ADVERTISEMENT

ADVERTISEMENT

മികച്ച വിജയം നേടിയ സ്കൂളുകളെ ആദരിച്ച് പാറക്കടവ് ബ്ലോക്ക്

നെടുമ്പാശേരി: പാറക്കടവ് ബ്ലോക്ക് പഞ്ചായത്ത് നേതൃത്വത്തിൽ ബ്ലോക്ക്പരിധിയിലെ എസ്എസ്എൽസി, പ്ലസ് ടു പരീക്ഷകളിൽ മികച്ച വിജയം നേടിയ വിദ്യാലയങ്ങളെ ആദരിച്ചു. ബ്ലോക്ക് പഞ്ചായത്ത് ഹാളിൽ നടന്ന ചടങ്ങ് പ്രസിഡന്‍റ് ടി.വി. പ്രദീഷ് ഉദ്ഘാടനം ചെയ്തു.
വൈസ് പ്രസിഡന്‍റ് താര സജീവ് അധ്യക്ഷയായിരുന്നു.

ചൊവ്വര ഗവ. ഹയർ സെക്കൻഡറി സ്കൂൾ, മാർ അത്തനേഷ്യസ് ഹയർസെക്കൻഡറി സ്കൂൾ അത്താണി, ചെങ്ങമനാട് ഗവ. ഹൈസ്കൂൾ, കപ്രശേരി മോഡൽ ടെക്നിക്കൽ ഹയർ സെക്കൻഡറി സ്കൂൾ,പാറക്കടവ് എൻഎസ്എസ് ഹയർസെക്കൻഡറി സ്കൂൾ,പാറക്കടവ് എൻഎസ്എസ് ഹൈസ്കൂൾ,

പൂവത്തുശേരി സെന്‍റ് ജോസഫ്സ് ഹൈസ്കൂൾ, പുളിയനം ഗവ. ഹൈസ്ക്കൂൾ, അയിരൂർ സെന്‍റ് തോമസ് ഹയർസെക്കൻഡറി സ്കൂൾ, അയിരൂർ സെന്‍റ് തോമസ് ഹൈസ്കൂൾ, പുത്തൻവേലിക്കര വിസിഎസ് ഹൈസ്കൂൾ, കുറ്റിപ്പുഴ ക്രൈസ്റ്റ് രാജ് ഹൈസ്കൂൾ എന്നീ സ്കൂളുകൾക്കാണ് ആദരവ് നൽകിയത്.

ADVERTISEMENT

തെരുവു നായ്ക്കൾ നൂറോളം താറാവുകളെ കൊന്നൊടുക്കി

അരൂർ: വീട്ടുവളപ്പിലെ കൂട്ടിൽ കയറി നൂറോളം താറാവുകളെ തെരുവു നായ്ക്കൾ കൊന്നു. എട്ടാം വാർഡിൽ മഞ്ചാടിക്കുന്നിൽ രവി ദാസിന്‍റെ താറാവുകളെയാണ് തെരുവു നായ്ക്കൾ കൊന്നത്. കർഷകനായ രവിദാസ് 20 സെന്‍റ് സ്ഥലത്താണ് പച്ചക്കറികളും, കോഴി, താറാവുകളെയും വളർത്തുന്നത്. കഴിഞ്ഞ ദിവസത്തെ കാറ്റിൽ പുരയിടത്തിലെ 50 ഓളം കുലച്ച ഏത്തവാഴകൾ ഒടിഞ്ഞുവീണിരുന്നു. ക്ഷീരകർഷകനായിരുന്ന ഇയാൾ ഏറെക്കാലമായി പച്ചക്കറി, കോഴി, താറാവു വളർത്തൽ കൃഷിയാണ് ചെയ്തുവന്നത്.

കെഎസ്ഇബി ഉദ്യോഗസ്ഥരെ ആക്രമിച്ചയാൾ പിടിയിൽ

പനങ്ങാട്: പനങ്ങാട് കെഎസ്ഇബി ഓഫീസിലെ ലൈൻമാനെയും സഹപ്രവർത്തകനേയും ആക്രമിച്ച കേസിലെ പ്രതി പനങ്ങാട് കാമോത്ത് അമ്പലത്തിന് സമീപം ചിറ്റമനപ്പറമ്പിൽ വീട്ടിൽ ജെയിൻ(59) നെ പനങ്ങാട് പോലീസ് അറസ്റ്റ് ചെയ്തു. കഴിഞ്ഞ 3ന് രാവിലെ കുമ്പളം ഭാഗത്തെ വീട്ടിൽ തകരാർ പരിഹരിക്കാനെത്തിയ ലൈൻമാനെയും വർക്കറെയും വഴിയിൽ തടഞ്ഞു നിർത്തി സിമന്‍റ് കട്ട കൊണ്ട് ആക്രമിച്ച് പരിക്കേൽപ്പിക്കുകയായിരുന്നു. കഴിഞ്ഞ വർഷം സെപ്റ്റംബറിൽ പ്രതിയുടെ വീട്ടിലെത്തിയ കെഎസ്ഇബി ഉദ്യോഗസ്ഥരെ ഇരുമ്പു വടികൊണ്ട് ആക്രമിച്ച കേസിലും ഇയാളെ അറസ്റ്റ് ചെയ്തിരുന്നു.

കാപ്പ ചുമത്തി നാടുകടത്തി

കൊച്ചി: വിവിധ കേസുകളില്‍ പ്രതിയായ കളമശേരി സ്വദേശിയെ കാപ്പ ചുമത്തി നാടുകടത്തി. ബോസ് നിസാര്‍ എന്നു വിളിപ്പേരുള്ള നിസാറി(47)നെയാണ് കൊച്ചി സിറ്റി പോലീസ് കമ്മീഷണറുടെ ഉത്തരവിന്‍റെ അടിസ്ഥാനത്തില്‍ കാപ്പ ചുമത്തി നാടുകടത്തിയത്. കൊച്ചി സിറ്റി പോലീസിന്‍റെ പരിധിയില്‍ പ്രവേശിക്കുന്നതിനും പ്രദേശത്ത് ഏതെങ്കിലും വിധത്തിലുള്ള പ്രവര്‍ത്തനങ്ങളില്‍ ഏര്‍പ്പെടുന്നതില്‍ നിന്നും ഇയാളെ ആറു മാസത്തേക്ക് തടഞ്ഞു കൊണ്ടുള്ളതാണ് ഉത്തരവ്. ഭവനഭേദനം, അടിപിടി, സംഘം ചേര്‍ന്ന് ആക്രമണം തുടങ്ങി വിവിധ കേസുകളിലെ പ്രതിയാണ് നിസാര്‍.

കൊച്ചിയില്‍ സുസ്ഥിര അയല്‍ക്കൂട്ട ബയോ ഗ്യാസ് പദ്ധതിക്ക് തുടക്കം

കൊച്ചി: കൊച്ചി കോര്‍പറേഷന്‍റെയും ഡോണ്‍ ബോസ്‌കോ സ്‌നേഹ ഭവന്‍, കെപിഎംജി എന്നീ സാമൂഹ്യ സംഘടനകളുടെയും സംയുക്താഭിമുഖ്യത്തില്‍ നടപ്പാക്കുന്ന സുസ്ഥിര അയല്‍ക്കൂട്ട ബയോഗ്യാസ് പദ്ധതിക്ക് തുടക്കമായി. പള്ളുരുത്തിയിലെ ഡോണ്‍ ബോസ്‌കോ സൈക്കോസോഷ്യല്‍ സപ്പോര്‍ട്ട് സെന്‍ററില്‍ നടന്ന ചടങ്ങില്‍ മേയര്‍ അഡ്വ. എം. അനില്‍കുമാര്‍ പദ്ധതി ഉദ്ഘാടനം ചെയ്തു. ദിനംപ്രതി 700 കിലോഗ്രാം ജൈവമാലിന്യം ശേഖരിച്ച് ശുദ്ധമായ ബയോഗ്യാസ് ഉത്പാദിപ്പിക്കുകയും, ഉയര്‍ന്ന നിലവാരത്തിലുള്ള ജൈവവളങ്ങള്‍ നിര്‍മിക്കുകയും ചെയ്യുന്ന ഈ പദ്ധതി നഗരത്തിലെ 350 കുടുംബങ്ങള്‍ക്ക് നേരിട്ട് ഉപകാരപ്പെടുന്ന തരത്തിലായിരിക്കും. മൈ വേസ്റ്റ്, മൈ റെസ്‌പോൺസിബിലിറ്റി എന്ന സന്ദേശത്തോടെ ബോധവത്കരണ പരിപാടികളും പദ്ധതി ഉള്‍ക്കൊള്ളുന്നു. ഓഡിറ്റിംഗ് ആന്‍ഡ് ഫിനാന്‍സ് മേഖലയിലെ പ്രമുഖരായ കെപിഎംജിയുടെ സഹകരണത്തോടെ നടപ്പാക്കിയ പദ്ധതിയുടെ ഉദ്ഘാടന ചടങ്ങില്‍ കെപിഎംജി കമ്പനി ചീഫ് ഡയറക്ടര്‍ ഗൗതം സേത്ത് മുഖ്യപ്രഭാഷണം നടത്തി. സ്‌നേഹ ഭവന്‍ എക്‌സിക്യൂട്ടീവ് ഡയറക്ടര്‍ ഫാ. പി.ഡി.തോമസ് അധ്യക്ഷത വഹിച്ചു. കെ പി എം ജി ചീഫ് ഓഫീസര്‍ രുഗ്മണി ബോധവത്കരണ സന്ദേശം നല്‍കി. കോര്‍പറേഷന്‍ സ്റ്റാൻഡിംഗ് കമ്മിറ്റി ചെയര്‍മാന്‍ ടി.കെ. അഷ്‌റഫ്, വാര്‍ഡ് കൗണ്‍സിലര്‍ വി.എ. ശ്രീജിത്ത്, ശ്രീകാന്ത്, ജിജു, ഫാ. സി.എം. ജോസഫ് തുടങ്ങിയവർ പങ്കെടുത്തു.

വാട്ടര്‍ പ്യൂരിഫയര്‍ റിപ്പയര്‍ ചെയ്തു നല്‍കിയില്ല; 30,000 രൂപ പിഴ

കൊച്ചി: സര്‍വീസ് കരാര്‍ ഉണ്ടായിരുന്നിട്ടും കുടിവെള്ളത്തിന് ഉപയോഗിച്ചിരുന്ന വാട്ടര്‍ പ്യൂരിഫയര്‍ റിപ്പയര്‍ ചെയ്യാത്തത് സേവനത്തിലെ ന്യൂനതയാണെന്ന ഉപഭോക്താവിന്‍റെ പരാതിയില്‍ നഷ്ട പരിഹാരവും കോടതി ചെലവും നല്‍കണമെന്ന് എറണാകുളം ജില്ലാ ഉപഭോക്തൃ തര്‍ക്ക പരിഹാര കമ്മീഷന്‍ വിധിച്ചു. യൂറേക്ക ഫോര്‍ബ്‌സ് ലിമിറ്റഡ് കമ്പനിക്കെതിരെ എറണാകുളം, കോതമംഗലം സ്വദേശി അജീഷ് കെ. ജോണ്‍ നല്‍കിയ പരാതിയിലാണ് ഉത്തരവ്. കുടിവെള്ളം ശുദ്ധീകരണത്തിനുള്ള ‘ഡോ. ആക്വാഗാര്‍ഡ് മാഗ്‌നാ യുവി' വാട്ടര്‍ പ്യൂരിഫയര്‍ന്‍റെ വാര്‍ഷിക സര്‍വീസ് കരാര്‍ പൂര്‍ണമായി പാലിക്കാതിരുന്നതും, ഉപഭോക്താവിന്‍റെ പരാതികള്‍ അവഗണിച്ചതും മൂലം കമ്പനി ഉപഭോക്തൃ അവകാശലംഘനമാണ് നടത്തിയതെന്ന് കമ്മീഷന്‍ നിരീക്ഷിച്ചു. ഉപഭോക്താവിന് സേവനം നിഷേധിച്ചതും പരാതികള്‍ക്ക് മറുപടി നല്‍കാതിരുന്നതും സര്‍വീസ് റദ്ദാക്കിയതും അന്യായമായ വ്യാപാര രീതിയാണെന്ന് ഡി.ബി. ബിനു അധ്യക്ഷനും വി. രാമചന്ദ്രന്‍, ടി.എന്‍. ശ്രീവിദ്യ എന്നിവര്‍ അംഗങ്ങളായ ബെഞ്ച് അഭിപ്രായപ്പെട്ടു. ഉപഭോക്താവിനുണ്ടായ മാനസിക, സാമ്പത്തിക ബുദ്ധിമുട്ടുകള്‍ക്ക് 25,000 രൂപയും, കൂടാതെ 5,000 രൂപ കോടതി ചെലവായും 45 ദിവസത്തിനകം നല്‍കാന്‍ എതിര്‍കക്ഷിക്ക് ഉത്തരവു നല്‍കി.

സുഹൃത്തുക്കൾക്കൊപ്പം കായലിൽ ചാടിയ ആളെ കാണാതായി

ഫോർട്ടുകൊച്ചി: അഴിമുഖത്ത് കായലിലേക്ക് ചാടിയ മൂന്നു പേരിൽ ഒരാളെ കാണാതായി. ഫോർട്ടുകൊച്ചി മെഹബൂബ് പാർക്കിനു സമീപം താമസിക്കുന്ന അലി മകൻ ഷറഫുദ്ദീനെ (28)യാണ് കാണാതായത്. ഫോർട്ടുകൊച്ചി അൽ ബുക്കർ ജെട്ടിയിൽ വൈകിട്ട് ആറോടെയാണ് സുഹൃത്തുക്കളായ മൂന്നു പേർ ചേർന്ന് കായലിലേക്ക് ചാടിയത്. ഇവരിൽ രണ്ടുപേർ തിരിച്ചുകയറിയെങ്കിലും ഷറഫുദ്ദീനെ കായലിൽ കാണാതാവുകയായിരുന്നു. അഗ്നി രക്ഷാസേനയും പോലീസും സ്ഥലത്തെത്തി തെരച്ചിൽ നടത്തിയെങ്കിലും കണ്ടെത്താനായില്ല.

വിദേശ ജോലി വാഗ്ദാനം ചെയ്തു തട്ടിപ്പ്: പ്രതി അറസ്റ്റില്‍

കൊച്ചി: ഫേസ്ബുക്ക് വഴി വിദേശത്ത് ജോലി വാഗ്ദാനം ചെയ്ത് തട്ടിപ്പ് നടത്തിയ കേസിലെ പ്രതി അറസ്റ്റില്‍. തിരുവനന്തപുരം കഠിനംകുളം സ്വദേശി ശോഭ(39)യാണ് കണ്ണമാലി പോലീസിന്‍റെ പിടിയിലായത്. ഫേസ്ബുക്ക് ലിങ്ക് വഴി പരസ്യത്തിലൂടെ വിദേശ ജോലി വാഗ്ദാനം ചെയ്ത് ലക്ഷങ്ങള്‍ തട്ടിയെടുത്തശേഷം ജോലി നല്‍കാതെ കബളിപ്പിക്കുകയായിരുന്നു. ചെല്ലാനം സ്വദേശിനിയുടെ പരാതിയിലാണ് അറസ്റ്റ്. ഒളിവില്‍ കഴിയുകയായിരുന്ന ഇവരെ എറണാകുളത്തു നിന്നാണ് അറസ്റ്റ് ചെയ്തത്. സമാനമായ രീതിയില്‍ സംസ്ഥാനത്തിന്‍റെ പലയിടങ്ങളിലും തട്ടിപ്പ് നടത്തി നിരവധി ആളുകളില്‍ നിന്നും ലക്ഷങ്ങള്‍ തട്ടിയതിന് കോഴിക്കോട്, തിരുവനന്തപുരം ജില്ലകളിലെ പോലീസ് സ്റ്റേഷനുകളില്‍ പ്രതിക്കെതിരെ കേസുകള്‍ നിലവിലുണ്ട്. കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.

വെള്ളക്കെട്ട് : കോര്‍പറേഷന്‍റെ പരിഹാര നടപടികളിൽ ഹൈക്കോടതിക്ക് തൃപ്തി

കൊച്ചി: കൊച്ചി കോര്‍പറേഷന്‍റെ വെള്ളക്കെട്ട് പരിഹാര പ്രവര്‍ത്തനങ്ങളില്‍ തൃപ്തി പ്രകടിപ്പിച്ച് ഹൈക്കോടതി. റോഡില്‍ വെള്ളക്കെട്ടില്ലെന്ന് ഉറപ്പാക്കാന്‍ ശക്തമായ മഴത്തും കോര്‍പറേഷന്‍ ജീവനക്കാര്‍ കര്‍മനിരതരാണ്. താന്‍ ഇക്കാര്യം നേരിട്ട് കണ്ടതാണെന്നും ജസ്റ്റീസ് ദേവന്‍ രാമചന്ദ്രന്‍ വ്യക്തമാക്കി. സ്‌റ്റേഡിയം ലിങ്ക് റോഡിന് സമീപത്തെ കനാലിലെയും പേരണ്ടൂര്‍ കനാലിലെയും ചെളി പൂര്‍ണമായും നീക്കിയാല്‍ നിലവില്‍ ഈ മേഖലയിലുണ്ടാകുന്ന വെള്ളക്കെട്ടിനും പരിഹാരം കാണാനാകുമെന്നും കോടതി വ്യക്തമാക്കി. റെയില്‍വേ കല്‍വര്‍ട്ടുകളിലെ ചെളി നീക്കത്തെയും കോടതി പ്രശംസിച്ചു. ശക്തമായ മഴയുണ്ടായിട്ടും ഇത്തവണ വെള്ളക്കെട്ടുണ്ടായില്ല. ചെളി നീക്കുന്നതിനുള്ള പ്രത്യേകയന്ത്രം ഉണ്ടെങ്കിലും ഇത് പൂര്‍ണമായും പ്രവര്‍ത്തിക്കാനാവാത്ത സ്ഥിതിയുണ്ട്. ഇക്കാര്യത്തില്‍ പരിഹാരമുണ്ടാക്കണം. എംജി റോഡില്‍ പത്മ ജംഗ്ഷനിലെ വെള്ളക്കെട്ട് ഒഴിവാക്കാന്‍ നടപടി സ്വീകരിക്കണം. ഇതിനുവേണ്ടി നടപ്പാത നിര്‍മാണം പൂര്‍ത്തിയാകാന്‍ സര്‍ക്കാര്‍ സമയം തേടുകയാണ്. തൃക്കാക്കര മേഖലയിലെ വെള്ളക്കെട്ടിനെ തുടര്‍ന്ന് വെള്ളം കൊച്ചി നഗരത്തിലേക്കും എത്തുന്നുണ്ട്. ഈ പ്രശ്‌നം പരിഹരിക്കണം. കാനകള്‍ മാലിന്യമടിഞ്ഞ് അടഞ്ഞ് കിടക്കുന്നത് സംബന്ധിച്ച് ജില്ല കളക്ടറോ ഇതിനായി നിയോഗിച്ചിട്ടുള്ള സമിതിയോ പരിശോധന നടത്തി റിപ്പോര്‍ട്ട് സമര്‍പ്പിക്കണം. പെരിയാറിന്‍റെ നീരൊഴുക്ക് തടസപ്പെടുത്തുന്ന വടുതല ബണ്ടിലെ മണ്ണ് റോഡ് നിര്‍മാണത്തിന് ഉപയോഗിക്കാനാകില്ലെന്ന് ദേശീയപാത അഥോറിട്ടി അറിയിച്ചു. മണ്ണ് പരിശോധിച്ചതിന്‍റെ അടിസ്ഥാനത്തിലാണ് ഇക്കാര്യം അറിയിച്ചത്. മണ്ണ് മറ്റെന്തെങ്കിലും ആവശ്യത്തിന് ഉപയോഗിക്കാനാകുമോ എന്നത് അറിയിക്കാമെന്ന് സര്‍ക്കാര്‍ അറിയിച്ചു. കടല്‍കയറ്റം: അടിയന്തരമായി നടപ്പാക്കാവുന്ന കാര്യങ്ങള്‍ അറിയിക്കണമെന്ന് ഹൈക്കോടതി കൊച്ചി: ചെല്ലാനം മേഖലയിലടക്കം കടല്‍കയറ്റം തടയാന്‍ അടിയന്തരമായി നടപ്പാക്കാവുന്ന കാര്യങ്ങള്‍ അറിയിക്കണമെന്ന് ഹൈക്കോടതി. ചെല്ലാനം മേഖലയിലെ കടലാക്രമണം തടയാന്‍ ദീര്‍ഘകാല പദ്ധതികള്‍ വേണമെന്നും മണ്‍സൂണ്‍ കാലത്ത് അടിയന്തര നടപടികള്‍ സ്വീകരിക്കണമെന്നും ആവശ്യപ്പെട്ട് നാട്ടുകാരനായ ടി.എ. ഡാന്‍ഫിന്‍ ഉള്‍പ്പെടെ നല്‍കിയ ഹര്‍ജിയിലാണ് ചീഫ് ജസ്റ്റീസ് നിധിന്‍ ജാംദാര്‍, ജസ്റ്റിസ് ബസന്ത് ബാലാജി എന്നിവരടങ്ങുന്ന ഡിവിഷന്‍ബെഞ്ചാണ് സര്‍ക്കാരിനോട് ഇക്കാര്യത്തില്‍ വിശദീകരണം തേടിയത്. താല്‍ക്കാലിക പരിഹാരം എന്ന നിലയില്‍ ജിയോ ബാഗുകള്‍ സ്ഥാപിക്കണമെന്ന ഇടക്കാല ആവശ്യത്തിലാണ് കോടതി സര്‍ക്കാരിന്‍റെ നിലപാട് തേടിയത്. വിഷയം വീണ്ടും 10 ന് പരിഗണിക്കാന്‍ മാറ്റി. കിലോമീറ്ററുകളോളം കടല്‍ഭിത്തി നിര്‍മാണം പൂര്‍ത്തിയാകാനുണ്ട്. ചെല്ലാനം മുതല്‍ ഫോര്‍ട്ടുകൊച്ചി വരെ കടല്‍ ഭിത്തി നിര്‍മിക്കണമെന്നാണ് ഹർജിയിലെ ആവശ്യം.

അറിവിന്‍റെയും ആദരവിന്‍റെയും ഉത്സവം

കോതമംഗലത്ത് ദീപിക യംഗ് ജീനിയസ് മീറ്റിന് എത്തിയത് നൂറുകണക്കിനു പ്രതിഭകള്‍ കോതമംഗലം: ദീപിക യംഗ് ജീനിയസ് മീറ്റും കരിയര്‍ ഗൈഡന്‍സ് ക്ലാസും കോതമംഗലം വിമലഗിരി പബ്ലിക് സ്‌കൂളില്‍ നടന്നു. കോതമംഗലം മേഖലയിലെ വിവിധ സ്‌കൂളുകളില്‍ എസ്എസ്എല്‍സി, പ്ലസ്ടു പരീക്ഷകളില്‍ തിളക്കമാര്‍ന്ന വിജയം സ്വന്തമാക്കിയ നൂറുകണക്കിനു പ്രതിഭകള്‍ പങ്കെടുത്തു. ആന്‍റണി ജോണ്‍ എംഎല്‍എ ഉദ്ഘാടനം ചെയ്തു. മലയാളിയുടെ പത്രവായനാശീലത്തില്‍ മുഖ്യപങ്കുവഹിച്ചിട്ടുള്ള ദീപിക വിദ്യാര്‍ഥികളുടെ മികവിനു പ്രോത്സാഹനമൊരുക്കാന്‍ സംഘടിപ്പിക്കുന്ന യംഗ് ജീനിയസ് മീറ്റ് മാതൃകാപരമാണെന്ന് അദ്ദേഹം പറഞ്ഞു. അറിവിന്‍റെ ഉയരങ്ങള്‍ കീഴടക്കുന്നതിനൊപ്പം സാമൂഹ്യബോധവും മാനവികതയും മുറുകെപ്പിടിക്കാനും വിദ്യാര്‍ഥികള്‍ ശ്രദ്ധിക്കേണ്ടതുണ്ടെന്നും അദ്ദേഹം അഭിപ്രായപ്പെട്ടു. മൂവാറ്റുപുഴ രൂപത വികാരി ജനറാള്‍ ഫാ. വര്‍ഗീസ് പന്തിരയിത്തടത്തില്‍ അധ്യക്ഷത വഹിച്ചു. എസ്എസ്എല്‍സി, പ്ലസ്ടു പരീക്ഷകളില്‍ എല്ലാ വിഷയങ്ങള്‍ക്കും എ പ്ലസ് നേടിയ വിദ്യാര്‍ഥികളെയും സിബിഎസ്ഇ, ഐസിഎസ്ഇ പരീക്ഷകളില്‍ 90 ശതമാനത്തിന് മുകളില്‍ മാര്‍ക്ക് നേടിയവരെയും ഉന്നത വിജയം നേടിയ സ്‌കൂളുകളെയും ചടങ്ങില്‍ ട്രോഫികളും സര്‍ട്ടിഫിക്കറ്റുകളും നല്‍കി ആദരിച്ചു. രാഷ്ട്രദീപിക ഡയറക്ടര്‍ റവ. ഡോ. തോമസ് പോത്തനാമുഴി മുഖ്യപ്രഭാഷണം നടത്തി. രാഷ്ട്രദീപിക ജനറല്‍ മനേജര്‍ ഫാ. ജിനോ പുന്നമറ്റത്തില്‍, സ്‌കൂള്‍ മനേജര്‍ ഫാ. കുര്യാക്കോസ് കറുത്തേടത്ത്, പ്രിന്‍സിപ്പല്‍ ജിസി സോജന്‍, ഡിഎഫ്‌സി മൂവാറ്റുപുഴ രൂപത ഡയറക്ടര്‍ ഫാ. ജോസ് കുട്ടിക്കേരില്‍, സംസ്ഥാന പ്രസിഡന്‍റ് ലോറന്‍സ് ഏബ്രഹാം, സംസ്ഥാന ഉപദേശക സമിതിയംഗം ജോയി നടുക്കുടി, ദീപിക അഡ്വൈസറി ബോര്‍ഡ് അംഗം ജേക്കബ് മിറ്റത്താനി, രൂപതാ പ്രസിഡന്‍റ് ഡിഗോള്‍ കെ. ജോര്‍ജ്, ദീപിക കൊച്ചി മാര്‍ക്കറ്റിംഗ് എജിഎം റെബി ജോര്‍ജ്, സര്‍ക്കുലേഷന്‍ മാനേജര്‍ ബിനോ വര്‍ഗീസ്, മാര്‍ക്കറ്റിംഗ് മാനേജര്‍ ജോണ്‍സണ്‍ പി. അഗസ്റ്റിന്‍ എന്നിവര്‍ പ്രസംഗിച്ചു. എന്‍ ഏബിള്‍ ട്രെയിനിംഗ് ഇന്‍സ്റ്റിറ്റ്യൂട്ട് സ്ഥാപകന്‍ ഡോ. ഹെൻറി ജോസഫ് കരിയര്‍ ഗൈഡന്‍സ് ക്ലാസ് നയിച്ചു. ഉന്നതം വിജയം നേടിയ വിദ്യാലയങ്ങള്‍ക്ക് ദീപികയുടെ ആദരം മൂവാറ്റുപുഴ/കോതമംഗലം: എസ്എസ്എല്‍സി, പ്ലസ്ടു പരീക്ഷകളില്‍ മികച്ച വിജയം നേടിയ മൂവാറ്റുപുഴ, കോതമംഗലം മേഖലകളിലെ വിദ്യാലയങ്ങള്‍ക്കു ദീപിക യംഗ് ജീനിയസ് മീറ്റില്‍ ആദരം. കഴിഞ്ഞ രണ്ടു ദിവസങ്ങളിലായി മൂവാറ്റുപുഴയിലും കോതമംഗലത്തും നടന്ന പരിപാടികളില്‍ ആദരം ഏറ്റുവാങ്ങിയ വിദ്യാലയങ്ങള്‍: ഇലഞ്ഞി സെന്‍റ് ഫിലോമിനാസ് പബ്ലിക് സ്‌കൂള്‍ ആന്‍ഡ് ജൂണിയര്‍ കോളജ്, മൂവാറ്റുപുഴ നിര്‍മല എച്ച്എസ്എസ്, പോത്താനിക്കാട് സെന്‍റ് സേവ്യേഴ്‌സ് പബ്ലിക് സ്‌കൂള്‍, മൂവാറ്റുപുഴ നിര്‍മല പബ്ലിക് സ്‌കൂള്‍, വാഴക്കുളം കാര്‍മല്‍ പബ്ലിക് സ്‌കൂള്‍, കൂത്താട്ടുകുളം മേരിഗിരി പബ്ലിക് സ്‌കൂള്‍, വാഴക്കുളം ചാവറ ഇന്‍റര്‍നാഷണല്‍ അക്കാദമി, മേമടങ്ങ് സെന്‍റ് സെബാസ്റ്റ്യന്‍സ് എച്ച്എസ്, ആരക്കുഴ സെന്‍റ് മേരീസ് എച്ച്എസ്എസ്, ആയവന സേക്രഡ് ഹാര്‍ട്ട് എച്ച്എസ്എസ്, ആനിക്കാട് സെന്‍റ് സെബാസ്റ്റ്യന്‍സ് എച്ച്എസ്എസ്. കോതമംഗലം വിമലഗിരി പബ്ലിക് സ്‌കൂള്‍, പൈങ്ങോട്ടൂര്‍ സെന്‍റ് ജോസഫ് ഹയര്‍ സെക്കന്‍ഡറി സ്‌കൂള്‍, കോതമംഗലം സെന്‍റ് അഗസ്റ്റിന്‍സ് എച്ച്എസ്എസ്, കോതമംഗലം ശോഭന പബ്ലിക് സ്‌കൂള്‍, ശോഭന ഇംഗ്ലീഷ് മീഡിയം ഹൈസ്‌കൂള്‍, കോതമംഗലം സെന്‍റ് ജോര്‍ജ് എച്ച്എസ്എസ്.

വയോധികന് അഭയകേന്ദ്രമൊരുക്കി പിങ്ക് പോലീസ്

മൂവാറ്റുപുഴ : നിരാലംബനായ വയോധികന് അഭയ കേന്ദ്രമൊരുക്കി മൂവാറ്റുപുഴയിലെ പിങ്ക് പോലീസ്. ആലപ്പുഴ സ്വദേശിയായ കുമാര(91) നാണ് മൂവാറ്റുപുഴ സബ് ഡിവിഷനിലെ പിങ്ക് പോലീസ് എഎസ്ഐ റ്റി.ജെ. ഐസി മോൾ, സിപിഒ മേഖ എസ്. നായർ, എഎസ്ഐ സിന്ധു വേണു എന്നിവരുടെ നേതൃത്വത്തിൽ താമസസ്ഥലവും ഭക്ഷണവും ഒരുക്കി നൽകിയത്. ഒരു കാൽ മുറിച്ചു മാറ്റി കൃതൃമക്കാലുമായി മൂവാറ്റുപുഴ കെഎസ്ആർടിസി ബസ് സ്റ്റാൻഡിലൂടെ ഇരുന്നു നിരങ്ങി നീങ്ങിയ കുമാരൻ മൂവാറ്റുപുഴ പിങ്ക് പോലീസിന്‍റെ ശ്രദ്ധയിൽപ്പെടുകയായിരുന്നു. വിവരം അന്വേഷിച്ചപ്പോൾ സഹായത്തിന് ആരുമില്ലാതെ നിരാലംബനായി കഴിയുന്ന ആളാണെന്നും ഭക്ഷണവും താമസസ്ഥലവും ഒരുക്കി നൽകണമെന്നും ആവശ്യപ്പെടുകയുമായിരുന്നു. തുടർന്ന് പിങ്ക് പോലീസ് സംഘം മുളന്തുരുത്തി ബത്‌ലഹേം ജറിയാട്രിക് കെയർ ഹോം അധികൃതരെ ബന്ധപ്പെടുകയും മാനേജിംഗ് ട്രസ്റ്റി ഫാ. അനിലും സംഘവും മൂവാറ്റുപുഴയിലെത്തി വയോധികനെ ഏറ്റെടുക്കുകയും ചെയ്തു.

സമ്മാനമായി ലഭിച്ച സൈക്കിൾ നിർധന കുടുംബത്തിനു നല്കി വ്യാപാരി

കൂത്താട്ടുകുളം: സമ്മാനമായി ലഭിച്ച സൈക്കിൾ നിർധന കുടുംബത്തിന് നൽകി വ്യാപാരി മാതൃകയായി. കൂത്താട്ടുകുളം ടൗണിലെ വ്യാപാര സ്ഥാപനമായ മേക്കാട്ടിൽ ഗ്ലാസ് ഹൗസ് ഉടമ ലിജോയാണ് മാതൃക പരമായ പ്രവർത്തനം നടത്തിയത്. എഐവൈഎഫ് കൂത്താട്ടുകുളം മേഖല കമ്മിറ്റി സംഘടിപ്പിച്ച എം.സി. ചാക്കോ മെമ്മോറിയൽ ഫുട്ബോൾ ടൂർണമെന്‍റിന്‍റ ഭാഗമായി ഒരുക്കിയ സമ്മാനപദ്ധതിയിൽ നറുക്കെടുപ്പിലൂടെ ഒന്നാം സമ്മാനമായി ലഭിച്ച സൈക്കിളാണ് ലിജോ നിർധന കുടുംബത്തിന് നൽകിയത്. തനിക്ക് ലഭിച്ച സമ്മാനം അർഹതപ്പെട്ട മറ്റൊരാൾക്ക് നൽകാനുള്ള ആഗ്രഹം അദ്ദേഹം എഐവൈഎഫ് പ്രവർത്തകരെ അറിയിച്ചതിനെ തുടർന്ന് ചെള്ളക്കപ്പടിയിലുള്ള അനുയോജ്യമായ കുടുംബത്തെ കണ്ടെത്തി കൈമാറുകയായിരുന്നു. സിപിഐ ലോക്കൽ സെക്രട്ടറി ബിജോ പൗലോസ്, എഐവൈഎഫ് മേഖല സെക്രട്ടറി പി.എം. ഷൈൻ, ചെള്ളക്കപ്പടി ബ്രാഞ്ച് സെക്രട്ടറി ബാബു വര്ഗീസ്, എഐവൈഎഫ് യൂണിറ്റ് ഭാരവാഹികളായ എബിൻ ബാബു, ജിഷ്ണു അനിരുദ്ധ് തുടങ്ങിയവർ പങ്കെടുത്തു.

മൊബൈൽ ടവർ നിർമാണ കന്പനിയിൽ നിന്ന് യന്ത്രസാമഗ്രികൾ മോഷ്ടിച്ച യുവാവ് അറസ്റ്റിൽ

മൂവാറ്റുപുഴ: പായിപ്ര ഭാഗത്തെ മൊബൈൽ ടവർ നിർമാണ കന്പനിയിൽ നിന്ന് മൂന്നു ലക്ഷത്തോളം രൂപ വിലവരുന്ന യന്ത്രസാമഗ്രികൾ മോഷ്ടിച്ച കേസിൽ യുവാവ് അറസ്റ്റിൽ. മുളവൂർ പെരുമറ്റം കുളുമാരി ഭാഗത്ത് വാടകക്ക് താമസിക്കുന്ന തൊടുപുഴ വേങ്ങല്ലൂർ ഭാഗത്ത് ചെനക്കരക്കുന്നേൽ നിബുൻ അസീസി(വലിയ അപ്പു-38) വിനെയാണ് മുവാറ്റുപുഴ പോലീസ് ഇൻസ്പെക്ടർ ബേസിൽ തോമസിന്‍റെ നേതൃത്വത്തിൽ ആലപ്പുഴയിൽ നിന്നും അറസ്റ്റ് ചെയ്തത്. നാലു മാസം മുന്പാണ് നിബുൻ കാപ്പ കഴിഞ്ഞ് ജില്ലയിൽ പ്രവേശിച്ചത്. പ്രതിക്കെതിരെ പോലീസിനെ അപയപെടുത്താൻ ശ്രമിച്ചതിന് തൊടുപുഴ പോലീസ് സ്റ്റേഷനിൽ കേസ് ഉണ്ട്. നിലന്പൂർ, ധർമടം, കോതമംഗലം, തൊടുപുഴ, മുവാറ്റുപുഴ എന്നീ പോലീസ് സ്റ്റേഷനുകളിൽ നിരവധി മോഷണ, പിടിച്ചുപറി, അടിപിടി കേസുകളിൽ ഉൾപ്പെട്ടയാളാണ്. അന്വേഷണസംഘത്തിൽ എസ്ഐമാരായ വിഷ്ണു രാജു, പി.സി. ജയകുമാർ, സീനിയർ സിപിഒമാരായ എം. അജന്തി, കെ.എ. അനസ്, രഞ്ജിത് രാജൻ എന്നിവരാണ് ഉണ്ടായിരുന്നത്

ഫലവൃക്ഷത്തൈ നട്ട് ശ്രേഷ്ഠ കാതോലിക്ക

കോലഞ്ചേരി: ലോക പരിസ്ഥിതി ദിനത്തോടനുബന്ധിച്ച് യാക്കോബായ സുറിയാനി ഓർത്തഡോക്സ് സഭയുടെ ശ്രേഷ്ഠ കാതോലിക്കാ മാർ ബസേലിയോസ് ജോസഫ് ബാവ തിരുവാങ്കുളം ക്യംതാ സെമിനാരി അങ്കണത്തിൽ ഫലവൃക്ഷത്തൈ നട്ട് പരിസ്ഥിതി ദിനാചരണം നടത്തി. പ്രകൃതി സംരക്ഷണം ജീവിതശൈലിയായി മാറണമെന്നും പ്ലാസ്റ്റിക് മലിനീകരണം അവസാനിപ്പിക്കണമെന്നും യുവജനങ്ങൾ അതിനായി പ്രവർത്തിക്കണമെന്നും ശ്രേഷ്ഠ ബാവ കൂട്ടിച്ചേർത്തു. കൊച്ചി ഭദ്രാസന യൂത്ത് അസോസിയേഷന്‍റെ ആഭിമുഖ്യത്തിലായിരുന്നു പരിപാടി.

ഹരിത ശോഭയിൽ പരിസ്ഥിതി ദിനാചരണം

മൂവാറ്റുപുഴ: പരിസ്ഥിതി ദിനത്തോടനുബന്ധിച്ച് നാടെങ്ങും വിപുലമായ പരിപാടികൾ സംഘടിപ്പിച്ചു. മൂവാറ്റുപുഴ നിർമല ഹയർ സെക്കൻഡറി സ്കൂൾ വിദ്യാർഥികൾക്കായി നേച്ചർ ത്രൂ മൈ ലെൻസ് -ഫോട്ടോഗ്രാഫി മത്സരം, പോസ്റ്റർ പ്രദർശനം എന്നിവ സംഘടിപ്പിച്ചു. നേച്ചർ ക്ലബ്ബ്, സോഷ്യൽ സയൻസ് ക്ലബ് എന്നിവയുടെ ആഭിമുഖ്യത്തിലായിരുന്നു പരിപാടികളെന്ന് പ്രിൻസിപ്പൽ ഫാ. പോൾ ഇടതൊട്ടി പറഞ്ഞു. മത്സരങ്ങളിൽ നിന്ന് ലഭിച്ച ഫോട്ടോകളും, പോസ്റ്ററുകളും സ്കൂളിൽ പ്രദർശനത്തിനായും, സോഷ്യൽ മീഡിയ കാന്പയിനുകൾക്കായും ഉപയോഗിക്കുമെന്ന് വൈസ് പ്രിൻസിപ്പൽ ഫാ. ജോർജ് മാറാപ്പള്ളി അറിയിച്ചു. മൂവാറ്റുപുഴ വിമലഗിരി ഇന്‍റർനാഷണൽ സ്കൂളിൽ വിപുലമായ പരിപാടികളോടെ പരിസ്ഥിതി ദിനം ആചരിച്ചു. സ്കൂൾ മാനേജർ ഫാ. വർഗിസ്, പ്രിൻസിപ്പൽ ജയമോൾ, വിദ്യാർത്ഥി പ്രതിനിധികൾ എന്നിവർ പരിസ്ഥിതിദിന സന്ദേശം നൽകി. തുടർന്ന് കുട്ടികളും അധ്യാപകരും ചേർന്ന് സ്കൂൾ മുറ്റത്ത് വ്യക്ഷതൈ നട്ട് പരിസ്ഥിതിദിന പ്രതിജ്ഞ എടുത്തു. കോതമംഗലം: കോതമംഗലം നിയോജക മണ്ഡല തല ദിനാചരണം മാമലക്കണ്ടം ഗവ. ഹൈസ്കൂളിൽ വൃക്ഷത്തൈകൾ നട്ട് ആന്‍റണി ജോണ്‍ എംഎൽഎ ഉദ്ഘാടനം നിർവഹിച്ചു. കുട്ടന്പുഴ പഞ്ചായത്ത് പ്രസിഡന്‍റ് കാന്തി വെള്ളക്കയ്യൻ അധ്യക്ഷത വഹിച്ചു. ഇലഞ്ഞി: സെന്‍റ് ഫിലോമിനാസ് പബ്ലിക് സ്കൂൾ ആൻഡ് ജൂണിയർ കോളജിൽ ദിനാചരണത്തിന്‍റെ ഭാഗമായി പ്രകൃതി സംരക്ഷണ പ്രതിജ്ഞയും വൃക്ഷത്തൈ വിതരണവും നടന്നു. ‌ യോഗത്തിൽ കൂത്താട്ടുകുളം എസ്എച്ച്ഒ സഞ്ജു ജോസഫ് പരിപാടികൾ ഉദ്ഘാടനം ചെയ്തു. കൃഷി ഓഫീസർ എൽദോസ് ഏബ്രഹാം അധ്യക്ഷത വഹിച്ചു. ജേക്കബ് തുന്പയിൽ മുഖ്യപ്രഭാഷണം നടത്തി. മൂവാറ്റുപുഴ: രണ്ടാർ എസ്എബിറ്റിഎം സ്കൂൾ വിദ്യാർഥികൾ അഗ്രോ ഫാം സന്ദർശിച്ചു. പരിപാടി സ്കൂൾ മാനേജർ എം.എം. അലിയാർ ഉദ്ഘാടനം ചെയ്തു. പ്രധാനാധ്യാപിക എം.എ. ഫൗസിയ സന്ദേശം നൽകി. സിപിഐ മൂവാറ്റുപുഴ മണ്ഡലം കമ്മറ്റിയുടെ നേതൃത്വത്തിൽ വിദ്യാർത്ഥികൾക്ക് തുണി സഞ്ചി വിതരണം ചെയ്തു. മൂവാറ്റുപുഴ ടൗണ്‍ യുപി സ്കൂളിൽ നടന്ന ചടങ്ങിൽ സിപിഐ മണ്ഡലം സെക്രട്ടറി ജോളി പൊട്ടക്കൽ ഉദ്ഘാടനം ചെയ്തു. ടൗണ്‍ ലോക്കൽ സെക്രട്ടറി കെ.പി അലിക്കുഞ്ഞ് അധ്യക്ഷത വഹിച്ചു. പേഴയ്ക്കാപ്പിള്ളി ഗവ. ഹയർ സെക്കൻഡറി സ്കൂളിൽ പരിസ്ഥിതി പ്രവർത്തകയും കളമശേരി എസ്‌സിഎംഎസ് കോളജിലെ അസിസ്റ്റന്‍റ് പ്രഫസറുമായ ഡോ. എസ്. സൂര്യ ബാബു പരിസ്ഥിതിദിന പരിപാടികൾ ഉദ്ഘാടനം ചെയ്തു. സ്കൂൾ സയൻസ് ക്ലബ്ബ് പ്രവർത്തനങ്ങൾക്ക് തുടക്കം കുറിച്ചു. എസ്പിസിയുടെ നേതൃത്വത്തിൽ സ്കൂളിൽ നടന്ന റാലി പ്രധാനാധ്യാപിക സഫീന എ. ഫ്ലാഗ് ഓഫ് ചെയ്തു. പിടിഎ പ്രസിഡന്‍റ് എം.എസ് ഹസീന അധ്യക്ഷത വഹിച്ചു. സ്വതന്ത്ര കർഷക സംഘം മൂവാറ്റുപുഴ നിയോജകമണ്ഡലം കമ്മിറ്റി സംഘടിപ്പിച്ച ദിനാചരണം ലീഗ് സംസ്ഥാന സെക്രട്ടേറിയറ്റംഗം കെ.എം. അബ്ദുൽ മജീദ് ഉദ്ഘാടനം ചെയ്തു. നിയോജകമണ്ഡലം പ്രസിഡന്‍റ് അലി പായിപ്ര അധ്യക്ഷത വഹിച്ചു. സ്വതന്ത്ര കർഷക സംഘം സംസ്ഥാന ഉപാധ്യക്ഷൻ എം.എം അലിയാർ മുഖ്യപ്രഭാഷണം നടത്തി. നഗരസഭയുടെ ആഭിമുഖ്യത്തിൽ കുര്യൻമല ഔഷധ ഉദ്യാനത്തിൽ നഗരസഭാധ്യക്ഷൻ പി.പി എൽദോസ് ഔഷധ ചെടികൾ നട്ടു ഉദ്ഘാടനം ചെയ്തു. നഗരസഭാംഗം അമൽ ബാബു അധ്യക്ഷനായിരുന്നു. ബിജെപി എറണാകുളം ഈസ്റ്റ് കമ്മിറ്റിയുടെ ആഭിമുഖ്യത്തിൽ മൂവാറ്റുപുഴ വെള്ളൂർകുന്നം ശ്രീ മഹാദേവ ക്ഷേത്രത്തിൽ ഈസ്റ്റ് ജില്ലാ പ്രസിഡന്‍റ് പി.പി സജീവ് ഫലവൃക്ഷത്തൈ നട്ടു. എറണാകുളം ഈസ്റ്റ് ജില്ല ജനറൽ സെക്രട്ടറി അരുണ്‍ പി. മോഹൻ സംബന്ധിച്ചു. വൈസ് ഇന്‍റർനാഷണൽ മൂവാറ്റുപുഴ ടവേഴ്സ് ക്ലബും കെ.ടി ജേക്കബ് നഗർ റസിഡൻസ് അസോസിയേഷനും സംയുക്താഭിമുഖ്യത്തിൽ വ്യക്ഷത്തൈകൾ നട്ടു. ടവേഴ്സ് ക്ലബ് പ്രസിഡന്‍റ് ജോർജ് വെട്ടിക്കുഴി ഉദ്ഘാടനം ചെയ്തു. മൂവാറ്റുപുഴ ബ്ലോക്ക് പഞ്ചായത്ത് ഗ്രീൻ കേരള റൈഡ് സംഘടിപ്പിച്ചു. പൊതു യാത്രാ സൗകര്യം കൂടുതലായി ഉപയോഗിക്കുക, കാൽനട യാത്ര പ്രോത്സാഹിപ്പിക്കുക തുടങ്ങിയ സന്ദേശം പ്രചരിപ്പിക്കുന്നതിനാണ് ബ്ലോക്ക് പഞ്ചായത്തംഗങ്ങളും ജീവനക്കാരും മൂവാറ്റുപുഴ നെഹ്റു പാർക്കിൽ നിന്നും ബ്ലോക്കു പഞ്ചായത്തിലേക്ക് നടന്നെത്തിയത്. ബ്ലോക്ക് പഞ്ചായത്ത് പ്രസിഡന്‍റ് കെ.ജി. രാധാകൃഷ്ണൻ ഉദ്ഘാടനം ചെയ്തു. സ്ഥിരം സമിതി അധ്യക്ഷൻ ഷിവാഗോ തോമസ് അധ്യക്ഷത വഹിച്ചു. ജില്ലാ ലീഗൽ സർവീസസ് അഥോറിറ്റിയും മൂവാറ്റുപുഴ താലൂക്ക് ലീഗൽ സർവീസസ് കമ്മിറ്റിയും മൂവാറ്റുപുഴ ബാർ അസോസിയേഷനും സംയുക്തമായി ഫെഡറൽ ബാങ്കിന്‍റെ സഹകരണത്തോടെ മൂവാറ്റുപുഴ കോടതി സമുച്ചയത്തിൽ ലോക പരിസ്ഥിതി ദിനം ആചരിച്ചു. മൂവാറ്റുപുഴ പോക്സോ സ്പെഷൽ കോടതി ജില്ലാ ജഡ്ജി ജി. മഹേഷ് ഉദ്ഘാടനം നിർവഹിച്ചു. മൂവാറ്റുപുഴ ബാർ അസോസിയേഷൻ പ്രസിഡന്‍റ് ജോസ് വർഗീസ് സന്ദേശം നൽകി. ഗവ. ടിടിഐയിൽ സംഘടിപ്പിച്ച പരിപാ ടിയിൽ നഗരസഭാംഗം രാജശ്രീ രാജു വൃക്ഷത്തൈ നട്ടു. മൂവാറ്റുപുഴ വിദ്യാഭ്യാസ ജില്ലാ ഓഫീസ് പേഴ്സണൽ അസിസ്റ്റന്‍റ് ലനി വി. തരകൻ പരിസ്ഥിതി ദിന സന്ദേശം നൽകി. കോതമംഗലം : കവളങ്ങാട് പഞ്ചായത്ത് കൃഷിഭവന്‍റെ നേതൃത്വത്തിൽ നെല്ലിമറ്റം സെന്‍റ് ജോസഫ് യുപി സ്കൂളിൽ പഞ്ചായത്ത് തല പരിസ്ഥിതി ദിനാചരണം സംഘടിപ്പിച്ചു. ഫലവൃക്ഷത്തൈകൾ നട്ട് പഞ്ചായത്ത് പ്രസിഡന്‍റ് സിബി മാത്യു ഉദ്ഘാടനം ചെയ്തു. സ്കൂൾ മാനേജർ റവ. ഡോ. തോമസ് ജെ. പറയിടം അന്ത്യക്ഷത വഹിച്ചു. കോതമംഗലം സെന്‍റ് അഗസ്റ്റിൻസ് ഗേൾസ് ഹയർ സെക്കൻഡറി സ്കൂളിൽ നടന്ന ദിനാചരണം സർക്കിൾ ഇൻസ്പെക്ടർ പി.ടി. ബിജോയ് ഉദ്ഘാടനം ചെയ്തു. ലോക്കൽ മാനേജർ സിസ്റ്റർ പോൾസി അധ്യക്ഷത വഹിച്ചു. സ്കൂൾ കോന്പൗണ്ടിൽ, വൃക്ഷത്തൈ നടുകയും കുട്ടികൾക്ക് പച്ചക്കറി തൈകൾ വിതരണം ചെയ്യുകയും ചെയ്തു. വാഴക്കുളം : നീറന്പുഴ ഗവ. എൽപി സ്കൂളിൽ പരിസ്ഥിതി ദിനാചരണം പഞ്ചായത്ത് പ്രസിഡന്‍റ് ആൻസി ജോസ് പെരുന്പള്ളികുന്നേൽ ഉദ്ഘാടനം ചെയ്തു. എൽപി സ്കൂൾ പ്രധാനാധ്യാപിക സീനിയ അധ്യക്ഷത വഹിച്ചു. കോലഞ്ചേരി: വ്യാപാരി വ്യവസായി ഏകോപന സമിതി കോലഞ്ചേരി യൂണിറ്റ് യൂത്ത് വിംഗിന്‍റെ നേതൃത്വത്തിൽ മെഡിക്കൽ കോളേജ് ജംഗ്ഷനിൽ നടത്തിയ പരിപാടികോലഞ്ചേരി ഫസ്റ്റ് ക്ലാസ് ജുഡീഷ്യൽ മജിസ്ട്രേറ്റ് എൻ.എ. സിർഷ വൃക്ഷത്തൈ നട്ട് ഉദ്ഘാടനം ചെയ്തു. കോലഞ്ചേരി കോടതി ബാർ അസോസിയേഷൻ കോടതിക്ക് മുന്നിൽ പരിസ്ഥിതി ദിനം ആചരിച്ചു. മഴുവന്നൂർ എസ്ആർയുപി സ്കൂളിൽ ദിനാചരണം മഴുവന്നൂർ പഞ്ചായത്ത് അംഗം നിജ ബൈജു ഉദ്ഘാടനം ചെയ്തു. പോസ്റ്റർ രചന മത്സരം, പരിസ്ഥിതി ദിന ക്വിസ്, പരിസ്ഥിതി ദിനം മുന്നേറ്റം എന്ന വിഷയത്തിലെ രചന മത്സരം എന്നിവ നടത്തി. പിറവം: എംഎസ്എം ഐടിഐയിൽ നടന്ന പരിസ്ഥിതി ദിനാചരണം ഡയറക്ടർ ഫാ. വർഗീസ് മഠത്തിക്കുന്നത്ത് ഉദ്ഘാടനം ചെയ്തു. സെന്‍റ് ജോസഫ്സ് ഹൈസ്കൂൾ പ്രധാന അധ്യാ പിക ബ്രീസി, നീതു സോമൻ എന്നിവർ കുട്ടികൾക്ക് വൃക്ഷത്തൈകൾ വിതരണം ചെയ്തു.

പ്രതി പിടിയിൽ

വൈപ്പിൻ : കോടതിയുടെ സംരക്ഷണ ഉത്തരവ് നിലനിൽക്കെ ഭാര്യാ വീട്ടിൽ കയറി നാശനഷ്ടങ്ങൾ വരുത്തുകയും ഭാര്യയുടെ മാതാവിനു നേരെ വധഭീഷണി മുഴക്കുകയും ചെയ്ത ശേഷം ഒളിവിൽ പോയ പ്രതി അറസ്റ്റിൽ. അങ്കമാലി ശ്യാമള വിലാസം നടുവട്ടം ശ്യാമി(33)നെ ഞാറക്കൽ പോലീസ് ആണ് അറസ്റ്റ് ചെയ്തത്. ഞാറക്കൽ കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

ഹരിത കാമ്പയിനുമായി വിപിഎസ് ലേക്‌ഷോര്‍

കൊച്ചി: ലോക പരിസ്ഥിതി ദിനാചരണത്തോടനുബന്ധിച്ച് ആരോഗ്യകരമായ പരിസ്ഥിതി വളര്‍ത്തുക എന്ന ലക്ഷ്യത്തോടെ വിപിഎസ് ലേക്‌ഷോര്‍ ആശുപത്രി ഹരിത കാമ്പയിന്‍ "തണല്‍' ആരംഭിച്ചു. ഒരു വര്‍ഷത്തിനുള്ളില്‍ 1,000 മരങ്ങള്‍ നടുക എന്നതാണ് "തണല്‍' പദ്ധതി ലക്ഷ്യമിടുന്നത്. ലോക പരിസ്ഥിതി ദിനത്തില്‍ വിപിഎസ് ലേക്‌ഷോര്‍ ആശുപത്രി മാനേജിംഗ് ഡയറക്ടര്‍ എസ്.കെ. അബ്ദുള്ളയും സീനിയര്‍ ഡയറക്ടര്‍ കെ.വി. ജോണിയും ചേര്‍ന്ന് മരം നട്ടുകൊണ്ട് കാമ്പയിന്‍ ഉദ്ഘാടനം ചെയ്തു. ആശുപത്രി ജീവനക്കാര്‍ക്കും സന്ദര്‍ശകര്‍ക്കും തൈകള്‍ കൈമാറി.

ബ്രഹ്മപുരത്തെ പച്ചപ്പണിയിക്കാന്‍ വരാപ്പുഴ അതിരൂപതയുടെ വക രാമച്ചം തൈകള്‍

കൊച്ചി: ബയോമൈനിംഗിലൂടെ മാലിന്യക്കൂമ്പാരങ്ങള്‍ നീക്കിയ ബ്രഹ്മപുരത്ത് രാമച്ചം തൈകള്‍ നട്ട് പിടിപ്പിക്കാന്‍ കൊച്ചി കോര്‍പറേഷനുമായി കൈകോര്‍ത്ത് വരാപ്പുഴ അതിരൂപത. ലോകപരിസ്ഥിതി ദിനത്തോടനുബന്ധിച്ച് അതിരൂപത ആസ്ഥാനത്ത് നടന്ന ചടങ്ങില്‍ ആര്‍ച്ച്ബിഷപ് ഡോ. ജോസഫ് കളത്തിപ്പറമ്പില്‍ രാമച്ചം തൈകള്‍ മേയര്‍ അഡ്വ. എം. അനില്‍കുമാറിന് കൈമാറി. വരാപ്പുഴ അതിരൂപതയിലെ വിവിധ ഇടവകകളില്‍ നടത്തുന്ന പരിസ്ഥിതി പ്രവര്‍ത്തനങ്ങളുടെ അതിരൂപതതല ഉദ്ഘാടനവും മേയര്‍ നിര്‍വഹിച്ചു. ആര്‍ച്ച്ബിഷപ് കൈമാറിയ രാമച്ചംതൈകള്‍ ബ്രഹ്മപുരത്ത് നടും. മാലിന്യം ഒഴുകിയിറങ്ങിയ മണ്ണ് ശുദ്ധീകരിക്കുന്നതിന് രാമച്ചം തൈകള്‍ക്ക് കഴിയുമെന്നും മേയര്‍ പറഞ്ഞു. അതിരൂപതാ സഹായമെത്രാന്‍ ഡോ. ആന്‍റണി വാലുങ്കല്‍, വികാരി ജനറല്‍മാര്‍, ബിസിസി ഡയറക്ടര്‍ എന്നിവരും ചടങ്ങില്‍ പങ്കെടുത്തു.

ചാവറ ദർശൻ പബ്ലിക് സ്കൂളിൽ

കൊച്ചി: കൂനമ്മാവ് ചാവറ ദര്‍ശന്‍ സിഎംഐ പബ്ലിക് സ്‌കൂള്‍ നേച്വര്‍ ക്ലബിന്‍റെ ആഭിമുഖ്യത്തില്‍ പരിസ്ഥിതി ദിനാചരണം നടത്തി. കോട്ടുവള്ളി ഗ്രാമപഞ്ചായത്ത് പ്രസിഡന്‍റ് കെ.എസ്. ഷാജി, കൃഷി ഓഫീസര്‍ ബേസില്‍ ചാക്കോച്ചന് വൃക്ഷത്തൈ സമ്മാനിച്ചുകൊണ്ട് ഉദ്ഘാടനം ചെയ്തു. സ്‌കൂള്‍ മാനേജരും പ്രിന്‍സിപ്പലുമായ ഫാ. മാര്‍ട്ടിന്‍ മുണ്ടാടന്‍ അധ്യക്ഷത വഹിച്ചു. അധ്യാപകരും വിദ്യാര്‍ഥികളും ചേര്‍ന്നൊരുക്കിയ വ്യത്യസ്ത പഴവര്‍ഗങ്ങളുടെയും വിത്തുകളുടെയും പ്രദര്‍ശനവും ഒരുക്കി. യോഗത്തില്‍ പ്രകൃതിസംരക്ഷണ പ്രതിജ്ഞ എല്ലാവരും ഏറ്റുചൊല്ലി. വൈസ് പ്രിന്‍സിപ്പല്‍ ഫാ. മെജിറ്റ് വട്ടോലി, അഡ്മിനിസ്‌ട്രേറ്റര്‍ ഫാ. ജോബി കോഴിക്കോട്ട്, അക്കാഡമിക് കോ-ഓര്‍ഡിനേറ്റര്‍ അനില അലക്‌സാണ്ടര്‍, ഹെഡ്മിസ്ട്രസ് പി.ജെ. അല്‍ഫോന്‍സ, കോട്ടുവള്ളി ഗ്രാമപഞ്ചായത്ത് സ്റ്റാന്‍ഡിംഗ് കമ്മറ്റി ചെയര്‍മാന്‍ ബിജു പഴമ്പിള്ളി, പിടിഎ പ്രസിഡന്‍റ് ജോസഫ് ജോണ്‍, അധ്യാപക കോ-ഓര്‍ഡിനേറ്റര്‍മാരായ കെ.എ.അനിത, സിത്താര ജോസഫ് എന്നിവര്‍ പ്രസംഗിച്ചു.

അങ്കമാലി ഡിസ്റ്റിൽ

അങ്കമാലി : പരിസ്ഥിതി ദിനാചരണത്തിന്‍റെ ഭാഗമായി അങ്കമാലി ഡിപോൾ ഇൻസ്റ്റിറ്റ്യൂട്ട് ഓഫ് സയൻസ് ആൻഡ് ടെക്നോളജിയിലെ സോഷ്യൽ വർക്ക്‌ വിഭാഗത്തിന്‍റെ സ്റ്റുഡന്‍റ്സ് അസോസിയേഷൻ ഓഫ് സോഷ്യൽ വർക്ക്, കെ സ്വാംപ്, ഹരിത കർമ സേന എന്നിവ സംയുക്തമായി പരിസ്ഥിതി ദിനചാരണ പരിപാടി സംഘടിപ്പിച്ചു. ഡിസ്റ്റ് വൈസ് പ്രിൻസിപ്പൽ ഫാ. ജോസഫ് തടത്തിൽ ദിനാചരണം ഉദ്ഘാടനം ചെയ്തു.സോഷൽ വർക്ക് വിഭാഗം എച്ച്ഓഡി ഡോ. എം.എസ്. അനീഷ് അധ്യക്ഷത വഹിച്ചു. പ്രധാന അതിഥിയായി ഹരിതകർമ സേനയുടെ അങ്കമാലി വിഭാഗം സെക്രട്ടറി ലിനി രാജേഷും അംഗങ്ങളായ വൽസ മാർട്ടിനും റോസ്‌ലി ബെന്നിയും പങ്കെടുത്തു.

രാജഗിരി സ്‌കൂളിൽ

കൊച്ചി: കളമശേരി രാജഗിരി ഹയര്‍ സെക്കന്‍ഡറി സ്‌കൂളില്‍ പരിസ്ഥിതി ദിനം വിവിധ പരിപാടികളോടെ ആചരിച്ചു. സബ് കളക്ടര്‍ കെ. മീര വിശിഷ്ട അതിഥിയായി. 2024-25 അധ്യയന വര്‍ഷത്തില്‍ മികച്ച പ്രകടനം കാഴ്ചവച്ച എയ്ഞ്ചല്‍ മരിയ പയസ് പ്രകൃതിദത്തമായ തുണി സഞ്ചികള്‍ കൈമാറി. രാജഗിരി ഹയര്‍സെക്കന്‍ഡറി സ്‌കൂള്‍ ഹരിതഗിരി പദ്ധതിയുടെ ഭാഗമായി നടത്തിയ ഗ്രീന്‍ ഹാര്‍വെസ്റ്റിംഗ് ചലഞ്ചില്‍ അടുക്കളത്തോട്ടം ഒരുക്കല്‍ പരിപാടിയില്‍ വിജയികളായവര്‍ക്ക് സബ് കളക്ടര്‍ സമ്മാനവിതരണം നടത്തി. മികച്ച പ്രകടനം കാഴ്ചവച്ച ചാവറദര്‍ശന്‍ സിഎംഐ പബ്ലിക് സ്‌കൂള്‍ അധ്യാപിക കെ.എ. അനിതയെ ആദരിച്ചു. രാജഗിരി ഹയര്‍സെക്കന്‍ഡറി സ്‌കൂള്‍ പ്രിന്‍സിപ്പല്‍ ഫാ. ടോമി കൊച്ചെലഞ്ഞിക്കല്‍, സ്‌കൂള്‍ അഡ്മിനിസ്‌ട്രേറ്റര്‍ ഫാ. ജോസിവടക്കേ ആക്കയില്‍, സീനിയര്‍ കോ-ഓര്‍ഡിനേറ്റര്‍ കെ.എ. ജോസ്, എല്‍പി കോ-ഓര്‍ഡിനേറ്റര്‍ ഡോ. ജെം ജോസ് എന്നിവര്‍ ചടങ്ങില്‍ പങ്കെടുത്തു.

പച്ചപ്പകിട്ടിൽ പരിസ്ഥിതി ദിനാചരണം

കൊച്ചി: ജില്ലയില്‍ വിവിധ സംഘടനകളുടെയും സ്ഥാപനങ്ങളുടെയും നേതൃത്വത്തില്‍ പരിസ്ഥിതി ദിനം ആചരിച്ചു. കലൂര്‍ സെന്‍റ് അഗസ്റ്റിന്‍സ് ഹൈസ്‌ക്കൂളില്‍ നടന്ന പരിസ്ഥിതി ദിനാചരണ പരിപാടിയില്‍ അധ്യാപകരും വിദ്യാര്‍ഥികളും ചേര്‍ന്ന് വൃക്ഷത്തെകള്‍ നട്ടു. പൂര്‍വ വിദ്യാര്‍ഥി സംഘടനാ പ്രസിഡന്‍റ് സി.ജി. രാജഗോപാല്‍ പരിസ്ഥിതി സന്ദേശം നല്‍കി. എറണാകുളം നോര്‍ത്ത് എസ്‌ഐ പി.പി. റെജി ബോധവത്കരണ ക്ലാസ് നയിച്ചു. വൃക്ഷത്തൈകള്‍ക്ക് സാഹിത്യ, സാംസ്‌ക്കാരിക നായകരുടെ പേരുകളാണ് നല്‍കിയിരിക്കുന്നത്. മരട് നഗരസഭ 16-ാം ഡിവിഷനിലെ പച്ചത്തുരുത്തില്‍ വൃക്ഷത്തൈകള്‍ നടുന്ന പരിപാടി നഗരസഭാ അധ്യക്ഷന്‍ ആന്‍റണി ആശാംപറമ്പില്‍ ഉദ്ഘാടനം ചെയ്തു. മാവ്, പ്ലാവ്, പേര, ഞാവല്‍, അമ്പഴം, നെല്ലി, ചാമ്പ, സപ്പോട്ട തുടങ്ങിയ ഫലവൃക്ഷങ്ങളാണ് വച്ചുപിടിപ്പിച്ചത്. ഹരിതകേരളം മിഷന്‍റെ ആഭിമുഖ്യത്തില്‍ തദ്ദേശ സ്ഥാപനങ്ങളുമായി ചേര്‍ന്ന് നടപ്പാക്കുന്ന പച്ചത്തുരുത്തു നിര്‍മാണം സിവില്‍ സ്‌റ്റേഷനില്‍ വൃക്ഷത്തൈ നട്ട് ജില്ലാ കളക്ടര്‍ എന്‍.എസ്.കെ. ഉമേഷ് ഉദ്ഘാടനം ചെയ്തു. സിവില്‍ സ്‌റ്റേഷനില്‍ തരിശായി കിടന്ന നാല് സെന്‍റ് വൃത്തിയാക്കിയാണ് പച്ചത്തുരുത്ത് നിര്‍മിക്കുന്നത്. പരിസ്ഥിതി ദിനത്തിന്‍റെ ഭാഗമായി പാതയോരങ്ങളില്‍ കണിക്കൊന്ന നട്ടുവളര്‍ത്തുന്ന പദ്ധതിക്ക് തുടക്കമിട്ട് കൊച്ചി കേന്ദ്രമായി പ്രവര്‍ത്തിക്കുന്ന സൗഹൃദ കൂട്ടായ്മയായ ഹാപ്പിനസ് സര്‍ക്കിള്‍. ആനന്ദകര്‍ണികാരം 2025 എന്ന പേരില്‍ കണ്ടെയ്‌നര്‍ റോഡില്‍ തുടക്കമിടുന്ന പദ്ധതി ഹൈബി ഈഡന്‍ എംപി ഉദ്ഘാടനം ചെയ്തു. അങ്കമാലി നഗരസഭയിലെ വിവിധ സര്‍ക്കാര്‍, എയ്ഡഡ് വിദ്യാലയങ്ങളില്‍ നഗരസഭയുടെ ആഭിമുഖ്യത്തില്‍ പരിസ്ഥിതി ദിനാചരണത്തിന്‍റെ ഭാഗമായി വൃക്ഷത്തൈകൾ നട്ടു. എംജിഎം ജിഎച്ച്എസ് സ്കൂളില്‍ ഫലവൃക്ഷ തൈകള്‍ നട്ടുകൊണ്ട് നഗരസഭ ചെയര്‍മാന്‍ അഡ്വ.ഷിയോ പോള്‍ ഉദ്ഘാടനം നിര്‍വഹിച്ചു. ഡെപ്യൂട്ടി ചെയര്‍പേഴ്സണ്‍ സിനി മനോജ് അധ്യക്ഷയായി. ഗവ. എല്‍പിഎസ് കോതകുളങ്ങരയില്‍ സ്ഥിരം സമിതി അധ്യക്ഷ ജിത ഷിജോയ്, പീച്ചാനിക്കാട് ഗവ. യുപി സ്കൂളിൽ‍ മനു നാരായണന്‍, ഹോളി ഫാമിലി സ്കൂളില്‍ ലക്സി ജോയി, സെന്‍റ് ജോസഫ് സ്കൂളില്‍ പോള്‍ ജോവർ, സെന്‍റ് ആന്‍റണീസ് സ്കൂളില്‍ ഷൈനി മാര്‍ട്ടിന്‍ എന്നിവരും ഫലവൃക്ഷ തൈ നട്ടുകൊണ്ട് ഉദ്ഘാടനം നിര്‍വഹിച്ചു. മലയാറ്റൂർ - നിലീശ്വരം ഗ്രാമ പഞ്ചായത്തിലെ ഇല്ലിത്തോട് ഗവൺമെന്‍റ് യുപി സ്കൂളിൽ മാത്രം 17 വാർഡുകളെ പ്രതിനിധികരിച്ച് 17 ഫലവൃക്ഷത്തൈകൾ നട്ടു പഞ്ചായത്ത് പ്രസിഡന്‍റ് ജോയി അവോക്കാരൻ ഉദ്ഘാടനം ചെയ്തു. കാർമൽ നഴ്സിംഗ് കോളജ് വിദ്യാർഥികൾ ആലുവ റെയിൽവേ സ്റ്റേഷനിൽ ഫ്ലാഷ് മോബും പ്ലാസ്റ്റിക് അമിതോപയോഗത്തിനെതിരെ ദൃശ്യാവിഷ്കാരവും നടത്തി. ഡെപ്യൂട്ടി എസ്എംആർ വിഷ്ണു ഉദ്ഘാടനം ചെയ്തു. സൂര്യ കൃഷ്ണ,സിസ്റ്റർ ജോയ്‌സ് മരിയ സിഎംസി, സിസ്റ്റർ അനില എന്നിവർ പ്രസംഗിച്ചു. ആലുവ യുസി കോളജിൽ കലാലയം വൃത്തിയാക്കിയും ആയിരം മരങ്ങൾ നടുന്ന പദ്ധതിയ്ക്ക് തുടക്കമിട്ടും വിദ്യാർഥികൾ പരിസ്ഥിതിദിനം ആചരിച്ചു. കാമ്പസിൽ 15 സെന്‍റിൽ നടപ്പിലാക്കുന്ന പദ്ധതി ഫാ. ബോബി ജോസ് കട്ടിക്കാട് ഉദ്ഘാടനം ചെയ്തു. സുവർണ ഉദ്യാനം പദ്ധതി ആരംഭിച്ചു നെടുമ്പാശേരി : വിവിധയിനം ഫലവൃക്ഷങ്ങൾ ഓരോ വീട്ടിലും കൃഷി ചെയ്യുന്നതിനായി നെടുമ്പാശേരിയിൽ മർക്കന്‍റെയിൽ സൊസൈറ്റിയുടെ നേതൃത്വത്തിൽ സുവർണ ഉദ്യാനം പദ്ധതി ആരംഭിച്ചു. മാങ്കോസ്റ്റിൻ,ബനാന ചിക്കു, മാതളം,നിരവധി ഇനം മാവുകൾ,ചാമ്പ തുടങ്ങിയ ഫലവൃക്ഷങ്ങളുടെ തൈകളാണ് വിവിധ സംഘടനകളുടെ സഹകരണത്തോടെ അംഗങ്ങൾക്ക് നൽകിക്കൊണ്ട് സുവർണ ഉദ്യാനം പദ്ധതിക്ക് മർക്കന്‍റെയിൽ സൊസൈറ്റി തുടക്കം കുറിച്ചിരിക്കുന്നത്. സുവർണ ഉദ്യാനം പദ്ധതിയുടെ ഉദ്ഘാടനവും ഔഷധഫല വൃക്ഷങ്ങളുടെ വിതരണവും കേരള വ്യാപാരി വ്യവസായി ഏകോപന സമിതി സംസ്ഥാന സെക്രട്ടറി അഡ്വ. എ.ജെ.റിയാസ് നിർവഹിച്ചു. സൊസൈറ്റി പ്രസിഡന്‍റ് സി.പി. തരിയൻ അധ്യക്ഷനായി.

എൽഎസ്എസ് വിജയികൾക്ക് സമ്മാനമായി വിമാനയാത്ര

മട്ടാഞ്ചേരി : സംസ്ഥാന സർക്കാരിന്‍റെ ലോവർ സെക്കൻഡറി സ്കോളർഷിപ് കരസ്ഥമാക്കിയ വിദ്യാർഥികൾക്ക് സമ്മാനമായി സൗജന്യ വിമാന യാത്ര. പനയപ്പിള്ളി എംഎം എൽപി സ്കൂളിൽ ഈ വർഷം എൽഎസ്എസ് നേടിയ അഞ്ച് വിദ്യാർഥികൾക്കാണ് സമ്മാനമായി വിമാനയാത്രയ്ക്ക് ഭാഗ്യം ലഭിച്ചത്. എഫ്. ആലിയ പർവീൺ, എം.ആർ. ഇഫ്രത്ത് പർവീൺ, എ. ആയിഷ, പി.എസ്. ഇശാൻ മുഹമ്മദ്, എ.ആർ. മുഹമ്മദ് ഹുസൈഫ് അബ്ദുല്ല എന്നിവരാണ് എൽഎസ്എസ് നേടിയത്. സ്കൂൾ അധികൃതരാണ് യാത്രയ്ക്കുള്ള സ്പോൺസർമാരെ കണ്ടെത്തിയത്. കൊച്ചി നഗരസഭ വിദ്യാഭ്യാസ- കായിക സ്ഥിരം സമിതി അധ്യക്ഷൻ വി.എ. ശ്രീജിത്ത് വിദ്യാർഥികൾക്ക് വിമാന ടിക്കറ്റ് സമ്മാനിച്ചു. സ്കൂൾ മാനേജർ സിയാദ് ഹുസൈൻ അധ്യക്ഷത വഹിച്ചു. കൗൺസിലർ എം. ഹബീബുള്ള , വിഎച്ച്എസ്ഇ പ്രിൻസിപ്പൽ മമത, ഹൈസ്കൂൾ പ്രധാനാധ്യാപിക വി.എ. ഷൈൻ തുടങ്ങിയവർ സംസാരിച്ചു.

ശ്രേഷ്ഠ ബാവയ്ക്ക് എറണാകുളം പൗരാവലിയുടെ സ്വീകരണം ഇന്ന്

കൊച്ചി: യാക്കോബായ സുറിയാനി ഓര്‍ത്തഡോക്‌സ് സഭയുടെ ശ്രേഷ്ഠ കാതോലിക്ക മാര്‍ ബസേലിയോസ് ജോസഫ് ബാവയ്ക്ക് കൊച്ചി കോർപറേഷന്‍റെയും എറണാകുളം പൗരാവലിയുടെയും നേതൃത്വത്തില്‍ ഇന്ന് സ്വീകരണവും അനുമോദനവും നല്‍കും. വൈകുന്നേരം 4.30ന് എറണാകുളം ടൗണ്‍ ഹാളില്‍ നടക്കുന്ന ചടങ്ങ് മന്ത്രി പി. രാജീവ് ഉദ്ഘാടനം ചെയ്യും. കൊച്ചി മേയര്‍ അഡ്വ.എം.അനില്‍ കുമാര്‍ അധ്യക്ഷത വഹിക്കും. ഹൈബി ഈഡന്‍ എംപി ഉപഹാരം സമര്‍പ്പിക്കും. കര്‍ദിനാള്‍ മാര്‍ ജോര്‍ജ് ആലഞ്ചേരി അനുഗ്രഹ പ്രഭാഷണവും പ്രഫ. എം.കെ. സാനു മാസ്റ്റര്‍ മുഖ്യ പ്രഭാഷണവും നടത്തും. പ്രോഗ്രാം കമ്മിറ്റി ജനറല്‍ കണ്‍വീനര്‍ ടി.ജെ. വിനോദ് എംഎല്‍എ, വരാപ്പുഴ അതിരൂപത സഹായ മെത്രാന്‍ ഡോ. ആന്‍റണി വാലുങ്കല്‍, ശാന്തിഗിരി ആശ്രമം ജനറല്‍ സെക്രട്ടറി സ്വാമി ഗുരുരത്‌നം ജ്ഞാന തപസ്വി, എറണാകുളം സെന്‍ട്രല്‍ ജുമാ മസ്ജിദ് ചീഫ് ഇമാം മുഹമ്മദ് അര്‍ഷദ് അല്‍ ബദ്‌രി വടുതല, എറണാകുളം കരയോഗം ജനറല്‍ സെക്രട്ടറി പി. രാമചന്ദ്രന്‍ (വേണു), കൊച്ചി ഡെപ്യൂട്ടി മേയര്‍ കെ.എ. അന്‍സിയ എന്നിവര്‍ പ്രസംഗിക്കും.

ആലുവ നഗരസഭയിലെ ജലധാര അഴിമതി : ജലധാര വറ്റിച്ച് വിജിലൻസ് പരിശോധന

ആലുവ: ആലുവ നഗരസഭ ആസ്ഥാനത്തിന് മുന്നിലുള്ള ജലധാര പുനർനിർമാണ കേസിൽ വിജിലൻസ് റെയ്ഡ് നടന്നു. ബന്ധപ്പെട്ട രേഖകൾ പിടിച്ചെടുത്തത് കൂടാതെ ജലധാര വറ്റിച്ച് വിസ്തീർണം, ഉപയോഗിച്ച നിർമാണ വസ്തുക്കൾ എന്നിവയുടെ എസ്റ്റിമേറ്റും എടുത്തു. ഇന്നലെ രാവിലെ മധ്യമേഖലാ വിജിലൻസ് ഡിവൈഎസ്പി തോമസ് ജോർജിന്‍റെ നേതൃത്വത്തിലുള്ള സംഘമാണ് ആലുവ മുനിസിപ്പൽ ഓഫീസിൽ എത്തിയത്. 5.46 അടി ആഴമുള്ള ജലധാരയിലെ ഒരു ലക്ഷം ലിറ്റർ ജലം മോട്ടർ ഉപയോഗിച്ച് പമ്പ് ചെയ്ത് പുറത്തു കളഞ്ഞാണ് വൈകിട്ടോടെ പരിശോധന നടത്തിയത്. നിർമാണ സമയത്ത് നഗരസഭാ എൻജിനീയറായിരുന്ന ഐശ്വര്യ സിംഗും ഹാജരായിരുന്നു. എന്നാൽ ജനപ്രതിനിധികളും എൻജിനീയർമാരും രാവിലെ എത്തിയില്ല. സിഎംആർഎല്ലും നഗരസഭയും തമ്മിൽ നടത്തിയ കത്തിടപാടുകളുടെ ഫയലും കാണാനില്ലെന്നാണ് സൂചന. ഇതേ കേസ് ഓംബുഡ്സ്മാൻ സിറ്റിംഗിലും വന്നപ്പോൾ നഗരസഭയുടെ കത്തുകൾ കണ്ടെത്താനായില്ല. കരാർ രേഖകളും കാണാനില്ല. എന്നാൽ നഗരസഭ ആവശ്യപ്പെട്ട പ്രകാരം കരാറുകാരന് ചെക്ക് നൽകിയ രേഖകൾ സിഎംആർഎൽ കൈമാറിയിട്ടുണ്ട്. മെക്കാനിക്കൽ, ഇലക്ട്രിക്കൽ, പ്ലന്പിംഗ് ജോലികൾ സിഎംആർഎൽ നൽകിയ സിഎസ്ആർ ഫണ്ട് ഉപയോഗിച്ചെന്നാണ് കണ്ടെത്തിയിരിക്കുന്നത്. ഉദ്ഘാടന ചടങ്ങലും കമ്പനി പ്രതിനിധി പങ്കെടുത്തു. എന്നാൽ ഇത്തരമൊരു പണമിടപാടിനെക്കുറിച്ച് കൗൺസിൽ യോഗങ്ങളിൽ പരാമർശിച്ചിട്ടില്ല. 2021 ആഗസ്റ്റിൽ ഉദ്ഘാടനം ചെയ്ത ജലധാരയുടെ നവീകരണത്തിന് ഏഴു ലക്ഷം രൂപ സിഎംആർഎൽ കമ്പനിയാണ് നൽകിയത്. എന്നാൽ തനത് ഫണ്ട് എന്ന രീതിയിൽ ഏഴ് ലക്ഷം രൂപ നഗരസഭ എൻജിനീയറിംഗ് വിഭാഗം എഴുതിയെടുക്കുകയും ചെയ്തു. ഇരട്ട ബില്ലിംഗ് നടന്നതിനെതിരെ പൊതുപ്രവർത്തകനായ ആർ. പത്മകുമാറാണ് പരാതി നൽകിയത്.

അസീസി സ്നേഹാലയത്തിന് വാട്ടർ ഡിസ്പെൻസർ നൽകി

കോതമംഗലം: കോഴിപ്പിള്ളി ആരാധനാ ഭവൻ പ്രദേശത്തെ കുടുംബങ്ങൾ ചേർന്ന് 30 ഓളം അന്തേവാസികളുള്ള കോഴിപ്പിള്ളി അസീസി സ്നേഹാലയത്തിന് വാട്ടർ ഡിസ്പെൻസർ വാങ്ങി നൽകി. സ്നേഹലായത്തിൽ നടന്ന ചടങ്ങിൽ ആന്‍റണി തൂമുള്ളിൽ ഡിസ്പെൻസർ സിസ്റ്റർ ആൻസിക്ക് കൈമാറി. ഷാജു കല്യാടിക്കൽ, സണ്ണി ഇലഞ്ഞിക്കൽ, തോമസ് പുല്ലൻ, ജോസ് കോട്ടക്കൽ, ഇമ്മാനുവൽ തൂമുള്ളിൽ, റോസിലി പോത്താനിക്കാട്, മോളി തൂമുള്ളിൽ, പൗളിൻ പേയ്ക്കൽ, റോസിലി ചുള്ളിയിൽ, സാറാമ്മ തൂമുള്ളിൽ, സെലിൻ പനച്ചിക്കുടി എന്നിവർ പങ്കെടുത്തു.

സിവിൽ സർവീസ് അക്കാദമി പുനരാരംഭിക്കണമെന്ന്

മൂവാറ്റുപുഴ: മൂവാറ്റുപുഴയ്ക്ക് നഷ്ടമായ സിവിൽ സർവീസ് അക്കാദമി പുനരാരംഭിക്കാൻ സംസ്ഥാന സർക്കാർ ഇടപെടണമെന്ന് സിപിഐ മൂവാറ്റുപുഴ മണ്ഡലം സമ്മേളനം ആവശ്യപ്പെട്ടു. മൂവാറ്റുപുഴയുടെ സ്വപ്ന പദ്ധതിയായ നഗരവികസനവും മുറിക്കൽ ബൈപാസും വേഗത്തിൽ പൂർത്തിയാക്കണമെന്നും വെള്ളപൊക്ക ഭീഷണിക്ക് പരിഹാരം കാണാൻ മൂവാറ്റുപുഴയാറിന് ആഴം കൂട്ടാൻ മണൽ വാരൽ പുനരാരംഭിക്കണമെന്നും സമ്മേളനം ആവശ്യപ്പെട്ടു. സമ്മേളനം 24 അംഗ ജില്ലാ സമ്മേളന പ്രതിനിധികളെയും, 25 അംഗ മണ്ഡലം കമ്മിറ്റിയെയും സമ്മേളനം തെരഞ്ഞെടുത്തു. ജോളി പൊട്ടയ്ക്കലാണ് മണ്ഡലം സെക്രട്ടറി.

വിദ്യാർഥികൾക്ക് അനുമോദനം

കോതമംഗലം: നഗരസഭാ 28-ാം വാർഡിൽ എസ്എസ്എൽസി, പ്ലസ്ടു പരീക്ഷകളിൽ വിജയികളായ കുട്ടികൾക്കുള്ള അനുമോദനവും പഠനോപകരണ വിതരണവും നടത്തി. വെണ്ടുവഴി സണ്‍ഡേ സ്കൂൾ ഹാളിൽ സംഘടിപ്പിച്ച അനുമോദന ചടങ്ങിൽ ആന്‍റണി ജോണ്‍ എംഎൽഎ ഉദ്ഘാടനവും അവാർഡ് ദാനവും നിർവഹിച്ചു. കോതമംഗലം നഗരസഭാ വൈസ് ചെയർപേഴ്സണ്‍ സിന്ധു ഗണേശൻ പഠനോപകരണ വിതരണം നടത്തി. വടക്കേ വെണ്ടുവഴി അങ്കണവാടിയിൽ നിന്നും പഠനം പൂർത്തിയാക്കി പുറത്തിറങ്ങിയ കുട്ടികൾക്ക് മെമന്‍റോയും സർട്ടിഫിക്കറ്റും വിതരണം ചെയ്തു. അസി. എക്സൈസ് ഇൻസ്പെക്ടർ കെ. വിൽസണ്‍ ലഹരിവിരുദ്ധ ബോധവത്കരണ ക്ലാസ് നടത്തി. വാർഡ് കൗണ്‍സിലർ ബിൻസി തങ്കച്ചൻ അധ്യക്ഷത വഹിച്ചു. അങ്കണവാടി അധ്യാപിക ഡെയ്സി ജോണ്‍, സിജു തോമസ് എന്നിവർ പ്രസംഗിച്ചു.

ഫുട്ബോളാണ് തന്‍റെ ലഹരിയെന്ന് ഐ.എം. വിജയൻ

മൂവാറ്റുപുഴ: ഫുട്ബോളാണ് തന്‍റെ ലഹരിയെന്ന് ഫുട്ബോൾ മാന്ത്രികൻ ഐ.എം. വിജയൻ. മൂവാറ്റുപുഴ എസ്എൻഡിപി ഹയർ സെക്കൻഡറി സ്കൂളിൽനിന്ന് കഴിഞ്ഞ അദ്ധ്യായന വർഷത്തിൽ ഉന്നത വിജയം നേടിയ വിദ്യാർഥികൾക്ക് കുമാരനാശാൻ പബ്ലിക് ലൈബ്രറിയുടെ സഹകരണത്തോടെ അജു ഫൗണ്ടേഷൻ നൽകുന്ന പുരസ്കാര സമർപ്പണം ഉദ്ഘാടനം ചെയ്യുകയായിരുന്നു അദ്ദേഹം. പഠിക്കാൻ പിന്നാക്കമായിരുന്ന ഞാൻ ഫുട്ബോളിൽ എന്നും മുന്നോക്കത്തിൽ മുന്നോക്കമായിരുന്നു. സ്പോട്സ് ലഹരിയുടെ വാതിൽ മലർക്കെ തുറന്നാൽ ജയിലുകളുടെ വാതിലുകൾ അടച്ചിടേണ്ടിവരുമെന്നും ഐ.എം. വിജയൻ പറഞ്ഞു. എസ്എൻഡിപി എച്ച്എസ് എസ് മാനേജർ വി.കെ. നാരായണൻ അധ്യക്ഷത വഹിച്ചു. സിപിഎം ഏരിയ സെക്രട്ടറി അനീഷ് എം. മാത്യു മുഖ്യപ്രഭാഷണം നടത്തി. കേരള ബാങ്ക് പ്രസിഡന്‍റ് ഗോപി കോട്ടമുറിക്കൽ ലഹരിവിരുദ്ധ സന്ദേശം നൽകി. അജു ഫൗണ്ടേഷൻ ജനറൽ സെക്രട്ടറി പ്രമോദ് കെ. തന്പാൻ, ഡയറക്ടർമാരായ ടി.എസ്. റഷീദ്, അജേഷ് കോട്ടമുറിക്കൽ, സി.കെ. ഉണ്ണി തുടങ്ങിയവർ പ്രസംഗിച്ചു.

ശബരി പാതയ്ക്ക് അനുമതി : പ്രതീക്ഷയോടെ സ്ഥലം വിട്ടുനൽകിയ കുടുംബങ്ങൾ

മൂവാറ്റുപുഴ: ശബരി പാതയ്ക്ക് കേന്ദ്ര സർക്കാർ അനുമതി നൽകിയതോടെ റെയിൽ പാതയ്ക്കു വേണ്ടി സ്ഥലം വിട്ടുനൽകിയ നൂറുകണക്കിന് കുടുംബങ്ങൾക്ക് വീണ്ടും പ്രതീക്ഷയുടെ ചിറകുമുളച്ചു. കേന്ദ്രാ സർക്കാർ തീരുമാനം പാഴ് പ്രഖ്യാപനമായി മാറരുതെയെന്ന പ്രാർഥനയാണ് മൂവാറ്റുപുഴ കിഴക്കേക്കരയടക്കമുള്ള പ്രദേശങ്ങളിലെ കുടുംബങ്ങൾക്ക്. രണ്ട് പതിറ്റാണ്ടു മുമ്പ് ഏറെ പ്രതീക്ഷയോടെ റെയിൽ പാതയ്ക്കു വേണ്ടി സ്ഥലം വിട്ടുനൽകിയ നിരവധി കുടുംബങ്ങളാണുള്ളത്. മൂവാറ്റുപുഴയിൽ റെയിൽവേ സ്റ്റേഷനായി സ്ഥലം കണ്ടെത്തിയത് കിഴക്കേക്കര മേഖലയിലാണ്. ഇവിടെ മാത്രം 40 ൽ അധികം കുടുംബങ്ങളുടെ സ്ഥലമാണ് ഏറ്റെടുത്ത് കല്ലിട്ടു പോയത്. എല്ലാ വർഷവും ബജറ്റ് പ്രഖ്യാപനങ്ങൾ വരുമ്പോൾ ഇവർക്ക് ആശ്വാസമാണ്. എന്നാൽ പ്രഖ്യാപനങ്ങൾ മാത്രം ഉണ്ടായെന്നല്ലാതെ ഒന്നും നടന്നില്ല. കാൽ നൂറ്റാണ്ട് മുമ്പ് പദ്ധതി ആരംഭിച്ചപ്പോള്‍ മുതല്‍ ജീവിതം ദുരിതത്തിലായ നൂറുകണക്കിനു കുടുംബങ്ങളുടെ ദുരിതം അവസാനിക്കുമെന്ന പ്രതീക്ഷയാണ് വീണ്ടും സർക്കാർ പ്രഖ്യാപനം സൃഷ്ടിച്ചിരിക്കുന്നത്. പാതയ്ക്കായി അലൈന്‍മെന്‍റ് നിശ്ചയിച്ചതോടെ ഭൂമി വില്‍ക്കാനോ, ബാങ്കില്‍‌ പണയപ്പെടുത്താനോ, പഴകിയ വീടുകള്‍ അറ്റകുറ്റപ്പണി നടത്താനോ സാധിക്കാതെ ജിവിതം വഴിമുട്ടിയ അവസ്ഥയിലാണ് കുടുംബങ്ങൾ. ഇതു മൂലം പലരുടെയും ജീവിതം തന്നെ ദുരിതത്തിലായിരുന്നു. ഇതിൽ നിന്നും രക്ഷപെടാൻ ഒടുവിൽ മനുഷ്യാവകാശങ്ങള്‍ ലംഘിക്കപ്പെടുകയാണെന്നു കാണിച്ച് മനുഷ്യാവകാശ കമ്മീഷനു വരെ പരാതികൾ പോയി. എറണാകുളം, ഇടുക്കി, കോട്ടയം ജില്ലകളിലെ ഗതാഗത വികസനത്തിനു വഴിവയ്ക്കുന്ന പദ്ധതി പൂർത്തിയാകുന്നതോടെ ശബരിമല, ഭരണങ്ങാനം തുടങ്ങിയ തീര്‍ഥാടന കേന്ദ്രങ്ങളിലേക്ക് അടക്കമുള്ള യാത്രാ സൗകര്യം മെച്ചപ്പെടുത്താനാകും. മലയോര മേഖലയുടെ വികസനത്തിനും ചരക്കുനീക്കത്തിനും നിർണായക പങ്ക് വഹിക്കന്നതിന്നും പദ്ധതിക്കാകും. അങ്കമാലിയിൽ നിന്നാരംഭിക്കുന്ന പാതയിൽ മൂവാറ്റുപുഴ താലൂക്കിലെ മഞ്ഞള്ളൂര്‍ വില്ലേജ് വരെയുള്ള സാമൂഹ്യ ആഘാത പഠന റിപ്പോര്‍ട്ട് തയാറായിക്കഴിഞ്ഞിട്ടുണ്ട്. ഇടുക്കി പാര്‍ലമെന്‍റ് മണ്ഡലത്തിലാകെ ആറ് റെയില്‍വേ സ്റ്റേഷനുകള്‍ ആണ് നിശ്ചയിച്ചിട്ടുള്ളത്. കോട്ടയം ജില്ലയില്‍ പുതിയ അലൈന്‍മെന്‍റ് സര്‍വേ പൂര്‍ത്തിയായിക്കഴിഞ്ഞു. അങ്കമാലി മുതല്‍ പെരുമ്പാവൂര്‍, കോതമംഗലം, മൂവാറ്റുപുഴ, തൊടുപുഴ, പാലാ എരുമേലി വരെ 115 കിലോമീറ്ററാണ് നീളം. പദ്ധതിക്കായി ഇനി ഏറ്റെടുക്കാനുള്ളത് 107 കിലോമീറ്ററാണ്.

നിർമല കോളജിൽ ‘ഉന്നതി 25’ : കരിയർ ഓറിയന്‍റേഷൻ പ്രോഗ്രാം ഇന്ന്

മൂവാറ്റുപുഴ: പ്ലസ് ടു പഠനത്തിനു ശേഷം വിദേശത്തും, ഇന്ത്യയിലെ തന്നെ ഉന്നത സർവകലാശാലകളിലും ഉന്നത പഠനം ആഗ്രഹിക്കുന്ന വിദ്യാർഥികൾക്കും, നിർമല കോളജിൽ ഇപ്പോൾ അഡ്മിഷൻ ആഗ്രഹിക്കുന്ന എല്ലാ വിദ്യാർഥികൾക്കും രക്ഷിതാക്കൾക്കുമായി നിർമല കോളജിന്‍റെ ആഭിമുഖ്യത്തിൽ ഇന്ന് ‘ഉന്നതി 25’ എന്ന പേരിൽ കരിയർ ഓറിയന്‍റേഷൻ പ്രോഗ്രാം സംഘടിപ്പിക്കുന്നു. കോളജ് ഓഡിയോ വിഷ്വൽ ഹാളിൽ നടത്തുന്ന സെമിനാർ കരിയർ വിദഗ്ധൻ അരുണ്‍ ജോസ് നയിക്കും. ആർട്ടിഫിഷ്യൽ ഇന്‍റലിജൻസ്, റോബാട്ടിക്സ്, കംപ്യൂട്ടർ എയ്ഡഡ് ഡ്രഗ് ഡിസൈൻ, ടൂറിസം, സോഷ്യൽ വർക്ക്, ബിസിനസ് കമ്യൂണിക്കേഷൻ സ്കിൽസ് തുടങ്ങിയ വ്യത്യസ്ത 16 വിഷയങ്ങളിലുള്ള ജോലി സാധ്യതകൾ, അതുമായി ബന്ധപ്പെട്ട വിദ്യാർഥികളുടെ സംശയങ്ങൾ മാറ്റുന്നതിനുമുള്ള വേദിയായിരിക്കും സെമിനാർ. പ്ലസ് ടു കഴിഞ്ഞ വിദ്യാർഥികൾക്കും അവരുടെ രക്ഷിതാക്കൾക്കും സെമിനാറിൽ പങ്കെടുക്കാം. പങ്കെടുക്കാനാഗ്രഹിക്കുന്നവർ രാവിലെ 11ന് കോളജിൽ നേരിട്ടെത്തി സൗജന്യമായി രജിസ്റ്റർ ചെയ്യണം. ഫോണ്‍ : 9446600852, 9446600853.

ഒന്നര വയസുകാരിയുടെ പേരിൽ 5 ലോക റിക്കാർഡുകൾ

മൂവാറ്റുപുഴ: ഒന്നര വയസിൽ നിരവധി ലോക റിക്കാർഡുകൾ സ്വന്തമാക്കി വാളകം സ്വദേശിയായ കൊച്ചുമിടുക്കി. വാളകം ആയക്കാട്ട് വിപിൻ - ആതിര ദന്പതികളുടെ ഏക മകളായ എം.വി. വസുധയാണ് തന്‍റെ ചെറുപ്രായത്തിൽ തന്നെ അഞ്ച് ലോക റിക്കാർഡുകൾ സ്വന്തമാക്കിയത്. 160 വസ്തുക്കൾ തിരിച്ചറിഞ്ഞാണ് ഇന്‍റർനാഷണൽ ബുക്ക് ഓഫ് റിക്കാർഡ്സ്, ഇന്ത്യ ബുക്ക് ഓഫ് റിക്കാർഡ്സ്, കലാം വേൾഡ് റിക്കാർഡ്സ്, വേൾഡ് വൈഡ് ബുക്ക് ഓഫ് റിക്കാർഡ്സ്, ട്രൈഅംപ് വേൾഡ് റിക്കാർഡ് എന്നിവ നേടിയത്. മൃഗങ്ങൾ, പക്ഷികൾ, മനുഷ്യ ശരീരത്തിലെ അവയവങ്ങൾ തുടങ്ങിയ 160 വസ്തുക്കളാണ് ഒന്നരവയസുകാരി നിമിഷനേരത്തിൽ തിരിച്ചറിഞ്ഞത്. മറ്റു കുരുന്നുകളെ അപേക്ഷിച്ച് ഗ്രഹിക്കുന്നതിനുള്ള ശേഷി കൂടുതലായതാണ് റിക്കാർഡുകൾ സ്വന്തം പേരിലാക്കാൻ കൊച്ചുമിടുക്കിയെ സഹായിച്ചത്.

വിദ്യാർഥിനിയടക്കം മൂന്നുപേർക്ക് തെരുവുനായയുടെ കടിയേറ്റു

കോതമംഗലം : വിദ്യാർഥിനിയടക്കം മൂന്ന് പേർക്ക് തെരുവുനായയുടെ കടിയേറ്റു. കാഞ്ഞിരക്കാട്ട് ഓമന ഗോപാലൻ (70), ചാരപ്പാട്ട് പുത്തൻപുരക്കൽ വിമല വേണു (55), പത്താം ക്ലാസ് വിദ്യാർഥിനി ഇളന്പക്കാട്ട് ഗൗരി ശങ്കർ (15) എന്നിവർക്കാണ് തെരുവുനായയുടെ കടിയേറ്റത്. സ്വകാര്യ സ്ഥാപനത്തിലെ ജോലി കഴിഞ്ഞ് വീട്ടിലേക്ക് മടങ്ങുംവഴി പുത്തൻകുരിശ് തടി ഡിപ്പോക്ക് സമീപത്ത് വച്ചാണ് വിമല വേണുവിനെ തെരുവുനായ ആക്രമിച്ചത്. ഇവർ കളമശേരി മെഡിക്കൽ കോളജ് ആശുപത്രിയിൽ ചികിത്സ തേടി. മറ്റു രണ്ട് പേർക്ക് വീടിന് സമീപത്ത് വച്ചുമാണ് കടിയേറ്റത്. പഞ്ചായത്തിന്‍റെ 12-ാം വാർഡിലുള്ളവരാണ് രണ്ടുപേർ, ഒരാൾ ആറാം വാർഡിലും. ഈ പ്രദേശങ്ങളിൽ തെരുവുനായ്ക്കൾ കൂട്ടത്തോടെ അലഞ്ഞുതിരിയുന്നത് പതിവാണ്. പഞ്ചായത്തിന്‍റെ അനാസ്ഥയാണ് ഇതിന്‍റെ മുഖ്യകാരണമെന്നും, നായകളുടെ വാക്സിനേഷനും വന്ധീകരണത്തിനുമായി തയാറാക്കിയ പദ്ധതി ഇതുവരെ നടപ്പാക്കാൻ സാധിച്ചിട്ടില്ലെന്നും പഞ്ചായത്ത് മുൻ പ്രസിഡന്‍റ് സൈജന്‍റ് ചാക്കോ ആരോപിച്ചു. രണ്ടു മാസം മുന്പ് പഞ്ചായത്തിന്‍റെ ഭരണസമിതി യോഗത്തിൽ ഈ വിഷയം അവതരിപ്പിച്ചതാണെന്നും സ്കൂൾ തുറക്കുന്നതിന് മുന്പ് പ്രശ്നത്തിന് പരിഹാരം കാണണമെന്നും ആവശ്യപ്പെട്ടിരുന്നു. എന്നാൽ അധികൃതർ യാതൊരു നടപടിയും സ്വീകരിച്ചിരുന്നില്ലെന്ന് അദ്ദേഹം ചൂണ്ടിക്കാട്ടി. പട്ടിയുടെ കടിയേറ്റ നിർധനരായവരുടെ ചികിത്സാ ചെലവ് പഞ്ചായത്ത് ഏറ്റെടുക്കണമെന്നും സൈജന്‍റ് ആവശ്യപ്പെട്ടു.

അമൃതയിൽ പരിസ്ഥിതി ദിനാചരണം

കൊച്ചി: അമൃത കോളജ് ഓഫ് നഴ്‌സിംഗ് കമ്യൂണിറ്റി ഹെല്‍ത്ത് നഴ്‌സിംഗ് വിഭാഗം വിദ്യാര്‍ഥികളുടെ നേതൃത്വത്തില്‍ ഞാറക്കല്‍ ഗവണ്‍മെന്‍റ് വൊക്കേഷണല്‍ ഹയര്‍ സെക്കന്‍ഡറി സ്‌കൂളില്‍ പരിസ്ഥിതി ദിനാചരണം നടത്തി. അമൃത കോളജ് ഓഫ് നഴ്‌സിംഗ് പ്രിന്‍സിപ്പല്‍ ഡോ. കെ.ടി. മോളി ഉദ്ഘാടനം ചെയ്തു. സ്‌കൂള്‍ ഹെഡ്മിസ്ട്രസ് വി.എം. ശൈലജ, ഞാറക്കല്‍ കൃഷി ഓഫീസര്‍ എസ്. ഗായത്രി ദേവി, അമൃത കോളജ് ഓഫ് നഴ്‌സിംഗ് പ്രഫസര്‍ ഡോ. എം. സുനില്‍ എന്നിവര്‍ കുട്ടികള്‍ക്ക് പരിസ്ഥിതി സംരക്ഷണ സന്ദേശം നല്‍കി. പരിസ്ഥിതി ദിനാഘോഷത്തിന്‍റെ ഭാഗമായി സ്‌കൂള്‍ വിദ്യാര്‍ഥികള്‍ക്കായി സംഘടിപ്പിച്ച പോസ്റ്റര്‍ ഡിസൈനിംഗ് മത്സര വിജയികള്‍ക്ക് സമ്മാനങ്ങള്‍ വിതരണം ചെയ്തു.

ഫോർട്ടുകൊച്ചിയിൽ തണൽമരം മുറിക്കുന്നതിനെതിരേ പ്രതിഷേധം

ഫോർട്ടുകൊച്ചി : പരിസ്ഥിതി ദിനാചരണ ചടങ്ങുകളിൽ ലോകം മുഴകി നിൽക്കെ ഫോർട്ടുകൊച്ചിയിൽ അധികൃതർ തന്നെ തണൽ വൃക്ഷങ്ങൾക്ക് കോടാലി വെച്ചു. ഫോർട്ടുകൊച്ചി കമാല കടവിൽ പെട്രോൾ പമ്പിനോട് ചേർന്നുള്ള ഏറെ പഴക്കമുള്ള വൻ വൃക്ഷം വെട്ടി തുടങ്ങിയതോടെ പരിസ്ഥിതി പ്രവർത്തകർ പ്രതിഷേധവുമായി എത്തി. ജെസിബി യന്ത്രവുമായി എത്തി ശിഖിരങ്ങൾ വെട്ടി തുടങ്ങിയതോടെ നാട്ടുകാരും പിന്നാലെ പരിസ്ഥിതി പ്രവർത്തകരും പ്രതിഷേധവുമായി എത്തുകയായിരുന്നു. ഇതോടെ അപകടകരമായ വൃക്ഷശിഖിരങ്ങൾ മാത്രം മുറിക്കുകയുളളുവെന്ന് ബന്ധപ്പെട്ടവർ അറിയിക്കുകയായിരുന്നു

ചെങ്ങൽ തോടിന്‍റെ തീരമിടിഞ്ഞ് വീട് അപകടാവസ്ഥയിൽ

കാലടി: കനത്ത മഴയെത്തുടർന്ന് ചെങ്ങൽ തോടിന്‍റെ തീരമിടിഞ്ഞു വീട് അപകടാവസ്ഥയിലായി. കാഞ്ഞൂർ പഞ്ചായത്ത് നാലാം വാർഡിലെ ചെങ്ങൽ തുറവുംകര റോഡിനു സമീപം താമസിക്കുന്ന ഇളങ്കുന്നിൽ വീട്ടിൽ ബാബുവിന്‍റെ വീടാണ് തീരമിടുന്നതിനാൽ വലിയ ഭീഷണി നേരിടുന്നത്. കഴിഞ്ഞ ദിവസങ്ങളിൽ പെയ്ത ശക്തമായ മഴയെ തുടർന്നാണ് മണ്ണിടിഞ്ഞ് തോട്ടിൽ പതിച്ചത്. നാലു സെന്‍റ് പുരയിടത്തിലെ അര സെന്‍റ് ഭൂമി ഇത്തരത്തിൽ ഇടിഞ്ഞു പോയതായി ബാബു വ്യക്തമാക്കി. ടൈൽ വിരിക്കുന്ന ജോലിചെയ്ത് ജീവനോപാധി കണ്ടെത്തുന്ന ബാബുവിന് ആകെയുള്ള സ്വത്താണ് ഈ വീട്. ചെങ്ങൽ തോടിനു കുറുകെ നിർമിച്ചിട്ടുള്ള പാലത്തിനടിയിൽ തോട്ടിലെ ജലനിരപ്പ് സംരക്ഷിക്കുവാൻ ലക്ഷ്യമിട്ട് തടയണ നിർമാണമാരംഭിച്ചിട്ടുണ്ട്. ഇതോടെ മുഴുവൻ സമയവും വെള്ളം കെട്ടിനിൽക്കുന്നതും സംരക്ഷണഭിത്തിയില്ലാത്തതുമെല്ലാം തീരവാസികളെ ഭീതിയിലാക്കുമെന്നും ചൂണ്ടിക്കാട്ടപ്പെടുന്നു. മഴക്കാലത്ത് പെരിയാറിൽ നിന്നും വലിയതോതിൽ വെള്ളമൊഴുകിയെത്തുമ്പോൾ വളവുള്ള ഈ ഭാഗത്താണ് ആദ്യം വെളളം അടിച്ചു കയറുന്നത്. ഇവിടെയിപ്പോഴും മണ്ണ് കുതിർന്നു നിൽക്കുന്ന സ്ഥിതിയുമുണ്ട്. കൂടാതെ സമീപവാസിയുടെ അലക്കു കല്ല് ബാബുവിന്‍റെ വീട്ടിലെ നാഗത്തറ തുടങ്ങിയവയെല്ലാം തോട്ടിലേക്ക് പതിക്കുന്ന അവസ്ഥയിലാണ് നിലകൊള്ളുന്നത്. കൂടുതൽ മണ്ണിടിയാതിരിക്കുവാൻ ടാർപോളിൻ ഇട്ടിട്ടുണ്ടെങ്കിലും വീട്ടിൽനിന്നും രണ്ടടി മാത്രം തോട്ടിലേക്കുളള ദൂരമെന്നിരിക്കെ കനത്ത മഴയും വെള്ളപ്പൊക്കവുമുണ്ടായാൽ ഏതു നിമിഷവും വീടുൾപ്പെടെ തോട്ടിൽ പതിക്കുമെന്ന ഭീതിയിലാണ് ബാബു കഴിഞ്ഞുകൂടുന്നത്. സംഭവത്തിന്‍റെ ഗൗരവം മനസിലാക്കി പഞ്ചായത്തധികൃതരെ ബന്ധപ്പെടുകയും തുടർന്ന് പ്രസിഡന്‍റ് വാർഡ് മെമ്പ എൻജിനീയർ എന്നിവരെത്തി സിയാൽ അധികൃതരെ വിളിച്ചുവരുത്തി ഇതിന്‍റെ ഗൗരവം ബോധ്യപ്പെടുത്തുകയും ചെയ്തു. അടിയന്തിരമായി സിയാലിന്‍റെ ഇടപെടലുണ്ടാകണമെന്നും പരിഹാരം കാണണമെന്നും പഞ്ചായത്ത് പ്രസിഡന്‍റ് പ്രിയ രഘുവും ആവശ്യപ്പെട്ടു.

സീക്കോൺ-25നു ഫിസാറ്റിൽ തുടക്കമായി

അങ്കമാലി: പുനർനിർമാണ മേഖലയുടെ സാധ്യതകൾ തേടി അങ്കമാലി ഫിസാറ്റ് എൻജിനീയറിംഗ് കോളജ് ഒരുക്കുന്ന അന്തർദേശീയ സമ്മേളനം 'സീക്കോൺ-25' പത്താം പതിപ്പിന് തുടക്കമായി. സമ്മേളനം മലേഷ്യ പഹങ് അൽ സുൽത്താൻ അബ്ദുള്ള യൂണിവേഴ്സിറ്റി ഡെപ്യൂട്ടി ഡയറക്ടർ ഡോ. റഹിമി എ. റഹ്മാൻ ഉദ്ഘാടനം ചെയ്തു. ഫിസാറ്റ് എൻജിനീയറിംഗ് കോളജ് ചെയർമാൻ പി.ആർ. ഷിമിത്ത് ചടങ്ങിൽ അധ്യക്ഷത വഹിച്ചു. ഇന്ത്യൻ കോൺക്രീറ്റ് ഇൻസ്റ്റിറ്റ്യൂട്ട്, ഇന്ത്യൻ സൊസൈറ്റി ഫോർ ടെക്‌നിക്കൽ എഡ്യൂക്കേഷൻ, ബിൽഡേഴ്‌സ് അസോസിയേഷൻ ഓഫ് ഇന്ത്യ, ഇൻസ്റ്റിറ്റ്യൂഷൻ ഓഫ് എൻജിനീയേർസ്, ഇന്ത്യൻ ഗ്രീൻ ബിൽഡിംഗ് കൗൺസിൽ, അമേരിക്കൻ സൊസൈറ്റി ഓഫ് സിവിൽ എൻജിനീയേഴ്സ് ഫിസാറ്റ് സ്റ്റുഡന്‍റ് ചാപ്റ്റർ തുടങ്ങിയവർ സമ്മേളനത്തിൽ സഹകരിക്കുന്നുണ്ട്. ഡോ. കെ.എസ്. ആനന്ദ്, ജെനീബ് ജെ. കാച്ചപ്പിള്ളി, ജോർജ് സി. ചാക്കോ, കെ.കെ. അജിത്കുമാർ, പ്രിൻസിപ്പൽ ഡോ. ജേക്കബ് തോമസ്, വൈസ് പ്രിൻസിപ്പൽ ഡോ. പി.ആർ. മിനി, ഡീൻ ഡോ. ജി. ഉണ്ണി കർത്ത തുടങ്ങിവർ സംസാരിച്ചു.

"സ്കൂൾ മുറ്റത്ത് എന്നും പൂക്കാലം' പദ്ധതിക്ക് തുടക്കംകുറിച്ചു

പെരുമ്പാവൂർ: ഒക്കൽ പെരിയാർ ലയൺസ് ക്ലബ് നടപ്പാക്കുന്ന സ്കൂൾ മുറ്റത്ത് എന്നും പൂക്കാലം പദ്ധതിക്ക് തുടക്കം കുറിച്ചു. ലയൺസ് ക്ലബ്ബിന്‍റെ പ്രവർത്തന പരിധിയിൽ വരുന്ന സ്കൂളുകളിൽ വിവിധ കാലഘട്ടങ്ങളിൽ പൂക്കുന്നതും എന്നും സുഗന്ധം പരത്തുന്നതും ആയ പൂച്ചെടികൾ നട്ടുപിടിപ്പിക്കുക എന്നതാണ് പദ്ധതിയുടെ ലക്ഷ്യം. സ്കൂൾ മുറ്റത്ത് എന്നും പൂക്കാലം പദ്ധതിയുടെ ഉദ്ഘാടനം എൽദോസ് കുന്നപ്പിള്ളി എംഎൽഎ നിർവഹിച്ചു. ഉദ്ഘാടനത്തോടനുബന്ധിച്ച് കൂവപ്പടി ഗവ. എൽപി സ്കൂളിൽ വിവിധതരത്തിലുള്ള പൂച്ചെടികൾ നട്ടുപിടിപ്പിച്ചു. ഉദ്ഘാടന യോഗത്തിൽ പെരുമ്പാവൂർ സർക്കിൾ ഇൻസ്പെക്ടർ ടി.എം. സൂഫി സ്കൂളിലെ മുഴുവൻ കുട്ടികൾക്കും പഠിക്കാനാവശ്യമായ ബുക്കുകൾ വിതരണം ചെയ്തു . അഡ്വ. വർഗീസ് മൂലൻ അധ്യക്ഷത വഹിച്ചു. യോഗത്തിൽ വർഗീസ് ചെട്ടിയകുടി, പോൾ വെട്ടിക്കനക്കുടി, രഞ്ജി പെട്ടയിൽ, ഷിജു തോപ്പിലാൻ, ബോബി പാപ്പച്ചൻ തുടങ്ങിയവർ പ്രസംഗിച്ചു.

മോഷണക്കേസ് പ്രതി പിടിയിൽ

കളമശേരി: കളമശേരി എച്ച്എംടി കോളനിയിലുള്ള ടെലസ്ക പവർ സിസ്റ്റംസിൽ മോഷണം നടത്തിയ യുവാവ് പിടിയിൽ. തൃശൂർ കൈപ്പമംഗലം പരത്തേഴത്ത് വീട്ടിൽ മുഹമ്മദ് വാഹിദ് (36) ആണ് പിടിയിലായത്. പവർ ടൂൾസും ഇലക്ട്രിക്ക് സാമഗ്രികളുമായി 2,94,788 രൂപ വില വരുന്ന സാധനങ്ങളും കന്പനിയുടെ വിലപ്പെട്ട രേഖകളും 2024ൽ ഇയാൾ മോഷ്ടിക്കുകയായിരുന്നു. കന്പനിയിലെ മുൻ ജീവനക്കാരനാണ്. കളമശേരി കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.

ഭാവി ശാസ്ത്രജ്ഞരെ വാർത്തെടുക്കാൻ ചേലേമ്പ്ര എന്‍എന്‍എം എച്ച്എസ്എസ്

കൊച്ചി: സ്‌കൂളില്‍ നിന്ന് ഭാവി ശാസ്ത്രജ്ഞരെ വാര്‍ത്തെടുക്കുകയെന്ന ലക്ഷ്യത്തോടെ വിദ്യാര്‍ഥികള്‍ക്ക് ശാസ്ത്ര വിഷയങ്ങള്‍ കണ്ടും അനുഭവിച്ചും പഠിക്കാന്‍ അവസരമൊരുക്കുന്ന ഇന്‍വെന്‍റര്‍ പാര്‍ക്കിന്‍റെ നിര്‍മാണം വള്ളിക്കുന്ന് നിയോജകമണ്ഡലത്തിലെ ചേലേമ്പ്ര എന്‍എന്‍എം ഹയർ സെക്കൻഡറി സ്‌കൂളില്‍ തുടങ്ങി. സ്‌കൂള്‍ പ്രവേശനോല്‍സവത്തോടനുബന്ധിച്ച് നടന്ന ചടങ്ങില്‍ നടന്‍ സലിംകുമാര്‍ ടാല്‍റോപിന്‍റെ ഇന്‍വെന്‍റര്‍ പാര്‍ക്ക് പ്രഖ്യാപനം നിര്‍വഹിച്ചു. പ്രിന്‍സിപ്പാള്‍ സി.ഇ. ദീപക് , ടാല്‍റോപ് കോഫൗണ്ടര്‍ ആന്‍ഡ് ചീഫ് മീഡിയ ഓഫീസര്‍ ഷമീര്‍ ഖാന്‍ എന്നിവര്‍ ഇന്‍വെന്‍റര്‍ പാര്‍ക്ക് പരിചയപ്പെടുത്തി. വിദ്യാര്‍ഥികള്‍ക്ക് സ്‌കൂള്‍ പഠന കാലയളവില്‍ തന്നെ ശാസ്ത്രലോകത്തെക്കുറിച്ച് ആഴത്തിലറിയാന്‍ ഇന്‍വെന്‍റര്‍ പാര്‍ക്കിലൂടെ അവസരമൊരുങ്ങും. ഓരോ നിയോജക മണ്ഡലത്തിലെയും തെരഞ്ഞെടുത്ത ഒരു സ്‌കൂൾ എന്ന കണക്കിൽ, സംസ്ഥാനത്തൊട്ടാകെ 140 ഇന്‍വെന്‍റര്‍ പാര്‍ക്കുകളാണ് ടാല്‍റോപ് ഒരുക്കി വരുന്നത്. ആര്‍.പി ബിന്ദു, എം.നാരായണന്‍, അബ്ദുള്‍ റഷീദ്, ഡോ. എന്‍. കെ. രജിത്ത്, ജയന്തി, ഹസീബ, കെ.വി ഷാജി, റീം ഖാന്‍, ടി.എ.അതുല്‍, സ്വാലിഹ്, മുഹമ്മദ് സഫീര്‍ തുടങ്ങിയവര്‍ ചടങ്ങില്‍ പങ്കെടുത്തു.

ബാങ്ക് ഓഫ് ബറോഡ പരിസ്ഥിതി ദിനം ആചരിച്ചു

കൊച്ചി: ലോക പരിസ്ഥിതി ദിനത്തിന്‍റെ ഭാഗമായി, 'പ്ലാസ്റ്റിക് മലിനീകരണത്തെ തുരത്തുക' എന്ന ലക്ഷ്യവുമായി ബാങ്ക് ഓഫ് ബറോഡയുടെ എറണാകുളം സോണല്‍ ഓഫീസും റീജണല്‍ ഓഫീസും ചേര്‍ന്ന് പരിസ്ഥിതി സംരക്ഷണ പ്രവര്‍ത്തനങ്ങള്‍ എറണാകുളം മറൈന്‍ ഡ്രൈവിലും എറണാകുളം കളമശേരി ഗവ. ഹയര്‍ സെക്കന്‍ഡറി സ്‌കൂളിലും നടത്തി. മറൈന്‍ഡ്രൈവില്‍ വാക്കത്തോണും പ്ലാസ്റ്റിക് ശുചീകരണ പ്രവര്‍ത്തനങ്ങളും സംഘടിപ്പിച്ചു. ഉദ്യോഗസ്ഥരും ജീവനക്കാരും ചേര്‍ന്ന് മറൈന്‍ഡ്രൈവ് നടപ്പാതയും ഗ്രൗണ്ടും വൃത്തിയാക്കുകയും അവിടെയുള്ള പ്ലാസ്റ്റിക് മാലിന്യങ്ങള്‍ ശേഖരിച്ച് നഗരസഭയ്ക്ക് കൈമാറുകയും ചെയ്തു. കളമശേരി ഗവ. ഹയര്‍ സെക്കന്‍ഡറി സ്‌കൂളില്‍ വൃക്ഷത്തൈകള്‍ നട്ടു പിടിപ്പിക്കുകയും സ്‌കൂള്‍ പരിസരം വൃത്തിയാക്കുകയും ചെയ്തു. ബാങ്ക് ഓഫ് ബറോഡ സ്‌കൂളിന് കൈമാറിയ അമ്പതോളം വിവിധ തൈകള്‍ വിദ്യാര്‍ഥികളും അധ്യാപകരും ചേര്‍ന്ന് സ്‌കൂള്‍ പരിസരത്ത് നട്ടുപിടിപ്പിച്ചു. പരിസ്ഥിതി ദിനാചരണ പരിപാടികള്‍ക്ക് സോണല്‍ ഹെഡ് ഡി.പജിത്ത് കുമാര്‍, ഡെപ്യൂട്ടി ജനറല്‍ മാനേജര്‍മാര്‍ കെ.ആര്‍.കഗഡാല്‍, അനീഷ്‌കുമാര്‍ കേശവന്‍, റീജണല്‍ മാനേജര്‍ സി.ജി.മിനി, ഡെപ്യൂട്ടി റീജണല്‍ മാനേജര്‍ പി.എ.അനില്‍കുമാര്‍ എന്നിവര്‍ നേതൃത്വം നല്‍കി.

എച്ച്എംടി ഭൂമി ഏറ്റെടുക്കൽ: തുക കൈമാറി

കളമശേരി: സീപോർട്ട് എയർപോർട്ട് റോഡിന്‍റെ രണ്ടാംഘട്ട നിർമാണവുമായി ബന്ധപ്പെട്ട് എച്ച്എംടിയുടെ ഭൂമി ഏറ്റെടുക്കുന്നതിനുള്ള തുക ബാങ്ക് അക്കൗണ്ടിലേക്ക് കൈമാറി. ഭൂമി വില ഹൈക്കോടതിയിൽ കെട്ടിവയ്ക്കുന്നതിന് ഹൈക്കോടതി രജിസ്ട്രാറുടെ പേരിൽ ദേശസാൽകൃത ബാങ്കിൽ നേരത്തെ അക്കൗണ്ട് തുറന്നിരുന്നു. ഭൂമി ഏറ്റെടുക്കലിനായി അനുവദിച്ചിട്ടുള്ള 37,90,90, 662 രൂപയാണ് കൈമാറിയത്. റോഡ് വികസനത്തിന് ആവശ്യമായ എച്ച്എംടി ഭൂമി ലഭ്യമാക്കുന്നതിന് ദേശസാൽകൃത ബാങ്കിൽ തുക കെട്ടിവെക്കുന്നതിനുള്ള സംസ്ഥാന സർക്കാരിന്‍റെ അപേക്ഷ സുപ്രീം കോടതി നേരത്തെ അനുവദിച്ചിരുന്നു. സീപോർട്ട്- എയർപോർട്ട് റോഡ് വികസനത്തിനായി എൻഎഡിയിൽ നിന്ന് വിട്ടു കിട്ടേണ്ട 2 .4967 ഹെക്ടർ ഭൂമിയുടെ വിലയുൾപ്പെടെ അനുവദിച്ച് സംസ്ഥാന സർക്കാർ ഉത്തരവിറക്കിയിരുന്നു. ജില്ലയിലെ പ്രധാന ഫ്ളാഗ്ഷിപ്പ് പദ്ധതിയായി കണക്കാക്കി റോഡ് നിർമാണം പൂർത്തികരിക്കുമെന്ന് മന്ത്രി പി.രാജീവ് പറഞ്ഞു.

വാർഡ് വിഭജനം : ഇടപ്പള്ളി ബ്ലോക്കിൽ ഒരു ഡിവിഷന്‍ കൂടി

കൊച്ചി: ഇടപ്പള്ളി ബ്ലോക്ക് പഞ്ചായത്തിലെ വാര്‍ഡ് വിഭജനത്തിന്‍റെ കരട് വിജ്ഞാപനം പുറത്തിറക്കി. നിലവില്‍ 13 ഡിവിഷനുകള്‍ ഉള്ള ബ്ലോക്ക് പഞ്ചായത്തില്‍ പുതുതായി ഒരു ഡിവിഷന്‍ കൂടി കൂട്ടിച്ചേര്‍ക്കാനാണ് തീരുമാനം. കടപ്പുറം, കര്‍ത്തേടം, മുളവുകാട്, കടമക്കുടി, കോട്ടപ്പറമ്പ്, ഇടയക്കുന്നം, വാലം, ചിറ്റൂര്‍ കോതാട്, പൊന്നാരിമംഗലം, അഴീക്കല്‍, പുതുവൈപ്പ്, സ്‌കൂള്‍മുറ്റം, മാലിപ്പുറം എന്നിവയാണ് ഡിവിഷനുകള്‍. ഓരോ ഡിവിഷനിലും ഉള്‍പ്പെടുന്ന ഗ്രാമ പഞ്ചായത്ത് വാര്‍ഡുകള്‍ സഹിതമാണ് കരട് വിജ്ഞാപനം പുറത്തിറക്കിയിട്ടുള്ളത്. വാര്‍ഡ് വിഭജനവുമായി ബന്ധപ്പെട്ട് ആക്ഷേപങ്ങളും, അഭിപ്രായങ്ങളും ഈ മാസം ഏഴിന് മുമ്പായി ഡീലിമിറ്റേഷന്‍ കമ്മീഷന്‍ സെക്രട്ടറി മുമ്പാകെയോ ജില്ലാ തെരഞ്ഞെടുപ്പ് ഉദ്യോഗസ്ഥന്‍ മുമ്പാകെയോ നേരിട്ടോ രജിസ്റ്റര്‍ ചെയ്ത് തപാല്‍ മുഖേനയോ സമര്‍പ്പിക്കണം. ഇതുമായി ബന്ധപ്പെട്ട രേഖകള്‍ നല്‍കാന്‍ ആഗ്രഹിക്കുന്നവര്‍ പ്രസ്തുത രേഖകളുടെ സ്വയം സാക്ഷ്യപ്പെടുത്തിയ പകര്‍പ്പുകളും നല്‍കേണ്ടതാണ്.

ചരക്കുലോറിയുടെ കാബിന് തീപിടിച്ചു

ആലുവ: ദേശീയ പാതയിൽ പ്ലാസ്റ്റിക് വസ്തുക്കൾ കൊണ്ടു പോകുകയായിരുന്ന ചരക്കുലോറിയിലെ കാബിനിൽ തീപിടിച്ചു. അഗ്‌നിശമന സേനയെത്തി തീ കെടുത്തി. ഇന്നലെ ഉച്ചയ്ക്ക് ദേശീയ പാതയിൽ തോട്ടയ്ക്കാട്ടുകരയിലാണ് സംഭവം. എറണാകുളത്തുനിന്ന് അങ്കമാലിയിലേക്ക് പോകുകയായിരുന്ന ജയ് ആഞ്ജനേയ എന്ന ലോറിയുടെ കാബിനിലാണ് തീ കണ്ടെത്തിയത്. ഓടിക്കൊണ്ടിരിക്കേ പുക ഉയർന്നത് കണ്ട് വണ്ടി നിർത്തി ഡ്രൈവർ അനീഷ് ചാടിയിറങ്ങുകയായിരുന്നു.

105-ാം ജന്മദിനത്തിൽ പ്രസരിപ്പോടെ ത്രേസ്യ...

കാലടി: 105-ാം ജന്മദിനം വളരെ സന്തോഷത്തോടെ ആഘോഷിച്ച് പാലിശേരി വീട്ടിൽ ത്രേസ്യ. മക്കളും കൊച്ചുമക്കളും ബന്ധുക്കളുമൊത്ത് കേക്ക് മുറിച്ച് മധുരം പങ്കിട്ട് ഈ അമ്മ സന്തോഷിച്ചാനന്ദിച്ചു.കാലടി ഗ്രാമ പഞ്ചായത്തിലെ തന്നെ ഏറ്റവും പ്രായം കൂടിയ വ്യക്തികളിരൊളാണ് പാലിശേരി വീട്ടിൽ പരേതനായ ദേവസിയുടെ ഭാര്യ ത്രേസ്യ. നാല് ആൺമക്കളും രണ്ട് പെൺമക്കളുമാണ് ഈ അമ്മയ്ക്കുള്ളത്. എല്ലാവരും വിവാഹിതർ. ഇതിൽ ഒരു മകനും രണ്ട് മരുമക്കളും മരണപ്പെട്ടു.105 വയസിലും നർമരസം നിറഞ്ഞ തമാശകളിലൂടെ എല്ലാവർക്കും സന്തോഷം പകർന്നത്രേസ്യയുടെ ജന്മദിനാഘോഷം ബന്ധുക്കളും നാട്ടുകാരും ചേർന്ന് ആഘോഷമാക്കി. ഗ്രാമപഞ്ചായത്ത് പ്രസിഡന്‍റ് ഷൈജൻ തോട്ടപ്പിള്ളി, കാലടി പള്ളി വികാരി ഫാ. മാത്യു കിലുക്കൻ തുടങ്ങിയവർ ആഘോഷങ്ങളിൽ പങ്കെടുക്കാനെത്തി.

കാപ്പ ചുമത്തി നാടുകടത്തി

ഏലൂർ: വിവിധ കേസുകളിൽ പ്രതിയായ യുവാവിനെ കാപ്പ ചുമത്തി നാടുകടത്തി. പാതാളം കുറ്റിക്കാട്ടുകര കോട്ടപ്പറന്പ് വീട്ടിൽ കാർത്തികി(23)നെയാണ് സിറ്റി പോലീസ് കമ്മീഷണറുടെ ഉത്തരവ് പ്രകാരം കാപ്പു ചുമത്തി ഒരു വർഷത്തേക്ക് നാടുകടത്തിയത്. കൊച്ചി സിറ്റി പോലീസിന്‍റെ പരിധിയിൽ പ്രവേശിക്കുന്നതിനും പ്രദേശത്ത് ഏതെങ്കിലും വിധത്തിലുള്ള പ്രവർത്തനങ്ങളിൽ ഏർപ്പെടുന്നതിൽ നിന്നും ഒരു വർഷത്തേക്കാണ് ഇയാളെ വിലക്കിയിട്ടുള്ളത്. ഏലൂർ സ്റ്റേഷൻ പരിധിയിൽ ദേഹോപദ്രവം ഏൽപ്പിച്ചുള്ള അടിപിടി, സംഘം ചേർന്ന് ആക്രമണം നടത്തൽ, പൊതുജന സമാധാന ലംഘനം ഉണ്ടാക്കൽ തുടങ്ങിയ വിവിധ വകുപ്പുകൾ പ്രകാരമുള്ള കുറ്റകൃത്യങ്ങളിലെ പ്രതിയാണ് ഇയാൾ.

ആഭ്യന്തര വകുപ്പിനോട് മനുഷ്യാവകാശ കമ്മീഷൻ : ജില്ലാ ജയിലിലെ കുടിവെള്ളക്ഷാമം പരിഹരിക്കാൻ എന്തു ചെയ്തു?

കാക്കനാട്: ജില്ലാ ജയിലിലെ കുടിവെള്ളക്ഷാമം പരിഹരിക്കാൻ ആഭ്യന്തര വകുപ്പ് ഇതുവരെ സ്വീകരിച്ച നടപടികൾ അറിയിക്കണമെന്ന് മനുഷ്യാവകാശ കമ്മീഷൻ ചെയർമാൻ ജസ്റ്റിസ് അലക്സാണ്ടർ തോമസ്. ആഭ്യന്തര വകുപ്പ് അഡീഷണൽ ചീഫ് സെക്രട്ടറിക്കാണ് കമ്മീഷൻ ഇതുസംബന്ധിച്ച നിർദേശം നൽകിയത്. ജയിൽ വകുപ്പിന്‍റെ ചുമതലയുള്ള ഡിജിപി ഇതിനായി പ്രത്യേകം ഉദ്യോഗസ്ഥനെനിയോഗിക്കണമെന്നും നടപടിക്രമങ്ങളുടെ പുരോഗതി വിലയിരുത്തണമെന്നും കമ്മീഷൻ ആവശ്യപ്പെട്ടു.ആഭ്യന്തരവകുപ്പ് അഡീഷണൽ ചീഫ് സെക്രട്ടറി, ജയിൽ വിഭാഗം ഡിജിപി, ജില്ലാ ജയിൽ സൂപ്രണ്ട്, ജല അഥോറിറ്റി (കളമശേരി) അസി.എക്സിക്യൂട്ടീവ് എൻജിനീയർ എന്നിവരുടെ പ്രതിനിധികൾ 25ന് എറണാകു ളം ഗവ. ഗസ്റ്റ് ഹൗസിൽ നടക്കുന്ന സിറ്റിംഗിൽ നേരിട്ട് ഹാജരായി തൽസ്ഥിതി വ്യക്തമാക്കണമെന്നും കമ്മീഷൻ നിർദേശിച്ചു. ജില്ലാ ജയിലിലെ കുടിവെള്ളക്ഷാമവുമായി ബന്ധപ്പെട്ട വാർത്തകൾ ശ്രദ്ധയിൽപ്പെട്ട കമ്മീഷൻ സ്വമേധയാ രജിസ്റ്റർ ചെയ്ത കേസിലാണ് ഉത്തരവ്. ജലഅഥോറിറ്റി അസി.എക്സിക്യൂട്ടീവ് എൻജിനീയർ പി. അജിത്കുമാർ, ജില്ലാ ജയിൽ അസി.സൂപ്രണ്ട് പി. വിനീത് എന്നിവർ കമ്മീഷൻ എറണാകുളത്ത് നടത്തിയ സിറ്റിംഗിൽ ഹാജരായിരുന്നു. ജയിലിലെ കുടിവെള്ള ടാങ്കറിന്‍റെ സംഭരണ ശേഷിയിലുള്ള കുറവാണ് കുടിവെള്ളക്ഷാമത്തിന് കാരണമെന്ന് ജല അഥോറിറ്റി സൂപ്രണ്ടിംഗ് എൻജിനീയർ കമ്മീഷനെ അറിയിച്ചു. മൂന്നു ദിവസത്തിലൊരിക്കൽ ജലഅഥോറിറ്റി വെള്ളം നൽകുകയാണെങ്കിൽ കുടിവെള്ളക്ഷാമം പരിഹരിക്കാൻ സാധിക്കുമെന്ന് ജില്ലാ ജയിൽ സൂപ്രണ്ടും കമ്മീഷനെ അറിയിച്ചു. നിലവിലുള്ള കുടിവെള്ളടാങ്കിന്‍റെ തകരാർ പരിഹരിക്കാൻ 22,73,000 രൂപയുടെ എസ്റ്റിമേറ്റ് പൊതുമരാമത്ത് വകുപ്പ് തയാറാക്കിയിട്ടുണ്ടെന്നും 5000 ലിറ്റർ വെള്ളമെങ്കിലും തൃക്കാക്കര നഗരസഭയിയിൽ നിന്ന് പ്രതിദിനം ലഭിക്കുകയാണെങ്കിൽ ക്ഷാമം പരിഹരിക്കാൻ കഴിയുമെ ന്നും ജയിൽ അധികൃതർ അറിയിച്ചു. തടവുകാരുടെ എണ്ണത്തിനനുസരിച്ച് ജയിലിനുളളിൽ വെള്ളം ലഭ്യമല്ലാത്തതിനാൽ ദൈനംദിന പ്രവർത്തനങ്ങൾ തടസപ്പെടുന്നത് തടവുകാർക്കിടയിലും പ്രശ്നങ്ങൾ സൃഷ്ടിക്കുന്നുണ്ട്.

നോർത്ത് കളമശേരി ദേശീയപാതയിലെ പാലത്തിൽ അഞ്ചു കാറുകൾ കൂട്ടിയിടിച്ചു; വൻ ഗതാഗതക്കുരുക്ക്

കളമശേരി: നോർത്ത് കളമശേരി ദേശീയപാതാ പാലത്തിൽ വീണ്ടും വാഹനാപകടം. ഇതേത്തുടർന്ന് ഇന്നലെ ഈ മേഖലയിൽ മണിക്കൂറുകൾ നീണ്ട വൻ ഗതാഗതക്കുരുക്കാണ് അനുഭവപ്പെട്ടത്. ഇന്നലെ രാവിലെ പെയ്ത കനത്ത മഴയിൽ പാലത്തിലുണ്ടായ വെള്ളക്കെട്ടിൽ നിയന്ത്രണം വിട്ട അഞ്ചു കാറുകൾ തമ്മിൽ കൂട്ടിയിടിച്ചായിരുന്നു അപകടം. ഇടിയുടെ ആഘാതത്തിൽ രണ്ടു കാറുകളുടെ ബംബറുകൾ ടയറിൽ കുരുങ്ങിയതിനാൽ വണ്ടികൾ നീക്കാൻ കഴിയാതെ വന്നതോടെ മണിക്കൂറുകൾ ദേശീയ പാതയിൽ ഗതാഗതക്കുരുക്കുണ്ടായി. കളമശേരി-ആലുവ ഭാഗത്തേക്കും ആലുവ-എറണാകുളം ഭാഗത്തേക്കും രാവിലെ 8.45 ഓടെ കനത്ത ഗതാഗതക്കുരുക്കാണ് അനുഭവപ്പെട്ടത്. വാഹന ഉടമകളും പോലീസും ചേർന്ന് കാറുകൾ നീക്കിയാണ് ഗതാഗതം ആരംഭിച്ചത്. കണ്ടെയ്നർ റോഡിനു മുകളിലൂടെയുള്ള പാലത്തിന്‍റെ നിർമാണ ഘട്ടത്തിൽ തന്നെയുണ്ടായിട്ടുള്ള അപാകത കാരണം ഇവിടെ അപകടങ്ങൾ തുടർക്കഥയാണ്. പാലത്തിലെ ഗർത്തത്തിൽ രൂപപ്പെടുന്ന വെള്ളക്കെട്ടിൽ ഒഴുകി എത്തുന്ന മണ്ണും അപകടമുണ്ടാക്കുന്നു. ഇരു ചക്ര വാഹനങ്ങളും മറ്റും വെള്ളക്കെട്ട് കണ്ട് പെട്ടെന്ന് വെട്ടിക്കുമ്പോഴാണ് അപകടം സംഭവിക്കുന്നത്. കഴിഞ്ഞ ആഴ്ച ഇവിടെ ഒരു കാർ തല കീഴായി മറിഞ്ഞിരുന്നു.

സിയാല്‍ അക്കാദമിയില്‍ എയര്‍ക്രാഫ്റ്റ് റെസ്‌ക്യൂ കോഴ്‌സ്

കൊച്ചി: കൊച്ചി എയര്‍പോര്‍ട്ടിന്‍റെ ഉപസ്ഥാപനമായ സിഐഎഎസ്എല്‍ അക്കാദമി നടത്തുന്ന കുസാറ്റ് അംഗീകൃത അഡ്വാന്‍സ് ഡിപ്ലോമ ഇന്‍ എയര്‍ക്രാഫ്റ്റ് റെസ്‌ക്യൂ ആന്‍ഡ് ഫയര്‍ ഫൈറ്റിംഗ് കോഴ്‌സിന് ഈ മാസം പ10 വരെ അപേക്ഷിക്കാം. സയന്‍സ് ഐച്ഛികവിഷയമായ പ്ലസ്ടുവാണ് അടിസ്ഥാന യോഗ്യത. 20ന് നടക്കുന്ന പ്രവേശന പരീക്ഷയുടെയും ഫിസിക്കല്‍ ടെസ്റ്റിന്‍റെയും അടിസ്ഥാനത്തിലാണ് അഡ്മിഷന്‍. പാഠ്യപദ്ധതിക്ക് ഒപ്പം കൊച്ചി ബിപിസിഎലില്‍ പ്രഷര്‍ ഫെഡ് ഫയര്‍ഫൈറ്റിംഗ് പരിശീലനം, കേരള ഫയര്‍ ആന്‍ഡ് റെസ്‌ക്യു അക്കാദമിയില്‍ ടണല്‍ ആന്‍ഡ് സ്‌മോക്ക് ചേമ്പര്‍ പരിശീലനം, തൃശൂര്‍ വൈല്‍ഡ് വിന്‍ഡ് അഡ്വെഞ്ച്വര്‍ ബില്‍ഡിംഗ് റെസ്‌ക്യു ഓപ്പറേഷന്‍സ്, സെന്‍റ് ജോണ്‍സില്‍ ആംബുലന്‍സ് സര്‍ട്ടിഫിക്ക്റ്റ് ട്രെനിയിംഗ് പ്രോഗ്രാം, വ്യക്തിത്വ വികസനം, സോഫ്റ്റ് സ്‌കില്‍, ആശയവിനിമയം എന്നിവയില്‍ പ്രത്യേക പരിശീലനം എന്നിവയും നല്‍കും. അപേക്ഷകള്‍ www.ciasl.aero/academy എന്ന ലിങ്കിലൂടെ സമര്‍പ്പിക്കാം. ഫോണ്‍ :8848000901.

കഞ്ചാവ് വില്പന: പ്രതിക്ക് രണ്ടുവർഷം കഠിന തടവ്

പറവൂർ: കഞ്ചാവ് വില്പന നടത്തിയ കേസിൽ ഉദയംപേരൂർ നടക്കാവ് ചാത്തൻകണ്ണേഴത്ത് വീട്ടിൽ വിനീതിനെ (33) രണ്ടു വർഷം കഠിനതടവിന് പറവൂർ അഡീഷണൽ സെഷൻസ് കോടതി-ഒന്ന് ജഡ്ജി എം.പി. ജയരാജ് ശിക്ഷിച്ചു. 20000 രൂപ പിഴയും ഒടുക്കണം. 2019 ഡിസംബർ 10ന് വൈകിട്ട് ആറിന് നടക്കാവ് കവലയിൽ 2.508 കിലോഗ്രാം കഞ്ചാവ് വില്പനയ്ക്കായി കൊണ്ടുവന്ന പ്പോഴാണ് പ്രതി പിടിയിലായത്.

പണം ആവശ്യപ്പെട്ട് ഡോ. വി.പി. ഗംഗാധരന് ഭീഷണിക്കത്ത്

കൊച്ചി: എട്ടു ലക്ഷം രൂപ നല്‍കണമെന്നാവശ്യപ്പെട്ട് കാന്‍സര്‍ ചികിൽസാ വിദഗ്ധന്‍ ഡോ. വി.പി. ഗംഗാധരന് ഭീഷണിക്കത്ത്. ഡോ. ഗംഗാധരന്‍റെ ചികിത്സാ പിഴവില്‍ പെണ്‍കുട്ടി മരിക്കാന്‍ ഇടയായെന്നും തുടര്‍ന്ന് കുട്ടിയുടെ അമ്മ ആത്മഹത്യ ചെയ്‌തുവെന്നുമാണ് മുംബൈയിലെ "സിറ്റിസണ്‍സ് ഫോര്‍ ജസ്റ്റീസ്' എന്ന പേരില്‍ അയച്ച കത്തിൽ പറയുന്നത്. മേയ് 17ന് തപാല്‍ വഴിയാണ് കത്തയച്ചിരിക്കുന്നത്. ഡോ. ഗംഗാധരന്‍ നല്കിയ പരാതിയില്‍ കേസെടുത്ത് അന്വേഷണം ആരംഭിച്ചതായി മരട് പോലീസ് പറഞ്ഞു. ഭീഷണിപ്പെടുത്തല്‍, വധഭീഷണി, പണം തട്ടിയെടുക്കല്‍ ശ്രമം തുടങ്ങിയ വകുപ്പുകള്‍ പ്രകാരമാണ് കേസ് രജിസ്റ്റര്‍ ചെയ്തിരിക്കുന്നത്. നീതി തേടി പെണ്‍കുട്ടിയുടെ പിതാവ് തങ്ങളെ സമീപിച്ചത് പ്രകാരമാണ് ഇടപെടലെന്നാണ് കത്തില്‍ പറയുന്നത്. കത്തില്‍ നല്‍കിയ ലിങ്ക് അല്ലെങ്കില്‍ ക്യുആര്‍ കോഡ് വഴി ബിറ്റ് കോയിന്‍ ആയി 8.25 ലക്ഷം രൂപ നല്‍കണം. പണം നല്‍കിയില്ലെങ്കില്‍ ഡോക്ടറുടെയും കുടുംബത്തിന്‍റെയും ജീവന്‍ അപകടത്തിലാക്കുമെന്നും ഭീഷണിയുണ്ട്. പരാതിയില്‍ സൈബര്‍ സെല്‍, തപാല്‍ വകുപ്പുകളുമായി ഏകോപിപ്പിച്ചാണ് അന്വേഷണം പുരോഗമിക്കുന്നത്. കത്ത് എവിടെ നിന്ന് അയച്ചു എന്ന് കണ്ടെത്താനാണ് പോലീസ് തപാല്‍ വകുപ്പിന്‍റെ സഹായം തേടിയിരിക്കുന്നത്. ഡിജിറ്റല്‍ പേയ്‌മെന്‍റ് ലിങ്കും ക്യുആര്‍ കോഡും സൈബര്‍ സെല്‍ വഴി കണ്ടെത്താനാണ് നീക്കം.

മഴക്കാല ഡ്രൈവിംഗ് സൂക്ഷിക്കണം

കൊച്ചി: മഴ ശക്തമായതിന് പിന്നാലെ ജില്ലയില്‍ റോഡ് അപകടങ്ങളും വര്‍ധിക്കുന്നു. കഴിഞ്ഞ ഒരാഴ്ചയ്ക്കിടെ വ്യത്യസ്ത അപകടങ്ങളിലായി രണ്ട് ജീവനുകളാണ് നിരത്തില്‍ പൊലിഞ്ഞത്. പല സ്ഥലത്തും വൈദ്യുത പോസ്റ്റിലൂടെ വലിച്ചിരിക്കുന്ന കേബിളുകള്‍ പൊട്ടിവീഴുന്നത് അപകടക്കെണിയാകുന്നു. തുടര്‍ച്ചയായി പെയ്ത കനത്ത മഴയില്‍ ഇടറോഡുകളിലടക്കം പലയിടത്തും വലിയ കുഴികള്‍ രൂപപ്പെട്ടിട്ടുണ്ട്. അതിനാൽ വാഹനയാത്രികര്‍ കൂടുതല്‍ ശ്രദ്ധ പുലര്‍ത്തണമെന്ന് മോട്ടോര്‍ വാഹന വകുപ്പും മുന്നറിയിപ്പ് നല്‍കുന്നു. കാറ്റില്‍ മരത്തിന്‍റെ ചില്ല ഒടിഞ്ഞ് വാഹനത്തിന് മുകളില്‍ വീഴുന്നത് പതിവായതോടെ വാഹനങ്ങള്‍ പാര്‍ക്ക് ചെയ്യുന്നതിലും ശ്രദ്ധിക്കേണ്ടതുണ്ട്. അമിത വേഗതയും അശ്രദ്ധമായ ഡ്രൈവിംഗുമാണ് ഭൂരിഭാഗം അപകടങ്ങളിലും വില്ലന്‍. അപകടങ്ങളില്‍ അകപ്പെടുന്നവയില്‍ ഭൂരിഭാഗവും ഇരുചക്ര വാഹനങ്ങളാണ്. അപകടത്തിനു കാരണമാകുന്നത് വലിയ വാഹനങ്ങളും. അതിനിടെ മദ്യപിച്ച് വാഹനമോടിച്ചുണ്ടാകുന്ന അപകടങ്ങള്‍ക്കും ജില്ലയില്‍ കുറവില്ല. റോഡുകളുടെ ശോച്യാവസ്ഥയും അപകടങ്ങള്‍ക്ക് വഴിയൊരുക്കുന്നുണ്ട്. നിരത്തില്‍ പൊലിഞ്ഞത് 113 ജീവൻ‍ കഴിഞ്ഞ വര്‍ഷം ജില്ലയില്‍ റോഡ് അപകടങ്ങളെത്തുടര്‍ന്ന് 113 പേർക്ക് ജീവന്‍ നഷ്ടപ്പെട്ടു. പലയിടങ്ങളിലായി 1,992 അപകടങ്ങളാണ് റിപ്പോര്‍ട്ട് ചെയ്തത്. ഇതില്‍ 2001 പേര്‍ക്ക് പരിക്കേറ്റു. ഭൂരിഭാഗം അപകടങ്ങള്‍ക്കും കാരണമായത് ഡ്രൈവർമാ ടെ അശ്രദ്ധയാണ്. എറണറാകുളം സിറ്റി പരിധിയിലായിരുന്നു ഭൂരിഭാഗം അപടങ്ങളും. എഐ കാമറകളടക്കം ഗതാഗതനിയമ ലംഘനം തടയാനായി സ്ഥാപിച്ചിട്ടും അപകടങ്ങള്‍ക്കും നിയമ ലംഘനങ്ങള്‍ക്കും കുറവില്ലെന്നാണ് കണക്കുകള്‍ വ്യക്തമാക്കുന്നത്. ഡ്രൈവിംഗിനിടെ മൊബൈലില്‍ സംസാരിച്ചത് മൂലം വാഹനം അപകടത്തില്‍പ്പെട്ട് ജീവന്‍ നഷ്ടമായവരുമുണ്ട്. അപകടങ്ങള്‍ക്ക് മഴയും കാരണമായ സംഭവങ്ങളുമുണ്ട്.

എന്‍‌റോൾമെന്‍റ് വീഡിയോ സമൂഹമാധ്യമത്തില്‍; യുവ അഭിഭാഷകന് കാരണംകാണിക്കല്‍ നോട്ടീസ്

കൊച്ചി: ഹൈക്കോടതി ജഡ്ജിയുടെ ഔദ്യോഗിക വാഹനത്തിന്‍റെ ദൃശ്യങ്ങള്‍ സഹിതം എന്‍‌റോൾമെന്‍റ് ചടങ്ങിന്‍റെ വീഡിയോ സമൂഹമാധ്യമത്തില്‍ പോസ്റ്റ് ചെയ്ത യുവഅഭിഭാഷകന് കേരള ബാര്‍ കൗണ്‍സിലിന്‍റെ കാരണം കാണിക്കല്‍ നോട്ടീസ്. തൃശൂര്‍ ചാവക്കാട് സ്വദേശി മുഹമ്മദ് ഫായിസിനെതിരേയാണ് നോട്ടീസ്. ബാര്‍ കൗണ്‍സില്‍ ജൂണ്‍ ഒന്നിന് കൊച്ചിയില്‍ സംഘടിപ്പിച്ച ചടങ്ങിലാണ് മുഹമ്മദ് ഫായിസ് സന്നത് എടുത്തത്. ഇതിനു പിന്നാലെയാണ് അര മിനിട്ടുള്ള വീഡിയോ സമൂഹമാധ്യമത്തില്‍ പ്രത്യക്ഷപ്പെട്ടത്. ഇതില്‍ ജഡ്ജിയുടെ വാഹനത്തിനു പുറമേ ഫായിസ് എന്‍‌റോൾമെന്‍റ് സ്വീകരിക്കുന്നതടക്കം പകര്‍ത്തിയിരിക്കുന്നത് വ്യക്തമാണ്. ജഡ്ജിയുടെ ഔദ്യോഗിക വാഹനം പ്രദര്‍ശിപ്പിച്ചത് ജുഡീഷറിയോടുള്ള അവഹേളനമാണ്. വീഡിയോ പ്രചരിപ്പിച്ച നടപടി പ്രഥമദൃഷ്ട്യാ പെരുമാറ്റദൂഷ്യമാണെന്നും ബാര്‍ കൗണ്‍സില്‍ ചൂണ്ടിക്കാട്ടി. അച്ചടക്കനടപടി സ്വീകരിക്കാതിരിക്കാന്‍ കാരണമുണ്ടെങ്കില്‍ 15 ദിവസത്തിനകം ബോധിപ്പിക്കാനാണ് നിര്‍ദേശം.

ഐബി ഉദ്യോഗസ്ഥയുടെ ആത്മഹത്യ: പ്രതിയുമായി തെളിവെടുപ്പ് നടത്തി

നെടുമ്പാശേരി : ഐ ബി ഉദ്യോഗസ്ഥ ആത്മഹത്യചെയ്ത സംഭവുമായി ബന്ധപ്പെട്ട് പ്രതി സുകാന്ത് സുരേഷുമായി പോലീസ് കൊച്ചി അന്താരാഷ്ട്ര വിമാനത്താവളത്തിനു സമീപം തെളിവെടുപ്പ് നടത്തി. സുകാന്ത് താമസിച്ചിരുന്ന നെടുമ്പാശേരിയിലെ അപ്പാര്‍ട്ട്‌മെന്‍റിലായിരുന്നു തെളിവെടുപ്പ്. തിരുവനന്തപുരത്തു നിന്നുള്ള പോലീസ് സംഘമാണ് സുകാന്തുമായി നെടുമ്പാശേരിയില്‍ എത്തിയത്. കൊച്ചി വിമാനത്താവളത്തിലെ എമിഗ്രേഷന്‍ ഉദ്യോഗസ്ഥനായിരുന്നു സുകാന്ത്. യുവതിയെ കൊച്ചിയിലെ അപ്പാര്‍ട്ട്‌മെന്‍റില്‍ പ്രതി എത്തിച്ചിരുന്നോ എന്നതടക്കമുള്ള കാര്യങ്ങള്‍ പോലീസ് ചോദിച്ചറിയുന്നുണ്ട്. പെണ്‍കുട്ടിയുമായി അടുപ്പമുണ്ടായിരുന്നു എന്നാല്‍ ആത്മഹത്യ ചെയ്തത് എന്തിനാണെന്ന് തനിക്കറിയില്ല എന്നാണ് സുകാന്ത് മൊഴി നല്‍കിയിരിക്കുന്നത്. ഇന്നലെ തിരുവനന്തപുരത്തെ ഫ്ളാറ്റിലെത്തിച്ച് തെളിവെടുപ്പ് നടത്തിയിരുന്നു. മൂന്നു ദിവസത്തേക്കാണ് സുകാന്തിനെ പോലീസ് കസ്റ്റഡിയില്‍ വിട്ടിരിക്കുന്നത്.

ഇഡി ഉദ്യോഗസ്ഥന്‍ പ്രതിയായ കേസ് : പണം പോയത് കടലാസ് കമ്പനിക്ക്

കൊച്ചി: എന്‍ഫോഴ്‌സ്‌മെന്‍റ് ഡയറക്ടറേറ്റ് (ഇഡി) ഉദ്യോഗസ്ഥന്‍ പ്രതിയായ വിജിലന്‍സ് കേസില്‍ അറസ്റ്റിലായ ഇടനിലക്കാര്‍ തട്ടിപ്പ് പണം കൈമാറിയിരുന്നതായി വിജിലന്‍സ് കണ്ടെത്തിയ മുംബൈയിലെ കമ്പനിയെക്കുറിച്ച് വിശദ അന്വേഷണത്തിനൊരുങ്ങി വിജിലന്‍സ്. ഇതിന്‍റെ ഭാഗമായി അന്വേഷണസംഘം മുംബൈയിലെത്തും. ഈ കമ്പനിയുടെ അക്കൗണ്ടിലേക്കാണ് ഇഡി ഉദ്യോഗസ്ഥന്‍റെ ഇടനിലക്കാര്‍ തട്ടിപ്പിലൂടെ സമ്പാദിച്ചിരുന്ന പണം കൈമാറിയിരുന്നതെന്ന് നേരത്തെ വിജിലന്‍സ് അന്വേഷണത്തില്‍ കണ്ടെത്തിയിരുന്നു. ഇതേത്തുടര്‍ന്ന് നടന്ന പരിശോധനയില്‍ ഇത് കടലാസ് കമ്പനിയാണെന്നാണ് കണ്ടെത്തല്‍. ഇത് പരിശോധിക്കുന്നതിനും കേസിലെ മൂന്നാം പ്രതിയായ രാജസ്ഥാന്‍ സ്വദേശി മുകേഷ് കുമാറിന്‍റെ ഇവിടുത്തെ ഇടപാടുകളെക്കുറിച്ച് അന്വേഷിച്ച് കണ്ടെത്തുന്നതിനുമാണ് വിജിലന്‍സ് നീക്കം. അതിനിടെ, കേസിലെ പ്രതിയായ ഇഡി ഉദ്യോഗസ്ഥനെതിരെ പുതിയൊരു കേസ് കൂടി രജിസ്റ്റര്‍ ചെയ്‌തേക്കും. ഇതോടനുബന്ധിച്ച് എറണാകുളം സ്വദേശിയായ വ്യാപാരിയുടെ മൊഴി രേഖപ്പെടുത്തിയിട്ടുണ്ട്. നാലു പേരുടെ മൊഴി ഉടന്‍ രേഖപ്പെടുത്തിയേക്കും. അനീഷ് ബാബു വിജിലന്‍സിനെ സമീപിച്ചതിന് പിന്നാലെയാണ് ഇവരും കൈക്കൂലി ആവശ്യപ്പെട്ട കാര്യം തുറന്നുപറയാന്‍ തയാറായത്.

പ്രതിഭകള്‍ക്ക് ദീപികയുടെ ആദരം

മൂവാറ്റുപുഴയില്‍ ദീപിക യംഗ് ജീനിയസ് മീറ്റില്‍ പങ്കാളികളായി നൂറുകണക്കിനു പ്രതിഭകള്‍ മൂവാറ്റുപുഴ: എസ്എസ്എല്‍സി, പ്ലസ്ടു പരീക്ഷകളില്‍ തിളക്കമാര്‍ന്ന വിജയം സ്വന്തമാക്കിയ പ്രതിഭകള്‍ക്ക് ദീപികയുടെ ആദരം. മൂവാറ്റുപുഴ നിര്‍മല ഹയര്‍ സെക്കന്‍ഡറി സ്‌കൂളില്‍ നടന്ന ദീപിക യംഗ് ജീനിയസ് മീറ്റിലും കരിയര്‍ ഗൈഡന്‍സ് ക്ലാസിലും മേഖലയിലെ നൂറുകണക്കിന് വിദ്യാര്‍ഥി പ്രതിഭകള്‍ പങ്കെടുത്തു. കോതമംഗലം രൂപത വികാരി ജനറാള്‍ മോണ്‍. ഡോ. പയസ് മലേക്കണ്ടത്തില്‍ ഉദ്ഘാടനം ചെയ്തു. കൊച്ചുലോകത്ത് ഒതുങ്ങിക്കൂടാതെ വിദ്യാര്‍ഥികള്‍ ലോകം അറിയുന്നവരായി മാറണമെന്ന് അദ്ദേഹം ഓര്‍മിപ്പിച്ചു. ഉയര്‍ന്ന നിലകളിലേക്ക് എത്തുന്നതിന് പ്രചോദനമാണ് ഇത്തരം ആദരിക്കല്‍ ചടങ്ങുകള്‍. പ്രതികൂല സാഹചര്യങ്ങളെ അതിജീവിച്ചാണ് പലരും പരീക്ഷകളില്‍ മികച്ച വിജയം സ്വന്തമാക്കിയത് എന്നത് ഏറെ അഭിമാനകരമാണ്. ഇനിയുള്ള ജീവിത യാത്രകളിലും വിജയം ലഭിക്കുന്ന രീതിയില്‍ ഉപരിപഠനരംഗങ്ങളില്‍ നിശ്ചയദാര്‍ഢ്യത്തോടെ തീരുമാനമെടുക്കണമെന്നും മോണ്‍. മലേക്കണ്ടത്തില്‍ പറഞ്ഞു. എസ്എസ്എല്‍സി, പ്ലസ്ടു പരീക്ഷകളില്‍ എല്ലാ വിഷയങ്ങള്‍ക്കും എ പ്ലസ് നേടിയ വിദ്യാര്‍ഥികളെയും സിബിഎസ്ഇ, ഐസിഎസ്ഇ പരീക്ഷകളില്‍ 90 ശതമാനത്തിന് മുകളില്‍ മാര്‍ക്ക് നേടിയവരെയും ഉന്നതവിജയം നേടിയ സ്‌കൂളുകളെയും ചടങ്ങില്‍ ട്രോഫികളും സര്‍ട്ടിഫിക്കറ്റുകളും നല്‍കി ആദരിച്ചു. ദീപിക എഡ്യൂക്കേഷന്‍ എക്‌സലന്‍സ് പുരസ്‌കാരം ഇലഞ്ഞി സെന്‍റ് ഫിലോമിനാസ് സ്‌കൂള്‍ സീനിയര്‍ പ്രിന്‍സിപ്പല്‍ റവ. ഡോ. ജോണ്‍ എര്‍ണ്യാകുളത്തിന് നല്‍കി ആദരിച്ചു. എംജി യൂണിവേഴ്‌സിറ്റി ബിഎഡ് പരീക്ഷയില്‍ മൂന്നാം റാങ്ക് നേടിയ നിര്‍മല ഹയര്‍ സെക്കന്‍ഡറി സ്‌കൂള്‍ വൈസ് പ്രിന്‍സിപ്പല്‍ ഫാ. അജേഷ് മാറപ്പിള്ളിക്ക് ഉപഹാരം സമര്‍പ്പിച്ചു. രാഷ്ട്രദീപിക ഡയറക്ടര്‍ റവ. ഡോ. തോമസ് പോത്തനാമുഴി അധ്യക്ഷത വഹിച്ചു. രാഷ്ട്രദീപിക ജനറല്‍ മനേജര്‍ ഫാ. ജിനോ പുന്നമറ്റത്തില്‍, സ്‌കൂള്‍ മനേജര്‍ റവ. ഡോ. ഇമ്മാനുവേല്‍ പിച്ചളക്കാട്ട്, നിര്‍മല ഹയര്‍ സെക്കന്‍ഡറി സ്‌കൂള്‍ പ്രിന്‍സിപ്പല്‍ ഫാ. പോള്‍ ഇടത്തൊട്ടി, ഡിഎഫ്‌സി സംസ്ഥാന ഉപദേശക സമിതിയംഗം ജോയി നടുക്കുടി, സംസ്ഥാന പ്രസിഡന്‍റ് ലോറന്‍സ് ഏബ്രഹാം, ഡിഎഫ്‌സി കോതമംഗലം രൂപത ഡയറക്ടര്‍ റവ.ഡോ. ആന്‍റണി പുത്തന്‍കുളം, അഡ്വൈസറി ബോര്‍ഡ് ചെയര്‍മാന്‍ ജേക്കബ് മിറ്റത്താനി, രൂപത പ്രസിഡന്‍റ് ഡിഗോള്‍ കെ. ജോര്‍ജ് എന്നിവര്‍ പ്രസംഗിച്ചു. എന്‍ ഏബിള്‍ ട്രെയിനിംഗ് ഇന്‍സ്റ്റിറ്റ്യൂട്ട് സ്ഥാപകന്‍ ഡോ. ഹെന്‍‌റി ജോസഫ് കരിയര്‍ ഗൈഡന്‍സ് ക്ലാസ് നയിച്ചു. ദീപിക കൊച്ചി മാര്‍ക്കറ്റിംഗ് എജിഎം റെബി ജോര്‍ജ്, സര്‍ക്കുലേഷന്‍ മാനേജര്‍ ബിനോ വര്‍ഗീസ് എന്നിവര്‍ പ്രസംഗിച്ചു. കോതമംഗലത്ത് യംഗ് ജീനിയസ് മീറ്റ് ഇന്ന് കോതമംഗലം: ദീപിക യംഗ് ജീനിയസ് മീറ്റും എസ്എസ്എല്‍സി, പ്ലസ്ടു പരീക്ഷകളിലെ ഉന്നത വിജയികള്‍ക്ക് ആദരവും കോതമംഗലം വിമലഗിരി പബ്ലിക് സ്‌കൂളില്‍ ഇന്നു നടക്കും. രാവിലെ 10ന് ആന്‍റണി ജോണ്‍ എംഎല്‍എ ഉദ്ഘാടനം ചെയ്യും. മൂവാറ്റുപുഴ രൂപത വികാരി ജനറാള്‍ ഫാ. വര്‍ഗീസ് പന്തിരയിത്തടത്തില്‍ അധ്യക്ഷത വഹിക്കും. കരിയര്‍ ഗൈഡന്‍സ് ക്ലാസും ഉണ്ടാകും. എസ്എസ്എല്‍സി, പ്ലസ്ടു പരീക്ഷകളില്‍ വിജയിച്ച കോതമംഗലം മേഖലയിലെ എല്ലാ വിദ്യാര്‍ഥികള്‍ക്കും പങ്കെടുക്കാം. ഫോണ്‍: 9387549034, 9387549002.

വിദ്യാർഥിയെ വീടിനുള്ളിൽ മരിച്ചനിലയിൽ കണ്ടെത്തി

പെരുന്പാവൂർ: ഹൈസ്കൂൾ വിദ്യാർഥിയെ വീടിനുള്ളിൽ തുങ്ങി മരിച്ചനിലയിൽ കണ്ടെത്തി. ഐമുറി കൈയ്യുത്തിയാൽ കന്നപ്പിള്ളി നീതു-സജി ദന്പതികളുടെ മകൻ എസ്‌. ബൗഷിക് (15) ആണ് മരിച്ചത്. ഐമുറി ചേരാനല്ലൂർ ഹയർ സെക്കൻഡറി സ്കൂൾ 10-ാം ക്ലാസ് വിദ്യാർഥിയായിരുന്നു. കളമശേരി മെഡിക്കൽ കോളജ് ആശുപത്രിയിൽ പോസ്റ്റുമോർട്ടതിനുശേഷം സംസ്കാരം ഇന്ന് ഐമുറി തിരുഹൃദയ പള്ളിയിൽ. സഹോദരി: ആർഷിക (നാലാം ക്ലാസ്).

അയിരൂർപാടം അങ്കണവാടിയിൽ താലൂക്ക്തല പ്രവേശനോത്സവം

കോതമംഗലം: ഉത്സവാന്തരീക്ഷത്തിൽ കുരുന്നുകളെ വരവേൽക്കാൻ അയിരൂർപാടം അങ്കണവാടിയിൽ താലൂക്ക്തല പ്രവേശനോത്സവം നടത്തി. കുരുന്നുകളെ കിരീടം വച്ച്, പൂക്കളും, ബലൂണും, മധുരവും നൽകി സ്വാഗതം ചെയ്തു. ആന്‍റണി ജോണ്‍ എംഎൽഎ ഉദ്ഘാടനം നിർവഹിച്ചു. പിണ്ടിമന പഞ്ചായത്ത് പ്രസിഡന്‍റ് ജെസി സാജു അധ്യക്ഷത വഹിച്ചു. വാർഡംഗം അലിയാർ, ഐസിഡിഎസ് സൂപ്പർവൈസർ വിമല അങ്കണവാടി സേവന പദ്ധതി വിശദീകരണം നടത്തി. വർക്കർ സിജി ആന്‍റണി, ഹെൽപ്പർ അലീമ അബ്ദുൽ റഹ്മാൻ, എഎൽഎംസി അംഗങ്ങൾ എന്നിവർ പ്രസംഗിച്ചു. കോതമംഗലം : കവളങ്ങാട് പഞ്ചായത്ത് തല സ്കൂൾ പ്രവേശനോത്സവം നെല്ലിമറ്റം സെന്‍റ് ജോസഫ് യുപി സ്കൂളിൽ നടത്തി. കവളങ്ങാട് പഞ്ചായത്ത് പ്രസിഡന്‍റ് സിബി മാത്യു ഉദ്ഘാടനം ചെയ്തു. സ്കൂൾ മാനേജർ റവ. ഡോ. തോമസ് ജെ. പറയിടം അധ്യക്ഷത വഹിച്ചു. പ്രധാനാധ്യാപകൻ വിനു ജോർജ്, പഞ്ചായത്തംഗം ടീന ടിനു, എംപിടിഎ പ്രസിഡന്‍റ് ഷീജ, ബിആർസി പ്രതിനിധി ലേഖ എന്നിവർ പ്രസംഗിച്ചു.

ചാവറ ഇന്‍റർനാഷണൽ അക്കാദമിയിൽ പ്രവേശനോത്സവം

വാഴക്കുളം: ചാവറ ഇന്‍റർനാഷണൽ അക്കാദമിയിൽ അധ്യയന വർഷാരംഭത്തിലെ പ്രവേശനോത്സവം വിപുലമായ പരിപാടികളോടെ ആഘോഷിച്ചു. മാത്യു കുഴൽനാടൻ എംഎൽഎ ഉദ്ഘാടനം ചെയ്തു. സ്കൂൾ മാനേജർ ഫാ. തോമസ് മഞ്ഞക്കുന്നേൽ അധ്യക്ഷത വഹിച്ചു. സ്കൂൾ മാഗസിൻ അറോറ’ യുടെ പ്രകാശനവും എംഎൽഎ നിർവഹിച്ചു. സ്കൂൾ വിദ്യാഭ്യാസം വെല്ലുവിളികളെ അതിജീവിക്കാൻ സജ്ജരാക്കുക’’എന്ന ആശയം മുൻ നിർത്തിയാണ് ഈ വർഷത്തെ പാഠ്യപാഠ്യേതര പ്രവർത്തനങ്ങളെ ഏകോപിപ്പിക്കുന്നതെന്ന് പ്രിൻസിപ്പൽ ഫാ. ഡിനോ കള്ളിക്കാട്ട് അറിയിച്ചു. വൈസ് പ്രിൻസിപ്പൽ ഫാ. ജിത്തു ജോർജ് തൊട്ടിയിൽ പ്രസംഗിച്ചു. പ്രവേശനോത്സവത്തോടനുബന്ധിച്ച് കുട്ടികൾ വിവിധ കലാപരിപാടികളും അവതരിപ്പിച്ചു.

സ്വിഫ്റ്റ് ബസിൽ നിന്നും തീയും പുകയും: ജനം പരിഭ്രാന്തരായി

കോതമംഗലം : കെഎസ്ആർടിസി സ്വിഫ്റ്റ് ബസിൽ നിന്നും ഓട്ടത്തിനിടെ തീയും പുകയും ഉയന്നത് പരിഭ്രാന്തി പരത്തി. അഗ്നിശമന രക്ഷാസേനയെത്തി തീയണച്ചു. മൂന്നാറിൽ നിന്ന് ബംഗളൂരുവിലേക്ക് പോകുകയായിരുന്ന ബസ് നെല്ലിമറ്റത്ത് എത്തിയപ്പോഴാണ് പൊട്ടിത്തെറിയും പുകയും വലിയ ശബ്ദവുമുണ്ടായത്. ഉടനെ ബസ് നിർത്തി യാത്രക്കാരെ പുറത്തിറക്കി. നാട്ടുകാർ ഓടിക്കൂടി രക്ഷാപ്രവർത്തനം നടത്തി. വൈകുന്നേരം 5.30ഓടെയാണ് സംഭവം. യാത്രക്കാരെ മറ്റൊരു ബസിൽ കയറ്റിവിട്ടു.

ലഹരിക്കെതിരെ പോരാടാം എന്ന സന്ദേശവുമായി വിദ്യാർഥികൾക്ക് സൗജന്യ യാത്രയൊരുക്കി സ്വകാര്യബസുകൾ

കോതമംഗലം: ലഹരിക്കെതിരെ പോരാടാം എന്ന സന്ദേശമുയർത്തി സ്വകാര്യ ബസുകൾ കോതമംഗലത്ത് മുഴുവൻ വിദ്യാർഥികൾക്കും സൗജന്യ യാത്രാ സൗകര്യം ഒരുക്കി. അയിഷാസ് ഗ്രൂപ്പിന്‍റെ നേതൃത്വത്തിൽ നടത്തിയ പരിപാടി ആന്‍റണി ജോണ്‍ എംഎൽഎ ഉദ്ഘാടനം ചെയ്തു. സമൂഹത്തിന്‍റെയാകെ പിന്തുണയോടെ സംസ്ഥാനത്ത് ലഹരിക്കെതിരെ നടത്തുന്ന പോരാട്ടത്തിൽ സ്വകാര്യ ബസുടമകളും പങ്കാളികളാകുന്നത് ഏറ്റവും മാതൃകാപരമായ പ്രവൃത്തിയാണെന്ന് എംഎൽഎ പറഞ്ഞു. ഇന്നും വിദ്യാർഥികൾക്ക് യാത്ര സൗജന്യമായിരിക്കും. നിരവധി യാത്രക്കാരും, വിദ്യാർഥികളും പങ്കെടുത്ത ചടങ്ങിൽ കോതമംഗലം ട്രാഫിക് എസ്ഐ സി.പി. ബഷീർ, ബസ് ഓണേഴ്സ് അസോസിയേഷൻ സെക്രട്ടറി സി.ബി. നവാസ്, അയിഷാസ് ഗ്രൂപ്പ് എംഡി ഷാജി തോപ്പിക്കുടിയിൽ, ഷംസുദ്ദീൻ തോപ്പിക്കുടിയിൽ, തങ്കച്ചൻ ഇലഞ്ഞിക്കമാലി, അലോഷി ആവോലി, എ.ജെ. ദിലീപ് എന്നിവർ പങ്കെടുത്തു.

പ്ലസ്ടു വിദ്യാർഥിയെ കാണാനില്ല : അന്വേഷണത്തിന് പ്രത്യേക സംഘം

പിറവം: കഴിഞ്ഞ തിങ്കളാഴ്ച രാവിലെ മുതൽ പിറവത്തിനടുത്ത് ഓണക്കൂറിൽ നിന്നും കാണാതായ പ്ലസ്ടു വിദ്യാർഥി അർജുൻ രഘു(17)വിനെക്കുറിച്ച് വിവരങ്ങളൊന്നും ലഭിച്ചില്ല. കേസ് അന്വേഷണത്തിന് കൂത്താട്ടുകുളം ഇൻസ്പെക്ടർ സഞ്ജു ജോസഫിന്‍റെ നേതൃത്വത്തിൽ പ്രത്യേക സംഘം രൂപീകരിച്ചിട്ടുണ്ട്. ഓണക്കൂർ കരയോഗപ്പടിക്ക് സമീപം ഓലോത്തിൽ വീട്ടിൽ രഘുനാഥന്‍റെ മകനും പാന്പാക്കുട എംടിഎം ഹയർസെക്കൻഡറി സ്കൂൾ പ്ലസ്ടു വിദ്യാർഥിയുമാണ് അർജുൻ. തിങ്കളാഴ്ച രാവിലെ സ്കൂളിലേക്ക് പോകുന്നതിനായാണ് വീട്ടിൽ നിന്നുമിറങ്ങിയത്. രാത്രിയായിട്ടും തിരിച്ചെത്താത്തതിനത്തുടർന്ന് വീട്ടുകാർ പിറവം പോലീസിൽ പരാതി നൽകുകയായിരുന്നു. മാതാപിതാക്കൾ ജോലി കഴിഞ്ഞെത്തിയപ്പോഴാണ് മകൻ വന്നിട്ടില്ലെന്നറിഞ്ഞത്. മാതാവ് സ്കൂളിലേക്ക് വിളിക്കുന്നതിനായി ഫോൺ നോക്കിയപ്പോൾ, അർജുൻ എത്തിയിട്ടില്ലെന്നറിയിച്ചു ഉച്ചയോടെ സ്കൂൾ അധികൃതർ അയച്ച മെസേജ് ശ്രദ്ധയിൽപ്പെട്ടു. സ്കൂളുമായും, സഹപാഠികളുമായും ഫോണിൽ ബന്ധപ്പെട്ടെങ്കിലും വിവരമൊന്നും ലഭിച്ചില്ല. സിസിടിവി ദൃശ്യത്തിൽ കരയോഗപ്പടി ജംഗ്ഷനിലൂടെ അർജുൻ നടന്നു പോകുന്നത് കണ്ടെത്തിയിട്ടുണ്ട്. പക്ഷേ, ഈ ദൃശ്യം അവ്യക്തമാണ്. പിറവം-എറണാകുളം റോഡിൽ പേപ്പതി ജംഗ്ഷനിൽ തിങ്കളാഴ്ച രാത്രിയിൽ ബസിറങ്ങിയതായും പറയുന്നുണ്ട്. ഇതേത്തുടർന്ന് ഇന്നലെ ഈ ഭാഗത്ത് ബന്ധുക്കൾ തെരച്ചിൽ നടത്തി. പിറവം റോഡ് റെയിൽവേ സ്റ്റേഷനിലെ സിസി ടിവി ദൃശങ്ങളും ഇന്നലെ രാത്രി പരിശോധിച്ചു. പ്ലസ്‌വൺ റിസൾട്ട് വന്നപ്പോൾ മാർക്ക് കുറവായിരുന്നെങ്കിലും, അർജുൻ എല്ലാ വിഷയങ്ങൾക്കും വിജയിച്ചിരുന്നുവെന്ന് മാതാപിതാക്കൾ പറയുന്നു. ഇതിന്‍റെ പേരിൽ മാറി നിൽക്കാൻ സാധ്യതയില്ലന്നും അവർ ചൂണ്ടിക്കാണിക്കുന്നു.

ദീപിക യംഗ് ജീനിയസ് മീറ്റും ഉന്നത വിജയികള്‍ക്ക് ആദരവും ഇന്ന് മൂവാറ്റുപുഴയില്‍

മൂവാറ്റുപുഴ: എസ്എസ്എല്‍സി, പ്ലസ്ടു പരീക്ഷാ വിജയികള്‍ക്കായി ദീപിക യംഗ് ജീനിയസ് മീറ്റും ഉന്നതവിജയം നേടിയവര്‍ക്ക് ആദരവും ഇന്ന് മൂവാറ്റുപുഴയില്‍. പരിപാടിയോടനുബന്ധിച്ചു വിദഗ്ധര്‍ നയിക്കുന്ന കരിയര്‍ ഗൈഡന്‍സ് ക്ലാസുകളും ഉണ്ടാകും. ഇന്നു രാവിലെ പത്തിന് മൂവാറ്റുപുഴ നിര്‍മല ഹയര്‍ സെക്കന്‍ഡറി സ്‌കൂളില്‍ നടക്കുന്ന യംഗ് ജീനിയസ് മീറ്റ് മാത്യു കുഴൽനാടൻ എംഎൽഎ ഉദ്ഘാടനം ചെയ്യും. കോതമംഗലം രൂപത വികാരി ജനറാള്‍ മോണ്‍. പയസ് മലേക്കണ്ടത്തില്‍ അധ്യക്ഷത വഹിക്കും. രാഷ്ട്രദീപിക മാനേജിംഗ് ഡയറക്ടര്‍ ഫാ. മൈക്കിള്‍ വെട്ടിക്കാട്ട് മുഖ്യപ്രഭാഷണം നടത്തും. ഡയറക്ടറും കൊച്ചി റസിഡന്‍റ് മാനേജരുമായ ഫാ. സൈമണ്‍ പള്ളുപ്പേട്ട, ഡയറക്ടര്‍ റവ. ഡോ. തോമസ് പോത്തനാമുഴി, ജനറല്‍ മാനേജര്‍ ഫാ. ജിനോ പുന്നമറ്റം, ഡിഎഫ്‌സി കോതമംഗലം രൂപത ഡയറക്ടര്‍ ഫാ. ആന്‍റണി പുത്തന്‍കുളം, സ്‌കൂള്‍ പ്രിന്‍സിപ്പല്‍ ഫാ. പോള്‍ എടത്തൊട്ടി എന്നിവര്‍ പ്രസംഗിക്കും. എസ്എസ്എല്‍സി, പ്ലസ്ടു പരീക്ഷകളില്‍ എല്ലാ വിഷയങ്ങള്‍ക്കും എ പ്ലസ് നേടിയവര്‍, സിബിഎസ്ഇ, ഐസിഎസ്ഇ പരീക്ഷകളില്‍ 90 ശതമാനത്തിനു മുകളില്‍ മാര്‍ക്ക് നേടിയവരെയും ഉന്നത വിജയം നേടിയ സ്‌കൂളുകളെയും ചടങ്ങില്‍ ആദരിക്കും. ജര്‍മന്‍ ഭാഷാപരിശീലന രംഗത്തെ പ്രമുഖരായ എന്‍. ഏബിള്‍ ട്രെയ്‌നിംഗ് ഇന്‍സ്റ്റിറ്റ്യൂട്ടിലെ (ഇന്ത്യാസ് ബിഗസ്റ്റ് ജര്‍മന്‍ ലാംഗ്വേജ് ഗുരുകുലം) വിദഗ്ധര്‍ കരിയര്‍ ഗൈഡന്‍സ് ക്ലാസുകള്‍ നയിക്കും. എസ്എസ്എല്‍സി, പ്ലസ്ടു പരീക്ഷകളില്‍ വിജയിച്ച മൂവാറ്റുപുഴ മേഖലയിലെ എല്ലാ വിദ്യാര്‍ഥികള്‍ക്കും ക്ലാസില്‍ പങ്കെടുക്കാം. നാളെ കോതമംഗലം വിമലഗിരി പബ്ലിക് സ്‌കൂളില്‍ നടക്കുന്ന ദീപിക യംഗ് ജീനിയസ് മീറ്റും ഉന്നത വിജയികള്‍ക്ക് ആദരവും രാവിലെ പത്തിനു മൂവാറ്റുപുഴ രൂപത വികാരി ജനറാള്‍ ഫാ. വര്‍ഗീസ് പന്തിരയിത്തടത്തില്‍ ഉദ്ഘാടനം ചെയ്യും. ആന്‍റണി ജോണ്‍ എംഎല്‍എ അധ്യക്ഷത വഹിക്കും. എസ്എസ്എല്‍സി, പ്ലസ്ടു പരീക്ഷകളില്‍ വിജയിച്ച കോതമംഗലം മേഖലയിലെ എല്ലാ വിദ്യാര്‍ഥികള്‍ക്കും ക്ലാസില്‍ പങ്കെടുക്കാം. കൂടുതല്‍ വിവരങ്ങള്‍ക്ക് 9387549034, 9387549002 എന്നീ നമ്പറുകളില്‍ വിളിക്കുക.

അറ്റകുറ്റപ്പണികൾ നടത്തിയില്ല : മൂവാറ്റുപുഴയിലെ റോഡുകളിൽ അപകടക്കുഴികൾ

മൂവാറ്റുപുഴ: മഴക്കാലമായതോടെ നഗരത്തിലെ നിരത്തുകളിൽ ഇറങ്ങുന്നവർ ജാഗ്രതൈ. കുണ്ടും കുഴിയും നിറഞ്ഞും, വൈദ്യുത കന്പികൾ പൊട്ടിവീണും റോഡുകളിൽ വലിയ അപകടങ്ങളാണ് കാത്തിരിക്കുന്നത്. അറ്റകുറ്റപ്പണികൾ നടത്താതെ നഗരത്തിലെ റോഡുകളിൽ പലതിലും വലിയ കുഴികളാണ് രൂപപ്പെട്ടിരിക്കുന്നതും. കുഴികളിൽ വെള്ളം നിറയുന്നതോടെ റോഡേത് കുഴിയേതെന്ന് തിരിച്ചറിയാനുമാകുന്നില്ല. ഇരുചക്ര വാഹന യാത്രികരാണ് കൂടുതലും അപകടത്തിൽ പെടുന്നതും. നഗര വികസന പ്രവർത്തനം നടക്കുന്ന മൂവാറ്റുപുഴ പിഒ ജംഗ്ഷൻ മുതൽ കച്ചേരിതാഴം വരെ ദുരിതയാത്ര തന്നെയാണ്. ഇതിനുപുറമേ നഗര വികസന പ്രവർത്തനങ്ങളുടെ ഭാഗമായി വണ്‍വേ സന്പ്രദായം കർശനമാക്കിയ നഗര റോഡുകളിലെല്ലാം ഭാരവാഹനങ്ങളടക്കം എത്തുന്നതിനാൽ അവിടേയും റോഡുകൾ തകരാനും ഗർത്തം രൂപപ്പെടാനും കാരണമായി. അപകടഭീഷണിയായി കുഴികൾ രൂപപ്പെട്ടിട്ടും പിഡബ്ല്യുഡി അധികൃതർ അനാസ്ഥ തുടരുകയാണെന്നാണ് ആക്ഷേപം. ഇതിനിടെ റോഡരികുകളിലെ കെഎസ്ഇബി പോസ്റ്റുകളിൽ നിന്ന് വൈദ്യുത കന്പികൾ പൊട്ടി വീഴുന്നതും യാത്രക്കാർക്ക് അപകട ഭീഷണിയാകുന്നു. സ്കൂളുകൾ കൂടി പ്രവർത്തനമാരംഭിച്ചതോടെ നിരത്തിലിറങ്ങുന്ന വാഹനങ്ങളുടെ എണ്ണവും ഗണ്യമായി വർധിച്ചിട്ടുണ്ട്. കിഴക്കേക്കര കന്പനിപ്പടി റോഡ് തകർന്നു മൂവാറ്റുപുഴ: കുടിവെള്ള പൈപ്പ് സ്ഥാപിക്കുന്നതിന്‍റെ ഭാഗമായി ജല അഥോറിറ്റി അധികൃതർ അറ്റകുറ്റപ്പണികൾ നടത്തിയ കിഴക്കേക്കര - കന്പനിപ്പടി റോഡ് തകർന്ന് കുഴികൾ രൂപപ്പെട്ടതോടെ യാത്രക്കാർ ദുരിതത്തിലായി. മൂവാറ്റുപുഴ നഗര വികസനത്തിന്‍റെ ഭാഗമായി പ്രധാന ബൈപ്പാസ് റോഡായി ഉപയോഗിക്കുന്ന റോഡാണിത്. തൊടുപുഴ ഭാഗത്തേക്ക് പോകേണ്ട വാഹനങ്ങൾ പ്രധാനമായും ഉപയോഗിക്കുന്ന റോഡിൽ പൈപ്പ് സ്ഥാപിക്കുന്നതിനായി ജല അഥോറിറ്റി പിഡബ്ല്യുഡി വകുപ്പിന് പണം അടച്ചിരുന്നു. എന്നാൽ തുടർനടപടി സ്വീകരിക്കേണ്ട പിഡബ്ല്യുഡി ഇപ്പോൾ അനാസ്ഥ തുടരുകയാണെന്നാണ് ആക്ഷേപം. നിരവധിതവണ ആവശ്യപ്പെട്ടിട്ടും റോഡിലെ കുഴി അടക്കുന്നതിനോ കോണ്‍ക്രീറ്റ് ചെയ്യാനോ അറ്റകുറ്റപ്പണികൾ നടത്താനോ അധികൃതർ തയാറാകുന്നില്ലെന്ന് നാട്ടുകാർ പറയുന്നു. തുടർച്ചയായി ഭാരവാഹനങ്ങളും മറ്റും എത്തിയതോടെ റോഡ് കൂടുതൽ തകരുന്നതിനും, ഗർത്തം രൂപപ്പെടുന്നതിനും കാരണമായി. പിഡബ്ല്യുഡി അധികൃതർ നാളുകളായി തുടരുന്ന അനാസ്ഥ അവസാനിപ്പിക്കണമെന്നും യാത്രക്കാരെ ദുരിതത്തിലാക്കുന്ന പ്രശ്നത്തിന് ഉടൻ പരിഹാരമുണ്ടാക്കണമെന്നുമാണ് ആവശ്യം ഉയർന്നിരിക്കുന്നത്.

വൈദിക പീഡനം: കുറ്റക്കാര്‍ക്കെതിരെ കടുത്തശിക്ഷ വേണമെന്ന് അല്‍മായ ശബ്ദം

കൊച്ചി: രണ്ടു മലയാളി വൈദികര്‍ക്ക് ഒഡീഷയിൽ ക്രൂരമര്‍ദനങ്ങള്‍ ഏല്‍ക്കേണ്ടി വന്ന സംഭവം അങ്ങേയറ്റം വേദനാജനകവും പ്രതിഷേധാര്‍ഹവുമാണെന്ന് അല്‍മായ ശബ്ദം ഭാരവാഹികൾ ചൂണ്ടിക്കാട്ടി. കുറ്റക്കാര്‍ക്കെതിരെ മുഖം നോക്കാതെ കടുത്ത ശിക്ഷ നടപടി സ്വീകരിക്കാന്‍ കേന്ദ്ര, സംസ്ഥാന സര്‍ക്കാരുകള്‍ തയാറാകണമെന്ന് കണ്‍വീനര്‍ ബിജു പോള്‍ നെറ്റിക്കാടന്‍, ഷൈബി പാപ്പച്ചന്‍ എന്നിവര്‍ ആവശ്യപ്പെട്ടു.

ചാലാക്ക സ്നേഹതീരം അവാർഡ് ദാനച്ചടങ്ങ് നടത്തി

നെടുമ്പാശേരി : ചാലാക്ക സ്നേഹതീരം ചാരിറ്റബിൾ സൊസൈറ്റിയുടെ നേതൃത്വത്തിൽ വിദ്യാഭ്യാസ അവാർഡ് ദാനവും പഠനോപകരണ വിതരണവും സംഘടിപ്പിച്ചു. ചാലാക്ക പ്രദേശത്ത് നിന്നും എസ്എസ്എൽസി, പ്ലസ്ടു പരീക്ഷകളിൽ വിജയിച്ച മുഴുവൻ വിദ്യാർഥികൾക്കും അവാർഡ് നൽകി. ഒന്ന് മുതൽ പ്ലസ്ടു വരെയുള്ള ക്ലാസുകളിൽ പഠിക്കുന്ന എല്ലാ വിദ്യാർഥികൾക്കും പഠനോപകരണങ്ങളും വിതരണം ചെയ്തു. ഡിസിസി പ്രസിഡന്‍റ് മുഹമ്മദ് ഷിയാസ് ഉദ്ഘാടനം ചെയ്തു. സ്നേഹതീരം പ്രസിഡന്‍റ് ടി.കെ. അജികുമാർ അധ്യക്ഷനായിരുന്നു. കൺവീനർ ജി. അനിൽ സ്വാഗതം പറഞ്ഞു. പഞ്ചായത്ത് പ്രസിഡന്‍റ് സൈന ബാബു പഠനോപകരണങ്ങൾ വിതരണം ചെയ്തു. കോൺഗ്രസ് മണ്ഡലം പ്രസിഡന്‍റ് ആർ. അനിൽ, ബ്ലോക്ക് ജനറൽ സെക്രട്ടറി ഷജിൻ ചിലങ്ങര, യൂത്ത് കോൺഗ്രസ് മണ്ഡലം പ്രസിഡന്‍റ് പി.കെ. മുഹമ്മദ് അജാസ്, വർഗീസ് പൊന്നാകുടം തുടങ്ങിയവർ സംസാരിച്ചു. ശ്രീനാരായണ ഇൻസ്റ്റിറ്റ്യൂട്ട് ഓഫ് മെഡിക്കൽ സയൻസസിൽ നിന്നും കേരള യൂണിവേഴ്സിറ്റിയിൽ ഒന്നാം റാങ്ക് കരസ്ഥമാക്കിയ ഡോ. അമൃത കൃഷ്ണയെ ചടങ്ങിൽ ആദരിച്ചു.

തൊഴിലുറപ്പ് തൊഴിലാളികൾക്ക് മഴക്കോട്ട് വിതരണം ചെയ്തു

അങ്കമാലി: യൂത്ത് കോൺഗ്രസ് അങ്കമാലി മണ്ഡലം കമ്മിറ്റിയുടെയും ഉമ്മൻചാണ്ടി ചാരിറ്റബിൾ ട്രസ്റ്റിന്‍റെയും നേതൃത്വത്തിൽ കുട്ടികൾക്ക് പഠനോപകരണങ്ങളും തൊഴിലുറപ്പ് പദ്ധതിയിലെ മുതിർന്ന തൊഴിലാളികൾക്ക് മഴക്കോട്ടുകളും വിതരണം ചെയ്തു. അങ്കമാലി നഗരസഭ ചെയർമാൻ അഡ്വ. ഷിയോ പോൾ ഉദ്ഘാടനം നിർവഹിച്ചു. യൂത്ത് കോൺഗ്രസ് അങ്കമാലി മണ്ഡലം പ്രസിഡന്‍റ് റിൻസ് ജോസ് അധ്യക്ഷത വഹിച്ചു. യൂത്ത് കോൺഗ്രസ് ജില്ലാ ഭാരവാഹികളായ ആൻമേരി ടോമി, ടിനു മോബിന്‍സ്, അനീഷ് മണവാളൻ, നിയോജകമണ്ഡലം വൈസ് പ്രസിഡന്‍റ് ബേസിൽ മേച്ചേരി, ജോൺസ് ഷാജു, അങ്കമാലി നഗരസഭ ആരോഗ്യ സ്റ്റാൻഡിംഗ് കമ്മിറ്റി ചെയർമാൻ മനു നാരായണൻ, ക്ഷേമകാര്യ സ്റ്റാൻഡിംഗ് കമ്മിറ്റി ചെയർപേഴ്സൺ ഷൈനി മാർട്ടിൻ, കോൺഗ്രസ് വാർഡ് പ്രസിഡന്‍റ് ഇ.പി. വർഗീസ്, ബൂത്ത് പ്രസിഡന്‍റ് ടികെ. തങ്കപ്പൻ, കോൺഗ്രസ് നേതാക്കളായ സി.കെ. സൈമൺ, കെ.എം. ആന്‍റു, പി.ഡി. ബാബു, സിജി പോൾ തുടങ്ങിയവർ സംസാരിച്ചു.

കുടുംബസംഗമവും ഐഡന്‍റിറ്റി കാർഡ് വിതരണവും

അങ്കമാലി: സൗണ്ട് ആൻഡ് ഇലൂമിനേഷൻ പന്തൽ വർക്കേഴ്സ് യൂണിയൻ എറണാകുളം ജില്ലാ കുടുംബ സംഗമവും അംഗങ്ങൾക്കുള്ള ഐഡന്‍റിറ്റി കാർഡ് വിതരണവും അങ്കമാലിയിൽ നടന്നു. അങ്കമാലി സൗത്തിൽ കുടുംബശ്രീ കഫേ ഹാളിൽ നടന്ന സമ്മേളനം സിഐടിയു ഏരിയ സെക്രട്ടറി സി.കെ. സലിം കുമാർ ഉദ്ഘാടനം ചെയ്തു. യോഗത്തിൽ യൂണിയന്‍റെ ജില്ല പ്രസിഡന്‍റ് ജെയ്സൻ വർഗീസ് അധ്യഷത വഹിച്ചു. യൂണിയൻ സംസ്ഥാന ജനറൽ സെക്രട്ടറി ഡി. മനോഹരൻ മുഖ്യപ്രഭാഷണം നടത്തി. സിഐടിയു ഏരിയ പ്രസിഡന്‍റ് പി.വി. ടോമി അംഗത്വ കാർഡ് വിതരണോദ്ഘാടനം നിർവഹിച്ചു. ജില്ലാ സെക്രട്ടറി പി.എ. ജോണി റിപ്പോർട്ട് അവതരിപ്പിച്ചു. യൂണിയൻ ഭാരവാഹികളായ സുനിൽകുമാർ, ദിലീപ് കുമാർ, എംഡി ജോജി, കെ എസ് ബെന്നി, ഏലിയാസ് സുമിട്ടോൻ , എന്നിവർ സംസാരിച്ചു.

പാറക്കടവ് ബ്ലോക്ക്തല അങ്കണവാടി പ്രവേശനോത്സവം

നെടുമ്പാശേരി: പാറക്കടവ് ബ്ലോക്ക് തല അങ്കണവാടി പ്രവേശനോത്സവം നെടുമ്പാശേരി പഞ്ചായത്തിലെ മളളുശേരി100ാം നമ്പർ അങ്കണവാടിയിൽ നടന്നു. പ്രവേശനോത്സവത്തിന്‍റെ ഉദ്ഘാടനം ബ്ലോക്ക് പഞ്ചായത്ത് പ്രസിഡന്‍റ് ടി.വി. പ്രദീഷ് നിർവഹിച്ചു. പഞ്ചായത്ത് പ്രസിഡന്‍റ് എ.വി. സുനിൽ അധ്യക്ഷനായിരുന്നു. ബ്ലോക്ക് പഞ്ചായത്ത് വൈസ് പ്രസിഡന്‍റ് താര സജീവ്, ആരോഗ്യ-വിദ്യാഭ്യാസ സ്ഥിരം സമിതി അധ്യക്ഷൻ അഡ്വ. ഷബീർ അലി, പഞ്ചായത്തംഗം സി.ഒ. മാർട്ടിൻ, ബ്ലോക്ക് ശിശുവികസന പദ്ധതി ഓഫീസർ ഗീതാജ്ഞലി, സൂപ്പർവൈസർ സൗമ്യ ജോസഫ് എന്നിവർ സംസാരിച്ചു. ബ്ലോക്ക് അതിർത്തിയിലെ സ്വന്തമായി കെട്ടിടമുള്ള മുഴുവൻ അങ്കണവാടികളെയും സ്മാർട്ട് അങ്കണവാടികളാക്കാനുള്ള പ്രവർത്തനങ്ങൾ പുരോഗമിക്കുകയാണെന്ന് ബ്ലോക്ക് പഞ്ചായത്ത് പ്രസിഡന്‍റ് പറഞ്ഞു.

ജപ്തി ചെയ്ത സ്ഥാപനത്തിലെ 2,000 കിലോ ഭാരമുള്ള ലോക്കർ ആലുവയിലെത്തിച്ചു

ആലുവ: സർക്കാർ കണ്ടുകെട്ടിയ പണമിടപാട് സ്ഥാപനത്തിലെ 2000 കിലോ ഭാരമുള്ള ലോക്കർ ക്രെയിൻ സഹായത്താൽ ആലുവ വെസ്റ്റ് വില്ലേജ് ഓഫീസിൽ എത്തിച്ചു. ഇന്നലെ രാത്രി 8.30 ഓടെയാണ് ബ്രിഡ്ജ് റോഡിലുള്ള പഴയ വില്ലേജ് കെട്ടിടത്തിലേക്ക് മാറ്റിയത്. പോപ്പുലർ ഫൈനാൻസിന്‍റെ മഞ്ഞപ്ര വടക്കുംഭാഗം ശാഖ പ്രവർത്തിച്ചിരുന്ന കെട്ടിടത്തിലേതാണ് അമിതഭാരമുള്ള ലോക്കർ. സാമ്പത്തിക പ്രതിസന്ധിയിൽ 2021ലാണ് സ്ഥാപനം സർക്കാർ കണ്ടുകെട്ടിയത്. സ്വർണവും മറ്റ് വിലപിടിപ്പുള്ള സാധനങ്ങളും ജില്ലാ ട്രഷറിയിലേക്ക് അന്നുതന്നെ മാറ്റിയിരുന്നു. ഇത്രയും വർഷം കഴിഞ്ഞിട്ടും ലോക്കറും ഫർണിച്ചറുകളുമെല്ലാം മാറ്റാത്തതിനെതിരെ കെട്ടിട ഉടമ ബാബു സെബാസ്റ്റ്യൻ ഹൈക്കോടതിയെ സമീപിച്ചതോടെയാണ് ലോക്കർ നീക്കിയത്. ഫർണിച്ചറുകൾ അങ്കമാലി മിനി സിവിൽ സ്റ്റേഷനിലെ കെട്ടിടത്തിൽ എത്തിച്ചു. മൂന്നാം നിലയിലേക്ക് കയറ്റാൻ കഴിയാത്തതിനാലാണ് ആലുവയിലെ വില്ലേജ് ഓഫീസിനോട് ചേർന്നുള്ള പഴയ കെട്ടിടം ലോക്കർ സൂക്ഷിക്കാൻ തെരഞ്ഞെടുത്തത്. ക്രെയിൻ ഉപയോഗിച്ചാണ് മിനി ലോറിയിലേക്ക് ലോക്കർ കയറ്റിയത്. ആലുവയിലെത്തിച്ച ശേഷവും ക്രെയിൻ സഹായത്താൽ ലോറിയിൽ നിന്നും ഇറക്കി വില്ലേജ് ഓഫീസ് കോമ്പൗണ്ടിലേക്ക് കയറ്റിയത്. ആലുവ തഹസിൽദാർ ഡിക്സി ഫ്രാൻസിസിന്‍റെ നേതൃത്വത്തിൽ റവന്യൂ ജീവനക്കാരും മണിക്കൂറുകളോളം ഏറെ കഷ്ടപ്പെട്ടു. ബാങ്ക് ജംഗ്ഷനും മെട്രോ സ്റ്റേഷനുമിടയിൽ ഗതാഗത തടസവും ഉണ്ടായി.

പട്ടിമറ്റത്തെ ഗതാഗതക്കുരുക്കിന് പരിഹാര നിര്‍ദേശവുമായി സർവകക്ഷിയോഗം

പെരുമ്പാവൂര്‍: പട്ടിമറ്റം ജംഗ്ഷനിലെ ഗതാഗതക്കുരുക്ക് പരിഹരിക്കുന്നതിന് പി.വി. ശ്രീനിജിന്‍ എംഎല്‍എ വിളിച്ചുചേര്‍ത്ത സര്‍വകക്ഷിയോഗം ചില പ്രായോഗിക നിര്‍ദേശങ്ങള്‍ മുന്നോട്ടുവച്ചു. വ്യാപാരികളും ഓട്ടോറിക്ഷ തൊഴിലാളികളും പൊതുജനങ്ങളും അവര്‍ നേരിടുന്ന പ്രശ്‌നങ്ങള്‍ യോഗത്തില്‍ അവതരിപ്പിച്ചു. ഇത് ഫലപ്രദമായി നടപ്പാക്കുന്നതിന് ജംഗ്ഷന്‍ സര്‍വേയും പഠനവും അറയ്ക്കപ്പടി ജയ് ഭാരത് എന്‍ജിനീയറിംഗ് കോളജിലെ സിവില്‍ എന്‍ജിനീയറിംഗ് ഡിപ്പാര്‍ട്ട്‌മെന്‍റ് ഏറ്റെടുത്തു. പ്രഫ. കെ.കെ. അജിനബി, പി.എ. ഫാബി, ആര്യ സെല്‍വരാജ് എന്നിവരുടെ നേതൃത്വത്തില്‍ സിവില്‍ എൻജിനീയറിംഗ് വിദ്യാര്‍ഥികള്‍, കോലഞ്ചേരി, മൂവാറ്റുപുഴ, പെരുമ്പാവൂര്‍, കിഴക്കമ്പലം ഭാഗത്തേക്കുള്ള റോഡുകളുടെ അവസ്ഥയും വിസ്തീര്‍ണവും പരിശോധിച്ച് ബസ് സ്റ്റോപ്പുകള്‍ക്ക് അനുയോജ്യമായ സ്ഥലങ്ങള്‍ കണ്ടെത്തി, പട്ടിമറ്റം ജംഗ്ഷനിലെ ഗതാഗതക്കുരുക്ക് ഒഴിവാക്കുന്നതിന് വേണ്ട ശാസ്ത്രീയ നിര്‍ദേശങ്ങള്‍ അധികൃതര്‍ക്ക് സമര്‍പ്പിക്കും.

കെഎസ്ഇബി ജീവനക്കാരനെ സിമന്‍റ്കട്ട കൊണ്ട് മർദിച്ചെന്ന്

പനങ്ങാട്: ബൈക്കിൽ സഞ്ചരിക്കുകയായിരുന്ന കെഎസ്ഇബി ജീവനക്കാരനെ സിമന്‍റ് കട്ട കൊണ്ട് മർദിച്ചതായി പരാതി. പനങ്ങാട് സ്വദേശിയും കെഎസ്ഇബി കരാർ ജീവനക്കാരനുമായ അപ്പുവിനാണ് മർദനമേറ്റത്. ചൊവ്വാഴ്ച ഉച്ചകഴിഞ്ഞ് 3.30 ഓടെയായിരുന്നു സംഭവം. പരിക്കേറ്റ അപ്പുവിനെ തൃപ്പൂണിത്തുറ താലൂക്കാശുപത്രിയിൽ പ്രവേശിപ്പിച്ചു. പനങ്ങാട് ചിറ്റമനപറമ്പ് സി.കെ. ജെയ്നി എന്നയാളാണ് ആക്രമിച്ചതെന്ന് പറയുന്നു. വൈദ്യുതി തകരാർ പരാതി പരിഹരിക്കാൻ റോഡിലൂടെ വാഹനത്തിൽ പോകുമ്പോഴാണ് ആക്രമണം നടത്തിയതെന്ന് പറയുന്നു. പനങ്ങാട് പോലീസ് കേസെടുത്ത് ഒളിവിൽ പോയ പ്രതിക്കായി അന്വേഷണമാരംഭിച്ചിട്ടുണ്ട്. കഴിഞ്ഞ വർഷം സെപ്റ്റംബറിൽ വീട്ടിൽ വൈദ്യുതി വിഛേദിക്കാനെത്തിയ കെഎസ്ഇബി ജീവനക്കാരെ ഹെൽമറ്റ് കൊണ്ട് മർദിച്ച കേസിൽ പ്രതിയാണ് ജെയ്നി.

വല്ലാര്‍പാടം ബസിലിക്കയില്‍ തിരുനാളിന് കൊടിയേറി

കൊച്ചി: വല്ലാര്‍പാടം ബസിലിക്കയില്‍ പെന്തക്കോസ്ത തിരുനാളിന് ആര്‍ച്ച്ബിഷപ് ഡോ. ഫ്രാന്‍സിസ് കല്ലറക്കല്‍ കൊടിയേറ്റി. തുടര്‍ന്ന് ദിവ്യബലിയില്‍ അദ്ദേഹം മുഖ്യകാർമികനായി. പ്രധാന തിരുനാള്‍ ദിനമായ എട്ടിന് തിരുക്കര്‍മങ്ങള്‍ക്ക് വരാപ്പുഴ ആര്‍ച്ച്ബിഷപ് ഡോ. ജോസഫ് കളത്തിപ്പറമ്പില്‍, സഹായമെത്രാന്‍ ഡോ. ആന്‍റണി വാലുങ്കല്‍ തുടങ്ങിയവര്‍ മുഖ്യ കാര്‍മികത്വം വഹിക്കും. 15നാണ് എട്ടാമിടം.

പാർക്കിംഗ് മേഖല കൈയടക്കി വർക്ക്ഷോപ്പ്; നടപടിയെടുക്കാൻ മടിച്ച് ആലുവ നഗരസഭ

ആലുവ: പാലസ് റോഡിൽ നഗരസഭയുടെ ഉടമസ്ഥതയിലുള്ള റെസ്റ്റ് ഹൗസ് ബിൽഡിംഗിലെ പാർക്കിംഗ് മേഖല കൈയടക്കി ഇരുചക്ര വർക്ക്ഷോപ്പ് നടത്തുന്നതായി പരാതി. നിരവധി പരാതികൾ ലഭിച്ചിട്ടും ആലുവ നഗരസഭ നടപടി എടുക്കുന്നില്ലെന്നാണ് ആക്ഷേപം. തൊട്ടടുത്തുള്ള വ്യാപാരശാലയുടെ മറവിലാണ് പാർക്കിംഗ് മേഖല കയ്യേറിയിരിക്കുന്നത്. പരാതിയെ തുടർന്ന് നനഗരസഭ ആരോഗ്യ സ്റ്റാൻഡിംഗ് കമ്മിറ്റി ചെയർമാൻ എം.പി. സൈമണിന്‍റെ നിർദേശപ്രകാരം ഉദ്യോഗസ്ഥർ രണ്ടാഴ്ച്ച മുമ്പ് സ്ഥലം സന്ദർശിച്ച് കൈയേറ്റം കണ്ടെത്തിയെങ്കിലും ഇതുവരെ നോട്ടീസ് നൽകിയിട്ടില്ല.

നവീകരിച്ച ഫോർട്ടുകൊച്ചി കസ്റ്റംസ് ജെട്ടി ചോർന്നൊലിക്കുന്നു

ഫോർട്ടുകൊച്ചി : പൈതൃക പെരുമയോടെ നവീകരിച്ച് മൂന്ന് മാസങ്ങൾക്ക് മുൻപ് ഉദ്ഘാടനം ചെയ്ത ഫോർട്ടുകൊച്ചി കസ്റ്റംസ് ജെട്ടി ചോർന്നൊലിക്കുന്നു. സിഎസ്എംഎല്ലിന്‍റെ നേതൃത്വത്തത്തിലാണ് ജെട്ടി നവീകരിച്ച് മനോഹരമാക്കിയത്. എന്നാൽ മഴ പെയ്തതോടെ ചോർച്ചയും തുടങ്ങിയിരിക്കയാണ്. നേരത്തെ ജലഗതാഗത വകുപ്പ് നിർമിച്ച ടിക്കറ്റ് കൗണ്ടറിലും വലിയ ചോർച്ചയാണ് രൂപപ്പെട്ടിരിക്കുന്നത്. ടിക്കറ്റെടുക്കാൻ കുട പിടിച്ചു നിൽക്കേണ്ട അവസ്ഥയാണ്. മഴക്കാലം എത്തിയതോടെ യാത്രക്കാർ ദുരിതത്തിലായിരിക്കയാണെന്ന് പശ്ചിമകൊച്ചി പാസഞ്ചേഴ്സ് അസോസിയേഷൻ പ്രസിഡന്‍റ് മുഹമ്മദ് അബ്ബാസ് പറഞ്ഞു. ചോർച്ച പരിഹരിക്കാൻ അടിയന്തിര ഇടപെടലുകൾ ഉണ്ടാകണമെന്നും അദ്ദേഹം ആവശ്യപ്പെട്ടു. ജെട്ടിയുടെ നവീകരണം നടക്കവെയാണ് ഫ്രഞ്ച് സ്വദേശിയായ യുവാവ് കുഴിയിൽ വീണ് കാലൊടിഞ്ഞത്.

കിഴക്കന്പലം ബസ് സ്റ്റാൻഡിൽ സ്വകാര്യബസുകൾ കയറുന്നില്ല; യാത്രക്കാർക്കു പൊല്ലാപ്പ്

കിഴക്കമ്പലം : കിഴക്കമ്പലം ബസ് സ്റ്റാൻഡിൽ കഴിഞ്ഞദിവസം മുതൽ സ്വകാര്യ ബസുകൾ കയറുന്നില്ല. ഇതുമൂലം സ്കൂൾ വിദ്യാർഥികൾ അടക്കമുള്ള യാത്രക്കാർ ബുദ്ധിമുട്ടായി. യാതൊരു മുന്നറിയിപ്പില്ലാതെയാണ് ബസുകാർ പുതിയ പരിഷ്കാരം നടപ്പിൽ വരുത്തിയത്. ഇപ്പോൾ തൃപ്പൂണിത്തുറ, പുത്തൻകുരിശ്, കോലഞ്ചേരി ഭാഗങ്ങളിൽ നിന്ന് വരുന്ന വാഹനങ്ങൾ സ്റ്റാൻഡിൽ പ്രവേശിക്കാതെയാണ് ആലുവയ്ക്ക് പോകുന്നത്. പഞ്ചായത്തിന്‍റെ തലതിരിഞ്ഞ നിർദേശം മൂലമാണ് സ്റ്റാൻഡിൽ കയറാത്തതെന്നാണ് ബസുടമകൾ പറയുന്നത്. കോലഞ്ചേരി ഭാഗത്തു നിന്ന് വരുന്ന ബസുകൾ സ്റ്റാൻഡിൽ എത്തി യാത്രക്കാരെ കയറ്റിയതിനു ശേഷം പഞ്ചായത്ത് റോഡ് വഴി സെന്‍റ് ജോസഫ്സ് ഹയർ സെക്കൻഡറി സ്കൂളിന് പിന്നിലൂടെ മെയിൻ റോഡിൽ പ്രവേശിച്ച് ആലുവയ്ക്ക് പോകുന്നതിനാണ് പഞ്ചായത്ത് നിർദേശം. എന്നാൽ ഈ തീരുമാനം പിൻവലിക്കണമെന്ന് ബസുടമകൾ പഞ്ചായത്തിനോട് ആവശ്യപ്പെട്ടെങ്കിലും നടപടിയുണ്ടായില്ലെന്നും അതിനാലാണ് സമയനഷ്ടം പരിഹരിക്കാൻ സ്റ്റാൻഡിൽ കയറാത്തതെന്നും ബസുടമകൾ പറയുന്നു. ഈ ഗതാഗത പരിഷ്കാരം അശാസ്ത്രീയമാണെന്നും സമയ നഷ്ടത്തിനിടയാക്കുമെന്നും ബസുടമകൾ പറയുന്നു. നഗരത്തിൽ അനുഭവപ്പെടുന്ന രൂക്ഷമായ ഗതാഗതക്കുരുക്കും തങ്ങളെ ഇങ്ങനെയൊരു തീരുമാനമെടുക്കാൻ പ്രേരിപ്പിച്ചതായി ബസുടമകൾ പറയുന്നു. ബസ് സ്റ്റാൻഡിനു മുന്നിലും പരിസരങ്ങളിലും ഇരുചക്രവാഹനങ്ങളും കാറുകളും പാർക്കു ചെയ്യുന്നതു മൂലം സ്റ്റാൻഡിലേക്ക് ബസുകൾ കയറുന്നതിനു ബുദ്ധിമുട്ട് അനുവപ്പെടുന്നതായും ഇത് സമയനഷ്ടമുണ്ടാക്കുന്നതായും ബസുടമകൾ ആരോപിക്കുന്നു. ബസ് സ്റ്റാൻഡിലെ പാർക്കിംഗ് മാറുന്നതോടെ ഒരു പരിധിവരെ ഗതാഗതക്കുരുക്കിനും സ്റ്റാൻഡിൽ ഉണ്ടാകുന്ന ഗതാഗത തടസത്തിനും പരിഹാരമാകുമത്രേ. എന്നൽ നഗരത്തിലെ ഗതാഗതക്കുരുക്ക് രൂക്ഷമായതോടെ വഴിയോര കച്ചവടം നിർത്തലാക്കാൻ പഞ്ചായത്ത് ഭരണസമിതി ഇന്നലെ യോഗം കൂടി തീരുമാനമെടുത്തു. വഴിയോര കച്ചവടം നിരോധിച്ചതായി പഞ്ചായത്ത് സെക്രട്ടറി രേഖാമൂലം അറിയിപ്പ് നൽകിയിട്ടുണ്ട്.

ഭാര്യയെ കൊലപ്പെടുത്തിയ ഭർത്താവ് റിമാൻഡിൽ

ചെറായി: സ്കൂട്ടറിൽ സഞ്ചരിക്കവേ വാക്കുതർക്കമുണ്ടായതിനെ തുടർന്ന് ഭാര്യയെ കുത്തിക്കൊലപ്പെടുത്തിയ ഭർത്താവിനെ ഞാറക്കൽ ഫസ്റ്റ് ക്ലാസ് മജിസ്ട്രേറ്റ് കോടതി റിമാൻഡ് ചെയ്തു. പള്ളിപ്പുറം തൈപ്പറമ്പിൽ സുരേഷ് തോമസാ(53)ണ് റിമാൻഡിലായത്. തിങ്കളാഴ്ച രാത്രി പള്ളിപ്പുറം സെന്‍റ് മേരീസ് ഹൈസ്കൂളിന് പടിഞ്ഞാറു വച്ചാണ് ഭാര്യ പ്രീത(43)യെ കൊലപ്പെടുത്തിയത്. പ്രതി മുനമ്പം പോലീസ് സ്റ്റേഷനിൽ കീഴടങ്ങുകയായിരുന്നു. മൃതദേഹം പോസ്റ്റുമോർട്ടത്തിനായി കളമശേരി മെഡിക്കൽ കോളജിലേക്ക് മാറ്റി. ഇന്ന് പോസ്റ്റ്മോർട്ടം നടക്കും.

ഓണ്‍ലൈന്‍ വഴി ലഭിച്ചത് പഴയ ഫോണ്‍ : 70,000 രൂപ നഷ്ടപരിഹാരം നല്‍കാൻ ഉത്തരവ്

കൊച്ചി: ഉപഭോക്താവിനെ തെറ്റിദ്ധരിപ്പിച്ച് പഴയതും കേടായതുമായ മൊബൈല്‍ ഫോണ്‍ നല്‍കി കബളിപ്പിക്കുകയും അതു തിരികെ വാങ്ങിയ ശേഷം പണം നല്‍കാതിരിക്കുകയും ചെയ്ത ഓണ്‍ലൈന്‍ വ്യാപാരി ഉപഭോക്താവിന് 70,000 രൂപ നഷ്ടപരിഹാരം നല്കണമെന്ന് എറണാകുളം ജില്ലാ ഉപഭോക്തൃ തര്‍ക്കപരിഹാര കമ്മീഷന്‍ ഉത്തരവിട്ടു. ചെന്നൈ ആസ്ഥാനമായ ലാപ്‌ടോപ്‌സോണ്‍ എന്ന സ്ഥാപനത്തിനെതിരായ പരാതിയിലാണ് ഡി.ബി. ബിനു അധ്യക്ഷനും വി. രാമചന്ദ്രന്‍, ടി.എന്‍. ശ്രീവിദ്യ എന്നിവര്‍ അംഗങ്ങളായ ബെഞ്ചിന്‍റെ നടപടി. 2023 ഏപ്രിലില്‍ കൊച്ചിയിലെ സ്വകാര്യ കമ്പനിയില്‍ ജോലി ചെയ്യുന്ന കെ.എസ്. മാരിയപ്പന്‍ ഓണ്‍ലൈനിലൂടെ 55,000 രൂപയ്ക്ക് വാങ്ങിയ സാംസംഗ് ഗാലക്‌സി ട21 മൊബൈലിന് ഗുണനിലവാരമില്ലായ്മയും നേരത്തെ ഉപയോഗിച്ചതുമായ പഴക്കവും കണ്ടെത്തിയിരുന്നു. ഓര്‍ഡര്‍ ചെയ്ത ആക്‌സസറികളും ഫോണിനൊപ്പം ഉണ്ടായിരുന്നില്ല. എതിര്‍കക്ഷി ആദ്യം പണം തിരികെ നല്‍കാന്‍ വിസമ്മതിച്ചെങ്കിലും പിന്നീട് കൈപ്പറ്റിയ ഫോണ്‍ തിരികെ അയയ്ക്കാൻ ഉപഭോക്താവിനോട് ആവശ്യപ്പെട്ടു. ഉപഭോക്താവ് ഫോണും കവര്‍ ലെറ്ററും കൊറിയറില്‍ അയച്ചെങ്കിലും പണം തിരികെ നല്‍കുന്നതില്‍ എതിര്‍കക്ഷി വീഴ്ചവരുത്തുകയും ഉപഭോക്താവിനെ ഭീഷണിപ്പെടുത്തുകയും ചെയ്തുവെന്ന് പരാതിയില്‍ പറയുന്നു. ഫോണിന്‍റെ വിലയായ 55,000 രൂപയും നഷ്ടപരിഹാരം കോടതി ചെലവ് ഇനങ്ങളില്‍ 15,000 രൂപയും 45 ദിവസത്തിനകം പരാതിക്കാരന് നല്‍കാനാണ് ഉത്തരവ്. പരാതിക്കാരനു വേണ്ടി അഡ്വ. സിജോ ജോര്‍ജ് ഹാജരായി.

പ്രതിഷേധ ധർണയുമായി മത്സ്യത്തൊഴിലാളി കോൺഗ്രസ്

കൊച്ചി: കപ്പല്‍ ദുരന്തത്തിന്‍റെ പശ്ചാത്തലത്തില്‍ മത്സ്യത്തൊഴിലാളികള്‍ക്ക് സര്‍ക്കാര്‍ പ്രഖ്യാപിച്ച നഷ്ടപരിഹാരം മത്സ്യത്തൊഴിലാളികളെ അപമാനിക്കുന്നതിന് തുല്യമാണെന്നാരോപിച്ചും വിവിധ ആവശ്യങ്ങള്‍ ഉന്നയിച്ചും മത്സ്യത്തൊഴിലാളി കോണ്‍ഗ്രസ് ജില്ലാ കമ്മിറ്റി പ്രതിഷേധ ധര്‍ണ നടത്തി. കണയന്നൂര്‍ താലൂക്ക് ഓഫീസിനു മുന്നില്‍ നടത്തിയ ധര്‍ണ യുഡിഎഫ് ജില്ലാ ചെയര്‍മാന്‍ ഡൊമിനിക് പ്രസന്‍റേഷന്‍ ഉദ്ഘാടനം ചെയ്തു. മത്സ്യത്തൊഴിലാളികളുടെ ആനുകൂല്യങ്ങള്‍ പുനഃസ്ഥാപിക്കുക, വിദ്യാര്‍ഥികളുടെ ഗ്രാന്‍റ് വെട്ടിക്കുറച്ച നടപടി പിന്‍വലിക്കുക തുടങ്ങിയ ആവശ്യങ്ങളും ധര്‍ണയില്‍ ഉന്നയിച്ചു. മത്സ്യത്തൊഴിലാളി കോണ്‍ഗ്രസ് സംസ്ഥാന ജനറല്‍ സെക്രട്ടറി എ.സി. ക്ലാരന്‍സ് അധ്യക്ഷത വഹിച്ചു. അഖിലേന്ത്യ ജനറല്‍ സെക്രട്ടറി മുനമ്പം സന്തോഷ്, സംസ്ഥാന ജനറല്‍ സെക്രട്ടറിമാരായ ആന്‍റണി കളരിക്കല്‍, എം.എല്‍. സുരേഷ്, സംസ്ഥാന സെക്രട്ടറിമാരായ ഗോപിദാസ് അമ്മിണിക്കുട്ടന്‍, കെ.എന്‍. കാര്‍ത്തികേയന്‍, കെ.വി. രത്‌നാകരന്‍ തുടങ്ങിയവര്‍ പ്രസംഗിച്ചു.

രണ്ടു കിലോഗ്രാം കഞ്ചാവുമായി ഇതരസംസ്ഥാന തൊഴിലാളി പിടിയിൽ

പെരുമ്പാവൂർ: രണ്ടു കിലോഗ്രാം കഞ്ചാവുമായി ഒഡീഷ ഗഞ്ചാം സ്വദേശി രാജേഷ് ഡീഗലി(23)നെ പെരുമ്പാവൂർ എഎസ്പിയുടെ പ്രത്യേക അന്വേഷണ സംഘം അറസ്റ്റ് ചെയ്തു. ഒഡീഷയിൽ നിന്ന് ട്രെയിൻ മാർഗം ആലുവയിൽ എത്തിയശേ ഷം പെരുമ്പാവൂർ ബസ് സ്റ്റാൻഡ് പരിസരത്ത് കഞ്ചാവ് കൈമാറാൻ നിൽക്കുന്നതിനിടെയാണ് ഇയാൾ വലയിലായത്. ഒഡീഷയിൽ നിന്ന് 3,000 രൂപയ്ക്ക് വാങ്ങുന്ന കഞ്ചാവ് ഇവിടെ 20,000 രൂപയ്ക്കാണ് വിറ്റിരുന്നത്. വില്പനയ്ക്കു ശേഷം രാത്രി തന്നെ ഒഡീഷയിലേക്ക് മടങ്ങാനായിരുന്നു പദ്ധതി. നേരത്തെ കഞ്ചാവ് കേസിൽ ഇയാൾ രണ്ടു വർഷത്തോളം പാലക്കാട് ജയിലിൽ ശിക്ഷ അനുഭവിച്ചിട്ടുണ്ട്. പെരുമ്പാവൂർ എഎസ്പി ശക്തിസിംഗ് ആര്യ, ഇൻസ്പെക്ടർ ടി.എം. സൂഫി, എസ്ഐമാരായ പി.എം. റാസിഖ് , വിനിൽ ബാബു, ജോഷി മാത്യു, എഎസ്ഐ പി.എ. അബ്ദുൽ മനാഫ്, എസ്‌സിപിഒമാരായ വർഗീസ് വേണാട്ട്, ടി.എ. അഫ്സൽ, ബെന്നി ഐസക്, എ.ടി. ജിൻസ്, നോബിൾ എന്നിവരാണ് അന്വേഷണസംഘത്തിൽ ഉണ്ടായിരുന്നത്.

ADVERTISEMENT

ADVERTISEMENT

ADVERTISEMENT

ADVERTISEMENT

ADVERTISEMENT

ആമസോണ്‍ ഓഫറുകളറിയാന്‍
ലിങ്കില്‍ ക്ലിക്ക് ചെയ്യുക

ADVERTISEMENT

More from other section

ADVERTISEMENT

LATEST NEWS

ADVERTISEMENT

ADVERTISEMENT

Quick Links

About Us Deepika E-Paper E-Shopping Karshakan Rashtradeepika Movies Tech @ Deepika

Business Deepika Viral Tax Letters University News Auto Spot Cartoon Scope

Matrimonial Special News Special Feature Calendar Samskarikam Career Deepika English Edition

Deepika Charity Health Sthreedhanam Responses Daily Quiz Youth Special Court Notice

Kuttikalude Deepika Deepika News Videos Out of Range US News Gulf News Student Reporter Classifieds

Children's Digest Today's Story Religion Book Review Sunday Deepika Send your greetings Online Advertising

Rashtra Deepika LTD

Chairman - Dr. Francis Cleetus MD - Michael Vettickatt Chief Editor - George Kudilil

Tel: +91 481 2566706 ,2566707,2566708

Privacy policy Terms and conditions for online payment

Copyright © 2025 , RDL. All rights reserved To access reprinting rights, please contact [email protected]