മൂവാറ്റുപുഴ: പ്രകൃതിരമണീയമായ പായിപ്ര പഞ്ചായത്ത് പോയാലിമലയിലെ ബയോസർവേയിൽ 83 സസ്യ ഇനങ്ങളും 23 ചിത്രശലഭ ഇനങ്ങളും കണ്ടെത്തിയതായി റിപ്പോർട്ട്. ആയുർവേദ മെഡിക്കൽ അസോസിയേഷൻ ഓഫ് ഇന്ത്യ മൂവാറ്റുപുഴ ഏരിയ, തൃപ്പൂണിത്തുറ ഗവ. ആയുർവേദ കോളജ് ഫോറസ്റ്റ് ക്ലബ്, നങ്ങേലിൽ ആയുർവേദ മെഡിക്കൽ കോളജ് ഫോറസ്റ്റ് ക്ലബ് എന്നിവയുടെ സംയുക്താഭിമുഖ്യത്തിലാണ് സർവേ സംഘടിപ്പിച്ചത്.
പ്രാഥമിക സർവേയിൽ 40 സസ്യ കുടുംബങ്ങളിലെ 83 സസ്യ ഇനങ്ങളെയാണ് കണ്ടെത്താനായത്. 83 സസ്യങ്ങളിൽ 27 വൃക്ഷങ്ങൾ, 26 ചെറുസസ്യങ്ങൾ, 14 കുറ്റിച്ചെടികൾ, 15 വള്ളിച്ചെടികൾ, ഒപ്പം ഒരു പായൽ ഇനവും ഉൾപ്പെടുന്നു.
നിംഫാലിഡേ വിഭാഗത്തിൽ 12 സ്പീഷീസ്, പിയറിഡേ നാല് ഇനങ്ങൾ, പാപ്പിലിയോനിഡേ മൂന്ന് ഇനങ്ങൾ, ഹെസ്പെരിഡേ രണ്ട് ഇനങ്ങൾ, ലൈകനിഡേ രണ്ട് ഇനങ്ങൾ എന്നിവയാണ് കണ്ടെത്തിയ പ്രധാന ചിത്രശലഭ ഇനങ്ങൾ. പോയാലിമലയുടെ ജൈവ വൈവിധ്യവും അതിന്‍റെ പാരിസ്ഥിതിക പ്രാധാന്യവും ഇതുവഴി കൂടുതൽ പ്രസക്തമാകുന്നു.
വിവിധ ജൈവ ആവാസവ്യവസ്ഥകളുടെ സംരക്ഷണത്തിനും വരും തലമുറയ്ക്കായി ഇവയെ നിലനിർത്തുന്നതിനും ആവശ്യമായ നടപടികളും അടിയന്തരമായി ആവിഷ്കരിക്കേണ്ടതുണ്ട്.
പായിപ്ര പഞ്ചായത്ത് പ്രസിഡന്‍റ് പി.എം. അസീസിന് പോയാലിമല ബയോസർവേ റിപ്പോർട്ട് ആയുർവേദ മെഡിക്കൽ അസോസിയേഷൻ ഓഫ് ഇന്ത്യ മൂവാറ്റുപുഴ ഏരിയ പ്രസിഡന്‍റ് ശ്രീരാജ് കെ. ദാമോദർ കൈമാറി.
പായിപ്ര ഗവ. ആയുർവേദ ഡിസ്പെൻസറി മെഡിക്കൽ ഓഫീസർ ജോസഫ് തോമസ്, പഞ്ചായത്ത് സെക്രട്ടറി കെ.എച്ച്. ഷാജി, സ്ഥിരംസമിതി അധ്യക്ഷൻ എം.എസ്. മുഹമ്മദ് ഷാഫി, അംഗങ്ങളായ എം.എ. നൗഷാദ്, എ.ടി. സുരേന്ദ്രൻ, വിജി പ്രഭാകരൻ, വി.ഇ. നാസർ, എൽജി റോയ്, പഞ്ചായത്ത് ജീവനക്കാർ എന്നിവർ പങ്കെടുത്തു.