വഖഫ് ദേദഗതി: ജെപിസി യോഗങ്ങള്‍ ബഹിഷ്‌കരിക്കുമെന്ന് കല്യാണ്‍ ബാനര്‍ജി
Friday, November 8, 2024 12:32 AM IST
കോല്‍ക്കത്ത: വഖഫ് ഭേദഗതിക്കായി നിയോഗിച്ച ജോയിന്‍റ് പാര്‍ലമെന്‍ററി കമ്മീഷന്‍റെ(ജെപിസി) ചെയര്‍മാനും ബിജെപി നേതാവുമായ ജഗദംബിക പാല്‍ ധിക്കാരപരവും ഏകപക്ഷീയവുമായ സമീപനമാണ് സ്വീകരിക്കുന്നതെന്നു തൃണമൂല്‍ കോണ്‍ഗ്രസ് എംപി കല്യാണ്‍ ബാനര്‍ജി ആരോപിച്ചു.
ഈ മാസം ഒന്‍പതിന് ആരംഭിക്കാനിരിക്കുന്ന ജെപിസിയുടെ തുടര്‍ചര്‍ച്ചകള്‍ പ്രതിപക്ഷ അംഗങ്ങള്‍ ബഹിഷ്‌കരിക്കുമെന്നും അദ്ദേഹം പറഞ്ഞു.
ആഴ്ചയില്‍ ആറു ദിവസങ്ങളിലായി വിവിധ നഗരങ്ങളില്‍ യോഗങ്ങള്‍ ക്രമീകരിക്കുക വഴി താങ്ങാനാവാത്ത ജോലിഭാരമാണു ചെയര്‍മാന്‍ അംഗങ്ങള്‍ക്കുമേല്‍ അടിച്ചേല്‍പ്പിക്കുന്നത്. ഇതുമൂലം സ്വന്തം മണ്ഡലങ്ങളില്‍ ശ്രദ്ധകേന്ദ്രീകരിക്കാന്‍ അംഗങ്ങള്‍ക്കു കഴിയുന്നില്ലെന്നും ബാനര്‍ജി പറഞ്ഞു.
കഴിഞ്ഞ മാസം 22ന് നടന്ന ജെപിസിയുടെ യോഗത്തില്‍ കൈയാങ്കളി നടത്തിയതിനും കുപ്പി അടിച്ചുപൊട്ടിച്ചതിനും ബാനര്‍ജിയെ ഒരു ദിവസത്തേക്കു സസ്‌പെന്‍ഡ് ചെയ്തിരുന്നു.