ചൈതന്യ കാര്‍ഷികമേള ഫെബ്രുവരി രണ്ടു മുതല്‍ ഒമ്പതുവരെ
1509342
Wednesday, January 29, 2025 11:36 PM IST
കോട്ടയം: കോട്ടയം സോഷ്യല്‍ സര്‍വീസ് സൊസൈറ്റിയുടെ ആഭിമുഖ്യത്തില്‍ ചൈതന്യ കാര്‍ഷികമേള ഫെബ്രുവരി രണ്ടുമുതല്‍ ഒന്‍പതുവരെ തെള്ളകം ചൈതന്യ പാസ്റ്ററല്‍ സെന്‍ററില്‍ നടത്തും.
കാര്‍ഷിക മേളയോടൊപ്പം നാടന്‍ പശുക്കളുടെ പ്രദര്‍ശനം, സ്റ്റാച്ച്യു പാര്‍ക്ക്, വിള പ്രദര്‍ശനം, അമ്യൂസ്മെന്‍റ് പാര്‍ക്ക്, പെറ്റ് ഷോ, പുരാവസ്തു പ്രദര്‍ശനം, പൗരാണിക ഭോജനശാല, മെഡിക്കല്‍ ക്യാമ്പ്, പച്ചമരുന്ന്-പാരമ്പര്യ ചികിത്സാരീതി പ്രദര്‍ശനം, പുഷ്പഫല വൃക്ഷാദികളുടെയും പക്ഷി മൃഗാദികളുടെയും പ്രദര്‍ശനവം വിപണനവും തുടങ്ങിയ പരിപാടികളുണ്ടെന്നു കോട്ടയം സോഷ്യല്‍ സര്‍വീസ് സൊസൈറ്റി എക്സിക്യൂട്ടീവ് ഡയറക്ടര്‍ ഫാ. സുനില്‍ പെരുമാനൂര്‍ പത്രസമ്മേളനത്തില്‍ അറിയിച്ചു.
രണ്ടിന് ഉച്ചയ്ക്ക് 2.30നു സ്വാശ്രയസംഘമഹോത്സവം ഉദ്ഘാടനം മന്ത്രി വി.എന്‍. വാസവനും കാര്‍ഷികമേള ഉദ്ഘാടനം മന്ത്രി പി. പ്രസാദും നിർവഹിക്കും.മൂന്നിന് ഉച്ചയ്ക്ക് 2.30ന് മന്ത്രി റോഷി അഗസ്റ്റിന്‍റെ അധ്യക്ഷതയില്‍ മന്ത്രി കെ. കൃഷ്ണന്‍കുട്ടി സമ്മേളനം ഉദ്ഘാടനം ചെയ്യും. നാലിന് ഉച്ചക്കു 2.30നു പരിസ്ഥിതി സൗഹാര്‍ദ സമ്മേളനം മന്ത്രി രാമചന്ദ്രന്‍ കടന്നപ്പള്ളി ഉദ്ഘാടനം ചെയ്യും. ആര്‍ച്ച്ബിഷപ് മാര്‍ തോമസ് തറയില്‍ അധ്യക്ഷത വഹിക്കും. എട്ടിന് ഉച്ചകഴിഞ്ഞ് 2.30ന് ഭക്ഷ്യസുരക്ഷാദിനം മന്ത്രി ജി.ആര്‍. അനില്‍ ഉദ്ഘാടനം ചെയ്യും. മന്ത്രി എ.കെ. ശശീന്ദ്രന്‍ മുഖ്യപ്രഭാഷണം നടത്തും. ഒമ്പതിന് ഉച്ചകഴിഞ്ഞ് 2.30 ന് സമാപനസമ്മേളനത്തില്‍ ആര്‍ച്ച്ബിഷപ് മാര്‍ മാത്യു മൂലക്കാട്ട് അധ്യക്ഷത വഹിക്കും. മന്ത്രി വി.എന്‍. വാസവന്‍ ഉദ്ഘാടനം ചെയ്യും. യോഗത്തില്‍ കാരുണ്യശ്രേഷ്ഠ, സാമൂഹ്യശ്രേഷ്ഠ പുരസ്‌കാരങ്ങള്‍ സമര്‍പ്പിക്കും.