റവ.ഡോ. മാത്യു ശൗര്യാംകുഴി കാഞ്ഞിരപ്പള്ളി രൂപത ചാൻസലർ; റവ.ഡോ. കുര്യൻ താമരശേരി കത്തീഡ്രൽ വികാരി
1515456
Wednesday, February 19, 2025 2:54 AM IST
കാഞ്ഞിരപ്പള്ളി: കാഞ്ഞിരപ്പള്ളി രൂപതയുടെ ചാൻസലറായി റവ.ഡോ. മാത്യു ശൗര്യാംകുഴിയെ രൂപതാധ്യക്ഷൻ മാർ ജോസ് പുളിക്കൽ നിയമിച്ചു. റോമിലെ പൊന്തിഫിക്കൽ ഓറിയന്‍റൽ ഇൻസ്റ്റിറ്റ്യൂട്ടിൽനിന്നും സഭാ നിയമത്തിൽ ഡോക്ടറേറ്റ് പൂർത്തിയാക്കിയെത്തി 2023 മേയ് മുതൽ രൂപതയുടെ വൈസ് ചാൻസലറായി ശുശ്രൂഷ നിർവഹിക്കുകയായിരുന്നു. വെളിച്ചിയാനി ഇടവക ശൗര്യാംകുഴി ആന്‍റണി-അന്നമ്മ ദമ്പതികളുടെ മകനാണ്.
രൂപത വികാരി ജനറാളും ചാൻസലറുമായിരുന്ന റവ.ഡോ. കുര്യൻ താമരശേരിയെ സെന്‍റ് ഡൊമിനിക്സ് കത്തീഡ്രൽ വികാരിയും മേജർ ആർക്കി എപ്പിസ്കോപ്പൽ തീർഥാടന കേന്ദ്രമായ കാഞ്ഞിരപ്പള്ളി പഴയ പള്ളി ആർച്ച് ്രീസ്റ്റുമായി രൂപതാധ്യക്ഷൻ മാർ ജോസ് പുളിക്കൽ നിയമിച്ചു. കത്തീഡ്രൽ വികാരിയായിരുന്ന ഫാ. വർഗീസ് പരിന്തിരിക്കൽ ചെങ്ങളം സെന്‍റ് ആന്‍റണീസ് പള്ളി വികാരിയായി നിയമിതനായതിനെ തുടർന്നാണ് റവ.ഡോ. കുര്യൻ താമരശേരി കത്തീഡ്രൽ വികാരിയും ആർച്ച്പ്രീസ്റ്റുമായി ഇന്ന് ചുമതലയേൽക്കുന്നത്.
റോമിലെ പൊന്തിഫിക്കൽ ഓറിയന്‍റൽ ഇൻസ്റ്റിറ്റ്യൂട്ടിൽനിന്നു സഭാ നിയമത്തിൽ ഡോക്ടറേറ്റ് പൂർത്തിയാക്കിയെത്തിയ റവ.ഡോ. കുര്യൻ താമരശേരി 2007 മുതൽ കാഞ്ഞിരപ്പള്ളി രൂപത കൂരിയയിൽ മാർ മാത്യു അറയ്ക്കലിന്‍റെ സെക്രട്ടറി, വൈസ് ചാൻസലർ, ജുഡീഷൽ വികാർ, രൂപത ട്രിബ്യൂണൽ ജഡ്ജ്,
ഡിഫൻഡർ ഓഫ് ബോണ്ട്, സീറോമലബാർ എക്യുമെനിക്കൽ സിനഡൽ കമ്മീഷൻ സെക്രട്ടറി, ചാൻസലർ, വികാരി ജനറാൾ തുടങ്ങിയ ശുശ്രൂഷകൾ വ്യത്യസ്ത കാലഘട്ടങ്ങളിലായി നിർവഹിച്ചു. പുഞ്ചവയൽ ഇടവകയിൽ താമരശേരി പരേതരായ കുര്യൻ-ഏലിയാമ്മ ദമ്പതികളുടെ മകനാണ്.