ആകാശപാതവിവാദം കൊഴുക്കുന്നു
1483797
Monday, December 2, 2024 5:54 AM IST
ഊരാളുങ്കല്‍ സൊസൈറ്റിയെ കൊണ്ടുവന്ന് ആകാശപാത ഇല്ലാതാക്കാന്‍ ശ്രമം: തിരുവഞ്ചൂര്‍
കോട്ടയം: ഊരാളുങ്കല്‍ സൊസൈറ്റിക്ക് നിര്‍മാണം കൊടുക്കാന്‍ നാടിന്‍റെ മുഖമാവേണ്ട ആകാശപാത ഇല്ലാതാക്കാന്‍ ശ്രമമെന്ന് തിരുവഞ്ചൂര്‍ രാധാകൃഷ്ണന്‍ എംഎല്‍എ. പണമില്ലാത്തതിനാലാണ് ആദ്യം പണി മുടങ്ങിയത്. ഇപ്പോഴുന്നയിക്കുന്ന സ്ഥലത്തിന്‍റെ വിഷയം ഇതുവരെ തന്നെ അറിയിച്ചിട്ടില്ലെന്നും തിരുവഞ്ചൂര്‍ രാധാകൃഷ്ണന്‍ പത്രസമ്മേളനത്തില്‍ പറഞ്ഞു.
നാറ്റ്പാക്കിന്‍റെ പഠനറിപ്പോര്‍ട്ടിന്‍റെ അടിസ്ഥാനത്തിലാണ് ആകാശപ്പാത നിര്‍മാണം ആരംഭിച്ചത്. പദ്ധതി സുഗമമായി മുന്നോട്ടുകൊണ്ടുപോയ കിറ്റ്കോ തുടരണമെന്നു മന്ത്രിമാര്‍ ആവശ്യപ്പെട്ടതാണ്. മന്ത്രിതല ചര്‍ച്ചകള്‍ക്കു പിന്നാലെ ചേര്‍ന്ന ഉദ്യോഗസ്ഥതല യോഗമാണ് കിറ്റ്കോ തുടരണമോ അതോ ഊരാളുങ്കല്‍പോലുള്ള സൊസൈറ്റികള്‍ വേണമോയെന്ന തീരുമാനത്തിലെത്തിയത്.
പണം അനുവദിച്ച് ഏജന്‍സിയെ ചുമതലപ്പെടുത്തിയ പദ്ധതിയാണ് പാതിവഴിയില്‍ ഇല്ലാതായത്. പണം കൊടുത്താല്‍ എട്ടുമാസത്തിനുള്ളില്‍ പൂര്‍ത്തിയാക്കുമെന്ന് കിറ്റ്കോ അറിയിച്ചിരുന്നു. ഒമ്പതു വര്‍ഷമായി പെയിന്‍റുപോലും ചെയ്യാതെ മഴയും വെയിലുമേറ്റു കിടക്കുന്നതിനാലാണ് തൂണുകള്‍ തുരുമ്പിക്കുന്നത്. 2022ല്‍ പദ്ധതി പൂര്‍ത്തീകരണത്തിന് ആവശ്യമായ തുക ആസ്തി വികസന ഫണ്ടില്‍നിന്ന് അനുവദിക്കാമോയെന്നു ചോദിച്ച് കളക്‌ടര്‍ കത്തയച്ചിരുന്നു. അനുവദിക്കാമെന്നറിയിക്കുകയും ചെയ്തു. അന്നൊന്നും സ്ഥല, സാങ്കേതിക പ്രശ്നം പറഞ്ഞില്ല.
ഏറ്റവുമൊടുവില്‍ കഴിഞ്ഞ ഏപ്രിലില്‍ മുഖ്യമന്ത്രിക്കു കത്തയച്ചു. എന്നാല്‍, ഈ ഫയല്‍ പദ്ധതിയുമായി യാതൊരു ബന്ധവുമില്ലാത്ത തദ്ദേശ സ്വയംഭരണ മന്ത്രിക്കാണു നല്‍കിയത്. ഇപ്പോള്‍ ചിലര്‍ ആരോപണങ്ങളുന്നയിച്ച് വെല്ലുവിളിക്കുകയാണ്. ആക്രാന്തംകൊണ്ടാണ് വെല്ലുവിളിക്കുന്നത്. താന്‍ ആരെയും വെല്ലുവിളിക്കാനില്ലെന്നും ഈരയില്‍ക്കടവ് ബൈപാസ് റോഡിനും ഇതേ തടസം ഉന്നയിച്ചിരുന്നെന്നും തിരുവഞ്ചൂര്‍ പറഞ്ഞു.
ഡിസിസി പ്രസിഡന്‍റ് നാട്ടകം സുരേഷ്, യുഡിഎഫ് ജില്ലാ ചെയര്‍മാന്‍ ഫില്‍സണ്‍ മാത്യു ജോണ്‍, കോണ്‍ഗ്രസ് ബ്ലോക്ക് പ്രസിഡന്‍റുമാരായ സിബി ജോണ്‍, എന്‍. ജയചന്ദ്രന്‍ എന്നിവരും പത്രസമ്മേളനത്തില്‍ പങ്കെടുത്തു.