ADVERTISEMENT

ADVERTISEMENT

കരിങ്ങഴ സ്കൂൾ ഗ്രൗണ്ട് യാഥാർഥ്യമായി

കോതമംഗലം: കോതമംഗലം നഗരസഭയിലെ കരിങ്ങഴ ഗവ എൽ പി സ്കൂൾ സ്കൂൾ ഗ്രൗണ്ട് യഥാർഥ്യമായി. ആന്‍റണി ജോൺ എംഎൽഎ ഉദ്ഘാടനം നിർവഹിച്ചു. മുനിസിപ്പൽ ചെയർമാൻ കെ.കെ. ടോമി അധ്യക്ഷത വഹിച്ചു. കൗൺസിലർ എൽദോസ് പോൾ, എച്ച്എം ടി.എ. ഷെമീന എന്നിവർ പ്രസംഗിച്ചു.

വികസനകാര്യ സ്ഥിരം സമിതി ചെയർമാൻ കെ.എ. നൗഷാദ്, നഗരസഭ മുൻ വൈസ് ചെയർമാൻ പ്രിൻസ് വർക്കി, സ്കൂൾ പിടിഎ പ്രസിഡന്‍റ് സജിത സോമൻ, ആശാ വർക്കർ ബിജി എൽദോസ്, ന്യൂലൈറ്റ് ആർട്സ് ആൻഡ് സ്പോർട്സ് ക്ലബ്‌ സെക്രട്ടറി കെ.ആർ. ജിബിൻ എന്നിവർ പങ്കെടുത്തു. ചടങ്ങിനോടനുബന്ധിച്ച് ഫുട്ബോൾ ടൂർണമെന്‍റും നടത്തി. നഗരസഭയുടെ കഴിഞ്ഞ നാല് വർഷങ്ങളിലെ പദ്ധതി ഫണ്ട്‌ വിനിയോഗിച്ചുകൊണ്ടാണ് ഗ്രൗണ്ടിന്‍റെ നിർമാണം പൂർത്തീകരിച്ചത്.

ADVERTISEMENT

നായ്‌പ്പേടിയില്‍ നാട്

കൊച്ചി: എറണാകുളം വടക്കന്‍ പറവൂരില്‍ മൂന്നര വയസുകാരിയുടെ ചെവി തെരുവുനായ കടിച്ചെടുത്തു. നായരമ്പലത്ത് തെരുവുനായ ആക്രമണത്തില്‍ മൂന്നു പേര്‍ക്ക് പരിക്കേറ്റു. കഴിഞ്ഞ രണ്ടു ദിവസത്തിനിടയിലെ സംഭവങ്ങളാണിത്. ജില്ലയില്‍ തെരുവുനായ്ക്കളുടെ കടിയേല്‍ക്കുന്നവരുടെ എണ്ണം നാൾക്കുനാൾ വര്‍ധിക്കുകയാണ്. ഞായറാഴ്ച വൈകുന്നേരം നീണ്ടൂര്‍ രാമന്‍കുളങ്ങര ക്ഷേത്രത്തിനു സമീപം കൂട്ടുകാര്‍ക്കൊപ്പം കളിക്കുന്നതിനിടെയാണ് നിഹാര എന്ന മൂന്നര വയസുകാരിയുടെ ചെവി തെരുവുനായ കടിച്ചുകീറിയത്. അറ്റുപോയ ചെവിയുടെ ഭാഗം പ്ലാസ്റ്റിക് സര്‍ജറിയിലൂടെ ഇന്നലെ വച്ചുപിടിപ്പിച്ചു. ഇടവഴിയിലും പൊതു റോഡിലുമൊക്കെ ഏതു നിമിഷവും മുന്നിലേക്ക് കുരച്ചു ചാടിയെത്തുന്ന തെരുവുനായയുടെ കടിയേല്‍ക്കാതെ രക്ഷപ്പെടുന്നവര്‍ ഭാഗ്യവാന്മാര്‍ എന്നെ പറയാനാവൂ. എറണാകുളം ജനറല്‍ ആശുപത്രിയില്‍ രോഗിയുടെ കൂട്ടിരിപ്പുകാര്‍ ഉള്‍പ്പെടെ അഞ്ചുപേര്‍ക്കു തെരുവു നായ്ക്കളുടെ കടിയേറ്റത് അടുത്തിടെയാണ്. മഹാരാജാസ് കോളജ് പരിസരത്ത് വച്ച് രണ്ടു വിദ്യാര്‍ഥികള്‍ക്കും ജില്ലാ കോടതിയില്‍ പോലീസ് ഉദ്യോഗസ്ഥനും വാച്ചര്‍ക്കും തെരുവുനായയുടെ കടിയേറ്റ സംഭവങ്ങളും അടുത്തിടെ റിപ്പോര്‍ട്ട് ചെയ്തിരുന്നു. തെരുവുനായ നിയന്ത്രണത്തിനായി സര്‍ക്കാര്‍ വിവിധ പദ്ധതികള്‍ ആവിഷ്‌കരിച്ചിട്ടുണ്ടെങ്കിലും അതൊന്നും ഫലപ്രദമല്ലെന്നാണ് നായയുടെ കടിയേല്‍ക്കുന്നവരുടെ എണ്ണം സൂചിപ്പിക്കുന്നത്. നഷ്ടപരിഹാരത്തിനായി തെരുവുനായയുടെ ആക്രമണത്തിന് ഇരയാകുന്നവര്‍ക്ക് ജില്ലാ ലീഗല്‍ സര്‍വീസ് അഥോറിറ്റി സെക്രട്ടറി ചെയര്‍പേഴ്‌സണായി സ്‌ട്രേ ഡോഗ് വിക്ടിം കോമ്പന്‍സേഷന്‍ റെക്കമന്‍റേഷന്‍ കമ്മിറ്റി വഴിയാണ് നഷ്ടപരിഹാരം ലഭിക്കുന്നത്. മുമ്പ് ജസ്റ്റീസ് (റിട്ട.) സിരിജഗന്‍ കമ്മിറ്റി മുഖേനയായിരുനനു നഷ്ടപരിഹാരത്തിനായി അപേക്ഷ നല്‍കിയിരുന്നത്. എന്നാല്‍ ഹൈക്കോടതി നിര്‍ദേശപ്രകാരമാണ് സ്‌ട്രേ ഡോഗ് വിക്ടിം കോമ്പന്‍സേഷന്‍ റെക്കമന്‍റേഷന്‍ കമ്മിറ്റി രൂപീകരിച്ചത്. കമ്മിറ്റിയില്‍ ജില്ല മെഡിക്കല്‍ ഓഫീസര്‍, തദ്ദേശ സ്വയംഭരണ വകുപ്പ് ജില്ലാ ജോയിന്‍റ് ഡയറക്ടര്‍, ജില്ല മൃഗസംരക്ഷണ ഓഫീസര്‍ എന്നിവര്‍ അംഗങ്ങളാണ്. അഞ്ചു വര്‍ഷം: കടിയേറ്റവര്‍ അനവധി കഴിഞ്ഞ അഞ്ചു വര്‍ഷത്തിനിടെ ജില്ലയില്‍ നായയുടെ കടിയേറ്റ് ചികിത്സ തേടിയവര്‍ ഏറെയാണെന്നാണ് സര്‍ക്കാര്‍ കണക്കുകള്‍ വ്യക്തമാക്കുന്നത്. 2020 18,354 2021 - 23,690 2022 - 28,105 2023 - 28,925 2024 - 32,086 2025 - (ഓഗസ്റ്റ് വരെ) 23, 877 എന്നിങ്ങനെയാണ് നായ ആക്രമണത്തില്‍ പരിക്കേറ്റ് ചികിത്സ തേടിയവരുടെ കണക്കുകള്‍. കഴിഞ്ഞ പത്തു വര്‍ഷത്തിനിടെ എട്ടു പേരാണ് പേ വിഷബാധയേറ്റ് ജില്ലയില്‍ മരിച്ചത്.

തോക്ക് ചൂണ്ടി കവർച്ച: നാല് പേർ കൂടി പിടിയിൽ

മരട്: കുണ്ടന്നൂരിലെ സ്റ്റീൽ വ്യാപാര സ്ഥാപനത്തിൽ തോക്ക് ചൂണ്ടി 81 ലക്ഷം രൂപ തട്ടിയെടുത്ത കേസിലെ നാലു പ്രതികൾ കൂടി പിടിയിലായി. മുഖംമൂടി ധരിച്ച് പണം കവർച്ച ചെയ്ത ഇടുക്കി മുരിക്കാശേരി ഉരുളിച്ചാലിൽ ജെയ്സൻ ഫ്രാൻസിസ് (30), ഇടുക്കി കള്ളിപ്പാറ അമ്പാട്ടുകുടിയിൽ എബിൻസ് കുര്യാക്കോസ് (28) എന്നിവരെയും കൃത്യം നടക്കുന്ന സമയം പണം എണ്ണിക്കൊണ്ടിരുന്നവരുടെ കൂട്ടത്തിലുണ്ടായിരുന്ന എറണാകുളം ആലങ്ങാട് വലിയപറമ്പിൽ ജോജി (32), പണം സൂക്ഷിക്കാൻ ഇടമൊരുക്കിയ ഇടുക്കി മുരിക്കാശേരി പാലക്കൽ ലെനിൻ ബിജു (27) എന്നിവരെയുമാ മരട് പോലീസ് അറസ്റ്റ് ചെയ്തത്. ഇതിൽ ജെയ്സനെയും എബിൻസിനേയും കോടതിയിൽ ഹാജരാക്കി റിമാൻഡ് ചെയ്തു. ഇതോടെ കേസിലുൾപ്പെട്ടവരിൽ ഒരു മുഖം മൂടിധാരിയൊഴികെ എല്ലാവരും പിടിയിലായെന്നാണ് സൂചന. ജോജിയെയും ലെനിനെയും ഇടുക്കിയിൽ നിന്നാണ് പിടികൂടിയത്. കവർച്ച നടത്തി തൃശൂരിലേക്ക് മുങ്ങിയ പ്രതികൾ തിരികെ കാക്കനാട്ടേക്കും അവിടെനിന്ന് ഇടുക്കിയിലേക്കും പിന്നീട് പോണ്ടിച്ചേരിയിലേക്കും അവിടുന്ന് ബംഗളൂരുവിലേക്കും മുങ്ങിയിരുന്നു. കവർച്ച ചെയ്ത പണത്തിൽ നിന്ന് 14 ലക്ഷം രൂപ ചെലവഴിച്ച് ഇവർ ഇടുക്കിയിൽ ഏലവും വാങ്ങി സൂക്ഷിച്ചു. സംഭവം നടന്ന ദിവസം തന്നെ ഒരാളെയും അടുത്ത ദിവസങ്ങളിലായി നാലു പേരെയും പിന്നീട് രണ്ടു പേരെയും പിടികൂടിയിരുന്നു. കവർന്ന പണത്തിൽ 20 ലക്ഷം രൂപയും തോക്കും ഇവരെ പിടികൂടിയതോടൊപ്പം കണ്ടെത്തിയിരുന്നു. സംഭവദിവസം പിടിയിലായ വടുതല സ്വദേശി സജി, തുടർന്നുള്ള ദിവസം പിടിയിലായ തൃശൂർ നാട്ടിക സ്വദേശി വിഷ്ണു, കൊച്ചി എസ്.ആർ.എം റോഡ് കണ്ണിടത്ത് വീട്ടിൽ അഡ്വ.നിഖിൽ നരേന്ദ്രനാഥ് (43), ചേരാനല്ലൂർ താമരശേരി വീട്ടിൽ ആസിഫ് ഇക്ബാൽ (43), പള്ളുരുത്തി കണ്ണോത്ത് പീടികയിൽ ബുഷറ (47), തൃശൂർ നാട്ടിക പുതുവീട്ടിൽ നിഹാസ് (26), നാട്ടിക പുളിക്കൽ വീട്ടിൽ അർജുൻ (32) എന്നീ ഏഴു പേരാണ് മുമ്പ് അറസ്റ്റിലായത്. കുണ്ടന്നൂരിലെ നാഷണൽ സ്റ്റീൽ കമ്പനിയിൽ കഴിഞ്ഞ എട്ടിന് ഉച്ചകഴിഞ്ഞ് മൂന്നോടെയായിരുന്നു മൂഖംമൂടി ധരിച്ച സംഘം തോക്കു ചൂണ്ടി 81 ലക്ഷം രൂപയുമായി കടന്നുകളഞ്ഞത്. സ്ഥാപന ഉടമ തോപ്പുംപടി പുളിയനത്ത് വീട്ടിൽ സുബിൻ ജോസഫ് പോലീസിൽ നൽകിയ പരാതിയെ തുടർന്ന്, സംഭവം ട്രേഡ് പ്രോഫിറ്റ് ഫണ്ടെന്ന പേരിൽ തമിഴ്നാട് കേന്ദ്രീകരിച്ചു പ്രവർത്തിക്കുന്ന നോട്ടിരട്ടിപ്പാണെന്ന് പോലീസ് കണ്ടെത്തിയിരന്നു. 81 ലക്ഷം രൂപ കൊടുത്താൽ 110 കോടിയായി തിരച്ചു കിട്ടുമെന്നായിരുന്നു ഇടപാടിലുണ്ടായിരുന്നത്. സ്ഥാപനത്തിൽ വച്ച് പണം എണ്ണി തിട്ടപ്പെടുത്തി കൊണ്ടിരിക്കുമ്പോഴായിരുന്നു മുഖംമൂടി ധരിച്ചെത്തിയ സംഘം തോക്ക് ചൂണ്ടി ആക്രമിച്ച് പണവുമായി കടന്നുകളഞ്ഞത്.

ജില്ലാ സ്‌കൂള്‍ അത്‌ലറ്റിക് മീറ്റ്: ട്രാക്കിൽ റിക്കാർഡ് വരൾച്ച

കൊച്ചി: കൊച്ചിക്ക് കായികവിരുന്നൊരുക്കി മൂന്നുനാള്‍ എറണാകുളം മഹാരാജാസ് കോളജ് ഗ്രൗണ്ടില്‍ നടന്ന ജില്ലാ സ്‌കൂള്‍ അത‌്‌ലറ്റിക് മീറ്റിന്‍റെ ട്രാക്കിനങ്ങള്‍ക്ക് മീറ്റിലെ ആദ്യ റിക്കാര്‍ഡ് പ്രകടനത്തോടെ സമാപനം. ഇന്നു മുതല്‍ കോതമംഗലം എംഎ കോളജിന്‍റെ ഗ്രൗണ്ടിലാണ് കിരീടത്തിലേക്കുള്ള അവസാന ലാപ്പിലെ പോരാട്ടം. പോൾ വോൾട്ടും ത്രോ ഇനങ്ങളും ഉള്‍പ്പെടെ ഇന്നും നാളെയും 35 ഇനങ്ങളിൽ മത്സരങ്ങള്‍ ഉണ്ടാകും. ട്രാക്കിലും ജംപിംഗ് പിറ്റിലുമായി 72 ഫൈനലുകള്‍ പൂര്‍ത്തിയായപ്പോള്‍ കിരീടപ്പോരില്‍ കോതമംഗലം തന്നെയാണ് മുന്നില്‍. 30 സ്വര്‍ണവും 20 വെള്ളിയും 12 വെങ്കലവുമടക്കം 223 പോയന്‍റുണ്ട് കോതമംഗലത്തിന്. രണ്ടാം സ്ഥാനത്തുള്ള അങ്കമാലി ഉപജില്ല ഇന്നലെ 10 സ്വര്‍ണമടക്കം 17 മെഡലുകള്‍ നേടി ആദ്യസ്ഥാനക്കാരുമായുള്ള അകലം 45 പോയന്‍റാക്കി കുറച്ചു. 21 സ്വര്‍ണവും എട്ട് വെള്ളിയും 14 വെങ്കലവും അടക്കം 178 പോയന്‍റാണ് അങ്കമാലിക്ക്. വൈപ്പിന്‍ (54) ഉപജില്ലയെ പിന്തള്ളി പെരുമ്പാവൂര്‍ (60) മൂന്നാം സ്ഥാനത്തേക്കുയര്‍ന്നു. കോതമംഗലത്തിന്‍റെ ആകെ നേട്ടത്തില്‍ 218 പോയന്‍റും മാര്‍ ബേസില്‍ എച്ച്എസ്എസിന്‍റെയും (168), കീരമ്പാറ സെന്‍റ് സ്റ്റീഫന്‍സ് എച്ച്എസ്എസിന്‍റെയും (50) സംഭാവനയാണ്. 23 സ്വര്‍ണവും 14 വെള്ളിയും 11 വെങ്കലവുമാണ് നിലവിലെ സ്‌കൂള്‍ ചാമ്പ്യന്‍മാരായ മാര്‍ ബേസില്‍ കുട്ടികള്‍ നേടിയത്. സെന്‍റ് സ്റ്റീഫന്‍സിന് ഏഴു സ്വര്‍ണവും അഞ്ചു വെള്ളിയും. നാല് സ്വര്‍ണമുള്‍പ്പെടെ 45 പോയന്‍റുമായി അങ്കമാലി മൂക്കന്നൂര്‍ എസ്എച്ച്ഒഎച്ച്എസ് മൂന്നാം സ്ഥാനത്തുണ്ട്. സാധാരണ മൂന്ന് ദിനങ്ങളിലായി നടക്കാറുള്ള ജില്ലാ മീറ്റ് ഇതാദ്യമായാണ് അഞ്ച് ദിവസം നീളുന്നത്. മഹാരാജാസ് ഗ്രൗണ്ടില്‍ ത്രോ ഏരിയ ലഭ്യമാവാത്തതിനാലാണ് ത്രോ, പോള്‍വോള്‍ട്ട് മത്സരങ്ങള്‍ കോതമംഗലം എംഎ കോളജ് ഗ്രൗണ്ടിലേക്ക് മാറ്റിയത്. ഇന്ന് രാവിലെ ആറിന് ക്രോസ് കണ്‍ട്രി മത്സരങ്ങള്‍ ആരംഭിക്കും. 8.30ന് ജൂണിയര്‍, സീനിയര്‍ പെണ്‍കുട്ടികളുടെ പോള്‍വോള്‍ട്ടും തുടര്‍ന്ന് മറ്റു വിഭാഗങ്ങളിലെ മത്സരങ്ങളും നടക്കും. ജൂണിയര്‍ ഗേള്‍സിന്‍റെ ഷോട്ട്പുട്ട്, സീനിയര്‍ ബോയ്‌സ് ഡിസ്‌കസ് ത്രോ, സീനിയര്‍ ഗേള്‍സ് ഹാമര്‍ത്രോ ഇനങ്ങളും ഒരേസമയം നടക്കും. ജാവ്‌ലിന്‍ ത്രോയിലാണ് ബുധനാഴ്ച പ്രധാന മത്സരം. റിലേ റദ്ദാക്കി കൊച്ചി: മത്സരത്തിന് മതിയായ ടീമുകളില്ലാത്തതിനാല്‍ രണ്ട് റിലേ ഇനങ്ങള്‍ റദ്ദാക്കി. ജില്ലാ സ്‌കൂള്‍ കായികമേളയില്‍ ഇന്നലെ നടക്കേണ്ട സീനിയര്‍ ആണ്‍കുട്ടികളുടെ 4X400 റിലേയും ശനിയാഴ്ച നടക്കേണ്ടിയിരുന്ന സീനിയര്‍ പെണ്‍കുട്ടികളുടെ സ്പ്രിന്‍റ് റിലേയുമാണ് റദ്ദാക്കിയത്. മത്സരം നടത്താന്‍ കുറഞ്ഞത് മൂന്ന് ടീമുകളെങ്കിലും വേണം. റിപ്പോര്‍ട്ടിംഗ് സമയം കഴിഞ്ഞിട്ടും നിശ്ചിത ടീമുകള്‍ എത്താത്തതിനാല്‍ മത്സരം റദ്ദാക്കുകയായിരുന്നു. ആവശ്യത്തിന് ഹര്‍ഡില്‍സുകള്‍ ഇല്ലാത്തതിനാല്‍ മീറ്റിലെ ഗ്ലാമര്‍ ഇനമായ ഹര്‍ഡില്‍സ് മത്സരം ടൈം ട്രയലായാണ് നടത്തിയത്. മൂന്ന് ട്രാക്കുകളില്‍ മാത്രമാണ് ഹ്‍ഡിലുകള്‍ നിരത്തിയത്. ഒരേസമയം മൂന്ന് പേര്‍ക്ക് ഓടാവുന്ന രീതിയിലായിരുന്നു ക്രമീകരണം. ഏറ്റവും മികച്ച സമയം കുറിച്ചവരെ ആദ്യമൂന്ന് സ്ഥാനക്കാരാണ് സംസ്ഥാന പോരാട്ടത്തിന് യോഗ്യത നേടിയത്. ട്രിപ്പിളടിച്ചേ... കൊച്ചി: ട്രാക്ക് ഇനങ്ങള്‍ പൂര്‍ത്തിയായപ്പോള്‍ ട്രിപ്പിള്‍ സ്വര്‍ണ നേട്ടവുമായി കോതമംഗലം മാര്‍ ബേസിലിന്‍റെ താരങ്ങള്‍. മുഹമ്മദ് അലി ജൗഹര്‍, ബേസില്‍ ബെന്നി ജേക്കബ്, കീര്‍ത്തന കലേഷ് എന്നിവരാണ് മൂന്നിനങ്ങളില്‍ സ്വര്‍ണനേട്ടം കൈവരിച്ചത്. സീനിയര്‍ പെണ്‍കുട്ടികളുടെ 3000 മീറ്ററിലാണ് കീര്‍ത്തനയുടെ ഇന്നലത്തെ സ്വര്‍ണ നേട്ടം. കഴിഞ്ഞ ദിവസം 800,1500 മീറ്ററുകളില്‍ കീര്‍ത്തന സ്വര്‍ണം നേടിയിരുന്നു. ഇടുക്കി കാല്‍വരി മൗണ്ട് സ്വദേശികളായ കലേഷ് കുമാര്‍-മിനി ദമ്പതികളുടെ മകളാണ്.

കോതമംഗലം അടിവാട് സ്വദേശിയായ പ്ലസ് വണ്‍ വിദ്യാര്‍ഥിയായ ജൗഹര്‍ സീനിയര്‍ ബോയ്‌സ് 200 മീറ്റര്‍, 400 മീറ്റര്‍, 100 മീറ്റര്‍ ഇനങ്ങളിലാണ് പൊന്നണിഞ്ഞത്. സീനിയര്‍ ബോയ്‌സ് 800 മീറ്റര്‍, 1500 മീറ്റര്‍, 400 മീറ്റര്‍ ഹര്‍ഡില്‍സ് ഇനങ്ങളിലാണ് ബേസില്‍ ബെന്നിയുടെ സ്വര്‍ണക്കൊയ്ത്ത്. മാര്‍ ബേസിലിലെ പ്ലസ്ടു വിദ്യാര്‍ഥിയാണ്. ഇതേ സ്‌കൂളിലെ കായികാധ്യാപിക ഷിബി മാത്യുവിന്‍റെയും ബെന്നി കെ. ജേക്കബിന്‍റെയും മകനാണ് ബേസില്‍ ബെന്നി. ഞായറാഴ്ച മാര്‍ ബേസില്‍ എച്ച്എസ്എസിലെ ഡാനിയല്‍ ഷാജിയും കീരംപാറ സെന്‍റ് സ്റ്റീഫന്‍സ് എച്ച്എസ്എസിലെ പ്ലസ് വണ്‍ വിദ്യാര്‍ഥിനി അദബിയ ഫര്‍ഹാനും ട്രിപ്പിളടിച്ചിരുന്നു. ഒടുവില്‍ എഡിസണ്‍ കണ്ടുപിടിച്ചു, റിക്കാര്‍ഡ് കൊച്ചി: റിക്കാര്‍ഡുകള്‍ കുറിക്കപ്പെടാതെ പോയ ആദ്യ രണ്ടു ദിനങ്ങള്‍ക്കുശേഷം ട്രാക്കിലെ ഏക റിക്കാര്‍ഡ് സ്വന്തമാക്കിയതിന്‍റെ സന്തോഷത്തിലാണ് അങ്കമാലി മൂക്കന്നൂര്‍ സേക്രഡ് ഹാര്‍ട്ട് ഓര്‍ഫനേജ് ഹൈസ്‌കൂളിലെ എട്ടാം ക്ലാസുകാരന്‍ എഡിസൺ മനോജ്. സബ് ജൂണിയര്‍ ആണ്‍കുട്ടികളുടെ 200 മീറ്ററിലാണ് കോതമംഗലം സെന്‍റ് ജോര്‍ജ് എച്ച്എസ്എസിന്‍റെ താരമായ അമല്‍ ജോര്‍ജ് 2006ല്‍ സ്ഥാപിച്ച റിക്കാര്‍ഡ് (24.86) എഡിസണ്‍ തിരുത്തിയത്. 24.55 സെക്കന്‍ഡില്‍ ഫിനിഷ് ചെയ്ത എഡിസന്‍ സ്പ്രിന്‍റ് ഡബിളും തികച്ചു.

ഒന്നാമതെത്തുമെന്ന് ഉറപ്പിച്ചിരുന്നെങ്കിലും റിക്കാർഡ് പ്രതീക്ഷിച്ചിരുന്നില്ലെന്ന് എഡിസണ്‍. ആദ്യം ഫുട്‌ബോളായിരുന്നു ഇഷ്ടം. ഫുട്‌ബോളില്‍ പ്രതിരോധതാരമായിരുന്നു. മൂക്കന്നൂര്‍ സ്‌കൂളിലെ ശ്യാം ശിവന്‍ സാറാണ് ഓടിക്കാന്‍ തുടങ്ങിയത്. അങ്കമാലി ചുള്ളി സ്വദേശിയായ മനോജ് - ജോണ്‍സി ദമ്പതികളുടെ മകനാണ്. ചേട്ടന്‍റെ പൊന്നനുജത്തി കൊച്ചി: ചേട്ടനുപിന്നാലെ ട്രാക്കിലും പിറ്റിലും തിളങ്ങി സെന്‍റ് തെരേസാസ് സിജിഎച്ച്എസ്എസിലെ പ്ലസ്ടു വിദ്യാര്‍ഥി ടി.വി. അപര്‍ണ. ജില്ലാ സ്‌കൂള്‍ കായികമേളയില്‍ സീനിയര്‍ വിഭാഗം 100 മീറ്ററില്‍ ഒന്നാമതായി ഓടിയെത്തി വേഗതാരമായി മാറിയ അപര്‍ണ ഇന്നലെ 200 മീറ്ററിലും പൊന്നണിഞ്ഞു. ലോംഗ് ജംപില്‍ വെള്ളിയാണ് നേട്ടം.

പിഴല സ്വദേശിയായ അപര്‍ണ ലോംഗ്ജംപ് താരമായ ചേട്ടന്‍ ടി.വി. അഖിലിന്‍റെ പ്രകടനങ്ങള്‍ കണ്ടാണ് മത്സരരംഗത്തേക്ക് വന്നത്. ദേശീയ, ജൂണിയർ മീറ്റുകളില്‍ അഖില്‍ മെഡല്‍ നേട്ടിയിട്ടുമുണ്ട്. അഖില്‍ തന്നെയാണ് പരിശീലകനായ പി.ആര്‍. പുരുഷോത്തമന്‍റെ അടുത്ത് അപര്‍ണയെ ചേര്‍ത്തത്. നാട്ടിലേക്ക് ബസ് കുറവായതിനാല്‍ ഓട്ടോഡ്രൈവറായ അച്ഛന്‍ വിജു എല്ലാ ദിവസവും അപര്‍ണയെ സ്‌കൂളില്‍ നിന്ന് പരിശീലനത്തിനായി മഹാരാജാസ് ഗ്രൗണ്ടിലും പിന്നീട് വീട്ടിലും കൊണ്ടുപോയി വിടുന്നത്. അതുകഴിഞ്ഞ് വീണ്ടും ഓട്ടോറിക്ഷ ഓടിക്കാന്‍ പോകും. അമ്മ: സവിത. മികവ് പോരാ കൊച്ചി: ഭാവി കായിക താരങ്ങളെ വാര്‍ത്തെടുക്കുന്ന സ്‌കൂള്‍ മീറ്റുകള്‍ കഴിഞ്ഞ കുറേ വര്‍ഷങ്ങളായി നിലവാരത്തകര്‍ച്ചയിലാണെന്നതിന്‍റെ നിരാശയിലും ആകൂലതയിലുമാണ് ജില്ലാ സ്‌കൂള്‍ മീറ്റിന്‍റെ ട്രാക്ക്, ജംപ് ഇനങ്ങള്‍ അവസാനിച്ചത്. ഒരു മീറ്റ് റിക്കാര്‍ഡ് പിറന്നതൊഴിച്ചാല്‍ മികവാര്‍ന്ന പ്രകടനങ്ങളൊന്നും മൂന്ന് ദിവസത്തെ മീറ്റില്‍ ഉണ്ടായില്ല. ഒന്നോ രണ്ടോ പേരൊഴിച്ചാല്‍ മറ്റുള്ളവര്‍ അമ്പേ നിരാശപ്പെടുത്തി. മികവ് തെളിയിച്ചവരാകട്ടെ, മുന്‍ഗാമികള്‍ക്ക് ഒരു വെല്ലുവിളിയും ഉയര്‍ത്തിയതുമില്ല. എറണാകുളം മഹാരാജാസ് സിന്തറ്റിക്ക് ട്രാക്കിലും പിറ്റിലുമായി മൂന്ന് ദിവസം നടന്ന റവന്യൂ ജില്ലാ സ്‌കൂള്‍ അത്ലറ്റിക് മീറ്റിലെ പ്രകടനത്തെ വിലയിരുത്തുകയാണ് കായികാധ്യാപിക ഷിബി മാത്യു. മികവ് കുറയാന്‍ കാരണം? മത്സരാര്‍ഥികളുടെ എണ്ണം കുറഞ്ഞു വരികയാണ്. കുട്ടികളിലെ താത്പര്യക്കുറവും ആവശ്യത്തിന് കായികാധ്യാപകര്‍ ഇല്ലാത്തതുമൊക്കെ കരണങ്ങളാണ്. ചെറുപ്പത്തിലേ കഴിവുകള്‍ കണ്ടെത്തി അതു വികസിപ്പിച്ചാല്‍ മാത്രമേ മികച്ച താരങ്ങളെ വാര്‍ത്തെടുക്കാന്‍ കഴിയൂ. ഇപ്പോള്‍ ചെയ്യുന്നത് കതിരില്‍ വളം വയ്ക്കുന്ന പരിപാടിയാണ്. കുട്ടികളുടെ താത്പര്യക്കുറവിന് കാരണം? എന്തിനുവേണ്ടി എന്ന ചിന്തയാണ് കുട്ടികളെ ഇതില്‍നിന്ന് പിന്തിരിപ്പിക്കുന്നത്. കായിക താരമായി മാറിയാല്‍ ഭാവില്‍ എന്തെങ്കിലും നേട്ടമുണ്ട് എന്ന തോന്നല്‍ അവര്‍ക്കിപ്പോഴില്ല. അങ്ങനൊരു ഉറപ്പ് നല്‍കാന്‍ കായികാധ്യാപകര്‍ക്ക് കഴിയില്ല. സര്‍ക്കാരാണ് ആ ഉറപ്പ് നല്‍കേണ്ടത്. കായിക താരങ്ങള്‍ക്ക് ഓരോ വര്‍ഷവും ജോലി നല്‍കിയാല്‍ വളര്‍ന്നുവരുന്ന താരങ്ങള്‍ക്ക് അത് പ്രചോദനമാകും. അക്കാഡമികള്‍ നിലച്ചുപോകുന്നത് തിരിച്ചടിയല്ലേ? മികച്ച അക്കാഡമികള്‍ നിന്നു പോകുന്നതും മികവാര്‍ന്ന താരങ്ങളെ വാര്‍ത്തെടുക്കാന്‍ നിലവിലുള്ള അക്കാഡമികള്‍ക്ക് സാധിക്കാത്തതും ഫണ്ട് ഇല്ലാത്തതുമൂലമാണ്. സ്‌പോര്‍ട്‌സ് കൗണ്‍സില്‍ മുന്‍പ് നല്‍കിയ ചെറിയ ധനസഹായം ഇപ്പോഴില്ല. പിടിഎ ഫണ്ടും മാനേജ്‌മെന്‍റ് ഫണ്ടും ഒന്നിനും തികയില്ല. കായികാധ്യാപകര്‍ കൈയില്‍ നിന്ന് കാശെടുത്താണ് എക്യുപ്‌മെന്‍റുകളും മറ്റും വാങ്ങുന്നത്. ജില്ലാ, സംസ്ഥാന മീറ്റുകളില്‍ മെഡല്‍ നേടുന്നവര്‍ക്ക് പ്രോത്സാഹനമായി സ്‌റ്റൈപ്പന്‍റ് നല്‍കിയാല്‍ താരങ്ങള്‍ക്ക് അത് വലിയ പ്രചോദനമാകും. വിശ്രമത്തിനു സമയം കിട്ടുന്നില്ലെന്ന് പരാതിയുണ്ടല്ലോ? മീറ്റുകള്‍ സംഘടിപ്പിക്കുന്നതിലെ അശാസ്ത്രീയത പ്രകടനത്തെ ബാധിക്കും. ഉപജില്ലയും ജില്ലാ മീറ്റും തമ്മില്‍ ഒന്നോ രണ്ടോ ദിവസത്തെ ഇടവേളയേ ഉണ്ടാകു. സംസ്ഥാന മീറ്റും ചുരുങ്ങിയ ഇടവേളയിലാണ് നടക്കുക. മീറ്റുകള്‍ തമ്മിലുള്ള ഇടവേള 15 ദിവസമെങ്കിലും ലഭിച്ചാല്‍ മാത്രമേ ആവശ്യമായ വിശ്രമം എടുത്ത് കുട്ടികള്‍ക്ക് മികവാര്‍ന്ന പ്രകടനം നടത്താന്‍ സാധിക്കു. കായികാധ്യാപരുടെ മികവിലും കുറവുണ്ടായോ? ഇപ്പോള്‍ ഈ മേഖലയിലേക്ക് കടന്നുവരുന്ന അധ്യാപകര്‍ക്ക് മികവുണ്ടെങ്കിലും സമര്‍പ്പണവും ആത്മാര്‍ഥതയും കുറവായതായാണ് കണ്ടുവരുന്നത്. തൊഴില്‍ സംബന്ധമായി ഒട്ടേറെ പ്രശ്‌നങ്ങള്‍ നേരിട്ടുന്നുണ്ടെങ്കിലും കുട്ടികളുടെ ഭാവി ബലികൊടുത്തുള്ള ഒന്നും പാടില്ല. അധ്യാപകര്‍ എത്രമാത്രം ആത്മാര്‍ഥത കാട്ടുന്നുവോ അത്രതന്നെ മികച്ച താരങ്ങളും വളര്‍ന്നുവരും. ഉപജില്ലാ പോയന്‍റ് നില 1. കോതമംഗലം - 223 2. അങ്കമാലി - 178 3. പെരുമ്പാവൂർ - 60 4. വൈപ്പിന്‍ - 54 5. എറണാകുളം - 46 6. കോലഞ്ചേരി - 41 7. ആലുവ - 40.5 8. മട്ടാഞ്ചേരി - 13.5 9. മൂവാറ്റുപുഴ - 10 10. കല്ലൂര്‍ക്കാട് - 10 11. നോര്‍ത്ത് പറവൂര്‍ - 10 12. തൃപ്പൂണിത്തുറ - 9 13. പിറവം - 4 14. കൂത്താട്ടുകുളം - 3 സ്‌കൂള്‍ പോയന്‍റ് നില 1. മാര്‍ ബേസില്‍ എച്ച്എസ്എസ്, കോതമംഗലം - 168 2. സെന്‍റ് സ്റ്റീഫന്‍സ് എച്ച്എസ് എസ് കീരമ്പാറ - 50 3. സേക്രഡ് ഹാര്‍ട്ട് ഓര്‍ഫനേജ് എച്ച്എസ് മൂക്കന്നൂര്‍ - 45 4. ശാലേം എച്ച്എസ് വെസ്റ്റ് വെങ്ങോല - 39 5. സെന്‍റ് ട്രീസാസ് സിജിഎച്ച്എസ്എസ് എറണാകുളം - 22 6. ഭഗവതി വിലാസം എച്ച്എസ് നായരമ്പലം - 20 7. സെന്‍റ് പീറ്റേഴ്‌സ് വിഎച്ച്എസ് എസ് കോലഞ്ചേരി - 20 8. ഗവ.എച്ച്എസ്എസ് മൂക്കന്നൂര്‍ - 16 9. സേക്രഡ് ഹാര്‍ട്ട് എച്ച്എസ്എസ് തേവര - 13 10. മാര്‍ അത്തനേഷ്യസ് എച്ച്എസ് നെടുമ്പാശേരി - 11

കരുമാലൂർ പഞ്ചായത്തിൽ പുഴ നികത്തൽ; മണ്ണുമാന്തി യന്ത്രം പിടിച്ചെടുത്തു

ആലങ്ങാട്: കരുമാലൂർ പഞ്ചായത്തിലെ 12 -ാം വാർഡിൽ കടൂപ്പാടത്ത് പുഴ നികത്തുന്നതായി കണ്ടെത്തി. പുഴ നികത്താനായി എത്തിച്ച മണ്ണുമാന്തി യന്ത്രം ഉൾപ്പടെ ആലുവ ഈസ്റ്റ് പോലീസ് പിടിച്ചെടുത്തു. പെരിയാറിന്‍റെ തീരത്ത് അനധികൃതമായി പ്ലാസ്റ്റിക് മാലിന്യങ്ങളും ഖരമാലിന്യങ്ങളും നിക്ഷേപിക്കുന്നതായി നാട്ടുകാർ പോലീസിലും കരുമാല്ലൂർ പഞ്ചായത്ത് ആരോഗ്യവിഭാഗത്തിലും അറിയിച്ചിരുന്നു. ഇത് പരിശോധിക്കാനെത്തിയപ്പോഴാണ് അനധികൃതമായി പുഴ നികത്തുന്നത് പോലീസിന്‍റെ ശ്രദ്ധയിൽപ്പെട്ടത്. തുടർന്ന് പോലീസ് കേസെടുക്കുകയായിരുന്നു. പുഴ നികത്തുന്ന ഭാഗത്തോടു ചേർന്നുള്ള സ്ഥലത്ത് രണ്ടു സ്വകാര്യ വ്യക്തികൾ പാർപ്പിട സമുച്ചയം നിർമിക്കാനുള്ള പ്രവർത്തനങ്ങൾ തുടങ്ങിയിരുന്നു.എന്നാൽ ഇടക്കാലത്ത് നിർമാണം പാതിവഴിയിൽ നിലച്ചു. പുഴ നികത്തിയെടുക്കാനായി വൻതോതിൽ ഖരമാലിന്യങ്ങളും മറ്റും ഇവിടെ ശേഖരിച്ചിട്ടുണ്ട്. ഈ ഭൂമിയിലുള്ള ഒരുകിണർ മാലിന്യങ്ങൾ നിക്ഷേപിച്ച് ഇവർ മൂടിക്കളഞ്ഞിട്ടുണ്ട്. ജൽ ജീവൻ പദ്ധതിക്കായി റോഡ് കുത്തിപ്പൊളിച്ച മാലിന്യങ്ങളും മണ്ണും വൻതോതിൽ പുഴ നികത്താൻ ഉപയോഗിച്ചതായി പഞ്ചായത്ത് ആരോഗ്യ വിഭാഗം നടത്തിയ പരിശോധനയിൽ വ്യക്തമായിട്ടുണ്ട്. ജൽജീവൻ പദ്ധതിയിലെ മണ്ണ് അനധികൃത ആവശ്യങ്ങൾക്ക് ഉപയോഗിച്ചതിനെതിരെ പഞ്ചായത്തും നടപടിക്കൊരുങ്ങുകയാണ്. പുഴ നികത്തുന്നതിലും മാലിന്യ നിക്ഷേപത്തിലും നടപടി ആവശ്യപ്പെട്ട് കളക്ടർ, പഞ്ചായത്ത് സെക്രട്ടറി, പോലീസ് എന്നിവർക്ക് കടൂപ്പാടം മേത്തരിപ്പറമ്പിൽ എം.കെ. ഫൈസൽ പരാതി നൽകി.

"അങ്കമാലി ഫെസ്റ്റ് 2025’ഒരുങ്ങുന്നു; ലോഗോ പ്രകാശനം നടത്തി

അങ്കമാലി: അങ്കമാലി നഗരസഭയുടെ നേതൃത്വത്തിൽ വിവിധ ഉത്സവങ്ങൾ കോർത്തിണക്കി ഒരുകുന്ന "അങ്കമാലി ഫെസ്റ്റ് 2025’ ഒരുങ്ങുന്നു. ഫെസ്റ്റിന്‍റെ ലോഗോ പ്രകാശനം നഗരസഭാ ചെയർപേഴ്സൺ ഷിയോ പോൾ നിർവഹിച്ചു. 17 മുതൽ നവംബർ ഒൻപത് വരെ 20 ദിവസങ്ങൾ നീണ്ടുനിൽക്കുന്ന "അങ്കമാലി ഫെസ്റ്റ്’ കിങ്ങിണി ഗ്രൗണ്ടിലാണ് ഒരുക്കുന്നത്. വിവിധ ആഘോഷങ്ങളായ കേരളോത്സവം, വയോജനോത്സവം, മെഡിക്കൽ ക്യാമ്പ്, ഭിന്നശേഷി കലോത്സവം, അങ്കണവാടി കലോത്സവം, കുടുംബശ്രീ സംഗമം, വിവിധ കലാപരിപാടികൾ, അമ്യൂസ്മെന്‍റ് പാർക്ക്, മനുഷ്യ റോബോട്ടുകൾ, സൂപ്പർ റിയാലിറ്റി, ഡും തിയേറ്റർ, സ്റ്റാളുകൾ, പെറ്റ് ഷോ എന്നിവയെല്ലാം ഇതിന്‍റെ ഭാഗമായി നടക്കും. ഫെസ്റ്റ് വേളയിലേക്കുള്ള പ്രവേശനം സൗജന്യമാണ്. ലോഗോ പ്രകാശന ചടങ്ങിൽ നഗരസഭാ ഡെപ്യൂട്ടി ചെയർപേഴ്സൺ സിനി മനോജ്, സ്ഥിരംസമിതി അധ്യക്ഷരായ കെ.പി. പോൾ ജോവർ, ഷൈനി മാർട്ടിൻ, മനു നാരായണൻ, ജിത ഷിജോയ്, മുൻ ചെയർമാൻ മാത്യു തോമസ്, നഗരസഭാ സെക്രട്ടറി ജെയിൻ പാത്താടൻ, റിസോഴ്സ്പേഴ്സൺ പി.എ. ശശി എന്നിവർ പങ്കെടുത്തു.

വലിയ കുടുംബങ്ങൾ സഭയുടെ വലിയ സന്തോഷം: മാർ ജോർജ് മഠത്തിക്കണ്ടത്തിൽ

മൂവാറ്റുപുഴ: കുടുംബങ്ങൾ ദൈവപരിപാലനയിൽ ആശ്രയിക്കണമെന്നും കൂടുതൽ മക്കളുള്ള വലിയ കുടുംബങ്ങൾ സഭയുടെ വലിയ സന്തോഷമാണന്നും കുടുംബങ്ങളുടെ ഉയർച്ചയും വളർച്ചയും സഭയുടെ ലക്ഷ്യമാണന്നും കോതമംഗലം രൂപത അധ്യക്ഷൻ മാർ ജോർജ് മഠത്തിക്കണ്ടത്തിൽ. കോതമംഗലം രൂപത സോഷ്യൽ സർവീസ് സൊസൈറ്റിയുടെയും ഫാമിലി അപ്പോസ്തലേറ്റിന്‍റെയും സംയുക്ത ആഭിമുഖ്യത്തിൽ മൂവാറ്റുപുഴ നെസ്റ്റ് പാസ്റ്ററൽ സെന്‍ററിൽ നടന്ന വലിയ കുടുംബങ്ങൾക്കായുള്ള സംഗമം ജീവ ബിഗ് ഫാമിലി മീറ്റ് 2025ന്‍റെ ഉദ്ഘാനം നിർവഹിക്കുകയായിരുന്നു. മാതാപിതാക്കൾ മക്കളെ ദൈവ വിശ്വാസത്തിൽ വളർത്തണമെന്നും കുടുംബങ്ങൾ പ്രാർഥനയുടെ ഇടങ്ങളായി മാറണമെന്നും ബിഷപ് ഉദ്ബോധിപ്പിച്ചു. വലിയ കുടുംബങ്ങളെ പ്രോൽസാഹിപ്പിക്കുന്ന നിരവധി പരിപാടികൾ രൂപത തലത്തിൽ സഭ ചെയ്യുന്നതായും പറഞ്ഞു. ഫാമിലി അപ്പോസ്തലേറ്റ് രൂപത ഡയറക്ടർ റവ. ഡോ. ആന്‍റണി പുത്തൻകുളം കുർബാന അർപ്പിച്ച് സന്ദേശം നൽകി. തുടർന്നു മാതാപിതാക്കൾക്കും കുട്ടികൾക്കും വെവ്വേറ നടന്ന സെമിനാറിന് ബ്രദർ എൽവിൻസ് കോട്ടൂരാനും ടീം അഗങ്ങളും നേതൃത്വം നൽകി. സമാപന സമ്മേളനത്തിൽ കോതമംഗലം രൂപത വികാരി ജനറാൾ മോൺ. പയസ് മലേക്കണ്ടത്തിൽ അധ്യക്ഷത വഹിച്ചു. കോതമംഗലം രൂപത സോഷ്യൽ സർവീസ് വിഭാഗം ഡയറക്ടർ ഫാ. ജോസഫ് കൊച്ചുപറമ്പിൽ സ്വാഗതവും, അസിസ്റ്റന്‍റ് ഡയറക്ടർ ഫാ. പൗലോസ് നെടുംതടത്തിൽ നന്ദിയും പറഞ്ഞു. സീറോ മലബാർ സഭയുടെ പ്രോ ലൈഫ് അപ്പോസ്തലേറ്റ് ഗ്ലോബൽ സെക്രട്ടറി ജോയ്സ് മുക്കുടം ജാലവിദ്യയുടെ അകമ്പടിയോടുകൂടി നടത്തിയ സന്ദേശം ഏറെ ശ്രദ്ധേയ ആകർഷിച്ചു. യോഗത്തിന്‍റെ സമാപനത്തിൽ വലിയ കുടുംബങ്ങളെ പ്രത്യേക പുരസ്കാരങ്ങൾ നൽകി ആദരിക്കുകയും ചെയ്തു. കോതമംഗലം രൂപത ലഹരി വിരുദ്ധ ക്യാമ്പയിൻ സജീവം ലഹരി വിരുദ്ധ പ്രോജക്ടിന്‍റെ നേതൃത്വത്തിൽ നടന്ന ഷോർട്ട് ഫിലിം മത്സരത്തിൽ വിജയിച്ചവർക്ക് അവാർഡ് നൽകി. വലിയ കുടുംബങ്ങളിലെ കുട്ടികളുടെ വിവിധ കലാപരിപാടികൾ യോഗത്തിന് കൊഴുപ്പേകി. ജോൺസൻ കറുകപ്പിള്ളിൽ, റോബിൻ ആന്‍റണി, ജോസ് കോടമുള്ളിൽ, ഡിഗോൾ ജോർജ് എന്നിവർ നേതൃത്വം നൽകി.

‘കുളിപ്പിച്ച് കുട്ടപ്പനാക്കാൻ’.. കെഎസ്ആർടിസി ഡിപ്പോയ്ക്ക് ആധുനിക ബസ് വാഷിംഗ് സിസ്റ്റം തയാറാക്കാൻ എംബിറ്റ്സ് വിദ്യാർഥികൾ

കോതമംഗലം: കോതമംഗലം കെഎസ്ആർടിസി ഡിപ്പോയ്ക്ക് ആധുനിക ബസ് വാഷിംഗ് സിസ്റ്റം തയാറാക്കാൻ ഒരുങ്ങി നെല്ലിമറ്റം എംബിറ്റ്സ് എൻജിനീയറിംഗ് കോളജിലെ മെക്കാനിക്കൽ എൻജിനീയറിംഗ് വിദ്യാർഥികൾ. കോളജിലെ അവസാന വർഷ വിദ്യാർഥികളാണ് തങ്ങളുടെ പഠനത്തിന്‍റെ ഭാഗമായുള്ള പ്രോജക്റ്റ് വർക്കിൽ ഉൾപ്പെടുത്തി സംവിധാനം ഒരുക്കുന്നത്. 360 ഡിഗ്രി തിരിയാൻ കഴിയുന്ന ബൂമിലൂടെ ബസിന്‍റെ എല്ലാ വശങ്ങളിലേക്കും വെള്ളമെത്തിച്ച് അനായാസം ബസ് കഴുകാൻ കഴിയുന്നതാണ് സംവിധാനം. ബസ് കഴുകൽ ആയാസ രഹിതമാക്കാനും വെള്ളത്തിന്‍റെ ഉപയോഗം കുറയ്ക്കാൻ കഴിയുമെന്നും വിദ്യാർഥികൾ പറഞ്ഞു. പദ്ധതി നടപ്പിലാക്കുന്നതിന് വേണ്ടിയുള്ള രേഖകൾ എംബിറ്റ്സ് കോളജ് കെഎസ്ആർടിസിയിൽ നൽകി അനുമതിയായതിന്‍റെ അടിസ്ഥാനത്തിലാണ് കോതമംഗലം ഡിപ്പോയിൽ ഇത് സജ്ജമാക്കുന്നത്. നിർമാണ ഉദ്ഘാടനം മന്ത്രി കെ.ബി. ഗണേഷ്കുമാർ നിർവഹിച്ചു. ആന്‍റണി ജോൺ എംഎൽഎ, കെ എസ്ആർടിസി എംഡി ഡോ. പി.എസ്. പ്രമോജ് ശങ്കർ, എംബിറ്റ്സ് കോളജ് സെക്രട്ടറി ബിനോയ് മണ്ണഞ്ചേരി, ഡയറക്ടർ ഷാജൻ കുര്യാക്കോസ്, മെക്കാനിക്കൽ എൻജിനീയറിംഗ് വിഭാഗം മേധാവി പ്രഫ. നിധീഷ് എൽദോ ബേബി, അധ്യാപകരായ എൽസൺ പോൾ, കെ.ഇ. എൽദോസ്, വിദ്യാർഥികൾ കെഎസ്ആർടിസി അതികൃതർ എന്നിവർ പങ്കെടുത്തു.

തെരുവുനായ ആക്രമണം: ബാലികയ്ക്ക് കൈത്താങ്ങായി ജനസേവ

ആലുവ: പറവൂരിൽ തെരുവുനായ ബാലികയുടെ ചെവി കടിച്ചെടുത്ത സംഭവത്തിൽ കൈത്താങ്ങായി ജനസേവ. ആശുപത്രിയിൽ കുട്ടിയെ സന്ദർശിച്ച തെരുവുനായ വിമുക്ത കേരള സംഘം ചെയർമാൻ ജോസ് മാവേലി കുട്ടിക്ക് വിദഗ്ധ ചികിത്സ ഉറപ്പുവരുത്താൻ ചികിത്സാ ചെലവിലേക്ക് ജനസേവ ശിശുഭവന്‍റെ സാമ്പത്തിക സഹായമായ ഇരുപതിനായിരം രൂപയുടെ ചെക്ക് നിഹാരയുടെ പിതാവിന് മാറി. വലതു ചെവി നഷ്ടപ്പെട്ട കുട്ടിയെ ആശുപത്രിയിൽ സന്ദർശിച്ച് മാതാപിതാക്കൾക്ക് എല്ലാവിധ സഹായവും അദ്ദേഹം വാഗ്ദാനം ചെയ്തു. കൽപ്പണി തൊഴിലാളിയായ പിതാവും മാതാവും കുട്ടിയോടൊപ്പം ആശുപത്രിയിൽ തുടരുകയാണ്.

ചരക്ക് ലോറിയിൽ കുടുങ്ങി കേബിളുകൾ പൊട്ടി; ഇന്‍റർനെറ്റ് നിലച്ചു

ആലുവ: അയഞ്ഞുകിടന്ന ഇന്‍റർനെറ്റ് കേബിൾ ചരക്ക് ലോറിയുടെ മുകളിൽ കുടുങ്ങി പൊട്ടി. ഇതോടെ ആലുവ ബാങ്ക് ജംഗ്ഷൻ മേഖലയിലെ ബിഎസ്എൻഎൽ അടക്കം ഇന്‍റർനെറ്റ് സംവിധാനം താറുമാറായി. ഇന്നലെ ഉച്ചതിരിച്ച് രണ്ടരയോടെ സംഭവം. മഹാരാഷ്ട്ര രജിസ്ട്രേഷനുള്ള ചരക്ക് ലോറിയുടെ മുകളിലായാണ് റോഡിനു കുറുകെ ഇലക്ട്രിക് പോസ്റ്റിലൂടെയുള്ള ഇന്‍റർനെറ്റ്, ടിവി കേബിളുകളിൽ ഒരെണ്ണം കുടുങ്ങിയത്. ഇതു കണ്ടവർ ലോറി മുന്നോട്ട് എടുക്കല്ലേയെന്ന് പറഞ്ഞെങ്കിലും ഡ്രൈവർ ചെവിക്കൊണ്ടില്ല. ഇതോടെ എല്ലാ കേബിളുകളും പൊട്ടി റോഡിലേക്ക് കുറുകെ വീഴുകയായിരുന്നു. ടെലിഫോൺ പോസ്റ്റും ചരിഞ്ഞു. അര മണിക്കൂറോളം ബാങ്ക് ജംഗ്ഷനിൽ ഗതാഗതക്കുരുക്ക് ഉണ്ടായി. ഫെഡറൽ ബാങ്ക് ഹെഡ് ഓഫീസിനു മുന്നിലൂടെ ബൈപ്പാസിലേക്ക് പോകുന്ന വാഹനങ്ങൾ ഉപയോഗിക്കുന്ന റോഡിന് കുറുകെയാണ് കേബിളുകൾ പൊട്ടിവീണത്. ജീവനക്കാരെത്തി ഇന്‍റർനെറ്റ് പുനസ്ഥാപിക്കാനുള്ള ശ്രമം തുടരുകയാണ്.

വൈപ്പിൻ ഉപജില്ലാ ശാസ്ത്രോത്സവം

വൈപ്പിൻ: ഉപജില്ലാ ശാസ്ത്രോത്സവം ഓച്ചന്തുരുത്ത് സാന്താക്രൂസ് ഹൈസ്കൂളിൽ തുടങ്ങി. കെ.എൻ. ഉണ്ണിക്കൃഷ്ണൻ എംഎൽഎ ഉദ്ഘാടനം ചെയ്തു. സാന്താക്രൂസ് സ്കൂൾ കൂടാതെ ഓച്ചന്തുരുത്ത് എസ്എസ്എസ്എസ് യുപി സ്കൂൾ, കറുത്തേടം എസ്എച്ച് ജിയുപി സ്കൂൾ, എളങ്കുന്നപുഴ ഗവ. ഹയർ സെക്കൻഡറി സ്കൂൾ എന്നിവിടങ്ങളിലായി നടക്കുന്ന ശാസ്ത്ര മാമാങ്കത്തിൽ 1000 വിദ്യാർഥികളാണ് മറ്റുരയ്ക്കുന്നത്. പഞ്ചായത്ത് പ്രസിഡന്‍റ് ആർ. രസികല അധ്യക്ഷത വഹിച്ചു. ഫാ. ഫ്രാൻസിസ് ഡിക്സൻ ഫെർണാണ്ടസ്, വാർഡ് അംഗം സെബാസ്റ്റ്യൻ ഷിബു, ഉപജില്ല വിദ്യാഭ്യാസ ഓഫീസർ ഷൈന മോൾ തുടങ്ങിയവർ പ്രസംഗിച്ചു.

വീടും സ്ഥലവും വാഗ്ദാനം ചെയ്ത് 11 ലക്ഷം തട്ടിയതായി പരാതി

ചെറായി: വീടും പറമ്പും രജിസ്റ്റർ ചെയ്തു തരാമെന്ന് വാഗ്ദാനം നൽകി വീട്ടമ്മയും മകനും പലഘട്ടങ്ങളിലായി 11 ലക്ഷം രൂപ തട്ടിയെടുത്തെന്ന് പരാതി. കുഴുപ്പിള്ളി അയ്യമ്പിള്ളി മനപ്പിള്ളി പ്ലാക്കൽ അനിൽകുമാറിന്‍റെ ഭാര്യ ബിന്ദുവാണ് അയ്യമ്പിള്ളി മനപ്പിള്ളി പൂത്തേരി ഷീബ, മകൻ ശബരിനാഥ് എന്നിവർക്കെതിരെ മുനന്പം പോലീസിൽ പരാതി നൽകിയത്. ഇവർ താമസിച്ചിരുന്ന വീടും പറമ്പും 25 ലക്ഷം രൂപയ്ക്ക് നൽകാമെന്ന് വാഗ്ദാനം നൽകി കഴിഞ്ഞ വർഷം മേയ് 27 മുതൽ പല ഘട്ടങ്ങളിലായാണ് 11 ലക്ഷം നൽകിയതെന്ന് ബിന്ദു പരാതിയിൽ പറ‍യുന്നു. എന്നാൽ രജിസ്റ്റർ ചെയ്തു തരാതെ വന്നപ്പോഴാണ് വീട്ടമ്മ പോലീസിൽ പരാതി നൽകിയത്. മുനമ്പം പോലീസ് ഷീബയ്ക്കും മകനുമെതിരെ കേസ് രജിസ്റ്റർ ചെയ്തിട്ടുണ്ട്.

ലഹരിയില്ലാത്ത യൗവനം: സ്റ്റുഡന്‍റ് പോലീസ് കേഡറ്റുകളുടെ മെഗാ മീറ്റ് സംഘടിപ്പിച്ചു

നെടുമ്പാശേരി : മുനമ്പം പോലീസ് സബ് ഡിവിഷന്‍റെ നേതൃത്വത്തിൽ ലഹരിയില്ലാത്ത യൗവനം എന്ന വിഷയത്തിൽ സ്റ്റുഡന്‍റ് പോലീസ് കേഡറ്റുകളുടെ മെഗാ മീറ്റ് സംഘടിപ്പിച്ചു. ചാലാക്ക ശ്രീനാരായണ മെഡിക്കൽ കോളജ് ഓഡിറ്റോറിയത്തിൽ മെഡിക്കൽ കോളജ് സൈക്യാട്രി വിഭാഗവും മുനമ്പം സബ് ഡിവിഷൻ സ്റ്റുഡന്‍റ് പോലീസ് കേഡറ്റ് യൂണിറ്റും സംയുക്തമായി സംഘടിപ്പിച്ച പരിപാടി ഹെൽത്ത് സ്ക്രീനിംഗോടെയാണ് ആരംഭിച്ചത്. ശ്രീ നാരായണ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസിലെ സൈക്യാട്രി വിഭാഗം അസി. പ്രഫസർ ഡോ. അലീന ജോൺസൺ കൗമാരക്കാരുടെ ആസക്തികൾ എന്ന വിഷയത്തിൽ ക്ലാസെടുത്തു. ക്ലിനിക്കൽ സൈക്കോളജിസ്റ്റ് ശാലിനി ഗാഡ്ജറ്റ് അഡിഷനുകളുടെ പ്രത്യാഘാതങ്ങളും പരിഹാരവും എന്ന വിഷയത്തിൽ ബോധവത്കരണം നടത്തി.

തൃപ്പൂണിത്തുറ ഉപജില്ലാ ശാസ്ത്രോത്സവം

ഉദയംപേരൂർ: തൃപ്പൂണിത്തുറ ഉപജില്ലാ ശാസ്ത്രോത്സവം ഉദയംപേരൂർ എസ്എൻഡിപി ഹയർസെക്കൻഡറി സ്കൂളിൽ തുടങ്ങി. രണ്ടുദിവസത്തെ ശാസ്ത്രോത്സവം കെ. ബാബു എംഎൽഎ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് സജിത മുരളി അധ്യക്ഷത വഹിച്ചു. ഉപജില്ലാ വിദ്യാഭ്യാസ ഓഫീസർ കെ.ജെ. രശ്മി, എൽ. സന്തോഷ്, മിനി പ്രസാദ്, പി. ഗഗാറിൻ, ഒ.വി. സാജു, ഡി. ജിനു രാജ്, ശാലിനി തങ്കപ്പൻ, കെ.എം. അനിൽ കുമാർ, ദീപ എസ്. നാരായണൻ തുടങ്ങിയവർ പ്രസംഗിച്ചു.

കരുമാലൂരും ആലങ്ങാടും മൂന്നിടത്ത് മോഷണം

ആലങ്ങാട്: കരുമാലൂർ- ആലങ്ങാട് പഞ്ചായത്തുകളിൽ മൂന്നിടത്ത് മോഷണം. നീറിക്കോട് ഭാഗത്തെ റേഷൻ കടയിലും സമീപത്തെ വീട്ടിലും മനയ്ക്കപ്പടി ഭാഗത്തെ കൃഷിയിടങ്ങളിലുമാണു മോഷണം നടന്നത്. നീറിക്കോട് ഭാഗത്തു ബാബുവിന്‍റെ ഉടമസ്ഥതയിലുള്ള റേഷൻ കടയിലെ 102 ലിറ്റർ മണ്ണെണ്ണ നഷ്ടപ്പെട്ടു. കടയുടെ വരാന്തയിൽ സൂക്ഷിച്ചിരുന്ന വീപ്പയിൽ നിന്നാണു മണ്ണെണ്ണ കവർന്നത്. തൊട്ടടുത്തു തന്നെയുള്ള ധനേഷ് സത്യന്‍റെ വീട്ടിൽ നിന്നു 3,000 രൂപ വിലവരുന്ന മീറ്റർ ബോക്സും നഷ്ടപ്പെട്ടു. മനയ്ക്കടി ഭാഗത്തെ കൃഷിയിടങ്ങളിൽ സൂക്ഷിച്ചിരുന്ന രണ്ട് മോട്ടറുകളും ഇന്നലെ മോഷണം പോയി. ഒരു മാസത്തിനിടെ ഏഴ് മോട്ടറുകൾ ഈ ഭാഗത്തുനിന്നു മോഷണം പോയിട്ടുണ്ട്. ആലങ്ങാട് പോലീസ് സ്റ്റേഷൻ പരിധിയിൽ കഴിഞ്ഞ ഒരു വർഷത്തിനിടെ നാൽപ്പതോളം മോഷണങ്ങളാണു നടന്നിരിക്കുന്നത്. ലഹരിസംഘങ്ങളുടെയും മോഷ്ടാക്കളുടെയും ശല്യമുള്ളതിനാൽ പലരും ഭയന്നിട്ടു രാത്രി പുറത്തിറങ്ങാറില്ല. ഈ അവസരം മുതലെടുത്താണു രാത്രിയും പകലും മോഷ്ടാക്കൾ കറങ്ങി നടക്കുന്നത്. ആക്രി പെറുക്കുന്ന നാടോടി സംഘങ്ങളും പലയിടത്തും വ്യാപകമായി മോഷണം നടത്തുന്നുണ്ട്. ആലങ്ങാട് പൊലീസ് കാര്യക്ഷമമായി പ്രവർത്തിക്കാത്തതാണു ഇതിന് കാരണമെന്നു നാട്ടുകാർ പറയുന്നു.

തൈറോയ്ഡ് കാൻസർ: പുതിയ മാർഗരേഖയിൽ ചർച്ച നടത്തി

കൊച്ചി: അമേരിക്കൻ തൈറോയ്ഡ് അസോസിയേഷൻ (എടിഎ) പുറത്തിറക്കിയ തൈറോയ്ഡ് കാൻസറിന്‍റെ 2025 ലെ പുതിയ മാർഗരേഖയെക്കുറിച്ചുള്ള കോൺഫറൻസ് ലിസി കാൻസർ സെന്‍ററിന്‍റെ ആഭിമുഖ്യത്തിൽ നടന്നു. ലിസി ആശുപത്രി ഡയറക്ടർ റവ. ഡോ. പോൾ കരേടൻ ഉദ്ഘാടനം ചെയ്തു. ഡോ. സന്ദീപ് സുരേഷ്, ഡോ. അരുൺ പീറ്റർ മാത്യു, ഡോ. എലിസബത്ത് മാത്യു ഐപ്പ്, ഡോ. ആർ.പി. രഞ്ജിൻ, ഡോ. അരുൺ വാര്യർ, ഡോ. റോഷൻ മേരി തോമസ്, ഡോ. ജി. റിജ്ജു, ഡോ. ആർ.എസ്. റിയാസ് , ഡോ. രാഹുൽ ജോർജ് എന്നിവർ പങ്കെടുത്തു. ഇന്ത്യയുടെ വിവിധ ഭാഗങ്ങളിൽ നിന്നുള്ള തൈറോയ്ഡ് ചികിൽസാ വിദഗ്ധരോടൊപ്പം അമേരിക്കൻ തൈറോയ്ഡ് അസോസിയേഷൻ പ്രസിഡന്‍റ് ഡോ. ജൂലി ആൻ സോസ, ഹോംങ്കോംഗി നിന്നുള്ള എൻഡോസ്കോപ്പിക് തൈറോയ്ഡ് സർജൻ ഡോ. ഹോക് നാം ലി എന്നിവർ പങ്കെടുത്തു. ജാഗ്രതയോടു കൂടിയ മേൽനോട്ടത്തിലൂടെ സർജറി ഒഴിവാക്കാം എന്ന പുതിയ മാർഗരേഖ ഡോ. ജൂലി ആൻ സോസ മുന്നോട്ടുവച്ചു.

സന്‍സ്‌കാര സ്‌കൂളില്‍ കേക്ക് മിക്‌സിംഗ്

കാക്കനാട്: ക്രിസ്തുമസ് ആഘോഷങ്ങള്‍ക്ക് തുടക്കം കുറിച്ചുകൊണ്ട് മുത്തൂറ്റ് സന്‍ഡാരി റിസോര്‍ട്ട്‌സിന്‍റെയും സന്‍സ്‌കാര സ്‌കൂളിന്‍റെയും സംയുക്താഭിമുഖ്യത്തില്‍ ദി ഗിവിംഗ് മിക്‌സ് എന്ന പേരില്‍ കേക്ക് മിക്‌സിംഗ് സംഘടിപ്പിച്ചു. സന്‍ഡാരിയിലെ പ്രമുഖ ഷെഫുമാരാണ് കേക്ക് മിക്‌സിംഗിന് നേതൃത്വം നല്‍കിയത്. വിദ്യാര്‍ഥികള്‍ കാമ്പയിനിലൂടെ കേക്കുകള്‍ വില്‍ക്കുകയും പണം സ്‌കൂളിലെ ചാരിറ്റി ക്ലബ്ബായ അമാരേയുടെ ജീവകാര്യണ്യ പ്രവര്‍ത്തനങ്ങള്‍ക്കായി വിനിയോഗിക്കുകയും ചെയ്യും. സ്‌കൂള്‍ ഓഡിറ്റോറിയത്തില്‍ നടന്ന ചടങ്ങിൽ സന്‍സ്‌കാര സ്‌കൂള്‍ പ്രിന്‍സിപ്പല്‍ ഡോ. സ്വാമിനാഥന്‍ കൃഷ്ണന്‍, പ്രമുഖ സോഷ്യല്‍ മീഡിയ ഇന്‍ഫ്‌ളുവന്‍മാരായ ബല്‍റാം മേനോന്‍, കല്യാണി പണിക്കര്‍, ജസ്റ്റിന്‍, സൗത്ത് ഏഷ്യ മിസ്സ് യൂണിവേഴ്‌സല്‍ നോയ് ലിസ് ടാനിയ, കാര്‍ത്ത്യായനി ഹോട്ടൽ ഉടമ ജജീന, വിനു, വോള്‍ഗ ഗ്രൂപ്പ് ഓഫ് ഫോട്ടല്‍ ഉടമ മാത്യു, സന്‍സ്‌കാര സ്‌കൂള്‍ ജീവനക്കാര്‍, വിദ്യാര്‍ഥികള്‍, രക്ഷിതാക്കള്‍, സന്‍ഡാരി ഗ്രൂപ്പ് ജീവനക്കാര്‍ തുടങ്ങിയവര്‍ പങ്കെടുത്തു.

മുനമ്പം: സർക്കാർ സുപ്രീംകോടതിയുടെ സ്റ്റേ കാത്തുനിൽക്കുന്നു -ഷോൺ ജോർജ്

ചെറായി: മുനമ്പം വഖഫ് ഭൂമിയല്ലെന്ന് ഹൈക്കോടതി ഡിവിഷൻ ബെഞ്ച് പ്രഖ്യാപിച്ചിട്ടും മുനമ്പം നിവാസികളുടെ റവന്യു അധികാരം പുനസ്ഥാപിച്ചു നൽകാൻ സർക്കാർ കുട്ടാക്കാത്തതിൽ ദുരുഹതയെന്ന് ബിജെപി സംസ്ഥാന വൈസ് പ്രസിഡന്‍റ് അഡ്വ.ഷോൺ ജോർജ് ആരോപിച്ചു. മുനമ്പം നിവാസികളുടെ റവന്യു അവകാശങ്ങൾ പുനസ്ഥാപിക്കണമെന്ന് ആവശ്യപ്പെട്ട് ബിജെപി ചെറായി മണ്ഡലം കമ്മിറ്റി നടത്തിയ സംഘടിപ്പിച്ച കുഴുപ്പിള്ളി വില്ലേജ് ഓഫീസ് മാർച്ച് ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഡിവിഷൻ ബെഞ്ച് ഉത്തരവിനെതിരെ സുപ്രീംകോടതിയുടെ സ്റ്റേ കാത്തു നിൽക്കുകയാണ് സർക്കാർ .വേണമെങ്കിൽ പുതിയ വഖഫ് ഭേദഗതി നിയമത്തിന്‍റെ പിൻബലത്തിലും മുനമ്പം നിവാസികൾക്ക് റവന്യു അധികാരങ്ങൾ പുനസ്ഥാപിച്ചു നൽകാനാകുമെന്നും അദ്ദേഹം കൂട്ടിച്ചേർത്തു. മാർച്ചിനും ധർണയ്ക്കും ശേഷം ഏതാനും മുനമ്പം നിവാസികൾ കുഴുപ്പിള്ളി വില്ലേജ് ഓഫീസിൽ എത്തി കരം അടച്ച് കിട്ടുന്നതിനുള്ള അപേക്ഷയും നൽകി. മണ്ഡലം പ്രസിഡന്‍റ് ഷബിൻലാൽ തെക്കേടത്ത് അധ്യക്ഷത വഹിച്ചു. ഇ.എസ് പുരുഷോത്തമൻ, വി.വി. അനിൽ, എൻ.എം. രവി, ഫിലിപ്പ് ജോസഫ്, എന്നിവർ സംസാരിച്ചു.

വെറ്റിലപ്പാറ രാജീവ് ഗാന്ധി നഗറിലെ അഞ്ച് കുടുംബങ്ങൾക്ക് പട്ടയം; നടപടിയായി

കോതമംഗലം: പിണ്ടിമന പഞ്ചായത്തിലെ വെറ്റിലപ്പാറ രാജീവ് ഗാന്ധി നഗറിലെ അഞ്ച് കുടുംബങ്ങൾക്ക് പട്ടയത്തിനുള്ള നടപടിയായതായി ആന്‍റണി ജോൺ എംഎൽഎ അറിയിച്ചു. ജൂൺ 27 ലെ പ്രകൃതിക്ഷോഭത്തിൽ രാജീവ് ഗാന്ധി നഗറിലെ ഒരു വീട് പൂർണമായും നിലം പൊത്തുകയും സമീപത്തുള്ള മറ്റു നാലു വീടുകൾ വാസയോഗ്യമല്ലാതായി തീരുകയും ചെയ്തിരുന്നു. വീടുകൾ രാജീവ് ഗാന്ധി ദശലക്ഷം പദ്ധതി പ്രകാരം ഹൗസിംഗ് ബോർഡ് പണിതു നൽകിയിരുന്നതാണ്. ഭൂമിയുടെ ഉടമസ്ഥാവകാശം ഹൗസിംഗ് ബോർഡിൽ തന്നെ നില നിർത്തുകയും ചെയ്തിരുന്നു. ആയതിനാൽ കുടുംബങ്ങൾക്ക് കൈവശ സർട്ടിഫിക്കറ്റ് ലഭിക്കുന്നതിനോ, കരം തീർക്കുന്നതിനോ, ലൈഫ് ഭവന പദ്ധതിയുടെ ഭാഗമാകുന്നതിനോ സാധിച്ചിരുന്നില്ല. വസ്തുക്കൾ ഇപ്പോൾ ഹൗസിംഗ് ബോർഡിൽനിന്നും സർക്കാരിലേക്ക് തിരികെ നൽകുകയും ചെയ്തു. അതിന്‍റെ തുടർച്ചയിലാണ് ഇപ്പോൾ ഈ കുടുംബങ്ങൾക്ക് പട്ടയം നൽകാനുള്ള നടപടി ഉണ്ടായത്. ഇന്നലെ ചേർന്ന താലൂക്ക് ലാൻഡ് അസൈൻമെന്‍റ് കമ്മിറ്റി യോഗം അഞ്ച് കുടുംബങ്ങളുടെ പട്ടയ അപേക്ഷകൾക്ക്‌ അംഗീകാരം നൽകി. താലൂക്ക് ഓഫീസിൽ ചേർന്ന ലാൻഡ് അസൈൻമെന്‍റ് കമ്മിറ്റിയിൽ ആന്‍റണി ജോൺ എംഎൽഎ അധ്യക്ഷത വഹിച്ചു. തഹസിൽദാർ എം. അനിൽകുമാർ, പഞ്ചായത്ത് പ്രസിഡന്‍റുമാരായ ജെസി സാജു, ഷിബു പടപ്പറമ്പത്ത്, രാഷ്ട്രീയ പാർട്ടി പ്രതിനിധികളായ കെ.കെ. ശിവൻ, എം.എസ്. എൽദോസ്, എ.കെ. ഗോവിന്ദൻ, ബേബി പൗലോസ് എന്നിവർ പങ്കെടുത്തു.

രക്ഷപെടൽ; 60 അടി ഉയരത്തിൽനിന്ന്

കോതമംഗലം: ശിഖരങ്ങൾ മുറിക്കുന്നതിനിടയിൽ തോളിന് പരിക്കേറ്റ് 60 അടി ഉയരത്തിൽ മരത്തിൽ കുടുങ്ങിയ തൊഴിലാളിയെ അഗ്നിരക്ഷാസേന രക്ഷപ്പെടുത്തി. ആസാം സ്വദേശി സദ്ദാം ഹുസൈനാ(32)ണ് മരത്തിൽ കുരുങ്ങിയത്. ഇന്നലെ ഉച്ചയ്ക്ക് 12.45 ഓടെ കോട്ടപ്പടി നാഗഞ്ചേരി പാനിപ്രയിൽ തോംപ്രയിൽ പൈലി പൗലോസിൽ പറമ്പിൽ മരങ്ങൾ മുറിക്കുന്നതിനിടയിലാണ് തൊഴിലാളി മരത്തിൽ കുടുങ്ങിയത്. വിവരം അറിയിച്ചതിനെ തുടർന്ന് എത്തിയ കോതമംഗലം അഗ്നിരക്ഷാസേനാംഗങ്ങൾ ഒരു മണിക്കൂറിലേറെ നീണ്ട കഠിന പ്രയത്നത്തിനൊടുവിലാണ് ലാഡർ, റോപ്പ്, സേഫ്റ്റി ഹാർനസ് എന്നിവ ഉപയോഗിച്ച് മരത്തിൽനിന്നും തൊഴിലാളിയെ സുരക്ഷിതമായി താഴെ ഇറക്കിയത്. തുടർന്ന് സേനയുടെ ആംബുലൻസിൽ കോതമംഗലം മാർ ബസോലിയസ് ആശുപത്രിയിൽ എത്തിച്ചു. സ്റ്റേഷന്‍ ഓഫീസർ സതീഷ് ജോസ്, സീനിയർ ഫയർ ആൻഡ് റെസ്ക്യൂ ഓഫീസർ സിദ്ദിഖ് ഇസ്മായിൽ, ഫയർ ആൻഡ് റെസ്ക്യൂ ഓഫീസർമാരായ ഒ.എ. ആബിദ്, വി.എം. ഷാജി, പി.കെ. ശ്രീജിത്ത്, ബേസിൽ ഷാജി, വിഷ്ണു മോഹൻ, എം.എ. അംജിത്ത്, ആർ. മഹേഷ്, ഹോംഗാർഡ്മാരായ പി. ബിനു, എം. സേതു, ജിയോബിൻ ചെറിയാൻ എന്നിവർചേർന്നാണ് രക്ഷാപ്രവർത്തനം നടത്തിയത്.

ആരക്കുഴയിൽ കോൺഗ്രസ് ഇലക്ഷൻ കമ്മിറ്റി ഓഫീസ് തുറന്നു

മൂവാറ്റുപുഴ: ബോർഡു സ്ഥാപിച്ചതുമായി ബന്ധപ്പെട്ട വിവാദത്തിനിടെ കോൺഗ്രസ് ആരക്കുഴ മണ്ഡലം കമ്മിറ്റി കേന്ദ്ര ഇലക്ഷൻ കമ്മറ്റി ഓഫീസ് പെരുമ്പല്ലൂർ പോസ്റ്റ് ഓഫീസ് കവലയിൽ മാത്യു കുഴൽനാടൻ എംഎൽഎ ഉദ്ഘാടനം ചെയ്തു. മണ്ഡലം പ്രസിഡന്‍റ് പോൾ ലൂയീസ് അധ്യക്ഷത വഹിച്ചു. കെപിസിസി സെക്രട്ടറി കെ.എം. സലിം, പാമ്പാക്കുട ബ്ലോക്ക് പഞ്ചായത്തംഗം സിബി പി. ജോർജ്, ആരക്കുഴ പഞ്ചായത്ത് പാർലമെന്‍ററി പാർട്ടി ലീഡർ സാബു പൊതൂർ, ആരക്കുഴ പഞ്ചായത്ത് പ്രസിഡന്‍റ് ലസിത മോഹനൻ, വൈസ് പ്രസിഡന്‍റ് ബിജു തോട്ടുപുറം, മുൻ മണ്ഡലം പ്രസിഡന്‍റ് ജോർജ് മാത്യു, യൂത്ത് കോൺഗ്രസ് മണ്ഡലം പ്രസിഡന്‍റ് വിഷ്ണു ബാബു എന്നിവർ പ്രസംഗിച്ചു. ഇന്ത്യൻ നാഷണൽ കോൺഗ്രസ് ആരക്കുഴ മണ്ഡലം കമ്മിറ്റിയുടെ നേതൃത്വത്തിലാണ് ഓഫീസ് തുറന്നത്. പഞ്ചായത്തു തെരഞ്ഞെടുപ്പ് അടുത്തപ്പോൾ യുഡിഎഫ് എന്ന പേരു ചേർത്ത് കേരള കോൺഗ്രസിനെ ഉൾപ്പെടുത്താതെ ഇന്ത്യൻ നാഷണൽ കോൺഗ്രസ് ആരക്കുഴ മണ്ഡലം കേന്ദ്ര തെരഞ്ഞെടുപ്പ് കമ്മിറ്റി ഓഫീസ് എന്ന പേരിൽ ബോർഡു സ്ഥാപിച്ചതുമായി ബന്ധപ്പെട്ട് കേരള കോൺഗ്രസ് പ്രതിഷേധം ഉയർത്തിയ ഓഫീസാണ്‌ തുറന്നത്.

സിഐഎസ്‌സിഇ ദേശീയ സ്കൂൾ ക്രിക്കറ്റ്; എംഎ ഇന്‍റർനാഷണലിൽനിന്നും രണ്ട് മിന്നും താരങ്ങൾ

കോതമംഗലം: സിഐഎസ്‌സിഇ ദേശീയ സ്കൂൾ ക്രിക്കറ്റ് അണ്ടർ 17 മത്സരത്തിൽ റണ്ണറപ്പ് കിരീടം നേടിയ കേരളാ ടീമിൽ എംഎ ഇന്‍റർനാഷണലിൽ നിന്നും രണ്ട് മിന്നും താരങ്ങൾ. സെമിഫൈനലിൽ മഹാരാഷ്ട്രയെ ഏഴുവിക്കറ്റിന് തോല്പിച്ചാണ് കേരളം ഫൈനലിൽ ഇടം നേടിയത്. മഹാരാഷ്ട്രയിൽ നടന്ന ഫൈനൽ മത്സരത്തി ൽ ബംഗാളിനോട് പൊരുതി പരാജയപ്പെട്ടെങ്കിലും കോതമംഗലം എംഎ ഇന്‍റർനാഷണൽ സ്കൂളിലെ 11-ാം ക്ലാസ് വിദ്യാർഥികളായ നെവിൻ പോളും, ജോഷ്വാ എൽദോ അരവിന്ദും ടൂർണമെന്‍റിലെ മിന്നും താരങ്ങളായി മാറി. നെവിൻ പോൾ നാല് മത്സരങ്ങളിൽ നിന്ന് 193 റൺസ് നേടി ടോപ് സ്കോററും മികച്ച വിക്കറ്റ് കീപ്പർ അവാർഡും നേടി, മാൻ ഓഫ് ദി ടൂർണമെന്‍റായി തെരഞ്ഞെടുക്കപ്പെട്ടു. ജോഷ്വാ എൽദോ അരവിന്ദ് ഏഴുവിക്കറ്റ് നേടുകയും (ടൂർണമെന്‍റിലെ രണ്ടാമത്തെ വിക്കറ്റ് വേട്ടക്കാരൻ ) സെമി ഫൈനലിൽ മാൻ ഓഫ് ദി മാച്ച് അവാർഡ് നേടുകയും ചെയ്തു. മികച്ച പ്രകടനം നടത്തിയ കുട്ടികളെയും കേരളാ ടീമിന്‍റെയും എംഎ ഇന്‍റർനാഷണൽ സ്കൂളിലെയും ക്രിക്കറ്റ് കോച്ച് വി.എം. മനുവിനെയും സ്കൂൾ മാനേജ്മെന്‍റും പ്രിൻസിപ്പലും അധ്യാപകരും ജീവനക്കാരും അഭിനന്ദിച്ചു. കോതമംഗലം പാലക്കാടൻ പോൾ പി. മാത്യുവിന്‍റെയും, ടീന പോളിന്‍റെയും മകനാണ് നെവിൻ പോൾ. മണ്ണാറ പ്രായിൽ ജി. അരവിന്ദന്‍റെയും, ആനി വി. ഐസക്കിന്‍റെയും മകനാണ് ജോഷ്വാ എൽദോ അരവിന്ദ്.

നിര്‍മലയിൽ വയോജന സംഗമം

മൂവാറ്റുപുഴ: നിര്‍മല കോളജ് സോഷ്യല്‍ വര്‍ക്ക് വിഭാഗത്തിന്‍റെ ആഭിമുഖ്യത്തില്‍ വയോജന സൗഹൃദം ലക്ഷ്യമിട്ട് നിഹാര്‍ (നിര്‍മല ഇനീഷ്യേറ്റീവ് ഫോര്‍ ഹെല്‍ത്തി ഏയ്ജിംഗ് ആൻഡ് റെസീലിയന്‍സ്) എന്ന പേരില്‍ വയോജന സംഗമം നടത്തി. കോളജ് ഓഡിറ്റോറിയത്തില്‍ നടത്തിയ വയോജന സംഗമം മുന്‍ ഡിജിപി ഡോ. ഋഷിരാജ് സിംഗ് ഉദ്ഘാടനം ചെയ്തു. കോതമംഗലം രൂപത ഹയര്‍ എഡ്യുക്കേഷന്‍ സെക്രട്ടറി റവ. ഡോ. പോള്‍ പാറത്താഴം ചടങ്ങില്‍ അധ്യക്ഷത വഹിച്ചു. മൂവാറ്റുപുഴ നഗരസഭയുമായി സഹകരിച്ച് ലോകാരോഗ്യ സംഘടനയുടെ ശൃംഖലയില്‍ ചേരുവാനുള്ള നടപടിക്രമങ്ങള്‍ കോളജ് സോഷ്യല്‍ വര്‍ക്ക് വിഭാഗത്തിന്‍റെ നേതൃത്വത്തില്‍ ആരംഭിച്ചു. ജീഡിയാട്രിക് സൊസൈറ്റി ഓഫ് ഇന്ത്യയും ലോകാരോഗ്യ സംഘടനയുമായി ചേര്‍ന്ന് ഇത്തരത്തില്‍ ഒരു നടപടിക്ക് തുടക്കമിടുന്ന കേരളത്തിലെ ആദ്യത്തെ സോഷ്യല്‍ വര്‍ക്ക് കോളജാണ്. ഓട്ടോണോമസ് ഡയറക്ടര്‍ പ്രഫ. ഡോ. കെ.വി. തോമസ്, ഡബ്ല്യുഎച്ച്ഒ ഫോക്കല്‍ പോയിന്‍റ് ഡോ. പ്രവീണ്‍ ജി. പായ്, ജീഡിയാട്രിക് സൊസൈറ്റി ഓഫ് ഇന്ത്യ മുന്‍ പ്രസിഡന്‍റ് ഡോ. സജീഷ് അശോകന്‍, നഗരസഭാംഗം ജോയ്‌സ് മേരി ആന്‍റണി, ശാന്തിഗിരി കോളജ് അസിസ്റ്റന്‍റ് പ്രഫ. സിസിലിയമ്മ പെരുംപനാനി, കോളജ് ഐക്യുഎസി കോ-ഓര്‍ഡിനേറ്റര്‍ ഡോ. വി.ജെ. ജിജോ, സോഷ്യല്‍ വര്‍ക്ക് വിഭാഗം മേധാവി സുജ തോമസ്, ലിറ്റ മെറിന്‍ മാത്യു എന്നിവര്‍ പ്രസംഗിച്ചു.

വനിതാ ആശുപത്രി സൂപ്രണ്ടിനുനേരേ കൈയേറ്റം: കര്‍ശന നടപടി വേണമെന്ന് കെജിഎംഒ

കൊച്ചി: പിറവം താലൂക്ക് ആശുപത്രിയിലെ സൂപ്രണ്ട് ഡോ. എം. രാജലക്ഷ്മിയെ അഭ്യം പറയുകയും ആക്രമിക്കാന്‍ ശ്രമിക്കുകയും ചെയ്ത അസിസ്റ്റന്‍റ് സര്‍ജന്‍ ഡോ. ഫവാസ് മജീദിനെതിരെ അടിയന്തരമായി കര്‍ശന നടപടി സ്വീകരിക്കണമെന്നും അല്ലാത്ത പക്ഷം ശക്തമായ സമരപരിപാടികളുമായി രംഗത്തുവരുമെന്നും കേരള ഗവ.മെഡിക്കല്‍ ഓഫീസേഴ്‌സ് അസോസിയേഷന്‍ (കെജിഎംഒഎ) ജില്ലാ കമ്മിറ്റി. ഇക്കാര്യം ആവശ്യപ്പെട്ട് ജില്ലാ മെഡിക്കല്‍ ഓഫീസര്‍ക്ക് പരാതി നല്‍കിയതായും കേരള ഗവ. മെഡിക്കല്‍ ഓഫീസേഴ്‌സ് അസോസിയേഷന്‍ (കെജിഎംഒഎ) എറണാകുളം ജില്ലാ പ്രസിഡന്‍റ് ഡോ. ടി. സുധാകര്‍, സെക്രട്ടറി ഡോ. കാര്‍ത്തിക് ബാലചന്ദ്രന്‍ എന്നിവര്‍ പറഞ്ഞു. വനിതയാണെന്ന പരിഗണന പോലും ഇല്ലാതെയാണ് ഡോ. ഫവാസ് മജീദ് സൂപ്രണ്ടിനെ ആക്രമിക്കാന്‍ ശ്രമിച്ചത്. ഇത് ഒരു കാരണവശാലും അംഗീകരിക്കാന്‍ കഴിയില്ല. അതിക്രമത്തെ തുടര്‍ന്ന് ദേഹാസ്വാസ്ഥ്യം അനുഭവപ്പെട്ട ഡോ. എം. രാജലക്ഷ്മി ചികിത്സയിലാണ്. കഴിഞ്ഞ മാസം ആശുപത്രിയിലെ സഹ ഡോക്ടറെ കൈയേറ്റം ചെയ്യാനും ഡോ. ഫവാസ് മജീദ് ശ്രമിച്ചിരുന്നു. രോഗികളോട് പോലും ഇയാള്‍ അക്രമ സ്വഭാവം കാണിക്കാറുണ്ടെന്നും പറയുന്നു. നിലവില്‍ ഇദ്ദേഹത്തിനൊപ്പം ജോലി ചെയ്യാന്‍ കഴിയില്ലെന്ന നിലപാടിലാണ് സഹ ജീവനക്കാര്‍. സംഭവത്തില്‍ പ്രതിഷേധിച്ച് ഹോസ്പിറ്റല്‍ സ്റ്റാഫ് കൗണ്‍സില്‍ യോഗം ചേര്‍ന്ന് ഡോ. ഫവാസ് മജീദിനെതിരെ ശക്തമായ നടപടിയാവശ്യപ്പെട്ടിട്ടുണ്ടെന്നും അസോസിയേഷന്‍ ഭാരവാഹികള്‍ വ്യക്തമാക്കി.

സ്കൂളിന്‍റെ സ്ഥലം വിട്ടുകിട്ടണമെന്ന ആവശ്യം കോടതി തള്ളി

മൂവാറ്റുപുഴ: സ്ഥലം വിട്ടുകിട്ടണമെന്ന് ആവശ്യപ്പെട്ട് ആറൂർ ഗവ. ഹൈസ്കൂളിനെതിരേ സ്വകാര്യ വ്യക്തി നൽകിയ ഹർജിയിൽ സ്‌കൂളിന് അനുകൂല വിധി. പാലക്കുഴ വട്ടക്കാവില്‍ ബാബു കുര്യാക്കോസാണ് സ്‌കൂളിന്‍റെ കൈവശമുള്ള 69.500 സെന്‍റ് സ്ഥലം തന്‍റേതാണെന്നും ഇത് വിട്ടുകിട്ടണമെന്നും ആവശ്യപ്പെട്ട് ഹർജി നൽകയത്. 2000ല്‍ മൂവാറ്റുപുഴ മുന്‍സിഫ് കോടതിയിലാണ് ആദ്യം അന്യായം നല്‍കിയത്. പിന്നീട് ഇത് പിന്‍വലിച്ച് സബ് കോടതിയില്‍ ഹർജി ഫയല്‍ ചെയ്തു. ശേഷം ഈ കേസ് പെരുമ്പാവൂര്‍ സബ് കോടതിയിലേക്ക് മാറ്റി. എന്നാല്‍ പിന്നീട് പെരുമ്പാവൂര്‍ കോടതി ഈ കേസ് തള്ളിയിരുന്നു. ഈ ഉത്തരവിനെതിരേ വാദി മൂവാറ്റുപുഴ അഡീഷണല്‍ ജില്ലാ കോടതിയില്‍ അപ്പീല്‍ ഫയല്‍ ചെയ്തു. നീണ്ട ഇരുപത്തിയഞ്ച് വര്‍ഷമായുള്ള നിയമയുദ്ധത്തിന് ഒടുവിൽ വിശദമായി വാദം കേട്ട് മൂവാറ്റുപുഴ അഡീഷണല്‍ ജില്ല ജഡ്ജി കെ.എന്‍. ഹരികുമാറാണ് ഹർജി തള്ളി ഉത്തരവിട്ടത്. കേസില്‍ സര്‍ക്കാരിനു വേണ്ടി അഡീഷണല്‍ ഗവ. പ്ലീഡര്‍ കെ.എസ്. ജ്യോതികുമാര്‍, സ്‌കൂള്‍ പിറ്റിഎയ്ക്കു വേണ്ടി എ.കെ. ജയപ്രകാശ് എന്നിവര്‍ ഹാജരായി.

ഗതാഗതമന്ത്രിയുടെ അതൃപ്തിക്കിടയാക്കിയ സംഭവം; സ്വകാര്യ ബസ് ജീവനക്കാർ ആര്‍ടിഒയ്ക്ക് മാപ്പപേക്ഷ നല്‍കി

കോതമംഗലം: കോതമംഗലത്ത് കെഎസ്ആര്‍ടിസി ബസ് സ്റ്റാൻഡിലെ ഉദ്ഘാടന ചടങ്ങില്‍ പങ്കെടുക്കുകയായിരുന്ന മന്ത്രി കെ.ബി. ഗണേഷ്കുമാറിന്‍റെ അതൃപ്തിക്കിടയാക്കിയ സംഭവത്തില്‍ ഐഷാസ് ബസിന്‍റെ ഡ്രൈവര്‍ അജയന്‍, കണ്ടക്ടര്‍ കരീം എന്നിവർ മൂവാറ്റുപുഴ ആര്‍ടിഒയ്ക്ക് മാപ്പപേക്ഷ നല്‍കി. ഇരുവരോടും ഓഫീസില്‍ ഹാജരാകണമെന്ന് ആര്‍ടിഒ ആവശ്യപ്പെട്ടിരുന്നു. ബസ് ഉടമ ഷാജിക്ക് ഒപ്പമാണ് ഇരുവരും ഹാജരായത്. സംഭവത്തില്‍ നേരിട്ട് വിശദീകരണം നല്‍കിയശേഷമാണ് മാപ്പപേക്ഷ നല്‍കിയത്. നടപടിയുടെ കാര്യത്തിലുള്ള തീരുമാനം ജീവനക്കാരെ അറിയിച്ചിട്ടില്ല. ബസിന്‍റെ പെര്‍മിറ്റ് സസ്പെന്‍റ് ചെയ്യുന്നതിലും അന്തിമ തീരുമാനമായിട്ടില്ല. ഉദ്ഘാടന വേദിയുടെ സമീപത്തുകൂടി അമിത വേഗതയില്‍ പോയെന്ന കാരണത്താല്‍ ഐഷാസ് ബസിനെതിരെ നടപടിയെടുക്കാന്‍ വേദിയില്‍വച്ചുതന്നെ മന്ത്രി ഉദ്യോഗസ്ഥര്‍ക്ക് നിര്‍ദേശം നല്‍കിയിരുന്നു. അസ്വാഭാവികമായി ഹോണ്‍ മുഴക്കിയതും മന്ത്രിയുടെ അപ്രീതിക്ക് കാരണമായിരുന്നു.അമിത വേഗതയില്‍ ബസ് ഓടിച്ചില്ലെന്നും തകരാര്‍മൂലമാണ് ഹോണ്‍ കൂടുതല്‍ നേരം മുഴങ്ങിയതെന്നും ബസ് ജീവനക്കാര്‍ വിശദീകരിച്ചിരുന്നു.

പിറവത്ത് വി.എസ്. സ്‌മാരക ഹാൾ തുറന്നു

പിറവം: മുൻ മുഖ്യമന്ത്രിയായിരുന്ന വി.എസ്. അച്യുതാനന്ദന്‍റെ സ്മാരകമായി പൂർത്തിയാക്കിയ ഹാൾ തുറന്നു കൊടുത്തു. പിറവത്ത് നഗരസഭ ഓഫീസ് പ്രവർത്തിക്കുന്ന സബർബൻ മാളിന്‍റെ അഞ്ചാം നിലയിലാണ് എയർ കണ്ടീഷൻ ഹാൾ പൂർത്തിയാക്കിയത്. മന്ത്രി പി. പ്രസാദ് ഹാളിന്‍റെ ഉദ്ഘാടനം നിർവഹിച്ചു. നഗരസഭാധ്യക്ഷ ജൂലി സാബു അധ്യക്ഷത വഹിച്ചു. അനൂപ് ജേക്കബ് എംഎൽഎ മുഖ്യ പ്രഭാഷണം നടത്തി. നഗരസഭാ ഉപാധ്യക്ഷൻ കെ.പി. സലിം, മുൻ നഗരസഭാധ്യക്ഷ ഏലിയാമ്മ ഫിലിപ്പ് സ്ഥിരം സമിതി അധ്യക്ഷരായ ജൂബി പൗലോസ്, ഷൈനി ഏലിയാസ്, ബിമൽ ചന്ദ്രൻ തുടങ്ങിയവർ പങ്കെടുത്തു. തുടർന്ന് ഗായകൻ അലോഷിയുടെ ഗസൽ പരിപാടിയും അരങ്ങേറി.

കോൺഗ്രസ് ജനപക്ഷ യാത്ര

ഇലഞ്ഞി: ഇലഞ്ഞി മണ്ഡലം കോൺഗ്രസ് കമ്മിറ്റിയുടെ നേത്യത്വത്തിൽ ജനപക്ഷ യാത്ര നടത്തി. എരപ്പാംകുഴിയിൽനിന്നും ആരംഭിച്ച ജനപക്ഷ യാത്ര പിറവം ബ്ലോക്ക് കോൺഗ്രസ് പ്രസിഡന്‍റ് പി.സി.ജോസ് ജാഥാ ക്യാപ്റ്റന് പതാക കൈമാറി ഉദ്ഘാടനം ചെയ്തു. മണ്ഡലം കോൺഗ്രസ് പ്രസിഡന്‍റ് സിജുമോൻ പുല്ലംപറയിൽ അധ്യഷത വഹിച്ചു.

കേരള കോൺഗ്രസ് മണ്ഡലം കൺവൻഷൻ

വാഴക്കുളം: കേരള കോൺഗ്രസ് ആവോലി മണ്ഡലം കൺവൻഷൻ നടത്തി. ആനിക്കാട് ചിറപ്പടിയിൽ ഡെപ്യൂട്ടി ചെയർമാൻ കെ.ഫ്രാൻസിസ് ജോർജ് എംപി കൺവൻഷൻ ഉദ്ഘാടനം ചെയ്തു. മണ്ഡലം പ്രസിഡന്‍റ് രാജു കണിമറ്റം അധ്യക്ഷത വഹിച്ചു. കേരള കോൺഗ്രസ് സംസ്ഥാന കോ-ഓർഡിനേറ്റർ അപു ജോൺ ജോസഫ് മുഖ്യ പ്രഭാഷണം നടത്തി. നിയോജക മണ്ഡലം പ്രസിഡന്‍റ് ഷൈസൺ മാങ്ങഴ, യൂത്ത് ഫ്രണ്ട് സംസ്ഥാന സെക്രട്ടറി കെ.എം. ജോർജ്, ജേക്കബ് ഇരമംഗലം, ജോയി കാക്കനാട്ട്, ഫ്രാൻസിസ് ഇലഞ്ഞേടത്ത്, കുര്യാച്ചൻ കളമ്പാട്ടുപറമ്പിൽ തുടങ്ങിയവർ പ്രസംഗിച്ചു.

കീരംപാറയിലെ കാട്ടാന ശല്യം; അധികൃതർ ഇടപെടണമെന്ന്

കോതമംഗലം: കീരംപാറ പഞ്ചായത്തിലെ ചീക്കോട്, കൂവപ്പാറ, ചാരുപാറ മേഖലയിലെ കാട്ടാന ശല്യം പരിഹരിക്കാൻ അധികൃതർ അടിയന്തിരമായി ഇടപെടണമെന്ന് സിപിഐ വീട്ടുമുറ്റ സദസ് ആവശ്യപ്പെട്ടു. സിപിഐ മണ്ഡലം സെക്രട്ടറി പി.റ്റി. ബെന്നി പരിപാടി ഉദ്ഘാടനം ചെയ്തു. ലോക്കൽ കമ്മറ്റി അസിസ്റ്റന്‍റ് സെക്രട്ടറി മനോജ് മത്തായി അധ്യക്ഷത വഹിച്ചു. മണ്ഡലം സെക്രട്ടറിയേറ്റ് മെമ്പർ കെ.എസ്. ജ്യോതികുമാർ, ലോക്കൽ കമ്മിറ്റി അംഗങ്ങളായ കെ.പി. തോമസ്, എൻ.എ. മാത്യു, ബെന്നി മാത്യു, പഞ്ചായത്ത് വികസന കാര്യ സ്ഥിരം സമിതി ചെയർപേഴ്സൺ സിനി ബിജു, ബിജു ഫ്രാൻസീസ്, എന്നിവർ പ്രസംഗിച്ചു.

പോളിയോ നിർമാർജന യജ്ഞം

മൂവാറ്റുപുഴ: മൂവാറ്റുപുഴ നഗരസഭയുടെ ആഭിമുഖ്യത്തില്‍ പോളിയോ വൈറസ് നിര്‍മാര്‍ജനം ലക്ഷ്യമിട്ട് നടത്തുന്ന ദേശീയ പോളിയോ നിർമാർജന തീവ്ര യജ്ഞ പരിപാടി സംഘടിപ്പിച്ചു. ഭാരതത്തെ പോളിയോ വിമുക്തമാക്കുന്നതിനായി നടത്തുന്ന തീവ്ര യജ്ഞ പരിപാടിയുടെ ഭാഗമായാണ് മൂവാറ്റുപുഴ ജനറല്‍ ആശുപത്രിയിലും പോളിയോ തുള്ളി മരുന്ന് വിതരണം സംഘടിപ്പിച്ചത്. ജനറല്‍ ആശുപത്രിക്ക് പുറമേ നഗരസഭയുടെ അഭിമുഖത്തില്‍ 28 കേന്ദ്രങ്ങളിലും പോളിയോ തുള്ളി മരുന്ന് വിതരണം നടത്തി. അഞ്ച് വയസില്‍ താഴെ പ്രായമുള്ള കുട്ടികള്‍ക്കാണ് രാവിലെ എട്ടു മുതല്‍ വൈകിട്ട് അഞ്ച് വരെ പോളിയോ തുല്യമരുന്ന് വിതരണം നടത്തിയത്. കോതമംഗലം: മാർ ബസേലിയോസ്‌ ആശുപത്രിയിൽ സംഘടിപ്പിച്ച പൾസ് പോളിയോ ഇമ്യൂണൈസേഷൻ ആന്‍റണി ജോൺ എംഎൽഎ ഉദ്ഘാടനം ചെയ്തു. ആർബിഎസ്കെ നേഴ്സ് സി.എം. ബിന്ദു, ആശാവർക്കർ സിന്ധു ചാക്കോച്ചൻ എന്നിവർ പങ്കെടുത്തു.

പെരുമറ്റം പാലത്തിന്‍റെ വീതി കൂട്ടുന്നു

മൂവാറ്റുപുഴ: കൊച്ചി-ധനുഷ്‌കോടി ദേശീയപാതയിലെ പ്രധാന പാലങ്ങളില്‍ ഒന്നായ പെരുമറ്റം പാലത്തിന്‍റെ വീതി കൂട്ടുന്നതിനുള്ള നിര്‍മാണ പ്രവര്‍ത്തനങ്ങള്‍ ആരംഭിച്ചു. 16 മീറ്റര്‍ നീളവും 7 മീറ്റര്‍ വീതിയുമുള്ള പാലത്തിനോട് ചേര്‍ന്ന് നാലുമീറ്റര്‍ കൂട്ടി ചേര്‍ത്താണ് വീതി വര്‍ധിപ്പിക്കുന്നത്. മൂന്ന് സ്പാനുകളില്‍ ആയിട്ടാണ് പുതുതായി ചേര്‍ക്കുന്ന പാലത്തിന്‍റെ സ്ലാബുകള്‍ ഉറപ്പിക്കുന്നത്. ഒറ്റവരി ഗതാഗതം മാത്രം സാധിക്കുന്ന ഈ പാലത്തില്‍ ഗതാഗതക്കുരുക്ക് അനുഭവപ്പെടുന്നതോടെ മൂന്ന് പതിറ്റാണ്ടുകള്‍ക്ക് മുമ്പാണ് പാലം വീതി കൂട്ടിയത്. മുളവൂരില്‍നിന്ന് ആരംഭിച്ച് മൂവാറ്റുപുഴയാറില്‍ കടവുംപാട് തോട്ടിലെ വെള്ളച്ചാട്ടത്തിന് മുകളിലായിട്ടാണ് പാലം നിര്‍മിച്ചിരിക്കുന്നത്. മൂന്നാറിലേക്ക് പോകുന്ന വിനോദസഞ്ചാരികള്‍ ഉള്‍പ്പെടെ യാത്രക്കാരെ ആകര്‍ഷിക്കുന്നതാണ് ഈ വെള്ളച്ചാട്ടം. വെള്ളച്ചാട്ടത്തിന്‍റെ മനോഹാരിത നിലനിര്‍ത്തിയാകും പാലത്തിന്‍റെ നിര്‍മാണം.

കിഴുമുറി പള്ളിയിലെ അമൂല്യ നാണയങ്ങൾ

പിറവം: രാമമംഗലം കിഴുമുറി സെന്‍റ് ജോർജ് ഓർത്തഡോക്സ് വലിയ പള്ളിയിലെ മേമ്പൂട്ടിൽ കഴിഞ്ഞ നൂറ്റി മുപ്പത് വർഷത്തോളമായി സൂക്ഷിച്ചിരുന്ന അമൂല്യ നാണയ ശേഖരം പുറത്തെടുത്ത് പ്രദർശിപ്പിച്ചു. ദേവലായത്തിൽ മേമ്പൂട്ടിൽ സൂക്ഷിച്ചിരുന്ന നാണയങ്ങൾ ശുചിയാക്കുന്നതിനായാണ് പുറത്തെടുത്തത്. വിശ്വാസികളും, നാട്ടുകാരുമടക്കം നിരവധി പേരാണ് ഇത് കാണുന്നതിനായി എത്തിയത്. കിഴുമുറിയിൽ പള്ളി കൂദാശ ചെയ്ത 1894 മുതൽ വിശ്വാസികൾ കാണിക്കയായി ഭണ്ഡാരത്തിൽ നിക്ഷേപിച്ചതും പള്ളിക്ക് സമർപ്പിച്ചതുമായ നാണയങ്ങളാണിത്. പണ്ടുണ്ടായിരുന്ന വിവിധതരം കാശുകൾ, കാലണ, ഒരണ, ഓട്ടക്കാലണ തുടങ്ങിയ നാണയങ്ങൾക്കൊപ്പം മൊറോക്കോ, ഫ്രാൻസ്, ഓസ്ട്രേലിയ, ഇസ്രായേൽ, ബ്രസീൽ, മലേഷ്യ, തുടങ്ങിയ വിദേശ രാജ്യങ്ങളിലെ നാണയങ്ങളും, വെള്ളി കൂടുതലായിട്ടുള്ള നാണയങ്ങളുമെല്ലാം ശേഖരത്തിലുണ്ട്. ഇപ്പോൾ വിനിമയ മൂല്യവും, പൗരാണികമൂല്യമുള്ള പല നാണയങ്ങളും വലിയ തുകയ്ക്ക് ലേലം ചെയ്തിട്ടുള്ളവയാണ്. വികാരി ഫാ. ജോസഫ് മലയിൽ, ട്രസ്റ്റി റോയ് കുര്യൻ, സെക്രട്ടറി ബിനോയ് സ്ക്കറിയ, കൺവീനർമാരായ സാബു മാത്യു പാടത്ത്, ഐസക് ടി. പോൾ, ഷാജു ജോൺ തുടങ്ങിയവർ ചേർന്ന് പുറത്തെടുത്ത നാണയങ്ങൾ കഴുകി വൃത്തിയാക്കി. പള്ളിയിലെത്തുന്നവർക്ക് കാണാൻ കഴിയുന്ന തരത്തിൽ നാണയങ്ങൾ പ്രദർശിപ്പിക്കാനാണ് സമിതി ഉദ്ദേശിക്കുന്നത്. പരുമല തിരുമേനിയായ മാർ ഗ്രീഗോറിയോസ് മെത്രാപ്പോലീത്ത, മലങ്കരയിലെ പ്രഥമ കാതോലിക്ക ബസേലിയോസ് പൗലോസ് പ്രഥമൻ ബാവ, മലങ്കര മെത്രോലീത്തയായിരുന്ന പുലിക്കോട്ടിൽ ജോസഫ് മാർ ദിവന്നാസിയോസ്, എന്നിവർ ചേർന്ന് തറക്കല്ലിട്ട് നിർമാണമാരംഭിച്ച പള്ളി 1894ൽ ഇവർ തന്നെയാണ് കൂദാശ നടത്തിയത്. നാണായ ശേഖരം കാണുന്നതിന് ജാതി - മത ഭേദമന്യേ ധാരാളമാളുകൾ ഇവിടെയെത്തുന്നുണ്ട്.

ശബരിമല സ്വര്‍ണപ്പാളി മോഷണ വിവാദം; കോൺഗ്രസ് പ്രതിഷേധിച്ചു

മൂവാറ്റുപുഴ: വിശ്വാസികള്‍ക്ക് എതിരായ നിലപാടാണ് സിപിഎം എല്ലാ കാലവും കൈകൊണ്ടിട്ടുള്ളതെന്ന് അയ്യപ്പ സേവാ സംഘം അഖിലേന്ത്യാ വൈസ് പ്രസിഡന്‍റ് ഡി. വിജയകുമാര്‍. ശബരിമലയില്‍ സര്‍ക്കാര്‍ എടുക്കുന്ന തീരുമാനങ്ങള്‍ വിശ്വാസികള്‍ക്ക് വേദനയുണ്ടാക്കുന്നതാണ്. ശബരിമല സ്വര്‍ണപ്പാളി മോഷണ വിവാദത്തില്‍ കോണ്‍ഗ്രസ് മൂവാറ്റുപുഴ, മഞ്ഞള്ളൂര്‍ ബ്ലോക്ക് കമ്മിറ്റികള്‍ സംഘടിപ്പിച്ച അയ്യന്‍ സാക്ഷി നൈറ്റ് മാര്‍ച്ച് ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. സ്ത്രീകളെ ശബരിമലയില്‍ പ്രവേശിപ്പിക്കാന്‍ നടത്തിയ ശ്രമങ്ങള്‍ മുതല്‍ എല്‍ഡിഎഫ് സര്‍ക്കാര്‍ വിശ്വാസികളെ ദ്രോഹിക്കുകയാണ്. യുഡിഎഫ് സര്‍ക്കാരിന്‍റെ കാലത്താണ് ശബരിമലയില്‍ വികസന പ്രവര്‍ത്തനങ്ങള്‍ നടന്നത്. യുഡിഎഫ് ശബരിമലയെ പുണ്യഭൂമിയായി കാണുന്നത് കൊണ്ടാണെന്ന് ഇതെന്നും വിജയകുമാര്‍ പറഞ്ഞു. മൂവാറ്റുപുഴ കെഎസ്ആര്‍ടിസി ജംഗ്ഷനില്‍നിന്നും ആരംഭിച്ച മാര്‍ച്ച് കെപിസിസി രാഷ്ട്രീയ കാര്യ സമിതി അംഗം ജോസഫ് വാഴക്കന്‍, മാത്യു കുഴല്‍നാടന്‍ എംഎല്‍എക്ക് പതാക കൈമാറി ഉദ്ഘാടനം ചെയ്തു. ബ്ലോക്ക് പ്രസിഡന്‍റ് സാബു ജോണ്‍ അധ്യക്ഷത വഹിച്ചു. വെള്ളൂര്‍ക്കുന്നം വരെയാണ് നൈറ്റ് മാര്‍ച്ച് സംഘടിപ്പിച്ചത്. തുടർന്ന് ടൗണ്‍ ഹാളില്‍ നടന്ന പരിപാടിയിൽ സാബു ജോണ്‍ അധ്യക്ഷത വഹിച്ചു. സുഭാഷ് കടയ്‌ക്കോട്, കെ.എം. സലിം, പി.പി. എല്‍ദോസ്, കെ.എം. പരീത് തുടങ്ങിയവരും പങ്കെടുത്തു.

എംബിറ്റ്സ് എൻജിനീയറിംഗ് കോളജിന് പുരസ്കാരം

കോതമംഗലം: മോർഫൈൻ മോട്ടോർ സ്പോർട്സ് സീരീസ് 2025-ലെ ബെസ്റ്റ് എമർജിംഗ് ടീം അവാർഡ് നെല്ലിമറ്റം എംബിറ്റ്സ് എൻജിനീയറിംഗ് കോളജ് മെക്കാനിക്കൽ വിദ്യാർഥികൾ നേടി. ദേശീയതലത്തിൽ നടന്ന ഇന്‍റർ കോളജ് ഗോ-കാർട്ട് ഡിസൈനിംഗ്, നിർമാണ, റേസിംഗ് മത്സരങ്ങൾ പൂനെയിലെ റാഫ്റ്റർ ഗോ-കാർട്ടിംഗ് ട്രാക്കിൽ ആണ് നടന്നത്. മികച്ച പ്രകടനം, സാങ്കേതിക മികവ്, ടീമിന്‍റെ കൂട്ടായ പരിശ്രമം എന്നിവയെ അടിസ്ഥാനമാക്കിയാണ് എംബിറ്റ്സിലെ അഞ്ചാം സെമസ്റ്റർ മെക്കാനിക്കൽ എൻജിനീയറിംഗ് വിദ്യാർഥികളുടെ ടീമിന് ബഹുമതി ലഭിച്ചത്. രാജ്യത്തെ വിവിധ സംസ്ഥാനങ്ങളിൽ നിന്നുമായി 25 ടീമുകളാണ് മത്സരത്തിൽ പങ്കെടുത്തത്. കേരളത്തിൽനിന്നും പങ്കെടുത്ത ഏക ടീമും എംബിറ്റ്സ് കോളജ് ആണ്. പോയിന്‍റ് പട്ടികയിൽ 10-ാം സ്ഥാനവും എംബിറ്റ്സ് കോളജിന് ലഭിച്ചു. ആദി സന്തോഷ്, ആനന്ദ് സുകുമാരൻ, അർജുൻ അശോകൻ, അതുൽ പ്രസാദ്, ബേസിൽ ഏലിയാസ്, ബേസിൽ സി. ഏലിയാസ്, ബേസിൽ എൽദോസ്, എം.എസ്. ധ്രുവൻ , ജോയൽ വർഗീസ്, കെവിൻ എസ്. ദേവ്, മാർട്ടിൻ ആന്‍റണി, നവീൻ ടോണി, വർഗീസ് ബിജു, ആൻഡ്രൂ സ്കറിയ, മിഥുൻ എം. നായർ, എം. വരുൺ, ജ്യോതിഷ് എന്നീ വിദ്യാർഥികൾ അധ്യാപകരായ കെ.വി. അഭിലാഷ്, ബിനീഷ് ജോയ് എന്നിവരുടെ നേതൃത്വത്തിൽ രണ്ട് മാസം കൊണ്ട് ഒന്നര ലക്ഷം രൂപ ചിലവിലാണ് ഗോ കാർട്ട് തയാറാക്കിയത്.

കെഎസ്എസ്പിഎ മണ്ഡലം വാർഷികം

കോതമംഗലം: കെഎസ്എസ്പിഎ പിണ്ടിമന മണ്ഡലം വാർഷികം മുത്തംകുഴി കുമാരനാശാൻ മെമ്മോറിയൽ നാഷണൽ ലൈബ്രറിയിൽ നടത്തി. പഞ്ചായത്ത് പ്രസിഡന്‍റ് ജെസി സാജു ഉദ്ഘാടനം ചെയ്തു. മണ്ഡലം പ്രസിഡന്‍റ് ബേബി പോൾ അധ്യക്ഷത വഹിച്ചു. സെക്രട്ടറി എം.ടി. സ്‌കറിയ, ട്രഷറർ ടി.എസ്. ജോളി, കോൺഗ്രസ്‌ മണ്ഡലം പ്രസിഡന്‍റ് മത്തായി കോട്ടക്കുന്നേൽ, ജില്ലാ സെക്രട്ടറി സി.എ. അലിക്കുഞ്ഞ്, നിയോജക മണ്ഡലം പ്രസിഡന്‍റ് സിബി ജെ. അടപ്പൂർ, സെക്രട്ടറി പി.വി. പൗലോസ്, രക്ഷാധികാരി കെ.എ. ജോസഫ്, എം. മുത്തുകുഞ്ഞ്, പി. ബാലൻ എന്നിവർ പ്രസംഗിച്ചു. പുതിയ ഭാരവാഹികളെ തെരഞ്ഞെടുത്തു.

ഒലിയപ്പുറത്തെ വൈദ്യുതി ലൈൻ മാറ്റും

തിരുമാറാടി: ഒലിയപ്പുറത്ത് സ്വകാര്യ വ്യക്തികളുടെ പറമ്പിലൂടെ കടന്നുപോകുന്ന വൈദ്യുതി ലൈൻ മാറ്റി സ്ഥാപിക്കുന്നതിന് പദ്ധതി പൂർത്തിയായി. ഒലിയപ്പുറം നിരപ്പത്താഴം കട്ടേമല താന്നിച്ചുവട്ടിൽ പ്രദേശത്തെ പുരയിടങ്ങളിലൂടെ കടന്നുപോകുന്ന വൈദ്യുതി ലൈനുകൾ മാറ്റി സ്ഥാപിക്കാൻ പദ്ധതി പൂർത്തിയായതായി പഞ്ചായത്ത് അംഗം നെവിൻ ജോർജ് അറിയിച്ചു. മരങ്ങൾക്കിടയിലൂടെയും പുരയിടത്തിലൂടെയും ഇലക്ട്രിക് ലൈനുകൾ കടന്നു പോകുന്ന നിരപ്പത്താഴം കട്ടമല, ഒലിയപുറം ഇല്ലംപടി, താന്നിച്ചുവട്ടിൽ താഴം പ്രദേശത്ത് നിരന്തരമായി വൈദ്യുതി മുടക്കം ഉണ്ടാകുന്നതിന് പരിഹാരം കാണണമെന്ന പ്രദേശവാസികളുടെ ആവശ്യത്തെ തുടർന്ന് വാർഡ് മെമ്പർ കെഎസ്ഇബി അധികൃതർക്ക് പരാതി നൽകിയിരുന്നു. ഇതേ തുടർന്ന് കെഎസ്ഇബി ഉദ്യോഗസ്ഥർ പ്രദേശത്ത് എത്തി പരിശോധനകൾ നടത്തി എസ്റ്റിമേറ്റ് തയാറാക്കി എക്സിക്യൂട്ടീവ് എൻജിനീയർക്ക് നൽകുകയും ചെയ്തിരുന്നു. ഈ പ്രദേശത്തെ റോഡുകൾ ഉണ്ടാകുന്നതിനു മുന്പേ പുരയിടങ്ങളിലൂടെ സ്ഥാപിച്ചിരുന്ന ഇലക്ട്രിക് പോസ്റ്റുകളും ഇലക്ട്രിക് ലൈനുകളും പുരയിടങ്ങളിൽനിന്ന് മാറ്റി സ്ഥാപിക്കുന്നതിനായുള്ള ജനറൽ വർക്ക് ലിസ്റ്റിൽ ഉൾപ്പെടുത്തിയതായി കൂത്താട്ടുകുളം കെഎസ്ഇബി അധികൃതർ അറിയിച്ചു.

കാടുകയറി മൂവാറ്റുപുഴ ഡ്രീം ലാൻഡ് പാർക്ക്

മൂവാറ്റുപുഴ: അതിമനോഹരമായ മൂവാറ്റുപുഴ ഡ്രീം ലാൻഡ് പാർക്ക് കാടുകയറിയും കളി ഉപകരണങ്ങൾ തുരുമ്പെടുത്തും നശിക്കുന്നു. ദിവസേന കുട്ടികൾ അടക്കമുള്ള ധാരാളം ആളുകളാണ് പാർക്കിൽ എത്തിയിരുന്നത്. എന്നാൽ ഇപ്പോൾ കാടുകയറിയത്തോടെ ഇഴജന്തുക്കളെ ഭയന്ന് ആളുകൾക്ക് കുട്ടികളുമൊത്ത് പാർക്കിൽ വരാൻ ഭയക്കുകയാണ്. പാർക്കിലെ കളി ഉപകരണങ്ങൾക്ക് ആവശ്യമായ അറ്റകുറ്റ പണികൾ നടത്താതെ വന്നതോടെ തുരുമ്പെടുത്തു. ഉപകരണങ്ങളിൽ ചിലത് ഉപയോഗ്യതശൂന്യമായിട്ടുണ്ട്. മുവാറ്റുപുഴ നഗരസഭയുടെ കീഴിലുള്ള രണ്ട് പാർക്കുകളിൽ ഒന്നാണ് ഇത്തരത്തിൽ നശിക്കുന്നത്. തിരക്കേറിയ നഗരത്തിൽ വിശ്രമത്തിനും വിനോദത്തിനുമായി നിരവധി ആളുകളാണ് ഈ പാർക്കിനെ ആശ്രയിച്ചിരുന്നത്. നഗരസഭയ്ക്ക് തനത് വരുമാനം ലഭിച്ചിരുന്ന ഈ പാർക്ക് നശിച്ചത് യുഡിഎഫ് ഭരണ സമിതിയുടെ കെടുകാര്യസ്ഥത മൂലമാണെന്ന് സിപിഎം മുവാറ്റുപുഴ ഏരിയ കമ്മിറ്റി അംഗം സജി ജോർജ് കുറ്റപ്പെടുത്തി.

കട്ടേപ്പാടത്ത് തുടർച്ചയായ അഞ്ചാം വർഷവും നെല്ലുവിളയും

ആലുവ : ചൂർണിക്കര ഗ്രാമപഞ്ചായത്ത് കൃഷിഭവനും പാടശേഖര സമിതിയും ചേർന്ന് കട്ടേപ്പാടം പാടശേഖരത്തിൽ അഞ്ചാം വർഷവും നെൽക്കൃഷി ആരംഭിച്ചു. ചൂർണിക്കര ഗ്രാമപഞ്ചായത്ത് വൈസ് പ്രസിഡന്‍റ് ബാബു പുത്തനങ്ങാടി വിത്ത് വിതയ്ക്കൽ ഉദ്ഘാടനം ചെയ്തു. സ്റ്റാൻഡിംഗ് കമ്മിറ്റി ചെയർമാൻ മുഹമ്മദ് ഷെഫീക്ക് അധ്യക്ഷത വഹിച്ചു. കൃഷി ഓഫീസർ അമൃത ലക്ഷ്മി, പാടശേഖര സമിതി ഭാരവാഹികൾ തുടങ്ങിയവർ പ്രസംഗിച്ചു. ഉമ നെൽവിത്താണ് വിതക്കുന്ന പാടത്ത് കുട്ടനാടൻ കർഷകരാണ് കൃഷി ചെയ്യുന്നത്.

ഗ്രാമീണ പഠനക്യാമ്പ് സംഘടിപ്പിച്ചു

അങ്കമാലി : ഡീ പോൾ ഇൻസ്റ്റിറ്റ്യൂട്ട് ഓഫ് സയൻസ് ആൻഡ് ടെക്നോളജിയിലെ ഒന്നാം വർഷ എം എസ്‌ഡബ്ല്യു വിദ്യാർഥികൾ തൊണ്ടർനാട് ഗ്രാമ പഞ്ചായത്തുമായി സഹകരിച്ച് മക്കിയാട് ഗ്രാമത്തിൽ "ഇരുൾ മൂടിയ ഭൂമിക്ക് തളിരു ചാർത്താൻ ഇതൾ'എന്ന പ്രമേയ വാക്യവുമായി ഒരാഴ്ച നീണ്ടുനിന്ന ഗ്രാമീണ പഠനക്യാമ്പ് “ഇതൾ ” സംഘടിപ്പിച്ചു. മക്കിയാട് സെന്‍റ് ജൂഡ് ഇടവക വികാരി ഫാ. സന്തോഷ്‌ കാവുങ്കൽ ഉദ്ഘാടനം നിർവഹിച്ചു. സോഷ്യൽ വർക്ക്‌ വിഭാഗം എച്ച്ഒഡി ഡോ. എം. എസ്. അനീഷ് അധ്യക്ഷത വഹിച്ചു, വാർഡ് മെമ്പർ പി. എ ബാബു ആശംസയർപ്പിച്ചു. സോഷ്യൽ വർക്ക്‌ വിഭാഗം അധ്യാപകൻ ഫാ. ജോൺ കൊല്ലക്കോട്ടിൽ ക്യാമ്പിന് നേതൃത്വം നൽകി.

വിശ്വാസ സംരക്ഷണ യാത്രയ്ക്ക് 16ന് സ്വീകരണം

ആലുവ: ശബരിമലയിലെ സ്വർണക്കൊള്ളയ്ക്കും വിശ്വാസ വഞ്ചനയ്ക്കുമെതിരെ കെപിസിസിയുടെ നേതൃത്വത്തിൽ കോൺഗ്രസ് വർക്കിംഗ് കമ്മിറ്റിയംഗം കൊടിക്കുന്നിൽ സുരേഷ് എംപി നയിക്കുന്ന വിശ്വാസ സംരക്ഷണ യാത്ര 16ന് ആലുവയിൽ എത്തും. രാവിലെ 10.30 ന് ഉമ്മൻചാണ്ടി സ്‌ക്വയറിൽ സ്വീകരണം നൽകുമെന്ന് ഭാരവാഹികൾ അറിയിച്ചു. ആലുവ, അങ്കമാലി, കളമശേരി, വൈപ്പിൻ, പറവൂർ എന്നീ നിയോജക മണ്ഡലത്തിൽ നിന്നുള്ള പ്രവർത്തകർ പങ്കെടുക്കും.

മയക്കുമരുന്നിനെതിരെ ഗാനമേളയുമായി റൂറൽ ജില്ലാ പോലീസ്

നെടുമ്പാശേരി: മയക്കുമരുന്നിനെതിരെ ജനമനസിനെ പാടിയുണർത്താൻ റൂറൽ ജില്ലാ പോലീസിന്‍റെ ഒരാഴ്ച നീണ്ടുനിൽക്കുന്ന "പാടാം ഒരു ഗാനം" എന്ന സംഗീത പരിപാടിക്ക് ഇന്ന് അത്താണി സിഗ്നൽ ജംഗ്ഷനിൽ ആരംഭിക്കും. ആലുവ സബ്ഡിവിഷന്‍റെ നേതൃത്വത്തിലാണ് പരിപാടി സംഘടിപ്പിക്കുന്നത്. സ്റ്റേജിൽ ആർക്കുവെണമെങ്കിലും പാടാം. ട്രാക്ക് ഗാനമേളയാണ് നടക്കുന്നത്. പ്രത്യേക സൗണ്ട് സിസ്റ്റം ഇതിനായി ഒരുക്കിയിട്ടുണ്ട്. ആലുവ സബ്ഡിവിഷനിലെ മുതിർന്ന പോലീസുദ്യോഗസ്ഥരും, റൂറൽ ജില്ലയിലെ പോലീസുകാരിലെ പാട്ടുകാരും, പാടാൻ താത്പര്യമുള്ള പൊതുജനങ്ങളും ഈ പരിപാടിയിൽ പങ്കാളിയാകും. ആദ്യ ദിവസം സ്റ്റാർ സിംഗർ ഗായകൻ ജോബി ജോൺ മുഖ്യതിഥിയാകും. വൈകുന്നേരം അഞ്ച് മുതൽ രാത്രി 9:30 വരെയാണ് ഗാനമേള. 18ന് സമാപിക്കും. ജില്ലാ പോലീസ് മേധാവി എം. ഹേമലതയുടെ നേതൃത്വത്തിൽ റൂറൽ ജില്ലയിൽ നടക്കുന്ന ലഹരി വിരുദ്ധ പരിപാടികളുടെ ഭാഗമായാണ് പാടാം ഒരു ഗാനം സംഘടിപ്പിച്ചിട്ടുള്ളതെന്ന് ആലുവ ഡിവൈഎസ്പി ടി.ആർ. രാജേഷ് പറഞ്ഞു.

നെല്‍ കെജി കേരളത്തിനാകെ മാതൃക: മന്ത്രി പി. പ്രസാദ്

പെരുമ്പാവൂര്‍: പെരുമ്പാവൂര്‍ മണ്ഡലത്തിലെ സ്‌കൂളുകളില്‍ നടക്കുന്ന നെല്‍ കെജി കൃഷി കേരളത്തിന് ആകെ മാതൃകയാണെന്നും പാഠപുസ്തകത്തിന് പുറത്തെ കൃഷി പാഠമാണ് നെല്‍ കെജിയെന്നും മന്ത്രി പി. പ്രസാദ്. എംഎല്‍എ ഇന്‍സ്‌പെയര്‍ വിദ്യാഭ്യാസ പദ്ധതിയുടെ ഭാഗമായി നടപ്പിലാക്കിയ നെല്‍ കെജി നെല്‍ക്കതിര്‍ പദ്ധതിയിലെ കുട്ടി കര്‍ഷക സംഗമവും വിളവെടുപ്പ് മഹോത്സവവും വേങ്ങൂര്‍ മാര്‍ കൗമ ഹയര്‍ സെക്കന്‍ഡറി സ്‌കൂളില്‍ ഉദ്ഘാടനം ചെയ്ത് സംസാരിക്കുകയായിരുന്നു മന്ത്രി. എല്‍ദോസ് കുന്നപ്പിള്ളി എംഎല്‍എ അധ്യക്ഷത വഹിച്ച ചടങ്ങില്‍ മാത്യൂസ് മാര്‍ അഫ്രേം മെത്രാപ്പോലീത്ത പ്രഭാഷണം നടത്തി. ത്രിതല പഞ്ചായത്ത് പ്രസിഡന്‍റുമാര്‍ അംഗങ്ങള്‍ എന്നിവര്‍ക്ക് പുറമേ എന്‍.പി. ആന്‍റണി പവിഴം, ജില്ലാ കൃഷി ഓഫീസര്‍ ഇന്ദു പി. നായര്‍, കൃഷി അസിസ്റ്റന്‍റ് ഡയറക്ടര്‍ വി.ജി. സിബി, കൃഷി ഓഫീസര്‍മാര്‍ തുടങ്ങിയവരും സംസാരിച്ചു.

കുറുപ്പംപടി ഫൊറോന കൺവൻഷൻ

കോതമംഗലം: ഫാമിലി അപ്പോസ്തലേറ്റിന്‍റെയും ദീപിക ഫ്രണ്ട്സ് ക്ലബ്ബിന്‍റെയും കുറുപ്പംപടി ഫൊറോന കൺവൻഷൻ സെന്‍റ് പീറ്റർ ആൻഡ് പോൾസ് ഫൊറോന പള്ളിയിൽ നടന്നു. പാരിഷ് ഹാളിൽ നടത്തിയ കൺവൻഷൻ ഫാമിലി അപ്പോസ്തലേറ്റ്, ഡിഎഫ്സി രൂപത ഡയറക്ടർ റവ. ഡോ. ആന്‍റണി പുത്തൻകുളം ഉദ്ഘാടനം ചെയ്തു. ഫൊറോന വികാരി ഫാ. ജെയിംസ് കക്കുഴിയിൽ അധ്യക്ഷത വഹിച്ചു. ദീപിക സർക്കുലേഷൻ ജനറൽ മാനേജർ ഫാ. ജിനോ പുന്നമറ്റത്തിൽ, ഡിഎഫ്സി രൂപത പ്രസിഡന്‍റ് ഡിഗോൾ ജോർജ്, ഫാമിലി അപ്പോസ്തലേറ്റ് ഫൊറോന പ്രസിഡന്‍റ് കെ.കെ. ജോൺ, ഡിഎഫ്സി വനിതാ ഫോറം രൂപത വൈസ് പ്രസിഡന്‍റ് എൽസി പത്രോസ് കാളാംപറമ്പിൽ, ഫൊറോന സെക്രട്ടറി രാജു മാങ്കുഴ, ഷൈജു ഇഞ്ചയ്ക്കൽ എന്നിവർ പ്രസംഗിച്ചു. കുടുംബ കൂട്ടായ്മകളുടെ ആവശ്യകതയെക്കുറിച്ചും സമുദായ ശാക്തീകരണം ദീപികയിലൂടെ എന്ന വിഷയവും കൺവൻഷൻ ചർച്ച ചെയ്തു. കുറുപ്പംപടി ഫൊറോനയിലെ വിവിധ ഇടവകകളിൽ നിന്നുള്ള ഫാമിലി അപ്പോസ്തലേറ്റ്, ഡിഎഫ്സി എന്നിവയുടെ ഭാരവാഹികളും കുടുംബ കൂട്ടായ്മ ഭാരവാഹികളും കൺവൻഷനിൽ പങ്കെടുത്തു.

ഇന്ത്യന്‍ സാമ്പത്തിക രംഗം വളരുന്നത് അതിവേഗം: ശ്യാം ജഗന്നാഥ്

കൊച്ചി: 2027 ആകുമ്പോഴേക്കും ലോകത്തിലെ മൂന്നാമത്തെ സാമ്പത്തിക ശക്തിയായി ഇന്ത്യ മാറുന്നതിനോടൊപ്പം യുവജനസംഖ്യയുള്ള ജനാധിപത്യ രാജ്യം കൂടിയാകുമെന്ന് ഷിപ്പിംഗ് ഡയറക്ടര്‍ ഓഫ് ജനറല്‍ ശ്യാം ജഗന്നാഥ് പറഞ്ഞു. നെട്ടൂരില്‍ ആരംഭിച്ച എസ് എച്ച് എം അക്കാദമി മാരിടൈം സേഫ്റ്റി ഉദ്ഘാടനം ചെയ്യുകയായിരുന്നു അദ്ദേഹം. ഇന്ത്യന്‍ സാമ്പത്തിക രംഗം വളരെ വേഗത്തിലാണ് വളരുന്നത്. അതിൽ മാരിടൈം ചെലുത്തുന്ന സ്വാധീനം ചെറുതല്ലെന്നും അദ്ദേഹം പറഞ്ഞു. ഡി.ജെ. സെന്തിൽ കുമാർ, കൃഷ്ണ വൈകുണ്ഠം, സൈഫുദ്ദീന്‍ ഹാജി, പി. പ്രസാദ് , എ.ശിവകുമാര്‍ എന്നിവര്‍ പ്രസംഗിച്ചു.

ഗ്ലോ കൊച്ചി ബ്രോഷർ പ്രകാശനം ചെയ്തു

കൊച്ചി: വെളിച്ചവും സംസ്‌കാരവും സാമൂഹിക കൂട്ടായ്മയും ഒത്തുചേരുന്ന ഗ്ലോ കൊച്ചി ആഘോഷം 18, 19 തിയതികളില്‍ എറണാകുളം രാജേന്ദ്ര മൈതാനിയില്‍ നടക്കുമെന്ന് സംഘാടകര്‍ വാര്‍ത്താ സമ്മേളനത്തില്‍ അറിയിച്ചു. വൈകുന്നേരം മൂന്നു മുതല്‍ അര്‍ധരാത്രി വരെയാണ് പരിപാടി. ഹൈബി ഈഡൻ എം പി ഉദ്ഘാടനം ചെയ്യും. ചലച്ചിത്ര താരം അർജുൻ രാധാകൃഷ്ണൻ പങ്കെടുക്കും. വാര്‍ത്താ സമ്മേളനത്തില്‍ ഷർമിള, രാഖി ജയശങ്കർ, നമിൻ ഹിലാൽ, ലിൻഡ രാകേഷ്, ഫാഷൻ ഡിസൈനർ മെൽവിൻ എന്നിവർ പങ്കെടുത്തു. ഗ്ലോ കൊച്ചി ബ്രോഷർ പ്രകാശനം ചെയ്തു.

ഓങ്കോപാത്ത് 3.0 ദേശീയ സമ്മേളനം

കൊച്ചി: ആലുവ രാജഗിരി ആശുപത്രിയില്‍ ഓങ്കോപാത്ത് 3.0 ദേശീയ സമ്മേളനം സംഘടിപ്പിച്ചു. രാജഗിരി കാന്‍സര്‍ സെന്‍ററും രാജഗിരി പത്തോളജി വിഭാഗവും സംയുക്തമായി സംഘടിപ്പിച്ച സമ്മേളനം രാജഗിരി എക്‌സിക്യൂട്ടീവ് ഡയറക്ടറും സിഇഒയുമായ ഫാ. ജോണ്‍സണ്‍ വാഴപ്പിള്ളി ഉദ്ഘാടനം ചെയ്തു. കാന്‍സര്‍ രോഗ നിര്‍ണയത്തിലെ പുതിയ സാങ്കേതിക വിദ്യകളും, വെല്ലുവിളികളും സമ്മേളനത്തില്‍ ചര്‍ച്ച ചെയ്തു. ഇന്ത്യയിലെ പ്രശസ്തരായ കാന്‍സര്‍ രോഗ വിദഗ്ധരും പത്തോളജിസ്റ്റുകളും ക്ലാസുകള്‍ നയിച്ചു. മെഡിക്കല്‍ പിജി വിദ്യാര്‍ഥികളടക്കം ഇരുന്നൂറോളം പേര്‍ സമ്മേളനത്തിന്‍റെ ഭാഗമായി. രാജഗിരി മെഡിക്കല്‍ ഓങ്കോളജി വിഭാഗം മേധാവി ഡോ. സഞ്ജു സിറിയക്, പത്തോളജി വിഭാഗം മേധാവി ഡോ. ലത കെ. അബ്രഹാം, റേഡിയോളജി വിഭാഗം മേധാവി അജിത് ടോംസ്, ഐഎപിഎം കേരള ചാപ്റ്റര്‍ പ്രസിഡന്‍റ് ഡോ. കവിത രവി എന്നിവര്‍ പ്രസംഗിച്ചു.

സ്തനാര്‍ബുദ ബോധവല്‍ക്കരണം നടത്തി

കൊച്ചി: കേരള ഫെഡറേഷന്‍ ഓഫ് ഒബ്സ്റ്റട്രിക് ആന്‍ഡ് ഗൈനക്കോളജി (കെഎഫ്ഒജി), അസോസിയേഷന്‍ ഓഫ് ഗൈനക്കോളജിക്കല്‍ ഓങ്കോളജിസ്റ്റ് ഓഫ് ഇന്ത്യ കേരള ചാപ്റ്റര്‍ എന്നിവയുടെ സഹകരണത്തോടെ കൊച്ചി ഒബ്സ്റ്റട്രിക്‌സ് ആന്‍ഡ് ഗൈനക്കോളജിക്കല്‍ സൊസൈറ്റിയും ലേക്ക്‌ഷോര്‍ ആശുപത്രിയും സംയുക്തമായി എറണാകുളം മറൈൻ ഡ്രൈവില്‍ സംഘടിപ്പിച്ച ബോധവല്‍ക്കരണ പരിപാടി ടി.ജെ. വിനോദ് എംഎല്‍എ ഉദ്ഘാടനം ചെയ്തു. സ്തനാര്‍ബുദം പ്രതിരോധവുമായി ബന്ധപ്പെട്ട ലഘുലേഖയുടെ പ്രകാശനവും അദ്ദേഹം നിര്‍വഹിച്ചു. ബോധവല്‍ക്കരണ പരിപാടിയുടെ ഭാഗമായി കൊച്ചിക്കായലില്‍ സംഘടിപ്പിച്ച കയാക്കിംഗും ദീപ ശിഖ കൈമാറലും എറണാകുളം അസിസ്റ്റന്‍റ് കളക്ടര്‍ പാര്‍വതി ഗോപകുമാര്‍ ഉദ്ഘാടനം ചെയ്തു. സ്തനാര്‍ബുദത്തെ അതിജീവിച്ച 25 പേരെ ചടങ്ങില്‍ ആദരിച്ചു. കെഎഫ്ഒജി പ്രസിഡന്‍റ് ഡോ. സുചിത്ര സുധീര്‍ അധ്യക്ഷത വഹിച്ചു. നിഷാ ജോസ് കെ. മാണി, ഡോ. കെ. ചിത്രതാര, ഡോ. ഉഷാ മേനോന്‍, ഡോ. ഗേസ്രി തോമസ്, ഡോ. മിനി ബാലകൃഷ്ണന്‍ തുടങ്ങിയവര്‍ സംസാരിച്ചു.

പാദരക്ഷാ വിലവ്യത്യാസം: സർക്കാർ ഇടപെടണമെന്ന് വ്യാപാരികൾ

ആലുവ: കേന്ദ്ര സർക്കാർ ജിഎസ് ടിയിൽ വരുത്തിയ കുറവ് നല്കുന്നില്ലെന്ന പേരിൽ പാദരക്ഷാ വ്യാപാര സ്ഥാപനങ്ങളിൽ ഉപഭോക്താക്കളുമായി തർക്കം ഉണ്ടാകുന്നതായി വ്യാപാരികൾ. ജിഎസ്ടി 12 ശതമാനത്തിൽ നിന്നും അഞ്ചു ശതമാനത്തിലേക്ക് മാറിയതിലുള്ള ആശയക്കുഴപ്പം മാറ്റാൻ സർക്കാർ അടിയന്തിരമായി ഇടപെടണമെന്ന് കേരള റീട്ടെയിൽ ഫുട്‌വെയേഴ്സ് അസോസിയേഷൻ ആവശ്യപ്പെട്ടു. പന്ത്രണ്ട് ശതമാനം ജിഎസ് ടിയിൽ സ്റ്റോക്കുള്ള ഉൽപന്നങ്ങൾ 2026 മാർച്ച് 31 വരെ വിറ്റഴിക്കാൻ സർക്കാർ അനുമതിയുള്ളപ്പോഴാണ് ഈ രീതിയിലുള്ള പ്രശ്നങ്ങൾ ഉണ്ടാകുന്നതെന്ന് വ്യാപാരികൾ പറയുന്നു. ഇത് സമ്മർദത്തിലാക്കുന്നതായാണ് വ്യാപാരികളുടെ വിശദീകരണം. ഈ വിഷയത്തിൽ ഉപഭോക്താക്കളെ വ്യക്തമായി ബോധ്യപ്പെടുത്തുന്ന രീതിയിൽ അറിയിപ്പുകളോ സർക്കുലറുകളോ പുറപ്പെടുവിച്ച് സംഘർഷാവസ്ഥ ഒഴിവാക്കി തരണമെന്ന് ആലുവയിൽ ചേർന്ന എറണാകുളം ജില്ലാ കെആർഎഫ് എ. പ്രതിനിധി സമ്മേളനം കേന്ദ്ര, സംസ്ഥാന സർക്കാരുകളോട് ആവശ്യപ്പെട്ടു. ഹുസൈൻ കുന്നുകര അധ്യക്ഷത വഹിച്ചു. എറണാകുളം ജില്ലാ ഭാരവാഹികളായി ഹുസൈൻ കുന്നുകര -പ്രസിഡന്‍റ്, ജൈജു വർഗീസ് -ജനറൽ സെക്രട്ടറി, മുഹമ്മദ് കാസിം -ട്രഷറർഎന്നിവരെ തെരഞ്ഞെടുത്തു.

ജോസ് മാവേലിക്ക് ആദരം

ആലുവ: ചേരികളിലും തെരുവോരങ്ങളിലും കഴിയുന്ന കുട്ടികളുടെ വിദ്യാഭ്യാസത്തിനായി ജനസേവ ശിശുഭവൻ ദേശീയതലത്തിൽ നടത്തുന്ന പ്രവർത്തനങ്ങളുടെ അടിസ്ഥാനത്തിൽ ചെയർമാൻ ജോസ് മാവേലിക്ക് സെന്‍റ് സേവ്യേഴ്സ് കോളജിന്‍റെ ആദരം. കോളജിൽ നടന്ന ചടങ്ങിൽ ജസ്റ്റീസ് സി.കെ. അബ്ദുൾ റഹീം മെമന്‍റോ നൽകി ആദരിച്ചു. സെന്‍റ് സേവ്യേഴ്സ് കോളജ് മാനേജർ സിസ്റ്റർ എം. ചാൾസ് അധ്യക്ഷത വഹിച്ചു. പ്രിൻസിപ്പൽ ഡോ. മിലൻ ഫ്രാൻസ്, എൻഎസ്എസ് പ്രോഗ്രാം ഓഫീസർമാർ തുടങ്ങിയവർ സംസാരിച്ചു.

ആലുവ പാർക്ക് റോഡിലെ അനധികൃത പിരിവ് നിർത്തിച്ചു

ആലുവ: ആലുവ മുനിസിപ്പൽ പാർക്കിനു മുന്നിൽ കരാറുകാരൻ നടത്തിവന്നിരുന്ന അനധികൃത പിരിവ് പ്രതിഷേധത്തെ തുടർന്ന് നിർത്തി. നഗരസഭാ പാർക്കിൽ കരാറെടുത്തിരുന്നയാൾ പാർക്കിനു മുന്നിലെ പൊതുവഴി കൈയേറി പേ ആൻഡ് പാർക്ക് ബോർഡുകൾ സ്ഥാപിക്കുകയും ഇവിടെ എത്തുന്ന വാഹനങ്ങളിൽനിന്ന് അനധികൃതമായി പാർക്കിംഗ് ഫീസ് വാങ്ങുകയും ചെയ്തിരുന്നതായാണ് പരാതി. ഇതിനെതിരെ ബിജെപി മുനിസിപ്പൽ പ്രസിഡന്‍റ് ആർ. പത്മകുമാറിന്‍റെ നേതൃത്വത്തിലാണ് ഇന്നലെ പ്രതിഷേധം നടന്നത്. മുനിസിപ്പൽ പാർക്കിന് സമീപത്തെ വീടുകളിലേക്ക് പോകുന്നവരെ തടഞ്ഞ് ഭീഷണിപ്പെടുത്തുന്നതും പണം ആവശ്യപ്പെടുന്നതും പതിവായിരുന്നെന്ന് നാട്ടുകാർ ആരോപിച്ചു. പൊതുവഴിയിൽ പേ ആൻഡ് പാർക്ക് ബോർഡുകളും പണപ്പിരിവും അനുവദിക്കില്ലെന്നും അനുവദിച്ച സ്ഥലത്ത് മാത്രമേ പണപ്പിരിവ് നടത്താൻ അനുവദിക്കുകയുള്ളു എന്നും കൗൺസിലർമാരായ എൻ. ശ്രീകാന്ത്, ശ്രീലത രാധാകൃഷ്ണൻ അറിയിച്ചു.

പീച്ചാനിക്കാട് സെന്‍റ് മേരീസ് പള്ളി പുനർനിർമാണം; ശിലാസ്ഥാപനം നടത്തി

അങ്കമാലി: പീച്ചാനിക്കാട് സെന്‍റ് മേരീസ് പള്ളി പുനർനിർമാണം ആരംഭിച്ചു. ആർച്ചു ബിഷപ് മാർ ആന്‍റണി കരിയിൽ ശിലാസ്ഥാപന കർമം നിർവഹിച്ചു. വികാരി ഫാ. ജോസ് മാടൻ, ഫാ. ജോസഫ് പാറേക്കാട്ടിൽ എന്നിവർ അനുബന്ധ കർമ്മങ്ങൾക്ക് നേതൃത്വം വഹിച്ചു. ഇന്നലെ രാവിലെ ദിവ്യബലിയെ തുടർന്നാണ് ശിലാസ്ഥാപന ചടങ്ങ് നടത്തിയത്.

സമ്പൂർണ ബൈബിൾ പകർത്തിയെഴുതി മൂത്തേടം ഇടവക

മരട്: സമ്പൂർണ ബൈബിൾ പകർത്തിയെഴുതി മൂത്തേടം ഇടവക. ദൈവദാസൻ ജോർജ് വാകയിലച്ചന്‍റെ 94-ാം അനുസ്മരണത്തോടനുബന്ധിച്ചാണ് ഇടവകയിലെ 1243 കുടുംബങ്ങളിൽ നിന്നും ഓരോരുത്തർ വീതം ബൈബിൾ ഭാഗങ്ങൾ പകർത്തിയത്. ബൈബിൾ പ്രതിഷ്ഠയോടെയാണ് ഇന്നലെ രാവിലെ 10.30 ന് പകർത്തിയെഴുത്ത് ആരംഭിച്ചത്. ഒരു മണിക്കൂർ കൊണ്ട് ബൈബിൾ പൂർണമായും പകർത്തിയെഴുതിക്കഴിഞ്ഞു. ഫാ. ഷൈജു തോപ്പിൽ, ഫാ. മിറാഷ് പുത്തൻപുരക്കൽ, ഫാ. സുജിത്ത് സ്റ്റാൻലി നടുവിലവീട്ടിൽ, ജനറൽ കൺവീനർ സാംസൺ കളത്തിപ്പറമ്പിൽ തുടങ്ങിയവർ നേതൃത്വം നൽകി. 26ന് ആരംഭിക്കുന്ന മൂത്തേടം ബൈബിൾ കൺവൻഷനിൽ പകർത്തിയെഴുതിയ ബൈബിളിന്‍റെ പ്രതിഷ്ഠ നടത്തും

വിശ്വാസപരിശീലകരുടെ സേവനം മഹത്തരം: മേജര്‍ ആര്‍ച്ച്ബിഷപ്

കാഞ്ഞൂര്‍: സഭയുടെ പ്രബോധന ശുശ്രൂഷയില്‍ സുപ്രാധാനമായ സേവനം ചെയ്യുന്നവരാണ് വിശ്വാസ പരിശീലകരെന്നു സീറോ മലബാര്‍ സഭ മേജര്‍ ആര്‍ച്ച്ബിഷപ് മാര്‍ റാഫേല്‍ തട്ടില്‍ പറഞ്ഞു. വളര്‍ന്നുവരുന്ന തലമുറയില്‍ കിസ്തുകേന്ദ്രീകൃതമായ വിശ്വാസസാക്ഷ്യവും മൂല്യാധിഷ്ഠിതമായ ജീവിതവും ക്രമപ്പെടുത്തുന്നതില്‍ വിശ്വാസപരിശീലകര്‍ നിര്‍വഹിക്കുന്ന ദൗത്യം മഹത്തരമാണെന്നും മാര്‍ തട്ടില്‍ പറഞ്ഞു. എറണാകുളം-അങ്കമാലി അതിരൂപത വിശ്വാസ പരിശീലന കേന്ദ്രത്തിന്‍റെ ആഭിമുഖ്യത്തില്‍ കാഞ്ഞൂര്‍ സെന്‍റെ മേരീസ് ഫൊറോന പള്ളിയില്‍ നടന്ന വിശ്വാസ പരിശീലകരുടെ മേഖലാ കണ്‍വന്‍ഷനില്‍ സമാപന സന്ദേശം നല്‍കുകയായിരുന്നു അദ്ദേഹം. വിശ്വാസത്തിന്‍റെ വിത്തു വിതയ്ക്കുന്ന സഭയുടെ ശ്രേഷ്ഠരായ പങ്കാളികളാണ് വിശ്വാസ പരിശീലകരെന്നും മേജര്‍ ആര്‍ച്ച്ബിഷപ് ഓര്‍മിപ്പിച്ചു. അതിരൂപതാതലത്തില്‍ മികച്ച വിജയം നേടിയ വിദ്യാര്‍ഥികളെയും വിശ്വാസ പരിശീലനത്തിന്‍റെ സുവര്‍ണ, റൂബി, രജത ജൂബിലി ആഘോഷിക്കുന്ന അധ്യാപകരെയും ആദരിച്ചു. അതിരൂപത ഡയറക്ടര്‍ റവ.ഡോ. പോള്‍ മൊറേലി, മഞ്ഞപ്ര ഫൊറോന വികാരി റവ. ഡോ. വര്‍ഗീസ് പൊട്ടയ്ക്കല്‍, ഫാ. നിഖില്‍ പാലാട്ടി, സിസ്റ്റര്‍ ലിസ് ലറ്റ്, സിസ്റ്റര്‍ ഐറിന്‍, സിസ്റ്റര്‍ അമല, ഷാജു ഏര്‍ത്തടത്തില്‍, സിനു പുത്തന്‍പുരയ്ക്കല്‍ എന്നിവര്‍ പ്രസംഗിച്ചു. നേരത്തെ റവ. ഡോ. ആന്‍റോ ചാലിശേരി കണ്‍വന്‍ഷന്‍ ഉദ്ഘാടനം ചെയ്തു. റവ. ഡോ. അഗസ്റ്റിന്‍ കല്ലേലി ക്ലാസ് നയിച്ചു. കാഞ്ഞൂര്‍, വല്ലം, മഞ്ഞപ്ര ഫൊറോനകളിലെ വിശ്വാസ പരിശീലകര്‍ പങ്കെടുത്തു.

ജില്ലയില്‍ കെ ഫോണ്‍ കണക്ഷന്‍ 9,000 ലേക്ക്

കൊച്ചി: സംസ്ഥാനത്തിന്‍റെ സ്വന്തം ഇന്‍റര്‍നെറ്റ് ബ്രോഡ്ബാന്‍ഡ് കണക്ഷനായ കേരള ഫൈബര്‍ ഒപ്റ്റിക് നെറ്റ്‌വര്‍ക്ക്(കെ ഫോണ്‍)പദ്ധതിയില്‍ ജില്ലയിലെ കണക്ഷനുകളുടെ എണ്ണം 9,000 ലേക്ക്. ഇതുവരെ 8,723 കണക്ഷനുകളാണ് നല്‍കിയത്. വീടുകളില്‍ മാത്രം 6,128 നല്‍കിയത് കണക്ഷനുകളാണ്. ദാരിദ്ര്യരേഖയ്ക്കു താഴെയുള്ള 995 വീടുകളില്‍ ഇന്‍റര്‍നെറ്റ് സൗകര്യം ലഭ്യമാക്കി. ഇതുകൂടാതെ 1,570 സര്‍ക്കാര്‍ സ്ഥാപനങ്ങളിലും കെ ഫോണ്‍ കണക്ഷന്‍ നല്‍കിയിട്ടുണ്ട്. 30 ഓളം ഇതര സ്വകാര്യ സ്ഥാപനങ്ങളിലും കണക്ഷനുകള്‍ നല്‍കാന്‍ കഴിഞ്ഞു. കെ ഫോണ്‍ ബേസിക്, ബേസിക് പ്ലസ്, മാസ്, ടര്‍ബോ, ടര്‍ബോ സൂപ്പര്‍, സെനിത്ത്, സെനിത്ത് സൂപ്പര്‍ തുടങ്ങി വിവിധ വേഗത്തിലുള്ള ഇന്‍റര്‍നെറ്റ് കണക്ഷനുകള്‍ കെ ഫോണ്‍ വഴി ലഭ്യമാണ്. 299 രൂപയാണ് പ്രതിമാസ ബേസിക് പ്ലാനുകളുടെ നിരക്ക്. പുതിയ കണക്ഷനുകള്‍ ലഭിക്കുന്നതിനായി https://selfcare.kfon.co.in/dm.php എന്ന ലിങ്ക് വഴി രജിസ്റ്റര്‍ ചെയ്‌തോ 18005704466 എന്ന നമ്പറില്‍ ബന്ധപ്പെട്ടോ enteKfon ആപ് വഴിയോ അപേക്ഷിക്കാം.

കോൺഗ്രസ് നേതാവിനെതിരേ ഫ്ലക്സ് വച്ച യുവാവിന് മർദനം

ആലങ്ങാട്: കോൺഗ്രസ് നേതാവിനെതിരേ റോഡിൽ ഫ്ലക്സ് വച്ച സംഭവത്തിൽ യുവാവിന് മർദനം. യുവാവിനെ ആക്രമിച്ചു പരിക്കേല്‍പ്പിച്ച സംഭവത്തില്‍ കോണ്‍ഗ്രസ് കരുമാലൂര്‍ ഈസ്റ്റ് മണ്ഡലം ജനറല്‍ സെക്രട്ടറി വെളിയത്തുനാട് കാരാടിക്കോടത്ത് വീട്ടില്‍ ഉബൈദുല്ലയെ ആലുവ പൊലീസ് അറസ്റ്റ് ചെയ്തു. ശനിയാഴ്ച രാത്രി ഒന്‍പതരയോടെയാണു സംഭവം നടന്നത്. കോണ്‍ഗ്രസ് നേതാവിനെതിരെ റോഡില്‍ ഫ്‌ളക്‌സ് വച്ചതിലുള്ള വിരോധമാണ് സംഭവത്തിനു പിന്നിലെന്നാണ് ആരോപണം.

വിജയ മധുരം നുകർന്ന് ഇരട്ടകള്‍

കൊച്ചി: ജൂണിയര്‍ പെണ്‍കുട്ടികളുടെ 100 മീറ്റര്‍ ഹര്‍ഡില്‍സില്‍ ഒന്നും മൂന്നും സ്ഥാനം നേടിയത് ഇരട്ടകളായ ഏയ്ഞ്ചലിനയും ഏയ്ഞ്ചലിയയും. കോതമംഗലം മാര്‍ ബേസിലിന്‍റെ താരങ്ങളാണ് തൃശൂര്‍ സ്വദേശികളായ ഇരുവരും. ലോംഗ്ജംപില്‍ ഏയ്ഞ്ചലിയ രണ്ടാംസ്ഥാനം നേടിയിരുന്നു. 400 മീറ്റര്‍ ഹര്‍ഡില്‍സില്‍ ഏയ്ഞ്ചലിയയ്ക്ക് ഇന്ന് മത്സരമുണ്ട്. ഏയ്ഞ്ചലിന 200 മീറ്ററില്‍ ഇന്നിറങ്ങും.

ട്രിപ്പിൾ മികവിൽ അദബിയ, ഡാനിയൽ

കൊച്ചി: മത്സരിച്ച മൂന്ന് ഇനങ്ങളിലും സ്വര്‍ണം നേടി കീരമ്പാറ സെന്‍റ് സ്റ്റീഫന്‍സ് എച്ച്എസ്എസിലെ പ്ലസ് വണ്‍ വിദ്യാര്‍ഥിനി അദബിയ ഫര്‍ഹാന്‍. ഇന്നലെ ജൂണിയര്‍ പെണ്‍കുട്ടികളുടെ ട്രിപ്പില്‍ ജംപിലാണ് അദബിയ ട്രിപ്പിൾ തികച്ചത്. എതിരാളികളെ ഏറെ പിന്നിലാക്കി 11.08 മീറ്റര്‍ കുറിച്ചാണ് സ്വര്‍ണമണിഞ്ഞത്. ജില്ലാ ജൂണിയര്‍ അത്‌ലറ്റിക് മീറ്റില്‍ 11.93 മീറ്റര്‍ കുറിച്ചതാണ് കരിയറിലെ മികച്ച പ്രകടനം. ആദ്യദിനം ലോംഗ് ജംപിലും 100 മീറ്ററിലും അദബിയ സ്വര്‍ണം നേടിയിരുന്നു. എം.എ. ജോര്‍ജിന്‍റെ കീഴിലാണ് പരിശീലനം. മാര്‍ ബേസിലിലെ ഡാനിയല്‍ ഷാജിയും ട്രിപ്പിൾ സ്വര്‍ണം സ്വന്തമാക്കി. ഇന്നലെ ജൂണിയര്‍ ആണ്‍കൂട്ടികളുടെ 400, 1500 മീറ്ററിലാണ് ഡാനിയൽ ട്രിപ്പിൾ തികച്ചത്. ആദ്യദിനം നടന്ന 800 മീറ്ററില്‍ സ്വര്‍ണം നേടിയിരുന്നു. മാര്‍ ബേസിലിലെ കായികാധ്യാപിക ഷിബി മാത്യുവിന്‍റെ ശിക്ഷണത്തിലാണ് പരിശീലനം.

പരിശീലനമില്ലാതെ സ്വര്‍ണം നേടി അനഹയും അനിലയും

കൊച്ചി: ഏതെങ്കിലും കായികാധ്യാപകന്‍റെ കീഴില്‍ ശാസ്ത്രീയമായ പരിശീനലമില്ലാതെ ജില്ലാ സ്‌കൂള്‍ മീറ്റില്‍ മത്സരിച്ച് സ്വര്‍ണം നേടി അനഹയും അനിലയും. വനിതകളുടെ ഹൈജംപ് ജൂണിയര്‍ വിഭാഗത്തിലാണ് കറുകുറ്റി സെന്‍റ് ജോസഫ്‌സ് ജിഎച്ച്എസിലെ എട്ടാംക്ലാസ് വിദ്യാര്‍ഥി അനഹ ഷാജു സ്വര്‍ണം നേടിയത്. മാണിക്കമംഗലം എന്‍എസ്എസ് എച്ച്എസ്എസിലെ പ്ലസ്ടു വിദ്യാര്‍ഥിനി അനില പോളച്ചന്‍റെ സ്വര്‍ണ നേട്ടം ഇതേ ഇനത്തില്‍ സീനിയര്‍ വിഭാഗത്തിലും. കായിക വിദ്യാഭ്യാസത്തിന് കാര്യമായ സൗകര്യങ്ങളില്ലാത്ത സ്‌കൂളുകളില്‍ നിന്നാണ് ഇരുവരുടെയും വരുന്നത്. ചെറുപ്പം മുതല്‍ക്കെ കായിക മത്സരങ്ങളില്‍ പങ്കെടുക്കുമായിരുന്ന ഇരുവരും ആരുടെയും ഉപദേശപ്രകാരമല്ലാതെ സ്വന്തം നിലയ്ക്കാണ് ഹൈജംപ് ഇഷ്ട ഇനമായി തെരഞ്ഞെടുത്തത്. ജില്ലാ മീറ്റിലെ ഇരുവരുടെയും ആദ്യ സ്വര്‍ണ നേട്ടവുമാണിത്.

ജോവിയ ട്രാക്കില്‍ രചിച്ചത് കരളുറപ്പിന്‍റെ കഥ

കൊച്ചി: മരണക്കിടക്കയില്‍ നിന്ന് കരളുറപ്പിന്‍റെ കനത്തില്‍ ട്രാക്കിലേക്ക് മടങ്ങിയെത്തിയ ഒമ്പതാംക്ലാസുകാരി ജോവിയ ജോര്‍ജിന് പറയാനുള്ളത് തന്‍റെ പുതുജീവിതത്തിന്‍റെ കഥകൂടിയാണ്. അണുബാധ മൂലം ദിവസങ്ങളോളം ആശുപത്രി വെന്‍റഇലേറ്ററിലും ഐസിയുവിലും കഴിഞ്ഞ് രോഗസാഹചര്യങ്ങളോട് പടവെട്ടി ജിവിതത്തിന്‍റെ ട്രാക്കിലേക്ക് മടങ്ങിവന്ന വിജയത്തിന്‍റെ കഥ. അമ്മൂമ്മയുടെ കൈപിടിച്ച് ജില്ലാ സ്‌കൂള്‍ മീറ്റിലെത്തി സീനിയര്‍ പെണ‍കുട്ടികളുടെ 400 മീറ്ററില്‍ സ്വര്‍ണം നേടുമ്പോള്‍ കായിക ലോകത്തിന് നല്‍കുന്ന തിരിച്ചുവരവിന്‍റെ ത്രില്ലർ കൂടിയാണ് ജോവിയ പറഞ്ഞു വച്ചത്. ചെറുപ്പം മുതല്‍ക്കേ ഓട്ടം ഇഷ്ടഇനമായിരുന്ന ജോവിയ കഴിഞ്ഞ വര്‍ഷം ജില്ലാ മീറ്റിനായി പരിശീലിക്കുന്നതിനിടെയാണ് മതിലില്‍ തട്ടി കൈവിരലിനു താഴെ മുറിവുണ്ടായത്. ആ മുറിവ് പതിയെ പനിയിലേക്കും അണുബാധയിലേക്കും എത്തി. പനിക്കിടക്കയില്‍ നിന്നാണ് ജില്ലാ മീറ്റിന് എത്തിയത്. പിന്നാലെ പനി മൂര്‍ച്ഛിച്ച് ആശുപത്രിയിലായി. അണുബാധ ശ്വാസകോശം, വൃക്ക, ഹൃദയം എന്നിവയെയെല്ലാം ബാധിച്ചിരുന്നു. ആലുവയിലെ സ്വകാര്യ ആശുപത്രിയില്‍ നാലു ദിവസം വെന്‍റിലേറ്ററിലും രണ്ടാഴ്ച ഐസിയുവിലും കിടന്ന ശേഷമാണ് ജീവിതത്തിലേക്ക് തിരിച്ചെത്തിയത്. ഏറെക്കാലത്തെ വിശ്രമത്തിനും ചികിത്സയ്ക്കും ശേഷം ഇക്കഴിഞ്ഞ ഫെബ്രുവരിയിലാണ് വീണ്ടും പരിശീലന ഗ്രൗണ്ടിലേക്കിറങ്ങിയത്. ബുദ്ധിമുട്ടാണെങ്കില്‍ പിന്നീട് ഇറങ്ങാമെന്ന് അധ്യാപകര്‍ പറഞ്ഞെങ്കിലും ഓടാതിരിക്കാന്‍ അവള്‍ക്കാവില്ലായിരുന്നു. 14 വയസുള്ള ജോവിയ മത്സരിക്കേണ്ടത് ജൂണിയര്‍ വിഭാഗത്തിലാണ്. എന്നാല്‍, സീനിയര്‍ വിഭാഗത്തില്‍ ഇറങ്ങി 1:12:9 സെക്കന്‍ഡില്‍ മുതിര്‍ന്നവരെ പിന്തള്ളിയാണ് ഒന്നാമതെത്തിയത്. ഇന്ന് 200 മീറ്ററില്‍ ജോവിയയ്ക്ക് മത്സരമുണ്ട്. സ്വകാര്യ കമ്പനി ഉദ്യോഗസ്ഥനായ പാങ്കോട് തോട്ടത്തില്‍ ജോര്‍ജിന്‍റെയും കുവൈറ്റില്‍ ജോലിചെയ്യുന്ന ദിവ്യയുടെയും മകളാണ്.

കാത്തിരിപ്പിനൊടുവിൽ കന്നിപ്പൊന്ന്

കൊച്ചി: അത്‌ലറ്റിക് മീറ്റുകളില്‍ പതിവായി പങ്കെടുക്കാറുണ്ടെങ്കിലും പുത്തന്‍വേലിക്കര വിസിഎസ് എച്ച്എസ്എസിലെ പ്ലസ് ടു വിദ്യാര്‍ഥി വി.ബി. വിഗ്നേശ്വറിന് സ്വര്‍ണം അണിയാനുള്ള ഭാഗ്യം മുമ്പ് ഉണ്ടായിരുന്നില്ല. ഇത്തവണ പക്ഷെ ആ കുറവ് നികത്തി. സീനിയര്‍ ആണ്‍കുട്ടികളുടെ ലോംഗ്ജംപില്‍ മികച്ച പ്രകടനം നടത്തിയാണ് ഏറെ നാളത്തെ കാത്തിരിപ്പിന് വിരാമമിട്ട് ജില്ലാ സ്‌കൂള്‍ മീറ്റിലെ തന്‍റെ ആദ്യ കന്നിപ്പൊന്ന് സ്വന്തമാക്കിയത്. ആദ്യ റൗണ്ടിലെ ഒന്നും മൂന്നും അവസരങ്ങള്‍ പാഴാക്കിയ വിഗ്നേശ്വര്‍ രണ്ടാം അവസരത്തില്‍ കുറിച്ച 5.65 മീറ്ററിന്‍റെ പിന്‍ബലത്തിലാണ് ഒന്നാമതെത്തിയത്. സ്‌കൂളില്‍ മികച്ച ജംപ് പിറ്റ് ഇല്ലാത്തതിനാല്‍ ആഴ്ചയില്‍ മൂന്ന് ദിവസം മഹാരാജാസ് കോളജ് ഗ്രൗണ്ടിലെ പിറ്റിലായിരുന്നു പരിശീലനം. സബ്ജില്ലാതല മത്സരത്തില്‍ 5.83 മീറ്റര്‍ കുറിച്ചതാണ് കരിയറിലെ മികച്ച പ്രകടനം. പുത്തന്‍വേലിക്കര ബിനേഷ്‌കുമാര്‍-രാജി ദമ്പതികളുടെ മകനാണ്. ജീഷ്‌കുമാറാണ് കോച്ച്.

ഹാട്രിക് മണിമുത്തം

കൊച്ചി: തുടര്‍ച്ചയായി മൂന്ന് ജില്ലാ സ്‌കൂള്‍ മീറ്റുകളില്‍ ഒരേ ഇനത്തില്‍ ഒന്നാമതെത്തി ഹാര്‍ട്രിക് സ്വര്‍ണ നേട്ടവുമായി മാര്‍ ബേസിലിലെ പ്ലസ് വണ്‍ വിദ്യാര്‍ഥി സനു നന്ദ. ജൂണിയര്‍ പെണ്‍കുട്ടികളുടെ 400 മീറ്ററിലാണ് സനു സ്വര്‍ണമണിഞ്ഞത്. കഴിഞ്ഞ വര്‍ഷങ്ങളിലും ഇതേ ഇനത്തില്‍ സനുവിനായിരുന്നു സ്വര്‍ണം. കഴിഞ്ഞ വര്‍ഷം 200 മീറ്ററിലും സ്വര്‍ണം നേടിയിരുന്നു. പരിക്ക് പിടിപെട്ടതിനാല്‍ സംസ്ഥാന മീറ്റില്‍ പങ്കെടുക്കാന്‍ കഴിഞ്ഞില്ല. കണ്ണൂര്‍ അച്ചേരിക്കുഴിയില്‍ സുഭാഷ്-സിജി ദമ്പതികളുടെ മകളാണ്.

ജില്ലാ സ്കൂൾ കായികമേള : കപ്പിനോടടുത്ത് കോതമംഗലം

കൊച്ചി: ട്രാക്കിലും പിറ്റിലും കൗമാര താരങ്ങള്‍ ജ്വലിച്ച ജില്ലാ സ്‌കൂള്‍ മീറ്റിന്‍റെ രണ്ടാം ദിനത്തിലും നിലവിലെ ചാമ്പ്യൻമാരായ കോതമംഗലം ഉപജില്ല എതിരാളികളില്ലാതെ കുതിപ്പ് തുടരുന്നു. ഇന്നലെ 14 സ്വര്‍ണംകൂടി പട്ടികയില്‍ ചേര്‍ത്ത് ആകെ മെഡല്‍ നേട്ടം 44 ആക്കി. 24 സ്വര്‍ണവും 14 വെള്ളിയും ആറ് വെങ്കലവുമുള്‍പ്പെടെ 169 പോയന്‍റാണ് കോതമംഗലത്തിന്‍റെ സമ്പാദ്യം. 11 സ്വര്‍ണവും ആറു വെള്ളിയും ഒന്‍പത് വെങ്കലവുമായി 102 പോയിന്‍റുള്ള അങ്കമാലി രണ്ടാം സ്ഥാനത്തും 44 പോയൻോടെ വൈപ്പിന്‍ ഉപജില്ല മൂന്നാം സ്ഥാനത്തുമുണ്ട്. മൂന്ന് സ്വര്‍ണവും ആറ് വെള്ളിയും നാല് വെങ്കലവുമാണ് വൈപ്പിനുള്ളത്. സ്‌കൂള്‍ പോയിന്‍റ് പട്ടികയില്‍ കോതമംഗലം മാര്‍ ബേസില്‍ എച്ച്എസ്എസിനും എതിരില്ല. 18 സ്വര്‍ണവും 10 വെള്ളിയും അഞ്ച് വെങ്കലവും അടക്കം 125 പോയന്‍റാണ് രണ്ട് ദിനങ്ങളിലായി മാര്‍ ബേസില്‍ വാരിക്കൂട്ടിയത്. രണ്ടാം സ്ഥാനത്തുള്ള ഉപജില്ല നേടിയ പോയിന്‍റിനേക്കാൾ കൂടുതലാണ് ഇതെന്നതു കണക്കിലെടുക്കുമ്പോൾ തന്നെ മാർ ബേസിലിന്‍റെ ആദിപത്യം വ്യകാതമാകും. സ്കൂളുകളിൽ കീരമ്പാറ സെന്‍റ് സ്റ്റീഫന്‍സ് എച്ച്എസ്എസാണ് രണ്ടാം സ്ഥാനത്ത്. ആറു സ്വര്‍ണമുള്‍പ്പെടെ 39 പോയന്‍റാണവർക്ക്. 27 പോയിന്‍റുമായി അങ്കമാലി മൂക്കന്നൂര്‍ സേക്രഡ് ഹാര്‍ട്ട് ഓര്‍ഫനേജ് എച്ച്എസാണ് മൂന്നാം സ്ഥാനത്ത്. എറണാകുളം മഹാരാജാസ് കോളജ് ഗ്രൗണ്ടില്‍ നടക്കുന്ന മീറ്റിന്‍റെ രണ്ടാംദിനവും വൈകിയാണ് മത്സരങ്ങള്‍ ആരംഭിച്ചത്. താളംതെറ്റിയ മത്സരക്രമത്തില്‍ പൊരിവെയിലത്ത് മത്സരിക്കേണ്ടി വരുന്നത് കുട്ടികളുടെ പ്രകടനത്തെ കാര്യമായി ബാധിക്കുന്നുണ്ട്. സ്‌പൈക്ക്‌സ് പോലുമില്ലാതെയാണ് പല മത്സരാര്‍ഥികളും ട്രാക്ക് ഇനങ്ങളില്‍ മത്സരിക്കുന്നത്. പലരും പരിക്കോടെയാണ് ട്രാക്ക് വിടുന്നതും. മഹാരാജാസ് ഗ്രൗണ്ടിലെ ട്രാക്ക്, ജംപ് ഇനങ്ങള്‍ ഇന്ന് പൂര്‍ത്തിയാവും. നാളെ മുതല്‍ കോതമംഗലം എംഎ കോളജിലാണ് ത്രോ മത്സരങ്ങള്‍. പോള്‍വോള്‍ട്ടും ഇതോടൊപ്പം നടക്കും. ആദ്യ റിക്കാര്‍ഡില്‍ ആശയക്കുഴപ്പം കൊച്ചി: ജില്ലാ സ്‌കൂള്‍ മീറ്റില്‍ പിറന്ന ആദ്യ റിക്കാര്‍ഡിനെ ചൊല്ലി ആശയക്കുഴപ്പം. രണ്ടാം ദിനമായ ഇന്നലെ ജൂണിയര്‍ ആണ്‍കുട്ടികളുടെ 4x100 മീറ്റര്‍ റിലേയില്‍ അങ്കമാലി ഉപജില്ലാ ടീം സ്ഥാപിച്ച റിക്കാർഡിനെ ചൊല്ലിയാണ് ആശയക്കുഴപ്പം ഉണ്ടായത്. ഇതേ തുടര്‍ന്ന് റിക്കാര്‍ഡ് ഔദ്യോഗികമായി രേഖപ്പെടുത്തിയില്ല. 2025 ദേശീയ ഗെയിംസില്‍ 40.73 സെക്കന്‍ഡിൽ കേരള പുരുഷ ടീം സ്ഥാപിച്ച റിക്കാർഡിന് അടുത്ത സമയത്തിലാണ് അങ്കമാലി ഉപജില്ല (41.6) ഫിനിഷ് ചെയ്തത്. ഇത് ഫിനിഷിംഗ് ഒഫീഷ്യല്‍സ് സമയം രേഖപ്പെടുത്തിയതിലെ പിഴവാണെന്ന സംശയം ഉയരാൻ കാരണമായി. 45 സെക്കന്‍ഡാണ് നിലവിലെ സ്‌കൂള്‍ മീറ്റ് റിക്കാർഡ്. ആശയക്കുഴപ്പം മൂലം സമയം ഔദ്യോഗികമായി രേഖപ്പെടുത്തിയിട്ടില്ല.

സ്വന്തം മക്കളിലൂടെ വാക്‌സിനേഷൻ സന്ദേശം പകര്‍ന്ന് ജില്ലാ കളക്ടര്‍

കൊച്ചി: പള്‍സ് പോളിയോ ദിനത്തില്‍ തേവര അര്‍ബന്‍ കമ്യൂണിറ്റി ഹെല്‍ത്ത് സെന്‍ററിലത്തി തന്‍റെ രണ്ടു മക്കള്‍ക്കും പോളിയോ തുള്ളിമരുന്ന് നല്‍കി ജില്ലാ കളക്ടര്‍ ജി. പ്രിയങ്ക. വാക്‌സിനേഷന്‍റെ പ്രാധാന്യം മനസിലാക്കി എല്ലാ രക്ഷിതാക്കളും കുട്ടികള്‍ക്ക് അത് ഉറപ്പുവരുത്തണമെന്ന് പള്‍സ് പോളിയോ ദിന ജില്ലാതല പരിപാടി ഉദ്ഘാടനം ചെയ്ത് ജില്ലാ കളക്ടര്‍ പറഞ്ഞു. പോളിയോ രോഗം നമ്മുടെ രാജ്യത്ത് ഇന്ന് ഇല്ലെങ്കിൽകൂടി അയല്‍ രാജ്യങ്ങളിലെ രോഗസാന്നിധ്യം കാരണം നാം ജാഗ്രത തുടരണം. എല്ലാ കുട്ടികള്‍ക്കും പോളിയോ തുള്ളിമരുന്ന് ലഭിക്കുന്നുണ്ടെന്ന് ഉറപ്പാക്കണമെന്നും കളക്ടര്‍ പറഞ്ഞു. കൗണ്‍സിലര്‍ പി.ആര്‍. റെനിഷ് അധ്യക്ഷത വഹിച്ച പരിപാടിയില്‍ ജില്ലാ മെഡിക്കല്‍ ഓഫീസര്‍ (ആരോഗ്യം ) ഡോ. ആശാദേവി മുഖ്യപ്രഭാഷണം നടത്തി. സ്റ്റേറ്റ് ഒബ്‌സെര്‍വര്‍മാരായ ഡോ. വി.ആര്‍. വനജ, ഡോ. ആശ വിജയന്‍ എന്നിവര്‍ പോളിയോ തുള്ളി മരുന്നിന്‍റെ പ്രാധാന്യത്തെക്കുറിച്ച് സംസാരിച്ചു.

കേബിളിൽ തട്ടി വീണ് സ്‌കൂട്ടർ യാത്രികയ്ക്ക് പരിക്ക്

തൃപ്പൂണിത്തുറ: അലക്ഷ്യമായി തൂണിൽ കെട്ടിയിരുന്ന കേബിളിൽ തട്ടി വീണ് സ്‌കൂട്ടർ യാത്രികയ്ക്കു പരിക്കേറ്റു. എരൂർ പുല്ലംതുരുത്ത് വീട്ടിൽ അമൃതയ്ക്കാണ് പരിക്കേറ്റത്. ഞായറാഴ്ച വൈകിട്ട് വടക്കേക്കോട്ട ചക്കാലമുട്ട് റോഡിലായിരുന്നു അപകടം. കാലിനു പൊട്ടലുണ്ടായ യുവതി സ്വകാര്യ ആശുപത്രിയിൽ ചികിത്സയിലാണ്. വീഴ്ചയുടെ ആഘാതത്തിൽ യുവതിയുടെ മുഖത്തിനും പരിക്കുണ്ട്. വടക്കേക്കോട്ട ഭാഗത്തു നിന്നെത്തിയ യുവതി, താഴ്ന്നു കിടന്നിരുന്ന സ്വകാര്യ ഇന്‍റർനെറ്റ് സേവന ദാതാവിന്‍റെ കേബിളിൽ കുടുങ്ങി വീഴുകയായിരുന്നുവെന്ന് നാട്ടുകാർ പറഞ്ഞു.

ഹൈബ്രിഡ് കഞ്ചാവുമായി ആശുപത്രി ജീവനക്കാരൻ പിടിയിൽ

വരാപ്പുഴ : വിൽപ്പനയ്ക്ക് സൂക്ഷിച്ചിരുന്ന ഹൈബ്രിഡ് കഞ്ചാവുമായി സ്വകാര്യ ആശുപത്രിയിലെ ജീവനക്കാരൻ പിടിയിൽ. കോതാട് കോരാമ്പാടം പാല്യത്ത് റോഡിൽ വാടകയ്ക്കു താമസിക്കുന്ന കൊട്ടാരക്കര ഉമ്മന്നൂർ പ്ലാപ്പിള്ളി കളിക്കൽ പുത്തൻവീട്ടിൽ അലൻ കോശി (25)യെയാണ് വരാപ്പുഴ പോലീസ് അറസ്റ്റ് ചെയ്തത്. സ്വകാര്യ ആശുപത്രിയിലെ ലിവർ കെയർ അസിസ്റ്റന്‍റ് ഫിസിഷ്യനാണ് അലൻ. ഇയാളിൽ നിന്നു 2.23 ഗ്രാം ഹൈബ്രിഡ് കഞ്ചാവും 8.24 ഗ്രാം കഞ്ചാവും കണ്ടെടുത്തു. നാലു കവറുകളിലാണു കഞ്ചാവ് സൂക്ഷിച്ചിരുന്നത്. തൂക്കാൻ ഉപയോഗിക്കുന്ന ചൈനീസ് നിർമിത ത്രാസും കണ്ടെടുത്തു. കണ്ടെയ്നർ റോഡിലും ചിറ്റൂർ കുട്ടി സാഹിബ് റോഡിലും നടത്തിയ പരിശോധനകളിൽനിന്ന് ലഭിച്ച വിവരത്തിന്‍റെ അടിസ്ഥാനത്തിലാണു പോലീസ് ഇയാളുടെ വാടകവീട്ടിൽ പരിശോധന നടത്തിയത്.

കാര്‍ത്തിക് ലൈവ്: ഡിസം. 19ന് കൊച്ചിയില്‍

കൊച്ചി: സംഗീത പ്രേമികളെ ആവേശത്തിലാക്കാന്‍ പുതിയ മ്യൂസിക് ടൂറുമായി (കാര്‍ത്തിക് ലൈവ്) പ്രശസ്ത ഗായകനും സംഗീത സംവിധായകനുമായ കാര്‍ത്തിക് കൊച്ചിയിലെത്തുന്നു. ബുക്ക് മൈഷോയുടെ സഹസംരംഭമായ ട്രൈബ്‌വൈബ് എന്‍റര്‍ടെയ്ൻമെന്‍റ് ഒരുക്കുന്ന ഈ ടൂര്‍ ദക്ഷിണേന്ത്യയിലെ പ്രധാന പതിനൊന്ന് നഗരങ്ങളില്‍ അരങ്ങേറും. നവംബര്‍ 30ന് ആരംഭിക്കുന്ന മ്യൂസിക് ടൂര്‍ തിരുപ്പതി, വിശാഖപട്ടണം, കോയമ്പത്തൂര്‍, കൊച്ചി, രാജമുണ്ഡ്രി, ബംഗളൂരു, ഹൈദരാബാദ്, വിജയവാഡ, ചെന്നൈ, മധുര, വാറങ്കല്‍ എന്നീ നഗരങ്ങളിലാണ് അരങ്ങേറുക. ഡിസംബര്‍ 19നാണ് കൊച്ചിയിലെ ഷോ.

പള്‍സ് പോളിയോ : ആദ്യദിനം ജില്ലയിൽ 1,71,983 കുട്ടികള്‍ക്ക് നല്‍കി

കൊച്ചി: പള്‍സ് പോളിയോ ദിനത്തില്‍ ജില്ലയില്‍ മികച്ച നേട്ടം. ജില്ലയില്‍ അഞ്ചു വയസിൽ താഴെയുള്ള 1,89,737 കുട്ടികള്‍ക്കാണ് പള്‍സ് പോളിയോ തുള്ളിമരുന്ന് നല്‍കാന്‍ ലക്ഷ്യമിട്ടത്. ഇതില്‍ 1,71,983 കുട്ടികള്‍ക്ക് ഇന്നലെ പള്‍സ് പോളിയോ തുള്ളിമരുന്ന് നല്‍കി. ഇതില്‍ 5,083 ഇതരസംസ്ഥാന തൊഴിലാളികളുടെ കുട്ടികളും ഉള്‍പ്പെടും. 1,947 ബൂത്തുകളാണ് ജില്ലയില്‍ ഇതിനായി സജ്ജീകരിച്ചത്. സര്‍ക്കാര്‍ ആശുപത്രികള്‍, സ്വകാര്യ ആശുപത്രികള്‍, അങ്കണവാടികള്‍, ജനകീയ ആരോഗ്യ കേന്ദ്രങ്ങള്‍ എന്നിവ കൂടാതെ ബസ്‌സ്റ്റാന്‍ഡുകള്‍, റെയില്‍വേ സ്റ്റേഷനുകള്‍, ബോട്ട് ജെട്ടികള്‍, മെട്രോ സ്റ്റേഷനുകള്‍, എയര്‍പോര്‍ട്ട് എന്നിവിടങ്ങളിലായി 51 കേന്ദ്രങ്ങളില്‍ ട്രാന്‍സിറ്റ് ബൂത്തുകളും പ്രവര്‍ത്തിച്ചു. ആളുകള്‍ക്ക് എത്തിച്ചേരാന്‍ ബുദ്ധിമുട്ടുള്ള പ്രദേശങ്ങളിലും ഇതര സംസ്ഥാന തൊഴിലാളി ക്യാമ്പുകളിലും, കുട്ടികള്‍ക്ക് തുള്ളിമരുന്ന് നല്‍കുന്നതിനായി 64 മൊബൈല്‍ ടീമുകളെ സജ്ജമാക്കിയിരുന്നു. കുട്ടികള്‍ക്ക് ഇന്നലെ തുള്ളിമരുന്ന് നല്‍കാന്‍ സാധിക്കാത്തവര്‍ക്ക് ആരോഗ്യ പ്രവര്‍ത്തകര്‍ അടുത്ത രണ്ടു ദിവസങ്ങളില്‍ വീടുകളിലെത്തി വാക്‌സിന്‍ നല്‍കുന്നതായിരിക്കും.

മലമ്പാമ്പിനെ പിടികൂടി

മൂവാറ്റുപുഴ: ബ്ലോക്ക് ഓഫീസിന്‍റെ ഗേറ്റിനു മുമ്പില്‍നിന്നും മലമ്പാമ്പിനെ പിടികൂടി. കഴിഞ്ഞദിവസം രാത്രി എട്ടോടെ നാട്ടുകാര്‍ അറിയിച്ചതിനെ തുടര്‍ന്ന് പാമ്പുപിടിത്ത പരിശീലനം നേടിയ പൊതുപ്രവര്‍ത്തകനും ഓട്ടോ തൊഴിലാളിയുമായ വാഴപ്പിള്ളി മുണ്ടയ്ക്കല്‍ എം.ജെ. ഷാജിയാണ് മലമ്പാമ്പിനെ പിടികൂടിയത്. പിന്നീട് വനംവകുപ്പിന് കൈമാറി. കഴിഞ്ഞ ഏതാനും മാസങ്ങള്‍ക്കകം ഇവിടെനിന്നും പിടികൂടുന്ന മൂന്നാമത്തെ മലമ്പാമ്പാണിത്.

സ്വർണമാല മോഷണം പോയെന്ന് പരാതി

കൂത്താട്ടുകുളം: രാത്രി ഉറങ്ങാൻ കിടന്ന യുവാവിന്‍റെ കഴുത്തിൽനിന്നും സ്വർണമാല മോഷണം പോയതായി പരാതി. മാറിക കുട്ടികവലയ്ക്ക് സമീപം മാളിയേക്കൽ ചന്ദ്രന്‍റെ വീട്ടിൽനിന്നാണ് സ്വർണമാല മോഷണം പോയത്. ശനിയാഴ്ച വെളുപ്പിന് രണ്ടിനാണ് സംഭവം. ചന്ദ്രനും ഭാര്യക്കും കൂട്ടുകിടക്കാൻ എത്തിയ സഹോദര പുത്രന്‍റെ കഴുത്തിൽനിന്നാണ് മാല മോഷ്ടിക്കപ്പെട്ടത്. വീടിന്‍റെ പിൻവശത്തെ ജനലിലൂടെ കൈകടത്തി വാതിലിന്‍റെ കുറ്റി തുറന്നശേഷം മോഷ്ടാവ് അകത്തു കയറി മോഷണം നടത്തിയെന്നാണ് കരുതുന്നത്. വീടിനുള്ളിൽ മേശയിൽ സൂക്ഷിച്ചിരുന്ന 1,000 രൂപയും മോഷണം പോയിട്ടുണ്ട്. ചന്ദ്രന്‍റെ പരാതിയെ തുടർന്ന് കൂത്താട്ടുകുളം പോലീസ് കേസെടുത്ത് അന്വേഷണം ആരംഭിച്ചു. ഡോഗ് സ്ക്വാഡും സ്ഥലത്തെത്തി പരിശോധ നടത്തി.

കെഎസ്എസ്പിഎ വാര്‍ഷിക സമ്മേളനം നടത്തി

മൂവാറ്റുപുഴ: കെഎസ്എസ്പിഎ മൂവാറ്റുപുഴ മുനിസിപ്പല്‍ മേഖല വാര്‍ഷിക സമ്മേളനം നടത്തി. കെ. കരുണാകരന്‍ സപ്തതി മന്ദിര ഹാളില്‍ നടന്ന സമ്മേളനത്തില്‍ മുനിസിപ്പല്‍ മേഖലാ പ്രസിഡന്‍റ് ബേബി ജോര്‍ജ് പതാക ഉയര്‍ത്തി. കോതമംഗലം രൂപത ഫാമിലി അപ്പോസ്തലേറ്റ് ഡയറക്ടര്‍ റവ.ഡോ. ആന്‍റണി പുത്തന്‍കുളം വാര്‍ഷിക സമ്മേളനം ഉദ്ഘാടനം ചെയ്തു. മൂവാറ്റുപുഴ നിയോജക മണ്ഡലം പ്രസിഡന്‍റ് ഒ.എം തങ്കച്ചന്‍ മുഖ്യപ്രഭാഷണം നടത്തി. കാര്യക്ഷമമായ സംഘടനാ പ്രവര്‍ത്തനം എന്ന വിഷയത്തെക്കുറിച്ച് എന്‍ജിഒ അസോസിയേഷന്‍ മുന്‍ സംസ്ഥാന പ്രസിഡന്‍റ് പി.എസ്.എ. ലത്തീഫ് ക്ലാസ് നയിച്ചു. ജില്ലാ വനിതാ ഫോറം പ്രസിഡന്‍റ് ആലീസ് സ്‌കറിയ വിവിധ മേഖലകളില്‍ കഴിവ് തെളിയിച്ച പ്രതിഭകളായ പി.ബി. ഗോപകുമാര്‍, പുഷ്പ ജോസഫ്, ലക്ഷ്മി സജീവന്‍, എസ്. കീര്‍ത്തന എന്നിവരെ ചടങ്ങില്‍ ആദരിച്ചു. കോണ്‍ഗ്രസ് ടൗണ്‍ മണ്ഡലം പ്രസിഡന്‍റ് കെ.എ. അബ്ദുള്‍ സലാം, കെഎസ്എസ്പിഎ സംസ്ഥാന കൗണ്‍സില്‍ അംഗം മാത്യു ഫിലിപ്പ്, നിയോജക മണ്ഡലം സെക്രട്ടറി വി.എം നാസര്‍ ഖാന്‍, നിയോജകമണ്ഡലം ട്രഷറര്‍ ടോമി ജേക്കബ്, നിയോജക മണ്ഡലം വനിതാ ഫോറം പ്രസിഡന്‍റ് റാണി പി. എല്‍ദോ, നിയോജകമണ്ഡലം ജോയിന്‍റ് സെക്രട്ടറി പി.എസ്. ഷബീബ്, വനിതാ ഫോറം മുന്‍ ജില്ലാ പ്രസിഡന്‍റ് കെ.എം റജീന, മുനിസിപ്പല്‍ മേഖല ജോയിന്‍റ് സെക്രട്ടറി എം.യു. ഷാജി, മുനിസിപ്പല്‍ മേഖല വനിത ഫോറം പ്രസിഡന്‍റ് എന്‍.എന്‍. മല്ലിക, സെക്രട്ടറി ബിനു കെ. പീറ്റര്‍, ട്രഷറര്‍ കെ.സി. ബോസ്, കെഎസ്എസ്പിഎ ജില്ലാ വൈസ് പ്രസിഡന്‍റ് ഡൊമിനിക് തോമസ് എന്നിവര്‍ പ്രസംഗിച്ചു.

ചാത്തമറ്റം പള്ളി കൂദാശ ചെയ്തു

പോത്താനിക്കാട്: ചാത്തമറ്റം സെന്‍റ് പീറ്റേഴ്സ് ആന്‍ഡ് സെന്‍റ് പോള്‍സ് ഓര്‍ത്തഡോക്സ് പള്ളി പരിശുദ്ധ ബസേലിയോസ് മാര്‍ത്തോമ്മാ മാത്യൂസ് തൃതിയന്‍ കാതോലിക്ക ബാവ കൂദാശ ചെയ്തു. ഇതോടനുബന്ധിച്ച് നടത്തിയ പൊതുസമ്മേളനം യൂഹാനോന്‍ മാര്‍ പോളിക്കാര്‍പ്പോസ് മെത്രാപ്പോലീത്ത അധ്യക്ഷത വഹിച്ചു. ഡീന്‍ കുര്യാക്കോസ് എംപി മുഖ്യപ്രഭാഷണം നടത്തി. മാത്യു കുഴല്‍നാടന്‍ എംഎല്‍എ ഇടവകയിലെ ഉന്നത വിജയം കരസ്ഥമാക്കിയ കുട്ടികള്‍ക്ക് സ്കോളര്‍ഷിപ്പുകള്‍ വിതരണം ചെയ്തു. പിന്നണി ഗായകന്‍ കെ.ജി. മാര്‍ക്കോസ് ദേവാലയം നിര്‍മിച്ചു നല്‍കിയ ഭവനങ്ങളുടെ താക്കോല്‍ ദാനം നിര്‍വഹിച്ചു. ഡോ. തോമസ് മാര്‍ അത്താനാസിയോസ് മെത്രാപ്പോലീത്ത, ഡോ. യൂഹാനോന്‍ മാര്‍ ദീയസ്കോറോസ് മെത്രാപ്പോലീത്ത, ജോഷ്വാ മാര്‍ നിക്കോദീമോസ് മെത്രാപ്പൊലീത്ത, വൈദീക ട്രസ്റ്റി ഡോ. തോമസ് വര്‍ഗീസ് അമയില്‍, അല്‍മായ ട്രസ്റ്റി ബിജു ഉമ്മന്‍, പോത്താനിക്കാട് പഞ്ചായത്ത് പ്രസിഡന്‍റ് സജി കെ. വര്‍ഗീസ്, വികാരി ഫാ. എല്‍ദോ കുര്യാക്കോസ്, ഫാ. കെ.കെ. മര്‍ക്കൊസ്, ട്രസ്റ്റിമാരായ വില്‍സണ്‍ വര്‍ഗീസ്, ഡെന്‍സണ്‍ കെ. പോള്‍, സെക്രട്ടറി ബേസില്‍ ജോര്‍ജ് എന്നിവര്‍ പ്രസംഗിച്ചു.

ഷാഫിക്കുനേരേ മർദനം: കോണ്‍ഗ്രസ് പ്രതിഷേധിച്ചു

മൂവാറ്റുപുഴ: കെപിസിസി വര്‍ക്കിംഗ് പ്രസിഡന്‍റും വടകര എംപിയുമായ ഷാഫി പറമ്പില്‍, കോഴിക്കോട് ഡിസിസി അധ്യക്ഷന്‍ കെ. പ്രവീണ്‍ കുമാര്‍ ഉള്‍പ്പെടെയുള്ള നേതാക്കള്‍ക്കെതിരേ പേരാമ്പ്രയിലുണ്ടായ പോലീസ് അതിക്രമത്തില്‍ പ്രതിഷേധിച്ച് യൂത്ത് കോണ്‍ഗ്രസ് മൂവാറ്റുപുഴ നിയോജക മണ്ഡലം കമ്മിറ്റിയുടെ നേതൃത്വത്തില്‍ നൈറ്റ് മാര്‍ച്ചും, റോഡ് ഉപരോധവും സംഘടിപ്പിച്ചു. കച്ചേരിത്താഴത്ത് നിന്നാരംഭിച്ച നൈറ്റ് മാര്‍ച്ച് വെള്ളൂര്‍ക്കുന്നത്ത് സമാപിച്ചു. തുടര്‍ന്ന് പ്രവര്‍ത്തകര്‍ അരമണിക്കൂറോളം റോഡ് ഉപരോധിക്കുകയും, ടയര്‍ കത്തിച്ച് പ്രതിഷേധിക്കുകയും ചെയ്തു. കോതമംഗലം: കോൺഗ്രസ് കോതമംഗലം ബ്ളോക്ക് കമ്മിറ്റിയുടെ നേതൃത്വത്തിൽ പ്രതിഷേധ പ്രകടനവും യോഗവും നടത്തി. ചെറിയ പള്ളിത്താഴത്ത് നടന്ന പ്രതിഷേധയോഗത്തിൽ ബ്ളോക്ക് പ്രസിഡന്‍റ് ഷമീർ പനക്കൽ അധ്യക്ഷത വഹിച്ചു . കെപിസിസി മെമ്പർ എ.ജി. ജോർജ് ഉദ്ഘാടനം ചെയ്തു.

അമിത വേഗതയിലും ഹോണടിച്ചും പോകുന്ന ബസുകള്‍ കണ്ട് ക്ഷുഭിതനായി മന്ത്രി

കോതമംഗലം: കോതമംഗലത്ത് മന്ത്രിയുടെ ഉദ്ഘാടന പരിപാടി നടക്കുന്ന സമയത്ത് തൊട്ടുടത്ത ഹൈറേഞ്ച് സ്റ്റാന്‍ഡിലേക്ക് അമിത വേഗതയിലും ഹോണടിച്ചും പോകുന്ന ബസുകള്‍ കണ്ട് മന്ത്രി ക്ഷുഭിതനായി. രണ്ട് സ്വകാര്യ ബസുകള്‍ക്കെതിരെ നടപടിക്കും ഉത്തരവിട്ടു. ഇതിന്‍റെ പേരില്‍ സമരം ചെയ്താല്‍ നൂറ് ബസ് ഇറക്കുമെന്നും മന്ത്രിയുടെ മുന്നറിയിപ്പും. കോതമംഗലത്ത് കെഎസ്ആര്‍ടിസി സ്റ്റാന്‍ഡില്‍ പുതിയ ബസ് ടെര്‍മിനലിന്‍റെ ഉദ്ഘാടനം നടക്കുന്നതിനിടെയാണ് നാടകീയ സംഭവങ്ങള്‍. മന്ത്രി കെ.ബി. ഗണേഷ്‌കുമാറായിരുന്നു ഉദ്ഘാടകന്‍. മന്ത്രിയുടെ പ്രസംഗത്തിന് മുമ്പ് ആന്‍റണി ജോണ്‍ എംഎല്‍എയുടെ അധ്യക്ഷപ്രസംഗം നടക്കുമ്പോഴാണ് ഒരു സ്വകാര്യ ബസ് നിര്‍ത്താതെ ഹോണടിച്ച് വേഗതയില്‍ പോയത്. ഫയര്‍ എന്‍ജിന്‍ വരുന്ന പോലെയായിരുന്നു ഹോണടിച്ചുള്ള ബസിന്‍റെ വരവ്. ഉദ്ഘാടന പ്രസംഗത്തില്‍ മന്ത്രി ഇക്കാര്യം പരാമര്‍ശിക്കുകയും ചെയ്തു. നിറച്ച് ആളെയും വച്ചോണ്ട് റോക്കറ്റ് പോലെയല്ലേ പോക്ക്. എവിടിട്ട് പിടിക്കാമെന്ന് നോക്കിയിരിക്കുമ്പോഴാണ് അതിനേക്കാള്‍ വേഗത്തില്‍ തിരിച്ച് പോകുന്നത്. ബ്രേക്ക് വല്ലതും പോയി പാഞ്ഞ് പോകുന്നതാണെന്നാണ് തെറ്റിദ്ധരിച്ചത്. അദേഹത്തിന്‍റെ പെര്‍മിറ്റ് പോയെന്ന് മാത്രമേ ഇപ്പോള്‍ പറയാനുള്ളൂവെന്നും മന്ത്രി പറഞ്ഞു. പ്രസംഗിച്ചുകൊണ്ടിരിക്കുന്നനിടെ അപ്പുറത്തെ സ്റ്റാന്‍ഡില്‍നിന്ന് മറ്റൊരു സ്വകാര്യ ബസ് പുറത്തേക്ക് അമിത വേഗതയില്‍ ഓടിച്ച് പോകുന്നതും മന്ത്രിയുടെ ശ്രദ്ധയില്‍പ്പെട്ടു. ഇവിടെ ഇതാണ് സ്പീഡ് എങ്കില്‍ റോഡില്‍ എന്തായിരിക്കുമെന്ന് സ്പീഡെന്നും മന്ത്രി ചോദിച്ചു. എന്തായാലും രണ്ട് ബസുകള്‍ക്കെതിരേയും നടപടിയെടുക്കാന്‍ പ്രസംഗത്തിനിടെ മൈക്കിലൂടെ തന്നെ മന്ത്രി ഉത്തരവിട്ടു. അതേസമയം ഹോണടിച്ച് വന്ന ബസിന്‍റെ ഹോണ്‍ സ്റ്റക്കായതാണെന്നും നിര്‍ത്താതെ ഹോണ്‍ മുഴങ്ങിയപ്പോള്‍ ഡ്രൈവര്‍ അങ്കലാപ്പിലായി വേഗത കൂടിയതാണെന്നുമാണ് ബസ് തൊഴിലാളികളും കണ്ടു നിന്നവരും പറയുന്നത്.

കോതമംഗലം ഡിപ്പോയിൽനിന്നും പുതിയ സർവീസുകൾ ആരംഭിക്കും: ഗതാഗത മന്ത്രി

കോതമംഗലം: നവംബർ പത്ത് മുതൽ കോതമംഗലത്തു നിന്ന് തിരുവനന്തപുരത്തേക്ക് പുതിയ കെഎസ്ആർടിസി പ്രീമിയം എസി സൂപ്പർ ഫാസ്റ്റ് സർവീസ് ആരംഭിക്കുമെന്ന് ഗതാഗത മന്ത്രി കെ.ബി. ഗണേഷ് കുമാർ. കോതമംഗലത്ത് പുതുതായി നിർമിച്ച ആധുനിക കെഎസ്ആർടിസി ബസ് ടെർമിനൽ ഉദ്ഘാടനം ചെയ്ത് സംസാരിക്കുകയായിരുന്നു. കമ്പം -തേനി ഭാഗത്തേക്ക് രണ്ടു ബസുകൾ വേണമെന്ന് ആവശ്യമുയർന്നിരുന്നു. അതിൽ കമ്പത്തേക്കു പുതിയ സർവീസ് ആരംഭിക്കാൻ തീരുമാനിച്ചിട്ടുണ്ട്. ഫാസ്റ്റ് പാസഞ്ചർ സർവീസ് ആണ് അനുവദിക്കുക. വൈകാതെ തന്നെ ആരംഭിക്കും. കോട്ടപ്പടി വഴി ഗുരുവായൂർക്ക് പുതിയ ലിങ്ക് ബസ് സർവീസ് ആരംഭിക്കും. ഒരുമാസം പരീക്ഷണാടിസ്ഥാനത്തിൽ നോക്കിയശേഷം, വിജയമാണെങ്കിൽ ഇത് തുടർന്നു കൊണ്ടു പോകും. നിലവിൽ ഒരു ലിങ്ക് ബസ് കോതമംഗലത്തിന് അനുവദിച്ചിട്ടുണ്ട്. അതുകൂടാതെയാണ് പുതിയ ബസ് വരുന്നത്. കളമശേരി മെഡിക്കൽ കോളജിലേക്ക് പുതിയൊരു സർവീസ് ആരംഭിക്കാനും തീരുമാനമായിട്ടുണ്ട്. കോതമംഗലത്തുനിന്ന് ഗോത്രമേഖലയിലേക്ക് പുതിയ സർവീസ് ആരംഭിച്ചിരുന്നു. ഇതിനോട് നല്ല പ്രതികരണമാണ് ലഭിച്ചത്. ഭാവിയിൽ നിലവിലെ ബസിന് പകരം പുതിയ മിനി ബസ് അനുവദിക്കുന്ന കാര്യം പരിഗണിക്കും. രാത്രി വരെ പെർമിറ്റ് ഉള്ള സ്വകാര്യ ബസുകൾ നേരത്തെ സർവീസ് അവസാനിപ്പിച്ച് ട്രിപ്പ് മുടക്കുന്നു എന്ന പരാതി ഉണ്ട്. ഇത്തരത്തിൽ സർവീസ് മുടക്കുന്ന സ്വകാര്യ ബസുകൾക്കെതിരേ കർശന നടപടി സ്വീകരിക്കും. ഇതിനായി അടുത്ത ദിവസം മുതൽ മോട്ടോർ വാഹന വകുപ്പിന്‍റെ പരിശോധന ആരംഭിക്കാൻ ഉദ്യോഗസ്ഥർക്ക് നിർദേശം നൽകിയിട്ടുണ്ട്. ബസ് ടർമിനൽ യാഥാർഥ്യമാക്കാൻ വിവിധതരത്തിൽ സഹായിച്ച വ്യക്തികളെയും സംഘടനകളെയും സ്ഥാപനങ്ങളെയും ചടങ്ങിൽ മന്ത്രി ആദരിച്ചു. ആന്‍റണി ജോൺ എംഎൽഎ അധ്യക്ഷത വഹിച്ചു. നഗരസഭ ചെയർമാൻ കെ.കെ. ടോമി മുഖ്യാതിഥിയായി. കെഎസ്ആർടിസി എംഡി ഡോ. പി.എസ്. പ്രമോജ് ങ്കർ, പഞ്ചായത്ത് പ്രസിഡന്‍റുമാരായ പി.കെ. ചന്ദ്രശേഖരൻ നായർ, മിനി ഗോപി, ജെസി സാജു, ഷിബു പടപ്പറമ്പത്ത്, എം.പി. ഗോപി, എഫ്ഐടി ചെയർമാൻ ആർ. അനിൽകുമാർ, എംപിഐ ചെയർമാൻ ഇ.കെ. ശിവൻ, മോട്ടോർ തൊഴിലാളി ക്ഷേമനിധി ബോർഡ് ചെയർമാൻ സി.കെ. ഹരികൃഷ്ണൻ, മറ്റ് ജനപ്രതിനിധികൾ, വിവിധ രാഷ്ട്രീയകക്ഷി പ്രതിനിധികൾ, ഉദ്യോഗസ്ഥർ എന്നിവർ പങ്കെടുത്തു

ആരക്കുഴയിൽ യുഡിഎഫിൽ വിള്ളൽ

മൂവാറ്റുപുഴ: ആരക്കുഴ പഞ്ചായത്തിൽ യുഡിഎഫ് മുന്നണി ബന്ധത്തിന് വിള്ളൽ വീഴുന്നു. പഞ്ചായത്തു തെരഞ്ഞെടുപ്പ് അടുത്തപ്പോൾ യുഡിഎഫ് എന്ന പേരു ചേർക്കാതെ ഇൻന്ത്യൻ നാഷണൽ കോൺഗ്രസ് ആരക്കുഴ മണ്ഡലം കേന്ദ്ര തെരഞ്ഞെടുപ്പ് കമ്മിറ്റി ഓഫീസ് എന്ന പേരിൽ ആരക്കുഴ പെരുമ്പല്ലൂരിൽ ഓഫീസ് തുറന്നത് കേരള കോൺഗ്രസിനെ അവഗണിച്ചു കൊണ്ടാണെന്നാണ് ആരോപണം ഉയർന്നിട്ടുള്ളത്. മുന്നണി ബന്ധം ഉപേക്ഷിച്ചു ഒറ്റക്ക് മത്സരിക്കാനുള്ള കോൺഗ്രസ് നീക്കമാണിതെന്നും കേരളാ കോൺഗ്രസ്‌ ഇതിനെതിരേ പ്രതികരിക്കുന്നതായും മുവാറ്റുപുഴ നിയോജക മണ്ഡലം പ്രസിഡന്‍റ് ഷൈസൺ പി. മാങ്ങഴ അറിയിച്ചു. വാർഡ് നറുക്കെടുപ്പ് ഈയാഴ്ച നടക്കാനിരിക്കെ അതിനു ശേഷം മുന്നണി ചർച്ച നടത്തി സീറ്റുകൾ തീരുമാനിക്കാമെന്ന നിലപാടിലായിരുന്നു നേതൃത്വം. എന്നാൽ അതിനു മുമ്പേ കോൺഗ്രസ്‌ കേന്ദ്ര തെരഞ്ഞെടുപ്പ് കമ്മിറ്റി ഓഫീസ് എന്ന പേരിൽ ഓഫീസ് തുറന്നതാണ് കേരള കോൺഗ്രസ് നേതൃത്വത്തെ ചൊടിപ്പിച്ചത്. മുന്നണി മര്യാദ പാലിക്കാൻ കോൺഗ്രസ് തയാറാകുന്നില്ലെങ്കിൽ ഒപ്പം സഹകരിക്കാൻ തയാറുള്ള കോൺഗ്രസ്‌ പ്രവർത്തകരെയും സമാന ചിന്താഗതിയുള്ള ഇതര സംഘടനകളെയും കക്ഷികളെയും ഉൾപ്പെടുത്തി ഐക്യ ജനാധിപത്യ മുന്നണി ശക്തിപ്പെടുത്താൻ കേരളാ കോൺഗ്രസ്‌ പാർട്ടി പ്രതിജ്ഞാബദ്ധമാകുമെന്നും വേണ്ടിവന്നാൽ എല്ലാ വാർഡുകളിലും സ്ഥാനാർഥികളെ മത്സരിപ്പിക്കുമെന്നും ഷൈസൺ പി. മാങ്ങഴ അറിയിച്ചു. എന്നാൽ തെരഞ്ഞെടുപ്പ് പ്രാബല്യത്തിലാകും മുമ്പ് മുന്നൊരുക്കമെന്ന നിലയിൽ പ്രവർത്തകർ സൗകര്യപ്രദമായ ഒരു ഓഫീസ് തുറന്നതാണ് ഇതെന്ന് കോൺഗ്രസ് നേതൃത്വം പറയുന്നു. വാർഡുകൾ പുനർനിർണയിച്ച് സ്ഥാനാർഥി ചർച്ച ആരംഭിക്കുമ്പോഴാണ് മുന്നണി ബന്ധം തീരുമാനമാകൂ എന്നും മുന്നണി വ്യവസ്ഥകൾ പാലിക്കാൻ എല്ലാവർക്കും കടമയുണ്ടെന്നും കോൺഗ്രസ് ആരക്കുഴ മണ്ഡലം പ്രസിഡന്‍റ് പോൾ ലൂയിസ് അറിയിച്ചു. നിലവിലുള്ള ഭരണസമിതിക്കു മുമ്പുള്ള തവണ മുന്നണിക്കു ഭരണം ലഭിച്ചപ്പോൾ രണ്ടര വർഷത്തിൽ പ്രസിഡന്‍റ് സ്ഥാനം കൈമാറാമെന്ന വ്യവസ്ഥയുണ്ടായിരുന്നതായും എന്നാൽ ഇക്കാര്യം പാലിക്കപ്പെടാതെ പോയതും മണ്ഡലം പ്രസിഡന്‍റ് ചൂണ്ടിക്കാണിച്ചു. തുടർന്നു വന്ന തെരഞ്ഞെടുപ്പിൽ പതിമൂന്നിൽ പത്തു സീറ്റും നേടി കോൺഗ്രസ് പഞ്ചായത്തു ഭരണത്തിലെത്തുകയായിരുന്നു.

കെഎസ്ആർടിസി ബസ് സ്റ്റാൻഡ് വിദ്യാർഥികൾ ശുചീകരിച്ചു

ആലുവ: കെഎസ്ആർടിസി ബസ് സ്റ്റാൻഡിൽ ശുചീകരണ പ്രവർത്തനം നടത്തി എടത്തല അൽ അമീൻ കോളേജ് എൻഎസ്എസ് യൂണിറ്റ് വിദ്യാർഥികൾ. ക്ലീനിംഗ് ഡ്രൈവ് പരിപാടി കെഎസ്ആർടിസി സ്റ്റേറ്റ് ഹൗസ്‌കീപ്പിംഗ് കോ ഓർഡിനേറ്റർ ശശികല ഗജ്ജാർ ഉദ്ഘാടനം ചെയ്തു. പ്രോഗ്രാം ഓഫീസർ ഡോ. നിഷാ ജോസഫ് അധ്യക്ഷത വഹിച്ചു. ജനറൽ കൺട്രോളിംഗ് ഇൻസ്‌പെക്ടർ ബിനിൽ ആന്‍റണി, ആർ. പ്രദീപ് കുമാർ, ബിനു സെവിയർ എന്നിവര്‍ സംസാരിച്ചു. എൻഎസ്എസ് സന്നദ്ധപ്രവർത്തകർ ബസ് സ്റ്റാൻഡ് പരിസരം വൃത്തിയാക്കി. മാലിന്യങ്ങൾ വേർതിരിച്ച് ശേഖരിക്കുകയും, പ്ലാസ്റ്റിക് മാലിന്യങ്ങൾ ശരിയായ രീതിയിൽ നീക്കം ചെയ്യുകയും ചെയ്തു. പ്രവർത്തനത്തിനിടെ യാത്രക്കാരെയും വ്യാപാരികളെയും ശുചിത്വത്തിന്‍റെ പ്രാധാന്യം ബോധ്യപ്പെടുത്തുന്ന പ്രചാരണ പ്രവർത്തനങ്ങളും നടത്തി.

വൈഎംസിഎ ഇന്‍റര്‍ സ്‌കൂള്‍ ചെസ് ചാമ്പ്യന്‍ഷിപ്പിന് തുടക്കം

കൊച്ചി: എറണാകുളം വൈഎംസിഎ സൗത്ത് ബ്രാഞ്ചിന്‍റെ ആഭിമുഖ്യത്തില്‍ നടത്തുന്ന ഇന്‍റര്‍ സ്‌കൂള്‍ ചെസ് ചാമ്പ്യന്‍ഷിപ്പ് വൈഎംസിഎ പ്രസിഡന്‍റ് മാത്യു മുണ്ടാട്ട് ഉദ്ഘാടനം ചെയ്തു. സൗത്ത് ബ്രാഞ്ച് ചെയര്‍മാന്‍ സി.എ. ഷോണ്‍ ജെഫ് ക്രിസ്റ്റഫര്‍ അധ്യക്ഷത വഹിച്ചു. എം.ഡി. ആന്‍റണി, ജനറല്‍ സെക്രട്ടറി ആന്‍റോ ജോസഫ്, ബ്രിസ്‌റ്റോ ജെയിംസ് എന്നിവര്‍ സംസാരിച്ചു .

പതിനാലുകാരനെ മർദിച്ച സംഭവം: ഡിവൈഎസ്പി ഓഫീസ് മാർച്ച് നടത്തും

പറവൂർ: ഞാറയ്ക്കൽ മഞ്ഞനക്കാട് മാരാത്തറ സാജുവിന്‍റെ 14 വയസുള്ള മകനെ മർദിച്ച കേസിലെ പ്രതികളെ സംരക്ഷിക്കുന്ന പോലീസ് നിലപാടിൽ പ്രതിഷേധിച്ച് പട്ടികജാതി- വർഗ സംയുക്ത വേദിയുടെ നേതൃത്വത്തിൽ ചൊവ്വാഴ്ച രാവിലെ 10ന് മുനമ്പം ഡിവൈഎസ്പി ഓഫീസ് മാർച്ച് സംഘടിപ്പിക്കുമെന്ന് ഭാരവാഹികൾ പത്രസമ്മേളനത്തിൽ പറഞ്ഞു. കോട്ടയം ജിവി രാജ സ്പോർട്സ് സ്കൂൾ വിദ്യാർഥിയും ഫുട്ബോൾ പ്രതിഭയുമായ സാജുവിന്‍റെ മകനെ ജൂൺ 27നാണ് എട്ടംഗ സംഘം വീട്ടിൽ നിന്ന് വിളിച്ചിറക്കി ക്രൂരമായി മർദിച്ചത്. ജുവനൈൽ ജസ്റ്റിസ് ആക്ടും, പട്ടികജാതി പീഡന നിരോധന നിയമവും ചുമത്താതെ പ്രതികൾക്ക് സ്‌റ്റേഷൻ ജാമ്യം നൽകിയതിനെതിരെ സിപിഎം ഉൾപ്പടെയുള്ള ഇടതുപാർട്ടികളും മറ്റ് സംഘടനകളും സമരരംഗത്തു വന്നിരുന്നു. കേസ് അട്ടിമറിക്കാൻ ശ്രമിക്കുന്ന പോലീസ് നിലപാട്‌ ചൂണ്ടിക്കാട്ടി ജൂലൈയിൽ മുഖ്യമന്ത്രിക്ക് പരാതി നൽകി. ഡിജിപിയുടെ ഉത്തരവിന്‍റെ അടിസ്ഥാനത്തിൽ മുനമ്പം ഡിവൈഎസ്പി എസ് ജയകൃഷ്ണനെ അന്വേഷണ ഉദ്യോഗസ്ഥനായി നിശ്ചയിച്ച് ആഗസ്റ്റ് 18ന് നിശ്ചയിച്ചെങ്കിലും യാതൊരു തരത്തിലുള്ള തുടരന്വേഷണവും ഉണ്ടായിട്ടില്ലെന്ന് ഭാരവാഹികൾ പറഞ്ഞു. സർക്കാർ തീരുമാനം അട്ടിമറിക്കാനാണ് പോലീസിന്‍റെ ശ്രമമെന്നും ഭാരവാഹികൾ കുറ്റപ്പെടുത്തി. പുല്ലംകുളം അംബേദ്കർ പാർക്കിന് മുന്നിൽ നിന്നും പ്രകടനം തുടങ്ങും. കെപിഎംഎസ് സംസ്ഥാന ജനറൽ സെക്രട്ടറി ബൈജു കലാശാല ഉദ്ഘാടനം ചെയ്യും. മറ്റ് സാമുദായിക സാംസ്കാരിക നായകർ സംസാരിക്കുമെന്ന് ജനറൽ കൺവീനർ വി.എസ്. രാധാകൃഷ്ണൻ, വൈസ് ചെയർമാൻ പ്രശോഭ് ഞാവേലി, കൺവീനർ എൻ.ജി. രതീഷ്, കെ.എസ്. ശ്രീരാജ്, എം.കെ. വിജയൻ എന്നിവർ പത്രസമ്മേളനത്തിൽ പങ്കെടുത്തു.

യൂത്ത് കോൺഗ്രസ് ദേശീയപാത ഉപരോധിച്ചു

ആലുവ: പേരാമ്പ്രയിൽ ഷാഫി പറമ്പിൽ എംപിയെ കൈയേറ്റം ചെയ്തതിൽ പ്രതിഷേധിച്ച് ആലുവയിൽ ഹൈവേ ഉപരോധിച്ച് യൂത്ത് കോൺഗ്രസ് പ്രതിഷേധം. ടയർ കത്തിച്ച് പ്രതിഷേധിക്കാനുള്ള പ്രവർത്തകരുടെ ശ്രമം പോലീസ് തടയാൻ ശ്രമിച്ചത് നേരിയ സംഘർഷത്തിനിടയായി. യൂത്ത് കോൺഗ്രസ് സംസ്ഥാന ജനറൽ സെക്രട്ടറി ലിന്‍റോ പി. ആന്‍റു പ്രതിഷേധം ഉദ്ഘാടനം ചെയ്തു. യൂത്ത് കോൺഗ്രസ് ആലുവ നിയോജക മണ്ഡലം പ്രസിഡന്‍റ് പി.എച്ച് അസ്ലം അധ്യക്ഷത വഹിച്ചു.

ലോകമാനസികാരോഗ്യ ദിനാചരണം നടത്തി

കൊച്ചി : എറണാകുളം സൈക്യാട്രിക് സൊസൈറ്റി (ഇപിഎസ്), ഇന്ത്യന്‍ സൈക്യാട്രിക് സൊസൈറ്റി (ഐപിഎസ്) കേരള ഘടകം, ഇന്ത്യന്‍ മെഡിക്കല്‍ അസോസിയേഷന്‍ (ഐഎംഎ) സംസ്ഥാന ശാഖ എന്നിവരുടെ സഹകരണത്തോടെ ലോകമാനസികാരോഗ്യ ദിനാചരണം നടത്തി. കലൂര്‍ ഐഎംഎ ഹൗസില്‍ നടന്ന ചടങ്ങ് കോട്ടയം മെഡിക്കല്‍ കോളജ് പ്രിന്‍സിപ്പൽ ഡോ. വര്‍ഗീസ് പി. പുന്നൂസ് ഉദ്ഘാടനം ചെയ്തു. ഡോ. അനൂപ് വിന്‍സെന്‍റ് അധ്യക്ഷത വഹിച്ചു. ഐഎംഎ സംസ്ഥാന പ്രസിഡന്‍റ് ഡോ. കെ.എ. ശ്രീവിലാസന്‍ മുഖ്യ പ്രഭാഷണം നടത്തി.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]