രഞ്ജിക്കില്ല; സഞ്ജു ആഫ്രിക്കയിലേക്ക്
Sunday, October 27, 2024 2:26 AM IST
കോൽക്കത്ത/മുംബൈ: രഞ്ജി ട്രോഫി ക്രിക്കറ്റിന്‍റെ മൂന്നാം റൗണ്ട് പോരാട്ടത്തിൽ കേരള ടീമിൽ സഞ്ജു സാംസണ്‍ കളിച്ചേക്കില്ലെന്നു സൂചന. ബംഗാളിനെതിരേ ഇന്നലെയായിരുന്നു കേരളത്തിന്‍റെ മൂന്നാം രഞ്ജി ട്രോഫി പോരാട്ടം. എന്നാൽ, മഴയെത്തുടർന്ന് ടോസ് ചെയ്യാൻ പോലും സാധിക്കാതെ ആദ്യദിനം ഉപേക്ഷിച്ചു. ചുണ്ടിൽ ചെറിയ ശസ്ത്രക്രിയയ്ക്കു വിധേയമായശേഷം ദക്ഷിണാഫ്രിക്കൻ പര്യടനത്തിനു മുന്പ് ആരോഗ്യം വീണ്ടെടുക്കാനുള്ള ശ്രമത്തിലാണ് സഞ്ജു.
ദക്ഷിണാഫ്രിക്കൻ പര്യടനത്തിനുള്ള ഇന്ത്യൻ ട്വന്‍റി-20 ടീമിൽ മലയാളി വിക്കറ്റ് കീപ്പർ ബാറ്ററായ സഞ്ജു സാംസണ്‍ ഉൾപ്പെട്ടിട്ടുണ്ട്. ബംഗ്ലാദേശിനെതിരായ പരന്പരയിലേതുപോലെ ഓപ്പണിംഗ് റോളിലാണ് സഞ്ജുവിനെ ടീമിൽ ഉൾപ്പെടുത്തിയിരിക്കുന്നത്. പുതുമുഖങ്ങളായി രമണ്‍ദീപ് സിംഗ്, വിജയകുമാർ വൈശാഖ് എന്നിവരും രാജ്യാന്തര അരങ്ങേറ്റം നടത്താത്ത യാഷ് ദയാലും ദക്ഷിണാഫ്രിക്കൻ പര്യടനത്തിനുള്ള ഇന്ത്യൻ ടീമിലുണ്ട്.
ദക്ഷിണാഫ്രിക്കൻ പര്യടനത്തിനുള്ള ഇന്ത്യൻ ടീം: സൂര്യകുമാർ യാദവ് (ക്യാപ്റ്റൻ), അഭിഷേക് ശർമ, സഞ്ജു സാംസണ്‍ (വിക്കറ്റ് കീപ്പർ), റിങ്കു സിംഗ്, തിലക് വർമ, ജിതേഷ് ശർമ (വിക്കറ്റ് കീപ്പർ), ഹാർദിക് പാണ്ഡ്യ, അക്സർ പട്ടേൽ, രമണ്‍ദീപ് സിംഗ്, വരുണ്‍ ചക്രവർത്തി, രവി ബിഷ്ണോയ്, അർഷദീപ് സിംഗ്, വിജയകുമാർ വൈശാഖ്, ആവേശ് ഖാൻ, യാഷ് ദയാൽ.