അടിമാലി: കേരള ഗവർണർ ആരിഫ് മുഹമ്മദ്ഖാന്റെ കൈയിൽനിന്നു അവാർഡ് സ്വീകരിച്ചതിന്റെ സന്തോഷത്തിലാണ് മരച്ചീനി കർഷകനും അടിമാലി സ്വദേശിയുമായ കെ.വി. തോമസ്. കൃഷി വിജ്ഞാന കേന്ദ്രത്തിന്റെ മുഖ്യ കർഷകരിൽ ഒരാളാണ് ഇദ്ദേഹം. കേന്ദ്ര കിഴങ്ങുവിള ഗവേഷണ കേന്ദ്രം വികസിപ്പിച്ചെടുത്ത മരച്ചീനി വർഷങ്ങളായി നൂതന രീതിൽ കൃഷി ചെയ്യുന്നുണ്ട് തോമസ്.
കേന്ദ്ര കിഴങ്ങുവിള ഗവേഷണ കേന്ദ്രത്തിന്റെ അറുപത്തൊന്നാമത് ഫൗണ്ടേഷൻ ദിനത്തോട് അനുബന്ധിച്ചു നടന്ന ചടങ്ങിലാണ് കൃഷി വിജ്ഞാന കേന്ദ്രത്തിന്റെ നാമ നിർദേശ പ്രകാരം തോമസിന് കേരള ഗവർണർ ആരിഫ് മുഹമ്മദ്ഖാൻ അവാർഡ് സമ്മാനിച്ചത്. അവാർഡ്ദാന ചടങ്ങിൽ കേന്ദ്ര കിഴങ്ങ് വിള ഗവേഷണ കേന്ദ്രം ഡയറക്ടർ ഡോ. ജി. ബൈജു, രാജീവ് ഗാന്ധി സെന്റർ ഫോർ ബിയോടെക്നോളജി ഡയറക്ടർ പ്രഫ. ചന്ദ്രഭാസ് നാരായണ എന്നിവരും പങ്കെടുത്തു.