ഉരുൾപൊട്ടൽ ദുരന്തത്തിൽ അകപ്പെട്ടവരുടെ പുനരധിവാസത്തിനായി ദീപികയും കെസിബിസിയും ചേർന്നു സ്വരൂപിക്കുന്ന നിധിയിലേക്ക് 1.2 കോടി രൂപ ബിഷപ് മാർ പോളി കണ്ണൂക്കാടൻ കൈമാറി. ഭവനം നഷ്ടപ്പെട്ടവർക്കു വീട് വച്ചുനൽകാൻ ഒരു കോടി രൂപയും പുനരധിവാസ പ്രവർത്തനങ്ങൾക്കായി 20 ലക്ഷം രൂപയുമാണ് കേരള സോഷ‍്യൽ സർവീസ് ഫോറം എക്സിക‍്യുട്ടീവ് ഡയറക്ടർ ഫാ. ജേക്കബ് മാവുങ്കലിന് കൈമാറിയത്.
സിയാൽ മുൻ എംഡി ഡോ. വി.ജെ. കുര്യനു കേരള സഭാതാരം അവാർഡ് മേജർ ആർച്ച്ബിഷപ്പും ഇരിങ്ങാലക്കുട മാർ പോളി കണ്ണൂക്കാടനും ചേർന്ന് സമ്മാനിച്ചു. കോടാനുകോടി രൂപയുടെ ക്രയവിക്രയം സത്യസന്ധമായി വിനിയോഗിച്ച് നെടുന്പാശേരി വിമാനത്താവളം മനോഹരമായി യാഥാർഥ്യമാക്കി ക്രൈസ്തവസാക്ഷ്യം നൽകിയ മഹദ്‌വ്യക്തിയാണ് വി.ജെ. കുര്യനെന്നു മാർ തട്ടിൽ പറഞ്ഞു.
ബെന്നി ബഹനാൻ എംപി മുഖ്യാതിഥിയായിരുന്നു. ഹൊസൂർ ബിഷപ് മാർ സെബാസ്റ്റ്യൻ പൊഴോലിപ്പറന്പിൽ, സനീഷ്കുമാർ ജോസഫ് എംഎൽഎ, ഫാ. ആന്‍റണി മുക്കാട്ടുകരക്കാരൻ, സിസ്റ്റർ ലൂസീന സിഎസ്‌സി, പാസ്റ്ററൽ കൗൺസിൽ സെക്രട്ടറി ഡേവിസ് ഊക്കൻ എന്നിവർ ആശംസകളർപ്പിച്ചു. വികാരി ജനറാൾമാരായ മോൺ. ജോസ് മാളിയേക്കൽ സ്വാഗതവും മോൺ. വിൽസൻ ഈരത്തറ നന്ദിയും പറഞ്ഞു.
തുടർന്ന് ചാലക്കുടി കുറ്റിക്കാട് കൂർക്കമറ്റത്ത് ആരംഭിക്കുന്ന സ്‌നേഹസദന്‍റെ ആശീര്‍വാദകര്‍മവും മേജര്‍ ആര്‍ച്ച്ബിഷപ് നിര്‍വഹിച്ചു.