സംയുക്ത സെലക്‌ഷന്‍ ട്രയല്‍സ് ഇന്നു നെടുങ്കണ്ടത്ത്
1509354
Wednesday, January 29, 2025 11:36 PM IST
നെടുങ്കണ്ടം: സംസ്ഥാനത്തെ വിവിധ സ്‌പോര്‍ട്‌സ് സ്‌കൂളുകള്‍, ഹോസ്റ്റലുകള്‍, അക്കാദമികള്‍ എന്നിവയിലേക്കുള്ള സംയുക്ത സെലക്‌ഷന്‍ ട്രയല്‍സ് ഇന്നു രാവിലെ ഒമ്പത് മുതല്‍ നെടുങ്കണ്ടം പഞ്ചായത്ത് സ്റ്റേഡിയത്തില്‍ നടക്കും. തിരുവനന്തപുരം ജിവി രാജാ സ്‌പോര്‍ട്‌സ് സ്‌കൂള്‍, കണ്ണൂര്‍ സ്‌പോര്‍ട്‌സ് സ്‌കൂള്‍, കേരള സ്‌പോര്‍ട്‌സ് കൗണ്‍സിലിന് കീഴിലുള്ള വിവിധ സ്‌പോര്‍ട്‌സ് ഹോസ്റ്റലുകള്‍, അക്കാദമികള്‍ എന്നിവിടങ്ങളിലേക്കുള്ള സംയുക്ത ട്രയല്‍സ് ആണ് നടക്കുന്നത്.
ആറാം ക്ലാസ് മുതല്‍ പ്ലസ് വണ്ണിലേക്കുള്ള വിദ്യാര്‍ഥികള്‍വരെയുള്ളവര്‍ക്കായാണ് ട്രയല്‍സ് നടക്കുന്നത്. ആറ്, ഏഴ്, എട്ട്, പ്ലസ് വണ്‍ ക്ലാസുകളിലേക്ക് കോമണ്‍ സെലക്‌ഷനും ഒമ്പത്, പത്ത് ക്ലാസുകളിലെ ഒഴിവുള്ള സീറ്റുകളില്‍ സംസ്ഥാന മെഡലുകള്‍ നേടിയവര്‍ക്കുള്ള ലാറ്ററല്‍ എന്‍ട്രി സെലക്‌ഷനുമാണ് നടക്കുന്നത്.
അത്‌ലറ്റിക്‌സ്, ബോക്‌സിംഗ്, ജൂഡോ, വോളിബോള്‍, ബാസ്‌കറ്റ് ബോള്‍, റെസിലിംഗ്, തായ്‌ക്വെന്‍ഡോ (ഗേള്‍സ്), ഫുട്‌ബോള്‍ (ഗേള്‍സ്), ഹോക്കി എന്നീ ഗെയിമുകളിലേക്കാണ് സെലക്‌ഷന്‍.
സെലക്‌ഷന്‍ ആഗ്രഹിക്കുന്നവര്‍ ആധാര്‍ കാര്‍ഡിന്‍റെയും ബര്‍ത്ത് സര്‍ട്ടിഫിക്കറ്റിന്‍റെയും കോപ്പിയും ഫോട്ടോയും ട്രയല്‍സിന് അനുയോജ്യമായ ഡ്രസും സഹിതം രാവിലെ ഒമ്പതിന് നെടുങ്കണ്ടം പഞ്ചായത്ത് സ്റ്റേഡിയത്തില്‍ എത്തണമെന്ന് സംഘാടകര്‍ അറിയിച്ചു.