കേസുകൾ കെട്ടിക്കിടക്കാനുള്ള കാരണം ജീവനക്കാരുടെ കുറവിനൊപ്പം അവരുടെ ഉദാസീനതയാണെന്നും റിപ്പോർട്ടിൽ സൂചിപ്പിക്കുന്നു. പരിശോധനാഫലം വൈകുന്നതിലൂടെ ക്രിമിനൽ കേസുകളിൽ തീർപ്പുകൽപ്പിക്കലും വൈകും. കുറ്റവാളികൾ നിയമത്തിന്‍റെ പിടിയിൽനിന്നു രക്ഷപ്പെടുന്നതിനു കാരണമാവുകയും ചെയ്യും. സാന്പിളുകൾ കെട്ടിക്കിടക്കുന്ന സാഹചര്യം നീതിന്യായ നിർവഹണ പ്രക്രിയയിലെ കുപ്പിക്കഴുത്ത്’ ആണെന്നും ഈ വിഷയം അടിയന്തരമായി പരിഹരിക്കണമെന്നും റിപ്പോർട്ടിൽ ശിപാർശയുണ്ട്.
കെട്ടിക്കിടക്കുന്നത് ഒന്നര ലക്ഷത്തിലധികം സാന്പിളുകൾ കുറ്റകൃത്യങ്ങളുമായി ബന്ധപ്പെട്ടു വിവിധ നീതിന്യായ കോടതികളും മറ്റ് അന്വേഷണ ഏജൻസികളും ലബോറട്ടറികളിലേക്ക് അയയ്ക്കുന്ന തൊണ്ടിവസ്തുക്കളുടെ രാസപരിശോധന നടത്തി ശാസ്ത്രീയ തെളിവുകൾ നൽകി നീതിനിർവഹണത്തിൽ ജുഡീഷറിയെ സഹായിക്കുകയാണു കെമിക്കൽ എക്സാമിനേഴ്സ് ലബോറട്ടറി വകുപ്പിന്‍റെ പ്രധാന ചുമതല. സെറോളജി, ടോക്സിക്കോളജി, എക്സൈസ്, നർക്കോട്ടിക്സ്, ജനറൽ കെമിസ്ട്രി എന്നീ വിഭാഗങ്ങളിലാണു രാസപരിശോധന നടത്തുന്നത്. തിരുവനന്തപുരം, കോഴിക്കോട്, എറണാകുളം എന്നിവിടങ്ങളിലാണ് കെമിക്കൽ എക്സാമിനേഴ്സ് വകുപ്പിനു കീഴിൽ രാസപരിശോധനാ ലബോറട്ടറികളുള്ളത്.
ഈ വർഷം ഏപ്രിൽ 31 വരെയുള്ള കണക്കനുസരിച്ച് കെമിക്കൽ എക്സാമിനേഴ്സ് വകുപ്പിന്‍റെ മൂന്നു ലബോറട്ടറികളിലായി 62,558 കേസുകളിലെ 1,69,188 സാന്പിളുകളാണ് പരിശോധന കാത്തുകിടക്കുന്നത്. 2012-13 സാന്പത്തിക വർഷാവസാനം 31,257 കേസുകളാണു തീർപ്പാക്കാനായി ഉണ്ടായിരുന്നത്. 2023-24ആയപ്പോഴേക്കും കെട്ടിക്കിടക്കുന്ന സാന്പിളുകളുടെ എണ്ണത്തിൽ ഇരട്ടിയിലേറെയാണു വർധന. കെട്ടിക്കിടക്കുന്ന കേസുകളിൽ 98.7 ശതമാനവും ടോക്സിക്കോളജി, നർക്കോട്ടിക്സ്, എക്സൈസ് ഡിവിഷനുകളിലാണ്.