മാർപാപ്പ അനുസ്മരണവും കരിന്തോട്ടുവാ സെന്‍റ് മേരീസ് പള്ളി മൂറോൻ കൂദാശയും : Deepika.com Nattu Visesham

ഓട്ടോയും കാറും കൂട്ടിയിടിച്ച്; ചികിത്സയിലായിരുന്ന ഓട്ടോ ഡ്രൈവർ മരിച്ചു

കോവളം : വാഴമുട്ടം ജംഗ്ഷനിൽ ഓട്ടോയും കാറും തമ്മിൽ കൂട്ടിയിടിച്ചുണ്ടായ അപകടത്തിൽ ഗുരുതര പരിക്കേറ്റ് ചികിത്സയിലായിരുന്ന ഓട്ടോ ഡ്രൈവർ മരിച്ചു. കോവളം കെഎസ് റോഡ് ഷൈല മൻസിൽ ചെറികോണത്തു മേലെവീട്ടിൽ സെയ്യദ് (55) ആണ് ഇന്നലെ രാവിലെ 11 ഓടെ മരിച്ചത്. കഴിഞ്ഞദിവസം രാത്രി ഒന്പതോടെയായിരുന്നു അപകടം. നാഗർകോവിലിൽ നിന്നും തിരുവനന്തപുരം എയർപോർട്ടിലേക്ക് പോകുകയായിരുന്ന കാറും പനത്തുറ ഭാഗത്തെ സർവീസ് റോഡിലൂടെ ബൈപ്പാസിലേക്ക് കയറുകയായിരുന്ന ഓട്ടോറിക്ഷയും തമ്മിൽ കൂട്ടിയിടിച്ചായിരുന്നു അപകടം. ഓട്ടോയിൽ ഒപ്പം ഉണ്ടായിരുന്ന ബന്ധു തിരുവനന്തപുരം മെഡിക്കൽ കോളജ് ആശുപത്രിയിൽ ചികിത്സയിലാണ്. സെയ്യദിന്‍റെ മൃതദേഹം ഇന്ന് പോസ്റ്റ്മോർട്ടത്തിന് ശേഷം ബന്ധുക്കൾക്ക് വിട്ടുകൊടുക്കുമെന്ന് തിരുവല്ലം പോലീസ് അറിയിച്ചു. ഭാര്യ : ലൈല, മക്കൾ: സിയാദ്, ഷംനാദ്, സജാദ്.

ആൾ താമസമില്ലാത്ത വീട്ടിൽ യുവാവ് മരിച്ച നിലയിൽ

വെഞ്ഞാറമൂട്: യുവാവിനെ ആൾ താമസമില്ലാത്ത വീട്ടിൽ മരിച്ച നിലയിൽ കണ്ടെത്തി. മുരൂർക്കോണം കാവുവിള വീട്ടിൽ ചെല്ലപ്പൻ-സരള ദമ്പതികളുടെ മകൻ ജയൻ (46) നെ നെല്ലനാട് വില്ലേജ് ഓഫീസിന് സമീപത്തെ ആൾതാമസമില്ലാത്ത വീട്ടിൽ മരിച്ച നിലയിൽ കാണപ്പെട്ടത്. മൃതദേഹത്തിന് അഞ്ചു ദിവസത്തെ പഴക്കമുണ്ട്. നാട്ടുകാർ വിവരം അറിയിച്ചതിനെ തുടർന്ന് വെഞ്ഞാറമൂട് പോലീസ് സ്ഥലത്തെത്തി ഇൻക്വസ്റ്റ് നടപടികൾ പൂർത്തിയാക്കി മൃതദ്ദേഹം തിരുവനന്തപുരം മെഡിക്കൽ കോളജ് മോർച്ചറിയിലേയ്ക്ക് മാറ്റി. കഴിഞ്ഞ കുറച്ച് ദിവസമായി ജയനെ കാണാനില്ലായിരുന്നെന്നാണ് ബന്ധുക്കൾ പറയുന്നത്. വെഞ്ഞാറമൂട്ടിലെ ഓഡിറ്റോറിയത്തിൽ ജോലിക്ക് പോയിട്ട് അവിടെ തന്നെ തങ്ങുമായിരുന്നു ജയൻ. ഈ കാരണത്താലാകും അന്വോഷണം നടത്താതിരുന്നത്. ഇന്ന് 12 മണിയോടെ പഞ്ചായത്തുമെമ്പർ സുജയുടെ നേതൃത്വത്തിൽ സംസ്കാര ചടങ്ങുകൾ നടത്തി. ഇയാൾ അവിവാഹിതനാണ്. ജയശ്രീ, കുമാർ എന്നിവർ സഹോദരങ്ങളാണ്.

രോഗി ആശുപത്രിയിൽ തൂങ്ങിമരിച്ച നിലയിൽ

മെഡിക്കല്‍കോളജ്: സ്വകാര്യാശുപത്രിയില്‍ ചികിത്സയിലായിരുന്ന രോഗിയെ തൂങ്ങിമരിച്ച നിലയില്‍ കണ്ടെത്തി. മലയിന്‍കീഴ് ഗോവിന്ദമംഗലം സ്വദേശി രാജേന്ദ്രകുമാര്‍ (60) ആണ് മരിച്ചത്. കഴിഞ്ഞദിവസം പുലര്‍ച്ചെയാണ് സംഭവം. ആശുപത്രിയില്‍ ഇയാള്‍ കഴിഞ്ഞുവന്ന വാര്‍ഡിലെ ജനാലക്കമ്പിയില്‍ ഉടുത്തിരുന്ന ലുങ്കി കെട്ടിയശേഷം തൂങ്ങിയ നിലയില്‍ കണ്ടെത്തുകയായിരുന്നു. ആശുപത്രി അധികൃതര്‍ ഇയാൾക്ക് ഉടന്‍തന്നെ വിദഗ്ധ ചികിത്സ നല്‍കിയെങ്കിലും ജീവൻരക്ഷിക്കാനായില്ല. ഇടതുകാലിനുണ്ടായ ഗുരുതരമായ പരിക്കിന് ഓപ്പറേഷന്‍ നടത്തുന്നതിനുവേണ്ടിയാണ് രാജേന്ദ്രകുമാറിനെ കുറച്ചുദിവസം മുമ്പ് ആശുപത്രിയില്‍ പ്രവേശിപ്പിച്ചത്. സഹിക്കാനാകാത്ത വേദനമൂലമാണ് രാജേന്ദ്രകുമാര്‍ ആത്മഹ്യചെയ്തതെന്നാണു പ്രാഥമിക നിഗമനം. മൃതദേഹം തിരുവനന്തപുരം മെഡിക്കല്‍കോളജ് ആശുപത്രിയില്‍ പോസ്റ്റുമോര്‍ട്ടം നടത്തി.

യുവാവ് വീടിനുള്ളിൽ തൂങ്ങിമരിച്ചനിലയിൽ

പൂവാർ : യുവാവിനെ വീടിനുള്ളിൽ തൂങ്ങിമരിച്ചനിലയിൽ കണ്ടെത്തി. തിരുപുറം കാലുംമുഖം വലിയതോപ്പ് മേക്കരുകത്ത് പുത്തൻവീട്ടിൽ ബർണാസിന്‍റെ മകൻ അഖിൽ (30) ആണ് മരിച്ചത്. സ്വകാര്യ ക്ലിനിക്കിലെ ഡയാലിസിസ് ടെക്നീഷ്യനാണ്. എട്ടുമാസം മുൻപായിരുന്നു അഖിലിന്‍റെ വിവാഹം നടന്നത്. ഭാര്യയുമായുള്ള പിണക്കമാണ് ആത്മഹത്യക്ക് കാരണമെന്ന് വീട്ടുകാർ മൊഴി നൽകിയതായി പൂവാർ പോലീസ് അറിയിച്ചു. അരുൺ സഹോദരനാണ്.

സിപിഎമ്മിനെയും കോണ്‍ഗ്രസിനെയും വിമര്‍ശിച്ച് ബിജെപി സംസ്ഥാന അധ്യക്ഷന്‍

തിരുവനന്തപുരം: സിപിഎമ്മിനെയും കോണ്‍ഗ്രസിനെയും വിമര്‍ശിച്ച് ബിജെപി സംസ്ഥാന അധ്യക്ഷന്‍ രാജീവ് ചന്ദ്രശേഖര്‍. നിരപരാധികളായ വിനോദ സഞ്ചാരികളെ ക്രൂരമായി കൊലപ്പെടുത്തിയ പാക് ഭീകരരെപ്പറ്റി പറയുമ്പോള്‍ എന്തിനാണ് എം.എ. ബേബിയും വി.ഡി. സതീശനും അസ്വസ്ഥരാവുന്നതെന്ന് രാജീവ് ചന്ദ്രശേഖര്‍ ചോദിച്ചു. പെഹല്‍ഗാമിലെ ഭീകരാക്രമണത്തില്‍ സുരക്ഷാ വീഴ്ച ഉണ്ടായെന്ന് എല്ലാവരും കാണുന്നതല്ലേയെന്ന് രാജീവ് ചന്ദ്രശേഖര്‍ മാധ്യമപ്രവര്‍ത്തകരുടെ ചോദ്യത്തിനു മറുപടിയായി പറഞ്ഞു. പാക്കിസ്ഥാനു വേണ്ടി എന്തിന് സിപിഎം, കോണ്‍ഗ്രസ് നേതാക്കള്‍ നിലപാടെടുക്കുന്നു? തീവ്രവാദി ആക്രമണത്തെ ഒറ്റക്കെട്ടായി അപലപിക്കുകയാണ് വേണ്ടത്. വി.ഡി. സതീശനും ബേബിയും ഒന്നും സുരക്ഷാ വിദഗ്ധരാകേണ്ടെന്നും രാജീവ് ചന്ദ്രശേഖര്‍ വിമര്‍ശിച്ചു.

പൊന്നമ്മ ഡിസി അന്തരിച്ചു

കോട്ടയം: എഴുത്തുകാരനും പ്രസാധകനുമായിരുന്ന ഡിസി കിഴക്കേമുറിയുടെ ഭാര്യ പൊന്നമ്മ ഡിസി (90) അന്തരിച്ചു. സംസ്‌കാരം 27ന് ഉച്ചകഴിഞ്ഞ് രണ്ടിനു വസതിയിലെ ശുശ്രൂഷയ്ക്കുശേഷം മൂന്നിനു കോട്ടയം ലൂര്‍ദ് ഫൊറോന പള്ളിയില്‍. മൃതദേഹം 26നു രാവിലെ 10 മുതല്‍ ദേവലോകത്തുള്ള വസതിയില്‍ പൊതുദര്‍ശനത്തിനു വയ്ക്കും. പൊന്നമ്മ രണ്ടു പതിറ്റാണ്ട് ഡിസി ബുക്‌സ് പ്രവര്‍ത്തനങ്ങള്‍ക്ക് സാരഥ്യം വഹിച്ചിരുന്നു. തിരുവല്ല ബാലികാമഠം സ്‌കൂളിലെ അധ്യാപികയായിരുന്നു. 1974ല്‍ ഡിസി ബുക്‌സ് ആരംഭിച്ചപ്പോള്‍ നേതൃത്വപരമായ പങ്കാളിത്തം വഹിച്ചത് പൊന്നമ്മ ഡിസിയായിരുന്നു. ഡിസി ബുക്‌സിന്‍റെ മാനേജിംഗ് പാര്‍ട്ണറാണ്. തകഴി, ബഷീര്‍, സി.ജെ. തോമസ് തുടങ്ങിയവരുമായി അടുത്ത സൗഹൃദം സൂക്ഷിച്ചിരുന്ന പൊന്നമ്മ ഡിസി സാമൂഹിക സാംസ്‌കാരിക രംഗത്ത് സജീവമായിരുന്നു. ഡിസി കിഴക്കേമുറിക്ക് ലഭിച്ച മരണാനന്തര പത്മഭൂഷന്‍ രാഷ്ട്രപതി കെ.ആര്‍. നാരായണനില്‍നിന്ന് ഏറ്റുവാങ്ങിയത് പൊന്നമ്മയായിരുന്നു. ചെങ്ങന്നൂര്‍ കടക്കേത്തുപറമ്പില്‍ പി.വി. ഐസക്കിന്‍റെയും റേച്ചലിന്‍റെയും ഇളയപുത്രിയായി 1934 ഡിസംബര്‍ മൂന്നിനായിരുന്നു ജനനം. മക്കള്‍: താര, മീര, രവി ഡിസി (ഡിസി ബുക്‌സ്). മരുമക്കള്‍: ജോസഫ് സത്യദാസ് (സിംഗപ്പുര്‍ സ്‌ട്രെയ്റ്റ് ടൈംസ് സീനിയര്‍ എഡിറ്റര്‍), അനില്‍ വര്‍ഗീസ് (ബിസിനസ്), രതീമ (എക്‌സിക്യുട്ടീവ് ഡയറക്ടര്‍, ഡിസി ബുക്‌സ്).

കൊച്ചുതുറയിൽ റോഡ് ഉപരോധിച്ചു : പുറന്പോക്ക് ഭൂമി നികത്താനൊരുങ്ങി പഞ്ചായത്ത് അധികൃതർ; തടഞ്ഞ് നാട്ടുകാർ

വിഴിഞ്ഞം: പഞ്ചായത്ത് പുറംമ്പോക്ക് ഭൂമിയിൽ മണ്ണിട്ട് നികത്തി വെള്ളക്കെട്ട് ഒഴിവാക്കാൻ അധികൃതർ. സ്വകാര്യ ഭൂമിയാണെന്ന് അവകാശപ്പെട്ട് എത്തിയ നാട്ടുകാർ പണി തടസപ്പെടുത്താൻ ശ്രമിച്ചു. മണ്ണിടൽ തുടർന്നതിൽ പ്രതിഷേധിച്ച് ഒരു വിഭാഗം നാട്ടുകാർ റോഡ് ഉപരോധവുമായി രംഗത്ത് എത്തി. കരിംകുളം കൊച്ചുപള്ളിക്ക് സമീപത്തെ ഒന്നര ഏക്കറോളം വരുന്ന സർക്കാർ ഭൂമിയിലെ മണ്ണിടലാണ് തർക്കത്തിനു വഴിതെളിയിച്ചത്. കാടും പടലുംപിടിച്ച ഭൂമിയിലെ വെള്ളക്കെട്ടിനെതിരെ നേരത്തെ വ്യാപക പരാതി ഉയർന്നിരുന്നതായി പഞ്ചായത്ത് അധികൃതർ പറയുന്നു. പരിഹാരമായി ഭൂമിയുടെ നവീകരണത്തിനും വെള്ളക്കെട്ട് ഒഴിവാക്കുന്നതിനും ലക്ഷ്യംവച്ചു രണ്ടു പ്രാവശ്യമായി 20 ലക്ഷം രൂപയുടെ ഫണ്ടും വകയിരുത്തി. എന്നാൽ ജില്ലാ കളക്ടറുടെ അനുമതിയോടെ പഞ്ചായത്തധികൃതർ പണി നടത്താനുള്ള ശ്രമം ആരംഭിച്ചതോടെ തടസവാദങ്ങളുമായി നാട്ടുകാരിൽ ഒരുവിഭാഗം രംഗത്തെത്തുകയായിരുന്നു. ഹൈക്കോടതിയിൽനിന്നു പോലീസ് സംരക്ഷണ അനുമതി വാങ്ങിയ അധികൃതർ ഇന്നലെ കാടു വെട്ടിത്തെളിച്ചു വെള്ളകെട്ട് ഒഴിവാക്കാനുള്ള നടപടി ആരംഭിച്ചു. ഇതിനിടയിൽ മണ്ണുമായെത്തിയ ലോറികളെ പ്രതിഷേധക്കാർ തടയുക യായിരുന്നു. എന്നാൽ പോലീസിന്‍റെ സംരക്ഷണയിൽ മണ്ണിടൽ തുടർന്നതിൽ പ്രതിഷേധിച്ച് നാട്ടുകാർ വിഴിഞ്ഞം-കളിയിക്കാവിള തീരദേശറോഡ് ഉപരോധിച്ചു. ബഞ്ചുകളും മറ്റും നിരത്തി സ്ത്രീകൾ ഉൾപ്പെടെയുള്ളവർ റോഡ് ഉപരോധിച്ചതോടെ ഇതുവഴിയുള്ള ഗതാഗതം മണിക്കൂറുകളോളം സ്തംഭിച്ചു. രാവിലെ തുടങ്ങിയ ഉപരോധം ഉച്ചകഴിഞ്ഞും തുടർന്നു. ഒടുവിൽ ജനപ്രതിനിധികളും ഇടവകാധികാരും തമ്മിൽ നടന്ന ചർച്ചക്കൊടുവിൽ ഉപരോധം അവസാനിച്ചു. കാഞ്ഞിരംകുളം പോലീസ് കണ്ടാലറിയാവുന്ന നിരവധി പേർക്കെതിരെ റോഡ് ഉപരോധത്തിന് കേസെടുത്തു. നാട്ടുകാരുടെ ആരോഗ്യപ്രശ്നത്തിനു വരെ വഴിതെളിച്ച വെള്ളക്കെട്ട് ഒഴിവാക്കുന്നതിനുള്ള നടപടിയുമായി മുന്നോട്ട് പോകുമെന്നു പഞ്ചായത്ത് പ്രസിഡന്‍റ് ഫ്രീഡ സൈമൺ അറിയിച്ചു.

കവര്‍ച്ച; വീട്ടുജോലിക്കാരി പിടിയില്‍

മെഡിക്കല്‍കോളജ്: സ്വര്‍ണാഭരണവും മൊബൈല്‍ഫോണും കവര്‍ച്ച നടത്തിയ സംഭവത്തില്‍ വീട്ടുജോലിക്കാരിയെ മെഡിക്കല്‍കോളജ് പോലീസ് പിടികൂടി. മണ്ണൂര്‍ക്കര കുറ്റിച്ചല്‍ പേങ്ങാട് അയണിമൂട് വീട്ടില്‍ ജലജ (54) ആണ് പിടിയിലായത്. ബുധനാഴ്ച പുലര്‍ച്ചെയായിരുന്നു സംഭവം. സ്റ്റേഷന്‍ പരിധിയില്‍ ദേവസ്വം ലെയിനിലെ ഒരു വീട്ടില്‍ താമസിച്ചുവരുന്ന 95 വയസുള്ള വയോധികയുടെ ഒരുപവന്‍ മാലയും വീട്ടില്‍ സൂക്ഷിച്ചിരുന്ന മൊബൈല്‍ ഫോണുമാണ് നഷ്ടമായത്. സ്വര്‍ണമാല കാണാതായതോടെ വയോധികയാണ് മെഡിക്കല്‍കോളജ് സ്റ്റേഷനില്‍ പരാതി നല്‍കിയത്. ജലജയാണ് കവര്‍ച്ച നടത്തിയതെന്നു വ്യക്തമായതോടെ ഇവരെ വീട്ടില്‍നിന്നുതന്നെ പോലീസ് കസ്റ്റഡിയിലെടുക്കുകയായിരുന്നു. തൊണ്ടിമുതല്‍ കണ്ടെടുക്കാനുള്ള ശ്രമം പോലീസ് ആരംഭിച്ചിട്ടുണ്ട്. അറസ്റ്റിലായ പ്രതിയെ കോടതിയില്‍ ഹാജരാക്കി റിമാന്‍ഡ് ചെയ്തു.

ആശാ സമരം 74 ദിനം പിന്നിട്ടു

തിരുവനന്തപുരം: സെക്രട്ടേറിയറ്റ് പടിക്കൽ നടക്കുന്ന ആശാ സമരം 74 ദിനം പിന്നിട്ടു. ഇന്നലെയും സമൂഹത്തിന്‍റെ നാനാ തുറകളിൽ നിന്നുള്ള നിരവധിപ്പേർ സമരത്തിന് പിന്തുണ പ്രഖ്യാപിച്ച് സമരപ്പന്തലിലെത്തി. ഇന്നലെ സമരത്തിന് അഭിവാദ്യം അർപ്പിച്ചുകൊണ്ട് യൂത്ത് ലീഗ് സംസ്ഥാന ജനറൽ സെക്രട്ടറി പി. കെ ഫിറോസ്, കേരള വനവാസി വികാസ കേന്ദ്രം നേതാവ് ഷിബു പാണത്തൂർ, കോണ്‍ഗ്രസ് നേതാവ് എം. ആർ. ജയപ്രസാദ് തുടങ്ങി വിവിധ സംഘടനാ നേതാക്കളും വ്യക്തികളും സമരവേദിയിൽ എത്തി. സമരപ്പന്തലിലെ നിരാഹാര സമരം 36 ദിവസം പിന്നിട്ടു.

തൊഴിലുറപ്പ് തൊഴിലാളികള്‍ പെരുങ്കടവിള പഞ്ചായത്ത് ഓഫീസ് വളഞ്ഞു

വെള്ളറട: പെരുങ്കടവിള പഞ്ചായത്ത് തൊഴിലുറപ്പ് പദ്ധതി നടത്തിപ്പിലെ അശാസ്ത്രീയമായ നടപടികള്‍ പിന്‍വലിക്കണമെന്നാവശ്യപ്പെട്ടു തൊഴിലുറപ്പ് തൊഴിലാളികള്‍ പഞ്ചായത്ത് ഓഫീസ് വളഞ്ഞു. വര്‍ക്ക്കോഡ് എന്ന പേരില്‍ ജിയോ ടാഗ് ഫോട്ടോ എടുക്കല്‍ അവസാനിപ്പിക്കുക, തൊഴില്‍ ദിനം 200 ആക്കി വര്‍ധിപ്പിക്കുക, വേതനം 500 ആക്കി വര്‍ധിപ്പിക്കുക, തൊഴിലുറപ്പ് തൊഴിലാളികള്‍ക്ക് പെന്‍ഷന്‍ അനുവദിക്കുക, സൗജ്യന്യ ചികിത്സയും- ആരോഗ്യ സുരക്ഷയും അനുവദിക്കുക തുടങ്ങിയ നിരവധി ആവശ്യങ്ങള്‍ ഉന്നയിച്ചു നടത്തിയ സമരം പെരുങ്കടവിള പഞ്ചായത്ത് ഓഫീസ് വളയല്‍ സമരം കര്‍ഷക കോണ്‍ഗ്രസ് സംസ്ഥാന വൈസ് പ്രസിഡന്‍റ് എം.എസ്. അനില്‍ ഉദ്ഘാടനം ചെയ്തു. വടകര വാര്‍ഡ് മെമ്പര്‍ മഞ്ജുഷാ ജയന്‍ അധ്യക്ഷത വഹിച്ചു. തത്തിയൂര്‍ വാര്‍ഡ് മെമ്പര്‍ കാക്കണം മധു, സ്വാഗത സംഘം ചെയര്‍മാന്‍ വടകര ജയന്‍, ആരാമം മധുസുദനന്‍ നായര്‍, അരുവിപുറം സദനന്ദന്‍, എന്നിവര്‍ നേതൃത്വം നല്‍കി. പെരുങ്കടവിള വില്ലേജ് ഓഫീസില്‍നിന്നും ആരംഭിച്ച പ്രകടനം പഞ്ചായത്ത് ഓഫീസില്‍ എത്തിച്ചേര്‍ന്നു. 500ല്‍ അതികം തൊഴിലുറപ്പ് തൊഴിലാളികള്‍ പങ്കെടുത്തു.

സാമൂഹ്യ പ്രതിബദ്ധതയുള്ള പൊതുപ്രവർത്തകർ നാടിനുമാതൃക: ജി.ആർ. അനിൽ

നെടുമങ്ങാട്: സാമൂഹ്യ പ്രതിബദ്ധതയോടെ പ്രവർത്തിക്കുന്ന പൊതു പ്രവർത്തകർ നാടിനു മാതൃകയെന്നു മന്ത്രി ജി.ആർ.അനിൽ. ജില്ലയിലെ മികച്ച ഗ്രാമ പഞ്ചായത്തിനുള്ള സ്വരാജ് ട്രോഫി ലഭിച്ച ആര്യനാട് പഞ്ചായത്തിനും കുടുംബശ്രീ സിഡിഎസിനും ആര്യനാട് വി.കെ ഓഡിറ്റോറിയത്തിൽ നൽകിയ പൗരസ്വീകരണം ഉദ്ഘാടനം ചെയ്യുകയായിരുന്നു മന്ത്രി. ജി.സ്റ്റീഫൻ എംഎൽഎ അധ്യക്ഷത വഹിച്ചു. പഞ്ചായത്ത് ഭരണ സമിതിക്കുവേണ്ടി പ്രസിഡന്‍റ് വി.വിജുമോഹനും ജീവനക്കാർക്കുവേണ്ടി സെക്രട്ടറി ജി. സുനൽകുമാറും കുടുംബശ്രീക്ക് വേണ്ടി സിഡിഎസ് ഭാരവാഹികളും ആദരവ് ഏറ്റുവാങ്ങി. ജില്ലാ പഞ്ചായത്തംഗം എ. മിനി, ബ്ലോക്ക്അംഗങ്ങളായ കെ. ഹരിസുധൻ, വി. രമേശൻ, സംഘാടക സമിതി ചെയർമാൻ കെ. സുനിൽകുമാർ, ജനറൽ കൺവീനർ വി.എസ്. ദിലീപ് കുമാർ എന്നിവർ സംസാരിച്ചു.

കായികവകുപ്പിന്‍റെ നേതൃത്വത്തിൽ മേയ് അഞ്ചു മുതൽ ലഹരിവിരുദ്ധ സന്ദേശ യാത്ര

തിരുവനന്തപുരം: കായിക വകുപ്പിന്‍റെ നേതൃത്വത്തിൽ മേയ് അഞ്ചുമുതൽ ലഹരി വിരുദ്ധ സന്ദേശ യാത്ര നടത്തും. കായികമന്ത്രി വി.അബ്ദുറഹ്മാൻ നയിക്കുന്ന ജാഥ മേയ് അഞ്ചിന് കാസർഗോഡ് മുഖ്യമന്ത്രി പിണറായി വിജയൻ ഫ്ളാഗ് ഓഫ് ചെയ്യും. രണ്ട് ഘട്ടമായാണ് ജാഥ ക്രമീകരിച്ചിരിക്കുന്നത്. ആദ്യ ഘട്ടത്തിൽ കാസർഗോഡ്, കണ്ണൂർ, വയനാട്, കോഴിക്കോട്, പാലക്കാട്, മലപ്പുറം ജില്ലകൾ കടന്ന് മേയ് 12ന് തൃശൂരിൽ സമാപിക്കും. മേയ് 14ന് തിരുവനന്തപുരത്തുനിന്ന് ആരംഭിക്കുന്ന രണ്ടാംഘട്ട സന്ദേശയാത്ര കൊല്ലം, പത്തനംതിട്ട, ആലപ്പുഴ, കോട്ടയം, ഇടുക്കി ജില്ലളിൽ പര്യടനം നടത്തി മേയ് 21ന് എറണാകുളം മറൈൻ ഡ്രൈവിൽ സമാപിക്കുമെന്ന് കായികമന്ത്രി വി. അബ്ദുറഹ്മാൻ അറിയിച്ചു.

മെഗാജോബ് ഫെയര്‍ ഇന്ന്

പേരൂര്‍ക്കട: സരസ്വതി കോളജ് ഓഫ് ആര്‍ട്ട്‌സ് ആൻഡ് സയന്‍സിന്‍റെ നേതൃത്വത്തില്‍ ഇന്ന് മെഗാ ജോബ് ഫെയര്‍ സംഘടിപ്പിക്കുന്നു. വട്ടിയൂര്‍ക്കാവ് സരസ്വതി വിദ്യാലയത്തില്‍ രാവിലെ ഒന്പതിനു മന്ത്രി വി. ശിവന്‍കുട്ടി ഉദ്ഘാടനം ചെയ്യും. വി.കെ. പ്രശാന്ത് എംഎല്‍എയുടെ നേതൃത്വത്തില്‍ നടക്കുന്ന ജോബ് ഫെയറില്‍ 130 പ്രമുഖ കമ്പനികള്‍ രജിസ്റ്റര്‍ ചെയ്തിട്ടുണ്ട്. 2500-ലധികം തൊഴിലവസരങ്ങളാണ് റിപ്പോര്‍ട്ട് ചെയ്തിരിക്കുന്നത്. 3552 ഉദ്യോഗാര്‍ഥികള്‍ ഓണ്‍ലൈന്‍ മുഖാന്തിരം രജിസ്റ്റര്‍ ചെയ്തുകഴിഞ്ഞു. എസ്എസ്എല്‍സി അടിസ്ഥാന യോഗ്യതയുള്ള, 18നും 45നും മദ്ധ്യേ പ്രായമുള്ള തൊഴിലന്വേഷകര്‍ക്ക് ജോബ് ഫെയറില്‍ പങ്കെടുക്കാം. ഐടി, എന്‍ജിനീയറിംഗ്, സെയില്‍സ്, മാര്‍ക്കറ്റിംഗ്, അക്കൗണ്ടിംഗ്, ക്ലറിക്കല്‍, മാനേജുമെന്‍റ് തുടങ്ങി വിവിധ തസ്തികകളില്‍ ഒഴിവുകളുണ്ട്. ഓണ്‍ലൈനായി രജിസ്റ്റര്‍ ചെയ്യാന്‍ www.tiim. co.in എന്ന ലിങ്ക് സന്ദര്‍ശിക്കണം. സ്പോട്ട് രജിസ്ട്രേഷന്‍ സംവിധാനവും ഒരുക്കിയിട്ടുണ്ട്. ഫോണ്‍: 75938 52229.

അനുസ്മരണ ചടങ്ങ് നടത്തി

തിരുവനന്തപുരം: ഭീകരാക്രമണത്തിനെതിരെ രാജ്യം ഒറ്റക്കെട്ടായി നിൽക്കേണ്ട സന്ദർഭത്തിൽ വർഗീയ ചേരിതിരുവ് ഉണ്ടാക്കാൻ ശ്രമിക്കുന്നവർ ദേശ ദ്രോഹികളാണെന്ന് എം.വിൻസന്‍റ് എംഎൽഎ. കെപിസിസി ഗാന്ധിദർശൻ സമിതി പ്രസിഡന്‍റ് വി.സി. കബീർ മാസ്റ്ററുടെ നേതൃത്വത്തിൽ കാശ്മീരിലെ ഭീകരാക്രമണത്തിനെതിരേ പാളയം രക്തസാക്ഷി മണ്ഡപത്തിൽ സംഘടിപ്പിച്ച അനുസ്മരണ ചടങ്ങ് ഉദ്ഘാടനം ചെയ്യുക യായിരുന്നു അദ്ദേഹം. ജില്ലാ പ്രസിഡന്‍റ് വഞ്ചിയൂർ രാധാകൃഷ്ണൻ അധ്യക്ഷത വഹിച്ചു. വർക്കിംഗ് പ്രസിഡന്‍റ്് കമ്പറ നാരായണൻ ഭീകര വിരുദ്ധ പ്രതിജ്ഞ ചൊല്ലിക്കൊടുത്തു. സംസ്ഥാന ഭാരവാഹികളായ പരശുവയ്ക്കൽ രാധാകൃഷ്ണൻ, ബൈജു വടക്കുംപുറം, കോട്ടമുകൾ സുഭാഷ്, സി.കെ. വിജയകുമാർ, ഇ. ഹർഷകുമാർ, പള്ളിക്കൽ മോഹൻ, സി.കെ. വിജയകുമാർ, ഭാസ്കരൻ മാസ്റ്റർ, എം.വി.ഹെൻറി, നസിം ബീവി, അസ്ബർ, കെ.ശശാങ്കൻ നായർ, കരകുളം ശശി, പാളയം സുധി, രാജേന്ദ്രൻ നായർ, ജി.ശശികുമാർ, ജ്യോതിഷ് കുമാർ തുടങ്ങിയവർ പങ്കെടുത്തു.

വീട് കുത്തിത്തുറന്ന് മോഷണം: സ്വർണവും പണവും നഷ്ടപ്പെട്ടു

കാട്ടാക്കട: വീട് കുത്തിത്തുറന്ന് സ്വർണവും പണവും കവർന്നു. കാട്ടാക്കട പെരുംകുളം മുതയിൽ എസ്ബി സുനിൽകുമാറിന്‍റെ രശ്മി ഭവനലാണ് ബുധനാഴ്ച രാത്രി മോഷണം നടന്നത്. ഏഴു പവൻ സ്വർണവും 60000 രൂപയും മോഷ്ടാവ് കൊണ്ടുപോയി. രാത്രി എട്ടിനും പത്തിനുമിടയിലാണ് മോഷണം നടന്നതായി കരുതുന്നത്. വീടിന്‍റെ പിൻവാതിൽ പൊളിച്ച് അകത്തു കടന്നാണ് മോഷണം.വാതിലുകൾ തകർത്ത നിലയിലാണ്. മേശകൾ അലമാരകൾ എന്നിവ കുത്തി തുറന്നു സാധനങ്ങൾ വലിച്ചു വാരി ഇട്ടിട്ടുണ്ട്.രണ്ടു മുറികളിലായി ഉണ്ടായിരുന്ന മേശക ളിൽ നിന്നാണ് സ്വർണവും പണവും മോഷ്ടിച്ചത്. വ്യാപാരി വ്യവസായി സമിതി ഏരിയാ പ്രസിഡന്‍റായ സുനിൽകുമാർ വൈകുന്നേരം കെഎസ്ആർടിസി ഷോപ്പിംഗ് കോംപ്ലക്‌സിലുള്ള സ്ഥാപനത്തിൽ പോയി തിരിച്ചു വീട്ടിലെത്തിയപ്പോഴാണ് മോഷണം നടന്നതായി കാണുന്നത്. ഉടൻ തന്നെ കാട്ടാക്കട പോലിസിൽ വിവരം അറിയിച്ചു. പോലീസ് സ്ഥലത്ത് പ്രഥമിക പരിശോധന നടത്തി . സ്ഥലത്ത് ഫോറൻസിക് പരിശോധന നടന്നുവരുന്നു. സിസിടിവികൾ കേന്ദ്രീകരിച്ച് അന്വേഷണം തുടങ്ങി.

കാറും ഓട്ടോയും കൂട്ടിയിടിച്ച് രണ്ടു പേർക്ക് പരിക്ക്; ഒരാളുടെ നില ഗുരുതരം

തിരുവല്ലം: കോവളം-തിരുവല്ലം ദേശീയപാതയില്‍ വാഴമുട്ടം ജംഗ്ഷനുസമീപം കാറും ഓട്ടോയും കൂട്ടിയിടിച്ച് ഓട്ടോ ഡ്രൈവര്‍ക്കും യാത്രക്കാരനും പരിക്കേറ്റു. അപകടത്തില്‍ സാരമായി പരിക്കേറ്റ ഓട്ടോ ഡ്രൈവറുടെ നില ഗുരുതരമാണ്. ഇന്നലെ രാത്രി 9.20 നായിരുന്നു അപകടം. അപകടത്തില്‍ ഓട്ടോറിക്ഷ പൂര്‍ണമായും കാറിന്‍റെ ഇടതുഭാഗം ഭാഗികമായും തകര്‍ന്നു. ഓട്ടോ ഡ്രൈവര്‍ കോവളം കമുകിന്‍കുഴി വാറുവിളാകത്ത് വീട്ടില്‍ സെയ്ദ് (54), ഇയാളുടെ ബന്ധുവായ സെയ്യദ് (49) എന്നിവര്‍ക്കാണ് പരിക്കേറ്റത്. സെയ്ദിന്‍റെ ഇരുകാലുകളും ഒടിഞ്ഞിട്ടുണ്ട്. കൂടാതെ വയറിനും സാരമായി പരിക്കേറ്റു. പൊളിഞ്ഞ ഓട്ടോയുടെ ഭാഗങ്ങള്‍ വയറില്‍ കുത്തിക്കയറിയാണ് പരിക്കേറ്റത്. സെയ്യദിനു മുഖത്തും കാലിനും തലയ്ക്കുമാണ് പരിക്കേറ്റത്. കോവളം ഭാഗത്തുനിന്നും വിമാനത്താവളത്തിലേയ്ക്ക് പോയ തമിഴ്‌നാട് സ്വദേശിയുടെ കാര്‍ പനത്തുറ ഭാഗത്തുനിന്നും വാഴമുട്ടം ജംഗ്ഷനിലേയ്ക്കു വരുകയായിരുന്ന ഓട്ടോയില്‍ ഇടിക്കുകയായിരുന്നു. സംഭവം നടന്നയുടന്‍ നാട്ടുകാര്‍ വിവരം തിരുവല്ലം പോലീസില്‍ അറിയിച്ചതിനെ തുടർന്നു പോലീസ് സ്ഥല ത്തെത്തി നാഷണല്‍ ഹൈവേ അഥോറിറ്റിയുടെ ആംബുലന്‍സില്‍ പരിക്കേറ്റവരെ തിരുവനന്തപുരം മെഡിക്കല്‍ കോളജ് ആശുപത്രിയില്‍ എത്തിച്ചു. അപകടമുണ്ടാക്കിയ കാറും അതിലെ ഡ്രൈവറെയും പോലീസ് കസ്റ്റഡിയിലെടുത്തു. അപകടത്തെത്തുടര്‍ന്ന് ഏറെ നേരം ദേശീയപാതയില്‍ ഗതാഗതം തടസപ്പെട്ടു.

പന്പിൽനിന്നു പെട്രോളടിച്ചു മുങ്ങിയ യുവാവ് പിടിയിൽ

വിഴിഞ്ഞം: കാറിൽ എത്തി പട്രോൾ പമ്പിൽ നിന്നു രണ്ടായിരം രൂപയുടെ പട്രോൾ അടിച്ച ശേഷം പണം നൽകാതെ മുങ്ങിയ യുവാവിനെ വിഴിഞ്ഞം പോലീസ് അറസ്റ്റു ചെയ്തു. കോവളം നെടുമം സ്വദേശി മുഹമ്മദ് സഫർ (20) ആണ് പോലീസിന്‍റെ പിടിയിലായത്. ഇക്കഴിഞ്ഞ 22ന് രാത്രിയിലായിരുന്നു സംഭവം. ‌മുക്കോലയിൽ പ്രവർത്തിക്കുന്ന നയരാ പട്രോൾ പമ്പിൽ സ്വിഫ്റ്റ് കാറിൽ എത്തിയ യുവാവ് രണ്ടായിരം രൂപയുടെ പെട്രോൾ അടിക്കാൻ തൊഴിലാളിയായ തമിഴ്നാട് സ്വദേശി ശരവണകുമാറിനോട് ആവശ്യപ്പെട്ടു. പെട്രോൾ അടിച്ച് തീരുന്നതിനിടയിൽ വാഹനവുമായി ഇയാൾ കടന്നു കളയുകയായിരുന്നു. തുടർന്ന് സിസി ടിവി ദൃശ്യങ്ങളുടെ അടിസ്ഥാനത്തിൽ വാഹനം തിരിച്ചറിഞ്ഞ പമ്പ് അധികൃതർ വിഴിഞ്ഞം പോലീസിൽ പരാതി നൽകുകയായിരുന്നു. പ്രതിയെ കോടതിയിൽ ഹാജരാക്കി.

ഹൈക്കോടതി വിധിക്കെതിരെ അപ്പീൽ: മാണിക്കൽ പഞ്ചായത്തിൽ കോൺഗ്രസ് പ്രതിഷേധം ശക്തം

വെന്പായം: ഹൈക്കോടതി വിധിക്കെതിരെ പഞ്ചായത്ത് ചെലവിൽ ഡിവിഷൻ ബഞ്ചിൽ അപ്പീൽ പോകാനുള്ള മാണിക്കൽ പഞ്ചായത്ത് ഭരണ സമിതിയുടെ തീരുമാനത്തിനെതിരെ പ്രതിക്ഷേധവുമായി പ്രതിപക്ഷം.അങ്കണവാടി വർക്കറായി മാണിക്കൽ പഞ്ചായത്ത് പ്രസിഡന്‍റായ കുതിരകുളം ജയന്‍റെ മരുമകളെ പ്രസിഡന്‍റ് ചെയർമാനായ സെലക്ഷൻ കമ്മിറ്റി നിയമിച്ചത് കേരള ഹൈക്കോടതി റദാക്കിയിരുന്നു. തുടർന്നു പ്രസിഡന്‍റിനെ ഒഴിവാക്കി പുതിയ സെലക്ഷൻ കമ്മിറ്റി രൂപീകരിച്ച് പുതിയ റാങ്ക് ലിസ്റ്റ് തയാറാക്കി നിയമനം രണ്ടു മാസത്തിനകം നടത്തണമെന്നും ഹൈക്കോടതി വിധിച്ചിരുന്നു. ഈ ഉത്തരവ് നിലനിൽക്കെ പഞ്ചായത്ത് സ്വന്തം ചെലവിൽ ഹൈക്കോടതി ഡിവിഷൻ ബെഞ്ചിൽ അപ്പീലിന് പോകാനുള്ള പഞ്ചായത്ത് കമ്മിറ്റി തീരുമാനത്തിന് എതിരെയാണ് പഞ്ചായത്ത് കമ്മിറ്റിയിൽ കോൺഗ്രസ് മെമ്പർമാർ പ്രതിഷേധിക്കുകയും വിയോജനക്കുറിപ്പ് രേഖപ്പെടുത്തുകയും ചെയ്തത്. ജനങ്ങളുടെ നികുതിപ്പണം ഉപയോഗിച്ച് അപ്പീലിന് പോകുന്നത് പഞ്ചായത്തു ഭരണസമിതിയുടെ ജനങ്ങളോടുള്ള വെല്ലുവിളിയാണെന്നും ഇതിനെതിരെ ശക്തമായ പ്രക്ഷോഭ പരിപാടികൾ സംഘടിപ്പിക്കുവാൻ ഇന്ത്യൻ നാഷണൽ കോൺഗ്രസ് മാണിക്കൽ മണ്ഡലം കമ്മിറ്റി തീരുമാനിച്ചതായും മാണിക്കൽ മണ്ഡലം പ്രസിഡന്‍റ് കെപ്പം ഉണ്ണികൃഷ്ണൻ പറഞ്ഞു

പാളയം മാർക്കറ്റ്; ഹൈക്കോടതി വിധി സ്വാഗതാർഹമെന്ന് എസ്.എസ്. മനോജ്

തിരുവനന്തപുരം: പാളയം മാർക്കറ്റിലെ വ്യാപാരികളെ താൽക്കാലിക കെട്ടിടത്തിലേക്ക് പുനരധിവസിക്കുന്നതിന് മുൻപ് മാർക്കറ്റിലെ മാലിന്യം നീക്കം ചെയ്യുകയും പൊതുജന സുരക്ഷാ ഉറപ്പുവരുത്തുകയും വേണമെന്ന ബഹുമാനപ്പെട്ട ഹൈക്കോടതിയുടെ ഡിവിഷൻ ബെഞ്ചിന്‍റെ ഉത്തരവ് സ്വാഗതാർഹമാണെന്നു കേരള വ്യാപാരി വ്യവസായി ഏകോപന സമിതി സംസ്ഥാന പ്രസിഡന്‍റും കോൺഫെഡറേഷൻ ഓഫ് ഓൾ ഇന്ത്യ ട്രേഡേഴ്സ് ദേശീയ സെക്രട്ടറിയുമായ എസ്.എസ്. മനോജ് പറഞ്ഞു. വ്യാപാരികളെ വികസന വിരോധികളായി ചിത്രീകരിക്കുവാൻ ആരും ശ്രമിക്കേണ്ട. പരിഷ്കൃത സമൂഹത്തിന് അനുയോജ്യമായ വികസന സാഹചര്യങ്ങളാണ് വികസന ശിൽപികൾ ഒരുക്കേണ്ടതെന്നും, അല്ലാതെ വന്നപ്പോഴാണ് വ്യാപാരികൾക്ക് കോടതിയെ സമീപിക്കേണ്ടി വന്നതെന്നും അദ്ദേഹം കൂട്ടിച്ചേർത്തു. മാർക്കറ്റിലെ സ്മാർട്ട് സിറ്റിയുടെ പദ്ധതികൾക്ക് വ്യാപാരികൾ പൂർണ പിന്തുണ നൽകുമെന്നു കേരള വ്യാപാരി വ്യവസായി ഏകോപന സമിതി ജില്ലാ വർക്കിംഗ് പ്രസിഡന്‍റ് പാളയം പത്മകുമാർ, സെക്രട്ടറി ഡി. വിദ്യാധരൻ പാളയം കണ്ണിമേറാ മാർക്കറ്റ് മർച്ചന്‍റ്സ് അസോസിയേഷൻ പ്രസിഡന്‍റ് രാജൻ പി. നായർ, സെക്രട്ടറി ജെ. റജാസ്, ട്രഷറർ എസ്. ഷഹാബുദ്ദീൻ എന്നിവർ പറഞ്ഞു.

മുതലപ്പൊഴിയിലെ പൊഴിമുറിക്കൽ : വലിയ ഡ്രഡ്ജർ ഇന്ന് ഉച്ചയോടെ മുതലപ്പൊഴിയിൽ എത്തിക്കും

തിരുവനന്തപുരം: മുതലപ്പൊഴിയിൽ പൊഴി മുറിക്കാനുള്ള പ്രവർത്തനങ്ങൾ അന്തിമഘട്ടത്തിലെ ത്തി. കണ്ണൂരിൽനിന്നും പുറപ്പെട്ട വലിയ ഡ്രഡ്ജർ ഇന്ന് ഉച്ചയോടെ മുതലപ്പൊഴിയിലെത്തിക്കും. ഇന്നലെ രാത്രിയോടെ ഡ്രഡ്ജർ കൊല്ലത്തെത്തി. അവിടെ നിന്നും സാവധാനത്തിലാണ് കടൽ മാർഗം ഡ്രഡ്ജർ മുതലപ്പൊ ഴിയിൽ എത്തിക്കുന്നത്. കഴിഞ്ഞ മൂന്നു ദിവസമായി പൊഴി മുറിക്കാനും മണൽ നീക്കം ചെയ്യാനുമുള്ള ജോലികൾ നടന്നു വരികയാണ്. മത്സ്യത്തൊഴിലാളികളും സമര സമിതിയും മുന്നോട്ടു വച്ച ഉപാധികൾ അനുസരിച്ചാണ് പ്രവർത്തനങ്ങൾ പുരോഗമിക്കുന്നത്. മൂന്നുമീറ്റർ ആഴത്തിൽ ഇന്നലെ കുഴിച്ചു. 20 മീറ്റർ വീതിയിൽ വള്ളങ്ങൾ കടന്നു പോകാനുള്ള തടസമില്ലാത്ത പാതയും ഒരുക്കിയിട്ടുണ്ട്. ചെറിയ ഡ്രഡ് ജർ, ജെസിബി എന്നിവ ഉപയോഗിച്ച് തുറമുഖ വകുപ്പിലെ ഉൾപ്പെടെ അൻപതിൽപരം പേരാണ് പൊഴി മുറിക്കാനുള്ള പ്രവർത്തികൾ ചെയ്യുന്നത്. വലിയ ഡ്രഡ് ജർ എത്തിയാൽ ഉടൻ തന്നെ പൊഴി പൂർണമായും മുറിക്കും.

സർവീസിൽനിന്നു വിരമിക്കുന്നു

മെഡിക്കൽ കോളജ്: മെഡിക്കൽ വിദ്യാഭ്യാസ ഡയറക്ടറും വിവിധ ഗവ. മെഡിക്കൽ കോളജുകളിലെയും ഗവ. നഴ്സിംഗ് കോളജുകളിലെയും പ്രിൻസിപ്പൽമാരുമടക്കം സർവീസിൽ നിന്നു വിരമിക്കുന്നു. മെഡിക്കൽ വിദ്യാഭ്യാസ ഡയറക്ടർ ഡോ. തോമസ് മാത്യു, ജോയിന്‍റ് മെഡിക്കൽ വിദ്യാഭ്യാസ ഡയറക്ടർ (ജനറൽ) ഡോ. വി.ടി. ബീന, ജോയിന്‍റ് ഡയറക്ടർ ഓഫ് നഴ്സിംഗ് എജ്യുക്കേഷൻ ഡോ. ടി. പ്രേമലത എന്നിവരാണ് വിരമിക്കുന്നത്. തിരുവനന്തപുരം മെഡിക്കൽ കോളജ് പ്രിൻസിപ്പൽ ഡോ. ലിനറ്റ് ജെ. മോറിസ്, തിരുവനന്തപുരം നഴ്സിംഗ് കോളജ് പ്രിൻസിപ്പൽ പ്രഫ. സി . ശ്രീദേവിയമ്മ, ഗവ. ഡെന്‍റൽ കോളജ് പ്രിൻസിപ്പൽ ഡോ. എ. റീത്ത സെറീന എന്നിവരും ഏപ്രിൽ, മേയ്, ജൂൺ മാസങ്ങളിലായി സർവീസിൽ നിന്നും വിരമിക്കും.

ബ്ലോഗർക്കെതിരെ പോക്സോ കേസെടുത്തു

വിഴിഞ്ഞം : കമ്പനിയുടെ പ്രമോഷനായി വീഡിയോ ചിത്രികരിക്കുന്നതിനിടയിൽ ദേഹത്ത് സ്പർശിച്ചതായി പരാതി. പതിനാറ് കാരിയുടെ പരാതിയിൽ ബ്ലോഗർക്കെതിരെ കോവളം പോലീസ് പോക്സോ കേസെടുത്തു. ആറ്റിങ്ങൽ സ്വദേശിനിയുടെ പരാതിയിൽ തിരുവനന്തപുരം സ്വദേശി മുകേഷിനെതിരെയാണ് കേസെടുത്തത്. രണ്ടു മാസം മുൻപ് നെടുമങ്ങാട് സ്വദേശിനിയായ പതി നാറുകാരി, തന്‍റെ കമ്പനിയുടെ പ്രമോഷനായുള്ള വീഡി യോ ചിത്രീകരം നടത്താൻ കോവളത്തെ ഒരു റിസോർട്ടിൽ എത്തിയപ്പോഴായിരുന്നു സംഭവം. സൈബർ സെല്ലിനു നൽകിയ പരാതിയിൽ കോവളം പോലീസ് കേസെടുക്കുകയായിരുന്നു.

രോഗിയോട് അപമര്യാദ: ഡോക്ടർക്കെതിരേ കേസെടുത്തു

നെടുമങ്ങാട്: രോഗിയോട് അപമര്യാദയായി പെരുമാറിയെന്ന പരാതിയിൽ ഡോക്ടർക്കെതിരെ കേസെടുത്തു. കോട്ടൂർ എരുമക്കുഴി സ്വദേശിനിയുടെ പരാതിയിൽ വെളിയന്നൂർ ആയൂർവേദ ആശുപത്രിയിലെ ഡോ. ഫക്രുദീനെതിരേയാണ് ആര്യനാട് പോലീസ് കേസെടുത്തത്. കഴിഞ്ഞ 14-നു ഭർത്താവിനും മക്കൾക്കുമൊപ്പം ഭർത്താവിന്‍റെ സുഹൃത്തിന്‍റെ വെളിയന്നൂരിലെ വീട്ടിൽ രാവിലെ ഒരു ചടങ്ങിനെത്തിയ പരാതിക്കാരിക്ക് ഉച്ചയ്ക്ക് തിരികെ മടങ്ങുന്നതിനുവേണ്ടി ബൈക്കിൽ കയറുന്നതിനിടെ താഴെ വീണു പരിക്കേറ്റിരുന്നു. തുടർന്നു സമീപത്തെ ആയൂർവേദ ആശുപത്രിയിൽ ചികിത്സതേടിയ പരാതിക്കാരി തുടർ ചികിത്സയുടെ ഭാഗമായി അടുത്തടുത്ത ദിവസങ്ങളിലും ആശുപത്രിയിലെത്തി. 17ന് ആശുപത്രിയിൽ എത്തിയ പരാതിക്കാരിയോട് ഡോക്ടർ മോശമായി പെരുമാറിയെന്നാണ് കേസ്.

ഫ്രാൻസിസ് മാർപാപ്പ അനുസ്മരണം ഇന്ന്

തിരുവനന്തപുരം: ദിവംഗതനായ ഫ്രാൻസിസ് മാർപാപ്പയുടെ സ്മരണകൾ പങ്കുവയ്ക്കാനും ആദരാഞ്ജലികൾ അർപ്പിക്കാനുമായി തിരുവനന്തപുരം ലൂർദ് പള്ളിയിൽ ഇന്നു വൈകുന്നേരം നാലിനു പ്രത്യേക സമ്മേളനവും പ്രാർഥനകളും സംഘടിപ്പിക്കും. കേരള ഗവർണർ രാജേന്ദ്ര വിശ്വനാഥ് അർലേക്കർ മുഖ്യാതിഥി ആയിരിക്കും. ‌ ധനമന്ത്രി കെ.എൻ. ബാലഗോപാൽ, സിപിഐ സംസ്ഥാന സെക്രട്ടറി ബിനോയ് വിശ്വം, കെ. മുരളീധരൻ, വി.കെ. പ്രശാന്ത് എംഎൽഎ, മാർത്തോമാ ബിഷപ് ഐസക്ക് മാർ ഫീലക്സീനോസ്, സ്വാമി ഗുരുരത്നം ജ്ഞാന തപസ്വി, പാളയം ഇമാം സുഹൈബ് മൗലവി തുടങ്ങിയ രാഷ്ട്രീയ, മത, സാംസ്കാരിക നേതാക്കന്മാർ പ്രസംഗിക്കും. മാർപാപ്പയേക്കുറിച്ചുള്ള തിരുവനന്തപുരം പൗരാവലിയുടെ ഓർമകളും അനുശോചനവും പ്രത്യേകം തയാറാക്കിയ താളുകളിൽ രേഖപ്പെടുത്താൻ നിരവധി പൗരപ്രമുഖരും വന്നുചേരും. പരിപാടികൾക്ക് വികാരി ജനറാൾ മോൺ. ഡോ. ജോണ്‍ തെക്കേക്കര, ഫാ. റ്റോണ്‍ പൊന്നാറ്റിൽ, ഫാ. മാത്യു മരങ്ങാട്ട്, സേവ്യർ സെബാസ്റ്റ്യൻ അനുഗ്രഹ്, ജോയി ജോസഫ് ചെന്നിക്കര, വർഗീസ് കെ.ജെ. ചുള്ളിക്കൽ, സാജു തോമസ് മാത്യു ഇല്ലിക്കൽ, ഏബ്രഹാം ജോസ് പുള്ളോലിൽ, ഇമ്മനുവേൽ മൈക്കിൾ കൊട്ടാരത്തിൽ, ജോസുകുട്ടി സെബാസ്റ്റ്യൻ കണ്ണിട്ടയിൽ, മീര ഷാജി തൂങ്കുഴി എന്നിവർ നേതൃത്വം നൽകും.

പരിവർത്തനത്തിനു സാധ്യതയില്ല; പ്രതിക്കു പരമാവധി ശിക്ഷ

തിരുവനന്തപുരം: വിനീത കൊലക്കേസിൽ കോടതി പ്രതിക്കു തൂക്കുകയർ വിധിച്ചത് പ്രതിയുടെ സാമൂഹിക ജീവിതത്തേക്കുറിച്ചു വിശദമായി പരിശോധിച്ചതിനു ശേഷം. മനഃപരിവർത്തനം നടത്താൻ കഴിയാത്ത കൊലപാതക പരന്പര നടത്തുന്നയാളാണ് പ്രതിയെന്നായിരുന്നു വിശദമായ പഠനം നടത്തി സമർപ്പിച്ച റിപ്പോർട്ടുകളുടെ പൊതുസാരാംശം. കേസ് അപൂർവങ്ങളിൽ അപൂർവമാണന്നുള്ള പ്രോസിക്യൂഷൻ വാദത്തെ തുടർന്നാണു പ്രതിയുടെ ജീവിതത്തിന്‍റെ സാമൂഹിക വിലയിരുത്തൽ പഠനത്തെക്കുറിച്ചുള്ള വിവിധ റിപ്പോർട്ടുകൾ കോടതി ശേഖരിച്ചത്. പ്രതിയുടെ പരിഷ്കരണ- പരിവർത്തന സാധ്യതകളെ കുറിച്ച് തിരുവനന്തപുരം ജില്ലാ കളക്ടർ അനുമാരി, പ്രതിയുടെ കുറ്റകരമായ മു പ്രവൃത്തികളെക്കുറിച്ച് സിറ്റി പോലീസ് കമ്മീഷണർ തോംസൻ ജോസ്, പ്രതിയുടെ മാനസികാരോഗ്യ നില പരിശോധിച്ച് പേരൂർക്കട മാനസികാരോഗ്യ ആശുപത്രി സൂപ്രണ്ട് ഡോ. പ്രീതി ജയിംസ്, ജയിലിനുള്ളിലെ പ്രതിയുടെ സ്വഭാവവും പെരുമാറ്റവും സംബന്ധിച്ച് തിരുവനന്തപുരം, പാളയംകോട്ട ജയിൽ സൂപ്രണ്ടുമാർ, പ്രതിയുടെ സ്ഥാവര ജംഗമ സ്വത്തുക്കളുടെ വിശദാംശങ്ങളെ സംബന്ധിച്ച് നാഗർകോവിൽ റവന്യു അഥോറിറ്റി, കന്യാകുമാരി, തിരുവനന്തപുരം ജില്ലാ പ്രൊബേഷൻ ഓഫീസർമാർ എന്നിവർ വിവിധ റിപ്പോർട്ടുകൾ മുദ്രവച്ച കവറുകളിൽ നൽകിയിരുന്നു. ജീവപര്യന്തം ശിക്ഷയാണു വിധിക്കുന്നതെങ്കിൽ ശിക്ഷാ ഇളവിനു പ്രതി അർഹനാണന്നും ഭാവിയിൽ സമാനമായ കുറ്റകൃത്യങ്ങളിൽ ഏർപ്പെടില്ലെന്നും ഉറപ്പു വരുത്താനാവില്ലന്നുമുള്ള പ്രോസിക്യൂഷൻ വാദം കോടതി അംഗീകരിച്ചു. ഒരു പരന്പര കൊലയാളി എന്ന നിലയിൽ പ്രതി സമൂഹത്തിന് ഭീഷണിയാണ്. നിരപരാധികളായ മനുഷ്യരെ ദാരുണമായ അന്ത്യത്തി ൽ നിന്നു രക്ഷിക്കാനുള്ള ഏക മാർഗം വധശിക്ഷയാണന്ന് പ്രോസിക്യൂഷൻ ശക്തമായ നിലപാടെടുത്തിരുന്നു. പ്രതിയുടെ പ്രായം പരിഗണിക്കണമെന്ന പ്രതിഭാഗം വാദം കോടതി തള്ളി.

അന്പലമുക്ക് വിനീത കൊലക്കേസ്: പ്രതി രാജേന്ദ്രനു വധശിക്ഷ

വധശിക്ഷയ്ക്കു പുറമേ ജീവപര്യന്തം കഠിനതടവും തിരുവനന്തപുരം: പേരൂർക്കട അന്പലമുക്കിൽ അലങ്കാരച്ചെടി വില്പനശാലയിലെ ജീവനക്കാരിയായിരുന്ന നെടുമങ്ങാട് കരിപ്പൂർ ചരുവള്ളികോണത്ത് വിനീതയെ(38) കുത്തിക്കൊലപ്പെടുത്തിയ കേസിലെ പ്രതിക്കു വധശിക്ഷ. കൂടാതെ ജീവപര്യന്തം കഠിനതടവും വിവിധ വകുപ്പുകളിലായി 8,10,500 രൂപ പിഴയും വിധിച്ചു. കന്യാകുമാരി തോവാള വെള്ളമടം രാജീവ് നഗറിൽ രാജേന്ദ്രനെ (42) യാണു തൂക്കിക്കൊല്ലാൻ വിധിച്ചത്. വധശിക്ഷയ്ക്കു പുറമേ മരണം ഉണ്ടാക്കിയുള്ള കവർച്ചയ്ക്കു ജീവപര്യന്തം കഠിനതടവും നാലു ലക്ഷം രൂപ പിഴയും കുറ്റകരമായ വസ്തു കൈയേറ്റത്തിനു മൂന്നുമാസം കഠിനതടവും 500 രൂപ പിഴയും തെളിവു നശിപ്പിച്ചതിന് ഏഴു വർഷം കഠിനതടവും 10, 000 രൂപ പിഴയും ശിക്ഷ വിധിച്ചു. പിഴകൾ ഒടുക്കിയല്ലെങ്കിൽ മൂന്നു വർഷം കൂടി കഠിനതടവ് അനുഭവിക്കണമെന്ന് 600 പേജുള്ള വിധിന്യായത്തിൽ തിരുവനന്തപുരം ഏഴാം അഡിഷണൽ സെഷൻസ് ജഡ്ജ് പ്രസൂണ്‍ മോഹൻ ഉത്തരവിട്ടു. പിഴത്തുകയിൽ നിന്നും നാലു ലക്ഷം രൂപ വിനീതയുടെ കുട്ടികൾക്കു നൽകണം. കൂടാതെ കുട്ടികൾക്കും മാതാപിതാക്കൾക്കും ലീഗൽ സർവീസ് അഥോറിറ്റിയിൽ നിന്നും നഷ്ടപരിഹാരം നൽകണമെന്നും കോടതി ഉത്തരവിട്ടു. കൊല്ലപ്പെട്ട വിനീതയുടെ 14 ഉം 11 ഉം വയസായ രണ്ടു മക്കൾ വിനീതയുടെ മാതാപിതാക്കളോടൊപ്പമാണ് കഴിയുന്നത്. വിധി പറയുന്നതു കേൾക്കാൻ വിനീതയുടെ മാതാപിതാക്കളും കുട്ടികളും കോടതിയിൽ എത്തിയിരുന്നു. ശിക്ഷയേക്കുറിച്ചുള്ള കോടതിയുടെ ചോദ്യങ്ങൾക്ക് 70 വയസ് കഴിഞ്ഞ അമ്മയ്ക്ക് ഏക ആശ്രയം താനാണെന്നും പോലീസിനെ ഭയന്നു സഹോദരൻ പ്രഭുവും സഹോദരി സുബ്ബലക്ഷ്മിയും അമ്മയെ കാണാൻ പോലും കൂട്ടാക്കാറില്ലന്നും പ്രതി കോടതിയോടു പറഞ്ഞു. ശിക്ഷയേക്കുറിച്ചു പ്രോസിക്യൂഷന്‍റെയും പ്രതിയുടെയും വാദങ്ങളും കോടതി കേട്ടു. പ്രതി കൊടും കുറ്റവാളിയാണന്നും കവർച്ചയ്ക്കായി തമിഴ്നാട്ടിലും കേരളത്തിലും പ്രതി നടത്തിയ നാലു കൊലപാതകങ്ങളിൽ മൂന്നു പേരും സ്ത്രീകളായിരുന്നുവെന്നും സ്പെഷൽ പബ്ലിക് പ്രോസിക്യൂട്ടർ എം.സലാഹുദീൻ പറഞ്ഞു. പ്രോസിക്യൂഷനു വേണ്ടി സ് പെഷൽ പബ്ലിക് പ്രോസിക്യൂട്ടർ എം. സലാഹുദ്ദീൻ, ദേവിക മധു, ജെ. ഫസ്ന, ഒ.എസ്. ചിത്ര എന്നിവർ ഹാജരായി. തിരുവനന്തപുരം സിറ്റി പോലീസ് കമ്മീഷണറായിരുന്ന ജി. സ്പർജൻ കുമാറിന്‍റെ മേൽനോട്ടത്തിൽ കന്‍റോണ്‍മെന്‍റ് എസിയായിരുന്ന വി.എസ്. ദിനരാജ്, പേരൂർക്കട സിഐ ആയിരുന്ന വി. സജികുമാർ, ജുവനപുടി മഹേഷ്, സബ് ഇൻസ്പക്ടർമാരായ എസ്. ജയകുമാർ, ആർ. അനിൽകുമാർ, മീന എസ്. നായർ, സീനിയർ സിവിൽ പോലീസുകരായ ആർ. പ്രമോദ്, നൗഫൽ റഫീഖ്, ഷംനാദ്, അരുണ്‍ എന്നിവരുടെ നേതൃത്വത്തിലുള്ള പ്രത്യേക പോലീസ് സംഘമാണ് അന്വേഷണം നടത്തി കുറ്റപത്രം സമർപ്പിച്ചത്.

ബൈക്കിടിച്ച് കാൽനട യാത്രക്കാരൻ മരിച്ചു

വെഞ്ഞാറമൂട്: ബൈക്കിടിച്ച് കാൽനട യാത്രക്കാരനായ വൃദ്ധൻ മരിച്ചു. ബൈക്കിൽ നിന്നും തെറിച്ചുവീണ് യുവാവിനും പരിക്കേറ്റു. വെഞ്ഞാറമൂട് കീഴായിക്കോണത്ത് വാടകയ്ക്ക് താമസിക്കുന്ന നെടുമങ്ങാട് ചുള്ളിമാനൂർ റോഡരികത്ത് വീട്ടിൽ ജോർജ് ജോസഫാണ് (70) മരിച്ചത്. അപകടത്തിൽ ബൈക്ക് യാത്രക്കാരനായ പാങ്ങോട് മതിര സ്വദേശി വിഷ്ണു ചന്ദ്രനാണ് പരിക്കേറ്റത്. കഴിഞ്ഞദിവസം രാവിലെ 5.45ന് എംസി റോഡിൽ കീഴായിക്കോണം പെട്രോൾ പമ്പിന് സമീപത്തായിരുന്നു അപകടം. ഉടൻതന്നെ നാട്ടുകാർ ജോർജ് ജോസഫിനെ കന്യാകുളങ്ങര സാമൂഹ്യാരോഗ്യ കേന്ദ്രത്തിലും വിഷ്ണു ചന്ദ്രനെ വെഞ്ഞാറമൂട്ടിലെ സ്വകാര്യ മെഡിക്കൽ കോളജാശുപത്രിയിലും പ്രവേശിപ്പിച്ചെങ്കിലും ജോർജ് ജോസഫിന്‍റെ ജീവൻ രക്ഷിക്കാനായില്ല. ജോർജ് ജോസഫിന്‍റെ ഭാര്യ നിർമല. മക്കൾ: ഷിബി (ആന്ധ്രാ പ്രദേശ്), ഷിബു (സൗദി അറേബ്യ) മരുമകൾ: ആതിര.

കിണറ്റില്‍ വീണു മൂന്നു വയസുകാരിയ്ക്ക് ദാരുണാന്ത്യം

വെള്ളറട: വെള്ളറടക്ക് സമീപം കിണറ്റില്‍ വീണു മൂന്നു വയസുകാരിക്ക് ദാരുണാന്ത്യം. ചൂണ്ടിക്കല്‍ സ്വദേശി ചന്ദ്രമോഹന്‍-ആരതി ദമ്പതികളുടെ മകള്‍ നക്ഷത്ര (മൂന്ന്) ആണ് മരിച്ചത്. അച്ഛന്‍ വിദേശത്താണ് നക്ഷത്രയും സഹോദരി നിവേദ്യയും മാതാവിന്‍റെ വീട്ടില്‍ നിറുത്തിയിട്ട് മാതാവ് ആതിര പുറത്തു പോയിരിക്കുകയായിരുന്നു. മടങ്ങിയെത്തിയപ്പോള്‍ കുട്ടിയെ കാണാത്തതിനെ തുടര്‍ന്നുള്ള അന്വേഷണമാണ് കിണറ്റില്‍ നിന്ന് മൃതദേഹം കിട്ടിയത്. പാടശേഖര പ്രദേശവും കിണറിന്‍റെ കൈവരി പൊക്കം കുറഞ്ഞതുമായിരുന്നു. കുട്ടിയെ ഉടന്‍ തന്നെ പുറത്തെടുത്ത് സമീപത്തെ സാമൂഹികാരോഗ്യ കേന്ദ്രത്തില്‍ എത്തിച്ചുവെങ്കിലും ഡോക്ടര്‍മാര്‍ മരണം സ്ഥിരീകരിക്കുകയായിരുന്നു.

വേനൽത്തുമ്പി കലാജാഥ

നെടുമങ്ങാട്: ബാലസംഘം നെടുമങ്ങാട് ഏരിയാ കമ്മിറ്റിയുടെ വേനൽത്തുമ്പി കലാജാഥയ്ക്ക് പൂവത്തൂർ മേഖലയിൽ ഉജ്ജ്വല വരവേൽപ്പ്. മേഖലാതല ഉദ്ഘാടനം ഉളിയൂർ തൃപ്പാദത്തിൽ കവി വിഭു പിരപ്പൻകോട്, ജാഥാ ക്യാപ്റ്റൻ അബിയ എസ്. ഷിബുവിന് പുസ്തകക്കിറ്റു നൽകി നിർവഹിച്ചു. മേഖലാ പ്രസിഡന്‍റ് ആദിത്യ അധ്യക്ഷയായി. ഉദ്ഘാടന യോഗത്തിൽ മേഖലാ മുഖ്യരക്ഷാധികാരി എസ്.എസ്. ബിജു, ബാലസംഘം ഏരിയാ സെക്രട്ടറി ആർ.ജെ. ആമിന, പ്രസിഡന്‍റ് അബിയ എസ്. ഷിബു, രക്ഷാധികാരി കെ. ആർ. രഞ്ജിത്ത് കൃഷ്ണ, ഏരിയാ കൺവീനർ അജിംഖാൻ, ഏരിയാ കോ-ഓർഡിനേറ്റർ ആനാട് ഹരിപ്രകാശ്, അനിൽ വേങ്കോട്, ബാലസംഘം മേഖലാ കൺവീനർ ആർ. സിന്ധുക്കുട്ടൻ, സംഘാടക സമിതി ചെയർമാൻ എസ്. കബീർ, കൺവീനർ വി. സതീശൻ, കൗൺസിലർ എസ്. സജിത എന്നിവർ സംസാരിച്ചു. സ്വീകരണ പരിപാടിക്ക് എസ്. രാജേന്ദ്രൻ, എൻ. പ്രസന്നൻ, എസ്.ആർ. രതീഷ്, ആർ.വി. ബിജു, ഹരികൃഷ്ണൻ, സിബി, ജി.എസ്. ജയചന്ദ്രൻ, വി. അനിൽകുമാർ, എൻ. എസ് ജോയി, എം. ശശികുമാർ എന്നിവർ നേതൃത്വം നൽകി.

സുരക്ഷിത ഭവനം പദ്ധതി: വീടിന്‍റെ താക്കോൽ കൈമാറി

വിതുര: സേവാശക്തി ഫൗണ്ടേഷന്‍റെ സുരക്ഷിത ഭവനം പദ്ധതിയുടെ ഭാഗമായി വിതുര തെന്നൂർ വനമേഖലയിലെ ഷീബയ്ക്കും മക്കൾക്കും നിർമിച്ചു നൽകിയ വീടിന്‍റെ താക്കോൽ ദാനം നടന്നു. രാഷ്ട്രീയ സ്വയംസേവക സംഘത്തിന്‍റെ മുതിർന്ന പ്രചാരകൻ സേതുമാധവൻ, വിഭാഗ് പ്രചാരക്‌ പ്രമോദ്, സേവാശക്തി ഫൗണ്ടേഷൻ ചെയർമാൻ സി.എസ്. മോഹനൻ, സെക്രട്ടറി എം. സന്തോഷ്, വൈസ് പ്രസിഡന്‍റ് എസ്. സുനിൽകുമാർ, സേവാഭാരതി ജില്ലാ സെക്രട്ടറി ബിനു എന്നിവരുടെ സാന്നിധ്യത്തിലായിരുന്നു ചടങ്ങുകൾ. വിതുര പഞ്ചായത്തിൽ മണലി വാർഡിൽ മുളമൂട്ട് മൺപുറം നിവാസികളായ ഷീബയ്ക്കും മക്കൾ മീരയ്ക്കും അനുവിനുമായാണു വീട് ഒരുങ്ങിയത്. കൈവശരേഖ പ്രകാരം 20 സെന്‍റ് സ്ഥലമുണ്ടെങ്കിലും ഷീബയ്ക്കും കുടുംബത്തിനും സ്വന്തമായൊരു വീടില്ലായിരുന്നു. ഷീറ്റിട്ട് മറച്ച ഷെഡ്ഡിലായിരുന്നു കുടുംബത്തിന്‍റെ ഉറക്കം. പ്ലസ്ടു വിദ്യാർഥിനിയായ മീരയെ ഒരു തവണ പാമ്പു കടിച്ചിരുന്നു. പ്രദേശത്തെ സാമൂഹ്യ പ്രവർത്തകർ സേവാശക്തി ഫൗണ്ടേഷന്‍റെ പ്രവർത്തകരെ അറിയിച്ചതിനെ തുടർന്നായിരുന്നു വീടെന്ന സ്വപ്നം സഫലമായത്. എട്ടു ലക്ഷം രൂപ ചെലവിട്ട് ആറു മാസം സമയമെടുത്താണ് പണി പൂർത്തിയായത്. പ്രവാസിയും സാമൂഹ്യ പ്രവർത്തകനുമായ ഹരികുമാർ, ഫൗണ്ടേഷൻ ട്രഷറർ സി. അനൂപ്, ലിജു വി. നായർ, ഷീജാ സാന്ദ്ര, സേവാഭാരതി വനമേഖല ട്രഷറർ ജയപ്രിയ തുടങ്ങിയവർ സംസാരിച്ചു.

എംഎല്‍എയുടെ ഡ്രൈവർക്ക് മർദനം; ഒരാൾ അറസ്റ്റിൽ

നേമം: എം. വിന്‍സന്‍റ് എംഎല്‍എയുടെ ഡ്രൈവര്‍ക്ക് മർദനമേറ്റ സംഭവത്തിലെ പ്രതികളിലൊരാളെ നേമം പോലീസ് അറസ്റ്റു ചെയ്തു. എസ്റ്ററ്റ് അരുവാക്കോട് സ്വദേശി സുഭാഷി(48) നെയാണ് അറസ്റ്റു ചെയ്തത്. ഡ്രൈവർ വിനോദ് നെട്ടത്താന്നിക്കും സുഹൃത്തിനും നേരെയാണ് ആക്രമണമുണ്ടായത്. തിങ്കളാഴ്ച വൈകുന്നേരം പാപ്പനംകോട് എസ്റ്റേറ്റ് ജംഗ്ഷനിലെ തട്ടുകടയ്ക്കു സമീപം രാത്രി ഏഴുമണിയോടുകൂടിയായിരുന്നു സംഭവം. ബൈക്കിലെത്തിയ വിനോദും സുഹൃത്തും ചായ കുടിക്കാനായി ഇറങ്ങിയപ്പോഴാണ് ബൈക്ക് മാറ്റി കൊടുക്കാന്‍ ആവശ്യപ്പെട്ട് രണ്ടുപേര്‍ വിനോദിനെയും സുഹൃത്ത് ബാലരാമപുരം കൊടിനട സ്വദേശി അഖിലിനെയും മര്‍ദ്ദിച്ചത്. വിനോദിന്‍റെ ഉടുപ്പ് വലിച്ചു കീറുകയും മൊബൈല്‍ ഫോണ്‍ തട്ടിയെടുക്കുകയും ബൈക്ക് കേടുവരുത്തുകയും കത്തി കാട്ടി ഭീഷണിപ്പെടുത്തുകയും ചെയ്തിരുന്നു. പിടിയിലായ പ്രതി കാപ്പ ഉൾപ്പെടെ നിരവധി കേസിലെ പ്രതിയാണ്.

വെള്ളാറില്‍ കുടിവെള്ളക്ഷാമം രൂക്ഷം; വാര്‍ഡ് കൗണ്‍സിലറുടെ നേതൃത്വത്തില്‍ ഉപരോധം സംഘടിപ്പിച്ചു

തിരുവല്ലം: വെള്ളാര്‍ വാര്‍ഡില്‍ കുടിവെളളക്ഷാമം രൂക്ഷമായതിനെത്തുടര്‍ന്നു വാര്‍ഡ് കൗണ്‍സിലറുടെ നേതൃത്വത്തില്‍ ജല അഥോറിറ്റി ഓഫീസ് ഉപരോധിച്ചു. അഥോറിറ്റി യുടെ വണ്ടിത്തടത്തുള്ള ഓഫീസിലെ അധികൃതര്‍ വെള്ളാര്‍ വാര്‍ഡിലെ വിവിധ ഇടങ്ങളിലെ കുടിവെള്ള വിതരണം തടസപ്പെടുത്തുന്നുവെന്നാരോപിച്ചാണ് കൗണ്‍സിലര്‍ പനത്തുറ ബൈജുവിന്‍റെ നേതൃത്വത്തില്‍ വണ്ടിത്തടം ജല അഥോറിറ്റി ഓഫീസിനു മുന്നില്‍ കഴിഞ്ഞ ദിവസം ഉപരോധം സംഘടിപ്പിച്ചത്. വാഴമുട്ടം, പീപ്പാറ, കുഴിവിളാകം, വട്ടപ്പാറ, കുന്നില്‍, കൈതവിള എന്നിവിടങ്ങളില്‍ കഴിഞ്ഞ രണ്ടാഴ്ചയിലേറെയായി കുടിവെള്ളം കിട്ടുന്നില്ലെന്നു നാട്ടുകാര്‍ കൗണ്‍സിലറിന് പരാതി നല്‍കിയിരുന്നു. ഇതേത്തുടര്‍ന്നു കഴിഞ്ഞ ദിവസം രാവിലെ മുതല്‍ ഉച്ചവരെ വണ്ടിത്തടം ഓഫീസില്‍ നടത്തിയ ഉപരോധത്തെത്തുടര്‍ന്ന് ഉദ്യോഗസ്ഥരെത്തി പ്രതിഷേധക്കാരുമായി ചര്‍ച്ച നടത്തുകയുണ്ടായി. ചര്‍ച്ചയെ തുടര്‍ന്ന് വാര്‍ഡിലെ ചോര്‍ച്ചയുള്ള പൈപ്പുകളില്‍ അറ്റകുറ്റപ്പണി നടത്തുകയും വൈകുന്നേരത്തോടെ കുടിവെള്ളമെത്തിക്കുകയുമായിരുന്നു. കൗണ്‍സിലര്‍ക്കൊപ്പം സിപിഐ ലോക്കല്‍ സെക്രട്ടറി വെള്ളാര്‍ സാബു, സിപിഎം നേതാവ് വാഴമുട്ടം രാധാകൃഷ്ണന്‍, ജയന്‍ വെളളാര്‍ എന്നിവരും നാട്ടുകാര്‍ക്കൊപ്പം പങ്കെടുത്തു.

യുവാവിനെ കൊലപ്പെടുത്താന്‍ ശ്രമിച്ച രണ്ടുപേര്‍കൂടി പിടിയില്‍

പേരൂര്‍ക്കട: യുവാവിനെ കുത്തിക്കൊലപ്പെടുത്താന്‍ ശ്രമിച്ച സംഭവത്തില്‍ രണ്ടുപേരെക്കൂടി മ്യൂസിയം സിഐ വിമല്‍, എസ്ഐമാരായ വിപിന്‍, ഷിജു എന്നിവര്‍ ഉള്‍പ്പെട്ട സംഘം പിടികൂടി. മൂന്നാംപ്രതി പെരുങ്കടവിള സ്വദേശിയും നിലവില്‍ തമിഴ്‌നാട് കൊല്ലംകോട് കച്ചേരിനട അയ്യന്‍കോവിലിനു സമീപം താമസിച്ചുവരുന്നയാളുമായ അജിത്ത് (26), നാലാംപ്രതി കുളത്തൂര്‍ ചിറ്റക്കോട് വള്ളിവിള വീട്ടില്‍ ശ്രീജു (18) എന്നിവരാണ് പിടിയിലായത്. ഏപ്രില്‍ 7നു പുലര്‍ച്ചെയായിരുന്നു കേസിന്നാസ്പദമായ സംഭവം. കരിമഠം സ്വദേശി ഷിബിന്‍ (25) ആണ് കഴുത്തിനു കുത്തേറ്റ് തിരുവനന്തപുരം മെഡിക്കല്‍കോളജ് ആശുപത്രിയില്‍ ചികിത്സ തേടിയത്. തിരുവനന്തപുരം ഓവര്‍ബ്രിഡ്ജിന് സമീപം ഒരുമാസം മുമ്പ് ഒരു അടിപിടിയുണ്ടായിരുന്നു. ഷിബിന്‍റെ സുഹൃത്ത് കാല്‍വിന്‍ നടത്തിവരുന്ന മൊബൈല്‍ ഷോപ്പിലെത്തിയ പ്രതികൾ കാല്‍വിനുമായി പണത്തെച്ചൊല്ലി വാക്കുതര്‍ക്കമുണ്ടായി. ഇതില്‍ ഷിബിന്‍റെ ഇടപെടലുണ്ടായതാണു വിരോധത്തിന് കാരണമായത്. സംഭവദിവസം പട്ടത്തിനടുത്തുള്ള ഒരു ചായക്കടയിലെത്തിയ പ്രതികള്‍ ഷിബിനെ കാണുകയും ഇയാളെ കഴുത്തിനു കുത്തിപ്പരിക്കേല്‍പ്പിക്കുകയുമായിരുന്നു. കൃത്യം നടത്തിയശേഷം ഇന്നോവ കാറില്‍ രക്ഷപ്പെട്ട സംഘത്തില്‍ ഉള്‍പ്പെട്ട കാരോട് സ്വദേശികളായ ആദര്‍ശ് (19), അമിത്കുമാര്‍ (24) എന്നിവര്‍ നേരത്തെ പിടിയിലായിരുന്നു. ഒളിവില്‍ക്കഴിഞ്ഞു വരികയായിരുന്നു അജിത്തും ശ്രീജുവും. അസി. കമ്മീഷണര്‍ സ്റ്റ്യുവര്‍ട്ട് കീലറിന്‍റെ നേതൃത്വത്തില്‍ സിപിഒമാരായ ഷിനി, ശരത്ത്, അനീഷ്, ബിജു, സന്തോഷ്, അരുണ്‍ദേവ്, പത്മരാജ് എന്നിവരും അന്വേഷണസംഘത്തില്‍ ഉണ്ടായിരുന്നു. കോടതിയിലെ ഹാജരാക്കിയ പ്രതികളെ പതിനാല് ദിവസ ത്തേക്കു റിമാൻഡ് ചെയ്തു.

തലചായ്ക്കാനൊരിടം ഒരുക്കി ചിറ്റിലപ്പിള്ളി ഫൗണ്ടേഷന്‍

വെള്ളറട: ചിറ്റിലപിള്ളി ഫൗണ്ടേഷന്‍ സേവാഭാരതിയുമായി സഹകരിച്ചു നടപ്പിലാക്കുന്ന തലചായ്ക്കാനൊരിടം പദ്ധതി പൂര്‍ത്തിയാക്കി. ഒറ്റശേഖരമംഗലം പഞ്ചായത്തിലെ കടമ്പറ വാര്‍ഡില്‍ കുളങ്ങരമൂഴിയില്‍ അനികുട്ടനും കുടുംബത്തിനും നിര്‍മിച്ച വീടിന്‍റെ താക്കോല്‍ദാനം ആർഎസ്എസ് പ്രാന്ത കാര്യവാഹക് ടി.വി. പ്രസാദ് ബാബു നിർവഹിച്ചു. സേവാഭാരതി ഒറ്റശേഖരമംഗലം യൂണിറ്റ് പ്രസിഡന്‍റ് കെ. മോഹനകുമാര്‍ അധ്യക്ഷത വഹിച്ചു. സേവാഭാരതി ജില്ലാ വൈസ് പ്രസിഡന്‍റും സംസ്ഥാന സമിതി അംഗവുമായ ഡോ. സാബു കെ. നായര്‍ മംഗള പത്രസമര്‍പ്പണം നിര്‍വഹിച്ചു. കള്ളികാട് പഞ്ചായത്ത് പ്രസിഡന്‍റ് പന്ത ശ്രീകുമാര്‍, പഞ്ചായത്തംഗം വിജയന്‍ കള്ളിക്കാട് എന്നിവര്‍ ആശംസകള്‍ അര്‍പ്പിച്ചു. സേവാഭാരതി ഒറ്റശേഖരമംഗലം യൂണിറ്റ് സെക്രട്ടറി സി.യു. വിഷ്ണു സ്വാഗതവും വൈസ് പ്രസിഡന്‍റ് എം.വി. അജയകുമാർ നന്ദിയും പറഞ്ഞു.

കൊറ്റംപള്ളി സെന്‍റ് ജോർജ് പള്ളി തിരുനാൾ

കാട്ടാക്കട: കൊറ്റംപള്ളി സെന്‍റ് ജോർജ് പള്ളിയിലെ ഇടവക തിരുനാൾ ആരംഭിച്ചു. 27നു സമാപിക്കും. ഇന്നലെ വൈകുന്നേരം കൊടിയേറ്റം നടന്നു. തുടർന്നു നടന്ന ദിവ്യബലിക്കു കള്ളിക്കാട് ഇടവക വികാരി ഫാ. ബിനു വർഗീസ് മുഖ്യകാർമികനായി. തുടർന്നു ജീവിത നവീകരണ ധ്യാനം. 24-നും 25-നും വൈകുന്നേരം 5.30-ന് ജപമാല, ലിറ്റിനി, നൊവേന, ആറിന് ദിവ്യബലി. ഫാ. ആർ.പി. റോബിൻരാജ്, ജസ്റ്റിൻ ഫ്രാൻസിസ് എന്നിവർ മുഖ്യകാർമികരാകും. 26-ന് വൈകുന്നേരം ആറിന് ദിവ്യബലി. ഫാ. ജോസഫ് ലിവേര മുഖ്യകാർമികനാകും. തുടർന്ന് വചനപ്രഘോഷണം- ഫാ. ജിജോ ഫ്രാൻസിസ് കാർമികനാകും. തുടർന്നു തിരുസ്വരൂപ പ്രദക്ഷിണം. 27-ന് തിരുനാൾ ദിനത്തിൽ രാവിലെ 10-ന് ജപമാല, ലിറ്റിനി, നൊവേന, 10.30-ന് തിരുനാൾ സമൂഹ ദിവ്യബലി, നെയ്യാറ്റിൻകര രൂപതാ വികാരി ജനറൽ മോൺ. വിൻസന്‍റ് കെ.പീറ്റർ മുഖ്യകാർമികനാകും, വചനപ്രഘോഷണം ഫാ. കെ.ആർ. ലോറൻസ്, ദിവ്യകാരുണ്യ പ്രദക്ഷിണം.

വൈദ്യുതി ശ്മശാനം നോക്കുകുത്തി; യന്ത്രങ്ങൾ തുരുമ്പെടുത്തു നശിക്കുന്നു

എല്ലാ വീടുകളിലും കുടിവെള്ളം ഉറപ്പാക്കും: മന്ത്രി ജി.ആര്‍. അനിൽ

നേമം: പള്ളിച്ചല്‍ വാര്‍ഡില്‍ പുതുതായി നിര്‍മിച്ച പൂവട വാട്ടര്‍ ടാങ്കിന്‍റെ പ്രവര്‍ത്തനോദ്ഘാടനം മന്ത്രി ജി.ആര്‍. അനില്‍ നിര്‍വഹിച്ചു. പൂവട വാട്ടര്‍ ടാങ്ക് പ്രവര്‍ത്തനമാരംഭിക്കുന്നതോടെ പള്ളിച്ചല്‍, വിളവൂര്‍ക്കല്‍, ബാലരാമപുരം പഞ്ചായത്തുകളിലെ കുടിവെള്ള പ്രശ്‌നത്തിന് പരിഹാരം കാണാനാകും. നബാര്‍ഡില്‍ നിന്നും 10.24 കോടി ചെലവില്‍ 8.7ലക്ഷം ലിറ്റര്‍ സംഭരണശേഷിയുള്ള ഭൂതല ജലസംഭരണിയാണ് നിര്‍മിച്ചിരിക്കുന്നത്. ഐ.ബി. സതീഷ് എംഎല്‍എ അധ്യക്ഷത വഹിച്ചു. പഞ്ചായത്ത് പ്രസിഡന്‍റ് കെ. രാഘേഷ്, വൈസ് പ്രസിഡന്‍റ് വി.ശശികല, സെക്രട്ടറി എം.കെ. കവിത, ജനപ്രതിനിധികള്‍, ഉദ്യോഗസ്ഥര്‍ തുടങ്ങിയവര്‍ പങ്കെടുത്തു.

കാർഷിക വായ്പ തിരിച്ചടച്ചു : ഈടുവച്ച പ്രമാണം മടക്കി നൽകിയില്ല; പ്രതിഷേധിച്ച് കർഷകനും മകനും

മലയിൻകീഴ്: കാർഷിക വായ്പ തിരിച്ചടച്ചെങ്കിലും ഈടു നൽകിയ വസ്തുവിന്‍റെ പ്രമാണം മടക്കി നൽകിയില്ല. കർഷകനും മകനും ബാങ്കിനു മുന്നിൽ പ്രതിഷേധിച്ചു. ഇന്നലെ മലയിൻകീഴിലായിരുന്നു സംഭവം. മലയിൻകീഴ് ശാന്തുംമൂലയിൽ പ്രവർത്തിക്കുന്ന കാട്ടാക്കട പ്രാഥമിക സഹകരണ കാർഷിക ഗ്രാമ വികസന ബാങ്കിന്‍റെ ഹെഡ് ഓഫീസിനു മുന്നിലാണ് ഇരുവരും പ്രതിഷേധിച്ചത്. അമ്പൂരി പാലക്കാട് ഹൗസിൽ റോബിൻ ജേക്കബ്, മകൻ അഭി ജേക്കബ് എന്നിവരാണ് ഇന്നലെ പരാതി ഉന്നയിച്ചെത്തിയത്. പ്രമാണം തിരികെ ലഭിച്ചാൽ മാത്രമേ മകന്‍റെ വിദേശ പഠനത്തിനുള്ള പണം കണ്ടെത്താനാകൂവെന്നു റോബിൻ പറഞ്ഞു. ചെമ്പൂര് ശാഖയിൽ നിന്നും 2013വാണു റോബിൻ മൂന്നുലക്ഷം രൂപ വായ്പ എടുത്തത്. 2.9 ഏക്കർ വസ്തുവിന്‍റെ പുരയിടം ഇതിനായി ഈടു നൽകിയിരുന്നു. കടാശ്വാസ കമ്മിഷൻ നിജപ്പെടുത്തിയ രൂപയിൽ 1,75,000 രൂപ 2023ൽ തിരിടച്ചു. സമയപരിധിക്കുള്ളിൽ തുക അടയ്ക്കാത്തതിനാൽ 27,916 രൂപ ബാങ്കിൽ അടയ്ക്കണമെന്നും സത്യവാങ്മൂലം എഴുതി നൽകിയാൽ പ്രമാണം മടക്കി നൽകണമെന്നും ബാങ്ക് സെക്രട്ടറിക്കു സഹകരണ സംഘം ജോയിന്‍റ് രജിസ്ട്രാർ കത്ത് നൽകിയിട്ടുണ്ട് ഇതിനു തയാറാണെന്നറിയിച്ചിട്ടും ബാങ്കിലെ സെക്രട്ടറി പ്രമാണം വിട്ടുനൽകുന്നില്ലെന്നാണ് റോബിന്‍റെ പരാതി. എന്നാൽ, സഹകരണ സംഘം ജോയിന്‍റ് രജിസ്ട്രാറുടെ കത്തിൽ സൂചിപ്പിക്കുന്ന കാര്യങ്ങൾ ഭരണസമിതിയുടെ നിർദേശങ്ങൾക്കു അനുസൃതമായി മാത്രമേ നടപ്പാക്കാൻ സാധിക്കൂവെന്നും സംസ്ഥാന കാർഷിക ഗ്രാമ വികസന ബാങ്കിൽ നിന്നും നിർദേശം ലഭിക്കുന്ന മുറയ്ക്കു മാത്രമേ തുടർ നടപടി സ്വീകരിക്കാൻ കഴിയൂ എന്ന് സെക്രട്ടറി ബിജു അറിയിച്ചു. കൂടാതെ നബാർഡ് വഴിയുള്ള കാർഷിക വായ്പയ്ക്ക് കടാശ്വാസം ലഭിച്ചാലും സർക്കാരിന്‍റെയും കർഷകന്‍റെയും വിഹിതവും ലഭിക്കുന്നതുവരെ ഈട് നൽകിയ പ്രമാണം നിയമപ്രകാരം മടക്കി നൽകാൻ കഴിയില്ലെന്നും ഇതു പ്രകാരം റോബിന്‍റെ വായ്പയിൽ ഒരു ലക്ഷത്തോളം രൂപ തിരിച്ചടവ് ഉണ്ടെന്നും സെക്രട്ടറി പറഞ്ഞു. തുടർന്ന് ഇവർ മലയിൻകീഴ് പോലീസിൽ പരാതി നൽകി. മലയിൻകീഴ് പോലീസ് ഇൻസ്‌പെക്ടർ റോയിയുടെ സാന്നിധ്യത്തിൽ നടന്ന ചർച്ചയിൽ എന്തുകൊണ്ട് പ്രമാണം മടക്കി നൽകുന്നില്ലെന്നു സെക്രട്ടറി ബിജു രേഖാമൂലം എഴുതി നൽകിയതിനെ തുടർന്നാണ് റോബിനും മകനും മടങ്ങിയത്.

എൻസിസി മേധാവി മുഖ്യമന്ത്രിയുമായി കൂടിക്കാഴ്ച നടത്തി

തിരുവനന്തപുരം: അഞ്ച് ദിവസത്തെ സന്ദർശനത്തിനായി സംസ്ഥാനത്ത് എത്തിയ എൻസിസി മേധാവി ലെഫ്റ്റനന്‍റ് ജനറൽ ഗുർബിർപാൽ മുഖ്യമന്ത്രി പിണറായി വിജയനുമായി കൂടിക്കാഴ്ച നടത്തി. കേരളത്തിലെ എൻസിസി കേഡറ്റുകളുടെ എണ്ണം വർധിപ്പിക്കുന്നതിനെ സംബന്ധിച്ചും, കേഡറ്റുകളുടെ റിഫ്രഷ്മെന്‍റ് അലവൻസിനെ സംബന്ധിച്ചും ചർച്ച നടത്തി. തുടർന്നു പാങ്ങോട് സൈനിക കേന്ദ്രത്തിലെ കുളച്ചൽ സ്റ്റേഡിയത്തിൽ എൻ‌സി‌സി കേഡറ്റുകൾ ഡയറക്ടർ ജനറലിനു ഗാർഡ് ഓഫ് ഓണർ നൽകി.

ഫ്‌ളാറ്റിന്‍റെ 12-ാം നിലയില്‍ കുടുങ്ങിയ വയോധികനെ അഗ്നിശമനസേന രക്ഷിച്ചു

പേരൂര്‍ക്കട: ഫ്‌ളാറ്റിന്‍റെ 12-ാം നിലയില്‍ കുടുങ്ങിയ നേപ്പാള്‍ സ്വദേശിയായ വയോധികനെ തിരുവനന്തപുരം ഫയര്‍ഫോഴ്‌സ് സംഘം രക്ഷപ്പെടുത്തി. വെള്ളയമ്പലം ശ്രീരാഗം ലെയിനില്‍ എസ്എഫ്എസ് അപ്പാര്‍ട്ട്‌മെന്‍റിലെ ക്ലീനിംഗ് സ്റ്റാഫായ ശിവ ആചാര്യയാണ് ഡോര്‍ ലോക്കായി ഉള്ളില്‍ കുടുങ്ങിപ്പോയത്. ബുധനാഴ്ച രാവിലെ 9.30നായിരുന്നു സംഭവം. ആള്‍ത്താമസമില്ലാത്തതിനാല്‍ ഫ്‌ളാറ്റിലെ മുറികള്‍ വൃത്തിയാക്കാന്‍ ഇദ്ദേഹം സ്ഥിരമായി എത്താറുണ്ട്. ഡോര്‍ അടച്ചശേഷം ഫ്‌ളോര്‍ വൃത്തിയാക്കിക്കൊണ്ടിരിക്കുകയായിരുന്നു. ഉള്ളിലേക്ക് കയറാന്‍ നോക്കിയപ്പോള്‍ സാധിക്കാതെ വന്നു. ഫ്‌ളാറ്റിന്‍റെ മാനേജര്‍ അറിയിച്ച് തിരുവനന്തപുരം നിലയത്തില്‍ നിന്ന് സീനിയര്‍ ഫയര്‍ ആൻഡ് റസ്‌ക്യു ഓഫീസര്‍ സുധീര്‍, ഫയര്‍മാന്‍മാരായ വിഷ്ണുനാരായണന്‍, ബിജു, സൂരജ്, ഫയര്‍ ആൻഡ് റസ്‌ക്യു ഡ്രൈവര്‍ സുധീഷ്‌കുമാര്‍ എന്നിവര്‍ ചേര്‍ന്ന് ഒരുമണിക്കൂര്‍ പരിശ്രമിച്ചാണ് വയോധികനെ രക്ഷപ്പെടുത്തിയത്. എയര്‍ഹോളിന്‍റെ ഭാഗത്തുകൂടി ഫയര്‍ഫോഴ്‌സ് സംഘം ഇട്ടുകൊടുത്ത ബ്ലേഡ് ഉപയോഗിച്ച് ഡോറിന്‍റെ ഒരുഭാഗം മുറിച്ചശേഷമാണ് ഇദ്ദേഹം അകത്തേക്കു കയറിയത്. ഫ്‌ളാറ്റില്‍ കുടുങ്ങിയ ഉള്‍ഭയംമൂലം കുറേനേരം സ്തബ്ധനായിരുന്നുവെങ്കിലും ശിവ ആചാര്യ പിന്നീട് ഫയര്‍ഫോഴ്‌സ് ഉദ്യോഗസ്ഥര്‍ക്ക് നന്ദി അറിയിക്കുകയായിരുന്നു.

നെടുമങ്ങാട് മണ്ഡലത്തിലെ നാലായിരത്തിൽപരം കുടുംബങ്ങൾക്ക് മുൻഗണന കാർഡ് നൽകി: മന്ത്രി

നെടുമങ്ങാട്: മണ്ഡലത്തിലെ നാലായിരത്തിൽപരം കുടുംബങ്ങൾക്ക് മുൻഗണന കാർഡ് നൽകിയെന്ന് മന്ത്രി ജി.ആർ. അനിൽ. ആക്കോട്ടുപാറ -ചെല്ലാംകോട് - പൂവത്തൂർ- ഏലാ റോഡിന്‍റെ യും കോലാംകുടി - ഡൈമൺപാലം റോഡിന്‍റെയും നിർമ്മാണ ഉദ്ഘാടനം നിർവഹിച്ചു സംസാരിക്കുകയായിരുന്നു അദ്ദേഹം. മിക്കവാറും റോഡുകളും സഞ്ചാരയോഗ്യമാക്കാൻ കഴിഞ്ഞു. മണ്ഡലത്തിലെ എല്ലാ പ്രദേശത്തെയും ജനങ്ങളുടെ പൊതുവായ താല്പര്യത്തിനനുസരിച്ചുള്ള വികസന പ്രവർത്തനങ്ങളാണ് സർക്കാർ നേരിട്ടും തദ്ദേശസ്വയംഭരണ സ്ഥാപനങ്ങൾ വഴിയും നടപ്പിലാക്കുന്നത്. ജനങ്ങളുടെ ജീവിത പ്രയാസങ്ങൾ മാറ്റുവാനുള്ള നിരന്തരമായ ഇടപെടലുകൾ സർക്കാർ നടത്തുന്നുണ്ടെന്നും മന്ത്രി പറഞ്ഞു. സംസ്ഥാന സർക്കാരിന്‍റെ 2024-25 ബഡ്ജറ്റിൽ ഉൾപ്പെടുത്തി 45 ലക്ഷം രൂപ ഉപയോഗിച്ചാണ് ആക്കോട്ടുപാറ -ചെല്ലാംകോട് - പൂവത്തൂർ - ഏലാ റോഡ് നവീകരിക്കുന്നത്. തദ്ദേശ ഗ്രാമീണ റോഡ് വികസനഫണ്ടിൽ നിന്നും 28 ലക്ഷം രൂപ വിനിയോഗിച്ചാണ് കോലാംകുടി - ഡൈമൺപാലം റോഡ് നവീകരിക്കുന്നത് നെടുമങ്ങാട് നഗരസഭ ചെയർപേഴ്സൺ സി. എസ് ശ്രീജ അധ്യക്ഷത വഹിച്ചു.

പൊഴിയൂര്‍ ഗവ. യുപിഎസില്‍ ലഹരിക്കെതിരെ ഫുട്ബോള്‍ ക്യാന്പ് തുടങ്ങി

നെയ്യാറ്റിന്‍കര: ലഹരിക്കെതിരെ ഫുട്ബോൾ പദ്ധതിയുടെ ഭാഗമായ പരിശീലന ക്യാന്പിന് പൊഴിയൂര്‍ ഗവ. യുപിഎസില്‍ തുടക്കമായി. പൊതുവിദ്യാഭ്യാസ വകുപ്പും കൊമ്പൻസും ചേർന്നു ലഹരിക്കെതിരെ സംഘടിപ്പിക്കുന്ന ഫുട്ബോൾ കോച്ചിംഗിന്‍റെ ആദ്യഘട്ടം എന്ന നിലയ്ക്ക് തെരഞ്ഞെടുക്കപ്പെട്ട പത്തു വിദ്യാലയങ്ങളില്‍ പൊഴിയൂര്‍ ഗവ. യുപിഎസും ഉള്‍പ്പെടുന്നു. പൊഴിയൂരിന്‍റെ മണ്ണിനു പൊതുവേ കാല്‍പ്പന്തുകളിയോടു വല്ലാത്ത ഹൃദയാഭിമുഖ്യവുമുണ്ട്. ഏതു തലമുറയിലെ അംഗമായാലും കാല്‍പ്പന്തുകളി തീരാത്ത ആവേശത്തിന്‍റെ പ്രതീകമായാണ് പൊഴിയൂരുകാര്‍ കണക്കാക്കുന്നത്. എന്തായാലും തങ്ങളുടെ വിദ്യാലയത്തിന് ലഭിച്ച ഈ അവസരം കാര്യക്ഷമമായി വിനിയോഗിക്കാന്‍ തന്നെയാണ് സ്കൂള്‍ അധികൃതരുടെ തീരുമാനം. താത്പര്യമുള്ള അന്പതു വിദ്യാര്‍ഥികളെ പരിശീലനത്തിനായി തെരഞ്ഞെടുത്തു. അക്കൂട്ടത്തില്‍ 12 പേര്‍ പെണ്‍കുട്ടികളാണ്. തിങ്കള്‍ മുതല്‍ വെള്ളി വരെയുള്ള ദിവസങ്ങളില്‍ രാവിലെ ഏഴു മുതല്‍ ഒന്പതു വരെ സ്കൂള്‍ കോന്പൗണ്ടില്‍ തന്നെയാണ് പരിശീലനം. ഒരു മാസമാണ് പരിശീലനത്തിന്‍റെ കാലാവധി നിലവില്‍ നിശ്ചയിച്ചിട്ടുള്ളത്.

നൈലോൺ നെറ്റിൽ കുടുങ്ങിയ ചേരയെ അഗ്നിരക്ഷാസേന രക്ഷിച്ചു

വിഴിഞ്ഞം: വീട്ടിൽ വിറകുപുരയുടെ പുറത്തു വിരിച്ചിരുന്ന നൈലോൺ നെറ്റിൽ കുടുങ്ങിയ നിലയിൽ കണ്ടെത്തിയ ചേരയെ വിഴിഞ്ഞം ഫയർ ആൻഡ് റെസ്ക്യൂ സേന രക്ഷപ്പെടുത്തി. കഴിവൂർ വേങ്ങപ്പൊറ്റ ഗുരുദീപത്തിൽ ഗുരുപ്രസാദിന്‍റെ വീടിനു സമീപത്തു നിന്നാണ് പിടികൂടിയത്. രണ്ടു ദിവസമായി നെറ്റിൽ കുടുങ്ങി അവശനായി കിടന്ന ചേരയെ സുരക്ഷിതമായി നെറ്റ് മുറിച്ച് രക്ഷിച്ചു. ഗ്രേഡ് എഎസ്ടിഒ അലിഅക്ബർ, ഫയർ ആൻഡ് റെസ്ക്യൂ ഓഫീസർമാരായ സന്തോഷ് കുമാർ, ആന്‍റു, അജയ് സിംഗ്, ഹോം ഗാർഡ് ജോസ് എന്നിവർ ചേർന്നാണ് രക്ഷാപ്രവർത്തനം നടത്തിയത്.

വലിയതുറ (കൊച്ചെടത്വാ) സെന്‍റ് നിക്കോളാസ് പള്ളിയിലെ തിരുനാൾ കൊടിയേറ്റ് 27ന്

വിഴിഞ്ഞം: തിരുവനന്തപുരത്തെ പ്രശസ്ത തീർഥാടന കേന്ദ്രമായ പുതിയതുറ (കൊച്ചെടത്വ) സെന്‍റ് നിക്കോളാസ് ദേവാലയത്തിലെ വിശുദ്ധ ഗീവർഗീസ് സഹദായുടെ തിരുനാൾ കൊടിയേറ്റ് 27നു വൈകുന്നേരം നടക്കും. ആഗോള കത്തോലിക്ക സഭയുടെ തലവൻ ഫ്രാൻസിസ് മാർപാപ്പയുടെ മരണവുമായി ബന്ധപ്പെട്ട് 25-ാം തീയതി നടത്താനിരുന്ന കൊടിയേറ്റ് മാർപാപ്പയുടെ സംസ്കാര ചടങ്ങുകൾ നടക്കുന്ന ശനിയാഴ്ച കഴിഞ്ഞ് ഞായറാഴ്ച തിരുനാൾ ആരംഭിച്ച് മേയ് നാലിന് അവസാനിക്കുന്ന രീതിയിലേക്കു മാറ്റുകയായിരുന്നു. എന്നാൽ കുട്ടികളുടെ ആദ്യകുർബാനയും സ്ഥൈര്യലേപനവും മുൻ നിശ്ചയിച്ച പ്രകാരം ദേവാലയത്തിൽ ഉണ്ടായിരിക്കുമെന്നു ഇടവക വികാരി ഫാ. ഗ്ലാഡിൻ അലക്സ് അറിയിച്ചു.

ഭാര്യയെ ഷോക്കടിപ്പിച്ചു കൊലപ്പെടുത്തിയ കേസിൽ ഭര്‍ത്താവ് കുറ്റക്കാരന്‍

കോടതി ഉത്തരവ് ലംഘിച്ച് സ്വകാര്യ വ്യക്തികളുടെ കടമുറികള്‍ തകര്‍ത്തു

വെള്ളറട: റോഡ് പുനരുദ്ധാരണത്തിന്‍റെ മറവില്‍ കോടതി ഉത്തരവ് ലംഘിച്ച് സ്വകാര്യ വ്യക്തികളുടെ കടമുറികള്‍ ജെസിബി ഉപയോഗിച്ച് ഇടിച്ചു നശിപ്പിച്ചതായി പരാതി. കുന്നത്തുകാല്‍ കൂത്തക്കോട് റോഡരികത്തുവീട്ടില്‍ പരേതനായ പ്രകാശം, മാരായമുട്ടം കാളിവിളാകം രാജ് നിവാസില്‍ സിന്ധു എന്നിവരുടെ ഉടമസ്ഥതയില്‍ കുന്നത്തുകാല്‍ ജംഗ്ഷനില്‍ സ്ഥിതിചെയ്യുന്ന കട മുറികളാണ് വൈദ്യുതി ബന്ധം പോലും വിച്ഛേദിക്കാതെ അപകടമായ വിധത്തില്‍ തിങ്കളാഴ്ച്ച വൈകുന്നേരം ആറുമണിയോടെ ടിപിഎല്‍ ഇന്‍ഫ്രാ പ്രൈവറ്റ് ലിമിറ്റഡ് എന്ന പേരിലുള്ള കെഎല്‍ 16 എ, ബി. 8700 നമ്പര്‍ ജെസിബി ഉപയോഗിച്ച് ഇടിച്ച് നശിപ്പിച്ചത്. അമരവിള കാരക്കോണം റോഡ് പുനരുദ്ധാരണത്തിന്‍റെ ഭാഗമായി കടമുറികള്‍ സ്ഥിതിചെയ്യുന്ന സ്ഥലത്ത് പുറമ്പോക്ക് ഭൂമിയുണ്ടെന്ന പിഡബ്‌ള്യൂഡി അധികൃതരുടെ തര്‍ക്കത്തെ തുടര്‍ന്ന് ഭൂവുടമകള്‍ ഹൈക്കോടതിയെ സമീപിക്കുകയും പ്രസ്തുത സ്ഥലം പട്ടയ ഭൂമിയാണെന്നും റോഡുനിര്‍മാണത്തിന്‍റെ ഭാഗമായി കെട്ടിടം പൊളിക്കുകയോ സ്ഥലം കൈവശപ്പെടുത്തുകയോ ചെയ്യരുതെന്നു ഹൈക്കോടതി ഉത്തരവ് പുറപ്പെടുവിക്കുകയും ചെയ്തിരുന്നു. ഉത്തരവിന്‍റെ പകര്‍പ്പ് ഭൂവുടമ കെട്ടിടത്തില്‍ പതിച്ച് മിനിറ്റുകള്‍ക്കുള്ളിലായിരുന്നു യാതൊരു മുന്നറിയിപ്പുമില്ലാതെ ജെസിബി എത്തിച്ച് കട മുറികള്‍ ഇടിച്ചിട്ടതെന്നും കെട്ടിട ഉടമകള്‍ ആരോപിക്കുന്നു.സംഭവത്തെ തുടര്‍ന്നു കടയുടമകള്‍ വെള്ളറട പോലീസില്‍ പരാതി നല്‍കുകയും പിഡബ്‌ള്യു ഡി അധികൃതര്‍ക്കു വക്കീല്‍ നോട്ടീസ് നല്‍കുകയും വീണ്ടും കോടതിയെ സമീപിക്കുകയും ചെയ്തിട്ടുണ്ട്. എന്നാല്‍ കടമുറികള്‍ ഇടിച്ചത് തങ്ങളുടെ അറിവോടെയല്ലെന്നും ഉത്തരവാദികളായവര്‍ക്കെതിരേ നടപടി കൈക്കൊള്ളുന്നതില്‍ എതിര്‍പ്പില്ലെന്നുമാണ് പിഡബ്‌ള്യുഡി അതികൃതരുടെ പ്രതികരണം. അഞ്ചു മുറികള്‍ ഉള്‍പ്പെടുന്ന കെട്ടിടത്തിന്‍റെ ഒരുഭാഗം ജെസിബി ഉപയോഗിച്ച് ഇടിച്ചതോടെ കെട്ടിടത്തെ മുഴുവന്‍ ഭാഗത്തിനും കേടുപാട് സംഭവിച്ചതായും ലക്ഷങ്ങളുടെ നഷ്ടം സഭവിച്ചതായും കെട്ടിട ഉടമകള്‍ പറഞ്ഞു. റോഡ് നിര്‍മാണവുമായി ബന്ധപ്പെട്ട കുന്നത്തുകാല്‍ ജംഗ്ഷനില്‍ സ്ഥലമെടുപ്പുമായി ബന്ധപ്പെട്ട തര്‍ക്കങ്ങള്‍ നിലവിലുണ്ടെങ്കിലും കോടതി വിധി ലഭിച്ചത് ഇവര്‍ക്ക് മാത്രമാണ്.

സിവില്‍ സര്‍വീസ് : നെയ്യാറ്റിന്‍കരയ്ക്ക് അഭിമാനമായി സി.എസ്. ആദര്‍ശ്

നെയ്യാറ്റിന്‍കര : സ്കൂള്‍ വിദ്യാഭ്യാസ കാലത്തിലേ ഉള്ളി‍ലുറപ്പിച്ച സിവില്‍ സര്‍വീസ് സ്വപ്നം സാക്ഷാത്കരിക്കാനായതിന്‍റെ സന്തോഷത്തില്‍ സി.എസ്. ആദര്‍ശ്. നെയ്യാറ്റിന്‍കരയു‌ടെ അഭിമാനമാണ് ആദര്‍ശെന്ന് കെ. ആന്‍സലന്‍ എംഎല്‍എയുടെ അനുമോദനം. വെങ്കടമ്പ് ഊരംവിള ശാന്തി ഭവനിൽ പൊതുമരാമത്തു വകുപ്പു ജീവനക്കാരനായ എം. ക്രിസ്തുദാസിന്‍റെയും കഴിവൂർ ഗവ. എച്ച്എസിലെ അധ്യാപിക പി.എസ് ഷൈനിയുടെയും മകനാണ് ആദര്‍ശ്. കുളത്തൂർ ഗവ. ഹയര്‍സെക്കന്‍ഡറി സ്കൂളില്‍ നിന്നാണ് എസ്എസ്എൽസി പൂര്‍ത്തിയാക്കിയത്. സിവില്‍ സര്‍വീസില്‍ നെയ്യാറ്റിന്‍കരയുടെ ഉജ്വല തിളക്കങ്ങളായ ഹരിത വി. കുമാര്‍, രേഷ്മ എന്നിവരെ പോലെ നെയ്യാറ്റിന്‍കര ഗവ. ബോയ്സ് ഹയര്‍സെക്കന്‍ഡറി സ്കൂളില്‍ ഹയര്‍സെക്കന്‍ഡറി വിദ്യാഭ്യാസം. വെള്ളായണി കാർഷിക കോളജിൽനിന്നു ബിഎസ്‌സി അഗ്രിക്കൾച്ചറിലെ ഉന്നത വിജയത്തിനുശേഷം സിവില്‍ സര്‍വീസ് പരീക്ഷയ്ക്കായി ഒരുക്കങ്ങള്‍ തുടങ്ങി. ഒരു വര്‍ഷം കോച്ചിംഗ് ക്ലാസില്‍ പങ്കെടുത്തു. തിരുവനന്തപുരത്തെ ഒരു പരിശീലന സ്ഥാപനത്തിലായിരുന്നു കോച്ചിംഗ്. ഒടുവില്‍ പരീക്ഷാ ഫലം വന്നപ്പോള്‍ 457 -ാം റാങ്ക്. കെ. ആന്‍സലന്‍ എംഎല്‍എ യ്ക്കു പുറമേ പ്ലാമൂട്ടുക്കടയിലെ അയല്‍പക്ക സൗഹൃദ സദസ്, നേതാജി ഗ്രന്ഥശാല എന്നിവയും ആദര്‍ശിന് സമൂഹമാധ്യമത്തിലൂടെ അനുമോദനം അറിയിച്ചിട്ടുണ്ട്.

പാളയം മാര്‍ക്കറ്റ്; വ്യാപാരികള്‍ പുതിയ കടമുറികളിലേക്കു മാറി

പേരൂര്‍ക്കട: പാളയം മാര്‍ക്കറ്റില്‍ നവീകരിച്ച കടമുറികളിലേക്ക് ഒരുവിഭാഗം വ്യാപാരികള്‍ മാറി. ഏകദേശം 150നും 200നും ഇടയ്ക്കു വരുന്ന വ്യാപാരി സംഘങ്ങളാണ് പുതിയ കടമുറികളിലേക്ക് മാറാന്‍ സന്നദ്ധത പ്രകടിപ്പിച്ചത്. ഇതിനുള്ള നടപടിക്രമങ്ങള്‍ നടന്നുവരുന്നുണ്ട്. മതിയായ സൗകര്യങ്ങളില്ലെന്ന് ആരോപിച്ച് കുറച്ചു വ്യാപാരികള്‍ പഴയ സ്ഥലത്തുതന്നെ കച്ചവടം നടത്തിവരുന്നുണ്ട്. അവരെ ഒഴിപ്പിക്കുകയോ എഗ്രിമെന്‍റ് റദ്ദാക്കുകയോ വേണ്ടിവരുമെന്നു പാളയം വാര്‍ഡ് കൗണ്‍സിലര്‍ പാളയം രാജന്‍ പറഞ്ഞു. കഴിഞ്ഞമാസം അവസാനമായിരുന്നു വ്യാപാരികള്‍ക്കു പുതിയ കടമുറികളിലേക്ക് മാറുന്നതിന് നഗരസഭ നല്‍കിയിരുന്ന സമയം. നിലവില്‍ പഴയ കടമുറികള്‍ നഗരസഭ ഏറെക്കുറെ പൊളിച്ചുമാറ്റിക്കഴിഞ്ഞു.

സജാദ് വധശ്രമക്കേസ്; പ്രതികളെ കോടതി ശിക്ഷിച്ചു

പേരൂര്‍ക്കട: ചാലയിലെ വ്യാപാരിയായ സജാദിനെ വധിക്കാന്‍ ശ്രമിച്ച സംഭവത്തില്‍ മൂന്നുപേരെ വഞ്ചിയൂര്‍ സെഷന്‍സ് കോടതി ശിക്ഷിച്ചു. മണക്കാട് കരിമഠം സ്വദേശികളായ ബിനു ഷാജഹാന്‍, സവാള സലീം എന്നറിയപ്പെടുന്ന സലീം, സുധി എന്നുവിളിക്കുന്ന സുധീര്‍ എന്നിവരെയാണ് ഏഴുവര്‍ഷത്തേക്ക് കോടതി ശിക്ഷിച്ചത്. 2015-ലാണ് കേസിന്നാസ്പദമായ സംഭവം. ചാലയില്‍ പൗരസമിതിയുടെ മേല്‍നോട്ടത്തിലുണ്ടായിരുന്ന വെയിറ്റിംഗ് ഷെഡ് പരാതി നല്‍കി പൊളിപ്പിച്ചതിലുള്ള വൈരാഗ്യമായിരുന്നു ആക്രമണത്തിനു കാരണം.

ജല അഥോറിറ്റി ഓഫീസിലെ മർദനം : തുടർനടപടി ജില്ലാ പോലീസ് മേധാവിക്ക് തീരുമാനിക്കാം: മനുഷ്യാവകാശ കമ്മീഷൻ

തിരുവനന്തപുരം : കുടിവെള്ള കണക്്ഷൻ വിച്ഛേദിച്ചതിനെക്കുറിച്ച് അന്വേഷിക്കാൻ ജലഅഥോറിറ്റിയുടെ പോങ്ങുംമൂട് ഓഫീസിലെത്തിയ ഉപഭോക്താവിനെ ഉദ്യോഗസ്ഥർ മർദിച്ചെന്ന പരാതിയിൽ ഉദ്യോഗസ്ഥർക്കെതിരെയുള്ള തുടർനടപടി സിറ്റി പോലീസ് മേധാവിക്കു തീരുമാനിക്കാമെന്ന് മനുഷ്യാവകാശ കമ്മീഷൻ ചെയർപേഴ്സണ്‍ ജസ്റ്റീസ് അലക്സാണ്ടർ തോമസ്. തനിക്കു പരാതിയില്ലെന്നും ആർക്കും പരാതി നൽകിയിട്ടില്ലെന്നും മർദനമേറ്റ ഉപഭോക്താവ് സജി പോലീസിനു മൊഴി നൽകിയതായി സിറ്റി പോലീസ് കമ്മീഷണർക്കുവേണ്ടി കഴക്കൂട്ടം സൈബർ സിറ്റി അസിസ്റ്റന്‍റ് കമ്മീഷണർ കമ്മീഷൻ സിറ്റിംഗിൽ നേരിട്ട് ഹാജരായി മൊഴി നൽകിയ സാഹചര്യത്തിലാണ് ഉത്തരവ്. സജി മെഡിക്കൽ കോളജ് എസ്എച്ച്ഒയ്ക്കു നൽകിയ മൊഴിയുടെ പകർപ്പും എസിപി ഹാജരാക്കി. അതേ സമയം ജലഅഥോറിറ്റി പോങ്ങുംമൂട് സെക്്ഷനിലെ ആരോപണവിധേയരായ ഉദ്യോഗസ്ഥർക്കെതിരെ സർവീസ് ചട്ടങ്ങൾ പ്രകാരം ജലഅഥോറിറ്റി സ്വീകരിച്ച സസ്പെൻഷൻ ഉൾപ്പെടെയുള്ള അച്ചടക്കനടപടികൾ നിയമവും ചട്ടവും അനുസരിച്ച് എത്രയും വേഗം പൂർത്തിയാക്കി നിയമപരമായ നടപടി സ്വീകരിക്കണമെന്ന് ജസ്റ്റീസ് അലക്സാണ്ടർ തോമസ് ജല അഥോറിറ്റി ദക്ഷിണമേഖലാ ചീഫ് എൻജിനീയർക്ക് നിേർദശം നൽകി. ജൂനിയർ സൂപ്രണ്ട്, ഹെഡ് ക്ലാർക്ക് എന്നിവരെ സസ്പെൻഡ് ചെയ്തതായും യുഡി, എൽഡി ക്ലാർക്കുമാരെ സ്ഥലംമാറ്റിയെന്നും ജലഅഥോറിറ്റി ദക്ഷിണ മേഖലാ ചീഫ് എൻജിനീയറുടെ റിപ്പോർട്ടിൽ പറയുന്നു. സർക്കാർ ഓഫീസിലെത്തിയ വ്യക്തിക്കു മർദനമേറ്റെന്നതായുള്ള പരാതി ക്രമസമാധാന വിഷയമായതിനാലാണു ജില്ലാ പോലീസ് മേധാവിയിൽനിന്നും കമ്മീഷൻ അന്വേഷണ റിപ്പോർട്ട് വാങ്ങിയത്. പത്രവാർത്തയുടെ അടിസ്ഥാനത്തിൽ സ്വമേധയാ രജിസ്റ്റർ ചെയ്ത കേസിനു പുറമെ അയിരൂപ്പാറ സ്വദേശി സനൽ കുമാറും ഇതേ വിഷയത്തിൽ കമ്മീഷന് പരാതി നൽകിയിരുന്നു.

Deepika.com

The Largest Read Malayalam Internet Daily

Quick Links

Rashtra Deepika LTD

Deepika.com

The Largest Read Malayalam Internet Daily

Local News

Quick Links

Rashtra Deepika LTD