കോണ്‍ഗ്രസ് പ്രവര്‍ത്തകനെതിരായ കേസ് ഫാസിസ്റ്റ് നടപടി: മുഹമ്മദ് ഷിയാസ്
Monday, August 5, 2024 2:04 AM IST
കൊച്ചി: മുഖ്യമന്ത്രിയുടെ ദുരിതാശ്വാസ നിധിയെ വിമര്‍ശിച്ചതിന്‍റെ പേരില്‍ കളമശേരിയിലെ കോണ്‍ഗ്രസ് പ്രവര്‍ത്തകന്‍ കെ.എച്ച്. ഷിജുവിനെതിരായ പോലീസ് കേസ് ഫാസിസ്റ്റ് നടപടിയെന്ന് ഡിസിസി പ്രസിഡന്‍റ് മുഹമ്മദ് ഷിയാസ്.
പ്രളയദുരിതാശ്വാസ ഫണ്ടില്‍ നിന്നു തട്ടിപ്പ് നടത്തിയെന്ന ആരോപണം നേരിട്ട സിപിഎം മുന്‍ ഏരിയ സെക്രട്ടറിയുടെ പരാതിയിൽ പോലീസിന്‍റെ അതിവേഗ ഇടപെടല്‍ വിചിത്രമാണ്. കോണ്‍ഗ്രസ് പ്രവര്‍ത്തകനെതിരായ കേസില്‍ പോലീസ് കാട്ടിയ തിടുക്കം പരാതിക്കാരനായ സിപിഎം നേതാവ് മുമ്പ് നടത്തിയ തട്ടിപ്പുകളില്‍ ഉണ്ടായില്ല. അനധികൃത സ്വത്തുസമ്പാദനം ഉള്‍പ്പെടെയുള്ള വിഷയങ്ങളില്‍ പാര്‍ട്ടിയില്‍നിന്നുപോലും നടപടി നേരിട്ടയാളാണു സക്കീര്‍ ഹുസൈനെന്നും അദ്ദേഹം പറഞ്ഞു.
മുഖ്യമന്ത്രിയുടെ ദുരിതാശ്വാസനിധിയില്‍ ജനങ്ങള്‍ക്കു വിശ്വാസം നഷ്‌ടമായെങ്കില്‍ അതിനുത്തരവാദി സര്‍ക്കാര്‍ തന്നെയാണ്. വയനാട്ടിൽ സര്‍ക്കാരിന്‍റെ ദുരന്തനിവാരണ പ്രവര്‍ത്തനങ്ങളില്‍ കോണ്‍ഗ്രസ് പാര്‍ട്ടി ഒപ്പം തന്നെയുണ്ട്. അതേസമയം, സര്‍ക്കാരിനെതിരേ ഉയര്‍ന്നുവരുന്ന വിമര്‍ശനങ്ങളില്‍ പ്രതികാരനടപടികള്‍ തുടര്‍ന്നാല്‍ നോക്കിയിരിക്കില്ലെന്ന് ഷിയാസ് വ്യക്തമാക്കി.