ഉദ്ഘാടനം ചെയ്യാന്‍ ആളെ തിരക്കി സംഘാടകര്‍: റവന്യു ജില്ലാ ശാസ്ത്രോത്സവത്തിനു തുടക്കമായി
1463378
Wednesday, October 23, 2024 7:15 AM IST
ചേര്‍ത്തല: റവന്യു ജില്ലാ ശാസ്ത്രോത്സവം ചേര്‍ത്തല ഗവ. ഗേള്‍സ് സ്‌കൂളില്‍ ജില്ലാ പഞ്ചായത്ത് വൈസ് പ്രസിഡന്‍റ് എന്‍.എസ്. ശിവപ്രസാദ് ഉദ്ഘാടനം ചെയ്തു. ഉദ്ഘാടകനായി നിശ്ചയിച്ചിരുന്ന മന്ത്രി പി. പ്രസാദും അധ്യക്ഷയായിരുന്ന ദലീമ ജോജ എംഎല്‍എയും മുഖ്യപ്രഭാഷകയായിരുന്ന നഗരസഭാ ചെയര്‍പേഴ്‌സണ്‍ ഷേര്‍ളി ഭാര്‍ഗവനും എത്താതിരുന്ന സാഹചര്യം ആശയകുഴപ്പങ്ങള്‍ക്കിടയാക്കിയിരുന്നു.
ഒടുവില്‍ 11 ഓടെയാണ് ജില്ലാപഞ്ചായത്ത് വൈസ് പ്രസിഡന്‍റ് എന്‍.എസ്. ശിവപ്രസാദ് മേള ഉദ്ഘാടനം ചെയ്തത്. നഗരസഭ വിദ്യാഭ്യാസ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ ഏലിക്കുട്ടി ജോണ്‍ അധ്യക്ഷയായി. വികസനകാര്യ സ്റ്റാന്‍ഡിംഗ് കമ്മിറ്റി ചെയര്‍പേഴ്‌സണ്‍ ശോഭാ ജോഷി, കൗണ്‍സിലര്‍ ബാബു മുള്ളന്‍ചിറ, ജില്ലാ ഡപ്യൂട്ടി ഡയറക്ടര്‍ ഇ.എസ്. ശ്രീലത, ഡയറ്റ് പ്രിന്‍സിപ്പല്‍ ഡോ.കെ.എ. ബിന്ദു, ചേര്‍ത്തല ഡിഇഒ എ.കെ. പ്രതീഷ്, സ്‌കൂള്‍ പ്രഥമാധ്യാപിക ബിന്ദു, പിടിഎ പ്രസിഡന്‍റ് സതീശന്‍, മഞ്ജു, അലക്‌സ്, അധ്യാപക സംഘടനാ പ്രതിനിധികള്‍ തുടങ്ങിയവര്‍ പങ്കെടുത്തു. മന്ത്രി തിരുവനന്തപുരത്തും മറ്റുള്ളവര്‍ വ്യക്തിപരമായ തിരക്കിലും പെട്ടതിനാല്‍ ഉദ്ഘാടനത്തിന് എത്താനാകില്ലെന്ന് അറിയിച്ചിരുന്നതായി സംഘാടകര്‍ പറഞ്ഞു.