ലോക്സഭാ തെരഞ്ഞെടുപ്പിൽ തോറ്റ രമ്യ ഹരിദാസിന് കോൺഗ്രസ് നേതൃത്വം ഒരവസരംകൂടി നൽകിയിരിക്കുകയാണ്. തൃശൂരിൽ കെ. മുരളീധരന്‍റെ കനത്ത തോൽവിയെത്തുടർന്ന് ജില്ലാ കോണ്ഗ്രസ് നേതൃത്വം അടിമുടി ഉലഞ്ഞുനിൽക്കുന്പോൾ വിജയമല്ലാതെ മറ്റൊന്നും അവർക്കും ചിന്തിക്കാനാകില്ല.
തൃശൂരിലെ തോൽവിക്കു ചേലക്കരയിൽ മറുപടി വേണമെന്ന കർശനനിർദേശം കെപിസിസിയും ജില്ലാ നേതാക്കൾക്കു നൽകിയിട്ടുണ്ട്. ചുമതലകളും വിഭജിച്ചുനൽകി മുന്നൊരുക്കങ്ങളും ആരംഭിച്ചു.
ലോക്സഭാ തെരഞ്ഞെടുപ്പിൽ ചേലക്കരയിൽ രാധാകൃഷ്ണനെക്കാൾ അയ്യായിരം വോട്ടിന്റെ കുറവുമാത്രമാണ് രമ്യക്കുള്ളത്. 2019ലെ ലോക്സഭാ തെരഞ്ഞെടുപ്പിൽ ആലപ്പുഴയിൽ പരാജയപ്പെട്ട ഷാനിമോൾ ഉസ്മാൻ ആ വർഷംതന്നെ അരൂർ മണ്ഡലത്തിൽ മത്സരിച്ചതിനു സമാനമായാണ് രമ്യക്കും അവസരം നൽകിയത്.
ചേലക്കര ഉൾപ്പെടുന്ന ആലത്തൂരിൽ ഒരുലക്ഷത്തോളം വോട്ട് വർധിച്ചതാണ് ബിജെപിയുടെ പ്രതീക്ഷ. സരസുവിന് 28,974 വോട്ടുകളാണ് ചേലക്കരയിൽ ലഭിച്ചത്. 2021ലെ നിയമസഭാ തെരഞ്ഞെടുപ്പിനെക്കാൾ നാലായിരത്തോളം വോട്ടുകൾ കൂടി.
1965 ൽ നിലവിൽ വന്ന പട്ടികജാതിസംവരണ മണ്ഡലമായ ചേലക്കരയിൽ ആറുവട്ടം കോണ്ഗ്രസും എട്ടുതവണ സിപിഎമ്മുമാണ് വിജയിച്ചത്. ദേശമംഗലം, വരവൂർ, വള്ളത്തോൾനഗർ, മുള്ളൂർക്കര, പാഞ്ഞാൾ, ചേലക്കര, കൊണ്ടാഴി, പഴയന്നൂർ, തിരുവില്വാമല എന്നീ ഒന്പതു പഞ്ചായത്തുകളാണ് മണ്ഡലത്തിലുള്ളത്.
ആറിലും എൽഡിഎഫ് ഭരണം. കൊണ്ടാഴിയിലും പഴയന്നൂരിലും യുഡിഎഫ്. തിരുവില്വാമല പഞ്ചായത്തിൽ ബിജെപി അധികാരത്തിൽ എത്തിയെങ്കിലും സിപിഎമ്മും കോണ്ഗ്രസും സംയുക്തമായി നടത്തിയ അവിശ്വാസനീക്കത്തിൽ ഭരണംപോയി.