ആലപ്പുഴ: ആധാരം എഴുത്ത് അസോസിയേഷന് (ഓള് കേരള ഡോക്യൂമെന്റ് റൈറ്റേഴ്സ് ആൻഡ് സ്ക്രൈബ്സ് അസോസിയേഷന്) 9, 10, 11 തീയതികളില് ആലപ്പുഴയില് നടത്തുന്ന ഇരുപത്തിനാലാമത് സംസ്ഥാന സമ്മേളനത്തിന്റെ ഭാഗമായി രണ്ടു ദിവസം നീണ്ടുനില്ക്കുന്ന ജില്ലാ തല വാഹന പ്രചാരണ സന്ദേശ യാത്രയ്ക്കു തുടക്കമായി. അമ്പലപ്പുഴ കച്ചേരി മുക്കില് നടന്ന വാഹന പ്രചാരണ സന്ദേശ യാത്ര ആധാരം എഴുത്ത് അസോസിയേഷന് സംസ്ഥാന പ്രസിഡന്റ് കെ.ജി. ഇന്ദുകലാധരന് ഉദ്ഘാടനം ചെയ്തു.
ആലപ്പുഴ ജില്ലാ പ്രസിഡന്റും സ്വാഗതസംഘം ചെയര്മാനുമായ പി.ടി. ജോണ് പെരുംപള്ളില് അധ്യക്ഷത വഹിച്ചു. ജില്ലാ സെക്രട്ടറി എം.പി. മധുസൂദനന്, ട്രഷറര് ഒ. നിസാര്, റെജിമോന് അമ്പലപ്പുഴ എന്നിവര് പ്രസംഗിച്ചു. തുടര്ന്ന് കെ.ജി. ഇന്ദുകലാധരന് ജാഥാ ക്യാപ്റ്റനും പി.ടി. ജോണ് പെരുംപള്ളില് വൈസ് ക്യാപ്റ്റനുമായിട്ടുള്ള വാഹന പ്രചാരണ സന്ദേശ യാത്ര ആലപ്പുഴ ജില്ലയിലെ വടക്കന് മേഖലയിലെ അമ്പലപ്പുഴ, ആലപ്പുഴ, കുട്ടനാട് പുളിങ്കുന്ന്, മാരാരിക്കുളം, പുത്തനമ്പലം , ചേര്ത്തല, പാണാവള്ളി, കുത്തിയതോട് എന്നിവിടങ്ങളില് സ്വീകരണം ഏറ്റുവാങ്ങിയ ശേഷം പട്ടണക്കാട്ട് ഒന്നാം ദിവസത്തെ പ്രചാരണ സന്ദേശ യാത്രയ്ക്കു സമാപനമായി.
ജില്ലയിലെ തെക്കന് മേഖലയിലെ രണ്ടാം ദിവസത്തെ പ്രചാരണ സന്ദേശ വാഹന ജാഥ മെയ് മൂന്നിന് ഹരിപ്പാട്, ചേപ്പാട്, കീരിക്കാട്, കരീലകുളങ്ങര, കായംകുളം, ഭരണിക്കാവ്, നൂറനാട്, ചെറിയനാട്, ചെങ്ങന്നൂര്, മാന്നാര് എന്നിവിടങ്ങളില് സ്വീകരണങ്ങള് ഏറ്റുവാങ്ങിയ ശേഷം മാവേലിക്കരയില് സമാപിയ് ക്കും.
അസോസിയേഷന് സംസ്ഥാന ജനറല് സെക്രട്ടറി എ. അന്സാര് ജാഥ ക്യാപ്റ്റനും ജില്ലാ സെക്രട്ടറി എം.പി. മധുസൂദനന് വൈസ് ക്യാപ്റ്റനുമായിട്ടുള്ള സംഘമാണ് രണ്ടാം ദിനത്തിലെ പ്രചാരണ സന്ദേശ യാത്രയ്ക്കു നേതൃത്വം നല്കുന്നത്.