ഫെഡറല്‍ ബാങ്ക് കൊച്ചി മാരത്തണ്‍: അഭിഷേക് സോണി, ശ്യാമലി സിംഗ് ജേതാക്കള്‍
Monday, February 10, 2025 12:18 AM IST
കൊച്ചി: ക്ലിയോ സ്‌പോര്‍ട്‌സ് സംഘടിപ്പിച്ച മൂന്നാമത് ഫെഡറല്‍ ബാങ്ക് കൊച്ചി മാരത്തണില്‍ പുരുഷ വിഭാഗത്തില്‍ അഭിഷേക് സോണിയും വനിതാ വിഭാഗത്തില്‍ ശ്യാമലി സിംഗും ജേതാക്കളായി. 42.1 കിലോമീറ്റർ ഫുള്‍ മാരത്തണില്‍ മധ്യപ്രദേശ് സ്വദേശി അഭിഷേക് രണ്ടു മണിക്കൂര്‍ 33 മിനിട്ട് 38 സെക്കൻഡില്‍ ഓടിയെത്തിയപ്പോള്‍ മൂന്നു മണിക്കൂര്‍ 10 മിനിറ്റ് 59 സെക്കന്‍ഡിലാണ് പശ്ചിമ ബംഗാള്‍ സ്വദേശിനി ശ്യാമലി ഓടിയെത്തിത്.
പുരുഷ വിഭാഗം ഫുള്‍ മാരത്തണില്‍ രണ്ടു മണിക്കൂര്‍ 36 മിനിറ്റ് 34 സെക്കന്‍ഡില്‍ ഓടിയെത്തിയ കമലാകര്‍ ലക്ഷ്മണ്‍ ദേശ്മുഖ് രണ്ടാം സ്ഥാനവും തെലു ങ്കാന സ്വദേശി രമേശ് ചന്ദ്ര (രണ്ട് മണിക്കൂര്‍ 38 മിനിറ്റ് 56 സെക്കന്‍ഡ്) മൂന്നാം സ്ഥാനവും കരസ്ഥമാക്കി. വനിതാ വിഭാഗത്തില്‍ ഹൈദരാബാദ് സ്വദേശി മാരിപ്പള്ളി ഉമ (മൂന്ന് മണിക്കൂര്‍ 17 മിനിറ്റ് 57 സെക്കന്‍ഡ്) രണ്ടാം സ്ഥാനവും മൂന്നു മണിക്കൂര്‍ 25 മിനിറ്റ് 40 സെക്കന്‍ഡില്‍ ഓടിയെത്തിയ സാക്ഷി ആനന്ദ് കസ്‌ബെ മൂന്നാം സ്ഥാനവും സ്വന്തമാക്കി.
വിവിധ രാജ്യങ്ങളില്‍നിന്നും ഇന്ത്യയില്‍ 20ല്‍ അധികം സംസ്ഥാനങ്ങളില്‍ നിന്നുമായി എണ്ണായിരത്തിലധികം പേരാണ് മൂന്നാം സീസണില്‍ പങ്കെടുത്തത്.
ഇന്നലെ പുലര്‍ച്ചെ നാലിന് മറൈന്‍ ഡ്രൈവ് ഷണ്‍മുഖം റോഡില്‍നിന്നാരംഭിച്ച മാരത്തണ്‍ ഫെഡറല്‍ ബാങ്ക് സിഎംഒ എം.വി.എസ്. മൂര്‍ത്തി, ഒളിമ്പ്യന്‍ ഗോപി തോന്നയ്ക്കല്‍, ഡോ. വിമല്‍ കോശി തോമസ്, മാരത്തണ്‍ റേസ് ഡയറക്ടര്‍ ഒളിമ്പ്യന്‍ ആനന്ദ് ലൂയിസ് മെനെസെസ്, ക്ലിയോ സ്‌പോര്‍ട്‌സ് ഡയറക്ടര്‍മാരായ ബൈജു പോള്‍, അനീഷ് പോള്‍, ശബരി നായര്‍ എന്നിവര്‍ ചേര്‍ന്ന് ഫ്‌ളാഗ് ഓഫ് ചെയ്തു.
പുരസ്‌കാരവിതരണ ചടങ്ങില്‍ ഹൈക്കോടതി ജഡ്ജി ജസ്റ്റീസ് ദേവന്‍ രാമചന്ദ്രന്‍ മുഖ്യാതിഥിയായിരുന്നു. ഹൈബി ഈഡന്‍ എംപി, കോസ്റ്റ് ഗാര്‍ഡ് ഡിഐജി എന്‍. രവി, ഫെഡറല്‍ ബാങ്ക് എക്‌സി. ഡയറക്ടര്‍ ശാലിനി വാര്യര്‍, ഫെഡറല്‍ ബാങ്ക് സിഎഫ്ഒ വെങ്കട്ട്‌രാമന്‍ വെങ്കട്ടേശ്വരന്‍, മാരത്തണ്‍ ഗുഡ്‌വില്‍ അംബാസിഡര്‍ പ്രാച്ചി തെഹ്‌ലാന്‍, ജെയിന്‍ യൂണിവേഴ്‌സിറ്റി പ്രഫ. ലിസി ജൂലിയസ് എന്നിവര്‍ പങ്കെടുത്തു.