ഭാര്യയെയും ഭാര്യാമാതാവിനെയും യുവാവ് വെട്ടിക്കൊലപ്പെടുത്തി

തലയോലപ്പറമ്പ്: ഭാര്യയെയും ഭാര്യാമാതാവിനെയും യുവാവ് വെട്ടിക്കൊലപ്പെടുത്തി. സംഭവത്തിനുശേഷം യുവാവ് പോലീസിൽ കീഴടങ്ങി. മറവൻതുരുത്ത് ശിവപ്രസാദത്തിൽ ഗീത (60), ശിവപ്രിയ (35) എന്നിവരാണ് കൊല്ലപ്പെട്ടത്.

ഇന്നലെ വൈകുന്നേരം ആറോടെ മറവന്‍തുരുത്ത് വാളോര്‍മംഗലത്താണ് നാടിനെ നടുക്കിയ കൊലപാതകം നടന്നത്. കൊലയ്ക്ക് ശേഷം നാലു വയസുള്ള മകൾക്കൊപ്പം മരുമകന്‍ നിധീഷ് (39) നേരേകടവിലെ ബന്ധു വീട്ടിലെത്തിയപ്പോൾ വസ്ത്രത്തിൽ ചോര പുരണ്ടിരിക്കുന്നതു കണ്ട് ബന്ധുക്കൾ ചോദിച്ചപ്പോഴാണ് ഇയാൾ കൊലപാതകത്തെക്കുറിച്ച് പറഞ്ഞത്. പിന്നീട് ബന്ധുക്കൾ പോലീസിൽ വിവരമറിയിച്ചതിനെ ത്തുടർന്ന് ഇയാൾ പോലീസിൽ കീഴടങ്ങി.

കൈക്ക് പരിക്കേറ്റ നിധീഷിനെ പോലീസ് കോട്ടയം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ശിവപ്രിയയെ കട്ടിലിലും ഗീതയെ നിലത്തുമാണ് കൊല്ലപ്പെട്ട നിലയില്‍ കണ്ടത്.
കുറച്ചുനാളുകളായി കുടുംബവുമായി അകന്നുകഴിയുന്ന നിധീഷ് ഉദയനാപുരം നേരേകടവ് ഭാഗത്ത് ഒറ്റയ്ക്കു താമസിക്കുകയായിരുന്നു.

ഇവിടെനിന്നെത്തിയാണ് കൃത്യം നിര്‍വഹിച്ചത്. ഭാര്യക്കൊപ്പമുണ്ടായിരുന്ന നാല് വയസുള്ള പെൺകുഞ്ഞിനെ ഇയാള്‍ എടുത്തുകൊണ്ട് പോയി. കനത്ത മഴയായിരുന്നതിനാല്‍ സമീപവാസികള്‍ ആരുംതന്നെ സംഭവം അറിഞ്ഞില്ല. നേരേകടവിലെ വീട്ടിൽ പപ്പടം നിർമിച്ചു വിൽപ്പന നടത്തിവരികയായിരുന്നു നിധീഷ്. ഒന്നര വര്‍ഷം മുമ്പ് ഗള്‍ഫില്‍നിന്ന് അവധിക്കെത്തിയ ഗീതയുടെ മകന്‍ തുറുവേലിക്കുന്നിലുണ്ടായ ബൈക്ക് അപകടത്തില്‍ മരണപ്പെട്ടിരുന്നു.
പിന്നീട് ഗീതയ്‌ക്കൊപ്പമായിരുന്നു മകളും മരുമകനും താമസിച്ചിരുന്നത്.