മാധ്യമപ്രവര്‍ത്തകര്‍ക്ക് എതിരായ മാനനഷ്‌ടക്കേസ് റദ്ദാക്കി
Sunday, August 11, 2024 1:22 AM IST
കൊച്ചി: മാതാ അമൃതാനന്ദമയിയെയും കൊല്ലം അമൃതപുരിയിലെ മഠത്തെയും കുറിച്ച് അമൃതാനന്ദമയിയുടെ മുന്‍ ശിഷ്യ ഗെയില്‍ ട്രെഡ്‌വെല്‍ എഴുതിയ ‘ഹോളി ഹെല്‍’ എന്ന പുസ്തകം ചര്‍ച്ച ചെയ്തതിന് മാധ്യമ പ്രവര്‍ത്തകരായ എം.വി. നികേഷ്‌കുമാറിനും പി.കെ. പ്രകാശിനുമെതിരായ മാനനഷ്‌ടക്കേസ് ഹൈക്കോടതി റദ്ദാക്കി.
സ്വകാര്യ ചാനലില്‍ പുസ്തകം ചര്‍ച്ച ചെയ്യുന്ന പരിപാടി സംപ്രേഷണം ചെയ്തതിനെതിരേ ഭക്ത നല്‍കിയ അപകീര്‍ത്തിക്കേസാണു ജസ്റ്റീസ് പി.വി. കുഞ്ഞിക്കൃഷ്ണന്‍ റദ്ദാക്കിയത്. പുസ്തകം എഴുതിയ വ്യക്തിക്കോ പ്രസിദ്ധീകരിച്ചവര്‍ക്കോ എതിരേ ആക്ഷേപമില്ല. പകരം പുസ്തകത്തെക്കുറിച്ച് റിപ്പോര്‍ട്ട് ചെയ്ത മാധ്യമങ്ങള്‍ക്കെതിരേ കേസെടുക്കണമെന്ന ആവശ്യം അംഗീകരിക്കാനാകില്ലെന്ന് കോടതി ചൂണ്ടിക്കാട്ടി.
പ്രസിദ്ധീകരിച്ച പുസ്തകം ചര്‍ച്ച ചെയ്യാന്‍ മാധ്യമങ്ങള്‍ക്ക് അവകാശമുണ്ടെന്നും അപകീര്‍ത്തിപരമായ ആരോപണങ്ങള്‍ ഉന്നയിച്ച് അവരെ നിശബ്‌ദരാക്കാനാകില്ലെന്നും കോടതി വ്യക്തമാക്കി. പുസ്തകം പൊതുസമൂഹത്തില്‍ ലഭ്യമാകുമ്പോള്‍ അതേക്കുറിച്ചു ചര്‍ച്ച ചെയ്യേണ്ടത് മാധ്യമപ്രവര്‍ത്തകരുടെ കടമയാണെന്നും കോടതി അഭിപ്രായപ്പെട്ടു.
സന്ദേശം സിനിമയിലെ ‘പോളണ്ടിനെ പറ്റി ഒരക്ഷരം മിണ്ടരുത്’ എന്ന ഡയലോഗ് ഉദ്ദരിച്ചാണ് കോടതി ഉത്തരവ്. പുസ്തകത്തിന്‍റെ ഉള്ളടക്കം ചര്‍ച്ച ചെയ്യുന്നത് ഹര്‍ജിക്കാരുടെ അഭിപ്രായ സ്വാതന്ത്ര്യമാണ്. അതിനാല്‍ പുസ്തകം ചര്‍ച്ച ചെയ്ത മാധ്യമപ്രവര്‍ത്തകരെ പ്രോസിക്യൂട്ട് ചെയ്യുന്നത് അനുവദിക്കാനാകില്ലെന്നും കോടതി വ്യക്തമാക്കി.