നഗരപരിധിയില്‍ കാട്ടുപന്നിയെ വെടിവച്ചു : Deepika.com Nattu Visesham

19 വർഷം ഒളിവിൽ കഴിഞ്ഞ കുറ്റാരോപിതൻ പിടിയിൽ

പത്തനംതിട്ട: കൊലപാതകശ്രമ കേസിൽ കുറ്റാരോപിതനായയാൾ 19 വര്‍ഷത്തിനു ശേഷം പോലീസ് പിടിയിൽ. മലയാലപ്പുഴ ഏറം പൊതീപ്പാട് പുത്തന്‍പുരയില്‍ രാജീവാണ് (50 ) പെരുനാട് കൂനംകരയില്‍ നിന്നും പോലീസ് ഇന്‍സ്പെക്ടര്‍ ജി. വിഷ്ണുവിന്‍റെ നേതൃത്വത്തിലുള്ള പ്രത്യേകസംഘത്തിന്‍റെ പിടിയിലായത്. ഇടുക്കി കാളിയാര്‍ സ്വദേശിയായ ഇയാള്‍ക്കെതിരേ കാളിയാര്‍ പോലീസ് സ്റ്റേഷനില്‍ റൗഡി ഹിസ്റ്ററി ഷീറ്റ് നിലവിലുണ്ട്. കൊലപാതകം, കൊലപാതകശ്രമം തുടങ്ങിയ കേസുകളില്‍ ഉള്‍പ്പെട്ട ഇയാള്‍ക്കെതിരേ അബ്കാരി കേസും നിലവിലുണ്ട്. കേസിനാസ്പദമായ കുറ്റകൃത്യം മണക്കയത്ത് 2006 ലാണ് നടന്നത്. പെരുനാട് പോലീസ് രജിസ്റ്റര്‍ ചെയ്ത് അന്വേഷണം നടത്തിയ കേസില്‍ പ്രതിയെ പിടിക്കാന്‍ കഴിഞ്ഞിരുന്നില്ല. അന്വേഷണസംഘത്തില്‍ എസ് ഐമാരായ അലോഷ്യസ്, രവീന്ദ്രന്‍, എസ് സി പി ഓമാരായ ഷിന്‍റോ, വിജീഷ് എന്നിവരാണ് ഉണ്ടായിരുന്നത്. പ്രതിയെ കോടതിയില്‍ ഹാജരാക്കി.

മൃഗവേട്ടയ്ക്കായി വനത്തിനുള്ളില്‍ കടന്ന സംഘത്തിലെ രണ്ട് പേര്‍ അറസ്റ്റില്‍

ചിറ്റാർ: മൃഗവേട്ടയ്ക്ക് നാടന്‍ തോക്കും മറ്റുമായി വനത്തിനുള്ളില്‍ കടന്ന മൂവര്‍ സംഘത്തിലെ രണ്ടുപേരെ വനപാലകസംഘം അറസ്റ്റ് ചെയ്തു. വടശേരിക്കര കുമ്പളത്താമണ്‍,അയത്തില്‍ രാജേഷ് (39), എഴുമറ്റൂര്‍ പനം പ്ലാക്കല്‍ എസ്. രാജേഷ് കുമാര്‍ (34) എന്നിവരാണ് പിടിയിലായത്. വാളക്കുഴി പനംപ്ലാക്കല്‍ എ.സി. സുരേഷ് ഓടി രക്ഷപ്പെട്ടു. ചിറ്റാര്‍ ഡെപ്യൂട്ടി ഫോറസ്റ്റ് റേഞ്ച് ഓഫീസര്‍ ടി. എസ്. അഭിലാഷ് നല്‍കിയ റിപോര്‍ട്ടിന്‍റെ അടിസ്ഥാനത്തില്‍ പ്രതികള്‍ക്കെതിരേ പെരുനാട് പോലീസ് കേസെടുത്തു. കസ്റ്റഡിയിലായ രണ്ടുപേരുടെ കൈയില്‍ നിന്നും നാല് ഈയ ഉണ്ടകളും, 100 ഗ്രാം വെടി മരുന്നും പിടിച്ചെടുത്തു. വടശേരിക്കര റേഞ്ച് ചിറ്റാര്‍ ഫോറസ്റ്റ് സ്റ്റേഷന്‍ പരിധിയിലെ ഒളികല്ല് വനമേഖലയില്‍ വേട്ടക്കെത്തിയ സംഘത്തെ കണ്ടെത്തിയത്. പെരുനാട് എസ്ഐ എ. അലോഷ്യസാണ് കേസ് രജിസ്റ്റര്‍ ചെയ്തത്. ഓടിപ്പോയ സുരേഷ് ഒന്നാം പ്രതിയാണ്. ജില്ലാ പോലീസ് മേധാവിയുടെ നിര്‍ദേശപ്രകാരം കേസില്‍ വിശദമായ അന്വേഷണം നടക്കുകയാണ്.

നിരീക്ഷണ കാമറയുടെ പേരില്‍ തര്‍ക്കം: അയല്‍വാസിയെ കുത്തിയ റിട്ട. എസ്‌ഐ അറസ്റ്റില്‍

തിരുവല്ല: നിരീക്ഷണ കാമറയെച്ചൊല്ലിയുള്ള തര്‍ക്കത്തിനിടെ പോലീസ് റിട്ട. എസ്ഐ അയല്‍വാസിയുടെ നെഞ്ചില്‍ കത്തി കുത്തിയിറക്കി. കാവുംഭാഗം മണക്കണ്ടത്തില്‍ എം.സി. ജേക്കബിനാണ് (63) കുത്തേറ്റത്. റിട്ട. എസ്‌ഐ ഇലഞ്ഞിമൂട്ടില്‍ രാജന്‍ ഏബ്രഹാമാണ് (62) കുത്തിയത്. ഇയാളെ തിരുവല്ല പോലീസ് അറസ്റ്റ് ചെയ്തു. ശനിയാഴ്ച വൈകുന്നേരം ജേക്കബിന്‍റെ വീട്ടില്‍ സിസിടിവി കാമറസ്ഥാപിച്ചതിനിടെയാണ് സംഭവം. ജേക്കബിന്‍റെ ഗേറ്റിന്‍റെ വശത്ത് സ്ഥാപിച്ച കാമറയുടെ കാഴ്ച സംബന്ധിച്ച് ഇരുവരും തമ്മില്‍ തര്‍ക്കമുണ്ടായി. ഇതിനിടെ കത്തിയുമായി എത്തിയ രാജൻ, ജേക്കബിനെ കുത്തുകയായിരുന്നു. ഇടതുനെഞ്ചില്‍ ആഴത്തില്‍ മുറിവേറ്റ ജേക്കബ് തിരുവല്ലയിലെ സ്വകാര്യ മെഡിക്കല്‍ കോളജില്‍ തീവ്രപരിചരണ വിഭാഗത്തില്‍ ചികിത്സയിലാണ്. അയല്‍ക്കാരായ ഇരുകുടുംബങ്ങളും തമ്മില്‍ വസ്തു തര്‍ക്കം സംബന്ധിച്ച് കോടതിയില്‍ കേസ് നിലവിലുണ്ട്. രാജനെതിരേ ജേക്കബ് തിരുവല്ല പോലീസില്‍ പരാതിയും നല്‍കിയിരുന്നു. ഏതാനും വര്‍ഷം മുമ്പ് കേരളാ പോലീസില്‍ നിന്നും എസ്ഐയായി വിരമിച്ചയാളാണ് രാജൻ‌. ഇയാളെ കോടതിയില്‍ ഹാജരാക്കി റിമാന്‍ഡ് ചെയ്തു. സൗദി അറേബ്യയിലെ ഇന്ത്യന്‍ എംബസി മുന്‍ ഉദ്യോഗസ്ഥനാണ് പരിക്കേറ്റ എം. ജേക്കബ്.

തീയാടിക്കലിലെ പൊക്കവിളക്ക് കണ്ണടച്ചു

തീയാടിക്കൽ: തീയാടിക്കല്‍ ജംഗ്ഷനിലെ ഹൈമാസ്റ്റ് വിളക്ക് കഴിഞ്ഞ ഒരുവര്‍ഷമായി കത്തുന്നില്ല. പഞ്ചായത്ത് മെംബറോടും അധികൃതരോടു പരാതി പറഞ്ഞിട്ടും പ്രയോജനമുണ്ടായില്ലെന്ന് നാട്ടുകാർ. വാറണ്ടി കാലാവധി കഴിഞ്ഞതിനാല്‍ ഇനിയും പഞ്ചായത്താണ് തകരാര്‍ പരിഹരിക്കേണ്ടത്.തിരുവല്ല - റാന്നി റൂട്ടിലെ പ്രധാന ജംഗ്ഷനായ തീയാടിക്കല്‍ സന്ധ്യ കഴിഞ്ഞാല്‍ ഇരുട്ടിലാണ്.

കാര്‍ മറിഞ്ഞു

കോന്നി: അട്ടച്ചാക്കല്‍ - കുമ്പളാംപൊയ്ക റോഡിലെ അട്ടച്ചാക്കല്‍ ശാന്തി ജംഗ്ഷനില്‍ കാര്‍ നിയന്ത്രണം വിട്ടു മറിഞ്ഞു. ചെങ്ങറ ഭാഗത്ത് നിന്നും അട്ടച്ചാക്കലിലേക്ക് വരികയായിരുന്ന കാര്‍ ശാന്തി ജംഗ്ഷനിലെ വളവില്‍ നിയന്ത്രണം വിട്ടു മറിയുകയായിരുന്നു. റോഡരികിലെ മതില്‍ തകര്‍ത്താണ് കാര്‍ നിന്നത്. ഇന്നലെ ഉച്ചകഴിഞ്ഞ് 1.30 നാണ് സംഭവം. ചെങ്ങറ ഹാരിസണ്‍ മലയാളം പ്ലാന്‍റേഷനിലെ വാപ്പില വെള്ളച്ചാട്ടം കണ്ട് മടങ്ങുകയായിരുന്ന മഞ്ഞക്കടമ്പ് സ്വദേശികളായ നാലുപേരാണ് കാറില്‍ ഉണ്ടായിരുന്നത് ആര്‍ക്കും പരിക്കില്ല.

അടവി കുട്ടവഞ്ചി സവാരികേന്ദ്രത്തിലെ തടയണ ഒലിച്ചുപോയി

കോന്നി: കനത്ത മഴയേ തുടര്‍ന്ന് അടവി കുട്ടവഞ്ചി സവാരി കേന്ദ്രത്തിലെ തടയണ ഒലിച്ചുപോയി. കല്ലാറ്റില്‍ ജല നിരപ്പ് താഴുമ്പോള്‍ കടവിലെ ജല നിരപ്പ് ഉയര്‍ത്തുന്നതിനായി നിര്‍മിച്ച തടയണ അശാസ്ത്രീയമായിരുന്നെന്ന് ആരോപണം ഉയര്‍ന്നിരുന്നു. തടയണയ്ക്ക് ബലക്ഷയവും സംഭവിച്ചിരുന്നു. മുമ്പ് മണല്‍ ചാക്കുകള്‍ നിറച്ചതിനു ശേഷമായിരുന്നു തടയണ നിര്‍മിച്ചിരുന്നത്. കുട്ടവഞ്ചി സവാരി കേന്ദ്രത്തിലെ തുഴച്ചില്‍ തൊഴിലാളികളെ കൊണ്ട് വനപാലകര്‍ ചാക്ക് നിറപ്പിച്ച് അടുക്കുകയാണ് ചെയ്തിരുന്നത്. എന്നാല്‍ കുറച്ചു കാലങ്ങളായി മണ്ണ് കൂനകൂട്ടി തടയണ നിര്‍മിക്കുകയാണ് ചെയ്യുന്നത്. ഇത് തീര്‍ത്തും അശാസ്ത്രീയമായ രീതിയില്‍ ചെയ്യുന്നതിനാല്‍ തന്നെ ചെറിയ ഒരു മഴ പെയ്താല്‍ പോലും ഒഴുകിപ്പോകും. ഈ ഭാഗത്ത് സ്ഥിരം തടയണ വേണമെന്ന ആവശ്യവും നടപ്പായിട്ടില്ല. ശക്തമായ മഴ ലഭിച്ചെങ്കില്‍ മാത്രമേ അടവിയില്‍ കുട്ടവഞ്ചി സവാരി പൂര്‍ണ തോതില്‍ നടത്തുവാന്‍ കഴിയൂ. നദിയിലെ ജലനിരപ്പ് താഴ്ന്നാല്‍ കുട്ടവഞ്ചികള്‍ കല്ലില്‍ ഇടിച്ച് മറിയുവാനുള്ള സാധ്യത ഏറെയാണ്. സ്ഥിരം തടയണ സംവിധാനം മാത്രമാണ് ഏക പോം വഴി. സീസണ്‍ സമയത്തും അല്ലാതെയും മികച്ച വരുമാനമാണ കുട്ടവഞ്ചി സവാരിയിലൂടെ ലഭിക്കുന്നത്. എന്നാല്‍ ലഭിക്കുന്ന വരുമാനത്തിന് അനുസരിച്ചുള്ള വികസന പ്രവര്‍ത്തനങ്ങള്‍ നടക്കുന്നില്ല. അടവി കുട്ട വഞ്ചി സവാരി കേന്ദ്രത്തിന്‍റെ നടത്തിപ്പ് ചുമതല എലിമുള്ളുംപ്ലാക്കല്‍ വന സംരക്ഷണ സമിതിക്കാണ്. തടയണ നിര്‍മിക്കുവാന്‍ അധികൃതരുടെ അടിയന്തര ഇടപെടല്‍ ആവശ്യമാണെന്നു സഞ്ചാരികള്‍ പറയുന്നു. അവധിക്കാലമായതോടെ കുട്ടവഞ്ചി സവാരി ആസ്വദിക്കാന്‍ നിരവധിയാളുകള്‍ എത്തുന്നുണ്ടെങ്കിലും വനംവകുപ്പോ ഇക്കോ ടൂറിസം അധികൃതരോ ഇവിടേക്ക് തിരിഞ്ഞു നോക്കാറില്ല.

കോന്നി ഇക്കോ ടൂറിസം കേന്ദ്രം ഒന്നിന് തുറക്കും

കോന്നി: നാലുവയസുകാരന്‍റെ മരണത്തിനിടയാക്കിയ അപകടത്തേ തുടര്‍ന്ന് അടച്ചിട്ട കോന്നി ഇക്കോ ടൂറിസം കേന്ദ്രം മേയ് ഒന്നിനു വീണ്ടും തുറക്കും. കഴിഞ്ഞ 18നു സംരക്ഷണ വേലിയുടെ കോണ്‍ക്രീറ്റ് തൂണ് ഇളകിവീണാണ് അപകടമുണ്ടായത്. കടമ്പനാട് വടക്ക് തൊയിപ്പാട്ട് പടിഞ്ഞാറ്റേതില്‍ അജി-ശാരി ദമ്പതികളുടെ ഏക മകന്‍ അഭിരാമാണ് അപകടത്തില്‍ മരിച്ചത്. സംഭവത്തേ തുടര്‍ന്ന് അന്വേഷണം നടത്തി സുരക്ഷാ ജീവനക്കാരായ അഞ്ച് ഉദ്യോഗസ്ഥരെ വനം വകുപ്പ് സസ്‌പെന്‍ഡ് ചെയ്യുകയും റേഞ്ച് ഓഫീസറെ സ്ഥലം മാറ്റുകയും ചെയ്തിരുന്നു.ഇതേത്തുടര്‍ന്ന് അടച്ചിട്ട കേന്ദ്രം വീണ്ടു തുറക്കുന്നതിനു മുന്നോടിയായാണ് കോന്നി ഇക്കോ ടൂറിസം കേന്ദ്രത്തില്‍ കെ. യു. ജനീഷ് കുമാര്‍ എംഎല്‍എ വനം വകുപ്പ് ഉന്നത ഉദ്യോഗസ്ഥരുടെയും വിവിധ വകുപ്പ് മേധാവികളുടെയും യോഗം വിളിച്ചുചേര്‍ത്തത്. കേന്ദ്രം തുറക്കുന്നതിനു മുമ്പായി ഉന്നത ഉദ്യോഗസ്ഥരുടെ സാന്നിധ്യത്തില്‍ സുരക്ഷാ പരിശോധനകള്‍ നടത്തും. ഉപയോഗശൂന്യമായ പില്ലറുകളും വേലിക്കല്ലുകളും നീക്കംചെയ്യും. വന്‍ മരങ്ങളുടെ ശിഖരങ്ങള്‍ മുറിച്ചു മാറ്റും. അപകടകരമായി നില്‍ക്കുന്ന വൈദ്യുത ലൈനുകള്‍ എബിസി ഫൈബര്‍ കേബിളുകളാക്കും. കുട്ടികളുടെ സുരക്ഷയും മറ്റ് കാര്യങ്ങളെക്കുറിച്ചും പഠനം നടത്താന്‍ കിറ്റ്‌സ് ഏജന്‍സിയെ ചുമതലപ്പെടുത്തും. സെന്‍ററിന് സുരക്ഷ ഉറപ്പാക്കും. കുട്ടികളെ പ്രത്യേകം ശ്രദ്ധ നല്‍കി നിരീക്ഷിക്കും. മൂന്ന് മാസത്തിലൊരിക്കല്‍ സുരക്ഷാ അവലോകനം നടത്തും. സുരക്ഷാ ചുമതലക്കാരെ പ്രത്യേകസംഘം നിരീക്ഷിക്കും. ഇനി ഏതെങ്കിലും തരത്തില്‍ അപകടമുണ്ടാകാത്തനിലയില്‍ കര്‍ശന സുരക്ഷാ ക്രമീകരണങ്ങളാണ് നടപ്പാക്കുന്നതെന്ന് എംഎല്‍എ പറഞ്ഞു. അടവിയിലും സുരക്ഷ കൂട്ടും അടവി കുട്ടവഞ്ചി സവാരി കേന്ദ്രത്തിലും കെ. യു. ജനീഷ്‌കുമാര്‍ എംഎല്‍എയുടെ നേതൃത്വത്തില്‍ കോന്നി ഇക്കോ ടൂറിസം സെന്‍ററിലെ സുരക്ഷ വിലയിരുത്തി. അടവിയിലും തുടര്‍ച്ചയായ പരിശോധനകളും സുരക്ഷാ വിലയിരുത്തലുകളും ഉണ്ടാകും. ജീവനക്കാരെ നിരീക്ഷിക്കാനും സംവിധാനം ഏര്‍പ്പെടുത്തി. വനംവകുപ്പ് അഡീഷണല്‍ പ്രിന്‍സിപ്പല്‍ ചീഫ് കണ്‍സര്‍വേറ്റര്‍ ജെ. ജസ്റ്റിന്‍ മോഹന്‍, കോന്നി ഡിഎഫ്ഒ ആയുഷ് കുമാര്‍ കോറി, ഡെപ്യൂട്ടി ഡിഎംഒ ഡോ. സി എസ്. നന്ദിനി, പൊതുമരാമത്ത് കെട്ടിടവിഭാഗം അസിസ്റ്റന്‍റ് എക്സിക്യുട്ടീവ് എൻജിനിയർ വി. ബി. സുഭാഷ് കുമാര്‍, അസിസ്റ്റന്‍റ് ഇലക്ട്രിക്കല്‍ ഇന്‍സ്‌പെക്ടര്‍ മാത്യു ടി മാത്യൂസ്, കോന്നി ഡിവൈഎസ്പി രാജപ്പന്‍ റാവുത്തര്‍, ജില്ലാ ഫയര്‍ ഓഫീസര്‍ ബി. എം. പ്രതാപ് ചന്ദ്രന്‍, ടി. എസ.് മാത്യുസ്, സാബി വര്‍ഗീസ്, കെ. എ. അശ്വനി കുമാര്‍, റേഞ്ച്് ഫോറസ്റ്റ് ഓഫീസര്‍ കെ. എസ.് മനോജ് എന്നിവര്‍ ഇക്കോ ടൂറിസം സെന്‍ററുകളില്‍ സുരക്ഷാ ക്രമീകരണങ്ങള്‍ എംഎല്‍എയോടൊപ്പം വിലയിരുത്തിയ ശേഷമാണ് അവലോകന യോഗം ചേര്‍ന്നത്.

ഇട്ടിയപ്പാറ ബസ് ടെര്‍മിനല്‍ നിര്‍മാണത്തിനായി മണ്ണു പരിശോധന

റാന്നി: ഇട്ടിയപ്പാറയില്‍ എംഎല്‍എ ആസ്തി വികസന ഫണ്ട് ഉപയോഗപ്പെടുത്തി 2.65 കോടി രൂപ ആദ്യഘട്ടമായി ചെലവഴിച്ച് നിര്‍മിക്കുന്ന ബസ് ടെര്‍മിനല്‍ നിര്‍മാണത്തിന്‍റെ പ്രാരംഭ നടപടിയായ മണ്ണു പരിശോധന ആരംഭിക്കുന്നു. മണ്ണ് പരിശോധനയ്ക്കു ശേഷം കെട്ടിടത്തിന്‌റെ വിശദമായ എസ്റ്റിമേറ്റ് തയാറാക്കും. കെഎസ്ആര്‍ടിസി പ്രൈവറ്റ് ബസ് യാത്രക്കാര്‍ക്ക് ഒരുപോലെ ഉപയോഗിക്കാവുന്ന രീതിയിലാണ് ടെര്‍മിനല്‍ രൂപകല്പന ചെയ്തിരിക്കുന്നത്. താലൂക്ക് സര്‍വേയര്‍ പഞ്ചായത്ത് അധികൃതര്‍ പരിശോധനയുടെ കരാര്‍ കമ്പനി പ്രതിനിധികള്‍ എന്നിവര്‍ക്കൊപ്പം പ്രമോദ് നാരായണ്‍ എംഎല്‍എ സ്റ്റാന്‍ഡ് സന്ദര്‍ശിച്ചു.

കോടികള്‍ ചെലവഴിച്ചുള്ള മുഖ്യമന്ത്രിയുടെയും സംഘത്തിന്‍റെയും പര്യടനം അപഹാസ്യമെന്ന് പുതുശേരി

തിരുവല്ല: സാമ്പത്തിക പ്രതിസന്ധിയെന്നു നാഴികയ്ക്കു നാല്‍പതുവട്ടം ആവര്‍ത്തിക്കുകയും അതിന്‍റെ പേരില്‍ അടിസ്ഥാന വര്‍ഗത്തിന്‍റെ ശമ്പളവും ആനുകൂല്യങ്ങളും നിഷേധിക്കുകയും കുടിശിക വരുത്തുകയും വെട്ടിക്കുറയ്ക്കുകയും ചെയ്തിട്ട് ഇല്ലാത്ത ഭരണ നേട്ടത്തെക്കുറിച്ച് വീമ്പടിക്കാന്‍ മുഖ്യമന്ത്രിയും സംഘവും നടത്തുന്ന പര്യടനത്തിന് സര്‍ക്കാര്‍ ഖജനാവില്‍ നിന്ന് കോടികള്‍ ചെലവഴിച്ചുകൊണ്ടുള്ള ധൂര്‍ത്തും ദുര്‍വ്യയവും ജനങ്ങളെ പരിഹസിക്കുന്നതിനു തുല്യമാണെന്നു കേരള കോണ്‍ഗ്രസ് എം വൈസ് ചെയര്‍മാന്‍ ജോസഫ് എം. പുതുശേരി. ഒമ്പതു വര്‍ഷത്തെ ഭരണം പൂര്‍ത്തീകരിക്കുമ്പോള്‍ ഇവര്‍ തന്നെ അഴിമതി ആരോപണങ്ങള്‍ അടക്കം ഉന്നയിച്ച് തടയാന്‍ ശ്രമിച്ചിട്ടും ഉമ്മന്‍ ചാണ്ടിയുടെ ഇച്ഛാശക്തി കൊണ്ട് തുടങ്ങിവച്ച പദ്ധതികളുടെ പൂര്‍ത്തീകരണമല്ലാതെ സ്വന്തമായ ഒരു പദ്ധതി പോലും ചൂണ്ടിക്കാണിക്കാന്‍ ഇല്ലാത്ത ഭരണ പരാജയത്തിന്‍റെ മകുടോദാഹരണമായി മാറിയ സര്‍ക്കാരാണ് ഭരണ നേട്ടങ്ങള്‍ എന്നു പറഞ്ഞ് വീമ്പു പറയാന്‍ ഇറങ്ങിയിരിക്കുന്നതെന്നും പുതുശേരി പറഞ്ഞു. കോടികള്‍ മുടക്കി സൃഷ്ടിക്കുന്ന മായാ പ്രപഞ്ചത്തില്‍ സര്‍ക്കാരിന്‍റെ ജനവിരുദ്ധത മറച്ചും മായിച്ചും കളയാമെന്ന തന്ത്രം വ്യാമോഹമായി അവശേഷിക്കുകയേയുള്ളൂവെന്നും അദ്ദേഹം അഭിപ്രായപ്പെട്ടു.

നിയന്ത്രണംവിട്ട ജീപ്പ് വൈദ്യുത തൂണില്‍ ഇടിച്ചു രണ്ടുപേര്‍ക്ക് പരിക്ക്

പത്തനംതിട്ട: മലയാറ്റൂര്‍ തീര്‍ഥാടനം കഴിഞ്ഞു മടങ്ങുകയായിരുന്നവര്‍ സഞ്ചരിച്ച വാന്‍ നിയന്ത്രണംവിട്ട് വൈദ്യുത തൂണില്‍ ഇടിച്ചു. കുടുങ്ങി കിടന്ന രണ്ടുപേരെ ഫയര്‍ഫോഴ്‌സ് സംഘം വാഹനം വെട്ടിപ്പൊളിച്ച് പുറത്തെടുത്തു. വാന്‍ ഓടിച്ചിരുന്ന പത്തനംതിട്ട കുമ്പഴ നെടുമ്പുരത്തു റോബിന്‍ റെജി (26), വെട്ടൂര്‍ വടക്കുപ്പുറം ദാവൂദ് കുട്ടി (75) എന്നിവരാണ് വാഹനത്തിനുള്ളില്‍ കുടുങ്ങിപ്പോയത്. ഇവരെ പത്തനംതിട്ട ജനറല്‍ ആശുപത്രിയില്‍ പ്രവേശിപ്പിച്ചു. കോഴഞ്ചേരി- പത്തനംതിട്ട പാതയില്‍ നന്നുവക്കാട്ട് ഇന്നലെ പുലര്‍ച്ചെ 4.45 ഓടെയാണ് അപകടം. വാഹനം ഓടിച്ച റോബിന്‍ ഉറങ്ങിപ്പോയതാണ് അപകടകാരണമെന്ന് പറയുന്നു.റോഡരികിലെ വൈദ്യുത പോസ്റ്റില്‍ ഇടിച്ചു മറിഞ്ഞാണ് വാന്‍ നിന്നത്. പത്തനംതിട്ടയില്‍ നിന്നെത്തിയ അഗ്‌നിരക്ഷാ സേന ഹൈഡ്രോളിക് കട്ടര്‍ ഉപയോഗിച്ച് വാഹനം വെട്ടിപ്പൊളിച്ചാണ് വാഹനത്തിനുള്ളില്‍ കുടുങ്ങിയവരെ പുറത്തെത്തിച്ചത്.

നിയന്ത്രണംവിട്ട ജീപ്പ് മതിലില്‍ ഇടിച്ചു മറിഞ്ഞു

റാന്നി: ബൊലേറോ ജീപ്പ് നിയന്ത്രണം നഷ്ടപ്പെട്ട് വീടിന്‍റെ മതിലില്‍ ഇടിച്ചു മറിഞ്ഞു. സംഭവത്തില്‍ സാരമായി പരിക്കേറ്റ ഇടമുറി തോമ്പിക്കണ്ടം സ്വദേശി കാവില്‍ ജെസ്റ്റിന്‍ വര്‍ഗീസിനെയും (30)നേയും ഭാര്യയേയും കുഞ്ഞിനേയും കോഴഞ്ചേരിയിലെ സ്വകാര്യ ആശുപത്രിയില്‍ പ്രവേശിപ്പിച്ചു. മുക്കട - ഇടമണ്‍ - അത്തിക്കയം എംഎല്‍എ റോഡില്‍ ഇടമണ്‍ പൊട്ടനരുവിക്ക് സമീപം പനച്ചിക്കാലായില്‍ മത്തായിയുടെ വീടിന്‍റെ മതിലിലാണ് ജീപ്പ് ഇടിച്ചത്. ഇന്നലെ രാവിലെ പത്തരയോടെയാണ് അപകടം ഉണ്ടായത്. റോഡില്‍ തലകീഴായി മറിഞ്ഞ വാഹനത്തില്‍ നിന്നും ഓടിക്കൂടിയ നാട്ടുകാരാണ് യാത്രക്കാരെ പുറത്തിറക്കിയത്. വെച്ചൂച്ചിറ പോലീസ് സ്ഥലത്തെത്തി മേല്‍നടപടികള്‍ സ്വീകരിച്ചു.

എക്യുമെനിക്കല്‍ ഫെലോഷിപ്പ് മാര്‍പാപ്പയെ അനുസ്മരിച്ചു

റാന്നി: എക്യുമെനിസത്തിന്‍റെ പ്രചാരകനും കരുണയുടെ മുഖവുമായിരുന്ന ഫ്രാന്‍സിസ് മാര്‍പാപ്പയെ റാന്നി എക്യുമെനിക്കല്‍ ഫെലോഷിപ്പ് അനുസ്മരിച്ചു. കാശ്മീരിലെ പഹല്‍ഗാം ഭീകരാക്രമണത്തില്‍ ജീവന്‍ പൊലിഞ്ഞവര്‍ക്കും യോഗം ആദരാജ്ഞലിയര്‍പ്പിച്ചു. ഫെലോഷിപ്പ് പ്രസിഡന്റ് ഫാ. റോയി മാത്യൂ മുളമൂട്ടില്‍ കോര്‍ എപ്പിസ്‌കോപ്പയുടെ അധ്യക്ഷതയില്‍ ഫാ രാജന്‍ ഏബ്രഹാം കുളമട, ഏബ്രഹാം മാത്യൂ പനച്ചമൂട്ടിൽ, റവ. ജോണ്‍സണ്‍ വര്‍ഗീസ്, ഫാ. സൈമണ്‍ ജേക്കബ്, ഫാ. ബെന്‍സി മാത്യൂ, ഫാ. അനൂപ് സ്റ്റീഫൻ, ഫാ. ജിസ് ഐക്കര, ഫാ. ചാക്കോ മേലേടത്ത്, റവ.ഡോ. ഹാപ്പി ഏബ്രഹാം, ഫാ. പോള്‍ നെല്‍സണ്‍, സ്മിജു ജേക്കബ്, ജെയ്‌സണ്‍ ചിറയ്ക്കൽ, എം.എസ് തോമസ്, ജെസി അലക്‌സ്, എബിന്‍ കൈതവന , ജാന്‍സി പീറ്റർ‌, സണ്ണി ഫിലിപ്പ്, മോളമ്മ കടിയംകുന്നിൽ, ജിന്‍സി പി ജെയിംസ്, കെ. ജ്ഞാനദാസ്, ഡെനീസ് ഏബ്രഹാം, എ.വി തോമസ്, അന്നമ്മ കുര്യാക്കോസ് എന്നിവര്‍ പ്രസംഗിച്ചു. മാര്‍പാപ്പ അനുസ്മരണ പ്രാര്‍ഥന റാന്നി: ഗുഡ് സമരിറ്റന്‍ ചാരിറ്റബിള്‍ ആന്‍ഡ് റിലീഫ് സൊസൈറ്റിയുടെയും അഞ്ചുകുഴി ആകാശ പറവകളുടെ ദിവ്യ കാരുണ്യ ആശ്രമത്തിന്‍റെയും ആഭിമുഖ്യത്തില്‍ പോപ്പ് ഫ്രാന്‍സിസ് അനുസ്മരണവും പ്രാര്‍ഥനയും നടത്തി. സൊസൈറ്റി ചെയര്‍മാന്‍ ഫാ. ബെന്‍സി മാത്യു കിഴക്കതിൽ, ആശ്രമം ഡയറക്ടര്‍ ബ്രദര്‍ ജോസഫ് കല്ലറക്കൽ, ബേബി ജോണ്‍ മണിമലേത്ത്, എറിക് നെല്‍സണ്‍ എന്നിവര്‍ പ്രസംഗിച്ചു.

പുഷപഗിരി അന്താരാഷ്‌ട്ര കോണ്‍ഫറന്‍സ്

തിരുവല്ല : പുഷപഗിരി മെഡിക്കല്‍ കോളജ് ആശുപത്രിയും രാഘവാ ഇന്‍റര്‍നാഷണല്‍ സ്റ്റാറ്റിസ്റ്റിക്കല്‍ ഇന്‍സ്റ്റിറ്റ്യൂട്ടും സംയുക്തമായി അന്താരാഷ്ട്ര തലത്തില്‍ സംഘടിപ്പിച്ച ഐക്യുകോണ്‍ 25 അന്താരാഷ്ട്ര കോണ്‍ഫറന്‍സ് ഡോ.ബി.കെ. റാണ, ഡോ.പരിവാളന്‍ രാജവേലു, ഡോ.തെന്നശു മരിതമുത്തു എന്നിവര്‍ ചേര്‍ന്ന് ഉദ്ഘാടനം ചെയ്തു. തിരുവല്ല പുഷ്പഗിരി ഗ്രൂപ്പ് ഓഫ് ഇന്‍സ്റ്റിറ്റ്യൂട്ട് സിഇഒ റവ.ഡോ.ഫിലിപ്പ് പയ്യംപള്ളില്‍, ഡോ.സേതു ബാബു, ബോബി രമേശ്, ഡി. രേണുകാദേവി എന്നിവര്‍ പ്രസംഗിച്ചു.

കരുവള്ളിക്കാട് കുരിശുമല തീര്‍ഥാടനം സമാപിച്ചു

ചുങ്കപ്പാറ: ചങ്ങനാശേരി അതിരൂപതയിലെ നിര്‍മലപുരം - കരുവള്ളിക്കാട്ട് സെന്‍റ് തോമസ് കുരിശുമല തീര്‍ഥാടനത്തിനു പുതു ഞായര്‍ തിരുനാളോടെ സമാപനം. അമ്പത് നോമ്പ് കാലയളവില്‍ നാടിന്‍റെ നാനാഭാഗങ്ങളില്‍ നിന്ന് ആയിരകണക്കിനാളുകള്‍ ഭക്തിനിര്‍ഭരമായി മലമുകളിലേയ്ക്ക് വിശുദ്ധ കുരിശിന്‍റെ തീര്‍ഥാടനത്തില്‍ പങ്കു ചേര്‍ന്നു. മലമുകളിലെ ചാപ്പലില്‍ ഇന്നലെ രാവിലെ ചങ്ങനാശേരി അതിരൂപത പ്രൊക്കുറേറ്റര്‍ ഫാ. ജയിംസ് ആന്‍റണി മാളിയേക്കല്‍ വിശുദ്ധ കുര്‍ബാന അര്‍പ്പിച്ചു.ഫാ. ജേക്കബ് വട്ടക്കാട്ട് വചന സന്ദേശം നല്‍കി. തുടര്‍ന്ന് സമാപന ആശിര്‍വാദം, നേര്‍ച്ച സമര്‍പ്പണത്തോടെ തീര്‍ഥാടനം സമാപിച്ചു. തീര്‍ഥാടന കേന്ദ്രം വികാരി ഫാ.മോബന്‍ചുരവടിയുടെ നേതൃത്വത്തില്‍ വിവിധ കമ്മിറ്റി ഭാരവാഹികള്‍ എന്നിവര്‍ ക്രമീകരണങ്ങള്‍ നടത്തി.

മാര്‍പാപ്പ അനുസ്മരണത്തോടെ ചന്ദനപ്പള്ളി കത്തോലിക്കാ പള്ളി തിരുനാളിനു കൊടിയേറി

ചന്ദനപ്പള്ളി: ആഗോള കത്തോലിക്കാ സഭ തലവനായിരുന്ന ഫ്രാന്‍സിസ് മാര്‍പാപ്പയുടെ സ്മരണയ്ക്കു മുന്‍പില്‍ ആദരാഞ്ജലികളും പ്രത്യേക പ്രാര്‍ഥനയും നടത്തി ചന്ദനപ്പള്ളി സെന്‍റ് ജോര്‍ജ് തീര്‍ഥാടന കത്തോലിക്കാ ദേവാലയത്തിലെ തിരുനാളിനു കൊടിയേറി. ദേവാലയാങ്കണത്തിലെ സ്വര്‍ണക്കൊടിമരത്തില്‍ കര്‍ണാടക - പുത്തൂര്‍ രൂപതാധ്യക്ഷന്‍ ഡോ. ഗീവര്‍ഗീസ് മാര്‍ മക്കാറിയോസ് കൊടിയേറ്റി. ഇടവക വികാരി ഫാ.ബെന്നി നാരകത്തിനാൽ, ഫാ. സനു സാം തെക്കേക്കാവിനാല്‍ എന്നിവര്‍ സഹകാര്‍മികരായിരുന്നു. രാവിലെ മെത്രാപ്പോലീത്തയെ ദേവാലയ കവാടത്തില്‍ വികാരി ഫാ. ബെന്നി നാരകത്തിനാല്‍ മെഴുകുതിരി നല്കി ദേവാലയത്തില്‍ സ്വീകരിച്ചു. തുടര്‍ന്ന് കുര്‍ബാന നടന്നു. ഗീവര്‍ഗീസ് സഹദായുടെ തിരുശേഷിപ്പ് വിശ്വാസികളുടെ വണക്കത്തിനായി ദേവാലയ മദ്ബഹയുടെ സമീപം പ്രതിഷ്ഠിച്ചു. ഫ്രാന്‍സിസ് മാര്‍പാപ്പ അനുസ്മരണ യോഗവും തീര്‍ഥാടന വാരാഘോഷ ഉദ്ഘാടനവും ഡോ. ഗീവര്‍ഗീസ് മാര്‍ മക്കാറിയോസ് നിര്‍വഹിച്ചു. അനുസ്മരണ പ്രമേയം തിരുനാള്‍ പ്രോഗ്രാം കണ്‍വീനര്‍ ബാബു കെ. പെരുമല അവതരിപ്പിച്ചു. വള്ളിക്കോട് പഞ്ചായത്ത് അംഗം തോമസ് ജോസ് അയ്യനേത്ത്, സെക്രട്ടറി ഫിലിപ്പ് കിടങ്ങില്‍ എന്നിവര്‍ പ്രസംഗിച്ചു. യ് 6,7 തീയതികളാണ് പ്രധാന തിരുനാൾ. ഏഴിന് ഉച്ചകഴിഞ്ഞ് 3.30 ന് നടക്കുന്ന ഫ്രാന്‍സിസ് മാര്‍പാപ്പയുടെ അനുസ്മരണ റാലിയില്‍ സാമൂഹ്യ സാംസ്‌കാരിക മത- നേതാക്കള്‍ തീര്‍ഥാടകരോടൊപ്പം പങ്കു ചേരും. തിരുനാള്‍ മേയ് 11 ന് അപ്പസ്‌തോലിക നുണ്‍ഷോ ആര്‍ച്ച്ബിഷപ് മാര്‍ ജോര്‍ജ് പനംതുണ്ടില്‍ കൊടിയിറക്ക് ചടങ്ങ് നിര്‍വഹിക്കുന്നതോടെ സമാപിക്കും.

കരിമ്പു കൃഷിയില്‍ വ്യാപൃതനായി ജില്ലാ പ്രസിഡന്‍റ്

പത്തനംതിട്ട: തൊഴില്‍ രഹിതരാക്കിയ ഇടത് സര്‍ക്കാര്‍ നടപടി മൂലം പൊറുതിമുട്ടിയ കേരളാ ഗവ. കോണ്‍ട്രാക്ടേഴ്‌സ് അസോസിയേഷന്‍ കാര്‍ഷിക മേഖലയെ ഉപജീവനമാക്കുകയാണ്. ഗവണ്‍മെന്‍റ് കോണ്‍ട്രാക്ടേഴ്‌സ് അസോസിയേഷന്‍ ജില്ലാ പ്രസിഡന്‍റ് തോമസുകുട്ടി തേവരുമുറിയില്‍ തന്‍റെ ഉമസ്ഥതയിലുള്ള പടിഞ്ഞാറ്റ് ഓതറയിലെ പത്ത് ഏക്കര്‍ ഭൂമിയില്‍ ജൈവ കരിമ്പിന്‍ കൃഷി ചെയ്ത് നൂറു കണക്കിന് കരാറുകാര്‍ക്കാണ് മാതൃക കാട്ടുന്നത്. വിളവെടുപ്പ് ആരംഭിച്ചു കഴിഞ്ഞു. മേയ് 15ന് ആലപ്പുഴ കൃഷി വിജ്ഞാന്‍ ഭവനില്‍ നടക്കുന്ന കാര്‍ഷിക മേഖലയിലെ സംരംഭകത്വ സാധ്യതകളെ പറ്റിയുള്ള സെമിനാറില്‍ ജൈവ ശര്‍ക്കരയുടെ വിപണനോദ്ഘാടനം നടക്കുമെന്ന് തോമസുകുട്ടി തേവരുമുറിയില്‍ പറഞ്ഞു. തോമസുകുട്ടി തേവരുമുറിയില്‍ ഇതിന് മാതൃക കാട്ടുകയാണ്. പമ്പാനദിക്കും മണിമലയാറിനും മധ്യേ സ്ഥിതി ചെയ്യുന്ന വളക്കൂറുള്ള ഭൂമിയില്‍ വരട്ടാറിനോടു ചേര്‍ന്നാണ് തോമസുകുട്ടിയുടെ കൃഷിയിടം. പൂര്‍വികരെ മാതൃകയാക്കി വ്യാപകമായ രീതിയില്‍ കരിമ്പ് കൃഷി ആരംഭിച്ച ശേഷം ജൈവവളം ഉണ്ടാക്കാനാണ് അദ്ദേഹം ആദ്യം ശ്രമിച്ചത്. ശരക്കര, തൈര്, പഴം, വിവിധതരം ധാന്യപ്പൊടികൾ, ചാണകം, കോഴിക്കാഷ്ടം, പിണ്ണാക്ക് എന്നിവ അടങ്ങിയ മിശ്രിതം തയാറാക്കി മൂന്നാഴ്ചയോളം കെട്ടിവച്ച് ഉണ്ടാക്കിയ ജൈവ വളമാണ് കൃഷിക്ക് ഉപയോഗിച്ചത്. വളത്തിന്‍റെ മികവില്‍ കൃഷി തഴച്ചു വളര്‍ന്നു. സാധാരണ കരിമ്പിന്‍ തണ്ടിന് 5, 6 അടിയാണ് നീളമെങ്കില്‍ തോമസുകുട്ടി വിളവെടുത്ത കരിമ്പിന്‍ തണ്ടിന് 10 അടിയില്‍ അധികമാണ് ഉയരം. കൃഷിക്ക് സഹായിയായി സിവില്‍ എന്‍ജിനിയറിംഗില്‍ എംടെക് പാസായ മകന്‍ റ്റിറ്റിന്‍ കൂടി ചേര്‍ന്നതോടെ കാര്‍ഷിക മേഖല തളിര്‍ത്തു. ജൈവകൃഷിയിലൂടെ കയറ്റുമതി സാധ്യത തേടും പൂര്‍ണമായും ജൈവ കൃഷിയും ഉത്പന്നങ്ങളുടെ സംസകരണവും കയറ്റുമതിയും ലക്ഷ്യമിട്ട് കരാറുകാര്‍ കാര്‍ഷിക മേഖലയില്‍ ചുവടുറപ്പിക്കുമെന്ന് അസോസിയേഷന്‍ സംസ്ഥാന പ്രസിഡന്‍റ് വര്‍ഗീസ് കണ്ണമ്പള്ളില്‍ പറഞ്ഞു. കാര്‍ഷിക മേഖലയില്‍ നടപ്പാക്കേണ്ട ഭാവി പരിപാടികള്‍ ചര്‍ച്ച ചെയ്യാന്‍ ദ്വിദിന സമ്മേളനം കായംകുളം കൃഷി വിജ്ഞാന്‍ കേന്ദ്രത്തില്‍ നടന്നു. ഗവണ്‍മെന്‍റ് കോണ്‍ട്രേക്ടേഴ്‌സ് അസോസിയേഷന്‍ സംഘടിപ്പിച്ച പരിപാടിയില്‍ കാര്‍ഷിക മേഖലയിലെ നൂതന തൊഴില്‍ സാധ്യതകളെപ്പറ്റി പ്രത്യേക ക്ലാസുകള്‍ ക്രമീകരിച്ചിരുന്നു. നബാര്‍ഡ് പ്രതിനിധികൾ, കാര്‍ഷിക മേഖലയിലെ വിദഗ്ധർ, കാര്‍ഷിക സംഘടനകള്‍ എന്നിവര്‍ പരിപാടിയില്‍ പങ്കെടുത്തു. മേയ് 10, 11 തീയതികളില്‍ മൂവാറ്റുപുഴയില്‍ നടക്കുന്ന കര്‍ഷക മഹാ പഞ്ചായത്തില്‍ ഗവ. കോണ്‍ട്രാക്ടേഴ്‌സ് അസോസിയെഷനില്‍ നിന്നും 10 പ്രതിനിധികള്‍ പങ്കെടുക്കും.

കരാര്‍ മേഖലയില്‍ കുത്തകവത്കരണം: ചെറുകിടക്കാര്‍ കളംവിടുന്നു

‘പോഷണ്‍ പക്വാഡ’സംഘടിപ്പിച്ചു

കോഴഞ്ചേരി: വനിതാ ശിശുവികസന വകുപ്പും ഐസിഡിഎസ് കോയിപ്രവും സംയുക്തമായി സംഘടിപ്പിച്ച പോഷണ്‍ പക്വാഡ 2025 ന്‍റെ ഉദ്ഘാടനം തോട്ടപ്പുഴശേരി ഗ്രാമപഞ്ചായത്ത് പ്രസിഡന്‍റ് ആര്‍ കൃഷ്ണകുമാര്‍ നിര്‍വഹിച്ചു. പരിപാടിയുടെ ഭാഗമായി അനീമിയ ബോധവത്കരണ ക്ലാസ്, ന്യൂട്രീഷന്‍ എക്‌സിബിഷന്‍, എച്ച് ബി പരിശോധന ക്യാമ്പ് എന്നിവ നടത്തി. വൈസ് പ്രസിഡന്‍റ് സിസിലി തോമസ്, സ്ഥിരം സമിതി അധ്യക്ഷരായ റീന തോമസ്, ലതാ ചന്ദ്രൻ, ജെസി മാത്യു, സിഡിപിഒ ജി. ബിന്ദു, ഐസിഡിഎസ് സൂപ്പര്‍വൈസര്‍ ആർ. ശ്രീലേഖ , എന്‍എന്‍എം കോഓർഡിനേറ്റര്‍ ബിബിൻ, അങ്കണവാടി ജീവനക്കാര്‍ എന്നിവര്‍ പങ്കെടുത്തു.

ബ്ലോക്ക് തല ക്വിസ് മത്സരം

കോഴഞ്ചേരി: ഹരിതകേരള മിഷന്‍റെയും സമഗ്രശിക്ഷാ കേരളത്തിന്‍റെയും സംയുക്താഭിമുഖ്യത്തില്‍ സംസ്ഥാനവ്യാപകമായി നടന്ന നീലക്കുറിഞ്ഞി ജൈവവൈവിധ്യ പഠനോത്സവത്തിന്‍റെ ഇലന്തൂര്‍ ബ്ലോക്ക്തല ക്വിസ് മത്സരം കോഴഞ്ചേരി ഗ്രാമപഞ്ചായത്ത് പ്രസിഡന്‍റ് സാലി ഫിലിപ്പ് ഉദ്ഘാടനം ചെയ്തു. കോഴഞ്ചേരി ഗവണ്‍മെന്‍റ് ഹൈസ്‌കൂളില്‍ നടന്ന ചടങ്ങില്‍ ഗ്രാമപഞ്ചായത്ത് അംഗം ഗീതു മുരളി അധ്യക്ഷത വഹിച്ചു. കോഴഞ്ചേരി എഇഒ പി. അനിത, കോഓര്‍ഡിനേറ്റര്‍ ടി.പി. അനൂപ്, ടി.സുമിനി, നന്ദകുമാര്‍ എന്നിവര്‍ പ്രസംഗിച്ചു. മത്സരവിജയികള്‍ക്കും പങ്കാളികള്‍ക്കും സര്‍ട്ടിഫിക്കറ്റുകളും പാരിതോഷികങ്ങളും നല്കി.

ആദരാഞ്ജലി അര്‍പ്പിച്ചു

മല്ലപ്പള്ളി: ജമ്മു കാശ്മീരിലെ പഹല്‍ഗാമില്‍ ഉണ്ടായ ഭീകരാക്രമണത്തില്‍ കൊല്ലപ്പെട്ടവരോടുള്ള ആദരസൂചകമായി കോൺഗ്രസ്‌ ബ്ലോക്ക്‌ കമ്മിറ്റിയുടെ നേതൃത്വത്തില്‍ മല്ലപ്പള്ളി ജംഗ്ഷനിൽ തിരി തെളിച്ച് ആദരാഞ്ജലികൾ അര്‍പ്പിച്ചു. ടൗണിൽ മൗനജാഥയും ഭീകരവിരുദ്ധ പ്രതിജ്ഞയെടുക്കലും ഇതിന്‍റെ ഭാഗമായി നടന്നു. ഡിസിസി ജനറൽ സെക്രട്ടറി കോശി പി. സക്കറിയ ഉദ്ഘാടനം ചെയ്തു. കോൺഗ്രസ്‌ ബ്ലോക്ക് പ്രസിഡന്‍റ് എബി മേക്കരിങ്ങാട്ട് അധ്യക്ഷത വഹിച്ചു. എം. കെ. സുബാഷ് കുമാർ, സാം പട്ടേരി, റെജി പണിക്കമുറി, ലിൻസൺ പാറോലിക്കൽ, കെ.ജി. സാബു, കെ. കെ. പ്രസാദ്‌, മോഹൻ കോടമല കെ. പി. സെൽവകുമാർ, റെജി പമ്പഴ, അനിൽ ഏബ്രഹാം ചെറിയാൻ, സി. പി. മാത്യു, അമ്പിളി പ്രസാദ്‌, സിന്ധു സുബാഷ്, തോമസ് കവിയൂർ, സണ്ണി വഴനക്കോട്ട്, മനോജ്‌ കവിയൂർ, സനീഷ് അടവിക്കൽ, മനീഷ് കുറുപ്പ്, അനു ഊത്തുകുഴിയിൽ എന്നിവർ പ്രസംഗിച്ചു.

പ്രകാശധാര സ്കൂളിൽ അധ്യാപക പരിശീലന ക്യാന്പ് ആരംഭിച്ചു

പത്തനംതിട്ട: രജത ജൂബിലി ആഘോഷിക്കുന്ന പ്രകാശധാര സ്കൂളിന്‍റെ ആഭിമുഖ്യത്തിൽ റിഹാബിലിറ്റേഷൻ കൗൺസിൽ ഓഫ് ഇന്ത്യയുടെ നേതൃത്തിൽ ഭിന്നശേഷിക്കാരായ വിദ്യാർഥികളെ പരിശീലിപ്പിക്കുന്ന അധ്യാപകർക്കായി സംസ്ഥാനതല സിആർഇ ട്രെയിനിംഗ് പരിശീലന ക്യാമ്പ് ആരംഭിച്ചു. ക്യാമ്പിന്‍റെ ഉദ്ഘാടനം ഓർത്തഡോക്സ് സഭ തുന്പമൺ ഭദ്രാസനാധിപൻ ഡോ. ഏബ്രഹാം മാർ സെറാഫിം നിർവഹിച്ചു. ജയിംസ് മാത്യു കോർ എപ്പിസ്കോപ്പയുടെ അധ്യക്ഷതയിൽ നടന്ന സമ്മേളനത്തിൽ ജില്ല സാമുഹ്യ നീതി വകുപ്പ് മേധാവി ഷംല ബീഗം മുഖ്യപ്രഭാഷണം നടത്തി. സിആർഇ കോ ഓർഡിനേറ്റർ റ്റി.എ. ഷിബു, പ്രഫ. കെ. സി. മാണി, ഫാ. റോയി സൈമൺ, ഫാ. വിത്സൺ പി. ഏബ്രഹാം, ഫാ. റ്റി. കെ. തോമസ്, ഷാജി മഠത്തിലേത്ത്, ഡോ. കെ. മാത്യു, ഫാ. ബിബിൻ കെ. പാപ്പച്ചൻ, ഡോ. കെ. ജെ. മാത്യു, ജെസി തോമസ് എന്നിവർ പ്രസംഗിച്ചു. സംസ്ഥാനത്തെ വിവിധ സ്പെഷൽ സ്കുളികളിലെ 150 ലധികം ക്യാന്പിൽ പങ്കെടുത്തു.

തിരുനാളാഘോഷം

മൈലപ്ര തിരുഹൃദയ പള്ളിയിൽ മൈലപ്ര: തിരുഹൃദയ മലങ്കര കത്തോലിക്കാ ദേവാലയത്തിൽ വിശുദ്ധ ഗീവർഗീസ് സഹദായുടെ തിരുനാളിനു 30ന് കൊടിയേറും. വൈകുന്നേരം അഞ്ചിന് റാന്നി - പെരുനാട് വൈദികജില്ലയിലെ വൈദികരുടെ കാർമികത്വത്തിൽ വിശുദ്ധ കുർബാനയും വചന പ്രഘോഷവും തുടർന്ന് കൊടിയേറ്റും ഗീവർഗീസ് സഹദായുടെ തിരുസ്വരൂപ പ്രതിഷ്ഠയും നടക്കും. മേയ് ഒന്നിന് വൈകുന്നേരം അഞ്ചിന് ഫാ.ലോറൻസ് തയ്യിൽ ലത്തീൻ ക്രമത്തിൽ വിശുദ്ധ കുർബാന അർപ്പിക്കും. തുടർന്ന് ഭക്തസംഘടനാ വാർഷികം. രണ്ടിനു വൈകുന്നേരം അഞ്ചിന് ഫാ.എഡ് വിൻ ഡാനിയേൽ വട്ടക്കുഴി സിഎംഐ സീറോ മലബാർ ക്രമത്തിൽ കുർബാന അർപ്പിച്ച് സന്ദേശം നൽകും. ദിവ്യകാരുണ്യ ആരാധനയും തുടർന്നുണ്ടാകും. മൂന്നിനു രാവിലെ ഏഴിന് ജോസ് ചാമക്കാലായിൽ റന്പാൻ, ഫാ.വർഗീസ് തോമസ് ചാമക്കാലായിൽ എന്നിവരുടെ നേതൃത്വത്തിൽ കുർബാനയും സെമിത്തേരിയിൽ ധൂപപ്രാർഥനയും. നാലിനു രാവിലെ 7.30ന് രൂപത വികാരി ജനറാൾ മോൺ. വർഗീസ് മാത്യു കാലായിൽ വടക്കേതിൽ കുർബാന അർപ്പിക്കും. തുടർന്ന് കുരിശുപള്ളിയിൽ ചെന്പ് പ്രതിഷ്ഠ. വൈകുന്നേരം ആറിന് സെബാസ്റ്റ്യൻ ആന്പശേരിൽ കോർ എപ്പിസ്കോപ്പ തിരുനാൾ സന്ദേശം നൽകും. തുടർന്ന് തിരുനാൾ റാസ. അഞ്ചിനു രാവിലെ 8.30ന് തിരുനാൾ കുർബാനയ്ക്ക് പത്തനംതിട്ട രൂപതാധ്യക്ഷൻ ഡോ.സാമുവേൽ മാർ ഐറേനിയോസ് മുഖ്യകാർമികത്വം വഹിക്കും. പ്രഥമ ദിവ്യകാരുണ്യ സ്വീകരണം, നേർച്ചവിളന്പ് എന്നിവയും ഉണ്ടാകും. ഏഴിനു വൈകുന്നേരം അഞ്ചിന് കുർബാന, തിരുസ്വരൂപം തിരികെ പ്രതിഷ്ഠ, കൊടിയിറക്ക്, ബൈബിൾ നാടകം എന്നിവയോടെ തിരുനാൾ സമാപിക്കും. മരുതിമൂട് സെന്‍റ് ജോർജ് പള്ളിയിൽ അടൂർ: മരുതിമൂട് സെന്‍റ് ജോർജ് റോമൻ ലത്തീൻ കത്തോലിക്കാ ദേവാലയത്തിൽ പാദുകാവലിനോടനുബന്ധിച്ച തിരുനാൾ കൊടിയേറ്റ് ഇന്നു രാവിലെ പത്തിന് നടക്കും. നാളെ മുതൽ മേയ് ഒന്നുവരെ കുടുംബ നവീകരണ ധ്യാനം. മേയ് മൂന്നിനു വൈകുന്നേരം പ്രദക്ഷിണം, നാലിനു രാവിലെ ചെന്പിൽ അരിയിടീൽ. പത്തിനു ജപമാല, ചെന്പെടുപ്പ് പ്രദക്ഷിണം, വൈകുന്നേരം ആറിന് ഇടവക ദിനാഘോഷവും മതബോധന വാർഷികവും. രാത്രി ഏഴിന് ഗാനമേള.

ബിഷപ് ഐസക് മാർ യൂഹാനോന്‍റെ ഓർമത്തിരുനാൾ

തിരുവല്ല : തിരുവല്ല അതിരൂപതയുടെ നാലാമത് മെത്രാപ്പോലീത്തയായിരുന്ന ഐസക് മാർ യൂഹാനോന്‍റെ 38 -ാമത് ഓർമത്തിരുനാൾ ഇന്നും നാളെയുമായി തിരുവല്ല സെന്‍റ് ജോൺസ് മെത്രാപ്പോലീത്തൻ കത്തീഡ്രൽ ദേവാലയത്തിൽ നടക്കും. ഇന്ന് വൈകുന്നേരം ആറിനു സന്ധ്യാപ്രാർഥനയേ തുടർന്ന് കബറിങ്കൽ ധൂപപ്രാർഥന. നാളെ രാവിലെ 6.30 ന് പ്രഭാത പ്രാർഥനയ്ക്കുശേഷം ആർച്ച് ബിഷപ് ഡോ. തോമസ് മാർ കൂറിലോസിന്‍റെ മുഖ്യകാർമികത്വത്തിൽ വിശുദ്ധ സമൂഹ ബലി, കബറിങ്കൽ ധൂപപ്രാർഥന, നേർച്ച വിളമ്പ് .

‘കാട്ടുമൃഗങ്ങളുടെ ഇറച്ചി’വില്പനയ്ക്കെത്തിച്ച സംഘം പോലീസ് നിരീക്ഷണത്തിൽ

അടൂർ ബൈബിൾ കൺവൻഷൻ ആരംഭിച്ചു

അടൂർ: വൈദിക ജില്ല മലങ്കര കാത്തലിക് ബൈബിൾ കൺവൻഷൻ നാളെ മുതൽ 30 വരെ നടക്കും. അടൂർ ഹോളി ഏഞ്ചൽസ് സ്കൂൾ ഗ്രൗണ്ടിൽ വൈകുന്നേരം അഞ്ചു മുതൽ രാത്രി ഒന്പതുവരെയാണ് കൺവൻഷൻ. കർദിനാൾ മാർ ബസേലിയോസ് ക്ലീമിസ് കാതോലിക്കാബാവ കൺവൻഷൻ ഉദ്ഘാടനം ചെയ്യും. ഫാ. ഡാനിയൽ പൂവണ്ണത്തിൽ ( മൗണ്ട് കാർമൽ ധ്യാന കേന്ദ്രം, വേറ്റിനാട്)കൺവൻഷൻ നയിക്കും. ജില്ലാ വികാരി ഫാ. ശാന്തൻ ചരുവിൽ, ജനറൽ കൺവീനർ ഫാ. ജോസഫ് കടകംപള്ളിയിൽ, ഫാ. അജോ കളപ്പുരയ്ക്കൽ എന്നിവർ നേതൃത്വം നൽകും.

വള്ളസദ്യകളുടെ ബുക്കിംഗ് 300 കടന്നു

ചെസ് മത്സരം ആരംഭിച്ചു

പത്തനംതിട്ട: കേരള സ്പോർട്സ് കൗൺസിലിന്‍റെ സ്റ്റേറ്റ് ചെസ് ടെക്നിക്കൽ കമ്മിറ്റിയുടെ കേരള സ്റ്റേറ്റ് അണ്ടർ 9 ഓപ്പൺ ആൻഡ് ഗേൾസ് ചെസ് ചാമ്പ്യൻഷിപ്പ് 2025 പത്തനംതിട്ട ചുട്ടിപ്പാറ സ്കൂൾ ഓഫ് ടെക്നോളജി ആൻഡ് അപ്ലൈഡ് സയൻസസ് കോളജിൽ ആരംഭിച്ചു. ജില്ലാ കളക്ടർ എസ്. പ്രേംകൃഷ്ണൻ ഉദ്ഘാടനം നിർവഹിച്ചു. കേരളത്തിലെ 14 ജില്ലകളിൽ നിന്നും ഇരു വിഭാഗങ്ങളിലുമായി 48 കുട്ടികളാണ് മത്സരത്തിൽ പങ്കെടുക്കുന്നത്. ജില്ലാ സ്പോർട്സ് കൗൺസിൽ പ്രസിഡന്‍റ് കെ. അനിൽകുമാർ യോഗത്തിൽ അധ്യക്ഷത വഹിച്ചു. ചെസ് ഒരു ലഹരിയാക്കുക എന്ന മുഖ്യസന്ദേശം വിമുക്തി പത്തനംതിട്ട ജില്ലാ മാനേജർ സനിൽ കുട്ടികൾക്ക് പകർന്നു നൽകി. ഇന്ത്യൻ ഇന്‍റർനാഷണൽ ചെസ് കളിക്കാരനായ ഡോ. മനോജ്‌കുമാർ, ജില്ലാ ഓർഗനൈസിംഗ് കമ്മിറ്റി ചെയർമാൻ പി.പി. ഷിജിൻ, കൺവീനർ ബിജുകുമാർ, വീണാ ശ്രീലാൽ, ബിനി വര്ഗീസ്, ജി. രാജശ്രീ എന്നിവർ പ്രസംഗിച്ചു.

അയിരൂർ പഞ്ചായത്ത് സ്റ്റേഡിയത്തിനു കസ്തൂരിരംഗന്‍റെ കൈയൊപ്പ്

കോഴഞ്ചേരി: ബഹിരാകാശ ഗവേഷണ രംഗത്ത് സമാനതകളില്ലാതെ സംഭാവനകള്‍ നല്കിയ ഐഎസ്ആര്‍ഒ മുന്‍ ചെയര്‍മാന്‍ അന്തരിച്ച കെ. കസ്തൂരിരംഗന്‍റെ ദീപ്തമായ സ്മരണകള്‍ അയിരൂര്‍ ഗ്രാമപഞ്ചായത്ത് നിവാസികൾക്ക് ഇപ്പോഴുമുണ്ട്. 2003 -2009 കാലയളവില്‍ രാജ്യസഭാ അംഗമായിരുന്ന കസ്തൂരിരംഗന്‍റെ ആസ്തിവികസനഫണ്ടില്‍ നിന്നും 25 ലക്ഷം രൂപയാണ് അയിരൂര്‍ ഗ്രാമപഞ്ചായത്തിലെ കായികപ്രേമികളുടെ സ്വപ്‌നമായ പഞ്ചായത്ത് സ്റ്റേഡിയത്തിന്‍റെ നവീകരണത്തിനായി ചെലവിട്ടതെന്ന് അയിരൂര്‍ ഗ്രാമപഞ്ചായത്ത് മുന്‍പ്രസിഡന്‍റ് പ്രസാദ് കൈലാത്ത് പറഞ്ഞു. അയിരൂര്‍ സ്വദേശിയും കസ്തൂരിരംഗന്‍റെ അടുത്ത സുഹൃത്തുമായിരുന്ന അന്തരിച്ച മുന്‍ പ്രധാനമന്ത്രി ഡോ. മന്‍മോഹന്‍സിംഗിന്‍റെ പ്രിന്‍സിപ്പല്‍ സെക്രട്ടറി ആയിരുന്ന ടി.കെ.എ. നായരാണ് കസ്തൂരിരംഗന്‍ എംപിയുടെ ആസ്തിവികസനഫണ്ടില്‍ നിന്നുള്ള തുക പഞ്ചായത്ത് സ്റ്റേഡിയത്തിനുവേണ്ടി നല്കാന്‍ നടപടികള്‍ സ്വീകരിച്ചതെന്ന് പ്രസാദ് പറഞ്ഞു. പണം അനുവദിക്കാനുള്ള നിർദേശം കസ്തൂരിരംഗൻ ഒപ്പിട്ടു നൽകുകയായിരുന്നു. കസ്തൂരിരംഗന്‍റെ ഫണ്ടില്‍ നിന്നും അനുവദിച്ച 25 ലക്ഷം രൂപ ചെലവഴിച്ചാണ് സ്റ്റേഡിയം മണ്ണിട്ടു നിരപ്പാക്കിയത്. അയിരൂര്‍ പഞ്ചായത്തിന്‍റെ കായിക സംസ്‌കാരത്തിനും വളര്‍ന്നുവരുന്ന തലമുറയ്ക്കും കസ്തൂരിരംഗന്‍ എന്ന ബഹുമുഖ പ്രതിഭയുടെ കൈയൊപ്പുകൂടി തങ്ങളുടെ ഗ്രാമത്തിനുണ്ടായിരുന്നത് ഏറെ അഭിമാനകരമാണെന്നും പ്രസാദ് കൈലാത്ത് പറഞ്ഞു.

പത്തനംതിട്ട നഗരസഭ ബസ് സ്റ്റാൻഡിലെ കൈയേറ്റങ്ങൾ ഒഴിപ്പിച്ചു തുടങ്ങി

പത്തനംതിട്ട: പൊതുജനങ്ങൾക്കും വ്യാപാരികൾക്കും ഒരേപോലെ ബുദ്ധിമുട്ടുണ്ടാക്കിയ ഹാജി സി. മീരാസാഹിബ് സ്‌മാരക നഗരസഭ ബസ് സ്റ്റാൻഡിലെ അനധികൃത കൈയേറ്റങ്ങൾ ഒഴിപ്പിച്ചു തുടങ്ങി. കൗൺസിൽ തീരുമാനം നടപ്പാക്കാൻ നഗരസഭ ചെയർമാൻ നൽകിയ ഉത്തരവിനേത്തുടർന്നാണ് നടപടികൾക്ക് തുടക്കമായത്. റവന്യൂ, എൻജിനിയറിംഗ്, ആരോഗ്യ വിഭാഗങ്ങളുടെ സംയുക്ത നേതൃത്വത്തിലാണ് ഒഴിപ്പിക്കൽ ആരംഭിച്ചത്. യാത്രക്കാർക്ക് തടസം സൃഷ്ടിച്ചുകൊണ്ട് ബസ് സ്റ്റാൻഡ് യാർഡിന് അഭിമുഖമായുള്ള വരാന്തകളിൽ നിർമിച്ചിരുന്ന ബങ്കുകൾ നീക്കം ചെയ്‌തു. നിയമവിരുദ്ധമായും അനുമതിയില്ലാതെയും ബസ് സ്റ്റാൻഡിന് ഉള്ളിലും പുറത്തും സ്ഥാപിച്ചിട്ടുള്ള എല്ലാ പരസ്യ ബോർഡുകളും നീക്കിത്തുടങ്ങി. നിർമാണം പൂർത്തീകരിച്ച പുതിയ യാർഡുകളുടെ ഡ്രയ്നേജിൽ വ്യാപാരികൾ മലിന ജലം ഒഴിക്കുന്നത് കർശനമായി നിരോധിച്ചു. മാലിന്യം തരംതിരിച്ച് ശേഖരിക്കാൻ വരും ദിവസങ്ങളിൽ എല്ലാ വ്യാപാരികൾക്കും ബിന്നുകൾ നൽകുമെന്നും സെക്യൂരിറ്റി പരിശോധന കർശനമാക്കുമെന്നും പരിശോധനയ്ക്കു നേതൃത്വം നൽകിയ നഗരസഭ ചെയർമാൻ ടി. സക്കീർ ഹുസൈൻ പറഞ്ഞു. ടൈൽ പാകൽ പുരോഗമിക്കുന്നു നവീകരണ പ്രവർത്തനങ്ങളുടെ ഭാഗമായി ബസ് സ്റ്റാൻഡിൽ ടൈൽ വിരിക്കുന്ന ജോലികൾ പുരോഗമിക്കുകയാണ്. കൗൺസിൽ തീരുമാനപ്രകാരം നിശ്ചിത തറവാടക ഈടാക്കി വ്യാപാരികളുടെ താത്പര്യങ്ങൾ കൂടി കണക്കിലെടുത്താകും ഇറക്കുകൾക്ക് അനുമതി നൽകുന്നത്. എന്നാൽ പൊതുജനങ്ങൾക്ക് അസൗകര്യം ഉണ്ടാകുന്ന നിലയിൽ വരാന്തയിൽ ഇറക്കുകൾ അനുവദിക്കില്ല. നിർദ്ദേശങ്ങൾ ലംഘിക്കുന്നവർക്കെതിരേ ഉയർന്ന നിരക്കിൽ പിഴയും പ്രോസിക്യൂഷൻ നടപടികളും ആരംഭിക്കുമെന്ന് നഗരസഭ ചെയർമാൻ പറഞ്ഞു. ബസ് സ്റ്റാൻഡ് കോംപ്ലക്‌സിൽ ഒഴിഞ്ഞുകിടക്കുന്ന കടമുറികൾ വ്യവസ്ഥകളിൽ മാറ്റം വരുത്തി ലേലം ചെയ്തു നൽകുന്നതിനെപ്പറ്റി ആലോചിക്കാൻ ഉടൻ കൗൺസിൽ യോഗം ചേരും. വർഷങ്ങളായി കടമുറികൾ ഒഴിഞ്ഞു കിടക്കുന്നതിനാൽ വലിയ സാമ്പത്തിക നഷ്ടമാണ് നഗരസഭയ്ക്ക് ഉണ്ടായിക്കൊണ്ടിരിക്കുന്നത്. ജനസൗഹൃദ ഇടമാക്കി നഗരസഭ ബസ് സ്റ്റാൻഡിനെ മാറ്റാൻ എല്ലാ ശ്രമങ്ങളും നടത്തുമെന്ന് ചെയർമാൻ സക്കീർ ഹുസൈൻ പറഞ്ഞു. ആരോഗ്യ സ്റ്റാൻഡിംഗ് കമ്മിറ്റി ചെയർമാൻ ജെറി അലക്സ്, വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ എസ്. ഷമീർ, കൗൺസിലർ ആർ. സാബു മുനിസിപ്പൽ എൻജിനിയർ സുധീർ രാജ്,ഹെൽത്ത് സൂപ്പർവൈസർ വിനോദ് കുമാർ, റവന്യൂ ഓഫീസർ പ്രശാന്ത് എന്നിവരും ചെയർമാനൊപ്പം ഉണ്ടായിരുന്നു.

സമഗ്ര ഗുണമേന്മാ പദ്ധതി ഉദ്ഘാടനം ചെയ്തു

പന്തളം: പന്തളം തെക്കേക്കര ഗ്രാമപഞ്ചായത്തിലെ സമഗ്ര ഗുണമേന്മാ പദ്ധതിയുടെ പഞ്ചായത്തുതല ഉദ്ഘാടനം പഞ്ചായത്ത് ഹാളില്‍ പ്രസിഡന്‍റ് എസ്. രാജേന്ദ്ര പ്രസാദ് നിര്‍വഹിച്ചു. സംസ്ഥാനത്തെ പൊതുവിദ്യാഭ്യാസ മേഖലയുടെ ഗുണമേന്മ മെച്ചപ്പെടുത്തുന്നതിനായി നടപ്പിലാക്കുന്ന പരിപടിയാണിത്. ഓരോ ക്ലാസിലും പ്രായത്തിനനുസരിച്ച് കുട്ടികള്‍ നേടേണ്ട ശേഷികള്‍ ഉറപ്പുവരുത്തുന്നതിനോടൊപ്പം വിദ്യാഭ്യാസ പ്രക്രിയയില്‍ സാങ്കേതിക വിദ്യ ഉപയോഗിച്ച് പഠനരീതികളെ ആധുനികമാക്കുകയും ഓണ്‍ലൈന്‍ പഠന ഫോറങ്ങള്‍ സജീവമാക്കുകയാണ് പദ്ധതിയുടെ ലക്ഷ്യം. വൈസ് പ്രസിഡന്‍റ് റാഹേല്‍ അധ്യക്ഷത വഹിച്ചു. വിദ്യാഭ്യാസ സ്ഥിരം സമിതി അധ്യക്ഷൻ എൻ. കെ. ശ്രീകുമാർ, അംഗങ്ങളായ വി. പി. വിദ്യാധര പണിക്കർ, പൊന്നമ്മ വര്‍ഗീസ്, ജയാദേവി, അംബിക, ശ്രീവിദ്യ, ഉപജില്ലാ വിദ്യാഭ്യാസ ഓഫീസര്‍ പി. ഉഷ, ബ്ലോക്ക് പ്രോജക്ട് കോര്‍ഡിനേറ്റര്‍ കെ. ദീപു, സിഡിഎസ് ചെയര്‍പേഴ്‌സണ്‍ രാജി പ്രസാദ്, അധ്യാപകര്‍, പിടിഎ അംഗങ്ങള്‍ എന്നിവര്‍ പങ്കെടുത്തു.

കരിയർ സെമിനാറും അക്കാദമിക് ലോഞ്ചിംഗും

പത്തനംതിട്ട: അടൂർ ഗാലക്സി ഇൻസ്റ്റിറ്റ്യൂട്ട് ഓഫ് മാനേജ്മെന്‍റ് സ്റ്റഡീസ് നേതൃത്വത്തിൽ വിദ്യാർഥികൾക്കായി കരിയർ സെമിനാറും ജെയിൻ യൂണിവേഴ്സിറ്റി അക്കാദമിക് ലോഞ്ചിംഗും 29 ന് അടൂർ എൻഎസ്എസ് ഓഡിറ്റോറിയത്തിൽ നടക്കും. ജെയിൻ യൂണിവേഴ്സിറ്റിയുടെ സ്കിൽ പാർട്ണറായി ഗാലക്സിയെ തെരഞ്ഞെടുത്തതായി ഭാരവാഹികൾ പറഞ്ഞു. രാവിലെ ഒന്പതിന് ഡെപ്യൂട്ടി സ്പീക്കർ ചിറ്റയം ഗോപകുമാർ ഉദ്ഘാടനം ചെയ്യും. കാർട്ടൂണിസ്റ്റ് ഡോ. എസ്. ജിതേഷ്, ജെയിൻ യൂണിവേഴ്സിറ്റി റീജണൽ ഹെഡ് കെ. നന്ദകുമാർ തുടങ്ങിയവർ പ്രസംഗിക്കും. ഗാലക്സി ഇൻസിറ്റിറ്റ്യൂട്ട് പ്രിൻസിപ്പൽ സൗമ്യ നായർ, ഡയറക്ടർ തോമസ് കോശി , സുഹൈൽ എസ്. നിസാർ എന്നിവർ പത്രസമ്മേളനത്തിൽ പങ്കെടുത്തു.

പോലീസിനെ കൈയേറ്റം ചെയ്ത യുവാവ് പിടിയിൽ

പത്തനംതിട്ട: പോലീസിനെ കൈയേറ്റം ചെയ്ത കേസില്‍ യുവാവ് അറസ്റ്റിൽ. വള്ളിക്കോട് ഞക്കുനിലം മണലേപ്പടി മരങ്ങാട്ടു കോളനി ഞ്ഞാറമൂട്ടില്‍ കോയിപ്പാട്ട് ബിജുവാണ് (39) അറസ്റ്റിലായത്. വള്ളിക്കോട് ഞക്കുനിലം മുരുപ്പേല്‍ വീട്ടില്‍ രാജമ്മയെ അയല്‍വാസി ബിജു ഉപദ്രവിക്കുന്നതായുള്ള വിവരമറിഞ്ഞാണ് പത്തനംതിട്ട എസ്ഐ ബിനോജിന്‍റെ നേതൃത്വത്തില്‍ പോലീസ് സംഘം സ്ഥലത്തെത്തിയത്. എസ് സിപിഒഹരിദാസ്, സിപിഒ ബിബിന്‍ എന്നിവരാണ് എസ്ഐ ക്കൊപ്പം ഉണ്ടായിരുന്നത്. കാര്യങ്ങള്‍ തിരക്കികൊണ്ടിരിക്കേ ബിജു, ബിബിനെ അസഭ്യം വിളിച്ചുകൊണ്ട് മര്‍ദ്ദിക്കുകയായിരുന്നു. പോലീസ് ഇന്‍സ്പെക്ടര്‍ ആര്‍. വി. അരുണ്‍ കുമാറിന്‍റെ നേതൃത്വത്തിലാണ് നടപടികള്‍ കൈക്കൊണ്ടത്.

ഹയര്‍ ദി ബെസ്റ്റ് പദ്ധതിയുമായി വിജ്ഞാന കേരളവും കുടുംബശ്രീയും

പത്തനംതിട്ട: വിജ്ഞാന കേരളം പദ്ധതിയുടെ ഭാഗമായി ജില്ലയിലെ പ്രാദേശിക തൊഴിലുകള്‍ കണ്ടെത്തി അഭ്യസ്തവിദ്യരായ യുവതി യുവാക്കള്‍ക്ക് തൊഴില്‍ നല്‍കുന്നതിനായി കുടുംബശ്രീ ജില്ലാ മിഷനുമായി ചേര്‍ന്ന് നടപ്പാക്കുന്ന ഹയര്‍ ദി ബെസ്റ്റ് പരിപാടി ആരംഭിച്ചു.വിജ്ഞാന കേരളം സംസ്ഥാന ഉപദേശകന്‍ ഡോ. ടി. എം. തോമസ് ഐസക് പദ്ധതി വിശദകരിച്ചു. മാത്യു ടി. തോമസ് എംഎല്‍എ അധ്യക്ഷത വഹിച്ചു. കുടുംബശ്രീയും വിജ്ഞാന കേരളവും സംയുക്തമായി തൊഴില്‍ ദാതാക്കള്‍ തെരഞ്ഞെടുക്കുന്ന ഉദ്യോഗാർഥികള്‍ക്ക് അടിസ്ഥാന പരിശീലനം നല്‍കും. ജില്ലയിലെ പ്രധാനപ്പെട്ട തൊഴില്‍ ദാതാക്കള്‍ ചര്‍ച്ചയില്‍ പങ്കെടുത്തു. എംഎല്‍എ മാരായ പ്രമോദ് നാരായൺ, കെ. യു. ജനീഷ് കുമാർ, ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം, വൈസ് പ്രസിഡന്‍റ് ബീനാ പ്രഭ , ജില്ലാ കളക്ടര്‍ എസ്. പ്രേം കൃഷ്ണൻ, ജില്ലാ മിഷന്‍ കോഡിനേറ്റര്‍ എസ്. ആദില, കെ ഡിസ്‌ക് ജില്ലാ പ്രോഗ്രാം മാനേജര്‍ ഷിജു എം. സാംസൺ, ബ്ലോക്ക്- ഗ്രാമപഞ്ചായത്ത് പ്രസിഡന്‍റുമാര്‍ എന്നിവര്‍ പങ്കെടുത്തു.

കംഫർട്ട് സ്റ്റേഷൻ നിർമാണം അശാസ്ത്രീയമെന്ന് വനിതാ കോൺ-എം

മല്ലപ്പള്ളി: മല്ലപ്പള്ളി ബസ് സ്റ്റാൻഡിൽ ഗ്രാമപഞ്ചായത്തിന്‍റെ നേതൃത്വത്തിൽ നടക്കുന്ന അശാസ്ത്രീയമായ കംഫർട്ട് സ്റ്റേഷൻ നിർമാണത്തിൽ കേരള വനിതാ കോൺഗ്രസ് - എം തിരുവല്ല നിയോജകമണ്ഡലം നേതൃയോഗം പ്രതിഷേധിച്ചു. സ്ഥലപരിമിതി മൂലം ബുദ്ധിമുട്ടുന്ന പഞ്ചായത്ത് ബസ് സ്റ്റാൻഡിൽ, പഞ്ചായത്തുവക സ്ഥലം സ്റ്റേഷനു പുറകിൽ നിലനിൽക്കേവയാണ്, അത് പ്രയോജനപ്പെടുത്താതെ സ്റ്റാൻഡ് കൈയേറി ശൗചാലയം പണിയുന്നത്. തീരുമാനം പഞ്ചായത്ത് പുനഃപരിശോധിച്ചില്ലെങ്കിൽ ശക്തമായ സമരപരിപാടികളുമായി മുന്നോട്ടുപോകുമെന്ന് യോഗം മുന്നറിയിപ്പ് നൽകി. കേരള വനിതാ കോൺഗ്രസ് - എം തിരുവല്ല നിയോജകമണ്ഡലം പ്രസിഡന്‍റ് സൂസമ്മ ബേബിയുടെ അധ്യക്ഷതയിൽ കൂടിയ യോഗത്തിൽ ഓഫീസ് ചാർജ് സെക്രട്ടറി മറിയാമ്മ തോമസ്, കുന്നന്താനം മണ്ഡലം പ്രസിഡന്‍റ് അനിലി വർഗീസ്, മല്ലപ്പള്ളി മണ്ഡലം പ്രസിഡൻറ് രേഷ്മ ലിജു, ആനിക്കാട് മണ്ഡലം പ്രസിഡന്‍റ് ഷിനിമോൾ സജിത്, രജനി ചന്ദ്രബാബു, സുബി സോജി എന്നിവർ പ്രസംഗിച്ചു.

തെരുവുവിളക്കുകളുടെ പരിപാലനം ഉറപ്പാക്കണം: മാത്യു ടി. തോമസ്

പത്തനംതിട്ട: തദ്ദേശ സ്ഥാപനങ്ങള്‍ തെരുവ് വിളക്കുകളുടെ പരിപാലനം ഉറപ്പുവരുത്തണമെന്ന് മാത്യു ടി. തോമസ് എംഎല്‍എ. ജില്ലാ വികസന സമിതി യോഗത്തിലാണ് എംഎൽഎയുടെ നിര്‍ദ്ദേശം. തിരുവല്ല ബൈപാസിലെ തകരാറുള്ള സൗരോര്‍ജ വിളക്കുകള്‍ പ്രവര്‍ത്തനക്ഷമമാക്കണം. കുറ്റൂര്‍ വില്ലേജ് ഓഫീസ് നിര്‍മാണം വേഗത്തിലാക്കാന്‍ എംഎല്‍എ, കളക്ടർ, പൊതുമരാമത്ത്, റവന്യൂ ഉദ്യോഗസ്ഥര്‍ എന്നിവര്‍ സംയുക്ത പരിശോധനനടത്തും. നിരണം പഞ്ചായത്തിലെ ജനസേവാ റോഡ് നിര്‍മാണം ഉടന്‍ പുനരാരംഭിക്കണമെന്നും എംഎല്‍എ പറഞ്ഞു. പഴകുളം - കുരമ്പാല റോഡില്‍ കനാല്‍ പാലത്തിന്റെ വശങ്ങള്‍ ഇടിഞ്ഞ് അപകടാവസ്ഥയിലായത് ഉടന്‍ പരിഹരിക്കണമെന്ന് ആന്‍റോ ആന്‍റണി എംപിയുടെ പ്രതിനിധി തോപ്പില്‍ ഗോപകുമാര്‍ പറഞ്ഞു. പള്ളിക്കല്‍ പ്രദേശത്തെ കുടിവെള്ള പ്രശ്നത്തിന് അടിയന്തര പരിഹാരം കാണണമെന്നും നിര്‍ദ്ദേശിച്ചു. തിരുവല്ലയില്‍ അതിദാരിദ്ര വിഭാഗത്തിലുള്ള 15 കുടുംബങ്ങള്‍ക്ക് വീട് നിര്‍മിച്ചു നല്‍കുന്നതിന് 42 സെന്‍റ് ഭൂമി തിരിച്ചറിഞ്ഞിട്ടുണ്ടെന്ന് അധ്യക്ഷത വഹിച്ച ജില്ലാ കളക്ടര്‍ എസ്. പ്രേം കൃഷ്ണന്‍ പറഞ്ഞു. ജില്ലാ പ്ലാനിംഗ് ഓഫീസര്‍ എ. എസ്. മായ, ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

മറവിരോഗം ബാധിച്ച ക‌ിടപ്പുരോഗിയെ മർദിച്ച ഹോം നഴ്സ് അറസ്റ്റിൽ

പത്തനംതിട്ട: മറവിരോഗം ബാധിച്ച കിടപ്പുരോഗിയെ നഗ്നനാക്കി മർദ്ദിച്ച് തറയിലൂടെ വലിച്ചിഴച്ച ഹോം നഴ്‌സ്‌ അറസ്റ്റിൽ. കൊല്ലം വിളക്കുടി കുന്നിക്കോട് ഭാസ്കര വിലാസത്തിൽ വിഷ്ണുവാണ് (37) അറസ്റ്റിലായത്. പന്തളം തെക്കേക്കര തട്ട പറപ്പെട്ടി സായി വീട്ടിൽ (സന്തോഷ്‌ ഭവനം) ശശിധരൻ പിള്ള (60)യാണ് ക്രൂരമർദ്ദനത്തിനിരയായത്. വ്യാഴാഴ്ച രണ്ടോടെയാണ് രോഗിയായ ഇദ്ദേഹത്തിന്, പരിചരിക്കാൻ നിർത്തിയ ഹോംനഴ്സിൽ നിന്നും മർദ്ദനമേറ്റത്. കിടപ്പുമുറിയിൽ വച്ച് വടികൊണ്ട് മുഖത്ത് കുത്തിയതു കാരണം ഇടതു കണ്ണിനു താഴെ അസ്ഥിക്ക് പൊട്ടലുണ്ടായി. ബെൽറ്റ് കൊണ്ടുള്ള അടിയേറ്റ് ഇടതുമുട്ടിന് താഴെ മുറിവും, തറയിൽ തള്ളിയിട്ടു വലിച്ചത് കാരണം മുതുകിന് ചതവും സംഭവിച്ചു. തുടർന്ന് ഇദ്ദേഹം അബോധാവസ്ഥയിലായി. പരുമലയിലെ സ്വകാര്യ ആശുപത്രിയിൽ ഐസിയുവിൽ ചികിത്സയിലാണ്. മറവിരോഗത്താലും മറ്റും പ്രയാസം അനുഭവിക്കുന്ന ശശിധരൻ പിള്ള ഏഴ് വർഷമായി കിടപ്പിലാണ്. ബിഎസ്എഫിൽ നിന്നും വിരമിച്ച ഇദ്ദേഹത്തെ പരിചരിക്കുന്നതിനായി, അടൂരിലെ ഒരു ഏജൻസി മുഖാന്തരം ഒന്നരമാസം മുമ്പാണ് വിഷ്ണുവിനെ നിയോഗിച്ചത്. തഞ്ചാവൂരിൽ ഗവൺമെന്‍റ് സർവീസിൽ അധ്യാപികയായ ഭാര്യ എം. എസ്. അനിത ഭർത്താവിനെ പരിചരിക്കാൻ ഹോം നഴ്സിനെ ഏർപ്പെടുത്തുകയായിരുന്നു. വീട്ടിലെ സിസിടിവി പരിശോധിച്ചപ്പോൾ വിഷ്ണു ശശിധരൻ പിള്ളയെ മർദ്ദിക്കുന്ന ദൃശ്യങ്ങൾ ലഭിച്ചു. കൊടുമൺ പോലിസിൽ വിവരം അറിയിച്ചതു പ്രകാരം, പോലീസ് നടപടികൾ സ്വീകരിക്കുകയായിരുന്നു. വിഷ്ണുവിന്‍റെ അറസ്റ്റ് ഇന്നലെ രേഖപ്പെടുത്തി.

ജീവകാരുണ്യ പദ്ധതികൾ ഉദ്ഘാടനം ചെയ്തു

റാന്നി: പരമസത്യമായ ദൈവത്തിലേക്ക് എത്താനുള്ള ഉറവകളാകണം മതങ്ങളെന്ന് മാർത്തോമ്മ സഭാ റാന്നി- നിലയ്ക്കൽ ഭദ്രാസനാധിപൻ ഡോ. ജോസഫ് മാർ ബർണബാസ് സഫ്രഗൻ മെത്രാപ്പോലീത്ത. ശതാബ്ദി ആഘോഷിക്കുന്ന കരിമ്പനാം കുഴി സെന്‍റ് ആൻഡ്രൂസ് മാർത്തോമ്മ ഇടവകയുടെ അഗാപ്പേ 2025 എന്ന പേരിൽ നടത്തിയ ജീവകാരുണ്യ പദ്ധതികളുടെ ഉദ്ഘാടനവും മത സൗഹാർദ സമ്മേളനവും ഉദ്ഘാടനം ചെയതു പ്രസംഗിക്കുകയായിരുന്നു അദ്ദേഹം. സ്വാമി ഗുരുരത്നം ജ്ഞാനതപസ്വി, ഡോ. സാമുവൽ മാർ ഐറേനിയോസ് മെത്രാപ്പോലിത്ത കുറിയാക്കോസ് മാർ ഇവാനിയോസ് മെത്രാപ്പോലീത്ത, പ്രമോദ് നാരായൺ എംഎൽഎ, ഫാ. എ.ജെ ക്ലീമീസ്, വികാരി റവ. ബിജോ ബെന്നി, ഹരി പത്തനാപുരം, ലതാ മോഹൻ, സിബി താഴത്തില്ലത്ത്, മേഴ്സി ജോൺ, ഭദ്രൻ കല്ലയ്ക്കൽ തുടങ്ങിയവർ പ്രസംഗിച്ചു. ജീവകാരുണ്യ പദ്ധതികളുടെ ഭാഗമായി 50 കിഡ്നി രോഗികൾക്കായുള്ള സഹായങ്ങളുടെയും നാല് സ്കൂളുകളിലെ 100 കുട്ടികൾക്കായുള്ള പഠനോപകരണ വിതരണവും ഡെൽറ്റ ഗ്രൂപ്പ് ചെയർമാൻ തോമസ് ഡെൽറ്റ നിർവഹിച്ചു.

തിരുവല്ല സബ്ട്രഷറി കെട്ടിടത്തിനു സ്ഥലം: ഫയലിൽ ചെയർപേഴ്സൺ ഒപ്പിടാത്തത് വിവാദത്തിൽ

തിരുവല്ല : തിരുവല്ല സബ് ട്രഷറിക്ക് പുതിയ കെട്ടിടം നിർമിക്കുന്നതിന് സ്ഥലം അനുവദിക്കാൻ മൂന്ന് മാസം മുമ്പ് മുനിസിപ്പൽ കൗൺസിൽ യോഗം തീരുമാനിച്ചിട്ടും ചെയർപേഴ്സൺ ഫയലിൽ ഒപ്പിടാത്തത് വിവാദത്തിൽ. കൗൺസിലിലെ ഭൂരിപക്ഷ തീരുമാനമുണ്ടായിട്ടും ചെയർപേഴ്സൺ ഒപ്പിടാത്തതു കാരണം തീരുമാനമെടുക്കാനാകുന്നില്ലെന്ന് ഇന്നലെ ചേർന്ന ജില്ലാ വികസന സമിതിയോഗത്തിലാണ് മുനിസിപ്പൽ സെക്രട്ടറിയാണ് അറിയിച്ചു. ഒരു നൂറ്റാണ്ടിലേറെ പഴക്കമുള്ള കെട്ടിടത്തിൽ പ്രവർത്തിക്കുന്ന സബ് ട്രഷറിക്ക് പുതിയ കെട്ടിടം നിർമിക്കാൻ സർക്കാർ പണം അനുവദിച്ചെങ്കിലും സ്ഥലം വിട്ടുകിട്ടുന്നതിലെ തടസങ്ങൾ കാരണം കെട്ടിടനിർമാണം നീണ്ടുപോകുകയാണ്. ഇതുസംബന്ധിച്ച് ജില്ലാ കളക്ടറുടെ സാന്നിധ്യത്തിൽ ഇന്നലെ നടന്ന യോഗത്തിൽ വിഷയം ചർച്ചയായി. ട്രഷറിക്ക് കെട്ടിടം നിർമിക്കാൻ കവിയൂർ പഞ്ചായത്തിൽ സ്ഥലം നൽകാമെന്ന് അറിയിച്ചിട്ടുണ്ടെന്ന് ജില്ലാ ട്രഷറി ഓഫീസർ യോഗത്തിൽ പറഞ്ഞു. എന്നാൽ തിരുവല്ലയുടെ നഗരഹൃദയത്തിൽ പ്രവർത്തിച്ചു കൊണ്ടിരിക്കുന്ന സബ് ട്രഷറി കിലോമീറ്ററുകൾക്ക് അപ്പുറത്തേക്ക് മാറ്റുന്നതു പെൻഷൻകാർ ഉൾപ്പെടെയുള്ളവർക്ക് ബുദ്ധിമുട്ടാകുന്ന സാഹചര്യം ഉണ്ടാക്കുമെന്ന് മാത്യു ടി. തോമസ് എംഎൽഎ യോഗത്തിൽ അറിയിച്ചു. ഇതേതുടർന്ന് സ്ഥലം ലഭിക്കുന്ന വിഷയത്തിൽ അന്തിമ തീരുമാനം ഉണ്ടാക്കാൻ ഒരുമാസം കൂടി അനുവദിക്കാൻ ജില്ലാ വികസനയോഗത്തിൽ തീരുമാനിച്ചു. നഗരസഭാ വളപ്പിലെ കുടുംബകോടതി പ്രവർത്തിച്ചിരുന്ന സ്ഥലം അനുവദിക്കുമെന്ന് ആദ്യം അറിയിച്ച നഗരസഭാധികൃതർ പിന്നീട് തീരുമാനം മാറ്റി. പഴയ ടൗൺ ഹാൾ പൊളിച്ചുമാറ്റി അവിടെ സ്ഥലം നൽകാൻ കൗൺസിൽ യോഗം പിന്നീട് തീരുമാനിച്ചു. ഇതേതുടർന്ന് സ്ഥലം അളന്നു തിട്ടപ്പെടുത്തി സർക്കാരിലേക്ക് തീരുമാനം അറിയിച്ചെങ്കിലും പുതിയ കൗൺസിൽ യോഗത്തിൽ ഈസ്ഥലം വിട്ടുനൽകുന്നതിന് എതിർപ്പുകൾ ഉണ്ടായി. തുടർന്ന് രാമപുരം മാർക്കറ്റ് ഷോപ്പിംഗ് കോംപ്ലക്സ് നിർമിക്കുമ്പോൾ അതിൽ സബ് ട്രഷറിക്ക് സൗകര്യം ഒരുക്കുമെന്ന് അറിയിച്ചു. ഇതിനെ കൗൺസിൽ അംഗങ്ങൾ എതിർത്തതോടെ 2011ൽ നഗരസഭയെടുത്ത മുൻതീരുമാനം അംഗീകരിക്കാൻ കഴിഞ്ഞ നവംബർ നാലിനു ചേർന്ന കൗൺസിൽ യോഗം എതിർപ്പില്ലാതെ തീരുമാനിച്ചിരുന്നു. ഇതുപ്രകാരം പഴയ ടൗൺ ഹാൾ പൊളിച്ചുമാറ്റിയ സ്ഥലം നൽകാനുള്ള തീരുമാനത്തിലാണ് നഗരസഭാദ്ധ്യക്ഷ ഒപ്പിടാതിരിക്കുന്നത്.

ഫ്രാൻസിസ് മാർപാപ്പയ്ക്ക് ആദരാഞ്ജലി അർപ്പിച്ചു

അടൂർ: പരിശുദ്ധ ഫ്രാൻസിസ് മാർപാപ്പയ്ക്ക് അടൂരിലെ ലത്തീൻ, സീറോ മലബാർ, സീറോ മലങ്കര സഭകളുടെ ആഭിമുഖ്യത്തിൽ സ്മരണാഞ്ജലിയും മൗന പ്രാർഥനാ റാലിയും സംഘടിപ്പിച്ചു. വൈദികരും സന്ന്യസ്തരും വിശ്വാസികളും മാർപാപ്പയുടെ കബറടക്കദിനമായ ഇന്നലെ വൈകുന്നേരം ഒന്നിച്ച് ചേർന്നു. അടൂർ തിരുഹൃദയ മലങ്കര കത്തോലിക്കാ ദേവാലയത്തിൽ നടന്ന പ്രാർഥനാ ശുശ്രുഷയിലും അനുസ്മരണ യോഗത്തിലും സെന്‍റ് ജോൺ ഓഫ് ദി ക്രോസ് ലത്തീൻ കത്തോലിക്ക ഇടവക, മാർ സ്ലീവാ സീറോ മലബാർ കത്തോലിക്ക ഇടവക, തിരുഹൃദയ മലങ്കര സുറിയാനി കത്തോലിക്ക ഇടവക എന്നിവിടങ്ങളിലെ വൈദികരും വിശ്വാസികളും പങ്കെടുത്തു. സിഎംഐ സന്യാസ സഭ, ഹോളി ക്രോസ് കോൺവെന്‍റ്, സെന്‍റ് ജോൺസ് കോൺവെന്‍റ്, ഡിഎം കോൺവെന്‍റ് എന്നിവിടങ്ങളിലെ സന്ന്യസ്തരും പ്രാർഥനാസംഗമത്തിൽ പങ്കുചേർന്നു. പ്രാർഥനാ സംഗമത്തിന് ശേഷം മാർപാപ്പയുടെ സ്മരണാർത്ഥം ടൗൺ ചുറ്റി മൗനജാഥ നടത്തി. റാന്നി: കാത്തലിക് ഫെലോഷിപ്പിന്‍റെയും റാന്നി പൗരാവലിയുടെയും സംയുക്താഭിമുഖ്യത്തിൽ ഫ്രാൻസിസ് മാർപാപ്പ അനുസ്മരണയാത്രയും യോഗവും നടത്തി. നീരാട്ടുകാവ് സെന്‍റ് തോമസ് മലങ്കര കത്തോലിക്കാ പള്ളിയിൽ കണ്ണംപള്ളി സെന്‍റ് മേരീസ് പള്ളി വികാരി ഫാ. ബിജു ചുളയില്ലാപ്ലാക്കലിന്‍റെ പ്രാർഥനയോടെ യാത്ര ആരംഭിച്ചു. തുടർന്ന് വാഹന റാലിയായി റാന്നി ചുറ്റി ചെത്തോങ്കര ക്രിസ്തുരാജ പള്ളിയിൽ സമാപിച്ചു. ‌ ഫാ. പോൾ നെൽസൺ ആമുഖ സന്ദേശവും ഫാ. ചെറിയാൻ മണപ്പുറത്ത് ധൂപാർപ്പണവും അനുസ്മരണ പ്രസംഗവും നടത്തി. ഫാ. ജോസഫ് വരമ്പുങ്കൽ ഒഐസി, ഫാ. ജീസ് ഐക്കര, ഫാ. കോശി മണ്ണിൽ, ഫാ. ജോൺ കമുകും പ്ലാക്കൽ തുടങ്ങിയവർ നേതൃത്വം നൽകി.

അഞ്ച് വയസ് ആകുന്പോഴും കോന്നി മെഡിക്കൽ കോളജിൽ കിടത്തിച്ചികിത്സ കിടപ്പിൽ തന്നെ

ഹജ്ജ് തീര്‍ഥാടകര്‍ക്ക് വാക്‌സിനേഷന്‍ ക്യാമ്പ് ഇന്ന്

പത്തനംതിട്ട: ഹജ് തീര്‍ഥാടനവുമായി ബന്ധപ്പട്ട് ജില്ലയില്‍ നിന്നും രജിസ്റ്റര്‍ ചെയ്തിട്ടുള്ള തീര്‍ഥാടകര്‍ക്ക് ഇന്ന് വാക്‌സിനേഷന്‍ ക്യാമ്പ് സംഘടിപ്പിക്കും. രാവിലെ 8.30 മുതല്‍ പത്തനംതിട്ട ജനറല്‍ ആശുപത്രിയിലാണ് ക്യാമ്പ്. സര്‍ക്കാര്‍ പട്ടികയിലുള്ള തീര്‍ഥാടകര്‍ തിരിച്ചറിയല്‍രേഖ, മറ്റ് അനുബന്ധ രേഖകള്‍ സഹിതം ക്യാമ്പില്‍ പങ്കെടുക്കണമെന്ന് ജില്ലാ മെഡിക്കല്‍ ഓഫീസര്‍ ഡോ. എല്‍. അനിതകുമാരി അറിയിച്ചു.

കാർ അപകടത്തിൽ അധ്യാപിക മരിച്ചു

വെണ്ണിക്കുളം: കാർ അപകടത്തിൽ അധ്യാപിക മരിച്ചു. പെരുന്പാവൂർ കീഴില്ലം മാർത്തോമ്മ ഹയർ സെക്കൻഡറി സ്കൂൾ അധ്യാപിക ആറന്മുള കാലായിൽ ഡോ.തോമസ് ജോർജിന്‍റെ (പ്രിൻസിപ്പൽ, എംബിറ്റ്സ് എൻജിനിയറിംഗ് കോളജ്, നെല്ലിമറ്റം - കോതമംഗലം) ഭാര്യ റെസി ടൈറ്റസാണ് (52) മരിച്ചത്. ഇന്നലെ പുലർച്ചെ കോട്ടയം - കോഴഞ്ചേരി റോഡിൽ വെണ്ണിക്കളം പാട്ടക്കാലായിലാണ് സംഭവം. പെരുന്പാവൂരിൽ നിന്നും വീട്ടിലേക്കു വരികയായിരുന്നു റെസി ടൈറ്റസ്. പാട്ടക്കാലയ്ക്കു സമീപം നിർത്തിയിട്ടിരുന്ന പിക്കപ് വാനിൽ കാർ നിയന്ത്രണം വിട്ട് ഇടിച്ചാണ് അപകടമുണ്ടായത്. ഭർത്താവ് തോമസ് ജോർജും കാറിലുണ്ടായിരുന്നു. റെസിയാണ് കാർ ഓടിച്ചിരുന്നത്. പത്തനംതിട്ട ചുരുളിക്കോട് തുണ്ടു പറമ്പിൽ പ്രഫ. ടി.എസ്. ടൈറ്റസിന്‍റെയും ആനി ടൈറ്റസിന്‍റെയും മകളാണ് റെസി. സംസ്കാരം പിന്നീട്. മക്കൾ: കിരൺ ജോർജ് തോമസ് (പ്രൈസ് വാട്ടർ ഹൗസ് കൂപേഴ്സ്, ബംഗളൂരു), അജയ് ടൈറ്റസ് തോമസ് (ടിസിഎസ്, തിരുവനന്തപുരം).

ടോറസിലിടിച്ച് പച്ചക്കറി ലോറി മറിഞ്ഞു

അടൂർ: എംസി റോഡിൽ അരമനപ്പടിക്കു സമീപം പച്ചക്കറി ലോറി ടോറസുമായി കൂട്ടിയിടിച്ചുണ്ടായ അപകടത്തിൽ ഡ്രൈവർക്ക് പരിക്ക്. ഇന്നലെ പുലർച്ചെ നാലിനായിരുന്നു അപകടം. അപകടത്തിൽപെട്ട പച്ചക്കറി ലോറി റോഡിന് കുറുകെ മറിഞ്ഞാണ് ലോറിയിലെ ഡ്രൈവർക്ക് സാരമായ പരിക്കേറ്റത്. ക്ലീനർക്കു നിസാര പരിക്കുകളുണ്ട്. റോഡിൽ വീണ പച്ചക്കറികൾ നീക്കം ചെയ്തു ലോറി ക്രെയിൻ ഉപയോഗിച്ച് ഉയർത്തി മാറ്റി. ലോറിയുടെ ഡീസൽ ടാങ്ക് പൊട്ടുകയും ഡീസൽ റോഡിൽ ഒഴുകുകയും ചെയ്തത് ഫയർഫോഴ്സ് സംഘം നീക്കം ചെയ്തു. അടൂർ ഫയർസ്റ്റേഷൻ സീനിയർ റെസ്ക്യൂ ഓഫീസർ അജിഖാൻ യൂസുഫിന്‍റെ നേതൃത്വത്തിലാണ് രക്ഷാപ്രവർത്തനം നടത്തിയത്.

പഹൽ ഗാമിൽ നടന്നത് ഹീനമായ സംഭവം: വെൽഫെയർ പാർട്ടി

പത്തനംതിട്ട: പഹൽഗാമിൽ നടന്നത് അത്യന്തം ഹീനമായ അക്രമണമാണെന്ന് വെൽഫെയർ പാർട്ടി സംസ്ഥാന പ്രസിഡന്‍റ് റസാഖ് പാലേരി പത്രസമ്മേളനത്തിൽ പറഞ്ഞു. സാധാരണക്കാരായ ആളുകളാണ് പഹൽഗാം ആക്രമണത്തിൽ കൊല്ലപ്പെട്ടത്. പൗരന്മാരുടെ സുരക്ഷ ഉറപ്പു വരുത്തേണ്ടത് ഭരണാധികാരികളാണ്. പ്രത്യേകിച്ചും കാശ്‌മീരിനുള്ള പ്രത്യേക പദവി ഇല്ലാതാക്കിയ ശേഷം കേന്ദ്രം നേരിട്ടു നിയന്ത്രിക്കുന്ന സുരക്ഷാ സംവിധാനങ്ങളാണ് അവിടെയുള്ളത്. അതിനാൽ ആക്രമണത്തിനു കാരണമായ സുരക്ഷാവീഴ്‌ചയുടെ പൂർ ഉത്തരവാദിത്തം കേന്ദ്ര സർക്കാറിനാണെന്നും റസാഖ് കുറ്റപ്പെടുത്തി. പൗരന്മാർക്ക് സുരക്ഷ ഉറപ്പാക്കാനാകുന്നില്ലെങ്കിൽ രാജിവെക്കുകയാണ് പ്രധാനമന്ത്രിയും പ്രതിരോധ-അഭ്യന്തര മന്ത്രിമാരും ചെയ്യേണ്ടതെന്നും അദ്ദേഹം അഭിപ്രായപ്പെട്ടു. സംസ്ഥാന വൈസ് പ്രസിഡന്‍റ് പി.എ. അബ്ദുൽ ഹക്കീം, സംസ്ഥാന സെക്രട്ടറി ജ്യോതിവാസ് പറവൂർ, ജില്ലാ പ്രസിഡന്‍റ് ഷാജി റസാഖ്, ജില്ലാ ജനറൽ സെക്രട്ടറി അജിത്ത് മാന്തുക, മാജിദ നൗഷാദ് അടൂർ എന്നിവരും പത്രസമ്മേളനത്തിൽ പങ്കെടുത്തു.

ഇ.വി. വർക്കി വെച്ചൂച്ചിറ ഗ്രാമപഞ്ചായത്ത് പ്രസിഡന്‍റ്

റാന്നി: വെച്ചൂച്ചിറ ഗ്രാമപഞ്ചായത്ത് പ്രസിഡന്‍റായി ഇ.വി. വർക്കി (കോൺഗ്രസ് ) തെരഞ്ഞെടുക്കപ്പെട്ടു. യുഡിഎഫ് ധാരണ പ്രകാരം ടി,കെ. ജയിംസ് പ്രസിഡന്‍റു സ്ഥാനം രാജിവച്ച ഒഴിവിലാണ് തെരഞ്ഞെടുപ്പ് നടന്നത്. ഓലക്കുളം വാർഡിനെ (അഞ്ച്) യാണ് ഇദ്ദേഹം പ്രതിനിധീകരിക്കുന്നത്.

നീലക്കുറിഞ്ഞി ബ്ലോക്ക്തല ക്വിസ് മത്സരം നടത്തി

റാന്നി: ഹരിത കേരളം മിഷന്‍റെ നേതൃത്വത്തിൽ മൂന്നാറിൽ നടക്കുന്ന ജൈവവൈവിധ്യ പഠനോത്സവത്തിനു മുന്നോടിയായി റാന്നി ബ്ലോക്ക്തല ക്വിസ്മത്സരം നടത്തി. റാന്നി ബിആർസി ഹാളിൽ നടന്ന മത്സരം പഴവങ്ങാടി ഗ്രാമപഞ്ചായത്ത് പ്രസിഡന്‍റ് റൂബി കോശി ഉദ്ഘാടനം ചെയ്തു. റാന്നി ഗ്രാമപഞ്ചായത്ത് പ്രസിഡന്‍റ് കെ. ആർ. പ്രകാശ് അധ്യക്ഷത വഹിച്ചു. ഉപജില്ലാ വിദ്യാഭ്യാസ ഓഫീസർ പ്രീതി ജോസഫ് മുഖ്യപ്രഭാഷണം നടത്തി. ബിപിസി ഷാജി എ. സലാം, ക്വിസ്മാസ്റ്റർ എഫ്. അജിനി, ഹരിത കേരളം മിഷൻ റിസോഴ്സ് പേഴ്സൺ ലക്ഷ്മി കോമൾ, പ്രഥമാധ്യാപകൻ ജോമോൻ എന്നിവർ പ്രസംഗിച്ചു. ഏഴ്, ഏട്ട്, ഒന്പത് ക്ലാസുകളിലെ കുട്ടികളാണ് മത്സരത്തിൽ പങ്കെടുത്തത്. മത്സരത്തിൽ ടി. ആകാശ് (ജിഎം ടിവിഎച്ച്സ്എസ് കുന്നം), ഷെല്ലി ഷിബു (ജിയുപിഎസ് പുതുശേരിമല), അനന്യ സജി തോമസ് (സെന്‍റ് തോമസ് എച്ച്എസ് റാന്നി) , വി.എൽ. അലീന മോൾ (എസ്എൻഡിപി എച്ച്എസ് വെൺകുറിഞ്ഞി) എന്നിവർ ഒന്ന്, രണ്ട്, മൂന്ന് നാല് സ്ഥാനങ്ങൾ കരസ്ഥമാക്കി. മേയ് 29നാണ് ജില്ലാതല മത്സരം നടക്കുന്നത്.

മൈലപ്ര ശാലേം മാർത്തോമ്മ ഇടവക ശതാബ്ദി ഉദ്ഘാടനം നാളെ

പത്തനംതിട്ട: മൈലപ്ര ശാലേം മാർത്തോമ്മ ഇടവക ശതാബ്ദി ആഘോഷങ്ങൾക്ക് നാളെ തുടക്കമാകും. രാവിലെ എട്ടിന് റാന്നി - നിലയ്ക്കൽ ഭദ്രാസന അധ്യക്ഷൻ ഡോ. ജോസഫ് മാർ ബർന്നബാസ് സഫ്രഹൻ മെത്രാപ്പോലീത്തായുടെ മുഖ്യ കാർമികത്വത്തിൽ വിശുദ്ധ കുർബാന. ഇടവക വികാരി റവ. അജിത് ഈപ്പൻ തോമസിന്‍റെ അധ്യക്ഷതയിൽ പൊതുസമ്മേളനം നടക്കും. ശതാബ്ദി ആഘോഷങ്ങൾക്ക് തുടക്കം കുറിച്ചുകൊണ്ടുള്ള വിളംബര ജാഥ ഇന്ന് 3.30ന് മരുതേലി മുരുപ്പേൽ പൂർവ ദേവാലയത്തിൽ നിന്ന് ആരംഭിച്ച് മൈലപ്ര ശാലേം മാർത്തോമ്മ ദേവാലയ അങ്കണത്തിൽ എത്തിച്ചേരും. ശതാബ്ദി ലോഗോ പ്രകാശനം റവ. സിജി തോമസ് പൂർവ ദേവാലയത്തിൽ നിർവഹിക്കും. ഉദ്ഘാടന സമ്മേളനത്തിൽ മാർത്തോമ്മ സഭ അല്മായ ട്രസ്റ്റി അൻസിൽ സഖറിയ കോമാട്ട്, ഭദ്രാസന ട്രഷറർ അനു ഫിലിപ്പ്, മുൻവികാരി റവ. ടി. ടി. തോമസ്, മുൻ വികാരിമാർ എന്നിവർ പ്രസംഗിക്കും. സാക്ഷ്യ സമൂഹമായി വിശ്വാസയാത്രയിൽ എന്ന ചിന്താവിഷയവുമായി ഒരു വർഷം നീണ്ടുനിൽക്കുന്ന ശതാബ്ദി ആഘോഷങ്ങൾക്ക് ഇടവകയിലെ വിവിധ ആത്മീയ സംഘടനകൾ നേതൃത്വം നൽകും. ശതാബ്ദി ആഘോഷങ്ങളുടെ സമാപനം 2026 ഏപ്രിൽ 12 നു നടക്കും.

വെണ്ണിക്കുളം ഗോപാലക്കുറുപ്പ് സ്മാരക പുരസ്കാരം ഡോ. സോണിയ ചെറിയാന്

പത്തനംതിട്ട: പ്രവാസി സംസ്കൃതി അസോസിയേഷന്‍റെ 2024ലെ മഹാകവി വെണ്ണിക്കുളം ഗോപാലകുറുപ്പ് സ്‌മാരക പുരസ്‌കാരം എഴുത്തുകാരിയായ ലെഫ്. കേണൽ ഡോ. സോണിയ ചെറിയാന്‍റെ സ്നോ ലോട്ടസ് എന്ന നോവലിന് ലഭിച്ചു. 10,001 രൂപയും മഹാകവിയുടെ പേരിലുള്ള ശില്‌പവും പ്രശസ്‌തിപത്രവും അടങ്ങുന്ന അവാർഡ് മേയ് ഒന്പതിനു രാവിലെ 10 ന് വെണ്ണിക്കുളം സെന്‍റ് ബെഹനാൻസ് ഹയർസെക്കൻഡറി സ്‌കൂളിൽ നടക്കുന്ന ചടങ്ങിൽ ഗവൺമെന്‍റ് ചീഫ് വിപ്പ് ഡോ. എൻ. ജയരാജ് സമ്മാനിക്കും. കണ്ണൂർ ജില്ലയിലെ പേരാവൂർ സ്വദേശിനിയാണ് ഡോ. സോണിയ ചെറിയാൻ. സാഹിത്യകാരിയും നോവലിസ്റ്റുമായ സോണിയ ചെറിയാൻ ഇൻഡ്യൻ കരസേനയുടെ ലെഫ്. കേണലായി വിരമിച്ചു. ഒരു പട്ടാളക്കാരിയുടെ ഓർമക്കുറിപ്പുകൾ, അവളവൾ ശരണം തുടങ്ങി നിരവധി നോവലുകളുടെയും പുസ്‌തകങ്ങളുടെയും ഗ്രന്ഥകർത്താവാണ്. ഡോ. സജി ചാക്കോ, ബിജു ജേക്കബ് കൈതാരം, സാമുവേൽ പ്രക്കാനം എന്നിവർ പത്രസമ്മേളനത്തിൽ അവാർഡ് പ്രഖ്യാപനം നടത്തി.

പഹൽഗാം ആക്രമണത്തിൽ മരണമടഞ്ഞവർക്ക് ആദരാഞ്ജലി അർപ്പിച്ച് മഹിളാ കോൺഗ്രസ്

പത്തനംതിട്ട: പഹല്‍ഗാമില്‍ തീവ്രവാദികള്‍ നിരപരാധികളായ വിനോദ സഞ്ചാരികളെ ക്രൂരമായി കൊലപ്പെടുത്തിയ സംഭവം രാജ്യത്തിന്‍റെ ഐക്യത്തിനും അഖണ്ഡതയ്ക്കും നേരെയുള്ള കടന്നാക്രമണത്തിന്‍റെ ഭാഗമാണെന്ന് ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പിൽ. പഹല്‍ഗാം ഭീകരാക്രമണത്തില്‍ കൊല്ലപ്പെട്ടവര്‍ക്ക് ആദരാഞ്ജലികള്‍ അര്‍പ്പിച്ചുകൊണ്ട് മഹിളാ കോണ്‍ഗ്രസ് പത്തനംതിട്ട ജില്ലാ കമ്മിറ്റിയുടെ നേതൃത്വത്തില്‍ നടത്തിയ മൗന ജാഥയും തുടർന്നു ഗാന്ധി സ്ക്വയറില്‍ നടന്ന അനുസ്മരണ സമ്മേളനവും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. മഹിളാ കോണ്‍ഗ്രസ് ജില്ലാ പ്രസിഡന്‍റ് രജനി പ്രദീപ് അധ്യക്ഷത വഹിച്ചു. കോണ്‍ഗ്രസ് നേതാക്കളായ എ. ഷംസുദ്ദീന്‍, ജെറി മാത്യു സാം, അബ്ദുള്‍കലാം ആസാദ്, മഹിളാ കോണ്‍ഗ്രസ് നേതാക്കളായ ലാലി ജോണ്‍, സുധ നായര്‍, മഞ്ജു വിശ്വനാഥ്, ലീല രാജൻ, സുജാത മോഹന്‍, അന്നമ്മ ഫിലിപ്പ്, വസന്ത ശ്രീകുമാര്‍, സജിത, പ്രസീത രഘു, ഓമന സത്യൻ, സുധാ പത്മകുമാര്‍, ഉഷാ തോമസ്, വിനി സന്തോഷ്, സുശീല അജി, സലീന, വിജയലക്ഷ്മി, ഷീബ വര്‍ഗീസ്, റോസമ്മ ബാബുജി, ബീന സോമൻ, ശ്രീകുമാരി, ഇന്ദിരാ പ്രേം, ഓമന വര്‍ഗീസ്, ജസി മോഹന്‍, സജിനി മോഹൻ, എം.വി. അമ്പിളി, സ്വപ്നാ സൂസൻ‌, പ്രിയ പ്രസാദ്, ലത ചെറിയാന്‍ എന്നിവര്‍ പ്രസംഗിച്ചു.

Deepika.com

The Largest Read Malayalam Internet Daily

Quick Links

Rashtra Deepika LTD

Deepika.com

The Largest Read Malayalam Internet Daily

Local News

Quick Links

Rashtra Deepika LTD