രനെ അടുത്തുള്ള സ്വകാര്യ ആശുപത്രിയിൽ പ്രവേശിപ്പിച്ചെങ്കിലും 12 മണിയോടെ രവീന്ദ്രൻ മരിച്ചു. ഹൃദ്രോഗി കൂടിയായ രവീന്ദ്രൻ അതിന്‍റെ ചികിത്സ തുടരുന്നയാളാണ്. സ്വകാര്യ ആയുർവേദ ആശുപത്രിയിലെ ജീവനക്കാരനാണ് നിഷാദ്. ഇയാൾക്കെതിരെ കൊലക്കുറ്റം ചുമത്താനാണ് പോലീസിന്‍റെ തീരുമാനം. വസ ന്തയാണ് രവീന്ദ്രന്‍റെ ഭാര്യ. സംഭവത്തിൽ നെയ്യാർ ഡാം പോലീസ് വിശദമായ അന്വേഷണം ആരംഭിച്ചിട്ടുണ്ട്.

കെപിസിസി ഓഫീസിലേക്ക് മഹിളാ മോർച്ച മാർച്ച് നടത്തി

തിരുവനന്തപുരം: കെപിസിസി ഓഫീസിലേക്ക് മഹിളാമോർച്ച നടത്തിയ മാർച്ചിനു നേർക്ക് പോലീസ് ജല പീരങ്കി പ്രയോഗിച്ചു. പ്രധാനമന്ത്രി നരേന്ദ്രമോദിയുടെ മാതാവിനെ അധിക്ഷേപിച്ച കോണ്‍ഗ്രസ് മാപ്പ് പറയുക, സ്ത്രീ പീഡകൻ എംഎൽഎയെ സംരക്ഷിക്കുന്നത് അവസാനിപ്പിക്കുക തുടങ്ങിയ ആവശ്യങ്ങളുന്നയിച്ചായിരുന്നു മാർച്ച്. മഹിളാമോർച്ച സംസ്ഥാന പ്രസിഡന്‍റ് നവ്യാ ഹരിദാസ് ഉദ്ഘാടനം ചെയ്തു. ദേശീയതലത്തിലും സംസ്ഥാന തലത്തിലും കോണ്‍ഗ്രസ് ജനപ്രതിനിധികൾ അഴിഞ്ഞാടുകയാണെന്ന് നവ്യാ ഹരിദാസ് പറഞ്ഞു. തിരുവനന്തപുരം ജില്ലാ പ്രസിഡന്‍റ് ലീന മോഹൻ അധ്യക്ഷത വഹിച്ചു. ബിജെപി സംസ്ഥാന സെക്രട്ടറി എം.വി.അഞ്ജന, പ്രഫ. വി.ടി. രമ, മഹിളാമോർച്ച സംസ്ഥാന ജനറൽ സെക്രട്ടറി ആർ.സി.ബീന, ട്രഷറർജി.എസ്. മഞ്ജു , ജില്ലാ ജനറൽ സെക്രട്ടറിമാരായ ശ്രീജ, സിനി മനോജ് തുടങ്ങിയവർ നേതൃത്വം നൽകി.

ഓണം വാരാഘോഷം ഇന്ന് ആരംഭിക്കും

തിരുവനന്തപുരം: സംസ്ഥാന സർക്കാരിന്‍റെ ഓണം വാരാഘോഷം ഇന്ന് ആരംഭിക്കും. യുകെ, ഫ്രാൻസ്, വിയറ്റ്‌നാം, ഇന്തോനേഷ്യ, തായ്‌വാൻ, ശ്രീലങ്ക, നേപ്പാൾ, മലേഷ്യ, റൊമാനിയ, സൗത്ത് കൊറിയ എന്നിവിടങ്ങളിൽ നിന്നുള്ള വിദേശ വിനോദസഞ്ചാരികളും ഓണാഘോഷത്തിന്‍റെ ഭാഗമായി അതിഥികളായി എത്തുമെന്ന് മന്ത്രി പി എ മുഹമ്മദ് റിയാസ് പറഞ്ഞു. ഓണാഘോഷത്തിന്‍റെ ഭാഗമായി 33 വേദികളിലായി വൈവിധ്യമാർന്ന പരിപാടികൾ തിരുവനന്തപുരത്ത് സംഘടിപ്പിക്കും. പതിനായിരത്തോളം കലാകാരന്മാർ ഓണാഘോഷത്തിൽ പ്രത്യക്ഷമായും പരോക്ഷമായും പങ്കെടുക്കും, ഇതിൽ നാലായിരത്തോളം കലാകാരന്മാർ പരമ്പരാഗത കലകളിൽ നിന്നുള്ളവരാണ്. സെപ്തംബർ 5, 6, 7 തീയതികളിൽ നഗരത്തിൽ കേരളവുമായി ബന്ധപ്പെട്ട കാര്യങ്ങൾ പരാമർശിക്കുന്ന 15 മിനിറ്റിലേറെ നീണ്ടു നിൽക്കുന്ന ഡ്രോൺ ഷോ ഒരുക്കും. ചന്ദ്രശേഖരൻ നായർ സ്റ്റേഡിയം, യൂണിവേഴ്‌സിറ്റി സ്റ്റേഡിയം എന്നിവയ്ക്ക് മുകളിലായാണ് ഡ്രോൺ ലൈറ്റ് ഷോ ഒരുക്കുന്നത്. 11.49 കോടി രൂപയാണ് സംസ്ഥാന സർക്കാർ ഓണഘോഷത്തിനായി അനുവദിച്ചിട്ടുള്ളത്. സംസ്ഥാനത്തിന്‍റെ ഐക്യം, മാനവികത, മതസൗഹാർദ്ദം, സമൃദ്ധി എന്നിവയുടെ സന്ദേശം നൽകുന്ന ഓണാഘോഷം തലസ്ഥാനത്ത് ഏറ്റവും നല്ല നിലയിൽ സംഘടിപ്പിക്കാനാണ് സർക്കാർ ശ്രമിക്കുന്നതെന്ന് മന്ത്രിമാർ പറഞ്ഞു. പാർക്കിംഗ് കോളജ്, ഓഫീസ് ഗ്രൗണ്ടുകളിൽ തിരുവനന്തപുരം: ഓണഘോഷവുമായി ബന്ധപ്പെട്ട് നഗരത്തിലെ പ്രധാന റോഡുകളിൽ പാർക്കിംഗ് അനുവദിക്കില്ലെന്ന് സിറ്റി പോലീസ് കമ്മീഷണർ തോംസൺ ജോസ് അറിയിച്ചു. യൂണിവേഴ്‌സിറ്റി ഓഫീസ് കോമ്പൗണ്ട്, യൂണിവേഴ്‌സിറ്റി കോളജ് ഗ്രൗണ്ട്, സംസ്‌കൃത കോളജ് ഗ്രൗണ്ട്, കേരള വാട്ടർ അഥോറിറ്റി കോമ്പൗണ്ട്, സംഗീത കോളജ് ഗ്രൗണ്ട്, എൽഎംഎസ് ഗ്രൗണ്ട്, സെന്‍റ് ജോസഫ് സ്‌കൂൾ ഗ്രൗണ്ട്, ഫോർട്ട് ഹൈസ്‌കൂൾ ഗ്രൗണ്ട്, സാൽവേഷൻ ആർമി സ്‌കൂൾ ഗ്രൗണ്ട്, ജിമ്മി ജോർജ് ഇൻഡോർ സ്റ്റേഡിയം, അട്ടക്കുളങ്ങര സെൻട്രൽ സ്‌കൂൾ, എസ്എംപി സ്‌കൂൾ ഗ്രൗണ്ട്, ആർട്‌സ് കോള ജ് ഗ്രൗണ്ട്, ആറ്റുകാൽ ക്ഷേത്രം ഗ്രൗണ്ട്, ഐരാണിമുട്ടം ഹോമിയോ കോളജ് ഗ്രൗണ്ട്, പബ്ലിക് ഓഫീസ് കോമ്പൗണ്ട്, ഫൈൻ ആർട്‌സ് കോളജ്, വിമൻസ് കോളജ് ഗ്രൗണ്ട്, എൽബിഎസ് സെന്‍റർ ഫോർ സയൻസ് ആൻഡ് ടെക്‌നോളജി എന്നിവിടങ്ങളിൽ പാർക്കിംഗിനായി സൗകര്യങ്ങൾ ഒരുക്കിയിട്ടുണ്ട്. കനകക്കുന്നിൽനിന്ന് കോർപ്പറേഷൻ വരെയുള്ള റോഡുകളിൽ തിരക്ക് അനുസരിച്ച് വാഹന ഗതാഗതത്തിന് നിയന്ത്രണങ്ങൾ ഉണ്ടാകും. നഗരത്തിലെ പ്രധാന കേന്ദ്രങ്ങളിൽ സിസിടിവി കവറേജ് ഉണ്ടായിരിക്കും. കനകക്കുന്നിൽ പ്രത്യേക കൺട്രോൾ റൂം പ്രവർത്തിക്കും. രാത്രി 12 മണിക്ക് ദീപാലങ്കാരങ്ങൾ അണയ്ക്കും. പാർക്കിംഗും വൺവേ നിയന്ത്രണങ്ങളും പാലിക്കുന്നതിൽ പൊതുജനങ്ങൾ സഹകരിക്കണമെന്നും കമ്മീഷണർ അറിയിച്ചു. photo ഓണം വാരാഘോഷത്തിന്‍റെ ഭാഗമായി നഗരത്തിലെ വിവിധയിടങ്ങളിൽ വൈദ്യുത ദീപാലങ്കരങ്ങൾ മിഴി തുറന്നപ്പോൾ. -ടി.സി. ഷിജുമോൻ

പുതുതലമുറയ്ക്ക് വിശ്വാസപൈതൃകം കൈമാറണം: മാർ ഫിലക്സിനോസ്

തിരുവനന്തപുരം: ഇന്നിന്‍റെ സാഹചര്യങ്ങളെ രൂപാന്തരപ്പെടുത്തി ജീവിക്കുകയും നാളെകളെ ഭാസുരമാക്കാനുള്ള താൽപര്യം ഉൗർജിതപ്പെടുത്തുകയും പൈതൃക തനിമ നഷ്ടപ്പെടുത്താതെ പുതിയ തലമുറയ്ക്കു വിശ്വാസത്തിന്‍റെ പ്രതീക്ഷകൾ കൈമാറുകയും ചെയ്യണമെന്നു മാർത്തോമ്മാ സഭ തിരുവനന്തപുരം കൊല്ലം ഭദ്രാസനാധിപൻ ഡോ. ഐസക്ക് മാർ ഫിലിക്സിനോസ് എപ്പിസ്കോപ്പ പറഞ്ഞു. തിരുവനന്തപുരം നഗരത്തിൽ നൂറുവർഷം പിന്നിടുന്ന മാർത്തോമ്മാ വിശ്വാസികളുടെ സംഗമം ഡോ. ജോസഫ് മാർത്തോമാ ഓഡിറ്റോറിയത്തിൽ ഉദ്ഘാടനം ചെയ്യുകയായിരുന്നു അദ്ദേഹം. വിശക്കുന്നവർക്ക് അപ്പമായി മാറാനും ജീവിതത്തിലൂടെ മറ്റുള്ളവർക്ക് നന്മ പകരാനും കഴിയണമെന്നും മാർ ഫിലിക് സിനോസ് എപ്പിസ്ക്കോപ്പ കൂട്ടി ചേർത്തു. തിരുവനന്തപുരം - കൊല്ലം ഭദ്രാസനം സന്നദ്ധ സുവിശേഷ സംഘത്തിന്‍റെ ആഭിമുഖ്യത്തിൽ തിരുവനന്തപുരം സെന്‍ററിലെ ഇടവകളുടെ സഹകരണത്തോടെ നടന്ന സംഗമത്തിൽ നൂറുകണക്കിനു വിശ്വാസികൾ പങ്കെടുത്തു. രാവിലെ വിശുദ്ധ കുർബാനയോടെ ആരംഭിച്ച സംഗമത്തിൽ ഫാ. ബോബി ജോസ് കട്ടിക്കാട് ധ്യാനപ്രഭാഷണം നടത്തി. റവ. ഷിബിൻ ശിശുമണി, ജൂലി മേരി മാത്യു, റവ. ലിപിൻ പൊന്നച്ചൻ എന്നിവർ യുവജനസഖ്യ, സണ്‍ഡേ സ്കൂൾ സമ്മേളനങ്ങൾക്കു നേതൃത്വം നൽകി. വികാരി ജനറാൾ റവ. ഡോ. കെ.ജി. പോത്തൻ, റവ. ഷിബു ഒ. പ്ലാവിള, റവ. വർഗീസ് ഫിലിപ്പ്, റവ. മാത്യു കെ. ജോണ്‍, റവ. സി. ജി. സാമുവൽ, റവ. മാത്യു പി. തോമസ്, റവ. മനോജ് ഇടിക്കുള, മാത്യു ടി. ഏബ്രഹാം എന്നിവർ പ്രസംഗിച്ചു. പൗരോഹിത്യ ശുശ്രൂഷയിൽ 50 വർഷം പിന്നിടുന്ന ഡോ ഐസക്ക് മാർ ഫിലക്സിനോസ് എപ്പിസ്കോപ്പയെ ഭദ്രാസന സന്നദ്ധ സുവിശേഷ സംഘം സെക്രട്ടറി മാത്യു ടി. ഏബ്രഹാം, ട്രഷറർ രാജു ടി. കല്ലുമൂട്ടിൽ എന്നിവർ ചേർന്ന് പൊന്നാട അണിയിച്ച് ആദരിച്ചു. റവ. ഡോ. ഈപ്പൻ വർഗീസ് രചിച്ച ’സുവിശേഷിതം’ എന്ന പുസ്തകം, സിഎസ്എസ് സെക്രട്ടറി റവ. സാം ടി. കോശിക്കു നൽകിക്കൊണ്ട് ഡോ. ഐസക് മാർ ഫിലക്സിനോസ് എപ്പിസ്കോപ്പ പ്രകാശനം ചെയ്തു.

ഓസാനം സ്നേഹഭവൻ ഉദ്ഘാടനം ചെയ്തു

തിരുവനന്തപുരം: സൊസൈറ്റി ഓഫ് സെന്‍റ് വിൻസന്‍റ് ഡി പോൾ തിരുവനന്തപുരം സെൻട്രൽ കൗൺസിൽ അശരണരും ആലംബഹീനരുമായ അമ്മമാർക്കും സഹോദരിമാർക്കും വസിക്കുന്നതിനുള്ള മന്ദിരം "ഓസാനം സ്നേഹ ഭവൻ' എന്ന പേരിൽ വെട്ടുതുറയിൽ ഉദ്ഘാടനം ചെയ്തു. തിരുവനന്തപുരം ലാത്തീൻ അതിരൂപത ആർച്ച്ബിഷപ് ഡോ. തോമസ് ജെ. നെറ്റോ, സ്നേഹഭവന്‍റെ ആശീർവാദവും ഉദ്ഘാടനവും നിർവഹിച്ചു. "ദൈവത്തിനു ഒന്നും അസാധ്യമല്ല. അതുപോലെ അസാധ്യം എന്നു തോന്നുന്ന പല പദ്ധതികളും പരിപാടികളും വിൻസന്‍റ് ഡി പോൾ സൊസൈറ്റിക്കു സാധ്യമാണെന്നതിനുള്ള ഉത്തമ ഉദാഹരണമാണ് രണ്ടു വർഷത്തിനുള്ളിൽ നിർമാണം പൂർത്തിയാക്കി നാടിനു സമർപ്പിച്ച ഈ സ്നേഹ ഭവനമെന്നും അദ്ദേഹം വ്യക്തമാക്കി. 50 അമ്മമാർക്കും സഹോദരിമാർക്കും വസിക്കാൻ കഴിയുന്ന വിധത്തിലാണ് സ്നേഹ ഭവനം നിർമിച്ചിരിക്കുന്നത്. സൊസൈറ്റി ഓഫ് സെന്‍റ് വിൻസെന്‍റ് ഡി പോൾ തിരുവനന്തപുരം സെൻട്രൽ കൗൺസിൽ പ്രസിഡന്‍റ് ബ്രദർ ഡി. ഫ്രാൻസിസ് അധ്യക്ഷത വഹിച്ചു. സൊസൈറ്റിയുടെ നാഷണൽ കൗൺസിൽ പ്രസിഡന്‍റ് ബ്രദർ എസ്. ജൂഡ് മംഗൾരാജ് മുഖ്യപ്രഭാഷണവും സൊസൈറ്റി തിരുവനന്തപുരം സെൻട്രൽ കൗൺസിൽ ആത്മീയ ഉപദേഷ്ടാവ് ഫാ. ബീഡ് മനോജ് അമാഡോ അനുഗ്രഹ പ്രഭാഷണവും നിർവഹിച്ചു. പുതുക്കുറിച്ചി ഫൊറോന വികാരി റവ. ഡോ. ഹയസിന്ത് എം. നായകം, റവ. ഡോ. യേശുദാസൻ റെമിയാസ്, വെട്ടുതുറ ഇടവക വികാരി ഫാ. മരിയ ഡോമിനിക്, കഠിനംകുളം പഞ്ചായത്ത് പ്രസിഡന്‍റ് അജിത അനി എന്നിവർ പ്രസംഗിച്ചു. ‌ തിരുവനന്തപുരം അതിരൂപതയുടെ ഇടവകകളിൽ നിന്നും 100 കണക്കിനു വിൻസൻഷ്യൻ പ്രവർത്തകർ പങ്കെടുത്തു. ‌സെന്‍റ് വിൻസന്‍റ് ഡി പോൾ സൊസൈറ്റി തിരുവനന്തപുരം സെൻട്രൽ കൗൺസിൽ വൈസ് പ്രസിഡന്‍റ് ബ്രദർ ഡയനേഷ്യസ് പെരേര സ്വാഗതവും ഉദ്ഘാടന കമ്മിറ്റി സെക്രട്ടറി ബ്രദർ ജോർജ് പെരേര നന്ദിയും പറഞ്ഞു.

ഗണേശ വിഗ്രഹ ഘോഷയാത്ര സമാപിച്ചു

തിരുവനന്തപുരം: ഗണേശോത്സവ ട്രസ്റ്റിന്‍റെ നേതൃത്വത്തിൽ നടന്ന ഗണേശ വിഗ്രഹ ഘോഷയാത്ര സമാപിച്ചു. തിരുവനന്തപുരത്തെ ഭക്തിസാന്ദ്രമാക്കിയ ഘോഷയാത്ര ഇന്നലെ പഴവങ്ങാടി ഗണപതി ക്ഷേത്രത്തിൽനിന്നും ആരംഭിച്ചു ശംഖുമുഖം കടൽ തീരത്ത് സമാപിച്ചു. പഴവങ്ങാടി ഗണ പതി ക്ഷ ത്രത്തിൽനടന്ന ഹോമത്തിനുശേഷം ഗണേശ വിഗ്രഹങ്ങൾ കടലിൽ നിമജ്ജനം ചെയ്തു. പഴവങ്ങാടിയിൽ നടന്ന സാംസ്കാരിക സമ്മേളനം മുൻ കേന്ദ്ര മന്ത്രി വി. മുരളീധരൻ ഉദ്ഘാടനം ചെയ്തു. ശ്രീകോവിലിനു മുന്നിൽ പോയി കൈയും കെട്ടി നിൽക്കുന്നവരാണു ഭക്തരെ അവഹേളിക്കാൻ ശബരിമലയിൽ അയ്യപ്പ സംഗമം നടത്തുന്നതെന്നു വി. മുരളീധരൻ പറഞ്ഞു. അയ്യപ്പനെയും ഗണപതിയേയുമൊക്കെ അവഹേളിക്കുന്നവരാണു സംസ്ഥാനം ഭരിക്കുന്നത്. ഗണപതിയും അയ്യപ്പനുമൊക്കെ മിത്തല്ലെന്നും അവതാരമൂർത്തകളാണെന്നു വൈകിയെങ്കിലും സംസ്ഥാന സർക്കാർ മനസിലാക്കിയതിൽ സന്തോഷമുണ്ടെന്നും അദ്ദേഹം പറഞ്ഞു. ആഘോഷകമ്മറ്റി ചെയർമാൻ ജി. രാജ്മോഹൻ, ട്രസ്റ്റ് മുഖ്യകാര്യദർശി എം.എസ്. ഭുവനചന്ദ്രൻ, ട്രസ്റ്റ് കണ്‍വീനർ ആർ.ഗോപിനാഥൻ നായർ എന്നിവർ പങ്കെടുത്തു.

മെറ്റീരിയൽ റിക്കവറി ഫെസിലിറ്റി സെന്‍റർ പ്രവർത്തനമാരംഭിച്ചു

വിഴിഞ്ഞം: വിഴിഞ്ഞം മേഖലയിലെ മാലിന്യ സംസ്കരണത്തിന് നവീന സാധ്യതകൾ ഒരുക്കി, മെറ്റീരിയൽ റിക്കവറി ഫെസിലിറ്റി സെന്‍റർ പ്രവർത്തനമാരംഭിച്ചു. അദാനി ഫൗണ്ടേഷൻ, ക്ലീൻ കേരള കമ്പനി, ശുചിത്വ മിഷൻ, തിരുവനന്തപുരം മുനിസിപ്പൽ കോർപ്പറേഷൻ, വിസിൽ തുടങ്ങിയ സ്ഥാപനങ്ങളുടെ സംയുക്താഭിമുഖ്യത്തിലാണു വിഴിഞ്ഞത്തു പദ്ധതിക്കു തുടക്കം കുറിച്ചത്. കോർപറേഷൻ മേയർ ആര്യ രാജേന്ദ്രൻ സെന്‍റർ ഉദ്ഘാടനം ചെയ്തു. ഡെപ്യൂട്ടി മേയർ പി.കെ. രാജു അധ്യക്ഷത വഹിച്ചു. മാലിന്യങ്ങൾ സ്വീകരിച്ച്, വേർതിരിച്ച്, പുനഃസംസ്‌കരിച്ചു വിപണനത്തിനായി പുതിയ വസ് തുക്കൾ തയാറാക്കുക എന്നതാണ് മെറ്റീരിയൽസ് റിക്കവറി ഫെസിലിറ്റി (എംആർഎഫ്) പദ്ധതിയുടെ ലക്ഷ്യം. വിഴിഞ്ഞം സോണിലെ അഞ്ച് വാർഡുകളിൽനിന്ന് ശേഖരിക്കുന്ന മാലിന്യങ്ങളാണു ശാസ്ത്രീയമായി വേർതിരിച്ച് ഇവിടെ പുനഃസംസ്‌കരിക്കുന്നത്. നഗരസഭ കൗൺസിലർമാരായ പനിയടിമ, നിസാമുദീൻ, അദാനി ഗ്രൂപ്പ് കോർപ്പറേറ്റ് അഫയേഴ്സ് മേധാവി അനിൽ ബാലകൃഷ്ണൻ, സിഎസ്ആർ. വിഭാഗത്തിലെ സെബാസ്റ്റ്യൻ ബ്രിട്ടോ, ജി.എം. വിസിൽ, പ്രസാദ് കുര്യൻ, ഹരിത കർമസേനാംഗങ്ങൾ, ശുചിത്വ മിഷൻ സ്റ്റാഫ്, ജീവനക്കാർ പങ്കെടുത്തു.

നിയമസഭയിൽ ഓണാഘോഷം

തിരുവനന്തപുരം: നിയമസഭയിൽ സംഘടിപ്പിച്ച ഓണാഘോഷപരിപാടികൾ സ്പീക്കർ എ.എൻ. ഷംസീർ ഉദ്ഘാടനം ചെയ്തു. ജീവനക്കാർക്കുവേണ്ടി കായിക, കലാമത്സരങ്ങളും അത്തപ്പൂക്കള മത്സരവും സംഘടിപ്പിച്ചു. ഉച്ചയ്ക്കുശേഷം ശങ്കരനാരായണൻ തമ്പി ലോഞ്ചിൽ ജീവനക്കാരുടെ കലാപരിപാടികളും അരങ്ങേറി. ഉച്ചയ്ക്ക് ഒരുക്കിയ ഓണസദ്യയിൽ മന്ത്രി ജി.ആർ. അനിൽ, ഗവ. ചീഫ് വിപ്പ് ഡോ. എൻ. ജയരാജ്, എംഎൽഎമാരായ ടി.പി. രാമകൃഷ്ണൻ, വി.കെ.പ്രശാന്ത്, സി.കെ. ഹരീന്ദ്രൻ, യു. പ്രതിഭ, ആന്‍റണിരാജു, മാത്യു ടി. തോമസ്, ജോബ് മൈക്കിൾ തുടങ്ങിയവരും മന്ത്രിമാരുടെ പേഴ്സണൽ സ്റ്റാഫ് അംഗങ്ങളും നിയമസഭാ ജീവനക്കാരും പങ്കെടുത്തു.

വസ്തുതട്ടിപ്പ് കേസ്: അനില്‍ തമ്പിയെ അറസ്റ്റുചെയ്യാനാകില്ല

പേരൂര്‍ക്കട: കവടിയാര്‍ ജവഹര്‍ നഗറിലെ വസ്തുതട്ടിപ്പ് കേസില്‍ ഒളിവില്‍പ്പോയ വ്യവസായി അനില്‍ തമ്പിയെ ഒരാഴ്ചത്തേക്ക് പോലീസിന് അറസ്റ്റുചെയ്യാനാകില്ല. ഇയാള്‍ കോടതിയില്‍ നിന്ന് അനുകൂല വിധി സമ്പാദിച്ചതാണ് ഇതിനു കാരണം. വരുന്ന ഒമ്പതാം തീയതി വരെ അനില്‍ തമ്പിയെ അറസ്റ്റുചെയ്യരുതെന്ന് കോടതിയുടെ നിര്‍ദ്ദേശമുണ്ട്. അതിനിടെ തിരുവനന്തപുരത്തെ വസതിയില്‍ നിന്ന് ആഴ്ചകള്‍ക്കു മുങ്ങിയ അനില്‍ തമ്പിയെ പിടികൂടാന്‍ പോലീസ് ഏകദേശം 6 ഉത്തരേന്ത്യന്‍ സംസ്ഥാനങ്ങളിലും നേപ്പാള്‍, ഭൂട്ടാന്‍ എന്നീ രാജ്യങ്ങളിലും തെരച്ചില്‍ നടത്തി വെറും കൈയോടെ മടങ്ങിയെത്തുകയുണ്ടായി. അനില്‍ തമ്പി ഇന്ത്യയില്‍ ഏതെങ്കിലും ഒരു സംസ്ഥാനത്ത് ഒളിവില്‍ക്കഴിയുന്നുണ്ടെന്നാണ് പോലീസ് ഇപ്പോഴും കരുതുന്നത്. അതേസമയം ഇയാള്‍ നേപ്പാളോ ഭൂട്ടാനോ വഴി പോലീസ് എത്തുന്നതിനുമുമ്പുതന്നെ അന്യരാജ്യത്തേക്ക് കടന്നതായാണു സൂചന. അനില്‍ തമ്പിയുടെ കുടുംബം ജവഹര്‍ നഗറിലെ ഒരു ഫ്‌ളാറ്റിലാണ് താമസിച്ചു വരുന്നത്. അതേസമയം മകള്‍ ജര്‍മ്മനിയിലാണ്. വസ്തുതട്ടിപ്പുമായി ബന്ധപ്പെട്ട് ഇതിനോടകം നിരവധി പേരാണ് അറസ്റ്റിലായിട്ടുള്ളത്. അതേസമയം സൂത്രധാരനെ പിടികൂടാനാകാത്തത് പോലീസിന് നാണക്കേട് സൃഷ്ടിച്ചിട്ടുണ്ട്. കവടിയാറിലെ ഡോറ അസറിയ ക്രിപ്‌സിന്റെ വീടും വസ്തുവും ചേര്‍ന്ന 10 കോടിയിലേറെ വരുന്ന സ്വത്ത് വ്യാജരേഖകള്‍ ചമച്ച് കൈക്കലാക്കിയ സംഭവത്തിലാണ് സൂത്രധാരനായ അനില്‍ തമ്പിയെ പോലീസ് തെരയുന്നത്.

എഐ മാവേലി വൻ ഹിറ്റ്; മാവേലിയോട് ആർക്കും ചാറ്റ് ചെയ്യാം

തിരുവനന്തപുരം: ആർക്കും ചാറ്റ് ചെയ്യാവുന്ന "എഐ മാവേലി’ യാണ് ഓണാഘോഷങ്ങളിലെ ടെക് താരം. ഓണത്തിനു കേരളത്തിലെത്തുന്ന എഐ മാവേലിയോട് ആർക്കും ചാറ്റ് ചെയ്യാനാകുമെന്നത് ഇതിനെ ജനപ്രിയമാക്കുന്നു. www.maveli.ai വഴി ആർക്കും മാവേലിയോട് ചാറ്റ് ചെയ്യാം. കേരള സ്റ്റാർട്ടപ്പ് മിഷനു കീഴിലുള്ള ടെക്നോപാർക്കിലെ സെഞ്ച്യൂറിയോടെക് എന്ന സ്റ്റാർട്ടപ്പ് കന്പനിയാണ് എഐ മാവേലിക്കു പിന്നിൽ. "ഓണം വീണ്ടും വന്നെത്തി. ഇത്തവണ നമുക്ക് എഐ വഴി സംസാരിച്ചാലോ’ എന്ന് ചോദിച്ച് മാവേലി സ്വാഗതം ചെയ്യും. മംഗ്ലീഷിലും ഇംഗ്ലീഷിലും മാവേലിയോട് ചോദ്യങ്ങൾ ചോദിക്കാനാകും. ഇമോജിയും തമാശകളുമായി മാവേലിയുടെ ഉത്തരങ്ങളെത്തും. സെഞ്ച്യൂറിയോടെക് സിഇഒ അജിഷ ഭാസി, അർഷാദ്, ദിവ്യ, ഭാർഗവ്, റെനീഷ്, ലക്ഷ്മി എന്നിവരുടെ നേതൃത്വത്തിൽ പത്തു പേരടങ്ങുന്ന സംഘമാണ് എഐ മാവേലിയെ വികസിപ്പിച്ചത്. രണ്ടുമാസം കൊണ്ടാണ് എഐ മാവേലിയെ വികസിപ്പിച്ചെന്നതും ശ്രദ്ധേയം. മാവേലിയോടു സംസാരിക്കുന്നതിനൊപ്പം മെന്‍റൽ ടിപ്സ് കൂടി ഉൾപ്പെടുത്താനുള്ള നീക്കത്തിലാണിവർ. ഇതിനകം വലിയ ജനശ്രദ്ധ നേടിയ എഐ മാവേലി കുട്ടികൾക്കും മുതിർന്നവർക്കും ഒരുപോലെ ആസ്വാദ്യകരമാണ്.

നിഡ്സിൽ ഓണാഘോഷം സംഘടിപ്പിച്ചു

നെയ്യാറ്റിൻകര: നെയ്യാറ്റിൻകര ഇന്‍റഗ്രൽ ഡവലപ്മെന്‍റ് സൊസൈറ്റിയും ക്വസ്റ്റ് അലയൻസും സംയുക്തമായി യുവജനങ്ങൾക്ക് വേണ്ടി സംഘടിപ്പിച്ചിരിക്കുന്ന തൊഴിൽ വൈദഗ്ധ്യ പരിശീലന പരിപാടിയിലെ ആദ്യ ബാച്ച് വിദ്യാർഥികൾ ലോഗോസ് പാസ്റ്ററൽ സെന്‍ററിൽ ഓണാഘോഷം സംഘടിപ്പിച്ചു. നിഡ്സ് ഡയറക്ടർ ഫാ. രാഹുൽ ബി. ആൻ്റോ ഉത്ഘാടനം ചെയ്തു. പ്രോഗ്രാം കോ-ഓഡിനേറ്റർ ശശികുമാർ അധ്യക്ഷത വഹിച്ചു. പ്രോജക്ട് ഓഫീസർ മൈക്കിൾ, വിശ്വനാഥൻ, സുജിത വിനോദ്, റോജ, സുജിത രാജ്, ജീന എന്നിവർ ഓണസന്ദേശം നൽകി. പ്രോജക്ട് ടീം അംഗങ്ങളായ ജയരാജ്, കവിത, സോന, അഞ്ചന എന്നിവർ നേതൃത്വം നൽകി.

മണ്ണന്തല-പൗഡിക്കോണം റോഡ് മഴയിലും വേനലിലും ചളിക്കളം

പേരൂര്‍ക്കട: മഴയൊഴിഞ്ഞാലും ചളിക്കുളമായി മാറുന്ന പൗഡിക്കോണം റോഡിലൂടെയുള്ള യാത്ര ജനങ്ങള്‍ക്കു ദുരിതമാകുന്നു. മണ്ണന്തല ജംഗ്ഷനില്‍നിന്നു പൗഡിക്കോണത്തേക്കു പോകുന്ന റോഡിന്‍റെ അവസ്ഥയാണ് ദയനീയമായി തുടരുന്നത്. മഴ പെയ്തു കഴിഞ്ഞാല്‍ ഇതുവഴി കാല്‍നടയാത്ര പോലും അസാധ്യമാണ്. മഴയൊഴിഞ്ഞാല്‍ ഒരുമാസത്തോളം ഇവിടെ വെള്ളക്കെട്ടുമാണ്. റോഡിന്‍റെ വശത്ത് ഓടയില്ലാത്തതാണു വര്‍ഷങ്ങളായുള്ള ജനങ്ങളുടെ ദുരിതത്തിനു കാരണം. ഒന്നരകിലോമീറ്റര്‍ നീളം വരുന്ന റോഡിലൂടെ നിരവധി സ്വകാര്യവാഹനങ്ങള്‍ കടന്നുപോകുന്നുണ്ട്. റോഡിന്‍റെ 200 മീറ്ററോളം ദൂരത്തില്‍ ചളികെട്ടി കാട്ടുചെടികളും പുല്ലും വളര്‍ന്നുകിടക്കുന്നുണ്ട്. ഓടയില്ലാത്തതിനാല്‍ ജലം മണ്ണില്‍ താഴുന്നത് അസാധ്യമാകുന്നതുകൊണ്ടാണു ചളിക്കെട്ടുണ്ടാകുന്നത്. അതുകൊണ്ടുതന്നെ ഇരുചക്ര വാഹനയാത്ര ഇതുവഴി ഏറെ പ്രയാസകരമാണ്. വര്‍ഷങ്ങളായി ജനങ്ങള്‍ പരാതിപറഞ്ഞു മടുത്തിരിക്കുന്ന റോഡാണ് ഇത്. ചെഞ്ചേരി കുറുങ്കുളം റസിഡന്‍റ് അസോസിയേഷന്‍ ഭാരവാഹികള്‍ ഇതുസംബന്ധിച്ചു നിരവധിതവണ അധികൃതര്‍ക്കു പരാതി നല്‍കിക്കഴിഞ്ഞു. തിരുവനന്തപുരം നഗരസഭയുമായി ബന്ധപ്പെട്ടപ്പോള്‍ ഫണ്ടില്ല എന്ന ന്യായവാദമാണു പറഞ്ഞുവരുന്നതെന്നു നാട്ടുകാര്‍ക്കു പരാതിയുണ്ട്. 20 ലക്ഷം രൂപയെങ്കിലും വകയിരുത്തിയാല്‍ മാത്രമേ റോഡിലെ വെള്ളക്കെട്ട് ഒഴിവാക്കുന്നതിന് ഓടനിര്‍മാണം സാധ്യമാകുകയുള്ളൂ. വി.കെ. പ്രശാന്ത് എംഎല്‍എ ഇക്കാര്യത്തില്‍ അടിയന്തര നടപടികള്‍ സ്വീകരിക്കണമെന്നതാണ് പ്രദേശവാസികളുടെ ആവശ്യം. കഴിഞ്ഞ മഴക്കാലത്തിനുശേഷമുള്ള ഇടവിട്ടുള്ള മഴയില്‍ നാലു ബൈക്കു യാത്രക്കാരും രണ്ടു സ്‌കൂട്ടര്‍ യാത്രികരും ഒരു കാല്‍നടയാത്രികനും റോഡില്‍ തെന്നിവീഴുകയുണ്ടായി. സ്‌കൂള്‍ വിദ്യാര്‍ഥികളുടെ യാത്രാതടസമാണ് ഏറെ പരിതാപകരമായിട്ടുള്ളത്. റോഡിന്‍റെ വശത്ത് ഓട നിര്‍മിക്കുന്നതിനും റോഡ് ടാര്‍ ചെയ്യുന്നതിനുമായി ഫണ്ടു വകയിരുത്തണമെന്ന ജനങ്ങളുടെ ആവശ്യം മുന്‍നിര്‍ത്തി അധികൃതര്‍ കുറച്ചുനാള്‍ മുമ്പ് എസ്റ്റിമേറ്റ് എടുത്തു മടങ്ങിയതല്ലാതെ മറ്റൊന്നുമുണ്ടായില്ലെന്നാണു പരാതി.

വേറിട്ട ഓണാഘോഷവുമായി ഭരണ സിരാകേന്ദ്രം

പേരൂര്‍ക്കട: റെയില്‍വേ പ്ലാറ്റ്‌ഫോമിനും ട്രെയിനിനും ഇടയില്‍പ്പെട്ടപോയ യാത്രക്കാരിക്ക് പുനര്‍ജന്മം നല്‍കിയ രാഘവനുണ്ണി, വിവാഹസംഘം ഓട്ടോയില്‍ മറന്നുവച്ച 18 പവന്‍ തിരികെ നല്‍കിയ പ്രസന്നകുമാര്‍... ജീവിതത്തില്‍ ഇവര്‍ കാരുണ്യത്തിന്‍റെയും മനുഷ്യസ്‌നേഹത്തിന്‍റെയും പ്രതീകമായി മാറിയപ്പോള്‍ ഇവര്‍ക്ക് ആദരവുമായി എത്തിയത് ജില്ലാകളക്ടര്‍ അനുകുമാരി. അതുകൊണ്ടുതന്നെ ഇത്തവണ ഭരണസിരാകേന്ദ്രമായ സിവില്‍സ്റ്റേഷനിലെ ഓണാഘോഷ പരിപാടികള്‍ വേറിട്ടതുമായി. എറണാകുളം റെയില്‍വേ ഡിപ്പോയിലെ ഇലക്ട്രിക്കല്‍ ടെക്നീഷ്യനും പാലക്കാട് പറളി തേനൂര്‍ സ്വദേശിയുമാണ് രാഘവനുണ്ണി. ഓഗസ്റ്റ് ഒമ്പതിന് എറണാകുളം നോര്‍ത്ത് റെയില്‍വേ സ്റ്റേഷനില്‍ യാത്രക്കാരിയെ രക്ഷപ്പെടുത്തിയ ഇദ്ദേഹം ഇപ്പോഴും സോഷ്യല്‍ മീഡിയയിലെ താരമാണ്. ആലപ്പുഴ ഗുരുപുരം ലൂഥറന്‍ സ്‌കൂളിന് സമീപത്തെ സ്റ്റാന്‍ഡിലെ ഓട്ടോ ഡ്രൈവറാണ് സന്തോഷ് എന്നറിയപ്പെടുന്ന പ്രസന്നകുമാര്‍. ബാങ്കോക്കില്‍ നടന്ന മിസ്റ്റര്‍ ഏഷ്യ ബോഡി ബില്‍ഡിംഗ് ചാമ്പ്യന്‍ഷിപ്പില്‍ നാലാം സ്ഥാനം കരസ്ഥമാക്കിയ നെയ്യാറ്റിന്‍കര തഹസില്‍ദാര്‍ ടി.ആര്‍ ഷാജിക്കും കളക്ടര്‍ ഉപഹാരം നല്‍കി. കളക്ടറേറ്റ് പരിസരത്തെ ഓപ്പണ്‍ ജിം ഉപയോഗപ്പെടുത്തി ജീവനക്കാര്‍ക്കിടയില്‍ നടത്തിയ വെയ്റ്റ് ലോസ് ചലഞ്ചില്‍ വിജയികളായവര്‍ക്കും സമ്മാനവിതരണം നടത്തി. കളക്ടറേറ്റ് സ്റ്റാഫ് വെല്‍ഫയര്‍ ആന്‍ഡ് റിക്രിയേഷന്‍ ക്ലബിന്‍റെ നേതൃത്വത്തില്‍ ജീവനക്കാരുടെ കലാകായിക മത്സരങ്ങളും അരങ്ങേറി. ചടങ്ങില്‍ എഡിഎം ടി.കെ. വിനീത്, റിക്രിയേഷന്‍ ക്ലബ് പ്രസിഡന്‍റ് വി. അജീഷ് കുമാര്‍, സെക്രട്ടറി എസ്.ആര്‍. ഷിജിന്‍ പങ്കെടുത്തു.

ഓണവിപണിയിൽ സർക്കാരിന്‍റേത് മാതൃകാപരമായ ഇടപെടൽ: മന്ത്രി

നെടുമങ്ങാട്: മാതൃകാപരമായ ഇടപെടലിലൂടെ ഈ ഓണക്കാലത്തും ജനങ്ങൾക്കു വിലക്കയറ്റത്തിന്‍റെ നേരിയ സമ്മർദ്ദം പോലുമില്ലാതെ ന്യായവിലയ്ക്ക് അവശ്യവസ്തുക്കൾ ലഭ്യമാക്കാനുള്ള സാഹചര്യം ഒരുക്കാൻ സർക്കാരിനു കഴിഞ്ഞെന്നു മന്ത്രി ജി. ആർ. അനിൽ. നെടുമങ്ങാട് ആരംഭിച്ച ഓണച്ചന്ത ഉദ്ഘാടനം ചെ യ്തു ചെയ്യുകയായിരുന്നു മന്ത്രി. വിദൂര ഗ്രാമങ്ങളിൽ നേരിട്ട് എത്തുന്ന "സഞ്ചരിക്കുന്ന ഓണച്ചന്ത'കൾക്ക് ഇതിനോടകം വലിയ സ്വീകാര്യതയാണ് പൊതുജനങ്ങളിൽനിന്നു ലഭിച്ചതെന്നും മന്ത്രി കൂട്ടിച്ചേർത്തു. നെടുമങ്ങാട് നഗരസഭാ ചെയർപേഴ്‌സൺ സി.എസ്. ശ്രീജ ആധ്യക്ഷയായി. കൗൺസിലർ സിന്ധുകൃഷ്‌ണകുമാർ, സിപിഎം ഏരിയ സെക്രട്ടറി കെ.പി. പ്രമോഷ്, പാട്ടത്തിൽ ഷെരീഫ് എന്നിവർ പങ്കെടുത്തു. കേരള സ്റ്റേറ്റ് സിവിൽ സപ്ലൈസ് കോർപ്പറേഷന്‍റെ ആഭിമുഖ്യത്തിൽ നടത്തിവരാറുള്ള ഓണച്ചന്ത നെടുമങ്ങാട് മുനിസിപ്പൽ ടൗൺഹാളിൽ പ്രവർത്തിക്കുന്ന സപ്ലൈകോ പീപ്പിൾസ് ബസാറിലാണ് നടക്കുന്നത്.

ജനാർദനപുരം ഹയര്‍ സെക്കൻഡറി സ്‌കൂളില്‍ ഓണം ക്യാമ്പ് നടത്തി

വെള്ളറട: ജനാർദനപുരം ഹയര്‍ സെക്കൻഡറി സ്‌കൂളില്‍ എസ്പിസി സ്‌കൗട്ട് ആൻഡ് ഗൈഡ് വിദ്യാർഥികളുടെ ത്രിദിന ക്യാമ്പ് ഡോ. എ.ആര്‍. നീരജ് ഉദ്ഘാടനം നിര്‍വഹിച്ചു. അഡ്വ. ജെ. വേണുഗോപാലന്‍ നായര്‍, അഡ്വ. എസ്. ശ്രീകുമാരിയമ്മ, എം.എസ്. ആദര്‍ശ് കുമാര്‍, എന്‍. ഷീബ ജപമലര്‍, ഷാജു ജേക്കബ്, അനികുമാര്‍ എസ്.എസ്. അഖിനേത്, രഞ്ജിത്, പാര്‍വതി വിദ്യ, പദ്‌മേഷ് തുടങ്ങിയവര്‍ പ്രസംഗിച്ചു.

പൂക്കൃഷി വിളവെടുത്തു

വെള്ളറട: തിരുവിതാംകൂര്‍ ദേവസ്വം ബോര്‍ഡിനു കീഴിലുള്ള കുറ്റിയായണിക്കാട് കോയിക്കല്‍ ശ്രീ മഹാദേവര്‍ ക്ഷേത്രത്തിലെ ജമന്തി പൂക്കൃഷി വിളവെടുപ്പ് ആര്യന്‍കോട് പഞ്ചായത്ത് പ്രസിഡന്‍റ് ഒ. ഗിരിജ കുമാരിയും ആര്യങ്കോട് കൃഷി ഓഫീസര്‍ ഡോ. എസ്.ആര്‍. ആര്യയും ചേര്‍ന്ന് ഉദ്ഘാടനം ചെയ്തു. പഞ്ചായത്ത് വൈസ് പ്രസിഡന്‍റ് എ. ജീവല്‍കുമാര്‍, ദേവസ്വം ബോര്‍ഡ് ഒറ്റശേഖരമംഗലം സബ് ഗ്രൂപ്പ് ഓഫീസര്‍ പ്രദീജ, നെയ്യാറ്റിന്‍കര ഗ്രൂപ്പ് അസിസ്റ്റന്‍റ് ദേവസ്വം കമ്മീഷണര്‍ അയ്യപ്പന്‍, ക്ഷേത്രം മേല്‍ശാന്തി കൃഷ്ണമൂര്‍ത്തി, ക്ഷേത്ര ഉപദേശക സമിതി സെക്രട്ടറി പി. പ്രജീഷ്‌കുമാര്‍, ക്ഷേത്ര ഉപദേശക സമിതി പ്രസിഡന്‍റ് പി. ശ്രീകുമാര്‍, കുറ്റിയായണിക്കാട് വാര്‍ഡ് മെമ്പര്‍ ഉഷ തുടങ്ങിയവര്‍ ചടങ്ങില്‍ പങ്കെടുത്തു.

തകരാര്‍ പരിഹരിച്ചു; ടാഗോര്‍ നഗറില്‍ വെള്ളമെത്തി

പേരൂര്‍ക്കട: തൃക്കണ്ണാപുരം വാര്‍ഡിലെ ടാഗോര്‍ നഗറില്‍ മുടങ്ങിയിരുന്ന കുടിവെള്ള വിതരണം പുന:സ്ഥാപിച്ചു. കഴിഞ്ഞ രണ്ടുദിവസങ്ങളിലാണ് ഈ ഭാഗത്തു താമസിച്ചുവരുന്ന 300 കുടുംബങ്ങള്‍ക്ക് കുടിവെള്ളം മുടങ്ങിയത്. വാട്ടര്‍ അഥോറിറ്റി പി.ടി.പി സെക്ഷന്‍ പരിധിയില്‍ നിന്നാണ് തൃക്കണ്ണാപുരം വാര്‍ഡ് പരിധിയിലേക്കു കുടിവെള്ളം വിതരണം ചെയ്യുന്നത്. 450 എം.എം ഡക്‌റ്റൈല്‍ അയണ്‍ പൈപ്പ് 160 എം.എം പി.വി.സി പൈപ്പുമായി കണക്ട് ചെയ്യുന്ന പണിക്കിടെ റോഡിനടിയിലൂടെ കടന്നുപോകുന്ന 200 എം.എം പി.വി.സി ലൈനില്‍ ചോര്‍ച്ചയുണ്ടായതാണ് പ്രശ്‌നത്തിനു കാരണമെന്നു പി.ടി.പി സെക്ഷന്‍ അസി. എക്‌സി. എന്‍ജിനീയര്‍ അറിയിച്ചു. ജലം മുടങ്ങിയതിനെത്തുടര്‍ന്ന് വാര്‍ഡ് കൗണ്‍സിലര്‍ ജയലക്ഷ്മി വാട്ടര്‍ അഥോറിറ്റി അസി. എന്‍ജിനീയറുടെ ശ്രദ്ധയില്‍ വിഷയം പെടുത്തുകയായിരുന്നു. നാട്ടുകാരും വാട്ടര്‍ അഥോറിറ്റിയില്‍ പരാതിപ്പെട്ടിരുന്നു. റോഡില്‍ ആഴത്തില്‍ കടന്നുപോകുന്ന പൊട്ടിയ പൈപ്പ് കണ്ടെത്താന്‍ കാലതാമസമെടുത്തതാണ് ജനങ്ങള്‍ക്കു ബുദ്ധിമുട്ടുണ്ടാക്കിയതെന്നും പ്രശ്‌നം പരിഹരിച്ചിട്ടുണ്ടെന്നും വാട്ടര്‍ അഥോറിറ്റി അറിയിച്ചു.

ബാറിലെ സംഘര്‍ഷം; ഒരാള്‍ അറസ്റ്റില്‍

പേരൂര്‍ക്കട: ബാറിലെ സംഘര്‍ഷവുമായി ബന്ധപ്പെട്ട് ഒരാളെ വട്ടിയൂര്‍ക്കാവ് പോലീസ് അറസ്റ്റുചെയ്തു. വട്ടിയൂര്‍ക്കാവ് കാഞ്ഞിരംപാറ വി.കെ. പാപ്പന്‍നഗര്‍ സ്വദേശി രാജേഷ് (41) ആണ് അറസ്റ്റിലായത്. ഞായറാഴ്ച ഉച്ചയ്ക്ക് രണ്ടോയെയായിരുന്നു സംഭവം. മഞ്ചാടിമൂട്ടില്‍ പ്രവര്‍ത്തിച്ചു വരുന്ന ജെ.ജെ. ബാറിലായിരുന്നു അടിപിടി. മദ്യപിച്ചു ലക്കുകെട്ട രാജേഷ് ഇവിടെയുണ്ടായിരുന്ന ഒരു ജീവനക്കാരനെയാണ് ആക്രമിച്ചു പരിക്കേല്‍പ്പിച്ചത്. കഴുത്തില്‍ ആഴത്തിലുള്ള മുറിവേറ്റ ഇയാള്‍ ആശുപത്രിയില്‍ ചികിത്സ തേടി. ബാര്‍ ജീവനക്കാര്‍ അറിയിച്ചതിന്‍ പ്രകാരം വട്ടിയൂര്‍ക്കാവ് പോലീസ് നടത്തിയ അന്വേഷണത്തിലാണ് രാജേഷ് പിടിയിലായത്. സിഐ അജേഷിന്‍റെ നേതൃത്വത്തില്‍ എസ്ഐമാരായ തോമസ് ഹീറ്റസ്, രതീഷ്, സിപിഒമാരായ മനു, അനീഷ് എന്നിവര്‍ അന്വേഷണ സംഘത്തില്‍ ഉണ്ടായിരുന്നു. പ്രതിയെ കോടതി റിമാന്‍ഡ് ചെയ്തു.

വോളിബോൾ കോർട്ടിനു ശിലാസ്ഥാപനം നടത്തി

വെള്ളറട: കാരക്കോണം ഡോ. സോമര്‍വെല്‍ സ്മാരക സിഎസ്ഐ മെഡിക്കല്‍ കോളജില്‍ വിദ്യാര്‍ഥി യൂണിയന്‍റെ നേതൃത്വത്തില്‍ ഇന്‍ഡോര്‍ വോളിബോള്‍ കോര്‍ട്ട് നിര്‍മിക്കുന്നു. സിഎസ്ഐ മോഡറേറ്റര്‍ കമ്മിസറിയും ദക്ഷിണകേരള മഹായിടവക ബിഷപ്പുമായ തിമോത്തി രവീന്ദ്രര്‍ ശിലാസ്ഥാപനം നിര്‍വഹിച്ചു. ഇതിനോടനുബന്ധിച്ച് നടന്ന സമ്മേളനത്തില്‍ ഡയറക്ടര്‍ ഡോ. ജെ. ബെനെറ്റ് ഏബ്രഹാം അധ്യക്ഷനായിരുന്നു. പ്രിന്‍സിപ്പൽ ഡോ . അനുഷ മെര്‍ലിന്‍, മഹാ ഇടവക മെഡിക്കല്‍ മിഷന്‍ സെക്രട്ടറി ഡോ. പ്രതാപ് കുമാര്‍, സ്റ്റുഡന്‍സ് യൂണിയന്‍ ചെയര്‍മാന്‍ ജിതിന്‍ ജിബു ജോര്‍ജ്, ജനറല്‍ സെക്രട്ടറി ബെഞ്ചമിന്‍ ബിനോയ് പോള്‍, സ്‌പോര്‍ട്‌സ് സെക്രട്ടറി മിബിന്‍ ബേബി എന്നിവര്‍ പ്രസംഗിച്ചു. വൈസ് ചെയര്‍മാന്മാരായ ബിവിന്‍ വര്‍ക്കി സ്വാഗതവും നന്ദിയും പറഞ്ഞു. മുപ്പത്തഞ്ചു ലക്ഷത്തോളം രൂപ നിർമാണ ചെലവ് പ്രതീക്ഷിക്കുന്നു ഡിസംബറിന് മുന്പു നിർമാണം പൂർത്തിയാക്കുമെന്നും യൂണിയൻ ചെയർമാൻ ജിതിൻ പറഞ്ഞു.

കരയോഗം കുടുംബസംഗമവും ഓണാഘോഷവും

നെടുമങ്ങാട്: ചെല്ലാംകോട് എൻഎസ്എസ് കരയോഗത്തിന്‍റെ കുടുംബസംഗമവും ഓണാഘോഷവും താലൂക്ക് യൂണിയൻ പ്രസിഡന്‍റ് അഡ്വ. വി.എ. ബാബുരാജ് ഉദ്ഘാടനം ചെയ്തു. വിവിധ പരീക്ഷകളിൽ ഉന്നത വിജയം നേടിയ കരയോഗം വിദ്യാർഥികളെ ആദരിച്ചു. തിരുവാതിരയും കൈകൊട്ടി കളിയും ഓണസദ്യയും ഓണക്കിറ്റ് വിതരണം നടന്നു. കരയോഗം പ്രസിഡന്‍റ് ബി. വിജയൻ അധ്യക്ഷത വഹിച്ചു. മേഖല കൺവീനർ എസ്. ചന്ദ്രകുമാർ, മഹിളാ സമാജം വൈസ് പ്രസിഡന്‍റ് ഷീല രാജാശേഖരൻ, പൂവത്തൂർ കരയോഗം പ്രസിഡന്‍റ് എ.ആർ. നാരായണൻ നായർ, തോട്ടുമുക്ക് കരയോഗം പ്രസിഡന്‍റ് പ്രസന്നകുമാരൻ നായർ, വിജയവിക്രമൻ നായർ, സോമശേഖരൻ നായർ, മുരളീധരൻ നായർ, രമണൻ നായർ, എം.ആർ. അനിൽ, വി എസ് സുരേഷ് കുമാർ, ആർ.എൽ. രതീഷ്, പ്രഭ കൃഷ്ണൻ, ലീല കുമാരി, ഉജ്വൽ ഉദയൻ തുടങ്ങിയവർ പങ്കെടുത്തു. കരയോഗം സെക്രട്ടറി വി.എസ്. ജ്യോതിഷ് സ്വാഗതവും കരയോഗം ‌ട്രഷറർ അജേന്ദ്രൻ നായർ നന്ദി പറഞ്ഞു.

സ്കൗട്ട്സ് ആൻഡ് ഗൈഡ്സ് പ്രാദേശിക യൂണിറ്റ് ക്യാമ്പ്

വെമ്പായം: വട്ടപ്പാറ ലൂർദ് മൗണ്ട് സ്കൂളിൽ നടന്നുവന്ന പ്രാദേശിക സ്കൗട്ട്സ് ആൻഡ് ഗൈഡ്സ് യൂണിറ്റ് ക്യാമ്പ് സമാപിച്ചു. സ്കൂൾ പ്രിൻസിപ്പൽ ഡോ. ജോസ് ഡി. സുജീവ് ക്യാമ്പ് ഉദ്ഘാടനം ചെയ്തു. സ്കൂൾ മാനേജരും അഡ്മിനിസ്ട്രേറ്ററുമായ ബ്രദർ പീറ്റർ വാഴപ്പറമ്പിൽ അധ്യക്ഷനായിരുന്നു. പട്ടം ജിഎച്ച്എസ്എസ് റിട്ട. പ്രിൻസിപ്പൽ സൂര്യ നാരായണ കുഞ്ചുരായർ സ്കൗട്ട് വിഭാഗത്തിനും നെടുവേലി എച്ച്എസ്എസിലെ കായിക അധ്യാപിക ഹിമബിന്ദു ഗൈഡ് വിഭാഗത്തിനും ക്ലാസെടുത്തു. 53 സ്കൗട്ട്സും 26 ഗൈഡ്സും ഉൾപ്പെടെ ആകെ 79 വിദ്യാർഥികളാണ് ക്യാമ്പിൽ പങ്കെടുത്തത്. പിടിഎയുടെ പിന്തുണയും ക്യാമ്പിനുണ്ടായിരുന്നു.

കോൺഗ്രസ് മാരായമുട്ടം കമ്മിറ്റി തളിര്‍ നേതൃപരിശീലന ക്യാമ്പ്

വെള്ളറട: കോണ്‍ഗ്രസ് മാരായമുട്ടം മണ്ഡലം കമ്മിറ്റിയുടെ നേതൃത്വത്തില്‍ തളിര്‍ എന്ന പേരില്‍ നേതൃ പരിശീലന ക്യാമ്പ് സംഘടിപ്പിച്ചു. മാരായമുട്ടം മണ്ഡലം കമ്മിറ്റിയുടെ കീഴില്‍ വരുന്ന എട്ടു വാർഡുകളിലെ തെരഞ്ഞെടുക്കപ്പെട്ട പ്രതിനിധികള്‍ക്കുവേണ്ടി സംഘടിപ്പിച്ച ക്യാന്പ് എഐസിസി അംഗം നെയ്യാറ്റിന്‍കര സനല്‍ ഉദ്ഘാടനം ചെയ്തു. മണ്ഡലം പ്രസിഡന്‍റ് ബിനില്‍ മണലുവിള അധ്യക്ഷത വഹിച്ചു. ഡി. ശ്രീകുമാര്‍ ക്ലാസ് എടുത്തു. അനില്‍ ജോസ്, ഡിസിസി ജനറല്‍ സെക്രട്ടറി വിനോദ് സെന്‍, ബ്ലോക്ക് പ്രസിഡന്‍റ് അഡ്വ: എസ്. ജോൺ, കര്‍ഷകകോണ്‍ഗ്രസ് സംസ്ഥാന വൈസ് പ്രസിഡന്‍റ് എം.എസ്.അനിൽ എന്നിവർ ക്ലാസെടുത്തു. നേതാക്കളായ മണ്ണൂര്‍ ശ്രീകുമാര്‍, അഡ്വ. മാരായമുട്ടം ജോണി, ഗോപകുമാര്‍, ശ്രീരാഗം ശ്രീകുമാര്‍, തത്തിയൂര്‍ സുരേന്ദ്രന്‍, സുഗതന്‍ തത്തിയൂര്‍, മിനിമോള്‍, ഷിജ, സരസ്വതി, അനിഷ് ചുള്ളിയൂര്‍, മലക്കുളങ്ങര ജോണി, തുളസിധരന്‍ ആശാരി, രാജേഷ് വടകര, സന്തോഷ് തത്തിയൂര്‍, അഖില്‍ തൃപ്പലവൂര്‍, സുരേഷ് ഇടഞ്ഞി എന്നിവര്‍ നേതൃത്വം നല്‍കി.

പെരിങ്ങമ്മലയിൽ വിദേശമദ്യം പിടികൂടി

നേമം: പെരിങ്ങമ്മല ഇടുവയിൽ രഹസ്യ അറയിൽ ഒളിപ്പിച്ച നിലയിൽ 102 കുപ്പികളിലായി 51 ലിറ്റർ ഇന്ത്യൻ നിർമിത വിദേശ മദ്യം കണ്ടെത്തി. ഓണം സ്പെഷൽ ഡ്രൈവിന്‍റെ ഭാഗമായി നെയ്യാറ്റിൻകര എക്സൈസ് ഉദ്യോഗസ്ഥരുടെ നേതൃത്വത്തിൽ നടത്തിയ പരിശോധനയിലാണ് മദ്യം കണ്ടെത്തിയത്. പെരിങ്ങമ്മല ഇടുവ സ്വദേശി പ്രജീഷ് കുമാറി(45)നെ എക്സൈസ് അറസ്റ്റ് ചെയ്തു. ഓണകാലത്തെ അവധി ദിവസങ്ങളിൽ വിൽപന നടത്തുവാൻ വേണ്ടി ആയിരുന്നു മദ്യം രഹസ്യഅറയിൽ സൂക്ഷിച്ചത്. പ്രജീഷ് കുമാർ നിരവധി അബ്കാരി കേസുകളിൽ പ്രതിയാണെന്ന് എക്സൈസ് സംഘം പറഞ്ഞു. ഇൻസ്പെക്ടർ ജെ.എസ്. പ്രശാന്ത്, ആർ. രാജേഷ് കുമാർ, സിവിൽ ഓഫീസർമാരായ എസ്.എസ്. അനീഷ്, യു.കെ. ലാൽ കൃഷ്ണ, എം. വിനോദ് കുമാർ, ബി. പ്രസന്നൻ, അൽത്താഫ് മുഹമ്മദ്, ബി. അഖിൽ, വി.ജെ. വിഷ്ണു എന്നിവരടങ്ങിയ സംഘമാണ് പരിശോധന നടത്തിയത്.

അമ്മമാർക്കൊപ്പം പൂവനി

വിതുര: പള്ളിക്കൂടം, കുടുംബം, സമൂഹം എന്നിവ തമ്മിലുള്ള ബന്ധം ദൃഢമാക്കാൻ എൻഎസ്എസ് വോളന്‍റിയർമാർ പദ്ധതിയിട്ട 'അമ്മമാർക്കൊപ്പം പൂവനി' പൂവിട്ടു. ഓണക്കാല വിപണി ലക്ഷ്യമിട്ട് വിതുര ഗവ.വിഎച്ച്എസ്എസിലെ നാഷണൽ സർവീസ് സ്കീം വോളന്‍റിറിയർമാർ മദർ പിടിഎ യുമായി ചേർന്ന് ആരംഭിച്ച പരിപാടിയാണ് വിജയം കണ്ടത്. സാമൂഹിക പ്രവർത്തകനായ ഇ.എം. നസീർ സൗജന്യമായി അനുവദിച്ച കൃഷിഭൂമിയിലാണ് അധ്യാപകരുടെ മേൽനോട്ടത്തിൽ വിദ്യാർഥികൾ ജമന്തി കൃഷി ആരംഭിച്ചത്. പഞ്ചായത്തിന്‍റെയും കൃഷിഭവന്‍റെയും സ്കൂൾ പിടിഎയുടെയും പിന്തുണയുണ്ടായിരുന്നു. ആദ്യ വിളവെടുപ്പ് പഞ്ചായത്ത് പ്രസിഡന്‍റ് മഞ്ജുഷ ജി. ആനന്ദ് ഉദ്ഘാടനം ചെയ്തു. പ്രിൻസിപ്പൽ എ.ആർ. മഞ്ജുഷ, വൈസ് പ്രിൻസിപ്പൽ വി.എസ്. ഷീജ, പിടിഎ പ്രസിഡന്‍റ് ആർ. രവിബാലൻ, കൃഷി അസിസ്റ്റന്‍റ് കിരൺ, സ്റ്റാഫ് സെക്രട്ടറി എം.എൻ. ഷാഫി, പ്രോഗ്രാം ഓഫീസർ വി.പി. അരുൺ, അധ്യാപകരായ ധന്യ വി. മാത്യൂസ്, ജി.ആർ. അഞ്ജന, ജെ. ശ്രീവിദ്യ, എൻഎസ്എസ് വോളന്‍റിയർമാർ എന്നിവർ പങ്കെടുത്തു.

ഓണത്തിനു സാന്ത്വന സ്പർശം

നേമം: വിക്ടറി ഗേൾസ് സ്കൂളിലെ ഓണഘോഷ പരിപാടിയോടനുബന്ധിച്ച് സാന്ത്വനസ്പർശം എന്ന പേരിൽ സേവന പരിപാടി സംഘടിപ്പിച്ചു. നേമം സർക്കാർ ആശുപത്രി പാലിയേറ്റീവ് കെയർ യൂണിറ്റിലേക്കു വീൽ ചെയറും കിടപ്പു രോഗികൾക്ക് അവശ്യവസ്തുക്കളും നൽകി. കൂടാതെ സ്കൂളിലെ നിർധനരായ വിദ്യാർഥിനികൾക് ഭക്ഷണക്കിറ്റു വിതരണം ചെയ്തു. പാലിയേറ്റിവ് സ്റ്റാഫ് നഴ്സ് എം.ആർ. അശ്വതി.സ്കൂൾ മാനേജ്മെന്‍റ് പ്രതിനിധി കെ.വി. അനിൽകുമാർ, പ്രധാനാധ്യാപിക ആശ എസ്. നായർ, പിടിഎ പ്രസിഡന്‍റ് കവിത ഉണ്ണി, വൈസ് പ്രസിഡന്‍റ് ജയകുമാർ, സ്കൂൾ ലീഡർ നൈസാന ഫാത്തിമ, ദേവിക സുഭാഷ്, സിന്ധു സലൂജ എന്നിവർ പങ്കെടുത്തു.

ഓണാഘോഷത്തിനിടെ നിയമസഭയിലെ ഡെപ്യൂട്ടി ലൈബ്രേറിയൻ കുഴഞ്ഞുവീണു മരിച്ചു

തിരുവനന്തപുരം : ഓണാഘോഷത്തിനിടെ നിയമസഭയിലെ ഡെപ്യൂട്ടി ലൈബ്രേറിയൻ ജുനൈസ് അബ്ദുള്ള (46) കുഴഞ്ഞുവീണു മരിച്ചു. ഇന്നലെ വൈകുന്നേരം മൂന്നരയോടെ നിയമസഭയിലെ ശങ്കരനാരായണൻ തന്പി ഹാളിൽ നൃത്ത പരിപാടിക്കിടെയായിരുന്നു കുഴഞ്ഞുവീണത്. ജനറൽ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. ഹൃദയാഘാതമാണു മരണ കാരണം. ജുനൈസ് കാറ്റലോഗ് അസിസ്റ്റന്‍റായാണു ജോലിയിൽ പ്രവേശിച്ചത്. എംഎൽഎയായിരുന്ന പി.വി.അൻവറിന്‍റെ പേഴ്സണൽ അസിസ്റ്റന്‍റായി പ്രവർത്തിച്ചിരുന്നു. നന്തൻകോട് സർക്കാർ ക്വാർട്ടേഴ്സിലായിരുന്നു താമസം. സുൽത്താൻബത്തേരി സ്വദേശിയാണ്. ഉപ്പ: പരേതനായ കുഞ്ഞബ്ദുള്ള. ഉമ്മ: ആയിഷ വടക്കോടൻ. ഭാര്യ: റസീന (അധ്യാപിക, തിരുവനന്തപുരം). മക്കൾ: നജാദ് അബ്ദുള്ള, നിഹാദ് അബ്ദുള്ള. സഹോദരങ്ങൾ: ഷഹർബാൻ, റിസാനത്ത് സലീം, നാസർ (കുവൈത്ത്), ആരിഫ (ബത്തേരി എംഇഎസ് ആശുപത്രി), റസീന (ഫോറസ്റ്റ് റിസർച്ച് സെന്‍റർ, തിരുവനന്തപുരം). മൃതദേഹം നിയമസഭ ഓഫീസിൽ പൊതുദർശനത്തിനുശേഷം ഇന്നു രാത്രിയോടെ ബത്തേരിയിലെ വീട്ടിലെത്തിക്കും. ബത്തേരി ചുങ്കം ഖബറിസ്ഥാനിൽ ഖബറടക്കും. നിര്യാണത്തിൽ സ്പീക്കർ എ.എൻ.ഷംസീർ അനുശോചിച്ചു.

കോൺഗ്രസ് സമര സംഗമം സംഘിടിപ്പിച്ചു

കിളിമാനൂർ: ബിജെപി വോട്ടർ പട്ടിക തട്ടിപ്പിനും കേന്ദ്ര-സംസ്ഥാന സർക്കാരുകളുടെ അഴിമതിക്കും ദുർഭരണത്തിനുമെതിരെ കോൺഗ്രസിന്‍റെ സമര സംഗമം. കിളിമാനൂർ ബ്ലോക്ക് കോൺഗ്രസ് കമ്മിറ്റിയുടെ നേതൃത്വത്തിൽ നടന്ന സമര സംഗമം മുൻ കെപിസിസി പ്രസിഡന്‍റ് കെ. മുരളീധരൻ ഉദ്ഘാടനം ചെയ്തു. ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് എ.അഹമ്മദ് കബീർ അധ്യക്ഷത വഹിച്ചു. മുൻ ഡെപ്യൂട്ടി സ്പീക്കർ പാലോട് രവി മുഖ്യപ്രഭാഷണം നടത്തി. കെപിസിസി അംഗങ്ങളായ എൻ. സുദർശനൻ, ചെമ്പഴന്തി അനിൽ, ഡിസിസി ഭാരവാഹികളായ എ. ഷി ഹാബുദ്ദീൻ, പി. സൊണാൾജ്, പഞ്ചായത്ത് പ്രസിഡന്‍റുമാരായ എസ്. സുസ്മിത, പോങ്ങനാട് രാധാകൃഷ്ണൻ, മുൻ ബ്ലോക്ക് കോൺഗ്രസ് കമ്മിറ്റി പ്രസിഡന്‍റ് എം.കെ. ഗംഗാധര തിലകൻ എന്നിവർ പങ്കെടുത്തു. ചെറുനാരകംകോട് ജോണി സ്വാഗതവും എസ്. ശ്യാംനാഥ് നന്ദിയും പറഞ്ഞു.

എംഡിഎംഎയുമായി പിടിയിൽ

നെയ്യാർഡാം: എംഡിഎംഎയുമായി യുവാക്കൾ പിടിയിൽ. ആനാട് ശക്തിപുരം ലക്ഷ്മി നിവാസിൽ ഗോകുൽ (21), പെരിങ്ങമല പാലോട് ദേശത്ത് കൊല്ലരിക്കോണം തടത്തരുകത്ത് വീട്ടിൽ കിരൺജിത്ത് (36) എന്നിവരാണ് പിടിയിലായത്. ഇവരിൽ നിന്നും 145 ഗ്രാം എംഡിഎംഎ കണ്ടെത്തി. കള്ളിക്കാട് ജംഗ്ഷന് സമീപമുള്ള എക്‌സൈസ് ചെക്‌പോസ്റ്റിൽ ഇന്നലെ വെളുപ്പിന് ഒരുമണിയോടെയാണ് ഇവരെ പിടികൂടിയത്. ഇവർ സഞ്ചരിച്ചിരുന്ന പൾസർ മോട്ടോർസൈക്കിളും പിടിച്ചെടുത്തു. തമിഴ്‌നാട്ടിൽ നിന്നു ലഹരിവസ്തുക്കൾ വാങ്ങി വരവേയാണ് ഇവർ പിടിയിലായത്. നെടുമങ്ങാടു ഭാഗത്ത് രാസലഹരി വിതരണം ചെയ്യുന്ന സംഘത്തിൽപ്പെട്ടവരാണ് ഇവർ. അഞ്ചുലക്ഷം രൂപയുടെ എംഡിയാണ് പിടികൂടിയത് നെടുമങ്ങാട് പ്രദേശങ്ങളിൽ വിതരണം ചെയ്യാനാണ് ഇവർ എംഡിഎംഎ കൊണ്ടുവന്നതെന്ന് പോലീസിന് മൊഴി നൽകി. പ്രതികളിൽ ഒരാളായ ഗോകുലിന് മൂന്നോളം കഞ്ചാവ് കേസുകൾ വിവിധ സ്റ്റേഷനുകളിലായി ഉണ്ട്. ഇയാൾ നേരത്തെ വിദേശത്തായിരുന്നു. കിരൺ ജിത്തിനു നേരത്തെ ബംഗളൂരുവിൽ ജോലിയുണ്ടായിരുന്നു.

പട്ടയ വിതരണം നടത്തി

നെടുമങ്ങാട്: സര്‍ക്കാരിന്‍റെ അതിദാരിദ്ര്യ നിര്‍മാര്‍ജന പദ്ധതിയുടെ ഭാഗമായി നെടുമങ്ങാട് താലൂക്ക് പരിധിയിലുള്ള ദരിദ്രകുടുംബങ്ങള്‍ക്ക് പട്ടയം വിതരണം ചെയ്തു. ഡി.കെ. മുരളി എംഎല്‍എ പട്ടയമേള ഉദ്ഘാടനം ചെയ്തു. തഹസീല്‍ദാര്‍ എം.എസ്. ഷാജു അധ്യക്ഷനായി. പാങ്ങോട് വില്ലേജ് (3) തൊളിക്കോട് (5), നെല്ലനാട് (2), വാമനപുരം (1) കുടുംബങ്ങള്‍ക്കാണ് പട്ടയം അനുവദിച്ചത്. പാലോട് വില്ലേജില്‍ കണ്ടെത്തിയ ഭൂമിയില്‍ മൂന്നു സെന്‍റ് സ്ഥലം വീതമാണ് ഓരോ കുടുംബത്തിനും അനുവദിച്ചത്. തഹസീല്‍ദാര്‍ അനില്‍കുമാര്‍, ഗവ. പ്ലീഡര്‍ കിഷോര്‍കുമാര്‍, തദ്ദേശ സ്വയംഭരണ ജനപ്രതിനിധികള്‍ ഡെപ്യൂട്ടി തഹസീല്‍ദാര്‍മാര്‍, വില്ലേജ് ഓഫീസര്‍മാര്‍ തുടങ്ങിയവര്‍ പങ്കെടുത്തു.

എൻഎസ്എസ് 1500 ഓണക്കിറ്റുകൾ നൽകി

നേമം: തിരുവനന്തപുരം താലുക്ക് എൻഎസ്എസ് യൂണിയൻ ഓണക്കിറ്റുകൾ വിതരണം ചെയ്തു. യൂണിയനു കീഴിൽ ഉള്ള ഓരോ കരയോഗത്തിനും അഞ്ചു കിറ്റുകൾ വീതം 1500 കിറ്റുകൾ നൽകി. ഇതോടനു ബന്ധിച്ചു നടന്ന ചടങ്ങിൽ എൻഎസ്എസ് വൈസ് പ്രസിഡന്‍റ് എം. സംഗീത് കുമാർ അധ്യക്ഷതയിൽ നടന്ന സമ്മേളനം വിദ്യാഭ്യാസ മന്ത്രി വി.ശിവൻകുട്ടി ഉദ്ഘാടനം ചെയ്തു. വൈസ് പ്രസിഡന്‍റ് എം. കാർത്തികേയൻ നായർ, യൂണിയൻ സെക്രട്ടറി വിജു വി. നായർ, വനിതാ യൂണിയൻ പ്രസിഡന്‍റ് എം. ഈശ്വരി അമ്മ, യൂണിയൻ കമ്മിറ്റി അംഗങ്ങൾ, പ്രതിനിധി സഭാംഗങ്ങൾ എന്നിവർ പങ്കെടുത്തു

പട്ടിണിയില്ലാത്ത കേരളം സർക്കാർ ലക്ഷ്യം: മന്ത്രി ജി.ആർ. അനിൽ

നെടുമങ്ങാട്: കേരളത്തിലെ ഒരാളും പട്ടിണി കിടക്കുന്ന സാഹചര്യം ഉണ്ടാകരുത് എന്നതാണ് സർക്കാരിന്‍റെ പ്രഖ്യാപിത ലക്ഷ്യമെന്നു മന്ത്രി ജി.ആർ.അനിൽ. ഉഴമലയ്‌ക്കൽ പഞ്ചായത്തിലെ ഏലിയാവൂർ മാർക്കറ്റ് സ്റ്റാൾ, കുളപ്പട മാവേലി സ്റ്റോർ എന്നിവ ഉദ്ഘാടനം ചെയ്യുകയായിരുന്നു മന്ത്രി ജി.ആർ. അനിൽ. അതിദരിദ്രരില്ലാത്ത കേരളം എന്ന വലിയ നേട്ടത്തിലേക്ക് സംസ്ഥാനം അടുക്കുകയാണ്. നവംബർ മാസം ഒന്നാം തീയതിയോടെ കേരളം അതിദരിദ്രരില്ലാത്ത സംസ്ഥാനമായി പ്രഖ്യാപിക്കാനാണ് സർക്കാർ പ്രവർത്തിക്കുന്നതെന്നും അദ്ദേഹം പറഞ്ഞു. ജി. സ്റ്റീഫൻ എംഎൽഎയുടെ ആസ്ഥിവികസന ഫണ്ടിൽനിന്നും തുക വകയിരുത്തിയാണ് ഏലിയാവൂർ മാർക്കറ്റ് സ്റ്റാൾ ഇരുനിലകളിലായി നിർമിച്ചിരിക്കുന്നത്. ഇതിനോടൊപ്പം നിർമിച്ച കുളപ്പട മാവേലി സ്റ്റോറിന്‍റെ പുതിയ കെട്ടിടവും ജനങ്ങൾക്കായി തുറന്നു നൽകി. ജി.സ്റ്റീഫൻ എംഎൽഎ അധ്യക്ഷത വഹിച്ചു. ഉഴമലയ്ക്കൽ പഞ്ചായത്ത്‌ പ്രസിഡന്‍റ് ജെ. ലളിത, വെള്ളനാട് ബ്ലോക്ക്‌ പഞ്ചായത്ത്‌ അസിസ്റ്റന്‍റ് എൻജിനീയർ സതീഷ് കുമാർ, ഉഴമലയ്ക്കൽ പഞ്ചായത്ത്‌ വൈസ് പ്രസിഡന്‍റ് എസ്. ശേഖരൻ, വെള്ളനാട് ബ്ലോക്ക്‌ പഞ്ചായത്ത് അംഗം എ. റഹീം തുടങ്ങിയവർ പങ്കെടുത്തു.

നവീകരിച്ച് മാസങ്ങള്‍ക്കുള്ളില്‍ തകര്‍ന്ന് മഠത്തുനടയിലെ ഉദ്യാനം

പേരൂര്‍ക്കട: നവീകരണം നടത്തി മാസങ്ങള്‍ക്കുള്ളില്‍ തകര്‍ന്നടിഞ്ഞ് മഠത്തുനടയിലെ ഉദ്യാനം. സാഗര റസിഡന്‍റ്സ് അസോസിയേഷന്‍ പരിധിയില്‍ വരുന്ന മഠത്തുനട ജംഗ്ഷനിലെ ബസ് വെയിറ്റിംഗ് ഷെഡ്ഡിനോടു ചേര്‍ന്നുള്ള ഉദ്യാനമാണ് പൂർണമായും നശിച്ചത്. ഏകദേശം നാലുമാസത്തിനു മുമ്പാണ് ഇവിടെ മനോഹരമായ പുല്‍ത്തകിടി വച്ചുപിടിപ്പിക്കുകയും മുളകള്‍ കൊണ്ടുള്ള സംരക്ഷണവേലി സ്ഥാപിക്കുകയും ചെയ്തത്. മുളന്തടികള്‍ അവിടവിടെ ഇളകിക്കിടക്കുന്ന കാഴ്ചയാണ് ഇപ്പോള്‍ കാണാനാകുന്നത്. കരിഞ്ഞുണങ്ങിക്കിടക്കുകയാണ് പുല്‍ത്തകിടി. വെറ്റിംഗ് ഷെഡിനു സമീപം രണ്ടു ഫ്‌ളക്‌സ് ബോര്‍ഡുകളുടെ അവശിഷ്ടങ്ങളും കാണാന്‍ സാധിക്കും. തിരുവനന്തപുരം നഗരസഭയുടെ മേല്‍നോട്ടത്തില്‍ ഏറെ ആകര്‍ഷകമാക്കുകയും മനോഹരമായ ചെടികള്‍ വച്ചുപിടിപ്പിക്കുകയും ചെയ്തിരുന്ന ഭാഗമാണ് ഇപ്പോള്‍ പൂര്‍ണമായും നശിച്ചു കിടക്കുന്നത്. കുറഞ്ഞത് 50,000 രൂപയെങ്കിലും മുടക്കിയാണ് നവീകരണം പൂര്‍ത്തീകരിച്ചത്. ചെടികള്‍ക്കു വെള്ളമൊഴിച്ചുകൊണ്ടിരുന്നവരെയും ഇടയ്ക്കിടെ നേരിട്ടുവന്ന് ഉദ്യാനം പരിപാലിച്ചുകൊണ്ടിരുന്നവരെയും ഇപ്പോള്‍ കാണാനില്ലെന്ന് പ്രദേശവാസികള്‍ പറയുന്നു.

അന്നം ഊട്ടുന്നവരെ ആദരിക്കാൻ കുട്ടികൾ മടിക്കരുത്: പന്ന്യൻ രവീന്ദ്രൻ

നേമം: അന്നമൂട്ടുന്നവരെ ആദരിക്കാൻ പുതുതലമുറയിലെ കുട്ടികൾ മടിക്കരുതെന്ന് മുൻ പാർലമെന്‍റ് അംഗം പന്ന്യൻ രവീന്ദ്രൻ. സംസ്ഥാനത്തെ സ്കൂളുകളിലെ പാചക തൊഴിലാളികൾക്ക് ഓണപ്പുടവ സമ്മാനിക്കുന്നതിന്‍റെ സംസ്ഥാനതല ഉദ്ഘാടനം തിരുവനന്തപുരം നേമം ഗവൺമെന്‍റ് യുപിഎസിൽ നിർവഹിച്ചുസംസാരിക്കുകയായിരുന്നു അദ്ദേഹം. പൊതു വിദ്യാലയങ്ങളിലെ മികവുറ്റ അക്കാദമിക - ഇതരപ്രവർത്തനങ്ങൾ പ്രോത്സാഹിപ്പിക്കുന്നതിനായി പ്രവർത്തിച്ചുവരുന്ന വിദ്യാഭ്യാസ ഓൺലൈൻ ചാനലായ പള്ളിക്കൂടം ടിവിയുടെ നേതൃത്വത്തിലാണു പരിപാടി സംഘടിപ്പിച്ചത്. ആദരവ് ഏറ്റുവാങ്ങിയ സ്കൂളിലെ പാചക തൊഴിലാളികളായ ബുഷ്റ, ലളിത, സരോജിനി, വസന്ത എന്നിവർക്ക് ഇത് വേറിട്ട അനുഭവമായി. സംസ്ഥാന ബാലാവകാശ കമ്മീഷൻ ചെയർമാൻ കെ.വി. മനോജ് കുമാർ, എസ് ഐഇടി ഡയറക്ടർ ബി. അബുരാജ്, കല്ലിയൂർ പഞ്ചായത്ത് പ്രസിഡന്‍റ് എം. സോമശേഖരൻ നായർ, പഞ്ചായത്തംഗങ്ങളായ കെ.കെ. ചന്തുകൃഷ്ണ, ഇ.ബി. വിനോദ്കുമാർ, പള്ളിക്കൂടം ടിവി ചീഫ് എഡിറ്റർ ഡി. സുഗതൻ, എസ്എംസി ചെയർമാൻ എസ്. പ്രേംകുമാർ തുടങ്ങിയവർ ചട ങ്ങിൽ പ്രസംഗിച്ചു.

വയോധികനെ ആക്രമിച്ച ഓട്ടോഡ്രൈവര്‍ പിടിയില്‍

പേരൂര്‍ക്കട: വട്ടിയൂര്‍ക്കാവ് ജംഗ്ഷനില്‍ പിരിവിനെത്തിയ വയോധികനെ മർദിച്ച സംഭവത്തില്‍ ഓട്ടോഡ്രൈവറെ വട്ടിയൂര്‍ക്കാവ് പോലീസ് പിടികൂടി. വള്ളക്കടവ് വയ്യാമൂല സ്വദേശി ദീപു (39) വിനെയാണ് വള്ളക്കടവില്‍നിന്നു പോലീസ് കസ്റ്റഡിയിലെടുത്തത്. വെള്ളിയാഴ്ച വൈകുന്നേരമാണ് സംഭവം. സ്വകാര്യാവശ്യവുമായി വട്ടിയൂര്‍ക്കാവിലെത്തിയ ഡ്രൈവര്‍ക്കു സമീപമെത്തിയ വയോധികന്‍ പണം ആവശ്യപ്പെട്ടതാണ് ഡ്രൈവറെ പ്രകോപിപ്പിച്ചത്. വയോധികന്‍ ഭേദപ്പെട്ട നിലയില്‍ വസ്ത്രധാരണം ചെയ്തയാളായിരുന്നു. പ്രദേശത്തു പണം തട്ടിപ്പിനെത്തിയ ആളാണെന്നു തെറ്റിദ്ധരിച്ചാണ് വയോധികനെ മര്‍ദിച്ചതെന്നു ദീപു പോ ലീസിനു മൊഴിനല്‍കി. അതേസമയം മര്‍ദനമേറ്റയാളെ ഇനിയും തിരിച്ചറിഞ്ഞിട്ടില്ല. സംഭവം കണ്ടുനിന്ന ഒരു പ്രദേശവാസിയാണ് വട്ടിയൂര്‍ക്കാവ് പോലീസില്‍ വിവരം ധരിപ്പിക്കുന്നത്. തുടർന്നു കേസെടുത്ത് അന്വേഷണം നടത്തിയ പോലീസ് സിസിടിവി ദൃശ്യങ്ങള്‍ കേന്ദ്രീകരിച്ച് അന്വേഷണം ആരംഭിച്ചു. അറസ്റ്റിലായ ദീപുവിനെ പിന്നീട് സ്റ്റേഷന്‍ജാമ്യത്തില്‍ വിട്ടയച്ചു. വയോധികന്‍ ആരെന്നു കണ്ടെത്തുന്നതിനുള്ള അന്വേഷണം നടന്നുവരുന്നതായി വട്ടിയൂര്‍ക്കാവ് പോലീസ് അറിയിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]