ജസ്റ്റീസ് ഹേമ കമ്മിറ്റി റിപ്പോര്‍ട്ട് പുറത്തുവിടാം
Wednesday, August 14, 2024 2:04 AM IST
കൊച്ചി: സിനിമാ മേഖലയിലെ സ്ത്രീകളുടെ പ്രശ്‌നങ്ങള്‍ സംബന്ധിച്ച പഠനം നടത്തിയ ജസ്റ്റീസ് കെ. ഹേമ കമ്മിറ്റി റിപ്പോര്‍ട്ട് പുറത്തുവിടാമെന്നു ഹൈക്കോടതി. റിപ്പോര്‍ട്ട് പുറത്തുവിടുന്നതിനെതിരേ നിര്‍മാതാവ് സജിമോന്‍ പാറയില്‍ നല്‍കിയ ഹര്‍ജി തള്ളിയാണു ജസ്റ്റീസ് വി.ജി. അരുണിന്‍റെ ഉത്തരവ്.
റിപ്പോര്‍ട്ട് പുറത്തുവിടുന്നത് ഹര്‍ജിക്കാരനെ നിയമപരമായി അടക്കം എങ്ങനെ ബാധിക്കുമെന്നു വ്യക്തമാക്കാനാകാത്ത സാഹചര്യത്തില്‍ ഹര്‍ജി നിയമപരമായി നിലനില്‍ക്കില്ലെന്നു കോടതി വിലയിരുത്തി.
രാഷ്‌ട്രനിര്‍മാണത്തില്‍ മാധ്യമങ്ങളുടെ പങ്ക് സംബന്ധിച്ച തെറ്റിദ്ധാരണയില്‍നിന്നാണ് മാധ്യമങ്ങളില്‍ റിപ്പോര്‍ട്ട് വരുന്നതു വ്യക്തിഹത്യക്കു കാരണമാകുമെന്ന ഹര്‍ജിക്കാരന്‍റെ ആശങ്കയ്ക്കു കാരണം.
ആരുടെയും സ്വകാര്യത ഹനിക്കപ്പെടാത്തതിനാല്‍ ഇത്തരം ആശങ്കയ്ക്ക് അടിസ്ഥാനമില്ലെന്നു വ്യക്തമാക്കി കോടതി ഹര്‍ജി തള്ളുകയായിരുന്നു. ഉത്തരവ് നടപ്പാക്കാനായി കമ്മീഷന്‍ നിര്‍ദേശിച്ചിട്ടുള്ള തീയതി ഒരാഴ്ചത്തേക്ക് കോടതി നീട്ടുകയും ചെയ്തു.
2019ല്‍ കൈമാറിയ ഹേമ കമ്മിറ്റി റിപ്പോര്‍ട്ട് പുറത്തുവിടാതിരുന്നതിനെത്തുടര്‍ന്ന് മാധ്യമപ്രവര്‍ത്തകര്‍ അടക്കം നല്‍കിയ അപേക്ഷയില്‍, സ്വകാര്യത ഭംഗിക്കുന്ന ഭാഗം ഒഴിവാക്കി റിപ്പോര്‍ട്ട് നല്‍കാന്‍ വിവരാവകാശ കമ്മീഷന്‍ ഉത്തരവിട്ടിരുന്നു. ഇതേത്തുടര്‍ന്ന് റിപ്പോര്‍ട്ട് പുറത്തുവിടാനിരിക്കുന്ന ദിവസമായിരുന്നു ഹര്ജിക്കാരന് കോടതിയെ സമീപിച്ചത്. അന്നുതന്നെ റിപ്പോര്‍ട്ട് പുറത്തുവിടുന്നതു സ്റ്റേ ചെയ്യുകയും ചെയ്തിരുന്നു.
മറച്ചുവച്ച് നല്‍കിയാലും മൊഴി നല്‍കിയവരെ തിരിച്ചറിയാന്‍ സാധ്യതയുണ്ടെന്നായിരുന്നു ഹർജിയിലെ വാദം. എന്നാല്‍, വിവരാവകാശ നിയമ പ്രകാരം അനുവദനീയമായ ഭാഗം മാത്രമാണ് അപേക്ഷകന്‍ ആവശ്യപ്പെട്ടിരുന്നതെന്നും അതു നിഷേധിക്കാനാകില്ലെന്നും ഹര്‍ജി നിലനില്‍ക്കില്ലെന്നും വിവരാവകാശ കമ്മീഷന്‍ വ്യക്തമാക്കി.
സംഭവവുമായി ബന്ധമില്ലാത്ത ഹര്ജിക്കാരന് ഇത്തരമൊരു ഹര്‍ജി നല്‍കാനാകില്ലെന്നു സര്‍ക്കാരും, സിനിമാ മേഖലയിലെ സ്ത്രീകള്‍ നേരിടുന്ന പ്രശ്‌നങ്ങള്‍ ചര്‍ച്ച ചെയ്യപ്പെടണമെന്നും അതിനായി റിപ്പോര്‍ട്ട് പുറത്തുവിടണമെന്നും വിമന്‍ ഇന്‍ സിനിമ കളക്ടീവും വനിതാ കമ്മീഷനും നിലപാടെടുത്തു.
വ്യക്തികളുടെ സ്വകാര്യത പുറത്തു പോകാതിരിക്കാനാവശ്യമായ നിര്‍ദേശങ്ങള്‍ വിവരാവകാശ കമ്മീഷന്‍ ഉത്തരവില്‍ത്തന്നെ ഉള്‍പ്പെടുത്തിയിട്ടുണ്ടന്നു കോടതി ചൂണ്ടിക്കാട്ടി.