ശുചിമുറിയിൽനിന്നുള്ള പൈപ്പുലൈൻ പൊട്ടി രോഗികളുടെ ദേഹത്ത് മലിനജലം വീണു
1463373
Wednesday, October 23, 2024 7:15 AM IST
കായംകുളം: രക്തം പരിശോധിക്കാൻ കാത്തിരുന്ന രോഗികളുടെ വസ്ത്രങ്ങളിലും ശരീരത്തിലും മലിനജലം വീണത് പ്രതിഷേധത്തിനിടയാക്കി. കായംകുളം താലൂക്ക് ആശുപത്രിയിലാണ് സംഭവം. ആശുപത്രിയുടെ മുകളിലത്തെ നിലയിലെ ശുചിമുറിയിൽനിന്നും ടാങ്കിലേക്കു പോകുന്ന പൈപ്പാണ് പൊട്ടിയത്. ഇന്നലെ രാവിലെ 11ന് രോഗികളുടെ തിരക്കുള്ള സമയത്തായിരുന്നു സംഭവം.
രക്ത പരിശോധനയ്ക്കായി ലാബിനു മുന്നിൽ കാത്തിരുന്ന രോഗികളുടെ ദേഹത്തേക്ക് പൊട്ടിയ പൈപ്പ് ലൈനിൽനിന്നും മലിനജലം വീഴുകയായിരുന്നു. തുടർന്ന് രോഗികൾ പ്രതിഷേധവുമായി രംഗത്തെത്തി. കുട്ടികളുടെ ദേഹത്തേക്കും മലിനജലം വീണു. ആശുപത്രിയിൽ മലിനജല ടാങ്കിലേക്കുള്ള പൈപ്പുപൊട്ടി റോഡിലേക്ക് ഒഴുകുന്നത് നിത്യസംഭവമാണ്. പരിശോധനയ്ക്ക് എത്തിയവർ സൂപ്രണ്ടിനു പരാതി നൽകി.