ADVERTISEMENT

ADVERTISEMENT

കെ. ഷിബുരാജന്‍ ആശാവര്‍ക്കേഴ്‌സ് കോണ്‍. സംസ്ഥാന വൈസ് പ്രസിഡന്‍റ്

ചെങ്ങന്നൂർ: ചെങ്ങന്നൂർ നഗരസഭാ വൈസ് ചെയർമാനും ഐഎൻടിയുസി ജില്ല സെക്രട്ടറിയുമായ കെ. ഷിബുരാജനെ ആശാ വർക്കേഴ്സ് കോൺഗ്രസ് സംസ്ഥാന വൈസ് പ്രസിഡന്‍റായി സംസ്ഥാന പ്രസിഡന്‍റ് ആർ. ചന്ദ്രശേഖരൻ നോമിനേറ്റ് ചെയ്തു.

നാലു തവണ ചെങ്ങന്നൂർ കൗൺസിലർ, മുൻ നഗരസഭാ ചെയർമാൻ, നില വിൽ യുഡിഎഫ് പാർലമെന്‍ററി പാർട്ടിലീഡർ എന്നീ നിലകളിൽ പ്രവർത്തിക്കുന്ന ഇദ്ദേഹം വിദ്യാർഥി രാഷ്ട്രീയത്തിലൂടെ വളർന്നുവന്ന വ്യക്തിയാണ്. വിവിധ തൊഴിലാളിസംഘ ടനകളിലും സാംസ്കാരിക രംഗത്തും സജീവമായ ഇദ്ദേഹം കഴിഞ്ഞ 19 വർഷ മായി ആലപ്പുഴ ഡിസിസി അംഗമാണ്. മാധ്യമ പ്രവർത്തകരുടെ സംഘടനയായ ചെങ്ങന്നൂർ മീഡിയ സെന്‍ററിന്‍റെ പ്രസിഡന്‍റുമാണ് കെ. ഷിബുരാജൻ.

ADVERTISEMENT

ചെറിയനാട് റെയിൽവേ അടിപ്പാതയിലെ ദുരിതത്തിന് അറുതിയില്ല; യാത്രക്കാർ വലയുന്നു

ചെങ്ങന്നൂര്‍: മാവേലിക്കര-കോഴഞ്ചേരി റോഡിലെ ചെറിയനാട് റെയില്‍വേ അടിപ്പാതയിലെ വെള്ളക്കെട്ട് യാത്രക്കാരുടെ പേടിസ്വപ്നമായി തുടരുകയാണ്. ലക്ഷങ്ങള്‍ മുടക്കി പഞ്ചായത്ത് ഓട നിര്‍മിച്ചിട്ടും ഈ ദുരിതത്തിന് ഒരു ശാശ്വത പരിഹാരം കാണാന്‍ അധികൃതര്‍ക്ക് കഴിഞ്ഞിട്ടില്ല എന്നതു വ്യാപകമായ പ്രതിഷേധത്തിനു കാരണമാകുന്നു. ചെറിയ മഴയില്‍പോലും അടിപ്പാതയില്‍ വെള്ളം നിറയുന്നതു പതിവായതോടെയാണ് ചെറിയനാട് പഞ്ചായത്ത് എട്ടു ലക്ഷം രൂപ ചെലവഴിച്ച് ഓട നിര്‍മിച്ചത്. നിര്‍ഭാഗ്യവശാല്‍ ഈ ഓടയിലേക്കു വെള്ളം ഒഴുകിയെത്താനുള്ള ഒരു സംവിധാനംപോലും അധികൃതര്‍ ഒരുക്കിയിട്ടില്ല. ഇതോടെ ഈ ശ്രമം വിഫലമായി. അടിപ്പാതയുടെ വശങ്ങള്‍ ചെരിച്ച് കോണ്‍ക്രീറ്റ് ചെയ്ത് വെള്ളം ഓടയിലേക്ക് എത്തിച്ചാല്‍ ഈ വെള്ളക്കെട്ട് ഒഴിവാക്കാന്‍ സാധിക്കുമെന്നാണ് വിദഗ്ധാഭിപ്രായം. എന്നാല്‍, അറ്റകുറ്റപ്പണികള്‍ നടത്താന്‍ റെയില്‍വേ തയാറാകുന്നില്ലെന്ന് പഞ്ചായത്ത് അധികൃതര്‍ കുറ്റപ്പെടുത്തുന്നു. വെള്ളം കെട്ടിനിന്നിരുന്നതിനാല്‍ രൂപപ്പെട്ട വലിയ കുഴികളും അടിപ്പാതയില്‍ നിറയെയാണ്. വലിയ കുഴികളും വെള്ളക്കെട്ടും ഒഴിവാക്കാന്‍ ചെങ്ങന്നൂര്‍ ഭാഗത്തുനിന്നു വരുന്ന വാഹനങ്ങള്‍ വലതുവശം ചേര്‍ന്നുപോകുന്നത് അപകടസാധ്യത വര്‍ധിപ്പിക്കുന്നു. അഞ്ചുവര്‍ഷം മുന്‍പ് എം.കെ. റോഡ് നവീകരിച്ചതിനു ശേഷമാണ് പാലത്തിന്‍റെ ഇരുവശവും ഉയര്‍ന്നത്. ഇതാണ് ഇരുവശങ്ങളില്‍ നിന്നുമുള്ള വെള്ളം പാലത്തിന്‍റെ അടിയിലേക്ക് ഒഴുകിയെത്തുന്നതിനും വെള്ളക്കെട്ട് രൂപപ്പെടുന്നതിനും പ്രധാന കാരണം. ഇതു കണ്ടെത്തി ഏകദേശം പതിനഞ്ചു മാസങ്ങള്‍ക്കു മുന്‍പ് ഈ ഭാഗം ലെവല്‍ ചെയ്ത് ടാര്‍ ചെയ്തിരുന്നു. ചെറിയ മഴയില്‍പോലും ഇവിടെ വെള്ളം കെട്ടിനില്‍ക്കുകയും അടിപ്പാതയില്‍ വലിയ കുഴികള്‍ രൂപപ്പെടുകയും ചെയ്യുന്നു. ഈ കുഴികളില്‍ വീണ് ഇരുചക്ര വാഹന യാത്രക്കാര്‍ ഉള്‍പ്പെടെ നിരവധി പേര്‍ക്ക് അപകടങ്ങള്‍ സംഭവിച്ചിട്ടുണ്ട്. അടിപ്പാതയില്‍ എത്തുന്ന വെള്ളം ഒഴുകിപ്പോകാന്‍ ശരിയായ ഒരു സംവിധാനം ഇല്ലാത്തതാണ് ഇവിടത്തെ പ്രധാന പ്രശ്‌നം. ചെളിവെള്ളം തെറിച്ച് ഇരുചക്രവാഹന യാത്രക്കാരുടെയും കാല്‍നടയാത്രക്കാരുടെയും ദേഹത്തു വീഴുന്നത് ഇവിടെ പതിവു കാഴ്ചയാണ്. ഇതു പലപ്പോഴും തര്‍ക്കങ്ങള്‍ക്കും വഴിവയ്ക്കാറുണ്ട്. ഇരുഭാഗത്തുനിന്നും വളഞ്ഞു വരുന്ന വാഹനങ്ങള്‍ പെട്ടെന്നാണ് വെള്ളക്കെട്ട് കാണുന്നത്. റോഡ് പരിചയമില്ലാത്ത ഡ്രൈവര്‍മാര്‍ പെട്ടെന്ന് ബ്രേക്ക് ചെയ്യുമ്പോള്‍ പിന്നാല വരുന്ന വാഹനങ്ങള്‍ ഇടിച്ചുണ്ടാകുന്ന അപകടങ്ങളും ഇവിടെ വര്‍ധിച്ചു വരുന്നു. മാവേലിക്കര-കോഴഞ്ചേരി റോഡിലെ ചെങ്ങന്നൂര്‍, തഴക്കര എന്നീ റെയില്‍വേ അടിപ്പാതകളിലെ വെള്ളക്കെട്ടിന് പരിഹാരം കണ്ടിട്ടും ചെറിയനാട്ടെ വെള്ളക്കെട്ടിന് പരിഹാരം കാണാത്തത് പ്രതിഷേധാര്‍ഹമാണെന്ന് നാട്ടുകാര്‍ പറയുന്നു. അധ്യയന വര്‍ഷം ആരംഭിക്കുമ്പോള്‍ ശ്രീവിജേശ്വരി ഹൈസ്‌കൂള്‍, ദേവസ്വം ബോര്‍ഡ് ഹയര്‍ സെക്കന്‍ഡറി സ്‌കൂള്‍, സെന്‍റ് ജോസഫ് ഇംഗ്ലീഷ് മീഡിയം സ്‌കൂള്‍, ആല ഗവ. ഹയര്‍സെക്കന്‍ഡറി സ്‌കൂള്‍, ചെറിയനാട് എസ്എന്‍ ട്രസ്റ്റ് ഹയര്‍ സെക്കന്‍ഡറി സ്‌കൂള്‍ എന്നിവിടങ്ങളിലെ കുട്ടികള്‍ സൈക്കിളിലും കാല്‍നടയായിട്ടും പോകുന്ന ഈ വഴിയിലെ ദുരിതം എത്രയും പെട്ടെന്നു പരിഹരിച്ചില്ലെങ്കില്‍ വന്‍അപകടങ്ങള്‍ സംഭവിക്കാന്‍ സാധ്യതയുണ്ട്. എംകെ റോഡിന്‍റെ പരിപാലന ചുമതല പിഡബ്ല്യുഡി നേരിട്ടല്ല നിര്‍വഹിക്കുന്നത്. പിഡബ്ല്യുഡി മെയിന്‍റനൻ‍സ് വിഭാഗത്തിനാണ് ഇതിന്‍റെ ചുമതല. റെയില്‍വേയും ഈ വിഭാഗവും ഒരുമിച്ച് ചേര്‍ന്ന് ഈ ഗുരുതരമായ പ്രശ്‌നത്തിന് എത്രയും പെട്ടെന്നു ശാശ്വത പരിഹാരം കാണണമെന്നാണ് യാത്രക്കാരുടെയും നാട്ടുകാരുടെയും ആവശ്യം. നേതാക്കൾ പ്രതികരിക്കുന്നു മാവേലിക്കര കോഴഞ്ചേരി റോഡില്‍ ചെറിയനാട് റെയില്‍വേ അടിപ്പാതയില്‍ വെള്ളം കെട്ടിക്കിടക്കുന്നതു മൂലം ഉണ്ടാകുന്ന യാത്രാദുരിതം അടിയന്തരമായി ഇടപെട്ട് പരിഹരിക്കണമെന്നു ചൂണ്ടിക്കാട്ടി ഡിവിഷണല്‍ മാനേജര്‍ ഡോ. മനീഷ് തപ്ലയാലിന് കത്തു നല്‍കിയിട്ടുണ്ട്. തദ്ദേശ സ്ഥാപനങ്ങളും പൊതുജനങ്ങളും പലതവണ നിവേദനം നല്‍കിയിട്ടും പ്രശ്നം പരിഹരിക്കപ്പെടാതെ കടുത്ത അസൗകര്യം സൃഷ്ടിക്കുകയും ഗുരുതരമായ സുരക്ഷാപ്രശ്നങ്ങള്‍ ഉയര്‍ത്തുകയും ചെയ്യുന്നു. റെയില്‍വേ അടിപ്പാതയ്ക്കു കീഴിലുള്ള സ്‌ട്രെച്ച് റെയില്‍വേയുടെ പരിധിയില്‍ വരുന്നതിനാല്‍ റെയില്‍വേ അടിയന്തരമായി ഇടപെട്ട് വിഷയത്തില്‍ പരിഹാരം ഉണ്ടാക്കേണ്ടതാണ്. റെയില്‍വേക്ക് ജോലി ഏറ്റെടുക്കാന്‍ കഴിയാത്ത പക്ഷം, നിരക്ഷേപപത്രം നല്‍കിയാല്‍ ഉടന്‍തന്നെ ജോലി ഏറ്റെടുത്ത് നടപ്പിലാക്കാന്‍ സംസ്ഥാന പൊതുമരാമത്ത് വകുപ്പ് തയാറാണ്. വകുപ്പ് റോഡ് മെയിന്‍റനന്‍സ് ഡിവിഷന്‍ എക്സിക്യൂട്ടീവ് എന്‍ജിനിയര്‍ ഇക്കാര്യം സൂചിപ്പിച്ച് റെയില്‍വേക്കു കത്ത് അയച്ചിട്ടുണ്ടെന്നും മന്ത്രി പറഞ്ഞു. സജി ചറിയാന്‍ (ചെങ്ങന്നൂര്‍ എംഎല്‍എ, സാംസ്‌കാരിക വകുപ്പ് മന്ത്രി) മാവേലിക്കര കോഴഞ്ചേരി റോഡില്‍ ചെറിയനാട് ജംഗ്ഷനു വടക്കുഭാഗത്തുള്ള റെയില്‍വേ അടിപ്പാതയില്‍ വെള്ളം കെട്ടിനില്‍ക്കുന്നത് പ്രതിഷേധാര്‍ഹമാണ്. പഞ്ചായത്ത് എട്ടു ലക്ഷം രൂപ മുടക്കി ഓട നിര്‍മിച്ചിട്ടും ഈ ദുരവസ്ഥയ്ക്കു പരിഹാരം കാണാത്തത് റെയില്‍വേ അധികൃതരുടെ കെടുകാര്യസ്ഥതയാണ് വ്യക്തമാക്കുന്നത്. റെയില്‍വേ അടിപ്പാതയിലെ മഴവെള്ളം ഓടയിലേക്ക് ഒഴുക്കാനുള്ള ശരിയായ സംവിധാനം ഇല്ലാത്തതാണ് ഇപ്പോഴും ഇവിടെ വെള്ളക്കെട്ട് രൂപപ്പെടാന്‍ കാരണം. ഇതു യാത്രക്കാര്‍ക്കും നാട്ടുകാര്‍ക്കും ഒരുപോലെ ദുരിതമുണ്ടാക്കുന്നു. ഈ വിഷയത്തില്‍ റെയില്‍വേ അധികൃതര്‍ അടിയന്തരമായി ഇടപെട്ട് ഓടയിലേക്കു വെള്ളം ഒഴുകുന്നതിനുള്ള സംവിധാനം ഏര്‍പ്പെടുത്തണം. അല്ലാത്തപക്ഷം, നാട്ടുകാരെ സംഘടിപ്പിച്ച് ശക്തമായ സമരപരിപാടികള്‍ നടത്തും. ഒ.ടി. ജയമോഹന്‍ (ചെറിയനാട് പഞ്ചായത്ത് നാലാം വാർഡ് മെംബര്‍)

കൂട്ടുംവാതുക്കൽക്കടവ് പാലം കാമറ നിരീക്ഷണത്തിൽ

കായംകുളം: വർണവെളിച്ചത്തിന്‍റെ പ്രഭയിൽ വിസ്മയം തീർക്കുന്ന കൂട്ടുംവാതുക്കൽക്കടവ് പാലത്തിൽ നിരീക്ഷണ കാമറകൾ സ്ഥാപിച്ചു. യു. പ്രതിഭ എംഎൽഎയുടെ പ്രത്യേക വികസനനിധിയിൽനിന്ന് അഞ്ചു ലക്ഷം രൂപ വിനിയോഗിച്ച് ഏഴു നിരീക്ഷണ കാമറകളാണ് പാലത്തിൽ സ്ഥാപിച്ചത്. 40 കോടി രൂപ വിനിയോഗിച്ച് കണ്ടല്ലൂർ പഞ്ചായത്തിനെയും ദേവികുളങ്ങര പഞ്ചായത്തിനെയും തമ്മിൽ ബന്ധിപ്പിക്കുന്ന കൂട്ടംവാതുക്കൽക്കടവ് പാലം വർണപ്പൊലിമയിൽ സഞ്ചാരികളുടെ ഇഷ്ടകേന്ദ്രമായി ഇപ്പോൾ മാറിയിരിക്കുകയാണ് . 75.50 ലക്ഷം രൂപ വിനിയോഗിച്ച് കേരളത്തിൽ ആദ്യമായി നിറം മാറ്റാൻ കഴിയുന്ന സംവിധാനമുള്ള ഫസാർഡ് ലൈറ്റാണ് കൂട്ടുംവാതുക്കൽക്കടവ് പാലത്തിന്‍റെ പ്രധാന ആകർഷണം. ഏകദേശം അഞ്ചുലക്ഷത്തോളം കളറുകൾ മാറ്റിമറിച്ച് പ്രകാശം പരത്താൻ ഈ സംവിധാനത്തിന് കഴിയും. 325 മീറ്റർ നീളമുള്ള പാലത്തിൽ 25 സോളാർ സ്ട്രീറ്റ് ലൈറ്റുകളും പാലത്തിന്‍റെ ഇരുവശങ്ങളിലുമായി സോളാർ മിനി മാസ്റ്റ് ലൈറ്റുകളും സ്ഥാപിച്ചിട്ടുണ്ട്. കഴിഞ്ഞ എൽഡിഎഫ് സർക്കാരിന്‍റെ കാലത്താണ് പാലം നിർമാണം പൂർത്തിയാക്കി നാടിന് സമർപ്പിച്ചത്. അഞ്ചു കമാനങ്ങളിലായി ബഹുവർണ കോമ്പിനേഷനിൽ ലഭ്യമാക്കുന്ന പാലത്തിലെ ദീപവിസ്മയം ആസ്വദിക്കാൻ വൈകുന്നേരങ്ങളിൽ അനേകം പേരാണ് ഇവിടേക്ക് ‌എത്തുന്നത്.

ഹൈബ്രിഡ് കഞ്ചാവ് കേസ്: കുറ്റപത്രം ഒരുമാസത്തിനുള്ളിലെന്ന് അന്വേഷണസംഘം

ആലപ്പുഴ: രണ്ടു കോടി വിലമതിക്കുന്ന മൂന്നു കിലോ ഹൈബ്രിഡ് കഞ്ചാവുകേസുമായി ബന്ധപ്പെട്ട കുറ്റപത്രം ഒരുമാസത്തിനുള്ളില്‍ കോടതിയില്‍ സമര്‍പ്പിക്കാന്‍ എക്‌സൈസ് അന്വേഷണസംഘം. പ്രതികളായ തസ്‌ലീമ സുല്‍ത്താന (ക്രിസ്റ്റീന -41), ഇവരുടെ ഭര്‍ത്താവും മുഖ്യസൂത്രധാരനുമായ സുല്‍ത്താന്‍ അക്ബര്‍ അലി (43), കൂട്ടാളി കെ. ഫിറോസ് (26) എന്നിവരുടെ ചോദ്യം ചെയ്യലില്‍നിന്ന് പ്രാഥമിക തെളിവുകളും വിവരങ്ങളും ലഭിച്ചു. എന്നാല്‍, ഇതിനു ബലമേകുന്ന ശാസ്ത്രീയ തെളിവുകള്‍ കൂടി സമാഹരിച്ച് കുറ്റപത്രം നല്‍കാനാണ് നീക്കം. പ്രതികളുടെ മൊബൈല്‍ ഫോണുകള്‍, അതിലെ രേഖകള്‍, ബാങ്ക് ഇടപാടുകള്‍ അടക്കമുള്ള വിവരങ്ങള്‍ ശാസ്ത്രീയമായി പരിശോധിക്കാന്‍ അയച്ചിട്ടുണ്ട്. ഇതു റിപ്പോര്‍ട്ടായി ലഭിക്കുമ്പോള്‍ കൃത്യതയോടെയും കുറ്റമറ്റതായും കോടതിയില്‍ സമര്‍പ്പിക്കാനാകും. ഇതിനായി വിവിധ പരിശോധനകളുടെ ശാസ്ത്രീയ പരിശോധനാ റിപ്പോര്‍ട്ട് വേഗത്തിലാക്കും. നടന്‍മാരായ ഷൈന്‍ ടോം ചാക്കോ, ശ്രീനാഥ് ഭാസി, കൊച്ചിയിലെ മോഡല്‍ എന്നിവരോട് തിങ്കളാഴ്ച ആലപ്പുഴ എക്‌സൈസ് ഡി.സി ഓഫിസില്‍ ഹാജരാകാന്‍ നോട്ടീസ് നല്‍കിയിട്ടുണ്ട്. ഇതുമായി ബന്ധമുള്ള റിയാലിറ്റി ഷോ താരവും സിനിമയിലെ അണിയറ പ്രവര്‍ത്തകനും ചൊവ്വാഴ്ച എത്തുമെന്നാണ് അന്വേഷണസംഘം നല്‍കുന്ന വിവരം. ഇതോടെ, കേസുമായി ബന്ധപ്പെട്ട് അഞ്ചു പ്രമുഖരെ ചോദ്യംചെയ്യും. ഇതിനു മുന്നോടിയായി കേസുമായി ബന്ധപ്പെട്ട് ഒട്ടേറെയാളുകളെ കസ്റ്റഡിയിലെടുത്ത് ചോദ്യംചെയ്ത് വിട്ടയച്ചു. വെള്ളിയാഴ്ചയും ലഹരി ഇടപാടുമായി ബന്ധപ്പെട്ട ചിലരെ വിളിപ്പിച്ചിരുന്നു. തസ്‌ലീമ പല പെണ്‍കുട്ടികളെയും പ്രമുഖര്‍ക്കായി എത്തിച്ചതായിട്ടാണ് വിവരം. ഇതിനൊപ്പം കഞ്ചാവ് ഇടപാടുകളും നടന്നതായിട്ടാണ് അന്വേഷണസംഘത്തിന്‍റെ കണ്ടെത്തല്‍.

പരുമലയിലും കാട്ടുപന്നി; പ്രദേശവാസികൾ ആശങ്കയിൽ

മാന്നാർ: മലയോര മേഖലകളിലെ കാട്ടുപന്നി ശല്യം കേട്ടറിവാണങ്കിൽ വനമേഖലയല്ലാത്തയിടങ്ങളിലും കാട്ടുപന്നിശല്യം രൂക്ഷമായിരിക്കുകയാണ്. പരുമലയുടെ പല ഭാഗങ്ങളിലും കാട്ടുപന്നി ശല്യം പതിവാണ്.പരുമലയിൽ തെരുവുനായ ശല്യം മൂലം പൊറുതിമുട്ടിയിരിക്കുമ്പോഴാണ് ഇപ്പോൾ കാട്ടുപന്നി ഭീഷണി ഉണ്ടായിരിക്കുന്നത്. പരുമല തിക്കപ്പുഴ ഭാഗത്താണ് കഴിഞ്ഞ ദിവസം വലിയ കാട്ടുപന്നിയെ കണ്ടത്. തിക്കപ്പുഴ എള്ളിട്ടക്കാട്ടിൽ വിനോദിന്‍റെ വീട്ടുമുറ്റത്താണ് കഴിഞ്ഞ ദിവസം പുലർച്ചെ കാട്ടുപന്നിയെ കണ്ടത്. പ്രഭാത സവാരിക്കായി ഇറങ്ങിയപ്പോൾ അസാധാരണമായി നായകൾ കുരയ്ക്കുന്നത് ശ്രദ്ധിച്ചപ്പോഴാണ് വീടിന്‍റെ മുറ്റത്ത് കാട്ടുപന്നി നിൽക്കുന്നതായി കണ്ടതെന്ന് വിനോദ് പറഞ്ഞു. ലൈറ്റിട്ട് വിനോദ് പുറത്തേക്കിറങ്ങിയപ്പോൾ കാട്ടുപന്നി തൊട്ടടുത്ത റബർത്തോട്ടത്തിലേക്ക് ഓടിമറഞ്ഞു. പിന്നീട് പ്രഭാത സവാരിക്കിറങ്ങിയ പലരും കാട്ടുപന്നിയെ കണ്ടതായി പറഞ്ഞു. പരുമലയിൽ കാട്ടുപന്നിയെ കണ്ടതോടെ പ്രദേശവാസികൾ ആശങ്കയിലാണ് .

പെൺകുട്ടികളുടെ നഗ്നഫോട്ടോകളും വിഡിയോകളും ഫോണിൽ: യുവാവ് പിടിയിൽ

ഹരിപ്പാട്: വിവിധ സമൂഹമാധ്യമങ്ങളിൽ വ്യാജ പ്രൊഫൈൽ നിർമിച്ച് പ്രായപൂർത്തിയാകാത്ത പെൺകുട്ടികളുടെ ഉൾപ്പെടെ ചിത്രങ്ങൾ മോർഫ് ചെയ്ത് പ്രചരിപ്പിക്കുന്ന സംഘത്തിലെ ഒരാളെ പോലീസ് അറസ്റ്റ് ചെയ്തു. വൈക്കം ടിവി പുരം ചെമ്മനത്തുകര നെടിയത്ത് വീട്ടിൽ എൻ.എ. അരുണാണ് (35) അറസ്റ്റിലായത്. ഹരിപ്പാട് സ്വദേശികളായ എട്ടുപേർ നൽകിയ പരാതിയിലാണ് അറസ്റ്റ്. ഫേസ് ബുക്ക് അക്കൗണ്ടിൽനിന്ന് ഫോട്ടോകൾ എടുത്ത് മോർഫ് ചെയ്ത് നഗ്നഫോട്ടോയാക്കി സോഷ്യൽ മീഡിയ വഴി പ്രചരിപ്പിക്കുന്നു എന്നാണ് പരാതി. പ്രായപൂർത്തിയാകാത്ത പെൺകുട്ടികളുടെയും വീട്ടമ്മമാരുടെയും ഫോട്ടോയാണ് മോർഫ് ചെയ്ത് പ്രചരിപ്പിച്ചത്. പോലീസ് സൈബർ സെല്ലിന്‍റെ സഹായത്തോടെ നടത്തിയ പരിശോധനയിൽ, ഇത്തരം ചിത്രങ്ങൾ പ്രചരിപ്പിച്ച വ്യാജ ഫേസ് ബുക്ക് അക്കൗണ്ടുകൾ ഉപയോഗിക്കുന്നത് അരുൺ ആണെന്ന് കണ്ടെത്തി. 2020 മുതൽ ഇയാൾ മോർഫ് ചെയ്ത നഗ്നഫോട്ടോകൾ പ്രചരിപ്പിച്ചിരുന്നതായി പോലീസ് കണ്ടെത്തിയിട്ടുണ്ട്. ഇയാളുടെ മൊബൈൽ ഫോണിൽ ആയിരത്തിലധികം പെൺകുട്ടികളുടെ മോർഫ് ചെയ്ത നഗ്ന ഫോട്ടോകളും വീഡിയോകളും ഉണ്ടെന്ന് പോലീസ് പറഞ്ഞു.

112ൽ പോലീസിനെ വിളിച്ച് വട്ടംചുറ്റിച്ച യുവാവ് അറസ്റ്റിൽ

ആലപ്പുഴ: എമർജൻസി കോൾ നമ്പറായ 112ൽ പോലീസിനെ വിളിച്ച് വട്ടംചുറ്റിച്ച യുവാവ് അറസ്റ്റിൽ. അമ്പലപ്പുഴ കരുമാടി പുത്തൻചിറയിൽ ധനീഷാണ് (33) അറസ്റ്റിലായത്. കഴിഞ്ഞ ദിവസം രാത്രി 12നാണ് പോലീസ് സഹായം തേടി ഫോൺ ചെയ്തത്. ഓച്ചിറയിലെ സൂപ്പർ മാർക്കറ്റിന് എതിർവശത്തെ ലോഡ്ജിൽ തന്നെ പൂട്ടിയിട്ടിരിക്കുന്നതായാണ് 112ൽ വിളിച്ചറിയിച്ചത്. ഈ വിവരം അവർ കായംകുളം സിആർവിക്ക് കൈമാറുകയും നിമിഷ നേരത്തിനുള്ളിൽ വാഹനം അവിടെ എത്തിയപ്പോൾ ലോഡ്ജ് അകത്തുനിന്നു പൂട്ടിയ നിലയിലുമായിരുന്നു. ലോഡ്ജിന്‍റെ ചുമതലക്കാരനെ ബന്ധപ്പെടാൻ ശ്രമിച്ചെങ്കിലും നടന്നില്ല. ഉദ്യോഗസ്ഥർ ധനുഷിനെ വീണ്ടും ബന്ധപ്പെട്ടപ്പോൾ മുറിയിലുണ്ടെന്ന് അറിയിച്ചു. തുടർന്ന് അഗ്നിരക്ഷാ സംഘത്തിന്‍റെ സഹായത്തോടെ പൂട്ട് അറുത്തുമാറ്റി അകത്തുകടന്ന് പരിശോധിച്ചെങ്കിലും ആരെയും കണ്ടെത്താനായില്ല. വീണ്ടും 112 ഫോൺവിളി വന്നതിനെത്തുടർന്ന് അന്വേഷണം നടത്തിയ എസ്ഐ രതീഷ് ബാബുവിന്‍റെ നേതൃത്വത്തിലുള്ള സംഘം മറ്റൊരു ലോഡ്ജിൽനിന്ന് ധനീഷിനെ കസ്റ്റഡിയിൽ എടുക്കുകയായിരുന്നു.

മാർപാപ്പയ്ക്കുവേണ്ടി പ്രാര്‍ഥനയും അനുസ്മരണ സമ്മേളനവും

ആലപ്പുഴ: ആലപ്പുഴ രൂപതയുടെ നേതൃത്വത്തില്‍ ഫ്രാന്‍സിസ് മാര്‍പാപ്പയ്ക്കുവേണ്ടി വിശുദ്ധബലി അര്‍പ്പണവും അനുസ്മരണ സമ്മേളനവും 25ന് വൈകുന്നേരം 4.30ന് ആലപ്പുഴ മൗണ്ട് കാര്‍മല്‍ കത്തീഡ്രലില്‍ നടത്തി. വികാരി ജനറാൾ മോണ്‍. ജോയ് പുത്തന്‍വീട്ടില്‍ മുഖ്യകാര്‍മികനായും രൂപതയിലെ മുഴുവന്‍ വൈദികരും സഹകാര്‍മികരായും വിശുദ്ധബലി അര്‍പ്പിച്ചു. ഫാ. യേശുദാസ് കാട്ടൂങ്കല്‍തയ്യില്‍ വചനപ്രഘോഷണം നടത്തി. രൂപതയിലെ ഇടവകകളില്‍നിന്നുമുള്ള പ്രതിനിധികള്‍ വിശുദ്ധ ബലിയില്‍ പങ്കുചേർന്നു. തുടര്‍ന്ന് മാര്‍പാപ്പയുടെ ചിത്രത്തിനു മുന്നില്‍ വിവിധ മതനേതാക്കളും സംഘടനാ ഭാരവാഹികളും പുഷ്പാര്‍ച്ചന നടത്തി. അനുസ്മരണ സമ്മേളനത്തില്‍ കൃഷി മന്ത്രി പി. പ്രസാദ്, ചിത്തരഞ്ജന്‍ എംഎൽഎ, കളക്ടര്‍ അലക്‌സ് വര്‍ഗീസ്, ഫാ. ബിജു കെ. ജോര്‍ജ്, മദര്‍ സിസ്റ്റർ ലീല ജോസ്, മദര്‍ സിസ്റ്റർ മാര്‍ഗരറ്റ് പീറ്റര്‍, കെ.ജി. ജഗദീശന്‍, പി.ജെ.ജെ. ആന്‍റണി, അലിയാര്‍ എം. മാക്കിയില്‍ എന്നിവര്‍ അനുസ്മര പ്രസംഗങ്ങള്‍ നടത്തിയതായി പിആര്‍ഒ ഫാ. സേവ്യര്‍ കുടിയാംശേരി അറിയിച്ചു.

മാര്‍പാപ്പയുടെ സ്മരണാര്‍ഥം സമൂഹബലി

ആലപ്പുഴ: പൂങ്കാവ് പള്ളിയില്‍ ഫ്രാന്‍സിസ് മാര്‍പാപ്പയുടെ സ്മരണാര്‍ഥം സമൂഹബലി നടത്തി. വൈദികര്‍ കറുപ്പു തിരുവസ്ത്രങ്ങളും സന്യാസിനികളും വിശ്വാസികളും കറുപ്പു ബാഡ്ജും അണിഞ്ഞാണ് ചടങ്ങുകളില്‍ പങ്കെടുത്തത്. വിശുദ്ധ കുര്‍ബാനയ്ക്ക് പൂങ്കാവ് പള്ളി വികാരി ഫാ. സേവ്യര്‍ ചിറമേല്‍ മുഖ്യ കാര്‍മികത്വം വഹിച്ചു. ഫാ. സേവ്യര്‍ ജിബിന്‍ കരിമ്പുറത്ത്, ഫാ. ജോസഫ് ബെനസ്റ്റ് ചക്കാലയ്ക്കല്‍, ബ്രദര്‍ ജോസഫ് സിറാജ്, ബ്രദര്‍ വി.വി. അഗസ്റ്റിന്‍ (ഇടുക്കി തങ്കച്ചന്‍) എന്നിവര്‍ പങ്കെടുത്ത ചടങ്ങില്‍ അന്യദേശങ്ങളില്‍നിന്നെത്തിയ വിശ്വാസികള്‍ അനുശോചനം രേഖപ്പെടുത്തി. വിശുദ്ധ കുര്‍ബാനയ്ക്കു ശേഷം നടന്ന മൗന ജാഥയിലും നിരവധിയാളുകള്‍ പങ്കെടുത്തു.

ഓട നിര്‍മാണം ഇഴയുന്നു; വേനല്‍മഴയില്‍ മുങ്ങി അരൂര്‍ ക്ഷേത്രം കവല

തുറവൂര്‍: അരൂര്‍-തുറവൂര്‍ ദേശീയപാതയില്‍ ഓടകളുടെ നിര്‍മാണം ഇഴയുന്നു. ഇതിനെത്തുടര്‍ന്നു കഴിഞ്ഞ ദിവസം പെയ്ത മഴയില്‍ അരൂര്‍ ക്ഷേത്രം കവലയില്‍ വലിയ വെള്ളക്കെട്ടാണ് രൂപപ്പെട്ടത്. ഇനിയും മഴ തുടാനുള്ള സാധ്യത നിലനില്‍ക്കേ ഇവിടുത്തെ ജനജീവിതം ദുഃസഹമായി. കഴിഞ്ഞ ദിവസങ്ങളില്‍ ജനങ്ങള്‍ മുട്ടൊപ്പം വെള്ളത്തിലാണ് സഞ്ചരിച്ചത്. കഴിഞ്ഞ രണ്ടു ദിവസമായി പെയ്ത മഴയിലാണ് കനത്ത വെള്ളക്കെട്ട് രൂപപ്പെട്ടത്. ദേശീയപാതയില്‍ അരൂര്‍-തുറവൂര്‍ ഉയരപ്പാത പണി നടക്കുന്നയിടങ്ങളില്‍ വെള്ളക്കെട്ട് രൂക്ഷമായി. അരൂര്‍, ചന്തിരൂര്‍, കൊച്ചുവെളിക്കവല, എരമല്ലൂര്‍, കോടംതുരുത്ത് എന്നിവിടങ്ങളിലാണ് ദുരിതമേറെയും. വെള്ളക്കെട്ട് ഒഴിവാക്കാന്‍ അരൂര്‍ മുതല്‍ തുറവൂര്‍ വരെ ഓട നിര്‍മിക്കാന്‍ ഉയരപ്പാത നിര്‍മാണവുമായി ബന്ധപ്പെട്ടു പദ്ധതിയുണ്ട്. എന്നാല്‍ പഞ്ചായത്തുകളുടെ അലംഭാവം മൂലം ഓട നിര്‍മാണം എങ്ങുമെത്തിയിട്ടില്ല. അരൂര്‍ മുതല്‍ തുറവൂര്‍ വരെ 12.75 കിലോമീറ്റര്‍ പാതയില്‍ 6.5 കിലോമീറ്ററും അരൂര്‍ പഞ്ചായത്തിന്‍റെ പരിധിയിലൂടെയാണ് കടന്നുപോകുന്നത്. എന്നിട്ടും പഞ്ചായത്ത് അധികൃതര്‍ വെള്ളക്കെട്ട് കണ്ടില്ലെന്നു നടിക്കുകയാണെന്നു ജനങ്ങള്‍ കുറ്റപ്പെടുത്തി.

പ്ലാസ്റ്റിക് മാലിന്യങ്ങള്‍ കൂട്ടിയിട്ട് കത്തിച്ചു; മൂന്നു സ്ഥാപനങ്ങള്‍ക്ക് പിഴ ചുമത്തി

കൊല്ലക്കടവ് : തദ്ദേശ സ്വയംഭരണ വകുപ്പ് ജില്ല എന്‍ഫോഴ്‌സ്മെന്‍റ് സ്‌ക്വാഡ് ചെറിയനാട് പഞ്ചായത്ത് പരിധിയില്‍ നടത്തിയ പരിശോധനയില്‍ നിയമ ലംഘനങ്ങള്‍ കണ്ടെത്തിയതിനെ തുടര്‍ന്ന് മൂന്ന് സ്ഥാപനങ്ങള്‍ക്ക് പിഴ ചുമത്തി. പ്ലാസ്റ്റിക് മാലിന്യങ്ങള്‍ കൂട്ടിയിട്ട് കത്തിച്ചു, അജൈവമാലിന്യങ്ങള്‍ അലക്ഷ്യമായി വലിച്ചെറിഞ്ഞു, മാലിന്യങ്ങള്‍ ശരിയായ രീതിയില്‍ സംസ്‌കരിച്ചില്ല തുടങ്ങിയ നിയമ ലംഘനങ്ങളാണ് എന്‍ഫോഴ്‌സ്മെന്‍റ് സ്‌ക്വാഡ് പരിശോധനയില്‍ കണ്ടെത്തിയത്. സ്ഥാപനങ്ങളിൽ നിന്ന് 15000 രൂപ പിഴ ഈടാക്കാനാണ് സ്‌ക്വാഡ് ശിപാര്‍ശ ചെയ്തത്. 15 സ്ഥാപനങ്ങളില്‍ നടത്തിയ പരിശോധനയില്‍ 31 കിലോ ഒറ്റത്തവണ ഉപയോഗ പ്ലാസ്റ്റിക് ഉത്പന്നങ്ങളും പിടികൂടി. ഏഴ് സ്ഥാപനങ്ങള്‍ക്ക് നോട്ടീസ് നല്‍കി. ജോയിന്റ് ബിഡിഒ ബിന്ദു വി നായര്‍, ശുചിത്വമിഷന്‍ റിസോഴ്സ് പേഴ്സണ്‍ എം.ബി. നിഷാദ്, പൊല്യൂഷന്‍ കണ്‍ട്രോള്‍ ബോര്‍ഡ് ഉദ്യോഗസ്ഥന്‍ ടി. യമുനേശന്‍, വില്ലേജ് എക്സ്റ്റന്‍ഷന്‍ ഓഫീസര്‍ പി.എസ്. സച്ചുമോന്‍ തുടങ്ങിയവര്‍ പരിശോധനയ്ക്ക് നേതൃത്വം നല്‍കി.

പ്രായപൂർത്തിയാകാത്ത പെൺകുട്ടിക്ക് പീഡനം: മാതാവും രണ്ടാനച്ഛനും അറസ്റ്റിൽ

മാന്നാർ: പ്രായപൂർത്തിയാകാത്ത പെൺകുട്ടിയെ പീഡിപ്പിച്ച സംഭവത്തിൽ രണ്ടാനച്ഛനും കുട്ടിയുടെ മാതാവും അറസ്റ്റിൽ. ചെന്നിത്തലയിൽ വാടകയ്ക്കു താമസിക്കുന്ന യുവതിയെയും രണ്ടാം ഭർത്താവിനെയുമാണ് അറസ്റ്റ് ചെയ്തത്. 2024 സെപ്റ്റംബറിലാണ് സംഭവം. പെൺകുട്ടി വീട്ടിൽ സിനിമ കണ്ടുകൊണ്ടിരുന്ന സമയത്താണ് രണ്ടാനച്ഛൻ കുട്ടിയെ പീഡിപ്പിച്ചത്. ഈ വിവരം മാതാവിനോടു കുട്ടി പറഞ്ഞെങ്കിലും യാതൊരുവിധമായ നടപടിയും മാതാവ് കൈക്കൊണ്ടിരുന്നില്ല. തുടർന്ന് രണ്ടാനച്ഛന്‍റെ ഭാഗത്തുനിന്നു കുട്ടിയെ മാനസികമായി തളർത്തുന്ന തരത്തിലുള്ള പെരുമാറ്റം തുടർന്നു വരികയായിരുന്നു. ഈ സംഭവവും കുട്ടി മാതാവിനോടു പറഞ്ഞെങ്കിലും കുട്ടിക്ക് അനുകൂലമായ നിലപാടൊന്നും ഉണ്ടായില്ല. ഈ മനോവിഷമത്തിൽ കുട്ടി നേരിട്ട് മാന്നാർ പോലീസ് സ്റ്റേഷനിൽ എത്തുകയും മുൻപു നടന്ന പീഡന വിവരം ഉൾപ്പടെ പറഞ്ഞു പരാതി നൽകുകയുമായിരുന്നു. തുടർന്ന് മാന്നാർ പോലീസ് ഇൻസ്പെക്ടർ രജീഷ് കുമാറിന്‍റെ നേതൃത്വത്തിൽ നടത്തിയ അന്വേഷണത്തിൽ എസ്ഐ ഗിരീഷ്കുമാർ, പ്രൊബേഷൻ എസ്ഐ ജോബിൻ, വനിതാ എഎസ്ഐ മാരായ സ്വർണരേഖ , രജിത , സിനിയർ സിപിഒ സുധീഷ്, സിപിഒ ഹരിപ്രസാദ് എന്നിവർ ചേർന്നാണ് പ്രതികളെ അറസ്റ്റ് ചെയ്തത്.

എഡിബിഎ: റോണി മാത്യു പ്രസിഡന്‍റ്, ജോണ്‍ ജോര്‍ജ് സെക്രട്ടറി

ആലപ്പുഴ: 2025-29-ലേക്കുള്ള ആലപ്പി ഡിസ്ട്രിക്ട് ബാസ്‌കറ്റ്ബോള്‍ അസോസിയേഷന്‍ (എഡിബിഎ) എക്‌സിക്യൂട്ടീവ് കമ്മിറ്റിയെ തെരെഞ്ഞെടുത്തു. ഭാരവാഹികളായി റോണിമാത്യു-പ്രസിഡന്‍റ്, അഡ്വ. പ്രിയദര്‍ശന്‍ തമ്പി, സെന്‍ കല്ലുപുര, ബിനു എം-വൈസ് പ്രസിഡന്‍റുമാർ, ജോണ്‍ ജോര്‍ജ്-സെക്രട്ടറി, ഹസീന അമന്‍-ജോയിന്‍റ് സെക്രട്ടറി, ജയിന്‍ ജോസ്-ട്രഷറര്‍, ബിബു പുന്നൂരാന്‍-കെബിഎ നോമിനി, ജോസ് സേവ്യര്‍- ഡിഎസ്‌സി നോമിനി, സി. ജയചന്ദ്രന്‍, എസ്. ഷഹബാസ്, ബി. സുഭാഷ്-എക്സിക്യൂട്ടീവ് കമ്മിറ്റി അംഗങ്ങള്‍. തോമസ് മത്തായി കരിക്കംപള്ളില്‍ നാമനിര്‍ദേശം നടത്തുകയും ബ്രിജിറ്റ് ജോസഫ് പിന്തുണയ്ക്കുകയും ചെയ്തു. അഡ്വ.പി.വി. തോമസ് റിട്ടേണിംഗ് ഓഫീസറായിരുന്നു. തെരെഞ്ഞെടുക്കപ്പെട്ട പ്രസിഡന്‍റ് സെക്രട്ടറിയും നേരത്തേ ആലപ്പുഴ വൈഎംസിഎ സെക്രട്ടറിമാരായി പ്രവര്‍ത്തിച്ചിട്ടുണ്ട്.

കൊല്ലം-തേനി ദേശീയപാത 183 വീതികൂട്ടൽ: അലൈൻമെന്‍റിൽ മാറ്റം വേണമെന്ന്

‌ചെങ്ങന്നൂർ: കൊല്ലം - തേനി ദേശീയപാത 183 വീതികൂട്ടുന്നതിന്‍റെ ഭാഗമായി ദേശീയപാത വികസന അഥോറിറ്റിയുടെ നിർദേശങ്ങൾ നടപ്പിലാക്കിയാൽ ചെങ്ങന്നൂർ മണ്ഡലത്തിൽ കൊല്ലകടവ് മുതൽ പ്രാവിൻകൂട് ജംഗ്ഷൻ വരെയുള്ള ഭാഗത്ത് ജനങ്ങൾക്കുണ്ടാകുന്ന ബുദ്ധിമുട്ടുകൾ പരിഹരിക്കാൻ അലൈൻമെന്‍റിൽ ആവശ്യമായ മാറ്റം വരുത്തണമെന്നു മന്ത്രി സജി ചെറിയാൻ നിർദേശിച്ചു. ദേശീയപാത വികസനവുമായി ബന്ധപ്പെട്ട് ചെങ്ങന്നൂർ മണ്ഡലത്തിലെ പ്രദേശവാസികളുടെ ആശങ്ക ചർച്ച ചെയ്യാനായി മന്ത്രി സജി ചെറിയാൻ പൊതുമരാമത്ത് വകുപ്പു മന്ത്രി പി.എ. മുഹമ്മദ് റിയാസുമായി കൂടിക്കാഴ്ച നടത്തി. പൊതുമരാമത്ത് വകുപ്പ് മന്ത്രിയുടെ ചേംബറിൽ ചേർന്ന യോഗത്തിൽ ദേശീയപാത അഥോറിറ്റിയും പൊതുമരാമത്ത് വകുപ്പ് ഉദ്യോഗസ്ഥരും പങ്കെടുത്തു. ചെങ്ങന്നൂര്‍ നഗരം ഒഴിവാക്കി പദ്ധതി നടപ്പാക്കാന്‍ ബദല്‍ നിര്‍ദേശങ്ങള്‍ പരിഗണിക്കണമെന്ന ആവശ്യം ശക്തമായി. ചെങ്ങന്നൂര്‍മുതല്‍ കോട്ടയംവരെ രണ്ടാം റീച്ചാണെങ്കിലും ഏറ്റവും ഒടുവിലായിരിക്കും പണിയുക. വ്യാപാരികളുടെയും തൊഴിലാളികളുടെയും ജീവിതമാര്‍ഗമടയുമെന്നതിനാല്‍ ബദല്‍ നിര്‍ദേശങ്ങള്‍ പരിഗണിക്കണമെന്നാണ് വ്യാപാരി സംഘടനകളും സിപിഎം, സിപിഐ സംഘടനകളും ആവശ്യപ്പെടുന്നത്. അതേസമയം ചെങ്ങന്നൂര്‍ നഗരത്തിലൂടെ വരുന്ന റോഡുവികസനത്തെക്കുറിച്ച് ദേശീയപാത വിഭാഗം ചര്‍ച്ച നടത്തിയില്ലെന്നാണ് വ്യാപാരി സംഘടനകളടക്കമുള്ളവര്‍ ഉന്നയിക്കുന്ന പ്രധാന വിമര്‍ശനം.

ബോധവത്കരണവും അനുമോദനവും

ഹരിപ്പാട്: ശ്രീനാരായണ ധർമപരിപാലനവേദി കാട്ടിൽ മാർക്കറ്റ് ആത്മവിദ്യാസംഘം ഗവ. എൽപി സ്കൂളിൽ ലഹരിവിരുദ്ധ ബോധവത്കരണ ക്ലാസും വിവിധ മേഖലകളിൽ മികവു തെളിയിച്ചവർക്ക് അനുമോദനവും സംഘടിപ്പിച്ചു. സീനിയർ സിവിൽ ജഡ്‌ജി പ്രമോദ് മുരളി ഉദ്ഘാടനം ചെയ്തു. കുമാരപുരം പഞ്ചായത്തംഗം വി. പ്രസന്ന അധ്യക്ഷയായി. കാർത്തികപള്ളി എക്സൈസ് ഇൻസ്പെക്ടർ വി. അരുൺ കുമാർ ക്ലാസെടുത്തു. ഹരിപ്പാട് സിപിഒ എ. നിഷാദ്, എംബിബിഎസ് വിജയി ഡോ. ഐശ്വര്യ എസ്. രാജേന്ദ്രൻ, എംബിബിഎസ് പ്രവേശനം ലഭിച്ച രോഹിത് പ്രമോദ്, വിവിധ പുരസ്കാരങ്ങൾ നേടിയ അമൃത വർഷിണി, വി. ശ്രേയസ്, ഗൗരിനന്ദ, എ.കെ. മധു തുടങ്ങിയവർ പ്രസംഗിച്ചു.

മേക്കാട് ക്ഷേത്രത്തിൽ കലശ മഹോൽസവം

മുഹമ്മ: മുഹമ്മ കാട്ടിപ്പറമ്പ് മേക്കാട് ഭദ്രകാളി-ഘണ്ഠാകർണ ക്ഷേത്രത്തിലെ കലശമഹോത്സവം തുടങ്ങി. 30ന് സമാപിക്കും. ദേവസ്വം പ്രസിഡന്‍റ് എൻ. കുഞ്ഞുമോൻ ഭദ്രദീപം തെളിച്ചു. ക്ഷേത്രം തന്ത്രി മാമണ്ണൂർ മനയിൽ സുരേഷ് നമ്പൂതിരിയുടെയും ക്ഷേത്രം മേൽശാന്തി ഹരീഷ് നമ്പൂതിരിയുടേയും മുഖ്യകാർമികത്വത്തിലാണ് ചടങ്ങുകൾ നടന്നത്. ദേവസ്വം പ്രസിഡന്‍റ് എൻ. കുഞ്ഞുമോൻ, സെക്രട്ടറി എസ്. സുജിത്, മാനേജൻ എൻ. രവീന്ദ്രൻ, ട്രഷറർ സുദർശന കുമാരി എന്നിവർ നേതൃത്വം നൽകി. തുടർന്ന് നാരായണീയം പാരായണം നടന്നു. 30 വരെ രാവിലെ ആറുമുതൽ ഭാഗവത പാരായണം. 30ന് കലശമഹോത്സവം, രാവിലെ എട്ടു മുതൽ കലശപൂജ, 11ന് കലശാഭിഷേകം, ഉച്ചയ്ക്ക് അന്നദാനം, വൈകിട്ട് 5.30 ന് നടതുറക്കൽ, 6.30ന് തിരുവാഭരണം ചാർത്തി ദീപാരാധന, രാത്രി ഏഴിന് മുഹമ്മ ശ്രീരഞ്ജിനി സ്കൂൾ ഓഫ് ഡാൻസ് അവതരിപ്പിക്കുന്ന നൃത്തസന്ധ്യ, എട്ടിന് അത്താഴപൂജ തുടർന്ന് വടക്കുപുറത്തു ഗുരുതി.

എവറസ്റ്റ് ബേസ് ക്യാമ്പ് കീഴടക്കിയ മോൻസി ജോണിനെ ആദരിച്ചു

മാങ്കാംകുഴി: ഹിമാലയവും എവറസ്റ്റ് ബേസ് ക്യാമ്പും കീഴടക്കി അഭിമാന നേട്ടം കൈവരിച്ച വ്യാപാരിയും പരിസ്ഥിതി സംരക്ഷണ പ്രവർത്തകനുമായ വെട്ടിയാർ ജെയ്മി ഭവനത്തിൽ മോൻസി ജോണിനെ കേരള വ്യാപാരി വ്യവസായി ഏകോപന സമിതി മാങ്കാംകുഴി യൂണിറ്റ് കമ്മിറ്റിയുടെ നേതൃത്വത്തിൽ അദ്ദേഹത്തിന്‍റെ വീട്ടിലെത്തി ആദരിച്ചു. അനുമോദന യോഗത്തിന്‍റെ ഉദ്‌ഘാടനവും മോൻസി ജോണിനുള്ള ഉപഹാര സമർപ്പണവും സംസ്ഥാന പ്രസിഡന്‍റ് രാജു അപ്സര നിർവഹിച്ചു.യൂണിറ്റ് പ്രസിഡന്‍റ്, ടി.എൻ. ദേവരാജ്‌കുമാർ അധ്യക്ഷത വഹിച്ചു. യൂണിറ്റ് ഭാരവാഹികളായ ശിവജി അറ്റ്‌ലസ്, നൗഷാദ് മാങ്കാംകുഴി, കെ.ആർ. പ്രഭാകരകുറുപ്പ്, രാജശേഖരൻപിള്ള, ടി. ഷാനുൽ, രാജഗോപാൽ, പി. അനീഷ്, മധുസൂദനൻ പിള്ള തുടങ്ങിയവർ പ്രസംഗിച്ചു.

മൂക്കുതുരുത്തി പാലം പുനർനിർമിക്കണം: ചമ്പക്കുളം വികസന സമിതി

മങ്കൊമ്പ്: ചമ്പക്കുളം പഞ്ചായത്ത്‌ പതിമൂന്നാം വാർഡിൽ കോയിക്കരിയിലുള്ള മൂക്കുതുരുത്തി പാലം പുനർനിർമിക്കണമെന്ന് ചമ്പക്കുളം വികസനസമിതി ആവശ്യപ്പെട്ടു. മാധവശേരി തോടിനു കുറുകെ മൂക്കുതുരുത്തി മോട്ടോർതറയ്ക്കു സമീപം വർഷങ്ങളായി നിലവിലുണ്ടായിരുന്ന പാലം പൊളിച്ചുനീക്കി പുതിയ പാലം നിർമിക്കുന്നതിന് നിരവധി വാർഷിക പദ്ധതികൾ കഴിഞ്ഞെങ്കിലും പാലം നിർമാണം ഇതുവരേയും ആരംഭിച്ചിട്ടില്ല. നിത്യേന നിരവധി ആളുകൾ യാത്ര ചെയ്തിരുന്നതും ഇരുചക്ര വാഹനങ്ങൾ ഉൾപ്പെടെ കടന്നു പൊയ്ക്കൊണ്ടിരുന്നതുമായ പാലം നിർമിക്കാത്തതുമൂലം പ്രദേശവാസികൾ അടയ്ക്കാമരവും മുളയുംകൊണ്ട് നിർമിച്ച പാലത്തിലൂടെയാണ് യാത്രചെയ്യുന്നത്. പാലം നിർമിക്കുന്നതിൽ കരാറുകരനും ബന്ധപ്പെട്ട അധികാരികളും കുറ്റകരമായ അനാസ്ഥ കാണിക്കുന്നതായി സമിതി ആരോപിച്ചു. പ്രഡിഡന്‍റ് ഡി. തങ്കച്ചന്‍റെ അധ്യക്ഷതയിൽ ചേർന്ന യോഗത്തിൽ അഗസ്റ്റിൻ ജോസ്, രാജു കോലപ്പള്ളി, ബി. ഹരികുമാർ, കെ.പി. ബാബു, എ.എസ്. സിന്ധുമോൾ എന്നിവർ പ്രസംഗിച്ചു.

എടത്വ പള്ളിയില്‍ വിശുദ്ധ ഗീവര്‍ഗീസ് സഹദായുടെ തിരുനാളിന് ഇന്നു കൊടിയേറും

എടത്വ: പ്രസിദ്ധ തീര്‍ഥാടനകേന്ദ്രമായ എടത്വ സെന്‍റ് ജോര്‍ജ് ഫൊറോന പള്ളിയില്‍ വിശുദ്ധ ഗീവര്‍ഗീസ് സഹദായുടെ തിരുനാളിന് ഇന്നു കൊടിയേറും. മേയ് 14ന് എട്ടാമിടത്തോടെ തിരുനാള്‍ സമാപിക്കും. പ്രധാന തിരുനാള്‍ മേയ് ഏഴിനാണ്. അന്ന് ഉച്ചകഴിഞ്ഞ് നാലിന് വിശുദ്ധന്‍റെ തിരുസ്വരൂപവും വഹിച്ചുള്ള ചരിത്രപ്രസിദ്ധമായ പ്രദക്ഷിണം പള്ളിക്കുചുറ്റും നടക്കും. എട്ടാമിടത്തിന് കുരിശടിയിലേക്കും പ്രദക്ഷിണമുണ്ടാകും. കേരളത്തിനു പുറമേ തമിഴ്‌നാട്, കര്‍ണാടകം, ആന്ധ്രാപ്രദേശ് തുടങ്ങിയ സംസ്ഥാനങ്ങളില്‍നിന്നുള്‍പ്പെടെയുള്ള ആയിരക്കണക്കിന് തീര്‍ഥാടകര്‍ തിരുനാളില്‍ പങ്കെടുക്കാനായി ഇന്നു മുതല്‍ എടത്വ പള്ളിയിലേക്ക് എത്തിച്ചേരും. മേയ് മൂന്നിനു രാവിലെ 5.45ന് ചങ്ങനാശേരി അതിരൂപത ആര്‍ച്ച്ബിഷപ് മാര്‍ തോമസ് തറയിലിന്‍റെ മുഖ്യകാര്‍മികത്വത്തില്‍ നടക്കുന്ന വിശുദ്ധ കുര്‍ബാനയ്ക്കു ശേഷം വിശുദ്ധ ഗീവര്‍ഗീസ് സഹദായുടെ തിരുസ്വരൂപം പള്ളിയുടെ പ്രധാനകവാടത്തില്‍ സ്ഥാപിക്കുന്നതോടെ പെരുന്നാളിന് തിരക്കേറും. ഇന്നു പുലര്‍ച്ചെ 5.45ന് മധ്യസ്ഥപ്രാര്‍ഥന, വിശുദ്ധ കുര്‍ബാന. തുടർന്ന് വികാരി ഫാ. ഫിലിപ് വൈക്കത്തുകാരന്‍റെ മുഖ്യകാര്‍മികത്വത്തില്‍ കൊടിയേറ്റും. നാളെ മുതല്‍ തിരുനാള്‍ ദിവസങ്ങളില്‍ എല്ലാ ദിവസവും 4.30ന് തമിഴ് കുര്‍ബാന, 5.45ന്, 7.45ന്, 10ന്, വൈകുന്നേരം നാലിന്, ആറിന് മധ്യസ്ഥ പ്രാര്‍ഥന, ലദീഞ്ഞ്, കുര്‍ബാന, രാത്രി ഏഴിന് കുരിശടിയില്‍ മധ്യസ്ഥ പ്രാര്‍ഥന എന്നിവ നടക്കും. മേയ് ഒന്നു മുതല്‍ എല്ലാ ദിവസവും ഉച്ചയ്ക്ക് 2.30ന് തമിഴില്‍ വിശുദ്ധ കുര്‍ബാനയും നടക്കും. മൂന്നിന് പാലക്കാട് സുല്‍ത്താന്‍പേട്ട് രൂപത ബിഷപ് റവ. ഡോ. പീറ്റര്‍ അബീര്‍ അന്തോനിസ്വാമിയുടെ കാര്‍മികത്വത്തിലും നാലിന് സീറോ മലബാര്‍ കുരിയാ ബിഷപ്പ് മാര്‍ സെബാസ്റ്റ്യന്‍ വാണിയപ്പുരയ്ക്കലിന്‍റെ കാര്‍മികത്വത്തിലും അഞ്ചിനു രാവിലെ 7.45ന് തിരുവല്ലാ അതിരൂപത ആര്‍ച്ച്ബിഷപ് തോമസ് മാര്‍ കുറിലോസിന്‍റെ മുഖ്യകാര്‍മികത്വത്തിലും ആറിനു രാവിലെ ഒന്‍പതിന് തക്കല രൂപത മത്രാന്‍ മാര്‍ ജോര്‍ജ് രാജേന്ദ്രന്‍റെ കാര്‍മികത്വത്തിലും ഉച്ചകഴിഞ്ഞ് 3.45ന് പാളയംകോട്ട് ബിഷപ് എമിരിറ്റസ് റവ. ഡോ. ജൂഡ് പോള്‍ രാജിന്‍റെ കാര്‍മികത്വത്തിലും ഏഴിനു രാവിലെ 5.45ന് ചങ്ങനാശേരി അതിരൂപത ആര്‍ച്ച്ബിഷപ് എമിരിറ്റൂസ് മാര്‍ ജോസഫ് പെരുന്തോട്ടത്തിലിന്‍റെ കാര്‍മികത്വത്തിലും മധ്യസ്ഥപ്രാര്‍ഥന, വിശുദ്ധ കുര്‍ബാന എന്നിവ നടക്കും. ആറിനു വൈകുന്നേരം അഞ്ചിന് ചെറിയ രൂപവും എുന്നള്ളിച്ചുള്ള പ്രദക്ഷിണം. പ്രധാന തിരുനാള്‍ദിനമായ ഏഴിന് വൈകുന്നേരം മൂന്നിന് തമിഴ് തിരുനാള്‍ വിശുദ്ധ കുര്‍ബാന - തൂത്തുക്കുടി രൂപത ബിഷപ് റവ. ഡോ. സ്റ്റീഫന്‍ ആന്‍റണി പിള്ളൈ കാര്‍മികത്വം വഹിക്കും. നാലിന് വിശുദ്ധ ഗീവര്‍ഗീസ് സഹദായുടെ അദ്ഭുത തിരുസ്വരൂപം വഹിച്ചുള്ള തിരുനാള്‍ പ്രദക്ഷിണം നടക്കും. ഫാ. ആന്‍ഡ്രൂസ് കുന്നത്ത് കാര്‍മികത്വം വഹിക്കും. ഏഴിനു വിശുദ്ധനെ വണങ്ങി അരി, മലര്‍, ഉപ്പ്, നല്ലമുളക്, കഴിനൂല്‍ എന്നീ നേര്‍ച്ചകള്‍ സ്വീകരിച്ച് തമിഴ്‌നാട്ടുകാര്‍ മടങ്ങുമ്പോള്‍ നാട്ടുകാരുടെ പെരുന്നാള്‍ തുടങ്ങും. 14ന് എട്ടാമിടത്തോടെ തിരുനാള്‍ സമാപിക്കും. 14ന് ഉച്ചയ്ക്ക് രണ്ടിന് ചങ്ങനാശേരി അതിരൂപത വികാരി ജനറാള്‍ റവ. ഡോ. സ്‌കറിയ കന്യാകോണിലിന്‍റെ കാര്‍മികത്വത്തില്‍ മധ്യസ്ഥപ്രാര്‍ഥന, ലദീഞ്ഞ്, കുര്‍ബാന. വൈകുന്നേരം നാലിന് കുരിശടിയിലേക്കു പ്രദക്ഷിണവും കൊടിയിറക്കവും. രാത്രി 9.30ന് വിശുദ്ധ ഗീവര്‍ഗീസ് സഹദായുടെ തിരുസ്വരൂപം തിരുനടയില്‍ പ്രതിഷ്ഠിക്കുന്നതോടെ തിരുനാള്‍ സമാപിക്കും. എടത്വ പള്ളിയില്‍ ഇന്ന്‌ എടത്വ സെന്‍റ് ജോര്‍ജ് ഫൊറോന പള്ളിയില്‍ രാവിലെ 5.45ന് സപ്രാ, മധ്യസ്ഥപ്രാര്‍ഥന, വിശുദ്ധ കുര്‍ബാന, തുടര്‍ന്ന് കൊടിയേറ്റ് - ഫാ. ഫിലിപ്പ് വൈക്കത്തുകാരന്‍ (വികാരി), 7.45 ന് മധ്യസ്ഥ പ്രാര്‍ഥന, ലദീഞ്ഞ്, വിശുദ്ധ കുര്‍ബാന - ഫാ. സെബാസ്റ്റ്യന്‍ ചാമക്കാല, 10ന് വിശുദ്ധ കുര്‍ബാന (തമിഴ് സീറോ മലബാര്‍) - ഫാ. പീറ്റര്‍ കിഴക്കേതില്‍, ‌ഫാ. അജിന്‍ സി. ജോസഫ്, ഉച്ചയ്ക്ക് രണ്ടിന് വിശുദ്ധ കുര്‍ബാന (തമിഴ്) - ഫാ. സൈമണ്‍, വൈകിട്ട് നാലിന് മധ്യസ്ഥപ്രാര്‍ഥന, ലദീഞ്ഞ്, വിശുദ്ധ കുര്‍ബാന - ഫാ. ജേക്കബ് കുഴിപ്പള്ളി, ആറിന് വിശുദ്ധ കുര്‍ബാന (തമിഴ്) - ഫാ. ദുരൈസ്വാമി, ഏഴിന് മധ്യസ്ഥപ്രാര്‍ഥന (കുരിശടിയില്‍).

എടത്വ സെന്‍റ് അലോഷ്യസ് 1974-75 എസ്എസ്എല്‍സി ബാച്ച് വീണ്ടും ഒത്തുകൂടി

എടത്വ: എടത്വ സെന്‍റ് അലോഷ്യസ് ഹൈസ്‌കൂള്‍ 1974-75 എസ്എസ്എല്‍സി ബാച്ചില്‍ പഠിച്ചവരും പഠിപ്പിച്ചവരും അതേ സ്‌കൂളില്‍ വീണ്ടും ഒത്തുകൂടി. പഠിച്ചിറങ്ങി 50 വര്‍ഷം തികഞ്ഞതിന്‍റെ ജൂബിലി ആഘോഷം സ്‌കൂളില്‍നിന്ന് എടത്വവരെ പൂര്‍വവിദ്യാര്‍ഥി മെഗാ സംഗമ വിളംബരജാഥ പുറപ്പെട്ടു തിരികെ പഠിച്ച അതേ സ്‌കൂളിന്‍റെ അങ്കണത്തില്‍ പൂര്‍വവിദ്യാര്‍ഥി ജൂബിലി മഹാസംഗമ പരിപാടിക്കായി അണിനിരന്നു. സ്‌കൂള്‍ മാനേജര്‍ ഫാ. ഫിലിപ്പ് വൈക്കത്തുകാരന്‍ ജൂബിലി മഹാസമ്മേളനം ഉദ്ഘാടനം നിര്‍വഹിച്ചു. മുന്‍ അധ്യാപകരായ തോമസുകുട്ടി കിളിരൂര്‍, കെ.ജെ. മത്തായി കറുകയില്‍, എം.എല്‍. ജേക്കബ് മെതിക്കളം, ജോര്‍ജുകുട്ടി കാവിലവീട്ടില്‍ എന്നിവരെ ആദരിച്ചു. 1975 എസ്എസ്എല്‍സി ബാച്ച് പൂര്‍വവിദ്യാര്‍ഥി അസോസിയേഷന്‍ പ്രസിഡന്‍റ് അഡ്വ. ഐസക് രാജു അധ്യക്ഷത വഹിച്ചു. ഉപഹാരമായി ലാപ്‌ടോപ് സ്‌കൂള്‍ ഹെഡ്മാസ്റ്റര്‍ ജിനോ ജോസഫിന് കൈമാറി. മുന്‍ അധ്യാപകന്‍ തോമസുകുട്ടി കിളിരൂര്‍, ഹെഡ്മാസ്റ്റര്‍ ജിനോ ജോസഫ്, അസോസിയേഷന്‍ സെക്രട്ടറി ജി.കെ. ജോസ് കളപ്പുരക്കല്‍, വൈസ് പ്രസിഡന്‍റ് തോമസ് കളങ്ങര, ജോയിന്‍റ് സെക്രട്ടറി എം.ജെ. മാത്യു മുണ്ടകത്തില്‍, ട്രഷറര്‍ സക്കറിയ പറപ്പള്ളില്‍, മോടി തോമസ്, എം.ജെ. ചെറിയാന്‍, ജോര്‍ജുകുട്ടി കളത്തില്‍ കോനാട്ട്, കെ.കെ. വിജയന്‍, വി. ഗ്രിഗറി, പി.ജെ. ചാക്കോ, എ.സി. ചാക്കോ, സേവ്യര്‍ ജോസഫ്, സാജന്‍ നൈനാന്‍, ഷാജി തോട്ടുകടവില്‍, ചെറിയാന്‍ ദേവസ്യ, ജോസ് വള്ളാംപറമ്പ്, എ.ഡി. ആന്‍റണി കൈനകരി, ആര്‍. മോഹനന്‍, ലോനപ്പന്‍ കുട്ടനാട് എന്നിവര്‍ പ്രസംഗിച്ചു. തുടര്‍ന്നു നടന്ന കുടുംബസംഗമ പരിപാടി ജില്ലാ പഞ്ചായത്ത് വികസന സ്ഥിരംസമിതി അധ്യക്ഷ ബിനു ഐസക് രാജു ഉദ്ഘാടനം ചെയ്തു. ഡയറക്ടറി പ്രകാശനം തകഴി പഞ്ചായത്ത് പ്രസിഡന്‍റ് എസ്. അജയകുമാര്‍ നിര്‍വഹിച്ചു. കലാപരിപാടികളും സ്‌നേഹവിരുന്നും നടത്തി.

നെഹ്‌റു ട്രോഫി വള്ളംകളി കൂടുതല്‍ പ്രഫഷണലാക്കും

ആലപ്പുഴ: നെഹ്‌റു ട്രോഫി വള്ളംകളി കൂടുതല്‍ പ്രഫഷണല്‍ ആകുന്നു. സ്റ്റാര്‍ട്ടിംഗ്, ഫിനിഷിംഗ് സംവിധാനങ്ങള്‍ കുറ്റമറ്റതാക്കാന്‍ ഇത്തവണ പ്രത്യേക നടപടികളുണ്ടാകും. തുടര്‍ച്ചയായ വര്‍ഷങ്ങളില്‍ പരാതികളുണ്ടാവുന്നത് ഇത്തവണ മത്സരം നേരത്തേ തുടങ്ങുന്നതു തുടങ്ങി നിരവധി വിഷയങ്ങളില്‍ കളക്ടര്‍ അലക്‌സ് വര്‍ഗീസ് വിളിച്ചു ചേര്‍ത്ത യോഗത്തില്‍ ചര്‍ച്ച ചെയ്തു. മുന്‍വര്‍ഷങ്ങളില്‍ ഉണ്ടായ അനുഭവങ്ങളാണ് യോഗം നേരത്തേ ചേരാന്‍ പ്രേരിപ്പിച്ചത്. സ്റ്റാര്‍ട്ടിംഗ് സംവിധാനത്തില്‍ പിഴവു സംഭവിക്കാനുള്ള സാധ്യതയാണ് ഏറ്റവും പ്രധാനമായി ചര്‍ച്ചചെയ്തത്. അടുത്ത തവണ ട്രാക്കുകളും പന്തലുകളും ഉള്‍പ്പെടെ ഉയര്‍ന്ന നിലവാരത്തിലുള്ളതാക്കാന്‍ ആലോചനയുണ്ട്. വിവിധ ചുമതലകളുള്ളവര്‍ക്കു യൂണിഫോം ഏര്‍പ്പെടുത്തിയേക്കും. വള്ളംകളി നടത്തിപ്പിന്‍റെ വിവിധ മേഖലകളില്‍ ആധുനിക ഉപകരണങ്ങള്‍ ഉപയോഗിക്കണമെന്ന നിര്‍ദേശം യോഗത്തിലുണ്ടായി. കഴിഞ്ഞ തവണ സ്റ്റാര്‍ട്ടിംഗിനെയും ഫിനിഷിംഗിനെയും സംബന്ധിച്ച് ഉയര്‍ന്ന പരാതികള്‍ വളരെ സൂക്ഷ്മമായി ചര്‍ച്ച ചെയ്തു. മത്സരം തുടങ്ങുന്ന സമയത്തു ട്രാക്കില്‍ ഒഫിഷ്യലുകളുടെ ബോട്ട് ഉണ്ടായിരുന്നെന്നും അതു മാറ്റാതെ സ്റ്റാര്‍ട്ടിംഗ് അനുവദിക്കരുതെന്നും പറഞ്ഞിട്ടും അതു പാലിച്ചില്ലെന്നു പരാതിയുണ്ടായി. ഫൈനലിലെ ഫിനിഷിംഗ് സമയം കണക്കാക്കിയതിനെപ്പറ്റിയുണ്ടായ പരാതി കോടതിയിലുമെത്തി. ഇത്തരം പ്രശ്‌നങ്ങള്‍ ഇത്തവണ ഒഴിവാക്കും. സ്റ്റാര്‍ട്ടിംഗ് സംവിധാനം നിലവിലുള്ള രീതിയില്‍ തന്നെയാകും ഘടിപ്പിക്കുന്നതെങ്കിലും വള്ളങ്ങളുടെ ചുണ്ട് ഒരേപോലെയാക്കിയ ശേഷമാകും സ്റ്റാര്‍ട്ടിംഗ്. കഴിഞ്ഞ വര്‍ഷത്തെപ്പോലെ ഒന്നിലേറെ വള്ളങ്ങള്‍ ഒരേ സമയം ഫിനിഷ് ചെയ്താല്‍ സൂക്ഷ്മതയ്ക്കായി സെക്കന്‍ഡിന്‍റെ നൂറിലൊരു അംശമാണോ ആയിരത്തിലൊന്നാണോ കണക്കാക്കേണ്ടത് എന്ന കാര്യത്തില്‍ നേരത്തേ വ്യക്തത വരുത്തും. ഇതുള്‍പ്പെടെ ഫിനിഷിംഗിനു മാനദണ്ഡങ്ങളുണ്ടാക്കാന്‍ വിദഗ്ധരുടെ സമിതി രൂപീകരിക്കും. തര്‍ക്കമുണ്ടായാല്‍ സമിതി പരിശോധിച്ച ശേഷമായിരിക്കും ഫലം പ്രഖ്യാപിക്കുക. സ്റ്റാര്‍ട്ടിംഗ് ഉള്‍പ്പെടെ സമിതി പരിശോധിക്കും. ഇത്തരം സാങ്കേതിക വശങ്ങളെല്ലാം ബന്ധപ്പെട്ടവര്‍ ക്യാപ്റ്റന്‍സ് ക്ലിനിക്കില്‍ വിശദീകരിക്കും. സബ് കലക്ടര്‍ സമീര്‍ കിഷന്‍, കെ.കെ. ഷാജു, സി.കെ. സദാശിവന്‍, ഇറിഗേഷന്‍ എക്‌സിക്യൂട്ടീവ് എന്‍ജിനിയര്‍ എം.സി. സജീവ് കുമാര്‍, തോമസ് ജോസഫ്, ആര്‍.കെ. കുറുപ്പ്, എസ്.എം ഇക്ബാല്‍ തുടങ്ങിയവര്‍ ചര്‍ച്ചകളില്‍ പങ്കെടുത്തു.

തിരുനാളാഘോഷവും വാർഷികധ്യാനവും

മങ്കൊമ്പ് : കൈനകരി തോട്ടുവാത്തല തിരുഹൃദയ പള്ളിയിൽ ഇടവകത്തിരുനാൾ മേയ് ഒന്നു മുതൽ നാലുവരെ നടക്കും. തിരുനാളിനു മുന്നോടിയായി ഫാ. ജോസഫ് പുത്തൻപുരയിൽ നയിക്കുന്ന വാർഷിക ധ്യാനത്തിനു തുടക്കമായി. പുളിങ്കുന്ന് ഫൊറോന വികാരി റവ.ഡോ. ടോം പുത്തൻകളം ധ്യാനം ഉദ്ഘാടനം ചെയ്തു. 30 വരെ ദിവസവും വൈകുന്നേരം 4.15ന് തിരുഹൃദയ ജപമാല, മധ്യസ്ഥപ്രാർഥന, വിശുദ്ധ കുർബാന, പ്രംസംഗം. 30ന് വൈകുന്നേരം 4.15ന് വിശുദ്ധ കുർബാന, പ്രസംഗം കർദിനാൾ മാർ ജോർജ് ആലഞ്ചേരി. തുടർന്ന് കലാസന്ധ്യ. മേയ് ഒന്നിന് വൈകുന്നേരം 4.15ന് തിരുഹൃദയ ജപമാല, കൊടിയേറ്റ് വികാരി ഫാ. സാവിയോ മാനാട്ട്. മധ്യസ്ഥപ്രാർഥന, ലദീഞ്ഞ്, വിശുദ്ധ കുർബാന, പ്രസംഗം, ഫാ.തോമസ് കാഞ്ഞിരവേലിൽ, രണ്ടിന് വൈകുന്നേരം 4.15ന് തിരുഹൃദയ ജപമാല, മധ്യസ്ഥപ്രാർഥന, ലദീഞ്ഞ്, വിശുദ്ധ കുർബാന, പ്രസംഗം ചങ്ങനാശേരി അതിരൂപത ആർച്ച്ബിഷപ് മാർ തോമസ് തറയിൽ. തുടർന്ന് സെമിത്തേരി സന്ദർശനം. മൂന്നിന് രാവിലെ 7.15ന് സപ്ര, ആഘോഷമായ വിശുദ്ധ കുർബാന സ്വീകരണം. ഫാ. ജയിംസ് മാളിയേക്കൽ, പ്രസംഗം ഫാ. ജോസഫ് ഏറത്ത്, 5.30ന് ആഘോഷമായ റംശാ, ഫാ. അനൂപ് കരിങ്ങാട്, തുടർന്ന് തിരുനാൾ പ്രദക്ഷിണം, 6.30ന് വചനപ്രഘോഷണം ചങ്ങനാശേരി അതിരൂപത വികാരി ജനറാൾ ഫാ. ആന്‍റണി ഏത്തയ്ക്കാട്, ആകാശവിസ്മയം, പ്രധാന തിരുനാൾ ദിനമായ നാലിന് രാവിലെ 9.30ന് സപ്ര, ആഘോഷമായ റാസ, ഫാ. ഷാജി തുമ്പേച്ചിറയിൽ. പ്രസംഗം ഫാ. ജിസൺ പോൾ വേങ്ങാശേരി. തിരുനാൾ പ്രദക്ഷിണം ഫാ. സോണി പള്ളിച്ചിറ, കൊടിയിറക്ക്.

വനവാതുക്കര ലിറ്റിൽ ഫ്ലവർ പള്ളിയുടെ കൂദാശ ഇന്ന്

ചെങ്ങന്നൂർ: നവീകരിച്ച കല്ലിശേരി വനവാതുക്കര ലിറ്റിൽ ഫ്ലവർ പള്ളിയുടെ പ്രതിഷ്ഠാകർമം ഇന്ന് വൈകുന്നേരം മൂന്നിന് വിജയപുരം രൂപതാധ്യക്ഷൻ സെബാസ്റ്റ്യൻ തെക്കത്തെച്ചേരിലിന്‍റെ കാർമികത്വത്തിൽ നടത്തും. ജനപ്രതിനിധികളും മത-സാമുദായിക നേതാക്കളും കൂദാശാകർമത്തിൽ പങ്കെടുക്കും. ഇടവക വികാരി ഫാ. ജോൺ വിയാനി, ഇടവക സെക്രട്ടറി വിജു ജോൺ വാലെവടക്കേതിൽ, നിർമാണക്കമ്മിറ്റി കൺവീനർ രാജു പള്ളത്ത് എന്നിവർ തിരുക്കർമങ്ങൾക്കു നേതൃത്വം നല്കും.

തങ്കി പള്ളിയില്‍ കൊംഗ്രഹസ ദര്‍ശനത്തിരുനാള്‍

ചേര്‍ത്തല: തങ്കി സെന്‍റ് മേരീസ് ഫൊറോന പള്ളിയില്‍ തൊഴിലാളിമധ്യസ്ഥനായ വിശുദ്ധ യൗസേപ്പിതാവിന്‍റെ കൊംഗ്രഹസ ദര്‍ശനത്തിരുനാള്‍ ഇന്നു മുതല്‍ മേയ് ഒന്നുവരെ ആഘോഷിക്കും. ഇന്നു വൈകുന്നേരം ആറിന് വികാരി ഫാ. ജോര്‍ജ് എടേഴത്തിന്‍റെ മുഖ്യകാര്‍മികത്വത്തില്‍ കൊടിയേറ്റ്. തുടര്‍ന്ന് ദിവ്യബലി-ഫാ. സിജു പാലിയത്തറ. വചനപ്രഘോഷണം- ഫാ. ഷിനോജ് പുന്നയ്ക്കല്‍. 28നു വൈകുന്നേരം ആറിന് ജപമാല, 6.30ന് ദിവ്യബലി, വചനപ്രഘോഷണം. തുടര്‍ന്ന് ലദീഞ്ഞ്, പരിശുദ്ധ കുര്‍ബാനയുടെ ആശീര്‍വാദം. 29ന് വൈകുന്നേരം ആറിനു ജപമാല, 6.30ന് ദിവ്യബലി, വചനപ്രഘോഷണം. തുടര്‍ന്ന് ലദീഞ്ഞ്, പരിശുദ്ധ കുര്‍ബാനയുടെ ആശീര്‍വാദം. 30നു വൈകുന്നേരം ആറിനു ജപമാല, 6.30നു ദിവ്യബലി, വചനപ്രഘോഷണം. തുടര്‍ന്ന് വേസ്പര, പ്രദക്ഷിണം. തിരുനാള്‍ദിനമായ മേയ് ഒന്നിനു രാവിലെ 5.30നും 6.30നും ദിവ്യബലി,വൈകുന്നേരം നാലിനു ജപമാല, 4.30ന് സമൂഹദിവ്യബലി-ഫാ. നിക്‌സണ്‍ തോളാട്ട്, വചനപ്രഘോഷണം-ഫാ. ജോസ് തോമസ്. തുടര്‍ന്ന് തിരുനാള്‍ പ്രദക്ഷിണം, പരിശുദ്ധ കുര്‍ബാനയുടെ ആശീര്‍വാദം, കൊടിയിറക്കല്‍.

മുതുകുളം സെന്‍റ് ജോർജ് ഓർത്തഡോക്സ് പള്ളി തിരുനാൾ

ഹരിപ്പാട്: മുതുകുളം സെന്‍റ് ജോർജ് ഓർത്തഡോക്സ് പള്ളിയിൽ വിശുദ്ധ ഗീവർഗീസ് സഹദായുടെ തിരുനാൾ ചടങ്ങുകൾ ഇന്നു മുതൽ മേയ് മൂന്നു വരെ നടക്കും. ഇന്ന് പെരുന്നാൾ കൊടിയേറ്റ് വികാരി ഫാ. തോമസ് നിർവഹിക്കും. 30ന് വൈകിട്ട് ആറിന് സന്ധ്യാനമസ്കാരം, ഗാനശുശ്രൂഷ,ഏഴിന് വചനശുശ്രുഷ ഫാ. ജോൺ ടി. ർഗീസ് കൂടാരത്തിൽ മേൽപ്പാടം നിർവഹിക്കും. മേയ് ഒന്നിന് വൈകിട്ട് 6.30ന് ഗാനശുശ്രൂഷ, ഏഴിന് വചനശുശ്രൂഷ ഫാ. ജോൺ ടി. വർഗീസ് കളക്കട നിർവഹിക്കും. രണ്ടിന് വൈകിട്ട് ആറിന് സന്ധ്യാനമസ്കാരം ആകാശദീപക്കാഴ്ച. വൈകിട്ട് ഏഴിന് ഭക്തനിർഭരമായ റാസ. രാത്രി 9.20ന് ആശീർവാദം. മൂന്നിന് രാവിലെ ഏഴിന് പ്രഭാത നമസ്കാരം എട്ടിന് വിശുദ്ധ മൂന്നിന്മേൽ കുർബാന ഡോ. സഖറിയാസ് മാർ അപ്രേം മെത്രാപ്പോലീത്തയുടെ മുഖ്യകാർമികത്വത്തിൽ നടക്കും. പള്ളിയിൽ 25 വർഷമായി പ്രധാന ശുശ്രൂഷകനായി സേവനമനുഷ്ഠിക്കുന്ന കണ്ടത്തിൽ കുഞ്ഞുമോൻ ജോണിനെ ആദരിക്കുന്നു. സംസ്ഥാന നെറ്റ്ബാൾ ചാമ്പ്യൻഷിപ്പിൽ സംസ്ഥാന ക്യാപ്റ്റനായി തിരഞ്ഞെടുക്കപ്പെട്ട ഷിജിൻ ജെ. കുഞ്ഞുമോന് പള്ളിയുടെ അനുമോദനം നൽകും. തുടർന്ന് പ്രദക്ഷിണം കൊടിയിറക്ക്, ആശീർവാദം വെച്ചൂട്ട് സദ്യ.

ഡോ. ജോഷ്വ മാർ ഇഗ്നാത്തിയോസിനു സ്നേഹാദരം നാളെ

മാവേലിക്കര: മലങ്കര കത്തോലിക്കാ സഭ മാവേലിക്കര ഭദ്രാസനാധിപൻ ഡോ. ജോഷ്വ മാർ ഇഗ്നാത്തിയോസിനു സ്നേഹാദരം സമർപ്പണ സമ്മേളനം നാളെ വൈകിട്ടു മൂന്നിനു താലൂക്ക് സഹകരണ ബാങ്ക് ഓഡിറ്റോറിയത്തിൽ നടക്കും. വരുന്ന മേയ് 24നു 75 പുർത്തിയാക്കുന്ന ഡോ. ജോഷ്വ മാർ ഇഗ്നാത്തിയോസ് 2007 മുതൽ മാവേലിക്കര രൂപതയുടെ പ്രഥമ മെത്രാപ്പൊലീത്തയായി പ്രവർത്തിക്കുകയാണ്. സമ്മേളനം മുൻ മന്ത്രി വി.എം. സുധീരൻ ഉദ്ഘാടനം ചെയ്യും. എം.എസ്. അരുൺകുമാർ എംഎൽഎ അധ്യക്ഷനാകും. കൊടിക്കുന്നിൽ സുരേഷ് എംപി പൗരാവലിയുടെ ഉപഹാര സമർപ്പണം നടത്തും. മുൻ ചീഫ് സെക്രട്ടറി കെ. ജയകുമാർ സദ്‌കീർത്തി പത്രം സമർപ്പണം നടത്തും. ഡോ. ജോഷ്വ മാർ ഇഗ്നാത്തിയോസ് മറുപടി പ്രസംഗം നടത്തും. അൻപതോളം സംഘടനകൾ ഡോ. ജോഷ്വ മാർ ഇഗ്നാത്തിയോസിനു ആദരവും നൽകുമെന്നു സ്വാഗതസംഘം ചെയർമാൻ മുരളീധരൻ തഴക്കര, ജനറൽ കൺവീനർ സുരേഷ് കുമാർ കുറത്തികാട് എന്നിവർ അറിയിച്ചു.

അവധിക്കാല പഠനക്കളരി ഇന്നു മുതൽ

ഹരിപ്പാട്: ചിങ്ങോലി യുവജന സമാജം ഗ്രന്ഥശാല സംഘടിപ്പിക്കുന്ന കുട്ടികളുടെ അവധിക്കാല പഠനക്കളരി കളിമുറ്റം ഇന്നു മുതൽ 29 വരെ നടക്കും. ഇന്ന് രാവിലെ പത്തിന് രമേശ് ചെന്നിത്തല എംഎൽഎ ഉദ്ഘാടനം ചെയ്യും. ഗ്രന്ഥശാല പ്രസിഡന്‍റ് മുഞ്ഞിനാട്ട് രാമചന്ദ്രൻ അധ്യക്ഷനാവും. 11ന് പുനർജനി ഡി അഡിക്ഷൻ സെന്‍റർ ഡയറക്ടർ കെ. അഭിലാഷ് അറിയാം മനശാസ്ത്രം എന്ന വിഷയത്തിൽ ക്ലാസെടുക്കും. രണ്ടിന് പാർഥസാരഥിവർമയുടെ വരയരങ്ങ്. നാളെ രാവിലെ ഒമ്പതിന് ഐശ്വര്യ തങ്കപ്പൻ വരച്ച ചിത്രങ്ങളുടെ പ്രദർശനം മുതുകുളം ബ്ലോക്ക് പഞ്ചായത്ത് പ്രസിഡന്‍റ് ഡി. അംബുജാക്ഷി ഉദ്ഘാടനം ചെയ്യും. പത്തിന് ബിജു മാവേലിക്കര അവതരിപ്പിക്കുന്ന അരങ്ങും ചിരിയും. രണ്ടിന് മുട്ടം സി.ആർ. ആചാര്യ അവതരിപ്പിക്കുന്ന ചൊൽക്കാഴ്‌ച. ചൊവ്വ രാവിലെ ഒമ്പതിന് പല്ലന കുമാരകോടിയിലേക്കു പഠനയാത്ര. 10ന് ആശാൻ കവിതകളുടെ അവലോകനം സാജിദ്ഖാൻ പനവേലി അവതരിപ്പിക്കും. ജില്ലാ പഞ്ചായത്ത് ക്ഷേമകാര്യ സ്ഥിരംസമിതി അധ്യക്ഷൻ ടി.എസ്. താഹ ഉദ്ഘാടനം ചെയ്യും. തൃക്കുന്നപ്പുഴ പഞ്ചായത്ത് പ്രസിഡന്‍റ് എസ്. വിനോദ്‌ കുമാർ അധ്യക്ഷനാവും. രണ്ടിന് മനോജ് ചേപ്പാട് അവതരിപ്പിക്കുന്ന കരോക്കെ ഗാനമേള. നാലിന് സമാപന സമ്മേളനവും സർട്ടിഫിക്കറ്റ് വിതരണവും ചിങ്ങോലി പഞ്ചായത്ത് വൈസ് പ്രസിഡന്‍റ് ജി. സജിനി ഉദ്ഘാടനം ചെയ്യും. അഡ്വ.ആർ. കിരൺകുമാർ അധ്യക്ഷനാകും.

ദേശീയപാതയില്‍ വേനല്‍മഴയില്‍ വെള്ളക്കെട്ട്

തുറവൂര്‍: അരൂര്‍-തുറവൂര്‍ ദേശീയപാതയില്‍ ഓടകളുടെ നിര്‍മാണം ഇഴയുന്നു. ഇതേത്തുടര്‍ന്ന് കഴിഞ്ഞ ദിവസം പെയ്ത മഴയില്‍ അരൂര്‍ ക്ഷേത്രം കവലയില്‍ വലിയ വെള്ളക്കെട്ടാണ് രൂപപ്പെട്ടത്. ഇനിയും മഴ തുടാനുള്ള സാധ്യത നിലനില്‍ക്കെ ഇവിടത്തെ ജനജീവിതം ദുസഹമായി. കഴിഞ്ഞദിവസങ്ങസളില്‍ ജനങ്ങള്‍ മുട്ടൊപ്പം ജലത്തിലാണ് സഞ്ചരിച്ചത്. കഴിഞ്ഞ രണ്ടു ദിവസമായി പെയ്ത മഴയിലാണ് കനത്ത വെള്ളക്കെട്ട് രൂപപ്പെട്ടത്. ദേശീയപാതയില്‍ അരൂര്‍-തുറവൂര്‍ ഉയരപ്പാത പണി നടക്കുന്നയിടങ്ങളില്‍ വെള്ളക്കെട്ട് രൂക്ഷമായത്. അരൂര്‍, ചന്തിരൂര്‍, കൊച്ചുവെളിക്കവല, എരമല്ലൂര്‍, കോടംതുരുത്ത് എന്നിവിടങ്ങളിലാണ് ദുരിതമേറെയും. വെള്ളക്കെട്ട് ഒഴിവാക്കാന്‍ അരൂര്‍ മുതല്‍ തുറവൂര്‍ വരെ ഓട നിര്‍മിക്കാന്‍ ഉയരപ്പാത നിര്‍മാണവുമായി ബന്ധപ്പെട്ട് പദ്ധതിയുണ്ട്. എന്നാല്‍, പഞ്ചായത്തുകളുടെ അലംഭാവം മൂലം ഓട നിര്‍മാണം എങ്ങുംമെത്തിയിട്ടില്ല. അരൂര്‍ മുതല്‍ തുറവൂര്‍ വരെ 12.75 കിലോമീറ്റര്‍ പാതയില്‍ 6.5 കിലോമീറ്ററും അരൂര്‍ പഞ്ചായത്തിന്‍റെ പരിധിയിലൂടെയാണ് കടന്നുപോകുന്നത്. എന്നിട്ടും പഞ്ചായത്ത് അധികൃതര്‍ വെള്ളക്കെട്ട് കണ്ടില്ലെന്നു നടിക്കുകയാണെന്നു ജനങ്ങള്‍ കുറ്റപ്പെടുത്തി.

ത്രിവേണി സംഗമം: കലയുടെ ദൃശ്യാനുഭവം ഇന്ന്

ചെങ്ങന്നൂർ: മലങ്കര മർത്തോമ്മ‌ സുറിയാനി സഭ ചെങ്ങന്നൂർ - മാവേലിക്കര ഭദ്രാസന സംഗീത സംവേദന വിഭാഗം (ഡിഎസ്എംസി) ചരിത്രത്തിലാദ്യമായി അവതരിപ്പിക്കുന്ന ബൃഹത്തായ കലാവിരുന്ന് -എന്‍റെ നാഴിക വന്നിരിക്കുന്നു - (ഓറ) ഇന്നു വൈകിട്ട് ആറിന് ആറാട്ടുപുഴ തരംഗം മിഷൻ ആക്‌ഷൻ സെന്‍ററിൽ അരങ്ങേറും. അറുപതിൽപ്പരം കലാകാരന്മാരും സാങ്കേതിക വിദഗ്ധരും ഒത്തുചേർന്ന് ഒരുക്കുന്ന ദൃശ്യവിസ്മയം വിശുദ്ധ യോഹന്നാന്‍റെ സുവിശേഷത്തിലെ ക്രിസ്തുവിന്‍റെ ജീവിതത്തെയും പീഡാനുഭവ - ഉത്ഥാന യാഥാർഥ്യങ്ങളെയും സംവിധാനവും രചനയും നിർവഹി ച്ചിരിക്കുന്നത് ഫാ. സുനിൽ ജോർജ് മാത്യുവാണ്. മലങ്കര കത്തോലിക്ക മാവേലിക്കര രൂപതാധ്യക്ഷൻ ജോഷ്വാ മാർ ഇഗ്നോത്തിയോസ് മെത്രാപ്പോലീത്ത മുഖ്യാതിഥിയാകും. മർത്തോമ്മ സഭ ചെങ്ങന്നൂർ മാവേലിക്കര ഭദ്രാസനാധിപൻ ഡോ. യുയാക്കിം മാർ കുറിലോസ് സഫ്രഗൻ മെത്രാപ്പോലീത്ത അധ്യക്ഷത വഹിക്കും.

ഒന്പതാം ക്ലാസ് വിദ്യാർഥി മുങ്ങിമരിച്ചു

മങ്കൊമ്പ് : വിവാഹച്ചടങ്ങിൽ പങ്കെടുക്കാൻ കുട്ടനാട്ടിലെത്തിയ ആലപ്പുഴ സ്വദേശിയായ ഹൈസ്‌കൂൾ വിദ്യാർഥി മുങ്ങിമരിച്ചു. ആലപ്പുഴ തത്തംപള്ളി പനക്കണ്ടത്തിൽ തോമസിന്‍റെ മകൻ മിഖിലാണ് (15) മരിച്ചത്. ഇന്നലെ രാവിലെ ചേന്നങ്കരിയാറ്റിലായിരുന്നു സംഭവം. സ്‌കൂളിലെ ജീവനക്കാരിയുടെ വിവാഹച്ചടങ്ങിൽ പങ്കെടുക്കുന്നതിനായിട്ടാണ് മറ്റു മൂന്നു സുഹൃത്തുക്കൾക്കൊപ്പം മിഖിൽ രണ്ടു ദിവസം മുൻപ് ചേന്നങ്കരിയിലെത്തിയത്. ഇന്നലെ രാവിലെ പത്തരയോടെ രണ്ടു കൂട്ടുകാർ ആറ്റിൽ കുളിക്കാനിറങ്ങിയിരുന്നു. നീന്തലറിയാത്ത മിഖിലും മറ്റൊരാളും കടവിലിരിക്കുകയായിരുന്നു. ഇതിനിടെ മിഖിൽ കാൽവഴുതി ആറ്റിലേക്കു വീഴുകയായിരുന്നു. ബഹളംകേട്ടു ഓടിയെത്തിയവർ രക്ഷിക്കാൻ ശ്രമിച്ചെങ്കിലും വെള്ളത്തിൽ മുങ്ങിത്താഴുകയായിരുന്നു. വിവരമറിഞ്ഞു തകഴിയിൽ നിന്നെത്തിയ ഫയർഫോഴ്‌സ് സംഘമാണ് മുതദേഹം കണ്ടെടുത്തത്. തത്തംപള്ളി സെന്‍റ് മൈക്കിൾ സ്‌കൂളിൽ ഒൻപതാംക്ലാസ് പരീക്ഷയെഴുതി ഫലം കാത്തിരിക്കുകയായിരുന്ന മിഖിൽ, പാഠ്യേതര വിഷയങ്ങളിലും മികവു തെളിയിച്ചിരുന്നു. മികച്ച ഫുട്‌ബോൾ താരമായ മിഖിൽ കഴിഞ്ഞ സ്‌കൂൾ കലോൽസവത്തിൽ മികച്ച നടനായി തെരഞ്ഞെടുക്കപ്പെട്ടിരുന്നു. സംസ്‌കാരം ഇന്നു മൂന്നിനു തത്തംപള്ളി സെന്‍റ് മൈക്കിൾസ് പള്ളിയിൽ. മാതാവ്: ഷേർളി. സഹോദരി സ്‌റ്റെഫി.

പ്രത്യാശയുടെ തീര്‍ഥാടകന്‍ ഫ്രാന്‍സിസ് പാപ്പായ്ക്ക് പ്രണാമമര്‍പ്പിച്ച് ചങ്ങനാശേരി അതിരൂപത

ചങ്ങനാശേരി: പ്രത്യാശയുടെ തീര്‍ഥാടകന്‍ യശഃശരീരനായ ഫ്രാന്‍സിസ് പാപ്പായ്ക്ക് പ്രണാമമര്‍പ്പിച്ച് ചങ്ങനാശേരി അതിരൂപത. സെന്‍റ് മേരീസ് മെത്രാപ്പോലീത്തന്‍പള്ളിയില്‍ നടന്ന വിശുദ്ധകുര്‍ബാനയ്ക്കും അനുസ്മരണ ശുശ്രൂഷകള്‍ക്കുംശേഷം പാരിഷ്ഹാളില്‍ സംഘടിപ്പിച്ച സമ്മേളനം ഓര്‍ത്തഡോക്‌സ് സഭയുടെ പരമാധ്യക്ഷന്‍ ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാ ബാവ ഉദ്ഘാടനം ചെയ്തു. ഈശോയുടെ വിനയവും സ്‌നേഹവും സ്വജീവിതത്തിലൂടെ ലോകത്തെ പഠിപ്പിച്ച ക്രിസ്തുശിഷ്യനാണ് ഫ്രാന്‍സിസ് പാപ്പായെന്ന് കാതോലിക്കാ ബാവ അനുസ്മരിച്ചു. ജീവിതത്തിന്‍റെ വ്യത്യസ്തമായ അനുഭവങ്ങളിലും പ്രതിസന്ധികളിലും ദൈവികകരുണയില്‍ ആഴമായി ആശ്രയിച്ച് ജീവിച്ച മഹാമനുഷ്യനായിരുന്നു പാപ്പായെന്നും അദ്ദേഹത്തെ രണ്ടുതവണ സന്ദര്‍ശിക്കാനും സഹോദര തുല്യമായ സ്‌നേഹം അനുഭവിക്കാനും തനിക്കു സാധിച്ചുവെന്നും കാതോലിക്കാ ബാവ കൂട്ടിച്ചേര്‍ത്തു. ആര്‍ച്ച്ബിഷപ് മാര്‍ തോമസ് തറയില്‍ അധ്യക്ഷത വഹിച്ചു. ഈശോ എല്ലാവരുടേതുമാണെന്നും സഭ എല്ലാവരുടേതുമാകണമെന്നും പഠിപ്പിച്ച പാപ്പാ വിശാലമായ മാനവിക ദര്‍ശനങ്ങളുടെ ഉടമയായിരുന്നുവെന്നും ആര്‍ച്ച്ബിഷപ് അഭിപ്രായപ്പെട്ടു. ആര്‍ച്ച്ബിഷപ് മാര്‍ ജോസഫ് പെരുന്തോട്ടം, മാര്‍ത്തോമ്മാ സഭയുടെ പ്രതിനിധി ആര്‍ച്ച്ബിഷപ് മാത്യൂസ് മാര്‍ സെറാഫിം, യാക്കോബായ സഭാപ്രതിനിധി ആര്‍ച്ച്ബിഷപ് തിമോത്തിയോസ് മാര്‍ മാത്യൂസ്, സിഎസ്‌ഐ സഭാപ്രതിനിധി ബിഷപ് ഡോ. തോമസ് സാമുവല്‍, കുറിച്ചി അദ്വൈത വിദ്യാശ്രമം അംഗം സ്വാമി വിശാലാനന്ദ, പുതൂര്‍പള്ളി മുസ്‌ലിം ജമാ അത്ത് പ്രസിഡന്‍റ് ടി.പി. അബ്ദുള്‍ ഹമീദ്, അതിരൂപതാ വികാരി ജനറാള്‍ മോണ്‍. ആന്‍റണി എത്തക്കാട്ട്, പാസ്റ്ററല്‍ കൗണ്‍സില്‍ ജോയിന്‍റ് സെക്രട്ടറി ബിജു സെബാസ്റ്റ്യന്‍ എന്നിവര്‍ പ്രസംഗിച്ചു. അതിരൂപത വികാരി ജനറാള്‍മാരായ മോണ്‍. മാത്യു ചങ്ങങ്കരി, മോണ്‍. സ്‌കറിയ കന്യാകോണില്‍, പ്രൊക്യുറേറ്റര്‍ ഫാ. ആന്‍റണി മാളിയേക്കല്‍, ചാന്‍സലര്‍ ഫാ. ജോര്‍ജ് പുതുമനമൂഴിയില്‍, കത്തീഡ്രല്‍ വികാരി ഫാ. ജോസഫ് വാണിയപുരയ്ക്കല്‍ എന്നിവര്‍ നേതൃത്വം നല്‍കി. അതിരൂപതയിലെ വൈദികര്‍, സന്യസ്തര്‍, അത്മായപ്രതിനിധികള്‍ തുടങ്ങി വലിയ വിശ്വാസിസമൂഹം അനുസ്മരണ ചടങ്ങില്‍ പങ്കെടുത്തു.

12 വയസുകാരിക്ക് നേരേ ലൈംഗികാതിക്രമം: പ്രതിക്ക് മൂന്നുവർഷം തടവും പിഴയും

ചേർത്തല: 12 വയസുകാരിക്കു നേരേ ലൈംഗികാതിക്രമം നടത്തിയ പ്രതിക്ക് മൂന്നു വർഷം തടവും 50,000 രൂപയും ശിക്ഷിച്ചു. തൈക്കാട്ടുശേരി പഞ്ചായത്ത് ഒന്നാം വാർഡ് ചാത്തങ്കേരി വീട്ടിൽ മധു (48) നെയാണ് ചേർത്തല പ്രത്യേക അതിവേഗ കോടതി (പോക്സോ) ശിക്ഷിച്ചത്. പിഴ അടയ്ക്കാത്ത പക്ഷം മൂന്നുമാസം തടവുകൂടി അനുഭവിക്കണം. പൂച്ചാക്കൽ പോലീസ് സ്റ്റേഷൻ ഇൻസ്പെക്ടർ കെ.ജെ. ജേക്കബ് രജിസ്റ്റർ ചെയ്ത് അന്വേഷണം പൂർത്തിയാക്കി കുറ്റപത്രം സമർപ്പിച്ച കേസിലാണ് വിധി. പ്രോസിക്യൂഷനുവേണ്ടി സ്‌പെഷ്യല്‍ പബ്ലിക് പ്രോസിക്യൂട്ടര്‍ അഡ്വ.ബിനാ കാര്‍ത്തികേയന്‍, അഡ്വ. വി.എൽ. ഭാഗ്യലക്ഷ്മി എന്നിവര്‍ കോടതിയില്‍ ഹാജരായി.

മകള്‍ക്കുനേരേ ലൈംഗികാതിക്രമം നടത്തിയ പിതാവിന് 18 വര്‍ഷം തടവും പിഴയും ശിക്ഷ

ചേര്‍ത്തല: നാലരവയസുകാരിയായ മകള്‍ക്കു നേരേ ലൈംഗികാതിക്രമം നടത്തിയെന്ന കേസില്‍ പിതാവിന് 18 വര്‍ഷം തടവും ഒന്നരലക്ഷം പിഴയും ശിക്ഷ. ഫോര്‍ട്ടുകൊച്ചി തുരുത്തിവെളി കോളനി നസിയത്തു വീട്ടില്‍ ചേര്‍ത്തല പാണാവള്ളി പഞ്ചായത്ത് രണ്ടാം വാര്‍ഡ് തൃച്ചാറ്റുകുളം ചെട്ടുകാട് വീട്ടില്‍ വാടകയ്ക്കു താമസിച്ചിരുന്ന സിറാജി (മാമു-39) നെയാണ് ചേര്‍ത്തല പ്രത്യേക അതിവേഗ പോക്‌സോ കോടതി ജഡ്ജി കെ.എം. വാണി ശിക്ഷിച്ച് ഉത്തരവായത്. 2022 ഓഗസ്റ്റ് അഞ്ചിന് പൂച്ചാക്കല്‍ പോലീസാണ് കേസ് രജിസ്റ്റര്‍ ചെയ്തത്. അമ്മ ജോലിക്കു പോയ സമയം കുട്ടിയെ സ്‌കൂളില്‍നിന്നു വിളിച്ചുകൊണ്ടുവന്ന് ഉപദ്രവിക്കുകയായിരുന്നു. പിന്നീട് കുട്ടിയില്‍നിന്നു കാര്യങ്ങള്‍ മനസിലാക്കിയ അമ്മയുടെ പരാതിയിലാണ് കേസെടുത്തത്. മൂന്നു വകുപ്പുകളിലായി ആറുവര്‍ഷം വീതമാണ് തടവും 50,000 പിഴയും വിധിച്ചത്. സബ് ഇന്‍സ്പക്ടര്‍ കെ.ജെ. ജേക്കബിന്‍റെ നേതൃത്വത്തില്‍ നടന്ന അന്വേഷണത്തില്‍ പോലീസ് ഇന്‍സ്പക്ടര്‍ എം. അജയമോഹനാണ് കുറ്റപത്രം സമര്‍പ്പിച്ചത്. പ്രോസിക്യൂഷനുവേണ്ടി സ്‌പെഷല്‍ പബ്ലിക് പ്രോസിക്യൂട്ടര്‍ അഡ്വ. ബിനാ കാര്‍ത്തികേയന്‍ ഹാജരായി.

കാരിച്ചാൽ സെന്‍റ് ജോർജ് പള്ളിയിൽ തിരുനാൾ ഇന്ന് തുടങ്ങും

ഹരിപ്പാട്: കാരിച്ചാൽ സെന്‍റ് ജോർജ് ഓർത്തഡോക്സ് സുറിയാനി പള്ളിയിൽ വി.ഗീവർഗീസ് സഹദായുടെ ഓർമ്മതിരുന്നാൾ ഇന്ന് മുതൽ മെയ്‌ 6 വരെ നടക്കും. നവീകരിച്ച എംഡി പാരിഷ് ഹാൾ കൂദാശയും ഉദ്‌ഘാടനവും ഇന്ന് വൈകിട്ട് 3ന് നടക്കും.മാവേലിക്കര ഭദ്രാസന മെത്രോപ്പോലിത്ത ഏബ്രഹാം മാർ എപ്പിഫാനിയോസ് മെത്രോപ്പോലിത്ത കൂദാശ നിർവഹിക്കും. രമേശ്‌ ചെന്നിത്തല എംഎൽഎ സമ്മേളനം ഉദ്ഘാടനം ചെയ്യും. ഏബ്രഹാം മാർ എപ്പിഫാനിയോസ് മെത്രോപ്പോലിത്ത അധ്യക്ഷനാകും. തോമസ്.കെ. തോമസ് എംഎൽഎ മുഖ്യപ്രഭാഷണം നടത്തും. വൈകിട്ട് 5.30ന് എബ്രഹാം മാർ എപ്പിഫാനിയോസ് മെത്രോപ്പോലിത്ത കൊടിയേറ്റ് കർമം നിർവഹിക്കും. തിരുന്നാൾ ദിനങ്ങളിൽ രാത്രിനമസ്കാരം, പ്രഭാതനമസ്കാരം, സന്ധ്യാനമസ്കാരം, സമർപ്പണ പ്രാർഥന എന്നിവ നടക്കും.നാളെ രാവിലെ 8ന് കുർബാനയ്ക്ക് ഫാ. മനോജ്‌ മാത്യു നേതൃത്വം നൽകും. 28ന് രാവിലെ 7.15ന് ഫാ. ഡോ.ജേക്കബ് മാത്യു കാരിച്ചാൽ നേതൃത്വം നൽകുന്ന കുർബാന. തുടർന്നുള്ള ദിവസങ്ങളിൽ ബസലേൽ റമ്പാൻ,ഫാ.ജോർജ് വർഗീസ്, ഫാ. പ്രവീൺ ജോൺമാത്യൂസ്, ഫാ.കെ.പി വർഗീസ്, ഫാ.ജിജി.കെ.തോമസ് എന്നിവരുടെ നേതൃത്വത്തിൽ കുർബാന നടക്കും.

ഫ്രാന്‍സിസ് മാര്‍പാപ്പ പ്രത്യാശയുടെ വഴിയിലേക്ക് ലോക ജനതയെ ആനയിച്ച കാരുണ്യത്തിന്‍റെ മുഖം: ഫാ. സിറിള്‍ ചേപ്പില

ആലപ്പുഴ: ക്രൈസ്തവ വിശ്വാസത്തിന്‍റെ ആകെ തുകയായ സ്‌നേഹം പകര്‍ന്ന് പ്രത്യാശയുടെ വഴിലേക്ക് ലോകജനത്തെ ആനയിച്ച കാരുണ്യത്തിന്‍റെ മുഖമായിരുന്നു ഫ്രാന്‍സിസ് മാര്‍പാപ്പയെന്ന് കിടങ്ങറ സെന്‍റ് ഗ്രിഗോറിയോസ് പള്ളി വികാരി ഫാ. സിറിള്‍ ചേപ്പില. കിടങ്ങറ പള്ളിയില്‍ ഫ്രാന്‍സിസ് മാര്‍പാപ്പായ്ക്കായി പ്രത്യേകമായി നടത്തിയ പരിശുദ്ധ കുര്‍ബാനയില്‍ അനുസ്മരണ സന്ദേശം നല്‍കുകയായിരുന്നു അദ്ദേഹം. ദുര്‍ബലരുടെ അടുത്തുചെന്ന് അവരോട് സംസാരിച്ച് കഷ്ടത അനുഭവിക്കുന്നവര്‍ക്കൊപ്പം അവസാന ശ്വാസംവരെ ശബ്ദമുയര്‍ത്തിയ മനുഷ്യസ്‌നേഹിയും നല്ല ഇടയനുമായിരുന്നു ഫ്രാൻസിസ് മാർപാപ്പ. സമാധാനത്തിനുവേണ്ടി അശ്രാന്തം പരിശ്രമിച്ച കാലഘട്ടത്തിന്‍റെ പ്രവാചകനായിരുന്നു ഫ്രാന്‍സിസ് മാര്‍പാപ്പയെന്ന് ഫാ. സിറിള്‍ ചേപ്പില അനുസ്മരണ സന്ദേശത്തില്‍ പറഞ്ഞു. പരിശുദ്ധ കുര്‍ബാനയും ഒപ്പീസും നടത്തുയും സ്‌നേഹദീപം തെളിക്കുകയുംചെയ്തു.

റോട്ടറി ക്ലബ്ബിന്‍റെ അധിനിവേശ സസ്യ നിര്‍മാര്‍ജന പദ്ധതി ഇന്ന് തുടങ്ങും

ചേര്‍ത്തല: ചേര്‍ത്തല റോട്ടറി ക്ലബ്ബിന്‍റെ അധിനിവേശ സസ്യ നിര്‍മാര്‍ജന പദ്ധതി ഹരിതരക്ഷ 26 ന് പാതിരാമണലില്‍ തുടങ്ങും. പദ്ധതിയുടെ ഒരുക്കങ്ങള്‍ പൂര്‍ത്തിയായതായി റോട്ടറി ക്ലബ് പ്രസിഡന്‍റ് സുമേഷ് ചെറുവാരണം, സെക്രട്ടറി വിനോദ് കുമാര്‍, മറ്റു ഭാരവാഹികളായ ബിനു ജോണ്‍, പി.എസ്. മനോജ്, ടി.കെ. അനിലാല്‍ കൊച്ചുകുട്ടന്‍ എന്നിവര്‍ പത്രസമ്മേളനത്തില്‍ അറിയിച്ചു. കേരളത്തിലെ കാര്‍ഷികവിളകളെയും തനതു സസ്യജാലങ്ങളെയും നശിപ്പിക്കുകയും ആവാസ വ്യവസ്ഥ തകര്‍ക്കുകയും ചെയ്യുന്ന അധിനിവേശ സസ്യങ്ങളെ തുടച്ചു നീക്കുക എന്ന പദ്ധതിയാണ് നടപ്പാക്കുന്നത്. പ്ലാസ്റ്റിക് നിര്‍മാര്‍ജനം, കണ്ടല്‍ ചെടികള്‍ നടല്‍, വിത്തുകള്‍ നടല്‍, ആയുര്‍വേദ സസ്യത്തോട്ടം നിര്‍മാണം, അധിനിവേശ സസ്യങ്ങളില്‍നിന്ന് കമ്പോസ്റ്റ് വളം നിര്‍മാണ പരിശീലനം എന്നിവയും പാതിരാമണലില്‍ നടപ്പാക്കും. കോളജ്-സ്‌കൂള്‍ വിദ്യാര്‍ഥികള്‍, അധ്യാപകര്‍, തൊഴിലുറപ്പ് തൊഴിലാളികള്‍, കൃഷി വകുപ്പ്, തദ്ദേശ സ്ഥാപനങ്ങള്‍ തുടങ്ങിയവയുടെ സഹായത്തോടെയും സഹകരണത്തോടെയുമാണ് പദ്ധതി നടപ്പാക്കുന്നത്. 26ന് രാവിലെ എട്ടിന് മന്ത്രി പി. പ്രസാദ് പദ്ധതി ഉദ്ഘാടനം ചെയ്യും. കായിപ്പുറം ജെട്ടിയില്‍ ചേരുന്ന സമ്മേളനത്തില്‍ ജില്ലാ കളക്ടര്‍ അലക്‌സ് വര്‍ഗീസ് മുഖ്യാതിഥിയാകും. കായല്‍ ഗവേഷണ കേന്ദ്രം ഡയറക്ടര്‍ ഡോ. കെ.ജി. പത്മകുമാര്‍ വിഷയം അവതരിപ്പിക്കും.

സാമൂഹ്യ വിരുദ്ധർ സ്കൂളിൽ വൻ നാശനഷ്ടം വരുത്തി

മാന്നാർ: പത്താമുദയ രാത്രിയിൽ ബുധനൂർ ഗവ. ഹയർ സെക്കൻഡറി സ്കൂളിൽ വ്യാപക നാശം വരുത്തിയതായി പരാതി. സ്കൂളിലെ ടാപ്പുകൾ തകർക്കുകയും ലക്ഷങ്ങൾ മുടക്കി നിർമിച്ച മിന്നാപാർക്ക് തല്ലിത്തകർക്കുകയും ചെയ്തു. സമീപ ക്ഷേത്രത്തിലെ ഉത്സവത്തിന്‍റെ മറവിലാണ് സ്കൂൾ വളപ്പിൽ സാമൂഹ്യ വിരുദ്ധർ അതിക്രമിച്ച് കയറിയത്. ഇവർ സ്കൂളിലെ കുടിവെളള വിതരണത്തിനുള്ള പത്തോളം പൈപ്പ് ടാപ്പുകൾ ഒടിച്ചു നശിപ്പിച്ചു. പരിസ്ഥിതി സംരക്ഷണ സമിതി വച്ചുപിടിപ്പിച്ച ഫലവൃക്ഷാദികൾ ഉൾപ്പെടെ ചെടികളും നശിപ്പിച്ചവയിൽ ഉൾപ്പെടുന്നു. കുട്ടികളുടെ മൂത്രപ്പുരയുടെ വാതിൽ നശിപ്പിച്ചു. 10 ലക്ഷം രൂപ മുടക്കി നിർമിച്ച പ്രീ പ്രൈമറി വർണക്കൂടാരത്തിനു വേണ്ടിയുള്ള ബോർഡുകൾ, സ്കൂൾ നോട്ടീസ് ബോർഡ്, പോസ്റ്റർ എന്നിവയും നരിപ്പിച്ചു. 20 ലക്ഷം രൂപയുടെ നാശനഷ്ടങ്ങളാണ് സാമൂഹ്യ വിരുദ്ധർ വരുത്തിയത്. സംഭവത്തിൽ പിടിഎ എക്സിക്യൂട്ടീവ് യോഗം കൂടി പ്രതിഷേധം രേഖപ്പടുത്തുകയും പോലീസിൽ പരാതി നൽകുകയും ചെയ്തു. കുറ്റക്കാരെ ഉടൻ പിടികൂടണമെന്ന് പിടിഎ യോഗം ആവശ്യപ്പെട്ടു. സ്കൂൾ ചുറ്റുമതിൽ കെട്ടി സംരക്ഷിക്കണമെന്നും യോഗം ആവശ്യപ്പെട്ടു.

ചക്കരക്കടവ് സെന്‍റ് ജോര്‍ജ് പള്ളിയില്‍ തിരുനാള്‍

ആലപ്പുഴ: പുത്തനങ്ങാടി ചക്കരക്കടവ് സെന്‍റ് ജോര്‍ജ് പള്ളിയില്‍ ഗീവര്‍ഗീസ് സഹദായുടെ തിരുനാളിനു കൊടിയേറി. ഇന്നലെ വൈകുന്നേരം അഞ്ചിന് വികാരി ഫാ. ജോബിന്‍ തൈപ്പറമ്പില്‍ കൊടിയേറ്റി. ഇന്നു രാവിലെ ആറിന് സപ്ര, വിശുദ്ധ കുര്‍ബാന, വൈകുന്നേരം അഞ്ചിന് വിശുദ്ധകുര്‍ബാന, പ്രസംഗം, മധ്യസ്ഥ പ്രാര്‍ഥന ലദീഞ്ഞ് എന്നിവ നടക്കും. ഫാ. തോമസ് മംഗലത്ത് കാര്‍മികനാവും. നാളെ രാവിലെ 7.30നു കുട്ടികളുടെ വിശുദ്ധകുര്‍ബാന സ്വീകരണം. തുടര്‍ന്ന് സപ്ര, വിശുദ്ധകുര്‍ബാന, പ്രസംഗം. റവ.ഡോ. ജോസ് ആലഞ്ചേരി കാര്‍മികനാവും. വൈകുന്നേരം അഞ്ചിന് വിശുദ്ധ കുര്‍ബാന സീറോ മലങ്കര. ഫാ. രഞ്ജിത്ത് മടത്തിറമ്പില്‍ കാര്‍മികനാവും. തിങ്കളാഴ്ച രാവിലെ 6.15ന് സപ്ര, വിശുദ്ധ കുര്‍ബാന. വൈകുന്നേരം അഞ്ചിന് വിശുദ്ധ കുര്‍ബാന, പ്രസംഗം, മധ്യസ്ഥ പ്രാര്‍ഥന, ലദീഞ്ഞ്. ഫാ. മാത്യു പുളിച്ചമാക്കല്‍ കാര്‍മികത്വം വഹിക്കും. മേയ് മൂന്നിന് 6.30ന് തിരുനാള്‍ പ്രദക്ഷിണം നടക്കും. നാലിന് വൈകുന്നേരം നാലിന് ആഘോഷമായ വിശുദ്ധ കുര്‍ബാന. ഫാ. ജോറിന്‍ ഇല്ലിക്കല്‍ സിഎംഐ തിരുനാള്‍ സന്ദേശം നല്‍കും. ആറിനു പട്ടണ പ്രദക്ഷിണം. ഫാ. വര്‍ഗീസ് കായിത്ര, ഫാ. സനു വലിയവീട് സിഎംഐ എന്നിവര്‍ നേതൃത്വം നല്‍കും.

ഹാർബർ ഓഫീസിനു മുന്നിൽ കഞ്ഞിവച്ചും കപ്പ പുഴുങ്ങിയും മത്സ്യത്തൊഴിലാളികൾ

ചേര്‍ത്തല: അർത്തുങ്കൽ ഹാർബർ നിർമാണം അടിയന്തരമായി പൂർത്തീകരിക്കണമെന്ന് ആവശ്യപ്പെട്ട് കേരള സ്വതന്ത്ര മത്സ്യതൊഴിലാളി ഫെഡറേഷന്‍റെ നേതൃത്വത്തിൽ ഹാർബർ എൻജിനിയറിംഗ് ഓഫീസിനു മുന്നിൽ മത്സ്യത്തൊഴിലാളികൾ നടത്തിവരുന്ന സത്യഗ്രഹം 30 ദിവസം പിന്നിട്ടിട്ടും നടപടിയാകാത്തതിൽ പ്രതിഷേധിച്ച് മത്സ്യതൊഴിലാളികള്‍ ഹാർബർ എൻജിനിയറിംഗ് ഓഫീസിനു മുന്നിൽ അടപ്പുകൾ കൂട്ടി കഞ്ഞിവച്ചും കപ്പ പുഴുങ്ങിയും പ്രതിഷേധിച്ചു. ആയിരംതൈ പള്ളിക്കു മുന്നിൽനിന്നു പ്രകടനമായെത്തിയ പ്രതിഷേധസമരത്തില്‍ നൂറുകണക്കിന് മത്സ്യത്തൊഴിലാളികൾ പങ്കെടുത്തു. പ്രതിഷേധ സമരം ഫെഡറേഷൻ സംസ്ഥാന പ്രസിഡന്‍റ് ജാക്സൺ പൊള്ളയിൽ ഉദ്ഘാടനം ചെയ്തു. 24 വർഷം പിന്നിട്ട ഹാർബർ നിർമാണത്തിന് 161 കോടി രൂപ ഖജനാവിൽ എത്തിയിട്ടും പുലിമുട്ടുകളുടെ ടെൻഡർ നടപടികൾ പൂർത്തിയാക്കുന്നതിന് സാങ്കേതിക കാരണങ്ങൾ പറഞ്ഞ് ഫയലുകൾ വൈകിക്കുന്നത് കൊച്ചിയിലെ മത്സ്യലോബിക്ക് വേണ്ടിയാണെന്ന് അദ്ദേഹം ആരോപിച്ചു. ജില്ലാ പ്രസിഡന്‍റ് രാജു ആശ്രയം, ജില്ലാ സെക്രട്ടറി ആന്‍റണി കുരിശുങ്കൽ, ജിജോ ഫ്രാൻസിസ്, ഷാജി പീറ്റർ തുടങ്ങിയവർ പ്രസംഗിച്ചു. ആയിരംപള്ളിക്കു മുന്നിൽ നിന്നാരംഭിച്ച പ്രതിഷേധ ജാഥ ആയിരംതൈ ലിറ്റിൽ ഫ്ലവർ പള്ളിവികാരി ഫാ. ജോസ് അറയ്ക്കൽ ഫ്ലാഗ് ഓഫ് ചെയ്തു.

ദേശീയപാതയിൽ അടിപ്പാത നിർമാണം: ഗതാഗത പരിഷ്‌കരണം യാത്രക്കാരെ വലയ്ക്കുന്നു

കായംകുളം: ദേശീയപാതയില്‍ അടിപ്പാത നിര്‍മാണവുമായി ബന്ധപ്പെട്ട് ഏര്‍പ്പെടുത്തിയിട്ടുള്ള ഗതാഗത പരിഷ്‌കരണം യാത്രക്കാരെ വലയ്ക്കുന്നു. കായംകുളം ഒഎന്‍കെ ജംഗ്ഷനില്‍ ഏര്‍പ്പെടുത്തിയ ഗതാഗത പരിഷ്‌കരണമാണ് യാത്രക്കാര്‍ക്കു ദുരിതമായി തീര്‍ന്നിരിക്കുന്നത്. അശാസ്ത്രീയമായ രീതിയില്‍ ഏര്‍പ്പെടുത്തിയിട്ടുള്ള പരിഷ്‌കാരം കാരണം അപകട പരമ്പരയാണ് ഇവിടെ നടക്കുന്നത്. കാര്‍ത്തികപ്പള്ളി, ആറാട്ടുപുഴ ഉള്‍പ്പെടുന്ന തീരദേശ റോഡുമായി ബന്ധിപ്പിക്കുന്ന ജംഗ്ഷന്‍ എന്ന നിലയില്‍ ഒഎന്‍കെ ജംഗ്ഷനില്‍ നാലു ദിക്കുകളില്‍നിന്നു വാഹനങ്ങള്‍ എത്തും. ഇങ്ങനെ എത്തുന്ന വാഹനങ്ങളെ വ്യക്തമായ ആസൂത്രണമില്ലാതെയാണ് തിരിച്ചുവിടുന്നതെന്ന് തുടക്കം മുതല്‍ പരാതി ഉയര്‍ന്നിരുന്നു. തീരദേശ റോഡില്‍നിന്നും മാര്‍ക്കറ്റില്‍നിന്നും വാഹനങ്ങള്‍ നേരിട്ട് ദേശീയപാതയിലേക്കു കയറുന്ന വിധത്തില്‍ വരുത്തിയ ഗതാഗത മാറ്റമാണ് ഇവിടെ അപകടങ്ങള്‍ വര്‍ധിപ്പിക്കുന്നതെന്നാണ് പ്രധാന പരാതി. ദേശീയപാതയില്‍ ഇരുദിശയില്‍നിന്നു തുടരെ വാഹനങ്ങള്‍ എത്തുന്നതിന്‍റെ മധ്യത്തിലേക്കാണ് ഇടറോഡുകളില്‍നിന്ന് വാഹനങ്ങള്‍ എത്തിപ്പെടുന്നത്. ഇതാണ് അപകടങ്ങള്‍ക്ക് പ്രധാന കാരണമാകുന്നത്. ഇടറോഡുകളില്‍നിന്ന് എത്തുന്ന വാഹനങ്ങള്‍ ദേശീയപാതയുടെ ഇടതുവശത്തേക്ക് ആദ്യം തിരിച്ചുവിട്ട ശേഷം ദേശീയപാതയിലേക്കു കയറുന്ന വിധത്തില്‍ ഗതാഗത പരിഷ്‌കാരം ഏര്‍പ്പെടുത്തിയിരുന്നു എങ്കില്‍ വാഹനങ്ങള്‍ സ്ഥിരമായി അപകടത്തില്‍പ്പെടുന്ന സാഹചര്യം ഒഴിവാക്കാമായിരുന്നുവെന്ന് നാട്ടുകാര്‍ പറഞ്ഞു. മറ്റു പല ജംഗ്ഷനുകളിലും അടിപ്പാത നിര്‍മാണത്തിന്‍റെ ഭാഗമായി കുറ്റമറ്റ രീതിയിലാണ് പരിഷ്‌കാരം ഏര്‍പ്പെടുത്തിയിട്ടുള്ളത്. ഇവിടെയും ഈ രീതി അവലംബിക്കണമെന്നാണ് ജനങ്ങളുടെ ആവശ്യം. രണ്ട് സര്‍വീസ് പാലങ്ങള്‍ക്ക് അനുമതി കായംകുളം പാലത്തിന് സമാന്തരമായി രണ്ടു സര്‍വീസ് പാലങ്ങള്‍ക്ക് അനുമതി ലഭിച്ചു. ദേശീയപാതയില്‍ സര്‍വീസ് റോഡുകള്‍ നിര്‍മിക്കുന്നതിനായാണ് രണ്ടു സര്‍വീസ് പാലങ്ങള്‍ക്കു കൂടി അനുമതി ലഭിച്ചത്. ദേശീയപാത നവീകരണവുമായി ബന്ധപ്പെട്ട അവലോകന യോഗത്തില്‍ യു. പ്രതിഭ എംഎല്‍എയാണ് ഇക്കാര്യം ചൂണ്ടിക്കാട്ടിയത്. കരിപ്പുഴ തോട്ടിലൂടെയുള്ള തോണിയാത്രയ്ക്കു തടസമുണ്ടാകാത്ത വിധത്തില്‍ പൊക്കമുള്ള രണ്ടു ചെറിയ പാലങ്ങളാണ് നിലവില്‍ നിര്‍മിക്കുന്ന പാലങ്ങള്‍ക്ക് ഇരുവശത്തുമായി നിര്‍മിക്കുക.

ഹൈക്കോടതി ഇടപെടലിനെത്തുടർന്ന് സംയുക്ത പരിശോധന

ചെങ്ങന്നൂർ: രൂക്ഷമായ കൈയേറ്റത്തെ തുടർന്ന് ഒഴുക്ക് നിലച്ച ഉത്തരപ്പള്ളിയാറിന്‍റെ പാരിസ്ഥിതിക പ്രശ്നങ്ങൾ പഠിക്കാൻ ഹൈക്കോടതി ഉത്തരവിട്ടതിനെത്തുടർന്ന് വിവിധ വകുപ്പുകൾ സംയുക്ത പരിശോധന നടത്തി. ചീഫ് സെക്രട്ടറിയുടെ നിർദേശ പ്രകാരം ആലപ്പുഴ ജില്ലാ കളക്ടറുടെ നേതൃത്വത്തിലായിരുന്നു റവന്യൂ, പഞ്ചായത്ത്, ഇറിഗേഷൻ, പിഡബ്ല്യുഡി എന്നീ വകുപ്പുകളിലെ ഉദ്യോഗസ്ഥർ ഇന്നലെ പ്രദേശത്ത് പരിശോധന നടത്തിയത്. റൂറൽ ഡെവലപമെന്‍റ് സൊസൈറ്റിയുടെ പരാതിയെത്തുടർന്നാണ് ഹൈക്കോടതി വിഷയത്തിൽ ഇടപെട്ടത്. ജൂൺ മാസത്തിനകം പഠനം നടത്തി റിപ്പോർട്ട് സമർപ്പിക്കാനാണ് കോടതി നിർദേശിച്ചിരിക്കുന്നത്. വെൺമണി പുത്താറ്റിൻകരയിൽ തുടങ്ങി ആലാ, ചെറിയനാട്, പുലിയൂർ, ബുധനൂർ പഞ്ചായത്തിലെ എണ്ണയ്ക്കാട് വില്ലേജിലെ ഇല്ലിമലയിൽ അവസാനിക്കുന്ന ഉത്തരപ്പള്ളിയാറിന്‍റെ നിലവിലെ പാരിസ്ഥിതിക അവസ്ഥയും കൈയേറ്റങ്ങളുമാണ് പ്രധാനമായും പരിശോധിക്കുന്നത്. ആലപ്പുഴ ജില്ലാ കളക്ടർ അലക്സ് വർഗീസ് ഐഎഎസ്, ചെങ്ങന്നൂർ ആർഡിഒ വിജയസേനൻ, ആലപ്പുഴ (എൽആർ) ഡെപ്യൂട്ടി കളക്ടർ ജോളി ജോസഫ്, ചെങ്ങന്നൂർ ഭൂരേഖ തഹസിൽദാർ ഷീബ മാത്യു, ഡെപ്യൂട്ടി തഹസിൽദാർ സ്റ്റാൻലി ജോൺ, ആലപ്പുഴ ജോയിന്‍റ് ഡയറക്ടർ ശ്രീകുമാർ, ആലപ്പുഴ പഞ്ചായത്ത് ഐവിഒ ഉദയസിംഹൻ, വെൺമണി, ആലാ, ചെറിയനാട്, പുലിയൂർ പഞ്ചായത്ത് പ്രസിഡന്‍റുമാർ, വൈസ് പ്രസിഡന്‍റുമാർ, വില്ലേ ജ് ഓഫീസർമാർ, പഞ്ചായത്ത് സെക്രട്ടറിമാർ, ഇറിഗേഷൻ എൻജിനീയർമാർ തുടങ്ങിയവർ പരിശോധനയിൽ പങ്കെടുത്തു. റവന്യൂ റിപ്പോർട്ട് ഞെട്ടിക്കുന്ന വിവരങ്ങളുമായി റവന്യൂ റിപ്പോർട്ട്. വർഷങ്ങളായുള്ള കൈയേറ്റങ്ങൾ ഉത്തരപ്പള്ളിയാറിനെ മരണത്തിലേക്കു തള്ളിവിട്ട അവസ്ഥയിലാണ്. റവന്യൂ സംഘം നടത്തിയ സർവേയിൽ ഞെട്ടിക്കുന്ന വിവരങ്ങളാണ് പുറത്തുവന്നത്. പലയിടത്തും ആറിന്‍റെ രേഖകൾ രാജഭരണ കാലത്തെ രജിസ്റ്ററുകളിൽപോലും കാണാനില്ല. ഉത്തരപ്പള്ളിയാർ സർവേയിൽ ചെറുതും വലുതുമായി 145 കയ്യേറ്റങ്ങളാണ് കണ്ടെത്തിയത്. വെൺമണി, ആലാ, ചെറിയനാട്, പുലിയൂർ, എണ്ണയ്ക്കാട് വില്ലേജുകളിലൂടെ ഒഴുകുന്ന ആറിന്‍റെ 10 കിലോമീറ്റർ ഭാഗം ഇപ്പോൾ നേർത്ത നീർച്ചാൽ മാത്രമാണ്. കുളിക്കാംപാലം മുതൽ രണ്ടു കിലോമീറ്റർ ദൂരം ആറ് പൂർണമായും അപ്രത്യക്ഷമായി. എന്നാൽ, ആറ് ഒഴുകിയിരുന്നതിന്‍റെ അടയാളങ്ങൾ ഇപ്പോഴും ഭൂമിയിൽ കാണാം. പമ്പയെയും അച്ഛൻ കോവിലാറിനെയും തമ്മിൽ ബന്ധിപ്പിക്കുന്ന 18 കിലോമീറ്റർ നീളത്തിലാണ് ഉത്തരപ്പള്ളിയാർ ഒഴുകിയിരുന്നത്. തുടർനടപടികൾ കഴിഞ്ഞ 40 വർഷത്തോളമായി ആറ് ഓർമ മാത്രമായി മാറിയിരിക്കുന്നു. കരപ്രദേശങ്ങളിൽ പലയിടത്തും ഇരുനില കെട്ടിടങ്ങൾവരെ ഉയർന്നിട്ടുണ്ട്. ആറ് ഒഴുകിയിരുന്നതിന്‍റെ ചരിത്രമറിയാതെയാണ് പലരും ഇവിടെ ഭൂമി വാങ്ങുകയും കെട്ടിടങ്ങൾ നിർമിക്കുകയും ചെയ്തത്. വസ്തുവിന്‍റെ രേഖകളും കരമടച്ച രസീതുകളും കൈവശമുള്ളവരും ഇക്കൂട്ടത്തിലുണ്ട്. അതിനിടെ, ആറിനെ വീണ്ടെടുക്കാനുള്ള പരിസ്ഥിതി പ്രവർത്തകരുടെയും നാട്ടുകാരുടെയും ശ്രമങ്ങൾക്ക് സർക്കാർ അനുകൂല നിലപാട് സ്വീകരിക്കുകയും പുനരുജ്ജീവനത്തിന് പച്ചക്കൊടി കാണിക്കുകയും ചെയ്തിരുന്നു. 2018-ൽ ആറിന്‍റെ പുനരുജ്ജീവന നടപടികൾക്ക് അനുകൂലമായി ഹൈക്കോടതി വിധിയും വന്നിരുന്നു. ഇതിന്‍റെ പകർപ്പുകൾ ബന്ധപ്പെട്ട തദ്ദേശസ്ഥാപനങ്ങൾക്കും റവന്യൂ, ഇറിഗേഷൻ, കൃഷി വകുപ്പുകൾക്കും കൈമാറിയിരുന്നു. എന്നാൽ, ഏഴു വർഷം പിന്നിടുമ്പോഴും തുടർനടപടികൾ ഉദ്യോഗസ്ഥ തലത്തിൽ ചുവപ്പു നാടയിൽ കുരുങ്ങിക്കിടക്കുകയായിന്നു. ഹൈക്കോടതിയുടെ പുതിയ ഇടപെടൽ ആറിന് ജീവൻ തിരിച്ചുകിട്ടാൻ സഹായിക്കുമെന്ന പ്രതീക്ഷയിലാണ് പരിസ്ഥിതിപ്രവർത്തകരും നാട്ടുകാരും.

മുതുകുളം സെന്‍റ് ജോര്‍ജ് ഓര്‍ത്തഡോക്സ് പള്ളി തിരുനാളിന് 27ന് കൊടിയേറും

കായംകുളം: മുതുകുളം സെന്‍റ് ജോര്‍ജ് ഓര്‍ത്തഡോക്സ് പള്ളിയില്‍ വിശുദ്ധ ഗീവര്‍ഗീസ് സഹദായുടെ തിരുനാൾ 27 മുതല്‍ മേയ് 3 വരെ നടക്കും. 27ന് തിരുനാൾ കൊടിയേറ്റ് വികാരി റവ. ഫാ. വി. തോമസ് നിര്‍വ്വഹിക്കും. 30ന് വൈകിട്ട് 6 ന് സന്ധ്യാ നമസ്കാരം, ഗാനശുശ്രൂഷ, 7ന് വചന ശുശ്രൂഷയ്ക്ക് ഫാ. ജോണ്‍ ടി. വര്‍ഗീസ് കൂടാരത്തില്‍ നേതൃത്വം നൽകും. മേയ് ഒന്നിന് വൈകിട്ട് 6.30ന് ഗാനശുശ്രൂഷ, 7 ന് വചനശുശ്രൂഷ ഫാ ജോണ്‍. ടി. വര്‍ഗീസ് കുളക്കട നയിക്കും. മെയ് രണ്ടിനു വൈകിട്ട് 6ന് സന്ധ്യാനമസ്കാരം, ആകാശദീപക്കാഴ്ച, വൈകിട്ട് 7ന് ഭക്തിനിര്‍ഭരമായ റാസ. രാത്രി 9.20ന് ആശീര്‍വാദം. മേയ് 3ന് രാവിലെ 7ന് പ്രഭാത നമസ്കാരം 8ന് വിശുദ്ധ മൂന്നിന്മേല്‍ കുര്‍ബാനയ്ക്ക് ഡോ. സഖറിയാസ് മാര്‍ അപ്രേം മെത്രാപ്പോലീത്ത മുഖ്യകാര്‍മികത്വം വഹിക്കും. 25 വര്‍ഷമായി പ്രധാന ശുശ്രൂഷകനായി പള്ളിയിൽ സേവനമനുഷ്ഠിക്കുന്ന കണ്ടത്തില്‍ കുഞ്ഞുമോന്‍ ജോൺ, സംസ്ഥാന നെറ്റ്ബോള്‍ ചാമ്പ്യന്‍ഷിപ്പില്‍ സംസ്ഥാന ക്യാപ്റ്റനായി തെരഞ്ഞെടുക്കപ്പെട്ട ഷിജിന്‍. ജെ. കുഞ്ഞുമോൻ എന്നിവർക്ക് ആദരവ് നൽകും. തുടര്‍ന്ന് പ്രദക്ഷിണം കൊടിയിറക്ക്, ആശീര്‍വാദം, വെച്ചൂട്ട് സദ്യ എന്നിവ നടക്കും.

മെഗാ മെഡിക്കൽ ക്യാമ്പ് രജിസ്ട്രേഷൻ ആരംഭിച്ചു

ചേര്‍ത്തല: എറണാകുളം അമൃത ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസിന്‍റെ സഹകരണത്തോടെ കൃഷി മന്ത്രി പി.പ്രസാദ് സംഘടിപ്പിക്കുന്ന മെഗാ മെഡിക്കൽ കാമ്പിൽ പങ്കെടുക്കുന്നതിനുള്ള രജിസ്ട്രേഷൻ ആരംഭിച്ചു. ചേർത്തല എസ്എന്‍എം ജിബിഎച്ച്എസ് സ്കൂളിൽ മേയ് നാലിനാണ് മെഗാ മെഡിക്കൽ ക്യാമ്പ്. ചേർത്തല മണ്ഡലത്തിലുള്ളവർക്കാണ് ക്യാമ്പിൽ പങ്കെടുക്കാനാവുക. പഞ്ചായത്ത് ഓഫീസുകൾ, ചേർത്തല മുനിസിപ്പൽ ഓഫീസ്, മന്ത്രിയുടെ മുനിസിപ്പൽ ഗാന്ധി ബസാർ ഷോപ്പിംഗ് കോംപ്ലക്സിൽ പ്രവർത്തിക്കുന്ന ഓഫീസ് എന്നിവിടങ്ങളിൽ രജിസ്ട്രേഷൻ നടത്തുന്നതിനുള്ള ക്രമീകരണങ്ങൾ ഏർപ്പെടുത്തിയിട്ടുണ്ട്. ജനറൽ മെഡിസിൻ, ജനറൽ സർജറി, ഡെന്‍റൽ, കാർഡിയോളജി, പീഡിയാട്രിക്സ്, പീഡിയാട്രിക് കാർഡിയോളജി, ഗൈനക്കോളജി, ഇഎന്‍ടി, നേത്രരോഗം എന്നീ വിഭാഗങ്ങളായാണ് മെഡിക്കൽ ക്യാമ്പ് സംഘടിപ്പിക്കുന്നത്. ആദ്യം രജിസ്റ്റർ ചെയ്യുന്നവർക്കാണ് മുൻഗണന. ക്യാമ്പിൽ പങ്കെടുക്കുവാൻ ആഗ്രഹിക്കുന്നവർ 28നുളളില്‍ പേര് രജിസ്റ്റർ ചെയ്യണമെന്ന് സംഘാടക സമിതി ചെയർപേഴ്സൺ ഷേർളി ഭാർഗവൻ, ജനറൽ കൺവീനർ ടി.എസ്. അജയകുമാർ എന്നിവർ അറിയിച്ചു.

ആയിരം വീടുകളിൽ ലഹരി വിരുദ്ധ സന്ദേശം നൽകി

‌ചേര്‍ത്തല: തണ്ണീർമുക്കം ആസാദ് സംഘത്തിന്‍റെയും തണ്ണീർമുക്കം ഗവ. ഹയർ സെക്കൻഡറി സ്കൂൾ എൻഎസ്എസ് യൂണിറ്റ്, സ്കൗട്ട് ആൻഡ് ഗൈഡ്സ്് എന്നിവയുടെയും ആഭിമുഖ്യത്തിൽ ലഹരി വിരുദ്ധ ക്ലാസിന്‍റെയും ആയിരം വീടുകളിൽ ലഹരിവിരുദ്ധ സന്ദേശം എത്തിക്കുന്നതിന്‍റെയും ഉദ്ഘാടനം ചേർത്തല എക്‌സൈസ് സർക്കിൾ ഇൻസ്‌പെക്ടർ സി.എസ്. സുനിൽകുമാർ നിർവഹിച്ചു. ആസാദ് സംഘം പ്രസിഡന്‍റ് തണ്ണീർമുക്കം ശിവശങ്കരൻ അധ്യക്ഷത വഹിച്ചു. ബേബി തോമസ് പദ്ധതി വിശദീകരിച്ചു. മുഹമ്മ പോലീസ് സബ് ഇൻസ്‌പെക്ടർ മനോജ്‌ യു. കൃഷ്ണൻ മുഖ്യപ്രഭാഷണം നടത്തി. അസിസ്റ്റന്‍റ് എക്‌സൈസ് ഇൻസ്‌പെക്ടർ മനോജ്‌കുമാർ ക്ലാസ് എടുത്തു. പ്രോഗ്രാം ഓഫീസർ ഡോ. എ.എസ്. ബെൻറോയ് ലഹരിവിരുദ്ധ പ്രതിജ്ഞ ചൊല്ലിക്കൊടുത്തു. പിടിഎ പ്രസിഡന്‍റ് സൈജു, എൻ. സിദ്ധാർഥൻ, പ്രസന്നൻ ആർ കല്ലായി, ആർ.വിശ്വനാഥൻ എന്നിവർ പ്രസംഗിച്ചു.

അന്ധകാരനഴി മുതല്‍ പള്ളിത്തോട് വരെ കടല്‍ഭിത്തി നിര്‍മിക്കണം: കെ.സി.വേണുഗോപാല്‍ എംപി

ആലപ്പുഴ: അന്ധകാരനഴി മുതല്‍ പള്ളിത്തോടുവരെയുള്ള തീരപ്രദേശത്ത് കടലാക്രമണ ഭീഷണി നേരിടാന്‍ കരിങ്കല്ലുകള്‍ ഉപയോഗിച്ചോ ട്രെട്രാപോഡ് സ്ഥാപിച്ചോ കടല്‍ഭിത്തി നിര്‍മിക്കണമെന്ന് കെ.സി.വേണുഗോപാല്‍ എംപി. ഇക്കാര്യം ചൂണ്ടിക്കാട്ടി ജലവിഭവ വകുപ്പ് മന്ത്രി റോഷി അഗസ്റ്റിന് എംപി കത്തു നല്‍കി. ഏഴു കിലോമീറ്റര്‍ ദൈര്‍ഘ്യമുള്ള ഈ പ്രദേശത്തെ കടല്‍ഭിത്തി കാലങ്ങളായി തകര്‍ന്നനിലയിലാണ്. കഴിഞ്ഞ 15 വര്‍ഷത്തിനിടെ ഒരു അറ്റകുറ്റപ്പണിയും നടന്നിട്ടില്ല. സംരക്ഷണ കടല്‍ഭിത്തി തകര്‍ന്നതിനാല്‍ ഈ ഭാഗത്തെ ജനങ്ങള്‍ കടുത്ത ദുരിതത്തിലാണ്. ഹാര്‍ബര്‍ എന്‍ജിനിയറിംഗ് വകുപ്പ് തകര്‍ന്ന ഭാഗങ്ങളില്‍ പരിശോധന നടത്തി പലവട്ടം എസ്റ്റിമേറ്റുകള്‍ സര്‍ക്കാരിനു സമര്‍പ്പിച്ചെങ്കിലും ഒരു നിര്‍മാണ പ്രവര്‍ത്തനവും നടന്നില്ല. പള്ളിത്തോട് കൈരളി സ്റ്റോപ്പ്, പാട്ടം സ്‌കൂള്‍, പ്രതിഭയ്ക്ക് പടിഞ്ഞാറ് തുടങ്ങിയ ഭാഗങ്ങളില്‍ കടല്‍ഭിത്തി പൂര്‍ണമായും തകര്‍ന്നു. ഇതുകാരണം കാലവര്‍ഷത്തില്‍ രൂക്ഷമായ കടലാക്രമണത്തിൽ വീടുകളില്‍ വെള്ളം ഇരച്ചെത്തുന്നതു പതിവാണ്. ഓരോ വര്‍ഷവും മണല്‍വാട നിര്‍മാണത്തില്‍ ലക്ഷങ്ങള്‍ ചെലവഴിക്കുന്നെങ്കിലും അതൊരു ശാശ്വത പരിഹാരമല്ല. ജില്ലയുടെ അതിര്‍ത്തിയായ ചെല്ലാനം ഹാര്‍ബര്‍ മുതല്‍ പുത്തന്‍തോടുവരെയുള്ള ഭാഗത്ത് ടെട്രാപാഡ് നിര്‍മാണം നടപ്പിലാക്കിയതുപോലെ തെക്കേ ചെല്ലാനം മുതല്‍ തെക്കോട്ടുള്ള ഭാഗങ്ങളിലും ശാശ്വത കടല്‍ഭിത്തി നിര്‍മാണം വേണമെന്നും വേണുഗോപാല്‍ആവശ്യപ്പെട്ടു.

പൊന്തുവള്ളങ്ങളുടെ‍ നിരോധന നീക്കത്തിനെതിരേ സ്വതന്ത്ര മത്സ്യത്തൊഴിലാളി ഫെഡറേഷൻ

ചേര്‍ത്തല: തീരക്കടൽ കേന്ദ്രീകരിച്ച് പരിസ്ഥിതി സൗഹൃദ മത്സ്യബന്ധനം നടത്തുന്ന പൊന്തുവള്ളങ്ങളെ ടൂറിസത്തിന്‍റെ പേരിൽ നിരോധിക്കുവാനുള്ള നീക്കം ഉപേക്ഷിക്കണമെന്ന് കേരള സ്വതന്ത്ര മത്സ്യത്തൊഴിലാളി ഫെഡറേഷൻ. പൊന്തുവള്ളം മത്സ്യബന്ധനം സംരക്ഷിക്കണമെന്ന് ആവശ്യപ്പെട്ട് ഫെഡറേഷൻ തീരഗ്രാമങ്ങളിൽ നടത്തുന്ന സായാഹ്നമാർച്ച് അന്ധകാരനഴിയിൽനിന്ന് ആരംഭിച്ചു. പൊന്തുവള്ളങ്ങളുമായി അർത്തുങ്കൽ കടപ്പുറത്തുനിന്നാരംഭിച്ച രണ്ടാംഘട്ട സായാഹ്ന മാർച്ച് അർത്തുങ്കൽ ബസിലിക്ക റെക്ടർ ഫാ.യേശുദാസ് കാട്ടുങ്കൽതയ്യിൽ ഉദ്ഘാടനം ചെയ്തു. ഭരണകൂടങ്ങൾക്ക് ബാധ്യതയില്ലാതെ ഉപജീവനം നടത്തുന്നവരുടെ തൊഴിലും തൊഴിലിടവും സംരക്ഷിക്കുവാൻ സർക്കാരിനു ബാധ്യതയുണ്ടെന്ന് അദ്ദേഹം പറഞ്ഞു. സംസ്ഥാനത്ത് ഹാർബർ ഇല്ലാത്ത ജില്ലയായതിനാലാണ് പൊന്തുമത്സ്യബന്ധനം വ്യാപകമാകുന്നത്. ലാഭകരമല്ലാത്ത മറ്റു ഹാർബറുകളെ ആശ്രയിക്കേണ്ട യന്ത്രവൽകൃത മത്സ്യബന്ധനത്തിൽനിന്നു മാറി ചിന്തിക്കുവാൻ മത്സ്യത്തൊഴിലാളികളെ പ്രേരിപ്പിച്ച ഘടകം പഠനവിധേയമാക്കണമെന്നും അർത്തുങ്കൽ ബസിലിക്ക റെക്ടർ ഫാ. യേശുദാസ് കാട്ടുങ്കൽതയ്യിൽ പറഞ്ഞു. ജാക്സൺ പൊള്ളയിൽ, രാജു ആശ്രയം, ആന്‍റണി കുരിശുങ്കല്‍, അഡ്വ. നവിൻജീ നാദമണി, ബിപിൻദാസ് തോട്ടത്തിൽ, ജിജോ ഫ്രാൻസീസ് എന്നിവർ പ്രസംഗിച്ചു. അർത്തുങ്കൽ കടപ്പുറത്തുനിന്ന് ആരംഭിച്ച മാർച്ചിന് ഷാജി പീറ്റർ, ഔസേപ്പ് പള്ളിക്കത്തയ്യിൽ, പ്രജുദമിയാൻ എന്നിവർ നേതൃത്വം നൽകി.

ജര്‍മനിയില്‍ സ്‌റ്റൈപെന്‍റോടെ സൗജന്യ ഉപരിപഠനം: സെമിനാര്‍ നാളെ തിരുവല്ലയില്‍

കോട്ടയം: ജൻറൈസ് ഗ്ലോബല്‍ സ്റ്റാഫിംഗും ബദനി ഇന്‍സ്റ്റിറ്റ്യൂട്ട് ഓഫ് ലാംഗ്വേജ് സ്റ്റഡീസും ചേര്‍ന്ന് ജര്‍മനിയിലെ ഉപരിപഠന സാധ്യതകള്‍ പരിചയപ്പെടുത്തുന്നതിനായി സെമിനാര്‍ സംഘടിപ്പിക്കും. നാളെ രാവിലെ 10 മുതല്‍ തിരുവല്ല തോലശേരി പുഷ്പഗിരി റോഡിലുള്ള ബഥനി ഇന്‍സ്റ്റിറ്റ്യൂട്ട് ഓഫ് ലാംഗ്വേജ് സ്റ്റഡീസിലാണ് (ബില്‍സ്) സെമിനാര്‍ നടക്കുന്നത്. പ്ലസ് ടു വിന് 55ശതമാനം മാര്‍ക്ക് നേടിയവര്‍ക്ക് അപേക്ഷിക്കാം. പഠന കാലത്ത് പ്രതിമാസം ഒരു ലക്ഷം രൂപ വരെ സ്‌റ്റൈപെന്‍റ് ലഭിക്കും. പഠനം പൂര്‍ത്തിയാക്കിയശേഷം പ്ലേസ്മെന്‍റ് അവസരങ്ങളും പിആര്‍ സാധ്യതകളും ലഭിക്കും. നഴ്‌സിംഗ് കൂടാതെ ഫുഡ് ടെക്‌നോളജി, ലോജിസ്റ്റിക്‌സ്, മെക്കട്രോണിക്, ഹോസ്പിറ്റാലിറ്റി മാനേജ്‌മെന്‍റ്, ഇലക്‌ട്രിക്കല്‍ മെക്കാനിക്‌സ് കോഴ്‌സുകളും സ്‌റ്റൈപെന്‍റോടെയും ഫീസില്ലാതെയും പഠിക്കാം. ജൻറൈസിലൂടെ കേരളത്തില്‍നിന്ന് ധാരാളം കുട്ടികള്‍ക്കു പ്ലേയ്‌സ്മെന്‍റ് ലഭിച്ചു. മുന്‍കൂട്ടി പേര് രജിസ്റ്റര്‍ ചെയ്യുന്ന 100 പേര്‍ക്കാണ് പ്രവേശനം. ഇപ്പോള്‍ രജിസ്റ്റര്‍ഡ് നഴ്‌സ്മാര്‍ക്കും അവസരമുണ്ട്. ബിഎസ്‌സി, ജിഎന്‍എം രജിസ്റ്റര്‍ഡ് നഴ്‌സുമാര്‍ക്ക് ജര്‍മന്‍ ഭാഷാപരിശീലനവും താമസ ഭക്ഷണ സൗകര്യങ്ങളും നല്‍കും. ഫോൺ: 7042421927, 7428548800. info<\@>genrise.in.

തൊഴിലുറപ്പു തൊഴിലാളികൾക്കു കൃത്യമായി വേതനം നൽക്കാത്ത മുഖ്യമന്ത്രിയെ വഴിയിൽ തടയും- കോൺഗ്രസ്

അമ്പലപ്പുഴ: തൊഴിലുറപ്പു തൊഴിലാളികള്‍ക്കു കൃത്യമായി വേതനം നല്‍ക്കാത്ത മുഖ്യമന്ത്രിയെ വഴിയില്‍ തടയുമെന്നു കോണ്‍ഗ്രസ്. കഴിഞ്ഞ നാലുമാസമായി തൊഴിലുറപ്പു തൊഴിലാളികള്‍ക്കു വേതനം നല്‍കാത്ത കേന്ദ്ര സംസ്ഥാന സര്‍ക്കാരുകളുടെ തൊഴിലാളി ദ്രോഹനടപടിക്കെതിരേ തൊഴിലുറപ്പു തൊഴിലാളി കോണ്‍ഗ്രസ് അമ്പലപ്പുഴ റീജണല്‍ കമ്മിറ്റിയുടെ നേതൃത്വത്തില്‍ പുന്നപ്ര പോസ്റ്റോഫീസ് പടിക്കല്‍ നടത്തിയ പ്രതിഷേധ ധര്‍ണ്ണ കെപിസിസി ജനറല്‍ സെക്രട്ടറി എം.ജെ. ജോബ് ഉദ്ഘാടനം ചെയ്തു. അടിയന്തിരമായി വേതനം നല്‍കിയില്ലെങ്കില്‍ മുഖ്യമന്ത്രി പിണറായി വിജയനെ വഴിയില്‍ തടയുമെന്ന് ധര്‍ണ ഉദ്ഘാടനം ചെയ്ത കെപിസിസി ജനറല്‍ സെക്രട്ടറി എം.ജെ. ജോബ് വ്യക്തമാക്കി. അമ്പലപ്പുഴ റീജിയണല്‍ പ്രസിഡന്‍റ് എം.എച്ച്. വിജയന്‍ അദ്ധ്യക്ഷത വഹിച്ചു. ബ്ലോക്ക് കോണ്‍ഗ്രസ് പ്രസിഡന്‍റ് ടി.എ. ഹാമിദ്, ഐഎൻടിയുസി ജില്ലാജനറല്‍ സെക്രട്ടറി എം.വി. രഘു, മത്സ്യത്തൊഴിലാളി കോണ്‍ഗ്രസ് സംസ്ഥാന ജനറല്‍ സെക്രട്ടറി എ.ആര്‍. കണ്ണന്‍, എസ്. പ്രഭുകുമാര്‍ എന്നിവര്‍ പ്രസംഗിച്ചു.

ചങ്ങനാശേരി അതിരൂപത കോര്‍പറേറ്റ് മാനേജ്മെന്‍റ് അധ്യാപക കണ്‍വന്‍ഷനുകള്‍ക്ക് തുടക്കം

ചങ്ങനാശേരി: ചങ്ങനാശേരി അതിരൂപത കോര്‍പറേറ്റ് മാനേജ്മെന്റ് അധ്യാപക കണ്‍വന്‍ഷനുകള്‍ക്കു തുടക്കമാകുന്നു. 110 സ്‌കൂളുകളിലെ 2,000 അധ്യാപകര്‍ക്ക് ഏഴ് സോണുകളിലായാണു കണ്‍വന്‍ഷന്‍ സംഘടിപ്പിച്ചിരിക്കുന്നത്. ഈശോമിശിഹായുടെ മനുഷ്യാവതാര ജൂബിലിയുടെ പ്രധാന പ്രമേയമായ പ്രത്യാശയുടെ തീര്‍ഥാടകര്‍ എന്നത് സന്ദേശമായി സ്വീകരിക്കുന്ന കണ്‍വന്‍ഷനുകളില്‍ കാലത്തിന്‍റെ മാറ്റങ്ങള്‍ക്കൊത്ത് വിദ്യാഭ്യാസരംഗത്ത് നിര്‍ണായക ശക്തിയാകുന്നതിനുള്ള പരിശീലനങ്ങളും പ്രത്യാശയുടെ തീര്‍ഥാടകരായി മാറുവാന്‍ അധ്യാപകരെ പ്രചോദിപ്പിക്കുന്ന ക്ലാസുകളും വിദ്യാഭ്യാസ സംബന്ധമായ ചര്‍ച്ചകളും നടക്കും. വിദ്യാഭ്യാസ മേഖലയിലെ പ്രഗത്‌ഭര്‍ ക്ലാസുകള്‍ക്കും ചര്‍ച്ചകള്‍ക്കും നേതൃത്വം നല്‍കും. 25ന് എടത്വാ സോണില്‍ ആരംഭിച്ച് മേയ് 6നു ചമ്പക്കുളം സോണില്‍ അവസാനിക്കുന്ന ഏഴു സോണല്‍ കണ്‍വന്‍ഷനുകളിലും ചങ്ങനാശേരി ആര്‍ച്ച്ബിഷപ് മാര്‍ തോമസ് തറയില്‍ സന്ദേശം നല്‍കും. അതിരൂപത വികാരി ജനറാള്‍മാര്‍ സന്നിഹിതരാകും. ചങ്ങനാശേരി അതിരൂപത കോര്‍പറേറ്റ് മാനേജ്മെന്‍റും ടീച്ചേഴ്‌സ് ഗില്‍ഡും സംയുക്തമായി സംഘടിപ്പിക്കുന്ന കണ്‍വന്‍ഷന്‍റെ മുന്നൊരുക്കങ്ങള്‍ പൂര്‍ത്തിയായതായി കോര്‍പറേറ്റ് മാനേജര്‍ റവ.ഡോ. ആന്‍റണി മൂലയില്‍, അസിസ്റ്റന്‍റ് മാനേജര്‍ റവ.ഡോ. ടോണി ചെത്തിപ്പുഴ, ടീച്ചേഴ്‌സ് ഗില്‍ഡ് പ്രസിഡന്‍റ് ഈശോ തോമസ്, ഗില്‍ഡ് ഭാരവാഹികള്‍എന്നിവര്‍ അറിയിച്ചു. അമൃതം ലഹരിവിരുദ്ധ പദ്ധതി ലഹരിക്കെതിരേ സ്‌കൂളുകള്‍ കേന്ദ്രീകരിച്ചുള്ള ശക്തമായ പോരാട്ടത്തിന് കണ്‍വന്‍ഷനില്‍ തുടക്കം കുറിക്കും. ലഹരിക്കെതിരേ ജീവന്‍റെ സംസ്‌കാരത്തിനായി വിദ്യാര്‍ഥികളെ അണിചേര്‍ത്ത്, സര്‍ക്കാരിന്‍റെ ലഹരിവിരുദ്ധ പരിപാടികളോടു ചേര്‍ന്ന് ചങ്ങനാശേരി അതിരൂപത കോര്‍പറേറ്റ് മാനേജ്‌മെന്‍റ് 110 വിദ്യാലയങ്ങളില്‍ 2025-26 അക്കാദമിക വര്‍ഷത്തില്‍ അമൃതം എന്ന പേരിലാണ് ലഹരിവിരുദ്ധ കാമ്പയിന്‍ സംഘടിപ്പിക്കുന്നത്. കുട്ടികള്‍ക്കു വിവിധ ബോധവത്കരണ പ്രവര്‍ത്തനങ്ങള്‍, കൗണ്‍സലിംഗ്, പിടിഎയോട് ചേര്‍ന്ന് ലഹരിവിരുദ്ധ മുന്നേറ്റങ്ങള്‍, ജാഗ്രതാ സെല്ലുകള്‍ തുടങ്ങിയവ അമൃതം പദ്ധതിയില്‍ ഉണ്ടായിരിക്കുമെന്ന് കോര്‍പറേറ്റ് മാനേജര്‍ ഫാ. ആന്‍റണി മൂലയില്‍ അറിയിച്ചു.

പൊക്കാളി പാടശേഖരങ്ങൾ മാറുന്നു, വനാമി ചെമ്മീൻ കൃഷിയിലേക്ക്

തുറവൂർ: പൊക്കാളി പാടശേഖരങ്ങൾ വനാമി ചെമ്മീൻ കൃഷിയിലേക്കു മാറുന്നു. കൃഷിമന്ത്രിക്കു നിവേദനവുമായി പരിസ്ഥിതിപ്രവർത്തകർ. അരൂർ നിയോജകമണ്ഡലത്തിൽ വർഷങ്ങൾക്കു മുൻപുവരെ വ്യാപകമായി നെൽകൃഷി ചെയ്തിരുന്ന പൊക്കാളി പാടശേഖരങ്ങൾ ഇപ്പോൾ തരിശു കിടക്കുകയാണ്. കടലോര മേഖലയിൽ ഹെക്ടർ കണക്കിന് നിലങ്ങളിൽ വ്യാപകമായി കൃഷി നടന്നിരുന്നു. അരൂർ മണ്ഡലത്തിൽ 5,000 ഹെക്ടർ പാടശേഖരത്തിൽ ഭൂരിഭാഗവും തരിശായി കിടക്കുകയാണ്. 10 വർഷം തുടർച്ചയായി നെൽകൃഷിക്ക് ഉപയോഗിക്കാത്ത പാടശേഖരങ്ങൾ സർക്കാർ അനുമതിയോടെ മത്സ്യകൃഷി നടത്താനാണ് നീക്കം. ഓരുവെളളത്തിലും നശിക്കാത്ത പൊക്കാളി വിത്തുകളിലായിരുന്നു കൃഷി. വിതച്ച ഉടനെ മഴ പെയ്താലും വെള്ളത്തിന്‍റെ പുറമേക്ക് വളരുന്ന നെൽവിത്തുകളാണിത്. അതുകൊണ്ടാണ് പൊക്കത്തിലേക്ക് ആളുന്ന എന്നർഥം വരുന്ന പൊക്കാളി എന്ന പേരു കിട്ടിയത്. വളം പോലും ആവശ്യമില്ലാത്ത പ്രതിരോധശക്തി അധികമുള്ള നെൽവിത്താണിത്. കേരളത്തിൽ ഇത്തരം വിത്തുകൾ വളരാൻ അപൂർവം പാടശേഖരങ്ങളാണുള്ളത്. ചെമ്മീൻ ക്ഷാമം അതിൽ ഏറ്റവും കീർത്തി കേട്ടതാണ് അരൂർ മേഖലയിലെ പൊക്കാളി പാടങ്ങൾ. പല കാരണങ്ങളാലും നെൽകൃഷിയോട് കർഷകർ വിടപറഞ്ഞ് മത്സ്യകൃഷി വ്യാപകമാക്കാൻ തുടങ്ങി. ഇടതുപക്ഷ സർക്കാരിന്‍റെ കാർഷിക നയങ്ങൾ രൂപീകരിക്കുന്നതിൽ നിർണായക പങ്കുവഹിക്കുന്ന കെഎസ്കെടിയു ഉൾപ്പെടെയുള്ള കർഷക തൊഴിലാളി സംഘടനകളും സിപിഎമ്മിന്‍റെ വർഗ ബഹുജന സംഘടനകളിൽ പെട്ട സിഐടിയുവും മുഴുവൻ സമയ ചെമ്മീൻ കൃഷിക്ക് കളമൊരുക്കുകയാണ്. മേയ്മാസം മന്ത്രി സജി ചെറിയാൻ പങ്കെടുക്കുന്ന സെമിനാർ അരൂരിൽ നടക്കും. ഒരുനെല്ലും ഒരുമീനും സർക്കാരിന്‍റെ നയമെന്ന് പ്രഖ്യാപിച്ച് മത്സ്യകൃഷി കഴിഞ്ഞാൽ ഇടവേളകളിൽ നെൽകൃഷി നടത്തണമെന്നും ഇല്ലെങ്കിൽ മത്സ്യകൃഷി നടത്താതെ പാടം ഒഴിച്ചിടണമെന്നുമായിരുന്നു സർക്കാരിന്‍റെ നയം. കേരളത്തിൽ സമുദ്രോല്പന്ന കയറ്റുമതി സ്ഥാപനങ്ങൾ കടുത്ത പ്രതിസന്ധി നേരിടുന്നതിന്‍റെ പ്രധാന കാരണം ചെമ്മീൻ ക്ഷാമമാണ്. കടലോരങ്ങളിൽ പഴയതുപോലെ ചെമ്മീൻ ലഭ്യമല്ല. നിവേദനം നൽകി സമുദ്രോല്പന്ന വ്യവസായം അരൂർ മേഖലയിൽ പിടിച്ചുനിൽക്കണമെങ്കിൽ വനാമി ചെമ്മീൻ ഉത്പാദനം വ്യാപകമാക്കണം. ഇതിനുവേണ്ടിയുള്ള ശ്രമത്തിന് സിപിഎം പരോക്ഷമായി ഒരുങ്ങുകയാണ്. ഓരു ജലവും തരിശുപാടശേഖരവും സമൃദ്ധമായ അരൂർ മേഖലയിൽ വനാമി ചെമ്മീൻ കൃഷിക്കും മത്സ്യകൃഷിക്കും വിപുലമായ സാധ്യതകളുണ്ടെന്നാണ് ചൂണ്ടിക്കാണിക്കപ്പെടുന്നത്. അരൂർ മേഖലയിൽ ഹെക്ടർ കണക്കിന് നെൽപ്പാടങ്ങൾ കൃഷിയില്ലാതെ കിടക്കുന്നത് കർഷക തൊഴിലാളി സംഘടനയെ പ്രയാസപ്പെടുത്തുന്ന കാര്യമാണ്. സാധ്യമായ കുറെ സ്ഥലമെങ്കിലും കൃഷിക്ക് ഉപയോഗിക്കണമെന്നുതന്നെയാണ് യൂണിയന്‍റെ നിലപാട്. കുറേ വർഷങ്ങളായി തരിശു കിടക്കുന്ന തുറവൂർ, പട്ടണക്കാട്, കുത്തിയതോട്, കോടംതുരുത്ത്, എഴുപുന്ന, അരൂർ പഞ്ചായത്തുകളിലെ പൊക്കാളി പാടശേഖരത്തിൽ നെൽകൃഷി നടത്തണമെന്ന് ആവശ്യപ്പെട്ട് പരിസ്ഥിതി സംരക്ഷണ സമിതി കൃഷി വകുപ്പ് മന്ത്രി പി. പ്രസാദിന് നിവേദനം നൽകി. നിലവിൽ തുറവൂർ പൊക്കാളി പാടശേഖരത്തിൽ സംഘടന നേരിട്ട് നെൽകൃഷി നടത്താൻ തയാറാണെന്ന് പരിസ്ഥിതി പ്രവർത്തകർ മന്ത്രിയോട് പറഞ്ഞു. നെൽകൃഷി നടത്തണമെങ്കിൽ നിലവിൽ പാടശേഖരത്തിൽ കയറ്റിയിരിക്കുന്ന ഉപ്പുവെള്ളം പമ്പു ചെയ്തു മാറ്റണം. വർഷകാലത്ത് സാമൂഹികവിരുദ്ധർ പൊഴിച്ചാലിൽനിന്ന് ഉപ്പുവെള്ളം പാടശേഖരത്തിലേക്കു കയറ്റാതിരിക്കുന്നതിനുവേണ്ട നടപടി ബന്ധപ്പെട്ട അധികൃതർ സ്വീകരിക്കണമെന്നും സമിതി പ്രവർത്തകർ മുന്നറിയിപ്പ് നൽകി.

രാസലഹരിക്കെതിരേ ദീപം കൊളുത്തി ഐക്യദാര്‍ഢ്യം: ബീച്ചില്‍ മോചനജ്വാല

ആലപ്പുഴ: സംസ്ഥാന സര്‍ക്കാരിന്‍റെ നാലാം വാര്‍ഷികാഘോഷങ്ങളുടെ ഭാഗമായി ആലപ്പുഴ ബീച്ചില്‍ രാസലഹരിക്കെതിരെ പ്രതിരോധ സന്ദേശമുയര്‍ത്തി മോചനജ്വാല തെളിച്ചു. ലഹരി വിരുദ്ധ മോചനജ്വാല പരിപാടിയുടെ ജില്ലാതല ഉദ്ഘാടനം ആലപ്പുഴ ബീച്ചില്‍ പി.പി. ചിത്തരഞ്ജന്‍ എംഎല്‍എ നിര്‍വഹിച്ചു. ജില്ല പഞ്ചായത്ത് പ്രസിഡന്‍റ് കെ.ജി. രാജേശ്വരി അധ്യക്ഷത വഹിച്ചു. നിരന്തരമായ ബോധവത്കരണ പരിപാടികളിലൂടെ മാത്രമേ ലഹരിയുടെ ഉപയോഗം കുറയ്ക്കാന്‍ കഴിയുകയുള്ളൂവെന്ന് മോചന ജ്വാല ഉദ്ഘാടനം ചെയ്തുകൊണ്ട് പി.പി. ചിത്തരഞ്ജന്‍ എംഎല്‍എ പറഞ്ഞു. ഫ്രാന്‍സിസ് മാര്‍പാര്‍പ്പയ്ക്കും പഹല്‍ഗാമില്‍ ഭീകരരുടെ വെടിയേറ്റ് മരിച്ചവര്‍ക്കും ആദരാഞ്ജലികള്‍ അര്‍പ്പിച്ചു കൊണ്ടാണ് പരിപാടി തുടങ്ങിയത്. ജില്ല ാ പഞ്ചായത്ത് സ്ഥിരംസമിതി അധ്യക്ഷ എം വി പ്രിയ ലഹരി വിരുദ്ധ പ്രതിജ്ഞ ചൊല്ലിക്കൊടുത്തു. ലഹരി വിരുദ്ധ സന്ദേശം നല്‍കിക്കൊണ്ട് വിനോദ് നരനാട്ട് നടത്തിയ കിറ്റി ഷോയും ഇതോടനുബസിച്ച് അരങ്ങേറി. ജില്ലാ പഞ്ചായത്ത് സ്ഥിരം സമിതി അധ്യക്ഷന്‍ ടി. എസ്. താഹ, ജില്ലാ പഞ്ചായത്ത് അംഗം ആര്‍.റിയാസ്, ജില്ലാ ഇന്‍ഫര്‍മേഷന്‍ ഓഫീസര്‍ കെ.എസ് സുമേഷ്, കുടുംബശ്രീ ജില്ലാ കോ - ഓര്‍ഡിനേറ്റര്‍ എസ്. രഞ്ജിത്, ജില്ലാ പഞ്ചായത്ത് സീനിയര്‍ സൂപ്രണ്ട് പി.വി. വിനോദ്, ഐസിഡിഎസ് ജില്ലാ പ്രോഗ്രാം ഓഫീസര്‍ ജെ. മായാലക്ഷ്മി, സിഡിഎസ് ചെയര്‍പേഴ്‌സണ്‍മാരായ സോഫിയ അഗസ്റ്റിന്‍, ഷീല മോഹന്‍ തുടങ്ങിയവര്‍ പങ്കെടുത്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]