കേരളത്തിൽ നെൽകൃഷി വ്യാപനത്തിനു മുന്നിട്ടിറങ്ങും: റോഷി അഗസ്റ്റിൻ
Wednesday, October 23, 2024 1:11 AM IST
തൃശൂർ: ഭക്ഷ്യോത്പാദനത്തിൽ കേരളത്തെ സ്വയംപര്യാപ്തമാക്കാൻ കേരള കോണ്ഗ്രസ്-എം എല്ലാ ജില്ലകളിലും നെൽകൃഷിയിലേക്ക് ഇറങ്ങുമെന്നു ജലവിഭവമന്ത്രി റോഷി അഗസ്റ്റിൻ.
കെ.എം. മാണി കാർഷികസമൃദ്ധി പദ്ധതിപ്രകാരം ‘ഞങ്ങളും നെൽകൃഷിയിലേക്ക്’ എന്ന പദ്ധതിയുടെ പ്രഖ്യാപനവും ഉദ്ഘാടനവും തൃശൂർ പുല്ലഴി കോൾപ്പാടത്തു നിർവഹിച്ചു പ്രസംഗിക്കുകയായിരുന്നു അദ്ദേഹം.
നെല്ലുത്പാദനം വർധിപ്പിക്കാൻ സർക്കാർ കൂടുതൽ ഊന്നൽ നൽകുമെന്നു മന്ത്രി പറഞ്ഞു. നെൽകർഷകരുടെ പ്രശ്നങ്ങൾ പരിഹരിക്കാൻ റവന്യു, കൃഷിവകുപ്പ് മന്ത്രിമാരുമായി ചർച്ച നടത്തുമെന്നും അദ്ദേഹം പറഞ്ഞു.
കോൾമേഖലയിലെ വിവിധ പ്രശ്നങ്ങളെക്കുറിച്ച് ജലസേചനവകുപ്പ്, കൃഷിവകുപ്പ് ഉദ്യോഗസ്ഥരുമായി മന്ത്രി ചർച്ച നടത്തി.
കോൾപ്പടവ് സഹകരണസംഘം പ്രസിഡന്‍റ് ഗോപിനാഥൻ കൊളങ്ങാട്ട്, കേരള കോണ്ഗ്രസ്-എം ജില്ലാ പ്രസിഡന്‍റ് ഉണ്ണികൃഷ്ണൻ ഈച്ചരത്ത്, ഉന്നതാധികാരസമിതിയംഗം സെബാസ്റ്റ്യൻ ചൂണ്ടൽ, സംസ്ഥാന സ്റ്റിയറിംഗ് കമ്മിറ്റിയംഗം ബേബി മാത്യു കാവുങ്കൽ, സംസ്ഥാന സെക്രട്ടേറിയറ്റ് അംഗം അഡ്വ.പി.ഐ. മാത്യു, ജില്ലാ സെക്രട്ടറിമാരായ ബേബി നെല്ലിക്കുഴി, സെബാസ്റ്റ്യൻ ജോസ് മഞ്ഞളി, പോളി റാഫേൽ, ജില്ലാ ട്രഷറർ കെ.എ. വിൻസന്‍റ്, കർഷകയൂണിയൻ ജില്ലാ പ്രസിഡന്‍റ് ജോസ് മുതുകാട്ടിൽ, നെൽക്കർഷക യൂണിയൻ ജില്ലാ പ്രസിഡന്‍റ് എ.ഐ. കൃഷ്ണൻകുട്ടി, കേരള യൂത്ത് ഫ്രണ്ട് -എം ജില്ലാ പ്രസിഡന്‍റ് പീറ്റർ പാവറട്ടി, ലോയേഴ്സ് കോണ്ഗ്രസ് ജില്ലാ പ്രസിഡന്‍റ് അഡ്വ. സജൂഷ് മാത്യു തുടങ്ങിയവർ പ്രസംഗിച്ചു.