ADVERTISEMENT

ADVERTISEMENT

ശ്രേഷ്ഠ കാതോലിക്ക ബാവയ്ക്ക് സ്വീകരണം

കൊച്ചി: യാക്കോബായ സഭയുടെ ശ്രേഷ്ഠ കാതോലിക്ക മാർ ബസേലിയോസ് ജോസഫ് ബാവായെ വരാപ്പുഴ ആർച്ച് ബിഷപ് ഹൗസിൽ ആർച്ച് ബിഷപ് ഡോ. ജോസഫ് കളത്തിപ്പറമ്പിൽ സ്വീകരിച്ചു.

സഹായമെത്രാൻ ഡോ. ആന്‍റണി വാലുങ്കൽ, വികാരി ജനറൽ മോൺ. മാത്യു ഇലഞ്ഞിമിറ്റം, ചാൻസിലർ ഫാ. എബിജിൻ അറയ്‌ക്കൽ, ഫാ. സോജൻ മാളിയേക്കൽ, ഫാ. സ്‌മിജോ കളത്തിപ്പറമ്പിൽ, മാത്യൂസ് മാർ അന്തിമോസ് മെത്രാപ്പോലീത്ത, ഫാ. ജോഷി മാത്യു ചിറ്റേത്ത് എന്നിവർ പങ്കെടുത്തു.

ADVERTISEMENT

ബ്ലോക്കുതല കോണ്‍ഗ്രസ് പ്രതിഷേധം 8ന്

കൊച്ചി: ആരോഗ്യമന്ത്രിയുടെ രാജി ആവശ്യപ്പെട്ട് കോണ്‍ഗ്രസ് ബ്ലോക്ക് കമ്മിറ്റികളുടെ നേതൃത്വത്തില്‍ എട്ടിന് പ്രതിഷേധ മാര്‍ച്ചും ധര്‍ണയും സംഘടിപ്പിക്കും. കളമശേരി മെഡിക്കല്‍ കോളജ് കുത്തഴിഞ്ഞ നിലയിലാണ് പ്രവര്‍ത്തിക്കുന്നതെന്നും എറണാകുളം ജനറല്‍ ആശുപത്രിയില്‍ ആവശ്യത്തിന് മരുന്നുകളും മതിയായ ചികിത്സയും ലഭ്യമല്ലെന്നും ജില്ലാ കോണ്‍ഗ്രസ് കമ്മിറ്റി നേതൃയോഗം ആരോപിച്ചു. കെപിസിസി വൈസ് പ്രസിഡന്‍റ് വി.ജെ.പൗലോസ് യോഗം ഉദ്ഘാടനം ചെയ്തു. ഡിസിസി പ്രസിഡന്‍റ് മുഹമ്മദ് ഷിയാസ് അധ്യക്ഷത വഹിച്ചു. എംഎല്‍എമാരായ കെ.ബാബു, അന്‍വര്‍ സാദത്ത്, നേതാക്കളായ ഡൊമിനിക് പ്രസന്‍റേഷന്‍, അജയ് തറയിൽ തുടങ്ങിയവര്‍ സംസാരിച്ചു. മഹിളാ കോൺഗ്രസ് പ്രതിഷേധിച്ചു കൊച്ചി: ആരോഗ്യമന്ത്രി വീണാ ജോർജ് രാജിവയ്ക്കണമെന്നാവശ്യപ്പെട്ട് മഹിളാ കോൺഗ്രസ് എറണാകുളം ജില്ലാ കമ്മിറ്റിയുടെ നേതൃത്വത്തിൽ എറണാകുളം ഡിഎംഒ ഓഫീസിലേക്ക് പ്രതിഷേധ പ്രകടനം നടത്തി. പ്രവർത്തകർ മന്ത്രിയുടെ കോലം കത്തിച്ചു. ജില്ലാ കോൺഗ്രസ് കമ്മിറ്റി പ്രസിഡന്‍റ് മുഹമ്മദ് ഷിയാസ് ഉദ്ഘാടനം ചെയ്തു. ജില്ലാ പ്രസിഡന്‍റ് സുനില സിബി അധ്യക്ഷത വഹിച്ചു. മഹിളാ കോൺഗ്രസ് സംസ്ഥാന വൈസ് പ്രസിഡന്‍റ് മുഖ്യപ്രഭാഷണം നടത്തി.

എംഡിഎംഎയുമായി യുവതിയുൾപ്പെടെ മൂവർ സംഘം പിടിയിൽ

കളമശേരി: കളമശേരിയിൽ എംഡിഎംഎയുമായി യുവതി ഉൾപ്പെടെ മൂവർ സംഘം പിടിയിൽ. ആലുവ കാരോത്തുകുടി കെ.ബി. സലോൺ(27), എടയപ്പുറം കോണത്തുകാട്ടിൽ അഹമ്മദ് ജിൻസ്(30), അങ്കമാലി പുളിയനം മന്നത്ത് അനു ബാബു(25) എന്നിവരെയാണ് പത്തടിപ്പാലത്തുനിന്ന് കളമശേരി പോലീസ് അറസ്റ്റ് ചെയ്തത്. പോലീസ് പട്രോളിംഗിനിടെ പുലർച്ചെ ഒന്നരയോടെയാണ് സംശയാസ്പദമായ സാഹചര്യത്തിൽ കാറിൽ സഞ്ചരിക്കുകായിരുന്നു സംഘത്തെ പിടികൂടി പരിശോധിച്ചത്. ഇവരുടെ പക്കൽനിന്ന് 0.81 ഗ്രാം എംഡിഎംഎ, 21 ഗ്രാം കഞ്ചാവ് എന്നിവ കണ്ടെടുത്തു. അറസ്റ്റ് പ്രതികളെ പിന്നീട് കോടതിയിൽ ഹാജരാക്കി റിമാൻഡ് ചെയ്തു. എസ്ഐ സെബാസ്റ്റ്യൻ പി. ചാക്കോയുടെ നേതൃത്വത്തിൽ എസ്ഐ ആർ.യു. രഞ്ജിത്ത്, സിപിഒമാരായ പ്രദീപ്, വിപിൻ, വിജേഷ് എന്നിവരടങ്ങിയ സംഘമാണ് പ്രതികളെ പിടികൂടിയത്.

കുട്ടികളിലെ ലഹരി ഉപയോഗം : സിറ്റി പോലീസ് കമ്മീഷണർ നേരിട്ട് ഹാജരാകണമെന്ന് ഹൈക്കോടതി

കൊച്ചി: ജില്ലയിലെ കുട്ടികളില്‍ ലഹരി ഉപയോഗം കൂടുതലായി കണ്ടെത്തിയ സാഹചര്യത്തില്‍ കൊച്ചി സിറ്റി പോലീസ് കമ്മീഷണറോട് നേരിട്ട് ഹാജരാകാന്‍ നിര്‍ദേശിച്ച് ഹൈക്കോടതി. കുട്ടികളിലെ ലഹരി ഉപയോഗം എങ്ങനെ തടയുമെന്ന് വിശദീകരിക്കാനാണ് കൊച്ചി സിറ്റി പോലീസ് കമ്മീഷണറോട് ഹാജരാകാനായി ചീഫ് ജസ്റ്റീസ് നിതിന്‍ ജാംദാര്‍, ജസ്റ്റീസ് സി. ജയചന്ദ്രന്‍ എന്നിവരടങ്ങിയ ഡിവിഷന്‍ ബെഞ്ച് നിർദേശിച്ചിരിക്കുന്നത്. 2015 മുതല്‍ 2024 വരെയുള്ള കാലയളവില്‍ 18 വയസില്‍ താഴെയുളള 125 കുട്ടികള്‍ക്കെതിരെ കേസെടുത്തിട്ടുണ്ടെന്ന് സര്‍ക്കാര്‍ അറിയിച്ചതിനെ തുടര്‍ന്നാണ് നടപടി. ഇതില്‍ 56 കേസുകളും എറണാകുളത്തു നിന്നാണെന്ന് ആഭ്യന്തര വകുപ്പ് ഫയല്‍ ചെയ്ത റിപ്പോര്‍ട്ടില്‍ വിശദീകരിക്കുന്നു. കുട്ടികളിലെ മയക്കുമരുന്ന് ഉപയോഗം തടയാന്‍ നടപടി ആവശ്യപ്പെടുന്ന പൊതുതാത്പര്യ ഹര്‍ജിയാണ് കോടതി പരിഗണിച്ചത്. സ്‌റ്റേറ്റ് ക്രൈം റിക്കാര്‍ഡ്‌സ് ബ്യൂറോയുടെ കണക്കാണ് സര്‍ക്കാര്‍ ഹാജരാക്കിയത്. മയക്കുമരുന്നിന് അടിമകളായ 341 കുട്ടികള്‍ക്ക് ജനമൈത്രി സുരക്ഷാ പദ്ധതിയുടെ ഭാഗമായി കൗണ്‍സലിംഗ് നല്‍കിയെന്ന് റിപ്പോര്‍ട്ടില്‍ പറയുന്നു. 112 കുട്ടികള്‍ക്ക് ലഹരിവിമുക്ത ചികിത്സ നല്‍കി. ഡിജിറ്റലായുള്ള ലഹരി വിമുക്ത സേവനങ്ങള്‍ 478 കുട്ടികള്‍ പ്രയോജനപ്പെടുത്തി. പ്രായപൂര്‍ത്തിയായവര്‍ക്കെതിരെ 2015ല്‍ 1,430 മയക്കുമരുന്ന് കേസുകളും 15,973 അബ്കാരി കേസുകളുമാണ് രജിസ്റ്റര്‍ ചെയ്തത്. 2024ല്‍ ഇത് യഥാക്രമം 8,160 ഉം 19,419ഉം ആയി വര്‍ധിച്ചു. ഫൊറന്‍സിക് ലാബുകളില്‍ ആവശ്യത്തിന് സ്റ്റാഫില്ലാത്തത് മയക്കുമരുന്നു കേസുകളുടെ നടത്തിപ്പിനെ ബാധിക്കുന്നുണ്ട്. ഫൊറന്‍സിക് റിപ്പോര്‍ട്ട് കിട്ടാത്തതിനാല്‍ കോടതികളില്‍ തീര്‍പ്പാകാതെ കിടക്കുന്ന എത്ര കേസുകളുണ്ടെന്ന് അറിയിക്കാനും ഹൈക്കോടതി രജിസ്ട്രിയോട് നിര്‍ദേശിച്ചിട്ടുണ്ട്.

ആരോഗ്യമന്ത്രിയുടെ രാജിക്കായി കേരള കോൺഗ്രസ് ഡിഎംഒ ഓഫീസ് മാർച്ചും ധർണയും നടത്തി

കൊച്ചി: കോട്ടയം മെഡിക്കൽ കോളജ് അപകടത്തിൽ അനാസ്ഥ കാട്ടിയ ആരോഗ്യമന്ത്രി രാജിവയ്ക്കണമെന്നാവശ്യപ്പെട്ടു കേരള കോൺഗ്രസ് ജില്ലാ കമ്മിറ്റിയുടെ ആഭിമുഖ്യത്തിൽ എറണാകുളം ഡിഎംഒ ഓഫീസിലേക്ക് മാർച്ചും ധർണയും നടത്തി. ജില്ലാ പ്രസിഡന്‍റ് ഷിബു തെക്കുംപുറം ഉദ്ഘാടനം ചെയ്തു. ആവശ്യ മരുന്നുകളോ, ശസ്ത്രക്രിയാ ഉപകരണങ്ങളോ ഇല്ലാതെ സർക്കാർ ആശുപത്രികൾ വലയുകയാണ്. മരുന്ന് വിതരണക്കാർക്ക് മെഡിക്കൽ സർവീസസ് കോർപറേഷന് കുടിശികയുള്ളത് കോടികളാണ്. അത് കൊടുക്കാതെ 100 കോടി ധൂർത്തടിച്ചു നാലാം വർഷികം ആഘോഷിക്കുകയാണ് പിണറായിയും കൂട്ടരും. സർക്കാർ ആശുപത്രികളിൽ അടിയന്തര ശസ്ത്രക്രിയകൾക്കു രോഗികൾ മാസങ്ങളോളം കാത്തിരിക്കേണ്ട ഗതികേടാണെന്നും ഷിബു തെക്കുംപുറം ചൂണ്ടിക്കാട്ടി. സേവി കുരിശുവീട്ടിൽ അധ്യക്ഷത വഹിച്ചു.

ജനകീയ കുറ്റവിചാരണ സദസ് 16ന്

കൊച്ചി: സംസ്ഥാന ഭരണം കെട്ടഴിഞ്ഞ അവസ്ഥയിലായ സാഹചര്യത്തില്‍ കെപിസിസി ആഹ്വാനപ്രകാരം 16ന് എറണാകുളത്ത് ജനകീയ കുറ്റവിചാരണ സദസ് സംഘടിപ്പിക്കുമെന്ന് ഡിസിസി പ്രസിഡന്‍റ് മുഹമ്മദ് ഷിയാസ് അറിയിച്ചു. ആരോഗ്യ മേഖല നേരിടുന്ന പ്രശ്‌നങ്ങള്‍, കടലോര മേഖലയിലെ ദുസഹമായ ജനജീവിതം , മലയോര മേഖലയിലെ വനം വന്യജീവി പ്രശ്‌നങ്ങള്‍ എന്നീ വിഷയങ്ങളില്‍ സര്‍ക്കാരിന്‍റെ പിടിപ്പുകേട് ജനപക്ഷത്ത് തുറന്നു കാട്ടുകയാണ് ജനകീയ കുറ്റവിചാരണ സദസിലൂടെ ലക്ഷ്യമിടുന്നതെന്ന് അദ്ദേഹം പറഞ്ഞു. 16ന് ഉച്ചകഴിഞ്ഞ് മൂന്നിന് നടക്കുന്ന പരിപാടിയില്‍ പ്രതിപക്ഷ നേതാവ് വി.ഡി.സതീശന്‍, കെപിസിസി പ്രസിഡന്‍റ് സണ്ണി ജേസഫ്, കെപിസിസി വര്‍ക്കിംഗ് പ്രസിഡന്‍റുമാര്‍, മറ്റു ഭാരവാഹികള്‍ തുടങ്ങിയവര്‍ പങ്കെടുക്കും.

കളിയെച്ചൊല്ലി കലഹം; സുഹൃത്തിനെ മർദിച്ച യുവാവ് അറസ്റ്റിൽ

ആലങ്ങാട്: പാനായികുളത്ത് ഫുട്ബോൾ കളിയെച്ചൊല്ലിയുള്ള വാക്കുതർക്കത്തെ തുടർന്നു യുവാവ് സുഹൃത്തിനെ മൂർച്ചയുള്ള ആയുധം ഉപയോഗിച്ച് ആക്രമിച്ചു. പാനായിക്കുളം നാലാംമൈൽ അൽ ഹുദ സ്കൂളിന് സമീപം തോട്ടകത്ത് വീട്ടിൽ അൾഡ്രിന് (21) ആണ് മർദനമേറ്റത്. ഞരമ്പിനു മുറിവു പറ്റിയ അൾഡ്രിനെ കളമശേരി മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. അൾഡ്രിന്‍റെ പരാതിയിൽ സുഹൃത്ത് ആലങ്ങാട് കുന്നേൽ പുതുശേരി വീട്ടിൽ ജോഫിനെ (20) ബിനാനിപുരം പോലീസ് അറസ്റ്റ് ചെയ്തു. കഴിഞ്ഞ രാത്രിയാണു സംഭവം. ഫുട്ബോൾ കളി കഴിഞ്ഞ് വീട്ടിലെത്തിയശേഷം ഇരുവരും പരസ്പരം ഫോണിൽ മെസേജ് അയയ്ക്കുകയും തർക്കം രൂക്ഷമായതോടെ ജോഫിൻ രാത്രി അൾഡ്രിന്‍റെ പാനായിക്കുളത്തെ വീടിന്‍റെ പരിസരത്തെത്തി മൂർച്ചയുള്ള ആയുധം കൊണ്ട് ആക്രമിക്കുകയുമായിരുന്നു.

വാഗ്ദാനം പാലിച്ചില്ല : ഫെര്‍ട്ടിലിറ്റി ക്ലിനിക് 2.66 ലക്ഷം നഷ്ടപരിഹാരം നല്കണം

കൊച്ചി: വന്ധ്യതയ്ക്ക് ചികിത്സ വാഗ്ദാനം ചെയ്ത് ദമ്പതികളിൽനിന്ന് വന്‍ തുക കൈപ്പറ്റി കമ്പളിപ്പിച്ചുവെന്ന പരാതിയില്‍, ഫെര്‍ട്ടിലിറ്റി ക്ലിനിക്ക് 2.66 ലക്ഷം രൂപ നഷ്ടപരിഹാരം നല്‍കണമെന്ന് എറണാകുളം ജില്ലാ ഉപഭോക്തൃ തര്‍ക്ക പരിഹാര കോടതി. 30 ദിവസത്തിനകം തുക നല്കണമെന്നാണ് ഡി.ബി ബിനു അധ്യക്ഷനായ ബെഞ്ച് ഉത്തരവിട്ടത്. വന്ധ്യതാ ചികിത്സയ്ക്ക് എന്ന പേരില്‍ മെഡിക്കല്‍ ക്യാമ്പ് സംഘടിപ്പിച്ച് 100 ശതമാനം വിജയം വാഗ്ദാനം ചെയ്ത് ആദ്യം അഡ്വാന്‍സായി 1000 രൂപ കൈപ്പറ്റി. തുടര്‍ന്ന് 2,40,000 രൂപ ഫീ ഇനത്തില്‍ ദമ്പതിമാരില്‍ നിന്നു വാങ്ങി. പണം മുഴുവന്‍ വാങ്ങിയതിനു ശേഷം ചികിൽസ വിജയിക്കുമോ എന്നത് സംശയാസ്പദമാണെന്ന് പറയുകയും കൂടുതല്‍ പരിശോധനയ്ക്കായി 40000 രൂപ അധികമായി ആവശ്യപ്പെടുകയും ചെയ്തു. പരാതിക്കാരി ആ തുകയും നല്‍കി. തുടര്‍ന്നാണ് ഇവര്‍ മാര്‍ക്കറ്റിംഗ് ഏജന്‍റുമാര്‍ മാത്രമാണെന്നും ഇവരുടെ വാഗ്ദാനത്തില്‍ യാതൊരു അടിസ്ഥാനവുമില്ല എന്നും പരാതിക്കാരിക്ക് ബോധ്യപ്പെട്ടത്. വാങ്ങിയ തുക തിരികെ ആവശ്യപ്പെട്ട് എതിര്‍കക്ഷിയെ സമീപിച്ചെങ്കിലും അത് നല്‍കാന്‍ തയാറാകാത്ത സാഹചര്യത്തിലാണ് ഉപഭോക്തൃ കോടതിയെ സമീപിച്ചത്. എറണാകുളത്തെ ബ്രൗണ്‍ ഹാള്‍ ഇന്‍റര്‍നാഷണല്‍, ഇന്ത്യ എന്ന ഫെര്‍ട്ടിലിറ്റി ക്ലിനിക്കിനെതിരെയാണ് പരാതിക്കാരി കോടതിയെ സമീപിച്ചത്. പരാതിക്കാരിക്കുവേണ്ടി അഡ്വ. ഫിലിപ്പ്. ടി.വര്‍ഗീസ് കോടതിയില്‍ ഹാജരായി.

വിവാഹ വാഗ്ദാനം നല്‍കി പീഡനം: യുവതിയുടെ പരാതിയില്‍ പ്രവാസിക്കെതിരെ കേസെടുത്തു

കൊച്ചി: വിവാഹ വാഗ്ദാനം നല്‍കി പീഡിപ്പിച്ചെന്ന യുവതിയുടെ പരാതിയില്‍ പ്രവാസിക്കെതിരെ പോലീസ് കേസെടുത്തു. 35കാരിയായ കൊല്ലം സ്വദേശിനിയുടെ പരാതിയില്‍ കോട്ടയം കാഞ്ഞിരപ്പള്ളി സ്വദേശിയായ പ്രവാസിക്കെതിരെയാണ് കൊച്ചി സിറ്റി പോലീസ് കേസെടുത്തത്. യുവതിയില്‍ നിന്നും ഇയാള്‍ 34 ലക്ഷത്തോളം രൂപ കൈക്കലാക്കിയെന്നും പരാതിയില്‍ പറയുന്നു. സംഭവത്തില്‍ പോലീസ് എഫ്‌ഐആർ രജിസ്റ്റര്‍ ചെയ്ത് അന്വേഷണം ആരംഭിച്ചു. 2022 ലാണ് കേസിനാസ്പദമായ സംഭവം. പ്രതിയും പരാതിക്കാരിയും വിദേശത്തുവച്ചാണ് പരിചയപ്പെടുന്നത്. പിന്നീട് ഇരുവരും പ്രണയത്തിലായി വീടുപണി പൂര്‍ത്തിയായാല്‍ വിവാഹം കഴിക്കാമെന്ന് ഇയാള്‍ അറിയിച്ചു. തുടര്‍ന്ന് ഇവര്‍ പല തവണകളായി 34 ലക്ഷം രൂപ നല്‍കി. വിവാഹത്തിന് വീട്ടുകാര്‍ സമ്മതിക്കില്ലെന്ന് പ്രതി അറിയിച്ചെങ്കിലും ഒന്നിച്ചു ജീവിക്കണമെന്നതില്‍ യുവതി ഉറച്ചുനിന്നു. തുടര്‍ന്ന് വിവാഹം രജിസ്റ്റര്‍ ചെയ്യാമെന്ന് ഉറപ്പുനല്‍കി കൊച്ചിയില്‍ എത്തിച്ചു. ആഢംബര ഹോട്ടലില്‍ താമസിപ്പിച്ച് പീഡിപ്പിക്കുകയായിരുന്നു. പിന്നീട് വിവാഹം രജിസ്റ്റര്‍ ചെയ്യാന്‍ ഇയാള്‍ തയാറായില്ല. പ്രതി വിവാഹിതനാണെന്ന് അറിഞ്ഞതോടെയാണ് യുവതി ഇപ്പോള്‍ പോലീസിനെ സമീപിച്ചതെന്നാണ് അറിയുന്നത്. യുവതിയുടെ മൊഴി പോലീസ് രേഖപ്പെടുത്തി.

വിദേശ ദന്പതികൾക്ക് ഇംഗ്ലീഷ് ചാനൽ കടക്കാൻ ബോട്ട് കൊച്ചിയിൽനിന്ന്

ഇടക്കൊച്ചി: സമുദ്രയാത്ര ഇഷ്ടപ്പെടുന്ന ഇംഗ്ലണ്ടിൽനിന്നുള്ള ദന്പതികൾക്ക് ഇംഗ്ലീഷ് ചാനൽ കടക്കാൻ യാത്രാബോട്ട് ഇടക്കൊച്ചിയിൽ നിന്ന്. നിക്ക് എന്ന് വിളിപ്പേരുള്ള ജോൺ നിക്കോളാസ് ഫ്രാൻസനും ഭാര്യ ആനിനും യാത്ര ചെയ്യുന്നതിനുള്ള ബോട്ടാണ് ഇംഗ്ളണ്ടിലേക്ക് കപ്പൽ കയറിയത്. ഇംഗ്ലണ്ടിൽ ബോട്ട് നിർമാണം വലിയ ചെലവേറിയതിനാലാണ് ഇവർ ഇന്ത്യയിലേക്ക് എത്തിയത്. ഇന്ത്യയിൽ പലയിടത്തും അന്വേഷണം നടത്തിയെങ്കിലും ഇവരുടെ മനസിന് ഇഷ്ടപ്പെട്ട നിർമാതാക്കളെ കണ്ടെത്താൻ സാധിച്ചില്ല. പിന്നീട് ജലയാനങ്ങൾ നിർമിക്കാൻ മിടുക്കരുള്ള കൊച്ചിയിലേക്ക് എത്തുകയായിരുന്നു. കൊച്ചിയിൽ പല ബോട്ട് നിർമാണ കമ്പനികളുമായി ചർച്ച നടത്തിയ ശേഷം ഇടക്കൊച്ചിയിലെ ദരിയ മറൈൻ എൻജിനീയറിംഗ് സർവീസസ് എന്ന ബോട്ട് നിർമാണ സ്ഥാപനത്തിന് ബോട്ട് നിർമിക്കാൻ ചുമതല നൽകി. സമുദ്രയാത്രാ പ്രിയനായ നിക്കിന്‍റെ മനസിലുള്ള ആശയങ്ങൾക്കനുസരിച്ച് ദരിയ മറൈൻ ആറു മാസം കൊണ്ട് ബോട്ടിന് രൂപം നൽകി. ഓരോ ദിവസത്തേയും ജോലികൾ നിക്കിന് വരച്ച് നൽകി ചിട്ടയായുള്ള നിർമാണമാണ് ദരിയ മറൈൻ നടത്തിയത്. ഇംഗ്ലണ്ടിലേക്ക് മടങ്ങാതെ ആറ് മാസമായി ഇവിടെ തന്നെ തങ്ങിയായിരുന്നു നിക്കിന്‍റെ മേൽനോട്ടം. ഇതിനിടെ ഭാര്യ ആൻ നാട്ടിലേക്ക് മടങ്ങി. ഇവിടെ നിന്ന് പഠിച്ച മലയാളത്തിലൂടെ, നിക്ക് നിർദേശങ്ങൾ നൽകിയിരുന്നതായി ദരിയ മറൈനിലെ ജോലിക്കാർ പറയുന്നു. കമ്പനി തികഞ്ഞ ഉത്തരവാദിത്വത്തോടെ തന്‍റെ മനസിൽ ഉണ്ടായിരുന്ന ബോട്ട് നിർമിച്ചു നൽകിയെന്ന് നിക്ക് പറയുന്നു. ശ്രീലങ്ക വഴി ഇംഗ്ലണ്ടിലേക്ക് പണി പൂർത്തിയാക്കി , അവസാന വട്ട പരീക്ഷണവും നടത്തിയ ബോട്ട് കൊച്ചിയിൽ നിന്ന് ശ്രീലങ്ക വഴിയാണ് ഇംഗ്ലണ്ടിലെത്തിക്കുക. കൊച്ചിയിലെ പസഫി ഓഷ്യൻ ലോജിസ്റ്റിക്സ് ഇന്‍റർനാഷണൽ ലിമിറ്റഡ് എന്ന ഷിപ്പിംഗ് കമ്പനിയാണ് ബോട്ട് ഇംഗ്ലണ്ടിൽ എത്തിക്കാൻ ചുമതല ഏറ്റെടുത്തിട്ടുള്ളത്. കഴിഞ്ഞ ദിവസം ബോട്ട് കപ്പൽ മാർഗം കൊച്ചിയിൽ നിന്ന് ഇംഗ്ലണ്ടിലേക്ക് കയറ്റിവിട്ടു. നിക്ക് കൊച്ചിയിൽ നിന്ന് വിമാനത്തിലും.

ചെല്ലാനം കടല്‍ഭിത്തി : സമയബന്ധിതമായി പൂര്‍ത്തിയാക്കും: മന്ത്രി റോഷി അഗസ്റ്റിന്‍

കൊച്ചി: ചെല്ലാനത്ത് ടെട്രാപോഡ് കടല്‍ ഭിത്തി നിര്‍മാണം സമയബന്ധിതമായി പൂര്‍ത്തിയാക്കുമെന്ന് മന്ത്രി റോഷി അഗസ്റ്റിന്‍. തീരദേശത്തെ ജനങ്ങളുടെ ബുദ്ധിമുട്ടുകള്‍ മനസിലാക്കി തീരസംരക്ഷണം പ്രധാന വിഷയമായാണ് സര്‍ക്കാര്‍ പരിഗണിക്കുന്നതെന്നും അദ്ദേഹം പറഞ്ഞു. ചെല്ലാനം, കണ്ണമാലി പ്രദേശങ്ങളിലെ കടലാക്രമണ ബാധിത പ്രശ്‌നങ്ങള്‍ വിലയിരുത്തുന്നതിനായി ചേര്‍ന്ന യോഗത്തില്‍ സംസാരിക്കുകയായിരുന്നു മന്ത്രി. 7.3 കിലോമീറ്ററില്‍ ടെട്രാപോഡ് കടല്‍ ഭിത്തി നിര്‍മാണം ആദ്യഘട്ടത്തില്‍ പൂര്‍ത്തീകരിച്ചിട്ടുണ്ട്. തുടര്‍ന്നുള്ള 3.5 കിലോമീറ്റര്‍ കൂടി നിര്‍മിക്കുന്നതിനുള്ള തുക നിലവില്‍ അനുവദിച്ചിട്ടുണ്ട്. നിര്‍മാണ പ്രവര്‍ത്തനങ്ങള്‍ സമയബന്ധിതമായി പൂര്‍ത്തിയാക്കും. അതിരൂക്ഷമായ കടലാക്രമണം നേരിടുന്ന പ്രദേശമെന്ന നിലയില്‍ ഈ വിഷയം ഗൗരവപൂര്‍ണമായാണ് സര്‍ക്കാര്‍ കാണുന്നത്. പ്രദേശത്തെ ജനങ്ങളുടെ പ്രതിഷേധം സര്‍ക്കാരിനെതിരല്ല. സര്‍ക്കാര്‍ ചെയ്ത പ്രവൃത്തി അഭിനന്ദിക്കുന്നതോടൊപ്പം തുടര്‍പ്രവർത്തികള്‍ ആവശ്യമാണെന്ന ബോധ്യപ്പെടുത്തലിന് വേണ്ടി നടത്തിയ ജനവികാരത്തിന്‍റെ ഭാഗമായാണ് അതിനെ കണ്ടതെന്നും മന്ത്രി പറഞ്ഞു. ടെട്രാപോഡ് ഉപയോഗിച്ചുള്ള തീര സംരക്ഷണത്തിനും കടല്‍ഭിത്തി നിര്‍മാണത്തിനും ആദ്യമായി തെരഞ്ഞെടുത്ത സ്ഥലം ചെല്ലാനമാണ്. ജില്ലയുടെ ചുമതലയുള്ള മന്ത്രി പി.രാജീവും മന്ത്രി സജി ചെറിയാനും കെ.ജെ.മാക്‌സി എംഎല്‍എയും ഉള്‍പ്പെടെ ഈ വിഷയത്തില്‍ ഒരുമിച്ച് ആലോചിച്ചാണ് ടെട്രാപോഡ് ഉപയോഗിച്ചുള്ള പുനര്‍നിര്‍മാണ പ്രവര്‍ത്തനങ്ങള്‍ക്ക് തുടക്കമിടാന്‍ തീരുമാനിച്ചത്. ചെല്ലാനത്തെ കടല്‍ഭിത്തി നിര്‍മാണ പ്രവര്‍ത്തനങ്ങള്‍ പൂര്‍ണമായി കഴിഞ്ഞാല്‍ കടല്‍ മികച്ച രീതിയില്‍ ആസ്വദിക്കാന്‍ കഴിയുന്ന പ്രദേശമായി ഇതു മാറും. പുറത്തുനിന്ന് വരുന്നവരെ വരെ ആകര്‍ഷിക്കാന്‍ സാധിക്കുന്ന രീതിയില്‍ ടൂറിസം കേന്ദ്രമായി മാറ്റുന്നതിനുള്ള നടപടികള്‍ സ്വീകരിക്കും. സംസ്ഥാനത്തെ കടല്‍ത്തീരത്തെ 24 ഭാഗങ്ങളിലായി ആകെ 41 കിലോമീറ്റര്‍ നീളത്തില്‍ 24 പ്രവൃത്തികള്‍ നടത്തുന്നതിനായി ലോകബാങ്കിന്‍റെ സഹായത്തോടു കൂടിയുള്ള നടപടികള്‍ ആരംഭിച്ചിട്ടുണ്ട്. ഹോട്ട്‌സ്‌പോട്ടുകള്‍ ആയ ശംഖുമുഖം (71.50 കോടി), കൊല്ലങ്കോട് (43.65 കോടി), ആലപ്പാട് (172.50 കോടി), കാപ്പാട് (76.26 കോടി) എന്നിവിടങ്ങളില്‍ സംരക്ഷണ നടപടികള്‍ക്കായി എന്‍സിസിആര്‍ എസ്റ്റിമേറ്റ് ലഭിച്ചിട്ടുണ്ട്. ഓരോ പ്രദേശത്തിന്‍റെയും കടലാക്രമണരീതി അനുസരിച്ച് പ്രവര്‍ത്തികള്‍ ഉടനെ തന്നെ ആരംഭിക്കും. 2021 ബജറ്റില്‍ ആകെ 5300 കോടിയുടെ തീരസംരക്ഷണ പ്രവൃത്തികളാണ് സര്‍ക്കാര്‍ പ്രഖ്യാപിച്ചത്. അതില്‍ 1500 കോടിരൂപ കിഫ്ബിയില്‍ നിന്നും ബാക്കി തുക എഡിബി അല്ലെങ്കില്‍ ലോകബാങ്ക് എന്നിവയുടെ സഹായത്തോടെ നടത്തുമെന്നായിരുന്നു പ്രഖ്യാപിച്ചത്. എന്നാല്‍ ചെല്ലാനം ആദ്യ പ്രവൃത്തിക്കുശേഷം കിഫ്ബിയില്‍ നിന്ന് പണം ലഭിക്കുന്നതില്‍ കാലതാമസം നേരിട്ടപ്പോള്‍ എഡിബി മുഖാന്തിരം ഹോട്ട്‌സ്‌പോട്ടുകള്‍ ഉള്‍പ്പെടെ കൂടുതല്‍ സ്ഥലങ്ങളില്‍ കടല്‍ത്തീര സംരക്ഷണ പ്രവര്‍ത്തനത്തിനായി നടപടികള്‍ ആരംഭിച്ചിട്ടുണ്ട്. എഡിബിയില്‍ നിന്ന് ഇക്കാര്യത്തിനായി ആകെ 466.67 ദശ ലക്ഷം ഡോളര്‍ (ഏകദേശം 4013 കോടി രൂപ) യുടെ പ്രവൃത്തികളാണ് വിഭാവനം ചെയ്തിട്ടുള്ളത്. ഇത് പ്രവൃത്തികളുടെ ആകെ തുകയാണ്. ഇതിന്‍റെ 70 ശതമാനം എഡിബിയും 30 ശതമാനം സംസ്ഥാന സര്‍ക്കാരുമാണ് വഹിക്കുന്നതെന്നും മന്ത്രി പറഞ്ഞു. കണ്ണമാലി സെന്‍റ് ആന്‍റണീസ് പള്ളി പരിസരത്ത് നടന്ന യോഗത്തില്‍ കെ.ജെ.മാക്‌സി എംഎല്‍എ, കൊച്ചി രൂപത പിആര്‍ഒ ഫാ. ജോണി സേവിയര്‍ പുതുക്കാട്, ചെല്ലാനം പഞ്ചായത്ത് പ്രസിഡന്‍റ് കെ.എല്‍. ജോസഫ്, ഇറിഗേഷന്‍ എക്‌സിക്യൂട്ടീവ് എന്‍ജിനീയര്‍ ബി.അബ്ബാസ്, ഇറിഗേഷന്‍ സൂപ്രണ്ടിംഗ് എന്‍ജിനീയര്‍ പി.എസ്.കോശി, ജനപ്രതിനിധികള്‍ തുടങ്ങിയവര്‍ പങ്കെടുത്തു.

മൂവാറ്റുപുഴയിൽ പൈപ്പ് പൊട്ടി ശുദ്ധജലം പാഴാകുന്നു

മൂവാറ്റുപുഴ: ജല അഥോറിറ്റിയുടെ പൈപ്പ് പൊട്ടി കുടിവെള്ളം പാഴാകാൻ തുടങ്ങിയിട്ട് ദിവസങ്ങളായി. മൂവാറ്റുപുഴ നിർമല ഹയർ സെക്കൻഡറി സ്കൂളിന് സമീപം സ്ലാബിനടിയിലാണ് പൈപ്പ് പൊട്ടി ജലം പാഴാകുന്നത്. നിരവധി കാൽനട - വാഹന യാത്രക്കാർ സഞ്ചരിക്കുന്ന റോഡിൽ പൈപ്പ്പൊട്ടി വെള്ളം പാഴാക്കാൻ തുടങ്ങിയിട്ട് അഞ്ചു ദിവസത്തോളമായിട്ടും അറ്റകുറ്റപ്പണികൾ നടത്താൻ അധികൃതർ തയാറാകാത്തതിനെതിരെ പ്രതിഷേധം വ്യാപകമായിട്ടുണ്ട്. പൈപ്പ് പൊട്ടിയതോടെ ദിവസവും ആയിരകണക്കിന് ലിറ്റർ കുടിവെള്ളമാണ് മൂവാറ്റുപുഴ കാവുംപടി റോഡിലൂടെ ഒഴുകുന്നത്. വിദ്യാർഥികളടക്കമുള്ള കാൽനട യാത്രക്കാർ റോഡിലൂടെ ഒഴുകുന്ന വെള്ളത്തിൽ ചവിട്ടി വേണം സഞ്ചരിക്കാൻ. ഇതുകൂടാതെ വാഹനങ്ങൾ കടന്നു പോകുന്പോൾ ദേഹത്തേക്ക് വെള്ളം തെറിക്കുന്നത് കാൽനട യാത്രക്കാരെ ബുദ്ധിമുട്ടിലാക്കുകയാണ്.

മനുഷ്യാവകാശ കമ്മീഷനും ഓംബുഡ്സ്മാനും പരാതി നൽകി

മൂവാറ്റുപുഴ: നഗരത്തിലെയും സമീപ പഞ്ചായത്തുകളും ആശ്രയിക്കുന്ന നഗരസഭ ശ്മശാനം അറ്റകുറ്റപ്പണികളുടെ പേരിൽ തുടരെ അടച്ചിടുന്നതും ഇതിന്‍റെ പേരിൽ നടക്കുന്ന മനുഷ്യാവകാശ ലംഘനങ്ങളും അന്വേഷിക്കണമെന്ന് ആവശ്യപ്പെട്ട് പൊതുപ്രവർത്തകൻ മുണ്ടയ്ക്കൽ എം.ജെ. ഷാജി മനുഷ്യാവകാശകമ്മീഷനും എൽഎസ്ജി ഓംബുഡ്സ്മാനും പരാതി നൽകി. ഉറ്റവരുടെ മൃതദേഹങ്ങളുമായി എത്തുന്ന ബന്ധുക്കളെ നെട്ടോട്ടം ഓടിക്കുകയും അവരെ മാനസികമായി തളർത്തുകയും ചെയ്യുന്നു. ഇവിടെ എത്തിക്കുന്ന മൃതദേഹങ്ങളോട് അനാദരവ് കാണിക്കുന്നുവെന്നാണ് മനുഷ്യാവകാശ കമ്മീഷന് നൽകിയ പരാതിയിൽ പറയുന്നത്. നഗരസഭ സെക്രട്ടറി, ചെയർമാൻ, ഹെൽത്ത് സ്റ്റാന്‍ഡിംഗ് കമ്മിറ്റി ചെയർമാൻ എന്നിവരെ എതിർകക്ഷികളാക്കി അറ്റകുറ്റപ്പണികളുടെ പേരിൽ നടക്കുന്ന ക്രമക്കേടുകളും അഴിമതിയും അന്വേഷിച്ച് നിയമനടപടികൾ സ്വീകരിക്കണമെന്ന് എൽഎസ്ജി ഓംബുഡ്സ്മാന് നൽകിയ പരാതിയിൽ ആവശ്യപ്പെട്ടിട്ടുണ്ട്.

കൈവിരലിൽ കുടുങ്ങിയ മോതിരം അഗ്നിരക്ഷാസേന മുറിച്ച് നീക്കി

കൂത്താട്ടുകുളം: വാഹനാപകടത്തിൽ യുവതിയുടെ കൈവിരലിൽ കുടുങ്ങിയ മോതിരം അഗ്നിരക്ഷാസേനയെത്തി മുറിച്ച് നീക്കി. വ്യാഴാഴ്ച വൈകുന്നേരം വഴിത്തലയിൽ സ്കൂട്ടർ മറിഞ്ഞുണ്ടായ അപകടത്തിലാണ് കാക്കൂർ സ്വദേശിയായ യുവതിയുടെ മോതിരം ഒടിഞ്ഞ് കൈവിരലിൽ കുടുങ്ങിയത്. കൂത്താട്ടുകുളം ദേവമാത ആശുപത്രിയിലെത്തിയ യുവതിയുടെ മോതിരം അഗ്നിരക്ഷാസേന എത്തി നീക്കം ചെയ്യുകയായിരുന്നു.

വൈദ്യുത കന്പിയിൽ കുടുങ്ങിയ പ്രാവിനെ പറത്തിവിട്ട് ഫയർഫോഴസ്

കൂത്താട്ടുകുളം: കാലിൽ നൂല് കുരുങ്ങി വൈദ്യുത കന്പിയിൽ തൂങ്ങിയാടിയ പ്രാവിന് രക്ഷകരായി അഗ്നിരക്ഷാസേന. കോഴിപ്പിള്ളി റോഡിൽ സഹകരണ ആശുപത്രിക്ക് സമീപം ഇന്നലെ ഉച്ചയോടെയാണ് സംഭവം. നാട്ടുകാർ കൂത്താട്ടുകുളം അഗ്നിരക്ഷാ നിലയത്തിൽ നേരിട്ടെത്തി അറിയിച്ചതിനേ തുടർന്ന് സേന സ്ഥലത്തെത്തി വൈദ്യുത കന്പിയിൽനിന്നു പ്രാവിനെ സുരക്ഷിതമായി താഴെയിറക്കി. കാലിൽ കുരങ്ങിയ നൂല് അറുത്തുമാറ്റി പ്രാവിനെ പറത്തിവിട്ടു.

തണൽമരം വീണ് ഗതാഗതം തടസപ്പെട്ടു

മൂവാറ്റുപുഴ: ശക്തമായ കാറ്റിൽ മൂവാറ്റുപുഴ - തൊടുപുഴ സംസ്ഥാന പാതയിൽ തണൽമരം വീണ് ഗതാഗതം തടസപ്പെട്ടു. ഹോസ്റ്റൽ പടിയിൽ ഇന്നലെ ഉച്ചയ്ക്ക് 12ഓടെയുണ്ടായ ശക്തമായ കാറ്റിലാണ് തണൽ മരത്തിന്‍റെ ശിഖരം ഒടിഞ്ഞു വീണത്. 50 ഇഞ്ച് വണ്ണം വരുന്ന വാകമരത്തിന്‍റെ ശിഖരമാണ് കാറ്റിൽ റോഡിലേക്ക് ഒടിഞ്ഞു വീണത്. മൂവാറ്റുപുഴ - തൊടുപുഴ സംസ്ഥാന പാതയിൽ വാഹനങ്ങൾ ഇല്ലാത്ത് സമയത്ത് മരം വീണതിനാൽ വലിയ അപകടം ഒഴിവായി. അഗ്നിശമന രക്ഷാസേന സ്ഥലത്തെത്തി ശിഖരങ്ങൾ മുറിച്ചു മാറ്റി ഗതാഗതം പുനസ്ഥാപിച്ചു.

ഞാറ്റുവേലച്ചന്തയും കർഷകസഭയും

കോലഞ്ചേരി: പൂതൃക്ക പഞ്ചായത്ത് കൃഷിഭവന്‍റെ നേതൃത്വത്തിൽ ഞാറ്റുവേലച്ചന്തയും കർഷകസഭയും കൃഷിഭവൻ അങ്കണത്തിൽ പഞ്ചായത്ത് പ്രസിഡന്‍റ് മാത്യൂസ് കുമ്മണ്ണൂർ ഉദ്ഘാടനം ചെയ്തു. മുൻ പഞ്ചായത്ത് പ്രസിഡന്‍റും പൂതൃക്ക പഞ്ചായത്തംഗവുമായ ടി.പി. വർഗീസ് അധ്യക്ഷനായി. ഞാറ്റുവേല ചന്തയുടെ ഭാഗമായി മണ്ണ് പരിശോധന റിസൽട്ടുകളും പച്ചക്കറി തൈകളും കുരുമുളക് വള്ളികളും കർഷകർക്ക് സൗജന്യമായി വിതരണം ചെയ്തു. മൂവാറ്റുപുഴ: പായിപ്ര പഞ്ചായത്ത് കൃഷിഭവന്‍റെ നേതൃത്വത്തിൽ കർഷകസഭയും ഞാറ്റുവേലച്ചന്തയും സംഘടിപ്പിച്ചു. പഞ്ചായത്ത് പ്രസിഡന്‍റ് എം.എസ്. അലിയാർ ഉദ്ഘാടനം ചെയ്തു. പഞ്ചായത്ത് സ്ഥിരംസമിതി അധ്യക്ഷൻ മുഹമ്മദ് ഷാഫി അധ്യക്ഷത വഹിച്ചു. തുടർന്ന് കാലാവസ്ഥധിഷ്ഠിത ഇൻഷ്വറൻസ് പദ്ധതിയുടെ കാന്പയിൻ, അഗ്രി സ്റ്റാക്ക് കാന്പയ്ൻ എന്നിവയും നടത്തി. കൈരളി ഇക്കോഷോപ്പിൽ നിന്നും വിവിധയിനം ഫലവർഗ തൈകളുടെ വിൽപ്പനയും മൈത്രി കൃഷിക്കൂട്ടത്തിൽ നിന്നുള്ള ഉത്പന്നങ്ങളായ സോപ്പ്, അച്ചാറുകൾ, വിർജിൻ കോക്കനട്ട് ഓയിൽ തുടങ്ങിയവയും കൃഷി ഭവനിൽനിന്നു സൗജന്യമായി പച്ചക്കറി വിത്ത്, പച്ചക്കറി തൈകൾ എന്നിവയുടെ വിതരണവുമുണ്ടായിരുന്നു.

ദീപിക നമ്മുടെ ഭാഷ പദ്ധതി : കാരക്കുന്നം ഫാത്തിമ മാതാ എൽപി സ്കൂളിൽ

മൂവാറ്റുപുഴ: കാരക്കുന്നം ഫാത്തിമ മാതാ എൽപി സ്കൂളിൽ ദീപിക നമ്മുടെ ഭാഷ പദ്ധതി ഡിഎഫ്സി കോതമംഗലം രൂപത ഡയറക്ടർ റവ.ഡോ. ആന്‍റണി പുത്തൻകുളം പ്രധാനാധ്യാപകൻ വിൻസെന്‍റ് ജോസഫിനു പത്രത്തിന്‍റെ കോപ്പി നൽകി ഉദ്ഘാടനം ചെയ്തു. സ്കൂൾ മാനേജർ ഫാ. ജോർജ് വള്ളോംകുന്നേൽ അധ്യക്ഷത വഹിച്ചു. യോഗത്തിൽ വാർഡംഗം സിജു ഏബ്രഹാം, പൗർണമി ക്ലബ് പ്രസിഡന്‍റ് ടി.സി. സ്കറിയ, പിടിഎ പ്രസിഡന്‍റ് പി.വി. അരുണ്‍, പത്രം സ്പോണ്‍സർമാരായ വിനോയി അഗസ്റ്റിൻ, ജോർജ് പറക്കുന്നേൽ, നോബി കൊറ്റം, ജോണ്‍ കന്നപ്പള്ളി, ബോബി കൂടക്കാട്ട്, ജോസ് കൊറ്റം, ഫ്രാൻസിസ് കാവുംപുറം, ജെയിംസ് നാമറ്റത്തിൽ, അധ്യാപകരായ പി. വിനീത, റെമ്മി മാണിച്ചൻ, ജെയ്മി മാത്യു, നിൻസി പി. ജോളി, എൽന എൽദോസ്, ഹരിത കെ. സത്യൻ, ജോയൽ മരിയ ലൂയിസ്, ജിസ്മിയ അമീൻ, അജു ജോർജ്, ലിൻഡ ഫ്രാൻസിസ്, സാന്ദ്ര ജോണ്‍സണ്‍, ബിനു ജോണ്‍, ജിൻസി ഷിബു, നിഖില ഷിജു തുടങ്ങിയവർ പങ്കെടുത്തു.

രാമമംഗലത്ത് സ്‌കൂളിലും കടയിലും മോഷണം

പിറവം: രാമമംഗലം ഹൈസ്‌കൂളിന്‍റെ ഓഫീസ് കുത്തിത്തുറന്ന് മേശയിൽ സൂക്ഷിച്ചിരുന്ന 50,000 രൂപ കവർന്നു. മേശയും അലമാരകളുമെല്ലാം കുത്തിത്തുറന്ന് പരിശോധന നടത്തിയ നിലയിലാണ്. സ്കൂളിലെ നിരീക്ഷണ കാമറയിൽ മോഷ്ടാവിന്‍റെ രൂപം പതിഞ്ഞിട്ടുണ്ട്. രാമമംഗലം സ്റ്റേഷൻ ഇൻസ്പെക്ടർ കെ.ആർ. മോഹൻദാസിന്‍റെ നേതൃത്വത്തിലാണ് അന്വേഷണം. ഓഫീസ് മുറിയുടെ താഴ് തകർത്താണ് മോഷ്ടാവ് അകത്തു കടന്നത്. ഇതേ രാത്രിതന്നെ സ്‌കൂളിന് മുന്നിലെ സ്റ്റേഷനറി കടയിലും മോഷണം നടന്നു. ഗോകുൽ ഡെക്കറേഷൻസ് ഉടമ രാമമംഗലം വരിക്കശേരിൽ ഗോപിനാഥന്‍റെ കടയിലാണ് മോഷണം നടന്നത്. കടയിൽ സൂക്ഷിച്ചിരുന്ന മൂവായിരത്തോളം രൂപ നഷ്ടപ്പെട്ടിട്ടുണ്ടെന്ന് ഗോപിനാഥൻ പറഞ്ഞു. വെള്ളിയാഴ്‌ച രാവിലെ ഏഴോടെ കട തുറക്കാനെത്തിയപ്പോഴാണ് കടയിൽ കവർച്ച നടന്ന വിവരം അറിഞ്ഞത്. കടയുടമയുടെ പരാതിയിൽ രാമമംഗലം പോലീസ് സ്ഥലത്തെത്തി പരിശോധന നടത്തി. പിന്നീട് എട്ടോടെയാണ് സ്‌കൂളിലെ മോഷണ വിവരം പുറത്തറിഞ്ഞത്. വീണ്ടും പോലീസ് സ്ഥലത്തെത്തി പരിശോധന നടത്തി. ആലുവയിൽനിന്ന് വിരലടയാള വിദഗ്‌ധരും കളമശേരിയിൽനിന്ന് ഡോഗ് സ്ക്വാഡും സ്ഥലത്തെത്തി തെളിവുകൾ ശേഖരിച്ചു. സ്‌കൂൾ വളപ്പിൽനിന്ന് മോഷ്ടാവ് ഉപേക്ഷിച്ചുപോയതെന്ന് കരുതുന്ന അടിവസ്ത്രവും കടയുടെ പരിസരത്തുനിന്ന് ബനിയനും കണ്ടുകിട്ടി. സ്‌കൂൾ വളപ്പിൽ മണം പിടിച്ച പോലീസ് നായ ഷിൽഡ ഓഫീസ് മുറിയുടെ കിഴക്കു ഭാഗത്തേക്ക് ഓടി കിഴക്കുഭാഗത്തെ ഗേറ്റിനടത്ത് ചെന്നുനിന്നു. പാൻസും ഷർട്ടും ധരിച്ച് തൊപ്പിവച്ച് മുഖം മൂടിക്കെട്ടി ഗ്ലാസ് ധരിച്ചെത്തിയ മോഷ്ടാവിന്‍റെ ദൃശ്യമാണ് നരീക്ഷണ കാമറയിൽ ലഭിച്ചത്.

മന്ത്രി വീണ ജോർജിന്‍റെ രാജിക്കായി കോണ്‍ഗ്രസ് പ്രകടനവും ധർണയും നടത്തി

മൂവാറ്റുപുഴ: കോട്ടയം മെഡിക്കൽ കോളജിൽ കെട്ടിടം തകർന്നു വീണ് വീട്ടമ്മ മരണപ്പെട്ട സംഭവത്തിന്‍റെ ധാർമിക ഉത്തരവാദിത്തം ഏറ്റെടുത്ത് മന്ത്രി വീണ ജോർജ് രാജിവയ്ക്കണമെന്നും തയാറാക്കാത്ത പക്ഷം മന്ത്രി സഭയിൽനിന്നു പുറത്താക്കണമെന്ന് ആവശ്യപ്പെട്ടും കോണ്‍ഗ്രസ് പ്രകടനവും ധർണയും നടത്തി. ധർണ നഗരസഭാധ്യക്ഷൻ പി.പി. എൽദോസ് ഉദ്ഘാടനം ചെയ്തു. മണ്ഡലം പ്രസിഡന്‍റ് കെ.എ. അബ്ദുൽ സലാം അധ്യക്ഷത വഹിച്ചു.

വായന പക്ഷാചരണവും അനുസ്മരണവും

മൂവാറ്റുപുഴ: പേഴ്ക്കാപ്പിള്ളി ആസാദ് പബ്ലിക് ലൈബ്രറിയുടെ ആഭിമുഖ്യത്തിൽ വായന പക്ഷാചരണവും പി.എൻ. പണിക്കർ, ഐ.വി. ദാസ്, വൈക്കം മുഹമ്മദ് ബഷീർ, എം. സുകുമാരൻ എന്നിവരുടെ അനുസ്മരണവും നടത്തി. പേഴയ്ക്കാപ്പിള്ളി ഗവ. ഹയർ സെക്കൻഡറി സ്കൂൾ വിദ്യാർഥികളുടെ ലൈബ്രറി സന്ദർശനവും സംഘടിപ്പിച്ചു. ലൈബ്രറി പ്രസിഡന്‍റ് ഫൈസൽ മുണ്ടങ്ങാമറ്റം അധ്യക്ഷത വഹിച്ചു. അധ്യാപികയും എഴുത്തുകാരിയുമായ സ്റ്റാലിന ഭായ് അനുസ്മരണ പ്രഭാഷണം നടത്തി. ലൈബ്രറി സെക്രട്ടറി ടി.ആർ. ഷാജു വായന പക്ഷാചരണ സന്ദേശം നൽകി. താലൂക്ക് ലൈബ്രറി കൗണ്‍സിൽ അംഗങ്ങളായ കെ.കെ. ഉമ്മർ, ഇ.എ. ഹരിദാസ് എന്നിവർ വായന മത്സര പുസ്തകങ്ങളുടെ വിതരണം നടത്തി.

റവ. ഡോ. ആന്‍റോ പൂണോളിക്ക് ഓണററി പൗരത്വം

ചേരാനല്ലൂർ : ലിച്ചെൻസ്റ്റൈൻ രാജ്യത്തെ മുൻസിപ്പൽ തെരഞ്ഞെടുപ്പിൽ റവ. ഡോ. ആന്‍റോ പൂണോളി മൗറൻ മുൻസിപ്പാലിറ്റിയുടെ ഓണറ്റി പൗരനായി തെരഞ്ഞെടുക്കപ്പെട്ടു. മൗറനിലുള്ള വിശുദ്ധ പീറ്റർ ആൻഡ് പോൾ ഇടവകയിൽ കഴിഞ്ഞ 27 വർഷമായി സേവനമനുഷ്ഠിക്കുന്നു. നാൽപ്പതിനായിരത്തിൽപ്പരം മാത്രം ജനസംഖ്യയുള്ള ഒരു ചെറു രാഷ്ട്രമാണിത്. ചേരാനല്ലൂർ മങ്കുഴി തിരുക്കുടുംബ ഇടവകയിൽപെട്ട പൂണോളി റാഫേൽ-ത്രേസ്യ ദമ്പതികളുടെ മകനും, വിൻസെൻഷ്യൽ അങ്കമാലി മേരി മാതാ പ്രൊവിൻസ് അംഗവുമാണ്.

മാണിക്യമംഗലം എൻഎസ്എസ് സ്കൂൾ ലൈബ്രറിക്ക് പുസ്തകങ്ങൾ നല്കി

കാലടി: കാലടി റോട്ടറി ക്ലബിന്‍റെ "ഗിഫ്റ്റ് ഓഫ് റീഡിംഗ് ' പദ്ധതിയുടെ ഭാഗമായി കാലടി മാണിക്യമംഗലം എൻഎസ്എസ് ഹൈസ്കൂളിന് പുസ്തകങ്ങൾ നല്കി. കാലടി റോട്ടറി ക്ലബ് പ്രസിഡന്‍റ് പി.എം. പോളി സ്കൂൾ പ്രധാനാധ്യാപിക സ്മിത എസ്. നായർക്ക് പുസ്തക ശേഖരം നല്കികൊണ്ട് ഉദ്ഘാടനം ചെയ്തു. കാലടി റോട്ടറി ക്ലബ് സെക്രട്ടറി സി.എ. ജോളി സ്റ്റീഫൻ, ട്രഷറർ തോമസ് പടയാട്ടിൽ, മുൻ പ്രസിഡന്‍റ് പി.എസ്. ഉണ്ണികൃഷ്ണൻ, പി. സത്യനാഥ്, ഡോ. കെ. കൃഷ്ണൻ നമ്പൂതിരി, അധ്യാപകരായ വി. മായ, വിഷ്ണുരാജ്, കെ. സാവിത്രി ദേവി എന്നിവർ പങ്കെടുത്തു.

"വായനയുടെ സമ്മാനം' പദ്ധതി‌‌യുമായി റോട്ടറി

കൊച്ചി: റോട്ടറി ക്ലബ് ഓഫ് കൊച്ചിൻ ലോർഡ്സ്, ഇടപ്പള്ളി ക്യാംപ്യൻ സ്കൂളുമായി സഹകരിച്ച് ഡിസ്ട്രിക്ട് ഗവർണർ ഡോ. ജി.എൻ. രമേശിന്‍റെ നേതൃത്വത്തിൽ “വായനയുടെ സമ്മാനം" എന്ന പേരിൽ പ്രഥമ പദ്ധതി ആരംഭിച്ചു. ചടങ്ങിൽ ഡോ. ഗൗർദാസ് ചൗധരി മുഖ്യാതിഥിയായിരുന്നു. ഡോ. കെ.വി. തോമസ് മുഖ്യപ്രഭാഷണം നടത്തി. ജില്ലാ സെക്രട്ടറി തേജസ്, സുധിൻ വിലങ്ങാടൻ, ഡോ. ആന്‍റണി പോൾ, അസി.ഗവർണർ ആർ. ജെ. പ്രഹർഷ്, ആർ. ജിജി, സഞ്ജീവ്കുമാർ, ഡോ. ലീലാമ്മ തോമസ്, ജോജി ഗീവർഗീസ്, കെ.വിഷ്ണുദാസ് എന്നിവർ പങ്കെടുത്തു.

പാറക്കടവ് ബ്ലോക്കിൽ ആശാ പ്രവർത്തകർക്ക് ത്രിദിന പരിശീലന പരിപാടി

നെടുമ്പാശേരി : പാറക്കടവ് ബ്ലോക്ക് പരിധിയിലെ ആശാ പ്രവർത്തകർക്കുള്ള ത്രിദിന പരിശീലന പരിപാടി ആരംഭിച്ചു. ബ്ലോക്ക് പഞ്ചായത്ത് പ്രസിഡന്‍റ് ടി.വി. പ്രദീഷ് ഉദ്ഘാടനം ചെയ്തു. വൈസ് പ്രസിഡന്‍റ് താര സജീവ് അധ്യക്ഷയായിരുന്നു. ചെങ്ങമനാട് , നെടുമ്പാശേരി, പാറക്കടവ്, കുന്നുകര, പുത്തൻവേലിക്കര പഞ്ചായത്തുകളിലെ ആശാപ്രവർത്തകരാണ് പരിശീലനത്തിൽ പങ്കെടുക്കുന്നത്. നൽകുന്ന സേവനങ്ങളുടെ ഗുണനിലവാരം വർധിപ്പിക്കുന്നതിനും, പ്രവർത്തനങ്ങളുടെ കാര്യക്ഷമത വർധിപ്പിക്കുന്നതിനും സഹായകരമാകുന്ന വിധത്തിലാണ് മൂന്ന് ദിവസത്തെ പരിശീലന പരിപാടികൾ ആസൂത്രണം ചെയ്തിരിക്കുന്നത്. ചടങ്ങിൽ ബ്ലോക്ക് വികസനകാര്യ സ്റ്റാൻഡിംഗ് കമ്മിറ്റി ചെയർമാൻ സി.എം. വർഗീസ്, ബ്ലോക്ക് പഞ്ചായഅംഗങ്ങളായ വി.ടി. സലീഷ്, അമ്പിളിഅശോകൻ, മെഡിക്കൽ ഓഫീസർ ഡോ. വി.വി. പുഷ്പ, എസ്.ബിജോഷ് , പിആർഒ സംഗീത ജോൺ എന്നിവർ പ്രസംഗിച്ചു.

"കീഴ്മാട് പ്രാഥമികാരോഗ്യ കേന്ദ്രത്തിൽ പരിശോധനാ സമയം വെട്ടിച്ചുരുക്കി'

ആലുവ: കീഴ്മാട് പ്രാഥമികാരോഗ്യ കേന്ദ്രത്തിൽ പരിശോധന സമയം വെട്ടിച്ചുരുക്കിയതായി പരാതി. ഡോക്ടർമാരുടേയും ജീവനക്കാരുടെയും സ്ഥലം മാറ്റം കാരണം കുറവ് വന്നതോടെയാണ് ഓ പി സമയം കുറച്ചതെന്ന് അധികൃതർ അറിയിച്ചു. രാവിലെ എട്ടു മണിമുതൽ വൈകിട്ട് ആറുമണിവരെ പ്രവർത്തിച്ചുകൊണ്ടിരുന്ന ഓ പി വിഭാഗമാണ് കഴിഞ്ഞ ഒരു ആഴ്ച ആയി ഉച്ചയ്ക്ക് ഒരുമണിവരെ ആക്കിയിരിക്കുന്നത്. പ്രതിദിനം നൂറുകണക്കിന് രോഗികൾ വരുന്ന ആശുപത്രിയിൽ നിലവിൽ മൂന്ന് ഡോക്ടർമാരാണ് ഓ പി യിൽ ഉണ്ടായിരുന്നത്.

കെഎംഎം കോളജില്‍ യുജി കോഴ്‌സുകൾ ഉദ്ഘാടനം ചെയ്തു

കൊച്ചി: വാഴക്കാല കെഎംഎം കോളജില്‍ 2025-26 വര്‍ഷത്തെ യുജി കോഴ്‌സുകളുടെ ഉദ്ഘാടനം ആകാശവാണി കൊച്ചി എഫ്എം ആര്‍ജെ ബാലകൃഷ്ണന്‍ പെരിയ (ബാലേട്ടന്‍) നിര്‍വഹിച്ചു. കെഎംഎം ഗ്രൂപ്പ് ഓഫ് ഇന്‍സ്റ്റിറ്റ്യൂട്ട് ചെയര്‍മാന്‍ എ.എം. അബൂബക്കര്‍ മുഖ്യപ്രഭാഷണം നടത്തി. ദേശീയ വിദ്യാഭ്യാസ നയത്തിന്‍റെ ഭാഗമായി തൊഴിലധിഷ്ഠിത കോഴ്‌സുകള്‍ക്കാണ് കോളജില്‍ കൂടുതല്‍ പ്രാമുഖ്യം നല്‍കുന്നതെന്ന് അദ്ദേഹം പറഞ്ഞു. കെഎംഎ കോളജ് മാനേജര്‍ ഡോ. സബാന ബക്കര്‍ അധ്യക്ഷത വഹിച്ചു. പ്രിന്‍സിപ്പൽ ഡോ. പി.എം. നൗഷാദ്, ഫാക്കല്‍റ്റി കോ-ഓര്‍ഡിനേറ്റര്‍മാരായ എം.എം. രാഗി, ഫാത്തിമ റെയ്ഹാനത്ത് തുടങ്ങിയവര്‍ പ്രസംഗിച്ചു.

പഴങ്ങനാട് ഇടവകയിലെ വയോജനങ്ങൾക്കു വിമാനയാത്രയൊരുക്കി

കിഴക്കന്പലം: വിശുദ്ധ തോമാശ്ലീഹായുടെ രക്തസാക്ഷിത്വ ദിനത്തോടനുബന്ധിച്ച് വിശുദ്ധന്‍റെ മൈലാപ്പൂർ ഉള്ള കബറിടം സന്ദർശിച്ച് പഴങ്ങനാട് സെന്‍റ് അഗസ്റ്റിൻസ് ഇടവകയിലെ വയോജനങ്ങൾ മാതൃകയായി. ഇടവകയിലെ വയോജനങ്ങൾക്കു ആദ്യ വിമാനയാത്രയും മൈലാപ്പൂർ യാത്രയിലൂടെ സാധിച്ചു. വികാരി റവ. ഡോ. പോൾ കൈപ്രന്പാടന്‍റെ നേതൃത്വത്തിലായിരുന്നു യാത്ര. ഇടവകയിലെ നാൽപതോളം വരുന്ന മാതാപിതാക്കളുടെ ചിരകാല സ്വപ്നമായ വിമാനയാത്ര സാധ്യമാക്കി നടത്തിയ മൈലാപ്പൂർ സന്ദർശനം അവർക്ക് അവിസ്മരണീയമായ അനുഭവമായി മാറി.

ഉദയംപേരൂരിലും നെടുന്പാശേരിയിലും ഞാറ്റുവേലച്ചന്ത

ഉദയംപേരൂർ: ഉദയംപേരൂർ പഞ്ചായത്ത് കുടുംബശ്രീ, കൃഷിഭവൻ, ഉദയംപേരൂർ സർവീസ് സഹകരണ ബാങ്ക്, മണകുന്നം വില്ലേജ് സർവീസ് സഹകരണ ബാങ്ക് എന്നിവയുടെ സംയുക്താഭിമുഖ്യത്തിലാരംഭിച്ച ഞാറ്റുവേലച്ചന്ത പഞ്ചായത്ത് പ്രസിഡന്‍റ് സജിത മുരളി ഉദ്ഘാടനം ചെയ്തു. വൈസ് പ്രസിഡന്‍റ് എസ്.എ.ഗോപി അധ്യക്ഷത വഹിച്ചു. ടി.കെ. ജയചന്ദ്രൻ, സുധാ നാരായണൻ, രാജു പി. നായർ, ടി.ഒ. ദീപ, ബി. ഇന്ദു, കെ.ആർ.ബൈജു, ഉഷ ധനപാലൻ, സീനു ജോസഫ് തുടങ്ങിയവർ പ്രസംഗിച്ചു. നെടുമ്പാശേരി : നെടുമ്പാശേരി പഞ്ചായത്ത് കൃഷിഭവന്‍റെ ഞാറ്റുവേലചന്ത പഞ്ചായത്ത്‌ പ്രസിഡന്‍റ് എ.വി. സുനിൽ ഉദ്ഘാടനം ചെയ്തു. വൈസ് പ്രസിഡന്‍റ് ശോഭ ഭരതൻ അധ്യക്ഷയായി. പഞ്ചായത്ത് അംഗങ്ങളായ ആന്‍റണി കയ്യാല, ബിജി സുരേഷ്, ജെസി ജോർജ്, പാറക്കടവ് ബ്ലോക്ക്‌ അംഗം ആനി കുഞ്ഞുമോൻ കൃഷി ഓഫീസർ ഉണ്ണി കൃഷ്ണൻ എന്നിവർ സംസാരിച്ചു. കർഷകർക്ക് ഗുണമേന്മയുള്ള തൈകൾ, വിത്തുകൾ, മൂല്യ വർദ്ധിത ഉത്പന്നങ്ങൾ തുടങ്ങിയവ മിതമായ നിരക്കിൽ വാങ്ങാൻ അവസരവും ഉണ്ടായിരുന്നു.

ഡിബി ഗിഫ്റ്റ് 2025 സീസൺ-6ന് തുടക്കം

കൊച്ചി: പള്ളുരുത്തി ഡോൺ ബോസ്കോ ബോയ്സ് ഹോമിൽ കുട്ടികളുടെ വിദ്യാഭ്യാസ കലാ-കായിക ഉന്നമനത്തിനായി നടപ്പാക്കുന്ന ഡിബി ഗിഫ്റ്റ് സീസൺ 6നു തുടക്കമായി. കൊച്ചി എക്സൈസ് അസി. ഇൻസ്പെക്ടർ അനിൽകുമാർ ഉദ്ഘാടനം ചെയ്തു. ലഹരിയുടെ സ്വാധീനത്തെപ്പറ്റിയും പ്രതിരോധ മാർഗത്തെപ്പറ്റിയും ബോധവത്കരണ ക്ലാസ് നടത്തി. സ്നേഹഭവൻ എക്സിക്യൂട്ടീവ് ഡയറക്ടർ ഫാ. പി.ഡി. തോമസ് അധ്യക്ഷത വഹിച്ചു. ഫാ. സി.എം. ജോസഫ്, ഫാ. ജോൺ, ഫാ. ജോയ്സൺ, ഫാ. അഭിലാഷ്, ജോബ് തുടങ്ങിയവർ പ്രസംഗിച്ചു.

കുമ്പളങ്ങി-കല്ലഞ്ചേരി റോഡ് പുനർനിർമിക്കും

ഫോർട്ടുകൊച്ചി: കുമ്പളങ്ങി-കല്ലഞ്ചേരി റോഡ് പുനർനിർമിക്കണമെന്ന ജനങ്ങളുടെ ആവശ്യത്തിന് പരിഹാരമായി കെ.ജെ. മാക്സി എംഎൽഎ, പിഡബ്ല്യുഡി ഉദ്യോഗസ്ഥരുമായി സ്ഥലം സന്ദർശിച്ച് എസ്റ്റിമേറ്റ് തയാറാക്കുവാനുള്ള നടപടികൾ സ്വീകരിച്ചു. കല്ലഞ്ചേരി വടക്കേ അറ്റം മുതൽ ചാലാവീട്ടിൽ സ്ലൂയീസ് വരെ ഒരു കിലോമീറ്റർ നീളത്തിൽ റീബിൽഡ് കേരള പദ്ധതിയിൽ ഉൾപ്പെടുത്തി റോഡ് പുനർനിർമിച്ചിരുന്നു. ബാക്കിയുള്ള 620 മീറ്റർ നീളത്തിലാണ് റോഡ് തകർന്നു കിടക്കുന്നത്. പരിസരവാസികളുടെ നേതൃത്വത്തിൽ ഒപ്പുശേഖരണം നടത്തി എംഎൽഎക്ക് ഭീമഹർജി നൽകിയ വേളയിൽ തന്നെ ഹർജിക്കാർക്ക് ഉറപ്പ് നൽകിയിരുന്നു. എംഎൽഎ ക്കൊപ്പം വൻജനാവലിയുമുണ്ടായിരുന്നു. കെ.ജെ. മാക്സി എംഎൽഎ ക്കൊപ്പം സിപിഎം ജില്ലാ കമ്മിറ്റി അംഗം പി.എ. പീറ്റർ, ബ്ലോക്ക് പഞ്ചായത്ത് വൈസ് പ്രസിഡന്‍റ് ജോബി പനക്കൽ, പഞ്ചായത്ത് മെമ്പർമാരായ ജെൻസി ആന്‍റണി, സജീവ് ആന്‍റണി, പി.ടി. സുധീർ, താരാ രാജു, ലോക്കൽ കമ്മിറ്റി സെക്രട്ടറി എൻ.എസ്. സുനീഷ് , മാർട്ടിൻ ആന്‍റണി, ടെൻസൻ കുറുപ്പശേരി തുടങ്ങിയവർ സന്നിഹിതരായിരുന്നു.

പൈപ്പ് പൊട്ടി കുടിവെള്ളം പാഴാകുന്നു

ആലുവ‌‌\ഫോർട്ടുകൊച്ചി: ആലുവ റെയിൽവേ സ്റ്റേഷൻ ജംഗ്ഷനിലും കുമ്പളങ്ങി-എഴുപുന്ന റോഡിലും പൈപ്പ് പൊട്ടി ശുദ്ധജലം പാഴാകുന്നു. ആലുവയിൽ വാഹനങ്ങൾ കയറി കുടിവെള്ള പൈപ്പ് പൊട്ടുകയായിരുന്നു. നേരിട്ട് അറിയിച്ചിട്ടും വാട്ടർ അഥോറിറ്റി നന്നാക്കുന്നില്ലെന്ന് വ്യാപാരികളുടെ പരാതി. ഇന്നലെ രാവിലെയാണ് ആലുവ റെയിൽവേ സ്റ്റേഷൻ ജംഗ്ഷനിൽ റോഡിനോടും പൊതു കാനയോടും ചേർന്ന് രാജാജി ലോഡ്ജിന് മുന്നിലായി കുടിവെള്ള പൈപ്പ് പൊട്ടിയത്. ഇന്നലെ സന്ധ്യവരെ പൈപ്പ് നന്നാക്കാൻ ആളെത്തിയില്ല. കുമ്പളങ്ങി-എഴുപുന്ന റോഡിൽ ഔവർ ലേഡി ഓഫ് ഫാത്തിമ ഹയർ സെക്കൻഡറി സ്കൂളിന് മുന്നിലാണ് പൈപ്പ് പൊട്ടി വെളളം ഒഴുകുന്നത്. പഞ്ചായത്ത് പ്രസിഡന്‍റ് സൂസൻ ജോസഫ്, മെമ്പർ ബെയ്സിൽ പുത്തംവീട്ടിൽ തുടങ്ങിയവർ സംഭവ സ്ഥലം സന്ദർശിച്ചു.ഇവർ വാട്ടർ അഥോറിറ്റിക്ക് പരാതി നല്കി. ശുദ്ധജലം പാഴാക്കുന്നതിനെതിരേയും വാട്ടർ അഥോറിറ്റിയുടെ അനാസ്ഥയ്ക്കെതിരെയും ജനാധിപത്യ കേരള കോൺഗ്രസ് കുമ്പളങ്ങി മണ്ഡലം കമ്മിറ്റിയുടെ നേതൃത്വത്തിൽ സായാഹ്ന പ്രതിഷേധപ്രകടനം സംഘടിപ്പിച്ചു. മണ്ഡലം പ്രസിഡന്‍റ് ടെൻസൺ കുറുപ്പശേരി അധ്യക്ഷത വഹിച്ചു. ജില്ലാ വൈസ് പ്രസിഡന്‍റ് തങ്കച്ചൻ പെരുമ്പള്ളി ഉദ്ഘാടനം ചെയ്തു.

ജ്ഞാനോദയയില്‍ ആര്‍ട്ട് ഫെസ്റ്റിവല്‍

കാലടി: ചെങ്ങല്‍ ജ്ഞാനോദയ സെന്‍ട്രല്‍ സ്‌കൂളില്‍ സംഘടിപ്പിച്ച ആര്‍ട്ട് ഫെസ്റ്റിവല്‍ ‘ടാലന്‍റ് ഡ്രിസില്‍ 2025’ നടന്‍ ഏലൂര്‍ ജോര്‍ജ് ഉദ്ഘാടനം ചെയ്തു. ലോക്കല്‍ മാനേജര്‍ സിസ്റ്റര്‍ ദയ മരിയ അധ്യക്ഷത വഹിച്ചു. പ്രിന്‍സിപ്പല്‍ സിസ്റ്റര്‍ സിനി റോസ്, അധ്യാപിക ആനി തോമസ്, ആര്‍ട്‌സ് ക്യാപ്റ്റന്‍ മിത്രജ രാജീവ് എന്നിവര്‍ പ്രസംഗിച്ചു. കെജി മുതല്‍ എച്ച്എസ്എസ് വരെ 30 ഇനങ്ങളിലായി കലാമത്സരങ്ങള്‍ നടന്നു.

മഞ്ഞപ്രയിലും നടുവട്ടത്തും ശക്തമായ കാറ്റ്; വ്യാപക നാശനഷ്ടം

കാലടി: ഇന്നലെ ഉച്ചയോടെ വീശിയടിച്ച ശക്തമായ കാറ്റിൽ മഞ്ഞപ്ര മേഖലയിലും, മലയാറ്റൂർ നീലീശ്വരം പഞ്ചായത്തിലെ നടുവട്ടം പ്രദേശത്തും വ്യാപക നാശനഷ്ടമുണ്ടായി. മഞ്ഞപ്രയിൽ ശക്തമായി വീശിയടിച്ച ചുഴലിക്കാറ്റിൽ വീടിന് മുകളിലേക്ക് മരം വീണ് വീട് പൂർണമായും തകർന്നു. വീട്ടിൽ ആൾതാമസമില്ലാതിരുന്നതിനാൽ വലിയ അപകടം ഒഴിവായി. ഇന്നലെ ഉച്ചയ്ക്ക് 12 ഓടെ ശക്തമായി പെയ്ത മഴയോടൊപ്പമാണ് ചുഴലിക്കാറ്റും വീശിയടിച്ചത്. മഞ്ഞപ്ര പഞ്ചായത്ത് അഞ്ചാം വാർഡിൽ താമസിക്കുന്ന പറമ്പി ബെന്നി ജോസഫിന്‍റെ ആൾ താമസമില്ലാത്ത വീടിന് മുകളിലേക്കാണ് മരം വീണത്. വീട് പൂർണമായും തകർന്നു. വീടിന് സമീപം നിന്നിരുന്ന വലിയ തേക്ക് മരം ശക്തമായ കാറ്റിൽ വീടിന് മുകളിലേക്ക് കടപുഴകി വീഴുകയായിരുന്നു. ശക്തമായ കാറ്റിൽ നടുവട്ടം ഭാഗത്തും വ്യാപക കൃഷിനാശവും ഉണ്ടായിട്ടുണ്ട്. കനത്ത കാറ്റിൽ രണ്ടാം വാർഡിലെ പയ്യപ്പിള്ളി ജോബിയുടെ ഇരുപതോളം ജാതി മരങ്ങൾ കടപഴുകി വീണു. നിറയെ ജാതി കായകൾ ഉള്ള മരങ്ങളാണ് മറിഞ്ഞത്. ലക്ഷക്കണക്കിന് രൂപയുടെ നഷ്ടമാണ് ജോബിക്ക് ഉണ്ടായിട്ടുളളത്. ശക്തമായ കാറ്റിൽ, വാഴ, ജാതി, കവുങ്ങ് ഉൾപ്പെടെ കടപുഴകി വീണ് വ്യാപക കൃഷി നാശം മേഖലയിൽ സംഭവിച്ചു.

കെസിവൈഎം കൊച്ചി രൂപത : സുവർണ ജൂബിലി ലോഗോ പ്രകാശനം ചെയ്തു

ഫോർട്ടുകൊച്ചി : കെസിവൈഎം കൊച്ചി രൂപതയുടെ സുവർണ ജൂബിലി ആഘോഷങ്ങൾക്ക് മുന്നോടിയായി ജൂബിലി ലോഗോ പ്രകാശനകർമം കെസിബിസി ഡെപ്യൂട്ടി സെക്രട്ടറി ഫാ. തോമസ് തറയിൽ, ജൂബിലി ലോഗോ രൂപത പ്രസിഡന്റ് ഡാനിയ ആന്‍റണിക്ക് കൈമാറി നിർവഹിച്ചു. ആഗോള കത്തോലിക്കാ സഭയുടെ ജൂബിലിയോടൊപ്പം തന്നെയാണ് കെസിവൈഎം സുവർണ ജൂബിലി ആഘോഷങ്ങൾ നടത്തപ്പെടുന്നതെന്ന് അദ്ദേഹം കൂട്ടിച്ചേർത്തു. സുവർണ ജൂബിലി ആപ്തവാക്യത്തിന്‍റെ പ്രകാശനകർമം സംസ്ഥാന ഡയറക്ടർ ഫാ. ഡിറ്റോ കൂള നിർവഹിച്ചു. ക്രിസ്തുപാതയിൽ നവസമൂഹനിർമിതിക്കായി ഉജ്ജ്വലയുവത്വം എന്നതാണ് സുവർണ ജൂബിലി ആപ്തവാക്യം. കെസിവൈഎം രൂപത ഡയറക്ടർ ഫാ. മെൽട്ടസ് കൊല്ലശേരി, സുവർണ ജൂബിലി ജനറൽ കൺവീനർ കാസി പൂപ്പന, രൂപത വൈസ് പ്രസിഡന്‍റ് ജീവാ റെജി, ട്രഷറർ ജോർജ് ജിക്സൺ, സെക്രട്ടറി സനൂപ് ദാസ്, സംസ്ഥാന സിൻഡിക്കേറ്റ് അംഗം അന്ന സിൽഫ സെബാസ്റ്റ്യൻ, എക്സിക്യൂട്ടീവ് അംഗങ്ങളായ ടോം ആന്‍റണി, ബേസിൽ റിച്ചാർഡ് എന്നിവർ സംസാരിച്ചു.

വിദ്യാലയത്തിനു മുന്നിൽ പോലീസില്ല : റോഡു മുറിച്ചുകടക്കാൻ പാടുപെട്ട് വിദ്യാർഥികൾ

ഫോർട്ടുകൊച്ചി: വിദ്യാലയങ്ങൾക്ക് മുന്നിൽ കുരുന്നുകൾക്ക് രക്ഷകരായി മാറേണ്ട പോലീസുകാരെ പലപ്പോഴും കാൺമാനില്ലെന്ന് രക്ഷിതാക്കളുടെയും സ്കൂൾ അധികൃതരുടേയും പരാതി. സ്കൂൾ തുറന്ന ദിനങ്ങളിലെല്ലാം ഡ്യൂട്ടിക്ക് പോലീസുകാർ ഉണ്ടായിരുന്നുവെങ്കിലും ഇപ്പോൾ കാണാനില്ലെന്നാണ് ആക്ഷേപം. കുന്പളങ്ങി പെരുമ്പടപ്പ് സെന്‍റ് ആന്‍റണീസ് യുപി സ്കൂളിനു മുന്നിൽ കുട്ടികൾ റോഡ് മുറിച്ചു കടക്കുന്നത് സുഗമമാക്കാൻ സിഗ്നൽ ലൈറ്റുകൾ സ്ഥാപിച്ചിട്ടുണ്ടെങ്കിലും സ്റ്റോപ്പ് ലൈറ്റുകൾ തെളിയാത്തതു മൂലം 24 മണിക്കൂറും വാഹനങ്ങൾ ചീറി പായുകയാണ്. സ്കൂളിലേക്ക് വരികയും പോരുകയും ചെയ്യുന്ന വിദ്യാർഥികൾ നന്നേ കഷ്ടപ്പെട്ടാണ് റോഡ് മുറിച്ചു കടക്കുന്നത്. സമീപത്ത് തന്നെ ബസ് സ്റ്റോപ്പ് ഉള്ളതിനാൽ ഗതാഗതക്കുരുക്കും ഈ സമയങ്ങളിൽ ഉണ്ടാകാറുണ്ട്. അപകടങ്ങളും ഇവിടെ നിത്യസംഭവമായി മാറിയിരിക്കുകയാണ്. തുറവൂർ-അരൂർ ആകാശപ്പാത നിർമാണം നടക്കുന്നതിനാൽ ഇരുചക്ര വാഹനമുൾപ്പെടെയുള്ള എല്ലാ വാഹനങ്ങളും കുമ്പളങ്ങി - പെരുമ്പടപ്പ് റോഡിലൂടെയാണ് യാത്ര ചെയ്യുന്നത്. ഇതുമൂലം ഇതിലേയുള്ള വാഹന ഗതാഗതം ഇരട്ടിയായി വർധിച്ചിരിക്കുകയാണ്. കുമ്പളങ്ങി-എഴുപുന്ന റോഡിലൂടെയുള്ള ഗതാഗതവും അപകടങ്ങൾ ക്ഷണിച്ചു വരുത്തുകയാണെന്നും കുമ്പളങ്ങിയിലേയും പെരുമ്പടപ്പിലേയും വിദ്യാലയങ്ങൾക്ക് മുന്നിൽ പോലീസിനേയോ ഹോം ഗാർഡുകളേയോ നിർത്തി വിദ്യാർഥികൾക്ക് സുരക്ഷ ഉറപ്പുവരുത്തണമെന്നും ജനാധിപത്യ കേരള കോൺഗ്രസ് കുമ്പളങ്ങി മണ്ഡലം പ്രസിഡന്‍റ് ടെൻസൻ കുറുപ്പശേരി വകുപ്പ് മന്ത്രിമാർക്ക് നല്കിയ പരാതിയിൽ ആവശ്യപെട്ടിട്ടുണ്ട്.

യൂസുഫ് പല്ലാരിമംഗലത്തിന് വൈക്കം മുഹമ്മദ് ബഷീര്‍ സ്മാരക പുരസ്കാരം

പോത്താനിക്കാട്: തിരുവനന്തപുരം തൈക്കാട് വൈക്കം മുഹമ്മദ് ബഷീര്‍ കള്‍ചറല്‍ ഫോറത്തിന്‍റെ വൈക്കം മുഹമ്മദ് ബഷീര്‍ സ്മാരക പുരസ്കാരത്തിനായി കെ.എ. യൂസുഫ് പല്ലാരിമംഗലത്തിനെ തെരഞ്ഞെടുത്തു. പല്ലാരിമംഗലം ഗവ. വൊക്കേഷണല്‍ ഹയര്‍ സെക്കന്‍ഡറി സ്കൂളിന്‍റെ ചരിത്ര പുസ്തകം തയാറാക്കിയതിനാണ് പുരസ്കാരം. 2023 ഒക്ടോബറിലാണ് പുസ്തകം പ്രകാശനം ചെയ്തത്. ആനുകാലികങ്ങളില്‍ കവിത, കഥ തുടങ്ങിയവ എഴുതുന്ന യൂസുഫ് "പെങ്ങള്‍ നട്ട പൂക്കള്‍’ എന്ന പേരില്‍ കവിതാസമാഹാരവും പുറത്തിറക്കിയിട്ടുണ്ട്. ജൂലൈ അഞ്ചിന് വൈക്കം മുഹമ്മദ് ബഷീര്‍ അനുസ്മരണ ദിനത്തില്‍ തിരുവനന്തപുരം നന്ദാവനം പ്രഫ. എന്‍. കൃഷ്ണപിള്ള ഹാളില്‍ നടക്കുന്ന ചടങ്ങില്‍ പുരസ്കാരം സമ്മാനിക്കും.

ലിറ്റിൽ ഫ്ളവർ ഹൈസ്കൂളിൽ നൊ ബാഗ് ഡേ

ഊന്നുകൽ: ലിറ്റിൽ ഫ്ളവർ ഹൈസ്കൂളിൽ നൊ ബാഗ് ഡേ ഉദ്ഘാടനം നടത്തി. സംസ്ഥാന സർക്കാർ പൊതുവിദ്യാലയങ്ങളെ മികവിന്‍റെ ഇടങ്ങളായി മാറ്റുന്നതിന്‍റെ ഭാഗമായും സമഗ്രഗുണമേന്മ പാഠ്യപദ്ധതിയുടെ ഭാഗമായിട്ടുമാണ് പദ്ധതിക്ക് തുടക്കംകുറിച്ചത്. കുട്ടികളിൽ ഒളിഞ്ഞു കിടക്കുന്ന സർഗവാസനകളെ കണ്ടെത്തി പരിശീലിപ്പിക്കുകയാണ് ലക്ഷ്യം. ബാൻഡ്, ചെണ്ട, കരാട്ടെ, ഡാൻസ്, അബാക്കസ്, സംഗീതം, യോഗ, ഡ്രോയിംഗ്, തയ്യിൽ, പ്രസംഗം എന്നിവയ്ക്കുള്ള പരിശീലനമാണ് ഇതിന്‍റെ ഭാഗമായി ആരംഭിച്ചിരിക്കുന്നത്. എല്ലാ ബുധനാഴ്ചയും പാഠ്യേതര പ്രവർത്തനങ്ങൾക്കുള്ള പരിശീലനം നൽകും. കോതമംഗലം രൂപത കോർപ്പറേറ്റ് ഏജൻസി സെക്രട്ടറി ഫാ. മാത്യു എം. മുണ്ടക്കൽ ഉദ്ഘാടനം നിർവഹിച്ചു. സ്കൂൾ മാനേജർ ഫാ. മാത്യു അത്തിക്കൽ അധ്യക്ഷത വഹിച്ചു.

മദ്യലഹരിയിൽ കാറോടിച്ച് അപകടം

കൂത്താട്ടുകുളം: എംസി റോഡിൽ കൂത്താട്ടുകുളം ടൗണിൽ മദ്യലഹരിയിൽ കാറോടിച്ച് അപകടം. അതിവേഗത്തിൽ കോട്ടയം ഭാഗത്തുനിന്നു ടൗണിലേക്ക് എത്തിയ വാഹനം മൂന്നു വാഹനങ്ങൾ തകർത്ത് പോസ്റ്റിൽ ഇടിച്ചാണ് നിന്നത്. വാഹനം ഓടിച്ചിരുന്ന കൂത്താട്ടുകുളം തേവർകുന്നേൽ ജൂബി ജോസ് (48), വാഹനത്തിലെ യാത്ര ചെയ്തുവന്ന കൂത്താട്ടുകുളം കക്കാട്ടുപിള്ളി കെ.കെ. ശ്രീകാന്ത് (44) എന്നിവരെ പോലീസ് കസ്റ്റഡിയിലെടുത്തു. ഇന്നലെ രാത്രി 8.15ഓടെയാണ് സംഭവം. അപകടത്തിൽ ആർക്കും പരിക്കുകൾ. രാമപുരം കവലയിൽ എയർപോർട്ടിൽനിന്നു യാത്രക്കാരുമായി വന്ന ഇന്നോവയിലാണ് ആദ്യം ഇടിച്ചതെന്ന് നാട്ടുകാർ പറഞ്ഞു. നൂറു മീറ്റർ മാറി ഫെഡറൽ ബാങ്ക് സമീപം കെഎസ്ആർടിസി ബസിന്‍റെ പിൻഭാഗത്ത് ഇടിച്ചു. പിന്നീട് എൻഎസ്എസ് ആർക്കേഡിൽ പാർക്ക് ചെയ്തിരുന്ന ഫോർച്യൂണർ കാറിൽ ഇടിച്ചുകയറി. തുടർന്ന് റോഡരികി വൈദ്യുത കാലിൽ ഇടിച്ചാണ് അപകടമുണ്ടാക്കിയ കാർ നിന്നത്. കാർ ഡ്രൈവറേയും സഹയാത്രികനേയും നാട്ടുകാർ തടഞ്ഞു പോലീസിൽ ഏൽപ്പിക്കുകയായിരുന്നു.

ഡി-അഡിക്ഷൻ സെന്‍ററിന് ആംബുലൻസ് നൽകി

തിരുവാങ്കുളം: ലഹരി വിപത്തിനെതിരെ യാക്കോബായ സുറിയാനി ഓർത്തഡോക്സ് സഭ ആരംഭിക്കുന്ന ലഹരി വിമുക്ത കേന്ദ്രത്തിന്‍റെ പ്രവർത്തനങ്ങൾ കൂടുതൽ വ്യാപിപ്പിക്കുമെന്ന് തിരുവാങ്കുളം ക്യംതാ സെമിനാരി കാതോലിക്കോസ് റെസിഡൻസിൽ ശ്രേഷ്ഠ കാതോലിക്ക മാർ ബസേലിയോസ് ജോസഫ് ബാവായുടെ അധ്യക്ഷത ചേർന്ന അവലോകന യോഗം വ്യക്തമാക്കി. കാലഘട്ടത്തിന്‍റെ ആവശ്യമായിക്കൊണ്ടിരിക്കുന്ന ലഹരി വിമുക്ത കേന്ദ്രങ്ങൾ പരിശുദ്ധ സഭയുടെ എല്ലാ ഭദ്രാസനങ്ങളിലും ആരംഭിക്കുമെന്ന് ശ്രേഷ്ഠ കാതോലിക്ക ബാവ പറഞ്ഞു. ഡി-അഡിക്ഷൻ സെന്‍ററിന്‍റെ ചുമതല വഹിക്കുന്ന സഖറിയാസ് മാർ പീലക്സിനോസ് മെത്രാപ്പോലീത്ത പ്രഭാഷണം നടത്തി. കൊച്ചി ഭദ്രാസനത്തിന്‍റെ നേതൃത്വത്തിൽ വെളിയനാട് വട്ടപ്പാറയിൽ ആരംഭിക്കുന്ന ആദ്യ സെന്‍ററിന്‍റെ പ്രവർത്തനങ്ങൾ പുരോഗമിക്കുന്നു. കോട്ടയം ഭദ്രാസനത്തിലെ വടവാതൂർ മാർ അപ്രേം യാക്കോബായ സുറിയാനി പള്ളിയിൽനിന്നു ഡി-അഡിക്ഷൻ സെന്‍ററിലേക്ക് ആംബുലൻസ് നൽകി. ശ്രേഷ്ഠ കാതോലിക്ക ബാവയും മെത്രാപ്പോലീത്തയും ചേർന്ന് പള്ളി വികാരിമാരായ ഫാ. അജു കെ. ഫിലിപ്പ് കോട്ടപ്പുറം, ഫാ. തോമസ് കുര്യൻ കണ്ടാന്തറ എന്നിവരിൽനിന്ന് ആംബുലൻസിന്‍റെ താക്കോൽ സ്വീകരിച്ചു.

റോഡുകളിലെ വെള്ളക്കെട്ട്: എംപിയുടെ നേതൃത്വത്തിൽ സ്ഥലം സന്ദർശിച്ചു

മൂവാറ്റുപുഴ: മണ്ഡലത്തിലെ റോഡുകളിൽ വെള്ളക്കെട്ടുണ്ടായ ഭാഗങ്ങൾ ഡീൻ കുര്യാക്കോസ് എംപിയുടെ നേതൃത്വത്തിലുള്ള സംഘം സന്ദർശിച്ചു. മഴക്കാലമായതോടെ ദേശീയപാത 85ന്‍റെ ഭാഗമായ മൂവാറ്റുപുഴ മണ്ഡലത്തിലെ വെള്ളക്കെട്ടുണ്ടാകുന്ന സ്ഥലങ്ങളാണ് സംഘം സന്ദർശിച്ചത്. മൂവാറ്റുപുഴ മണ്ഡലം ആരംഭിക്കുന്ന പെരുവംമൂഴി പാലം മുതൽ മൂവാറ്റുപുഴ കടാതി വരെയാണ് എംപി സന്ദർശനം നടത്തിയത്. ദേശീയപാത അഥോറിറ്റി ഉദ്യോഗസ്ഥരെയും ഉൾപ്പെടുത്തിയാണ് മേക്കടന്പ്, കടാതി ഷാപ്പുംപടി, ആലിൻചുവട് പ്രദേശങ്ങളിൽ എംപി സന്ദർശനം നടത്തിയത്. ദേശീയപാത വികസന അഥോറിറ്റി ഉദ്യോഗസ്ഥരെക്കൊണ്ട് സ്ഥല പരിശോധന നടത്തുകയും ചെയ്തു. പെരുവംമൂഴി മുതൽ കടാതി വരെ നിരന്തരമായി വെള്ളക്കെട്ട് രൂക്ഷമായ നാല് സ്ഥലങ്ങളിലെ പ്രശ്നപരിഹാരത്തിനായി എംപി ഇടപെടൽ നടത്തിയെങ്കിലും സൂക്ഷ്മ പരിശോധന ആവശ്യമായിരുന്നു. വലിയ വെള്ളക്കെട്ടുണ്ടാകുന്ന പ്രദേശങ്ങളിലെ ഓടയുടെ നിർമാണത്തിൽ ശാസ്ത്രീയമായ പരിഷ്കരണങ്ങൾ നടത്താനാണ് നിലവിൽ തീരുമാനിച്ചിരിക്കുന്നത്. പെരുവംമൂഴി മുതൽ ബഥനിപ്പടി വരെയുള്ള ഓടയുടെ നിർമാണത്തിൽ കണ്ടെത്തിയിട്ടുള്ള അശാസ്ത്രീയത പരിഹരിക്കാനും തീരുമാനമായി. കെഎസ്ഇബിയുടെ പോസ്റ്റുകൾ മാറ്റാത്തത് ഓടയുടെ നിർമാണം പൂർത്തീകരിക്കാൻ തടസമായി. ഓട നിർമാണത്തിലെ അപാകതകൾ പരിശോധിക്കുമെന്നും വിവിധ വകുപ്പുകളുമായി ഏകോപിപ്പിച്ച് നിർമാണ പ്രവർത്തനം ഉടൻ പൂർത്തീകരിക്കുമെന്നും എംപി പറഞ്ഞു.

ഓർമപ്പെരുന്നാൾ ഇന്നാരംഭിക്കും

മൂവാറ്റുപുഴ: വെള്ളൂർക്കുന്നം മൗണ്ട് താബോർ സെന്‍റ് പോൾസ് ചാപ്പലിൽ പൗലോസ് ശ്ലീഹായുടെ ഓർമപ്പെരുന്നാൾ ഇന്ന് തുടങ്ങും. വികാരി ജോർജ് മാന്തോട്ടം കോറെപ്പിസ്കോപ്പ കൊടിയേറ്റി. ഇന്ന് രാവിലെ 6.45ന് പ്രാർഥന, 7.30ന് കുർബാന ഫാ. ജോബി ജോണ്‍ പുളിഞ്ചിയിൽ, 6.30ന് പ്രാർഥന ഫാ. ബാബു പാലക്കുന്നേൽ. നാളെ 6.45ന് പ്രാർഥന, 7.30ന് കുർബാന ഫാ. ജോയി നെല്ലിക്കുന്നേൽ, 6.30ന് പ്രാർഥന, 7.30ന് പ്രദക്ഷിണം. ആറിന് 7.30ന് പ്രാർഥന, 8.30ന് കുർബാന മാത്യുസ് മാർ തീമോത്തിയോസ് മെത്രാപ്പോലീത്ത, പത്തിന് ഉന്നത വിജയം നേടിയ വിദ്യാർഥികളെ ആദരിക്കലും നിർധന രോഗികൾക്ക് ധനസഹായ വിതരണവും, 10.30ന് പ്രദക്ഷിണം.

റോട്ടറി ക്ലബ് വിദ്യാർഥികൾക്ക് പരിസ്ഥിതി പ്രവർത്തനങ്ങൾക്കുള്ള പദ്ധതികൾ നടപ്പാക്കും

കൂത്താട്ടുകുളം: റോട്ടറി ക്ലബ് സ്കൂൾ വിദ്യാർഥികൾക്ക് പരിസ്ഥിതി പ്രവർത്തനങ്ങൾക്കുള്ള പദ്ധതികൾ നടപ്പാക്കുമെന്ന് ഭാരവാഹികൾ പത്രസമ്മേളനത്തിൽ അറിയിച്ചു. സ്കൂൾ ലൈബ്രറിക്ക് പുസ്തകങ്ങൾ, ലഹരി വിരുദ്ധ ബോധവത്കരണം, ആശുപത്രികൾക്ക് സഹായം, മെഡിക്കൽ ക്യാന്പുകൾ, മരുന്ന് വിതരണം, വയോജന കേന്ദ്രങ്ങളിലും അനാധാലയങ്ങളിലും ഭക്ഷണം, വിവിധ മേഖലകളിൽ പ്രാഗൽഭ്യം തെളിയിച്ചവർക്ക് വൊക്കേഷണൽ അവാർഡുകൾ തുടങ്ങിയവ കൂത്താട്ടുകുളം റോട്ടറി നടപ്പാക്കും. കൃത്രിമ അവയവങ്ങൾ നൽകൽ, കൈമുട്ട്, കാൽമുട്ട് മാറ്റിവയ്ക്കൽ ശസ്ത്രക്രിയ, 18 വയസിൽ താഴെയുള്ള കുട്ടികൾക്ക് സൗജന്യ ഹൃദയ ശസ്ത്രക്രിയ, കാൻസർ ചികിത്സാ സഹായം എന്നിവയുമുണ്ടാകും. പത്രസമ്മേളനത്തിൽ പ്രസിഡന്‍റ് സന്ദീപ് ഉല്ലാസ്, സെക്രട്ടറി എം.എൻ. പ്രിൻസ്, അനിൽ ജോണ്‍, എം.സി. സാജു, പി.ജി. സിനോജ് എന്നിവർ പങ്കെടുത്തു.

യുവാവിനെ ആക്രമിച്ച കേസ്; പ്രതിക്ക് അഞ്ചുവർഷം തടവും 50,000 പിഴയും

മൂവാറ്റുപുഴ: യുവാവിനെ ആക്രമിച്ച് പരിക്കേൽപ്പിച്ച കേസിൽ പ്രതിക്ക് അഞ്ചുവർഷം തടവും 50,000 രൂപ പിഴയും ശിക്ഷ വിധിച്ചു. തൊടുപുഴ ഉടുന്പന്നൂർ ഉറുന്പിക്കുന്നേൽ അഭിലാഷി (44) നെയാണ് മൂവാറ്റുപുഴ അസിസ്റ്റന്‍റ് സെഷൻസ് കോടതി ജഡ്ജി അഥീക് റഹ്മാൻ ശിക്ഷിച്ചത്. 2012 ജനുവരിയിൽ കൂത്താട്ടുകുളം പോലീസ് സ്റ്റേഷനിൽ രജിസ്റ്റർ ചെയ്ത കേസാണ്. കോഴിപ്പിള്ളി അറയാനിച്ചോട് സ്വദേശിയായ വിഷ്ണുവിനെ കുത്തി പരിക്കേൽപ്പിക്കുകയായിരുന്നു. കല്യാണ വീട്ടിലുണ്ടായ തർക്കത്തെതുടർന്നുള്ള വൈരാഗ്യത്തിലാണ് ആക്രമിച്ചത്. അന്വേഷണം പൂർത്തിയാക്കി പ്രതിക്കെതിരെ കുറ്റപത്രം സമർപ്പിച്ചത് സബ് ഇൻസ്പെക്ടർ വി.എസ്. അനിൽകുമാറാണ്. പ്രോസിക്യൂഷനു വേണ്ടി ഗവ. പ്ലീഡർ സാബു ജോസഫ് ഹാജരായി.

മാലിപ്പാറയിൽ കൃഷി നശിപ്പിച്ച് കാട്ടാനകൾ

കോതമംഗലം: മാലിപ്പാറയിൽ ജനവാസ മേഖലയിലിറങ്ങിയ കാട്ടാനകൾ മതിലും തകർത്ത് കൃഷിയും നശിപ്പിച്ചു. പിണ്ടിമന പഞ്ചായത്തിലെ മാലിപ്പാറയിൽ കടവുങ്കൽ സിജു ലൂക്കോസിന്‍റെ കൃഷിയിടത്തിൽ വ്യാഴാഴ്ച രാത്രിയെത്തിയ കാട്ടാനക്കൂട്ടമാണ് മതിൽ തകർത്ത് കൃഷിയും നശിപ്പിച്ചത്. അൻപതോളം ചുവട് കപ്പ ആനകൾ പിഴുതെടുത്തിട്ടുണ്ട്. പൊതുമരാമത്ത് റോഡിലൂടെ വന്ന ആനകൾ മതിൽ തകർത്താണ് കൃഷിയിടത്തിൽ കയറിയത്. സമീപത്തെ മറ്റ് കൃഷിയിടങ്ങളിലും ആനകൾ കടന്നുകയറി. പൈനാപ്പിളും റന്പൂട്ടാനുമെല്ലാം നശിപ്പിച്ചവയിലുണ്ട്. പന ചവിട്ടി മറിച്ച് തിന്നുകയും ചെയ്തു. കൃഷി നശിപ്പിച്ചതിന് പുറമെ കയ്യാലകളും തകർത്തിട്ടുണ്ട്. ടാർ റോഡിലൂടെയാണ് ഏറെ ദൂരം ആനകൾ സഞ്ചരിച്ചത്. രണ്ട് തവണയാണ് ഈ ഭാഗത്ത് ആനകളെത്തിയത്. രാത്രി ഒന്നോടെയായിരുന്നു ആദ്യത്തെ വരവ്. പടക്കംപൊട്ടിച്ചും ഒച്ചവച്ചും അവയെ ഓടിച്ചു. പിന്നീട് പുലർച്ചെ മൂന്നോടെ മറ്റൊരുകൂട്ടം ആനകളെത്തുകയായിരുന്നു. വെറ്റിലപ്പാറ, മാലിപ്പാറ പ്രദേശങ്ങളിൽ ആനശല്യം രൂക്ഷമായിരിക്കുകയാണ്. കഴിഞ്ഞ ദിവസങ്ങളിലെല്ലാം ആനകൾ നാട്ടിലിറങ്ങി വിഹരിച്ചു. നിരവധി പേരുടെ കൃഷികളാണ് നശിപ്പിച്ചത്. രാത്രിയിൽ ആനകളെ ഭയന്ന് വീടിന് പുറത്തിറങ്ങാൻ കഴിയുന്നില്ലെന്ന് നാട്ടുകാർ പറയുന്നു. രാത്രിയായാൽ റോഡിലൂടെ സഞ്ചരിക്കാനും ഭയപ്പെടണം. റബർ തോട്ടങ്ങളിൽ ടാപ്പിംഗിന് ഇറങ്ങാൻ കഴിയാത്ത സാഹചര്യവുമുണ്ട്. ആനശല്യം പരിഹരിക്കാൻ നടപടി വേണമെന്ന ആവശ്യം ശക്തമായിരിക്കുകയാണ്.

ഞാറ്റുവേല ചന്തയും കര്‍ഷകസഭയും

കോതമംഗലം: വാരപ്പെട്ടി പഞ്ചായത്ത് കൃഷിഭവന്‍റെ ആഭിമുഖ്യത്തിൽ ഞാറ്റുവേലയോടാനുബന്ധിച്ചുള്ള കർഷക സഭ നടത്തി. പഞ്ചായത്ത് പ്രസിഡന്‍റ് പി.കെ. ചന്ദ്രശേഖരൻ നായർ ഉദ്ഘാടനം നിർവഹിച്ചു. പഞ്ചായത്ത് സ്ഥിരംസമിതി അധ്യക്ഷൻ എം.എസ്. ബെന്നി അധ്യക്ഷത വഹിച്ചു. ഞാറ്റുവേലയുടെ ഭാഗമായി കൊക്കോ, കുരുമുളക്, തൈകൾ കർഷകർക്ക് വിതരണം ചെയ്തു. വരും ദിവസങ്ങളിൽ തെങ്ങിൻ തൈ, നേന്ത്രൻ ടിഷ്യു വാഴ തൈകൾ എന്നിവയും കർഷകർക്ക് ലഭ്യമാക്കും. പോത്താനിക്കാട്: പോത്താനിക്കാട് പഞ്ചായത്തിന്‍റെ സഹകരണത്തോടെ തിരുവാതിര ഞാറ്റുവേലയോടനുബന്ധിച്ച് കൃഷിഭവന്‍റെ നേതൃത്വത്തില്‍ നടത്തിയ ഞാറ്റുവേല ചന്തയുടെയും കര്‍ഷക സഭയുടെയും ഉദ്ഘാടനം പഞ്ചായത്ത് പ്രസിഡന്‍റ് സജി കെ. വര്‍ഗീസ് നിര്‍വഹിച്ചു. പഞ്ചായത്ത് വൈസ് പ്രസിഡന്‍റ് ആശ ജിമ്മി അധ്യക്ഷത വഹിച്ചു. ജില്ലാ പഞ്ചായത്ത് അംഗം റാണികുട്ടി ജോര്‍ജ് ഞാറ്റുവേല സന്ദേശം നല്‍കി. ചടങ്ങിനോട നുബന്ധിച്ച് തെങ്ങിന്‍ തൈകളുടെ ആദ്യ വില്‍പ്പന ബ്ലോക്ക് പഞ്ചയത്ത് ക്ഷേമകാര്യം സ്ഥിരം സമിതി അധ്യക്ഷ സാലി ഐപ്പ് നിര്‍വഹിച്ചു. ഞാറ്റുവേല ചന്തയില്‍ ഗുണമേന്മയുള്ള വേരു പിടിപ്പിച്ച കുരുമുളക് തൈകള്‍, ഹൈബ്രിഡ് കൊക്കോ തൈകള്‍, സങ്കരയിനം തെങ്ങിന്‍ തൈകള്‍, വെസ്റ്റ് കോസ്റ്റ് തെങ്ങിന്‍ തൈകള്‍ എന്നിവ സബ്സിഡി നിരക്കില്‍ കര്‍ഷകര്‍ക്ക് വിതരണം ചെയ്തു. കൃഷി അസി. ഡയറക്ടര്‍ പ്രിയമോള്‍ തോമസ് പദ്ധതി വിശദീകരണം നടത്തി. കല്ലൂർക്കാട്: കൃഷിഭവന്‍റെ ആഭിമുഖ്യത്തിൽ ഞാറ്റുവേല ചന്തയും കർഷകസഭയും നടത്തി. ബ്ലോക്ക് പഞ്ചായത്ത് പ്രസിഡന്‍റ് കെ.ജി. രാധാകൃഷ്ണൻ ഉദ്ഘാടനം നിർവഹിച്ചു. പഞ്ചായത്ത് പ്രസിഡന്‍റ് സുജിത് ബേബി യോഗത്തിൽ അധ്യക്ഷത വഹിച്ചു.

കല്ലൂർക്കാട് സബ് ട്രഷറി കെട്ടിടത്തിന് ശിലയിട്ടു

കല്ലൂർക്കാട്: കാർഷിക മേഖലയിൽ ട്രഷറി സ്ഥാപനങ്ങളുടെ സേവനം കൂടുതൽ ലഭ്യമാക്കാൻ സർക്കാർ സൗകര്യമൊരുക്കുമെന്ന് മന്ത്രി കെ.എൻ. ബാലഗോപാൽ. കല്ലൂർക്കാട് സബ് ട്രഷറി കെട്ടിടത്തിന്‍റെ ശിലാസ്ഥാപനം നിർവഹിക്കുകയായിരുന്നു മന്ത്രി. കാർഷിക മേഖലയിൽ നിലവാരമുള്ള ഉത്പന്നങ്ങൾ പരീക്ഷിച്ച് ഉത്പാദിപ്പിക്കുന്ന കർഷകർക്ക് കൂടുതൽ സേവനം നൽകുന്നതിന് സർക്കാരിന്‍റെ വിവിധ സംവിധാനങ്ങൾ ശക്തിപ്പെടുത്തും. കേരളം വികസന രംഗത്ത് മെച്ചപ്പെട്ട കാലത്തിലേക്ക് ഇപ്പോൾ പോകുന്നത് കൂടുതൽ മാറ്റം ഉണ്ടാക്കുന്നു. യുവാക്കൾക്ക് ലോകത്ത് നിലവിലുള്ള ഏത് സ്റ്റാർട്ടപ്പ് സ്ഥാപനങ്ങൾ തുടങ്ങുവാനുള്ള സംസ്ഥാനമായി മാറി കേരളം. ആറായിരത്തിലേറെ സ്ഥാപനങ്ങൾ നിലവിലുണ്ടെന്നും മന്ത്രി കൂട്ടിച്ചേർത്തു. മാത്യു കുഴൽനാടൻ എംഎൽഎ അധ്യക്ഷത വഹിച്ചു. അടിസ്ഥാന സൗകര്യ വികസന പദ്ധതിയിലുൾപ്പെടുത്തി 1.56 കോടി മുടക്കിയാണ് കെട്ടിട നിർമാണം. കല്ലൂർക്കാട് പഞ്ചായത്ത് നൽകിയ സ്ഥലത്താണ് കെട്ടിടം നിർമിക്കുക.

നെല്ലിമറ്റത്ത് ആംബുലന്‍സ് മറിഞ്ഞ് നാലു പേര്‍ക്ക് പരിക്ക്

കോതമംഗലം: ദേശീയ പാതയില്‍ നെല്ലിമറ്റത്ത് ആംബുലന്‍സ് മറിഞ്ഞ് നാലു പേര്‍ക്ക് പരിക്ക്. അടിമാലി സ്വദേശികളായ പാലിയേറ്റീവ് ജീവനക്കാരായ സരേഷ്, ശ്വേത, വാളറ അഞ്ചാംമൈല്‍ സ്വദേശിയും ആംബുലന്‍സ് ഡ്രൈവറുമായ ജിനോ, സഹോദരി ജിന്‍സ എന്നിവര്‍ക്കാണ് പരിക്കേറ്റത്. ആരുടേയും പരിക്ക് ഗുരുതരമല്ല. നെല്ലിമറ്റം മില്ലുംപടിയില്‍ വച്ച് ഇന്നലെ ഉച്ചകഴിഞ്ഞ് രണ്ടിനായിരുന്നു അപകടം. റോഡില്‍ തെന്നിമറിയകുകയായിരുന്നുവെന്ന് പോലീസ് പറഞ്ഞു. ഓടികൂടിയ സമീപവാസികള്‍ അപകടത്തില്‍പ്പെട്ടവരെ ആശുപത്രിയില്‍ എത്തിച്ചു. പോലീസ് എത്തി മേല്‍നടപടി സ്വീകരിച്ചു. ഹൈറേഞ്ചില്‍ ഓടുന്ന ജീപ്പ് മാതൃകയിലുള്ള ആംബുലന്‍സാണ് അപകടത്തില്‍പ്പെട്ടത്. ജിനോയുടെ വീട്ടില്‍ രോഗിയായ അമ്മയ്‌ക്ക് ഓക്‌സിജന്‍ നല്‍കുന്നതിന് വേണ്ടി സിലിണ്ടര്‍ മാറ്റിവയ്ക്കുന്നതിനിടെ ഗ്യാസ് കുറ്റിതുറന്ന് ഗ്യാസ് മുഖത്തേക്ക് പതിച്ച് പാലിയേറ്റീവ് ജീവനക്കാരനായ സരേഷിന് അസ്വസ്ഥതയും മൂക്കില്‍നിന്നു രക്തം വരുകയും ചെയ്തു. സരേഷിനെ ആശുപത്രിയില്‍ എത്തിക്കാനായി മറ്റ് മൂന്ന് പേരും കൂടി ആംബുലന്‍സില്‍ നേര്യമംഗലത്തേക്ക് വരുകയായിരുന്നു. നേര്യമംഗലം പ്രാഥമിക ആരോഗ്യ കേന്ദ്രത്തില്‍ എത്തിച്ച് പരിശോധിച്ചപ്പോള്‍ വിദഗ്ധ ചികിത്സ തേടണമെന്ന നിര്‍ദേശാനുസരണം കോതമംഗലത്തെ ആശുപത്രിയിലേക്ക് വരുംവഴിയാണ് അപകടം. കോതമംഗലത്തെ സ്വകാര്യ ആശുപത്രിയില്‍ പ്രവേശിപ്പിച്ച നാല് പേരേയും വൈകിട്ടോടെ വിട്ടയച്ചു.

വിദേശമദ്യവുമായി മധ്യവയസ്കൻ പിടിയിൽ

പെരുമ്പാവൂർ: ഇന്ത്യൻ നിർമിത വിദേശമദ്യവുമായി മധ്യവയസ്കൻ പോലീസ് പിടിയിൽ. മാറമ്പിള്ളി കമ്പനിപ്പടി പറക്കാട്ടുകുടി രാജേഷ് (53)നെയാണ് 18 കുപ്പി വിദേശമദ്യവുമായി പെരുമ്പാവൂർ പോലീസ് പിടികൂടിയത്. രഹസ്യവിവരത്തിന്‍റെ അടിസ്ഥാനത്തിൽ നടന്ന പരിശോധനയിൽ കമ്പനിപ്പടി ഭാഗത്തുവച്ചായിരുന്നു അറസ്റ്റ്. ഇയാളുടെ ബന്ധുവിന്‍റെ ഉടമസ്ഥതയിലുള്ള ആർത്താമസമില്ലാത്ത വീട്ടിലായിരുന്നു വില്പന. മദ്യവില്പനയിലൂടെ ലഭിച്ച 2,300 രൂപയും ഇയാളിൽ നിന്ന് കണ്ടെടുത്തു. ഇൻസ്പെക്ടർ ടി.എം. സൂഫി, എസ്.ഐ. ശിവപ്രസാദ്, സീനിയർ സിപിഒമാരായ ശിവാനന്ദൻ കർത്ത, മുഹമ്മദ് ഷാൻ എന്നിവരാണ് അന്വേഷണ സംഘത്തിലുണ്ടായിരുന്നത്.

നഗരത്തില്‍ എംഡിഎംഎ വില്പന; മുഖ്യപ്രതി അറസ്റ്റില്‍

കൊച്ചി: നഗരത്തില്‍ എംഡിഎംഎ വില്പന നടത്തിവന്നിരുന്ന മുഖ്യപ്രതി പിടിയില്‍. ചേരാനെല്ലൂര്‍ സ്വദേശി അമല്‍ ജോര്‍ജ് ഷെന്‍സണ്‍(33) ആണ് ഡാന്‍സാഫ് സംഘത്തിന്‍റെ പിടിയിലായത്. ഇയാളുടെ പക്കല്‍ നിന്നും 203.71 ഗ്രാം എംഡിഎംഎ പിടിച്ചെടുത്തു. രഹസ്യ വിവരത്തെത്തുടര്‍ന്ന് കാക്കനാട് അത്താണി ജംഗ്ഷന്‍ സമീപത്തുള്ള ലോഡ്ജില്‍ നടത്തിയ പരിശോധനയിലാണ് പ്രതിയെ പിടികൂടിയത്. ബംഗളൂരുവില്‍ നിന്നും നേരിട്ടും ഇടനിലക്കാര്‍ വഴിയും വലിയ അളവില്‍ എംഡിഎംഎ കൊച്ചിയിലെത്തിച്ച് സ്ത്രീകളെയും യുവാക്കളെയും കാരിയര്‍മാരാക്കി വില്പന നടത്തിവരികയായിരുന്നു ഇയാള്‍. ഇത്തരത്തില്‍ ജില്ലയുടെ പല ഭാഗങ്ങളിലും ഇയള്‍ മയക്കുമരുന്ന് എത്തിച്ചിരുന്നു. സ്വയം മൊബൈല്‍ ഫോണ്‍ ഉപയോഗിക്കാതെയും മറ്റുള്ളവരുടെ ഫോണിലെ വൈഫൈ ഉപയോഗിച്ചുമാണ് പ്രതി കച്ചവടം നടത്തിയിരുന്നത്. രഹസ്യവിവരത്തിന്‍റെ പശ്ചാത്തലത്തില്‍ നര്‍ക്കോട്ടിക് സെല്‍ പ്രതിയെ നിരീക്ഷിച്ച് വരികയായിരുന്നു.

പോലീസ് ഉദ്യോഗസ്ഥനെതിരെ വിജിലന്‍സ് കേസ്

കൊച്ചി: അനധികൃത സ്വത്ത് സമ്പാദന കേസില്‍ പോലീസ് ഉദ്യോഗസ്ഥനെതിരെ വിജിലന്‍സ് കേസ് എടുത്തു. കോട്ടയം വാഴൂര്‍ ഗവ. പ്രസില്‍ സെക്യൂരിറ്റി വിംഗില്‍ ഡെപ്യൂട്ടേഷനിൽ ജോലി നോക്കിവരുന്ന കോട്ടയം ചാമംപതാല്‍ സ്വദേശി കെ.പി. ഷിമാലി(43)നെതിരെയാണ് എറണാകുളം വിജിലന്‍സ് സ്‌പെഷല്‍ സെല്‍ കേസ് എടുത്തത്. ഉപ്പുതറ പോലീസ് സ്റ്റേഷനില്‍ എസ്‌സിപിഒ ആയി ജോലി ചെയ്തിരുന്ന കാലയളവില്‍ വിവിധ വസ്തുവകകള്‍ ഉള്‍പ്പെടെ 92,17,140 രൂപയുടെ മുതലുകള്‍ സമ്പാദിച്ചതായും അതില്‍ 29,26,837 രൂപ വരവില്‍ കവിഞ്ഞ സ്വത്തുക്കളാണെന്നും വിജിലന്‍സിന്‍റെ പ്രാഥമിക അന്വേഷണത്തില്‍ കണ്ടെത്തിയതിനെ തുടര്‍ന്നാണ് കേസെടുത്തത്. വാഴൂരിലെ ഇയാളുടെ വീട്ടിലും സ്ഥാപനങ്ങളിലും നടത്തിയ പരിശോധനയില്‍ ബന്ധപ്പെട്ട രേഖകള്‍ വിജിലന്‍സ് പിടിച്ചെടുത്തു.

കോതമംഗലത്തെ പട്ടയ പ്രശ്‌നത്തിന് ഒരു മാസത്തിനകം പരിഹാരം

കൊച്ചി: കോതമംഗലം താലൂക്കില്‍ പട്ടയം അനുവദിക്കുന്നത് സംബന്ധിച്ച പ്രശ്‌നങ്ങള്‍ ഒരു മാസത്തിനുള്ളില്‍ പരിഹരിക്കാന്‍ ധാരണ. മുഖ്യമന്ത്രി പിണറായി വിജയന്‍റെ നേതൃത്വത്തില്‍ കോട്ടയത്ത് നടന്ന അവലോകന യോഗത്തിലാണ് ഇതുസംബന്ധിച്ച തീരുമാനമുണ്ടായത്. നിലവില്‍ വനം വകുപ്പുമായി ബന്ധപ്പെട്ടാണ് സാങ്കേതിക തടസങ്ങള്‍ ഉള്ളത്. പ്രശ്‌നങ്ങള്‍ ഉന്നതതല യോഗം ചേര്‍ന്ന് പരിഹരിക്കാവുന്നതാണെന്ന് യോഗം നിരീക്ഷിച്ചു. ഇതില്‍ തീരുമാനം ആകുന്നതോടെ കോതമംഗലത്തിന്‍റെ നാളുകളായുള്ള പട്ടയ പ്രശ്‌നത്തിന് പരിഹാരമാകും. പന്തപ്ര ആദിവാസി നഗറിലെ സമഗ്ര പുനരധിവാസ പദ്ധതിയുടെ ഭാഗമായുള്ള വീടുകളുടെ നിര്‍മാണം വേഗത്തില്‍ പൂര്‍ത്തീകരിക്കുമെന്ന് വനം വകുപ്പ് അറിയിച്ചു. നിലവില്‍ 64 വീടുകളില്‍ 15 വീടുകളുടെ നിര്‍മാണം പൂര്‍ത്തിയായി. പുനരധിവാസത്തിന് അനുവദിച്ച സ്ഥലത്തെ തേക്ക് മരങ്ങള്‍ മുറിക്കാന്‍ കഴിയാത്തതിനാലാണ് പദ്ധതി പ്രതിസന്ധിയിലായതെന്ന് യോഗം ചൂണ്ടിക്കാട്ടി.ഏലൂര്‍ നഗരസഭയില്‍ പ്രഖ്യാപിച്ചിട്ടുള്ള സയന്‍സ് പാര്‍ക്കുമായി ബന്ധപ്പെട്ട് ഭൂമി ഏറ്റെടുക്കല്‍ വേഗത്തിലാക്കാൻ തീരുമാനമായി. എച്ച്‌ഐഎല്‍ കമ്പനി പാട്ടം റദ്ദാക്കുന്നതിനുള്ള നടപടി സ്വീകരിക്കാനും യോഗത്തില്‍ തീരുമാനമായി.

കൊച്ചി വിമാനത്താവളത്തോടനുബന്ധിച്ച് ഐടി പാർക്കിനായി പദ്ധതി

നെടുമ്പാശേരി: സംസ്ഥാനത്തിന്‍റെ വികസനത്തിന് വേഗത കൂട്ടാൻ കൊച്ചി അന്താരാഷ്ട്ര വിമാനത്താവളം പുതിയ പദ്ധതികളുമായി രംഗത്ത്. പുത്തൻ പദ്ധതികളുമായി എന്നും സജീവമായിട്ടുള്ള കൊച്ചി വിമാനത്താവള ഭൂമിയിൽ ഐടി പാർക്ക് സ്ഥാപിക്കാൻ പദ്ധതിയിട്ട് മുന്നോട്ടുള്ള പ്രവർത്തനങ്ങളുമായി സജീവം. ആദ്യപടിയെന്നനിലയിൽ ഐടി പാര്‍ക്കിനുള്ള സാധ്യതാ പഠനം നടത്താൻ ടെൻഡർ പുറപ്പെടുവിച്ചു. വിമാനത്താവളത്തിലേക്കുള്ള ഫ്‌ളൈഓവറിനും സിയാല്‍ കണ്‍വന്‍ഷന്‍ സെന്‍ററിനും ഇടയിലുള്ള 20 ഏക്കര്‍ ഭൂമിയാണ് ഇതിനായി വിട്ടുകൊടുക്കുന്നത്. വിമാനത്താവളത്തിന്‍റെ ഭൂമി പൂര്‍ണമായും ഉപയോഗിക്കാനാണ് തീരുമാനം. ഇതിനായുള്ള സാധ്യതാ പഠനം നടത്താന്‍ കണ്‍സള്‍ട്ടന്‍സികളെ തിരഞ്ഞെടുക്കാന്‍ ടെൻഡര്‍ പുറപ്പെടുവിച്ചു. ഐടി, ഐടി അധിഷ്ഠിത സേവനങ്ങള്‍ എന്നിവ നല്‍കുന്ന പദ്ധതിയുടെ മാസ്റ്റര്‍ പ്ലാന്‍ തയാറാക്കുമെന്നും സിയാല്‍ പുറത്തിറക്കിയ ടെൻഡറില്‍ പറയുന്നു. തിരഞ്ഞെടുക്കപ്പെടുന്ന ഏജന്‍സി മൂന്ന് മാസങ്ങള്‍ക്കുള്ളില്‍ റിപ്പോര്‍ട്ട് സമര്‍പ്പിക്കണം. ഐടി മേഖലക്ക് കുതിപ്പാകും ഇന്‍ഫോപാര്‍ക്ക്, സ്മാര്‍ട്‌സിറ്റി എന്നീ രണ്ട് ഐടി ഹബ്ബുകള്‍ പ്രവര്‍ത്തിക്കുന്ന കൊച്ചി നഗരത്തിന്‍റെ വ്യവസായ മേഖലക്ക് പുത്തനുണര്‍വ് നല്‍കാന്‍ പദ്ധതിക്കാകുമെന്നാണ് കരുതുന്നത്. ലോകത്തിന്‍റെ വിവിധ ഭാഗങ്ങളിലേക്കുള്ള കണക്ടിവിറ്റിയും സമീപത്തുള്ള താമസസ്ഥലങ്ങളും പദ്ധതിക്ക് ഗുണമാകും. ലോകോത്തര നിലവാരത്തിലുള്ള തൊഴില്‍ സാഹചര്യവും അടിസ്ഥാന സൗകര്യങ്ങളും ഇവിടെ ഒരുങ്ങും. ഈ പദ്ധതി യാഥാര്‍ത്ഥ്യമാകുന്നതിലൂടെ കേരളത്തിന്‍റെ ഐടി മേഖലയില്‍ വലിയ കുതിപ്പ് സൃഷ്ടിക്കാനാകുമെന്ന് മന്ത്രി പി. രാജീവ് ഫേസ്ബുക്ക് കുറിപ്പില്‍ പറഞ്ഞു. 200 കോടി രൂപ മുതല്‍ മുടക്കില്‍ കൊച്ചി അന്താരാഷ്ട്ര വിമാനത്താവളത്തിന്‍റെ മുഖഛായ മാറ്റുന്ന സിയാല്‍ 2.0 പദ്ധതിക്ക് കഴിഞ്ഞ മാസം തുടക്കം കുറിച്ചിരുന്നു. നിര്‍മിതബുദ്ധി, ഓട്ടോമേഷന്‍, പഴുതടച്ച സൈബര്‍ സുരക്ഷ എന്നിവയിലൂടെ വിമാനത്താവള പ്രവര്‍ത്തനങ്ങള്‍ പൂര്‍ണമായും ഡിജിറ്റൈസ് ചെയ്യുന്ന പദ്ധതിയാണിത്. ഒപ്പം യാത്രക്കാര്‍ക്ക് അതിവേഗം സുരക്ഷാ പ്രക്രിയ പൂര്‍ത്തിയാക്കാനുമാകും. ഐടി പാർക്ക് വരുന്നതോടെ എറണാകുളം ജില്ലയിൽ വൻ വ്യവസായ കുതിപ്പ് ഉണ്ടാകാനാണ് സാധ്യത. കൂടാതെ പുതിയ വിമാനകമ്പനികൾ വരുന്നതിനും ഇത് സഹായകരമാകും ഇത്തരത്തിലാണ് പുതിയ ഐടി പാർക്കു കൊണ്ട് ലക്ഷ്യമിടുന്നത് .

കോട്ടയം മെഡിക്കല്‍ കോളജിലെ അപകടം: മന്ത്രിമാര്‍ രാജിവയ്ക്കണമെന്ന് മുഹമ്മദ് ഷിയാസ്

കൊച്ചി: കോട്ടയം മെഡിക്കല്‍ കോളജിലെ അപകടം സര്‍ക്കാരിന്‍റെ അനാസ്ഥ മൂലമാണെന്ന് ഡിസിസി പ്രസിഡന്‍റ് മുഹമ്മദ് ഷിയാസ്. അപകട സ്ഥലത്തുവന്ന് മന്ത്രിമാരായ വി.എന്‍. വാസവനും വീണാ ജോര്‍ജും നിരുത്തരവാദപരമായ പ്രവര്‍ത്തനമാണ് നടത്തിയത്. ഒരു അപകടം നടക്കുമ്പോഴും സര്‍ക്കാരിന്‍റെ പ്രതിച്ഛായയെ ബാധിക്കുമോയെന്ന ചിന്ത മാത്രമായിരുന്നു മന്ത്രിമാര്‍ക്കുണ്ടായിരുന്നത്. ജനങ്ങളുടെ ജീവന് പുല്ലുവിലയാണ് സര്‍ക്കാര്‍ നല്‍കുന്നത്. മന്ത്രിമാര്‍ അടിയന്തരമായി രാജി വച്ചില്ലെങ്കില്‍ കടുത്ത പ്രതിഷേധങ്ങള്‍ക്ക് കോണ്‍ഗ്രസ് നേതൃത്വം നല്‍കുമെന്നും അദ്ദേഹം പറഞ്ഞു. എറണാകുളം ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തില്‍ നടത്തിയ പ്രതിഷേധം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. ഡിസിസി ഓഫീസ് പരിസരത്തുനിന്ന് ആരംഭിച്ച പ്രതിഷേധം എംജി റോഡ് ഉപരോധിച്ചാണ് അവസാനിപ്പിച്ചത്. ഐ.കെ. രാജു, ടോണി ചമ്മണി, എം.ആര്‍. അഭിലാഷ്, തമ്പി സുബ്രഹ്മണ്യം, പോളച്ചന്‍ മണിയങ്കോട്, അബ്ദുല്‍ ലത്തീഫ് തുടങ്ങിയവര്‍ നേതൃത്വം നല്‍കി.

സംസ്കൃത സർവകലാശാലയിലെ സമരം : 15 വിദ്യാർഥികൾക്കുകൂടി കാരണംകാണിക്കൽ നോട്ടീസ്

കാലടി: ശ്രീശങ്കരാചാര്യ സംസ്കൃത സർവകലാശാല ലഹരി മുക്തമാണെന്ന് ഉറപ്പാക്കുന്നതിനും കാന്പസിനുള്ളിൽ സർവകലാശാലയുമായി ബന്ധമില്ലാത്ത വ്യക്തികളുടെയും വാഹനങ്ങളുടെയും പ്രവേശനം തടയുന്നതിനും വിദ്യാർഥികളുടെ സുരക്ഷ ഉറപ്പാക്കുന്നതിനായും സർവകലാശാല പുറത്തിറക്കിയ ഉത്തരവിനെതിരെ ഒരു വിഭാഗം വിദ്യാർഥികൾ നടത്തിയ സമരത്തിന് നേതൃത്വം നൽകിയ 37 വിദ്യാർഥികൾക്കെതിരെ നടപടി സ്വീകരിച്ചതായി സർവകലാശാലാ അധികൃതർ അറിയിച്ചു. ബുധനാഴ്ച 22 വിദ്യാർഥികൾക്ക് കാരണം കാണിക്കൽ നോട്ടീസ് നൽകിയിരുന്നു. ഉത്തരവ് പ്രകാരം നിർദേശിക്കപ്പെട്ട സമയത്ത് സർവകലാശാലാ കാമ്പസിലെ വനിതാ ഹോസ്റ്റലുകൾ അടയ്ക്കാൻ ബുധനാഴ്ച രാത്രിയിൽ സെക്യൂരിറ്റി ജീവനക്കാരെ അനുവദിക്കാത്ത സാഹചര്യത്തിൽ ഇന്നലെ 15 വിദ്യാർഥികൾക്ക് കൂടി കാരണംകാണിക്കൽ നോട്ടീസ് നൽകി. ഏഴ് ദിവസത്തിനകം രേഖാമൂലം മറുപടി നൽകണമെന്നാണ് നോട്ടീസ്.

‘അമ്മ'യില്‍ തെരഞ്ഞെടുപ്പ് ഓഗസ്റ്റ് 15ന്

കൊച്ചി: താര സംഘടനയായ ‘അമ്മ'യിലെ ഭരണസമിതി തെരഞ്ഞെടുപ്പ് ഓഗസ്റ്റ് 15ന് നടക്കും. ജനറല്‍ ബോഡിയില്‍ തെരഞ്ഞെടുപ്പ് വേണ്ടെന്ന് അഭിപ്രായമുയര്‍ന്നിരുന്നെങ്കിലും പ്രസിഡന്‍റ് സ്ഥാനത്തേക്ക് മത്സരിക്കില്ലെന്ന് മോഹന്‍ലാല്‍ പറഞ്ഞതോടെ തെരഞ്ഞെടുപ്പിലേക്ക് എത്തുകയായിരുന്നു. സംഘടനയുടെ തലപ്പത്തേക്ക് പുതിയ അംഗങ്ങള്‍ വരട്ടെയെന്നാണ് മോഹന്‍ലാലിന്‍റെ നിലപാട്. ഹേമ കമ്മിറ്റി റിപ്പോര്‍ട്ടിനു പിന്നാലെ ഭരണസമിതി പിരിച്ചുവിട്ട് അഡ്‌ഹോക്ക് കമ്മിറ്റി രൂപീകരിച്ചിരുന്നു. ഇത് കഴിഞ്ഞ മാസം പിരിച്ചുവിട്ടതോടെ ഭരണസമിതി രൂപീകരിക്കേണ്ടത് അനിവാര്യമാവുകയായിരുന്നു.

വായന പക്ഷാചരണം: റീല്‍ മത്സരത്തില്‍ അമൃതയും അമല്യയും ഒന്നാം സ്ഥാനക്കാര്‍

കൊച്ചി: വായന പക്ഷാചരണത്തോടനുബന്ധിച്ച് എറണാകുളം ജില്ലാ ഇന്‍ഫര്‍മേഷന്‍ ഓഫീസ് സംഘടിപ്പിച്ച സോഷ്യല്‍ മീഡിയ റീല്‍സ് മത്സര വിജയികളെ തെരഞ്ഞെടുത്തു. ‘എന്‍റെ പുസ്തകം എന്‍റെ റീല്‍' എന്ന പേരില്‍ നടത്തിയ മത്സരത്തില്‍ ഇഷ്ട പുസ്തകത്തെ പരിചയപ്പെടുത്തുന്ന റീല്‍ തയാറാക്കുന്നതായിരുന്നു മത്സരം. മുതിര്‍ന്നവരുടെ വിഭാഗത്തില്‍ കളമശേരി രാജഗിരി കോളജ് അധ്യാപികയായ ഇടപ്പള്ളി മാമംഗലം സ്വദേശി അമൃത കെ. മാധവ്, വിദ്യാര്‍ഥികളുടെ വിഭാഗത്തില്‍ കൂനമ്മാവ് സെന്‍റ് ഫിലോമിനാസ് സ്‌കൂളില്‍ പ്ലസ് വണ്‍ വിദ്യാര്‍ഥിയായ കൂനമ്മാവ് സ്വദേശിനി എം.എസ്. അമല്യ എന്നിവര്‍ ഒന്നാം സ്ഥാനത്തിന് അര്‍ഹരായി.

ജോലി നഷ്ടപ്പെട്ടതിലെ വൈരാഗ്യം : ബാങ്ക് ജീവനക്കാരിയെ കുത്തിക്കൊലപ്പെടുത്താന്‍ ശ്രമം

ആത്മഹത്യക്ക് ശ്രമിച്ച മുന്‍ ജീവനക്കാരന്‍ കസ്റ്റഡിയില്‍ കളമശേരി: ജോലി നഷ്ടപ്പെട്ട വൈരാഗ്യത്തില്‍ ബാങ്ക് ജീവനക്കാരിയെ കുത്തിക്കൊലപ്പെടുത്താന്‍ ശ്രമിച്ച ശേഷം ആത്മഹത്യക്കു ശ്രമിച്ച മുൻ ജീവനക്കാരനെ പോലീസ് കസ്റ്റഡിയിലെടുത്തു. ആക്രമണത്തില്‍ വലത് കൈപ്പത്തിക്ക് ഗുരുതരമായി പരിക്കേറ്റ അസിസ്റ്റന്‍റ് മാനേജര്‍ മാവേലിക്കര സ്വദേശിനി ഇന്ദു കൃഷ്ണ(35)യെ കൊച്ചിയിലെ സ്വകാര്യ ആശുപത്രിയില്‍ പ്രവേശിപ്പിച്ചു. ആക്രമണത്തിനു ശേഷം സ്വയം കുത്തി പരിക്കേല്‍പ്പിച്ച ബാങ്കിലെ മുന്‍ അപ്രൈസര്‍ കൊടുങ്ങല്ലൂര്‍ ടികെഎസ് പുരത്ത് സ്വദേശി സെന്തില്‍ കുമാര്‍ (44) കളമശേരി മെഡിക്കല്‍ കോളജില്‍ ചികിത്സയിലാണ്. ഇയാള്‍ ഏലൂര്‍ പോലീസിന്‍റെ കസ്റ്റഡിയിലാണ്. ഇന്നലെ വൈകിട്ട് ഏഴോടെ മഞ്ഞുമ്മലിലെ പൊതുമേഖലാ ബാങ്കിലായിരുന്നു സംഭവം. ഇന്ദു കൃഷണയുടെ രണ്ട് വിരലുകള്‍ അറ്റുതൂങ്ങിയതായാണ് വിവരം. ഇവരുടെ കവിളിലും പുറത്തും പരിക്കേറ്റിട്ടുണ്ട്. ബാങ്ക് സമയം അവസാനിച്ച ശേഷം ജോലികള്‍ പൂര്‍ത്തിയാക്കുകയായിരുന്നു ഇന്ദു കൃഷ്ണ. ഈ സമയം ബൈക്കില്‍ എത്തിയ സെന്തില്‍ കുമാര്‍ കൈയില്‍ കരുതിയിരുന്ന ഇറച്ചി വെട്ടാന്‍ ഉപയോഗിക്കുന്ന കത്തി ഉപയോഗിച്ച് ഇന്ദുവിനെ ആക്രമിക്കുകയായിരുന്നു. ബാങ്കിലെ അപ്രൈസ് ആയിരുന്ന തന്‍റെ ജോലി നഷ്ടപ്പെടാൻ കാരണക്കാരി ഇന്ദുവാണെന്ന് പറഞ്ഞായിരുന്നു അക്രമണം. ഈ സമയം മറ്റു ജീവനക്കാര്‍ ഓടിക്കൂടി സെന്തില്‍ കുമാറിനെ പിടിച്ചുമാറ്റി ഇയാളുടെ കൈയിലുണ്ടായിരുന്ന കത്തിയും പിടിച്ചെടുത്തു. തുടര്‍ന്ന് ജീവനക്കാര്‍ ഉടന്‍ ഇന്ദുവിനെ മഞ്ഞുമ്മലിനെ ആശുപത്രിയിലേക്ക് മാറ്റി. ഈ സമയം ബാങ്കില്‍ നിന്ന് കിട്ടിയ മറ്റൊരു ചെറിയ കത്തിയുമായി ശൗചാലയത്തില്‍ കയറി വാതില്‍ അടച്ച സെന്തില്‍ നെഞ്ചിന് കുത്തിയും കൈ ഞരമ്പ് മുറിച്ചും ആത്മഹത്യക്ക് ശ്രമിച്ചു. ഏലൂര്‍ പോലീസ് സ്ഥലത്തെത്തി വാതില്‍ ചവിട്ടിപ്പൊളിച്ചാണ് അബോധാവസ്ഥയിലായിരുന്ന സെന്തില്‍ കുമാറിനെ പുറത്തെടുത്തത്.

‘വാന്‍ഹായ് 503'ലെ വെള്ളം വറ്റിക്കല്‍ വിജയം കാണുന്നു

ബേപ്പൂരിന് സമീപം പുറംകടലില്‍ തീപിടിച്ച 'വാന്‍ഹായ് 503' കപ്പലിന്‍റെ എന്‍ജിന്‍ മുറിയിലെ വെള്ളം വറ്റിക്കല്‍ വിജയം കാണുന്നു. ഏഴു മീറ്ററോളം വെള്ളമുണ്ടായിരുന്നത് ഇപ്പോള്‍ 3.5 മീറ്റര്‍ വരെയായി. കപ്പല്‍ മുങ്ങുമെന്ന ആശങ്കയ്ക്ക് ഇതോടെ വിരാമമായതായി ഡയറക്ടറേറ്റ് ജനറല്‍ ഓഫ് ഷിപ്പിംഗ് അറിയിച്ചു. കപ്പലിലെ തീ പൂര്‍ണമായി അണച്ചശേഷം ശ്രീലങ്കയിലെ ഹമ്പന്‍ടോട്ട തുറമുഖത്തേക്ക് നീക്കാനുള്ള ദൗത്യം പുരോഗമിക്കുകയാണ്. കപ്പല്‍ ബുധനാഴ്ച രാത്രി ഇന്ത്യയുടെ പ്രത്യേക സാമ്പത്തികമേഖല കടന്നിരുന്നു. 200 നോട്ടിക്കല്‍ മൈലിന് പുറത്തേക്ക് കൊണ്ടുപോകാനാണ് ഡയറക്ടറേറ്റ് ജനറല്‍ ഓഫ് ഷിപ്പിംഗ് ലക്ഷ്യമിട്ടിരുന്നത്.

എല്‍സ3 കപ്പലപകടം: എണ്ണ വീണ്ടെടുക്കുന്ന നടപടികള്‍ അടുത്തമാസം തുടങ്ങിയേക്കും

കൊച്ചി: കൊച്ചി പുറംകടലില്‍ മുങ്ങിയ ലൈബീരിയന്‍ ചരക്കുകപ്പല്‍ എംഎസ്‌സി എല്‍സ3 ല്‍ നിന്നുള്ള എണ്ണ വീണ്ടെടുക്കലടക്കമുള്ള രക്ഷാപ്രവര്‍ത്തനങ്ങള്‍ അടുത്തമാസം ആദ്യം ആരംഭിച്ചേക്കും. ഇതിനായി സ്മിറ്റ് സാല്‍വേജിന്‍റെ നേതൃത്വത്തിലുള്ള 30 അംഗ ദൗത്യസംഘം പരിശീലനത്തിലാണ്. ഡൈവ് സപ്പോര്‍ട്ട് വെസ്സലും സജ്ജമാണ്. കാലാവസ്ഥ അനുകൂലമാണെങ്കില്‍ വെസലും ദൗത്യസംഘവും വൈകാതെ എത്തും. കപ്പല്‍ മുങ്ങിയ സ്ഥലത്ത് നിലവില്‍ പുതിയ എണ്ണപ്പാട കണ്ടെത്തിയിട്ടില്ല. എണ്ണപ്പാട കണ്ടെത്താന്‍ കനറ മേഘ കപ്പല്‍ 24 മണിക്കൂറും നിരീക്ഷണം നടത്തുന്നുണ്ട്. അതിനിടെ കരയ്ക്കടിഞ്ഞ പ്ലാസ്റ്റിക് തരികള്‍ നീക്കുന്നത് പുരോഗമിക്കുകയാണ്. തിരുവനന്തപുരം, കൊല്ലം എന്നിവിടങ്ങളില്‍നിന്ന് 350 ടണ്‍ പ്ലാസ്റ്റിക് തരികള്‍ നീക്കി. രാമേശ്വരത്തുനിന്ന് 200 ടണ്ണും കന്യാകുമാരിയില്‍നിന്ന് 50 ടണ്ണും നീക്കി.

പ്രതിസന്ധികളല്ല, പ്രത്യാശയുടെ ചക്രവാളങ്ങളാണു സഭയെ നയിക്കേണ്ടത്: മാർ തട്ടിൽ

പ്രൗഢമായി സീറോ മലബാർ സഭാ ദിനാഘോഷവും ദുക്റാന ആചരണവും കൊച്ചി: പ്രതിസന്ധികളിൽ അസ്വസ്ഥരാവുകയല്ല, പ്രത്യാശയുടെ ചക്രവാളങ്ങളിലേക്കു നയിക്കപ്പെടുകയാണു വർത്തമാനകാലത്തു സഭയുടെ സവിശേഷ ദൗത്യമെന്ന് സീറോ മലബാർ സഭ മേജർ ആർച്ച്ബിഷപ് മാർ റാഫേൽ തട്ടിൽ. മഹത്തായ പൈതൃകവും ലോകമെങ്ങും സാക്ഷാത്കരിക്കപ്പെട്ട വളർച്ചയുടെ കരുത്തും സഭയുടെ പ്രേഷിത പ്രയാണത്തിന് ഇന്നു കൂടുതൽ ഉണർവു പകരുന്നുണ്ടെന്നും മാർ തട്ടിൽ പറഞ്ഞു. സീറോ മലബാർ സഭയുടെ ആസ്ഥാനമായ കാക്കനാട് മൗണ്ട് സെന്‍റ് തോമസിൽ മാർ തോമാശ്ലീഹായുടെ രക്തസാക്ഷിത്വത്തിന്‍റെ സ്മരണയിൽ നടന്ന ദുക്റാന തിരുനാൾ ആചരണവും സഭാ ദിനാഘോഷവും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. 24 പൗരസ്ത്യസഭകളിൽ സീറോ മലബാർ സഭ എല്ലാ അർഥത്തിലും അതിന്‍റെ ശ്രേഷ്ഠമായ ശ്ലൈഹിക പൈതൃകം അഭിമാനത്തോടെ അടയാളപ്പെടുത്തുന്നു. അമ്പതു ലക്ഷം വിശ്വാസികളുള്ള സഭ, അതിന്‍റെ പൈതൃകത്തിൽ അഭിമാനിക്കാനും നാളെകളിലേക്കുള്ള യാത്രകളെ ആസൂത്രണം ചെയ്യാനും സഭാദിനം ഓർമിപ്പിക്കുന്നുണ്ട്. സീറോ മലബാർ സഭ ലോകമെമ്പാടും വളരുകയാണ്. ഈ വർഷം 283 നവവൈദികർ അഭിഷിക്തരായി. സന്യാസരംഗത്ത് 145 പേർ നിത്യവ്രത വാഗ്ദാനവും 272 പേർ പ്രഥമ വ്രത വാഗ്ദാനവും നടത്തി. 338 പേർ‌ വിവിധ സന്യാസിനി സമൂഹങ്ങളിൽ സമർപ്പിതരായി. 3056 രൂപത വൈദികർ‌ സഭയിലുണ്ട്. സന്യസ്തരും ബ്രദർമാരുമായി 4991 പേർ. 32114 സന്യാസിനികൾ‌ നമുക്കുണ്ട്. 1214 പേർ മേജർ‌ സെമിനാരികളിൽ പരിശീലനം നടത്തുന്നു. സമുദായശക്തീകരണ വർഷാചരണത്തിലേക്കു സീറോ മലബാർ സഭ കടക്കുകയാണ്. നമ്മുടെ കുടുംബങ്ങളിൽ കുഞ്ഞുങ്ങളുടെ എണ്ണം നിയന്ത്രിക്കുന്നതിനുള്ള സമ്മർദം ആശങ്കപ്പെടുത്തുന്നുണ്ട്. ആൾബലമുള്ള സഭയാകാൻ ദീർഘവീക്ഷണത്തോടെ നാം ചിന്തിക്കണം. ആൾബലമില്ലാത്ത സഭ ശക്തിയാർജിക്കുക എളുപ്പമല്ല. സഭയിലെ എല്ലാവരും ഒന്നിച്ചു കൂട്ടായ്മയിൽ മുന്നോട്ടു നീങ്ങണം. അല്മായരുടെ ശക്തമായ പ്രവർത്തനങ്ങൾ സഭയ്ക്കു പ്രതീക്ഷ നൽകുന്നതായും മേജർ ആർച്ച്ബിഷപ് പറഞ്ഞു. കൂരിയ ബിഷപ് മാർ സെബാസ്റ്റ്യൻ വാണിയപ്പുരയ്ക്കൽ, സെന്‍റ് മർത്താസ് സന്യാസിനി സമൂഹത്തിന്‍റെ സുപ്പീരിയർ ജനറൽ സിസ്റ്റർ സ്നേഹ പോൾ, കത്തോലിക്ക കോൺഗ്രസ് ഗ്ലോബൽ പ്രസിഡന്‍റ് രാജീവ് കൊച്ചുപറമ്പിൽ, മാതൃവേദി ഗ്ലോബൽ പ്രസിഡന്‍റ് ബീന ജോഷി, എസ്എംവൈഎം കേരള റീജിയൺ പ്രസിഡന്‍റ് അലക്സ് തോമസ്, കൂരിയ ചാൻസലർ റവ. ഡോ. ഏബ്രഹാം കാവിൽപുരയിടത്തിൽ, വൈസ് ചാൻസലർ റവ.ഡോ. പ്രകാശ് മറ്റത്തിൽ, സിഎസ്ടി ബ്രദേഴ്സ് അസി. ജനറൽ ബ്രദർ തോമസ് കരോണ്ടുകടവിൽ, സിഎംഎൽ ഇന്‍റർനാഷണൽ ജനറൽ സെക്രട്ടറി ബിനോയ് പള്ളിപ്പറന്പിൽ എന്നിവർ പ്രസംഗിച്ചു. പബ്ലിക് അഫയേഴ്സ് കമ്മീഷൻ സെക്രട്ടറി ഫാ. ജെയിംസ് കൊക്കാവയലിൽ സമുദായശാക്തീകരണ വർഷാചരണത്തിന്‍റെ രൂപരേഖ അവതരിപ്പിച്ചു. നേരത്തെ മേജർ ആർച്ച്ബിഷപ് മാർ റാഫേൽ തട്ടിലിന്‍റെ മുഖ്യകാർമികത്വത്തിൽ ആഘോഷമായ റാസാ കുർബാന അർപ്പിച്ചു. മാർ സെബാസ്റ്റ്യൻ വാണിയപ്പുരയ്ക്കൽ, താമരശേരി എംസിബിഎസ് സനാതന സെമിനാരി ഫാ. ഡെന്നീസ് പട്ടേരുപറമ്പിൽ എന്നിവർ സഹകാർമികരായി. സഭയിലെ വിവിധ രൂപതകളിലെയും സന്യാസ സമൂഹങ്ങളിലെയും സംഘടനകളുടെയും പ്രതിനിധികൾ സഭാദിനാഘോഷത്തിൽ പങ്കെടുത്തതായി പിആർഒ റവ. ഡോ. ടോം ഓലിക്കരോട്ട് പറഞ്ഞു. സമ്മേളനത്തോടനുബന്ധിച്ചു കലാപരിപാടികളും ഉണ്ടായിരുന്നു. ഡോ. പെരിയപ്പുറത്തിനു സഭയുടെ ആദരം കൊച്ചി: പദ്മഭൂഷൺ പുരസ്കാരം നേടിയ പ്രമുഖ ഹൃദയ ചികിത്സാ വിദഗ്ധനും എറണാകുളം ലിസി ആശുപത്രിയിലെ കാർഡിയാക് സർജറി വിഭാഗം മേധാവിയുമായ സീറോ മലബാർ സഭാംഗം ഡോ. ജോസ് ചാക്കോ പെരിയപ്പുറത്തിന് സീറോ മലബാർ സഭയുടെ ആദരം. കാക്കനാട് മൗണ്ട് സെന്‍റ് തോമസിൽ നടന്ന സഭാ ദിനാചരണ സമ്മേളനത്തിൽ മേജർ ആർച്ച്ബിഷപ് മാർ റാഫേൽ തട്ടിൽ അദ്ദേഹത്തെ ഷാൾ അണിയിച്ച് ഉപഹാരം സമർപ്പിച്ചു. സീറോ മലബാർ സഭാംഗമെന്ന നിലയിൽ അഭിമാനത്തോടെയാണു ആദരം സ്വീകരിക്കുന്നതെന്നു ഡോ. ജോസ് ചാക്കോ പറഞ്ഞു. പാർശ്വങ്ങളിൽ സഞ്ചരിക്കുന്നവരെയും സഹജീവികളെയും കാരുണ്യത്തിന്‍റെ മനോഭാവത്തോടെ കാണാനും പരിചരിക്കാനും സ്നേഹിക്കാനുമുള്ള ദൗത്യത്തിന് സഭ വലിയ പ്രചോദനമാണ്. തനിക്കു ലഭിച്ച പുരസ്കാരങ്ങൾ നമ്മുടെ ആരോഗ്യമേഖലയ്ക്കാകെയുള്ള അംഗീകാരമാണെന്നും ഡോ. ജോസ് പറഞ്ഞു. ഡോ. ജോസ് ചാക്കോയുടെ പത്നി ജെയ്മിയും ചടങ്ങിനെത്തിയിരുന്നു.

വൈപ്പിൻ ബ്ലോക്ക് പഞ്ചായത്തിനു മുന്നിൽ മഹിളാ കോൺഗ്രസ് ധർണ

വൈപ്പിൻ : ബ്ലോക്ക് പഞ്ചായത്ത് പ്രസിഡന്‍റ് രാജി വയ്ക്കണമെന്നാവശ്യപ്പെട്ട് മഹിളാകോൺഗ്രസ് പ്രവർത്തകർ ബ്ലോക്ക് പഞ്ചായത്ത് ഓഫീസിനു മുന്നിൽ പ്രതിഷേധ ധർണ നടത്തി. ഞാറക്കൽ ആശുപത്രിയിൽ ജിഡ ഫണ്ട് ഉപയോഗിച്ച് നിർമിച്ച കെട്ടിടത്തിന് നമ്പർ ലഭിക്കുന്നതിനായി ബ്ലോക്കിലെ പൊതുമരാമത്ത് വകുപ്പിനെ എൽപ്പിക്കാതെ സ്വകാര്യ വ്യക്തിയെ ഏൽപിക്കുകയും അയാൾക്ക് 2.39 ലക്ഷം രൂപ നൽകണമെന്ന് എച്ച്എംസി കമ്മിറ്റിയോട് ആവശ്യപ്പെടുകയും ചെയ്ത സാഹചര്യത്തിലാണ് രാജി ആവശ്യപ്പെടുന്നത്. ഇത് അഴിമതി ആണെന്നാണ് മഹിളകോൺഗ്രസിന്‍റെ ആരോപണം. ധർണ മഹിളാ കോൺഗ്രസ് ജില്ലാ പ്രസിഡന്‍റ് സുനില സിബി ഉദ്ഘാടനം ചെയ്തു. ട്രീസ ക്ലീറ്റസ് അധ്യക്ഷയായി.

പെരുന്പാവൂരിൽ മണ്‍സൂണ്‍ ഫെസ്റ്റ് -2025 ഇന്നു മുതൽ

പെരുമ്പാവൂര്‍: കേരള സ്റ്റേറ്റ് എക്സിബിഷന്‍ വര്‍ക്കേഴ്സ് യൂണിയന്‍റെ നേതൃത്വത്തില്‍ സംഘടിപ്പിക്കുന്ന മണ്‍സൂണ്‍ ഫെസ്റ്റ് -2025 വാത്തിയായത്ത് ആശുപത്രിക്ക് സമീപത്തെ ഗ്രൗണ്ടില്‍ ഇന്നു മുതല്‍ 30 വരെ നടക്കുമെന്ന് ഭാരവാഹികള്‍ വാര്‍ത്താ സമ്മേളനത്തില്‍ പറഞ്ഞു. ഇന്ന് വൈകിട്ട് അഞ്ചിന് ഉദ്ഘാടനം ചെയ്യും. വ്യാപാര വിപണ സ്റ്റാളുകള്‍, ഫുഡ് കോര്‍ട്ട്, കുട്ടികളുടെ ചില്‍ഡ്രന്‍സ് പാര്‍ക്ക്, ഗോസ്റ്റ് ഹൗസ്, കാര്‍ഷിക ഉല്‍പ്പന്നങ്ങളുടെ വിപണന സ്റ്റാളുകള്‍, കേരളത്തിന്‍റെ തനതു നാടന്‍ മാമ്പഴങ്ങളുടെ വിപണനം എന്നിവ ഉണ്ടാകും. സ്റ്റാളുകള്‍ ദിവസവും രാവിലെ 10 മുതല്‍ രാത്രി 10 വരെയാണ്. പ്രവേശനം സൗജന്യമാണ്. ഇതില്‍നിന്ന് ലഭിക്കുന്ന തുക നിര്‍ധനരായ കുട്ടികളുടെ പഠന ചിലവിനു വേണ്ടി നല്‍കുമെന്ന് സംഘാടകര്‍ പറഞ്ഞു. സി.എസ്. വിജയന്‍ ഏറ്റുമാനൂര്‍, കെ.എം. ഹംസ ആലുവ, കെ.സി. അനൂപ് കോലഞ്ചേരി, കേരള സ്റ്റേറ്റ് എക്സിബിഷന്‍ വര്‍ക്കേഴ്സ് യൂണിയന്‍ സംസ്ഥാന പ്രസിഡന്‍റ് ജ്യോതികുമാര്‍ ജി. മുദാക്കല്‍ എന്നിവര്‍ പങ്കെടുത്തു.

സൈറൺ നിരോധനം: പ്രതിഷേധ ജാഥ നടത്തി

ആലുവ : നഗരസഭയുടെ അരനൂറ്റാണ്ട് പഴക്കമുള്ള സൈറൺ നിരോധിച്ചുകൊണ്ടുള്ള എറണാകുളം ജില്ലാ കളക്ടറുടെ ഉത്തരവിൽ പ്രതിഷേധിച്ച് ആലുവയിൽ പൗരാവലിയുടെ നേതൃത്വത്തിൽ ജാഥ നടത്തി. അൻവർ സാദത്ത് എംഎൽഎ ഉദ്ഘാടനം ചെയ്തു. കൗൺസിലർമാരും വിവിധ രാഷ്ട്രീയ നേതാക്കന്മാരും പങ്കെടുത്ത പ്രതിഷേധ ജാഥയിൽ ലത്തീഫ് പൂഴിത്തറ, വി.പി. ജോർജ് , രാജീവ് സക്കറിയ, ശ്രീകാന്ത്, സൈജിജോളി, ഫാസിൽ ഹുസൈൻ, എം. പി. സൈമൺ തുടങ്ങിയവർ പങ്കെടുത്തു. ജനവിരുദ്ധ ഉത്തരവ് പിൻവലിക്കണമെന്ന് പൗരാവലി ആവശ്യപ്പെട്ടു.

കൊച്ചിയിൽ ഹിറ്റായി ഇൻസ്റ്റാമാർട്ട്

കൊച്ചി: ക്വിക്ക് കൊമേഴ്‌സ് പ്ലാറ്റ്‌ഫോമായ ഇൻസ്റ്റാമാർട്ടിനു കൊച്ചിയിൽ മികച്ച പ്രതികരണം. നാളികേരം മുതൽ വിവിധ നിത്യോപയോഗ സാധനങ്ങൾക്ക് ഇൻസ്റ്റാമാർട്ട് ഉപയോഗിക്കുന്നവരുടെ എണ്ണം വർധിച്ചെന്നു കണക്കുകൾ വ്യക്തമാക്കുന്നു. കഴിഞ്ഞ ജനുവരി മുതൽ നാളികേര വില്പനയിൽ 66 ശതമാനവും വെളിച്ചെണ്ണ വില്പനയിൽ 32 ശതമാനവും വർധനവുണ്ടായി. പാലിന്‍റെ വില്പനയിലും കുതിപ്പുണ്ട്. ഓർഡറുകളുടെ ശരാശരി ഡെലിവറി സമയം 11 മിനിറ്റാണ്. വൈകുന്നേരം ആറിനും രാത്രി 9.30നും ഇടയിലാണ് ഏറ്റവും കൂടുതൽ ഓർഡറുകൾ ലഭിക്കുന്നതെന്ന് അധികൃതർ പറഞ്ഞു.

പെൻഷനേഴ്സ് അസോസിയേഷൻ ധർണ നടത്തി

അങ്കമാലി: വിവിധ ആവശ്യങ്ങളുന്നയിച്ച് സ്റ്റേറ്റ് സർവീസ് പെൻഷനേഴ്സ് അസോസിയേഷൻ അങ്കമാലി നിയോജക മണ്ഡലം കമ്മിറ്റി അങ്കമാലി സബ് ട്രഷറിക്കു മുന്പിൽ ധർണ നടത്തി. പെൻഷൻ പരിഷ്കരണം ഉടൻ നടപ്പിലാക്കുക, ആറു ഗഡു ക്ഷാമാശ്വാസം അനുവദിക്കുക, മെഡിസെപ് അപാകതകൾ പരിഹരിക്കുക, ക്ഷാമാശ്വാസ കുടിശിക ഉടൻ നൽകുക എന്നീ ആവശ്യങ്ങൾ ഉന്നയിച്ചായിരുന്നു ധർണ. മുൻ എംഎൽഎ പി.ജെ. ജോയ്‌ ഉദ്ഘാടനം ചെയ്തു. നിയോജക മണ്ഡലം പ്രസിഡന്‍റ് എസ്.ഡി. ജോസ് അധ്യക്ഷത വഹിച്ചു. സംസ്ഥാന വൈസ്‌ പ്രസിഡന്‍റ് കെ.വി. മുരളി, സംസ്ഥാന കമ്മിറ്റി അംഗം എം.പി. ഗീവർഗീസ്, ജില്ലാ ട്രഷറർ വി.എ.അപ്സലൻ, ജില്ലാ ജോയിന്‍റ് സെക്രട്ടറി ടി.ടി. കൊച്ചുത്രേസ്യ, ടെസി ജോണി, കെ.പി. പോൾ, ടി.എ. ജോണി, വി.സി. പൗലോസ്, പി.ഒ. ജോർജ്, കെ.പി. സണ്ണി, ഓമന ലാസർ, പോൾ ജോസഫ് തുടങ്ങിയവർ പ്രസംഗിച്ചു.

കുന്പളങ്ങിയിലെ പാടത്ത് വിത്തുവിതയ്ക്കാൻ ഡ്രോൺ

പള്ളുരുത്തി: പാടത്തെ ചെളിയിൽ ചവിട്ടാതെ വിത്തു വിതച്ച് കുമ്പളങ്ങി സ്വദേശി മാഞ്ചപ്പൻ. ചെറുപ്പം മുതൽ കൃഷി ചെയ്യുന്ന മാഞ്ചപ്പന് എൺപത്തിയൊന്ന് വയസുണ്ട്. കുമ്പളങ്ങി മണൽക്കൂറിലുള്ള മൂന്നേക്കറോളം പാടത്താണ് ഡ്രോൺ ഉപയോഗിച്ച് നിലവിൽ വിത്ത് വിതച്ചിരിക്കുന്നത്. ഡ്രോൺ ഉപയോഗിച്ചു കരയിൽ ഇരുന്ന് നിയന്ത്രിച്ചു നടത്തുന്ന ഈ വിത നാട്ടുകാർക്കും പുത്തൻ അനുഭവമായി. ഈ വർഷം മഴ നേരത്തെ ആയതിനാൽ വിത്ത് വിതക്കാൻ സാധിച്ചിരിന്നില്ല. സമയത്ത് വിത്ത് വിതക്കൻ വേഗത്തിലാക്കുന്നതിനാണ് ഡ്രോൺ ഉപയോഗപ്പെടുത്തിയത്. കാക്കനാടുള്ള കൃഷിയുടെ എൻജിനീയറിംഗ് വിഭാഗമാണ് ഡ്രോൺ കൃഷി മാഞ്ചപ്പന് പരിചയപ്പെടുത്തി നടപടിയിലേക്കെത്തിച്ചത്. ഡ്രോൺ ഉപയോഗിച്ച് മരുന്ന് തളി, വളം ഇടീൽ എന്നിവ നടത്തിയിട്ടുണ്ടെങ്കിലും വിത്ത് വിതക്കൽ ജില്ലയിൽ തന്നെ ആദ്യമാണ്. തൻ്റെ പൂർവികരുടെ കാലം മുതൽ നെൽകൃഷി മുങ്ങിയിട്ടില്ല, ഇത്തവണ മഴ നേരത്തെ വന്നതിനാൽ പാടം ഉണങ്ങി കിട്ടുവാൻ പ്രയാസമായി, നേരിട്ട് പോയി വിതക്കുവാൻ സാധിക്കാത്തതിനാലാണ് പ്രതികൂല സാഹചര്യമായിട്ടും ഡ്രോൺ ഉപയോഗിച്ച് കൃഷി നടത്തുവാൻ തീരുമാനിച്ചതെന്ന് മാഞ്ചപ്പൻ പറയുന്നു. വിതക്കൽ കുടാതെ ജൈവകീടനാശിനി തളിക്കൽ, വളം ഇടീൽ തുടങ്ങിയവയും ഡ്രോണിലൂടെ നടത്തുന്നതിനുള്ള ഒരുക്കത്തിലാണ് മാഞ്ചപ്പൻ. നെൽവിത്ത് വിതക്കലിൽ കുമ്പളങ്ങി പഞ്ചായത്ത് പ്രസിഡന്‍റ് സൂസൻ ജോസഫ്, ജില്ലാ പഞ്ചായത്ത് അംഗം ദീപു കുഞ്ഞുകുട്ടി, കുമ്പളങ്ങി സഹകരണ ബാങ്ക് പ്രസിഡന്‍റ് നെൽസൻ കോച്ചേരി, മെമ്പർ ലീജ തോമസ് എന്നിവർ പങ്കെടുത്തു.

ആലുവ ഹെഡ് പോസ്റ്റോഫീസ് ആധാർസേവനം പുനസ്ഥാപിച്ചു

ആലുവ: ആലുവ ഹെഡ് പോസ്റ്റോഫീസിൽ ആധാർ അനുബന്ധ സേവനങ്ങൾ മാസങ്ങൾക്ക് ശേഷം പുന:സ്ഥാപിച്ചു. കഴിഞ്ഞ ഏതാനും മാസങ്ങളായി നിർത്തിവെച്ചിരുന്ന സൗജന്യ ആധാർ അനുബന്ധ സേവനങ്ങളാണ് ആരംഭിച്ചത്. മറ്റ് ആധാർ സേവന കേന്ദ്രങ്ങൾ സർവീസ് ചാർജ് ഈടാക്കുമ്പോൾ പോസ്റ്റ് ഓഫീസ് സേവനം പൊതുജനത്തിന് വലിയ അനുഗ്രഹമായിരുന്നു. സേവന കേന്ദ്രം നിർത്തലാക്കിയതോടെ വ്യാപക പ്രതിഷേധം ഉയർന്നെങ്കിലും അധികൃതർ ജീവനക്കാരുടെ കുറവ് ചൂണ്ടിക്കാട്ടി നിസംഗത പാലിക്കുകയായിരുന്നു. ആലുവ നഗരസഭ കൗൺസിലർമാരായ എൻ. ശ്രീകാന്ത്, ശ്രീലത രാധാകൃഷ്ണൻ എന്നിവരുടെ പരാതിയിലാണ് സേവന കേന്ദ്രം പുനസ്ഥാപിച്ചത്.

മെട്രോ രണ്ടാംഘട്ട നിർമാണം: ഗതാഗതക്കുരുക്കിനെതിരെ പ്രതിഷേധം

കാക്കനാട്: മെട്രോ റെയിലിന്‍റെ രണ്ടാംഘട്ട നിർമാണവുമായി ബന്ധപ്പെട്ട് ജനം അനുഭവിക്കുന്ന രൂക്ഷമായ ഗതാഗതക്കുരുക്കിനു പരിഹാരമാവശ്യപ്പെട്ട് കോൺഗ്രസ് തൃക്കാക്കര ഈസ്റ്റ് മണ്ഡലം കമ്മിറ്റിയുടെ നേതൃത്വത്തിൽഎറണാകുളം കളക്ടറേറ്റ് ജംഗ്ഷനിൽ നടന്ന പ്രതിഷേധ ധർണ ഹൈബി ഈഡൻ എംപി ഉദ്ഘാടനം ചെയ്തു. രണ്ടാംഘട്ടനിർമാണ പ്രവർത്തനങ്ങൾ ആരംഭിച്ചതോടെ മരണക്കുഴിയായി മാറിയ റോഡുകൾ യുദ്ധകാലാടിസ്ഥാനത്തിൽ ഗതാഗതയോഗ്യമാക്കാൻ നടപടി വേണമെന്ന് ഹൈബി ഈഡൻ ആവശ്യപ്പെട്ടു. ടിവി സെന്‍റർ തുടങ്ങിയ പ്രധാന സ്ഥലങ്ങളിൽ അടിപ്പാതകളും സർവീസ് റോഡുകളും നിർമിച്ച് ഗതാഗത സൗകര്യം മെച്ചപ്പെടുത്തണമെന്നും കോൺഗ്രസ് ഈസ്റ്റ് മണ്ഡലം പ്രസിഡന്‍റ് എം.എസ്. അനിൽകുമാർആവശ്യപ്പെട്ടു. മെട്രോ റെയിൽവേയുടെ ഒന്നാംഘട്ട നിർമാണ സമയത്ത് സ്വീകരിച്ച ഗതാഗത സുരക്ഷാ മുൻകരുതലുകൾ പാലിക്കാതെയുള്ള രണ്ടാംഘട്ട നിർമാണം ശരിയല്ലെന്നു നേതാക്കൾ കുറ്റപ്പെടുത്തി. കോൺഗ്രസ് ബ്ലോക്ക് പ്രസിഡന്‍റ് റാഷിദ് ഉള്ളംപിള്ളി, മുനിസിപ്പൽ ചെയർപേഴ്സൺ രാധാമണിപിള്ള മുനിസിപ്പൽ കൗൺസിലർമാരായ വി.ഡി. സുരേഷ്, എം.ഒ. വർഗീസ്, സി.സി. വിജു , ഉണ്ണി കാക്കനാട്, കൊച്ചി കോർപ്പറേഷൻ കൗൺസിലർ കെ.എ. വിജയകുമാർ, ബ്ലോക്ക് ഭാരവാഹികളായ കെ.എം. അബ്ബാസ്, അലി പാറേക്കാട്ടിൽ എ.എം. കുഞ്ഞുമക്കർ തുടങ്ങിയവർ പ്രസംഗിച്ചു.

സാമൂഹ്യ വിരുദ്ധർ ഫ്യൂസ് ഊരിമാറ്റുന്നതായി പരാതി

മരട്: ചമ്പക്കര ഭാഗത്ത് രാത്രികാലങ്ങളിൽ സാമൂഹ്യ വിരുദ്ധർ ട്രാൻസ്ഫോർമർ ഓഫ് ചെയ്ത് വൈദ്യുതി തടസപ്പെടുത്തുന്നതായി പരാതി. വൈദ്യുതി വിതരണം തടസപ്പെട്ടെന്ന ഫോൾ കോളുകളെ തുടർന്ന് പരിശോധന നടത്തുമ്പോഴാണ് ഫ്യൂസ് കാരിയറുകളിൽ നിന്ന് ഫ്യൂസ് ഊരിമാറ്റി വച്ചിരിക്കുന്നതായി കാണുന്നത്. ന്യൂക്ലിയസ് മാൾ, ഇഞ്ചക്കൽ, ചമ്പക്കര തുടങ്ങി പത്തോളം സ്ഥലത്ത് കഴിഞ്ഞ മൂന്ന് ദിവസത്തിനുള്ളിൽ ഇത്തരം പ്രശ്നമുണ്ടായതായി കെഎസ്ഇബി അധികൃതർ പറഞ്ഞു. സംഭവത്തെക്കുറിച്ച് പോലീസിൽ പരാതി നൽകിയിട്ടുണ്ട്. വൈറ്റില സെക്ഷനിലും ഇതേ പ്രശ്നമുണ്ടെന്നാണ് പറയുന്നത്.

ജനറല്‍ ആശുപത്രിക്കെതിരെ വ്യാജ പ്രചാരണം: നടപടി സ്വീകരിക്കണമെന്ന് കെജിഎംഒഎ

കൊച്ചി: എറണാകുളം ജനറല്‍ ആശുപത്രിയില്‍ ശസ്ത്രക്രിയയ്ക്ക് വിധേയയായ യുവതിയുടെ വയറ്റില്‍ നൂല് മറന്നുവെച്ച് തുന്നിക്കെട്ടിയെന്ന് പ്രചരിപ്പിക്കുന്നത് വാസ്തവ വിരുദ്ധമാണെന്നും ഇത്തരം വ്യാജ വാര്‍ത്തകള്‍ പ്രചരിക്കുന്നതിനെതിരെ സര്‍ക്കാര്‍ നടപടി സ്വീകരിക്കണമെന്നും മെഡിക്കല്‍ ഓഫീസേഴ്‌സ് അസോസിയേഷന്‍ (കെജിഎംഒഎ) പത്രക്കുറുപ്പിൽ ആവശ്യപ്പെട്ടു. അന്വേഷണമോ ജാഗ്രതയോ കൂടാതെ വാര്‍ത്ത നല്‍കുന്ന മാധ്യമങ്ങളുടെ നിലപാട് അംഗീകരിക്കാന്‍ കഴിയില്ല. ശസ്ത്രക്രിയ വിഭാഗത്തിന്‍റെ അന്താരാഷ്ട്ര രീതികളുടെ ഭാഗമായി, ഉദരപേശി ശക്തിപ്പെടുത്തുന്നതിനും ഹെര്‍ണിയ പോലുള്ള ബുദ്ധിമുട്ടുകള്‍ തടയുന്നതിനും പ്രോലൈന്‍ പോലുള്ള നോണ്‍ അബ്‌സോറബിള്‍ സ്യൂച്ചര്‍ ഉപയോഗിക്കുന്നത് സ്ഥിരമായി ശുപാര്‍ശ ചെയ്യുന്ന ശസ്ത്രക്രിയാ പ്രോട്ടോക്കോളാണ്. അല്ലാതെ പിഴവോ മറവിയോ അല്ല. ശസ്ത്രക്രിയാസമയത്ത് ഇത്തരം നൂല്‍ പ്രയോഗിക്കുന്നത് ശാരീരിക സുരക്ഷയ്ക്കും ദീര്‍ഘകാല ഫലപ്രാപ്തിക്കും ആവശ്യമാണെന്നും ജില്ലാ പ്രസിഡന്‍റ് ഡോ.ടി. സുധാകര്‍, സെക്രട്ടറി ഡോ. കാര്‍ത്തിക് ബാലചന്ദ്രന്‍ എന്നിവര്‍ പറഞ്ഞു.

കോട്ടക്കാവ് ഫൊറോന പള്ളിയിൽ ദുക്റാന തിരുനാൾ സമാപിച്ചു

പറവൂർ: കോട്ടക്കാവ് ഫൊറോന പള്ളിയിൽ ദുക്റാന തിരുനാൾ നേർച്ചസദ്യയോടെ സമാപിച്ചു. രാവിലെ മാർ തോമാശ്ലീഹ ക്രിസ്തു വിശ്വാസം പകർന്നു നൽകിയ തീർഥക്കുളത്തിനരികിൽ വച്ച് വികാരി റവ. ഡോ. ജോസ് പുതിയേടത്തിന്‍റെ മുഖ്യ കാർമികത്വത്തിൽ മാമ്മോദീസയും മാമോദീസാ നവീകരണവും നടത്തി. തുടർന്ന് നടന്ന ആഘോഷമായ തിരുനാൾ ദിവ്യബലിക്ക് പാണാവള്ളി സെന്‍റ് ജോസഫ്സ്പള്ളി വികാരി ഫാ. വിപിൻ കുരിശുതറ മുഖ്യകാർമികനായി. ഫാ. സെബിൻ മരക്കാശേരി, ഫാ. അഖിൽ വയ്പ്പുകാട്ടിൽ, സഹവികാരി ഫാ.സജിത്ത് കൂവേലി എന്നിവർ സഹകാർമികരായിരുന്നു. കലൂർ റിന്യൂവൽ സെന്‍റർ ഡയറക്ടർ റവ. ഡോ. ജോഷി പുതുശേരി വചനപ്രഘോഷണം നടത്തി. തിരുനാൾ കമ്മിറ്റിയും തോമസ് നാമധാരികളും കാഴ്ച സമർപ്പണം നടത്തി. പള്ളി ചുറ്റി പ്രദക്ഷിണവും നടന്നു. തുടർന്ന് നേർച്ചസദ്യയുടെ ആശീർവദം നടത്തി. ആയിരക്കണക്കിന് വിശ്വാസികൾ നേർച്ചസദ്യയിൽ പങ്കാളികളായി.

സ്ത്രീകളുടെ സമഗ്ര ആരോഗ്യത്തിനായി ആരോഗ്യലക്ഷ്മി പദ്ധതിക്ക് തുടക്കം

കൊച്ചി: എറണാകുളം ജില്ലാ പഞ്ചായത്തിന്‍റെ 2024-25 വാര്‍ഷിക പദ്ധതിയുടെ ഭാഗമായി ഭാരതീയ ചികിത്സാ സഹായത്തോടെ നടപ്പാക്കുന്ന സ്ത്രീകളുടെ സമഗ്ര ആരോഗ്യത്തിനായുള്ള ആരോഗ്യ ലക്ഷ്മി പദ്ധതിക്ക് തുടക്കമായി. ഉദ്ഘാടനം ഹൈബി ഈഡന്‍ എംപി നിര്‍വഹിച്ചു. 1.6 കോടി രൂപയുടെ ആയുര്‍വേദ മരുന്നുകളാണ് ഈ പദ്ധതി വഴി വിതരണം ചെയ്യുന്നത്. സ്ത്രീകള്‍ക്കുണ്ടാകുന്ന ആര്‍ത്തവപ്രശ്‌നങ്ങള്‍, ഹോര്‍മോണ്‍ വ്യതിയാനങ്ങള്‍, ആര്‍ത്തവ വിരാമത്തോടനുബന്ധിച്ചുള്ള ആരോഗ്യപ്രശ്‌നങ്ങള്‍, കൗമാരക്കാരില്‍ ഉണ്ടാകുന്ന ആര്‍ത്തവ ചക്രത്തിലെ ക്രമക്കേടുകള്‍, അമിത രക്തസ്രാവം, വെള്ളപോക്ക് മുതലായ ആരോഗ്യ പ്രശ്‌നങ്ങള്‍ക്കുള്ള പരിഹാരത്തിനായി ജില്ലയിലെ മുഴുവന്‍ സര്‍ക്കാര്‍ ആയുര്‍വേദ സ്ഥാപനങ്ങള്‍ വഴി ആരോഗ്യലക്ഷ്മി പദ്ധതി നടപ്പാക്കാനാണ് ജില്ലാ പഞ്ചായത്ത് ലക്ഷ്യമിട്ടിട്ടുള്ളത്. എറണാകുളം ജില്ലാ ആയുര്‍വേദ ആശുപത്രിയില്‍ നടന്ന ചടങ്ങില്‍ ജില്ലാ പഞ്ചായത്ത് പ്രസിഡന്‍റ് മനോജ് മൂത്തേടന്‍ അധ്യക്ഷത വഹിച്ചു. ടി.ജെ. വിനോദ് എംഎല്‍എ മുഖ്യാതിഥിയായിരുന്നു. പരിപാടിയോടനുബന്ധിച്ച് ബോധവത്കരണ ക്ലാസും നടത്തി.

കനത്ത മഴ: വീട് തകർന്നു

ഉദയംപേരൂർ: കനത്ത മഴയെ തുടർന്ന് വീടിന്‍റെ ഒരു ഭാഗം തകർന്ന് വീണു. ഉദയംപേരൂർ പഞ്ചായത്ത് 6-ാം വാർഡിൽ പട്ടരുകണ്ടത്തിൽ ദാമോദരന്‍റെ വീടാണ് തകർന്നത്. വീടിന് സമീപത്തെ തോടുകൾ നികത്തിയതോടെ വീടിന് ചുറ്റും വെള്ളക്കെട്ട് പതിവായിരുന്നു. നിരന്തരമുണ്ടായ വെള്ളക്കെട്ടിനെ തുടർന്ന് ജീർണാവസ്ഥയിലായ വീടിന്‍റെ അടുക്കളയുടെ ഭാഗമാണ് കഴിഞ്ഞദിവസം തകർന്ന് വീണത്.

മലയാറ്റൂർ പള്ളിയിൽ ദുക്റാന തിരുനാൾ ആഘോഷിച്ചു

മലയാറ്റൂർ: അന്തർ ദേശീയ തീർഥാടന കേന്ദ്രമായ കുരിശുമുടിയിലും സെന്‍റ് തോമസ് പള്ളിയിലും ദുക്റാന തിരുനാൾ ആഘോഷിച്ചു. ആഘോഷമായ തിരുനാൾ കുർബാനയും നേർച്ച സദ്യയും ഉണ്ടായിരുന്നു. വിശുദ്ധ കുർബാനയ്ക്ക് ഫാ. ആന്‍റണി കാട്ടുപറമ്പിൽ നേതൃത്വം നൽകി. ഫാ. ബിബിൻ മുളവരിക്കൽ സന്ദേശം നൽകി. നേർച്ചസദ്യയുടെ വെഞ്ചിരിപ്പ് കർമം മലയാറ്റൂർ പള്ളി വികാരി ഫാ. ജോസ് ഒഴലക്കാട് നിർവഹിച്ചു. അസി. വികാരി ഫാ. നിഖിൽ മുളവരിക്കൽ, ഫാ. മാത്യു പെരുമായൻ, റോജി എം. ജോൺഎംഎൽഎ , ബ്ലോക്ക് പഞ്ചായത്ത് പ്രസിഡന്‍റ് കൊച്ചുത്രേസ്യ തങ്കച്ചൻ, ജില്ലാ പഞ്ചായത്തംഗം അനിമോൾ ബേബി, കൈകാരന്മാരായ തോമസ് കരോട്ടപുറം, ജോയ് മുട്ടതോട്ടിൽ, അഗസ്റ്റിൻ വല്ലൂരാൻ, വൈസ് ചെയർമാൻ ലൂയിസ് പയ്യപ്പിള്ളി, ഫുഡ് കമ്മിറ്റി കൺവീനർമാരായ സേവ്യർ പനഞ്ചിക്കൽ, ടിനു തറയിൽ, തങ്കച്ചൻ കുറിയോടത്ത്, ജിനോ മാണിക്യത്താൻ എന്നിവർ നേതൃത്വം നൽകി. 10,000 ത്തോളം ഭക്തജനങ്ങൾ നേർച്ചസദ്യയിൽ പങ്കുകൊണ്ടു. കുരിശുമുടിയിൽ സ്പിരിച്ചൽ ഡയറക്ടർ ഫാ. ജോസ് വടക്കന്‍റെ നേതൃത്വത്തിൽ വിശുദ്ധ കുർബാനയും നൊവേനയും നടന്നു. പാ ചോറ് വിതരണവും ഉണ്ടായിരുന്നു.

ലഹരിക്കെതിരേ ബോധവത്കരണവുമായി ഓട്ടൻതുള്ളൽ

തൃപ്പൂണിത്തുറ: ശ്രീവെങ്കടേശ്വര ഹൈസ്കൂളും തൃപ്പൂണിത്തുറ റോട്ടറി റോയലെയും ചേർന്ന് സംസ്ഥാന എക്‌സൈസ് വകുപ്പിന്‍റെ ആഭിമുഖ്യത്തിൽ വിമുക്തി മിഷൻ അവതരിപ്പിക്കുന്ന ബോധവത്ക്കരണ ക്ലാസും ഓട്ടൻതുള്ളലും സംഘടിപ്പിച്ചു. അസി.എക്‌സൈസ് ഇൻസ്‌പെക്ടർ വി. ജയരാജ്‌ ഓട്ടൻതുള്ളൽ അവതരിപ്പിച്ചു. തുടർന്ന് ക്ലാസും നയിച്ചു. സ്കൂൾ മാനേജർ എസ്. ശ്രീനിവാസൻ, പ്രധാനാധ്യാപിക ജെ. രേണുക എന്നിവർ പങ്കെടുത്തു.

തെരുവുനായ ശല്യം : യുഡിഎഫ് കൗൺസിലർമാർ കുത്തിയിരുന്ന് പ്രതിഷേധിച്ചു

ഫോർട്ടുകൊച്ചി: നഗരത്തിൽ വർധിച്ചു വരുന്ന തെരുവ് നായയുടെ ആക്രമണത്തിൽ പ്രതിഷേധിച്ച് നഗരസഭാ കവാടത്തിന് മുൻപിൽ യുഡിഎഫ് കൗൺസിലർമാർ കുത്തിയിരുന്ന് പ്രതിഷേധിച്ചു. കൗൺസിലർ എം.ജി. അരിസ്റ്റോട്ടിൽ നായ്ക്കളുടെ കടിയേറ്റ് പരിക്കേറ്റ അവസ്ഥയിലെത്തി പ്രതീകാത്മകമായിട്ടായിരുന്നു കൗൺസിലർമാരുടെ പ്രതിഷേധം. നായ്ക്കൾക്ക് പേവിഷബാധക്കെതിരെ വാക്സിൻ നൽകൽ, വന്ധ്യംകരണം ഉൾപ്പെടെയുള്ള നടപടികൾ മരവിച്ച സ്ഥിതിയിലാണ്. കഴിഞ്ഞ രണ്ട് വർഷമായി വന്ധ്യംകരണം കാര്യക്ഷമമല്ലാത്തതിനാൽ ‌ നഗരത്തിന്‍റെ മുക്കിലും മൂലയിലും തെരുവ് നായ ശല്യം രൂക്ഷമാണെന്ന് പ്രതിഷേധം ഉദ്ഘാടനം ചെയ്ത പ്രതിപക്ഷ നേതാവ് ആന്‍റണി കുരീത്തറ പറഞ്ഞു. തെരുവ് നായ്ക്കളെ പിടികൂടാനായുള്ള ഡോഗ് സ്ക്വാ‍ഡുകളുടെ പ്രവർത്തനവും മന്ദഗതിയിലാണെന്നും അടിയന്തിരമായി നായ്ക്കളെ പിടികൂടി വന്ധ്യംകരണം നടത്തുവാനും പേവിഷബാധ കുത്തിവെപ്പ് നടത്തുവാനും നഗരസഭ തയാറാകണമെന്നും പ്രതിഷേധക്കാർ ആവശ്യപ്പെട്ടു. കോടതികൾ, ബസ് ടെർമിനൽ, റെയിൽവേ സ്റ്റേഷൻ, ജനറൽ ആശുപത്രി പരിസരം തുടങ്ങിയ പ്രധാന ഇടങ്ങൾ നായ്ക്കൾ കൈയേറിയിരിക്കുകയാണ്. ഒരേ ദിവസം തന്നെയാണ് നഗരത്തിൽ പലയിടങ്ങളിലായി തെരുവ് നായ ആക്രമണം ഉണ്ടായത്. ഒരിടത്തും നായ് ശല്യം പ്രതിരോധിക്കുന്നതിനുള്ള നടപടിയില്ലെന്നതിന് തെളിവാണെന്ന് പാർലെമെന്‍ററി സെക്രട്ടറി എം.ജി. അരിസ്റ്റോട്ടിൽ പറഞ്ഞു. ആന്‍റണി പൈനുതറ, ഹെൻട്രി ഓസ്റ്റിൻ, പയസ് ജോസഫ്, മാലിനി കുറുപ്പ്, അഭിലാഷ് തോപ്പിൽ, ലൈലാദാസ്, രജനി മണി, ശാന്ത ടീച്ചർ, സക്കീർ തമ്മനം, കെ.എം. മനാഫ്, ടിബിൻ ദേവസി, ഷൈല തദേവൂസ്, മിന്ന വിവേര, സോണി ജോസഫ്, മിനി ദിലീപ് എന്നിവർ പ്രസംഗിച്ചു.

ഫ്ലാറ്റ് തട്ടിപ്പ്: പ്രതി പിടിയിൽ

കാക്കനാട്: കാക്കനാട് ഫ്ലാറ്റ് പണയത്തിന് നൽകാമെന്നു വാഗ്ദാനം നൽകി കോടികളുടെ തട്ടിപ്പ് നടത്തിയ സംഭവത്തിൽ ഒരാളെ തൃക്കാക്കര പോലീസ് അറസ്റ്റു ചെയ്തു. വാഴക്കാല മലബാർ അപ്പാർട്ടുമെന്‍റിൽ മിന്‍റു മാണി(39)യെയാണ് തൃക്കാക്കര എസ്ഐ വി.ബി. അനസിന്‍റെ നേതൃത്വത്തിൽ പിടികൂടിയത്. വാഴക്കാലയിലെ മലബാർ സർവീസ് അപ്പാർട്ട്മെന്‍റ്സ് എന്ന സ്ഥാപനത്തിന്‍റെ പേരിലായിരുന്നു തട്ടിപ്പ്.

തുരത്തുന്നതിനിടെ കാട്ടാനക്കൂട്ടം പാഞ്ഞടുത്തത് പരിഭ്രാന്തി പരത്തി

കോതമംഗലം: കോട്ടപ്പടി കൂവക്കണ്ടത്ത് നാട്ടിലിറങ്ങിയ കാട്ടാനകളെ തുരത്തുന്നതിനിടയിൽ ഫോറസ്റ്റ് ഉദ്യോഗസ്ഥർക്കും നാട്ടുകാർക്കും നേരെ കാട്ടാനക്കൂട്ടം പാഞ്ഞടുത്തു. ദിവസങ്ങളായി കുട്ടിയാനയുൾപ്പെടെ ആറ് ആനകൾ ഈ ഭാഗത്ത് എത്തുന്നുണ്ട്. കാർഷിക വിളകൾ നശിപ്പിക്കുന്നതും പതിവായിരിക്കുകയാണ്. കോട്ടപ്പാറ വനമേഖലയിൽനിന്നു ചൊവ്വാഴ്ച രാത്രിയിലെത്തിയ കാട്ടാനക്കൂട്ടം ഇന്നലെ പുലർന്നശേഷവും മടങ്ങിയിരുന്നില്ല. ആറ് ആനകളാണ് ഇന്നലെയും സംഘത്തിലുണ്ടായിരുന്നത്. നാട്ടുകാർ അറിയിച്ചതനുസരിച്ചാണ് ആനകളെ ഓടിക്കാൻ വനപാലകരെത്തിയത്. പ്ലാമുടിക്ക് സമീപമുള്ള കൂവക്കണ്ടം ഭാഗത്തുവച്ച് ആനകളിൽ രണ്ടെണ്ണം വനപാലകർക്കും നാട്ടുകാർക്കും നേരെ പാഞ്ഞടുത്തു. അൽപ്പം പകച്ചുപോയ എല്ലാവരും പിന്തിരിഞ്ഞോടിയാണ് ജീവൻ രക്ഷിച്ചത്. പിന്നീട് ധൈര്യം വീണ്ടെടുത്ത വനപാലകർ ആനകളെ വിരട്ടിയോടിക്കുകയായിരുന്നു. വനത്തിൽ നിന്നും മൂന്ന് കിലോമീറ്ററോളം മാറി ജനവാസ പ്രദേശത്ത് കല്ലുമല ഭാഗത്ത് ആനക്കൂട്ടം കൃഷി നശിപ്പിച്ചിട്ടുണ്ട്. ഇവിടെനിന്ന് ആനകൾ ജനവാസ മേഖലയിലൂടെയാണ് ഇന്നലെ രാവിലെ വനത്തിലേക്ക് നീങ്ങിയത്. പ്രദേശത്ത് ആനകളിറങ്ങുന്നത് നിത്യസംഭവമാണ്. ആനകൾ കടന്നുകയറാത്ത കൃഷിയിടങ്ങളും പുരയിടങ്ങളും വിരളമാണ്. ജീവിതം പൊറുതിമുട്ടിയെന്ന് നാട്ടുകാർ പറയുന്നു. കൃഷിയിടവും വീടുമെല്ലാം ഉപേക്ഷിച്ച് മറ്റിടങ്ങളിലേക്ക് ചേക്കേറിയവരും നിരവധിയാണ്. മാസങ്ങൾക്ക് മുന്പ് രാത്രിയിൽ കൃഷിയിടത്തിലിറങ്ങിയ ആനകളെ തുരത്തുന്നതിനിടെ ഒരു കർഷകൻ കുഴഞ്ഞുവീണ് മരിച്ചതും കൂവക്കണ്ടത്താണ്. ആനകൾ നാട്ടിലിറങ്ങുന്നത് തടയാൻ വനാതിർത്തിയിൽ ഫെൻസിംഗ് സ്ഥാപിക്കുന്നതിനുള്ള പ്രവർത്തനം നടന്നുവരികയാണ്. ഫെൻസിംഗ് ശാശ്വതമായ പ്രശ്നപരിഹാരത്തിന് പ്രാപ്തമല്ലെന്നാണ് പൊതുവേയുള്ള നാട്ടുകാരുടെ വിലയിരുത്തൽ.

മഹാരാജാസ് കോളജില്‍ തെരുവുനായ ആക്രമണം; മൂന്നുപേർക്ക് കടിയേറ്റു

നായയ്ക്ക് പേ വിഷബാധയുണ്ടെന്ന് സംശയം കൊച്ചി: മഹാരാജാസ് കോളജില്‍ ഇന്നലെ തെരുവ് നായ ആക്രമണത്തില്‍ മൂന്നു പേർക്ക് കടിയേറ്റു. ഇന്നലെ രാവിലെ കോളജിലെ ഓഫീസ് അസിസ്റ്റന്‍റ് നിത്യയ്ക്കും ഒന്നാം വര്‍ഷ ഡിഗ്രി ഹിന്ദി വിദ്യാര്‍ഥിക്കുമാണ് തെരുവുനായയുടെ കടിയേറ്റത്. ഉച്ചയ്ക്കുശേഷം അഡ്മിഷന്‍ നടപടികള്‍ക്കായെത്തിയ കുട്ടിയുടെ രക്ഷിതാവിനെയും ഈ നായ കടിച്ചു. ഏറെ നേരത്തെ ശ്രമത്തിനൊടുവില്‍ നായയെ പിടികൂടി. നായയ്ക്ക് പേ വിഷബാധയുള്ളതായി സംശയിക്കുന്നു. കോളജില്‍ നിന്ന് അറിയിച്ചതിനെത്തുടര്‍ന്ന് കൊച്ചി കോര്‍പറേഷനില്‍ നിന്നുള്ള ജീവനക്കാരെത്തി കാമ്പസിനുള്ളിലുണ്ടായിരുന്നു ഒന്നിലേറെ തെരുവുനായ്ക്കളെ പിടികൂടിയെങ്കിലും ആക്രമിച്ച നായ ആദ്യം പിടികൂടാനായില്ല. നായയുടെ വായില്‍ നുരയും പതയും കണ്ടതായി കടിയേറ്റവരും വിദ്യാര്‍ഥികളും പറഞ്ഞു. ഏറെ നേരത്തെ തെരച്ചിലിനൊടുവില്‍ വൈകിട്ടോടെയാണ് നായയെ പിടികൂടാനായ്ത്. ഇതേ നായയുടെ കടിയേറ്റ മറ്റൊരു നായയെയും പിടികൂടി.

യുവതിയെ കയറിപ്പിടിച്ച യുവാക്കൾ അറസ്റ്റിൽ

കളമശേരി: കളമശേരി സോഷ്യൽ പള്ളി സൗഹൃദ നഗർ റോഡിൽ വച്ച് കഴിഞ്ഞ ദിവസം 7.50ന് അതുവഴി നടന്നുപോയ യുവതിയെ ലൈംഗിക ഉദ്ദേശത്തോടെ കയറിപ്പിടിച്ച കേസിൽ രണ്ട് യുവാക്കളെ കളമശേരി പോലീസ് പിടികൂടി. പെരുമ്പാവൂർ അല്ലപ്ര മകപ്പിള്ളി വീട്ടിൽ മുഹമ്മദ് അക്ഷാദ് (18), കളമശേരി ചങ്ങമ്പുഴ നഗറർ പൊട്ടച്ചാൽ നഗറിൽ വാഴയിൽ വീട്ടിൽ അഹമ്മദ് ഹലീം (19) എന്നിവരെയാണ് കളമശേരി പോലീസ് അറസ്റ്റ് ചെയ്തത്. പോലീസ് ഇൻസ്പെക്ടർ എം.ബി. ലത്തീഫിന്‍റെ നേതൃത്വത്തിൽ എസ്ഐ രഞ്ജിത്ത്, സിപിഒമാരായ വിനു, ഷാജഹാൻ എന്നിവരുടെ നേതൃത്വത്തിലുള്ള സംഘമാണ് അറസ്റ്റ് ചെയ്തത്. കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]