250ലേറെ പേർ കൊല്ലപ്പെടുകയും അരലക്ഷത്തിലേറെ പേർ ഭവനരഹിതരാകുകയും ചെയ്ത കലാപം 15-ാം മാസത്തിലേക്കു കടന്നിട്ടും കലാപകാരികളെ നിയന്ത്രിക്കാൻ കേന്ദ്ര, സംസ്ഥാന സർക്കാരുകൾ നടപടി സ്വീകരിക്കാത്തത് ഗുരുതര ഭവിഷ്യത്താണു സൃഷ്ടിക്കുന്നതെന്ന് കോണ്ഗ്രസ് കുറ്റപ്പെടുത്തി.
ഒരു വർഷത്തിലേറെയായി സംഘർഷം തുടരുന്ന മണിപ്പുർ സന്ദർശിക്കാനും ദുരിബാധിതരെ ആശ്വസിപ്പിക്കാനും പ്രധാനമന്ത്രി നരേന്ദ്ര മോദി തയാറാകാത്തതുതന്നെ സർക്കാരിന്റെ വീഴ്ചയുടെ പ്രതിഫലനമാണെന്നും കോണ്ഗ്രസ് ചൂണ്ടിക്കാട്ടി.
ജിരിബാമിലെ കുക്കി വിഭാഗക്കാരായ ഹമർ ഗോത്രവർഗക്കാർക്കു നേരേ മെയ്തെയ്കൾ നടത്തിയ ആക്രമണങ്ങളെത്തുടർന്ന് ഏതാനും ആഴ്ചകളായി മേഖലയിൽ സംഘർഷം നിലനിൽക്കുകയായിരുന്നു. മണിപ്പുർ സർക്കാരിന്റെയും പോലീസിന്റെയും പിന്തുണയോടെ കുക്കി ഗ്രാമങ്ങളിൽ മാത്രം നടത്തുന്ന പരിശോധനയ്ക്കെതിരേയും പ്രദേശവാസികൾ പ്രതിഷേധിച്ചിരുന്നു.
കഴിഞ്ഞ വർഷം മേയ് മൂന്നിന് മെയ്തെയ്കളും കുക്കികളും തമ്മിൽ സംഘർഷം ആരംഭിച്ചതിനു ശേഷം ഒരു വർഷത്തിലേറെയായി ജിരിബാമിൽ അക്രമം ഉണ്ടായിരുന്നില്ല.
എന്നാൽ മെയ്തെയ്കളും സംസ്ഥാന പോലീസും ചേർന്ന് കഴിഞ്ഞ മാസം ജിരിബാമിൽ ആക്രമണം തുടങ്ങിയെന്നാണ് കുക്കികൾ പറയുന്നത്. ജിരിബാമിലൂടെ കടന്നുപോകുന്ന ആസാമിലെ കച്ചാറുമായി ഇംഫാലിനെ ബന്ധിപ്പിക്കുന്ന മണിപ്പുരിലെ ദേശീയപാത 37ൽ മെയ്തെയ്കൾ വാഹനപരിശോധനയെന്ന പേരിൽ കുക്കികളുടെ ചരക്കുനീക്കം തടസപ്പെടുത്തിയതാണ് പുതിയ പ്രകോപനത്തിനു കാരണമായതെന്നാണ് സൂചന.