ചെറുപുഷ്പ സ്കൂളിൽ കുട്ടികളുമായി സംവദിച്ച് ജർമൻ സംഘം
1463383
Wednesday, October 23, 2024 7:15 AM IST
ചാരുംമൂട്: ചുനക്കര ചെറുപുഷ്പ ബഥനി സീനിയർ സെക്കൻഡറി സ്കൂളിലെ കുട്ടികളോട് സംവദിച്ച് ജർമൻ സംഘം. 36 അംഗ ജർമൻ സംഘമാണ് സ്കൂൾ സന്ദർശിക്കാനെത്തിയത്. മാനേജ്മെന്റും അധ്യാപകരും വിദ്യാർഥികളും ചേർന്ന് കേരളീയ തനിമയിൽ വാദ്യഘോഷങ്ങളോടെ ജർമൻ സംഘത്തെ സ്വീകരിച്ചു. തുടർന്ന് സ്കൂളിൽ നടന്ന സമ്മേളനം ജർമൻ സംഘാംഗമായ ആൽവിൻ ക്ലുംബർ ഉദ്ഘാടനം ചെയ്തു.
സ്കൂൾ മാനേജർ ഫാ. ക്രിസ്റ്റി ജോൺ, പ്രിൻസിപ്പൽ ഫാ. ജയിംസ് വർഗീസ്, ബർസാർ ഫാ. സജി സൈമൺ, പിടിഎ വൈസ് പ്രസിഡന്റ് രഞ്ജിനി പ്രവീൺ, അബ്ദുൾ ജബ്ബാർ, അനിൽ എ.ജി, അനിത് പി. ജോൺ എന്നിവർ പങ്കെടുത്തു. ജർമൻ സംഘത്തിനുവേണ്ടി കേരളത്തിന്റെ തനത് കലാരൂപങ്ങൾ ഉൾപ്പെടുന്ന വിവിധ കലാപരിപാടികൾ വിദ്യാർഥികൾ അവതരിപ്പിച്ചു.
തുടർന്ന് വിദ്യാർഥികളും അധ്യാപകരുമായി സംഘാംഗങ്ങൾ അന്തർദേശീയതലത്തിലെ വിദ്യാഭ്യാസപരവും കലാ-കായികപരവും സാംസ്കാരികപരവുമായ കാര്യങ്ങളിൽ ചർച്ചകൾ നടത്തി. സ്കൂളിലെ പുരാവസ്തു മ്യൂസിയത്തിലെ വിവിധ ശേഖരങ്ങളെക്കുറിച്ച് വിദ്യാർഥികൾ സംഘാംഗങ്ങൾക്ക് വിശദീകരിച്ചു നൽകി.
തുടർന്ന് കുട്ടികളുടെ ക്ലാസ് റൂമുകൾ സന്ദർശിച്ച സംഘം അവരുമായി ജർമൻ ഭാഷയുടെ പ്രാധാന്യത്തെക്കുറിച്ചും ജർമൻ സംസ്കാരത്തെക്കുറിച്ചും ആശയവിനിമയം നടത്തുകയും കുട്ടികളുടെ ചോദ്യങ്ങൾക്കും സംശയങ്ങൾക്കും ഉത്തരം നൽകുകയും ചെയ്തു. ജർമൻ സംഘവുമായുള്ള ആശയ സംവാദം വിദ്യാർഥികൾക്ക് നവ്യാനുഭവം പകർന്നു.