എഡിജിപിയെ ഇന്‍റലിജന്‍സ് നിരീക്ഷണത്തിനു വിധേയമാക്കണം: പി.വി. അന്‍വര്‍
Tuesday, September 10, 2024 1:48 AM IST
മഞ്ചേരി : ആഭ്യന്തരവകുപ്പിനെതിരേ പി.വി. അന്‍വര്‍ എംഎല്‍എയുടെ വെളിപ്പെടുത്തലുകള്‍ തുടരുന്നു.
എം.ആര്‍. അജിത് കുമാറിനെ എഡിജിപി സ്ഥാനത്തു നിന്ന് മാറ്റിനിര്‍ത്തിയതു കൊണ്ടു മാത്രം ഫലമില്ല. മറിച്ച് അദ്ദേഹത്തിന്‍റെ തുടര്‍നീക്കങ്ങള്‍ കൃത്യമായ ഇന്‍റലിജന്‍സ് നിരീക്ഷണത്തിനു വിധേയമാക്കണമെന്ന് അന്‍വര്‍ ആവശ്യപ്പെട്ടു.
ഞെട്ടിക്കുന്ന കാര്യങ്ങളാണ് എഡിജിപിക്കെതിരേ വന്നുകൊണ്ടിരിക്കുന്നത്. ഇതുവരെ സാമ്പത്തിക മേഖലയിലെ കള്ളക്കളികളാണു പുറത്തുവന്നതെങ്കില്‍ ഇവര്‍ നടത്തിയ രാഷ്‌ട്രീയമായ അട്ടിമറികളുടെ വിവരമാണു വരാനിരിക്കുന്നത്. അജിത് കുമാറിനെ ക്രമസമാധാന ചുമതലയില്‍ നിലനിര്‍ത്തുന്നതുതന്നെ കുരുക്കാനാണെന്നും അന്‍വര്‍ ആരോപിച്ചു. തനിക്ക് വല്ലതും സംഭവിച്ചാലും തെളിവുകള്‍ ഇല്ലാതാകില്ലെന്നും എല്ലാ തെളിവുകളും തിരിച്ചുവരുമെന്നും അന്‍വര്‍ പറഞ്ഞു.
"എല്ലാ പരിധിയും അജിത്കുമാറും സംഘവും ലംഘിച്ചിട്ടുണ്ട്. ക്രിമിനല്‍സംഘത്തില്‍ ഇനിയും പല വന്‍മീനുകളും ഉണ്ട്. അവരെയെല്ലാം പുറത്തുകൊണ്ടുവരും.
കേരളം കാതോര്‍ത്തിരുന്ന ചില കേസുകള്‍ അജിത് കുമാര്‍ അട്ടിമറിച്ചിട്ടുണ്ട്. അതിന്‍റെ വക്കും മൂലയും ഇപ്പോള്‍ എനിക്ക് ലഭിച്ചിട്ടുണ്ട്. അധികം വൈകാതെ കൂടുതല്‍ വിവരം ലഭ്യമാകും. അതും പുറത്തുവിടും. ഒരു സര്‍ക്കാരിനെ മാത്രമല്ല ഒരു മുന്നണിയെ പോലും ബാധിക്കാന്‍ സാധ്യതയുള്ള കേരളത്തിലെ അതിപ്രമാദമായ രാഷ്ട്രീയ കേസ് അന്തം വിട്ടുപോകുന്ന രീതിയിലാണ് അട്ടിമറിച്ചത്-അന്‍വര്‍ പറഞ്ഞു.
മുഖ്യമന്ത്രിയുടേതടക്കം ഇടത്,വലതു നേതാക്കളുടെ ഫോണ്‍ ചോര്‍ത്തിയതായും അന്‍വര്‍ പറഞ്ഞു. മലപ്പുറം അരീക്കോട് തണ്ടര്‍ ബോള്‍ട്ട് ആസ്ഥാനത്ത് സ്ഥാപിച്ച അത്യാധുനിക ഇന്‍റര്‍സെപ്ഷന്‍ സംവിധാനത്തിന്‍റെ സഹായത്തോടെയാണ് സിപിഎം, കോണ്‍ഗ്രസ്, ലീഗ് ഉള്‍പ്പെടെയുള്ള പാര്‍ട്ടി നേതാക്കുളുടെ ഫോണ്‍ ചോര്‍ത്തിയത്.
എഡിജിപി എം.ആര്‍. അജിത്കുമാറിന്‍റെ വിശ്വസ്തനായ, അരീക്കോട് ക്യാമ്പിലെ കമന്‍ഡാന്‍റ് അജിത്കുമാറിനെ ഉപയോഗിച്ചാണ് ഫോണ്‍ ചോര്‍ത്തിയത്. ഉദ്യോഗസ്ഥരായ കെ.കെ. ജിനീഷ്, എസ്. ശരത്ത്, ജയപ്രസാദ്, രൂപേഷ് എന്നിവര്‍ക്കായിരുന്നു മുഖ്യമന്ത്രിയുടേതുള്‍പ്പെടെയുള്ള ഫോണുകള്‍ ചോര്‍ത്തുന്നതിന്‍റെ ചുമതല.
വാട്സ് ആപ്, ഇന്‍സ്റ്റഗ്രാം, ടെലഗ്രാം അക്കൗണ്ടുകളിലും ഇവര്‍ നുഴഞ്ഞു കയറി. മുഖ്യമന്ത്രിയുടെ വീട്ടിലെ തൂപ്പുകാരിയുടെ ശബ്ദം വരെ സുജിത്ദാസ് തന്‍റെ കൈവശമുണ്ടെന്ന് അവകാശപ്പെട്ടതായും അന്‍വര്‍ വാര്‍ത്താസമ്മേളനത്തില്‍ പറഞ്ഞു.
""കേരളത്തിലെ മുതിര്‍ന്ന മാധ്യമപ്രവര്‍ത്തകരുടെയും ഫോണ്‍ ചോര്‍ത്തുന്നുണ്ട്. മാവോയിസ്റ്റ് വിരുദ്ധ സ്ക്വാഡിനു നല്‍കിയ പ്രത്യേക അനുമതി ദുരുപയോഗം ചെയ്തായിരുന്നു ഇവരുടെ പ്രവൃത്തി. സ്വര്‍ണക്കടത്തിനു പുറമേ കുഴല്‍പ്പണക്കാരുടെയും പണം സുജിത്ദാസും സംഘവും തട്ടിയെടുക്കുന്നുണ്ട്.
എഡിജിപി അജിത്കുമാറിനെ ആരാണ് സംരക്ഷിക്കുന്നത് എന്ന് എനിക്കറിയില്ല. കേസ് അന്വേഷണത്തിന് പോയ വനിതാ പോലീസ് ഓഫീസര്‍ മൈസൂരില്‍വച്ച് അപകടത്തില്‍ പരിക്കേറ്റ് മരിച്ചു. കൃത്യമായ ചികില്‍സ ലഭിക്കാതെ ഇവര്‍ മരിക്കാനിടയാക്കിയതും സ്വര്‍ണക്കള്ളക്കടത്ത് സംഘവുമായുള്ള അജിത്കുമാറിന്‍റെ പങ്കും അന്വേഷിക്കണം’’- അന്‍വര്‍ ആവശ്യപ്പെട്ടു.