ADVERTISEMENT

ADVERTISEMENT

കർഷക പ്രതിഷേധ വാഹന ജാഥ സമാപിച്ചു

ഇരിട്ടി: കാർഷിക മേഖലയിലെ കർഷകരുടെ ബുദ്ധിമുട്ടുകൾ തുറന്നു കാട്ടിയും , കേന്ദ്ര-സംസ്ഥാന സർക്കാരുകൾ കർഷകരോട് കാണിക്കുന്ന അവഗണനയിൽ പ്രതിഷേധിച്ചും കർഷക കോൺഗ്രസ് കണ്ണൂർ ജില്ലാ പ്രസിഡന്‍റ് ജോസ് പൂമല നയിച്ച കർഷക പ്രതിഷേധ വാഹന ജാഥ ഇരിട്ടിയിൽ സമാപിച്ചു.

കാർഷിക മേഖലയുടെ അധ:പതനം രാജ്യത്തിന്‍റെ സമ്പദ്ഘടനയെ തകർക്കുമെന്ന് കെപിസിസി ജനറൽ സെക്രട്ടറി സോണി സെബാസ്റ്റ്യൻ പറഞ്ഞു. ഇരിട്ടിയിൽ നടന്ന

യോഗത്തിൽ കർഷക കോൺഗ്രസ് പേരാവൂർ നിയോജക മണ്ഡലം പ്രസിഡന്‍റ് അഗസ്റ്റിൻ വടക്കേൽ അധ്യക്ഷത വഹിച്ചു. കെപിസിസി ജനറൽ സെക്രട്ടറി ചന്ദ്രൻ തില്ലങ്കേരി, ഇരിട്ടി കോൺഗ്രസ് ബ്ലോക്ക് പ്രസിഡന്‍റ് പി.എ. നസീർ, തോമസ് വർഗീസ്, എം.ഒ. ചന്ദ്രശേഖരൻ, എ.ജെ. തോമസ്, ജോണി മുണ്ടയ്ക്കൽ, ജോയ് വേളുപുഴ, സോമൻ ആറളം, ടെൻസൻ ജോർജ്, ബിജു സാമുവേൽ, ബിനു സാമ്പ്രിക്കൽ, എം.വി. ശിവദാസൻ, റോയി ഈറ്റക്കൽ, എം. ദാസൻ, എം. രാജു തുടങ്ങിയവർ പ്രസംഗിച്ചു.

ADVERTISEMENT

പയ്യാവൂർ മാംഗല്യത്തിന് തുടക്കമായി; ആദ്യതാലികെട്ട് പാനൂരിൽ

പയ്യാവൂർ: ഒരു നാട്ടിലെ ഒരുപാട് പേരുടെ കാത്തിരിപ്പിന് വിരാമമിട്ട് പയ്യാവൂർ മാംഗല്യത്തിന് തുടക്കമായി. ആദ്യതാലികെട്ട് പാനൂരിലാണ് നടന്നത്. പാനൂർ സ്വദേശി ഷാജിയും പയ്യന്നൂർ സ്വദേശി ബിന്ദുവും തമ്മിലുള്ള വിവാഹം ഇന്നലെ പാനൂർ ശ്രീനാരായണഗുരു മന്ദിരത്തിൽ നടന്നു. വധുവിന്‍റെ ബന്ധുവിന്‍റെ മരണത്തെത്തുടർന്നാണ് വിവാഹം പാനൂരിലേക്ക് മാറ്റിയതെന്ന് പയ്യാവൂർ പഞ്ചായത്ത് വൈസ് പ്രസിഡന്‍റ് പ്രീത സുരേഷ് പറഞ്ഞു. വിവാഹ ചടങ്ങിൽ പയ്യാവൂർ പഞ്ചായത്ത് പ്രസിഡന്‍റ് സാജുസേവ്യർ, വൈസ് പ്രസിഡന്‍റ് പ്രീത സുരേഷ്, മെംബർമാരായ പ്രഭാവതി മോഹനൻ, രജനി സുന്ദരൻ, സിഡിഎസ് അംഗങ്ങളായ ബിന്ദു ശിവദാസൻ, ബിന്ദുരാജൻ, ജില്ലാ സിംഗിൾ വുമൺ അസോസിയേഷൻ ഭാരവാഹി പി.വി. ശോഭന തുടങ്ങി നിരവധി പേർ പങ്കെടുത്തു. പയ്യാവൂർ പഞ്ചായത്തിലേക്ക് വിവാഹം കഴിക്കാൻ അപേക്ഷകളുടെ കുത്തൊഴുക്കാണ് ഇപ്പോഴും. "പയ്യാവൂർ മാംഗല്യം" പദ്ധതി പഞ്ചായത്ത് പ്രഖ്യാപിച്ചതോടെയാണ് ആയിരക്കണക്കിന് അപേക്ഷകൾ എത്താൻ തുടങ്ങിയത്. ഇതുവരെ ലഭിച്ച നാലായിരത്തോളം അപേക്ഷകരിൽ 90 ശതമാനവും പുരുഷന്മാരാണെന്നതാണ് പഞ്ചായത്തിനെ കുഴപ്പിക്കുന്നത്. കുടുംബശ്രീ അംഗങ്ങൾ പഞ്ചായത്തിലേക്കെത്തുന്ന ഓരോ അപേക്ഷകളും വിവിധ മത, സമുദായങ്ങൾക്കനുസരിച്ച് തരംതിരിക്കുകയാണ്. അതിൽ അനുയോജ്യരായവരെ കൂട്ടിയിണക്കാൻ ശ്രമിക്കുകയാണ് പഞ്ചായത്ത്. അപേക്ഷകളിലെ അസന്തുലിതാവസ്ഥ പരിഹരിയ്ക്കാൻ വിവിധ പഞ്ചായത്തുകളുമായി സഹകരിക്കാനാണ് പയ്യാവൂർ പഞ്ചായത്തിന്‍റെ നീക്കം. പയ്യാവൂർ ഗ്രാമപഞ്ചായത്തിന്‍റെ നേതൃത്വത്തിൽ ജില്ലാ സിംഗിൾ വുമൺ അസോസിയേഷനുമായി ചേർന്നാണ് പയ്യാവൂർ മാംഗല്യം' എന്ന പേരിൽ പദ്ധതി ആവിഷ്കരിച്ചത്. അവിവാഹിതരും പുനർ വിവാഹിതരും ഉൾപ്പെടെ ജാതി ഭേദമന്യേ സ്ത്രീ പുരുഷന്മാർക്ക് വിവാഹിതരാകാനുളള അവസരമാണ് പദ്ധതിയിലൂടെ ഒരുക്കുന്നത്.

രാജ്യാന്തര ചലച്ചിത്രമേളയ്ക്ക് കൊടിയിറങ്ങി

കണ്ണൂർ: ചലച്ചിത്രമേളകളുടെ ഭൂപടത്തിൽ തലശേരിയെ അടയാളപ്പെടുത്തി രാജ്യാന്തര ചലച്ചിത്രമേളയ്ക്ക് തിരശീല വീണു. കഴിഞ്ഞ നാലു ദിവസങ്ങളായി ലോകസിനിമയുടെ മായാദൃശ്യങ്ങൾ മനസിൽ പതിപ്പിച്ച് കേരള സംസ്ഥാന ചലച്ചിത്ര അക്കാദമി സംഘടിപ്പിച്ച പ്രഥമ തലശേരി രാജ്യാന്തര ചലച്ചിത്രമേളയുടെ സമാപനസമ്മേളനം മന്ത്രി ഒ.ആർ. കേളു ഉദ്ഘാടനം ചെയ്തു. നമ്മുടെ നാടിനെ ഇന്നത്തെ കേരളമായി മാറ്റിയെടുക്കാൻ സാധിച്ചതിൽ ചലച്ചിത്രം വലിയ പങ്ക് വഹിച്ചിട്ടുണ്ടെന്നും അതിനെ ശക്തിയോടെ പരിപോഷിപ്പിക്കേണ്ടതുണ്ടെന്നും മന്ത്രി പറഞ്ഞു. ദേശീയ അവാർഡ് ജേതാവ് നടൻ വിജയരാഘവനെ നിയമസഭാ സ്പീക്കർ എ.എൻ. ഷംസീർ ആദരിച്ചു. ചലച്ചിത്ര അക്കാദമി ചെയർപേഴ്സൺ പ്രേംകുമാർ, സെക്രട്ടറി സി. അജോയ് എന്നിവർക്കുള്ള സംഘാടക സമിതിയുടെ സ്നേഹോപഹാരവും സ്പീക്കർ നൽകി. തലശേരിയുടെ അഭിമാനമായ സംഗീത സംവിധായകൻ കെ.രാഘവൻ മാസ്റ്ററുടെ 12-ാം ചരമവാർഷികദിനത്തിൽ പ്രണാമമർപ്പിച്ച് സമാപനസമ്മേളന വേദിയിൽ ചലച്ചിത്ര അക്കാദമി സെക്രട്ടറി സി. അജോയ് അനുസ്മരണപ്രമേയം അവതരിപ്പിച്ചു. കഴിഞ്ഞ വർഷം ലോകത്ത് നിർമിക്കപ്പെട്ട ഏറ്റവും മികച്ച 55 ദൃശ്യവിസ്‌മയങ്ങൾ തലശേരി ലിബർട്ടി തീയേറ്റർ സമുച്ചയത്തിൽ മറ്റൊരു ലോകം തന്നെ തീർക്കുകയായിരുന്നു. ലിബർട്ടി തീയേറ്റർ സമുച്ചയത്തിലെ ലിറ്റിൽ പാരഡൈസിൽ നടന്ന ഉദ്ഘാടന ചടങ്ങിൽ തലശേരി നഗരസഭ ചെയർപേഴ്സൺ കെ.എം. ജമുനാറാണി അധ്യക്ഷത വഹിച്ചു. ഗ്രാമപഞ്ചായത്ത് പ്രസിഡന്‍റുമാരായ പി.പി. സനിൽ, എം.കെ. സെയ്‌തു, സി.കെ. രമ്യ, നിർമാതാവ് ലിബർട്ടി ബഷീർ, ബീനിഷ് കോടിയേരി, ടി.എം. ദിനേശൻ തുടങ്ങിയവർ പങ്കെടുത്തു.

അപകടത്തിൽപ്പെട്ട നായക്കുട്ടിക്ക് ബംഗളൂരുവിൽ വിദഗ്ധ ചികിത്സ

മട്ടന്നൂർ: കൂടാളി ഗണപതി ക്ഷേത്രത്തിനു സമീപം വാഹനമിടിച്ച് അവശതയിലായ നായക്കുട്ടിയുടെ രക്ഷയ്ക്ക് കൂടാളി പഞ്ചായത്ത് പ്രസിഡന്‍റ് പി.കെ. ഷൈമയും മൃഗസ്നേഹികളും ഒത്തുചേർന്നു. തക്കസമയത്തെ ഇടപെടലിൽ വിദഗ്‌ധ ചികിത്സ നൽകി രക്ഷപ്പെടുത്തി. വാഹനമിടിച്ച് പിടയുന്ന നാലുമാസം പ്രായമായ നായക്കുഞ്ഞിനെ രക്ഷിക്കാൻ വനംവകുപ്പ്, പോലീസ് തുടങ്ങി പലരെയും വിളിച്ചു. റസ്ക്യൂ ടീം ഡോ. സുഷമ പ്രഭുവിന്‍റെ നിർദേശത്തിൽ പഞ്ചായത്ത് പ്രസിഡന്‍റ് പട്ടിക്കുഞ്ഞിന് വെള്ളവും ഭക്ഷണവും നൽകി സമീപത്തെ വീട്ടിലാക്കി. പിന്നീട് ഡോ. സുഷമ പ്രഭുവിന്‍റെ നേതൃത്വത്തിലുള്ള പീപ്പിൾ ഫോർ ആനിമൽ വെൽഫെയർ എന്ന സംഘടനയുടെ പ്രവർത്തകർ ആംബുലൻസിൽ ബംഗളൂരുവിലെ ആർഎസ് വെറ്ററിനറി ക്ലിനിക്കിലെത്തിച്ച് നട്ടെല്ലിനു ശസ്ത്രക്രിയ നടത്തി. ശസ്ത്രക്രിയയ്ക്ക് 40,000 രൂപ ചെലവായി.

സംഘാടനത്തിലെ പിഴവ്; ചാമ്പ്യൻസ് ബോട്ട് ലീഗ് നിർത്തിവച്ചു

ചെറുവത്തൂർ: സംസ്ഥാന ടൂറിസം വകുപ്പ് ചെറുവത്തൂർ അച്ചാംതുരുത്തിയിൽ സംഘടിപ്പിച്ച പ്രഥമ ചാമ്പ്യൻസ് ബോട്ട് ലീഗ് സംഘാടനത്തിലെ പിഴവ് മൂലം നിർത്തിവച്ചു. മികച്ച സമയം കാഴ്ച വയ്ക്കുന്ന ടീമുകളെ കണ്ടെത്തി ഫൈനൽ നടത്തുന്നതായിരുന്നു സിബിഎൽ രീതി. ചെറുവത്തൂരിലെ അച്ചാംതുരുത്തി - കോട്ടപ്പുറം പാലത്തിന് സമീപം ഇന്നലെ ഉച്ചകഴിഞ്ഞ് മൂന്നോടെ ഹീറ്റ്സ് മത്സരങ്ങൾ ആരംഭിച്ചിരുന്നു. എന്നാൽ രണ്ടാമത്തെ ഹീറ്റ്സ് നടന്നപ്പോൾ സ്റ്റാർട്ടിംഗ് വേളയിൽ വെടിയൊച്ചക്കൊപ്പം പ്രവർത്തിക്കേണ്ട ടൈമർ നിലച്ചതാണ് തർക്കങ്ങൾക്ക് തുടക്കമിട്ടത്. തുടർന്ന് നടന്ന ഹീറ്റ്സുകളിൽ സാധാരണ പോലെ ടൈമർ പ്രവർത്തിക്കുകയും ചെയ്തു. ഇതോടെ തർക്കമുണ്ടായ ഹീറ്റ്സ് വീണ്ടും നടത്തണമെന്ന ആവശ്യം മറ്റു ടീമുകളിൽ നിന്നുയർന്നു. സംഘാടകരും ജനപ്രതിനിധികളും നടത്തിപ്പിന്‍റെ ചുക്കാൻ പിടിച്ച ടൂറിസം വകുപ്പ് ഉദ്യോഗസ്ഥരും തർക്കമുണ്ടായ ഹീറ്റ്സിലെ ടീമുകളുടെ മാനേജർമാരെ വിളിച്ച് വീണ്ടും മത്സരം നടത്താൻ ആവശ്യപ്പെട്ടുവെങ്കിലും രണ്ടു ടീമുകൾ പിന്മാറുകയായിരുന്നു. ഇതോടെ മറ്റു ടീമുകൾ പ്രതിഷേധമറിയിക്കുകയും വീണ്ടും യോഗം ചേർന്നപ്പോൾ ഓരോ ഹീറ്റ്സിലും പങ്കെടുത്ത രണ്ടു ടീമുകളെ പങ്കെടുപ്പിക്കാമെന്ന നിർദേശം ഉയർന്നെങ്കിലും ഭൂരിഭാഗം ടീമുകളും എതിർപ്പറിയിച്ചതോടെ ചാമ്പ്യൻസ് ബോട്ട് ലീഗ് മത്സരം നിർത്തിവയ്ക്കുന്നതായി സാങ്കേതിക വിഭാഗത്തിന്‍റെ ചുമതല വഹിക്കുന്ന ടൂറിസം വകുപ്പിലെ അഭിലാഷ് അറിയിച്ചു. ഹീറ്റ്സ് മത്സരങ്ങൾ ഉൾപ്പെടെ വീണ്ടും നടത്തുന്നതിന് സംഘാടകർ നിർദേശം മുന്നോട്ടുവച്ചെങ്കിലും ടീമുകൾ തയാറായില്ല. അതേസമയം ചാമ്പ്യൻസ് ബോട്ട് ലീഗ് മത്സര നിബന്ധന അംഗീകരിക്കാത്ത ടീമുകളെ ഒഴിവാക്കി തുടർന്നുള്ള മത്സരം നടത്തണമെന്ന് മികച്ച സമയം കുറിച്ച പാലിച്ചോൻ അച്ചാംതുരുത്തി ടീം ഭാരവാഹികൾ അറിയിച്ചു. ചാമ്പ്യൻസ് ബോട്ട് ലീഗ് ടൂറിസം മന്ത്രി പി.എ. മുഹമ്മദ് റിയാസ് ഓൺലൈനായി ഉദ്ഘാടനം ചെയ്തു. എം. രാജഗോപാലൻ എംഎൽഎ അധ്യക്ഷത വഹിച്ചു. രാജ്മോഹൻ ഉണ്ണിത്താൻ എംപി ഫ്ലാഗ് ഓഫ് ചെയ്തു. ജില്ലാ കളക്ടർ കെ. ഇമ്പശേഖർ, ജില്ലാ പഞ്ചായത്ത് പ്രസിഡന്‍റ് ബേബി ബാലകൃഷ്ണൻ, നീലേശ്വരം നഗരസഭ ചയർ ടി.വി. ശാന്ത, ചെറുവത്തൂർ പഞ്ചായത്ത് പ്രസിഡന്‍റ് സി.വി. പ്രമീള, വൈസ്പ്രസിഡന്‍റ് പി.വി. രാഘവൻ, ബ്ലോക്ക് പഞ്ചായത്ത് പ്രസിഡന്‍റ് മാധവൻ മണിയറ, ജില്ലാ പഞ്ചായത്തംഗം സി.ജെ. സജിത്ത്, ടൂറിസം വകുപ്പ് ഡെപ്യൂട്ടി ഡയറക്ടർ എ.നസീർ, ഡിടിപിസി സെക്രട്ടറി ജെ.കെ.ജിജേഷ് കുമാർ എന്നിവർ സംബന്ധിച്ചു. കേരളത്തിലെ വിവിധ വള്ളംകളി മത്സരങ്ങളെ ഏകീകരിച്ച് സംസ്ഥാന ടൂറിസം വകുപ്പ് നടത്തി വരുന്ന ചാമ്പ്യൻസ് ബോട്ട് ലീഗിന്‍റെ മൂന്നാമത് മത്സരമാണ് ചെറുവത്തൂരിലെ അച്ചാംതുരുത്തി പുഴയിൽ സംഘടിപ്പിച്ചത്.

കോശി കമ്മീഷൻ റിപ്പോർട്ടിൽ സർക്കാർ ഒളിച്ചുകളി അവസാനിപ്പിക്കണം: ബിഷപ് അലക്സ് വടക്കുംതല

കണ്ണൂർ: ക്രൈസ്തവരുടെ അവസ്ഥ പഠിക്കാൻ നിയോഗിച്ച ജെ.ബി. കോശി കമ്മീഷൻ റിപ്പോർട്ട് സമർപ്പിച്ചു രണ്ടരവർഷം കഴിഞ്ഞിട്ടും തുടർനടപടികൾ കൈക്കൊള്ളാത്ത സർക്കാരിന്‍റെ ഒളിച്ചുകളി അവസാനിപ്പിച്ചില്ലെങ്കിൽ ലത്തീൻ സമുദായം പ്രത്യക്ഷ സമരപരിപാടികളുമായി മുന്നിട്ടിറങ്ങുമെന്ന് കണ്ണൂർ ബിഷപ് ഡോ. അലക്സ് വടക്കുംതല. കണ്ണൂർ ചേംബർ ഹാളിൽ കേരള ലാറ്റിൻ കാത്തലിക് അസോസിയേഷൻ (കെഎൽസിഎ) കണ്ണൂർ രൂപത സമിതിയുടെ ആഭിമുഖ്യത്തിൽ സംഘടിപ്പിച്ച സമുദായ ജനസമ്പർക്ക പരിപാടി ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ലത്തീൻ സമുദായം രാഷ്‌‌ട്രീയമായും സാമൂഹികമായും അവഗണിക്കപ്പെടുന്ന സാഹചര്യമാണ് നിലവിലുള്ളതെന്നും തീരദേശമേഖലയിലും വിദ്യാഭ്യാസ മേഖലയിലും ഉൾപ്പെടെ സമുദായം നേരിടുന്ന പ്രതിസന്ധികൾക്ക് ഉത്തരം ലഭിച്ചേ മതിയാകുവെന്നും ബിഷപ് പറഞ്ഞു. സമുദായ സർട്ടിഫിക്കറ്റ്, വിദ്യാഭ്യാസ സ്കോളർഷിപ്പുകൾ, ഉദ്യോഗ സംവരണം, ഭരണഘടനാപരമായ പൊതുവായ അവകാശ നിഷേധങ്ങൾ എന്നിവ ഉയർത്തിയാണ് ജനസമ്പർക്ക പരിപാടി സംഘടിപ്പിച്ചത്. കെഎൽസിഎ രൂപത പ്രസിഡന്‍റ് ഗോഡ്സൺ ഡിക്രൂസ് അധ്യക്ഷത വഹിച്ചു. കെപിസിസി പ്രസിഡന്‍റ് സണ്ണി ജോസഫ് എംഎൽഎ മുഖ്യാതിഥിയായി. കണ്ണൂർ രൂപത സഹായ മെത്രാൻ ഡോ. ഡെന്നിസ് കുറുപ്പശേരി അനുഗ്രഹ പ്രഭാഷണം നടത്തി. കെഎൽസിഎ സംസ്ഥാന പ്രസിഡന്‍റ് ഷെറി ജെ. തോമസ് വിഷയാവതരണം നടത്തി. സംസ്ഥാന ജനറൽ സെക്രട്ടറി ബിജു ജോസി, സംസ്ഥാന ട്രഷറർ രതീഷ് ആന്‍റണി, സംസ്ഥാന മുൻ പ്രസിഡന്‍റ് ആന്‍റണി നൊറോണ, രൂപത ഡയറക്ടർ ഫാ. ആൻസിൽ പീറ്റർ, ഫൊറോന വികാരി ഫാ. ബെന്നി മണപ്പാട്ട്, കെഎൽസിഡബ്ല്യുഎ സംസ്ഥാന പ്രസിഡന്‍റ് ഷേർളി സ്റ്റാൻലി, രൂപത ജനറൽ സെക്രട്ടറി ശ്രീജൻ ഫ്രാൻസിസ്, സംസ്ഥാന സെക്രട്ടറി ജോൺ ബാബു, സംസ്ഥാന വൈസ് പ്രസിഡന്‍റ് നൈജു അറയ്ക്കൽ, ഫാ. മാർട്ടിൻ രായപ്പൻ, ആനിമേറ്റർ സിസ്റ്റർ പ്രിൻസി ആന്‍റണി, പ്രീത സ്റ്റാൻലി, ഫ്രാൻസിസ് സി. അലക്സ് എന്നിവർ പ്രസംഗിച്ചു.

പാലിയേറ്റീവ് നഴ്‌സസ് അസോസിയേഷൻ ജില്ലാ സമ്മേളനം

കണ്ണൂർ: ജില്ലാ പാലിയേറ്റീവ് നഴ്‌സസ് അസോസിയേഷൻ ജില്ലാ സമ്മേളനം കണ്ണൂരിൽ സി. കണ്ണൻ സ്മാരക ഹാളിൽ നടന്നു. സിഐടിയു ജില്ലാ സെക്രട്ടറി കെ. ധനഞ്ജയൻ സമ്മേളനം ഉദ്ഘാടനം ചെയ്തു. അസോസിയേഷൻ ജില്ലാ പ്രസിഡന്‍റ് ഒ.സി. ബിന്ദു അധ്യക്ഷത വഹിച്ചു. ജില്ലാ സെക്രട്ടറി കെ. നിഷ പ്രവർത്തന റിപ്പോർട്ടും ഫെഡറേഷൻ സംസ്ഥാന ജോയിന്‍റ് സെക്രട്ടറി പ്രസന്ന സുരേഷ് സംഘടനാ റിപ്പോർട്ടും അവതരിപ്പിച്ചു. സിഐടിയു സംസ്ഥാന സെക്രട്ടറി കെ.പി. സഹദേവൻ, ജില്ലാ സഹഭാരവാഹി ഒ. കാർത്യായനി എന്നിവർ പ്രസംഗിച്ചു. ഭാരവാഹികൾ: ഒ.സി. ബിന്ദു-പ്രസിഡന്‍റ്, കെ. നിഷ-സെക്രട്ടറി, കെ. റോജ-ട്രഷറർ.

സിപിഎമ്മിന്‍റെ ചട്ടലംഘനങ്ങൾ കോർപറേഷൻ അധികൃതർ കണ്ടില്ലെന്ന് നടിക്കുന്നു: ബിജെപി

കണ്ണൂർ: സിപിഎമ്മിന്‍റെ പുതിയ ഓഫീസ് ഉദ്ഘാടനവുമായി ബന്ധപ്പെട്ട് കണ്ണൂർ നഗരത്തിൽ ചട്ടങ്ങൾ കാറ്റിൽ പറത്തിക്കൊണ്ട് ഉയർത്തിയ കൊടി തോരണങ്ങളും പ്രചാരണ സാമഗ്രികളും കോർപറേഷൻ അധികൃതർ കണ്ടില്ലെന്ന് നടിക്കുകയാണെന്ന് ബിജെപി കണ്ണൂർ നോർത്ത് ജില്ലാ അധ്യക്ഷൻ കെ.കെ. വിനോദ് കുമാർ ആരോപിച്ചു. പൊതുസ്ഥലങ്ങളിൽ കൊടി തോരണങ്ങളും പ്രചാരണ സാമഗ്രികളും ഉയർത്തണമെങ്കിൽ അധികൃതരുടെ മുൻകൂർ അനുമതി വേണമെന്ന് കോടതി തന്നെ വ്യക്തമാക്കിയ താണ്. എന്നാൽ മുൻകൂട്ടി ഒരു അനുമതിയും വാങ്ങാതെയാണ് മുഖ്യമന്ത്രി പിണറായി വിജയൻ പങ്കെടുക്കുന്ന പരിപാടിയുടെ ഭാഗമായുള്ള കൊടി തോരണങ്ങൾ കണ്ണൂർ നഗരത്തിൽ ഉയർത്തിയിട്ടുള്ളത്. ഇതിൽ നിരോധിത പ്ലാസ്റ്റിക്കുകളും ഫ്ലക്സുകളും ഉൾപ്പെടെ ഉണ്ടെന്നുള്ളത് ആശങ്ക ഉണ്ടാക്കുന്നതാണ്. ഇത്തരത്തിലുള്ള നിയമലംഘനങ്ങൾ നടത്തിയാൽ കോർപറേഷൻ അധികൃതർ തന്നെ നേരിട്ട് എത്തി ഇത്തരം പ്രചാരണ സാമഗ്രികൾ അഴിച്ചു മാറ്റുകയാണ് പതിവ്. അനുമതി വാങ്ങിയിട്ടില്ലെങ്കിൽ പിഴ ഈടാക്കുകയും ചെയ്യാറുണ്ട്. കോടതി ഉത്തരവിന്‍റെ പേരും പറഞ്ഞ് ബിജെപിയുടെ പ്രചാരണസാമഗ്രികൾ പലതവണയായി കോർപറേഷൻ അധികൃതർ നീക്കം ചെയ്തിരുന്നു. എന്നാൽ സിപിഎമ്മിന്‍റെ മാടമ്പി രാഷ്ട്രീയത്തിൽ ഭയം പൂണ്ട കോൺഗ്രസ് നേതൃത്വം നല്കുന്ന കോർപറേഷൻ ഭരിക്കുന്ന യുഡിഎഫ് നടപടി സ്വീകരിക്കാൻ വിമുഖത കാട്ടുകയാണെന്നും വിനോദ് കുമാർ ആരോപിച്ചു.

ലഹരി വിരുദ്ധ ബോധവത്കരണവും അവാർഡ് വിതരണവും

മട്ടന്നൂർ: ഏഷ്യാ ബുക്ക് ഓഫ് റെക്കോർഡ്സിൽ ഇടം പിടിച്ച മട്ടന്നൂർ എയർപോർട്ട് സ്റ്റേഷൻ എഎസ്ഐ ടി. രാജീവൻ വേങ്ങാടിനുള്ള ഔദ്യോഗിക അവാർഡ് വിതരണം മട്ടന്നൂർ പിആർ എൻഎസ്എസ് കോളേജിൽ നടന്നു. കൂത്തുപറമ്പ് എസിപി കെ.വി. പ്രമോദൻ ഉദ്ഘാടനം ചെയ്തു. ചുരുങ്ങിയ സമയം കൊണ്ട് കൂടുതൽ ലഹരി വിരുദ്ധ ബോധവത്കരണ ക്ലാസുകൾ നടത്തിയതിലൂടെയാണ് രാജീവൻ ഏഷ്യാ ബുക്ക് ഓഫ് റെക്കോർഡ്സിൽ ഇടം പിടിച്ചത്. ഔദ്യോഗിക ജോലിക്കിടയിലും ലഹരി വിരുദ്ധ ബോധവത്കരണ പ്രവർത്തനങ്ങൾക്ക് ശക്തമായ നേതൃത്വം നൽകുന്നയാളാണ് രാജീവൻ. ബോധവത്കരണ പ്രവർത്തനം കൂടുതൽ ആഴത്തിൽ പതിയാൻ മാജിക് ഷോയിലൂടെയാണ് പ്രധാനമായും ബോധവത്കരണ പരിപാടി സംഘടിപ്പിക്കുന്നത്. എസിപി കെ.വി. പ്രമോദൻ അവാർഡ് വിതരണം ചെയ്തു. കോളജ് പ്രിൻസിപ്പൽ ഇൻ ചാർജ് ഡോ ആർ.കെ. ബിജു അധ്യക്ഷത വഹിച്ചു. വിമാനത്താവള സ്റ്റേഷൻ സിഐ ടി.വി. പ്രദീഷ്, എൻസിസി ഓഫീസർ പി.വി. അനിൽ, എൻസിസി ഓഫീസർമാരായ കെ.സി. ജയന്തി, ഡോ.വി.പി. സജിനേഷ്, ആന്‍റി ഡ്രഗ്സ് കമ്മിറ്റി കൺവീനവർ ഡോ.അഖിൽ കെ. ശ്രീധർ, ഡോ. സുചിത്ര സുധീർ, റിട്ട. മിലിറ്ററി ഓഫീസർ ഗംഗാധരൻ, വിമാനത്താവള സ്റ്റേഷൻ എസ്ഐ കെ. രമേഷ്,കോളജ് യൂണിയൻ ചെയർമാൻ നിധി ദിനേശ് എന്നിവർ പ്രസംഗിച്ചു. തുടർന്ന് ലഹരി വിരുദ്ധ ബോധവൽക്കരണ മാജിക്കും നടന്നു.

സിപിഎം അണികളും കവർച്ച തുടങ്ങിയെന്ന് രാജീവൻ എളയാവൂർ

കണ്ണൂർ: പിണറായി വിജയൻ സ്വർണക്കടത്തിനും സ്വർണ കവർച്ചയ്ക്കും ഒത്താശ നല്കുമ്പോൾ അണികളും സ്വർണ കവർച്ചയും പിടിച്ചുപറിയും തുടങ്ങിയിരിക്കുകയാണെന്നും അതിന്‍റെ ഉദാഹരണ മാണ് കൂത്തുപറമ്പിൽ സിപിഎം കൗൺസിലർ വയോധികയുടെ സ്വർണമാല കവർച്ച ചെയ്തതെന്ന് കെപിസിസി മെംബർ രാജീവൻ എളയാവൂർ ആരോപിച്ചു. ഓൾ കേരള പെയിന്‍റേഴ്സ് കോൺഗ്രസ് കണ്ണൂർ ജില്ലാ മെംബർഷിപ്പ് കാമ്പയിനും തൊഴിലാളികൾക്കുള്ള ഐഡന്‍റിറ്റി കാർഡ് വിതരണവും ഡിസിസി ഓഡിറ്റോറിയത്തിൽ ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ജില്ലാ കോ-ഓർഡിനേറ്റർ കബീർ പയ്യന്നൂർ അധ്യക്ഷത വഹിച്ചു. ജില്ലാ ജനറൽ സെക്രട്ടറി എ. ടി. നിഷാത്ത് മുഖ്യപ്രഭാഷണം നടത്തി. പെയിന്‍റിംഗ് മേഖലയിലെ തൊഴിലാളികൾക്ക് ആരോഗ്യ-അപകട ഇൻഷ്വറൻസ് നടപ്പിലാക്കുന്നതിന് സർക്കാർ തയാറാവണമെന്നും, മുടങ്ങിക്കിടക്കുന്ന 20 മാസത്തെ പെൻഷൻ അടിയന്തരമായി വിതരണം ചെയ്യാൻ നടപടി ഉണ്ടാകണമെന്നും, പെയിന്‍റിംഗ് മേഖലയിൽ കുത്തകകളുടെ കടന്നു കയറ്റം തടയണമെന്നും കൺവൻഷൻ സർക്കാറിനോട് ആവശ്യപ്പെട്ടു.അനൂപ് മാവിലായി, മനോഹരൻ കേളകം, ജോജി ജോസഫ്, ഹരീഷ് കുമാർ മുള്ളിക്കാട്ടിൽ, ദീപേഷ് മമ്മാങ്കുന്ന് എന്നിവർ പ്രസംഗിച്ചു.

ആരും തിരിഞ്ഞുനോക്കാതെ മട്ടന്നൂർ ടൗൺ സ്‌ക്വയർ

മട്ടന്നൂർ: നഗരത്തിലെത്തുന്നവർക്കുള്ള വിനോദ-വിശ്രമ കേന്ദ്രമെന്ന നിലയിൽ നിർമിച്ച മട്ടന്നൂർ ടൗൺസ്‌ക്വയറിൽ ആളനക്കമില്ല. ടൂറിസം വകുപ്പിന്‍റെ നേതൃത്വത്തിലാണ് കോടികൾ ചെലവഴിച്ച് നഗരമധ്യത്തിലെ ഐബി പരിസരത്ത് ടൗൺ സ്‌ക്വയർ നിർമിച്ചത്. മരങ്ങൾക്കിടയിൽ പ്രകൃതി സൗഹൃദ രീതിയിലാണ് കേന്ദ്രം ഒരുക്കിയിട്ടുള്ളത്. എന്നാൽ വളരെ കുറവ് ആളുകൾ മാത്രമാണ് ഇവിടെ എത്തിച്ചേരുന്നത്. കാര്യമായി പൊതുപരിപാടികളും ഇവിടെ നടത്താറില്ല. ആളുകളെത്താത്ത ടൗൺ സ്‌ക്വയറിൽ വാഹനങ്ങൾ പാർക്ക് ചെയ്തിരിക്കുകയാണ്. മുമ്പ് കോവിഡ് ലോക്ക്ഡൗൺ കാലത്ത് അടച്ചിട്ട ഇവിടം കാടുകയറുകയും ഇരിപ്പിടങ്ങൾ ഉൾപ്പടെയുള്ളവ നശിക്കാൻ തുടങ്ങുകയും ചെയ്തിരുന്നു. പ്രതിഷേധം ഉയർന്നതോടെയാണ് ടൗൺ സ്‌ക്വയർ ശുചീകരിച്ചത്. കുട്ടികളുടെ പാർക്കും മറ്റും ആരും ഉപയോഗിക്കാതെ കിടക്കുകയാണ്. ടൗൺ സ്‌ക്വയറിന്‍റെ നടത്തിപ്പ് ഡിടിപിസി മുമ്പ് ലേലത്തിലൂടെ ഒരു സൊസൈറ്റിക്ക് നൽകിയിരുന്നു. ഇവരുടെ നേതൃത്വത്തിലുള്ള ഹോട്ടൽ പ്രവർത്തിക്കുന്നുണ്ട്. നഗരസഭയുടെ ഓപ്പൺ ഓഡിറ്റോറിയത്തിന്‍റെ നിർമാണം ബസ് സ്റ്റാൻഡ് പരിസരത്ത് പുരോഗമിക്കുകയാണ്. ഇത് പൂർത്തിയാകുന്നതോടെ പരിപാടികൾ നടത്താനും ടൗൺ സ്‌ക്വയർ വേണ്ടാതാകും. വൈകുന്നേരവും മറ്റും കനത്ത വെയിൽ അനുഭവപ്പെടുന്നതും ടൗൺ സ്‌ക്വയറിൽ ആളുകൾ എത്തിച്ചേരുന്നതിന് തടസമാകുന്നുണ്ട്. മരങ്ങളും മറ്റും പരിപാലിക്കേണ്ടതിനാൽ മേൽക്കൂര നിർമിച്ചിട്ടില്ല. പരിപാടികൾ നടത്തുന്നതിനുള്ള സ്റ്റേജ് സൗകര്യവും ഇരിപ്പിടങ്ങളും ശൗചാലയവും ഇവിടെയുണ്ട്. സമീപത്ത് കുട്ടികളുടെ പാർക്കും നിർമിച്ചിട്ടുണ്ട്. ഓരോ തദ്ദേശസ്ഥാപനങ്ങളിലും ടൂറിസം കേന്ദ്രം ഒരുക്കാനുള്ള നടപടികളുമായി സർക്കാർ മുന്നോട്ടുപോകുമ്പോഴാണ് നഗരമധ്യത്തിലുള്ള ടൗൺ സ്‌ക്വയർ ആർക്കും വേണ്ടാതെ കിടക്കുന്നത്.

കീഴല്ലൂർ പഞ്ചായത്ത് വികസന സദസ്

മട്ടന്നൂർ: കീഴല്ലൂർ പഞ്ചായത്ത് വികസന സദസ് നടത്തി. എടയന്നൂർ ഗവ.ഹയർ സെക്കൻഡറി സ് കൂളിൽ സംഘടിപ്പിച്ച വികസന സദസ് കെ.കെ. ശൈലജ എംഎൽഎ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് കെ.വി. മിനി അധ്യക്ഷത വഹിച്ചു. വികസന പ്രവർത്തനങ്ങളുടെ വീഡിയോ കെ.കെ. ശൈലജ എംഎൽഎ പ്രകാശിപ്പിച്ചു. കേരള സർക്കാരിന്‍റെ വികസന നേട്ടങ്ങളുടെ അവതരണം ഇരിട്ടി ബ്ലോക്ക് പഞ്ചായത്ത് ജോയിന്‍റ് ബിഡിഒ കെ.ബി. പ്രശാന്ത് നിർവഹിച്ചു. വികസന രേഖ എൻ.വി. ചന്ദ്രബാബു എംഎൽഎക്ക് നൽകി പ്രകാശിപ്പിച്ചു. പഞ്ചായത്ത് സെക്രട്ടറി എസ്. അജി റിപ്പോർട്ട് അവതരിപ്പിച്ചു. വിവിധ മേഖലകളിൽ മികവ് തെളിയിച്ചവരെ ആദരിച്ചു. ഇരിട്ടി ബ്ലോക്ക് പഞ്ചായത്ത് ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ എം. രതീഷ്, കണ്ണൂർ ജില്ലാ പഞ്ചായത്ത് അംഗം ചന്ദ്രൻ കല്ലാട്ട്, കെ.കെ. പ്രഭാകരൻ, കെ.വി. ഷീജ, കെ. മനോഹരൻ, പി.കെ. ജിഷ, എം. രാജൻ, സി. സജീവൻ, വൈസ് പ്രസിഡന്‍റ് കെ. അനിൽകുമാർ, അസി. സെക്രട്ടറി കെ.വി. രജനി എന്നിവർ പ്രസംഗിച്ചു. തുടർന്ന് നടന്ന ഓപ്പൺ ഫോറത്തിൽ പഞ്ചായത്തിൽ നടപ്പാക്കേണ്ട വികസനങ്ങളും ജനങ്ങൾ നേരിടുന്ന പ്രശ്നങ്ങളും ചർച്ചയായി.

ആറളം പഞ്ചായത്ത് വികസന സദസ്

ഇരിട്ടി : ആറളം പഞ്ചായത്ത് വികസന സദസ് ഡോ. ശിവദാസൻ എംപി ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് കെ.പി. രാജേഷ് അധ്യക്ഷത വഹിച്ചു. കണ്ണൂർ ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യൻ മുഖ്യാഥിതി ആയി. പഞ്ചായത്ത് സെക്രട്ടറി ബാലകൃഷ്ണൻ റിപ്പോർട്ട് അവതരിപ്പിച്ചു. പഞ്ചായത്തിനായി സൗജന്യമായി ഭൂമി വിട്ടു നൽകിയവരെയും ഹരിത കർമ സേന, റോഡ് സ്വീപ്പർമാർ എന്നിവരെയും ആദരിച്ചു. പഞ്ചായത്ത് വൈസ് പ്രസിഡന്‍റ് കെ.ജെ. ജെസി മോൾ, ഇരിട്ടി ജോയിന്‍റ് വിഡിഒ കെ. രമേശൻ, ആസൂത്രണ സമിതി ഉപാധ്യക്ഷൻ വൈ.വൈ. മത്തായി, ഹരിതകേരള മിഷൻ റിസോഴ്സ് പേഴ്സൺ ജയപ്രകാശ് പന്തക്ക, ആരോഗ്യ വിദ്യാഭ്യാസ സ്റ്റാൻഡിംഗ് കമ്മിറ്റി ചെയർമാൻ ഇ.സി. രാജു, പഞ്ചായത്ത് അംഗങ്ങളായ യു.കെ. സുധാകരൻ, ഇ.പി. മേരിക്കുട്ടി, ഷീബ രവി, ഷൈൻ ബാബു, യു.എസ്. ബിന്ദു, മിനി ദിനേശൻ എന്നിവർ പ്രസംഗിച്ചു.

അയ്യൻകുന്ന് വില്ലേജിൽ റീ സർവേ നടപടികൾക്ക് ജീവൻ വയ്ക്കുന്നു

ഇരിട്ടി : അയ്യൻകുന്ന് വില്ലേജിലെ റീസർവേ പ്രവൃത്തികൾക്കുള്ള നടപടികൾ ഉടൻ തുടങ്ങും. ഇതുമായി ബന്ധപ്പെട്ട് അയ്യൻകുന്ന് പഞ്ചായത്ത് പ്രസിഡന്‍റ് കുര്യാച്ചൻ പൈമ്പള്ളിക്കുന്നേലിന്‍റെ അധ്യക്ഷതയിൽ ഈ ആഴ്ച യോഗം ചേരും. സർവേയുടെ പ്രാരംഭ നടപടികൾ പൂർത്തിയാക്കാനാണ് ആദ്യയോഗം. 33 വർഷം മുന്പുള്ള ആവശ്യം ഇവിടുത്തെ ജനങ്ങളുടെ വർഷങ്ങളായുള്ള ആവശ്യമായിരുന്നു റീസർവേ. വനമേഖലയോട് അതിർത്തി പങ്കിടുന്ന അയ്യൻകുന്ന് പഞ്ചായത്തിലെ കുടിയേറ്റ കർഷകരുടെ ഭൂമി കൈമാറ്റം ചെയ്യണമെങ്കിൽ നിരാക്ഷേപപത്രം വേണമെന്ന വനംവകുപ്പിന്‍റെ ഉത്തരവിനെ തുടർന്ന് 1992 ൽ ആണ് പ്രദേശവാസികൾ ആദ്യമായി കർമസമിതി രൂപീകരിക്കുന്നത്. ഫോറസ്റ്റ് ജണ്ട കണക്കാക്കി സർവേ നടത്തി കർഷകരുടെ ഭൂമി വനം വകുപ്പിന്‍റെ നിമയത്തിൽനിന്നും ഒഴിവാക്കിത്തരണം എന്നായിരുന്നു ഇവരുടെ ആവശ്യം. അന്നത്തെ എംഎൽഎ ആയിരുന്ന കെ.പി. നൂറുദീന്‍റെ നേതൃത്വത്തിൽ പി.സി. ജോസ് കൺവീനർ ആയി കർമസമിതി പ്രവർത്തനം ആരംഭിക്കുന്നത്. അന്നത്തെ റവന്യൂ മന്ത്രി ആയിരുന്ന കെ.എം. മാണിയെ നേരിൽക്കണ്ട് കാര്യങ്ങൾ ധരിപ്പിച്ചു. തുടർന്നും നിരന്തര പരാതികളുടെ ഫലമായി 1995 ൽ 10 അംഗ പ്രത്യേക സർവേ സംഘത്തെ അയ്യൻകുന്നിലേക്ക് നിയമിക്കുന്നു. ഇതിന്‍റെ എല്ലാം പിന്നിൽ തിരുവനന്തപുരം മുതൽ കണ്ണൂർ വരെ നിരന്തരമായ നിരവധി ഓഫീസുകൾ കയറി ഇറങ്ങേണ്ടി വന്നിട്ടുണ്ട്. മൂർഖൻ പറമ്പിലേക്കും ബാരാപോളിലേക്കും മാറ്റുന്നു അയ്യൻകുന്നിൽ എത്തിയ സർവേ സംഘം പ്രവർത്തനം തുടങ്ങി മാസങ്ങൾക്ക് ഉള്ളിലാണ് ഇവരെ മൂർഖൻ പറമ്പിലേക്കും ബാരാപോളിലേക്കും സർവേ നടപടികൾക്കായി മാറ്റിക്കൊണ്ടുള്ള ഉത്തരവ് വരുന്നത്. ഏറെ പ്രതീക്ഷയോടെ തുടങ്ങിയെങ്കിലും മുളയിലേ നുള്ളിയ ആവശ്യം ഉപേക്ഷിക്കാൻ കർമസമിതിയുടെ അമരക്കാരനായ പി.സി.ജോസ് തയാറായിരുന്നില്ല. പിന്നീട് പലതവണ അനുകൂല ഉത്തരവുകൾ വന്നെങ്കിലും സാങ്കേതിക പ്രശ്നങ്ങൾ തടസമായി. 2021 വീണ്ടും അയ്യൻകുന്നിൽ റീസർവേ നടപടികൾ ആരംഭിക്കാൻ നടപടികൾ പൂർത്തിയായി. അങ്ങാടിക്കടവിൽ ക്യാമ്പ് ഓഫീസ് ആരംഭിച്ചെങ്കിലും വെമ്പുഴ പുഴ പുറമ്പോക്ക് വിവാദത്തിൽപെട്ട് വീണ്ടും സർവേ നടപടികൾ നിലച്ചു. പിന്നീട് അയ്യൻകുന്ന് വില്ലേജ് വിഭജിച്ച് അങ്ങാടിക്കടവ്, കരിക്കോട്ടക്കരി വില്ലേജുകൾ നിലവിൽവന്നു. ഇതിൽ കരിക്കോട്ടക്കരി വില്ലേജിൽ മാത്രം റീ സർവേ നടപടികൾ പൂർത്തിയായെങ്കിലും പ്രശ്നം നിലനിൽക്കുന്ന അങ്ങാടിക്കടവ് വില്ലേജിൽ പഴയ സ്ഥിതി തുടർന്നു. മുഖ്യമന്ത്രിക്ക് പരാതി നൽകി ധർമടത്ത് നടന്ന പരിപാടിയിൽ റീസർവേ ആവശ്യവുമായി പി.സി. ജോസ് മുഖ്യമന്ത്രിക്ക് പരാതി നൽകി. ഇതിന്‍റെ തുടർനടപടിയായാണ് വീണ്ടും അയ്യൻകുന്നിൽ റീസർവേ ആരംഭിക്കുന്നതിന്‍റെ പ്രാരംഭ പ്രവൃത്തികൾ തുടങ്ങിയത്. ആറു മാസം കൊണ്ട് സർവേ നടപടികൾ പൂർത്തിയാക്കാനാണ് പദ്ധതി. സർവേ കൃത്യമായി പൂർത്തിയാക്കുന്നതിന് ഭൂഉടമകളുടെ സഹകരണം കൂടി അധികൃതർ ആവശ്യപ്പെട്ടിട്ടുണ്ട് . ഇതിനായി സ്ഥലത്തിന്‍റെ അതിർത്തികൾ തെളിച്ചുനൽകണം. വസ്തുവിന്‍റെ ആധാരം, ആധാർ കാർഡ് തുടങ്ങിയ രേഖകൾ സർവേ അധികൃതർക്ക് ഭൂ ഉടമകൾ നൽകണമെന്നും അധികൃതർ അറിയിച്ചു.1992 ആരംഭിച്ച കർമസമിതിയുടെ കമ്മിറ്റിക്കാരിൽ നാലുപേർ മാത്രമാണ് ഇന്ന് അവശേഷിക്കുന്നത്.

തളിപ്പറന്പ് കൗൺസിൽ യോഗത്തിൽ പ്രതിപക്ഷ പ്രതിഷേധം

തളിപ്പറമ്പ്: ആക്രി വില്പനയില്‍ ക്രമക്കേട് നടത്തിയെന്ന് ആരോപണവുമായി ബന്ധപ്പെട്ട വിഷയത്തിൽ നഗരസഭാ കൗൺസിൽ യോഗത്തിൽ പ്രതിപക്ഷ കൗൺസിലർമാർ പ്ലക്കാര്‍ഡുകൾ ഉയര്‍ത്തി പ്രതിഷേധിച്ചു. സംഭവത്തിൽ സസ്‌പെന്‍റ് ചെയ്യപ്പെട്ട ജീവനക്കാരന്‍റെ വിശദീകരണം ഇന്നലെ നടന്ന കൗണ്‍സില്‍ യോഗം പരിഗണിച്ചിരുന്നു.ഇതേ ചൊല്ലി ഭരണ-പ്രതിപക്ഷാംഗങ്ങള്‍ തമ്മിൽ വാക്ക് തർക്കം നടന്നിരുന്നു. ഇതിനിടയിലാണ് പ്രതിപക്ഷ കൗൺസിലർമാർ പ്ലക്കാര്‍ഡുകല്‍ ഉയര്‍ത്തി പ്രതിഷേധിച്ചത്. പ്രശ്‌നവുമായി ബന്ധപ്പെട്ട് നഗരസഭ ക്ലാര്‍ക്ക് വി.വി. ഷാജിയെ മുന്‍സിപ്പല്‍ ജോയിന്‍റ് ഡയറക്ടര്‍ അന്വേഷണ വിധേയമായി സസ്‌പെന്‍റ് ചെയ്തിരുന്നു. പ്രശ്‌നം ചര്‍ച്ചയ്ക്ക് വന്ന ഉടന്‍ പ്രതിപക്ഷ കൗണ്‍സിലര്‍മാര്‍ സ്‌ക്രാപ് ലേലം അഴിമതിയുടെ പങ്കുപറ്റിയവര്‍ രാജിവയ്ക്കുക എന്ന പ്ലക്കാര്‍ഡുകല്‍ ഉയര്‍ത്തി പ്രതിഷേധിക്കുകയായിരുന്നു. പ്രതിപക്ഷത്തെ സിപിഎം അംഗം സി.വി. ഗിരീശനും വൈസ് ചെയര്‍മാന്‍ കല്ലിങ്കീല്‍ പദ്മനാഭനും മറ്റ് കൗൺസിൽ അംഗങ്ങളും തമ്മിൽ ഇതിന്‍റെ പേരില്‍ വാക്ക് തർക്കവും നടന്നു. ഒടുവില്‍ പ്രതിപക്ഷ ത്തിന്‍റെ വിയോജനക്കുറിപ്പോടെ അജൻഡ് അംഗീകരിച്ചു.

പഞ്ചായത്ത് വികസന സദസുകൾ നടത്തി

പെരിങ്ങോം: ഭരണസമിതിയുടെ അഞ്ചു വർഷത്തെ വികസന നേട്ടങ്ങൾ അവതരിപ്പിച്ച് സംഘടിപ്പിച്ച പെരിങ്ങോം-വയക്കര ഗ്രാമപഞ്ചായത്ത് വികസന സദസ് മുൻ എംഎൽഎ കെ.പി. സതീഷ് ചന്ദ്രൻ ഉദ്ഘാടനം ചെയ്തു. ഇനി നടപ്പിലാക്കേണ്ട പദ്ധതികളും കൂടുതൽ മെച്ചപ്പെടുത്തേണ്ട മേഖലകളും വികസന പരിപാടി കളും ഓപ്പൺ ഫോറത്തിൽ ഉയർന്നുവന്നു. സദസിന്‍റെ ഭാഗമായി കെ സ്മാർട്ട് സേവനം ലഭ്യമാക്കി യിരുന്നു. പഞ്ചായത്ത് പരിസരത്ത് നടന്ന പരിപാടിയിൽ പഞ്ചായത്ത് പ്രസിഡന്‍റ് വി.എം. ഉണ്ണികൃഷ്ണൻ അധ്യക്ഷത വഹിച്ചു. പയ്യാവൂർ : പയ്യാവൂർ പഞ്ചായത്ത് വികസന സദസ് ഉദ്ഘാടനവും വികസന രേഖ പ്രകാശനവും കണ്ണൂർ ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യൻ നിർവഹിച്ചു. പഞ്ചായത്ത് പ്രസിഡന്‍റ് സാജു സേവ്യർ അധ്യക്ഷത വഹിച്ചു. പയ്യാവൂർ ബസ് സ്റ്റാൻഡ് പരിസരത്ത് നടത്തിയ പരിപാടിയിൽ പഞ്ചായത്ത് വൈസ് പ്രസിഡന്‍റ് പ്രീത സുരേഷ്, സ്ഥിരം സമിതി അധ്യക്ഷരായ മോഹനൻ, ഷീന ജോൺ, ആസൂത്രണ സമിതി ഉപാധ്യക്ഷൻ കെ.ടി. അനിൽകുമാർ, രാഷ്ട്രീയ കക്ഷി പ്രതിനിധികൾ എന്നിവർ പങ്കെടുത്തു. കാങ്കോൽ: കാങ്കോല്‍- ആലപ്പടമ്പ് ഗ്രാമപഞ്ചായത്ത് വികസന സദസ് ടി.ഐ. മധുസൂദനന്‍ എംഎല്‍എ ഉദ്ഘാടനം ചെയ്തു. പഞ്ചായത്ത് ഓഡിറ്റോറിയത്തില്‍ പ്രസിഡന്‍റ് എം.വി. സുനില്‍ കുമാര്‍ അധ്യക്ഷത വഹിച്ചു. പഞ്ചായത്തിന്‍റെ വികസന നേട്ടങ്ങള്‍ ഉള്‍ക്കൊള്ളിച്ച 'പടവുകള്‍' പ്രോഗ്രസ് റിപ്പോര്‍ട്ട് എംഎല്‍എ ഗ്രാമപഞ്ചായത്ത് മുന്‍ വൈസ് പ്രസിഡന്‍റ് കെ.പി. രാഘവനു നല്‍കി പ്രകാശനം ചെയ്തു. പരമ്പരാഗത ജലസ്രോതസുകളുടെ പുനരുദ്ധാരണം, എല്ലാ വാര്‍ഡുകളിലും പച്ചത്തുരുത്ത്, വനവത്കരണം, പൊതു കുളങ്ങളുടെ നിര്‍മാണം, 'പാതയോരം മനോഹരം' പദ്ധതി നടപ്പാക്കല്‍, നീര്‍ച്ചാലുകളുടെ നവീകരണം, തോടുകളുടെ പാര്‍ശ്വഭിത്തി നിര്‍മാണം എന്നിങ്ങനെയുള്ള പദ്ധതികളും കൂടുതല്‍ മെച്ചപ്പെടുത്തേണ്ട മേഖലകളും ശ്രദ്ധയൂന്നേണ്ട വികസന പരിപാടികളും ഓപ്പണ്‍ ഫോറത്തില്‍ ഉയര്‍ന്നുവന്നു.

കെഎസ്എസ്പിഎ നിടിയേങ്ങ മണ്ഡലം വാർഷിക സമ്മേളനം

നിടിയേങ്ങ: കെഎസ്എസ്പിഎ നിടിയേങ്ങ മണ്ഡലം വാർഷിക സമ്മേളനത്തിന്‍റെയും പുതിയ ഭാരവാഹികളെ തെരഞ്ഞെടുക്കൽ ചടങ്ങിന്‍റേയും ഉദ്ഘാടനം ശ്രീകണ്ഠപുരം നഗരസഭാധ്യക്ഷ ഡോ.കെ.വി. ഫിലോമിന നിർവഹിച്ചു. നിടിയേങ്ങ മണ്ഡലം പ്രസിഡന്‍റ് കെ.വി. കുഞ്ഞിരാമൻ അധ്യക്ഷത വഹിച്ചു. കെ. രാമകൃഷ്ണൻ മുഖ്യ പ്രഭാഷണം നടത്തി. ജോസ് സക്കറിയ ക്ലാസുകൾ നടത്തി. സി.വി. ലക്ഷ്മണൻ, പി.പി. ചന്ദ്രാഗദൻ, അപ്പു കണ്ണാവിൽ, എം.പി. കുഞ്ഞിമൊയ്‌ദീൻ, ജോസഫീന വർഗീസ്, ജിയോ ജേക്കബ് എന്നിവർ പ്രസംഗിച്ചു.

ചെറുപുഴയിൽ യംഗ് ഇന്ത്യ ജില്ലാതല ഉദ്ഘാടനം

ചെറുപുഴ: യൂത്ത് കോൺഗ്രസ് സംഘടനാ സംവിധാനം ശക്തിപ്പെടുത്തുന്നതിനും പഞ്ചായത്ത് തെരഞ്ഞെടുപ്പിന്‍റെ ഒരുക്കങ്ങൾ വിലയിരുത്തുന്നതിനും വേണ്ടി യൂത്ത്‌ കോൺഗ്രസ് കണ്ണൂർ ജില്ലാ കമ്മിറ്റിയുടെ നേതൃത്വത്തിൽ നടത്തുന്ന യംഗ് ഇന്ത്യ 2.0 എന്ന പരിപാടിക്ക് ചെറുപുഴയിൽ തുടക്കമായി. യൂത്ത്‌ കോൺഗ്രസ് ദേശീയ സെക്രട്ടറി ഷംസീർ അൻസാരി ഖാൻ ഉദ്ഘാടനം ചെയ്തു. നിയോജക മണ്ഡലം പ്രസിഡന്‍റ് നവനീത് നാരായണൻ അധ്യക്ഷത വഹിച്ചു. ജില്ലാ പ്രസിഡന്‍റ് വിജിൻ മോഹനൻ, മുതിർന്ന കോൺഗ്രസ്‌ നേതാവ് വി. കൃഷ്ണൻ, മഹേഷ്‌ കുന്നുമ്മൽ, കെ.കെ. സുരേഷ് കുമാർ, ഉമ്മർ പെരിങ്ങോം, ടി.പി. ചന്ദ്രൻ, രവി പൊന്നംവയൽ, എ.കെ. രാജൻ, പ്രണവ് തട്ടുമ്മൽ, പ്രണവ് കരേള, ഡെൽജോ എം. ഡേവിഡ്, വൈശാഖ് ഏറ്റുകുടുക്ക, അരുൺ ആലയിൽ, ദിലിൻ വിത്തൻ തുടങ്ങിയവർ പ്രസംഗിച്ചു.

ഉണ്ണിമിശിഹാ പള്ളിക്ക് തറക്കല്ലിട്ടു

ശ്രീകണ്ഠപുരം: ശ്രീകണ്ഠപുരം ഉണ്ണിമിശിഹാ തീർഥാടന പള്ളിയുടെ തറക്കല്ലിടൽ കർമവും സമ്പൂർണ മാതൃവേദി ഇടവക പ്രഖ്യാപനവും നടന്നു. തിരുക്കർമങ്ങൾക്ക് തലശേരി ആർച്ച് ബിഷപ് മാർ. ജോസഫ് പാംപ്ലാനി മുഖ്യകാർമികത്വം വഹിച്ചു. തലശേരി അതിരൂപത ചാൻസലർ ഫാ. ജോസഫ് മുട്ടത്ത്കുന്നേൽ, വികാരി ഫാ. ജോസഫ് മഞ്ചപ്പിള്ളിൽ, അസി. വികാരി ഫാ. മാർട്ടിൻ പാഴൂപ്പറമ്പിൽ എന്നിവർ സഹകാർമികരായിരുന്നു. 2010 ൽ സ്ഥാപിതമായ ശ്രീകണ്ഠപുരം ഇടവകയുടെ അനേക നാളുകളായുള്ള സ്വപ്നമാണ് യാഥാർഥ്യമാകുന്നത്. ഇടവകയിലെ മുഴുവൻ അമ്മമാരേയും മാതൃവേദിയിൽ അംഗങ്ങളാക്കി എന്ന അപൂർവ നേട്ടവും സ്വന്തമാക്കുകയാണ് ശ്രീകണ്ഠപുരം ഇടവക. തിരുക്കർമങ്ങൾക്ക് ശേഷം സ്നേഹവിരുന്നും ഉണ്ടായിരുന്നു.

കരുവഞ്ചാൽ-കുറ്റിപ്പുഴ-നെല്ലിപ്പാറ റോഡ് തകർന്നു

ആലക്കോട്: രണ്ടു പതിറ്റാണ്ട് മുന്പ് പൊതുമരാമത്ത് വകുപ്പ് ഏറ്റെടുത്ത് നിർമിച്ച കരുവഞ്ചാൽ-കുറ്റിപ്പുഴ- നെല്ലിപ്പാറ റോഡ് തകർന്നു. എട്ടുകിലോ മീറ്ററുള്ള റോഡ് തകർന്നിട്ടും അറ്റകുറ്റപ്പണികൾ നടത്തി സഞ്ചാരയോഗ്യമാക്കാൻ അധികൃതർ തയാറാകുന്നില്ലെന്നാണു നാട്ടുകാർ പറയുന്നത്. നിരവധി തവണ പരാതി നൽകിയിട്ടും അധികൃതർ തിരിഞ്ഞു നോക്കുന്നില്ലെന്ന ആക്ഷേപമുണ്ട്. തുടർച്ചയായുള്ള മഴ റോഡിൽ കുഴികൾ രൂപപ്പെട്ട് അപകടാവസ്ഥയ്ക്ക് കാരണമാവുന്നുണ്ട്. ഇരുചക്രവാഹനങ്ങൾ അപകടത്തിൽപ്പെടുന്നത് നിത്യസംഭവമായിരിക്കുന്നു. റോഡ് റീടാറിംഗ് നടത്തി എത്രയും വേഗം നവീകരിക്കണമെന്നും ഗ്രാമീണ മേഖലയിലൂടെ കടന്നുപോകുന്ന ഈ റോഡിലൂടെ ബസ് സർവീസ് ആരംഭിക്കണമെന്നുമാണ് നാട്ടുകാരുടെ ആവശ്യം.

കാണാതായ യുവാവിനെ പുഴയിൽ മരിച്ച നിലയിൽ കണ്ടെത്തി

മട്ടന്നൂർ: കാണാതായ യുവാവിനെ പുഴയിൽ മരിച്ച നിലയിൽ കണ്ടെത്തി. ആയിപ്പുഴ ബസ് സ്റ്റോപ്പിനു സമീപത്തെ കെ.വി ഹൗസിൽ വി. മർസൂക്ക്-കെ.വി. നസീമ ദമ്പതികളുടെ മകൻ കെ.വി. സഫ്രാനെയാണ് (29) മരിച്ചനിലയിൽ കണ്ടെത്തിയത്. കഴിഞ്ഞ 16ന് രാത്രി 7.30ന് പുറത്തു പോയി വരാമെന്നു പറഞ്ഞു വീട്ടിൽ നിന്ന് ഇറങ്ങിയതായിരുന്നു. തിരിച്ചെത്താത്തതിനെ തുടർന്നു വീട്ടുകാർ മട്ടന്നൂർ പോലീസിൽ പരാതി നൽകി. ബന്ധുക്കളും പോലീസും ചേർന്ന് അന്വേഷണം നടത്തുന്നതിനിടെയാണ് പട്ടാന്നൂർ നിടുകുളം പുഴയോരത്ത് മൃതദേഹം കണ്ടെത്തിയത്. ഇന്നലെ രാവിലെയാണു വെള്ളത്തിൽ പൊങ്ങിക്കിടക്കുന്ന നിലയിൽ മൃതദേഹം കണ്ടത്. മട്ടന്നൂർ പോലീസ് സ്ഥലത്തെത്തി ഇൻക്വസ്റ്റ് നടത്തി. വിദേശത്തായിരുന്ന സഫ്രാൻ രണ്ടുവർഷം മുമ്പാണു നാട്ടിലെത്തിയത്. ലോഡിംഗ് തൊഴിൽ ചെയ്തു വരികയായിരുന്നു. സഹോദരങ്ങൾ: അഫ്ത്താർ, സഫ്രീന.

പ്രാപ്പൊയിലിന്‍റെ പവറിൽ പയ്യന്നൂരിന് കിരീടം

തലശേരി: ജില്ലാ കായിക മേളയില്‍ പ്രാപ്പൊയില്‍ സ്‌കൂളിന്‍റെ പവറിൽ പയ്യന്നൂര്‍ ഉപജില്ല തുടര്‍ച്ചയായി ചാന്പ്യന്‍ഷിപ്പ് നിലനിര്‍ത്തി. എതിരാളികള്‍ക്കു പോലും പിന്തുടരാന്‍ കഴിയാതെ 27 സ്വര്‍ണവും 16 വെള്ളിയും16 വെങ്കല്ലവും കരസ്ഥമാക്കി 230 പോയിന്‍റുകള്‍ നേടിയാണ് പയ്യന്നൂർ കിരീടം നിലനിര്‍ത്തിയത്. ഒമ്പത് സ്വര്‍ണവും ഏഴു വെള്ളിയും ഒമ്പതു വെങ്കല്ലവുമായി 81.25 പോയിന്‍റുള്ള മട്ടന്നൂര്‍ ഉപജില്ല രണ്ടാംസ്ഥാനവും, ആറ് സ്വർണവും 10 വെള്ളിയും 12 വെങ്കല്ലുമായി 74 പോയിന്‍റോടെ ഇരിട്ടി ഉപജില്ല മൂന്നാമതെത്തി. 11 സ്വര്‍ണവും നാല് വെള്ളിയും ഒരു വെങ്കല്ലവുമായി 68 പോയിന്‍റിനേടി സ്‌കൂള്‍ തലത്തില്‍ പയ്യന്നൂര്‍ പ്രാപ്പൊയില്‍ ഗവ. എച്ച്എസ്എസ് ഒന്നാം സ്ഥാനം കരസ്ഥമാക്കി ഒന്നാമതായി. പയ്യന്നൂര്‍ ഉപജില്ലയ്ക്ക് തുടര്‍ച്ചയായി കിരീടം നിലനിര്‍ത്താന്‍ പ്രാപ്പൊയില്‍ സ്‌കൂളിന്‍റെ പോരാട്ടം നിര്‍ണായകമായി. എട്ട് സ്വര്‍ണവും മൂന്നു വെള്ളിയും രണ്ട് വെങ്കല്ലവുമായി 51 പോയിന്‍റുമായി മട്ടന്നൂര്‍ എച്ച്എസ്എസ് രണ്ടാംസ്ഥാനവും, ആറ് സ്വര്‍ണവും ഒരു വെള്ളിയും രണ്ട് വെങ്കല്ലവുമായി 35 പോയിന്‍റുകള്‍ നേടി കരിവെള്ളൂര്‍ എ.വി.എസ് ഗവ. ഹയര്‍സെക്കന്‍ഡറി സ്‌കൂള്‍ മൂന്നാം സ്ഥാനവും കരസ്ഥമാക്കി. മൂന്നു ദിനങ്ങളിലായി നടന്ന കായിക മേളയില്‍ 22 റിക്കാർഡുകളാണ് പഴങ്കഥയായത്. സമാപന സമ്മേളനം ഉദ്ഘാടനവും സമ്മാന വിതരണവും തലശേരി നഗരസഭ വൈസ് ചെയര്‍മാന്‍ എം.വി. ജയരാജന്‍ നിര്‍വഹിച്ചു. കണ്ണൂര്‍ വിദ്യാഭ്യാസ ഉപഡയറക്ടര്‍ ഡി. ഷൈനി അധ്യക്ഷത വഹിച്ചു. നഗരസഭാ അംഗങ്ങളായ കെ.എം. ശ്രീശന്‍, ടി.വി. റാഷിദ, ജില്ലാ വിദ്യാഭ്യാസ ഓഫിസര്‍ പി. ശകുന്തള, കണ്ണൂര്‍ ആര്‍ഡിഎസ്ജിഎ സെക്രട്ടറി എന്‍.പി. ബിനീഷ്, തലശേരി നോര്‍ത്ത് ഉപജില്ലാ വിദ്യാഭ്യാസ ഓഫിസര്‍ എ. പ്രശാന്ത് എന്നിവർ പ്രസംഗിച്ചു. സമാപനദിനത്തില്‍ റിക്കാർഡ് മഴ തലശേരി: ജില്ലാ റവന്യൂ സ്‌കൂള്‍ കായികമേളയുടെ സമാപനദിനത്തില്‍ പിറന്നത് 10 മീറ്റ് റിക്കാർഡുകള്‍. സബ് ജൂണിയര്‍ ആണ്‍കുട്ടികളുടെ ഡിസ്‌കസ്‌ ത്രോയില്‍ കൂത്തുപറമ്പ് റാണി ജയ് എച്ച്എസ്എസ് എട്ടാം ക്ലാസ് വിദ്യാര്‍ഥി വി.വി മുഹമ്മദ് ജസാഹ്. 35.15 മീറ്റര്‍ എറിഞ്ഞാണ് മീറ്റ് റിക്കാർഡ് തകര്‍ത്തത്. സീനിയര്‍ പെണ്‍കുട്ടികളുടെ മൂന്ന് കിലോമീറ്റര്‍ നടത്തത്തില്‍ മാത്തില്‍ ഗവ. ഹയര്‍സെക്കന്‍ഡറി സ്‌കൂള്‍ പ്ലസ് ടു വിദ്യാര്‍ഥിനി പി.വി നിരഞ്ജന 15 മിനിറ്റ് 26.44 സെക്കന്‍ഡിലാണ് റിക്കാർഡ് മറികടന്നത്. സീനിയര്‍ ആണ്‍കുട്ടികളുടെ ട്രിപ്പിള്‍ ജന്പിൽ കുതിപ്പുമായി പേരാവൂര്‍ സെന്‍റ് ജോസഫ് എച്ച്എസ്എസിലെ അല്‍ബിന്‍ ഇമ്മാനുവല്‍ ഷൈജന്‍. 2014 ല്‍ കണ്ണാടിപ്പറമ്പ് ജിഎച്ച്എസ്എസിലെ വി. രാഹുലിന്‍റെ 13.31 മീറ്റര്‍ നേട്ടമാണ് ആല്‍ബിന്‍ തിരുത്തിയത്. 13.54 മീറ്ററാണ് പുതിയ നേട്ടം. പേരാവൂര്‍ ചേരുംതടത്തില്‍ സി. ഷൈജന്‍റേ യും സിജിയുടെയും മകനാണ് ആല്‍ബിന്‍. മൂന്ന് റിക്കാർഡുകളുടെ തിളക്കത്തിലാണ് കരിവള്ളൂര്‍ എവിഎസ്ജിഎച്ച്എസ്എസിലെ പ്ലസ് വണ്‍ വിദ്യാര്‍ഥി കെ. അഭിനവ്. ജൂണിയര്‍ വിഭാഗം 400 മീറ്റര്‍ ഓട്ടം, 400 മീറ്റര്‍ ഹര്‍ഡില്‍സ്, 110 മീറ്റര്‍ ഹര്‍ഡില്‍സ് എന്നിവയിലാണ് നേട്ടം കൊയ്തത്. പയ്യന്നൂര്‍ കണ്ടോത്ത് കാഞ്ഞിരക്കില്‍ കെ. വിജയ കുമാറിന്‍റെയും ടി. പ്രവീണയുടെയും മകനാണ്. സബ്ജൂണിയര്‍ പെണ്‍കുട്ടികളുടെ ഡിസ്‌കസ് ത്രോയില്‍ റിക്കോർഡിട്ട് മമ്പറം എച്ച്എസ്എസിലെ എട്ടാം ക്ലാസ് വിദ്യാര്‍ഥിനി ബി.കെ അന്‍വിക. 34.75 മീറ്റര്‍ ആണ് പുതിയ റിക്കാർഡ്. ആണ്‍കുട്ടികളുടെ ജൂണിയര്‍ ബോയ്‌സ് ത്രിപ്പിള്‍ ജംപ് മത്സരത്തില്‍ ജിഎച്ച്എസ്എസ് പ്രപൊയില്‍ 10 ക്ലാസ് വിദ്യാര്‍ഥി അഭിനവ് മനോജ് 13.01 സെക്കൻഡില്‍ റിക്കാർഡ് നേടി. സബ് ജൂണിയര്‍ ബോയ്‌സ് 200 മീറ്റര്‍ ഓട്ടത്തില്‍ തിരുവങ്ങാട് ഗവ എച്ച്എസ്എസിലെ കെ.കെ ഇഷാന്‍ മീറ്റ് റിക്കാർഡോടെ സ്വര്‍ണം നേടി. സീനിയര്‍ ബോയ്‌സ് 400 മീറ്റര്‍ ഹഡില്‍സില്‍ തോട്ടട എസ്എന്‍ ട്രസ്റ്റ് എച്ച്എസ്എസിലെ സങ്കീര്‍ത്ത് വിനോദ് 54.3 സെക്കൻഡ് കൊണ്ട് മീറ്റ് റിക്കാർഡ് മറികടന്നു. സീനിയര്‍ ബോയ്‌സ് 200 മീറ്റര്‍ ഓട്ടത്തില്‍ മമ്പറം എച്ച്എസ്എസിലെ എ.എം ഷാരോണ്‍ കൃഷ്ണ 22.59 സെക്കൻഡ് കൊണ്ട് മോറാഴ ജിവിഎച്ച്എസ്എസിലെ പി.പി വിനീത് 2012 ല്‍ സ്ഥാപിച്ച 22.75 എന്ന മീറ്റ് റിക്കോർഡ് മറികടന്നു.ജൂണിയർ ഗേൾസ് 200 മീറ്റർ ഓട്ടത്തിൽ തലശേരി സായിയിലെ 25. 16 സെക്കൻഡ് മീറ്റ് റിക്കാർഡിട്ടു. സായിയിലെ തന്നെ ഡെൽന ഫിലിപിന്‍റെ 26. 48 സെക്കൻഡാണ് തിരുത്തിയത്.

വെസ്റ്റേൺ ഇന്ത്യ പ്ലൈവുഡ്സിന്‍റെ മരമില്ലിൽനിന്ന് കാൽക്കോടിയുടെ യന്ത്ര ഭാഗങ്ങൾ കവർന്ന പ്രതികൾ അറസ്റ്റിൽ

തലശേരി: വെസ്റ്റേൺ ഇന്ത്യ പ്ലൈവുഡ്സിന്‍റെ മരമില്ലിൽ നിന്ന് കാൽക്കോടിയുടെ യന്ത്രഭാഗങ്ങൾ കവർന്ന കേസിലെ പ്രതികൾ അറസ്റ്റിൽ. കൊടുവള്ളി വീനസ് കോർണറിലെ സിറ്റി സെന്‍ററിന് പിറകിലുള്ള സതേൺ വിനീയേഴ്സ് ആൻഡ് വുഡ് വർക്സ് സ്ഥാപനത്തിൽ നടത്തിയ കവർച്ചയിലാണ് സെക്യൂരിറ്റി ജീവനക്കാരൻ കതിരൂർ ആറാം മൈലിലെ കനകരാജ് (64 ), പാട്യത്തെ മാരി ശെൽവം (30), വടകര പുറമേരിയിലെ വി. സന്തോഷ് കുമാർ (29), എന്നിവർ അറസ്റ്റിലായത്. പ്രതികളെ കോടതി റിമാൻഡ് ചെയ്തു.ദീർഘകാലമായി അടച്ചിട്ട സ്ഥാപനത്തിലാണ് കവർച്ച നടന്നത്. പരാതി രജിസ്റ്റർ ചെയ്ത പോലീസ് രണ്ടുദിവസം കൊണ്ട് പ്രതികളെ പിടികൂടുകയായിരുന്നു. കഴിഞ്ഞ ദിവസമാണ് 25 ലക്ഷം രൂപ വില വരുന്ന മെഷീനറികൾ കാണാനില്ലെന്ന് കാണിച്ച് കമ്പനി മാനേജർ പിണറായി പാണ്ട്യാല മുക്കിലെ ശ്രുതിലകത്തിൽ രാജഗോപാലൻ നായർ പരാതി നല്കിയത്. കഴിഞ്ഞ ഓഗസ്റ്റ് 30 നും ഒക്ടോബർ 13 നും ഇടയിലുള്ള ഏതോ സമയത്താണ് കളവ് നടന്നതെന്നായിരുന്നു സൂചന. കമ്പനിയിൽ മരങ്ങൾ ഈർച്ച നടത്താൻ വേണ്ടി തടികൾ മെഷീനിലേക്ക് ഉരുട്ടിക്കൊണ്ടുപോകുന്ന റെയിലിന്‍റെ ഒരു ഭാഗവും മരം ഉരുട്ടാൻ ഉപയോഗിക്കുന്ന ഇരുമ്പിന്‍റെ നാല് ടയറുകളും സ്റ്റാൻഡും ഉൾപ്പെടെയുള്ള അനുബന്ധ ഉരുപ്പടികളുമാണ് കവർച്ച നടത്തിയതായി കണ്ടെത്തിയത്. ഒന്നിൽ കൂടുതൽ പേർ എത്തിയാൽ മാത്രമേ ഏറെ ഭാരമുള്ള യന്ത്രഭാഗങ്ങൾ കടത്തിക്കൊണ്ടുപോകാനാവു എന്ന നിഗമനത്തിൽ ആദ്യം കമ്പനിയിലെ സെക്യൂരിറ്റിക്കാരനെയാണ് ചോദ്യം ചെയ്തത്. ചില സൂചനകൾ ലഭിച്ചതോടെ ആക്രിക്കച്ചവടക്കാരായ മറ്റ് പ്രതികളിലേക്കും അന്വേഷണസംഘം നീങ്ങുകയായിരുന്നു. തൊണ്ടി മുതലുകളിൽ ഒരു ഭാഗം വടകര പുറമേരി വെള്ളൂരിലെ ആക്രിക്കടയിൽ നിന്നും പോലീസ് വീണ്ടെടുത്തു. പ്രമുഖ പ്ലൈവുഡ് വ്യവസായിയായിരുന്ന എ.കെ. കാദർകുട്ടി സാഹിബായിരുന്നു മരമില്ലിന്‍റെ സ്ഥാപകൻ.

ചാലോട് ചൈതന്യം മുത്തപ്പൻ മടപ്പുരയിൽ ഭണ്ഡാരം തകർത്തു മോഷണം

മട്ടന്നൂർ: ചാലോട് ചൈതന്യം മുത്തപ്പൻ മടപ്പുരയിൽ ഭണ്ഡാരം തകർത്ത് മോഷണം. ക്ഷേത്രത്തിലെ രണ്ടു ഭണ്ഡാരങ്ങളുടെ പൂട്ടു പൊളിച്ചാണു പണം കവർന്നത്. ചാലോട് ടൗണിൽ ഇരിക്കൂർ റോഡിലെ ചൈതന്യം മുത്തപ്പൻ മടപ്പുരയിലാണു വ്യാഴാഴ്ച രാത്രി മോഷണം നടന്നത്. ക്ഷേത്രത്തിനോടു ചേർന്നു മുന്നിൽ സ്ഥാപിച്ച ഭണ്ഡാരത്തിലെയും റോഡിനോടു ചേർന്ന് മതിലിൽ സ്ഥാപിച്ച ഭണ്ഡാരത്തിലെയുമാണു പണം കവർന്നത്. ഇന്നലെ രാവിലെ ക്ഷേത്രം ഭാരവാഹികൾ സ്ഥലത്തെത്തിയപ്പോഴാണു മോഷണം ശ്രദ്ധയിൽപെട്ടത്. ഒരുമാസത്തോളമായി ഭണ്ഡാരം തുറക്കാത്തതെന്ന് ക്ഷേത്രം ഭാരവാഹികൾ പറഞ്ഞു. മുമ്പും ക്ഷേത്രത്തിലെ ഭണ്ഡാരം പൊളിച്ചു മോഷണം നടത്തിയിരുന്നു. ക്ഷേത്രം ഭാരവാഹികൾ പരാതി നൽകിയതിനാൽ മട്ടന്നൂർ പോലീസ് സ്ഥലത്തെത്തി അന്വേഷണം ആരംഭിച്ചു.

മട്ടന്നൂരിൽ വൻ എംഡിഎംഎ വേട്ട; ഒരാൾ അറസ്റ്റിൽ

മട്ടന്നൂർ: ലക്ഷങ്ങൾ വിലമതിക്കുന്ന എംഡിഎംഎയുമായി യുവാവ് മട്ടന്നൂർ പോലീസിന്‍റെ പിടിയിലായി. ന്യൂമാഹി സ്വദേശി യു.കെ. റിഷാബിനെ (31) ആണ് 52 ഗ്രാമോളം എംഡിഎംഎയുമായി അറസ്റ്റു ചെയ്തത്. ഇന്നലെ പുലർച്ചെ അഞ്ചരയോടെ മട്ടന്നൂർ-ഇരിട്ടി റോഡിൽ പാലോട്ടുപള്ളിയിൽ നിന്നാണ് ഇയാളെ പിടികൂടിയത്. രഹസ്യവിവരത്തിന്‍റെ അടിസ്ഥാനത്തിൽ മട്ടന്നൂർ എസ്ഐ സി.പി. ലിനേഷും സംഘവും നടത്തിയ വാഹന പരിശോധനയിലാണു യുവാവ് എംഡിഎംഎയുമായി പിടിയിലായത്. ബംഗളൂരുവിൽ നിന്നു തലശേരിയിലേക്കു വരികയായിരുന്ന ബസിൽ വന്ന യുവാവ് പാലോട്ടുപള്ളി സ്റ്റോപ്പിൽ ഇറങ്ങിയപ്പോഴാണു പോലീസ് പിടികൂടിയത്. എംഡിഎംഎ വില്പന നടത്താനായി കൊണ്ടുപോകുന്നതിനിടെയാണ് ഇയാൾ പിടിയിലായതെന്നു പോലീസ് അറിയിച്ചു. യുവാവിന്‍റെ അറസ്റ്റ് രേഖപ്പെടുത്തി വൈകുന്നേരത്തോടെ മട്ടന്നൂർ കോടതിയിൽ ഹാജരാക്കി.

കൊളപ്പ ചിത്രാരിയിൽ വാഹനാപകടം; രണ്ടു പേർക്ക് പരിക്ക്

മട്ടന്നൂർ: ചാലോട് -ഇരിക്കൂർ റോഡിൽ കൊളപ്പ ചിത്രാരിയിൽ വാഹനാപകടം. രണ്ടു പേർക്ക് പരിക്കേറ്റു. ശനിയാഴ്ച രാത്രി എട്ടോടെ ചിത്രാരി ആക്രി പീടികയ്ക്ക് സമീപമായിരുന്നു അപകടം. ചാലോട് ഭാഗത്ത് നിന്ന് ഇരിക്കൂർ ഭാഗത്തേക്ക് പോകുകയായിരുന്ന കാറും എതിരേ വന്ന പാഴ്സൽ വാനുമാണ് കൂട്ടിയിടിച്ചത്. ഇരുവാഹനങ്ങളിലുമുള്ളവർക്കാണ് പരിക്കേറ്റത്. ഇവർ ആശുപത്രിയിൽ ചികിത്സ തേടി. അപകടത്തിൽ കാറിന്‍റേയും പാഴ്സൽ വാനിന്‍റേയും മുൻ ഭാഗം തകർന്നു. മട്ടന്നൂർ പോലീസ് സ്ഥലത്തെത്തി അപകടത്തിൽപ്പെട്ട വാഹനങ്ങൾ റോഡിൽ നിന്ന് നീക്കി.

ഓൺലൈൻ തട്ടിപ്പ്: നഷ്‌ടമായത് അഞ്ചേമുക്കാൽ ലക്ഷം

പയ്യന്നൂർ: രണ്ടുപേരിൽ നിന്ന് ഓൺലൈൻ തട്ടിപ്പിലൂടെ അഞ്ചേമുക്കാൽ ലക്ഷം രൂപ തട്ടിയെടുത്തെന്ന പരാതികളിൽ പയ്യന്നൂർ പോലീസ് കേസെടുത്തു. കോറോം സ്വദേശി സ്വാസ്തിക് നാരായണൻ, ഏഴിമല നാവിക അക്കാഡമിയിലെ ജീവനക്കാരൻ സൗമ്യ രാജൻ ദാസ് എന്നിവരുടെ പരാതികളിലാണ് പോലീസ് കേസെടുത്തത്. ഇൻസ്റ്റാഗ്രാമിലൂടെ പാർട്ട് ടൈം ജോലി വാഗ്ദാനം ചെയ്തായിരുന്നു സ്വാസ്തിക് നാരായണനെ ചതിച്ചത്. തട്ടിപ്പുകാർ നൽകിയ ടാസ്കുകൾ ചെയ്തതിലൂടെ കഴിഞ്ഞ ഓഗസ്റ്റ് 27, 29 ദിവസങ്ങളിലായി ഇയാളുടെ അക്കൗണ്ടിൽ നിന്ന് തട്ടിപ്പുകാരിലേക്ക് ഒഴുകിപ്പോയത് 2,52,000 രൂപയാണ്. ഇതേ തുടർന്നാണ് മുതലും വാഗ്ദാനം നൽകിയ ലാഭവും നൽകാതെ വഞ്ചിച്ചെന്ന പരാതിയിൽ പോലീസ് കേസെടുത്തത്. ആർബിഎൽ ക്രെഡിറ്റ് കാർഡ് വിഭാഗം കസ്റ്റമർ കെയറിൽ നിന്നെന്ന വ്യാജേനയെത്തിയ ഫോൺ സന്ദേശമാണ് നാവിക അക്കാഡമി ജീവനക്കാരനെ കുടുക്കിയത്. ഫോണിലൂടെ അയയ്ക്കുന്ന ഫയൽ ഇൻസ്റ്റാൾ ചെയ്യാനായിരുന്നു ആവശ്യപ്പെട്ടത്. ഈ ഫയൽ ഇൻസ്റ്റാൾ ചെയ്തപ്പോഴേക്കും പരാതിക്കാരന്‍റെ രണ്ടു ക്രെഡിറ്റ് കാർഡുകളിലുണ്ടായിരുന്ന 3,28,663 രൂപയാണ് തട്ടിപ്പുകാർ കൈക്കലാക്കിയത്.

ആനപ്പന്തി ബാങ്കിലെ മുക്കുപണ്ട തട്ടിപ്പ് കേസ്: അന്വേഷണം ക്രൈംബ്രാഞ്ചിന്

കണ്ണൂർ: സിപിഎം നിയന്ത്രണത്തിലുള്ള ആനപ്പന്തി സഹകരണ ബാങ്കിന്‍റെ കച്ചേരിക്കടവ് ശാഖയിൽ പണയം വച്ചിരുന്ന യഥാർഥ സ്വർണം മാറ്റി പകരം മുക്കുപണ്ടം വച്ച് കോടികളുടെ തട്ടിപ്പ് നടത്തിയ കേസിന്‍റെ അന്വേഷണം കണ്ണൂർ ജില്ലാ ക്രൈംബ്രാഞ്ചിന് വിട്ടു. വ്യക്തികൾ ബാങ്കിൽ പണയംവച്ച സ്വർണാഭരണങ്ങൾക്ക് പകരം അതേ അളവിൽ മുക്കുപണ്ടം വെച്ച് ഒരു കോടിയോളം രൂപയാണ് ബാങ്ക് ജീവനക്കാരനും സഹായിയും ചേർന്ന് തട്ടിപ്പ് നടത്തിയത്. ബാങ്കിന്‍റെ കച്ചേരിക്കടവ് ശാഖയിലെ കാഷ്യർ ആയിരുന്ന സുധീർ തോമസ്, സുഹൃത്ത് സുനീഷ് തോമസ് എന്നിവർ ചേർന്ന് തട്ടിപ്പ് നടത്തിയെന്നാണ് കേസ്. ഇരുവരെയും ഇരിട്ടി പോലീസ് അറസ്റ്റ് ചെയ്തിരുന്നു . കഴിഞ്ഞ മേയിലായിരുന്നു സംഭവം. തട്ടിപ്പ് പിടിക്കപ്പെടമെന്ന് ഉറപ്പായതോടെ ഒന്നാം പ്രതി ബാങ്കിന്‍റെ താക്കോൽ അടങ്ങിയ ബാഗ് ബാങ്കിന് മുന്നിൽവച്ചശേഷം ഒളിവിൽ പോയിരുന്നു. തുടർന്ന് നടത്തിയ പരിശോധനയിലാണ് യഥാർഥ സ്വർണത്തിന് പകരം മുക്കുപണ്ടങ്ങൾ വച്ച സംഭവം ബാങ്ക് അധികൃതർ കണ്ടെത്തുന്നത്. ആസൂത്രിതമായ തട്ടിപ്പാണ് ഇവർ ആസൂത്രണം ചെയ്തത്. സ്ഥലത്തില്ലാത്തവരുടെ സ്വർണവും രണ്ടാംപ്രതി ബാങ്കിൽ പണയപ്പെടുത്തിയിരുന്ന സ്വർണവുമാണ് ഇവർ മാറ്റിയിരുന്നത് . മോഷ്ടിച്ച സ്വർണം സ്വകാര്യ ധനകാര്യ സ്ഥാപനങ്ങളിൽ പണയം വയ്ക്കുകയും വില്പന നടത്തുകയുമാണ് പ്രതികൾ ചെയ്തത്. കണ്ണൂർ ക്രൈംബ്രാഞ്ച് ഡിവൈഎസ്പി കീർത്തി ബാബുവിനാണ് അന്വേഷണ ചുമതല. പ്രതികളെ കസ്റ്റഡിയിലെടുത്ത് അന്വേഷണ സംഘം വീണ്ടും ചോദ്യം ചെയ്യും. രണ്ടുപേരുടെയും സാമ്പത്തിക ഇടപാടുകൾ ഉൾപ്പെടെ പരിശോധിക്കും . കേസിൽ സംശയത്തിന്‍റെ നിഴലിലുള്ളവരെയും ചോദ്യം ചെയ്യാനാണ് ക്രൈംബ്രാഞ്ച് ഉദ്ദേശിക്കുന്നത്. തട്ടിപ്പിൽ ബാങ്കുമായി ബന്ധപ്പെട്ട മറ്റ് ചിലർക്കും ബന്ധമുണ്ടെന്നാണ് സൂചന.

വിദ്യാർഥിക്ക് പരിക്കേറ്റ സംഭവത്തിൽ ബസ് ജീവനക്കാരനെതിരേ കേസെടുത്തു

പഴയങ്ങാടി: ബസിൽനിന്ന് ക്ലീനർ വലിച്ചിറക്കിയപ്പോൾ സ്കൂൾ വിദ്യാർഥിക്ക് വീണ് പരിക്കേറ്റ സംഭവത്തിൽ ബസ് ജീവനക്കാരനെതിരേ പഴയങ്ങാടി പോലീസ് കേസെടുത്തു. നെരുവമ്പ്രം ജെടിഎസ് സ്‌കൂളിലെ എട്ടാം ക്ലാസ് വിദ്യാർഥിയും താവം സ്വദേശിയുമായ അനശ്വർ സതീഷിനാണ് (13) പരിക്കേറ്റത്. അനശ്വറിന്‍റെ അമ്മ ഷിജിയുടെ പരാതിയിലാണ് പഴയങ്ങാടി-കണ്ണൂർ റൂട്ടിൽ ഓടുന്ന ഒയാസിസ് ബസിലെ ജീവനക്കാരനെതിരേ കേസെടുത്തത്. വെള്ളിയാഴ്ച വൈകുന്നേരം സ്‌കൂൾവിട്ട് വീട്ടിലേക്ക് പോകാനായി പഴയങ്ങാടി ബസ്‌സ്റ്റാൻഡിൽ നിന്ന് ബസ് കയറിയ വിദ്യാർഥിയെ ബസ് ക്ലീനർ പിടിച്ചിറക്കിയപ്പോൾ താഴെവീണ് വലതുകൈയ്ക്ക് പരിക്കേൽക്കുകയായിരുന്നു.

നിയമന അംഗീകാരം നൽകാത്തതിനെതിരേ‌ എയ്ഡഡ് സ്കൂൾ മാനേജർമാർ സമരത്തിലേക്ക്

കണ്ണൂർ: എയ്ഡഡ് സ്കൂൾ അധ്യാപകർക്കും ജീവനക്കാർക്കും നിയമന അംഗീകാരം നൽകാത്തതിനെതിരേ പ്രൈവറ്റ് സ്കൂൾ (എയ്ഡഡ് ) മാനേജേഴ്സ് അസോസിയേഷൻ പ്രത്യക്ഷ സമരത്തിലേക്ക്. സമരത്തിനു തുടക്കം കുറിച്ച് 20ന് രാവിലെ 10ന് കണ്ണൂർ പഴയ ബസ് സ്റ്റാൻഡിനു സമീപത്തെ ബ്രോഡ് ബീൻ ഓഡിറ്റോറിയത്തിൽ കെഇആർ ഒരു പുനർവായന, ഭിന്നശേഷി നിയമനം എന്നീ വിഷയങ്ങളിൽ പഠനക്ലാസ് നടത്തും. നവംബർ ഏഴിന് രാവിലെ 10ന് കണ്ണൂർ കളക്ടറേറ്റിനു മുന്നിൽ ധർണ നടത്തുമെന്നും ഭാരവാഹികൾ പത്രസമ്മേളനത്തിൽ അറിയിച്ചു. ഭിന്നശേഷി സംവരണവുമായി ബന്ധപ്പെട്ട് സർക്കാർ പുറപ്പെടുവിച്ച ഉത്തരവുകളിലെ അപാകതകൾ കാരണം അവ പൂർണമായി അംഗീകരിച്ചു കൊടുക്കാൻ കഴിയാത്ത സാഹചര്യമാണുള്ളത്. 1995 ലെ പി ഡബ്ല്യുഡി ആക്ടിലെയും 1996 ലെ അംഗ പരിമിതരുടെ സംവരണം സംബന്ധിച്ച സുപ്രീംകോടതി വിധിയുടെയും 2016 ലെ ആർപിഡബ്ലിയുഡി ആക്ടിലെയും വ്യവസ്ഥകൾക്ക് കടകവിരുദ്ധമായ ഉത്തരവുകളാണ് സർക്കാർ ഇറക്കിയിട്ടുള്ളത്. ഉത്തരവുകളെ തുടർന്ന് മാനേജർമാർ നിയമിച്ച 16,000 അധ്യാപകർക്ക് നിയമന അംഗീകാരം ലഭിക്കാനുണ്ട്. ഇതിൽ കുറേ അധ്യാപകർക്ക് ദിവസ വേതനം ലഭിക്കുന്നെങ്കിലും അംഗീകാരത്തിനുള്ള അപേക്ഷ നിരസിക്കുകയാണ്. ഭിന്നശേഷി സംവരണം, സംരക്ഷിത അധ്യാപക നിയമനം എന്നീ കാര്യങ്ങൾ ഉന്നയിച്ച് നിലവിലുള്ള ഉത്തരവുകളെ ദുർവ്യാഖ്യാനം ചെയ്താണ് ഉദ്യോഗസ്ഥർ നിയമനങ്ങൾ നിരസിക്കുന്നത്. അധ്യാപക ബാങ്കിൽ നിന്നാണ് സംരക്ഷിത അധ്യാപകരെ നിയമിക്കേണ്ടത്. എംപ്ലോയ്മെന്‍റ് എക്സ്ചേഞ്ച് വഴിയാണ് ഭിന്നശേഷിക്കാരെ നിയമിക്കേണ്ടത്. എന്നാൽ കണ്ണൂർ ജില്ലയിൽ അടക്കം അധ്യാപക ബാങ്കിൽ സംരക്ഷിത അധ്യാപകരില്ല. മാത്രമല്ല പൂർണ യോഗ്യത നേടിയ എത്ര ഭിന്നശേഷിക്കാർ നിയമനം കാത്തു കിട‌ക്കുന്നുവെന്നതിന്‍റെ കണക്കുകൾ ലഭ്യവുമല്ല. ഈ അനീതികൾക്കെതിരേയാണ് സ്കൂൾ മാനേജർമാരുടെ സംഘടന സമരത്തിനിറങ്ങുന്നതെന്നും അവർ അറിയിച്ചു. പത്രസമ്മേളനത്തിൽ ഭാരവാഹികളായ ദിനേശൻ മഠത്തിൽ, കെ.വി. സത്യനാദൻ, കെ. പ്രതീപ് കുമാർ, സി.വി. ബീരാൻകുട്ടി, കെ.പി. സതീശൻ എന്നിവർ പങ്കെടുത്തു.

തുഴച്ചലിൽ കേളകം സ്വദേശിനിക്ക് സ്വർണ മെഡൽ

കേളകം: തുഴച്ചലിൽ കേളകം സ്വദേശിനിക്ക് സ്വർണ മെഡൽ ലഭിച്ചു. ഓൾ ഇന്ത്യ ഇന്‍റർസായ് തുഴച്ചിൽ കോംപറ്റീഷനിൽ നാല്, എട്ട് അംഗ വിഭാഗങ്ങളിലാണ് അഞ്ജലി മേരി ജോർജ് പനച്ചിക്കൽ സ്വർണമെഡൽ കരസ്ഥമാക്കിയത്. കേളകം വെള്ളൂന്നി പനച്ചിക്കൽ ജോർജ് - ഷൈനി ദന്പതികളുടെ മകളാണ്.

തദ്ദേശ തെരഞ്ഞെടുപ്പ്: ബ്ലോക്ക് പഞ്ചായത്തുകളുടെ സംവരണവാർഡുകൾ നറുക്കെടുത്തു

കണ്ണൂർ: തദ്ദേശ സ്വയംഭരണ തെരഞ്ഞെടുപ്പിനു മുന്നോടിയായി ജില്ലയിലെ 11 ബ്ലോക്ക് പഞ്ചായത്തുക ളുടെയും സംവരണ വാർഡുകളുടെയും നറുക്കെടുപ്പ് പൂർത്തിയായി. ജില്ലയിലെ ഗ്രാമപഞ്ചായത്തു കൾ, നഗരസഭകൾ എന്നിവയുടെ സംവരണ വാർഡുകളുടെ നറുക്കെടുപ്പ് നേരത്തെ പൂർത്തിയാക്കി യിരുന്നു. ജില്ലാ തെരഞ്ഞെടുപ്പ് ഉദ്യോഗസ്ഥനായ ജില്ലാ കളക്ടർ അരുൺ കെ. വിജയൻ നേതൃത്വം നല്കി. ജില്ലാപഞ്ചായത്തിന്‍റെ സംവരണ വാർഡുകളുടെ നറുക്കെടുപ്പ് 21ന് നടക്കും. ബ്ലോക്ക് പഞ്ചായത്ത് സംവരണ വാർഡുകൾ: എടക്കാട് വനിത: അഞ്ച്-ചക്കരക്കൽ, ഏഴ്-പെരളശേരി, എട്ട്-മാവിലായി, പത്ത്-ആഡൂർ, 11-കോയ്യോട്, 12-ചെമ്പിലോട്, 14-ചേലേരി. പട്ടികജാതി: നാല്-തലമുണ്ട. കല്യാശേരി വനിത: ഒന്ന്-പിലാത്തറ, നാല്-ചെറുകുന്ന്, ഏഴ്-കെ കണ്ണപുരം, എട്ട്-കല്യാശേരി, പത്ത്-നാറാത്ത്, 11-ഇരിണാവ്, 12-മാട്ടൂൽ സൗത്ത്, 16-പുതിയങ്ങാടി. പട്ടികജാതി: മൂന്ന്-ഏഴോം. ഇരിക്കൂർ വനിത: ഒന്ന്-കുടിയാന്മല, മൂന്ന്-മണിക്കടവ്, അഞ്ച്-നുച്യാട്, ഏഴ്-കല്യാട്, ഒമ്പത്-മലപ്പട്ടം, 11-ചട്ടുകപ്പാറ, 12-മാണിയൂർ, 15-പയ്യാവൂർ. പട്ടികവർഗം: പത്ത്-കുറ്റ്യാട്ടൂർ. കണ്ണൂർ വനിത: ഒന്ന്-അഴീക്കൽ, ആറ്-കാട്ടാമ്പള്ളി, ഏഴ്-പുഴാതി, ഒമ്പത്-ചിറക്കൽ, പത്ത്-അലവിൽ, 11-തെക്ക് ഭാഗം, 14-വളപട്ടണം. പട്ടികജാതി: രണ്ട്-കരിക്കൻകുളം. ഇരിട്ടി വനിത: മൂന്ന്-വള്ളിത്തോട്, ആറ്-കീഴ്പ്പള്ളി, ഏഴ്-വെളിമാനം, ഒന്പത്-ആലയാട്, 12-എളമ്പാറ, 13-കൂടാളി ടൗൺ, 14-നായാട്ടുപാറ. പട്ടികവർഗം: 11-കീഴല്ലൂർ. കൂത്തുപറമ്പ് വനിത: ഒന്ന്-മാങ്ങാട്ടിടം, രണ്ട്-വട്ടിപ്രം, മൂന്ന്-കണ്ടംകുന്ന്, അഞ്ച്-കണ്ണവം, ആറ്-ചെറുവാഞ്ചേരി, എട്ട്-തൃപ്പങ്ങോട്ടൂർ, പത്ത്-പുത്തൂർ, 11-ചെണ്ടയാട്. പട്ടികവർഗം: ഒമ്പത്-കൊളവല്ലൂർ. പാനൂർ വനിത: മൂന്ന്-വള്ള്യായി, നാല്-പാറേമ്മൽ, അഞ്ച്-കൂരാറ, ആറ്-അരയാക്കൂൽ, ഒമ്പത്-കാഞ്ഞിരത്തിൻ കീഴിൽ, 13-കുണ്ടുചിറ, 14-പുല്ല്യോട്. പട്ടികജാതി: 12-ചമ്പാട്. പേരാവൂർ വനിത: ഒന്ന്-പാലപ്പുഴ, മൂന്ന്-അമ്പായത്തോട്, നാല്-കൊട്ടിയൂർ, ഏഴ്-തുണ്ടിയിൽ, ഒന്പത്-കോളയാട്, 12-കാഞ്ഞിലേരി, 14-കാക്കയങ്ങാട്. പട്ടികവർഗം: രണ്ട്-അടയ്ക്കാത്തോട്. പയ്യന്നൂർ വനിത: ഒന്ന്-കരിവെള്ളൂർ, മൂന്ന്-മാത്തിൽ, നാല്-പെരിങ്ങോം, അഞ്ച്-പാടിയോട്ടുചാൽ, ആറ്-പുളിങ്ങോം, പത്ത്-മാതമംഗലം, 13-കുന്നരു. പട്ടികജാതി: 11-കാങ്കോൽ. തളിപ്പറമ്പ് വനിത: ഒന്ന്-തേർത്തല്ലി, ആറ്-നടുവിൽ, ഏഴ്-ചുഴലി, എട്ട്-ചെങ്ങളായി, 11-പട്ടുവം, 13-കുറ്റ്യേരി, 15-പാണപ്പുഴ, 16-കൂവേരി, 17-ചപ്പാരപ്പടവ്. പട്ടികജാതി: 14-കടന്നപ്പള്ളി. പട്ടികവർഗം: 12-പരിയാരം. തലശേരി വനിത: ഒന്ന്-അഞ്ചരക്കണ്ടി, രണ്ട്-മുഴപ്പാല, അഞ്ച്-പാതിരിയാട്, ആറ്-എരുവട്ടി, ഏഴ്-വടക്കുമ്പാട്, ഒന്പത്-ന്യൂമാഹി, 13-പാലയാട്, 15-പിണറായി. പട്ടികജാതി: 11-കൂടക്കടവ്. കളക്ടറേറ്റ് കോൺഫറൻസ് ഹാളിൽ നടന്ന നറുക്കെടുപ്പിൽ തദ്ദേശ സ്വയംഭരണ വകുപ്പ് ജോയിന്‍റ് ഡയറക്ടർ ടി.ജെ. അരുൺ, ഇലക്ഷൻ ഡെപ്യുട്ടി കളക്ടർ കെ.കെ. ബിനി, തദ്ദേശസ്ഥാപന വകുപ്പ് ഉദ്യോഗസ്ഥർ, രാഷ്ട്രീയ പാർട്ടി പ്രതിനിധികൾ എന്നിവർ പങ്കെടുത്തു.

തളിപ്പറമ്പിലെ തീപിടിത്തം; കടകൾക്ക് നോട്ടീസ് നൽകി ഫയർഫോഴ്സ്

തളിപ്പറമ്പ്: നഗരസഭയിലെ കെവി കോംപ്ലക്‌സിലുണ്ടായ വൻ തീപിടിത്തത്തിന്‍റെ പശ്ചാത്തലത്തിൽ നടപടി കർശനമാക്കി തളിപ്പറമ്പ് ഫയർഫോഴ്‌സ്. കഴിഞ്ഞ ദിവസം മുതൽ ടൗണിലെ സ്ഥാപനങ്ങളിൽ അഗ്നിരക്ഷാ നിലയം സ്റ്റേഷൻ ഓഫീസർ എൻ. കുര്യാക്കോസിന്‍റെ നേതൃത്വത്തിൽ നോട്ടീസ് നൽകിയശേഷം തീ നിയന്ത്രണ ഉപകരണങ്ങൾ സ്ഥാപിക്കാൻ നിർദേശം നൽകുകയായിരുന്നു. കടകളിലെ ഫയർപ്രൊട്ടക്ഷൻ സംവിധാനങ്ങൾ കാര്യക്ഷമമാണോയെന്ന് പരിശോധിച്ചശേഷം നോട്ടീസ് നൽകുകയാണ്. സംവിധാനമില്ലെങ്കിലോ കാര്യക്ഷമം അല്ലെങ്കിലോ നോട്ടീസ് ലഭിച്ച് നിശ്ചിത ദിവസത്തിനകം ശരിയാക്കാനാണ് നിർദേശിക്കുന്നത്. കെട്ടിടത്തിന്‍റെ വയറിംഗ് സുരക്ഷിതമാണെന്ന കാര്യം അംഗീകൃത ഏജൻസിയെകൊണ്ട് പരിശോധിപ്പിച്ച് ഉറപ്പ് വരുത്തുക, മെയിൻ സ്വിച്ച് ബോർഡ്, പ്ലഗ് തുടങ്ങിയവയുടെ സമീപത്ത് സാധനങ്ങൾ സംഭരിച്ചുവയ്ക്കുന്നത് ഒഴിവാക്കുക, അളവിൽ കവിഞ്ഞ രീതിയിൽ സാധനങ്ങൾ കടയിൽ സ്റ്റോക്ക് ചെയ്യാതിരിക്കുക തുടങ്ങിയ നിർദേശങ്ങളും നോട്ടീസിലുണ്ട്. കഴിഞ്ഞ ദിവസം ഫയർസ്റ്റേഷനിൽ നടന്ന വ്യാപാരി നേതാക്കളുടെ യോഗത്തിൽ എല്ലാ സ്ഥാപനങ്ങളിലും തീ നിയന്ത്രണ വിധേയമാക്കുന്ന ഫയർ എക്സ്റ്റിക്യൂഷർ സ്ഥാപിക്കണമെന്ന് ഉദ്യോഗസ്ഥർ നിർദേശം നൽകിയിരുന്നു. 15 ദിവസത്തെ കാലാവധി കടയുടമകൾക്ക് നൽകും. ഇവ സ്ഥാപിക്കാത്ത കടകളുടെ വിവരങ്ങൾ ശേഖരിച്ച് നഗരസഭ അധികൃതർക്ക് കൈമാറി നടപടി സ്വീകരിക്കും. നിലവിൽ പല കടകളിലും ഉപകരണം ഉണ്ടെങ്കിലും ജീവനക്കാർക്കോ ഉടമകൾക്കോ ഉപയോഗിക്കാൻ അറിയില്ല. ഇതിനാൽ അഞ്ച് ഘട്ടങ്ങളിലായി ഫയർഫോഴ്സ് പരിശീലനം നൽകും. വയറിംഗ് സംവിധാനങ്ങളുടെ പരിശോധന ഉൾപ്പെടെ വരുംദിവസങ്ങളിൽ നടക്കും. പരിശോധനയിൽസീനിയർ ഫയർ ഓഫീസർ വി. ജയകുമാർ, രാജീവൻ, അഭിനേഷ്, ഹോം ഗാർഡ് ധനഞ്ജയൻ എന്നിവർ പങ്കെടുത്തു.

എൽഡിഎഫ് നയങ്ങളോട് യോജിപ്പെന്ന് കേരള കോൺഗ്രസ് -എം

ചെമ്പന്തൊട്ടി: ബഫർസോൺ അനുകൂല വിധി, വനനിയമ ഭേദഗതി കരട് വിജ്ഞാപനം നിയമസഭ യിൽ അവതരിപ്പിക്കില്ല എന്ന മുഖ്യമന്ത്രിയുടെ ഉറപ്പ്, ഭൂ പതിവ് ചട്ടത്തിൽ കൊണ്ടുവന്ന രണ്ട് ഭേദഗതികൾ, വന്യജീവി സംരക്ഷണ നിയമത്തിന്‍റെ കേരള ഭേദഗതി, എയ്ഡഡ് മാനേജ്മെന്‍റുകൾ അഭിമുഖീകരിച്ച അധ്യാപക നിയമന പ്രതിസന്ധിക്കും മുനമ്പം ഭൂപ്രശ്നത്തിനും ശാശ്വതപരിഹാരം, മണിപ്പൂരിലെ ക്രൈസ്തവർക്കു നേരെയുള്ള ആക്രമണം, അതുപോലെ വടക്കുകിഴക്കൻ സംസ്ഥാന ങ്ങളിലെ ക്രൈസ്തവർക്ക് നേരെയുള്ള ആക്രമണം എന്നീ വിഷയങ്ങളിൽ പരിഹാരം കാണുവാൻ പാർട്ടിയും, ചെയർമാൻ ജോസ് കെ. മാണിയും ഇടപെടലുകൾ നടത്തിയെന്ന് കേരള കോൺഗ്രസ് -എം ഇരിക്കൂർ നിയോജക മണ്ഡലം കമ്മിറ്റി യോഗം അഭിപ്രായപ്പെട്ടു. കേരള കോൺഗ്രസ് -എം ചെയർമാൻ എന്ന നിലയിൽ ഉന്നയിക്കുന്ന എല്ലാ കാര്യങ്ങളിലും മുഖ്യമന്ത്രി പിണറായി വിജയൻ പരിഗണിക്കുകയും, ആവശ്യപ്പെടുന്ന എല്ലാ വിഷയങ്ങളിലും ഇടപെടലുകൽ നടത്തുകയും നടപടികൾ സ്വീകരിക്കുകയും ചെയ്തതായും യോഗം അവകാശപ്പെട്ടു. കേരളത്തിൽനിന്ന് 19 എംപിമാർ യുഡിഎഫിന് ഉണ്ടായിട്ടും ജനങ്ങളുടെയും, കൃഷിക്കാരന്‍റേയും ശബ്ദമായി മാറാൻ ഇവർക്ക് സാധിച്ചിട്ടില്ലെന്നും യോഗം ചൂണ്ടിക്കാട്ടി. സംസ്ഥാന സർക്കാരിനെതിരേ സമരം ചെയ്തും, കുറ്റം പറഞ്ഞും കർഷകരെ വിഡ്ഢികളാക്കി അവഹേളിക്കുകയാണ് കോൺഗ്രസ്. കേരള കോൺഗ്രസ് -എം പാർട്ടിയുടെ അടിസ്ഥാന നയമായ കർഷക രക്ഷ, മതേതരത്വം, നവകേരളം എന്നീ പ്രഖ്യാപിത മുദ്രാവാക്യങ്ങളിൽ ഊന്നിയാണ് എൽഡിഎഫിനോടൊപ്പം കേരള കോൺഗ്രസ് -എം ഉറച്ചുനിന്നതെന്ന് ഇരിക്കൂർ നിയോജക മണ്ഡലം കമ്മിറ്റി അഭിപ്രായപ്പെട്ടു. നിയോജക മണ്ഡലം പ്രസിഡന്‍റ് ബിജു പുതുക്കള്ളിയുടെ അധ്യക്ഷതയിൽ ജില്ലാ പ്രസിഡൻറ് ജോയികൊന്നക്കൽ ഉദ്ഘാടനം ചെയ്തു. ബിനു മണ്ഡപം, സി.ജെ. ജോൺ, പി.എസ്. ജോസഫ്, ബിനു ഇലവുങ്കൽ, സിബി പന്തപ്പാട്ട്, സണ്ണി മുക്കുഴി, ഷോണി അറയ്ക്കൽ, ജോളി പുതുശേരി,ഷാജി കുര്യൻ, ജോർജ് മേലേട്ട്, പി.പി. രാഘവൻ, തുടങ്ങിയവർ പ്രസംഗിച്ചു.

കർഷക കോൺഗ്രസ് വാഹന ജാഥക്ക് സ്വീകരണം

പയ്യാവൂർ: കേന്ദ്ര, സംസ്ഥാന സർക്കാരുകളുടെ കർഷകവിരുദ്ധ നയങ്ങൾക്കെതിരെ കർഷക കോൺഗ്രസിന്‍റെ ആഭിമുഖ്യത്തിൽ സംഘടിപ്പിച്ച വാഹനജാഥയ്ക്ക് പയ്യാവൂരിൽ കോൺഗ്രസ് മണ്ഡലം കമ്മിറ്റിയുടെ നേതൃത്വത്തിൽ സ്വീകരണം നൽകി. കർഷക കോൺഗ്രസ് ജില്ലാ പ്രസിഡന്‍റ് ജോസ് പൂമലയാണ് ജാഥ നയിക്കുന്നത്. കോൺഗ്രസ് പയ്യാവൂർ മണ്ഡലം പ്രസിഡന്‍റ് ഇ.കെ. കുര്യൻ സ്വീകരണ യോഗം ഉദ്ഘാടനം ചെയ്തു. കർഷക കോൺഗ്രസ് മണ്ഡലം പ്രസിഡന്‍റ് ജോസഫ് അറയ്ക്കപ്പറമ്പിൽ അധ്യക്ഷത വഹിച്ചു. കർഷക കോൺഗ്രസ് സംസ്ഥാന ജനറൽ സെക്രട്ടറി എം.ഒ. ചന്ദ്രശേഖരൻ മുഖ്യപ്രഭാഷണം നടത്തി.കർഷക കോൺഗ്രസ് ജില്ലാ സെക്രട്ടറിമാരായ ജേക്കബ് പനന്താനം, ജോണി മുണ്ടയ്ക്കൽ, കർഷക കോൺഗ്രസ് ഇരിക്കൂർ നിയോജക മണ്ഡലം പ്രസിഡന്‍റ് റോയി ഈട്ടിയ്ക്കൽ, കോൺഗ്രസ് നേതാക്കളായ ജോയ് പുന്നശേരിമലയിൽ, ജിത്തു തോമസ്, ആനീസ് നെട്ടനാനി, സജി അട്ടിയ്ക്കൽ, സൈമൺ തെരുവക്കുന്നേൽ, മൈക്കിൾ ചാണ്ടിക്കൊല്ലി, കുര്യാക്കോസ് തെരുവത്ത്, ജോയ് പാറയ്ക്കൽ, തോമസ് മച്ചികാട്ട്, ബേബി കുരീക്കാട്ടിൽ, ആലീസ് കുര്യൻ എന്നിവർ പ്രസംഗിച്ചു. ചെമ്പന്തൊട്ടി : കർഷകരോടും കാർഷിക ഉത്പന്നങ്ങളോടുമുള്ള കേന്ദ്ര-സംസ്ഥാന സർക്കാരുകളുടെ അവഗണനക്കെതിരേ കർഷക കോൺഗ്രസ് കണ്ണൂർ ജില്ലാ കമ്മിറ്റിയുടെ നേതൃത്വത്തിൽ നടത്തുന്ന കർഷക വാഹന പ്രതിഷേധ റാലിയുടെ ചെമ്പന്തൊട്ടിയിലെ സ്വീകരണ നഗരസഭാധ്യക്ഷ ഡോ. കെ. വി. ഫിലോമിന ഉദ്ഘാടനം ചെയ്തു. അലക്സാണ്ടർ കുഴിയാത്ത് അധ്യക്ഷത വഹിച്ചു. എം.ഒ. മാധവൻ മുഖ്യപ്രഭാഷണം നടത്തി. ഡേവിഡ് ആലങ്ങാടൻ, ജിയോജേക്കബ്, കെ.സി. ജോസഫ് കൊന്നക്കൽ, ജോണി പെരുമ്പള്ളി, കെ.പി. ലിഷ, ജോസ് അക്കിപറമ്പിൽ തുടങ്ങിയവർ പ്രസംഗിച്ചു. ചെറുപുഴയിൽ നിന്നും ആരംഭിച്ച് ഇരട്ടി വരെയാണ് വാഹന പ്രതിഷേധ റാലി നടത്തുന്നത്.

മെഡിസെപ്പ് പദ്ധതി കുറ്റമറ്റ രീതിയിൽ നടപ്പിലാക്കണം: കെഎസ്എസ്പിഎ

ചപ്പാരപ്പടവ്: സർക്കാർ ജീവനക്കാർക്കും പെൻഷൻകാർക്കും നിലവിലുള്ള ചികിത്സാ പദ്ധതി മെഡിസെപ്പ് കുറ്റമറ്റ രീതിയിൽ നടപ്പിലാക്കാൻ സർക്കാർ തയാറാകണമെന്ന് കെഎസ്എസ്പിഎ ചപ്പാരപ്പടവ് മണ്ഡലം സമ്മേളനം ആവശ്യപ്പെട്ടു. സംസ്ഥാന സെക്രട്ടറി കെ. രാമകൃഷ്ണൻ ഉദ്ഘാടനം ചെയ്തു. മണ്ഡലം പ്രസിഡന്‍റ് ടി.ജെ. ജോർജ് അദ്ധ്യക്ഷത വഹിച്ചു. സംസ്ഥാന കൗൺസിലർ പി.ജെ. മാത്യു, ജില്ലാ കമ്മിറ്റി അംഗം വി.വി. ജോസഫ്, സെക്രട്ടറി എം. രാജൻ എന്നിവർ പ്രസംഗിച്ചു. ഭാരവാഹികളായി ടി.ജെ. ജോർജ്-പ്രസിഡന്‍റ്, മനോജ്‌ ജോസ്-സെക്രട്ടറി, ഡി. മാത്തുകുട്ടി-ട്രഷറർ എന്നിവരെ തെരഞ്ഞെടുത്തു.

ശ്രീകണ്ഠപുരം ഉണ്ണി മിശിഹാ പള്ളിയുടെ തറക്കല്ലിടലും സമ്പൂർണ മാതൃവേദി ഇടവകാ പ്രഖ്യാപനവും ഇന്ന്

ശ്രീകണ്ഠാപുരം: ശ്രീകണ്ഠപുരം ഉണ്ണി മിശിഹാ തീർഥാടന ദേവാലയത്തിന്‍റെ തറക്കല്ലിടൽ കർമവും സമ്പൂർണ മാതൃവേദി ഇടവക പ്രഖ്യാപനവും ഇന്ന് നടക്കും. രാവിലെ 6.30ന് ആരംഭിക്കുന്ന തിരുകർമങ്ങൾക്ക് തലശേരി ആർച്ച് ബിഷപ് മാർ. ജോസഫ് പാംപ്ലാനി മുഖ്യകാർമികത്വം വഹിക്കും. തലശേരി അതിരൂപത ചാൻസലർ ഫാ. ജോസഫ് മുട്ടത്ത്കുന്നേൽ, അതിരൂപത മാതൃവേദി ഡയറക്ടർ ഫാ. ജോബി കോവാട്ട്, വികാരി ഫാ. ജോസഫ് മഞ്ചപ്പിള്ളിൽ, അസി. വികാരി ഫാ. മാർട്ടിൻ പാഴൂപ്പറമ്പിൽ എന്നിവർ സഹകാർമികരാകും. 2010 ൽ സ്ഥാപിതമായ ശ്രീകണ്ഠപുരം ഇടവകയുടെ അനേക നാളുകളായുള്ള സ്വപ്നമാണ് യാഥാർഥ്യമാകുന്നത്. ഇടവകയിലെ മുഴുവൻ അമ്മമാരേയും മാതൃവേദിയിൽ അംഗങ്ങളാക്കി എന്ന അപൂർവ നേട്ടവും സ്വന്തമാക്കുകയാണ് ശ്രീകണ്ഠപുരം ഇടവക. തിരുക്കർമങ്ങൾക്ക് ശേഷം സ്നേഹവിരുന്നും ഒരുക്കിയിട്ടുണ്ട്.

പ്രഥമ കോട്ടൂർ സിഎസ്ടി ആശ്രമ ബൈബിൾ കൺവൻഷനു തുടക്കമായി

കോട്ടൂർ: വിശുദ്ധ ചെറുപുഷ്പത്തിന്‍റെ വിശുദ്ധ പദവിയുടെ നൂറാം വാർഷികത്തോടനുബന്ധിച്ച് ശ്രീകണ്ഠപുരം കോട്ടൂർ ലിറ്റിൽ ഫ്ലവർ സ്കൂൾ ഗ്രൗണ്ടിൽ സംഘടിപ്പിച്ച പ്രഥമ കോട്ടൂർ സിഎസ്ടി ആശ്രമ ബൈബിൾ കൺവൻഷന് തുടക്കമായി. ചെമ്പന്തൊട്ടി സെന്‍റ് ജോർജ് ഫൊറോന വികാരി ഫാ. ആന്‍റണി മഞ്ഞളാംകുന്നേൽ കൺവൻഷൻ ഉദ്ഘാടനം ചെയ്തു. പ്രശസ്ത വചനപ്രഘോഷകൻ ഫാ.മാത്യു വയലാമണ്ണിൽ സിഎസ്ടിയാണു കൺവൻഷൻ നയിക്കുന്നത്. മലബാർ മേഖലയിൽ ചെറുപുഷ്പ സഭയുടെ പ്രഥമ ആശ്രമമായ കോട്ടൂർ സെന്‍റ് തോമസ് ആശ്രമത്തിന്‍റെ നേതൃത്വത്തിലാണു ബൈബിൾ കൺവൻഷൻ നടത്തുന്നത്. ശ്രീകണ്ഠപുരം മേഖലയിലെ സാമൂഹിക, സാംസ്കാരിക, ബൗദ്ധിക, ആത്മീയ രംഗങ്ങളിൽ 1958 മുതൽ ഉണർവേകിവരുന്ന ചെറുപുഷ്പ സഭയുടെ സ്ഥാപനമാണ് കോട്ടൂരിലെ സെന്‍റ് തോമസ് ആശ്രമം. കോട്ടൂർ ആശ്രമത്തിന്‍റെ ആഭിമുഖ്യത്തിൽ ലിറ്റിൽ ഫ്ളവർ സിബിഎസ്ഇ സ്കൂൾ, കോട്ടൂർ പ്രൈവറ്റ് ഐടിഐ, സ്മിത്ത് ഇൻഡസ്ട്രി വർക്സ് എന്നിവ വർഷങ്ങളായി പ്രവർത്തിച്ചു വരുന്നുണ്ട്. തലശേരി അതിരൂപതയുടെ കീഴിലുള്ള കോട്ടൂർ സെന്‍റ് തോമസ് ഇടവകയ്ക്കും ആത്മീയ നേതൃത്വം നൽകുന്നത് ചെറുപുഷ്പ സഭയുടെ സിഎസ്ടി വൈദികരാണ്. ചെറുപുഴ, ആലക്കോട്, പരിയാരം, തളിപ്പറമ്പ്, ഇരിട്ടി, ചെമ്പേരി, പയ്യാവൂർ തുടങ്ങിയ പ്രദേശങ്ങളിൽ നിന്നുള്ള ആയിരക്കണക്കിനാളുകളാണ് ബൈബിൾ കൺവൻഷനിൽ പങ്കെടുക്കുന്നത്. കൺവൻഷൻ 20 ന് സമാപിക്കും.

വ്യാപാരി-തൊഴിലാളികളുടെ പുനരധിവാസം: വ്യാപാരി നേതാക്കൾ നിവേദനം നൽകി

തളിപ്പറമ്പ് : തീപിടിത്തം ഉണ്ടായ കെവി കോംപ്ലക്സിലെ വ്യാപാരികളുടെയും തൊഴിലാളികളുടെയും പുനരധിവാസം വേഗത്തിൽ ആക്കുന്നതിനും പുനരധിവാസം യുദ്ധകാല അടിസ്ഥാനത്തിൽ നടപ്പാക്കാൻ നിർദേശിക്കണമെന്നും ആവശ്യപ്പെട്ട് തളിപ്പറമ്പ് മർച്ചൻസ് അസോസിയേഷൻ ഭാരവാഹികൾ എം.വി. ഗോവിന്ദൻ എംഎൽഎയ്ക്ക് നിവേദനം നൽകി. മുഖ്യമന്ത്രിയുടെ ഓഫീസുമായി സംഭവ ദിവസം ബന്ധപ്പെട്ട് തുടർനടപടികൾ വേഗത്തിലാക്കാനുള്ള ശ്രമം നടത്തിയതായും എല്ലാ സഹകരണവും ഉണ്ടാകുമെന്നും എംഎൽഎ നിവേദക സംഘത്തിന് ഉറപ്പു നൽകി. തളിപ്പറമ്പ് മർച്ചൻസ് അസോസിയേഷൻ പ്രസിഡന്‍റ് കെ.എസ്. റിയാസ് ജനറൽ സെക്രട്ടറി വി. താജുദീൻ, ട്രഷറർ ടി. ജയരാജ്, സെക്രട്ടറി സി.ടി. അഷ്റഫ്, സെക്രട്ടേറിയറ്റ് മെംബർ പ്രദീപ് കുമാർ എന്നിവർ നിവേദക സംഘത്തിൽ ഉണ്ടായിരുന്നു

കനത്ത മഴയിൽ വീടുകൾ തകർന്നു

കാർത്തികപുരം: ശക്തമായ കാറ്റിലും മഴയിലും തെങ്ങു വീണ് വീട് തകർന്നു. ഉദയഗിരി പഞ്ചായത്ത് മണക്കടവ് വായിക്കമ്പയിലെ ഓലിക്കൽ ശ്രീജിത്തിന്‍റെ വീടാണ് തകർന്നത്. ഓടു മേഞ്ഞ മേൽക്കൂര പൂർണമായി തകർന്ന നിലയിലാണ്. കഴിഞ്ഞ ദിവസം രാത്രിയാണ് സംഭവം.ആ സമയത്ത് വീട്ടിൽ ആരുമില്ലാതിരുന്നതിനാൽ അപകടം ഒഴിവായി. പഞ്ചായത്ത് അധികൃതർ സംഭവ സ്ഥലം സന്ദർശിച്ചു. രയറോം: ശക്തമായ മഴയിൽ വീട് തകർന്നു. നെടുവോട് സി.എച്ച്. റോഡിലെ പ്ലാവറത്തലയിൽ രാജുവിന്‍റെ വീടാണ് തകർന്നത്. അപകട സമയം വീട്ടിലുണ്ടായിരുന്ന രാജുവും ഭാര്യ അമ്മിണിയും പരിക്കേൽക്കാതെ രക്ഷപ്പെട്ടു. കഴിഞ്ഞ ദിവസം രാത്രി പത്തോടെയാണ് സംഭവം. ഓടുമേഞ്ഞ വീടിന്‍റെ മേൽക്കൂര തകർന്നു വീഴുകയായിരുന്നു. രണ്ടുലക്ഷം രൂപയുടെ നാശനഷ്‌ടം കണക്കാക്കുന്നു. ആലക്കോട് പഞ്ചായത്ത് സ്ഥിരം സമിതി ചെയർമാൻ എം.എ. ഖലീൽ റഹ്‌മാന്‍റെ നേതൃത്വത്തിൽ പഞ്ചായത്ത് അധികൃതർ സ്ഥലം സന്ദർശിച്ചു.

സർക്കാർ പെൻഷൻകാരെ വഞ്ചിച്ചു: കെഎസ്എസ്പിഎ

ചെറുപുഴ: ക്ഷാമാശ്വാസ കുടിശിക സഹിതം നൽകാതെയും പെൻഷൻ പരിഷ്കരണം അട്ടിമറിച്ചും പെൻഷൻകാരെ സർക്കാർ വഞ്ചിച്ചതായി കെഎസ്എസ്പിഎ സംസ്ഥാന പ്രസിഡന്‍റ് എം.പി. വേലായുധൻ പറഞ്ഞു. കെഎസ്എസ്പിഎ ചെറുപുഴ മണ്ഡലം സമ്മേളനം ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. മണ്ഡലം പ്രസിഡന്‍റ് ഷാജൻ ജോസ് അധ്യക്ഷത വഹിച്ചു. പ്രതിനിധി സമ്മേളനം സംസ്ഥാന വൈസ് പ്രസിഡന്‍റ് ടി.വി. ഗംഗാധരൻ ഉദ്ഘാടനം ചെയ്തു. സംസ്ഥാന സെക്രട്ടേറിയറ്റ് അംഗം കെ.വി. ഭാസ്കരൻ, ജില്ലാ സെക്രട്ടറി പി. സുഖദേവൻ, സംസ്ഥാന കമ്മിറ്റി അംഗം ടി. കുഞ്ഞികൃഷ്ണൻ, ടി.പി. ചന്ദ്രൻ, പി. ലളിത, കോടൂർ കുഞ്ഞിരാമൻ, പി.ജെ. ജോസഫ്, സി.എം. ഇസ്മയിൽ, കെ.എം. തോമസ്, കെ.എ. മൊയ്തീൻ കുഞ്ഞി, പി.ജെ. ജോസഫ്, കെ.സി. ജോസഫ്, തോമസ് ജോസഫ്, കെ. മുസ്തഫ, കെ. അനിത ഭായി എന്നിവർ പ്രസംഗിച്ചു. മികച്ച പൊതുപ്രവർത്തകനുള്ള കെ.ജി. നമ്പ്യാർ അവാർഡ് ജേതാവായ വി. കൃഷ്ണനെ ഡിസിസി പ്രസിഡന്‍റ് മാർട്ടിൻ ജോർജ് ചടങ്ങിൽ ആദരിച്ചു. ഭാരവാഹികളായി ഷാജൻ ജോസ്- പ്രസിഡന്‍റ് , തോമസ് ജോസഫ്, പി.ടി. ജയ്സൺ, കെ. മുസ്തഫ-വൈസ് പ്രസിഡന്‍റുമാർ, പി.ജെ. ജോസഫ്-സെക്രട്ടറി, കൃഷ്ണൻ പള്ളിക്കര, പി. ശശിധരൻ, കെ.സി. ആൻസമ്മ-ജോയിന്‍റ് സെക്രട്ടറിമാർ, കെ.സി. ജോസഫ്-ട്രഷറർ എന്നിവരെ തെരഞ്ഞെടുത്തു.

പെൻഷൻകാരുടെ കുടിശികയായ ക്ഷാമബത്ത ഉടൻ അനുവദിക്കണം: കെഎസ്എസ്പിഎ

ഇരിട്ടി: പെൻഷൻകാരുടെ കുടിശികയായ ക്ഷാമബത്ത ഉടൻ അനുവദിക്കണമെന്ന് സ്റ്റേറ്റ് സർവീസ് പെൻഷനേഴ്‌സ് അസോസിയേഷൻ പായം മണ്ഡലം വാർഷിക സമ്മേളനം ആവശ്യപ്പെട്ടു. സംസ്ഥാനത്തെ പെൻഷൻകാരോട് സർക്കാർ കടുത്ത വഞ്ചനയും നീതി നിഷേധവുമാണ് നടത്തുന്നതെന്ന് യോഗം കുറ്റപ്പെടുത്തി. ഇരിട്ടിയിൽ നടന്ന സമ്മേളനം കെപിസിസി ജനസെക്രട്ടറി ചന്ദ്രൻ തില്ലങ്കേരി ഉദ്ഘാടനം ചെയ്തു. പായം മണ്ഡലം പ്രസിഡന്‍റ് സി. നാരായണൻ അധ്യക്ഷത വഹിച്ചു. അസോസിയേഷൻ സംസ്ഥാന വൈസ് പ്രസിഡന്‍റ് പി.സി. വർഗീസ് മുഖ്യപ്രഭാഷണം നടത്തി. കെ. ബിന്നി ജോസഫ് റിപ്പോർട്ടും കുര്യൻ ദേവസ്യ വരവ് ചെലവ് കണക്കും അവതരിപ്പിച്ചു. 80 വയസ് കഴിഞ്ഞവരെ വി.വി.സി. നമ്പ്യാർ ആദരിച്ചു. എൻ. നാരായണൻ പുതിയ അംഗങ്ങളെ വരവേറ്റു. സി.വി. കുഞ്ഞനന്തൻ സംഘടനാ പ്രവർത്തനങ്ങൾ വിശദീകരിച്ചു. റെയീസ് കണിയാറക്കൽ, കെ. മോഹനൻ, നാരായണൻ കോയിറ്റി, ഫിലോമിന കക്കട്ടിൽ, ജാൻസി തോമസ്, കെ. തമ്പാൻ, പി.വി. അന്നമ്മ, പി.വി. മറിയാമ്മ എന്നിവർ പ്രസംഗിച്ചു.

ഒരു തൈ നടാം കാമ്പയിൻ: പുരസ്‌കാരം ഏറ്റുവാങ്ങി

കണ്ണൂർ: "ഒരു തൈ നടാം, ഒരു കോടി തൈകൾ' കാമ്പയനിൽ സംസ്ഥാനത്ത് ഏറ്റവുവുമധികം തൈകൾ നട്ടതിനുള്ള പുരസ്‌കാരം മഹാത്മാഗാന്ധി ദേശീയ ഗ്രാമീണ തൊഴിലുറപ്പു പദ്ധതി സംസ്ഥാന ഡയറക്ടർ ഡി. രഞ്ജിത്തിൽ നിന്നും ഹരിത കേരളം ജില്ലാ മിഷൻ കോ-ഓർഡിനേറ്റർ ഇ.കെ. സോമശേഖരന്‍റെ നേതൃത്വത്തിലുള്ള സംഘം ഏറ്റുവാങ്ങി. തിരുവനന്തപുരത്ത് നടന്ന പരിപാടിയിൽ നവകേരളം സംസ്ഥാന കോ-ഓർഡിനേറ്റർ ഡോ.ടി.എൻ.സീമ അധ്യക്ഷത വഹിച്ചു. ഒക്ടോബർ 15 വരെയുള്ള കാലയളവിൽ 7,31,836 തൈകൾ നട്ടാണ് ജില്ല ഒന്നാം സ്ഥാനത്ത് എത്തിയത്. കൃഷിവകുപ്പ്, തദേശസ്വയംഭരണ സ്ഥാപനങ്ങൾ, കുടുംബശ്രീ അയൽകൂട്ടങ്ങൾ, നാഷണൽ സർവീസ് സ്‌കീം ടീമുകൾ, വിദ്യാഭ്യാസ സ്ഥാപനങ്ങൾ, ഗ്രന്ഥശാലകൾ, വൃക്ഷതൈ നഴ്‌സറികൾ എന്നിവ നൽകിയ തൈകളാണ് പദ്ധതിയുടെ ഭാഗമായി നട്ടത്. ചങ്ങാതിക്കൊരു തൈ എന്ന പേരിലാണ് വിദ്യാലയങ്ങളിൽ പരിപാടി സംഘടിപ്പിച്ചത്. ഓർമ മരം എന്ന പേരിൽ തദ്ദേശ ഭരണ സ്ഥാപനങ്ങളിലും മരങ്ങൾ നട്ടു.

ആറളം പഞ്ചായത്തിലെ തൊട്ടുകടവ്, പരിപ്പുതോട് പാലങ്ങൾ ഉദ്ഘാടനം ചെയ്തു

ഇരിട്ടി: ആറളം പഞ്ചായത്തിൽ ജില്ലാ പഞ്ചായത്തിന്‍റെയും ആറളം പഞ്ചായത്തിന്‍റെയും സഹകരണത്തോടെ നിർമിച്ച ആറളം തോട്ടുകടവ്, പരിപ്പുതോട് പാലങ്ങൾ ഗതാഗതത്തിന് തുറന്നു കൊടുത്തു. ഇരു പാലങ്ങളും ജില്ലാ പഞ്ചായത്ത് പ്രസിഡന്‍റ് കെ.കെ. രത്നകുമാരി ഉദ്ഘാടനം ചെയ്തു. തോട്ടുകടവിൽ ജില്ലാ പഞ്ചായത്ത് വൈസ് പ്രസിഡന്‍റ് ബിനോയി കുര്യൻ അധ്യക്ഷത വഹിച്ചു. ജില്ലാ പഞ്ചായത്ത് പൊതുമരാമത്ത് സ്റ്റാൻഡിംഗ് കമ്മിറ്റി ചെയർമാൻ ടി. സരള, ആറളം പഞ്ചായത്ത് പ്രസിഡന്‍റ് കെ.പി. രാജേഷ്, എൻ.വി. ശ്രീജിനി, കെ.ജെ. ജെസിമോൾ, ഷിജി നടുപ്പറമ്പിൽ, ഷീബ രവി, ജോസഫ് അന്ത്യാംകുളം, കെ.പി. സെലീന, ഇബിനു മസൂദ്, പി. രവീന്ദ്രൻ, കെ.വി. ഷിഹാബുദീൻ, സന്തോഷ് പാലക്കൽ, വിപിൻ തോമസ്, മാമുഹാജി, കെ. സജീവൻ, എൻ. മുകുന്ദൻ എന്നിവർ പ്രസംഗിച്ചു. ജില്ലാ പഞ്ചായത്ത് അനുവദിച്ച 1.25 കോടി ചെലവിൽ ഒന്നര വർഷം മുന്പാണ് പാലത്തിന്‍റെ പ്രവൃത്തി ഉദ്ഘാടനം ചെയ്തത്. പ്രളയം തകർത്ത പരിപ്പുതോട് പാലത്തിന് ബദലായാണ് തദ്ദേശ സ്ഥാപനങ്ങളുടെ സഹായത്തോടെ പരിപ്പുതോട് പുതിയ പാലം നിർമിച്ചത്. കീഴ്പ്പള്ളി -വിയറ്റ്‌നാം നിവാസികളുടെ യാത്രാക്ലേശത്തിന് പരിഹാരമായാണ് ജില്ലാ പഞ്ചായത്തും ആറളം പഞ്ചായത്തും 1.15 കോടി ചെലവിൽ പാലം നിർമിച്ചത്. 2018 ൽ പ്രളയത്തിലാണ് പാലം തകർന്നത്. ആറളം പഞ്ചായത്ത് പ്രസിഡന്‍റ് കെ.പി. രാജേഷ് അധ്യക്ഷത വഹിച്ചു. ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യൻ മുഖ്യാതിഥിയായി. എൻജിനീയർ ഇബ്നു മഷൂദ് റിപ്പോർട്ട് അവതരിപ്പിച്ചു. പഞ്ചായത്ത് വൈസ് പ്രസിഡന്‍റ് കെ.ജെ. ജെസിമോൾ, ഇ.സി. രാജു, എ.ഡി. ബിജു, കെ.ബി. ഉത്തമൻ, വി. ശോഭ, ജിമ്മി അന്തീനാട്ട്, ജയ്സൺ ജീരകശേരി, ടി. റസാഖ്, സജീവൻ കൊയ്യത്ത്, രജനി ആയോടൻ എന്നിവർ പ്രസംഗിച്ചു.

ആറളം ഫാമിലെ ഓപ്പറേഷൻ ഗജമുക്തി പദ്ധതി നിലച്ചു; ആനക്കലിയിൽ വിരണ്ട് പുനരധിവാസ മേഖല

ഇരിട്ടി: മനുഷ്യ-വന്യജീവി സംഘർഷം ലഘൂകരിക്കുന്നതിനായി വനം വകുപ്പ് ആവിഷ്കരിച്ച "ഓപ്പറേഷൻ ഗജമുക്തി"പദ്ധതി നിലച്ചതോടെ ആറളം ഫാമിലും, ആറളം ആദിവാസി പുനരധിവാസ മേഖലയിലും കാട്ടാനകളുടെ പരാക്രമങ്ങൾ തുടരുന്നു. ആറളം ഫാമിലെ കാർഷിക വിളകളെയും, ആദിവാസി പുനരധിവാസ മേഖലയിലെ ജനങ്ങളെയും സംരക്ഷിക്കാൻ വനം വകുപ്പ് നടപ്പാക്കിയ ഗജ മുക്തി പദ്ധതി പ്രകാരം രണ്ട് ഘട്ടങ്ങളിലായി 10 ആനകളെ വനത്തിലേക്ക് തുരത്തിയെങ്കിലും തുരത്തിയ ആനകൾ കൂട്ടത്തോടെ മടങ്ങിയെത്തി നാശം വിതക്കുന്നതാണ് നിലവിലെ അവസ്ഥ. ആറളം ഫാമിലും, പുനരധിവാസ മേഖലയിലും ആനക്കലിക്ക് അറുതിയില്ലന്ന് പ്രദേശവാസികൾ പറയുന്നു. ഫാമിലും, പുനരധിവാസ മേഖലയിലും കാട്ടാനയിറങ്ങി കൃഷി നശിപ്പിക്കുന്നത് തുടരുമ്പോൾ ജനങ്ങൾ ഭീതിയിലാണ് കഴിക്കുന്നത്. ബ്ലോക്ക് ഏഴിലും, പതിനൊന്നിലും കഴിഞ്ഞ ദിവസം നിരവധി കായ്ഫലമുള്ള തെങ്ങുകൾ കാട്ടാനകൾ നശിപ്പിച്ചു.

കണ്ണൂർ നോർത്ത് ഉപജില്ലാ സ്കൂൾ കലോത്സവം 22 മുതൽ

കണ്ണൂർ: കണ്ണൂർ നോർത്ത് ഉപജില്ലാ സ്കൂൾ കലോത്സവം ടൗൺ ഹയർ സെക്കൻഡറി സ്കൂളിൽ 22 മുതൽ 25 വരെ ന‌ടക്കും. 22ന് രാവിലെ 11ന് മേയർ മുസ്‌ലിഹ് മഠത്തിൽ ഉദ്ഘാടനം ചെയ്യുമെന്ന് സംഘാടക സമിതി ജനറൽ കൺവീനർ വി. ശ്രീജ പത്രസമ്മേളനത്തിൽ അറിയിച്ചു. ചടങ്ങിൽ സുരേഷ് ബാബു എളയാവൂർ അധ്യക്ഷത വഹിക്കും. മാപ്പിളപ്പാട്ട് കലാകാരൻ കണ്ണൂർ ഷെരീഫ് മുഖ്യാതിഥിയാകും. ഇന്ത്യൻ ഓയിൽ കോർപ്പറേഷൻ സ്കൂളിന് അനുവദിച്ച സ്റ്റേജ് കം പ്ലേ ഗ്രൗണ്ട് ഉദ്ഘാടനം ജനറൽ മാനേജർ ഗീതിക വർമ നിർവഹിക്കും. സമാപന സമ്മേളനം 25ന് വൈകുന്നേരം മന്ത്രി രാമചന്ദ്രൻ കടന്നപ്പള്ളി ഉദ്ഘാടനം ചെയ്യും. ഡെപ്യുട്ടി മേയർ പി. ഇന്ദിര അധ്യക്ഷത വഹിക്കും.

തദ്ദേശ തെരഞ്ഞെടുപ്പ്: ബ്ലോക്ക് പഞ്ചായത്തുകളുടെ സംവരണവാർഡുകൾ നറുക്കെടുത്തു

കണ്ണൂർ: തദ്ദേശ സ്വയംഭരണ തെരഞ്ഞെടുപ്പിനു മുന്നോടിയായി ജില്ലയിലെ 11 ബ്ലോക്ക് പഞ്ചായത്തുക ളുടെയും സംവരണ വാർഡുകളുടെയും നറുക്കെടുപ്പ് പൂർത്തിയായി. ജില്ലയിലെ ഗ്രാമപഞ്ചായത്തു കൾ, നഗരസഭകൾ എന്നിവയുടെ സംവരണ വാർഡുകളുടെ നറുക്കെടുപ്പ് നേരത്തെ പൂർത്തിയാക്കി യിരുന്നു. ജില്ലാ തെരഞ്ഞെടുപ്പ് ഉദ്യോഗസ്ഥനായ ജില്ലാ കളക്ടർ അരുൺ കെ. വിജയൻ നേതൃത്വം നല്കി. ജില്ലാപഞ്ചായത്തിന്‍റെ സംവരണ വാർഡുകളുടെ നറുക്കെടുപ്പ് 21ന് നടക്കും. ബ്ലോക്ക് പഞ്ചായത്ത് സംവരണ വാർഡുകൾ: എടക്കാട് വനിത: അഞ്ച്-ചക്കരക്കൽ, ഏഴ്-പെരളശേരി, എട്ട്-മാവിലായി, പത്ത്-ആഡൂർ, 11-കോയ്യോട്, 12-ചെമ്പിലോട്, 14-ചേലേരി. പട്ടികജാതി: നാല്-തലമുണ്ട. കല്യാശേരി വനിത: ഒന്ന്-പിലാത്തറ, നാല്-ചെറുകുന്ന്, ഏഴ്-കെ കണ്ണപുരം, എട്ട്-കല്യാശേരി, പത്ത്-നാറാത്ത്, 11-ഇരിണാവ്, 12-മാട്ടൂൽ സൗത്ത്, 16-പുതിയങ്ങാടി. പട്ടികജാതി: മൂന്ന്-ഏഴോം. ഇരിക്കൂർ വനിത: ഒന്ന്-കുടിയാന്മല, മൂന്ന്-മണിക്കടവ്, അഞ്ച്-നുച്യാട്, ഏഴ്-കല്യാട്, ഒമ്പത്-മലപ്പട്ടം, 11-ചട്ടുകപ്പാറ, 12-മാണിയൂർ, 15-പയ്യാവൂർ. പട്ടികവർഗം: പത്ത്-കുറ്റ്യാട്ടൂർ. കണ്ണൂർ വനിത: ഒന്ന്-അഴീക്കൽ, ആറ്-കാട്ടാമ്പള്ളി, ഏഴ്-പുഴാതി, ഒമ്പത്-ചിറക്കൽ, പത്ത്-അലവിൽ, 11-തെക്ക് ഭാഗം, 14-വളപട്ടണം. പട്ടികജാതി: രണ്ട്-കരിക്കൻകുളം. ഇരിട്ടി വനിത: മൂന്ന്-വള്ളിത്തോട്, ആറ്-കീഴ്പ്പള്ളി, ഏഴ്-വെളിമാനം, ഒന്പത്-ആലയാട്, 12-എളമ്പാറ, 13-കൂടാളി ടൗൺ, 14-നായാട്ടുപാറ. പട്ടികവർഗം: 11-കീഴല്ലൂർ. കൂത്തുപറമ്പ് വനിത: ഒന്ന്-മാങ്ങാട്ടിടം, രണ്ട്-വട്ടിപ്രം, മൂന്ന്-കണ്ടംകുന്ന്, അഞ്ച്-കണ്ണവം, ആറ്-ചെറുവാഞ്ചേരി, എട്ട്-തൃപ്പങ്ങോട്ടൂർ, പത്ത്-പുത്തൂർ, 11-ചെണ്ടയാട്. പട്ടികവർഗം: ഒമ്പത്-കൊളവല്ലൂർ. പാനൂർ വനിത: മൂന്ന്-വള്ള്യായി, നാല്-പാറേമ്മൽ, അഞ്ച്-കൂരാറ, ആറ്-അരയാക്കൂൽ, ഒമ്പത്-കാഞ്ഞിരത്തിൻ കീഴിൽ, 13-കുണ്ടുചിറ, 14-പുല്ല്യോട്. പട്ടികജാതി: 12-ചമ്പാട്. പേരാവൂർ വനിത: ഒന്ന്-പാലപ്പുഴ, മൂന്ന്-അമ്പായത്തോട്, നാല്-കൊട്ടിയൂർ, ഏഴ്-തുണ്ടിയിൽ, ഒന്പത്-കോളയാട്, 12-കാഞ്ഞിലേരി, 14-കാക്കയങ്ങാട്. പട്ടികവർഗം: രണ്ട്-അടയ്ക്കാത്തോട്. പയ്യന്നൂർ വനിത: ഒന്ന്-കരിവെള്ളൂർ, മൂന്ന്-മാത്തിൽ, നാല്-പെരിങ്ങോം, അഞ്ച്-പാടിയോട്ടുചാൽ, ആറ്-പുളിങ്ങോം, പത്ത്-മാതമംഗലം, 13-കുന്നരു. പട്ടികജാതി: 11-കാങ്കോൽ. തളിപ്പറമ്പ് വനിത: ഒന്ന്-തേർത്തല്ലി, ആറ്-നടുവിൽ, ഏഴ്-ചുഴലി, എട്ട്-ചെങ്ങളായി, 11-പട്ടുവം, 13-കുറ്റ്യേരി, 15-പാണപ്പുഴ, 16-കൂവേരി, 17-ചപ്പാരപ്പടവ്. പട്ടികജാതി: 14-കടന്നപ്പള്ളി. പട്ടികവർഗം: 12-പരിയാരം. തലശേരി വനിത: ഒന്ന്-അഞ്ചരക്കണ്ടി, രണ്ട്-മുഴപ്പാല, അഞ്ച്-പാതിരിയാട്, ആറ്-എരുവട്ടി, ഏഴ്-വടക്കുമ്പാട്, ഒന്പത്-ന്യൂമാഹി, 13-പാലയാട്, 15-പിണറായി. പട്ടികജാതി: 11-കൂടക്കടവ്. കളക്ടറേറ്റ് കോൺഫറൻസ് ഹാളിൽ നടന്ന നറുക്കെടുപ്പിൽ തദ്ദേശ സ്വയംഭരണ വകുപ്പ് ജോയിന്‍റ് ഡയറക്ടർ ടി.ജെ. അരുൺ, ഇലക്ഷൻ ഡെപ്യുട്ടി കളക്ടർ കെ.കെ. ബിനി, തദ്ദേശസ്ഥാപന വകുപ്പ് ഉദ്യോഗസ്ഥർ, രാഷ്ട്രീയ പാർട്ടി പ്രതിനിധികൾ എന്നിവർ പങ്കെടുത്തു.

പഞ്ചായത്ത് വികസന സദസുകൾ നടത്തി

പേരാവൂർ: പേരാവൂർ പഞ്ചായത്ത് വികസന സദസ് ഡിപിസി ഗവ. നോമിനി കെ.വി. ഗോവിന്ദൻ ഉദ്ഘാടനം ചെയ്തു. പേരാവൂർ പഞ്ചായത്ത് പ്രസിഡന്‍റ് പി.പി. വേണുഗോപാലൻ അധ്യക്ഷത വഹിച്ചു. പേരാവൂർ ബ്ലോക്ക് പഞ്ചായത്ത് പ്രസിഡന്‍റ് കെ.സുധാകരൻ പഞ്ചായത്ത് വികസന റിപ്പോർട്ട് പ്രകാശനം ചെയ്തു. പേരാവൂർ ബ്ലോക്ക് പഞ്ചായത്ത് വൈസ് പ്രസിഡന്‍റ് പ്രീത ദിനേശൻ, ജില്ലാ പഞ്ചായത്ത് അംഗങ്ങളായ ജൂബിലി ചാക്കോ, വി. ഗീത, പേരാവൂർ ഗ്രാമ പഞ്ചായത്ത് വൈസ് പ്രസിഡന്‍റ് നിഷ ബാലകൃഷ്ണൻ, സ്റ്റാൻഡിംഗ് കമ്മിറ്റി ചെയർമാൻമാരായ കെ.വി. ശരത്, റീന മനോഹരൻ, എം. ശൈലജ, ആസൂത്രണ സമിതി ഉപാധ്യക്ഷൻ കെ.എ രജീഷ് എന്നിവർ പങ്കെടുത്തു. വനിതകളുടെ സംഗീത നാടക ശിൽപം കനൽച്ചിന്തുകൾ അരങ്ങേറി. കണിച്ചാർ: കണിച്ചാർ പഞ്ചായത്ത് വികസന സദസ് കെ.പി. മോഹനൻ എംഎൽഎ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് ആന്‍റണി സെബാസ്റ്റ്യൻ അധ്യക്ഷത വഹിച്ചു. ലൈഫ് ഭവന പദ്ധതി താക്കോൽ ദാനവും ഭൂമി നല്കുന്നതിനുള്ള അനുവാദ പത്രിക വിതരണവും എംഎൽഎ നിർവഹിച്ചു. പേരാവൂർ ബ്ലോക്ക് പഞ്ചായത്ത് പ്രസിഡന്‍റ് കെ. സുധാകരൻ മുഖ്യാതിഥിയായിരുന്നു. കണിച്ചാർ പഞ്ചായത്ത് സെക്രട്ടറി കെ.ജി. സന്തോഷ് പഞ്ചായത്തിന്‍റെ വികസന നേട്ടങ്ങൾ ഉൾപ്പെടുത്തി റിപ്പോർട്ട് അവതരിപ്പിച്ചു. കേളകം : കേളകം പഞ്ചായത്ത് വികസന സദസിന്‍റെ ഉദ്ഘാടനം കണ്ണൂർ ജില്ലാ പഞ്ചായത്ത് വൈസ് പ്രസിഡന്‍റ് ബിനോയ് കുര്യൻ നിർവഹിച്ചു. പഞ്ചായത്ത് പ്രസിഡന്‍റ് സി.ടി. അനീഷ് അധ്യക്ഷത വഹിച്ചു. വികസന സദസിന്‍റെ ഭാഗമായി പഞ്ചായത്തിന്‍റെ വിവിധ സേവനങ്ങൾ ലഭ്യമാക്കുന്ന കെ സ്മാർട്ട് ക്ലിനിക്, തൊഴിൽ മേള എന്നിവയും സംഘടിപ്പിച്ചു. കേളകം പഞ്ചായത്ത് വൈസ് പ്രസിഡന്‍റ് തങ്കമ്മ മേലേക്കുറ്റ്, ജില്ലാ പഞ്ചായത്ത് അംഗം വി. ഗീത, പേരാവൂർ ബ്ലോക്ക്പഞ്ചായത്ത് അംഗം മേരിക്കുട്ടി കഞ്ഞിക്കുഴിയിൽ, കേളകം പഞ്ചായത്ത് അസി. സെക്രട്ടറി സച്ചിദാനന്ദൻ എന്നിവർ പ്രസംഗിച്ചു. ചെങ്ങളായി: ചെങ്ങളായി പഞ്ചായത്ത് വികസന സദസ് മന്ത്രി കടന്നപ്പള്ളി രാമചന്ദ്രന്‍ ഓണ്‍ലൈനായി ഉദ്ഘാടനം ചെയ്തു. ചെങ്ങളായി പഞ്ചായത്ത് പ്രസിഡന്‍റ് വി.പി. മോഹനന്‍ അധ്യക്ഷത വഹിച്ചു. വികസന സദസിന്‍റെ ഭാഗമായി കെ സ്മാര്‍ട്ട് ക്ലിനിക്, വിജ്ഞാന കേരളം തൊഴില്‍ മേള, ഓക്‌സലോ ഫെസ്റ്റ്, വിവിധ കലാ പരിപാടികള്‍, കലാകായിക രംഗത്തുള്ളവര്‍ക്കുള്ള അനുമോദനം എന്നിവയും സംഘടിപ്പിച്ചു. കുന്നോത്ത്പറമ്പ്: കുന്നോത്ത്പറമ്പ് പഞ്ചായത്തിൽ സംഘടിപ്പിച്ച വികസന സദസ് കെ.പി. മോഹനൻ എംഎൽഎ ഉദ്ഘാടനം ചെയ്തു. മുൻ പഞ്ചായത്ത് പ്രസിഡന്‍റുമാർ, മുൻ ജനപ്രതിനിധികൾ, ഹരിതകർമ സേനാംഗങ്ങൾ എന്നിവരെ എംഎൽഎ ആദരിച്ചു. കെ സ്മാർട്ട് ക്ലിനിക്കും തൊഴിൽമേളയും പരിപാടിയുടെ ഭാഗമായി സംഘടിപ്പിച്ചു.

കെ സ്മാർട്ടിന്‍റെ പേരിൽ സർക്കാർ തദ്ദേശ സ്ഥാപനങ്ങളെ കൊള്ളയടിക്കുന്നു: കോർപറേഷൻ കൗൺസിൽ

കണ്ണൂർ: കെ സ്മാർട്ട് സോഫ്റ്റ്‌വെയർ നടപ്പാക്കിയതിലൂടെ തദ്ദേശ സ്ഥാപനങ്ങളുടെ വരുമാനം വർധിച്ചെന്നു വരുത്തി തദ്ദേശ സ്ഥാപനങ്ങൾക്ക് ലഭിക്കേണ്ട വരുമാനത്തെ സർക്കാർ ഉത്തരവിലൂടെ കൊള്ളയടിക്കുകയാണെന്ന് കൗൺസിൽ യോഗം. വരുമാനത്തിന്‍റെ 2.5 ശതമാനം സോഴ്സ് ഓട്ടോ ഡിഡക്ഷൻ വഴി ഐകെഎമ്മിന് ലഭ്യമാക്കുന്ന നടപടി അംഗീകരിക്കുകയില്ലെന്നും കോടതിയെ സമീപിക്കുമെന്നും മേയർ മുസ്‌ലിഹ് മഠത്തിൽ പറഞ്ഞു. ലേബർ വകുപ്പിന്‍റെ ചുമതലയിലുള്ള ലേബർ സെസ് പിരിച്ചെടുക്കുന്ന തദ്ദേശസ്ഥാപനങ്ങളെ ചുമതലപ്പെടുത്തുകയും ഒരു ശതമാനം തുക തദ്ദേശസ്ഥാപനത്തിന് അനുവദിക്കുകയും ചെയ്തിരുന്നു. എന്നാൽ ഈ ഒരു ശതമാനം തുകയും ഐകെഎമ്മിന് എന്ന നിലക്ക് ഉത്തരവ് തിരുത്തുകയും ചെയ്തിട്ടുണ്ട്.സർക്കാരിന്‍റെ ഈ ഉത്തരവ് തദ്ദേശസ്ഥാപനങ്ങളുടെ നിലനിൽപിനെ തന്നെ ചോദ്യം ചെയ്യപ്പെടുകയാണ്. വികസന പ്രവർത്തനങ്ങൾക്ക് വരുമാനം കണ്ടെത്താൻ കഷ്ടപ്പെടുന്ന പല തദ്ദേശസ്ഥാപനങ്ങളും ഉണ്ട് . ഇപ്പോൾ കേരളത്തിൽ നടന്നുകൊണ്ടിരിക്കുന്ന കൊള്ളയുടെ ഒരു ഭാഗമായി ഇതിനെ കാണേണ്ടിവരു മെന്നും ഡെപ്യൂട്ടി മേയർ പറഞ്ഞു. യോഗത്തിൽ ഡപ്യൂട്ടി മേയർ പി.ഇന്ദിര, സ്ഥിരംസമിതി അധ്യക്ഷന്മാരായ പി.കെ. രാഗേഷ്, എം.പി. രാജേഷ്, വി.കെ. ശ്രീലത, സയ്യിദ് സിയാദ് തങ്ങൾ, ഷാഹിന മൊയ്തീൻ, സുരേഷ് ബാബു എളയാവൂർ കൗൺസിലർമാരായ ടി.ഒ. മോഹനൻ, കെ.പി. അബ്ദുൾ റസാഖ്, എൻ. സുകന്യ, കെ. പ്രദീപൻ എന്നിവർ സംസാരിച്ചു.

തളിപ്പറമ്പ് തീപിടിത്തം; ഏകോപന സമിതി കേളകം യൂണിറ്റ് ധനസഹായം കൈമാറി

കേളകം: കഴിഞ്ഞ ദിവസം തളിപ്പറമ്പ് ടൗണിലെ വ്യാപാര സ്ഥാപനങ്ങൾ കത്തിനശിച്ച് കോടിക്കണ ക്കിന് രൂപയുടെ നഷ്ടം സംഭവിച്ച സാഹചര്യത്തിൽ കേരള വ്യാപാരി വ്യവസായി ഏകോപന സമിതി കണ്ണൂർ ജില്ലാ കമ്മിറ്റി നല്കുന്ന രണ്ടു കോടി രൂപയുടെ ധനസഹായത്തിലേക്ക് കേളകം യൂണിറ്റ് പിരിച്ചെടുത്ത തുക നൽകി. യൂണിറ്റ് അംഗങ്ങളിൽ നിന്നും ടൗണിലെ കച്ചവടക്കാരിൽ നിന്നും പിരിച്ചെടുത്ത ഒരു ലക്ഷത്തോളം രൂപയാണ് ജില്ലാ കമ്മിറ്റിക്ക് കൈമാറിയത്. കേളകം വ്യാപാര ഭവനിൽ നടന്ന ചടങ്ങിന് കേളകം യൂണിറ്റ് പ്രസിഡന്‍റ് എം.എസ്. തങ്കച്ചൻ അധ്യക്ഷത വഹിച്ചു. ജില്ലാ പ്രസിഡന്‍റ് ദേവസ്യ മേച്ചേരി ധനസഹായം ഏറ്റുവാങ്ങി. സിബി അൽക്ക, നാണു എന്നിവർ പ്രസംഗിച്ചു.

സാമൂഹ്യ പ്രതിബന്ധതയോടെ പ്രവർത്തിക്കുവാൻ മനുഷ്യൻ സന്നദ്ധമാകണം: കെ. സുധാകരൻ

കണ്ണൂർ: സാമൂഹ്യ പ്രതിബന്ധതയോട് കൂടി മാനവികത മൂല്യങ്ങൾ ഉയർത്തിപ്പിടിച്ച് കർമരംഗത്ത് സന്നദ്ധതയോടെ പ്രവർത്തിക്കുവാൻ മനുഷ്യൻ സന്നദ്ധമാകണമെന്ന് കെ. സുധാകരൻ എംപി. അസോസിയേഷൻ ഓഫ് ഓർഫനേജ് ആൻഡ് ചാരിറ്റബിൾ ഇൻസ്റ്റിട്യൂഷൻസ് ജില്ലാതല അവാർഡ് ദാന ചടങ്ങ് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ഓർഫനേജ് കൺട്രോൾ ബോർഡ്‌ തെരഞ്ഞെടുപ്പിൽ വിജയിച്ച ഫാ. ലിജോ ചിറ്റിലപ്പള്ളി, ഡോ. അബ്ദുറഹ്മാൻ മുബാറക് എന്നിവർക്ക് യോഗം സ്വീകരണം നല്കി. സംസ്ഥാന സർക്കാരിന്‍റെ വയോ സേവന പുരസ്‌കാരം കരസ്ഥമാക്കിയ ഖിദ്മ ആൻഡ് തണൽ സ്‌നേഹവീടിന് പുരസ്‌കാരം നൽകി. ജില്ലയിലെ അനാഥലയങ്ങളിൽ നിന്ന് എസ്എസ്എൽസി, പ്ലസ് ടു പരീക്ഷകളിൽ കൂടുതൽ മാർക്ക്‌ വാങ്ങിയ 60 കുട്ടികൾക്ക് മെമ്മോറണ്ടവും കാഷ് അവാർഡും നൽകി. ചടങ്ങിൽ ബ്രദർ സജി അധ്യക്ഷത വഹിച്ചു. സംസ്ഥാന ജനറൽ സെക്രട്ടറി പി.വി. സൈനുദ്ധീൻ മുഖ്യ പ്രഭാഷണം നടത്തി. ടി.എ. തങ്ങൾ, രവീന്ദ്രനാഥ്‌ ചെലേരി, കെ.എൻ. മുസ്തഫ, ബ്രദർ ലിജോ, കെ.കെ. അഹമ്മദ് ഹാജി, സി.എച്ച്. മൊയ്‌തു ഹാജി എന്നിവർ പ്രസംഗി ച്ചു.

തില്ലങ്കേരിയിൽ വ്യാജ പരാതിയിലൂടെ വോട്ട് തള്ളാൻ ശ്രമമെന്ന് പരാതി

ഇരിട്ടി: തില്ലങ്കേരിയിൽ വ്യാജ പരാതിയിലൂടെ വോട്ട് തള്ളാൻ ശ്രമമെന്ന് പരാതി. തില്ലങ്കേരി പഞ്ചായത്തിൽ തദ്ദേശ തെരഞ്ഞെടുപ്പിൽ വോട്ട് ചേർക്കേണ്ടതും തളേളണ്ടതുമായ അവസാന നിമിഷങ്ങളിൽ വ്യാപകമായി 3, 4, 5 , 10, 14 വാർഡുകളിൽ വോട്ട് നീക്കം ചെയ്യുന്നതിന് അപേക്ഷ നൽകിയിരിക്കുകയാണ്. നാലാം വാർഡിൽ 37 ആക്ഷേപങ്ങളാണ് നൽകിയിട്ടുള്ളത്. സി. മോഹന്‍ കുമാർ എന്ന വ്യക്തിയുടെ പേരിൽ വ്യാജ പരാതി നൽകിയതായാണ് പരാതി ഉയർന്നത്. ഇതു സംബന്ധിച്ച് അദ്ദേഹം പഞ്ചായത്ത് സെക്രട്ടറിക്ക് പരാതി നൽകി. വ്യാജ പരാതി നൽകിയവർക്കെതിരെ ശക്തമായ നിയമ നടപടി സ്വീകരിക്കണമെന്നും അല്ലാത്തപക്ഷം ശക്തമായ പ്രക്ഷോഭവുമായി മുന്നോട്ടുപോകുമെന്നും മണ്ഡലം പ്രസിഡന്‍റ് രാഗേഷ് തില്ലങ്കേരി പറഞ്ഞു.

സിഗ്നേച്ചർ കാമ്പയിൻ സംഘടിപ്പിച്ചു

പയ്യാവൂർ: കേന്ദ്ര സർക്കാരിന്‍റെ വോട്ട് കൊള്ളക്കെതിരെ "വോട്ട് ചോരി' എന്ന മുദ്രാവാക്യമുയർത്തി രാഹുൽഗാന്ധിയുടെ നേതൃത്വത്തിൽ നടത്തുന്ന ഒപ്പുശേഖരണത്തിന്‍റെ ഭാഗമായി മഹിളാ കോൺഗ്രസ് ഇരിക്കൂർ ബ്ലോക്ക് കമ്മിറ്റിയുടെ ആഭിമുഖ്യത്തിൽ പയ്യാവൂർ ബസ് സ്റ്റാൻഡ് പരിസരത്ത് സിഗ്നേച്ചർ കാമ്പയിൻ നടത്തി. കണ്ണൂർ ഡിസിസി ജനറൽ സെക്രട്ടറി ജോജി വർഗീസ് ഉദ്ഘാടനം ചെയ്തു. മഹിളാ കോൺഗ്രസ് ബ്ലോക്ക് പ്രസിഡന്‍റ് പി. കോമള അധ്യക്ഷത വഹിച്ചു. മഹിളാ കോൺഗ്രസ് പയ്യാവൂർ മണ്ഡലം പ്രസിഡന്‍റ് സിന്ധു ബെന്നി ആമുഖ പ്രഭാഷണവും സംസ്ഥാന സെക്രട്ടറി നസീമ ഖാദർ മുഖ്യപ്രഭാഷണവും നടത്തി. ലിസമ്മ ബാബു, മേഴ്‌സി ജോസ്, ഷേർലി അലക്സാണ്ടർ, ഇ.കെ. കുര്യൻ, ടി.പി. അഷ്റഫ്, ജിത്തു തോമസ്, എൻ.കെ. സന്ധ്യ എന്നിവർ പ്രസംഗിച്ചു.

കളക്ടറുടെ നിരോധന ഉത്തരവിലും കാര്യമില്ല; ചുഴലിയിൽ ചെങ്കൽ ഖനനം വ്യാപകം

ചപ്പാരപ്പടവ്: ചുഴലി വില്ലേജിലെ അനധികൃത ചെങ്കൽ ഖനനങ്ങൾ നിരോധിച്ചു കൊണ്ടുള്ള ജില്ലാ കളക്ടറുടെ ഉത്തരവിനെ മറികടന്നും മേഖലയിൽ ചെങ്കൽ ഖനനം സജീവം. ജനവാസ മേഖലയിലെ അപകട ഭീഷണിയും പാരിസ്ഥിതിക പ്രശ്നങ്ങളും കണക്കിലെടുത്ത് ജില്ലാ ദുരന്തനിവാരണ അഥോറിറ്റി ചെയർമാൻ കൂടിയായ ജില്ലാ കളക്ടർ കഴിഞ്ഞമാസം 24 നാണ് നിരോധന ഉത്തരവ് പുറപ്പെടുവിച്ചത്. തളിപ്പറമ്പ് തഹസിൽദാരുടെ റിപ്പോർട്ട് പ്രകാരം ചുഴലി വില്ലേജിലെ വിവിധ സർവേ നമ്പറുകളിലെ മിച്ച ഭൂമി, ദേവസ്വം ഭൂമി, സ്വകാര്യഭൂമി എന്നിവിടങ്ങളിലെ ഖനനങ്ങളാണ് നിരോധിച്ചിരുന്നത്. എന്നാൽ ലൈസൻസ് ഉള്ള ചില ക്വാറികൾക്ക് ഖനനം നടത്തുന്നതിനു അനുമതി നല്കിയിരുന്നു. ഇതിന്‍റെ മറവിലാണ് വ്യാജമായ രേഖകൾ ഉണ്ടാക്കി ചെങ്കൽ ഖനനം തുടരുന്നതെന്നാണ് പടപ്പേങ്ങാട് -ബാലേശുഗിരി ചെങ്കൽ ഖനന വിരുദ്ധ കർമസമിതിയുടെ ആരോപണം. കൊളത്തൂർ, മാവിലൻപാറ, കണ്ണാടിപ്പാറ എന്നീ പ്രദേശങ്ങളിലെ ചെങ്കൽ ഖനനം നിമിത്തം പടപ്പേങ്ങാട്, ബാലേശുഗിരി പ്രദേശങ്ങളിലെ വീടുകളിലെ കിണറുകളിൽ മലിനജലം നിറയുന്നു എന്ന് ആരോപിച്ചാണ് ചെങ്കൽ ഖനനത്തിനെതിരേ കർമസമിതി രൂപീകരിച്ചത്. മലബാർ ദേവസ്വ ത്തിന് കീഴിലുള്ള ടിടികെ ദേവസ്വത്തിന്‍റെ അധീനതയിൽ ഉണ്ടായിരുന്ന ആയിരക്കണക്കിന് ഏക്കർ ഭൂമിയാണ് കൈയേറ്റം നടത്തി ചെങ്കൽ ഖനനം നടത്തുന്നത്. പ്രാദേശികമായ രാഷ്ട്രീയ നേതാക്കന്മാരുടെ പിന്തുണയോടെ കോഴിക്കോട്, മലപ്പുറം, കാസർഗോഡ് ജില്ലകളിൽ നിന്നുള്ള ചില സംഘങ്ങളാണ് ഉദ്യോഗസ്ഥരെ സ്വാധീനിച്ച് രേഖകൾ ഉണ്ടാക്കിയതെന്ന് കർമസമിതി ആരോപിക്കുന്നു. വ്യാജ കൈവശ രേഖകൾ ഉപയോഗിച്ച് ജിയോളജി വകുപ്പിൽ നിന്നും അനുമതി സംഘടിപ്പിച്ചാണ് ഖനനം തുടരുന്നതെന്നാണ് ആരോപണം. ഇതിനെതിരേ നിയമപരമായ നടപടികൾ സ്വീകരിക്കുമെന്നും ജില്ലാ കളക്ടർ അടക്കമുള്ളവരെ ഇക്കാര്യം ബോധ്യപ്പെടുത്തിയിട്ടുണ്ടെന്നും കർമസമിതി ചെയർമാനും പഞ്ചായത്ത് പ്രസിഡന്‍റുമായ സുനിജ ബാലകൃഷ്ണനും കൺവീനർ എ.എൻ.വിനോദും പറഞ്ഞു. മലബാർ ദേവസ്വം ബോർഡ് പ്രസിഡന്‍റ് ഒ.കെ. വാസു കഴിഞ്ഞമാസം നേരിട്ടു പ്രദേശത്തു പരിശോധന നടത്തിയിരുന്നു. തുടർന്ന് ജില്ലാ കളക്ടർ അടക്കമുള്ളവർക്ക് നിവേദനം നല്കുകയും ചെയ്തിരുന്നു. കർമസമിതിക്കെതിരേ ചില ക്വാറി ഉടമകൾ കോടതിയെ സമീപിക്കുകയും ചെയ്തി ട്ടുണ്ട്. ജില്ലാ കളക്ടറുടെ ഉത്തരവ് മറികടന്ന് റോഡിൽ നിന്ന് ദൂരപരിധി പാലിക്കാതെ പോലും ചെങ്കൽപണങ്ങൾ പ്രവർത്തിക്കുന്നതും കൈയേറ്റങ്ങൾ തുടരുന്നതിലും പ്രതിഷേധ ശക്തമാവു കയാണ്.

നാടൻ തോക്കും തിരകളും വാറ്റുചാരായവും പിടിച്ചു

ചെറുപുഴ: നാടൻ തോക്കും തിരകളും വാറ്റുചാരായവും പിടിച്ചു. ചെറുപുഴ പോലീസ് സ്റ്റേഷൻ അതിർത്തിയിൽ രാജഗിരി മരുതുംതട്ടിലെ മുതുപ്ലാക്കൽ ജോയിയുടെ (75) വീട്ടിൽ ഇന്നലെ വൈകുന്നേരം നടത്തിയ പരിശോധനയിലാണു തോക്കും തിരകളും പിടികൂടിയത്. ചെറുപുഴ എസ്ഐ രൂപ മധുസൂദനന്‍റെ നേതൃത്വത്തിലുള്ള പോലീസ് സംഘമാണ് മരുതുംതട്ടിലെ വീട്ടിൽ പരിശോധന നടത്തിയത്. പോലീസ് സ്ഥലത്തെത്തിയപ്പോൾ വീട്ടുടമ സ്ഥലത്തുണ്ടായിരുന്നില്ല. ഈസമയം വീടിന്‍റെ പരിസരത്ത് ഒരാൾ നാടൻചാരായം വാറ്റുന്നുണ്ടായിരുന്നു. പോലീസിനെ കണ്ട ഉടൻ ഇയാൾ ഓടിരക്ഷപ്പെട്ടു. ഇയാളുടെ മൊബൈൽ ഫോൺ പോലീസിന് ലഭിച്ചതായി സൂചനയുണ്ട്. നാടൻ തോക്കിനു പുറമെ 50 തിരകൾ, അഞ്ചുലിറ്റർ നാടൻ ചാരായം, 250 ലിറ്ററിലേറെ വാഷ് എന്നിവയും വീട്ടിൽ നിന്നു കണ്ടെടുത്തു. കുറെക്കാലമായി ഇയാൾ നിരീക്ഷണത്തിലായിരുന്നു. എസ്ഐ രൂപ മധുസൂദനനു പുറമെ സ്പെഷൽ ബ്രാഞ്ച് എസ്ഐ സി. വിജയൻ, എഎസ്ഐ പി. ബിജുമോൻ, പി.കെ. സുധീഷ്, ജോമോൻ തോമസ്, എൻ. സരോജ് എന്നിവരും സംഘത്തിലുണ്ടായിരുന്നു.

കാട്ടുപന്നികൾ മരച്ചീനി കൃഷി നശിപ്പിച്ചു

ചെറുപുഴ: കൊല്ലാടയിലുള്ള സുലൈമാന്‍റെ വീടിനോട് ചേർന്ന 10 സെന്‍റ് സ്ഥലത്ത് നട്ട മരച്ചീനി കാട്ടുപന്നി കൂട്ടം നശിപ്പിച്ചു. രണ്ട് ദിവസത്തിനുള്ളിൽ വിളവെടുക്കാനിരുന്ന കപ്പയാണ് കാട്ടുപന്നികൾ നശിപ്പിച്ചത്. ചെറുപുഴ പഞ്ചായത്തിലെ മികച്ച കർഷകനായ അഞ്ചില്ലത്ത് സുലൈമാൻ കൃഷിയെ മാത്രം ആശ്രയിച്ച് ജീവിക്കുന്ന കർഷകനാണ്. കൃഷിഭവന്‍റെ നിർദേശങ്ങൾക്കനുസരിച്ചുള്ള ശാസ്ത്രീയ കൃഷിരീതിയാണ് സുലൈമാൻ ചെയ്യുന്നത്. അതിനാൽ രോഗകീടാബാധ കുറവും മികച്ച വിളവുമാണെന്നും കൃഷിയിടം സന്ദർശിച്ച കൃഷി ഉദ്യോഗസ്ഥൻ സുരേഷ് കുറ്റൂർ പറഞ്ഞു.

പയ്യന്നൂർ ഉപജില്ലാ കലോത്സവം 22 മുതൽ 25 വരെ രാമന്തളിയിൽ

പയ്യന്നൂർ: 29 വർഷങ്ങൾക്കുശേഷം രാമന്തളി ഗവ. ഹയർ സെക്കൻഡറി സ്കൂളിൽ നടത്തപ്പെടുന്ന 64ാമത് പയ്യന്നൂർ ഉപജില്ലാ കലോത്സവത്തിനുള്ള ഒരുക്കങ്ങൾ പൂർത്തീകരിച്ചതായി സംഘാടക സമിതി. 22 മുതൽ 25 വരെ നടക്കുന്ന കലാമേളയിൽ എട്ടിക്കുളം മുതൽ രാജഗിരി വരെയുള്ള പയ്യന്നൂർ ഉപജില്ലയിലെ 96 വിദ്യാലയങ്ങളിൽ നിന്നായി 1200 ഓളം പ്രതിഭകൾ നാലു ദിവസങ്ങളിലായി മാറ്റുരക്കും. 13 വേദികളാണ് ഇവിടെ മത്സരത്തിനായി ഒരുക്കിയിരിക്കുന്നത്. കുട്ടികൾക്ക് പ്രഭാത ഭക്ഷണം, ഉച്ചഭക്ഷണം എന്നിവ നൽകാനായി വിശാലമായ ഒരു ഭക്ഷണപ്പുരയാണ് ഒരുക്കിയിട്ടുള്ളത്. സംഘാടക സമിതിക്ക് സഹായകമായി 17 സബ് കമ്മിറ്റികളാണു കലോത്സവ വിജയത്തിനായി പ്രവർത്തിച്ചുവരുന്നത്. നാളെ വൈകുന്നേരം നാലിന് കുന്നത്തെരു ചിദംബരനാഥ് സ്കൂളിൽ നിന്ന് കലോത്സവത്തിന്‍റെ മുന്നോടിയായുള്ള വിളംബരജാഥ നടത്തുമെന്ന് സംഘാടക സമിതി ചെയർപേഴ്സൺ വി. ഷൈമ, ജനറൽ കൺവീനർ ടി.വി. സചിൻകുമാർ, കെ.വി. സുരേന്ദ്രൻ, ഒ.കെ. ശശി, കെ. ശശീന്ദ്രൻ, വി. പ്രമോദ് തുടങ്ങിയവർ പത്രസമ്മേളനത്തിൽ അറിയിച്ചു.

വികസന പദ്ധതി രൂപീകരണത്തിനായി ഊരുകൂട്ടം സംഘടിപ്പിച്ചു

നടുവിൽ: അംബേദ്കർ സെറ്റിൽമെന്‍റ് സമഗ്ര വികസന പദ്ധതി രൂപീകരണ ഊരുകൂട്ടത്തിന്‍റെ ഉദ്ഘാടനം സജീവ് ജോസഫ് എംഎൽഎ നിർവഹിച്ചു. നടുവിൽ പഞ്ചായത്തിലെ ഉത്തൂർ നഗറിനെയാണ് പദ്ധതിക്കായി തെരഞ്ഞെടുത്തത്. പട്ടികജാതി പട്ടിക വര്‍ഗ വിഭാഗങ്ങളുടെ ഉന്നമനത്തിന് പ്രത്യേക പരിഗണന നല്‍കുമെന്ന് എംഎൽ എ പറഞ്ഞു. കോളനിയുടെ സമഗ്ര വികസനം മുന്നില്‍ കണ്ട് ദീര്‍ഘ വീക്ഷണത്തോടെ പദ്ധതികള്‍ നടപ്പാക്കണമെന്നും അദ്ദേഹം ആവശ്യപ്പെട്ടു. റോഡ് നവീകരണം, വീട് റിപ്പയർ, കുടിവെള്ള പദ്ധതി, മിനി മാസ്റ്റ് ലൈറ്റ് തുടങ്ങിയവ പദ്ധതിയിൽ ഉൾപ്പെടുന്നു. നടുവിൽ സെന്‍റ് മേരീസ് പാരീഷ് ഹാളിൽ നടന്ന ചടങ്ങിൽ നടുവിൽ പഞ്ചായത്ത് പ്രസിഡന്‍റ് ബേബി ഓംടമ്പള്ളി അധ്യക്ഷത വഹിച്ചു. ബ്ലോക്ക് പഞ്ചായത്ത് അംഗം ജോഷി കണ്ടത്തിൽ, വാർഡ് മെംബർ ലിസി ജോസഫ്, ഐടിഡിപി ജില്ലാ ഓഫീസർ കെ. ബിന്ദു, ടിഇഒടി കെ. സജിത, എ.ഇ. മിനിത, ഊരുമൂപ്പ കെ.ആർ.ബിന്ദു തുടങ്ങിയവർ പ്രസംഗിച്ചു.

കരിസ്മാറ്റിക്ക് ജൂബിലി തിരി രത്നഗിരി പള്ളിയിൽ

രത്നഗിരി: കേരള കത്തോലിക്ക കരിസ്മാറ്റിക്ക് നവീകരണ മുന്നേറ്റം സുവർണ ജൂബിലി ആഘോഷങ്ങളുടെ ഭാഗമായി കരിസ്മാറ്റിക്ക് ചെമ്പേരി സബ് സോണിന്‍റെ ആഭിമുഖ്യത്തിൽ നടത്തിവരുന്ന ജൂബിലി തിരി പ്രയാണത്തിന്‍റെ പൊന്മല സെന്‍റ് ജോസഫ്സ് പള്ളിയിലെ ശുശ്രൂഷകൾക്കുശേഷം രത്നഗിരി സെന്‍റ് സെബാസ്റ്റ്യൻസ് പള്ളിയിൽ എത്തിച്ചു. സിസ്റ്റർ ആൻസി കുര്യൻ, പ്രാർഥന ഗ്രൂപ്പ് ലീഡർ സാലി വലിയവള്ളിയിൽ, ഇടവക കോ-ഓർഡിനേറ്റർ ജോയി പെരുമാലിൽ, പ്രാർഥന ഗ്രൂപ്പ് അംഗങ്ങൾ എന്നിവർ ചേർന്ന് ഏറ്റുവാങ്ങി. 25 ന് രാവിലെ 9.30 ന് ജപമാല പ്രാർഥനയ്ക്കും സ്തുതി ആരാധനയ്ക്കും ശേഷം ഇടവക വികാരി ഫാ. ലാസർ വരമ്പകത്ത് ജൂബിലി തിരിതെളിച്ച് ആമുഖ സന്ദേശം നൽകും. തുടർന്ന് വചന പ്രഘോഷണം, വിശുദ്ധ കുർബാന, ദിവ്യകാരുണ്യ ആരാധന എന്നിവയ്ക്ക് കരിസ്മാറ്റിക്ക് സബ്സോൺ ആനിമേറ്റർ ഫാ. ജോസഫ് പുതുമന, സബ്സോൺ കോ-ഓർഡിനേറ്റർ വിൻസെന്‍റ് മായയിൽ എന്നിവർ നേതൃത്വം നൽകും. ഇവിടത്തെ ശുശ്രൂഷകൾക്കുശേഷം ജൂബിലി തിരി വലിയ അരീക്കമല ദീപഗിരി സെന്‍റ് തോമസ് പള്ളിയിലേക്കു കൈമാറും.

ചെറുപുഴ പഞ്ചായത്ത് വികസന സദസ്

ചെറുപുഴ: ചെറുപുഴ പഞ്ചായത്ത് വികസന സദസ് നടന്നു. ടി.ഐ. മധുസൂദനൻ എംഎൽഎ ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് കെ.എഫ്. അലക്സാണ്ടർ അധ്യക്ഷത വഹിച്ചു. പയ്യന്നൂർ ബ്ലോക്ക് പഞ്ചായത്ത് പ്രസിഡന്‍റ് പി.വി. വൽസല, പഞ്ചായത്ത് വൈസ് പ്രസിഡന്‍റ് റെജി പുളിക്കൽ, ജില്ലാ പഞ്ചായത്തംഗം, എം. രാഘവൻ, സ്റ്റാൻഡിംഗ് കമ്മിറ്റി ചെയർമാൻമാരായ കെ.കെ. ജോയി, എം. ബാലകൃഷ്ണൻ, ഷാന്‍റി കലാധരൻ, ബ്ലോക്ക് പഞ്ചായത്തംഗം കെ. ദാമോദരൻ, പി.കെ. ചന്ദ്രശേഖരൻ, പഞ്ചായത്ത് സെക്രട്ടറി ബിറ്റാജ് തോമസ്, അനിൽ കരിച്ചേരി എന്നിവർ പ്രസംഗിച്ചു. തുടർന്ന് പൊതുചർച്ച, മറുപടി, ആദരിക്കൽ എന്നിവ നടന്നു.

കാൽനടയാത്രികനെ ഇടിച്ചു നിർത്താതെ പോയ വാഹനം പോലീസ് കണ്ടെത്തി

കണ്ണൂർ: പെരിങ്ങത്തൂർ–കരിയാട് റോഡിൽ ബാലൻപീടികയിൽ ഒക്ടോബർ 10 ന് രാത്രി ഏഴിനും 7:15-നും ഇടയിൽ കാൽനടയാത്രികനെ ഇടിച്ചു നിർത്താതെ പോയ വാഹനത്തെ കണ്ടെത്തി ചൊക്ലി പോലീസ്. അജ്ഞാത വാഹനം ഇടിച്ച് നിർത്താതെ പോയെന്ന പരാതിക്കാരന്‍റെ മൊഴിയുടെ അടിസ്ഥാനത്തിൽ നിരവധി സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് ഓടിച്ചിരുന്നത് റോയൽ എൻഫീൽഡ് കമ്പനിയുടെ മോട്ടോർസൈക്കിൾ ആണെന്ന് പോലീസ് കണ്ടെത്തുകയും വാഹനം ഓടിച്ചത് 17 വയസുകാരനാണെന്ന് പോലീസിന് ബോധ്യമാവുകയും ചെയ്തിട്ടുണ്ട്. തുടർന്ന് കുട്ടിയുടെ രക്ഷിതാക്കൾക്കെതിരേ പോലീസ് കേസെടുത്തു അന്വേഷണം ആരംഭിച്ചിട്ടുണ്ട്. ചൊക്ലി പോലീസ് സ്റ്റേഷൻ ഇൻസ്പെക്ടർ കെ. മഹേഷിന്‍റെ നിർദേശ പ്രകാരം സിവിൽ പോലീസ് ഓഫീസർമാരായ അഖിൽ, ശ്രീനിഷ്, ബാഗീഷ് എന്നിവർ ചേർന്ന് 30 ഓളം സിസിടിവി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് ഇടിച്ചു നിർത്താതെ പോയ വാഹനത്തെ കണ്ടെത്തിയത്.

അമലിന് വേണം സുമനസുകളുടെ സഹായം

ഇരിട്ടി: ഇരുവൃക്കകളും തകരാറിലായ എടൂർ സ്വദേശി അമൽ മുകളത്തിന്‍റെ (27) ചികിത്സയ്ക്കായി നാട്ടുകാർ ജനകീയ കമ്മിറ്റി രൂപീകരിച്ചു. യുവാവിന്‍റെ ജീവൻ നിലനിർത്തണമെങ്കിൽ വൃക്ക മാറ്റിവയ്ക്കുകയല്ലാതെ മറ്റു മാർഗങ്ങളില്ല. ശസ്ത്രക്രിയ ഉൾപ്പെടെ 25 ലക്ഷം രൂപ ചെലവ് വരുന്ന ചികിത്സയ്ക്ക് നിർധന കുടുംബത്തിൽപ്പെട്ട അമലിനു വഴിയില്ലാത്ത സാഹചര്യത്തിലാണ് നാട്ടുകാർ ജനകീയ കമ്മിറ്റി രൂപീകരിച്ചു സുമനസുകളുടെ സഹായം തേടാൻ തീരുമാനിച്ചത്. ഭാരവാഹികൾ: സണ്ണി ജോസഫ് എംഎൽഎ, ഇരിട്ടി ബ്ലോക്ക് പഞ്ചായത്ത് പ്രസിഡന്‍റ് കെ. വേലായുധൻ, ആറളം പഞ്ചായത്ത് പ്രസിഡന്‍റ് കെ.പി. രാജേഷ്, എടൂർ സെന്‍റ് മേരീസ് ഫൊറോന ആർക്കി എപ്പിസ്കോപ്പൽ മരിയൻ തീർഥാടന ദേവാലയം വികാരി ഫാ. തോമസ് വടക്കേമുറിയിൽ -രക്ഷാധികാരി. പഞ്ചായത്ത് സ്ഥിരം സമിതി അധ്യക്ഷൻ ജോസ് അന്ത്യംകുളം -കൺവീനർ, പഞ്ചായത്ത് അംഗം കെ.പി. സെലീന -ചെയർമാൻ, വിനോദ് കൊല്ലമ്പറമ്പിൽ -ട്രഷറർ. ഒന്നര മാസത്തിനകം ശസ്ത്രക്രിയ നടത്താനാണ് ഡോക്‌ടർമാർ നിർദേശിച്ചിട്ടുള്ളത്. സഹായങ്ങൾ ഇന്ത്യൻ ഓവർസീസ് ബാങ്കിന്‍റെ എടൂർ ശാഖയിൽ 344502000000226 (ഐഎഫ്എസ്‌സി: ഐഒബിഎ0003445) അക്കൗണ്ടിലേക്ക് അയയ്ക്കാം. ഫോൺ: 996148 3294.

അനന്ദു അജിയുടെ മരണം: ഡിവൈഎഫ്ഐ ജാഗ്രത സദസ് സംഘടിപ്പിച്ചു

പയ്യന്നൂർ: കോട്ടയം കാഞ്ഞിരപ്പള്ളിയിലെ അനന്ദു അജിയുടെ മരണം സംബന്ധിച്ച് സമഗ്രാന്വേഷണം നടത്തണമെന്നാവശ്യപ്പെട്ട് ഡിവൈഎഫ്ഐ പയ്യന്നൂർ ബ്ലോക്ക് കമ്മിറ്റിയുടെ നേതൃത്വത്തിൽ യുവജന ജാഗ്രത സദസ് സംഘടിപ്പിച്ചു. പയ്യന്നൂർ ഷേണായ് സ്‌ക്വയർ പരിസരത്ത് ഡിവൈഎഫ്ഐ കണ്ണൂർ ജില്ലാ സെക്രട്ടറി സരിൻ ശശി ഉദ്ഘാടനം ചെയ്തു. ആർഎസ്എസ് ശാഖയിൽ നിന്ന് കുട്ടിക്കാലം മുതലേ നേരിടേണ്ടി വന്ന ലൈംഗീക പീഡനത്തിന്‍റെ ഞെട്ടിക്കുന്ന വിവരങ്ങളാണ് മരണത്തിന് മുന്പ് അനന്തു ഇൻസ്റ്റഗ്രാം വഴി പങ്കുവച്ചതെന്ന് സരിൻ ശശി പറഞ്ഞു. എത്ര മാത്രം അകറ്റി നിർത്തേണ്ട ആശയവും പ്രവർത്തിയുമാണ് ആർഎസ്എസ് മുന്നോട്ടു വയ്ക്കുന്നതെന്ന് അനന്തു ജീവിതം അവസാനിപ്പിക്കുംമുമ്പ് കുറിച്ചിരിക്കുന്നു. സഹജീവി സ്നേഹം പഠിക്കേണ്ട ബാല്യങ്ങളെ അപരവിദ്വേഷം പഠിപ്പിക്കുന്ന ഇടമാക്കിയും മനുഷത്വം ഇല്ലാത്തവരാക്കിയും മാറ്റുന്ന ഇത്തരം ശാഖകളിലേക്ക് നമ്മുടെ കുഞ്ഞുങ്ങൾ എത്താതിരിക്കാൻ കൂടുതൽ ജാഗ്രത ഉണ്ടാവണമെന്നും അദ്ദേഹം പറഞ്ഞു. അനന്തുവിന്‍റെ മരണത്തിൽ അന്വേഷണം നടത്തി ഘാതകരായ ആർഎസ്എസ് ക്രിമിനലുകളെ നിയമത്തിന് മുന്നിൽ കൊണ്ടു വരണമെന്ന ആവശ്യവ്യമായി സംഘടിപ്പിച്ച പരിപാടിയിൽ സി.വി. റഹിനേജ് അധ്യക്ഷത വഹിച്ചു. വി.കെ. നിഷാദ്, പി.പി. അനീഷ, സി. ഷിജിൽ, ടി.സി.വി. നന്ദകുമാർ, കെ. മനുരാജ്‌, പി. ഷിജി എന്നിവർ പ്രസംഗിച്ചു.

മട്ടന്നൂർ പോളിടെക്നിക് കോളജ് വിദ്യാർഥി യൂണിയൻ കെഎസ്‌യു‌വിന്

മട്ടന്നൂർ: മട്ടന്നൂർ പോളിടെക്നിക് കോളജ് വിദ്യാർഥി യൂണിയൻ കെഎസ്‌യുവിന്. വർഷങ്ങളായി എസ്എഫ്ഐ നിലനിർത്തിയിരുന്ന യൂണിയനാണു കെഎസ്‌യു പിടിച്ചെടുത്തത്. ശക്തമായ പോലീസ് കാവലിലായിരുന്നു തെരഞ്ഞെടുപ്പ്. പോളിടെക്നിക് പ്രവർത്തനം ആരംഭിച്ച മുതൽ 34 വർഷത്തിലധികമായി എസ്എഫ്ഐ ഭരിച്ചിരുന്ന യൂണിയനാണ് കെ‌എസ്‌യു പിടിച്ചെടുത്തത്. ചെയർമാനായി ആർ.കെ. അശ്വന്ത്, വൈസ് ചെയർമാനായി വി. അശ്വന്ത് കൃഷ്ണ, ലേഡി വൈസ് ചെയർമാനായി ടി.പി. ഷസ മിന്നത്ത്, ജനറൽ സെക്രട്ടറിയായി എസ്.ബി. സഫ്വാൻ, പിയുസിയായി അഹമ്മദിബ്നു മുഹമ്മദ്‌, മാഗസിൻ എഡിറ്ററായി എം. മുഹമ്മദ്‌, ആർട്സ് ക്ലബ് സെക്രട്ടറിയായി ടി. മുഹമ്മദ്‌ അദ്നാൻ എന്നിവരെ തെരഞ്ഞെടുത്തു. വിജയിച്ചവരെ ആനയിച്ച് കളറോഡ് പോളിടെക്നിക് പരിസരത്ത് നിന്ന് മട്ടന്നൂരിലേക്ക് ആഹ്ലാദ പ്രകടനം നടത്തി. ചരിത്ര വിജയമാണ് നേടിയതെന്ന് യൂത്ത് കോൺഗ്രസ് ജില്ലാ വൈസ് പ്രസിഡന്‍റ് ഫർസീൻ മജീദും കെഎസ്‌യു ജില്ലാ വൈസ് പ്രസിഡന്‍റ് ഹരികൃഷ്ണൻ പാളാടും പറഞ്ഞു. മട്ടന്നൂർ ബസ് സ്റ്റാൻഡിൽ നടന്ന സമാപനത്തിൽ വി.ആർ. ഭാസ്കരൻ, സുരേഷ് മാവില, എ.കെ. രാജേഷ്, ഫർസീൻ മജീദ്, ഹരികൃഷ്ണൻ പാളാട്, ഹരി കൃഷ്ണൻ പൊറോറ തുടങ്ങിയവർ പ്രസംഗിച്ചു. സംഘർഷ സാധ്യത കണക്കിലെടുത്ത് വൻ പോലീസ് സന്നാഹമാണ് കോളജ് പരിസരത്ത് ഏർപ്പെടുത്തിയത്.

നഗരശ്രീ പുരസ്കാരം ഡോ.എ.കെ. വേണുഗോപാലിന്

കണ്ണൂർ: 2025ലെ കണ്ണൂർ കോർപറേഷന്‍റെ നഗരശ്രീ പുരസ്കാരത്തിന് ഡോ.എ.കെ. വേണുഗോപാലിനെ തെരഞ്ഞെടുത്തതായി ഡെപ്യുട്ടി മേയർ പി. ഇന്ദിര വാർത്താസമ്മേളനത്തിൽ അറിയിച്ചു. വിവിധ മേഖലകളിൽ പ്രാവീണ്യം തെളിയിച്ചിട്ടുള്ളവരെ ആദരിക്കുന്നതിനായാണ് നഗരശ്രീ പുരസ്കാരം ഏർപ്പെടുത്തിയത്. ഇത്തവണ ആരോഗ്യമേഖലയിലുള്ളവരെയാണ് പുരസ്കാരത്തിന് പരിഗണിച്ചത്. കണ്ണൂർ വെസ്റ്റ് കോസ്റ്റ് നഴ്സിംഗ് ഹോം ആശുപത്രിയിലെ ഡോക്‌ടറാണ് വേണുഗോപാൽ. ഭാര്യ: ഡോ.കെ.എം. സുഹറ. ഡോ. സന്ദീപ്, ഡോ. സൂര്യ എന്നിവർ മക്കളാണ്. വാർത്താ സമ്മേളനത്തിൽ സ്ഥിരം സമിതി അധ്യക്ഷന്മാരായ എം.പി. രാജേഷ്, പി. ഷമീമ, വി.കെ. ശ്രീലത, ഷാഹിന മൊയ്തീൻ, സുരേഷ് ബാബു എളയാവൂർ, കൗൺസിലർമാരായ ടി.ഒ. മോഹനൻ, കെ.പി. അബ്ദുൽ റസാഖ്, ടി. രവീന്ദ്രൻ, പി.വി. ജയസൂര്യൻ എന്നിവർ പങ്കെടുത്തു.

തൊഴിലാളികളെ കയറ്റിവന്ന ഓട്ടോ ടാക്സി നിയന്ത്രണം വിട്ട് മറിഞ്ഞ് ആറുപേർക്ക് പരിക്ക്

ഇരിട്ടി: വാണിയപ്പാറതട്ടിൽ മരം വെട്ടു തൊഴിലാളികളെ കയറ്റിവന്ന ഓട്ടോ ടാക്സി നിയന്ത്രണം വിട്ട് കശുമാവിൻ തോട്ടത്തിലേക്കു മറിഞ്ഞ് ഡ്രൈവർ ഉൾപ്പെടെ ആറുപേർക്ക് പരിക്കേറ്റു. മരം വെട്ട് ജോലികഴിഞ്ഞ് തൊഴിലാളികളുമായി തിരിച്ചുവരികയായിരുന്ന ഓട്ടോ ടാക്സി വാണിയപ്പാറ തട്ട് ബ്ലാക്ക് റോക്ക് ക്രഷറിനു സമീപത്തെ വളവിൽ നിയന്ത്രണം വിട്ടു മറിയുകയായിരുന്നു. നാലുതവണ തലകീഴായി മറിഞ്ഞ വാഹനം മരത്തിൽ തട്ടി നിൽക്കുകയായിരുന്നു. ഇന്നലെ ഉച്ചകഴിഞ്ഞ് മൂന്നോടെയായിരുന്നു അപകടം. കരിക്കോട്ടക്കരി സ്വദേശികളായ അശോകൻ (56), സാബു (56), ഹരി (39), കൊട്ടുകപ്പാറ സ്വദേശികളായ കോഴിപറമ്പിൽ ബാലൻ (59), ഞാഞ്ഞിലത്ത് തൊമ്മൻ (54), ഡ്രൈവർ കരിക്കോട്ടക്കരി സ്വദേശി ഹരി (45) എന്നിവർക്കാണു പരിക്കേറ്റത്. അപകടത്തിൽപ്പെട്ടവരെ രക്ഷപ്പെടുത്തി നാട്ടുകാർ ഇരിട്ടിയിലെ സ്വകാര്യ ആശുപത്രിയിൽ എത്തിച്ചു. തലയ്ക്കും തോളെല്ലിനും വാരിയെല്ലിനും പൊട്ടൽ സംഭവിച്ച് ഗുരുതരമായി പരിക്കേറ്റ അശോകൻ, സാബു, ബാലൻ എന്നിവരെ കണ്ണൂർ പരിയാരം ഗവ. മെഡിക്കൽ കോളജിലേക്കു മാറ്റി. മറ്റു മൂന്നുപേരുടെയും പരിക്കുകൾ ഗുരുതരമല്ല.

ചീങ്കണ്ണി പുഴയ്ക്ക് മൂന്ന് അവകാശികൾ; ഒടുവിൽ സെറ്റിൽമെന്‍റ് ഇഷ്യു ആയി പ്രഖ്യാപിച്ച് കളക്ടർ

കേളകം: കേളകം പഞ്ചായത്തിന്‍റെ അതിർത്തിയിലൂടെ ഒഴുകുന്ന ചീങ്കണ്ണി പുഴയ്ക്ക് അവകാശികൾ ഏറിയതോടെ സെറ്റിൽമെന്‍റ് ഇഷ്യൂ ആയി പ്രഖ്യാപിച്ച് എന്‍റെ ഭൂമി പോർട്ടലിൽ അപ്‌ലോഡ് ചെയ്തതായി ജില്ലാ കളക്ടർ അറിയിച്ചു. ചീങ്കണ്ണി പുഴയുടെ അവകാശം കേളകം പഞ്ചായത്തിൽ നിലനിർത്തണമെന്ന് ആവശ്യപ്പെട്ട് ജനകീയ സമിതി ചെയർമാൻ ഫാ. സെബാസ്റ്റ്യൻ പൊടിമറ്റം മുഖ്യമന്ത്രിക്ക് നൽകിയ നിവേദനത്തിന് മറുപടിയായാണ് ജില്ലാ കളക്ടറുടെ അറിയിപ്പ്. നിലവിൽ കേളകം പഞ്ചായത്തിന്‍റെ അധീനതയിലായിരുന്നു പുഴ. എന്നാൽ റീസർവേയുടെ ഭാഗമായി പുഴ ആദ്യം ആറളം പഞ്ചായത്തിൽ ഉൾപ്പെടുത്തി അളന്ന് തിട്ടപ്പെടുത്തി. ഇരു പഞ്ചായത്തുകളുടെയും സർവേ നടപടി പൂർത്തിയാകുന്നതിന് അനുസരിച്ച് പുഴ കേളകം പഞ്ചായത്തിന്‍റെ അധീനതയിൽ വരും എന്നാണ് നേരത്തേ പറഞ്ഞിരുന്നത്. എന്നാൽ ഇരുപഞ്ചായത്തുകളിലെയും സർവേ നടപടികൾ പൂർത്തിയായപ്പോൾ പുഴയുടെ അവകാശ തർക്കം ഉടലെടുത്തു. ഇതിനിടയിൽ പുഴ തങ്ങൾക്ക് അവകാശപ്പെട്ടതാണെന്ന് പറഞ്ഞ് വനം വകുപ്പ് കൂടി രംഗത്തെത്തി. ഇത് സംബന്ധിച്ച് റവന്യൂ വകുപ്പിന് വനം വകുപ്പ് അധികൃതർ കത്തും നൽകി. നിലവിലെ സർവേ പ്രകാരം ആറളം വില്ലേജിന്‍റെ അധീനതയിലാണ് പുഴ. ചീങ്കണ്ണി പുഴയുടെ പുറമ്പോക്ക് അളന്ന് തിട്ടപ്പെടുത്തിയിരിക്കുന്നത് കേളകം പഞ്ചായത്തിൽ കൂടെയാണ്. അതിനാൽ പുഴയുടെ ഇക്കരെയുള്ള കേളകം വില്ലേജിന്‍റെ റവന്യൂ ഭൂമി ആയിരുന്ന പ്രദേശം കൂടി ഇപ്പോൾ ആറളം വില്ലേജിന്‍റെ അധീനതയിലായി. പുഴ പുറമ്പോക്കുമായി ബന്ധപ്പെട്ട തർക്കം റീസർവേ സമയത്ത് ഉയർന്നു വന്നപ്പോൾ സ്ഥലം സന്ദർശിച്ച തലശേരി സബ് കളക്ടർ അളവ് പൂർത്തിയാകുന്നതോടെ പ്രശ്നങ്ങൾ പരിഹരിച്ചു നൽകാമെന്ന് ഉറപ്പുനൽകിയിരുന്നു. പുഴയുടെ അവകാശം പൂർണമായും കൈക്കലാക്കാൻ വനം വകുപ്പ് ഇതിനിടയിൽ ഗൂഢശ്രമം നടത്തിയെന്നാണ് പുതിയ സൂചന. പുഴ തങ്ങളുടെ അധീനതയിൽ ആകുന്നതോടുകൂടി പുഴയിൽ ഇറങ്ങാനുള്ള പ്രദേശവാസികളുടെ അവകാശവും ഇല്ലാതാക്കാനാവും. മാത്രമല്ല പുഴക്ക് ഇക്കരെയുള്ള റവന്യൂ ഭൂമി വനംവകുപ്പിന്‍റെ അധീനതലാകുന്നതോടെ റിസർവ് വനമായി മാറ്റാനും സാധ്യതയുണ്ട്. റിട്ടയേഡ് സൈനികനെ പുഴയിൽ ചൂണ്ടയിട്ടതിന് അകാരണമായി കേസെടുക്കുകയും ജയിലിൽ അടയ്ക്കാൻ ശ്രമിക്കുകയും ചെയ്തതാണ് വനം വകുപ്പ്. ഇനി ആറളം വില്ലേജിലാണ് പുഴ പെടുന്നതെങ്കിൽ അതും ഭീഷിയാണ്. നിലവിൽ ആറളം വില്ലേജ് പരിധിയിലാണ് ആറളം വന്യജീവി സങ്കേതം. വില്ലേജിന്‍റെ പരിധി വർധിക്കുന്നതോടെ വനത്തിന്‍റെ വിസ്തൃതി വർധിപ്പിക്കാൻ കഴിയും. കേളകം പഞ്ചായത്തിന്‍റെ പ്രധാന കുടിവെള്ള പദ്ധതി ചീങ്കണ്ണി പുഴയിലാണ്. ത്രിതല പഞ്ചായത്ത് തെരഞ്ഞെടുപ്പ് അടുത്തിരിക്കുന്ന സാഹചര്യത്തിൽ ശക്തമായ പ്രതിഷേധം നടത്താനാണ് പ്രദേശവാസികളുടെ തീരുമാനം.

ഇരിട്ടി പഴയ പാലത്തിൽ സമ്പൂർണ ഗതാഗത നിരോധനം; കാൽനടയും വേണ്ട

ഇരിട്ടി: ഇരിട്ടി പഴയ പാലത്തിലൂടെയുള്ള ഗതാഗതം പെതുമരാമത്ത് വകുപ്പ് പൂർണമായും നിരോധിച്ചു. കാൽ നടയാത്രയ്ക്കുള്ള അവസരവും നിഷേധിക്കുന്ന തരത്തിൽ പാലത്തിന്‍റെ ഇരുഭാഗങ്ങളിലും റിബൺ വലിച്ചുകെട്ടി വഴിയടച്ചിരിക്കുകയാണ്. സുരക്ഷാകാരണങ്ങളാലാണ് പാലത്തിലൂടെയുള്ള ഗതാഗതം താത്ക്കാലികമായി നിരോധിച്ചതെന്ന് കാണിച്ച് പൊതുമരാമത്ത് വകുപ്പ് പാലം വിഭാഗം എക്സിക്യൂ‌ട്ടീവ് എൻജിനിയറുടെ പേരിൽ ബോർഡും സ്ഥാപിച്ചു. കഴിഞ്ഞ ദിവസം കെഎസ്ആർടിസി സ്വിഫ്റ്റ് ബസ് പാലത്തിലേക്ക് ഇടിച്ചു കയറിയിരുന്നു. പാലത്തിന്‍റെ ഇരുമ്പ് ചട്ടക്കൂടാണ് ബസ് പുഴയിലേക്ക് വീഴുന്നത് തടഞ്ഞുള്ള രക്ഷാകവചമായി നിലകൊണ്ടത്. ബസ് വേഗതയിൽ പാലത്തിലേക്ക് ഇടിച്ചു കയറിയതുമൂലം പാലത്തിന്‍റെ ജോയിന്‍റു വേർപ്പെട്ടെന്നും ഇത് അപകട ഭീഷണിയാകുമെന്നും പരിശോധനയിൽ കണ്ടെത്തിയതിനെ തുടർന്നാണ് പാലം അടച്ചിട്ടതെന്ന് പൊതുമരാമത്ത് പാലം വിഭാഗം എക്‌സിക്യൂട്ടീവ് എൻജിനിയർ ബിനോയി പറഞ്ഞു. തകർന്ന ഭാഗം ബലപ്പെടുത്തുന്നതിനുള്ള എസ്റ്റിമേററ് സമർപ്പിച്ചിട്ടുണ്ടെന്നും ബലപ്പെടുത്തൽ പൂർത്തിയാകുന്ന മുറയ്ക്ക് പാലം ഗതാഗതത്തിന് തുറന്നുകൊടുക്കുമെന്നും അദ്ദേഹം കൂട്ടിച്ചേർത്തു. അപകടത്തിൽപെട്ട ബസ് മാറ്റി പാലത്തിലൂടെയുള്ള ഗതാഗതം പുനഃസ്ഥാപിച്ചിരുന്നു. എന്നാൽ വ്യാഴാഴ്ച വൈകുന്നേരത്തോടെയാണ് നിരോധനം ഏർപ്പെടുത്തിയിരിക്കുന്നത്. ഇതോടെ ഇരിട്ടി ടൗണിൽ നിന്നും തളിപ്പറമ്പ് ഉളിക്കൽ ഭാഗത്തേക്കുളള വാഹനങ്ങൾ പുതിയ പാലം വഴി തിരിച്ചുവിട്ടു. വൺവേ സംവിധാനം എന്ന നിലയിൽ ഈ ഭാഗത്തേക്കുളള വാഹനങ്ങൾ പഴയ പാലം വഴി കടന്നുപോകാൻ തുടങ്ങിയത് ഗതാഗതക്കുരുക്കിനും പരിഹാരമായിരുന്നു. പഴയ പാലം അടച്ചതോടെ പുതിയ പാലത്തിലെ ഗതാഗതക്കുരുക്ക് വർധിച്ചിരിക്കുകയാണ്. ബ്രിട്ടീഷ് ഭരണകാലത്ത് 1933-ൽ നിർമിച്ച പാലത്തിന് 90 വർഷത്തിലധികം പഴക്കമുണ്ട്. ഇരിട്ടി പട്ടണത്തിന്‍റെ അടയാളം കൂടിയാണ് പഴയ പാലം. പുതിയ പാലം പൂർത്തിയാകുന്നതിനിടയിൽ നിർമാണ പുരോഗതി വിലയിരുത്താൻ എത്തിയ അന്നത്തെ പൊതുമരാമത്ത് മന്ത്രി പഴയ പാലത്തെ പൈതൃക പട്ടികയിൽ ഉൾപ്പെടുത്തി സംരക്ഷിക്കുമെന്ന് പ്രഖ്യാപിച്ചിരുന്നു. എന്നാൽ ഇതൊന്നും ഇതുവരെ നടപ്പായി‌‌‌‌ല്ല.

കണ്ണപുരം സ്ഫോടനം: അഞ്ചാം പ്രതി സ്വാമിനാഥൻ അറസ്റ്റിൽ

കണ്ണൂർ: കണ്ണപുരം കീഴറയിൽ ഓഗസ്റ്റ് 30 ന് പുലർച്ചെ ഉണ്ടായ സ്ഫോടനവുമായി ബന്ധപ്പെട്ട കേസിലെ അഞ്ചാം പ്രതി അറസ്റ്റിൽ. പാലക്കാട് ഏഴക്കാട് മുണ്ടൂർ സ്വദേശി സ്വാമിനാഥനെ (64) യാണ് കണ്ണപുരം പോലീസ് ഇൻസ്‌പെക്ടർ മഹേഷ് കണ്ടമ്പേത്തിന്‍റെ നേതൃത്വത്തിലുള്ള പോലീസ് സംഘം അറസ്റ്റു ചെയ്തത്. കേസിലെ പ്രതികളായ അനൂപ് മാലിക്, അനീഷ്, റാഹിൽ എന്നിവരെ നേരത്തെ അറസ്റ്റ് ചെയ്തിരു ന്നു. ഇവരെ പിന്നീട് കസ്റ്റഡിയിലും വാങ്ങിയിരുന്നു. പ്രതികളുടെ മൊഴികളും മൊബൈൽ വിവര ങ്ങളും ബാങ്ക് ഇടപാടുകളുടെ വിവരങ്ങളുമാണ് സ്വാമിനാഥന്‍റെ അറസ്റ്റിലേക്ക് നയിച്ചത്. 2025 ഓഗസ്റ്റ് 30ന് പുലർച്ചെ 1:50ന് കണ്ണപുരം കീഴറയിലെ ഒരു വാടക വീട്ടിൽ ഉണ്ടായ സ്ഫോടനത്തിൽ ഒരാൾ മരിച്ചിരുന്നു. സ്ഫോടനത്തിന്‍റെ ആഘാതത്തിൽ ആ വീടിനും സമീപവാസികളുടെ വീടുകൾ ക്കും നാശനഷ്ടങ്ങൾ സംഭവിച്ചിരുന്നു. സംഭവവുമായി ബന്ധപ്പെട്ട് കണ്ണപുരം പോലീസ് അന്വേഷണം ഊർജിതമാക്കി. അന്വേഷണ സംഘത്തിൽ എസ്‌സിപിഒ. മഹേഷ്, സിപിഒ അനൂപ്, സിപിഒ റിജേഷ് കുമാർ എന്നിവരും ഉൾപ്പെട്ടിരുന്നു.

1972 ലെ വന്യജീവിസംരക്ഷണ നിയമം ഭരണഘടനാ വിരുദ്ധം: മാധവ് ഗാഡ്ഗിൽ

വെള്ളരിക്കുണ്ട്: 1972 ലെ വന്യജീവിസംരക്ഷണ നിയമം മനുഷ്യന്‍റെ ജീവനും സ്വത്തിനും സംരക്ഷണം ലഭിക്കാനുള്ള ഭരണഘടനാപരമായ അവകാശത്തിനുമേൽ വന്യജീവികളുടെ സംരക്ഷണത്തിന് പ്രാമുഖ്യം നൽകുന്നതാണെന്നും അതുകൊണ്ടുതന്നെ അത് ഭരണഘടനാ വിരുദ്ധമാണെന്നും പരിസ്ഥിതി ശാസ്ത്രജ്ഞൻ പ്രഫ. മാധവ് ഗാഡ്ഗിൽ പറഞ്ഞു. അടിമുടി ഭരണഘടനാ വിരുദ്ധമായ ഈ നിയമം ഉടൻ പൊളിച്ചെഴുതണമെന്ന് അദ്ദേഹം ആവശ്യപ്പെട്ടു. വന്യജീവി ആക്രമണങ്ങൾക്ക് ശാശ്വത പരിഹാരം ആവശ്യപ്പെട്ട് വെള്ളരിക്കുണ്ടിൽ നടക്കുന്ന കർഷകസ്വരാജ് സത്യഗ്രഹത്തിന്‍റെ രണ്ടാംഘട്ട സമര പരിപാടികളുമായി ബന്ധപ്പെട്ട ഓൺലൈൻ കൺവൻഷൻ ഉദ്ഘാടനം ചെയ്ത് പ്രസംഗിക്കുകയായിരുന്നു അദ്ദേഹം. ആനയുൾപ്പെടെയുള്ള വന്യജീവികളുടെ എണ്ണം പല മടങ്ങായി വർധിച്ചിട്ടും അതു സംബന്ധിച്ച വിശ്വാസയോഗ്യമായ കണക്കുകൾ വനംവകുപ്പിന്‍റെ പക്കലില്ലെന്ന് ഗാഡ്ഗിൽ ചൂണ്ടിക്കാട്ടി. വന്യജീവി ആക്രമണങ്ങളിൽ ജീവൻ നഷ്ടപ്പെടുന്ന സംഭവങ്ങൾക്ക് മാത്രമാണ് ശ്രദ്ധ കിട്ടുന്നത്. കർഷകരുടെയും തൊഴിലാളികളുടെയും ജീവനോപാധികൾക്കുണ്ടാവുന്ന നഷ്ടം പലപ്പോഴും അവഗണിക്കപ്പെടുകയാണ്. മഹാരാഷ്‌‌ട്രയിൽ മാത്രം വന്യജീവി ആക്രമണങ്ങളിൽ നാല്പതിനായിരം കോടി രൂപയുടെ കാർഷിക നഷ്ടമാണ് ഉണ്ടായിട്ടുള്ളതെന്ന് ഇതു സംബന്ധിച്ച പഠന റിപ്പോർട്ട് ഉദ്ധരിച്ച് അദ്ദേഹം പറഞ്ഞു. ഇതുപോലെ കേരളത്തിലും വന്യജീവി ആക്രമണങ്ങൾ മൂലമുണ്ടായ കാർഷികനഷ്ടം സംബന്ധിച്ച് വിശദമായ പഠനം നടത്തണമെന്ന് അദ്ദേഹം ആവശ്യപ്പെട്ടു. രണ്ടാം ഘട്ട സമരപരിപാടികൾ സത്യഗ്രഹ സമിതി ചെയർമാൻ സണ്ണി പൈകട പ്രഖ്യാപിച്ചു. 29 ന് ഡൽഹിയിൽ ഏകദിന സത്യഗ്രഹവും നവംബർ ഏഴു മുതൽ വെള്ളരിക്കുണ്ടിൽനിന്ന് തിരുവനനന്തപുരത്തേക്ക് സംസ്ഥാനതല വാഹന പ്രചാരണ ജാഥയും നടക്കും. നവംബർ 15 മുതൽ സെക്രട്ടേറിയറ്റ് പടിക്കൽ 100 മണിക്കൂർ ഉപവാസം നടത്തും. വെള്ളരിക്കുണ്ടിൽ നടന്നുവരുന്ന അനിശ്ചികാല കർഷകസ്വരാജ് സത്യഗ്രഹം ഇതുപോലെ തുടരും. ആവശ്യങ്ങൾ അംഗീകരിക്കാത്തപക്ഷം ജനുവരി ആദ്യവാരം മുതൽ സത്യഗ്രഹ സമരം കൂടുതൽ ശക്തമാക്കും. ഓൺലൈൻ യോഗത്തിൽ കർഷകസ്വരാജ് സത്യഗ്രഹ ഐക്യദാർഢ്യസമിതി ചെയർമാൻ കെ.വി. ബിജു അധ്യക്ഷത വഹിച്ചു. പി.ടി. ജോൺ, അഡ്വ. വിനോദ് പയ്യട, അഡ്വ. ജോൺ ജോസഫ്, ജിയോ ജോസ്, റോസ് ചന്ദ്രൻ, മുതലാംതോട് മണി, ജിമ്മി ഇടപ്പാടി, അഡ്വ. ബിനോയ് തോമസ്, റോജർ സെബാസ്റ്റ്യൻ എന്നിവർ പ്രസംഗിച്ചു.

എഎസ്ഐഎസ്‌സി കലോത്സവത്തിന് കൊടിയേറി

മാന്നാനം: ലാസ്യ താള രാഗങ്ങളുടെ അരങ്ങുണർന്നു. കെഇ സ്കൂളിലെ വേദികളിൽ കൗമാരം കലയുടെ പീലിവിടർത്തിയാടി. എഎസ്ഐഎസ്‌സി കേരള റീജൺ കലോത്സവത്തിന് കൊടിയേറി. മാന്നാനം കെഇ സ്കൂൾ ആതിഥേയത്വം വഹിക്കുന്ന കലോത്സവം ‘രംഗോത്സവ് 2025’ ചലച്ചിത്ര നടനും തിരക്കഥാകൃത്തുമായ ഡോ. റോണി ഡേവിഡ് ഉദ്ഘാടനം ചെയ്തു. എഎസ്ഐഎസ്‌സി കേരള റീജൺ പ്രസിഡന്‍റ് റവ. ഡോ. സിൽവി ആന്‍റണി അധ്യക്ഷത വഹിച്ചു. മാന്നാനം സെന്‍റ് ജോസഫ്സ് ആശ്രമം പ്രിയോർ റവ. ഡോ. കുര്യൻ ചാലങ്ങാടി സിഎംഐ, കേരള റീജൺ സെക്രട്ടറിയും കെഇ സ്കൂൾ പ്രിൻസിപ്പലുമായ റവ. ഡോ. ജയിംസ് മുല്ലശേരി സിഎംഐ, റീജണൽ കലോത്സവം പ്രിൻസിപ്പൽ കോ ഓർഡിനേറ്റർ ഫാ. ഷിനോ കളപ്പുരയ്ക്കൽ, പിടിഎ വൈസ് പ്രസിഡന്‍റ് ഡോ. ഇന്ദു പി. നായർ തുടങ്ങിയവർ സന്നിഹിതരായിരുന്നു. തീം ഡാൻസ്, നാടോടി നൃത്തം, സംഘനൃത്തം, ലളിതഗാനം, പ്രസംഗം, പദ്യപാരായണം, കുച്ചുപ്പുടി, ഭരതനാട്യം, മോഹിനിയാട്ടം, ശാസ്ത്രീയ സംഗീതം തുടങ്ങിയ ഇനങ്ങളിൽ ഇന്നലെ മത്സരം നടന്നു. കലോത്സവം ഇന്ന് സമാപിക്കും വൈകുന്നേരം നടക്കുന്ന ചടങ്ങിൽ സിഎംഐ സഭയുടെ തിരുവനന്തപുരം പ്രൊവിൻഷ്യൽ ഫാ. ആന്‍റണി ഇളന്തോട്ടം സമ്മാനദാനം നിർവഹിക്കും. സെന്‍റ് മേരീസും ഹരിശ്രീയും മുന്നിൽ ആദ്യ ദിവസത്തെ മത്സരങ്ങൾ പൂർത്തിയായപ്പോൾ കാറ്റഗറി മൂന്നിൽ സെന്‍റ് മേരീസ് ഇംഗ്ലീഷ് മീഡിയം സ്കൂൾ കോഴിക്കോടും കാറ്റഗറി നാലിലും അഞ്ചിലും ഹരിശ്രീ വിദ്യാനിധി സ്കൂൾ തൃശൂരും പോയിന്‍റ് നിലയിൽ മുന്നിട്ടുനിൽക്കുന്നു.

റവന്യൂ ജില്ലാ സ്കൂൾ കായികമേള : ബഹുദൂരം പയ്യന്നൂർ

തലശേരി: റവന്യൂ ജില്ലാ സ്കൂൾ കായികമേളയുടെ രണ്ടാം ദിനം 68 മത്സരങ്ങൾ പൂർത്തിയായപ്പോൾ 152 പോയിന്‍റുമായി പയ്യന്നൂർ ഉപജില്ല ബഹൂദൂരം മുന്നിൽ. 61.25 പോയിന്‍റുമായി മട്ടന്നൂർ ഉപജില്ല രണ്ടാം സ്ഥാനത്തും 53 പോയിന്‍റുമായി ഇരിക്കൂർ മൂന്നാം സ്ഥാനത്തുമുണ്ട്. 48 പോയിന്‍റുള്ള ഇരിട്ടി ഉപജില്ലയാണ് നാലാം സ്ഥാനത്ത്. രണ്ടാം ദിനവും ആറ് മീറ്റ് റിക്കാർഡുകൾ പിറന്നു. സബ് ജൂണിയര്‍ വിഭാഗം പെണ്‍കുട്ടികളുടെ ഷോട്ട്പുട്ടിൽ മമ്പറം എച്ച്എസ്എസിലെ എട്ടാം ക്ലാസ് വിദ്യാര്‍ഥി ബി.കെ. അന്‍വിക 11.6 മീറ്റര്‍ എറിഞ്ഞാണ് റിക്കാര്‍ഡ് തകര്‍ത്തത്. 2023 ല്‍ മട്ടന്നൂര്‍ എച്ച്എസ്എസിലെ ലാസിമ റഷീദിന്‍റെ 8.69 എന്ന മീറ്റ് റിക്കാർഡ് ആണ് അന്‍വിക പഴങ്കഥയാക്കിയത്. കഴിഞ്ഞവര്‍ഷം സംസ്ഥാനതലത്തില്‍ ഷോട്ട് പുട്ടില്‍ അന്‍വിക സ്വർണം നേടിയിരുന്നു. കുന്നിരിക്ക ചോല വീട്ടില്‍ രാജേഷ് -സജിന ദമ്പതികളുടെ മകളാണ്. ഇന്ന് നടക്കുന്ന ഡിസ്‌കസ് ത്രോ മത്സരത്തിലും അന്‍വിക പങ്കെടുക്കുന്നുണ്ട്. ജൂണിയര്‍ ഗേള്‍സ് ഷോട്ട് പുട്ട് മത്സരത്തില്‍ മട്ടന്നൂര്‍ എച്ച്എസ്എസിലെ പത്താം ക്ലാസ് വിദ്യാര്‍ഥിനി ലാസിമ റഷീദ് റിക്കാർഡ് കു റിച്ചു. 10.33 മീറ്റര്‍ എറിഞ്ഞ് മണിക്കടവ് സെന്‍റ് തോമസ് എച്ച് എസ്എസിലെ എസ്. നിവേദ്യയുടെ 2023 ലെ 10.20 മീറ്റര്‍ എന്ന റിക്കാര്‍ഡാണ് ലാസിമ മറികടന്നത്. ജൂണിയര്‍ ഗേള്‍സ് 100 മീറ്റര്‍ ഓട്ടത്തില്‍ തലശേരി സായിയിലെ ടി.പി. മിഥുന 12.32 സെക്കൻഡില്‍ മീറ്റ് റിക്കാർഡ് മറികടന്നു. സായിയിലെ ഇവാന ടോമിയുടെ 12.63 എന്ന മീറ്റ് റിക്കാര്‍ഡാണ് മറികടന്നത്. ജൂണിയര്‍ ബോയ്സ് 110 മീറ്റര്‍ ഹർഡില്‍സില്‍ കരിവെള്ളൂര്‍ എവിഎസ് ഗവ.ഹയര്‍ സെക്കൻഡറി സ്‌കൂളിലെ കെ. അഭിനവ് 14.87 സെക്കൻഡില്‍ 2024 ലെ അല്‍വിന്‍ സന്തോഷിന്‍റെ 16.09 സെക്കൻഡ് റിക്കാർഡ് മറികടന്നു. ജൂണിയര്‍ ഗേള്‍സിന്‍റെ 100 മീറ്റര്‍ ഹർഡില്‍സില്‍ കണ്ണൂര്‍ ഗവ. വിഎച്ച്എസ്എസ് സ്‌പോര്‍ട്‌സിലെ പ്ലസ് വണ്‍ വിദ്യാര്‍ഥിനി ടി.വി. ദേവശ്രീ സ്വന്തം റിക്കാര്‍ഡ് മറികടന്നു. 2024 ല്‍ തന്‍റെ തന്നെ റിക്കാഡായ 15.83 സെക്കൻഡാണ് മറികടന്നത്. ജൂണിയര്‍ ഗേള്‍സ് ഹാമര്‍ ത്രോ മത്സരത്തില്‍ മണക്കടവ് സെന്‍റ് തോമസ് ഹൈസ്‌കൂളിലെ റോസ് മരിയ ജോണിക്കുട്ടി 33.55 മീറ്റര്‍ എറിഞ്ഞ് സെന്‍റ് തോമസ് എച്ച്എസ്എസിലെ എം.എസ്. നിവേദിത യുടെ 2024 ലെ 33.33 മീറ്റര്‍ എന്ന മീറ്റ് റിക്കാർഡ് മറികടന്നു. മൂന്നു ദിവസമായി നടക്കുന്ന കായിക മേള ഇന്ന് സമാപിക്കും. മഴയില്ലാതെ നല്ല കാലാവസ്ഥയിലായിരുന്നു രണ്ടാം ദിനം കടന്നുപോയത്. നൂറു മീറ്റർ ഓട്ടം, ഹർഡിൽസ്, ഷോട്ട് പുട്ട്, ജാവലിൽ ത്രോ, പോൾ വാൾട്ട് മത്സരങ്ങൾ രണ്ടാം ദിനം ശ്രദ്ധേയമായിരുന്നു. മഴ മൂലം നിർത്തിവച്ച ജൂണിയർ ഗേൾസിന്‍റെ ഹൈജംപ് മത്സരവും ഇന്നലെ നടന്നിരുന്നു.

കണ്ണൂർ റവന്യു ജില്ലാ സ്കൂൾ കായികമേള : ആദ്യദിനം പയ്യന്നൂരിന്‍റ കുതിപ്പ്

നവാസ് മേത്തർ തലശേരി: കണ്ണൂർ റവന്യു ജില്ലാ സ്കൂൾ കായികമേളയുടെ ആദ്യദിനം പയ്യന്നൂര്‍ ഉപജില്ലയുടെ കുതിപ്പ്. 77 പോയിന്‍റുകള്‍ നേടിയാണ് പയ്യന്നൂർ മുന്നിട്ടുനില്ക്കുന്നത്. തൊട്ടുപിറകില്‍ 37.25 പോയിന്‍റുമായി മട്ടന്നൂര്‍ ഉപജില്ല രണ്ടാം സ്ഥാനത്തും 27 പോയിന്‍റുമായി തലശേരി സൗത്ത് മൂന്നാം സ്ഥാനത്തുമുണ്ട്. 26 പോയിന്‍റുള്ള കണ്ണൂര്‍ നോര്‍ത്താണ് നാലാം സ്ഥാനത്ത്. ഉച്ചകഴിഞ്ഞ് പെയ്ത മഴയെ തുടർന്ന് ജൂണിയർ ഗേൾസ് ഹൈംജംപ് മാറ്റി. മീറ്റ് റിക്കാർഡുകൾ ആദ്യദിനം മീറ്റ് റിക്കാർഡുകൾക്കും കുറവുണ്ടായില്ല. ഇന്നലെ ആറ് മീറ്റ് റിക്കാർഡുകളാണ് പിറന്നത്. അഞ്ചെണ്ണം വ്യക്തി ഗത ഇനത്തിലായിരുന്നുവെങ്കിൽ ഒരു റിക്കാർഡ് റിലേയിലായിരുന്നു. ജൂണിയര്‍ ബോയ്‌സ് ഷോട്ട്പുട്ടില്‍ കോളയാട് സെന്‍റ് കൊര്‍ണേലിയൂസ് എച്ച്എസ്എസിലെ എട്ടാംക്ലാസ് വിദ്യാര്‍ഥി നിഷാല്‍ വി. ചന്ദ്രനാണ് 9.58 മീറ്റര്‍ എറിഞ്ഞ് സ്വര്‍ണം നേടിയത്. ചെമ്പേരി നിര്‍മല എച്ച്എസ്എസ് വിദ്യാര്‍ഥി ജെറോല്‍ ജോസ് കഴിഞ്ഞ വര്‍ഷം നേടിയ 9.53 റിക്കാർഡാണ് നിഷാല്‍ തകര്‍ത്തത്. സീനിയര്‍ ബോയ്‌സ് ലോംഗ് ജംപില്‍ അഞ്ചരക്കരണ്ടി എച്ച്എസ്എസിലെ പ്ലസ്ടു വിദ്യാര്‍ഥി സി. ശിവദത്ത് 6.67 മീറ്റര്‍ ചാടി 2023 ല്‍ മട്ടന്നൂര്‍ എച്ച്എസ്എസ് വിദ്യാര്‍ഥി വി.എം വിഷ്ണുവിന്‍റെ 6.39 എന്ന റിക്കാർഡ് തകര്‍ത്തു. സീനിയര്‍ ബോയ്‌സ് 400 മീറ്റര്‍ ഓട്ടത്തില്‍ തോട്ടട എസ്എന്‍ ട്രസ്റ്റ് എച്ച്എസ്എസിലെ സംഗീര്‍ഥ് വിനോദ് മീറ്റ് റിക്കാർഡിട്ടു. 49.75 സെക്കന്‍റിലാണ് റിക്കാർഡ്. 2017ല്‍ എളയാവൂര്‍ സിഎച്ച്എംഎച്ച്എസ്എസിലെ പി.ജി. അഭിലാഷിന്‍റെ 52.09 സെക്കന്‍ഡ് റിക്കാർഡാണ് മറികടന്നത്. ജൂണിയര്‍ ബോയ്‌സ് 400 മീറ്ററില്‍ കരിവെള്ളൂര്‍ എവിഎസ് ഗവ. എച്ച്എസ്എസിലെ കെ. അഭിനവ് 52. 20 സെക്കന്‍റില്‍ ഓടിയെത്തി റിക്കാർഡിട്ടു. 2017ല്‍ എളയാവൂര്‍ സിഎച്ച്എം എച്ച്എസ്എസിലെ മുഹമ്മദ് ഷഹലിന്‍റെ 52.46 സെക്കന്‍റാണ് തകര്‍ത്തത്. ജൂണിയര്‍ ഗേള്‍സ് 400 മീറ്റര്‍ ഓട്ടത്തില്‍ തലശേരി സായിയിലെ ഇവാന ടോമി 57.50 സെക്കന്‍റില്‍ 2024 ലെ 59.53 സെക്കന്‍റ് എന്ന സ്വന്തം റിക്കാർഡ് മറികടന്നു. ജൂണിയര്‍ ഗേള്‍സ് വിഭാഗത്തില്‍ 4x100 മീറ്റര്‍ റിലേ മത്സരത്തില്‍ 55.41 സെക്കന്‍റില്‍ തലശേരി സൗത്ത് ഉപജില്ല മീറ്റ് റിക്കാർഡിട്ടു. 2009 ല്‍ ഇരിട്ടി ഉപജില്ലയുടെ 56.50 സെക്കന്‍റ് എന്ന റിക്കാർഡാണ് മറികടന്നത്. തലശേരി സെന്‍റ് ജോസഫ് എച്ചഎസ്എസിലെ കെ. ശ്രീനന്ദ, ഗവ. ടൗണ്‍ എച്ച്എസ്എസിലെ എവ്‌ലിന്‍ മരിയ ചെറിയാന്‍, തിരുവങ്ങാട് എച്ച്എസ്എസിലെ എന്‍. വി. നിരഞ്ചന, കൊടുവള്ളി ഗവ. വൊക്കേഷന്‍ എച്ച്എസ്എസിലെ അമയാ സുനില്‍ എന്നിവരാണ് ടീമുണ്ടായിരുന്നത്. കായികതാരങ്ങളായ കുട്ടികൾക്ക് ഷൂസുകൾ ഉറപ്പാക്കണം: സ്പീക്കർ കണ്ണൂർ: കായികമേളകളിൽ പങ്കെടുക്കുന്ന കുട്ടികൾക്ക് ഷൂസുകൾ ബന്ധപ്പെട്ടവർ ഉറപ്പാക്കണമെന്ന് സ്പീക്കർ എ.എൻ. ഷംസീർ. കണ്ണൂർ റവന്യു ജില്ലാ കായികമേള തലശേരി വി.ആർ. കൃഷ്ണയ്യർ മെമ്മോറിയൽ മുനിസിപ്പൽ സ്റ്റേഡിയത്തിൽ ‌ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. പല കുട്ടികളും സാന്പത്തീക കാരണങ്ങളാൽ ഷൂസുകളില്ലാതെ നഗ്നപാദരായാണ് മത്സരിക്കുന്നത്. അത്തരം സാഹചര്യങ്ങളിൽ പിടിഎ മുൻകൈ എടുത്ത് ഷൂസുകൾ വാങ്ങി നൽകണം. ഇത്തരം നടപടികൾക്ക് ആവശ്യമായ മാർഗനിർദേശം ജില്ലാ വിദ്യാഭ്യാസ വകുപ്പിന്‍റെ ഭാഗത്ത് നിന്ന് ഉണ്ടാകണം.

കഴിഞ്ഞ ദിവസം സ്റ്റേഡിയത്തിൽ നടന്ന മട്ടന്നൂർ ഉപജില്ലാ കായികമേളയിൽ നഗ്നപാദരായി മത്സരിക്കാനെത്തിയ കുട്ടികൾക്ക് കാലിന് പൊള്ളലേറ്റ സാഹചര്യം ദയനീയമാണ്. ഇത്തരം കാര്യങ്ങൾ ആവർത്തിക്കാതിരിക്കാനുള്ള നടപടികൾ അത്യാവശ്യമാണെന്നും സ്പീക്കർ പറഞ്ഞു. തലശേരി മുനിസിപ്പൽ ചെയർപേഴ്സൺ കെ. ജമുനാറാണി അധ്യക്ഷത വഹിച്ചു. കണ്ണൂർ ഡിഡിഇ ഡി. ഷൈനി പതാക ഉയർത്തി. 15 ഉപജില്ലകളിൽ നിന്നും തലശേരി സായി സെന്‍റർ, കണ്ണൂർ സ്പോർട്സ് ഡിവിഷൻ എന്നിവിടങ്ങളിൽ നിന്നുമുള്ള 2600 കായിക താരങ്ങളാണ് ജില്ലാ കായികമേളയിൽ മാറ്റുരയ്ക്കുന്നത്. മൂന്നു ദിവസങ്ങളിലായി 98 ഇനങ്ങളിലാണ് മത്സരങ്ങൾ. ഉദ്ഘാടന ചടങ്ങിൽ ഹയര്‍സെക്കന്‍ഡറി ആര്‍ഡിഡി എ.കെ വിനോദ്കുമാർ, തലശേരി മുനിസിപ്പൽ സ്റ്റാൻഡിംഗ് കമ്മിറ്റി ചെയർപേഴ്സൺമാരായ ശബാന ഷാനവാസ്, ടി.കെ. സാഹിറ, റിസപ്ഷന്‍ കമ്മിറ്റി കണ്‍വീനര്‍ കെ. റസാഖ് എന്നിവർ പ്രസംഗിച്ചു. കായികാധ്യാപകരുടെ പ്രതിഷേധം

തലശേരി: നിസഹകരണ സമരത്തിന്‍റെ ഭാഗമായി കായികമേള ഗ്രൗണ്ടിൽ കായികാധ്യാപകരുടെ പ്രതിഷേധം. കായികാധ്യാപകരുടെ സംരക്ഷണ ഉത്തരവ് പുനഃസ്ഥാപിക്കുക, കായികമേള നടത്തിപ്പുമായി ബന്ധപ്പെട്ട് കായികാധ്യപകർക്ക് ലഭിക്കാനുള്ള കുടിശിക നൽകുക, തുടങ്ങിയ ആവശ്യങ്ങൾ ഉന്നയിച്ച് കായികാധ്യാപകർ നടത്തി വരുന്ന നിസഹകരണ സമരത്തിന്‍റെ ഭാഗമായാണ് പ്രതിഷേധിച്ചത്. കെപിഎസ്പിടിഎ സംസ്ഥാന സെക്രട്ടറി പി.പി. ഉദയകുമാര്‍ ഉദ്ഘാടനം ചെയ്തു. തിളങ്ങി ഇവാന തലശേരി: സ്വന്തം റിക്കാര്‍ഡ് തിരുത്തിയെഴുതി തലശേരി സായിയിലെ ഇവാന ടോമി തിളങ്ങി. ജൂണിയര്‍ പെണ്‍കുട്ടികളുടെ 400 മീറ്റര്‍ ഓട്ടത്തിലാണ് നേട്ടം. കഴിഞ്ഞവട്ടം 0.59 സെക്കന്‍റിനുള്ളില്‍ ഓടിയെത്തിയാണ് റിക്കാർഡിട്ടതെങ്കില്‍ ഇത്തവണ 0.57 സെക്കന്‍റിനുള്ളിലാണ് ഓടിത്തീര്‍ത്തത്. കഴിഞ്ഞ തവണ 100 മീറ്റിലും റിക്കാര്‍ഡ് ഇവാനയ്ക്കായിരുന്നു. 800 മീറ്ററില്‍ സ്വര്‍ണവും നേടി. തുടര്‍ന്നുള്ള ദിവസങ്ങളില്‍ 100, 200 മീറ്റര്‍ മത്സരങ്ങളില്‍ മത്സരിക്കും. പടിയൂര്‍ കല്യാട് തിരൂരിലെ നിരപ്പേല്‍ എന്‍.ടി. ടോമി - ബിന്ദു ഫ്രാന്‍സിസ് ദന്പതികളുടെ മകളാണ്. സഹോദരന്‍ ഐവിന്‍ ടോമി.

ഉളിക്കൽ പഞ്ചായത്ത് എൻജി. വിഭാഗത്തിൽ വിജിലൻസ് റെയ്ഡ്; വെട്ടിപ്പുകൾ വ്യാപകം

ഉളിക്കൽ: ഉളിക്കൽ പഞ്ചായത്ത് എൻജിനിയറിംഗ് വിഭാഗത്തിൽ വിജിലൻസ് നടത്തിയ പരിശോധനയിൽ ലക്ഷങ്ങളുടെ ക്രമക്കേട് കണ്ടെത്തി. കരാറുകാരിൽനിന്ന് ഗൂഗിൾപേ വഴിയും അല്ലാതെയും ലക്ഷക്കണക്കിന് രൂപ ഉദ്യോഗസ്ഥർ കൈപ്പറ്റിയതിന്‍റെ തെളിവ് വിജിലൻസിന് ലഭിച്ചു . നാലു കരാറുകാരുടെ അക്കൗണ്ടിൽനിന്ന് ഓവർസിയർ, താത്കാലിക ക്ലാർക്ക് എന്നിവരുടെ അക്കൗണ്ടിലേക്ക് ഗൂഗിൾപേ വഴി പണം അയച്ചതായും ഇവർ മറ്റു ജീവനക്കാരുടെ അക്കൗണ്ടുകളി ലേക്ക് തുക മാറ്റിയതായും കണ്ടെത്തി എന്നാണ് അന്വേഷണ ഉദ്യോഗസ്ഥൻ വെളിപ്പെടുത്തുന്നത്. ക്രമക്കേട് നടത്തിയ ഉദ്യോഗസ്ഥരുടെ ആറുമാസത്തെ ഗൂഗിൾ പേ കണക്കുകൾ പരിശോധിച്ചതി ലാണ് വൻ ക്രമക്കേടുകൾ കണ്ടെത്തിയത്. ഒരു കരാറുകാരൻ മാത്രം 1.50 ലക്ഷത്തിലധികം രൂപ ഗൂഗിൾ പേ വഴി കൈമാറിയിട്ടുണ്ടെന്നാണ് ലഭിക്കുന്ന വിവരം. കൂടുതൽ പരിശോധന നടത്തിയാൽ മാത്രമേ കൃത്യമായ കണക്ക് ലഭിക്കുകയുള്ളൂ. പരിശോധന വരും ദിവസങ്ങളിലും തുടരും. ആറു മാസത്തെ കണക്കുകൾ പരിശോധിച്ചതിലാണ് വലിയ ക്രമക്കേടുകൾ കണ്ടെത്തിയത്. ഓവർസിയർക്ക് എതിരേ ലഭിച്ച പരാതിയിലാണ് അന്വേഷണം നടത്തിയത്. കണ്ണൂർ കോർപറേഷൻ എടക്കാട് സോണൽ ഓഫീസ് എൻജിനിയറിംഗ് വിഭാഗത്തിലെ വനിതാ ജീവനക്കാരി ഇത്തരത്തിൽ കരാറുകാരിൽനിന്നും ഗൂഗിൾ പേ വഴി വലിയ തുക കൈപ്പറ്റിയത് വിജിലൻസ് കണ്ടെത്തിയിരുന്നു. ‌വളപട്ടണം റിട്ട. ഗ്രേഡ് എഎസ് ഐ ആയിരുന്ന വ്യക്തി മണൽ കടത്തുകാരിൽ നിന്നുൾപ്പെടെ വലിയ തുക കൈപ്പറ്റിയിരുന്നതായും വിജിലൻസ് കണ്ടെത്തി കേസ് എടുത്തിട്ടുണ്ട്. ഉദ്യോഗസ്ഥരുടെ ഗൂഗിൾ പേ അക്കൗണ്ടുകൾ കേന്ദ്രീകരിച്ചുള്ള തട്ടിപ്പ് കണ്ടെത്തിയതോടെ സംശയ നിഴലിലുള്ള വരെ കേന്ദ്രീകരിച്ചും വിജിലൻസ് അന്വേഷണം നടത്തുന്നുണ്ട്. ഉളിക്കലിൽ പ്രാഥമിക അന്വേഷണത്തിൽ തന്നെ ഉദ്യോഗസ്ഥർ രണ്ടുപേർ കുറ്റക്കാരാണെന്ന് തെളിഞ്ഞതോടെ കൂടുതൽ അന്വേഷണം നടത്തി ഇവർക്കെതിരേ അഴിമതി നിരോധന നിയമപ്രകാരം കേസ് രജിസ്റ്റർ ചെയ്യുമെന്നാണ് വിജിലൻസ് അധികൃതർ പറയുന്നത്. വിജിലൻസ് ഇൻസ്പെക്‌ടർ സി. ഷാജു, എഎസ്ഐ ശ്രീജിത്ത്, ഷിൻജു, സന്തോഷ്, ഗസറ്റഡ് ഓഫീസർ പയ്യന്നൂർ ബ്ലോക്ക് പഞ്ചായത്ത് എഇ അനിൽകുമാർ എന്നിവരുടെ നേതൃത്വത്തിലാണ് പരിശോധന നടത്തിയത്. ഉദ്യോഗസ്ഥരുടെ അഴിമതിയുമായി ബന്ധപ്പെട്ട പൊതുജനങ്ങളുടെ പരാതികൾ അറിയിക്കേണ്ട നമ്പർ : 0497 2707778 .

കൈത്തറി മേഖലയിൽ രണ്ടാഴ്ചക്കകം ടാസ്‌ക് ഫോഴ്‌സ് രൂപീകരിക്കും: മന്ത്രി പി. രാജീവ്

കണ്ണൂർ: കൈത്തറി മേഖലയിൽ ഉത്പാദനം മുതൽ വിപണനം വരെ ആധുനികവത്കരിക്കേണ്ടത് അനിവാര്യമണെന്നിരിക്കെ ഇതിനായി ഹാൻഡ്‌ലൂം ടാസ്ക് ഫോഴ്സ് രൂപീകരിക്കുമെന്ന് മന്ത്രി പി. രാജീവ്. കണ്ണൂരിൽ നടന്ന സംസ്ഥാന കൈത്തറി കോൺക്ലേവിലെ ചർച്ചകൾക്ക് ശേഷം സംസാരിക്കുകയായിരുന്നു മന്ത്രി. ഉത്പാദനം, ഡിസൈന്‍, ഫിനാൻസ്, മാര്‍ക്കറ്റിംഗ്, സാങ്കേതികവിദ്യ എന്നിങ്ങനെയുള്ള മേഖലകളിൽ കാലോചിതമായ മാറ്റങ്ങൾ വരുത്തുന്നതിന് ടാസ്ക് ഫോഴ്സ് നേതൃത്വം നൽകും. സഹകരണസംഘം തൊഴിലാളികള്‍ക്ക് എല്ലാ മാസവും സ്‌കൂള്‍ യൂണിഫോം തുണിയുടെ കൂലി ലഭിക്കുമെന്ന് ഉറപ്പുവരുത്താന്‍ റിവോള്‍വിംഗ് ഫണ്ട് ആരംഭിക്കുമെന്നും മന്ത്രി പറഞ്ഞു. പ്രീമിയം ഉത്പന്നങ്ങൾ നിർമിക്കാൻ സൗകര്യമുള്ള സഹകരണസംഘങ്ങളെ തെരഞ്ഞെടുത്ത് അവർക്ക് ആവശ്യമായ സാങ്കേതിക സാന്പത്തിക പിന്തുണ നൽകും.ഡിസൈന്‍ കാലോചിതമായി പരിഷ്‌കരിക്കുന്നതിന് വിദഗ്ധരുടെ സഹായം ഉറപ്പുവരുത്തും. കേരള കൈത്തറി ബ്രാന്‍ഡ് വിപുലപ്പെടുത്തുമെന്നും. ഭൗമസൂചിക ഉത്പന്നങ്ങളുടെ രജിസ്‌ട്രേഷന്‍ പൂര്‍ത്തീകരിക്കുമെന്നും മന്ത്രി പറഞ്ഞു. രാവിലെ നടന്ന കോൺക്ലേവിന്‍റെ ഉദ്ഘാടനം മ ന്ത്രി പി. രാജീവ് നിർവഹിച്ചു. കെ.വി. സുമേഷ് എംഎൽഎ അധ്യക്ഷത വഹിച്ചു. എംഎൽഎമാരായ കെ.കെ. ശൈലജ , എം. വിജിൻ, വ്യവസായ വകുപ്പ് പ്രിൻസിപ്പൽ സെക്രട്ടറി എ.പി.എം. മുഹമ്മദ് ഹനീഷ്, ഇൻഡസ്ട്രീസ് ആൻഡ് കയർ വികസന ഡയറക്ടർ ആനി ജൂല തോമസ്, കൈത്തറി വസ്ത്ര ഡയറക്ടർ ഡോ. കെ.എസ്. കൃപകുമാർ, സംഘാടകസമിതി ചെയർമാൻ ടി.കെ. ഗോവിന്ദൻ, പത്മശ്രീ ജേതാവ് പി. ഗോപിനാഥൻ, കൈത്തറി തൊഴിലാളി യൂനിയൻ നേതാക്കളായ അരക്കൻ ബാലൻ, താവം ബാലകൃഷ്ണൻ, യു.കെ ജലജ, ടി.വി സുധ പങ്കെടുത്തു. സമാപന സമ്മേളനം നിയമസഭാ സ്പീക്കര്‍ എ. എന്‍. ഷംസീര്‍ ഉദ്ഘാടനം ചെയ്തു.

കെസിവൈഎം "ചിറക് കർമപദ്ധതി' വിതരണോദ്ഘാടനം

മാടത്തിൽ: കെസിവൈഎം-എസ്എംവൈഎം തലശേരി അതിരൂപത സമിതിയുടെ 2025-26 വർഷത്തെ "ചിറക് കർമപദ്ധതി'യുടെ വിതരണോദ്ഘാടനവും ഓൺലൈൻ പതിപ്പിന്‍റെ പ്രകാശനവും മാടത്തിൽ സെന്‍റ് സെബാസ്റ്റ്യൻസ് ഇടവക ഓഡിറ്റോറിയത്തിൽ നടന്നു. ആർച്ച്ബിഷപ് എമരിറ്റസ് മാർ ജോർജ് ഞറളക്കാട്ട് കെസിവൈഎം അതിരൂപത പ്രസിഡന്‍റ് അബിൻ വടക്കേക്കരയ്ക്ക് കർമപദ്ധതി നൽകി ഉദ്ഘാടനം നിർവഹിച്ചു. അതിരൂപത ഡയറക്ടർ ഫാ.അഖിൽ മാത്യു മുക്കുഴി, അതിരൂപത ട്രഷറർ ബിബിൻ പീടിയേക്കൽ, കുന്നോത്ത് ഫൊറോന ഡയറക്ടർ ഫാ. ജിൽബർട്ട് കൊന്നയിൽ, ഫൊറോന പ്രസിഡന്‍റ് അമൽ എഴുവന്താനത്ത് എന്നിവർ പ്രസംഗിച്ചു. കർമപദ്ധതിയിൽ ഉൾപ്പെടുത്തിയിട്ടുള്ള ഇഡബ്ല്യുഎസ് ആനുകൂല്യങ്ങൾ, ന്യൂനപക്ഷ ക്ഷേമ വകുപ്പ് നൽകുന്ന ലോണുകൾ, സ്കോളർഷിപ്പുകൾ എന്നിവ സംബന്ധിച്ച വിവരങ്ങൾ കൂടുതൽ ആളുകളിലേക്ക് എത്തിക്കാനാണ് ഓൺലൈൻ പതിപ്പ് ലക്ഷ്യമിടുന്നതെന്ന് പ്രകാശനം നിർവഹിക്കവെ മാർ ജോർജ് ഞറളക്കാട്ട് പറഞ്ഞു.

ഓടുന്നതിനിടെ ഓമ്നി വാൻ കത്തിനശിച്ചു

കണ്ണൂർ: ഓടുന്നതിനിടെ തീപിടിച്ച ഓമ്നി വാൻ കത്തിനശിച്ചു. വാൻ ഓടിച്ചയാൾ അത്ഭുതകരമായി രക്ഷപ്പെട്ടു. ഇന്നലെ രാത്രി 8.30 ഓടെ എസ്എൻ പാർക്കിനടുത്താണ് സംഭവം. വാൻ പൂർണമായും കത്തി നശിച്ചു. സവോയ് ഹോട്ടലിനടുത്ത് റോഡരികിൽ നിർത്തിയിട്ട വാൻ മുന്നോട്ടെടുക്കുന്നതിനിടയിൽ തീ കണ്ടതിനെ തുടർന്ന് വാഹനം ഓടിച്ച പടന്നപ്പാലത്തെ ദേവദാസ് ഇറങ്ങിയോടുകയായിരുന്നു. നിമിഷങ്ങൾക്കുള്ളിൽ തീ ആളിപടരുകയായിരുന്നു. അഗ്നിരക്ഷാ സേന എത്തിയാണ് തീ അണച്ചത്. സമീപത്തെ മിൽമ ബൂത്തിലെ ജീവനക്കാരനായ ദേവദാസിന്‍റേതാണ് കത്തിനശിച്ച ഓമ്നി വാൻ. അഗ്നിശമന സേന യഥാസമയം എത്തി തീയണച്ചതിനാൽ സമീപത്ത് നിർത്തിയിട്ടിരുന്ന മറ്റ് വാഹനങ്ങൾക്ക് തീ പടരാതെ നിയന്ത്രിക്കാനായി. സീനിയർ ഫയർ റെസ്ക്യൂ ഓഫീസർ സിനോജ്, ഉദ്യോഗസ്ഥരായ രാജേഷ്, വിപിൻ ഉണ്ണികൃഷ്ണൻ, മിഥുൻ എസ് നായർ, ശ്രീജേഷ്, ഗിരീഷ് കുമാർ എന്നിവർ ചേർന്നാണ് തീയണച്ചത്.

മാനസികാരോഗ്യ ദിനാചരണം സംഘടിപ്പിച്ചു

കണ്ണൂർ: എംഎസ്എംഐ നവദർശൻ ഫാമിലി റിന്യൂവൽ ആൻഡ് സോഷ്യൽ വെൽഫെയർ സെന്‍ററിന്‍റെ ആഭിമുഖ്യത്തിൽ PsyNova 2K25' എന്ന പരിൽ അന്താരാഷ്‌‌ട്ര മാനസികാരോഗ്യ ദിനാചരണം സംഘടിപ്പിച്ചു. എംവിആർ ഗ്രൂപ്പ് ഓഫ് ഇൻസ്റ്റിറ്റ്യൂഷൻ ഡയറക്ടർ പ്രഫ. ഇ. കുഞ്ഞിരാമൻ ഉദ്ഘാടനം ചെയ്തു. കണ്ണൂർ, കാസർഗോഡ് ജില്ലകളിലെ വിവിധ കോളജുകളിൽ നിന്നുള്ള 70 വിദ്യാർഥികൾ ടാബ്ലോ, ഫേസ് പെയിന്‍റിംഗ്, റീൽ മേക്കിംഗ് തുടങ്ങിയ വിവിധ മത്സരങ്ങളിൽ പങ്കെടുത്തു. സെന്‍റർ ഡയറക്ടർ സിസ്റ്റർ ഡോ. ഡിവിന ജോസഫ് എംഎസ്എംഐ അധ്യക്ഷത വഹിച്ചു. തലശേരി അതിരൂപത വൈസ് ചാൻസലർ ഫാ. ജോസഫ് റാത്തപ്പള്ളിൽ മുഖ്യപ്രഭാഷണം നടത്തി. കണ്ണൂർ ദീപിക റസിഡന്‍റ് മാനേജർ ഫാ. ജോബിൻ വലിയപറമ്പിൽ, ഗെയിൽ ഡപ്യൂട്ടി മാനേജർ ജോർജ് ആന്‍റണി, സിസ്റ്റർ ജസ്ന വർഗീസ് എംഎസ്എംഐ, സിസ്റ്റർ ആൻ മരിയ എംഎസ്എംഐ എന്നിവർ പ്രസംഗിച്ചു. എംഎസ്എംഐ സാൻ ജോർജിയ സ്പെഷൽ സ്കൂളിലെ കുട്ടികളുടെ സംഘനൃത്തവും ഉണ്ടായിരുന്നു. വിവിധ മത്സരങ്ങളിലെ വിജയികൾ ചുവടെ. ഒന്ന്, രണ്ട്, മൂന്ന് സ്ഥാനങ്ങൾ നേടിയവർ യഥാക്രമം : ടാബ്ലോ: കനോസ കോളജ് ഓഫ് നഴ്സിംഗ് (ചെറുകുന്ന്), ഗോൾഡൻ ക്രോസ് കോളജ് ഓഫ് ഡിസൈൻ (കണ്ണൂർ), പീപ്പിൾസ് കോ-ഓപ്പറേറ്റീവ് ആർട്സ് ആൻഡ് സയൻസ് കോളജ് (മുന്നാട്). ഫേസ് പെയിന്‍റിംഗ് : വിറാസ് കോളജ് (പിലാത്തറ), ഗോൾഡൻ ക്രോസ് കോളജ് ഓഫ് ഡിസൈൻ (കണ്ണൂർ), കെഎംഎംജിഡബ്ല്യു കോളജ് (കണ്ണൂർ) .

സിഐടിയു റെയിൽവേ സ്റ്റേഷൻ മാർച്ച് നടത്തി

കണ്ണൂർ: കണ്ണൂർ, കാസർഗോഡ് ജില്ലകളിലെ ഇഎസ്ഐ അംഗങ്ങളും കുടുംബങ്ങളും ആശ്രയിക്കുന്ന തോട്ടട ഇഎസ്ഐ ആശുപത്രി സൂപ്പർ സെപ്ഷാലിറ്റിയാക്കി ഉയർത്തുക, ഇഎസ്ഐ ഡിസ്പെൻസറികളിൽ ആവശ്യമായ ഡോക്ടർമാരെയും ജീവനക്കാരെയും നിയമിക്കു, ആവശ്യത്തിനുള്ള മരുന്നുകൾ ലഭ്യമാക്കുക തുടങ്ങിയ ആവശ്യങ്ങൾ ഉന്നയിച്ച് സിഐടിയുവിന്‍റെ നേതൃത്വത്തിൽ കണ്ണൂർ റെയിൽവേ സ്റ്റേഷന്‍ മാർച്ച് നടത്തി. സിഐടിയു സംസ്ഥാന സെക്രട്ടറി കെ.പി. സഹദേവൻ ഉദ്ഘാടനം ചെയ്തു. ജില്ലാ പ്രസിഡന്‍റ് സി. കൃഷ്ണൻ അധ്യക്ഷത വഹിച്ചു. ഇഎസ്ഐ അംഗങ്ങൾക്ക് എംപാനൽഡ് ആശുപത്രികളിലെ ചികിത്സക്ക് മാർക്കറ്റ് റേറ്റിൽ തുക നൽകികൊണ്ട് ചികിത്സ സൗകര്യം മെച്ചപ്പെടുത്തുക, മരുന്ന് വിതരണത്തിൽ നേരിടുന്ന കാലതാമസം പരിഹരിക്കുക, ഇഎസ്ഐ വരുമാന പരിധി 40000 രൂപയാക്കി ഉയർത്തുക എന്നീ ആവശ്യങ്ങളും സിഐടിയു ഉന്നയിച്ചു. ജില്ലാ ജനറൽ സെക്രട്ടറി കെ. മനോഹരൻ, സെക്രട്ടറി കെ. അശോകൻ, എൻ.വി. ചന്ദ്രബാബു, കെ. കരുണാകരൻ, കെ.കെ. നാരായണൻ, ഇ. സുർജിത്ത്കുമാർ, അരക്കൻ ബാലൻ, എം.സി. ഹരിദാസൻ, ടി. ശശി, കെ.പി. രാജൻ, ടി.പി. ശ്രീധരൻ, വൈ.വൈ. മത്തായി, എസ്.ടി. ജയ്‌സൺ, കെ. ധനഞ്ജയൻ, കെ. സത്യഭാമ, എന്നിവർ പ്രസംഗിച്ചു.

രണ്ടു കിലോ കഞ്ചാവുമായി യുവാക്കൾ അറസ്റ്റിൽ

പേരാവൂർ: പേരാവൂരിൽ രണ്ടു കിലോ കഞ്ചാവുമായി യുവാക്കൾ അറസ്റ്റിൽ. പേര്യയിലെ ചമ്മനാട്ട് അബിൻ തോമസ് (28), കണിച്ചാർ മലയാംപടിയിലെ പുഞ്ചക്കുന്നേൽ അലൻ മനോജ് (22) എന്നിവരെ പേരാവൂർ എസ്എച്ച്‌ഒ പി.ബി. സജീവിന്‍റെ നേതൃത്വത്തിലുള്ള പോലീസും ഡാൻസാഫ് സംഘവും ചേർന്നാണ് അറസ്റ്റു ചെയ്തത്. ഇവരിൽ നിന്ന് 1.927 കിലോ കഞ്ചാവ് കണ്ടെത്തു. ഇവർ സഞ്ചരിച്ച പൾസർ ബൈക്കും കസ്റ്റഡിയിലെടുത്തു. എസ്ഐ അബ്ദുൾ നാസർ, എസ്ഐ ജോമോൻ, സത്യൻ, ഷമീർ എന്നിവരും പിടികൂടിയ സംഘത്തിലുണ്ടായിരുന്നു. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.

മാട്ടൂലിൽ വീട് കുത്തിത്തുറന്ന് സ്വർണവും പണവും കവർന്ന കേസിൽ അന്വേഷണം ഊർജിതം

പഴയങ്ങാടി: മാട്ടൂലിൽ 22 പവനും ആറുലക്ഷം രൂപയും കവർന്ന കേസിൽ പോലീസ് അന്വേഷണം ഊർജിതമാക്കി. പഴയങ്ങാടി ഇൻസ്പെക്ടർ എൻ.കെ. സത്യനാഥന്‍റെ നേതൃത്തിലുള്ള അന്വേഷണ സംഘം, ഫോറൻസിംഗ് വിഭാഗം, ഡോഗ് സ്കോഡ് എന്നിവർ സംഭവം നടന്ന വിടും പരിസരവും വിശദമായി പരിശോധിച്ചു. സ്ട്രീറ്റ് നമ്പർ 23 ൽ മാട്ടൂൽ ഗവ. ഹയർ സെക്കൻഡറി സ്കൂളിന് സമീപത്തെ സി.എം.കെ ഹഫ്സത്തിന്‍റെ വീട്ടിൽ ബുധനാഴ്ച വൈകുന്നേരമായിരുന്നു മോഷണം. മോഷ്ടാക്കൾ താക്കോൽ എടുത്ത് അലമാര തുറന്ന് മോഷണം നടത്തിയ ശേഷം പഴയപടി പൂട്ടുകയായിരിക്കാമെന്നാണ് പോലീസിന്‍റെ പ്രാഥമീക നിഗമനം. കാലങ്ങളായി സ്വരുക്കൂട്ടിയ സ്വർണവും സ്ഥലം വില്പന നടത്തിയതിലൂടെ ലഭിച്ച പണവുമാണ് നഷ്ടപ്പെട്ടത്. പയ്യന്നൂർ ഡിവൈഎസ്പി കെ. വിനോദ് കുമാർ മോഷണം നടന്ന വീട് പരിശോധിച്ചു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]