ADVERTISEMENT

ADVERTISEMENT

കാട്ടാനക്കൂട്ടം കൃഷി നശിപ്പിച്ചു

ഉദയഗിരി: ഉദയഗിരി പഞ്ചായത്തിലെ വായിക്കമ്പ പ്രദേശത്ത് ഭീതി പരത്തി കാട്ടാനക്കൂട്ടം. വായിക്കമ്പയിൽ അമ്പലത്തിങ്കൻ വാസുദേവന്‍റെ വീട്ടുമുറ്റത്തു വരെയാണ് കഴിഞ്ഞ ദിവസം കാട്ടാന കൂട്ടമായി എത്തിയത്. വീട്ടുകാർ അദ്ഭുതകരമായി രക്ഷപെടുകയായിരുന്നു.

നിരവധി കർഷകരുടെ തെങ്ങ്, വാഴ, കമുക് തുടങ്ങിയ കൃഷികൾ വ്യാപകമായി നശിപ്പിച്ചു. നശിപ്പിച്ച കൃഷിയിടങ്ങൾ ഉദയഗിരി പഞ്ചായത്ത് പ്രസിഡന്‍റ് കെ.എസ്. ചന്ദ്രശേഖരൻ, വൈസ് പ്രസിഡന്‍റ് ബിന്ദു ഷാജു, ക്ഷേമ കാര്യസ്റ്റാൻഡിംഗ് കമ്മിറ്റി ചെയർമാൻ ഷീജ വിനോദ്, പഞ്ചായത്തംഗങ്ങളായ സിനി, ബിന്ദു രാജേഷ്, വി.സി. പ്രകാശ് എന്നിവർ സന്ദർശിച്ചു. കൃഷി നാശം സംഭവിച്ചവർക്ക് കഴിഞ്ഞ വർഷത്തൈതടക്കം നഷ്ടപരിഹാരം അടിയന്തരമായി നൽകണമെന്ന് കെ.എസ്. ചന്ദ്രശേഖരൻ ആവശ്യപ്പെട്ടു.

ADVERTISEMENT

കുളത്തിൽ മുങ്ങിത്താഴ്ന്ന് അബോധാവസ്ഥയിലായ യുവാവിനെ ജീവിതത്തിലേക്ക് കരകയറ്റി ടെക്കി

കണ്ണൂർ: സുഹൃത്തുക്കൾക്കൊപ്പം കുളത്തിൽ കുളിക്കുന്നതിനിടെ മുങ്ങിത്താഴ്ന്ന് അബോധാവസ്ഥയിലായ യുവാവിനെ ജീവിതത്തിലേക്ക് അതിസാഹസികമായി പിടിച്ചുകയറ്റി ഐടി പ്രഫഷണലായ യുവാവ്. ഇന്നലെ രാവിലെ പതിനൊന്നോടെ പള്ളിക്കുന്ന് തയ്യിൽ തറവാട് കുളത്തിലായിരുന്നു സംഭവം. കണ്ണൂർ ഹൈറ്റ്സിലെ താമസക്കാരനായ ശ്രീകാർത്തിക് സനോജിനാണ് (22) കുളത്തിനു സമീപത്തെ താമസക്കാരനും ബംഗളൂരുവിലെ ഐടി സ്ഥാപനത്തിലെ ജീവനക്കാരനുമായ അഷിനിന്‍റെ (32) സമയോചിതമായ ഇടപെടലിലൂടെ ജീവൻ തിരിച്ചുകിട്ടിയത്. പതിവായി നീന്തൽ പരിശീലനം നടക്കാറുള്ള കുളത്തിൽ ഇന്നലെ ആരുമില്ലാതിരുന്ന സമയത്താണ് ശ്രീകാർത്തിക് സനോജും രണ്ടു സുഹൃത്തുക്കളും നീന്താനെത്തിയത്. നീന്തുന്നതിനിടെ പേശീവലിവ് അനുഭവപ്പെട്ട് വെള്ളത്തിനടിയിലേക്ക് താഴ്ന്നുപോകുകയായിരുന്നു. കൂടെയുണ്ടായിരുന്നവർ ബഹളം വയ്ക്കുന്നതു കേട്ട് ഓടിയെത്തിയ തൊട്ടടുത്ത വീട്ടിലെ അഷിൻ വെള്ളത്തിനടിയിൽ അബോധാവസ്ഥയിൽ കിടക്കുന്ന ശ്രീകാർത്തികിനെ ഞൊടിയിടയിൽ പൊക്കിയെടുത്ത് കരയ്ക്കെത്തിക്കുകയായിരുന്നു. ഇതിനിടെ സമീപത്തെ വീട്ടുകാരി ശുഭ അഗ്നിരക്ഷാസേനയെയും വിവരമറിയിച്ചിരുന്നു. എന്നാൽ അഗ്നിരക്ഷാ സേനയെത്തുന്പോഴേക്കും അഷിൻ യുവാവിനെ കരയ്ക്കെത്തിച്ച് സിപിആർ ഉൾപ്പടെയുള്ള പ്രഥമ ശുശ്രൂഷ നൽകി ജീവിതത്തിലേക്ക് തിരിച്ചെത്തിച്ചിരുന്നു. ""ഏറെ നേരം സിപിആർ നൽകിയിട്ടും പ്രതികരണമുണ്ടാകാതിരുന്നപ്പോൾ ഭയന്നു പോയെങ്കിലും സിപിആർ ചെയ്യുന്നത് തുടർന്നതോടെ ചെറിയ ചലനമുണ്ടായത് പ്രതീക്ഷയ്ക്ക് വക നൽകി. ഇതിനിടെ അഗ്നിരക്ഷാസേന കൂടിയെത്തിയത് ആശ്വാസമായി. അഗ്നിരക്ഷാ സേനാംഗങ്ങളും പ്രഥമ ശുശ്രൂഷ നൽകുകയും ഉടൻ ആശുപത്രിയിലെത്തിക്കുകയും ചെയ്തു.'' കണ്ണൂർ അഗ്നിരക്ഷാ നിലയത്തിലെ സ്റ്റേഷൻ ഓഫീസർ പി.വി. പവിത്രന്‍റെ നേതൃത്വത്തിലുള്ള സംഘമാണ് യുവാവിനെ ആശുപത്രിയിലെത്തിച്ചത്.എകെജി ആശുപത്രിയിൽ പ്രവേശിപ്പിച്ച യുവാവ് അപകടനില തരണം ചെയ്തതായി ആശുപത്രി വൃത്തങ്ങൾ അറിയിച്ചു. അഷിന്‍റെ സമയോചിതമായ ഇടപെടലാണ് യുവാവിന്‍റെ ജീവൻ രക്ഷിച്ചതെന്നും അഷിനെ അഭിനന്ദിക്കുന്നതായും അഗ്നിരക്ഷാ സേനാംഗങ്ങൾ പറഞ്ഞു. അഷിനെ കെ.വി. സുമേഷ് എംഎൽഎ വീട്ടിലെത്തി ഉപഹാരം നൽകി അനുമോദിച്ചു.

വീണ്ടും ഫൈബര്‍ ഓടം മറിഞ്ഞു; മണല്‍ത്തിട്ട നീക്കാന്‍ മത്സ്യത്തൊഴിലാളികള്‍

പയ്യന്നൂര്‍: പാലക്കോട് അഴിമുഖത്തെ മണല്‍ത്തിട്ടയിലിടിച്ച് ഇന്നലെയും ഫൈബര്‍ ഓടം മറിഞ്ഞ് അപകടം. എട്ടിക്കുളം സ്വദേശി മുഹമ്മദ് ഹാജിയുടെ ഫൈബര്‍ ഓടമാണ് മറിഞ്ഞത്. ഭീഷണിയായി മാറിയ മണല്‍ത്തിട്ട നീക്കാന്‍ അധികൃതര്‍ നടപടി സ്വീകരിക്കാത്തതിനെ തുടര്‍ന്ന് മത്സ്യത്തൊഴിലാളികള്‍ സ്വന്തം ചെലവിൽ മണല്‍ത്തിട്ട നീക്കം ചെയ്യൽ തുടങ്ങി. ഇന്നലെ രാവിലെ എട്ടേമുക്കാലോടെയാണ് മണല്‍ത്തിട്ടയിലിടിച്ച് വീണ്ടും ഫൈബര്‍ ഓടം മറിഞ്ഞ് അപകടമുണ്ടായത്. പാലക്കോട് ഹാര്‍ബറില്‍നിന്നും മത്സ്യബന്ധനത്തിനായി പോകുന്നതിനിടെ മണൽതിട്ടയിലിടിച്ച് ഹാജിയുടെ അല്‍ മിന്ന എന്ന ഫൈബര്‍ ഓടം മറിയുകയായിരുന്നു. പത്തോളം തൊഴിലാളികളാണ് ഓടത്തിലുണ്ടായിരുന്നത്. ഇവരില്‍ എട്ടിക്കുളം പള്ളിക്കോളനിയിലെ അബ്ദുള്‍ റഹ്മാന്‍, ചിറ്റടിയിലെ രതീഷ് എന്നിവര്‍ക്ക് സിസാര പരിക്കേറ്റു. മറ്റുള്ളവര്‍ പരിക്കേല്‍ക്കാതെ രക്ഷപ്പെട്ടു. പരിക്കേറ്റവരെ പയ്യന്നൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു. അന്പതടിയോളം നീളമുള്ള ഫൈബര്‍ ഓടം വടംകെട്ടി വലിച്ചുകയറ്റാനുള്ള തൊഴിലാളികളുടെ ആദ്യശ്രമങ്ങള്‍ പരാജയപ്പെട്ടപ്പോള്‍ മണല്‍ നീക്കുന്നതിനായി കൊണ്ടുവന്ന ഹിറ്റാച്ചിയില്‍ ബന്ധിപ്പിച്ച് വലിച്ചു കയറ്റുകയറ്റാന്‍ ശ്രമിച്ചിട്ടും ഫലമുണ്ടായില്ല. വിവരമറിഞ്ഞെത്തിയ നാട്ടുകാരുള്‍പ്പെടെയുള്ള മുന്നൂറോളം പേര്‍ കൂടുതല്‍ വടങ്ങള്‍ കെട്ടിയാണ് പത്തേകാലോടെ ഓടം വലിച്ച് കരയ്ക്കടുപ്പിച്ചത്. കടലില്‍വീണ ഓടത്തിലുണ്ടായിരുന്ന ലക്ഷങ്ങള്‍ വിലവരുന്ന മൂന്ന് എൻജിനുകളും വല വലിച്ചുകയറ്റുന്നതിനുള്ള വീഞ്ചും വലകളും മറ്റുപകരണങ്ങളും മത്സ്യത്തൊഴിലാളികള്‍ വീണ്ടെടുത്തെങ്കിലും എല്ലാം തകര്‍ന്ന നിലയിലാണുള്ളത്. തകര്‍ന്ന ഓടം ശരിയാക്കുന്നതിനും ലക്ഷങ്ങള്‍ ചെലവിടേണ്ടിവരുമെന്നതാണ് അവസ്ഥ. ചൊവ്വാഴ്ച വൈകുന്നരം മറ്റൊരു ഓടം അപകടത്തില്‍പ്പെട്ടിരുന്നു. പുതിയങ്ങാടിയിലെ അലോഷ്യസിന്‍റെ വള്ളം മണല്‍ത്തിട്ടയിലിടിച്ച് അടിഭാഗം തകര്‍ന്ന് വെള്ളം കയറുകയായിരുന്നു. കടലില്‍ മുങ്ങിത്താഴുന്നതിന് മുമ്പായി സമീപത്തുണ്ടായിരുന്ന സൈന്‍ എന്ന വള്ളത്തിലെ തൊഴിലാളികള്‍ അപകടത്തില്‍പ്പെട്ട തൊഴിലാളികളേയും തൊഴിലുപകരണങ്ങളും രക്ഷപ്പെടുത്തുകയായിരുന്നു. കോസ്റ്റല്‍ പോലീസാണ് ഓടം കെട്ടിവലിച്ച് കരയ്ക്കെത്തിച്ചത്. അധികൃതര്‍ കനിഞ്ഞില്ല; ഒടുവില്‍ മത്സ്യത്തൊഴിലാളികള്‍ രംഗത്ത് റീബില്‍ഡ് കേരള ഇനിഷ്യേറ്റീവില്‍ ഉള്‍പ്പെടുത്തി 26.60 കോടി രൂപ ചെലവില്‍ പണിതിട്ടും പണിതിട്ടും പൂര്‍ത്തീകരിക്കാത്ത പാലക്കോട് വലിയകടപ്പുറം അഴിമുഖത്തെ പുലിമുട്ടിനരികില്‍ രൂപപ്പെട്ട മണല്‍ത്തിട്ടയാണ് രണ്ട് ദിവസങ്ങളിലായി അപകടങ്ങൾക്കിടയാക്കിയത്. വേലിയേറ്റത്തില്‍ മണല്‍ത്തിട്ട വെള്ളത്തില്‍ മൂടുമ്പോള്‍ എവിടെയാണ് അപകടം പതിയിരിക്കുന്നതെന്ന് തിരിച്ചറിയാന്‍ പറ്റാത്ത അവസ്ഥയായിരുന്നു. പുഴയില്‍നിന്നു വെള്ളമൊഴുകി പോകാനുള്ള വഴി മാത്രമാണ് അവശേഷിച്ചിരുന്നത്. വേലിയറക്കത്തില്‍ മാത്രമേ ആഴമുള്ള സ്ഥലം തിരിച്ചറിയാന്‍ പറ്റുമായിരുന്നുള്ളൂ. മത്സ്യത്തൊഴിലാളികള്‍ ജില്ലാ കളക്ടറുടെ ശ്രദ്ധയില്‍ ഇക്കാര്യമുന്നയിച്ചിട്ടും പരിഹാരമുണ്ടായില്ലെന്ന് ആക്ഷേപമുണ്ട്. അധികൃതരുടെ കനിവ് കാണാതെ വന്നപ്പോള്‍ മത്സ്യത്തൊഴിലാളികള്‍തന്നെ ഇതിനൊരു പരിഹാരം കാണാന്‍ മുന്നോട്ടുവരികയായിരുന്നു. പുതിയങ്ങാടിയിലേയും പാലക്കോട്ടേയും മത്സ്യത്തൊഴിലാളികളുടെ കൂട്ടായ്മയായ കടക്കോടതികള്‍ ഇരിട്ടിയില്‍നിന്നും കൊണ്ടുവന്ന വലിയ ഹിറ്റാച്ചികളുപയോഗിച്ച് മണല്‍ത്തിട്ട നീക്കം ചെയ്യുന്ന പ്രവര്‍ത്തി ഇന്നലെ മുതല്‍ ആരംഭിച്ചിട്ടുണ്ട്. രണ്ടുദിവസത്തെ മണല്‍ നീക്കുന്ന പ്രവര്‍ത്തിക്ക് മാത്രമായി ഒരുലക്ഷത്തിലേറെ രൂപയാണ് ചെലവഴിക്കേണ്ടി വന്നത്.

പഴയങ്ങാടിയിൽ ബസുകൾ കൂട്ടിയിടിച്ച് 38 പേർക്ക് പരിക്ക്

പഴയങ്ങാടി: റെയിൽവേ സ്റ്റേഷന് സമീപം സ്വകാര്യ ബസുകൾ കൂട്ടിയിടിച്ച് 38 യാത്രക്കാർക്കു പരിക്ക്. ഇന്നലെ രാവിലെ പത്തരയോടെയാണ് അപകടം. പുതിയങ്ങാടി മൊട്ടാമ്പ്രത്തെ സ്വകാര്യ ആശുപത്രിയിൽ 32 പേർ ചികിത്സ തേടി. ഏറെ പേരെ പ്രാഥമിക ശുശ്രൂഷ നൽകി പറഞ്ഞയച്ചു. പരിക്കേറ്റവരിൽ അധികവും സ്ത്രീകളാണ് കെ. ശുഭ (37) മാട്ടൂൽ സൗത്ത്, എം. ഷൈമ (38) എട്ടിക്കുളം, കെ.വി. രചന (39) മാട്ടൂൽ നോർത്ത്, മാട്ടൂൽ സ്വദേശികളായ മുഹമ്മദലി (50), അബ്ദുൾ റഹ്മാൻ (50), ജിൻസി (30), ഫർസാന (23), നിത (20), സൂര്യ (24), റയാൻ റയാദ് (ആറ്), ടി. ശശി (54), അഭിലാഷ് (45), ഖദീജ (45), ഹസ്ന സുനാദ് (25), ദിൽ ഫത്ത് (12) റിയാസ്, മുഹ്സിൻ, ഹന്നത്ത് (15) ഫാദിൽ ഫൈസൽ (14), മുഹമ്മദ് റയാൻ (13), ബജീഷ് (38), വാടിക്കലിലെ ദീപ (52), പുതിയങ്ങാടിയിലെ സജിനി (40), മാടായിലെ സി. ജോയ് (48) എന്നിവരാണ് മൊട്ടാമ്പ്രത്തെ ക്രസ്റ്റന്‍റ് ആശുപത്രിയിൽ ചികിത്സ തേടിയത്. ഇവരിൽ ചിലരെ നിരീക്ഷണത്തിനു ശേഷം വൈകുന്നേരത്തോടെ വിട്ടയച്ചു. മാട്ടൂൽ സൗത്ത് സ്വദേശിനി ആബിദ ( 38 )യെ പരിയാരത്തെ കണ്ണൂർ ഗവ. മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. മാട്ടൂൽ സൗത്തിലെ ഫാത്തിമത്തുൽ മർവ(34), ഹസ്ന ഹമിദ് (27) എന്നിവരെ കണ്ണൂർ കിംസ് ആശുപത്രിയിൽ പ്രവേശിപ്പിച്ചു. ഇരുവരും കിംസ് ആശുപത്രിയിലെ ജീവനക്കാരാണ്. കഴിഞ്ഞദിവസം പഴയങ്ങാടി ബീവി റോഡ് അടിപ്പാതക്ക് സമീപം ഗതാഗതം നിയന്ത്രിക്കുകയായിരുന്ന ഹോം ഗാർഡ് രാജേഷിനെ അപായപ്പെടുത്താൻ ശ്രമിച്ച ബ്രീസ് ബസാണ് അപകടമുണ്ടാക്കിയത്. രണ്ടു ദിവസം പോലീസ് കസ്റ്റഡിയിലായിരുന്ന ബസ് ഇന്നലെയാണ് വീണ്ടും സർവീസ് ആരംഭിച്ചത്. പഴയങ്ങാടി ഭാഗത്തുനിന്ന് മാട്ടൂലിലേക്ക് പോകുന്ന ഫെമി ഗ്രൂപ്പിന്‍റെ ബസും മാട്ടൂലിൽ നിന്ന് പഴയങ്ങാടി ഭാഗത്തേക്ക് പോകുന്ന ബ്രീസ് ബസും തമ്മിലാണ് കൂട്ടിയിടിച്ചത്. ഇടിയുടെ ആഘാതത്തിൽ ഇരുബസുകളുടെയും മുൻഭാഗം പൂർണമായും തകർന്നു. അപകടം വരുത്തും വിധം ബസ് ഓടിച്ചതിന് ബ്രീസ് ബസ് ഡ്രൈവർ മാട്ടൂലെ എം. ആഷിഖി(35) നെതിരെ പഴയങ്ങാടി പോലീസ് കേസെടുത്തു. അപകടത്തെ തുർന്ന് ഏറെ നേരം ഇതുവഴിയുള്ള ഗതാഗതം തടസപ്പെട്ടു. പഴയങ്ങാടി പോലീസ് എത്തിയാണ് ഗതാഗതം നിയന്ത്രിച്ച് വാഹനങ്ങളെ കടത്തിവിട്ടത്.

എടക്കാനം ആക്രമണ കേസിൽ ഒരാൾകൂടി അറസ്റ്റിൽ

ഇരിട്ടി: എടക്കാനം റിവർ വ്യൂ പോയിന്‍റിൽ ഞായറാഴ്ച നടന്ന ആക്രമണത്തിൽ ഒരാൾ കൂടി അറസ്റ്റിൽ. കാക്കയങ്ങാട് പടിഞ്ഞാറെകണ്ടി പിടങ്ങോട് സ്വദേശി അരുൺ എന്ന അരൂട്ടിയെയാണ്(33) ഇരിട്ടി സിഐ എ. കുട്ടിക്കൃഷ്ണന്‍റെ നേതൃത്വത്തിലുള്ള പോലീസ് സംഘം അറസ്റ്റ് ചെയ്തത്. എടക്കാനത്ത് എത്തിച്ച് തിരിച്ചറിയൽ നടപടികൾ പൂർത്തിയാക്കിയ ശേഷം പ്രതിയെ കോടതിയിൽ ഹാജരാക്കി. പോക്സോ ഉൾപ്പെടെ ആറോളം കേസുകളിലെ പ്രതിയാണ് അറസ്റ്റിലായ അരുൺ. സംഭവത്തിൽ കഴിഞ്ഞ ദിവസം സിപിഎം കാക്കയങ്ങാട് ലോക്കൽ കമ്മറ്റിയംഗം പാലപ്പുഴ സ്വദേശി എ. രഞ്ജിത്ത് (32), മുഴക്കുന്ന് സ്വദേശി അക്ഷയ് (25) എന്നിവരെഅറസ്റ്റ് ചെയ്തിരുന്നു.

ഫാ. ഏബ്രഹാം പറമ്പേട്ട് കോട്ടയം അതിരൂപത പ്രിസ്ബിറ്ററല്‍ കൗണ്‍സില്‍ സെക്രട്ടറി

കോട്ടയം: ഫാ. ഏബ്രഹാം പറമ്പേട്ടിനെ കോട്ടയം അതിരൂപത പ്രിസ്ബിറ്ററല്‍ കൗണ്‍സില്‍ സെക്രട്ടറിയായി വീണ്ടും തെരഞ്ഞെടുത്തു. നിലവില്‍ കോട്ടയം അതിരൂപതാ പ്രൊക്കുറേറ്ററായി സേവനമനുഷ്ഠിക്കുകയാണ്. മടമ്പം ഇടവക പറമ്പേട്ട് കുര്യാക്കോസ്-ഏലിയാമ്മ ദമ്പതികളുടെ മകനാണ്. കോട്ടയം അതിരൂപത ആര്‍ച്ച്ബിഷപ് മാര്‍ മാത്യു മൂലക്കാട്ടിന്‍റെ അധ്യക്ഷതയില്‍ തെള്ളകം ചൈതന്യ പാസ്റ്ററല്‍ സെന്‍ററില്‍ ചേര്‍ന്ന അതിരൂപതയുടെ പുതുതായി രൂപീകരിച്ച പ്രിസ്ബിറ്ററല്‍ കൗണ്‍സിലിന്‍റെ ആദ്യയോഗത്തിലാണ് തെരഞ്ഞെടുപ്പ് നടന്നത്. ഫാ. ലൂക്ക് കരിമ്പില്‍, ഫാ. തോമസ് പ്രാലേല്‍, ഫാ. റെന്നി കട്ടേല്‍ എന്നിവരെ പ്രിസ്ബിറ്ററല്‍ കൗണ്‍സില്‍ എക്സിക്യുട്ടീവ് അംഗങ്ങളായും, ഫാ. മാത്യു കൊച്ചാദംപള്ളിലിനെ അതിരൂപതാ പാസ്റ്ററല്‍ കൗണ്‍സില്‍ പ്രതിനിധിയായും തെരഞ്ഞെടുത്തു.

സഹ. സംഘത്തിലെ കോടികളുടെ തട്ടിപ്പ്: സെക്രട്ടറി അറസ്റ്റിൽ

ചക്കരക്കൽ: കോൺഗ്രസ് നിയന്ത്രണത്തിലുള്ള സഹകരണ സംഘത്തിൽനിന്നു കോടികൾ തട്ടിയ സംഭവത്തിൽ സൊസൈറ്റി സെക്രട്ടറി അറസ്റ്റിൽ. പാനേരിച്ചാൽ കക്കോത്ത് സ്വദേശി ഇ.കെ. ഷാജിയെയാണ് ചക്കരക്കൽ സിഐ എം.പി. ഷാജിയുടെ നേതൃത്വത്തിലുള്ള പോലീസ് സംഘം എറണാകുളത്ത് നിന്നും അറസ്റ്റ് ചെയ്ത്. കണ്ണൂർ ജില്ലാ ബിൽഡിംഗ് മെറ്റീരിയൽ കോ-ഓപ്പറേറ്റീവ് സൊസൈറ്റിയിലെ നിക്ഷേപത്തുകയിൽ തിരിമറി നടത്തിയ കേസിലാണു അറസ്റ്റ്. അറ്റൻഡർ പാതിരിയാട് പടുവിലായിലെ കെ.കെ. ഷൈലജയ്ക്കെതിരെയും ജില്ലാ കോ-ഓപ്പറേറ്റീവ് ഓഡിറ്റ് വിഭാഗം ജോയിന്‍റ് ഡയറക്‌ടർ പി.വി. വത്സരാജിന്‍റെ പരാതിയിൽ ചക്കരക്കൽ പോലീസ് നേരത്തെ കേസെടുത്തിരുന്നു. 2023-24 സാമ്പത്തിക വർഷത്തിലെ ഓഡിറ്റിംഗിൽ സൊസൈറ്റി അംഗങ്ങളിൽനിന്നു സ്വീകരിച്ച നിക്ഷേപത്തുകയിൽനിന്ന് സെക്രട്ടറിയുടെ ചുമതല വഹിച്ച ഒന്നാം പ്രതി 7,83,98,121 രൂപയും രണ്ടാം പ്രതി അറ്റൻഡർ 21,00,530 രൂപയും കൈവശപ്പെടുത്തുകയും നിക്ഷേപകർക്ക് പണം തിരിച്ചു നൽകാതെ വിശ്വാസവഞ്ചന ചെയ്തുവെന്നായിരുന്നു പരാതി. നിക്ഷേപകർ സംഘം ചേർന്നു മറ്റൊരു പരാതിയും പോലീസിൽ നൽകിയിരുന്നു. കേസെടുത്തതിന് പിന്നാലെ സെക്രട്ടറി ഒളിവിലായിരുന്നു.

കോർപറേഷന്‍ സെക്രട്ടറിയെ കോൺഗ്രസ് പ്രവർത്തകർ ഉപരോധിച്ചു

കണ്ണൂർ: കണ്ണൂർ പുതിയ ബസ് സ്റ്റാൻഡിൽ തോട് കൈയറി അനധികൃതമായി കെട്ടിടം നിർമിച്ച് ജനങ്ങളുടെ സഞ്ചാര സ്വാതന്ത്ര്യം തടസപ്പെടുത്തിയിട്ടും നടപടികൾ ഉണ്ടാകുന്നില്ലെന്നാരോപിച്ച് കോൺഗ്രസ് പ്രവർത്തകർ സെക്രട്ടറിയെ ഉപരോധിച്ചു. സെക്രട്ടറി വിനു സി. കുഞ്ഞപ്പനെയാണ് ഡിസിസി സെക്രട്ടറി ടി. ജയകൃഷ്ണൻ , കണ്ണൂർ ബ്ലോക്ക് പ്രസിഡന്‍റ് രാഹുൽ കായക്കൽ, വൈസ് പ്രസിഡന്‍റ് ഷിബു ഫെർണാണ്ടസ്, രാഗേഷ് ആയിക്കര, ഷിബിൻ തുടങ്ങിയവരുടെ നേതൃത്വത്തിൽ ഓഫീസിൽ ഉപരോധിച്ചത്. ഒരു വർഷം മുന്പ് വാർഡ് കൗൺസിലർ വിഷയം കോർപറേഷന്‍റെ ശ്രദ്ധയിൽ പെടുത്തിയിട്ടും നടപടി ഉണ്ടായില്ലെന്നും സമരക്കാർ പറഞ്ഞു. വിവരമറിഞ്ഞ് സ്ഥലത്തെത്തിയ ടൗൺ എസ്ഐ വി.വി.ദീപ്തിയുടെ നേതൃത്വത്തിലുള്ള പോലീസ് സംഘം ഇരുവരുമായി ചർച്ച ചെയ്യുകയും അനധികൃത കെട്ടിടം പൊളിക്കാമെന്ന് സെക്രട്ടറി ഉറപ്പ് നൽകുകയും ചെയ്തതിനെ തുടർന്ന് ഉപരോധം അവസാനിപ്പിച്ചു. അനധകൃത കെട്ടിട വിഷയവുമായി ബന്ധപ്പെട്ട് ഇന്നലെ സിപിഎം ജില്ലാ സെക്രട്ടറിയുടെ നേതൃത്വത്തിൽ പ്രദേശവാസികളും സമരം നടത്തിയിരുന്നു.

വിദ്യാരംഗം കലാസാഹിത്യ വേദിയുടെയും വിവിധ ‌ക്ലബുകളുടെയും ഉദ്ഘാടനം

കൊളക്കാട്: കാപ്പാട് സെന്‍റ് സെബാസ്റ്റ്യൻസ് യുപി സ്കൂളിൽ വിദ്യാരംഗം കലാസാഹിത്യവേദിയുടെയും വിവിധ ക്ലബുകളുടെയും ഉദ്ഘാടനം നടത്തി. വിസിലിംഗ് ഗിന്നസ് വേൾഡ് റിക്കാർഡ് ജേതാവ് ബാബു കൊടോളിപ്രം ഉദ്ഘാടനം ചെയ്തു. സ്കൂൾ മാനേജർ ഫാ. തോമസ് പട്ടാംകുളം അധ്യക്ഷത വഹിച്ചു. ഉദ്ഘാടനം ചെയ്ത ബാബു കൊടോളിപ്രം അവതരിപ്പിച്ച വിസിലിംഗ്, മിമിക്രി, മോണോ ആക്‌ട് തുടങ്ങിയവ കുട്ടികൾക്ക് വേറിട്ട അനുഭവമായിരുന്നു. സ്കൂൾ മുഖ്യാധ്യാപിക ജാൻസി തോമസ്, പിടിഎ പ്രസിഡന്‍റ് സന്തോഷ് പെരേപ്പാടൻ, മദർ പിടിഎ പ്രസിഡന്‍റ് ജിസ്ന ടോബിൻ, സ്കൂൾ ലീഡർ ഏയ്ഞ്ചൽ മരിയ റെന്നി, അധ്യാപക പ്രതിനിധി റീന ചെറിയാൻ തുടങ്ങിയവർ പ്രസംഗിച്ചു. അധ്യാപകരായ പി.എ. ജെയ്സൺ, പി.ജെ. ജസ്റ്റിൻ, ദീപ്തി കുര്യാക്കോസ് എന്നിവർ പരിപാടികൾക്കു നേതൃത്വം നൽകി. കുട്ടികളുടെ വിവിധ കലാപരിപാടികളും അരങ്ങേറി.

ക്വട്ടേഷന്‍ സംഘങ്ങള്‍ക്കെതിരേ നാട് ഒന്നിക്കണം: മാര്‍ട്ടിന്‍ ജോര്‍ജ്

ഇരിട്ടി: നാട്ടില്‍ വര്‍ധിച്ച് വരുന്ന ക്വട്ടേഷന്‍ സംഘങ്ങളുടെ ആക്രമണങ്ങള്‍ക്കെതിരേ രാഷ്ട്രീയ ഭേദമില്ലാതെ നാട് ഒറ്റക്കെട്ടായി നില്‍ക്കണമെന്നും നിരവധി കൊലക്കേസുകളില്‍ പ്രതികളായവര്‍ നാട്ടിലിറങ്ങി വീണ്ടും അക്രമം നടത്തുകയാണന്നും ഡിസിസി പ്രസിഡന്‍റ് മാര്‍ട്ടിന്‍ ജോര്‍ജ്. എടക്കാനം റിവര്‍വ്യൂ പൊയന്‍റില്‍ നടന്ന ക്വട്ടേഷന്‍ സംഘത്തിന്‍റെ അക്രമത്തില്‍ പ്രതിഷേധിച്ച് കോണ്‍ഗ്രസ് എടക്കാനം ബൂത്ത് കമ്മിറ്റി സംഘടിപ്പിച്ച പ്രതിഷേധ കൂട്ടായ്മ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ബൂത്ത് പ്രസിഡന്‍റ് കെ.കെ. ഉണ്ണിക്കൃഷ്ണന്‍ അധ്യക്ഷത വഹിച്ചു. കെപിസിസി സെക്രട്ടറി ചന്ദ്രന്‍ തില്ലങ്കേരി,ഡിസിസി സെക്രട്ടറി പി.കെ. ജനാര്‍ദനന്‍, ബ്ലോക്ക് കോണ്‍ഗ്രസ് പ്രസിഡന്‍റ് പി.എ. നസീര്‍ മണ്ഡലം പ്രസിഡന്‍റുമാരായ സി.കെ. ശശിധരന്‍, കെ.വി. രാമചന്ദ്രന്‍, മുന്‍ ബ്ലോക്ക് പ്രസിഡന്‍റ് തോമസ് വര്‍ഗീസ്, മഹിള കോണ്‍ഗ്രസ് ബ്ലോക്ക് പ്രസിഡന്‍റ് മിനി പ്രസാദ്, ബ്ലോക്ക് കോണ്‍ഗ്രസ് വൈസ് പ്രസിഡന്‍റ് കുടൃപ്പ, സെക്രട്ടറിമാരായ, എം. ശ്രീനിവാസൻ, പി.എസ്. സുരേഷ്കുമാര്‍, സുമേഷ് നടുവനാട്, ഷാനിദ് പുന്നാട്. കെ. രാമകൃഷ്ണന്‍, വി. പ്രകാശന്‍ തുടങ്ങിയവർ പ്രസംഗിച്ചു.

സ്വകാര്യ ബസിടിച്ച് കാൽനടയാത്രക്കാരനു പരിക്ക്

മട്ടന്നൂർ: ചാവശേരി ഇരുപത്തിയൊന്നാംമൈലിൽ സ്വകാര്യ ബസിടിച്ച് കാൽനടയാത്രക്കാരന് പരിക്കേറ്റു. നരയമ്പാറ സ്വദേശി ടി.പി. അഹമ്മദ് കുട്ടിക്കാണ് (87) പരിക്കേറ്റത്. ഇന്നലെ ഉച്ചയോടെ ഇരുപത്തിയൊന്നാംമൈൽ ബസ് വെയിറ്റിംഗ് ഷെൽട്ടറിന് മുന്നിൽ വച്ചായിരുന്നു അപകടം. ഇരിട്ടിയിൽ നിന്ന് മട്ടന്നൂരിലേക്ക് വരികയായിരുന്ന സോൾജിയർ ബസ് അഹമ്മദ് കുട്ടിയെ ഇടിക്കുകയായിരുന്നു. ടി.പി. അഹമ്മദ് കുട്ടി റോഡ് മുറിച്ചുകടക്കാൻ ശ്രമിക്കുന്നതിനിടെയായിരുന്നു അപകടം. കാലിന് ഗുരുതരമായി പരിക്കേറ്റ വയോധികനെ മട്ടന്നൂരിലെ സ്വകാര്യ ആശുപത്രിയിൽ എത്തിച്ച് പ്രഥമ ശുശ്രൂഷ നൽകിയ ശേഷം കണ്ണൂരിലെ സ്വകാര്യ ആശുപത്രിയിലേക്ക് മാറ്റി. അപകടത്തിനിടയാക്കിയ ബസ് മട്ടന്നൂർ പോലീസ് സ്റ്റേഷൻ കോമ്പൗണ്ടിലേക്ക് മാറ്റി.

നവംബറോടെ എല്ലാവർക്കും റവന്യു ഡിജിറ്റൽ കാർഡ്: മന്ത്രി കെ. രാജൻ

തലശേരി: നവംബർ മാസത്തോടെ റവന്യു ഡിജിറ്റൽ കാർഡ് എല്ലാവരുടെയും കൈകളിലേക്ക് എത്തുമെന്ന് മന്ത്രി കെ.രാജൻ പറഞ്ഞു. തലശേരി സബ് കളക്ടർ ഓഫീസിൽ പുതുതായി നിർമിച്ച വീഡിയോ കോൺഫറൻസ് ഹാൾ ഓൺലൈനായി ഉദ്ഘാടനം ചെയ്തു പ്രസംഗിക്കുകയായിരുന്നു മന്ത്രി. സംസ്ഥാനത്ത് റവന്യു വകുപ്പിന്‍റെ പ്രവർത്തനങ്ങൾ അതിവേഗതയിൽ നടക്കുമ്പോൾ ആധുനിക സംവിധാനങ്ങൾ ഉണ്ടാവണമെന്നത് കാലഘട്ടത്തിന്‍റെ ആവശ്യമാണ്. റവന്യു വകുപ്പിന്‍റെ പ്രവർത്തനങ്ങളെ ഏകോപിപ്പിക്കുക മാത്രമല്ല വകുപ്പിന്‍റെ പ്രവർത്തനങ്ങൾ ഏറ്റവും വേഗതയിലും ഏറ്റവും കൂടുതൽ ജനങ്ങളിലേക്കും എത്തിക്കാനുള്ള ശ്രമമാണ് നടക്കുന്നതെന്നും മന്ത്രി പറഞ്ഞു. സംസ്ഥാന സർക്കാരിന്‍റെ സ്മാർട്ട് റവന്യൂ ഓഫീസ് പദ്ധതിയിൽ ഉൾപ്പെടുത്തിയാണ് കോൺഫറൻസ് ഹാൾ നിർമിച്ചത്. സ്പീക്കർ എ.എൻ. ഷംസീർ അധ്യക്ഷത വഹിച്ചു.ശിലാഫലകം സ്പീക്കർ നിർവഹിച്ചു. ജില്ലാ നിർമിതി കേന്ദ്ര പ്രൊജക്ട് മാനേജർ കെ. സജിത്ത് റിപ്പോർട്ട് അവതരിപ്പിച്ചു. നഗരസഭാധ്യക്ഷ കെ.എം. ജമുനാ റാണി, സബ് കളക്ടർ കാർത്തിക് പാണിഗ്രഹി, കണ്ണൂർ എഡിഎം. കല ഭാസ്‌കർ, തലശേരി തഹസിൽദാർ എം.വിജേഷ്, ഇരിട്ടി തഹസിൽദാർ സി.വി. പ്രകാശൻ, സബ് കളക്ടർ ഓഫീസ് സീനിയർ സൂപ്രണ്ട് പി പ്രേംരാജ് എന്നിവർ പങ്കെടുത്തു.

‘ഒപ്പരം' പ്രകാശനം ചെയ്തു

തലശേരി: സമഗ്ര ശിക്ഷാ കേരളം കണ്ണൂര്‍, തലശേരി സൗത്ത് ബി.ആര്‍.സി എന്നിവയുടെ നേതൃത്വത്തിൽ തലശേരിയിലെ പ്രാദേശിക ഭാഷാ പ്രയോഗങ്ങളെ കുറിച്ചുള്ള പുസ്തകം പ്രകാശനം ചെയ്തു. എഴുത്തുകാരൻ എം. മുകുന്ദൻ പ്രകാശനം നിർവഹിച്ചു. വിദ്യാർഥികളുടെ നേതൃത്വത്തിൽ 'ഒപ്പരം' എന്ന പേരിലാണ് പുസ്തകം തയാറാക്കിയത്. തലശേരി മുനിസിപ്പൽ ചെയർപേഴ്സൺ കെ.എം.ജമുനാറാണിക്ക് പുസ്തകം നൽകിയാണ് എം.മുകുന്ദൻ പ്രകാശനം നിർവഹിച്ചത്. തലശേരി സേക്രഡ് ഹാര്‍ട്ട്, തിരുവങ്ങാട് ഗവ. ഹയര്‍ സെക്കന്‍ഡറി, ന്യൂമാഹിഎംഎംഎച്ച്എസ്എസ് ന്യൂ മാഹി, പാലയാട് ഗവ. ഹയര്‍ സെക്കന്‍ഡറി, കൊടുവള്ളി ജിവിഎച്ച്എസ്എസ് കൊടുവള്ളി എന്നീ വിദ്യാലയങ്ങളില്‍ നിന്നും ആറ് വീതം കുട്ടികളെ ഉള്‍പ്പെടുന്ന 30 അംഗ സംഘമാണ് പ്രോജക്ട് പൂര്‍ത്തിയാക്കിയത്. നാട്ടുഭാഷാ പൈതൃകത്തിന്‍റെ ചരിത്ര പശ്ചാത്തലത്തെക്കുറിച്ച് പ്രമുഖ ചരിത്ര പണ്ഡിതതരായഡോ എ. വത്സലന്‍, ഞാറ്റിയാല ശ്രീധരന്‍ എന്നിവരുമായി വിദ്യാര്‍ഥികള്‍ അഭിമുഖം നടത്തി. തലശേരി മുനിസിപ്പൽ കോണ്‍ഫറന്‍സ് ഹാളില്‍ നടന്ന പരിപാടിയില്‍ തലശേരിസൗത്ത് ബി പിസി ടി.വി സഖീഷ് അധ്യക്ഷത വഹിച്ചു.

മലയോരത്ത് അപകടങ്ങൾ പെരുകുന്നു

ഇരിട്ടി: മഴ ശക്തമായതിനൊപ്പം വാഹനങ്ങളുടെ അമിത വേഗതയും അശ്രദ്ധയും മലയോരത്ത് വാഹനാപകടങ്ങൾക്കിടയാക്കുന്നു. ഇരിട്ടി കൂട്ടുപുഴ അന്തർസംസ്ഥാന പാതയിൽ റോഡിലെ വെള്ളക്കെട്ടും അപകടത്തിനിടയാക്കുന്നുണ്ട്. കഴിഞ്ഞ ദിവസം ഇരിട്ടി-കൂട്ടുപുഴ റോഡിൽ കല്ലുമുട്ടിയിൽ കർണാടക രജിസ്ട്രേഷൻ ലോറി ഇടിച്ച് ‌കെഎസ്ആർടിസി ബസിനും കാറിനും കേടുപാടുകൾ സംഭവിച്ചു. ഇരിട്ടി ഭാഗത്തു നിന്ന് കൂട്ടുപുഴ ഭാഗത്തേക്ക് വന്ന ലോറി ആദ്യം കാറിൽ ഇടിക്കുകയായിരുന്നു. ഇടിയുടെ ആഘാതത്തിൽ നിയന്ത്രണം വിട്ട കാർ കെഎസ്ആർടിസി ബസിലേക്ക് ഇടിച്ചു കയറുകയായിരുന്നു. ‍അപകടത്തിൽ പെട്ട വാഹനങ്ങളിലുള്ളവർ അത്ഭുതകരമായി രക്ഷപ്പെട്ടു.

ആറളം ഫാമിൽ കാട്ടാന തെങ്ങ് നശിപ്പിച്ചു

ഇരിട്ടി: ആറളം ഫാമിലെ ഒന്ന്, രണ്ട് ബ്ലോക്കുകളിൽ കാട്ടാനകൾ വ്യാപകമായി കൃഷി നശിപ്പിച്ചു. നിറയെ കായ്ഫലമുള്ള തെങ്ങുകളാണ് കാട്ടാന നശിപ്പിച്ചത്. ഒരാഴ്ചക്കുള്ളിൽ കാട്ടാനകൾ 25 ൽ അധികം തെങ്ങുകളെ ചുവടെ മറിച്ചിട്ട് നശിപ്പിച്ചു. ബ്ലോക്ക് ഒന്നിലും രണ്ടിലും തമ്പടിച്ചിരുന്ന കാട്ടാനകളാണ് കൃഷികൾ നശിപ്പിച്ചത്. മേഖലയിൽ നിന്ന് കാട്ടാനകളെ തുരത്തണമെന്ന് ഫാമിംഗ് കോർപ്പറേഷൻ ആവശ്യപെടുന്നെങ്കിലും യാതൊരു നടപടിയും വനംവകുപ്പിന്‍റെ ഭാഗത്തു നിന്ന് ഉണ്ടാകുന്നില്ലെന്നാണ് പരാതി. ഇതോടെ ഫാമിന്‍റെ കൃഷിയിടത്തിൽ നിലയുറപ്പിച്ചിരിക്കുന്ന ആനകൾ കൂട്ടമായി വന്ന് കൃഷികൾ നശിപ്പിക്കുകയാണ്. ഫാമിന് ലഭിക്കേണ്ടത് 91 കോടി ആറളം ഫാമിലെ കൃഷികൾ നശിപ്പിച്ച വകയിൽ വനം വകുപ്പ് ആറളം ഫാമിംഗ് കോർപറേഷന് നഷ്ടപരിഹാര ഇനത്തിൽ നൽകാനുള്ളത് 91 കോടിയോളം രൂപ വരുമെന്നാണ് ഫാമിംഗ് കോർപ്പറേഷന്‍റെ കണക്കുകൾ സൂചിപ്പിക്കുന്നത്. എന്നാൽ ഇതിനെകുറിച്ച് വനംവകുപ്പിന്‍റെ പ്രതികരണം ലഭ്യമല്ല. ഫാമിൽ പുതിയതായി ആരംഭിക്കുന്ന കൃഷികൾ ഉൾപ്പെടെ കാട്ടാനകൾ നശിപ്പിക്കുകയാണ്. ഫാമിൽ നിന്നും പുനരധിവാസ മേഖലയിൽ നിന്നും ആനകളെ പൂർണമായും തുരത്തിയാൽ മാത്രമേ ഇവിടെ ജനജീവിതവും കൃഷിയും സാധാരണ ഗതിയിലേക്ക് എത്തുകയുള്ളൂ. അതിനുള്ള പോംവഴി ആനമതിൽ നിർമാണം അടിയന്തരമായി പൂർത്തിയാക്കുക മാത്രമാണ്.

മാർ വള്ളോപ്പിള്ളി പ്രതിമ നിർമാണം: വെങ്കല വസ്തുക്കൾ കൈമാറി

വെണ്ണക്കല്ല്: ചെമ്പന്തൊട്ടിയിൽ നിർമാണം പൂർത്തിയാക്കിയ ബിഷപ് മാർ സെബാസ്റ്റ്യൻ വള്ളോപ്പിള്ളി സ്മാരക കുടിയേറ്റ മ്യൂസിയത്തിന്‍റെ മുന്നിൽ സ്ഥാപിക്കാനുള്ള വെങ്കല പ്രതിമ നിർമാണത്തിനായി വെങ്കല വസ്തുക്കൾ കൈമാറി. ആർച്ച്ബിഷപ് മാർ ജോസഫ് പാംപ്ലാനിയുടെ ആഹ്വാന പ്രകാരം കത്തോലിക്ക കോൺഗ്രസ് പ്രവർത്തകരുടെ നേതൃത്വത്തിലാണ് പഴയ വെങ്കല വസ്തുക്കളുടെ ശേഖരണം തുടങ്ങിയത്. ചെമ്പന്തൊട്ടി ഫൊറോന തലത്തിലുള്ള ശേഖരണം വെണ്ണക്കല്ല് സെന്‍റ് ആന്‍റണീസ് പള്ളിയിൽ നടന്ന ചടങ്ങിൽ വികാരി ഫാ. മാത്യു കുറുമ്പുറത്ത് ഉദ്ഘാടനം ചെയ്തു. കത്തോലിക്ക കോൺഗ്രസ് വെണ്ണക്കല്ല് യൂണിറ്റ് പ്രസിഡന്‍റ് അനിൽ മണ്ണാപറമ്പിലും പ്രവർത്തകരും സംഭരിച്ച 20 കിലോ വെങ്കല വസ്തുക്കൾ കത്തോലിക്ക കോൺഗ്രസ് ഫൊറോന പ്രസിഡന്‍റ് ജോസഫ് മാത്യു കൈതമറ്റത്തിന് കൈമാറി. ഫൊറോന സെക്രട്ടറി ഷാജിമോൻ കളപ്പുരയ്ക്കൽ, തോമസ് കരയിടത്ത്, പൗലോസ് തോട്ടപ്പള്ളി, ബിന്ദു മണ്ണാപറമ്പിൽ, മിനി പയ്യമ്പള്ളി എന്നിവർ പ്രസംഗിച്ചു.

നൂറുദിന കർമ പരിപാടികളുമായി പയ്യാവൂർ പഞ്ചായത്ത്

പയ്യാവൂർ: പഞ്ചായത്ത് ഭരണ സമിതിയുടെ കാലാവധി അവസാനിക്കാൻ നാല് മാസം മാത്രം ബാക്കി ശേഷിക്കേ വികസനത്തിന് വേഗത കൂട്ടാൻ നൂറുദിന കർമ പരിപാടിയിലൂടെ 40 പദ്ധതികൾ സമയ ബന്ധിതമായി നടപ്പാക്കാൻ പയ്യാവൂർ പഞ്ചായത്ത് . 21 മുതൽ ഒക്ടോബർ 30 വരെയുള്ള കാലയളവാണ് ഇതിനായി ഉദ്ദേശിക്കുന്നത്. സമ്പൂർണ ഭവന പദ്ധതി നടപ്പാക്കൽ, സൗരോർജ തൂക്കുവേലി രണ്ടാം ഘട്ട പ്രവൃത്തികൾ പൂർത്തിയാക്കി ചാർജ് ചെയ്യുക. ബഡ്സ് സ്കൂൾ കെട്ടിടങ്ങളുടെ നിർമാണ പൂർത്തീകരണം, ബഡ്സ് സ്കൂൾ കുട്ടികളുടെ അമ്മമാരുടെ ചപ്പാത്തി നിർമാണ യൂണിറ്റ് ആരംഭിക്കൽ, ബഡ്സ് സ്കൂളിന് സ്കൂൾ ബസ് വാങ്ങൽ, പൊന്നുംപറമ്പ്, ചന്ദനക്കാംപാറ സ്റ്റേഡിയങ്ങളുടെ ആധുനികവൽകരണ പ്രവർത്തനങ്ങൾ, ചന്ദനക്കാംപാറ, വഞ്ചിയം പി എച്ച്സി കെട്ടിടങ്ങളുടെ നിർമാണ പ്രവൃത്തികൾ, സ്ത്രീകൾക്ക് യോഗ പരിശീലനം, സീറോ അനീമിക് പഞ്ചായത്ത് പ്രവർത്തനങ്ങൾ, കൃഷിനാശമുണ്ടാക്കുന്ന കാട്ടുപന്നികളെ നിയമ വിധേയമായി നിഗ്രഹിക്കാൻ തോക്കുടമകൾക്ക് ഷൂട്ടർ ലൈസൻസും അനുമതിയും നൽകൽ, കണ്ടകശേരി പാലത്തിന് കൈവരി സ്ഥാപിക്കൽ, കാഞ്ഞിരക്കൊല്ലിയിൽ വന സംരക്ഷണ സമിതി രൂപീകരണം എന്നിവയടക്കം 40 പദ്ധതികളാണ് ലക്ഷ്യമാക്കുന്നത്. പയ്യാവൂർ പട്ടയമേളയുടെ ഭാഗമായി പഞ്ചായത്ത് ഏർപ്പെടുത്തിയ ഹെൽപ് ഡെസ്കിലൂടെ നിരവധി അപേക്ഷകൾ സുതാര്യമായി ലാൻഡ് ട്രിബ്യൂണലിലേക്ക് എത്തിച്ച് വരികയാണ്. ജില്ലയിലെ ഏകസ്ഥരുടെ സംഘടനയുടെ സഹകരണത്തോടെ "പയ്യാവൂർ മാംഗല്യം' എന്ന പേരിൽ സമൂഹ വിവാഹം സംഘടിപ്പിക്കുമെന്നും പഞ്ചായത്ത് പ്രസിഡന്‍റ് സാജു സേവ്യർ അറിയിച്ചു.

രാജരാജേശ്വര ക്ഷേത്രത്തിൽ ഭക്തജനത്തിരക്ക്

തളിപ്പറമ്പ്: രാജരാജേശ്വര ക്ഷേത്രത്തിൽ ഇന്നലെ കർക്കടക സംക്രമത്തിന് ഭക്തജനങ്ങളുടെ തിരക്ക്. ശക്തമായ മഴയിൽ പോലും നൂറുകണക്കിന് ഭക്തജനങ്ങളാണ് ഇന്നലെ പുലർച്ചെ നാലിന് കണിക്ക് തുറക്കൽ ദർശിക്കാൻ ദൂരെ സ്ഥലങ്ങളിൽ നിന്നു പോലും എത്തിച്ചേർന്നത്.ക്ഷേത്രത്തിൽ നെയ്യമൃത് സമർപ്പിച്ച് തൊഴാൻ രാവിലെ തന്നെ സ്ത്രീകളുടെ ഉൾപ്പെടെ നീണ്ട നിര തന്നെ ഉണ്ടായിരുന്നു. തിരക്ക് നിയന്ത്രിക്കുന്നതിന് തളിപ്പറമ്പ് എസ്ഐ ദിനേശൻ കൊതേരിയുടെ നേതൃത്വത്തിൽ പോലീസുകാരെയും വിന്യസിച്ചിരുന്നു.

വികസിത ഭാരതത്തിനായി പ്രവര്‍ത്തിക്കും: സി. സദാനന്ദന്‍

കണ്ണൂര്‍: എല്ലാ മേഖലയിലും വികസനം എന്ന പ്രധാനമന്ത്രിയുടെ ആഗ്രഹം പൂർത്തീകരിക്കാൻ താൻ പ്രവർത്തിക്കുമെന്ന് ബിജെപി സംസ്ഥാന വൈസ് പ്രസിഡന്‍റും നിയുക്ത രാജ്യസഭാംഗവുമായ സി. സദാനന്ദൻ. പയ്യാന്പലത്തെ മാരാർജി സ്മൃതി മണ്ഡപത്തിൽ പുഷ്പാർച്ചന നടത്തിയ ബിജെപി കണ്ണൂർ നോർത്ത് ജില്ലാ കമ്മിറ്റി നൽകിയ സ്വീകരണത്തിൽ പ്രസംഗിക്കുകയായിരുന്നു അദ്ദേഹം. തന്‍റെ നാമനിർദേശവുമായി ബന്ധപ്പെട്ട് വിവാദങ്ങളുണ്ടാക്കുന്നവർക്ക് നല്ല നമസ്കാരമെന്നും മ‍റക്കാൻ ശ്രമിക്കുന്ന കാര്യങ്ങൾ വീണ്ടും കീറി പരിശോധിക്കുന്നതിൽ നിന്ന് മാധ്യമങ്ങൾ പിൻമാറണമെന്നും സി. സദാനന്ദൻ പറഞ്ഞു. പുഷ്പാര്‍ച്ചനയിലും സ്വീകരണ ചടങ്ങിലും ബിജെപി മുന്‍ സംസ്ഥാന പ്രസിഡന്‍റ് സി.കെ. പദ്മനാഭന്‍, ദേശീയ നിര്‍വാഹക സമിതിയംഗം പി.കെ. കൃഷ്ണദാസ്, സംസ്ഥാന സെക്രട്ടറി കെ. രഞ്ജിത്ത്, ദേശീയ സമിതിയംഗങ്ങളായ സി. രഘുനാഥ്, പി.കെ. വേലായുധന്‍, ബിജെപി കണ്ണൂർ നോര്‍ത്ത് ജില്ലാ പ്രസിഡന്‍റ് കെ.കെ. വിനോദ്കുമാര്‍ എന്നിവര്‍ പങ്കെടുത്തു.

പെൻഷൻ പരിഷ്കരണം നടപ്പിലാക്കണം: കെഎസ്എസ്പിഎ

ശ്രീകണ്ഠപുരം: പെൻഷൻ പരിഷ്കരണം നടപ്പിലാക്കണമെന്നും കുടിശികയായ 20 ശതമാനം ക്ഷാമാശ്വാസം മുൻകാല പ്രാബല്യത്തോടെ മുഴുവനായും അനുവദിക്കണമെന്നും വിലക്കയറ്റം നിയന്ത്രിക്കണമെന്നും കേരള സ്റ്റേറ്റ് സർവീസ് പെൻഷനേഴ്സ് അസോസിയേഷൻ (കെഎസ്എസ്പിഎ) ഇരിക്കൂർ നിയോജക മണ്ഡലം കമ്മിറ്റിയോഗം ആവശ്യപ്പെട്ടു. പെൻഷൻകാരുടെ വിവിധ ആവശ്യങ്ങൾ ഉന്നയിച്ച് ഓഗസ്റ്റ് ആറ്, ഏഴ് തീയതികളിൽ നടക്കുന്ന കളക്‌ടറേറ്റ് ധർണയിൽ നിയോജക മണ്ഡലത്തിൽ നിന്നും 150 പേരെ പങ്കെടുപ്പിക്കുവാനും തീരുമാനിച്ചു.യോഗത്തിൽ പ്രസിഡന്‍റ് ജോസഫ് സഖറിയാസ് അധ്യക്ഷത വഹിച്ചു. പി.പി. ചന്ദ്രാംഗതൻ, എം.പി. കുഞ്ഞിമൊയ്തീൻ, പി.ടി. കുര്യാക്കോസ്, അപ്പു കണ്ണാവിൽ, പി. ദിനേശൻ, കെ.സി. ജോൺ, ഡോ. വി.എ. അഗസ്റ്റിൻ, കെ.വി. പത്മനാഭൻ, കെ.വി. കുഞ്ഞിരാമൻ, സി.എം. മാത്യു, പി.ജെ. സ്കറിയ, വിൽസൺ മാത്യു, വർഗീസ് ജോൺ, ടി.ടി. സെബാസ്റ്റ്യൻ, വി.വി. കുഞ്ഞികൃഷ്ണൻ, ഏബ്രഹാം തോമസ്, വി.ടി. മാത്യു, കെ. മോഹനൻ എന്നിവർ പ്രസംഗിച്ചു.

ഭൂഗര്‍ഭ ജലനിരപ്പ് ഉയർത്താൻ വിപുലമായ പദ്ധതികള്‍ നടപ്പാക്കും

കണ്ണൂർ: ജില്ലയിലെ ഭൂഗര്‍ഭ ജലനിരപ്പ് ഉയര്‍ത്തുന്നതിനായി കിണര്‍ റീചാര്‍ജിംഗ് ഉള്‍പ്പെടെയുള്ള വിപുലമായ പ്രവര്‍ത്തനങ്ങള്‍ക്ക് രൂപം നല്‍കാന്‍ ജില്ലാ പഞ്ചായത്ത് പ്രസിഡന്‍റ് കെ.കെ. രത്‌നകുമാരിയുടെ അധ്യക്ഷതയില്‍ കളക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന നവകേരളം കര്‍മ്മപദ്ധതി ജില്ലാ മിഷന്‍ യോഗം തീരുമാനിച്ചു. ജില്ലയിലെ പാനൂര്‍, തലശേരി, കണ്ണൂര്‍, മട്ടന്നൂര്‍ ബ്ലോക്ക് പഞ്ചായത്ത് പ്രദേശങ്ങളിലും നഗരസഭകളിലും ജല ചൂഷണം വര്‍ധിക്കുന്നുവെന്നും ഈ പ്രദേശങ്ങളെ കേന്ദ്ര സര്‍ക്കാര്‍ നിര്‍ണായക വിഭാഗമായി പ്രഖ്യാപിക്കാന്‍ ഇടയുണ്ടെന്ന നാഷണല്‍ കോംപാലിയേഷന്‍ ഓണ്‍ ഡൈനാമിക് ഗ്രൗണ്ട് വാട്ടര്‍ റിസോഴ്സ്സ് ഓഫ് ഇന്ത്യയുടെ റിപ്പോര്‍ട്ടിനെ തുടര്‍ന്നാണ് നടപടി. ജില്ലാതല ജല ബജറ്റ് ഉടനെ തയാറാക്കാനും നവകേരളം കർമ പദ്ധതി യോഗം തീരുമാനിച്ചു. മാപ്പത്തോണ്‍ മാപ്പിംഗ് പൂര്‍ത്തീകരിച്ച ജില്ലയിലെ തദ്ദേശ ഭരണ സ്ഥാപനങ്ങളിലെ നീര്‍ച്ചാലുകള്‍ പുനരുദ്ധരിക്കാന്‍ പദ്ധതി ആവിഷ്‌കരിക്കാനും ധാരണയായി. യോഗത്തില്‍ ജില്ലാ കളക്ടര്‍ അരുണ്‍ കെ. വിജയന്‍, കല്യാശേരി ബ്ലോക്ക് പഞ്ചായത്ത് പ്രസിഡന്‍റ് പി.പി ഷാജിര്‍, തദ്ദേശ സ്വയംഭരണ വകുപ്പ് ജോയിന്‍റ് ഡയറക്ടര്‍ ടി.ജെ അരുണ്‍, ജില്ലാ പ്ലാനിംഗ് ഓഫീസര്‍ നെനോജ് മേപ്പടിയത്ത് എന്നിവര്‍ പങ്കെടുത്തു.

സ്ഥാനാരോഹണം നടത്തി

കുടിയാന്മല: വൈസ്മെൻ ഇന്‍റർനാഷണൽ കുടിയാന്മല ക്ലബിന്‍റെ 2025-26വർഷത്തെ ഭാരവാഹികളുടെ സ്ഥാനാരോഹണവും പുതിയ അംഗങ്ങളുടെ സത്യപ്രതിജ്ഞയും കുടിയാന്മല വൈസ്മെൻ ക്ലബ് ഹാളിൽ നടന്നു. വൈസ്മെൻ സോൺ രണ്ടിന്‍റെ എൽആർഡി മധു പണിക്കർ ഉദ്ഘാടനം ചെയ്തു. ഡിസ്ട്രിക്‌ട് ഗവർണർ ടാജി ടോം പൂന്തോട്ടം ഭാരവാഹികളുടെ സത്യപ്രതിജ്ഞ നടത്തി സ്ഥാനാരോഹണം നിർവഹിച്ചു. ഡിസ്ട്രിക്‌ട് സെക്രട്ടറി ജോൺ പടിഞ്ഞാത്ത് ക്ലബിൽ ചേർന്ന പുതിയ അംഗങ്ങൾക്ക് സത്യവാചകം ചൊല്ലിക്കൊടുത്തു. ഡിസ്ട്രിക്‌ട് ട്രഷറർ സണ്ണി മനാടിയിൽ കമ്യൂണിറ്റി പ്രോജക്‌ട് ഉദ്ഘാടനം ചെയ്തു. ജിമ്മി ആയിത്തമറ്റം, സെബാസ്റ്റ്യൻ കുരിശുംമൂട്ടിൽ, ജാൻസമ്മ ജോയ്, വിനോദ് കാപ്പിൽ, നിവിൻ വിനോദ് കാപ്പിൽ എന്നിവർ പ്രസംഗിച്ചു. ബാബു കണ്ണമ്പുഴ, ഷീബ വിനോദ് കാപ്പിൽ, സൈമൺ കണ്ണംപ്ലാക്കൽ, ജോബിന്‍സ് കണ്ണേഴത്ത്, നിവേദ്യ ജോസ് മുണ്ടാമ്പള്ളി, ബിനു അനന്തക്കാട്ട് എന്നിവർ നേതൃത്വം നൽകി. ഭാരവാഹികൾ: ജോയ് ജോൺ കുറിച്ചേൽ -പ്രസിഡന്‍റ്, സിജോ കണ്ണേഴത്ത്-സെക്രട്ടറി, ജോസഫ് നെടുംപുറത്ത്- ട്രഷറർ.

മലയോര ഹൈവേയിൽ ചെറുപുഴ പാക്കഞ്ഞിക്കാടും കല്ലങ്കോട് ബോംബെ മുക്കിലും വാഹനാപകടം

ചെറുപുഴ: മലയോര ഹൈവേയിൽ ചെറുപുഴ പാക്കഞ്ഞിക്കാടും കല്ലങ്കോട് ബോംബെ മുക്കിലും വാഹനാപകടം. അപകടത്തിൽ ആർക്കും പരിക്കില്ല. ഇന്നലെ ഉച്ചകഴിഞ്ഞ് രണ്ടേകാലോടെയാണ് മലയോര ഹൈവേയിലെ സ്ഥിരം അപകടമേഖലയായ ചെറുപുഴ പാക്കഞ്ഞിക്കാട് നിയന്ത്രണം വിട്ട കാർ റോഡിന് താഴേയ്ക്ക് വീണത്. റോഡിന് താഴെ വീഴുന്ന വാഹനങ്ങൾ തെങ്ങിൽ തട്ടി നിൽക്കുകയായിരുന്നു. ഇല്ലെങ്കിൽ തൊട്ടടുത്ത തോട്ടിലേയ്ക്ക് വീണ് വൻ അപകടത്തിലേക്കു നയിക്കുമായിരുന്നു.ഇന്നലെ ഉച്ചകഴിഞ്ഞ് ഒന്നരയോടെയാണ് കല്ലങ്കോട് ബോംബെ മുക്കിൽ പിക്കപ്പ് വാൻ നിയന്ത്രണം വിട്ട് തോട്ടിലേയ്ക്ക് മറിഞ്ഞത്. ചെറുപുഴ ഭാഗത്തു നിന്നു തേർത്തല്ലി ഭാഗത്തേയ്ക്ക് പോയ വാൻ നിയന്ത്രണം വിട്ട് റോഡരികിലെ മതിലിലിടിച്ച് എതിർവശത്തേയ്ക്ക് നീങ്ങി തോട്ടിലേയ്ക്ക് വീഴുകയായിരുന്നു. ഡ്രൈവർക്ക് നിസാര പരിക്കുപറ്റി. ആലക്കോട് പോലീസ് എത്തി പരിശോധന നടത്തി.അപകടത്തിൽപ്പെട്ട എല്ലാ വാഹനങ്ങളും ഈ തെങ്ങിൽ തട്ടി നിൽക്കുകയാണ് ചെയ്യുന്നത്. ഇതേ സ്ഥലത്ത് കുറച്ചു നാളായി നിരവധി വാഹനങ്ങളാണ് അപകടത്തിൽപ്പെട്ടത്.

ചീങ്കണ്ണിപ്പുഴയുടെ അവകാശ തർക്കം, വന്യമൃഗ ശല്യം: നിവേദനം നല്കി

കേളകം: ചീങ്കണ്ണിപ്പുഴയുടെ അവകാശ തർക്കം, വന്യമൃഗ ശല്യം എന്നീ വിഷയങ്ങളിൽ ആറളം വന്യജീവി സങ്കേതത്തിന്‍റെ അതിർത്തിയിലെ പ്രദേശവാസികളുടെ ജനകീയ കൂട്ടായ്മയുടെ ആഭിമുഖ്യത്തിൽ ആയിരത്തിലധികം കർഷകരുടെ ഒപ്പുശേഖരണം നടത്തി മുഖ്യമന്ത്രിക്ക് നിവേദനം സമർപ്പിക്കുകയും കോപ്പി പഞ്ചായത്ത് പ്രസിഡന്‍റിന് കൈമാറുകയും ചെയ്തു. ചീങ്കണ്ണിപ്പുഴയുടെ ഉടമസ്ഥാവകാശം കേളകം പഞ്ചായത്തിൽ നിലനിർത്തുക, പ്രദേശവാസികളുടെ ജീവനും സ്വത്തിനും സംരക്ഷണം നൽകുന്ന ആന പ്രതിരോധ മതിലിന്‍റെ ഉയരവും ദൈർഘ്യവും വർധിപ്പിക്കുക, അതുവരേക്കും ഹാങ്ങിംഗ് ഫെൻസിംഗ് ഏർപ്പെടുത്തുക എന്നീ വിഷയങ്ങളാണ് നിവേദനത്തിൽ ഉള്ളത്. ജനകീയ കമ്മിറ്റി ചെയർമാൻ ചെട്ടിയാംപറമ്പ് പള്ളി വികാരി ഫാ. സെബാസ്റ്റ്യൻ പൊടിമറ്റത്തിന്‍റെ നേതൃത്വത്തിലാണ് നിവേദനം കൈമാറിയത്. ജനകീയ കമ്മിറ്റി കൺവീനർ കബീർ പുത്തൻപുരയ്ക്കൽ, കോ-ഓർഡിനേറ്റർ ഗ്രേസൺ ഉള്ളാഹയിൽ, ടോമി സി.കെ. ചാത്തൻപാറ, ബെന്നി മണിമല കരോട്ട്, പ്രവീൺ താഴത്തെ മുറിയിൽ എന്നിവർ സന്നിഹിതരായിരുന്നു.

വിജയോത്സവം ഉദ്ഘാടനം ചെയ്തു

കണ്ണൂർ: തലശേരി മണ്ഡലത്തിൽ ഹയർ സെക്കൻഡറി പരീക്ഷയിൽ ഉന്നത വിജയം നേടിയ വിദ്യാർഥികളെ ആദരിക്കുന്ന 'തലശേരിയിലെ താരങ്ങൾ' പരിപാടി കോടിയേരി ബാലകൃഷ്ണൻ സ്മാരക ടൗൺഹാളിൽ പൊതു വിദ്യാഭ്യാസമന്ത്രി വി. ശിവൻകുട്ടി ഉദ്ഘാടനം ചെയ്തു. ഉന്നത വിജയം നേടിയ സ്‌കൂളുകളെയും ചടങ്ങിൽ അനുമോദിച്ചു. കാഴ്ച്ച പരിമിതയും എട്ടാം ക്ലാസ് ഉപപാഠ പുസ്തകത്തിൽ പഠന വിഷയമായ മലയാളിയുടെ ഹെലൻ കെല്ലർ എന്നറിയപ്പെടുന്ന തലശേരി സ്വദേശിയുമായ സിഷ്ന ആനന്ദ് വരച്ച മന്ത്രി വി. ശിവൻകുട്ടിയുടെ ചിത്രം വേദിയിൽ കൈമാറി. നിയമസഭാ സ്പീക്കർ എ.എൻ. ഷംസീർ അധ്യക്ഷത വഹിച്ചു. ഫിഷറീസ് സ്പെഷൽ സെക്രട്ടറി ബി. അബ്ദുൾ നാസർ, സബ് കളക്ടർ കാർത്തിക് പാണിഗ്രഹി, ഡോ. ടോം ജോസഫ് എന്നിവർ മുഖ്യാതിഥികളായിരുന്നു. തലശേരി നഗരസഭാധ്യക്ഷ കെ.എം. ജമുനാ റാണി, സഗരസഭ വിദ്യാഭ്യാസ സ്റ്റാൻഡിംഗ് കമ്മിറ്റി അധ്യക്ഷ ഷബാന ഷാനവാസ് തുടങ്ങിയവർ പ്രസംഗിച്ചു.

കടാശ്വാസ കമ്മീഷന് കർഷകർ അപേക്ഷ സമർപ്പിച്ചു

ഇരിട്ടി: കർഷക കോൺഗ്രസ് അയ്യൻകുന്ന് മണ്ഡലം കമ്മിറ്റിയുടെ ആഭിമുഖ്യത്തിൽ കർഷകരുടെ സഹകരണ ബാങ്കുകളിലെ വായ്പകൾ ഒഴിവാക്കി കിട്ടുന്നതിനുവേണ്ടി സംസ്ഥാന കടാശ്വാസ കമ്മീഷന് കർഷകർ അപേക്ഷ കൈമാറി. അപേക്ഷ സമർപ്പിക്കുന്നതിന്‍റെ പഞ്ചായത്ത് തല ഉദ്ഘാടനം സംസ്ഥാന കടാശ്വാസ കമ്മീഷൻ അംഗം കെ.സി. വിജയൻ നിർവഹിച്ചു. സംസ്ഥാനത്ത് തന്നെ ആദ്യമായാണ് ഇത്തരത്തിൽ വായ്പകൾ ഒഴിവാക്കി കിട്ടുന്നതിനായി കർഷകർ അപേക്ഷ സമർപ്പിക്കുന്നതെന്ന് കെ.സി. വിജയൻ പറഞ്ഞു. കർഷക കോൺഗ്രസ് മണ്ഡലം പ്രസിഡന്‍റ് സിനോജ് കളരുപാറ അധ്യക്ഷത വഹിച്ചു. കർഷക കോൺഗ്രസ് ജില്ലാ പ്രസിഡന്‍റ് ജോസ് പൂമല മുഖ്യപ്രഭാഷണം നടത്തി. പഞ്ചായത്തംഗങ്ങളായ ജോസഫ് വട്ടുകുളം, മിനി വിശ്വനാഥൻ, പി.സി. ജോസ്, ജെയിംസ് ടി. മാത്യു, ജോർജ് വടക്കുംകര, റോസിലി വിൽസൺ, കെ.സി. ചാക്കോ, മണ്ഡലം ഭാരവാഹികളായ ബിജോയ് വട്ടുകുളം, ഷാജി മടയംകുന്നേൽ, ബേബി ചിറ്റേത്ത്, ഷാജു എടശേരി, ജിമ്മി വാഴാംപ്ലാക്കൽ, അജയ് സെബാസ്റ്റ്യൻ എന്നിവർ പ്രസംഗിച്ചു.

ഹോപ്പ് ഗ്രാമ പത്താംഘട്ടം ഉദ്ഘാടനം ചെയ്തു

ഇരിട്ടി: ഇരിട്ടി ഐജിഎഫ്ജി കൂട്ടായ്മയും സോബിൻസ് ഗ്രീൻസ് ചാരിറ്റബിൾ ട്രസ്റ്റും സംയുക്തമായി നടത്തുന്ന കിടപ്പുരോഗികൾക്കുള്ള ഹോപ്പ് ഗ്രാമ പത്താംഘട്ട കിറ്റ് വിതരണോദ്ഘാടനം തലശേരി ആർച്ച്ബിഷപ് മാർ ജോസഫ് പാംപ്ലാനി വികാരി ജനറാൾ മോൺ. സെബാസ്റ്റ്യൻ പാലക്കുഴിക്ക് ലോഗോ നൽകി നിർവഹിച്ചു. നിർധനരായ കിടപ്പുരോഗികൾക്ക് ഒരുമാസത്തേക്ക് ആവശ്യമായ ഡയപ്പെർ, കോട്ടൺ, ഗ്ലൗസ്, പാഡ്, യൂറിൻ ബാഗ് തുടങ്ങി അത്യാവശ്യ സാധനകൾ അടങ്ങിയ കിറ്റുകളാണ് പ്രവർത്തകർ നേരിട്ട് എത്തിക്കുന്നത്. സുമനസുകളായ ആളുകൾ നൽകുന്ന സംഭാവനകളിലൂടെയാണ് ഹോപ്പ് ഗ്രാമ പത്താംഘട്ടം പിന്നിടുന്നത്. ഓരോ മാസവും അന്പതിലധികം കുടുംബങ്ങളിൽ ഹോപ്പ് ഗ്രാമ കിറ്റുകൾ എത്തുന്നുണ്ട്. സോബിൻസ് ഗ്രീൻസ് ചാരിറ്റബിൾ ട്രസ്റ്റിയായ ജ്യോതി ജോൺ, ഐജിഎഫ്ജി ഗ്രാമദീപം കൂട്ടായ്മയുടെ എക്സിക്യുട്ടീവ് കമ്മിറ്റി അംഗങ്ങളായ സോഫിയ ഫ്രെഡറിക്ക്, വിമൽ മാത്യു ഉപ്പുകണ്ടത്തിൽ, ഷിന്‍റോ മൂക്കനോലി, കെ.വി. ബേബി എന്നിവർ ചടങ്ങിൽ പങ്കെടുത്തു.

പേരാവൂരിൽ 278 കുടുംബങ്ങളുടെ ഭൂമിക്ക് പട്ടയമായി

ഇരിട്ടി: പേരാവൂർ നിയോജക മണ്ഡലത്തിലെ 278 കുടുംബങ്ങളുടെ ഭൂമിക്ക് കൂടി പട്ടയമായി. ഇരിട്ടിയിൽ നടന്ന മണ്ഡലം തല പട്ടയമേള മന്ത്രി കെ. രാജൻ ഓൺലൈനായി ഉദ്ഘാടനം ചെയ്തു. 50 വർഷമായി നിലനിന്ന പല പട്ടയ പ്രശ്നങ്ങൾക്കും പട്ടയ മിഷന്‍റെ ഭാഗമായി പരിഹാരം കാണാൻ സാധിച്ചതായി മന്ത്രി പറഞ്ഞു. പരമാവധി ആൾക്കാരെ ഭൂമിയുടെ യഥാർഥ ഉടമകളാക്കി മാറ്റുകയാണ് ദൗത്യമെന്നും ഇതിനായി നിയമങ്ങളും ചട്ടങ്ങളും ഭേദഗതി വരുത്താൻ സർക്കാർ പ്രതിജ്ഞാബദ്ധമാണെന്നും മന്ത്രി പറഞ്ഞു. ഇരിട്ടി നഗരസഭയിൽ - 65, പേരാവൂരിൽ - 61, അയ്യൻകുന്നിൽ -12, ആറളത്ത് - 98, മുഴക്കുന്നിൽ - 20, പായത്ത് - 5, കേളകം -2 , കൊട്ടിയൂരിൽ - 1, ദേവസ്വം ഭൂമി പട്ടയം - 10, ലക്ഷം വീട് - 2, ടിഇ - 2 പട്ടയവുമാണ് ചടങ്ങിൽ വിതരണം ചെയ്തത്. ജില്ലാ പഞ്ചായത്ത് വെെസ് പ്രസിഡന്‍റ് ബിനോയ് കുര്യൻ അധ്യക്ഷത വഹിച്ചു. ബ്ലോക്ക് പഞ്ചായത്ത് പ്രസിഡന്‍റുമാരായ കെ. വേലായുധൻ, കെ. സുധാകരൻ, നഗരസഭ അധ്യക്ഷ കെ. ശ്രീലത, പേരാവൂർ പഞ്ചായത്ത് പ്രസിഡന്‍റ് പി.പി. വേണുഗോപാലൻ, നഗരസഭാ കൗൺസിലർ വി.പി. റഷീദ്, ഡെപ്യൂട്ടി കളക്ടർ മാരായ കെ.വി. ശ്രുതി, ഷെർലി, തഹസിൽദാർ സി.വി. പ്രകാശൻ, എൽആർ തഹസിൽദാർ വിജയൻ ചെല്ലട്ടൻ, എൽടി തഹസിൽദാർ എം.സി. സീനത്ത്, പി.പി. അശോകൻ, എം.വി. രവീന്ദ്രൻ, എം.എം. മജീദ്, കെ. മുഹമ്മദലി, വി.എം. പ്രശോഭ് എന്നിവർ പ്രസംഗിച്ചു.

മാത്തില്‍ ഗുരുദേവ് കോളജില്‍ ജോബ്‌ ഫെയര്‍ 19ന്

പയ്യന്നൂര്‍: മാത്തില്‍ ഗുരുദേവ് ആര്‍ട്‌സ് ആൻഡ് സയന്‍സ് കോളജും ജിടെക് കംപ്യൂട്ടര്‍ എഡ്യൂക്കേഷനും ചേര്‍ന്ന് 19ന് കോളജില്‍ സൗജന്യ ജോബ്‌ ഫെയര്‍ സംഘടിപ്പിക്കുന്നു. മള്‍ട്ടിമീഡിയ, ഐടി, ബാങ്കിംഗ്, എഡ്യൂക്കേഷന്‍, ഇന്‍ഷ്വറന്‍സ്, അക്കൗണ്ടിംഗ്, ബില്ലിംഗ്, സെയില്‍സ് ആൻഡ് മാനേജിംഗ് സര്‍വീസ് തുടങ്ങി ആയിരത്തിലധികം ഒഴിവുകളിലേക്ക് ഉദ്യോഗാര്‍ഥികളെ നേരിട്ട് തെരഞ്ഞെടുക്കും. രാവിലെ 9.30 മുതല്‍ വൈകുന്നേരം നാലുവരെ നടക്കുന്ന മേളയില്‍ പാരിസണ്‍സ്, അഫ്ജാന്‍ ഡേറ്റ്‌സ്, ബര്‍ജര്‍ പെയിന്‍റ്സ്, കല്യാണ്‍ ജ്വല്ലേഴ്‌സ് തുടങ്ങി മുപ്പതോളം കമ്പനികള്‍ പങ്കെടുക്കും. കമ്പനികള്‍ക്കും ഉദ്യോഗാര്‍ഥികള്‍ക്കും രജിസ്ട്രേഷനും അനുബന്ധ സേവനങ്ങളും തികച്ചും സൗജന്യമാണ്. ഒരാള്‍ക്ക് നാല് അഭിമുഖങ്ങളില്‍ പങ്കെടുക്കാം. ഉദ്യോഗാര്‍ഥികള്‍ ബയോഡാറ്റയുടെ അഞ്ച് പകര്‍പ്പുകളും രണ്ട് പാസ്പോര്‍ട്ട് സൈസ് ഫോട്ടോകളും യോഗ്യത തെളിയിക്കുന്ന രേഖകളും ഹാജരാക്കണം. രജിസ്ട്രേഷന് 9447767962, 7356000620 എന്നീ നമ്പറുകളില്‍ ബന്ധപ്പെടണം. ഓണ്‍ലൈന്‍ രജിസ്ട്രേഷന് http://g5.gobsbank.com.jobfair2/candidate.php എന്ന ലിങ്കില്‍ ക്ലിക്ക് ചെയ്യണമെന്ന് ഫാ. സാമുവല്‍ പുതുപ്പാടി, കെ.വി. ചന്ദ്രശേഖരന്‍, സനല്‍ലാല്‍, അന്‍വര്‍ സാദിഖ് തുടങ്ങിയവര്‍ പത്രസമ്മേളനത്തില്‍ അറിയിച്ചു.

അനധികൃത പാർക്കിംഗ്; ആലക്കോട്ട് ഗതാഗതക്കുരുക്ക് രൂക്ഷമാകുന്നു

ആലക്കോട്: ആലക്കോട് ടൗണിൽ വാഹനങ്ങൾ തോന്നിയത് പോലെ നിർത്തിയിടാൻ തുടങ്ങിയതോടെ ഗതാഗത സ്തംഭനം പതിവാകുന്നു. മലയോര ഹൈവേയും തളിപ്പറമ്പ് കുർഗ് ടിസിബി റോഡും കൂടിച്ചേരുന്ന പ്ര‌ധാന ടൗൺ ആയതിനാൽ ഏത് നേരവും ഇവിടെ വാഹനത്തിരക്കാണ്. ഇരുഭാഗങ്ങളിലെ നടപ്പാത കൈയേറിയും കുറുകേയും വഴിയടച്ച് ചിലർ വാഹനങ്ങൾ നിർത്തിയിടുന്നത് കാൽനട യാത്രക്കാരെയും വലയ്ക്കുന്നുണ്ട്. ഇതുമൂലം വയോധികരും സ്ത്രീകളും കുട്ടികളും അടക്കമുള്ള കാൽനടയാത്രക്കാർ അപകടാവസ്ഥ നേരിടുന്നുണ്ട്. സമീപകാലത്ത് നിരവധി അപകടങ്ങൾ ഇതുമായി ബന്ധപ്പെട്ട് ടൗണിൽ സംഭവിച്ചിട്ടുണ്ട്. പോസ്റ്റ് ഓഫീസ്, ബാങ്കുകൾ തുടങ്ങി നിരവധി സർക്കാർ സ്ഥാപനങ്ങളിലേക്ക് പോകാനായി റോഡ് മുറിച്ച് കടക്കാനായി പ്രായമായവർ മറ്റുള്ളവരെ ആശ്രയിക്കേണ്ടി വരുന്നു. ചിലർ വാഹനങ്ങളിലെത്തി റോഡരികിൽ നിർത്തിയിട്ടശേഷം ബസിൽ ദൂരയാത്രയ്ക്കു പോകുകയും വൈകുന്നേരമെത്തി വാഹനങ്ങളുമായി മടങ്ങുകയും ചെയ്യുന്നു. മൂന്നു സ്കൂളുകളും കോളജും പള്ളിയും മസ്ജിദും ഉൾപ്പെടെയുള്ള സ്ഥലത്ത് കാൽനടക്കാർ ഏറെയുണ്ട്. നോ പാർക്കിംഗ് ബോർഡിന്‍റെ കീഴിൽവരെ വാഹനങ്ങൾ പാർക്ക് ചെയ്യുകയാണ്. പാർക്കിംഗ് സൗകര്യമില്ലാത്തതിനാൽ ദൂരെ സ്ഥലങ്ങളിൽ നിന്ന് സ്വകാര്യവാഹനങ്ങളിൽ വരുന്നവർ ഹോട്ടലിൽ ഭക്ഷണം കഴിക്കാനും കടകളിൽ കയറി സാധനങ്ങൾ വാങ്ങാനും കഴിയാതെ മറ്റു സ്ഥലത്തേക്ക് പോവുകയാണെന്ന് വ്യാപാരികൾ പറയുന്നു. അനധികൃത പാർക്കിംഗ് ഒഴിവാക്കാൻ നടപടി സ്വീകരിക്കണമെന്നാണ് നാട്ടുകരുടെ ആവശ്യം.

കിഡ്സ്‌ പാർക്ക് ഉദ്ഘാടനം ചെയ്തു

ശ്രീകണ്ഠപുരം: നിടിയേങ്ങ ശിശുമന്ദിരത്തിൽ സ്ഥാപിച്ച കിഡ്സ്‌ പാർക്കിന്‍റം ഉദ്ഘാടനം നഗരസഭാധ്യക്ഷ ഡോ. കെ.വി. ഫിലോമിന നിർവഹിച്ചു. നഗരസഭയുടെ 2024 - 25 വാർഷിക പദ്ധതിയിൽ ഉൾപ്പെടുത്തി 10 ലക്ഷം ചെലവിട്ടാണ് പാർക്ക് തുറന്നത്. വൈസ് ചെയർമാൻ കെ. ശിവദാസൻ അധ്യക്ഷത വഹിച്ചു. വാർഡ് കൗൺസിലറും നഗരസഭാ വികസന കാര്യ സ്റ്റാൻഡിംഗ് കമ്മിറ്റി ചെയർപേഴ്സനുമായ ജോസഫിന വർഗീസ്, നഗരസഭസ്ഥിരം സമിതി അധ്യക്ഷന്മാരായ കെ.സി. ജോസഫ് കൊന്നക്കൽ, പി.പി. ചന്ദ്രാംഗദൻ, വി. പി. നസീമ, കൗൺസിലർ കെ.വി. കുഞ്ഞിരാമൻ, സെക്രട്ടറി ടി.വി. നാരായണൻ, ഇമ്പ്ലിമെന്‍റിംഗ് ഓഫീസർ വി. പ്രേമരാജൻ, പിഎച്ച് ഐ, പി.വി. സതീശൻ, സിഡിപിഒ, ശ്യാമള, ഐസിഡിഎസ് സൂപ്പർവൈസർ പി. ജയലക്ഷ്മി, ടി.എൻ. പ്രമോദ്, ഐസിഡിഎസ് സൂപ്പർവൈസർ വി.സി. ശ്രീജ എന്നിവർ പ്രസംഗിച്ചു.

മാന്പൊയിലിൽ കാട്ടാനക്കൂട്ടം കൃഷി നശിപ്പിച്ചു

ആലക്കോട്: ഉദയഗിരി പഞ്ചായത്തിൽ മാന്പൊയിൽ പ്രദേശത്ത് കാട്ടാനക്കൂട്ടം വ്യാപകമായി കൃഷി നശിപ്പിച്ചു. മാന്പൊയിലിലെ തുരുത്തേൽ ഏബ്രഹാം, കവളംമാക്കൽ അലക്സാണ്ടർ, തൊമ്മിത്താഴത്ത് ജോസുകുട്ടി, തുരുത്തേൽ ദേവസ്യ എന്നിവരുടെ കൃഷിയിടത്തിലാണ് കാട്ടാന ഇറങ്ങിയത്. തെങ്ങ്, കമുക്, വാഴ ഉൾപ്പെടെയുള്ള കൃഷികളാണ് മൂന്ന് ദിവസങ്ങളിലായി നശിപ്പിച്ചത്. ഇവിടെ അര കിലോമീറ്ററോളം ഭാഗത്ത് സോളർവേലി നിർമിച്ചിട്ടില്ല. വേലി ഉള്ളയിടങ്ങളിൽ ഇടയ്ക്കിടയ്ക്കിടെ പ്രവർത്തന രഹിതമാകുന്നു. ഇതു മൂലമാണ് കാട്ടാനകൾ കൃഷിയിടങ്ങളിലേക്കും ജനവാസ മേഖലയിലേക്കും ഇറങ്ങുന്നത്. പാട്ട കൊട്ടിയും പടക്കം പൊട്ടിച്ചുമാണ് കർഷകർ അവയെ തുരത്തുന്നത്. വന്യമൃഗ ശല്യം തടയാൻ നടപടി ഉണ്ടാകണമെന്നാണ് ജനങ്ങളുടെ ആവശ്യം. കഴിഞ്ഞ ആഴ്ചയും അപ്പർ ചീക്കാട്‌ കൃഷി നശിപ്പിച്ചിരുന്നു. കർണാടക വനാതിർത്തിയോട് ചേർന്നുള്ള പ്രദേശങ്ങളിൽ കാട്ടാനക്കൂട്ടം ഇറങ്ങി വ്യാപകമായി കൃഷിനശിപ്പിക്കുന്നത് പതിവാകുകയാണ്.

തളിപ്പറമ്പ് നഗരസഭാ കൗണ്‍സില്‍ യോഗത്തില്‍ ഭരണ-പ്രതിപക്ഷ കയ്യാങ്കളി

തളിപ്പറമ്പ്: മാലിന്യപ്രശ്‌നത്തെക്കുറിച്ചുള്ള ചര്‍ച്ച നഗരസഭാ കൗണ്‍സില്‍ യോഗത്തില്‍ ഭരണ-പ്രതിപക്ഷങ്ങള്‍ തമ്മിലുള്ള കൈയാങ്കളിയില്‍ കലാശിച്ചു. ഇന്നലെ രാവിലെ നടന്ന യോഗത്തിലാണ് സംഭവം. ബാബുഫ്രഷ് റസ്റ്റോറന്‍റില്‍ നിന്ന് കക്കൂസ് മാലിന്യങ്ങള്‍ തോട്ടിലൂടെ ജനവാസ കേന്ദ്രത്തില്‍ ഒഴുക്കിവിട്ടതുമായി ബന്ധപ്പെട്ട ചര്‍ച്ച തുടങ്ങിവച്ച പ്രതിപക്ഷ കൗണ്‍സിലര്‍ സി.വി. ഗിരീശന്‍ ഭരണപക്ഷത്തെ രൂക്ഷമായി വിമര്‍ശിച്ചു. നഗരത്തിലെ ഒട്ടുമിക്ക സ്ഥാപനങ്ങളുടെയും മലിനജലം പൈപ്പിലൂടെ പൊതു ഓടയിലേക്ക് ഒഴുക്കിവിടുകയാണെന്നും കക്കൂസ് മാലിന്യങ്ങള്‍വരെ ഇത്തരത്തില്‍ ഓടയിലേക്ക് വിടുന്നുണ്ടെന്നും അദ്ദേഹം പറഞ്ഞു. വി. വിജയന്‍, കെ.എം. ലത്തീഫ്, ഡി. വനജ, പി. വല്‍സല എന്നിവര്‍ ഭരണപക്ഷത്തിനെതിരെ രൂക്ഷമായ വിമര്‍ശനങ്ങളാണ് ഉയര്‍ത്തതി വിട്ടത്. ഈ സമയത്ത് ഭരണപക്ഷത്തുനിന്ന് എഴുന്നേറ്റ യൂത്ത്‌ലീഗ് ജില്ലാ ജനറൽ സെക്രട്ടറി കൂടിയായ പി.സി. നസീര്‍ മാലിന്യമുക്ത കേരളത്തിലല്ലേ മാലിന്യമുക്ത തളിപ്പറമ്പ് എന്ന് ചോദിച്ചതോടെയാണ് പ്രതിപക്ഷം പ്രകോപിതരായത്. തളിപ്പറമ്പിലെ മാലിന്യ പ്രശ്‌നത്തേക്കുറിച്ച് പറയുമ്പോള്‍ സംസ്ഥാനത്തെ മാലിന്യത്തെക്കുറിച്ച് പറയേണ്ട കാര്യമില്ലെന്ന് പറഞ്ഞാണ് പ്രതിപക്ഷം ചാടിയെഴുന്നേറ്റത്. ഇതോടെ ഇരുവിഭാഗവും സീറ്റുകളില്‍ നിന്ന് എഴുന്നേറ്റ് പോരിനൊരുങ്ങി. ഇതിനിടയില്‍ സുപ്രധാനമായ പ്രശ്‌നങ്ങള്‍ ചര്‍ച്ചക്കെടുക്കുമ്പോള്‍ ഭരണ-പ്രതിപക്ഷങ്ങള്‍ തമ്മില്‍ ഒത്തുകളിച്ച് ഏറ്റുമുട്ടല്‍ നാടകം നടത്തുകയാണെന്ന് ബിജെപി കൗണ്‍സിലര്‍ പി.വി. സുരേഷ് ഇരുപക്ഷത്തെയും വിമര്‍ശിച്ചു. ഇത് കേട്ടതോടെ കെ.എം. ലത്തീഫ് ഓടിയെത്തി സുരേഷിനെ കൈയേറ്റം ചെയ്യാന്‍ മുതിര്‍ന്നു. പ്രകോപിതനായ സുരേഷിനെ മുതിര്‍ന്ന അംഗങ്ങള്‍ അനുനയിപ്പിച്ച് കൗണ്‍സില്‍ ഹാളിന് പുറത്തെത്തിച്ചതോടെയാണ് രംഗം ശാന്തമായത്. ചെയര്‍പേഴ്‌സന്‍ മുര്‍ഷിദ കൊങ്ങായിയുടെ അധ്യക്ഷതയില്‍ നടന്ന യോഗത്തില്‍ വൈസ് ചെയര്‍മാന്‍ കല്ലിങ്കീല്‍ പത്മനാഭന്‍, കെ.നബീസ ബീവി, ഒ.സുഭാഗ്യം എന്നിവര്‍ ചര്‍ച്ചകളില്‍ പങ്കെടുത്തു. നഗരസഭാ ഓഫീസിലേക്ക് സിപിഎം മാര്‍ച്ച് ഇന്ന് തളിപ്പറമ്പ്: തളിപ്പറമ്പ് നഗരത്തിലെ മാലിന്യപ്രശ്‌നത്തിന് പരിഹാരം കാണണമെന്നാവശ്യപ്പെട്ട് സിപിഎം ഇന്ന് നഗരസഭാ ഓഫീസിലേക്ക് പ്രതിഷേധ മാര്‍ച്ച് നടത്തും. രാവിലെ പത്തരക്ക് നടക്കുന്ന മാര്‍ച്ച് സിപിഎം ജില്ലാ സെക്രട്ടറി കെ.കെ. രാഗേഷ് ഉദ്ഘാടനം ചെയ്യും.

കർമപദ്ധതികൾ ആവിഷ്കരിച്ചു; പഞ്ചായത്തുതല യോഗങ്ങൾ 20ന്

കണ്ണൂർ: തദ്ദേശ ഭരണ തെരഞ്ഞെടുപ്പിനുള്ള മുന്നൊരുക്കങ്ങളുടെ ഭാഗമായി പ്രവർത്തനം സജീവവും കുറ്റമറ്റതുമാക്കാൻ യുഡിഎഫ്. ജില്ലാ കമ്മറ്റി കർമ പദ്ധതികൾ ആവിഷ്കരിച്ചു. അതിന്‍റെ ഭാഗമായി ജില്ലയിലെ എല്ലാ മുനിസിപ്പൽ,മേഖലാ പഞ്ചായത്ത് തലങ്ങളിലും 20 ന് യുഡിഎഫിന്‍റെ പ്രത്യേക യോഗങ്ങൾ വിളിച്ചു ചേർക്കാൻ നിർദേശിച്ചു. നിയോജക മണ്ഡലം നേതാക്കൾ പ്രസ്തുത യോഗങ്ങളിൽ പങ്കെടുക്കും.ജൂലൈ 31 നകം മുനിസിപ്പൽ, പഞ്ചായത്ത് കമ്മറ്റികളും ഓഗസ്റ്റ് 15 നകം വാർഡ് കമ്മറ്റികളും രൂപീകരിക്കാൻ തീരുമാനിച്ചു. ആരോഗ്യ വിദ്യാഭ്യാസ മേഖലകളിലെ കെടുകാര്യസ്ഥതയ്ക്കും അനാസ്ഥയ്ക്കുമെതിരേ 23 ന് കണ്ണൂർ കളക്ടറേറ്റിന് മുന്നിൽ പ്രതിഷേധ സംഗമം നടത്തും. അതിന് മുന്നോടിയായി 18, 19 തിയതികളിൽ എല്ലാ നിയോജക മണ്ഡലം യോഗങ്ങളും ചേരും. ജില്ലാ നേതാക്കൾ പ്രസ്തുത യോഗങ്ങളിൽ പങ്കെടുക്കും. ഡിസിസി പ്രസിഡന്‍റ് മാർട്ടിൻ ജോർജ് യോഗത്തിൽ അധ്യക്ഷത വഹിച്ചു. യുഡിഎഫ് നേതാക്കളായ അബ്ദുൾ കരീം ചേലേരി, കെ.ടി .സഹദുള്ള, എ.ഡി. മുസ്തഫ, സി.എ. അജീർ, എസ്. മുഹമ്മദ്, ജോൺസൺ പി തോമസ്, ചന്ദ്രൻ തില്ലങ്കേരി, ടി.ഒ. മോഹനൻ, സഹജൻ, സജീവ് മാറോളി , വി.എ. നാരായണൻ തുടങ്ങിയവർ പങ്കെടുത്തു.

വായ്പ നല്കിയ പണം തിരികെ ചോദിച്ചപ്പോൾ അമ്മയ്ക്കും മകൾക്കും മർദനം; യുവാവിനെതിരേ കേസ്

കണ്ണൂർ: വായ്പ നൽകിയ പണം തിരികെ ചോദിച്ചതിന് വീട്ടിൽ അതിക്രമിച്ച് കയറി അമ്മയെയും മകളെയും മർദിച്ചുവെന്ന പരാതിയിൽ യുവാവിനെതിരെ ടൗൺ പോലീസ് കേസെടുത്തു. മേലെ ചൊവ്വ സ്വദേശിനിയായ 29 കാരിയുടെ പരാതിയിലാണ് ചൊവ്വ സ്വദേശി സൂരജ് നിവാസിൽ കെ.വി. സനകിനെതിരെ പോലീസ് കേസെടുത്തത്. 2022 നവംബർ 13 നാണ് പരാതിക്കാസ്പദമായ സംഭവങ്ങൾക്ക് തുടക്കം. പരാതിക്കാരിക്ക് പ്രതി വിവാഹവാഗ്ദാനം നൽകിയിരുന്നു. ആറുമാസത്തിനുള്ളിൽ പരാതിക്കാരിയെ വിവാഹം കഴിക്കാമെന്നും പ്രതിയുടെ വീടിന്‍റെ നിർമാണം പൂർത്തിയാക്കിയാൽ മാത്രമെ വിവാഹം നടത്താൻ സാധിക്കുകയുള്ളൂവെന്നും പറഞ്ഞ് 45 ലക്ഷം രൂപ കൈപ്പറ്റി. വിവാഹം കഴിഞ്ഞാൽ പ്രതിയുടെ സ്വത്ത് വിറ്റ് പണം തിരികെ തരാമെന്നും വിശ്വസിപ്പിച്ചു. എന്നാൽ പരാതിക്കാരിയുടെ വീടിന്‍റെ ജപ്തി നടപടികൾ ഒഴിവാക്കുന്നതിന് പ്രതി കൈപ്പറ്റിയ പണം തിരികെ ചോദിച്ചപ്പോൾ വീട്ടിൽ അതിക്രമിച്ച് കയറി തടഞ്ഞുവച്ച് മർദിക്കുകയും തടയാൻ ചെന്ന അമ്മയെയും അടിച്ചു പരിക്കേൽപ്പിച്ചുവെന്ന പരാതിയിലാണ് കേസെടുത്തത്.

ഭാര്യയെയും മകളെയും ഡാമിൽ തള്ളിയിടുകയും മകൾ മരിക്കുകയും ചെയ്ത കേസിൽ വിചാരണ ഇന്ന് തുടങ്ങും

തലശേരി: പുഴയിൽ വെള്ളം കയറിയത് കാണിച്ചു തരാമെന്ന് പറഞ്ഞ് ഭാര്യയേയും ഒന്നര വയസുകാരിയായ ഏകമകളേയും കൂട്ടിക്കൊണ്ടു പോയി ഡാമിൽ തള്ളിയിടുകയും മകൾ മരിക്കുകയും ചെയ്ത കേസിൽ അഡീഷണൽ ജില്ലാ സെഷൻസ് കോടതിയിൽ (ഫാസ്റ്റ് ട്രാക്ക്-ഒന്ന്) ഇന്ന് വിചാരണ ആരംഭിക്കും. പാട്യം പത്തായകുന്നിലെ കുപ്പിയാട്ട് മടപ്പുര വീട്ടിൽ കെ.പി. ഷിനു എന്ന ഷിജുവാണ് (46) കേസിലെ പ്രതി. ഷിജുവിന്‍റെ ഭാര്യ ചോയ്യാടത്തെ എം.പി. സോന സുരേഷിനേയും (35), മകൾ അൻവിതയേയും ബൈക്കിൽ കയറ്റി മൊകേരി പാത്തിപ്പാലത്തെ വാട്ടർ അഥോറിറ്റിയുടെ ചെക്ക്ഡാമിനടുത്തായി കൊണ്ടുപോയ ശേഷം കൊല്ലുകയെന്ന ലക്ഷ്യത്തോടെ ഡാമിലേക്ക് തള്ളിയിട്ടുവെന്നാണ് കേസ്. ഒഴുക്കിൽപ്പെട്ട സോനയെ രക്ഷിക്കാൻ ആവശ്യപ്പെട്ടപ്പോൾ പ്രതി ചെരിപ്പുകൊണ്ട് അടിച്ച് വീണ്ടും വെള്ളത്തിലേക്കിട്ടു. ഒഴുക്കിൽപ്പെട്ട സോന കുറച്ചകലെയുള്ള കൈതച്ചെടിയിൽ പിടിക്കുകയും ബഹളം കേട്ട് ഓടിയെത്തിയ നാട്ടുകാർ രക്ഷിക്കുകയുമായിരുന്നു. സംഭവദിവസം രാത്രി ഏഴരയോടെ കുറച്ചകലെനിന്നും അൻവിതയുടെ മൃതദേഹം കണ്ടെത്തുകയായിരുന്നു. സംഭവസ്ഥലത്തുനിന്നു രക്ഷപ്പെട്ട പ്രതിയെ പിറ്റേ ദിവസം മട്ടന്നൂരിൽനിന്നു പോലീസ് പിടികൂടുകയായിരുന്നു. 2021 ഒക്ടോബർ 15 നായിരുന്നു കേസിനാസ്പദമായ സംഭവം . 122 സാക്ഷികളാണ് ഈ കേസിലുള്ളത്. കതിരൂർ പോലീസാണ് ആദ്യം കേസ് രജിസ്റ്റർ ചെയ്തത്. പിന്നീട് പാനൂർ പോലീസിന് കൈമാറി. കതിരൂർ സിഐയായിരുന്ന കെ.വി. മഹേഷാണ് പ്രതിയെ അറസ്റ്റ് ചെയ്തത്.

യുവജനങ്ങൾക്ക് നൈപുണ്യോത്സവങ്ങൾ സംഘടിപ്പിക്കും: മന്ത്രി വി. ശിവൻകുട്ടി

കണ്ണൂർ: സംസ്ഥാനത്തെ യുവജനങ്ങളെ ആഗോള മത്സരക്ഷമതയുള്ള മികച്ച മാനവവിഭവശേഷി ആക്കുന്നതിന് സംസ്ഥാനത്ത് ആദ്യമായി നൈപുണ്യോത്സവങ്ങൾ സംഘടിപ്പിക്കുമെന്ന് മന്ത്രി വി. ശിവൻകുട്ടി. കേരള അക്കാദമി ഫോർ സ്‌കിൽ എക്‌സലൻസ് (കെയ്‌സ്) ടാലി എഡ്യുക്കേഷൻ പ്രൈവറ്റ് ലിമിറ്റഡുമായി (ടിഇപിഎൽ) ചേർന്ന് സംഘടിപ്പിച്ച ലോക യുവജന നൈപുണ്യ ദിനാചരണവും ടാലി ട്രെയിനിംഗ് സെന്‍ററുകളുടെ അക്രഡിറ്റേഷനും കണ്ണൂർ കൃഷ്ണ ബീച്ച് റിസോർട്ടിൽ ഉദ്ഘാടനം ചെയ്ത് പ്രസംഗിക്കുകയായിരുന്നു മന്ത്രി. ദേശീയ-അന്തർദേശീയ വ്യവസായ രംഗങ്ങളിലെ മികച്ച തൊഴിൽ മേഖലകൾ നമ്മുടെ യുവതലമുറയ്ക്ക് പരിചയപ്പെടുത്തുക, തൊഴിൽ വൈദഗ്ധ്യം കൈവരിക്കേണ്ടതിന്‍റെ പ്രാധാന്യം യുവതലമുറയെ ബോധ്യപ്പെടുത്തുക എന്നീ ഉദ്ദേശ്യലക്ഷ്യങ്ങളോടെയാണ് നൈപുണ്യോത്സവങ്ങൾ സംഘടിപ്പിക്കുന്നതെന്ന് മന്ത്രി പറഞ്ഞു. 22 വയസിൽ താഴെയുള്ള യുവാക്കൾക്ക് ആഗോള പ്രാധാന്യമുള്ള അറുപതോളം ട്രേഡുകൾ പരിചയപ്പെടുത്താനും വൈദഗ്ധ്യം മാറ്റുരയ്ക്കാനുമുള്ള അവസരമാണ് ലഭ്യമാക്കുന്നത്. സ്‌കൂൾ-കോളജ് വിദ്യാർഥികൾക്കും 22 വയസിൽ താഴെയുള്ള അഭ്യസ്ത വിദ്യർക്കും അവസരം ലഭ്യമാക്കും. വിജയികൾക്ക് " ഇന്ത്യ സ്‌കിൽസ് ' മത്സരങ്ങളിലൂടെ ദേശീയതലത്തിലും അന്തർദേശീയ തലത്തിലും മാറ്റുരയ്ക്കുന്നതിന് അവസരം സൃഷ്ടിക്കും. സെപ്റ്റംബറിൽ ആരംഭിച്ച് ഫെബ്രുവരിയിൽ മത്സരങ്ങൾ പൂർത്തിയാക്കും. വികേന്ദ്രീകൃത നൈപുണ്യ വികസനത്തിന്‍റെ ഭാഗമായി ടാലി എജുക്കേഷൻ പ്രൈവറ്റ് ലിമിറ്റഡുമായി സഹകരിച്ച് കേരളത്തിൽ അക്കൗണ്ടിംഗ് രംഗത്ത് നല്ല രീതിയിൽ പരിശീലനം ലഭ്യമാക്കുന്ന പരിശീലന സ്ഥാപനങ്ങളെ കെയ്സിലേയ്ക്ക് അക്രഡിറ്റേഷൻ നൽകുന്നതിനാണ് തുടക്കമാവുന്നത്. പുതുതായി തയാറാക്കിയ "മാസ്റ്റർ അക്കൗണ്ടന്‍റ്' എന്ന കോഴ്‌സിന്‍റെ രജിസ്‌ട്രേഷനും മന്ത്രി ഉദ്ഘാടനം ചെയ്തു. കെയ്‌സ് എംഡി സൂഫിയാൻ അഹമ്മദ് അധ്യക്ഷത വഹിച്ചു. ടിഇപിഎൽ ഗവ. പ്രൊജക്ട്‌സ് അക്രഡിറ്റേഷൻ ഹെഡ് രാകേഷ് ചന്ദ്രശേഖർ മുഖ്യപ്രഭാഷണം നടത്തി. അസി. കളക്ടർ എഹ്‌തെദ മുഫസിർ, ജില്ലാ പ്ലാനിംഗ് ഓഫീസർ നെനോജ് മേപ്പടിയത്ത്, ടിഇപിഎൽ സൗത്ത് സോൺ, ഇന്‍റർനാഷനൽ എജിഎം എൻ ജിജി കുമാർ, കെയ്‌സ് സിഇഒ ടി വി. വിനോദ് എന്നിവർ പ്രസംഗിച്ചു.

സിപിഎം നേതാവ് ഉൾപ്പെടെ രണ്ടുപേർ അറസ്റ്റിൽ

ഇരിട്ടി: എടക്കാനം റിവർ വ്യൂ പോയിന്‍റിലെ ആക്രമണവുമായി ബന്ധപ്പെട്ട് സിപിഎം നേതാവ് ഉൾപ്പെടെ രണ്ടുപേർ അറസ്റ്റിൽ. സിപിഎം കാക്കയങ്ങാട് ലോക്കൽ കമ്മിറ്റിയംഗം പാലപ്പുഴ സ്വദേശി എ. രഞ്ജിത്ത് (32), മുഴക്കുന്ന് സ്വദേശി അക്ഷയ് (25) എന്നിവരെയാണ് തിങ്കളാഴ്ച രാത്രിയോടെ പോലീസ് കസ്റ്റഡിയിലെടുത്തത്. ഇവരുടെ അറസ്റ്റ് രേഖപ്പെടുത്തി കോടതിയിൽ ഹാജരാക്കി റിമാൻഡ് ചെയ്തു. ഒരാളെ വീട്ടിൽനിന്നും മറ്റൊരാളെ രാത്രി വൈകി റോഡിൽ നിന്നുമാണ് പോലീസ് പിടികൂടിയത്. അക്ഷയ് നിരവധി കേസുകളിലെ പ്രതിയാണ്. കൂത്തുപറമ്പിലെ കുഴൽപ്പണ കേസ്, നാടൻ തോക്ക് കൈവശം വച്ചതുൾപ്പെടെ കേസുകൾ പ്രതിക്കെതിരേ വിവിധ സ്റ്റേഷനുകളിൽ നിലവിലുണ്ട്. 15 പ്രതികളാണ് സംഭവത്തിലുള്ളത്. കേസിലെ ഒന്നാം പ്രതിയും ശുഹൈബ് വധക്കേസിലെ രണ്ടാം പ്രതിയുമായ ദീപ് ചന്ദ് ഉൾപ്പെടെയുള്ള 13 പ്രതികൾ ഒളിവിലാണ്. ഇവർക്കായുള്ള അന്വേഷണം തുടരുന്നതായി ഇരിട്ടി സിഐ എ. കുട്ടികൃഷ്ണൻ പറഞ്ഞു. അക്രമികൾ ഉപയോഗിച്ച മൂന്നു വാഹനങ്ങളും തിരിച്ചറിഞ്ഞിട്ടുണ്ട്.

ഇരിട്ടിയിലെ ബാഗ് കടയിൽ കുരങ്ങന്‍റെ ‘മിന്നൽ റെയ്ഡ് ’

ഇരിട്ടി: ഇരിട്ടി പഴയ സ്റ്റാൻഡിലെ ബാഗ് കടയിൽ കുരങ്ങൻ കയറി ബാഗുകൾ വലിച്ചു നിലത്തിട്ടു. ബാഗ് വേൾഡ് എന്ന കടയിലാണു കുരങ്ങൻ എത്തിയത്. കഴിഞ്ഞ ദിവസം പകൽ സമയത്താണ് കുരങ്ങ് കടയ്ക്കുള്ളിൽ കയറിയത്. ബാഗുകൾ വലിച്ചു താഴെയിട്ടശേഷം കുരങ്ങൻ പുറത്തേക്ക് ഓടി സമീപത്തെ കെട്ടിടത്തിനു മുകളിൽ കയറി. കുരങ്ങൻ നാശനഷ്‌ടമൊന്നും വരുത്തിയില്ലെന്നാണു കടയുടമ പറയുന്നത്. സമീപത്തെ പഴം-പച്ചക്കറി കടയിൽ ഭക്ഷണത്തിനായി വന്ന കുരങ്ങൻ ബാഗ് കടയ്ക്കുള്ളിൽ അബദ്ധത്തിൽ കയറിയതാണ്. കടയ്ക്കുള്ളിൽ കയറി ബാഗ് വലിച്ചിടുന്ന കുരങ്ങന്‍റെ വീഡിയോ കടയുടമ മൊബൈൽ ഫോണിൽ പകർത്തിയത് ഇപ്പോൾ സമൂഹമാധ്യമങ്ങളിൽ വൈറലാണ്. കുരങ്ങുകൾ കൂട്ടമായി ടൗൺ പരിസരങ്ങളിൽ എത്താറുണ്ടെങ്കിലും ആദ്യമായാണ് കടയ്ക്കുള്ളിൽ കയറുന്നത്.

കായികാധ്യാപകരില്ലാതെ സ്കൂളുകളിലെ കായികക്ഷമത; 10,000 ഒഴിവുകൾ

പി. ജയകൃഷ്ണൻ കണ്ണൂർ: വിദ്യാർഥികളുടെ ആരോഗ്യവും കായികക്ഷമതവും വർധിപ്പിക്കുമെന്ന പതിവ് പല്ലവി ഭരണാധികാരികൾ ആവർത്തിക്കുന്പോഴും കേരളത്തിൽ കായിക അധ്യാപകരെ സ്ഥിരമായി നിയമിക്കുന്നതിനു നടപടിയില്ല. ഉള്ള അധ്യാപക തസ്തികയാകട്ടെ കുട്ടികൾ കുറഞ്ഞതിന്‍റെ പേരിൽ നിർത്തലാക്കുകയും ചെയ്യുന്നു. സംസ്ഥാനത്ത് സർക്കാർ, എയ്ഡഡ് മേഖലകളിൽ 12,644 സ്കൂളുകളിൽ കായിക അധ്യാപകരെ നിയമിക്കണം. നിലവിലുള്ളതാകട്ടെ 1862 അധ്യാപകരും. ഇനിയും പത്തായിരത്തിലേറെ അധ്യാപക രുടെ തസ്തിക ഒഴിഞ്ഞുകിടക്കുന്നു. കണ്ണൂർ ജില്ലയിൽ 1100 സ്കൂളുകളിൽ ആകെയുള്ളത് 152 കായിക അധ്യാപകരാണ്. അഞ്ചു മുതൽ പത്തുവരെ ക്ലാസുകളിൽ കായികവിദ്യാഭ്യാസ പുസ്തകവും പരീക്ഷയും ഉണ്ടെങ്കിലും അധ്യാപകൻ വേണമെന്ന കാര്യം സർക്കാരും മറന്നമട്ടിലാണ്. അധ്യാപകരില്ലാതെ എങ്ങനെ പഠിപ്പി ക്കും എന്ന കാര്യം സർക്കാരിനും വശമില്ല. താത്കാലികമായി നിയമിക്കുന്നവർക്കാകട്ടെ മാന്യമായ പ്രതിഫലവും നല്കുന്നില്ല. 500 വിദ്യാർഥികൾക്ക് ഒരു കായിക അധ്യാപകൻ എന്ന 1956ലെ നിയമമാണ് ഇപ്പോഴും തുടരുന്നത്. അഞ്ച്, ആറ്, ഏഴ് ക്ലാസുകളിൽ ഇത്രയും കുട്ടികൾ ഉണ്ടെങ്കിലാണ് യുപി സ്കൂളുകളിൽ ഒരു കായിക അധ്യാപകനെ അനുവദിക്കുക. ഹൈസ്കൂളുകളിലാകട്ടെ എട്ട്, ഒന്പത് ക്ലാസുകളിൽ 500 കുട്ടികൾ ഉണ്ടെങ്കിൽ അധ്യാപകനെ നിയമിക്കും. തസ്തിക നിർണയത്തിലെ അപാകമാണ് കായിക അധ്യാപക നിമയനത്തിലെ പ്രധാന പ്രശ്നം. കുട്ടികൾ കുറഞ്ഞാൽ പ്രസ്തുത സ്കൂളിലെ കായിക അധ്യാപകനെ കൂടുതൽ കുട്ടികളുള്ള സ്കൂളി ലേക്ക് നേരത്തെ മാറ്റിയിരുന്നുവെങ്കിലും സംസ്ഥാന സർക്കാർ തസ്തിക സംരക്ഷണ ഉത്തരവ് പിൻവലിച്ചതോടെ പലർക്കും ജോലി പോകുന്ന അവസ്ഥയായി. ഇതിനകം 10 വർഷത്തിലധികം സർവീസുള്ള 70 പേർക്കാണ് ഇത്തരത്തിൽ ജോലി നഷ്ടപ്പെട്ടത്. യുപി സ്കൂളുകളിൽനിന്ന് വർക്ക് പോസ്റ്റ് എന്ന നിലയിൽ ഹൈസ്കൂളുകളിൽ കായിക അധ്യാപരെ നിയമിക്കുന്നുണ്ടെങ്കിലും യുപി സ്കൂൾ വിഭാഗത്തിൽ നല്കുന്ന ശന്പളം തന്നെയാണ് ഹൈസ്കൂളുകളിൽ ഇത്തരത്തിൽ നിയമിക്കപ്പെടുന്നവർക്ക് ലഭിക്കുന്നതെന്ന് സംയുക്ത കായിക അധ്യാപക സംഘടന നേതാവ് പി.പി. ഉദയകുമാർ ദീപികയോട് പറഞ്ഞു. കുട്ടികളുടെ കുറവിനെത്തുടർന്ന് അധ്യാപക-വിദ്യാർഥി അനുപാതത്തിൽ മറ്റെല്ലാ തസ്തികകളിലും ഭേദഗതി വരുത്തിയെങ്കിലും കായിക അധ്യാപക നിയമനത്തിൽ മാറ്റം വരുത്തിയില്ല. ഹയർ സെക്ക ൻഡറിയിലും വിഎച്ച്എസ്ഇയിലുമാകട്ടെ കായിക അധ്യാപക തസ്തികയുമില്ല. അധ്യാപകർക്കുള്ള കുടിശിക 70.05 ലക്ഷം 10 ജില്ലകളിൽ റവന്യു ജില്ലാതല മത്സരം സംഘടിപ്പിച്ചതിൽ കടക്കെണിയിലായതും പാവം കായികാധ്യാപകരാണ്. ഡിഡിഇയ്ക്കും കായിക അധ്യാപകനായ റവന്യു ജില്ലാ സെക്രട്ടറി മാർക്കുമാണ് ഓരോ ജില്ലയിലേയും സ്കൂൾ റവന്യു ജില്ലാ കായിക മത്സരത്തിന്‍റെ സാന്പത്തികമടക്ക മുള്ള കാര്യങ്ങളുടെ ചുമതല. റവന്യു ജില്ലാതലത്തിൽ സ്കൂൾ കായിക മത്സരം നടത്തുന്നതിനായി ഇവർ ചെലവഴിച്ച കഴിഞ്ഞ മൂന്നുവർഷത്തേതടക്കം 70.05 ലക്ഷം രൂപ ഇപ്പോഴും കുടിശികയാണ്. തിരുവനന്തപുരം, കണ്ണൂർ ജില്ലകളിലാണ് മൂന്നുവർഷത്തെ തുക കുടിശികയായിട്ടുള്ളത്. തിരുവനന്തപുരം ജില്ലയ്ക്ക് 20.85 ലക്ഷവും കണ്ണൂരിന് 11.56 ലക്ഷവും കുടിശികയുണ്ട്. മലപ്പുറത്തിന് 10.74 ലക്ഷം രൂപയും പാലക്കാടിന് 8.90 ലക്ഷവും തൃശൂരിന് 5.15 ലക്ഷവും കുടിശികയാണ്. കൂടാതെ കൊല്ലം, പത്തനംതിട്ട, എറണാകുളം, കോഴിക്കോട്, കാസർഗോഡ് ജില്ലയിലെ റവന്യൂ ജില്ലാ സെക്രട്ടറിമാർക്കും തുക ലഭിക്കാനുണ്ട്. പലരും വ്യക്തികളിൽനിന്നും ബാങ്കിൽനിന്നും വായ്പയും മറ്റും എടുത്താണ് മാനം കാത്തത് എന്നതും ഇപ്പോഴും സർക്കാർ അറിയാതെ പോകുന്നു.

കല്യാട് അന്താരാഷ്‌ട്ര ആയുർവേദ ഗവേഷണ കേന്ദ്രം: ഒന്നാംഘട്ടം നവംബറിൽ ആരംഭിക്കും

ഇരിട്ടി: പടിയൂർ പഞ്ചായത്തിലെ കല്യാട് നിർമാണം പുരോഗമിക്കുന്ന അന്താരാഷ്‌ട്ര ആയുർവേദ ഗവേഷണ കേന്ദ്രം ആദ്യഘട്ടം നവംബറിൽ ഉദ്ഘാടനം ചെയ്യും. കേന്ദ്രത്തിന്‍റെ നിർമാണ പുരോഗതി വിലയിരുത്തിയ ശേഷം മുൻ ആരോഗ്യമന്ത്രി കെ.കെ. ശൈലജ എംഎൽഎയുടെയും ആയുസ് ഡയറക്ടർ സജിത്ത് ബാബുവിന്‍റെയും നേതൃത്വത്തിൽ ആയുർവേദ ഗവേഷണ കേന്ദ്രത്തിൽ നടന്ന അവലോകന യോഗത്തിലാണ് തീരുമാനം. ഒക്ടോബറിനുള്ളിൽ എല്ലാ ഒന്നാംഘട്ട പ്രവർത്തനങ്ങളും പൂർത്തിയാക്കാനും നവംബർ ആദ്യവാരം ഉദ്ഘാടനം നടത്താനും മുഖ്യമന്ത്രി പിണറായി വിജയൻ നിർദേശിച്ചതായി അവലോകനയോഗത്തിനുശേഷം എംഎൽഎ പറഞ്ഞു. ഒന്നാംഘട്ടത്തിൽ 100 കിടക്കകളുള്ള ആധുനിക സൗകര്യങ്ങളോടുകൂടിയ ആശുപത്രി ബ്ലോക്ക്, വൈദ്യശാസ്ത്ര അറിവുകളുമായി ബന്ധപ്പെട്ട താളിയോലകളും കൈയെഴുത്ത് കൃതികളും സംരക്ഷിക്കുന്നതിനുള്ള മാനുസ്‌ക്രിപ്റ്റ് സെന്‍റർ, ഔഷധ സസ്യങ്ങളുടെ നഴ്സറി ബ്ലോക്ക്, ചുറ്റുമതിൽ, പ്രവേശന കവാടം എന്നിവയാണ് പൂർത്തിയാക്കുന്നത്. ഇതോടൊപ്പം അന്താരാഷ്‌ട്ര നിലവാരമുള്ള ലാബും സജ്ജമാക്കും. ആശുപത്രി ബ്ലോക്കിന്‍റെ മൂന്നുനിലകളുടെ നിർമാണം അവസാനഘട്ടത്തിലാണ്. മാനുസ്‌ക്രിപ്റ്റ് സ്റ്റഡി സെന്‍റർ നിർമാണവും പുരോഗമിക്കുന്നു. 36.5 ഏക്കറിൽ കിഫ്ബി ഫണ്ടിൽനിന്നും 120 കോടിയോളം ചെലവഴിച്ചാണ് ഒന്നാംഘട്ടം പൂർത്തിയാക്കുന്നത്. 250 ഏക്കർ സ്ഥലമാണ് ആയുർവേദ ഗവേഷണ കേന്ദ്രത്തിനായി ഏറ്റെടുത്തിരിക്കുന്നത്. ആദ്യഘട്ട പ്രവർത്തനത്തിന് വേണ്ടിവരുന്ന 132 തസ്തികകൾ സർക്കാരിന്‍റെ അനുമതിക്കായി സമർപ്പിക്കാനും യോഗം തീരുമാനിച്ചു. 135 ശാസ്ത്രജ്ഞന്മാരുടെ തസ്തിക ഉൾപ്പെടെ 432 പ്രധാന തസ്തികകളിലേക്കാണ് നിയമനം നടത്തേണ്ടത്. രണ്ട്, മൂന്ന് ഘട്ടങ്ങളിൽ ഗവേഷണ കേന്ദ്രത്തിന്‍റെ നിർമാണം പൂർത്തിയാകുന്നതോടെ ആയിരത്തിലധികം തസ്തികകൾ സൃഷ്ടിക്കപ്പെടും. കേന്ദ്രത്തിന്‍റെ നടത്തിപ്പിനായുള്ള ഗവേണിംഗ് കൗൺസിൽ ഉൾപ്പെടെ രൂപവത്ക്കരിക്കുന്നതിനുള്ള കാര്യങ്ങൾ യോഗത്തിൽ ചർച്ചയായി. താളിയോലഗ്രന്ഥങ്ങൾ ഡിജിറ്റൈസ് ചെയ്യും ആയുർവേദവുമായി ബന്ധപ്പട്ട ഇരുനൂറോളം താളിയോല ഗ്രന്ഥങ്ങളും രണ്ടായിരത്തോളം കൈയെഴുത്ത് പ്രതികളും ലഭിച്ചതായും ഒന്നാംഘട്ടം പൂർത്തിയാകുന്നതോടെ ഇതൊക്കെ ഡിജിറ്റൈസ് ചെയ്യുമെന്നും ബന്ധപ്പെട്ടവർ യോഗത്തെ അറിയിച്ചു. രണ്ടാംഘട്ടത്തിൽ അന്താരാഷ്‌ട്ര ആയുർവേദ മ്യൂസിയം, അഡ്മിനിസ്‌ട്രേറ്റീവ് ബ്ലോക്ക്, ശാസ്ത്രജ്ഞന്മാർക്കും വിദ്യാർഥികൾക്കും ഉള്ള താമസ സൗകര്യം, ഹെർബൽ ഗാർഡൻ, ആയുർവേദവുമായി ബന്ധപ്പെടുത്തിയുള്ള ടൂറിസം സാധ്യതകൾ എന്നിവ പൂർത്തിയാക്കും. ഇതിനുള്ള പ്രവർത്തനങ്ങളും ആരംഭിച്ചതായും വിദേശത്തുനിന്നും സ്വദേശത്തുനിന്നും ആയുർവേദ ഗവേഷണവുമായി ബന്ധപ്പെട്ട എല്ലാ കാര്യങ്ങളും ശാസ്ത്രീയമായി അപഗ്രഥിക്കുന്നതിനുള്ള കേന്ദ്രമായി വളർത്തുമെന്നും ബന്ധപ്പെട്ടവർ പറഞ്ഞു. ആയുഷ് സ്‌പെഷൽ ഓഫീസർ ഡോ. രാജ് മോഹൻ, ഔഷധി എംഡി ഡോ. ഹൃദിക്ക്, മാനുസ്‌ക്രിപ്റ്റ് വിഭാഗം മേധാവി ഡോ.ആർ. സത്യജിത്ത്, പടിയൂർ ഗ്രാമപഞ്ചായത്ത് പ്രസിഡന്‍റ് ബി. ഷംസുദ്ദീൻ, കിറ്റ്‌കോ പ്രതിനിധികളായ ബൈജു ജോൺ, സി. അനൂപ് , കെ.എസ്. അമൽ തുടങ്ങിയവരും യോഗത്തിൽ സംബന്ധിച്ചു.

കുളിക്കുന്നതിനിടെ യുവാവ് മുങ്ങിമരിച്ചു

പയ്യന്നൂർ: കുളിക്കുന്നതിനിടയിൽ തൃക്കരിപ്പൂർ സ്വദേശിയായ യുവാവ് പയ്യന്നൂരിലെ കുളത്തിൽ മുങ്ങി മരിച്ചു. തൃക്കരിപ്പൂർ ബീരിച്ചേരി പള്ളത്തിലെ ആഷിക്ക് (27) ആണ് മരിച്ചത്. ഇന്നലെ വൈകുന്നേരം ആറേകാലോടെ കണ്ടോത്ത് ആയുർവേദ ആശുപത്രിക്ക് സമീപത്തെ ദേശീയപാതക്കരികിലെ കുളത്തിലാണ് സംഭവം. പെരുമ്പയിലെ സുഹൃത്തുക്കൾക്കൊപ്പം അഞ്ചേമുക്കാലോടെ കുളിക്കാനെത്തിയതായിരുന്നു ഇയാൾ. കൂട്ടുകാർക്കൊപ്പം നീന്തുന്നതിനിടയിൽ ആഷിക്ക് വെള്ളത്തിൽ മുങ്ങിപ്പോവുകയായിരുന്നു. വിവരമറിഞ്ഞ് നാട്ടുകാരും പോലീസും അഗ്നിരക്ഷാ സേനയുമെത്തി. ഇതോടെ ദേശീയപാതയിലെ ഗതാഗതവും സ്തംഭിച്ചു. ഏറെ സമയത്തെ തെരച്ചിലിനൊടുവിലാണ് വെള്ളം നിറഞ്ഞുകിടന്നിരുന്ന കുളത്തിനടിയിൽനിന്ന് ഫയർഫോഴ്സിന് ഇയാളെ മുങ്ങിയെടുക്കാനായത്. പയ്യന്നൂർ താലൂക്ക് ആശുപത്രിയിലെത്തിക്കുമ്പോഴേക്കും ആഷിക് മരിച്ചിരുന്നു. ബീരിച്ചേരി ഗേറ്റിന് സമീപത്തെ പ്രവാസി നീതി ഇലക്ട്രിക്കൽസിൽ ജോലി ചെയ്തുവരികയായിരുന്നു ആഷിക്. പരേതനായ എം.എ. ജാഫറിന്‍റേയും ബദറുന്നീസയുടേയും മകനാണ്. സഹോദരങ്ങൾ: അജാസ്, അനീസ.

വയോധികൻ മരിച്ച നിലയിൽവയോധികൻ മരിച്ച നിലയിൽ

തളിപ്പറമ്പ്: വയോധികനെ വീട്ടുവളപ്പിലെ കശുമാവില്‍ തൂങ്ങിമരിച്ചനിലയിൽ കണ്ടെത്തി. പന്നിയൂര്‍ കുരുമുളക് ഗവേഷണ കേന്ദ്രത്തില്‍ നിന്നും വിരമിച്ച മാവിച്ചേരിയിലെ പയ്യരട്ട പി. കൃഷ്ണനാണ് (73) മരിച്ചത്. ഭാര്യ: യശോദ. മക്കള്‍: സുഭാഷ്ബാബു (ഭാരത് ബ്രഡ്, തലശേരി), സുജീഷ് (ഷിയ ബ്രഡ്, കാഞ്ഞങ്ങാട്), സുമേഷ്. മരുമക്കള്‍: മായ, ഷിജിന. സഹോദരങ്ങള്‍: ശാന്ത, ജനാര്‍ദ്ദനന്‍, കുഞ്ഞിരാമന്‍, ഭാസ്‌ക്കരന്‍, യശോദ, അനിത.

വയറിംഗ് തൊഴിലാളി മരിച്ച നിലയിൽ

കണ്ണൂർ: തനിച്ചു താമസിക്കുന്ന വയറിംഗ് തൊഴിലാളിയെ വീട്ടുകിണറ്റിൽ മരിച്ച നിലയിൽ കണ്ടെത്തി. അഴീക്കോട് കണിശൻമുക്കിലെ പരേതരായ പി.സി. ഗോവിന്ദന്‍റെയും സൗദാമിനിയുടെയും മകൻ കാക്കരിക്കൽ വീട്ടിൽ നികേഷ് കെ. ബാലന്‍റെ (52) മൃതദേഹമാണ് ഇന്നലെ രാവിലെ വീട്ടുകിണറ്റിൽ കണ്ടെത്തിയത്. സഹോദരങ്ങൾ: മീറ, രമ, ഗീത, ജയ, ലത, നിഷ, നിത്യ.

കർഷകരുടെ സമരകൂട്ടായ്മ സംഘടിപ്പിച്ചു

ആലക്കോട്: കരിന്തളം-വയനാട് 400 കെവി വൈദ്യുത ലൈൻ കടന്നുപോകുമ്പോൾ ഭൂമിയും വിളകളും വീടും നഷ്ടപ്പെടുന്ന കർഷകരുടെ സമര കൂട്ടായ്മ സംഘടിപ്പിച്ചു. പാടിയോട്ടുചാലിൽ നടന്ന സമര കൂട്ടായ്മയിൽ ഭൂമി നഷ്ടപ്പെടുന്ന നൂറു കണക്കിന് ആളുകൾ പങ്കെടുത്തു. പടിയോട്ടുചാലിൽ നടന്ന സമര കൂട്ടായ്മ ആലക്കോട് മേഖലാ ആക്‌ഷൻ കമ്മിറ്റി കൺവീനർ ടോമി കുമ്പിടിയാമാക്കൽ ഉദ്ഘാടനം ചെയ്തു. സണ്ണി ജോസഫ് പൊൻപാറ അധ്യക്ഷത വഹിച്ചു. കെഎസ്ഇബി ഉദ്യോഗസ്ഥർ സാധാരണ കൃഷിക്കാരെ പറഞ്ഞു പറ്റിച്ച് ഭൂമിയുടെ കരം അടച്ച രസീതും സമ്മതപത്രവും വാങ്ങിയതിനു ശേഷം സെന്‍റിന് മൂന്ന് ലക്ഷം രൂപ വരെ വിലയുള്ള കൃഷിഭൂമിയിൽ ടവറിന്‍റെ പണി ആരംഭിച്ചതിനുശേഷം മാത്രമാണ് കൃഷിക്കാർ ചതി മനസിലാക്കിയതെന്ന് കർഷകർ പറയുന്നു. രണ്ടര സെന്‍റിന് 6000 രൂപയാണ് നഷ്ടപരിഹാരമായി പാടിച്ചാൽ പ്രദേശത്ത് കൃഷിക്കാർക്ക് കെഎസ്ഇബി നൽകിയത്. റോഡ് നിർമിക്കുന്നതിനും ടവർ സ്ഥാപിക്കുന്നതിനുമായി വിളകൾ മുറിച്ചുമാറ്റിയതിന് ഒരു രൂപ പോലും നഷ്ടപരിഹാരം നാളിതുവരെയായിട്ടും കൃഷിക്കാർക്ക് ലഭിച്ചിട്ടില്ലന്നും കർഷകർ പറയുന്നു. കർഷകന്‍റെ വിളകൾക്കും വീടിനും ഭൂമിക്കും അതതു പ്രദേശത്ത് നിലവിലുള്ള വില ലഭിക്കാതെ ഇനി ഭൂമിയിൽ കയറി ഒരുവിധ നിർമാണ പ്രവർത്തനവും അനുവദിക്കില്ലെന്നാണ് കർഷകരുടെ തീരുമാനം. ആലക്കോട് മേഖലയിലെ ആക്‌ഷൻ കമ്മിറ്റിയുമായി കൂട്ടായി ചേർന്ന് തുടർ സമരം നടത്താനും യോഗം തീരുമാനിച്ചു. ബെന്നി ഇടിയാംകുന്നേൽ, മാത്തുക്കുട്ടി, ഷാജി. ഉമ്മർ പൊയിൽ, ഒ.ജെ. ജോൺ, രാജേഷ് എന്നിവർ പ്രസംഗിച്ചു.

മാത്തിൽ ഗുരുദേവ് കോളജിൽ ഇൻഡക്ഷൻ പ്രോഗ്രാം നടത്തി

ചെറുപുഴ: മാത്തിൽ ഗുരുദേവ് ആർട്സ് ആൻഡ് സയൻസ് കോളജിൽ പുതിയ കേന്ദ്ര വിദ്യാഭ്യാസ നയത്തിന് അനുസൃതമായി നാല് വർഷത്തെ ബിരുദ പ്രോഗ്രാമുകൾക്ക് (എഫ്‌വൈയുജിപി) തുടക്കമായി. കോളജ് പ്രിൻസിപ്പൽ റവ. ഡോ. സാമുവൽ പുതുപ്പാടി പരിപാടി ഉദ്ഘാടനം ചെയ്തു. വിദ്യാർഥികളുടെ സർഗ ശേഷികളെ വളർത്തുന്ന കായിക മേഖലകൾക്ക് പ്രാധാന്യം കൊടുക്കുന്ന വിവിധ തൊഴിൽ മേഖലകളിലേക്ക് വിദ്യാർഥികളെ പ്രാപ്തമാക്കുന്ന സമഗ്ര വികസനമാണ് കോളജിന്‍റെ ലക്ഷ്യമെന്നു അദ്ദേഹം പറഞ്ഞു. 19ന് ഇവിടെ നടക്കുന്ന മെഗാ തൊഴിൽമേളയിൽ കേരളത്തിനകത്തും പുറത്തുമുള്ള പ്രമുഖ കമ്പനികൾ പങ്കെടുക്കും. കോളജ് കോർഡിനേറ്റർ എ. മൃദുല, കോളജ് വൈസ് പ്രിൻസിപ്പൽ പി. വിനോദ് കുമാർ, എഫ്‌വൈയുജിപി കോ-ഓർഡിനേറ്റർ കെ. സുമേഷ്, നാക് കോ-ഓർഡിനേറ്റർ പി.കെ. സിന്ധു എന്നിവർ പ്രസംഗിച്ചു.

ചന്ദനക്കാംപാറ യുപി സ്കൂൾ സുവർണ ജൂബിലി; സ്വാഗതസംഘം രൂപീകരിച്ചു

ചന്ദനക്കാംപാറ: ചെറുപുഷ്പ യുപി സ്കൂൾ സുവർണ ജൂബിലി ആഘോഷങ്ങളുടെ ഭാഗമായി സ്വാഗത സംഘം രൂപീകരണ യോഗം സ്കൂൾ ഓഡിറ്റോറിയത്തിൽ നടന്നു. സജീവ് ജോസഫ് എംഎൽഎ യോഗം ഉദ്ഘാടനം ചെയ്തു. പയ്യാവൂർ പഞ്ചായത്ത് പ്രസിഡന്‍റ് സാജു സേവ്യർ അധ്യക്ഷത വഹിച്ചു. സ്കൂൾ മുഖ്യാധ്യാപിക വിജി മാത്യു ആമുഖ പ്രഭാഷണവും സ്കൂൾ മാനേജർ ഫാ. ജോസഫ് ചാത്തനാട്ട് അനുഗ്രഹ പ്രഭാഷണവും നടത്തി. ഇരിക്കൂർ ബ്ലോക്ക് പഞ്ചായത്ത് മെംബർ പി.ആർ. രാഘവൻ, പയ്യാവൂർ പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർപേഴ്സൺ ഷീന ജോൺ, വാർഡ് മെംബർമാരായ സിന്ധു ബെന്നി, ജിത്തു തോമസ്, ഫാ. ജിൻസ് ചൊള്ളമ്പുഴ, പയ്യാവൂർ സർവീസ് സഹകരണ ബാങ്ക് പ്രസിഡന്‍റ് ടി.എം. ജോഷി, ജോർജ് അമ്പാട്ട്, ശിവദാസ്, കെ.വി. മുരളീധരൻ, ഹൈസ്കൂൾ മുഖ്യാധ്യാപിക മഞ്ജു ജയിംസ്, എൽപി സ്കൂൾ മുഖ്യാധ്യാപിക പി.എ. റെജീന, അനിൽ കൊച്ചുകൈപ്പേൽ, വി.ജെ. ജയിംസ്, തോമസ് മാത്യു, ജിൻസ് തോമസ്, ജിഷ പുളിയ്ക്കൽ, നിയോൺ ബിനോയി എന്നിവർ പ്രസംഗിച്ചു. ഒരു വർഷം നീണ്ടുനിൽക്കുന്ന ആഘോഷ പരിപാടികൾക്കായി വിവിധ കമ്മിറ്റികൾ രൂപീകരിച്ചു.

നഗരസഭാ ഓഫീസിന് മുന്നിൽ ധർണ നടത്തി

ശ്രീകണ്ഠപുരം: നഗരസഭാ പരിധിയിൽ എക്സ്പ്ലോസീവ് മാഗസിൻ സ്ഥാപിക്കാൻ അനുമതി നൽകാനുള്ള നീക്കം ഉപേക്ഷിക്കുക, ചെമ്പന്തൊട്ടി നായനാർമലയിൽ വീണ്ടും പുതിയ ക്വാറി തുടങ്ങാൻ എൻഒസി നൽകരുത് എന്നീ ആവശ്യങ്ങൾ ഉന്നയിച്ച് നായനാർമല ക്വാറി വിരുദ്ധ സമിതിയുടെ നേതൃത്വത്തിൽ ശ്രീകണ്ഠപുരം നഗരസഭാ ഓഫീസിന് മുന്നിൽ ധർണ നടത്തി. ചെമ്പന്തൊട്ടി സെന്‍റ് ജോർജ് ഹൈസ്കൂൾ മുൻ മുഖ്യാധ്യാപകൻ സോയി ജോസഫ് ഉദ്ഘാടനം ചെയ്തു. നായനാർമല ക്വാറി വിരുദ്ധ സമിതി ജനറൽ കൺവീനർ കെ.എം. ഷംസീർ അധ്യക്ഷത വഹിച്ചു. കെ.സി. ജയിംസ്, രാജു വയലിൽ, എൻ.വി. വർഗീസ്, ജോയി കൊച്ചുപുരയ്ക്കൽ, ജോസ് പാറയ്ക്കൽ, ഫിലോമിന കാരിമറ്റം, ജോയി നെയ്മണ്ണിൽ, വിനോദ് പുത്തൻപുര എന്നിവർ പ്രസംഗിച്ചു. ജഫി കാക്കല്ലിൽ, എം.വി. സജി, പി.ജെ. സെബാസ്റ്റ്യൻ, സണ്ണി കൊച്ചുപുരയ്ക്കൽ, കുഞ്ഞ് ചാലുങ്കൽ, ജോയി പനച്ചിക്കൽ എന്നിവർ നേതൃത്വം നൽകി. ഭരണപക്ഷ കൗൺസിലർമാർ വിയോജനക്കുറിപ്പെഴുതി ശ്രീകണ്ഠപുരം: നഗരസഭാ പരിധിയിൽ വെ‌ടിക്കോപ്പുകൾ സൂക്ഷിക്കാനുള്ള എക്സ്പ്ലോസീവ് മാഗസിൻ സ്ഥാപിക്കാൻ അനുമതി നൽകുന്നത് സംബന്ധിച്ച കൗൺസിൽ ചർച്ചയിൽ രണ്ട് സ്ഥിരം സമിതി അധ്യക്ഷൻമാരും രണ്ടു കൗൺസിലർമാരും ഉൾപ്പെടെ നാല് ഭരണപക്ഷ കൗൺസിലർമാർ വിയോജനക്കുറിപ്പ് രേഖപ്പെടുത്തി. ഇതോടെ ഭൂരിപക്ഷം നഷ്ടപ്പെട്ട ഭരണപക്ഷം പ്രതിപക്ഷ കൗൺസിലർമാരുടെ പിന്തുണയോടെയാണ് അജണ്ട പാസാക്കിയത്. ജനവികാരം മാനിച്ച് തീരുമാനം നടപ്പാക്കരുതെന്ന് വിയോജനക്കുറിപ്പെഴുതിയ കൗൺസിലർമാർ ആവശ്യപ്പെട്ടു. പരിസരവാസികളുടെ പരാതി പോലും പരിഗണിക്കാതെയാണ് അജണ്ട പാസാക്കിയത്. ഇതിനെതിരെ തുടർപ്രക്ഷോഭം നടത്താനുള്ള ഒരുക്കത്തിലാണ് നായനാർമല ക്വാറി വിരുദ്ധ സമിതി. തെറ്റിദ്ധാരണ പരത്തുന്നു: ഭരണസമിതി ശ്രീകണ്ഠപുരം: വാസ്തവവിരുദ്ധമായ കാര്യങ്ങൾ പറഞ്ഞുപരത്തി ചിലയാളുകൾ നഗരസഭയിലെ ജനങ്ങളെ തെറ്റിദ്ധരിപ്പിക്കുന്നുവെന്ന് നഗരസഭാ ഭരണസമിതി വർത്താക്കുറിപ്പിൽ അറിയിച്ചു. ഇന്നലെ രണ്ടു കൗൺസിലർമാരുടെ നേതൃത്വത്തിൽ കുറച്ചുപേർ നഗരസഭയുടെ മുന്നിൽ സമരത്തിന് എത്തിയിരുന്നു. ആറാം വാർഡ് കംബ്ലാരിയിൽ നിയമപരമായി തുടങ്ങാനുള്ള എക്സ്പ്ലോസീവ് മാഗസിനെ ചൊല്ലിയാണ് കുറച്ചുനാളായി വിവാദങ്ങൾ ഉയരുന്നത്. ഉപസമിതിയുടെ പരിശോധനയുടെ അടിസ്ഥാനത്തിൽ മാനദണ്ഡങ്ങൾ പാലിച്ചും നിയമം പൂർണമായി അനുസരിച്ചുമാണ് കംബ്ലാരിയിലെ ആളൊഴിഞ്ഞ സ്ഥലത്ത് അനുമതി കൊടുക്കാമെന്നു റിപ്പോർട്ടിൽ പറഞ്ഞിട്ടുള്ളത്. രണ്ടുമാസം മുന്പ് നിയോഗിച്ച ഉപസമിതിയുടെ റിപ്പോർട്ട്‌ ഇന്നലെ കൂടിയ കൗൺസിൽ യോഗം അംഗീകരിച്ചു. സ്ഥിരം സമിതി അധ്യക്ഷരായ വി.പി. നസീമ, പി.പി. ചന്ദ്രാംഗദൻ, വാർഡ് കൗൺസിലർമാരായ, ടി.ആർ. നാരായണൻ, വിജിൽ മോഹൻ, നഗരസഭ സെക്രട്ടറി, ക്‌ളീൻ സിറ്റി മാനേജർ പി. മോഹനൻ, ജൂണിയർ ഹെൽത്ത് ഇൻസ്പെക്ടർ പി.വി. സതീഷ് തുടങ്ങിയവർ ഉൾപ്പെട്ടതായിരുന്നു ഉപസമിതി. ‌ രണ്ട് കൗൺസിലർമാർ ജനങ്ങളെ തെറ്റിദ്ധരിപ്പിച്ചുകൊണ്ട് വിയോജനക്കുറിപ്പ് എഴുതിയിട്ടുള്ളതായും ഭരണസമിതി അറിയിച്ചു.

യുവജന ദിനാഘോഷം സംഘടിപ്പിച്ചു

കേളകം: കെസിവൈഎം വെള്ളൂന്നി യൂണിറ്റിന്‍റെ നേതൃത്വത്തിൽ വെള്ളൂന്നി പ്രൊവിഡൻസ് പള്ളിയിൽ യുവജനദിനാഘോഷം സംഘടിപ്പിച്ചു. കെസിവൈഎം മാനന്തവാടി രൂപത ഡയറക്ടർ ഫാ. സാന്‍റോ അമ്പലത്തറ പരിപാടി ഉദ്ഘാടനം ചെയ്തു. യൂണിറ്റ് പ്രസിഡന്‍റ് മാർട്ടിൻ കൊല്ലംപറമ്പിൽ അധ്യക്ഷ വഹിച്ചു. യൂണിറ്റ് ഡയറക്ടർ ഫാ. ടോമി പുത്തൻപുരയ്ക്കൽ ആമുഖ പ്രഭാഷണം നടത്തി. ആനിമേറ്റർ സിസ്റ്റർ എൽസി എസ്എച്ച്, രൂപത ജനറൽ സെക്രട്ടറി വിമൽ കൊച്ചുപുരയ്ക്കൽ, ട്രസ്റ്റി ഷാജി കാക്കരമറ്റത്തിൽ, എൽവിൻ കുന്നുംപുറത്ത് തുടങ്ങിയവർ പ്രസംഗിച്ചു. മാനന്തവാടി രൂപത സംഘടിപ്പിച്ച ഗ്രീൻ ഫ്യുച്ചർ പരിസ്ഥിതി വാരാചരണത്തിൽ വെള്ളൂന്നി യൂണിറ്റ് മാനന്തവാടി രൂപതയിലെ മികച്ച യൂണിറ്റ് ആയി തെരഞ്ഞെടുക്കപ്പെട്ടു. ആഘോഷ പരിപാടികൾക്ക് മേഖല സിൻഡിക്കേറ്റ് അംഗം ആൻലിനറ്റ് നമ്പിക്കുന്നേൽ, യൂണിറ്റ് ട്രഷർ ജെമിൽ ഓലിക്കൽ, യൂണിറ്റ് അംഗം അബിൻ തേമാംകുഴി, ജോയിന്‍റ് സെക്രട്ടറി ഡിയ കൊച്ചുപുരയ്ക്കൽ, കോ-ഓർഡിനേറ്റർ ആഞ്ജലീന നമ്പിക്കുന്നേൽ, യൂണിറ്റ് സെക്രട്ടറി ആൻമരിയ പനച്ചിക്കൽ, ട്രസ്റ്റി സിജു വട്ടുകുളത്തിൽ തുടങ്ങിയവർ പ്രസംഗിച്ചു.

കൂട്ടുമുഖം താഴെ പാലം നാടിന് സമർപ്പിച്ചു

കണ്ണൂർ: വികസനം ഗ്രാമങ്ങളിൽ നിന്ന് തുടങ്ങണമെന്നും ഗ്രാമങ്ങൾ വികസിക്കുമ്പോൾ മാത്രമാണ് രാജ്യം വികസിക്കുന്നതെന്നും ഡോ. ജോൺ ബ്രിട്ടാസ് എംപി. കൂട്ടുമുഖം താഴെ പാലം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ശ്രീകണ്ഠപുരം നഗരസഭാ വാർഡ് കൗൺസിലർ വി.വി. ജമുന അധ്യക്ഷത വഹിച്ചു. രാജ്യസഭ എംപിയായ ഡോ. ജോൺ ബ്രിട്ടാസിന്‍റെ 2022-23 വർഷത്തെ പ്രാദേശിക വികസന ഫണ്ടിൽ നിന്ന് 20 ലക്ഷം രൂപ ചെലവഴിച്ചാണ് പാലത്തിന്‍റെ പണി പൂർത്തീകരിച്ചത്. കൂട്ടുമുഖത്തു നിന്നും കോളേരി വയൽ, കൊയിലി എന്നിവിടങ്ങളിലേക്ക് ഏറ്റവും വേഗത്തിലെത്താനാവുന്ന റോഡാണിത്. പാലത്തിന്‍റെ നിർമാണം പൂർത്തിയായതോടെ പ്രദേശത്തെ 150 ഓളം വീട്ടുകാരുടെ യാത്രാദുരിതം അവസാനിച്ചു. പാലത്തിനോട് ചേർന്നുള്ള 150 മീറ്റർ അപ്പ്രോച്ച് റോഡ് ടാർ ചെയ്യുന്നതിനായി ഫണ്ട് അനുവദിക്കുന്നതിനായി പ്രദേശവാസികൾ എംപി ക്ക് നിവേദനം നൽകി. പാലത്തിന്‍റെ നിർമാണ പ്രവൃത്തികൾ ദ്രുതഗതിയിൽ പൂർത്തിയാക്കിയ കോൺട്രാക്ടർ ഹംസക്കുട്ടിക്കും പാലം നിർമാണത്തിനായി നഗരസഭയ്ക്ക് സ്ഥലം വിട്ടുനൽകിയ മുഹമ്മദ് കുഞ്ഞിക്കും എംപി ഉപഹാരം നല്കി. വാർഡ് മെംബർമാരായ വിജിൽ മോഹനൻ, കെ.ഒ. പ്രദീപൻ, വി.സി. രവീന്ദ്രൻ, പി. മീന, ഇ.വി. തങ്കമണി, കെ. ഷൈജു, വിവിധ പാർട്ടി പ്രതിനിധികൾ എന്നിവർ പ്രസംഗിച്ചു.

നിർമാണത്തിലിരിക്കെ വീടിന്‍റെ സൺഷേഡ് തകർന്നു; രണ്ടു പേർക്ക് പരിക്ക്

കൂത്തുപറമ്പ്: മൂര്യാട് നിർമാണത്തിലിരിക്കുന്ന വീടിന്‍റെ സൺഷേഡ് തകർന്ന് കൊൽക്കൊത്ത സ്വദേശികളായ രണ്ടു തൊഴിലാളികൾക്ക് പരിക്ക്. വീടിന്‍റെ കോൺക്രീറ്റ് നടത്തുന്നതിനിടെ രണ്ടാം നിലയുടെ സൺ ഷേഡ് തകർന്നാണ് അപകടമുണ്ടായത്. ഇന്നലെ രാവിലെ 11.30 യോടെയായിരുന്നു സംഭവം. മൂര്യാട് സെൻട്രൽ യുപി സ്കൂളിന് സമീപത്തെ പി. ഷമീറിന്‍റെ ഇരുനില വീടിന്‍റെ സൺ ഷേഡാണ് തകർന്നത്. സൺ ഷേഡിലുണ്ടായിരുന്ന രണ്ട് തൊഴിലാളികൾ താഴെ വീഴുകയായിരുന്നു. സംഭവം കണ്ട് ഓടിമാറിയതിനാൽ മറ്റു തൊഴിലാളിലാളികൾ പരിക്കേൽക്കാതെ രക്ഷപ്പെട്ടു. കാലിന് സാരമായി പരിക്കേറ്റ തൊഴിലാളിയെ കണ്ണൂരിലെ സ്വകാര്യ ആശുപത്രിയിൽ പ്രവേശിപ്പിച്ചു.

തദ്ദേശ തെരഞ്ഞെടുപ്പിൽ ചരിത്ര വിജയത്തിനായി പ്രവർത്തിക്കണം: സണ്ണി ജോസഫ്

കണ്ണൂര്‍: തദ്ദേശ തെരഞ്ഞെടുപ്പില്‍ ചരിത്ര വിജയം നേടാനുള്ള പ്രവർത്തനങ്ങൾക്കാണ് ഇനിയുള്ള ദിവസങ്ങൾ വിനിയോഗിക്കേണ്ടതെന്ന് കെപിസിസി പ്രസിഡന്‍റ് സണ്ണി ജോസഫ് എംഎല്‍എ. കേന്ദ്ര സംസ്ഥാന സര്‍ക്കാരുകളുടെ ജനദ്രോഹ നയങ്ങള്‍ക്കെതിരായി കെപിസിസി ആഹ്വാന പ്രകാരമുള്ള സമരസംഗമം കണ്ണൂര്‍ നവനീതം ഓഡിറ്റോറിയത്തില്‍ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. വോട്ടര്‍ പട്ടിക പ്രസിദ്ധീകരിക്കുന്ന കാര്യത്തില്‍ പോലും തെരഞ്ഞെടുപ്പ് കമ്മീഷന്‍ അനാവശ്യമായ നീട്ടികൊണ്ട് പോകല്‍ നടത്തുകയാണ്. ഈ മാസം 21 ന് വോട്ടര്‍പട്ടിക പ്രസിദ്ധീകരിക്കുമെന്നാണ് പറയുന്നത്. വോട്ടര്‍പട്ടിക പ്രസിദ്ധീകരിച്ച് കഴിഞ്ഞാല്‍ തള്ളേണ്ടവരെ തള്ളിക്കാനും ചേര്‍ക്കാനുള്ളവരെ ചേര്‍ക്കാ നും പ്രവര്‍ത്തകര്‍ ജാഗരൂകരാകണമെന്നും സണ്ണി ജോസഫ് എംഎല്‍എ പറഞ്ഞു. ഡിസിസി പ്രസിഡന്‍റ് മാര്‍ട്ടിന്‍ ജോര്‍ജ് അധ്യക്ഷത വഹിച്ചു. യുഡിഎഫ് കണ്‍വീനര്‍ അടൂര്‍ പ്രകാശ്, കെപിസിസി വര്‍ക്കിംഗ് പ്രസിഡന്‍റുമാരായ എ.പി. അനില്‍കു മാര്‍ എംഎല്‍എ, ഷാഫി പറമ്പില്‍ എംപി , രാജ്മോഹന്‍ ഉണ്ണിത്താന്‍ എംപി എന്നിവർ പ്രസംഗിച്ചു. സജിവ് ജോസഫ് എംഎല്‍എ, പി.എം. നിയാസ്, സോണി സെബാസ്റ്റ്യന്‍, പ്രഫ. എ.ഡി. മുസ്തഫ, വി.എ. നാരായണന്‍, സജീവ് മാറോളി, ചന്ദ്രൻ തില്ലങ്കേരി, ടി.ഒ. മോഹനൻ തുടങ്ങിയവർ പങ്കെടുത്തു, ഡിവൈഎഫ്ഐ- എസ്എഫ്ഐ സമരാഭാസം സർക്കാരിന്‍റെ വീഴ്ച മറച്ചുവയ്ക്കാൻ: അടൂർ പ്രകാശ് ആരോഗ്യമേഖലയിലെ വീഴ്ച മറച്ചു വയ്ക്കാനാണ് ഡിവൈഎഫ്‌ഐയും എസ്എഫ്ഐയും കേരളത്തില്‍ സമരാഭാസം നടത്തുന്നതെന്ന് യുഡിഎഫ് കൺവീനർ അടൂര്‍ പ്രകാശ് പറഞ്ഞു. സമര സംഗമത്തിൽ പ്രസംഗിക്കുകയായിരുന്നു അദ്ദേഹം. എല്ലാ മേഖലയിലും കേരളം നമ്പര്‍ വണ്‍ എന്നാണ് പിആര്‍ വര്‍ക്കിലൂടെ അവകാശപ്പെടുന്നത്. എന്നാല്‍ കേരളത്തില്‍ അടുത്തകാലത്തുണ്ടായ ഒട്ടേറെ സംഭവങ്ങള്‍ വെളിവാക്കുന്നത് ഈ അവകാശ വാദം വെറും പൊള്ളയാണെന്നാണ്. വരുന്ന തദ്ദേശ തെരഞ്ഞെത്തെടുപ്പിലും നിയമസഭാ തെരഞ്ഞെടുപ്പിലും ഒറ്റക്കെട്ടായി നിന്നാല്‍ യുഡി എഫിന് ഭരണം ലഭിക്കുമെന്ന കാര്യത്തില്‍ സംശയമില്ല. ഇനിയുള്ള കാലയളവില്‍ നേതാക്കളും പ്രവര്‍ത്തകരും അതിനായി ഒത്തൊരുമിച്ച് പ്രവര്‍ത്തിക്കണമെന്നും അടൂര്‍ പ്രകാശ് ആവശ്യപ്പെട്ടു.

കാറ്റിൽ കടയുടെ ഷീറ്റ് വീണ് ഓട്ടോറിക്ഷയുടെ മുൻഭാഗം തകർന്നു

മാഹി: മഴയോടൊപ്പമുണ്ടായ ശക്തമായ കാറ്റിൽ കടയുടെ ഷീറ്റ് വീണ് ഓട്ടോയുടെ മുകൾ ഭാഗം തകർന്നു. ഇന്നലെ വൈകുന്നേരമാണ് സംഭവം. മാഹി പാറക്കലിലെ മത്സ്യമാർക്കറ്റിന് സമീപത്തെ രാജ് എന്‍റർപ്രൈസസ് കടയുടെ മുകളിൽ പാകിയ ഷീറ്റ് പാറി നൂറ് മീറ്റർ ദൂരത്തിൽ ബീച്ച് റോഡിൽ നിന്ന് യാത്രക്കാരുമായി മെയിൻ റോഡിലേക്ക് പ്രവേശിക്കുകയായിരുന്ന ഓട്ടോയുടെ മുകളിൽ പതിക്കുകയായിരുന്നു. യാത്രക്കാരും, ഡ്രൈവറും പരിക്കേല്ക്കാതെ രക്ഷപ്പെട്ടു.മാഹി പാറക്കലിലെ വിനോദിന്‍റെ ഉടമസ്ഥതയിലുള്ളതാണ് ഓട്ടോ.ഷീറ്റ് വീണ് ഓട്ടോയുടെ മുൻഭാഗം പാടെ തകർന്നു. മുപ്പതിനായിരം രൂപയുടെ നഷ്ടമുണ്ടായി. മാഹി പോലീസ് സംഭവസ്ഥലത്തെത്തി നടപടി സ്വീകരിച്ചു.

എസിയിൽനിന്ന് തീ പടർന്ന് വീടിന്‍റെ കിടപ്പുമുറി കത്തിനശിച്ചു

ഇരിട്ടി: ആറളം കൂട്ടക്കളത്ത് തേക്കുമല കുര്യാച്ചന്‍റെ വീട്ടിന് തീ പിടിച്ചു. കിടപ്പു മുറിയിലെ എസിയിൽ നിന്നാണ് തീ പടർന്നത്. ഇന്നലെ വൈകുന്നേരം 5.30 ഓടെയാണ് തീ പിടിച്ചത്. ഇരിട്ടിയിൽ നിന്ന് രണ്ട് യൂണിറ്റ് ഫയർ ഫോഴ്സ് സംഘം എത്തി ഏറെ നേരത്തെ പരിശ്രമത്തിന് ശേഷമാണ് തീ അണച്ചത്. വീട്ടിലെ വസ്ത്രങ്ങൾ ഉൾപ്പെടെ കത്തി നശിച്ചു. അസിസ്റ്റന്‍റ് സ്റ്റേഷൻ ഗ്രേഡ് ഓഫീസർ എൻ.ജി. അശോകൻ,സീനിയർ ഫയർ ആൻഡ് റെസ്ക്യൂ ഓഫീസർ കെ. ഷിജു, ഫയർ ആൻഡ് റെസ്ക്യൂ ഓഫീസർ ഡ്രൈവർമാരായ പി.ജെ. മത്തായി, എൻ.ജെ. അനു, ഫയർ ആൻഡ് റെസ്ക്യൂ ഓഫീസർമാരായ അനീഷ് മാത്യു, അരുൺകുമാർ, കെ.എം. അനീഷ്, വി.പി. ബിനോയ്, എസ്. ശ്രീജിത്ത്, കെ.ബി. ഉന്മേഷ്, ഡോളമി മുണ്ടാനൂർ എന്നിവരും സംഘത്തിൽ ഉണ്ടായിരുന്നു.

സ്നേഹവീടിന്‍റെ താക്കോൽ കൈമാറി

എടൂർ: എടൂർ സെന്‍റ് മേരീസ് ഫൊറോന ആർക്കി എപ്പി‌സ്കോപ്പൽ മരിയൻ തീർഥാടന കേന്ദ്രം കൂട്ടായ്‌മ ഒരുക്കിയ സ്‌നേഹവീടിന്‍റെ താക്കോൽ കൈമാറ്റവും വെഞ്ചിരിപ്പും ഇടവക വികാരി ഫാ. തോമസ് വടക്കേമുറിയിൽ നിർവഹിച്ചു. എടൂരിൽ ഇടവകയിൽ നിന്ന് അഞ്ചു വർഷത്തിനുള്ളിൽ നിർമിച്ച് നൽകുന്ന 18-ാമത്തെ വീടാണിത്. പേരു വെളിപ്പെടുത്താൻ ആഗ്രഹിക്കാത്ത ഒരു ഇടവകാംഗമാണ് വീടിന് ആവശ്യമായ ധനസഹായത്തിൽ അധികഭാഗവും നൽകിയത്. ഒന്പത് ലക്ഷം രൂപ ചെലവിൽ വീടിന്‍റെ എല്ലാ പ്രവൃത്തിയും പൂർത്തിയാക്കിയാണ് താക്കോൽ കൈമാറിയത്. അസിസ്റ്റന്‍റ് വികാരി ഫാ. അഭിലാഷ് ചെല്ലങ്കോട്ട്, ഇടവക കോ-ഓർഡിനേറ്റർ സി.ജെ. ജോസഫ്, ഭവന നിർമാണ കമ്മിറ്റി അംഗങ്ങളായ പി.വി. ജോസഫ് പാരിക്കാപ്പള്ളി, ജോസഫ് വേകത്താനം, ബോബി ഓടയ്ക്കൽ, കൈക്കാരൻമാരായ മാത്യുസ് കൂട്ടിയാനി, ഔസേപ്പച്ചൻ പാംപ്ലാനി, മാത്യു ഒരപ്പാംകുഴി, ബിജു കുന്നുംപുറം, വാർഡ് പ്രതിനിധികളായ ബെന്നി കൊച്ചുമല, ജോസഫ് കൊച്ചുപറമ്പിൽ എന്നിവർ പ്രവർത്തനങ്ങൾക്കു നേതൃത്വം നൽകി. വീടിന്‍റെ നിർമാണം ഭംഗിയായി നിർവഹിച്ച നിഷാദ് സെബാസ്‌റ്റ്യൻ തോണക്കരയെ അഭിനന്ദിച്ചു.

ആദരവ് -2025 സംഘടിപ്പിച്ചു

ഉളിക്കൽ: മണിക്കടവ് ജീവൻ സ്വാശ്രയ സംഘത്തിന്‍റെ ആഭിമുഖ്യത്തിൽ "ആദരവ് -2025" പരിപാടി സംഘടിപ്പിച്ചു. പാലാക്കുഴി ഓഡിറ്റോറിയത്തിൽ നടന്ന ആദരവ് ചടങ്ങ് മണിക്കടവ് ഫൊറോന വികാരി ഫാ. പയസ് പടിഞ്ഞാറേമുറിയിൽ ഉദ്ഘാടനം ചെയ്തു. സംഘം പ്രസിഡന്‍റ് ജോജി വർഗീസ് അധ്യക്ഷത വഹിച്ചു. ചടങ്ങിൽ സാഹിത്യകാരൻ പി.എം. ജോൺ പരക്കാട്ടിനെയും ദീർഘകാലമായി സൺ‌ഡേ സ്കൂൾ അധ്യാപകനും സാമൂഹ്യ പ്രവർത്തകനുമായ 85 വയസ് പൂർത്തിയാക്കിയ മാത്യു വെടികുന്നേലിനെയും എസ്എസ്എൽസി, പ്ലസ്ടു പരീക്ഷകളിൽ ഉന്നത വിജയം നേടിയ അംഗങ്ങളുടെ മക്കളെയും മിമിക്രിയിൽ ജില്ലാ തലത്തിൽ എ ഗ്രേഡും നേടിയ അലക്സ്‌ ബിജു പരക്കാട്ടിനേയും ആദരിച്ചു. ഉളിക്കൽ പഞ്ചായത്ത്‌ വികസന സ്റ്റാൻഡിംഗ് കമ്മിറ്റി ചെയർമാൻ ഒ.വി. ഷാജു, പഞ്ചായത്ത്‌അംഗം ജാൻസി കുന്നേൽ, പ്രസാദ് തോമസ്, അബിയ തോമസ് സാബു, ബിജു കുന്നിന്, ഹെയിൻ ടെസാ ലെസ്‌ലി, സംഘം സെക്രട്ടറി ലെസ്‌ലി ജോസ്, ജോയിന്‍റ് സെക്രട്ടറി സാബു ജോർജ് എന്നിവർ പ്രസംഗിച്ചു. തുടർന്ന് കുട്ടികളുടെ കലാപരിപാടികളും അരങ്ങേറി. ഉന്നത വിജയികൾക്ക് കാഷ് അവാർഡും പി.എം. ജോൺ പരക്കാട്ടിന്‍റെ " മണിക്കടവും സപ്ത സഹോദരിമാരും" എന്ന പുസ്തകവും നൽകി. അൽഫോൻസ ജോസ് ആനത്താറക്കൽ, ആബേൽ തോമസ്, സാബു ചിറ്റംക്കുഴിയിൽ, ജൂവൽ മരിയ ടോം കുടിയിരുപ്പിൽ, ഇവാൻ ജോൺ പ്രസാദ് ഇലവുങ്കചാലിൽ, അലക്സ്‌ ബിജു പരക്കാട്ട് തുടങ്ങിയവർ നേതൃത്വം നൽകി.

കോളിത്തട്ടിൽ കാട്ടാന കൃഷി നശിപ്പിച്ചു

ഉളിക്കൽ: കോളിത്തട്ട് രണ്ടാംകൈയിൽ ജനവാസ കേന്ദ്രത്തിൽ കാട്ടാന കൃഷി നശിപ്പിച്ചു. കാഞ്ഞിരത്തിൽ ദാസൻ, പുതുശേരി ചന്ദ്രൻകുട്ടി എന്നിവരുടെ വീട്ടുമുറ്റം വരെ എത്തിയാണ് കൃഷി നശിപ്പിച്ചത്. കർണാടക വനത്തിൽ നിന്നുള്ള ആനകളാണ് ജനവാസ കേന്ദ്രത്തിൽ ഇറങ്ങുന്നത്. വാഴ, തെങ്ങ്, കവുങ്ങ് തുടങ്ങിയ കൃഷികൾ കാട്ടാന നശിപ്പിച്ചു. കഴിഞ്ഞ ഒരാഴ്ചയിൽ അധികമായി കാട്ടാനകൾ മേഖലയിൽ വ്യാപകമായി കൃഷി നശിപ്പിക്കുകയാണ്. സെക്‌ഷൻ ഫോറസ്‌റ്റ് ഓഫീസർ എ.കെ. ബാലൻ, ബീറ്റ് ഫോറസ്‌റ്റ് ഓഫിസമാരായ കെ.പി. മുകേഷ്, മിഥുൻ, ആർ.കെ. രതീഷ്, സിനു കിനാത്തി തുടങ്ങിയവർ സ്‌ഥലം സന്ദർശിച്ചു.

കാരുണ്യസ്പർശം അവാർഡ് സമ്മാനിച്ചു

കരുവഞ്ചാൽ: ജോർജ് അർത്തനാകുന്നേലിന്‍റെ സ്മരണയ്ക്കായി ബി പോസിറ്റീവ് ട്രസ്റ്റ് നൽകുന്ന കാരുണ്യ സ്പർശം അവാർഡ് ഫാ. ജോസഫ് ഈനാച്ചേരിയിൽനിന്ന് കരുവഞ്ചാൽ ആശാഭവൻ സ്‌പെഷൽ സ്കൂൾ പ്രിൻസിപ്പൽ സിസ്റ്റർ മെർലിൻ ഏറ്റുവാങ്ങി. കാൽ ലക്ഷം രൂപയും പ്രശംസാഫലകവും അടങ്ങുന്ന അവാർഡ് ജീവകാരുണ്യ പ്രവർത്തനങ്ങളുടെ പ്രോത്സാഹനമായാണ് നൽകുന്നത്. ആശാഭവൻ ഓഡിറ്റോറിയത്തിൽ നടന്ന ചടങ്ങിൽ സ്‌പെഷൽ സ്കൂളിലെ കുട്ടികളും പരിശീലകരും ബി പോസിറ്റീവ് അംഗങ്ങളും ജോർജിന്‍റെ കുടുംബാംഗങ്ങളും പങ്കെടുത്തു. ജോർജ് അർത്തനാകുന്നേലിന്‍റെ ജീവകാരുണ്യപ്രവർത്തനങ്ങളുടെ വിവിധ മേഖലകൾ ചടങ്ങിൽ പങ്കെടുത്തവർ പങ്കുവച്ചു. കഷ്ടത അനുഭവിക്കുന്നവർക്കും രോഗികൾക്കും പകലും രാത്രിയും ജോർജ് സമീപസ്ഥനായിരുന്നു. വീടില്ലാത്തവർക്ക് വീട് വച്ചു കൊടുക്കാനും കിടപ്പുരോഗികൾക്ക് ആവശ്യമായ ഉപകരണങ്ങൾ എത്തിച്ചു കൊടുക്കാനും നിർധനരെ സ്വന്തം വാഹനത്തിൽ ആശുപത്രിയിൽ എത്തിക്കാനും ഓടി നടന്ന അദ്ദേഹതത്തിന്‍റെ വിയോഗം സമൂഹത്തിനു വലിയ നഷ്ടമാണെന്ന് യോഗം വിലയിരുത്തി. കേന്ദ്ര കാർഷികഗവേഷണ കേന്ദ്രം മുൻ പ്രിൻസിപ്പൽ ഡോ. ജോസ് ചെറുക്കാവിൽ ഉദ്ഘാടനം ചെയ്തു. ചടങ്ങിൽ ബി പോസിറ്റീവ് ട്രസ്റ്റ് ഡയറക്ടർ ജോസ് വീണപ്ലാക്കൽ അധ്യക്ഷത വഹിച്ചു. ട്രസ്റ്റ് സെക്രട്ടറി സിബി പഴുവൻകാല സ്വാഗതവും ട്രസ്റ്റ് കോ -ഓർഡിനേറ്റർ റോയിച്ചൻ ഓലിക്കൽ പള്ളത്ത് നന്ദിയും പറഞ്ഞു. ആശാഭവൻ സ്പെഷൽ സ്കൂളിലെ കുട്ടികളുടെ വിവിധ കലാപരിപാടികളും ഉണ്ടായിരുന്നു.

റെയ്ഡിനെത്തിയ എക്സൈസ് സംഘത്തെ ആക്രമിച്ചു; ഇൻസ്പെക്ടർക്ക് പരിക്ക്

ആലക്കോട്: വെള്ളാട് ഫർലോംഗ്കര അംബേദ്കർ ഉന്നതിയിൽവച്ച് ചാരായവും വാഷുമായി പിടിയിലായ ആളെ എക്സൈസ് സംഘത്തെ ആക്രമിച്ച് മോചിപ്പിക്കാൻ ശ്രമം. പത്തംഗസംഘം നടത്തിയ ആക്രമണത്തിൽ എക്സൈസ് ഇൻസ്പെക്ടർ സി.എച്ച്. നസീബിന് പരിക്കേറ്റു. ഞായറാഴ്ച രാത്രിയായിരുന്നു സംഭവം. ഉന്നതി കേന്ദ്രീകരിച്ച് ചാരായവാറ്റും വില്പനയും നടക്കുന്നുണ്ടെന്ന രഹസ്യ വിവരത്തെ തുടർന്നായിരുന്നു ആലക്കോട് എക്സൈസ് സംഘം ഉന്നതിയിലെത്തിയത്. എക്സൈസ് സംഘം എത്തിയതിനു പിന്നാലെ കാറിൽ മൂന്നര ലിറ്റർ ചാരായവും പത്തു ലിറ്റർ വാഷുമായി കടന്നുകളയാനുള്ള ശ്രമത്തിനിടെ ഇവിടുത്തെ താമസക്കാരനായ പി. ബിജേഷിനെ കസ്റ്റഡിയിലെടുത്തിരുന്നു. ഇയാളെ എക്സൈസ് ഓഫീസിലേക്ക് കൊണ്ടുപോകാനിരിക്കെ മനു, സേതു, സി.കെ. രഞ്ജിത്ത്, മഹേഷ് എന്നിവരുടെ നേതൃത്വത്തിൽ കണ്ടാലറിയാവുന്ന പത്തംഗസംഘം എക്സൈസ് ഉദ്യോഗസ്ഥരെ തടയുകയും പ്രതിയെ മോചിപ്പിക്കാൻ ശ്രമിക്കുകയുമായിരുന്നു. ഇത് പ്രതിരോധിക്കുന്നതിനിടെയാണ് ഇൻസ്പെക്ടർ നസീബിനെ ആക്രമിച്ചത്. നസീബിന്‍റെ കാലിനാണ് പരിക്ക്. വിവരമറിഞ്ഞ് ആലക്കോട് പോലീസ് എത്തിയാണ് എക്സൈസ് സംഘത്തെ അക്രമികളിൽനിന്നു രക്ഷിച്ചത്. പോലീസെത്തിയതോടെ അക്രമിസംഘം രക്ഷപ്പെടുകയായിരുന്നു. പ്രതികൾക്കായി പോലീസും എക്സൈസും തെരച്ചിൽ നടത്തിയെങ്കിലും കണ്ടെത്താനായില്ല. ചാരായവും വാറ്റുമായി അറസ്റ്റിലായ പ്രതിയെ കോടതി റിമാൻഡ് ചെയ്തു. എക്സൈസ് ഇൻസ്പെക്ടർ സി.എച്ച്. നസീബിന്‍റെ പരാതിയിൽ പോലീസ് കേസെടുത്തു. കസ്റ്റഡിയിലുള്ള പ്രതിയെ മോചിപ്പിക്കാൻ ശ്രമിച്ചതിനും ഉദ്യോഗസ്ഥരുടെ കൃത്യനിർവഹണം തടഞ്ഞ് ആക്രമിച്ചതിനുമാണ് കേസ് രജിസ്റ്റർ ചെയ്തിരിക്കുന്നത്. അസിസ്റ്റന്‍റ് എക്സൈസ് ഇൻസ്പെക്ടർ കെ. അഹമ്മദ്, വി.വി. ബിജു, പ്രിവന്‍റീവ് ഓഫീസർ സി. പ്രദീപ് കുമാർ, സിവിൽ ഓഫീസർമാരായ വി. ധനേഷ്, വി. ശ്രീജിത്ത്, റിജിൽ കുമാർ, കെ.പി. വിനീത, എം. മുനീറ എന്നിവരായിരുന്നു എക്സൈസ് സംഘത്തിലുണ്ടായിരുന്നത്.

അടിച്ചു മോനേ...തൃക്കരിപ്പൂരിൽ ഭാഗ്യധാരയുടെ ഒരു കോടി

തൃക്കരിപ്പൂർ: സംസ്ഥാന ഭാഗ്യക്കുറിയുടെ തിങ്കളാഴ്ച നറുക്കെടുത്ത ഭാഗ്യധാരയുടെ ഒരു കോടി രൂപയുടെ ഒന്നാം സമ്മാനം തൃക്ക രിപ്പൂർ ടൗണിലെ മത്‌സ്യ മാർക്കറ്റിന് സമീപത്തെ സൗഭാഗ്യ ലോട്ടറി സ്റ്റാളിൽ നിന്ന് പുതിയവളപ്പിൽ രാജൻ വില്പന നടത്തിയ BE 220046 നമ്പർ ടിക്കറ്റിന്്. എന്നാൽ, സമ്മാനമടിച്ച ആ ഭാഗ്യവാൻ ആരെന്ന് ഇതുവരെ അറിയില്ലെന്ന് രാജൻ പറഞ്ഞു. 16 വർഷമായി തൃക്കരിപ്പൂർ ടൗണിൽ ഭാഗ്യക്കുറി വില്പനക്കാരനാണ് രാജൻ. ഒരുലക്ഷം രൂപ വരെ ഇതിനു മുമ്പ് സമ്മാനമടിച്ചിട്ടുണ്ടെങ്കിലും ഒരു കോടിയുടെ ഒന്നാം സമ്മാനംആദ്യമായാണ്. ആദ്യകാലത്ത് സ്വകാര്യ ബീഡി തൊഴിലാളിയായിരുന്ന രാജൻ പിന്നീട് അബുദാബിയിൽ പ്രവാസ ജീവിതം നയിച്ചിരുന്നു. രാവിലെ ആറു മുതൽ വൈകുന്നേരം ആറ് വരെ വില്പന നടത്തിയ ടിക്കറ്റിലാണ് ഒന്നാം സമ്മാനം. സെയിം അല്ലാതെ ഒറ്റയ്ക്കെടുത്ത ടിക്കറ്റിനാണ് സമ്മാനമടിച്ചതെന്ന് രാജൻ പറയുന്നു. കണ്ണൂർ ന്യൂ ലക്കി സെന്‍ററിൽ നിന്നാണ് വില്പ നയക്ക് ടിക്കറ്റെടുത്തത്.

റിവർ വ്യൂ പോയിന്‍റിലെ അക്രമത്തിൽ ശുഹൈബ് വധക്കേസ് പ്രതിയും

ഇരിട്ടി: എടക്കാനം റിവർ വ്യൂ പോയിന്‍റിൽ വാഹനങ്ങളിലെത്തിയ സായുധസംഘം പ്രദേശവാസികളെ ആക്രമിച്ച സംഭവത്തിൽ കൊലക്കേസ് പ്രതിയുൾപ്പടെ15 പേർക്കെതിരേ ജാമ്യമില്ലാ വകുപ്പ് പ്രകാരം ഇരിട്ടി പോലീസ് കേസെടുത്തു. മട്ടന്നൂരിലെ യൂത്ത് കോൺഗ്രസ് നേതാവ് ശുഹൈബ് കൊലക്കേസിലെ പ്രതി ദീപ്ചന്ദ്, അട്ടാപ്പി, സുജീഷ് എന്നിവരടക്കം കണ്ടാലറിയാവുന്ന 15 പേർക്കെതിരേയാണ് കേസ്. പ്രതികൾ ഒളിവിലാണ്. ഞായറാഴ്ച രാത്രി ഏഴോടെ ആയുധങ്ങളുമായി മൂന്നു വാഹനങ്ങളിലെത്തിയ സംഘം റിവർ വ്യൂ പോയിന്‍റിൽ നേരിൽ കണ്ടവരെയെല്ലാം ആക്രമിക്കുകയായിരുന്നു. അക്രമത്തിൽ ഗുരുതരമായി പരിക്കേറ്റ പ്രദേശവാസികളായ ഷാജി കുറ്റിയാടൻ (47), കെ.കെ. സുജിത്ത് (38), ആർ.വി. സതീശൻ (42), കെ. ജിതേഷ് (40 ), പി. രഞ്ജിത് (29) എന്നിവരെ തലശേരിയിലെ ആശുപത്രിയിൽ പ്രവേശിപ്പിച്ചു. ഇതിൽ ഒരാളുടെ പരിക്ക് ഗുരുതരമാണ്. അക്രമിസംഘം തിരിച്ചുപോകുന്നതിനിടെ ചിലരെ വാഹനം കൊണ്ട് ഇടിച്ചിടുകയും ചെയ്തു. ഇതിനിടെ സംഘം സഞ്ചരിച്ച വാഹനങ്ങളിൽ ഒന്ന് നിയന്ത്രണംവിട്ട് വയലിലേക്ക് മറിഞ്ഞു. അപകടത്തിൽപെട്ട വാഹനം ഉപേക്ഷിച്ച സംഘം മറ്റു വാഹനങ്ങളിൽ കയറിയാണ് സ്ഥലത്തുനിന്നും രക്ഷപ്പെട്ടത്. ഫോറിൻസിക് സംഘം എത്തി വാഹനം പരിശോധിച്ച ശേഷം പോലീസ് കസ്റ്റഡിയിലേക്ക് മാറ്റും. ഇരിട്ടി പോലീസിന്‍റെ നേതൃത്വത്തിൽ സ്ഥലത്ത് കാവൽ ഏർപ്പെടുത്തിയിട്ടുണ്ട്. അക്രമികളെ കണ്ടെത്തുന്നതിനായി പോലീസ് അന്വേഷണം ആരംഭിച്ചു. പ്രദേശവാസികൾ പറയുന്നത് ഇങ്ങനെ: നിരവധി സന്ദർശകർ എത്തുന്ന പ്രദേശമാണ് റിവർ വ്യൂ പോയിന്‍റ്. അവധി ദിവസമാണെങ്കിൽ മഴയെ പോലും വകവയ്ക്കാതെയാണ് ജനം ഇവിടേക്ക് എത്തുന്നത്. സന്ദർശകർ ചിലരുമായി പലപ്പോഴും വാക്ക് തർക്കങ്ങളും പതിവാണ്. ഞായറാഴ്ച വൈകുന്നേരം നാലോടെ കുടുംബമായി എത്തിയ സന്ദർശകരെ ഒരു കൂട്ടം ചെറുപ്പക്കാർ ചേർന്ന് ശല്യം ചെയ്തു. അതിനെ കുടുംബാംഗങ്ങൾ ചോദ്യം ചെയ്യുകയും ശല്യപ്പെടുത്തിയവരെ മർദിക്കുകയും ചെയ്തിരുന്നു. പിന്നീട് ഇരുകൂട്ടരും ഇവിടെനിന്നും പിരിഞ്ഞുപോയിരുന്നു. തുടർന്ന് വൈകുന്നേരം ഏഴോടെ എത്തിയ ഗുണ്ടാസംഘം മാരകായുധങ്ങളുമായെത്തി പ്രദേശവാസികളെ ആക്രമിക്കുകയായിരുന്നു. നേരത്തെ നടന്ന മർദനത്തിൽ പ്രദേശവാസികൾക്ക് പങ്കുണ്ട് എന്നു സംശയിച്ചായിരുന്നു ഗുണ്ടാസംഘത്തിന്‍റെ പരാക്രമം . വഴിയടച്ച് നാട്ടുകാർ ഇരിട്ടി: സംഭവത്തിൽ പ്രതിഷേധിച്ച് റിവർ വ്യൂ പോയിന്‍റിലേക്കുള്ള വഴി നാട്ടുകാർ അടച്ചു. ഇവിടേക്കുള്ള ഗേറ്റ് അടച്ചു പൂട്ടിയും വടം കെട്ടിയുമാണ് പ്രവേശനം തടഞ്ഞത്. പുറമെനിന്നെത്തി അരാജകത്വം സൃഷ്ടിക്കുന്നവർക്കെതിരെ കർശന നടപടി വേണമെന്ന് നാട്ടുകാർ ആവശ്യപ്പെട്ടു. വിനോദ സഞ്ചാരത്തിന്‍റെ മറവിൽ എടക്കാനം റിവർവ്യൂ പോയിന്‍റിൽ നടക്കുന്ന മദ്യ-മയക്കുമരുന്നു മാഫിയകളുടെ വിളയാട്ടം അവസാനിപ്പിച്ച് പ്രദേശത്ത് സമാധാന ജീവിതം ഉറപ്പുവരുത്താൻ പോലീസ്, എക്സൈസ്, മോട്ടോർ വാഹന വകുപ്പുകൾ കർശന നടപടികൾ സ്വീകരിക്കണമെന്നും നാട്ടുകാർ ആവശ്യപ്പെട്ടു. റിവർവ്യൂ പോയന്‍റിലേക്കുള്ള വഴി നാട്ടുകാർ അടച്ചുപൂട്ടിയതറിയാതെ നിരവധി സന്ദർശകർ ഇവിടേക്ക് ഇപ്പോഴും എത്തുന്നുണ്ട്. ഇങ്ങനെ എത്തുന്നവരെ നാട്ടുകാർ തന്നെ മടക്കി അയയ്ക്കുകയാണ്. രാത്രി വൈകിയും യാതൊരു നിയന്ത്രണവും ഇല്ലാതെ സന്ദർശകർ എത്തുന്നതും സുരക്ഷാ സംവിധാനങ്ങൾ ഇല്ലാത്തതും സന്ദർശകർക്ക് തോന്നുംപോലെ പ്രവർത്തിക്കുന്നതിന് കാരണമാകുന്നുവെന്നാണ് പ്രദേശവാസികളുടെ പരാതി. സ്ഥലം ഇറിഗേഷന്‍റേത് റിവർവ്യൂ പോയിന്‍റ് മനോഹരവും അതിലേറെ അപകടം നിറഞ്ഞതുമായ സ്ഥലമാണ്. പഴശി ഇറിഗേഷന്‍റെ അധീനതയിൽ ഉള്ള സ്ഥലത്ത് അനുവാദമില്ലാതെയാണ് ഇത്തരം പ്രവർത്തികൾ നടക്കുന്നത്. യാതൊരു പരിശോധനയോ നിയന്ത്രണങ്ങളോ ഇല്ലാത്ത സ്ഥലത്ത് സന്ദർശകർ തോന്നുമ്പോലെയാണ് പെരുമാറുന്നത്. ലഹരി വസ്തുക്കളുടെ ഉപയോഗം ഉൾപ്പെടെ അസാന്മാർഗിക പ്രവർത്തികൾ ഇവിടെ വർധിച്ചുവരികയാണ്. വളർത്തുമൃഗങ്ങൾക്ക് നേരെയും അക്രമം റിവർവ്യൂ പോയന്‍റിൽ എത്തുന്ന സന്ദർശകരുടെ ആക്രമണം വളർത്തു മൃഗങ്ങൾക്ക് നേരെയും. പദ്ധതി പ്രദേശത്ത് മേയാൻ കെട്ടിയിരിക്കുന്ന പശുക്കളെ ഉൾപ്പെടെ ഉപദ്രവിച്ച ശേഷം അഴിച്ചുവിട്ട് വേദനയോടെ ഓടുന്ന മൃഗങ്ങളുടെ വീഡിയോ എടുത്ത് റീൽസ് ഇടുന്നതായും പരാതിയുണ്ട്. ഉടമസ്ഥർ എത്തുമ്പോൾ പലപ്പോഴും മേയാൻ കെട്ടിയിരുന്ന പശുക്കളെ ഉൾപ്പെടെ അടുത്തുള്ള കൃഷി സ്ഥലത്തു നിന്നാണ് ലഭിക്കാറുള്ളത്. സമീപ പ്രദേശത്തെ സ്ത്രീകൾ ആരും ഇവിടേക്ക് ഇപ്പോൾ പോകാറില്ല. കുടുംബവുമായി എത്തുന്ന നല്ല സന്ദർശകർ ഉണ്ടെങ്കിലും അതെല്ലാം നശിപ്പിക്കുന്ന രീതിയിലാണ് ഒരുപറ്റം സാമൂഹ്യ വിരുദ്ധരു ടെ പ്രവർത്തനം. ‘വടിവാളുകളുമായി എത്തി... കൊന്നുകളയുമെന്ന് ഭീഷണിപ്പെടുത്തി’ ഇരിട്ടി: വീടിനുള്ളിൽ നിന്ന് പുറത്തേക്കു വരാതെ വാതിലിന് പിന്നിൽ പകുതി മറഞ്ഞുനിന്ന് ചില അപ്രിയ സത്യങ്ങൾ വിളിച്ചുപറയുമ്പോൾ സുജിനയുടെ കണ്ണുകളിൽ ഭയം തളം കെട്ടി നിൽക്കുന്നുണ്ട്. വടിവാളുമായി പാഞ്ഞടുത്ത അക്രമി സംഘത്തിന് മുന്നിൽപെട്ട വീട്ടമ്മ സുജിനയുടെ വാക്കുകൾ അധികാരികൾ കേൾക്കാതെ പോകരുത്. സുജിന പറയുന്നതിങ്ങനെ: വലിയ ശബ്ദം കേട്ട് ഓടിയെത്തുമ്പോൾ സഹോദരനെ ഉൾപ്പെടെയുള്ള നാട്ടുകാരെ 20 ഓളം പേർ ചേർന്ന് ആക്രമിക്കുന്നതാണ് കണ്ടത്. വീടിന്‍റെ മുറ്റംവരെ എത്തിയ അക്രമികൾ വടിവാൾ ഉൾപ്പെടെയുള്ള മാരക ആയുധങ്ങളുമായെത്തി കൊന്നുകളയുമെന്ന് ഭീഷണിപ്പെടുത്തി. അക്രമികളിൽ ആരെയും മുന്പ് കണ്ട് പരിചയം ഉള്ള ആളുകളായിരുന്നില്ല. കണ്ണിൽ കണ്ടവരെ എല്ലാവരെയും അവർ ക്രൂരമായി മർദിച്ചു. കുറച്ചു മാസങ്ങളായി പ്രദേശം വിനോദ സഞ്ചാരത്തെക്കാൾ മറ്റുപല സാമൂഹ്യ ദ്രോഹികളുടെ കേന്ദ്രമായിരിക്കുകയാണ്. സന്ദർശകരായി എത്തുന്നവർ പലപ്പോഴും പരസ്പരം പ്രശ്നങ്ങൾ സൃഷ്ടിക്കുന്നത് പതിവാണ്. പലരും ലഹരി ഉൾപ്പെടെയുള്ള വസ്തുക്കൾ ഉപയോഗിച്ച ശേഷമാണ് എത്തുന്നത്. സന്ദർശകർ എത്തുന്നത് നല്ലതാണ്. പക്ഷെ പ്രദേശവാസികളുടെ സ്വാതന്ത്ര്യത്തെ ചോദ്യം ചെയ്യുന്ന രീതിയിലാണ് പ്രവർത്തിക്കുന്നത്. പ്രദേശമാകെ മാലിന്യം നിക്ഷേപിക്കുന്നതും പതിവാണ്. സഹോദരൻ ഉൾപ്പെടെ ചികിത്സയിലാണ്. എല്ലാവർക്കും അവരുടെ രാഷ്‌‌ട്രീയം ഉണ്ടെങ്കിലും പ്രദേശവാസികൾ എല്ലാവരും എല്ലാകാര്യത്തിനും ഒറ്റക്കെട്ടാണ്. അധികൃതർ നടപടി സ്വീകരിച്ചില്ലെങ്കിൽ ജനങ്ങൾ ഒറ്റക്കെട്ടായി നേരിടും. കുടുംബമായി ജീവിക്കുന്ന ഞങ്ങൾക്ക് ഇവിടെ നടക്കുന്നത് പലതും വെളിയിൽ പറയാൻ കഴിയില്ലെന്നും സുജിന പറയുന്നു.

ചെറുപുഷ്പ മിഷൻലീഗ് അതിരൂപത മാനേജിംഗ് കമ്മിറ്റി യോഗം

തളിപ്പറമ്പ്: ചെറുപുഷ്പ മിഷൻലീഗ് തലശേരി അതിരൂപത മാനേജിംഗ് കമ്മിറ്റി യോഗവും ജൂണിയർ ഭാരവാഹികളുടെ തെരഞ്ഞെടുപ്പും തളിപ്പറമ്പ് സെന്‍റ് മേരീസ് ഓഡിറ്റോറിയത്തിൽ നടന്നു. തലശേരി അതിരൂപത വികാരി ജനറാൾ മോൺ. മാത്യു ഇളംതുരുത്തിപടവിൽ ഉദ്ഘാടനം ചെയ്തു.ചെറുപുഷ്പ മിഷൻലീഗ് നൽകുന്ന സംഭാവനകൾ മാതൃകാപരമെന്ന് അദ്ദേഹം പറഞ്ഞു. അതിരൂപത പ്രസിഡന്‍റ് ഷിജോ സ്രായിൽ അധ്യക്ഷത വഹിച്ചു. 19 മേഖലകളിലെ ജൂണിയർ, സീനിയർ ഭാരവാഹികൾ പങ്കെടുത്തു. ജൂണിയർ ഭാരവാഹികളുടെ തെരഞ്ഞെടുപ്പും നടത്തി. സംസ്ഥാന ജനറൽ സെക്രട്ടറി ജയ്സൺ പുളിച്ചമാക്കൽ മാനേജിംഗ് കമ്മിറ്റി അംഗങ്ങൾക്ക് ക്ലാസെടുത്തു. അതിരൂപത സെക്രട്ടറി ബിജു കൊച്ചുപൂവ്വക്കോട്ട് റിപ്പോർട്ട് അവതരിപ്പിച്ചു. ജൂണിയർ പ്രസിഡന്‍റ് മാത്യു പാലാട്ടികൂനത്താൻ, ജനറൽ ഓർഗനൈസർ അരുൾ പറയകുന്നേൽ, ഡയറക്ടർ ഫാ. ജോസഫ് വയലുങ്കൽ എന്നിവർ പ്രസംഗിച്ചു.

ബൈക്ക് യാത്രക്കാരൻ ഓടയിൽ വീണു

പാലാവയൽ: അശാസ്ത്രീയമായ റോഡ് നിർമാണം മൂലം പുളിങ്ങോം-പാലാവയൽ റോഡിൽ അപകടങ്ങൾ പതിവാകുന്നു. ഇന്നലെ രാവിലെ 11ഓടെ പുളിങ്ങോത്തുനിന്ന് പാലാവയലിലേക്ക് വരികയായിരുന്ന ബൈക്ക് യാത്രക്കാരൻ റോഡിലെ ഓവുചാലിൽ വീണു. പരിക്കേൽക്കാതെ രക്ഷപ്പെട്ടെങ്കിലും ബൈക്ക് പൂർണമായും തകർന്നു. ഒരുമാസം മുന്പ് ഇവിടെ കാറും അപകടത്തിൽപ്പെട്ടിരുന്നു. പുളിങ്ങോത്തിനും പാലാവയൽ പാലത്തിനുമിടയിലാണ് അപകടമേഖല. ഓവുചാലിന് സ്ലാബിടാതെ തുറന്നുകിടക്കുന്നതാണ് അപകടത്തിന് കാരണമാകുന്നത്. ഓവുചാൽ മൂടാൻ അധികൃതർ തയാറാകണമെന്നാണ് നാട്ടുകാരുടെ ആവശ്യം.

ഈ മനോഹര പാലത്തിൽ തരുമോ ഇനിയൊരു ടാറിംഗ് കൂടി...

പാലാവയൽ: പുളിങ്ങോം-പാലാവയൽ പാലത്തിനു മുന്നിലെത്തുമ്പോൾ ഇപ്പോൾ നാട്ടുകാരുടെയെല്ലാം മനസിൽ ആദ്യം വരുന്നത് പാലാവയലിൻ ചാരെയുണ്ടൊരു പാലം എന്ന പാട്ടാണ്. ചന്ദ്രകളഭം ചാർത്തിയുണരും തീരം എന്ന നിത്യഹരിതഗാനത്തിന്‍റെ ഈണത്തിൽ പാലാവയലിലെ ഓട്ടോഡ്രൈവറായ ജോബി കുന്നുംപുറത്ത് ആക്ഷേപഹാസ്യ രൂപത്തില്‍ വരികളെഴുതി പാടി സമൂഹമാധ്യമങ്ങളിൽ വൈറലാക്കിയ പാട്ട്. ഈ മനോഹര പാലത്തിൽ തരുമോ ഇനിയൊരു ടാറിംഗ് കൂടി എന്നാണ് ചെറുപുഴ പഞ്ചായത്തിനോട് ജോബിയുടെ പാട്ടിലൂടെയുള്ള അഭ്യർഥന. ജില്ലയുടെ നീന്തൽഗ്രാമമായ പാലാവയലിനെ അനുസ്മരിപ്പിച്ചുകൊണ്ട് ഈയൊരു പാലത്തിന്‍ മീതെയല്ലാതെ നീന്തൽക്കുളങ്ങളുണ്ടോ എന്നും നടുവൊടിയാതെ ഇവിടെ വാഹനമോടിച്ചവരുണ്ടോ എന്നുമുള്ള ചോദ്യങ്ങള്‍ കേൾവിക്കാരിൽ ചിരിയും ചിന്തയും ഉണർത്തുന്നതാണ്. ഈസ്റ്റ് എളേരി പഞ്ചായത്തിലെ പാലാവയൽ, ഓടക്കൊല്ലി, തയ്യേനി പ്രദേശങ്ങളില്‍ നിന്നുള്ളവര്‍ക്ക് പുളിങ്ങോം ഭാഗത്തേക്ക് പോകാനുള്ള ഏക മാര്‍ഗമാണ് ഈ പാലം. റോഡും പാലവും ഏറ്റവുമധികം ആവശ്യമുള്ളത് ഈ ഭാഗത്തുനിന്നുള്ളവര്‍ക്കാണെങ്കിലും പാലം സ്ഥിതി ചെയ്യുന്നത് ചെറുപുഴ പഞ്ചായത്തിന്‍റെ പരിധിയിലാണ്. പാലത്തിന്‍റെ മുകളില്‍ നാളുകളായി പൊട്ടിപ്പൊളിഞ്ഞുകിടക്കുന്ന റോഡിന്‍റെ അറ്റകുറ്റപ്പണികള്‍ക്ക് നേരത്തേ ഒരുതവണ ചെറുപുഴ പഞ്ചായത്ത് ടെൻഡർ നല്കിയിരുന്നതാണ്. എന്നാല്‍, കരാറുകാരന്‍ പണി തുടങ്ങാന്‍ തയാറായി വന്നപ്പോള്‍ ഒരു വിഭാഗം ആളുകള്‍ ചില സാങ്കേതികവിഷയങ്ങൾ ഉന്നയിച്ച് അത് തടസപ്പെടുത്തുകയായിരുന്നു. ഇതിനുശേഷം പാലത്തില്‍ അറ്റകുറ്റപ്പണികളൊന്നും നടന്നിട്ടില്ല. പാലത്തിലൂടെയുള്ള കാൽനടയാത്ര പോലും ഇപ്പോള്‍ ദുഷ്കരമായിരിക്കുകയാണ്. വർഷങ്ങൾക്ക് മുമ്പ് ജനകീയ സഹകരണേത്തോടെ പണിത പാലത്തിന് ചെറുവാഹങ്ങൾക്ക് കടന്നുപോകാവുന്ന വീതി മാത്രമാണുള്ളത്. ഇതിനിടയിൽ സ്കൂള്‍ കുട്ടികളടക്കമുള്ള കാല്‍നടയാത്രക്കാര്‍ ഏറെ ദുരിതമനുഭവിക്കുന്നുണ്ട്. ഇവിടെ കൂടുതല്‍ വീതിയില്‍ പുതിയൊരു പാലം നിര്‍മിക്കണമെന്ന ആവശ്യവും ഏറെക്കാലമായി ഉയരുന്നുണ്ട്.

കുരങ്ങുകളെ പ്രതിരോധിക്കാനുള്ള അവകാശം കർഷകർക്ക് നൽകണം: കിഫ

കേളകം: ജനവാസ മേഖലയിൽ ഇറങ്ങി ജനങ്ങളുടെ ജീവനും കാർഷിക വിളകൾ നശിപ്പിക്കുകയും ചെയ്യുന്ന കുരങ്ങുകളെ ഉന്മൂലനം ചെയ്യാൻ തദ്ദേശസ്ഥാപനങ്ങൾക്കും കർഷകർക്കും അധികാരം നൽകണമെന്ന് കേരള ഇൻഡിപെൻഡന്റ് ഫാർമേഴ്സ് അസോസിയേഷൻ (കിഫ) ജില്ലാ കമ്മിറ്റി വാർഷിക പൊതുയോഗം ആവശ്യപ്പെട്ടു. കാട്ടുപന്നിയുടെ കാര്യത്തിലേതിനു സമാനമായി കുരങ്ങു ശല്യവും പരിഗണിച്ച് സർക്കാർ നടപടികൾ സ്വീകരിക്കണമെന്ന് കിഫ ആവശ്യപ്പെട്ടു. കേരളത്തിൽ നാളിക ഉത്പാദനം കുറയുന്നതിന് പ്രധാന കാരണം കുരങ്ങു ശല്യമാണ്. ആയിരം തെങ്ങുള്ള കർഷകർപോലും സ്വന്തം ആവശ്യങ്ങൾക്ക് തേങ്ങ വാങ്ങിക്കേണ്ട സ്ഥിതിയാണ്. കാട്ടുപന്നികളെ ഉപാധികളോടെ വെടിവച്ചു കൊല്ലാമെന്ന നിയമം നടപ്പായത് കിഫയുടെ ശക്തമായ ഇടപെടലുകൾ കൊണ്ടാണെന്ന് യോഗം വിലയിരുത്തി. ജില്ലയിൽ വർധിച്ചു വരുന്ന വന്യമൃഗാക്രമണം, കാർഷികനാശം തുടങ്ങിയ വിഷയങ്ങൾ യോഗം ചർച്ച ചെയ്തു. വിൽസൺ വടക്കയിൽ, ജിൽസ് ജോൺ, ഷാന്‍റോ മാത്യു, കെ.യു. ഉലഹന്നാൻ, സിജോ, ഉണ്ണി ജോസഫ്, ബെന്നി മുട്ടത്തിൽ എന്നിവർ ചർച്ചയിൽ പങ്കെടുത്തു. കേളകം പ്രസ് ഫോറം ഹാളിൽ നടന്ന യോഗത്തിന് ജില്ലാ പ്രസിഡന്‍റ് പ്രിൻസ് ദേവസ്യയുടെ അധ്യക്ഷത വഹിച്ചു. ജില്ലാ സെക്രട്ടറി എം.ജെ. റോബിൻ പ്രസംഗിച്ചു. പ്രസിഡന്‍റായി പ്രിൻസ് ദേവസ്യയെയും സെക്രട്ടറിയായി എം.ജെ. റോബിനെയും വീണ്ടും തെരഞ്ഞെടുത്തു.

ഡയാലിസിസ് സെന്‍റർ പ്രതിസന്ധി; ബദൽ മാർഗം തേടുന്നു

ഇരിട്ടി: സാമ്പത്തിക പ്രതിസന്ധി മൂലം നിലനില്പ് ഭീഷണി നേരിടുന്ന ഇരിട്ടി താലൂക്ക് ആശുപത്രി ഡയാലിസിസ് സെന്‍റർ അടച്ചുപൂട്ടാതിരിക്കാനായി ബദൽ മാർഗം തേടുന്നു. സാമ്പത്തിക പ്രതിസന്ധി മറികടക്കാൻ വ്യക്‌തികളുടെയും സംഘടനകളുടെയും സഹായം തേടാനും സുമനസുകളെ നേരിട്ടു സമീപിക്കാനും ഇരിട്ടി നഗരസഭാ കനിവ് കിഡ്‌നി പേഷ്യന്‍റ്സ് വെൽഫെയർ സൊസൈറ്റിയുടെ അടിയന്തര നിർവഹണ സമിതി യോഗം തീരുമാനിച്ചു. നടത്തിപ്പിനു പണം കണ്ടെത്താനാകാതെ വന്നതോടെ ജീവനക്കാരുടെ രണ്ടുമാസത്തെ ശമ്പളം ഉൾപ്പെടെ മുടങ്ങുകയും ഡയാലിസിസ് സെന്‍റർ അടച്ചുപൂട്ടൽ ഭീഷണി നേരിടുകയുമാണ്. ഫണ്ട് സമാഹരണത്തിനായി വിവിധ പദ്ധതികൾക്ക് രൂപം നൽകി. മേഖലയിലെ വിദ്യാലയങ്ങൾ, കോളജുകൾ, കുടുംബശ്രീ യൂണിറ്റുകൾ, വ്യാപാര സ്‌ഥാപനങ്ങൾ, സുമനസുകൾ എന്നിവരെ നേരിൽക്കണ്ടു ഫണ്ട് സമാഹരണം നടത്തും. സമ്മാനക്കൂപ്പൺ പദ്ധതി നടപ്പാക്കും. കൂടുതൽ ആളുകളെ സൊസൈറ്റി അംഗങ്ങളാക്കി പ്രവേശനഫീസും വരിസംഖ്യയും വഴി വരുമാന വർധന ഉറപ്പാക്കും. കൂടുതൽ ഫണ്ട് സമാഹരിച്ച് മൂന്നാമത്തെ ഷിഫ്റ്റു കൂടി ലക്ഷ്യം വയ്ക്കാനും സൊസൈറ്റി യോഗം തീരുമാനിച്ചു. ഇരിട്ടി നഗരസഭാ അധ്യക്ഷ കെ. ശ്രീലത അധ്യക്ഷത വഹിച്ചു. എസ്ബിഐ ഇരിട്ടി ശാഖ മുഖേന സംഭാവനകൾ അയയ്ക്കാം: കനിവ് കിഡ്‌നി പേഷ്യന്‍റ്സ് വെൽഫെയർ സൊസൈറ്റി, അക്കൗണ്ട് നമ്പർ: 40789435811, ഐഎഫ്എസ്‌സി കോഡ്: എസ്ബിഐഎൻ 0017063.

എടൂർ ഇടവകയുടെ 18-ാമത് സ്നേഹവീടൊരുങ്ങി

എടൂർ: നിർധന കുടുംബത്തിനു സ്നേഹവീടൊരുക്കി എടൂർ സെന്‍റ് മേരീസ് ഫൊറോന ആർക്കി എപ്പി‌സ്കോപ്പൽ മരിയൻ തീർഥാടന കേന്ദ്രം കൂട്ടായ്‌മ. താക്കോൽ ഇന്നു രാവിലെ 9.30ന് നടക്കുന്ന ചടങ്ങിൽ പള്ളി വികാരി ഫാ. തോമസ് വടക്കേമുറിയിൽ സ്നേഹവീട് കൈമാറും. എടൂർ ഇടവകയുടെ നേതൃത്വത്തിൽ അഞ്ചു വർഷത്തിനിടെ കൈമാറുന്ന 18 -ാമത് വീടാണിത്. ഇത്തവണ പേരു വെളിപ്പെടുത്താൻ താത്പര്യം ഇല്ലാത്ത ഒരു ഇടവകാംഗമാണ് പ്രധാനമായും ധനസഹായം നൽകിയത്. തലശേരി രൂപത പ്രഥമ ബിഷപ് മാർ സെബാസ്‌റ്റ്യൻ വള്ളോപ്പിള്ളി ഭവനനിർമാണ പദ്ധതിയുടെയും എടൂർ ഇടവക പ്ലാറ്റിനം ജൂബിലി സ്‌മാരക ഭവന പദ്ധതിയുടെയും ഭാഗമായാണ് എടൂർ ഇടവകയിൽ "ഈശോയ്ക്കൊരു വീട്' ഭവന പദ്ധതിക്കു രൂപം നൽകിയത്. ഭവനരഹിതരില്ലാത്ത ഇടവക എന്നതാണു പദ്ധതിയുടെ ലക്ഷ്യം. അതിരൂപതയിൽ ബിഷപ് വള്ളോപ്പിള്ളി ഭവന പദ്ധതിയിൽ നാലുവർഷത്തിനകം 900 വീടുകൾ കൈമാറി. ഏഴുലക്ഷം രൂപ ചെലവിൽ 630 ചതുരശ്ര അടിയിൽ രണ്ടു കിടപ്പുമുറികൾ, അടുക്കള, ഹാൾ, സിറ്റ്ഔട്ട്, വർക്ക് ഏരിയ എന്നിവയുള്ള ടൈൽ വിരിച്ചു വയറിംഗും പ്ലംബിംഗും ഉൾപ്പെടെ പൂർത്തിയാക്കിയാണു വീടു നിർമിച്ചത്. നിർമാണം നടത്തിയ നിഷാദ് സെബാസ്‌റ്റ്യൻ തോണക്കരയെ ആദരിക്കും. ഇടവക വികാരി ഫാ. തോമസ് വടക്കേമുറിയിൽ, അസിസ്റ്റന്‍റ് വികാരി ഫാ. അഭിലാഷ് ചെല്ലങ്കോട്ട്, ഭവന നിർമാണ കമ്മിറ്റി അംഗങ്ങളായ പി.വി. ജോസഫ് പാരിക്കാപ്പള്ളി, ജോസഫ് വേകത്താനം, ബോബി ഓടയ്ക്കൽ, ഇടവക കോ-ഓഡിനേറ്റർ സി.ജെ. ജോസഫ്, കൈക്കാരൻമാരായ മാത്യൂസ് കൂട്ടിയാനി, ഔസേപ്പച്ചൻ പാംപ്ലാനി, മാത്യു ഒരപ്പാംകുഴി, ബിജു കുന്നുംപുറം, വാർഡ് പ്രതിനിധികളായ ബെന്നി കൊച്ചുമല, ജോസഫ് കൊച്ചുപറമ്പിൽ എന്നിവർ പ്രവർത്തങ്ങൾക്കു നേതൃത്വം നൽകി.

മണ്ണിനെയും കൃഷിയെയും അടുത്തറിഞ്ഞ് വിദ്യാർഥികൾ

കണ്ണൂർ: ക്ലാസ് മുറിയുടെ നാലു ചുമരുകൾക്കും പാഠപുസ്തകങ്ങളുടെ താളുകൾക്കുമപ്പുറം മണ്ണിനെയും കൃഷിയെയും അനുഭവിച്ചറിഞ്ഞ് വിദ്യാർഥികൾ. കണ്ണൂർ സെന്‍റ് മൈക്കിൾസ് ആംഗ്ലോ ഇന്ത്യൻ ഹയർ സെക്കൻഡറി സ്കൂൾ വിദ്യാരംഗം കലാസാഹിത്യവേദി കാർഷിക ക്ലബുമായി സഹകരിച്ച് നടത്തിയ "മണ്ണേ നമ്പി' കാർഷിക പാഠശാലയാണ് വിദ്യാർഥികൾക്ക് പ്രകൃതിയെ നേരിട്ടറിയാൻ അവസരമൊരുക്കിയത്. മയ്യിൽ മേച്ചേരി പാടശേഖരസമിതി അംഗങ്ങളും മയ്യിൽ പഞ്ചായത്ത് കുടുംബശ്രീ പ്രവർത്തകരും കൂട്ടായി എത്തിയപ്പോൾ വിദ്യാർഥികൾക്ക് മണ്ണിനെയും കൃഷിയെയും മഴയെയും നാട്ടു നന്മകളെയും പരിചയപ്പെടാനുള്ള അപൂർവ അവസരമാണ് ലഭിച്ചത്. മയ്യിൽ പഞ്ചായത്ത് പ്രസിഡന്‍റ് എം.വി. അജിത ഉദ്ഘാടനം ചെയ്തു. പഞ്ചായത്തംഗം എം.വി. രവി അധ്യക്ഷത വഹിച്ചു. പ്രഥമ ഷാജൂ പനയൻ സ്മാരക പുരസ്ക്കാര ജേതാവും നാട്ടിപാട്ട് കലാകാരിയുമായ പയ്യാടകത്ത് ദേവി നാട്ടിപ്പാട്ടുകളും കർഷക പുരസ്കാര ജേതാക്കളായ പി.വി. കാർത്യായനി, ലക്ഷ്മണൻ കുന്നുമ്പ്രത്ത് എന്നിവർ കൃഷി അനുഭവങ്ങളും അറിവുകളും പങ്കുവച്ചു. നാട്ടറിവ് പാട്ടുകൾക്ക് നാട്ടുകലാകാരക്കൂട്ടം ജില്ലാ പ്രസിഡന്‍റ് കുട്ടാപ്പു കതിരൂർ, പ്രജീഷ് കുറ്റ്യാട്ടൂർ, അഭി മുഴപ്പിലങ്ങാട് എന്നിവർ നേതൃത്വം നൽകി. വയൽ നടത്തം, സൊറവരമ്പ്, നിലമൊരുക്കൽ, ഞാറുനടീൽ, ചെളിയുത്സവം, കപ്പേം കാപ്പീം, കഞ്ഞിയും പുഴുക്കും എന്നിവയും പാഠശാലയുടെ ഭാഗമായി ഒരുക്കിയിരുന്നു. സ്കൂളിലെ 57 വിദ്യാർഥികളും മൂന്ന് അധ്യാപകരും അഞ്ച് രക്ഷിതാക്കളും അടങ്ങുന്ന സംഘമാണ് "മണ്ണേ നമ്പി' പാഠശാലയിൽ പങ്കെടുത്തത്. സാംസ്കാരിക പ്രവർത്തകനും ദേശീയ അധ്യാപക പുരസ്കാര ജേതാവുമായ രാധാകൃഷ്ണൻ മാണിക്കോത്ത്, അധ്യാപകരായ ഫാ. ബാസ്റ്റിൻ ജോസ്, ഫാ. സ്റ്റീവൻസൻ, എ. സജിത്ത് എന്നിവർ പ്രസംഗിച്ചു. വിദ്യാർഥികളായ അമൻ എൽ. ബിനോയ്, സൂര്യദേവ് രാജേഷ്, പി. അർജുൻ, ശ്രാവൺ, ശ്രീകാന്ത് എന്നിവർ നേതൃത്വം നൽകി.

"ഒരുവാർഡിൽ ഒരുദിനം' പകർച്ചവ്യാധി ജനകീയ കാമ്പയിൻ ആലോചനാ യോഗം

ഇരിട്ടി: ഇരിട്ടി നഗരസഭയുടെ പകർച്ചവ്യാധി പ്രതിരോധത്തിനായി "ഒരുവാർഡിൽ ഒരുദിനം' ജനകീയ കാമ്പയിന്‍റെ മുനിസിപ്പാലിറ്റിതല ആലോചനാ യോഗം നഗരസഭാ ഹാളിൽ നടന്നു. ചെയർപേഴ്സൺ കെ. ശ്രീലത ഉദ്ഘാടനം ചെയ്തു. വൈസ് ചെയർമാൻ പി.പി. ഉസ്മാൻ അധ്യക്ഷത വഹിച്ചു. ആരോഗ്യ സ്റ്റാൻഡിംഗ് കമ്മറ്റി ചെയർപേഴ്സൺ വി. സോയ, ക്ലീൻസിറ്റി മാനേജർ കെ.വി. രാജീവൻ, ഇരിട്ടി താലൂക്ക് ആശുപത്രി ഹെൽത്ത്‌ സൂപ്പർവൈസർ ഇൻചാർജ് രാജേഷ് വി. ജയിംസ്, എച്ച്ഐ ഇൻചാർജ് ഷിബുമോൻ, ആരോഗ്യ സ്റ്റാൻഡിംഗ് കമ്മറ്റി ചെയർമാൻ സോയ എന്നിവർ പ്രസംഗിച്ചു. ജനകീയ പങ്കാളിത്തത്തോടെ ഉറവിട നശീകരണം, ക്ലോറിനേഷൻ, ബോധവത്കരണം തുടങ്ങിയ പരിപാടികൾ വാർഡ് തലത്തിൽ അടിയന്തരമായി പൂർത്തിയാക്കാൻ തീരുമാനിച്ചു. പകർച്ചവ്യാധികൾ പടരാൻ കാരണമാകുന്ന തരത്തിൽ പ്രവർത്തിക്കുന്ന സ്ഥാപനങ്ങൾക്കും വ്യക്തികൾക്കുമെതിരെ നടപടി സ്വീകരിക്കുമെന്നും ചെയർപേഴ്സൺ അറിയിച്ചു.

ആനപ്പന്തി പാലം കോൺക്രീറ്റ് കഴിഞ്ഞു; പാലത്തിലൂടെ നടവഴി തുറന്നുകൊടുത്തു

ഇരിട്ടി: മലയോര ഹൈവേയിൽ ആനപ്പന്തിയിൽ കുണ്ടൂർ പുഴയ്ക്ക് കുറുകെ നിർമിക്കുന്ന പുതിയ പാലത്തിന്‍റെ കോൺക്രീറ്റ് പൂർത്തിയായി. പാലത്തിന് മുകളിലൂടെ താത്കാലിക നടവഴി തുറന്നുകൊടുത്തു. മലയോര ഹൈവേ നവീകരണ ഭാഗമായി കുണ്ടൂർ പുഴയിലെ പഴയ പാലം പൊളിച്ചാണ് പുതിയ പാലം നിർമിക്കുന്നത്. ആറുമാസം മുന്പാണ് പാലത്തിന്‍റെ നിർമാണം ആരംഭിച്ചത്. നിർമാണം വൈകിയതോടെ മലവെള്ളപ്പാച്ചിലിൽ പുഴയ്ക്ക് കുറുകെ നിർമിച്ച സമാന്തര പാത ഒഴുകിപ്പോയിരുന്നു. അതോടെ ഇതുവഴിയുള്ള ഗതാഗതം തടസപ്പെടുകയായിരുന്നു. ജനങ്ങളുടെ സൗകര്യാർഥം കരാറുകാരൻ താത്കാലിക നടപ്പാലം നിർമിച്ചെങ്കിലും അതും മലവെള്ളപ്പാച്ചിലിൽ അപകടാവസ്ഥയിൽ ആയിരുന്നു. തുടർന്നാണ് രണ്ടുദിവസം മുന്പ് കോൺക്രീറ്റ് പൂർത്തിയായ പാലത്തിലൂടെ താത്കാലിക നടവഴി തുറന്ന് കൊടുത്തത്. ഓഗസ്റ്റ് 15 ഓടെ പാലം തുറന്ന് കൊടുക്കുമെന്നാണ് പ്രതീക്ഷിക്കുന്നത്.

കൃഷ്ണന്‍റെയും കമലാക്ഷിയുടെയും വീട് പഞ്ചായത്ത് പ്രസിഡന്‍റ് സന്ദർശിച്ചു

ഉളിക്കൽ: ലൈഫ് ഭവന പദ്ധതിയിൽ വീട് ലഭിച്ചിട്ടും കരാറുകാർ പണി ഏറ്റെടുക്കത്താത്തതിനാൽ വീട് യാഥാർഥ്യമാകാതെ വിഷമിക്കുന്ന പരിക്കളത്തെ കൃഷ്ണൻ നമ്പ്യാരെയും ഭാര്യ കമലാക്ഷിയെയും ഉളിക്കൽ പഞ്ചായത്ത് പ്രസിഡന്‍റ് പി.സി. ഷാജി സന്ദർശിച്ചു. വീട് നിർമാണം സാധിക്കാതെ കുടുംബം പ്രതിസന്ധിയിലാണെന്ന് ദീപിക കഴിഞ്ഞ ദിവസം റിപ്പോർട്ട്‌ ചെയ്തിരുന്നു. നിലവിലുള്ള പ്രതിസന്ധി പരിഹരിക്കാൻ ആവശ്യമായ നടപടികൾ സ്വീകരിച്ചതായി പ്രസിഡന്‍റ് കുടുംബത്തെ അറിയിച്ചു. മഴ കുറയുന്നതോടെ വീട് നിർമാണം ആരംഭിക്കുമെന്നും പ്രസിഡന്‍റ് ഉറപ്പ് നൽകി. അതുവരെ ദമ്പതികൾ ബന്ധു വീട്ടിൽ താമസിക്കും. പൂർത്തീകരണ ഘട്ടത്തിൽ ജനകീയ പിന്തുണയും ഉറപ്പാക്കും. വികസനകാര്യ സ്റ്റാൻഡിംഗ് കമ്മിറ്റി പേഴ്സൺ ഒ.വി. ഷാജു, വാർഡ് മെംബർമാരായ രാമകൃഷ്ണൻ കോയാടൻ, സരുൺ തോമസ് എന്നിവരും ഒപ്പം ഉണ്ടായിരുന്നു.

കേയാപറമ്പ്-മണ്ഡപപ്പറമ്പ് ബൈപ്പാസ് റോഡ് വികസനം; പ്രദേശവാസികളുടെ യോഗം ചേർന്നു

ഉളിക്കൽ: സ്ഥല പരിമിതിയും ഗതാഗതക്കുരുക്കും നേരിടുന്ന ഉളിക്കൽ ടൗണിലെ ഗതാഗത പ്രശ്നങ്ങൾക്ക് പരിഹാരം കാണുന്നതിന് മണ്ഡപ്പറമ്പ്-കേയാപറമ്പ് റോഡ് വികസനവുമായി ബന്ധപ്പെട്ട് പ്രദേശവാസികളുടെ യോഗം ചേർന്നു. നെല്ലിക്കാംപൊയിൽ ഭാഗത്തുനിന്ന് ഉളിക്കൽ ടൗണിലെ തിരക്ക് ഒഴിവാക്കി വള്ളിത്തോട്, മാട്ടറ ഭാഗത്തേക്ക് കടന്നുപോകാൻ കഴിയുന്ന റോഡാണിത്. കേയാപറന്പിൽ മലയോര ഹൈവേയുമായും ഇരിട്ടി- ഉളിക്കൽ റോഡുമായും ബന്ധപ്പെടുന്ന പ്രധാന ലിങ്ക് റോഡ് കൂടിയാണിത്. ഒരു കിലോമീറ്റർ ദൈർഘ്യം വരുന്ന റോഡ് ടാറിംഗ് നടത്തി നിലവാരം മെച്ചപ്പെടുത്തണമെന്ന് യോഗത്തിൽ നിർദേശമുണ്ടായി. ഓവുചാലുകൾ കലുങ്കുകൾ എന്നിവ നിർമിക്കണം. കേയാപറമ്പിൽ ഹൈമാസ്റ്റ്, തെരുവു വിളക്കുകൾ, സൈൻ ബോർഡുകൾ എന്നിവ സ്ഥാപിക്കണമെന്നും യോഗത്തിൽ ആവശ്യമുയർന്നു. റോഡിന് മൂന്നുലക്ഷം രൂപയുടെ അറ്റകുറ്റപ്പണിക്കാണ് പഞ്ചായത്ത് അനുമതി നൽകിയത്. കൂടാതെ വെള്ളപ്പൊക്ക ദുരിതാശ്വാസ പദ്ധതിയിൽ ഉൾപ്പെടുത്തി 10 ലക്ഷംഅനുവദിക്കുന്നതിനുള്ള ശിപാർശ എംഎൽഎയും നൽകിയിട്ടുണ്ട്. യോഗം സജീവ് ജോസഫ് എംഎൽഎ ഉദ്ഘാടനം ചെയ്തു. മണ്ഡപപ്പറമ്പിലും കേയാപറമ്പിലും ഹൈമാസ്റ്റ് ലൈറ്റ് സ്ഥാപിക്കുമെന്നും റോഡ് വിപുലീകരണത്തിന് ഫണ്ട് അനുവദിക്കാൻ സർക്കാരിന് നിവേദനം നൽകുമെന്നും സജീവ് ജോസഫ് എംഎൽഎ യോഗത്തിൽ അറിയിച്ചു. ഇരിക്കൂർ ബ്ലോക്ക് പഞ്ചായത്ത് സ്ഥിരം സമിതി അധ്യക്ഷൻ ബേബി തോലാനി അധ്യക്ഷനായിരുന്നു. പഞ്ചായത്ത് അംഗം ടോമി ജോസഫ് മൂക്കനോലി, കെ.കെ. സുരേഷ്കുമാർ, കെ.എൻ. ശിവദാസ്, വാർഡ് അംഗം ആയിഷ ഇബ്രാഹിം, പി. പുഷ്പരാജ് എന്നിവർ പ്രസംഗിച്ചു. ‌

കുരങ്ങുകളെ പ്രതിരോധിക്കാനുള്ള അവകാശം കർഷകർക്ക് നൽകണം: കിഫ

കേളകം: ജനവാസ മേഖലയിൽ ഇറങ്ങി ജനങ്ങളുടെ ജീവനും കാർഷിക വിളകൾ നശിപ്പിക്കുകയും ചെയ്യുന്ന കുരങ്ങുകളെ ഉന്മൂലനം ചെയ്യാൻ തദ്ദേശസ്ഥാപനങ്ങൾക്കും കർഷകർക്കും അധികാരം നൽകണമെന്ന് കേരള ഇൻഡിപെൻഡന്റ് ഫാർമേഴ്സ് അസോസിയേഷൻ (കിഫ) ജില്ലാ കമ്മിറ്റി വാർഷിക പൊതുയോഗം ആവശ്യപ്പെട്ടു. കാട്ടുപന്നിയുടെ കാര്യത്തിലേതിനു സമാനമായി കുരങ്ങു ശല്യവും പരിഗണിച്ച് സർക്കാർ നടപടികൾ സ്വീകരിക്കണമെന്ന് കിഫ ആവശ്യപ്പെട്ടു. കേരളത്തിൽ നാളിക ഉത്പാദനം കുറയുന്നതിന് പ്രധാന കാരണം കുരങ്ങു ശല്യമാണ്. ആയിരം തെങ്ങുള്ള കർഷകർപോലും സ്വന്തം ആവശ്യങ്ങൾക്ക് തേങ്ങ വാങ്ങിക്കേണ്ട സ്ഥിതിയാണ്. കാട്ടുപന്നികളെ ഉപാധികളോടെ വെടിവച്ചു കൊല്ലാമെന്ന നിയമം നടപ്പായത് കിഫയുടെ ശക്തമായ ഇടപെടലുകൾ കൊണ്ടാണെന്ന് യോഗം വിലയിരുത്തി. ജില്ലയിൽ വർധിച്ചു വരുന്ന വന്യമൃഗാക്രമണം, കാർഷികനാശം തുടങ്ങിയ വിഷയങ്ങൾ യോഗം ചർച്ച ചെയ്തു. വിൽസൺ വടക്കയിൽ, ജിൽസ് ജോൺ, ഷാന്‍റോ മാത്യു, കെ.യു. ഉലഹന്നാൻ, സിജോ, ഉണ്ണി ജോസഫ്, ബെന്നി മുട്ടത്തിൽ എന്നിവർ ചർച്ചയിൽ പങ്കെടുത്തു. കേളകം പ്രസ് ഫോറം ഹാളിൽ നടന്ന യോഗത്തിന് ജില്ലാ പ്രസിഡന്‍റ് പ്രിൻസ് ദേവസ്യയുടെ അധ്യക്ഷത വഹിച്ചു. ജില്ലാ സെക്രട്ടറി എം.ജെ. റോബിൻ പ്രസംഗിച്ചു. പ്രസിഡന്‍റായി പ്രിൻസ് ദേവസ്യയെയും സെക്രട്ടറിയായി എം.ജെ. റോബിനെയും വീണ്ടും തെരഞ്ഞെടുത്തു.

ഡിഎഡബ്ല്യുഎഫ് പെരിങ്ങോം ഏരിയാ കൺവൻഷൻ

പെരിങ്ങോം: ഭിന്നശേഷിക്കാർക്ക് ജനപ്രാതിനിധ്യ സഭകളിൽ സംവരണം ഏർപ്പെടുത്തണമെന്ന് ഡിഫറന്‍റ്ലി ഏബിൾഡ് പേഴ്‌സൺസ് വെൽഫെയർ ഫെഡറേഷൻ (ഡിഎഡബ്ള്യുഎഫ്) പെരിങ്ങോം ഏരിയാ കൺവൻഷൻ ആവശ്യപ്പെട്ടു. കേന്ദ്ര-സംസ്ഥാന സർക്കാരുകൾ നൽകുന്ന പെൻഷൻ 5,000 രൂപ വീതമാക്കി വർധിപ്പിക്കണമെന്നും കേന്ദ്ര സർക്കാർ നൽകുന്ന പെൻഷൻ 40 ശതമാനത്തിനു മുകളിൽ ഭിന്നശേഷിത്വമുള്ള മുഴുവൻ ആളുകൾക്കും ലഭ്യമാക്കുക, ഭിന്നശേഷിക്കാർക്ക് നൽകുന്ന ആനുകൂല്യങ്ങൾക്ക് കുടുംബ വരുമാനം പരിഗണിക്കാതെ ഭിന്നശേഷിക്കാരുടെ വ്യക്തിഗത വരുമാനം മാത്രം പരിഗണിക്കുക, ഭിന്നശേഷിക്കാർക്കുള്ള സ്വകാര്യ ബസ് യാത്രാ സൗജന്യത്തിനുള്ള പാസ് വിതരണം പയ്യന്നൂർ ആർടിഒ ഓഫീസിൽ ആരംഭിക്കുക എന്നീ ആവശ്യങ്ങളും സമ്മേളനം പ്രമേയത്തിലൂടെ ഉന്നയിച്ചു. കേരള ഗസറ്റഡ് ഓഫീസേഴ്‌സ് അസോസിയേഷൻ കണ്ണൂർ ജില്ലാ പ്രസിഡന്‍റ് സി.എം. സുധീഷ്കുമാർ സമ്മേളനം ഉദ്ഘാടനം ചെയ്തു. ഡിഎഡബ്ല്യുഎഫ് ഏരിയാ പ്രസിഡന്‍റ് എം. സുധീർ അധ്യക്ഷത വഹിച്ചു. ഏരിയാ സെക്രട്ടറി രാജേഷ്കുമാർ കാങ്കോൽ പ്രവർത്തന റിപ്പോർട്ടും ട്രഷറർ ലീലാമ്മ റോജി വരവു-ചെലവു കണക്കും ജില്ലാ പ്രസിഡന്‍റ് എ. ഷിജു സംഘടനാ റിപ്പോർട്ടും ഏരിയാ ജോയിന്‍റ് സെക്രട്ടറി ലാലമ്മ ജോർജ് അനുശോചന പ്രമേയവും അവതരിപ്പിച്ചു. ഡിഎഡബ്ല്യുഎഫ് ജില്ലാ കമ്മറ്റി അംഗങ്ങളായ പി.സി. മൊയ്തു, പി.വി. ശങ്കരൻ, ഏരിയാ രക്ഷാധികാരി കെ.ബി. ബാലകൃഷ്ണൻ, സിപിഎം ഏരിയാ സെക്രട്ടറി പി. ശശിധരൻ, സിപിഎം ഏരിയാ കമ്മറ്റിയംഗം കെ.ഡി. അഗസ്റ്റിൻ, സംഘാടക സമിതി ചെയർമാൻ എൻ.വി. സുജിത്കുമാർ തുടങ്ങിയവർ പ്രസംഗിച്ചു. ഭാരവാഹികൾ: എം. സുധീർ-പ്രസിഡന്‍റ്, കെ.വി. ദാമോദരൻ, സി. സുപ്രിയ-വൈസ് പ്രസിഡന്‍റുമാർ, രാജേഷ് കുമാർ കാങ്കോൽ-സെക്രട്ടറി, പ്രമോദ് അന്നൂക്കാരൻ, കെ.വി. ശീതള-ജോയിന്‍റ് സെക്രട്ടറിമാർ.

ഉന്നത വിജയികളെ അനുമോദിച്ചു

ചെറുപുഴ: ജനശ്രീ മണ്ഡലം സഭയുടെ നേതൃത്വത്തിൽ വിവിധ പരീക്ഷകളിൽ ഉന്നത വിജയം നേടിയ വിദ്യാർഥികളെ അനുമോദിച്ചു. ജനശ്രീ മിഷൻ ജില്ലാ ചെയർമാൻ ചന്ദ്രൻ തില്ലങ്കേരി ഉദ്ഘാടനം ചെയ്തു. ജനശ്രീ മണ്ഡലം ചെയർമാൻ എം.കെ. ബാലചന്ദ്രൻ അധ്യക്ഷത വഹിച്ചു. വി. കൃഷ്ണൻ മുഖ്യപ്രഭാഷണം നടത്തി. മഹേഷ്‌ കുന്നുമ്മല്‍, കെ.പി. ശൈലേഷ് കുമാര്‍, ടി.പി. ചന്ദ്രന്‍, സലീം തേക്കാട്ടില്‍, കുട്ടിച്ചന്‍ തുണ്ടിയിൽ, ജോയ്‌സി ഷാജി, വി.വി. ദാമോദരന്‍ എന്നിവര്‍ പ്രസംഗിച്ചു. പെരുമ്പടവ്: പച്ചാണി ബ്ലൂസ്റ്റാർ ആർട്സ് ആൻഡ് സ്പോർട്സ് ക്ലബിന്‍റെ ആഭിമുഖ്യത്തിൽ എസ്എസ്എൽസി, പ്ലസ് ടു പരീക്ഷയിൽ വിജയം കൈവരിച്ച വിദ്യാർഥികളെയും, നീറ്റ് പരീക്ഷയിൽ എംബിബിഎസിന് അഡ്മിഷൻ ലഭിച്ച ദേവനന്ദ പി. നമ്പ്യായരെയും ആനുമോദിച്ചു. സജീവ് ജോസഫ് എംഎൽഎ ഉദ്ഘാടനം ചെയ്ത് വിജയ്കൾക്ക് മെമന്‍റോ നൽകി. ചടങ്ങിൽ ആലക്കോട് പഞ്ചായത്ത് പ്രസിഡന്‍റ് ജോജി കന്നിക്കാട്ട് അധ്യക്ഷത വഹിച്ചു. ജില്ലാ പഞ്ചായത്ത് അംഗം തോമസ് വെക്കത്തനം, പഞ്ചായത്ത് അംഗം എം.എസ്. മിനി, ഫാ. ജോസഫ് കൈതമറ്റത്തിൽ, പി.സി. തോമസ്, ബിനേഷ് പച്ചാണി, ദേവനന്ദ പി. നമ്പ്യാർ എന്നിവർ പ്രസംഗിച്ചു.

മണ്ണിനെയും കൃഷിയെയും അടുത്തറിഞ്ഞ് വിദ്യാർഥികൾ

കണ്ണൂർ: ക്ലാസ് മുറിയുടെ നാലു ചുമരുകൾക്കും പാഠപുസ്തകങ്ങളുടെ താളുകൾക്കുമപ്പുറം മണ്ണിനെയും കൃഷിയെയും അനുഭവിച്ചറിഞ്ഞ് വിദ്യാർഥികൾ. കണ്ണൂർ സെന്‍റ് മൈക്കിൾസ് ആംഗ്ലോ ഇന്ത്യൻ ഹയർ സെക്കൻഡറി സ്കൂൾ വിദ്യാരംഗം കലാസാഹിത്യവേദി കാർഷിക ക്ലബുമായി സഹകരിച്ച് നടത്തിയ "മണ്ണേ നമ്പി' കാർഷിക പാഠശാലയാണ് വിദ്യാർഥികൾക്ക് പ്രകൃതിയെ നേരിട്ടറിയാൻ അവസരമൊരുക്കിയത്. മയ്യിൽ മേച്ചേരി പാടശേഖരസമിതി അംഗങ്ങളും മയ്യിൽ പഞ്ചായത്ത് കുടുംബശ്രീ പ്രവർത്തകരും കൂട്ടായി എത്തിയപ്പോൾ വിദ്യാർഥികൾക്ക് മണ്ണിനെയും കൃഷിയെയും മഴയെയും നാട്ടു നന്മകളെയും പരിചയപ്പെടാനുള്ള അപൂർവ അവസരമാണ് ലഭിച്ചത്. മയ്യിൽ പഞ്ചായത്ത് പ്രസിഡന്‍റ് എം.വി. അജിത ഉദ്ഘാടനം ചെയ്തു. പഞ്ചായത്തംഗം എം.വി. രവി അധ്യക്ഷത വഹിച്ചു. പ്രഥമ ഷാജൂ പനയൻ സ്മാരക പുരസ്ക്കാര ജേതാവും നാട്ടിപാട്ട് കലാകാരിയുമായ പയ്യാടകത്ത് ദേവി നാട്ടിപ്പാട്ടുകളും കർഷക പുരസ്കാര ജേതാക്കളായ പി.വി. കാർത്യായനി, ലക്ഷ്മണൻ കുന്നുമ്പ്രത്ത് എന്നിവർ കൃഷി അനുഭവങ്ങളും അറിവുകളും പങ്കുവച്ചു. നാട്ടറിവ് പാട്ടുകൾക്ക് നാട്ടുകലാകാരക്കൂട്ടം ജില്ലാ പ്രസിഡന്‍റ് കുട്ടാപ്പു കതിരൂർ, പ്രജീഷ് കുറ്റ്യാട്ടൂർ, അഭി മുഴപ്പിലങ്ങാട് എന്നിവർ നേതൃത്വം നൽകി. വയൽ നടത്തം, സൊറവരമ്പ്, നിലമൊരുക്കൽ, ഞാറുനടീൽ, ചെളിയുത്സവം, കപ്പേം കാപ്പീം, കഞ്ഞിയും പുഴുക്കും എന്നിവയും പാഠശാലയുടെ ഭാഗമായി ഒരുക്കിയിരുന്നു. 57 വിദ്യാർഥികളും മൂന്ന് അധ്യാപകരും അഞ്ച് രക്ഷിതാക്കളും അടങ്ങുന്ന സംഘമാണ് പാഠശാലയിൽ പങ്കെടുത്തത്. സാംസ്കാരിക പ്രവർത്തകനും ദേശീയ അധ്യാപക പുരസ്കാര ജേതാവുമായ രാധാകൃഷ്ണൻ മാണിക്കോത്ത്, അധ്യാപകരായ ഫാ. ബാസ്റ്റിൻ ജോസ്, ഫാ. സ്റ്റീവൻസൻ, എ. സജിത്ത് എന്നിവർ പ്രസംഗിച്ചു. വിദ്യാർഥികളായ അമൻ എൽ. ബിനോയ്, സൂര്യദേവ് രാജേഷ്, പി. അർജുൻ, ശ്രാവൺ, ശ്രീകാന്ത് എന്നിവർ നേതൃത്വം നൽകി.

നായനാർമല ക്വാറി വിരുദ്ധ സമിതി ബഹുജന ധർണ ഇന്ന്

ചെമ്പന്തൊട്ടി: ശ്രീകണ്ഠപുരം നഗരസഭാ പരിധിയിൽ എക്സ്പ്ലോസീവ് മാഗസിൻ സ്ഥാപിക്കാൻ അനുമതി നൽകാനുള്ള നീക്കം ഉപേക്ഷിക്കണമെന്നും ചെമ്പന്തൊട്ടി നായനാർമലയിൽ പുതുതായി തുടങ്ങാൻ ശ്രമങ്ങൾ നടത്തിവരുന്ന ക്വാറിക്ക് അനുമതി നൽകരുതെന്നും ആവശ്യപ്പെട്ട് നായനാർമല ക്വാറി വിരുദ്ധ ജനകീയ സമിതിയുടെ നേതൃത്വത്തിൽ ഇന്ന് രാവിലെ 9.30 മുതൽ ശ്രീകണ്ഠപുരം നഗരസഭ ഓഫീസിനു മുന്നിൽ ബഹുജന ധർണ നടത്തും. ബഹുജന ധർണയുമായി ബന്ധപ്പെട്ട് ചെന്പന്തൊട്ടി സെന്‍റ് ജോർജ് ഫൊറോന പാരിഷ് ഹാളിൽ ചേർന്ന ക്വാറി വിരുദ്ധ സമിതി യോഗം ഫൊറോന വികാരി ഫാ. ആന്‍റണി മഞ്ഞളാംകുന്നേൽ ഉദ്ഘാടനം ചെയ്തു. നായനാർമല ക്വാറി വിരുദ്ധ സമിതി ഭാരവാഹികളായ കെ.സി. ജോസഫ്, കെ.ജെ. ചാക്കോ, കെ.എം. ഷംസീർ, ഷിനോ പാറയ്ക്കൽ, വർഗീസ് നെടിയകാലായിൽ, തോമസ് കുര്യൻ, രാജു വയലിൽ, സോയി ജോസഫ്, ജോയി നെയ്മണ്ണിൽ, വിനോദ് പുത്തൻപുര, ജോസ് പാറയിൽ, ജഫി കാക്കല്ലിൽ എന്നിവർ പ്രസംഗിച്ചു. നിലവിൽ സ്റ്റോപ്പ് മെമ്മോ നൽകിയിട്ടുള്ള ചെമ്പന്തൊട്ടി നായനാർമലയിൽ തന്നെ പുതിയ ക്വാറി തുടങ്ങാനുള്ള നീക്കം എന്തുവിലകൊടുത്തും തടയുമെന്ന് കേരള കോൺഗ്രസ് നേതാവ് വർഗീസ് വയലാമണ്ണിൽ പറഞ്ഞു. ഈ സാഹചര്യത്തിൽ ശ്രീകണ്ഠപുരം നഗരസഭയിലെ ഒന്നുമുതൽ അഞ്ചുവരെ വാർഡുകളിലെ ജനങ്ങളെ ഒന്നടങ്കം അണിനിരത്തിയുള്ള പ്രക്ഷോഭത്തിന് കേരള കോൺഗ്രസ് നേതൃത്വം നൽകുമെന്നും അദ്ദേഹം അറിയിച്ചു.

"സ്റ്റെം അറ്റ് സ്കൂൾ' പരിശീലന പരിപാടി ഒന്നാംഘട്ടം നടത്തി

പയ്യാവൂർ: മടമ്പം പികെഎം കോളജ് ഓഫ് എഡ്യുക്കേഷനിൽ സൃഷ്ടി റോബോട്ടിക്സ് ആൻഡ് ടെക്‌നോളജീസുമായി സഹകരിച്ചു നടപ്പാക്കുന്ന അക്കാഡമിക് പ്രോജക്ടായ "സ്റ്റെം അറ്റ് സ്കൂൾ' പദ്ധതിയുടെ ഒന്നാംഘട്ട പരിശീലന പരിപാടി നടത്തി. അഞ്ചു മുതൽ എട്ടു വരെ ക്ലാസുകളിൽ പഠിക്കുന്ന വിദ്യാർഥികൾക്ക് നൂതന സാങ്കേതിക വിദ്യകളായ റോബോട്ടിക്സ്, ത്രിഡി പ്രിന്‍റിംഗ്, കോഡിംഗ് എന്നിവയിൽ പരിശീലനം നൽകി. രാവിലെ 10 മുതൽ വൈകുന്നേരം നാലുവരെ കോളജിലെ സ്റ്റെം ലബോറട്ടറിയിൽ നടന്ന പരിശീലനത്തിന് സൃഷ്ടി റോബോട്ടിക്സ് ആൻഡ് ടെക്‌നോളജിസ്‌ സിഇഒ സുനിൽ പോളും സ്റ്റെം മെന്‍റേഴ്സും നേതൃത്വം നൽകി. കോളജ് വൈസ് പ്രിൻസിപ്പൽ ഡോ. പ്രശാന്ത് മാത്യു പരിശീലന പരിപാടി ഉദ്ഘാടനം ചെയ്തു. ചെമ്പേരി വിമൽ ജ്യോതി എൻജിനിയറിംഗ് കോളജ് ഇലക്‌ട്രോണിക്സ് വിഭാഗം അധ്യാപിക ഡോ. ടി.വി. റോഷ്‌നി മുഖ്യ പ്രഭാഷണം നടത്തി.

പ്രകൃതി സംരക്ഷണ സന്ദേശ മഴയാത്ര നടത്തി

ചെമ്പേരി: മലയോര വിനോദ സഞ്ചാര കേന്ദ്രമായ പൈതൽമലയിലേക്ക് വൈഎംസിഎ ചെമ്പേരി യൂണിറ്റിന്‍റെ ആഭിമുഖ്യത്തിൽ പ്രകൃതി സംരക്ഷണ സന്ദേശ മഴയാത്ര സംഘടിപ്പിച്ചു. പൊട്ടംപ്ലാവ് ടൗണിൽ നിന്നാരംഭിച്ച മഴയാത്ര പൊട്ടംപ്ലാവ് സെന്‍റ് ജോസഫ്സ് പള്ളി വികാരി ഫാ. ജിസ് കളപ്പുരയ്ക്കൽ, ശ്രീകണ്ഠപുരം ഗവ. ഹയർ സെക്കൻഡറി സ്കൂൾ അധ്യാപകൻ അനീഷ് ജോസഫ് എന്നിവർ ചേർന്ന് ഫ്ലാഗ്ഓഫ് ചെയ്തു. വൈഎംസിഎ പ്രസിഡന്‍റ് ഷീൻ ഏബ്രഹാം അധ്യക്ഷത വഹിച്ചു. നടുവിൽ പഞ്ചായത്ത് അംഗം അലക്സ് ചുനയമ്മാക്കൽ പ്രസംഗിച്ചു. പ്രോഗ്രാം ഡയറക്ടർമാരായ വിമൽ ജ്യോതി എൻജിനിയറിംഗ് കോളജ് പ്രഫ. ജോമി ജോസ്, മണിക്കടവ് സെന്‍റ് തോമസ് ഹയർ സെക്കൻഡറി സ്കൂൾ പ്രിൻസിപ്പൽ ഷാജി വർഗീസ്, ശ്രീകണ്ഠപുരം എസ്ഇഎസ് കോളജ് അസിസ്റ്റന്‍റ് പ്രഫ. ദീപു ജോസ്, ചെമ്പേരി നിർമല ഹയർ സെക്കൻഡറി സ്കൂൾ അധ്യാപകൻ വിനോദ് അഗസ്റ്റിൻ, വൈഎംസിഎ ചെമ്പേരി യൂണിറ്റ് സെക്രട്ടറി റോബി ഇലവുങ്കൽ, ട്രഷറർ സാജു കൊട്ടാരം, സിബി പിണക്കാട്ട് എന്നിവർ നേതൃത്വം നൽകി. വൈഎംസിഎ കുടുംബാംഗങ്ങളോടൊപ്പം ചെമ്പേരി നിർമല ഹയർ സെക്കൻഡറി സ്കൂൾ എസ്പിസി, എൻസിസി കേഡറ്റുകൾ, ശ്രീകണ്ഠപുരം എസ്ഇഎസ് കോളജിൽ നിന്നും നെല്ലിക്കുറ്റി സെന്‍റ് അഗസ്റ്റിൻസ് ഹൈസ്കൂളിൽ നിന്നുമുള്ള വിദ്യാർഥികളും മഴയാത്രയിൽ പങ്കെടുത്തു. പൈതൽമലയിൽ ഒത്തുചേർന്ന യാത്രാ സംഘം സൂംബാ ഡാൻസ് ഉൾപ്പെടെ വിവിധ കലാപരിപാടികൾ അവതരിപ്പിച്ചു. കഥാകാരനും ശ്രീകണ്ഠപുരം ഗവ.ഹയർ സെക്കൻഡറി സ്കൂൾ അധ്യാപകനുമായ അനീഷ് ജോസഫ് പ്രകൃതി സംരക്ഷണ സന്ദേശം നൽകി. വൈഎംസിഎ സൗത്ത് വെസ്റ്റ് ഇന്ത്യാ റീജണൽ ചെയർമാൻ പ്രഫ. അലക്സ് തോമസ് സമാപന സമ്മേളനം ഉദ്ഘാടനം ചെയ്തു. സബ് റീജണൽ ചെയർമാൻ ബെന്നി ജോൺ, റീജണൽ മുൻ ആക്‌ടിംഗ് ചെയർമാൻ ജിയോ ജേക്കബ് എന്നിവർ പ്രസംഗിച്ചു.

ക്ഷീരമേഖലയെ തകർക്കരുത്: ആർകെഎംഎസ്

പയ്യാവൂർ: നിർദിഷ്ട ഇൻഡോ-അമേരിക്ക വ്യാപാരകരാർ നടപ്പാക്കിയാൽ രാജ്യത്തെ ക്ഷീരമേഖല തകരുമെന്ന് രാഷ്‌ട്രീയ കിസാൻ മഹാ സംഘ് (ആർകെഎംഎസ്) സംസ്ഥാന ചെയർമാൻ ബിനോയ് തോമസ്. ആർകെഎംഎസ് കണ്ണൂർ ജില്ലാ നേതൃസംഗമം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കരാർ നടപ്പായാൽ പാൽക്കട്ടി, പാൽപ്പൊടി എന്നിവ വ്യാപകമായ തോതിൽ ഇന്ത്യയിലേക്ക് ഇറക്കുമതി ചെയ്യപ്പെടും. ഇത് രാജ്യത്തെ പതിനഞ്ചു കോടിയോളം വരുന്ന ക്ഷീരകർഷകരുടെ തകർച്ചയിലേക്കാണ് നയിക്കപ്പെടുക. ഗാട്ട്, ആസിയാൻ കരാറുകളുടെ ഭാഗമായി ഇറക്കുമതി തീരുവ വലിയ തോതിൽ കുറച്ചതിനെ തുടർന്ന് നാണ്യവിളകളുടെ വിലയിടിവ് കാർഷിക മേഖലയെ കടുത്ത പ്രതിസന്ധിയിലാക്കിയിട്ടുണ്ട്. കേരളത്തിലെ ക്ഷീരമേഖല തകർന്നാൽ ലക്ഷക്കണക്കിന് ക്ഷീരകർഷകരെ മാത്രമല്ല മിൽമയുമായി ബന്ധപ്പെട്ട് പ്രവർത്തിക്കുന്ന ആയിരക്കണക്കിന് ജീവനക്കാരുടെ കുടുംബങ്ങളും അനാഥമായിത്തീരും. അതിനാൽ ഇന്ത്യയിലെ പ്രത്യേകിച്ച് കേരളത്തിലെ കർഷകരുടെ നടുവൊടിക്കുന്ന നിർദിഷ്ട ഇൻഡോ-അമേരിക്ക വ്യാപാര കരാറിൽ നിന്ന് ഇന്ത്യ പിന്മാറണമെന്നും ബിനോയ് തോമസ് ആവശ്യപ്പെട്ടു. ജില്ലാ ചെയർമാൻ സണ്ണി അഗസ്റ്റിൻ അധ്യക്ഷത വഹിച്ചു. ഗാന്ധിയൻ കളക്ടീവ് സംസ്ഥാന ചെയർമാൻ സണ്ണി പൈകട മുഖ്യാതിഥിയായിരുന്നു. വിവിധ സംഘടനാ നേതാക്കളായ കുര്യാക്കോസ് പുതിയിടത്തുപറമ്പിൽ, അഗസ്റ്റിൻ വെള്ളാരംകുന്നേൽ, ഗർവാസിസ് കല്ലുവയൽ, ജോസഫ് വടക്കേക്കര, ടി.ജെ. ദേവസ്യ, പീറ്റർ പുത്തൻപറമ്പിൽ, കെ.വി. ചാക്കോ, എം.വി. ലീലാമ്മ, എം.ജെ. ജോസഫ്, ജോയി ഉളിക്കൽ, കെ.വി. ശാന്തകുമാരി, റെജി വെള്ളറയ്ക്കൽ, ബിനോയി പുത്തൻനടയിൽ, അമൽ പുളിയ്ക്കൽ എന്നിവർ പ്രസംഗിച്ചു.

കേരള പൂരക്കളി കലാഅക്കാദമി ഇനി മുതല്‍ പൂരക്കളി കലാ അസോ.

കാഞ്ഞങ്ങാട്: കേരള പൂരക്കളി കലാഅക്കാദമി ഇനിമുതല്‍ കേരള പൂരക്കളി കലാ അസോസിയേഷന്‍ എന്നറിയപ്പെടും. കേരള സർക്കാരിന്‍റെ പൂരക്കളി അക്കാഡമിയുമായി സമാനത തോന്നുന്ന പേരിന്‍റെ സാങ്കേതിക പ്രശ്നങ്ങൾ കണക്കിലെടുത്താണ് സംഘടനയുടെ പേരുമാറ്റം. ചാമുണ്ഡിക്കുന്ന് ശ്രീ വിഷ്ണു ചാമുണ്ഡേശ്വരി ക്ഷേത്രഓഡിറ്റോറിയത്തില്‍ നടന്ന സംസ്ഥാനസമ്മേളനത്തിന്‍റെ പ്രതിനിധിസമ്മേളനം വിഷ്ണു ചാമുണ്ഡേശ്വരി ക്ഷേത്രസ്ഥാനികര്‍, കേരള പൂരക്കളി കലാ അക്കാദമി തലമുതിര്‍ന്ന പ്രവര്‍ത്തകരായ ടി. ചോയ്യമ്പു, വലത്തു വളപ്പില്‍ കുഞ്ഞിക്കണ്ണന്‍ അടോട്ട്, കുഞ്ഞിക്കണ്ണന്‍ മാസ്റ്റര്‍ കാടാങ്കോട്ട്, സംഘാടക സമിതി ചെയര്‍മാന്‍ ഡോ.സി.കെ.നാരായണ പണിക്കര്‍, ചാമുണ്ഡിക്കുന്ന് ക്ഷേത്രം പ്രസിഡന്‍റ് ജനാര്‍ദനന്‍ കുന്നരുവത്ത് എന്നിവര്‍ ചേര്‍ന്ന് ഭദ്രദീപം തെളിച്ച് ഉദ്ഘാടനം ചെയ്തു. സംസ്ഥാന ചെയര്‍മാന്‍ ടി.ഐ. മധുസൂദനന്‍ എംഎല്‍എ അധ്യക്ഷതവഹിച്ചു. മടിക്കൈ ഗോപാലകൃഷ്ണന്‍ പണിക്കര്‍, കാഞ്ഞങ്ങാട് ദാമോദരപണിക്കര്‍, കുഞ്ഞിക്കണ്ണന്‍ കയ്യൂര്‍, പി.വി. മോഹനന്‍, എന്‍. കൃഷ്ണന്‍, മണിയറ ചന്ദ്രന്‍, സന്തോഷ് പാലായി എന്നിവര്‍ പ്രസംഗിച്ചു. ഭാരവാഹികള്‍: ടി.ഐ. മധുസൂദനന്‍ എംഎല്‍എ (ചെയര്‍മാന്‍), മടിക്കൈ ഗോപാലകൃഷ്ണപണിക്കര്‍ (ജനറല്‍ കണ്‍വീനര്‍).

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]