കലോത്സവത്തെ വരവേൽക്കാൻ ഉദിനൂർ ഒരുങ്ങുന്നു
1463760
Friday, October 25, 2024 3:05 AM IST
തൃക്കരിപ്പൂർ: റവന്യു ജില്ലാ സ്കൂൾ കലോത്സവത്തെ വരവേൽക്കാനൊരുക്കങ്ങളുമായി ഉദിനൂർ ഗവ. ഹയർസെക്കൻഡറി സ്കൂൾ. നവംബർ 26 മുതൽ 30വരെ നടക്കുന്ന കലോത്സവത്തിന്റെ ഭാഗമായുള്ള ആദ്യഘട്ട അവലോകന യോഗം സ്കൂളിൽ നടന്നു. സംഘാടകസമിതി ചെയർമാൻ എം. രാജഗോപാലൻ എംഎൽഎ അധ്യക്ഷത വഹിച്ചു.
15 വേദികളിലായാണ് മത്സര ഇനങ്ങൾ അരങ്ങേറുക. ഉദിനൂർ ഗവ. ഹയർസെക്കൻഡറി സ്കൂൾ, ഉദിനൂർ സെൻട്രൽ എയുപി സ്കൂൾ എന്നിവിടങ്ങളിലായാണ് പ്രധാന വേദികൾ ഒരുക്കുന്നത്. മുഴുവൻ മത്സരാർഥികൾക്കും ഭക്ഷണം ലഭ്യമാക്കും. താമസ സൗകര്യം ആവശ്യമായ മത്സരാർഥികൾക്കും അനുഗമിക്കുന്ന അധ്യാപകർക്കും ഉദിനൂരും പരിസര പ്രദേശങ്ങളിലുമുള്ള വീടുകളിൽ താമസ സൗകര്യം ഒരുക്കും.
കലോത്സവം പൂർണമായും ഹരിത ചട്ടം പാലിച്ചാണ് നടത്തുക. 16 വർഷത്തിന് ശേഷം ഉദിനൂരിത്തിലെത്തുന്ന ജില്ലാ സ്കൂൾ കലോത്സവം വിജയിപ്പിക്കാനുള്ള ഒരുക്കങ്ങൾ ഉദിനൂരിലും പരിസര പ്രദേശങ്ങളിലും നേരത്തേ തുടങ്ങിയിട്ടുണ്ട്. ജില്ലാ പഞ്ചായത്ത് പ്രസിഡന്റ് ബേബി ബാലകൃഷ്ണൻ, ബ്ലോക്ക് പഞ്ചായത്ത് പ്രസിഡന്റ് മാധവൻ മണിയറ,പടന്ന പഞ്ചായത്ത് പ്രസിഡന്റ് പി.വി. മുഹമ്മദ് അസ്ലം, ജില്ലാ പഞ്ചായത്തംഗം സി.ജെ. സജിത്ത് എന്നിവർ പ്രസംഗിച്ചു.
സ്കൂൾ കലോത്സവം: ലോഗോ ക്ഷണിച്ചു
ഉദിനൂർ: നവംബർ 26 മുതൽ 30 വരെ ഉദിനൂർ ജിഎച്ച്എസ്എസിൽ നടക്കുന്ന റവന്യു ജില്ലാ സ്കൂൾ കലോത്സവത്തിനുള്ള ലോഗോ ക്ഷണിച്ചു. പിഎൻജി ഫയൽ ഫോർമാറ്റിലാണ് ലോഗോ തയാറാക്കേണ്ടത്. തയാറാക്കിയ ലോഗോ 29നു വൈകുന്നേരം അഞ്ചിന് മുമ്പായി districtkalo lsava mudinur @gmail.com എന്ന ഇ മെയിലിലും 9809777555 എന്ന വാട്സാപ്പ് നമ്പറിലും ലഭിക്കണം. തെരഞ്ഞെടുക്കുന്ന ലോഗോയ്ക്ക് ഉപഹാരം നൽകും. ഫോൺ: 9895312161, 9809777555.