ഈസ്റ്റർ സ്നേഹസംഗമം സംഘടിപ്പിച്ചു : Deepika.com Nattu Visesham

റാന്നി: ഇടമുറി എബനേസർ മാർത്തോമ്മ ഇടവകയുടെ പുനഃപ്രതിഷ്ഠാ ശുശ്രൂഷയും സുവർണ ജൂബിലി സമാപനവും ഇന്നു നടക്കും. റാന്നി - നിലയ്ക്കൽ ഭദ്രാസനാധിപൻ ഡോ.ജോസഫ് മാർ ബർണബാസ് സഫ്രഗൻ മെത്രാപ്പോലീത്തയുടെ മുഖ്യകാർമികത്വത്തിൽ കുർബാനയേ തുടർന്ന് അഞ്ചിന് പൊതു സമ്മേളനം.

മെഗാ മ്യൂസിക്കൽ ഷോ 27ന്

തിരുവല്ല: ലയൺസ് ക്ലബിന്‍റെ വജ്രജൂബിലി ആഘോഷങ്ങളുടെ ഭാഗമായി 27 ന് വൈകുന്നേരം 6.30ന് മെഗാ മ്യൂസിക്കൽ ഷോ നടക്കും. ചീഫ് വിപ്പ് ഡോ. എൻ.ജയരാജ് ഉദ്ഘാടനം ചെയ്യും. ലയൺസ് ഡിസ്ട്രിക്‌ട് ഗവർണർ ആർ. വെങ്കിടാചലം ഭദ്രദീപം തെളിക്കും. തിരുവല്ല പ്രസിഡന്‍റ് കെ.ജി. തോമസ് കരിക്കനേത്ത്, ജൂബിലി കൺവീനർ ചെറിയാൻ പോളച്ചിറയ്ക്കൽ, സെക്രട്ടറി ജോണി ജോർജ് എന്നി വർ പ്രസംഗിക്കും.

അറസ്റ്റ് ചെയ്തു

അടൂർ: ഗുരുമന്ദിരത്തിന്‍റെ പ്രതിഷ്ഠാ വാര്‍ഷികത്തോടനുബന്ധിച്ച് പ്രസാദമായി വിതരണം ചെയ്ത ഉണ്ണിയപ്പം മോശമാണെന്ന് ആരോപിച്ച് അസഭ്യം പറഞ്ഞുവെന്ന പരാതിയിൽ യുവാവ് അറസ്റ്റിൽ. ഏനാത്ത് കടമ്പനാട് വടക്ക് പാലത്തുണ്ടില്‍ വീട്ടില്‍ ഷൈജുവാണ് അറസ്റ്റിലായത്. 17 നായിരുന്നു പ്രതിഷ്ഠാ വാര്‍ഷികം നടന്നത്. അന്നു പ്രസാദമായി വിതരണം ചെയ്ത ഉണ്ണിയപ്പം മോശമാണെന്ന് പറഞ്ഞാണ് ഇയാള്‍, ശാഖാ സെക്രട്ടറി കടമ്പനാട് വടക്ക് നെല്ലിമുകള്‍ അരുണ്‍ നിവാസില്‍ അരുണ്‍ സുദര്‍ശനനെ ഫോണിലൂടെ അസഭ്യം വിളിച്ചത്. തുടര്‍ന്ന് വീട്ടിലെത്തി കൊല്ലുമെന്ന് ഭീഷണിപ്പെടുത്തുകയും ചെയ്തതായും പറയുന്നു. എസ്ഐ ആർ. ശ്രീകുമാര്‍, സി പിഒ ഷാനു പോലീസ് നടപടിക്ക് നേതൃത്വം നല്‍കി.

ശതാബ്ദി ആഘോഷവും മതസൗഹാർദ സമ്മേളനവും നാളെ

റാന്നി: റാന്നി കരിമ്പനാംകുഴി സെന്‍റ് ആൻഡ്രൂസ് മാർത്തോമ്മ ഇടവക ശതാബ്ദി ആഘോഷം 'അഗാപ്പെ - 2025' നാളെ വിവിധ പരിപാടികളോടെ ആഘോഷിക്കും. ശതാബ്ദി ആഘോഷത്തിന്‍റെ ഭാഗമായി മതസൗഹാർദ്ദ സമ്മേളനവും, ജീവകാരുണ്യ പ്രവർത്തനങ്ങളുടെ ഉദ്ഘാടനവും നടത്തും. റാന്നി നിലയ്ക്കൽ ഭദ്രാസനാധിപൻ ഡോ. ജോസഫ് മാർ ബർണബാസ് സഫ്രഗൻ മെത്രാപ്പോലീത്ത അധ്യക്ഷത വഹിക്കും, ശാന്തിഗിരി ആശ്രമം ജനറൽ സെക്രട്ടറി സ്വാമി ഗുരുരത്നം ജ്ഞാന തപസ്വി മുഖ്യപ്രഭാഷണം നടത്തും. പത്തനംതിട്ട രൂപതാധ്യക്ഷൻ ഡോ. സാമുവേൽ മാർ ഐറേനിയോസ്, ക്നാനായ അതിഭദ്രാസനം റാന്നി മേഖല മെത്രാപ്പോലീത്ത കുര്യാക്കോസ് മാർ ഇവാനിയോസ്, ആന്‍റോ ആന്‍റണി എംപി, പ്രമോദ് നാരായൺ എംഎൽഎ, ഹരി പത്തനാപുരം, ഫാ.എ.ജെ. ക്ലീമിസ്, സംവിധായകൻ കെ. മധു തുടങ്ങിയവർ പ്രസംഗിക്കും. ശതാബ്ദി കാരുണ്യ പദ്ധതിയുടെ ഭാഗമായി കിഡ്നി രോഗികൾക്കായുള്ള ധനസഹായ വിതരണത്തിന്‍റെ ഉദ്ഘാടനം തോമസ് ഫിലിപ്പ് ഡെൽറ്റ നിർവഹിക്കും.

ഫ്രാൻസിസ് മാർപാപ്പ അനുസ്മരണം ഇന്ന് തിരുവല്ലയിൽ

തിരുവല്ല: കാലം ചെയ്ത ഫ്രാൻസിസ് മാർപാപ്പയോടുള്ള ആദരസൂചകമായി തിരുവല്ല അതിഭദ്രാസനത്തിന്‍റെയും തിരുവല്ല പൗരാവലിയുടെയും ആഭിമുഖ്യത്തിൽ അനുസ്മരണ പരിപാടികൾ ഇന്ന് നടക്കും. വൈകുന്നേരം നാലിന് എസ്‌സിഎസ് കാമ്പസിൽ നിന്ന് ആരംഭിക്കുന്ന മൗനജാഥയുടെ ആരംഭത്തിൽ ഡോ. തിയഡോഷ്യസ് മാർത്തോമ്മ മെത്രാപ്പോലീത്ത ആമുഖ സന്ദേശം നൽകും. തുടർന്നുള്ള മൗനജാഥ എസ് സിഎസ് കാമ്പസിൽനിന്ന് ആരംഭിച്ച് സെന്‍റ് ജോൺസ് മെത്രാപ്പോലീത്തൻ കത്തീഡ്രലിൽ സമാപിക്കും. തുടർന്ന് ആർച്ച് ബിഷപ് ഡോ. തോമസ് മാർ കൂറിലോസിന്‍റെ അധ്യക്ഷതയിൽ നടക്കുന്ന അനുസ്മരണ യോഗത്തിൽ സിഎസ്ഐ ബിഷപ് തോമസ് സാമുവൽ, ബിഷപ് ഗീവർഗീസ് മാർ അപ്രേം, മാത്യു ടി. തോമസ് എംഎൽഎ, സ്വാമി നിർവിണാനന്ദ, ഇമാം ഹാഫിസ് മുഹമ്മദ് റിഫാൻ ബഖവി, ഓർത്തഡോക്സ് സഭ അസോസിയേഷൻ സെക്രട്ടറി ബിജു ഉമ്മൻ, നഗരസഭാധ്യക്ഷ അനു ജോർജ് എന്നിവർ പ്രസംഗിക്കും. മുഖ്യ വികാരി ജനറൽ റവ. ഡോ. ഐസക് പറപ്പള്ളിൽ, കത്തീഡ്രൽ വികാരി ഫാ. മാത്യു പുനക്കുളം, ഫാ. ചെറിയാൻ കുരിശുമൂട്ടിൽ, ബിജു പാലത്തിങ്കൽ, സിറിയക് വി ജോൺ എന്നിവരുടെ നേതൃത്വത്തിൽ വിവിധ കമ്മിറ്റികൾ പ്രവർത്തിക്കുന്നു.

പുതമൺ പാലത്തിന്‍റെ നിർമാണം ഓണത്തിനു മുന്പ് പൂർ‌ത്തിയാക്കും

റാന്നി: പുതമൺ പാലത്തിന്‍റെ നിർമാണം ഓണത്തിനു മുമ്പ് പൂർത്തിയാക്കണമെന്ന് പ്രമോദ് നാരായൺ എംഎൽഎ നിർദേശം നൽകി. പാലം നിർമാണം എംഎൽഎ നേരിട്ടു സന്ദർശിച്ച് നിർമാണ പുരോഗതി വിലയിരുത്തി. നിർമാണം പൂർത്തിയാക്കുന്നതിനു വേണ്ട നടപടി സ്വീകരിക്കണമെന്നാണ് കരാറുകാരനോട് എംഎൽഎ നിർദ്ദേശിച്ചത്. 2.61 കോടി രൂപ ചെലവഴിച്ച് നിർമിക്കുന്ന പാലത്തിന്‍റെ ആറു പൈലുകളും മൂന്ന് പൈൽ ക്യാമ്പുകളും പൂർത്തിയായിട്ടുണ്ട്. ഇരുകരകളിലെയും അബട്മെന്‍റുകളുടെയും നടുക്കുള്ള പിയറിന്‍റെയും നിർമാണം പുരോഗമിക്കുകയാണ്. 35 ശതമാനം നിർമാണ ജോലികളും പൂർത്തീകരിച്ചു. എട്ടു മീറ്റർ വീതം നീളമുള്ള രണ്ട് സ്പാനുകളോടു കൂടിയ പാലത്തിന് വാഹന യാത്രയ്ക്കായി 7.50 മീറ്റർ വീതി ഉണ്ടാകും. കൂടാതെ 1.5 മീറ്റർ വീതിയിൽ ഇരുവശത്തും നടപ്പാതയും നിർമിക്കും. ആകെ 11 മീറ്ററാണ് പാലത്തിന്‍റെ വീതി കോഴഞ്ചേരി - റാന്നി റോഡിൽ പുതമൺ പെരുന്തോടിന് ഉണ്ടായിരുന്ന 70 വർഷത്തിലധികം പഴക്കമുള്ള പാലം അപകടാവസ്ഥയിൽ ആയതിനേത്തുടർന്നാണ് ഇപ്പോൾ പുതിയ പാലം നിർമിക്കുന്നത്. യാത്രക്കാർക്ക് 30 ലക്ഷം രൂപ ചെലവഴിച്ച് താത്കാലിക പാതയും ഒരുക്കി നൽകിയിട്ടുണ്ട്. പാലം നിർമാണം നേരത്തേ ടെൻഡർ ചെയ്തിരുന്നെങ്കിലും എസ്റ്റിമേറ്റ് തുകയുടെ 20 ശതമാനം അധികം തുകയാണ് കരാറുകാരൻ നൽകിയതെന്ന കാരണത്താൽ നിർമാണം മൂന്നു തവണ ടെൻഡർ ചെയ്യേണ്ടി വന്നു. പിന്നീട് പ്രത്യേക മന്ത്രിസഭാ യോഗമാണ് പുതിയ തുകയ്ക്ക് നിർമാണാനുമതി നൽകിയത്.

വലിയപതാൽ ഉന്നതയുടെ വികസനം; ഊരുകൂട്ടം യോഗം ചേർന്നു

റാന്നി: വലിയ പതാൽ പട്ടികവർഗ ഉന്നതയുടെ വികസന പ്രവർത്തനങ്ങൾ ചർച്ച ചെയ്ത് പദ്ധതി തയാറാക്കുന്നതിന് ഉപഭോക്താക്കളുടെ ഊരുകൂട്ടം ചേർന്നു. ഒരുകോടി രൂപയാണ് കോളനിയുടെ വികസനത്തിനായി അംബേദ്കർ സെറ്റിൽമെന്‍റ് പദ്ധതി വഴി വകയിരുത്തിയിരിക്കുന്നത്. വീടുകളുടെ അറ്റകുറ്റപ്പണികൾ, വീടുകൾക്ക് സംരക്ഷണഭിത്തി, റോഡ് നിർമാണം, വൈദ്യുതീകരണം തുടങ്ങിയ പൊതു ആവശ്യങ്ങൾക്കാണ് ഫണ്ട് വിനിയോഗിക്കുക. ജില്ലാ നിർമിതി കേന്ദ്രം മുഖേനയാണ് പദ്ധതി നടപ്പാക്കുന്നത്. യോഗം പ്രമോദ് നാരായൺ എംഎൽഎ ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡന്‍റ് സോണിയ മനോജ് അധ്യക്ഷത വഹിച്ചു.

കുരിശുമല തീർ‌ഥാടന സമാപനം ഞായറാഴ്ച

ചുങ്കപ്പാറ: മധ്യതിരുവതാംകൂറിലെ കുരിശുമല തീർഥാടന കേന്ദ്രമായ ചങ്ങനാശേരി അതിരൂപതയുടെ നിർമലപുരം - കരുവള്ളിക്കാട്ട് സെന്‍റ് തോമസ് കുരിശുമല തീർഥാടനത്തിനു പുതുഞായറാഴ്ച തിരുനാളോടെ 27നു സമാപനമാകും. അന്പതു നോന്പ് കാലയളവിൽ വിവിധ ഇടവകകളുടെയും ഭക്തസംഘടനകളുടെയും നേതൃത്വത്തിൽ വിവിധ ദിനങ്ങളിൽ ആയിരകണക്കിനാളുകളാണ് മലമുകളിലേക്ക് കുരിശിന്‍റെ തീർ‌ഥാടനം നടത്തിയത്. പുതുഞായറാഴ്ച രാവിലെ ഒമ്പതിന് മലമുകളിലെ ചാപ്പലിൽ ചങ്ങനാശേരി അതിരൂപത പ്രൊക്കുറേറ്റർ ഫാ. ജയിംസ് ആന്‍റണി മാളിയേക്കൽ വിശുദ്ധ കുർബാന അർപ്പിക്കും.ഫാ. ജേക്കബ് വട്ടക്കാട്ട് വചന സന്ദേശം നൽകും. തുടർന്ന് സമാപന ആശിർവാദം നേർച്ച സമർപ്പണത്തോടെ ഈ വർഷത്തെ കുരിശുമല തീർഥാടനത്തിനു സമാപനമാകും. തീർഥാടന കേന്ദ്രം ഫാ. മോബൻചുരവടിയുടെ നേതൃത്വത്തിൽ വിവിധ കമ്മിറ്റി ഭാരവാഹികൾ തീർഥാടന ക്രമീകരണങ്ങൾക്കു ചുക്കാൻ പിടിക്കുന്നു

ഫേസ്ബുക്ക് പരിചയം; വീട്ടമ്മയില്‍നിന്ന് 6.81 ലക്ഷം രൂപ തട്ടിയ യുവാവ് അറസ്റ്റില്‍

മല്ലപ്പള്ളി: ഫേസ്ബുക്കില്‍ സൃഷ്ടിച്ച പ്രത്യേകഗ്രൂപ്പിലൂടെ പരിചയപ്പെട്ട വീട്ടമ്മയില്‍നിന്നു ലക്ഷങ്ങള്‍ തട്ടിയ യുവാവിനെ കീഴ്‌വായ്പൂര് പോലീസ് അറസ്റ്റ് ചെയ്തു. കോഴിക്കോട് മാവൂര്‍ കന്നിപ്പറമ്പ് പെരുംകൊല്ലം തൊടി വീട്ടില്‍ സി. കെ. പ്രജിത്താണ് (39) പിടിയിലായത്. തൂവല്‍ കൊട്ടാരം എന്ന പേരിലുള്ള ഫേസ്ബുക്ക് ഗ്രൂപ്പിലൂടെ പരിചയപ്പെട്ട ആനിക്കാട് സ്വദേശിനിയായ 52 കാരിയില്‍നിന്നു പലതവണയായി 6,80,801 രൂപ പ്രജിത്ത് കൈക്കലാക്കിയെന്നാണ് പരാതി. ഗ്രൂപ്പിന്‍റെ അഡ്മിന്‍ ആയ ഇയാൾ പല ആവശ്യങ്ങള്‍ പറഞ്ഞും, തിരിച്ചുകൊടുക്കാമെന്ന് ഉറപ്പുകൊടുത്തുമാണ് ഇത്രയും തുക സ്വന്തം അക്കൗണ്ടിലേക്കും ഇയാള്‍ നല്‍കിയ മറ്റ് അക്കൗണ്ടുകളിലേക്കും ഗൂഗിള്‍ പേ ചെയ്തു വീട്ടമ്മയില്‍നിന്നു വാങ്ങിയത്. സാമ്പത്തിക തട്ടിപ്പിനിരയായ വീട്ടമ്മ 2024 നവംബര്‍ 24ന് കീഴ്‌വായ്പൂര് പോലീസില്‍ പരാതി നല്‍കി. പോലീസ് ഇന്‍സ്പെക്ടര്‍ വിപിന്‍ ഗോപിനാഥന്‍ കേസ് രജിസ്റ്റര്‍ ചെയ്ത് അന്വേഷണം ആരംഭിച്ചു. സൈബര്‍ സെല്ലിന്‍റെ സഹായത്തോടെ ഇയാളെ കോഴിക്കോട്ട്നിന്ന് അറസ്റ്റ് ചെയ്യുകയായിരുന്നു.

മുന്‍വിരോധത്താല്‍ വീടുകയറി അതിക്രമം: യുവാവ് അറസ്റ്റിൽ

തിരുവല്ല: കൊലപാതക കേസലെ പ്രതിയുടെ കുടുംബവുമായി സഹകരിക്കുന്നതിലെ വിരോധം കാരണം വീട്ടില്‍ കയറി അതിക്രമം കാട്ടിയ സംഘത്തിലെ ഒരാളെ തിരുവല്ല പോലീസ് പിടികൂടി. ഇരവിപേരൂര്‍ കിഴക്കന്‍ ഓതറ തൈക്കാട് അമ്പഴത്താംകുന്നില്‍ രതീഷാണ് (37) അറസ്റ്റിലായത്. 22ന് രാത്രി ഒന്പതിനാണ് സംഭവം. കഴിഞ്ഞ 13 ന് കിഴക്കന്‍ ഓതറയിലുണ്ടായ കത്തിക്കുത്തില്‍ മനോജ് (48) കൊല്ലപ്പെട്ടിരുന്നു. ഈ കേസിലെ പ്രതി ഈസ്റ്റ് ഓതറ തൈക്കാട്ടില്‍ വീട്ടില്‍ വിക്രമന്‍റെ കുടുംബവുമായി, നക്രാംപുറത്തുപടി തൈക്കാട് കിഴക്കന്‍ വീട്ടില്‍ രാജനും വീട്ടുകാരും സഹകരിക്കുന്നതില്‍ പ്രകോപിതരായി മൂവര്‍ സംഘം ഇയാളുടെ വീട്ടില്‍ കമ്പിവടിയും മരക്കമ്പുകളുമായി അതിക്രമിച്ചു കയറുകയായിരുന്നു. പ്രതികള്‍ രാജനെയും സഹോദരനെയും കൊല്ലുമെന്ന് ഭീഷണിപ്പെടുത്തുകയും ചെയ്തതായും മൊഴിയില്‍ പറയുന്നു. എഎസ്ഐ മിത്ര വി. മുരളി രേഖപ്പെടുത്തി. എസ്ഐ പി. എസ്. സനില്‍ കേസ് രജിസ്റ്റര്‍ ചെയ്ത് അന്വേഷണം ആരംഭിച്ചു.

പോക്സോ കേസെടുക്കുന്നതിൽ വൈകിപ്പിച്ചു; സിഡബ്ല്യുസി നോട്ടീസ് നൽകും

പത്തനംതിട്ട: പോക്സോ കേസ് സംബന്ധിച്ച പരാതിയിൽ നടപടി വൈകിപ്പിച്ച പത്തനംതിട്ട വനിതാ സ്റ്റേഷനിലെ എസ്എച്ച്ഒ കെ.ആർ. ഷെമിമോളിൽ നിന്നും വിശദീകരണം തേടി നോട്ടീസ് നൽകുമെന്ന് സിഡബ്ല്യുസി. ഇതു സംബന്ധിച്ച പരാതിയിൽ അന്വേഷണം നടത്തി വിശദീകരണം തേടാൻ പത്തനംതിട്ട ഡിവൈഎസ്പിക്കാണ് നോട്ടീസ് നൽകുകയെന്ന് സിഡബ്ല്യുസി ജില്ലാ ചെയർമാൻ എൻ. രാജീവ് അറിയിച്ചു. ഏഴ് വയസുകാരിയെ ട്യൂഷന്‍ ടീച്ചറുടെ പിതാവ് ലൈംഗികമായി ഉപദ്രവിച്ചെന്ന പരാതിയിലാണ് എസ്ഐ നടപടി എടുക്കാതിരുന്നത്. സ്റ്റേഷനില്‍ എത്തിയപ്പോള്‍ ഷെമിമോള്‍ പരാതി സ്വീകരിക്കാത്തതിനേ തുടര്‍ന്ന് പെണ്‍കുട്ടിയുടെ രക്ഷിതാക്കള്‍ ചൈല്‍ഡ് ലൈന്‍ വഴി പരാതി നല്‍കുകയായിരുന്നു. തുടര്‍ന്ന് എഴുപതുകാരനെ പോലീസ് അറസ്റ്റു ചെയ്തു. എസ്ഐക്ക് മുന്നില്‍ പിതാവും കുട്ടിയും എത്തിയപ്പോള്‍പരാതി വിശദമായി കേട്ട എസ്ഐ കേസെടുക്കാതെ ഇവരെ പറഞ്ഞു വിട്ടതായി പറയുന്നു. വനിതാ സ്റ്റേഷനില്‍ നിന്ന് നീതി ലഭിക്കില്ലെന്ന് മനസിലാക്കിയ പിതാവ് വിവരം ചൈല്‍ഡ് ലൈനില്‍ അറിയിച്ചു. അവിടെ നിന്നുള്ള നിര്‍ദേശപ്രകാരമാണ് പോലീസ് തുടര്‍ നടപടി സ്വീകരിച്ചത്. ഷെമിമോൾക്കെതിരേ സമാനമായ മറ്റു പല പരാതികളും ലഭിച്ചിട്ടുള്ളതിനാലാണ് സിഡബ്ല്യുസി വിശദീകരണം തേടുന്നത്.

ക്രിസോസ്റ്റം മെത്രാപ്പോലീത്തയുടെ പേരിൽ സിപിഎം രാഷ്‌ട്രീയം കളിക്കുന്നെന്ന് കോൺഗ്രസ്

കോഴഞ്ചേരി: ലോകം ആദരിക്കുന്ന ഡോ. ഫിലിപ്പോസ് മാർ ക്രിസോസ്റ്റം മാർത്തോമ്മ വലിയ മെത്രാപ്പോലീത്തയെ രാഷ്‌ട്രീയ ലക്ഷ്യത്തിനായി സിപിഎമ്മിലെ ഒരു വിഭാഗം ഉപയോഗിക്കുന്നുവെന്ന് കോൺഗ്രസ് ആരോപണം. ഇന്നലെ മാരാമണ്ണിൽ നടന്ന പുരസ്കാരദാന ചടങ്ങ് യുഡിഎഫ് ബഹിഷ്കരിച്ചു. ആന്‍റോ ആന്‍റണി എംപി, ഡിസിസി പ്രസിഡന്‍റ് സതീഷ് കൊച്ചുപറമ്പിൽ, കോഴഞ്ചേരി, തോട്ടപ്പുഴ ശേരി, ഗ്രാമപഞ്ചായത്തു പ്രസിഡന്‍റുമാരായ സാലി ഫിലിപ്പ്, കൃഷ്ണ കുമാർ, കോയിപ്രം ബ്ലോക്ക്‌ പഞ്ചായത്തു പ്രസിഡന്‍റ് സൂസൻ തോമസ്, ബ്ലോക്ക്‌ പഞ്ചായത്തു അംഗം ക്രിസ്റ്റഫർ തോമസ് ഉൾപ്പെടെ കോൺഗ്രസുകാരായ ജന പ്രതിനിധികളും പ്രവർത്തകരും സമ്മേളനത്തിൽ പങ്കെടുത്തില്ല. അവാർഡുദാനം സിപിഎമ്മിലെ ചില നേതാക്കളുടെ പരിപാടിയായി മാറിയെന്നും ഇതിനായി രൂപീകരിച്ചിട്ടുള്ള ഫൗണ്ടേഷൻ നിലനില്പുള്ളതല്ലെന്നും കോൺഗ്രസ് ബ്ലോക്ക് പ്രസിഡന്‍റുമാരായ ജെറി മാത്യു സാം, ഈപ്പൻ കുര്യൻ, സഭകൗൺസിൽ മുൻ അംഗം ജേക്കബ് ഇമ്മാനുവേൽ എന്നിവർ ആരോപിച്ചു. സിപിഎം ജനറൽ സെക്രട്ടറിയായി തെരഞ്ഞെടുക്കപ്പെട്ട എം.എ. ബേബിയ്ക്കു മാരാമണ്ണിൽ സ്വീകരണം നൽകാനാണ് ഇത്തരമൊരു ഫൗണ്ടേഷൻ രൂപീകരിച്ചതെന്നും കോൺഗ്രസ് നേതാക്കൾ ആരോപിച്ചു.

മാർ ക്രിസോസ്റ്റം പകർന്നു നൽകിയത് കാരുണ്യത്തിന്‍റെ സന്ദേശം: മുഖ്യമന്ത്രി

കോഴഞ്ചേരി: ജീവിതം സ്‌നേഹത്തിന്‍റെയും കാരുണ്യത്തിന്‍റെയും സന്ദേശമാക്കി മാറ്റിയ വ്യക്തിത്വമായിരുന്നു പത്മഭൂഷൺ ഡോ. ഫിലിപ്പോസ് മാർ ക്രിസോസ്റ്റം വലിയ മെത്രാപ്പോലീത്തയെന്ന് മുഖ്യമന്ത്രി പിണറായി വിജയൻ. പദ്മഭൂഷണ്‍ മാര്‍ ക്രിസോസ്റ്റം ഫൗണ്ടേഷന്‍ പുരസ്‌കാര സമര്‍പ്പണ സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. വേദനിക്കുന്നവരുടെ കണ്ണീരൊപ്പാനും മനുഷ്യന്‍റെ യാതനകള്‍ക്ക് പരിഹാരം കാണാനും ജീവിതം ഉഴിഞ്ഞുവച്ച ആളായിരുന്നു മാര്‍ ക്രിസോസ്റ്റം വലിയ മെത്രാപ്പോലീത്ത. മതങ്ങളുടെ യഥാര്‍ഥ അർഥം നീതിയും സഹാനുഭൂതിയാണെന്നും സമൂഹത്തെ പഠിപ്പിക്കാനും അദ്ദേഹത്തിന് കഴിഞ്ഞിരുന്നു. വർഗീയതയും വെറുപ്പും ആളിക്കത്തിക്കാനുളള ശ്രമം നടക്കുമ്പോള്‍ ക്രിസോസ്റ്റം തെളിയിച്ച മാനവികത വെളിച്ചം നല്‍കുന്നതാണ്. എംജി സര്‍വകലാശാലയില്‍ ആരംഭിച്ചിരിക്കുന്ന ക്രിസോസ്റ്റം ചെയറിന്‍റെ പ്രവര്‍ത്തനം കൂടുതൽ ശക്തമാക്കാനുള്ള നടപടികള്‍ സര്‍ക്കാരിന്‍റെ ഭാഗത്തുനിന്നുണ്ടാവുമെന്നും മുഖ്യ മന്ത്രി പറഞ്ഞു. ഫൗണ്ടേഷന്‍റെ പ്രഥമ പുരസ്‌കാരം സിപിഎം ജനറല്‍ സെക്രട്ടറി എം.എ. ബേബിക്ക് മുഖ്യമന്ത്രി നൽകി. മാരാമണ്‍ കണ്‍വന്‍ഷന്‍ നഗറിന് സമീപമുള്ള പദ്മഭൂഷണ്‍ മാര്‍ ക്രിസോസ്റ്റം നഗറില്‍ നടന്ന യോഗത്തില്‍ ഡോ. തോമസ് മാര്‍ തീത്തോസ് എപ്പിസ്കോപ്പ അധ്യക്ഷത വഹിച്ചു. മന്ത്രി വീണാ ജോര്‍ജ്, ഡെപ്യൂട്ടി സ്പീക്കര്‍ ചിറ്റയം ഗോപകുമാർ, എംഎല്‍എ മാരായ മാത്യു ടി. തോമസ്, ജനീഷ് കുമാർ, പ്രമോദ് നാരായണ്‍, മുന്‍ എംഎല്‍എ രാജു ഏബ്രഹാം, ത്രിതല ജനപ്രതിനിധികളായ സാറാ തോമസ്, ആര്‍ അജയകുമാർ, ജിജി മാത്യു, ബിജിലി പി. ഈശോ, കെഎസ്എഫ്ഇ മുന്‍ ചെയര്‍മാന്‍ ഫിലിപ്പോസ് തോമസ്, ദേവസ്വം ബോര്‍ഡ് മുന്‍ പ്രസിഡന്‍റുമാരായ എ. പത്മകുമാർ, കെ. അനന്തഗോപന്‍, മാര്‍ത്തോമ്മ സഭ ട്രസ്റ്റി അന്‍സില്‍ സഖറിയ, ഫൗണ്ടേഷന്‍ സെക്രട്ടറി രാജന്‍ വര്‍ഗീസ് എന്നിവര്‍ പ്രസംഗിച്ചു. ഡോ. വര്‍ഗീസ് ജോര്‍ജ് രചിച്ച പ്രതിരോധത്തിന്‍റെ കൂട്ടായ്മ എന്ന പുസ്തകം എം.എ. ബേബി പ്രകാശനം ചെയ്തു.

കാടിറങ്ങി നാട്ടിലെത്തിയ പന്നികൾക്ക് കോയിപ്രം വയലേലകൾ താവളം

പുല്ലാട്: വനമേഖലയിൽ നിന്നു കിലോമീറ്ററുകൾക്കപ്പുറമുള്ള കോയിപ്രം ഗ്രാമപഞ്ചായത്തിലെ പൂവത്തൂർ മേഖലകളിൽ വ്യാപിച്ചു കിടക്കുന്ന ചെമ്പിൽ കണ്ടം, പടമണ്ണ്, അനിക്കാട് പുഞ്ച എന്നിവിടങ്ങൾ കാട്ടുപന്നികളുടെ താവളമായി മാറി. പകൽ സമയം വയലുകളിൽ കുഴി എടുത്ത് പതിയിരിക്കുന്ന പന്നികൾ രാത്രി ആകുന്നതോടെ പുറത്തിറങ്ങും. തുടർന്ന് കൃഷി ഇടങ്ങളിൽ തേർവാഴ്ച നടത്തുന്ന ഇവ നേരം പുലരുന്നതോടെ വീണ്ടും കുഴികളിൽ ഇറങ്ങി പതിയിരിക്കും. അതിനാൽ ഇവയെ കണ്ടെത്താൻ ബുദ്ധിമുട്ടാണ്. കാട്ടുപന്നികളെ ഭയന്നു വയലേലകൾക്ക് നടുവിലൂടെയുള്ള വഴികളിലൂടെ നടക്കാൻ പോലും നാട്ടുകാർ ഭയപ്പെടുകയാണ്. കാട്ടുപന്നികൾക്കൊപ്പം മുള്ളൻപന്നികളുടെയും വിഹാര കേന്ദ്രമായി വയലുകൾ മാറിയിരിക്കുകയാണ്. കൃഷി ഇല്ലാതായതോടെ വയലേലകൾ പന്നികളും താവളമാക്കി. മുന്പ് വയൽ നിറയെ നെൽകൃഷി ഉണ്ടായിരുന്നു. എന്നാൽ കൃഷി നഷ്ടമായതോടെ ഇവിടമാകെ തരിശു കിടക്കാൻ തുടങ്ങിയിട്ട് കാലങ്ങളായി. കർഷകർ കൃഷി ഇടത്തിൽ വരാത്തതിനാൽ പന്നികൾ ഒളിത്താവളമാക്കുകയായിരുന്നു. പത്തു വർഷം മുമ്പ് ചിലർ നെൽകൃഷിക്ക് പകരം പടമണ്ണിൽ റബർ നട്ടിരുന്നു. ടാപ്പിംഗ് നടക്കാത്തതിനാൽ ഇപ്പോൾ റബർ മരങ്ങൾക്കിടയിലും പന്നിക്കൂട്ടം പതിയിരിക്കുകയാണ്. ഏത്തവാഴ, ചേന, ചേമ്പ് തുടങ്ങിയ കൃഷികൾ പന്നിക്കൂട്ടം ഇറങ്ങി ഒറ്റ രാത്രി കൊണ്ട് ഒന്നില്ലാതെ നശിപ്പിച്ചു. തോക്ക് ലൈസൻസുള്ളവർ വിരളം ശല്യക്കാരായ കാട്ടുപന്നികളെ വെടിവച്ചുകൊല്ലാൻ സ്വന്തമായി ലൈസൻസുള്ള തോക്കു വേണം. പഞ്ചായത്തിൽ പ്രത്യേകം അപേക്ഷ സമർപ്പിച്ച് എം പാനൽ ചെയ്ത് ലിസ്റ്റിൽ കയറണം. ഇത്തരത്തിലുള്ളവരുടെ ഒരു പാനൽ ഡിവിഷണൽ ഫോറസ്റ്റ് ഓഫീസർ, വൈൽഡ് ലൈഫ് വാർഡൻ എന്നിവർ തയാറാക്കിയിട്ടുണ്ട്. വനം വകുപ്പ്, പോലീസ്, മറ്റ് യൂണിഫോം സർവീസിൽപ്പെട്ട ഉദ്യോഗസ്ഥർ, സ്വന്തമായി തോക്ക് ഉപയോഗിക്കാൻ ലൈസൻസുള്ളവർ എന്നിവരെയാണ് എം പാനൽ ചെയ്യുന്നത്. പഞ്ചായത്ത് പ്രസിഡന്‍റിന്‍റെ അനുമതിയോടെ ഇവർക്ക് പന്നിയെ വെടിവയ്ക്കാം. അനുമതി ഇല്ലാതെ കാട്ടുപന്നിയെ ഇപ്പോഴും കൊല്ലാൻ കഴിയില്ല. കൊല്ലുന്നവൻ അടുത്ത കാലത്ത് പുറം ലോകം കാണില്ല. അനുമതിയോടെ കൊന്നാൽ പന്നിയുടെ ജഡം ഉദ്യോഗസ്ഥരെ ബോധ്യപ്പെടുത്തി കുഴിച്ചിടുക മാത്രമാണ് പരിഹാരം. ഇറച്ചിയാക്കി വിൽക്കുകയോ കഴിക്കുകയോ ചെയ്താൽ പിടിവീഴും എന്ന കാര്യം ഉറപ്പ്. സാധാരണക്കാരായ കൃഷിക്കാർക്ക് മാത്രമാണ് നിയമം ബാധകമായിട്ടുള്ളത്. കാടിറങ്ങി നാട്ടിൽ പെറ്റുപെരുകിയ കാട്ടുപന്നികൾ‌ വന്യമൃഗ സംരക്ഷണ പരിധിയിൽ എങ്ങനെ വരുമെന്നാണ് കർഷകരുടെ ചോദ്യം വർഷങ്ങളായി കാർഷിക മേഖലയെ വെല്ലുവിളിച്ചുകൊണ്ടുള്ള പന്നിശല്യം നേരിടാൻ ആകെ അവലംബിക്കുന്നത് തോക്ക് ഉപയോഗിച്ച് കൊല്ലുകയെന്നതു മാത്രമാണ്. എന്നാൽ ലൈസൻസുള്ളവർ വിരളമാണ്. കോയിപ്രം പഞ്ചായത്തിൽ മൂന്നു പേർ മാത്രമാണ് പന്നിയെ കൊല്ലാൻ എം പാനൽ ചെയ്തിട്ടുള്ളത്. കേരള ഇൻഡിപെന്‍ഡന്‍റ്ഫാർമേഴ്സ് അസോസിയേഷന ് (കിഫ) പ്രത്യേകം ഷൂട്ടേഴ്സ് ക്ലബുണ്ട്. ഇവർക്ക് നൂറിലധികം ലൈസൻസുള്ള ഷൂട്ടർമാരുണ്ട്. പഞ്ചായത്തുകൾ ഇവരെ എം പാനൽ ഷൂട്ടർമാരായി നിയമിച്ചിട്ടുണ്ട്. ഇവരുടെ സഹായത്തോടെ പന്നികളെ കൊന്നൊടുക്കാം. എന്നാൽ ഇക്കാര്യങ്ങൾ ഒന്നും സാധാരണക്കാരായ കർഷകർക്ക് അറിയില്ല. പഞ്ചായത്തുകൾ മുൻകൈയെടുക്കുന്നതുമില്ല. തെരഞ്ഞെടുപ്പോ ഉപതെരഞ്ഞെടുപ്പോ പ്രഖ്യാപിച്ചു കഴിഞ്ഞാൽ തോക്ക് അധികൃതർക്ക് മുന്നിൽ സറണ്ടർ ചെയ്യണം. തെരഞ്ഞെടുപ്പ് കഴിഞ്ഞ് ഫലം വന്ന് രണ്ടാഴ്ച കഴിഞ്ഞു മാത്രമേ തോക്ക് തിരികെ ലഭിക്കു. തോക്ക് ഇല്ലാത്ത സാഹചര്യം. പന്നി പെറ്റുപെരുകാൻ ഈ ഇടവേള ധാരാളം. കൊ ന്നു തള്ളുന്ന പന്നികളുടെ മൂന്നിരട്ടി ഇതിനോടകം ജന്മം കൊണ്ടുകഴിയും. പന്നി ഒന്നിന് 1000 രൂപായായിരുന്നു അടുത്ത കാലം വരെ ഷൂട്ടർമാർക്കുള്ള ഓണറേറിയം . ഇത് 1500 ആയി ഇപ്പോൾ വർധിപ്പിട്ടുണ്ട്.

ഭീകരവാദത്തിനെതിരേ പ്രതിഷേധവും അന്ത്യാഞ്ജലിയും

കോന്നി : ജമ്മു കാശ്മീരിലെ പഹൽഗാമിൽ ഭീകരവാതികളുടെ അക്രമണത്തിൽ മരണപ്പെട്ടവർക്ക് അന്ത്യാഞ്ജലി അർപ്പിച്ച് കോന്നി ടൗണിൽ കോൺഗ്രസ് മണ്ഡലം കമ്മിറ്റിയുടെ ആഭിമുഖ്യത്തിൽ ദീപം തെളിച്ചു. ഭീകരവാദത്തിനെതിരേ പ്രതിജ്ഞയുമെടുത്തു. കോൺഗ്രസ് മണ്ഡലം പ്രസിഡന്‍റ് പ്രവീൺ പ്ലാവിളയിൽ അധ്യക്ഷത വഹിച്ച യോഗം കെപിസിസി അംഗം മാത്യു കുളത്തിങ്കൽ ഉദ്ഘാടനം ചെയ്തു. മോഹനൻ മുല്ലപ്പറമ്പിൽ, ശ്യാം എസ്. കോന്നി, തോമസ് കാലായിൽ, രാജീവ് മള്ളൂർ, സുലേഖ വി. നായർ, അർച്ചനാ ബാലൻ, ഷിജു അറപ്പുരയിൽ, ഫൈസൽ കോന്നി, റോബിൻ കാരാവള്ളിൽ, ബഷീർ കോന്നി, റോബിൻ ചെങ്ങറ സാബു മഞ്ഞക്കടമ്പൻ, മനു എന്നിവർ പ്രസംഗിച്ചു.

ഫ്രാന്‍സിസ് പാപ്പായ്ക്ക് ചങ്ങനാശേരി അതിരൂപതയുടെ പ്രണാമം ഇന്ന് മെത്രാപ്പോലീത്തന്‍ പള്ളിയില്‍

ചങ്ങനാശേരി: ആഗോള കത്തോലിക്കാ സഭയെ ഒരു വ്യാഴവട്ടക്കാലം നയിച്ച് നിത്യതയിലേക്കു കടന്നുപോയ ഫ്രാന്‍സിസ് പാപ്പായ്ക്ക് പ്രണാമമര്‍പ്പിച്ചു ചങ്ങനാശേരി അതിരൂപത സെന്‍റ് മേരീസ് മെത്രാപ്പോലീത്തന്‍ പളളിയില്‍ പ്രര്‍ഥനാശുശ്രൂഷകളും അനുസ്മരണ സമ്മേളനവും നടത്തും. ഉച്ചകഴിഞ്ഞ് മൂന്നിനു നടക്കുന്ന വിശുദ്ധകുര്‍ബാനയ്ക്കും തുടര്‍ന്നുള്ള ഒപ്പീസിനും ആര്‍ച്ച്ബിഷപ് മാര്‍ തോമസ് തറയില്‍ മുഖ്യകാര്‍മികനായിരിക്കും. തുടര്‍ന്നു നടക്കുന്ന അനുസ്മരണ സമ്മേളനത്തില്‍ ആര്‍ച്ച്ബിഷപ് മാര്‍ തോമസ് തറയില്‍ അധ്യക്ഷത വഹിക്കും. മന്ത്രി വി.എന്‍. വാസവന്‍ ഉദ്ഘാടനം ചെയ്യും. മലങ്കര ഓര്‍ത്തഡോക്സ് സഭാധ്യക്ഷന്‍ ബസേലിയോസ് മാര്‍ത്തോമ മാത്യൂസ് തൃതീയന്‍ കാതോലിക്കാ ബാവ അനുഗ്രഹപ്രഭാഷണവും അനുസ്മരണവും നടത്തും. ആര്‍ച്ച്ബിഷപ് മാര്‍ ജോസഫ് പെരുന്തോട്ടം, മാര്‍ത്തോമാ സഭ അടൂര്‍ ഭദ്രാസനാധിപന്‍ മാത്യൂസ് മാര്‍ സെറാഫിം എപ്പിസ്‌കോപ്പ, സുറിയാനി ഓര്‍ത്തഡോക്‌സ് സഭ ജറൂസലേം പാത്രിയര്‍ക്കല്‍ വികാര്‍ മാത്യൂസ് മാര്‍ തിമോത്തിയോസ് മെത്രാപ്പോലീത്ത, റവ.ഡോ. തോമസ് സാമുവല്‍, കുറിച്ചി അദ്വൈത വിദ്യാശ്രമത്തിലെ സ്വാമി വിശാലാനന്ദ, പുതൂര്‍പള്ളി മുസ്‌ലിം ജമാ അത്ത് പ്രസിഡന്‍റ് ടി.പി. അബ്ദുള്‍ ഹമീദ്, ചങ്ങനാശരി അതിരൂപത മുഖ്യ വികാരി ജനറാള്‍ മോണ്‍. ആന്‍റണി ഏത്തക്കാട്ട്, പാസ്റ്ററല്‍ കൗണ്‍സില്‍ ജോയിന്‍റ് സെക്രട്ടറി ബിജു സെബാസ്റ്റ്യന്‍ എന്നിവര്‍ പ്രസംഗിക്കും. അതിരൂപതാ വികാരി ജനറാള്‍മാരായ മോണ്‍. മാത്യു ചങ്ങങ്കരി, മോണ്‍. സ്‌കറിയ കന്യാകോണില്‍, പ്രൊക്കുറേറ്റര്‍ ഫാ. ആന്‍റണി മാളേക്കല്‍, ചാന്‍സിലര്‍ ഫാ. ജോര്‍ജ് പുതുമനമൂഴിയില്‍, കത്തീഡ്രല്‍ വികാരി ഫാ. ജോസഫ് വാണിയപുരയ്ക്കല്‍ എന്നിവര്‍ നേതൃത്വം നല്‍കും. അനുസ്മരണ കുർബാനയിലും സമ്മേളനത്തിലും എല്ലാ ഫൊറോനാ വികാരിമാരും അതിരൂപത-സന്യസ്ത വൈദീകർ, സമർപ്പിതർ, പാസ്റ്ററൽ-ഫൊറോനാ കൗൺസിൽ അംഗങ്ങൾ, പാരീഷ്കൗൺസിൽ അംഗങ്ങൾ, സംഘടനാ ഭാരവാഹികൾ, മതാധ്യാപകർ, കുടുംബകൂട്ടായ്മ ഭാരവാഹികൾ തുടങ്ങിയവർ പങ്കെടുക്കും.

ചങ്ങനാശേരി അതിരൂപത കോര്‍പറേറ്റ് മാനേജ്മെന്‍റ് അധ്യാപക കണ്‍വന്‍ഷനുകള്‍ക്ക് തുടക്കം

ചങ്ങനാശേരി: ചങ്ങനാശേരി അതിരൂപത കോര്‍പറേറ്റ് മാനേജ്മെന്റ് അധ്യാപക കണ്‍വന്‍ഷനുകള്‍ക്കു തുടക്കമാകുന്നു. 110 സ്‌കൂളുകളിലെ 2,000 അധ്യാപകര്‍ക്ക് ഏഴ് സോണുകളിലായാണു കണ്‍വന്‍ഷന്‍ സംഘടിപ്പിച്ചിരിക്കുന്നത്. ഈശോമിശിഹായുടെ മനുഷ്യാവതാര ജൂബിലിയുടെ പ്രധാന പ്രമേയമായ പ്രത്യാശയുടെ തീര്‍ഥാടകര്‍ എന്നത് സന്ദേശമായി സ്വീകരിക്കുന്ന കണ്‍വന്‍ഷനുകളില്‍ കാലത്തിന്‍റെ മാറ്റങ്ങള്‍ക്കൊത്ത് വിദ്യാഭ്യാസരംഗത്ത് നിര്‍ണായക ശക്തിയാകുന്നതിനുള്ള പരിശീലനങ്ങളും പ്രത്യാശയുടെ തീര്‍ഥാടകരായി മാറുവാന്‍ അധ്യാപകരെ പ്രചോദിപ്പിക്കുന്ന ക്ലാസുകളും വിദ്യാഭ്യാസ സംബന്ധമായ ചര്‍ച്ചകളും നടക്കും. വിദ്യാഭ്യാസ മേഖലയിലെ പ്രഗത്‌ഭര്‍ ക്ലാസുകള്‍ക്കും ചര്‍ച്ചകള്‍ക്കും നേതൃത്വം നല്‍കും. 25ന് എടത്വാ സോണില്‍ ആരംഭിച്ച് മേയ് 6നു ചമ്പക്കുളം സോണില്‍ അവസാനിക്കുന്ന ഏഴു സോണല്‍ കണ്‍വന്‍ഷനുകളിലും ചങ്ങനാശേരി ആര്‍ച്ച്ബിഷപ് മാര്‍ തോമസ് തറയില്‍ സന്ദേശം നല്‍കും. അതിരൂപത വികാരി ജനറാള്‍മാര്‍ സന്നിഹിതരാകും. ചങ്ങനാശേരി അതിരൂപത കോര്‍പറേറ്റ് മാനേജ്മെന്‍റും ടീച്ചേഴ്‌സ് ഗില്‍ഡും സംയുക്തമായി സംഘടിപ്പിക്കുന്ന കണ്‍വന്‍ഷന്‍റെ മുന്നൊരുക്കങ്ങള്‍ പൂര്‍ത്തിയായതായി കോര്‍പറേറ്റ് മാനേജര്‍ റവ.ഡോ. ആന്‍റണി മൂലയില്‍, അസിസ്റ്റന്‍റ് മാനേജര്‍ റവ.ഡോ. ടോണി ചെത്തിപ്പുഴ, ടീച്ചേഴ്‌സ് ഗില്‍ഡ് പ്രസിഡന്‍റ് ഈശോ തോമസ്, ഗില്‍ഡ് ഭാരവാഹികള്‍ എന്നിവര്‍ അറിയിച്ചു. അമൃതം ലഹരിവിരുദ്ധ പദ്ധതി ലഹരിക്കെതിരേ സ്‌കൂളുകള്‍ കേന്ദ്രീകരിച്ചുള്ള ശക്തമായ പോരാട്ടത്തിന് കണ്‍വന്‍ഷനില്‍ തുടക്കം കുറിക്കും. ലഹരിക്കെതിരേ ജീവന്‍റെ സംസ്‌കാരത്തിനായി വിദ്യാര്‍ഥികളെ അണിചേര്‍ത്ത്, സര്‍ക്കാരിന്‍റെ ലഹരിവിരുദ്ധ പരിപാടികളോടു ചേര്‍ന്ന് ചങ്ങനാശേരി അതിരൂപത കോര്‍പറേറ്റ് മാനേജ്‌മെന്‍റ് 110 വിദ്യാലയങ്ങളില്‍ 2025-26 അക്കാദമിക വര്‍ഷത്തില്‍ അമൃതം എന്ന പേരിലാണ് ലഹരിവിരുദ്ധ കാമ്പയിന്‍ സംഘടിപ്പിക്കുന്നത്. കുട്ടികള്‍ക്കു വിവിധ ബോധവത്കരണ പ്രവര്‍ത്തനങ്ങള്‍, കൗണ്‍സലിംഗ്, പിടിഎയോട് ചേര്‍ന്ന് ലഹരിവിരുദ്ധ മുന്നേറ്റങ്ങള്‍, ജാഗ്രതാ സെല്ലുകള്‍ തുടങ്ങിയവ അമൃതം പദ്ധതിയില്‍ ഉണ്ടായിരിക്കുമെന്ന് കോര്‍പറേറ്റ് മാനേജര്‍ ഫാ. ആന്‍റണി മൂലയില്‍ അറിയിച്ചു.

ജര്‍മനിയില്‍ സ്‌റ്റൈപെന്‍റോടെ സൗജന്യ ഉപരിപഠനം: സെമിനാര്‍ നാളെ തിരുവല്ലയില്‍

കോട്ടയം: ജൻറൈസ് ഗ്ലോബല്‍ സ്റ്റാഫിംഗും ബദനി ഇന്‍സ്റ്റിറ്റ്യൂട്ട് ഓഫ് ലാംഗ്വേജ് സ്റ്റഡീസും ചേര്‍ന്ന് ജര്‍മനിയിലെ ഉപരിപഠന സാധ്യതകള്‍ പരിചയപ്പെടുത്തുന്നതിനായി സെമിനാര്‍ സംഘടിപ്പിക്കും. നാളെ രാവിലെ 10 മുതല്‍ തിരുവല്ല തോലശേരി പുഷ്പഗിരി റോഡിലുള്ള ബദനി ഇന്‍സ്റ്റിറ്റ്യൂട്ട് ഓഫ് ലാംഗ്വേജ് സ്റ്റഡീസിലാണ് (ബില്‍സ്) സെമിനാര്‍ നടക്കുന്നത്. പ്ലസ് ടു വിന് 55ശതമാനം മാര്‍ക്ക് നേടിയവര്‍ക്ക് അപേക്ഷിക്കാം. പഠന കാലത്ത് പ്രതിമാസം ഒരു ലക്ഷം രൂപ വരെ സ്‌റ്റൈപെന്‍റ് ലഭിക്കും. പഠനം പൂര്‍ത്തിയാക്കിയശേഷം പ്ലേസ്മെന്‍റ് അവസരങ്ങളും പിആര്‍ സാധ്യതകളും ലഭിക്കും. നഴ്‌സിംഗ് കൂടാതെ ഫുഡ് ടെക്‌നോളജി, ലോജിസ്റ്റിക്‌സ്, മെക്കട്രോണിക്, ഹോസ്പിറ്റാലിറ്റി മാനേജ്‌മെന്‍റ്, ഇലക്‌ട്രിക്കല്‍ മെക്കാനിക്‌സ് കോഴ്‌സുകളും സ്‌റ്റൈപെന്‍റോടെയും ഫീസില്ലാതെയും പഠിക്കാം. ജൻറൈസിലൂടെ കേരളത്തില്‍നിന്ന് ധാരാളം കുട്ടികള്‍ക്കു പ്ലേയ്‌സ്മെന്‍റ് ലഭിച്ചു. മുന്‍കൂട്ടി പേര് രജിസ്റ്റര്‍ ചെയ്യുന്ന 100 പേര്‍ക്കാണ് പ്രവേശനം. ഇപ്പോള്‍ രജിസ്റ്റര്‍ഡ് നഴ്‌സ്മാര്‍ക്കും അവസരമുണ്ട്. ബിഎസ്‌സി, ജിഎന്‍എം രജിസ്റ്റര്‍ഡ് നഴ്‌സുമാര്‍ക്ക് ജര്‍മന്‍ ഭാഷ പരിശീലനവും താമസ ഭക്ഷണ സൗകര്യവും നല്‍കും. 7042421927, 7428548800. [email protected].

ഫ്രാൻസിസ് മാർപാപ്പ സ്മരണയിൽ കാഞ്ഞിരപ്പള്ളി രൂപതയിൽ പ്രാർഥനാദിനം

കാഞ്ഞിരപ്പള്ളി: ഫ്രാൻസിസ് മാർപാപ്പയുടെ കബറടക്ക ശുശ്രൂഷകൾ നടത്തപ്പെടുന്ന നാളെ കാഞ്ഞിരപ്പള്ളി രൂപതയിൽ പ്രത്യേക പ്രാർഥനാദിനമായി ആചരിക്കുന്നതിന് കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ നിർദേശം നൽകി. രൂപതയിലെ എല്ലാ ഇടവകകളിലും പരിശുദ്ധ പിതാവിനെ അനുസ്മരിച്ച് വിശുദ്ധ കുർബാന അർപ്പിക്കുകയും ഒപ്പീസ് നടത്തുകയും ചെയ്യുന്നതാണ്. യാമ ശുശ്രൂഷകളിലുൾപ്പെടെ കുടുംബ നമസ്കാരങ്ങളിൽ പരിശുദ്ധ പിതാവിനെ പ്രത്യേകം സ്മരിക്കും. രൂപതയിലെ എല്ലാ ഓഫീസുകൾക്കും വിദ്യാഭ്യാസ സ്ഥാപനങ്ങളുൾപ്പെടെയുള്ള സ്ഥാപനങ്ങൾക്കും അവധിയായിരിക്കും. മുൻകൂട്ടി നിശ്ചയിച്ച പരീക്ഷകൾ നടത്തപ്പെടുന്നതാണ്. പരിശുദ്ധ പിതാവിന്‍റെ കബറടക്ക ശുശ്രൂഷയിൽ ദൃശ്യ- ശ്രാവ്യ മാധ്യമങ്ങളിലൂടെ ആത്മനാ പങ്കുചേരുന്നതിനും നിർദേശം നൽകിയിട്ടുണ്ട്. പ്രാർഥനാദിനങ്ങളായാചരിക്കുന്ന ഒന്പതു ദിവസങ്ങളിലും രൂപതയിലെ ഇടവകകളിലെയും സ്ഥാപനങ്ങളിലെയും എല്ലാ ആഘോഷ പരിപാടികളും ഒഴിവാക്കേണ്ടതാണ്. മുൻകൂട്ടി നിശ്ചയിച്ച തിരുനാളുകളും പ്രത്യേക പ്രാധാന്യമുള്ള പരിപാടികളും മാറ്റി വയ്ക്കാനാവാത്ത സാഹചര്യമാണെങ്കിൽ മാത്രം പരിശുദ്ധ പിതാവിനെ അനുസ്മരിച്ചും അദ്ദേഹത്തോടുള്ള ആദരവ് പ്രകടിപ്പിച്ചും ആഘോഷങ്ങൾ ഒഴിവാക്കി നടത്താവുന്നതാണെന്ന് രൂപത കേന്ദ്രത്തിൽ നിന്ന് അറിയിച്ചു.

ഗവി യാത്രക്കാരുമായി ബസ് വീണ്ടും വനത്തിൽ കുടുങ്ങി

പത്തനംതിട്ട: ഗവി റൂട്ടിൽ പോയ കെഎസ്ആർടിസി ബസ് വീണ്ടും കൊടുംവനത്തിൽ കുടുങ്ങി. പത്തനംതിട്ട കെഎസ്ആർടിസി ഡിപ്പോയിൽ നിന്ന് ഇന്നലെ രാവിലെ ആറരയോടെ മൂഴിയാർ വഴി കുമളിക്ക് യാത്ര തിരിച്ച ആർഎസി 497 നമ്പർ ബസാണ് തകരാറിലായി അരണമുടിക്ക് സമീപം സർവീസ് മുടങ്ങിയത്. ഗവി റൂട്ടിലെ സ്ഥിരം സർവീസായതിനാൽ യാത്രികരിൽ അധികവും ആങ്ങമൂഴി , മൂഴിയാർ, കൊച്ചു പമ്പാ , വണ്ടിപ്പെരിയാർ, കുമളി മേഖലയിൽ ഉള്ളവരായിരുന്നു. ഗവി വഴിയുള്ള കാനനയാത്ര ആസ്വദിക്കാനായി പുറപ്പെട്ട ഏതാനും സഞ്ചാരികളും ബസിലുണ്ടായിരുന്നു. 38 യാത്രക്കാരും മൂന്നര മണിക്കൂറുകളോളം വഴിയിൽ കുടുങ്ങി. പത്തനംതിട്ട ഡിപ്പോയിൽ നിന്ന് പകരം അയച്ച ബസ് ഒന്നരയോടെ അരണമുടിയിൽ എത്തി യാത്രക്കാരുമായി ഗവി, കുമളി റൂട്ടിലേക്ക് തിരിച്ചു. പകരമെത്തിയ ബസിലാണ് കെഎസ്ആർടിസി മെക്കാനിക് വിഭാഗം ജീവനക്കാരും ഉണ്ടായിരുന്നത്. തകരാറായ ബസിന് പത്തുവർഷത്തിൽ താഴെയെ പഴക്കമുള്ളു എന്നാണ് വിശദീകരണം. കഴിഞ്ഞ 17ന് കൊല്ലം ചടയമംഗലത്തു നിന്നും വിനോദ സഞ്ചാരികളുമായി എത്തിയ കെഎസ്ആർടിസി ബസ് അരണമുടിക്കു സമീപം തകരാറിലായി. തുടർന്ന് യാത്രക്കാർ അഞ്ചു മണിക്കൂറാണ് മഴയത്തു വനത്തിൽ കഴിച്ചു കൂട്ടിയത്. വിവരം അറിഞ്ഞ് പത്തനംതിട്ട ഡപ്പോയിൽ നിന്നും മറ്റൊരു ബസ് അയച്ച് യാത്രക്കാരെ അതിൽ കയറ്റിയെങ്കിലും പത്തുമീറ്റർ മാത്രം ഓടി ആ ബസും നിശ്ചലമായിരുന്നു. ഭക്ഷണം കഴിക്കാതെ മണിക്കൂറുകൾ വലഞ്ഞ യാത്രക്കാർ കുമളിയിൽ നിന്ന് വന്ന മറ്റൊരു കെഎസ്ആർടിസി ബസിലാണ് അന്ന് ചടയമംഗലത്തേക്ക് തിരിച്ചത്. അടിക്കടി ബസുകൾ വനത്തിൽ കുടുങ്ങാനുള്ള പ്രധാന കാരണം ബസുകളുടെ പഴക്കവും മെക്കാനിക്കൽ വിഭാഗത്തിന്‍റെ പിടിപ്പുകേടുമാണെന്ന് ആക്ഷേപം. പത്തനംതിട്ട കെഎസ്ആർടിസി മെക്കാനിക്കൽ വിഭാഗത്തിനെതിരേ പല തവണ ഇത്തരത്തിൽ ആരോപണം ഉയർന്നിട്ടുണ്ട്. ഹൈറേഞ്ചിലൂടെ ഓടുന്ന വാഹനത്തിന്‍റെ അവസ്ഥ ശരിയായ രീതിയിൽ വർക്ക് ഷോപ്പിൽ പരിശോധിക്കാറില്ല. രാത്രി ഓട്ടം കഴിഞ്ഞെത്തുന്ന വാഹനത്തിന്‍റെ കണ്ടീഷൻ പരിശോധിച്ച് അറ്റകുറ്റപ്പണി നടത്തിയ ശേഷമേ അടുത്ത ദിവസത്തെ ഓട്ടത്തിന് വിട്ടുകൊടുക്കാവൂ എന്നാണ് നിർദ്ദേശം. പലപ്പോഴും പരിശോധന വഴിപാടായി മാറുകയാണ്. അവശ്യം മാറേണ്ട സ്പെയർ പാർട്സുകളുടെ അഭാവമാണ് കാരണമെന്ന് ആക്ഷേപമുണ്ട്.

മുഖ്യമന്ത്രിയുടെ വാഹനത്തിനു നേരേ കരിങ്കൊടി യൂത്ത് കോൺഗ്രസിന്‍റെ അപ്രതീക്ഷിത പ്രതിഷേധം പോലീസിനെ വെട്ടിലാക്കി

പത്തനംതിട്ട: മന്ത്രിസഭയുടെ നാലാം വാർഷിക ആഘോഷത്തിന് പത്തനംതിട്ടയിലെത്തിയ മുഖ്യമന്ത്രി പിണറായി വിജയന്‍റെ വാഹനത്തിനു നേരേ യൂത്ത് കോൺഗ്രസിന്‍റെ കരിങ്കൊടി.യൂത്ത് കോൺഗ്രസ് ജില്ലാ പ്രസിഡന്‍റ് വിജയ് ഇന്ദുചൂഡന്‍റെ നേതൃത്വത്തിൽ അഴൂരിലെ സർക്കാർ ഗസ്റ്റ് ഹൗസിനു സമീപമാണ് കരിങ്കൊടിയുമായി പ്രതിഷേധിച്ചത്. കരിങ്കൊടി കാണിച്ചവരെ അറസ്റ്റ് ചെയ്തെങ്കിലും യൂത്ത് കോൺ‌ഗ്രസിന്‍റ അപ്രതീക്ഷിത പ്രതിഷേധം പോലീസിനെയും വെട്ടിലാക്കി. ജില്ലാ പോലീസ് മേധാവിയടക്കം നേരിട്ടെത്തി സുരക്ഷാച്ചുമതല നിർവഹിക്കുകയും ഇന്‍റലിജൻസ് വിഭാഗം ഉൾപ്പെടെ രംഗത്തുണ്ടാകുകയും ചെയ്തതിനിടെയാണ് യൂത്ത് കോൺഗ്രസുകാർ പ്രതിഷേധിച്ചത്. കരിങ്കൊടി കാണിച്ച ആറ് യൂത്ത് കോൺഗ്രസ് പ്രവർത്തകരെ പിന്നീട് പോലീസ് അറസ്റ്റ് ചെയ്തു. ഇന്നലെ രാവിലെ ഗസ്റ്റ് ഹൗസിൽ നിന്നും സംവാദം പരിപാടി നടക്കുന്ന ഓഡിറ്റോറിയത്തിലേക്ക് വരുന്പോഴായിരുന്നു പ്രതിഷേധം. വാഹനം ഗസ്റ്റ്ഹൗസ് റോഡിൽ നിന്ന് പ്രധാന റോഡിലേക്ക് കയറി അല്പം കഴിഞ്ഞപ്പോഴാണ് മറഞ്ഞുനിന്ന പ്രവർത്തകർ വാഹനത്തിന് മുന്നിലേക്ക് ചാടി കരിങ്കൊടി വീശിയത്. റോഡിൽ ഡ്യൂട്ടിയിലുണ്ടായിരുന്ന പോലീസുകാർ ഇവരെ മൽപ്പിടിത്തത്തിലൂടെ ജീപ്പിലാക്കി. നാലാം വാർഷികത്തിന്‍റെ പേരിൽ സർക്കാർ നടത്തുന്ന ധൂർത്ത് അവസാനിപ്പിക്കണമെന്ന് ആവശ്യപ്പെട്ടായിരുന്നു പ്രതിഷേധം. യൂത്ത് കോൺഗ്രസ് ജില്ലാ പ്രസിഡന്‍റ് വിജയ് ഇന്ദുചൂഡന്‍റെ ഷർട്ട് പിടിവലിക്കിടെ ഊരി പോലീസ് ഉദ്യോഗസ്ഥന്‍റെ കൈയിലായി. സംസ്ഥാന സെക്രട്ടറി റെനോ പി. രാജൻ, ജില്ലാ സെക്രട്ടറി ജിതിൻ ജി. നൈനാൻ, നേസ്മൽ കാവിളയിൽ, സുബിൻ വല്യയന്തി, റോബിൻ വല്യ‌യന്തി എന്നിവരാണ് അറസ്റ്റിലായത്. യൂത്ത് കോൺഗ്രസ് ജില്ലാ സെക്രട്ടറി അൻസർ മുഹമ്മദ്, നിയോജകമണ്ഡലം പ്രസിഡന്‍റ് നേജോ മെഴുവേലി, കുമ്പഴ മണ്ഡലം പ്രസിഡന്‍റ് മുഹമ്മദ് റാഫി എന്നിവരെ കരുതൽ തടങ്കലിൽ ആക്കുകയും ചെയ്തു. മുഖ്യമന്ത്രി ജില്ല വിട്ടശേഷമാണ് ഇവരെ വിട്ടയച്ചത്.

സ്പെഷൽ സ്കൂളുകൾക്ക് ലഭിച്ചത് 1.78 കോടി

പത്തനംതിട്ട: ഭിന്നശേഷി കുട്ടികൾ പഠിക്കുന്ന സ്പെഷൽ സ്‌കൂളുകള്‍ക്കായി 2024-25 സാമ്പത്തിക വര്‍ഷം 50 കോടിരൂപ സംസ്ഥാനത്തു ലഭ്യമാക്കി. 270 കുട്ടികൾക്കാണ് ഇതു നൽകിയത്. പത്തനംതിട്ട ജില്ല‌യില്‍ അപേക്ഷിച്ച ഒമ്പത് സ്‌കൂളുകള്‍ക്കായി 1,78,49,500 രൂപ വിതരണം ചെയ്തു. 18 വയസ് കഴിഞ്ഞ ഭിന്നശേഷി കുട്ടികള്‍ക്ക് നിലവിലെ പദ്ധതികള്‍ സംബന്ധിച്ചും ദീപ്തി സ്പെഷല്‍ സ്‌കൂള്‍ പ്രിന്‍സിപ്പള്‍ ഡോ. സൂസന്‍ മാത്യുവിന്‍റെ നിര്‍ദേശത്തിന് മുഖ്യമന്ത്രി പിണറായി വിജയൻ മറുപടി നല്‍കി. പൊതുവിദ്യാലയങ്ങളില്‍ വിജ്ഞാന കേരളത്തിന്‍റെ നേതൃത്വത്തില്‍ സ്‌കില്‍ ഡവലപ്മെന്‍റ് പദ്ധതി നടപ്പിലാക്കുമെന്ന് മുഖ്യമന്ത്രി പറഞ്ഞു. ഓരോ കുട്ടികളുടെയും ഇഷ്ടങ്ങള്‍ തിരിച്ചറിഞ്ഞ് പരിശീലനം നല്‍കും. പാഠഭാഗങ്ങളില്‍ ആവശ്യമായവ ഉള്‍പ്പെടുത്തുവാനും നിര്‍ദ്ദേശം നല്‍കിയിട്ടുണ്ടെന്നും അധ്യാപകര്‍ക്ക് കൗണ്‍സിലിംഗ് പരിശീലനവും മാതാപിതാക്കള്‍ക്ക് കൗണ്‍സിലിംഗും നല്‍കുമെന്നും മുഖ്യമന്ത്രി പറഞ്ഞു. പൊതു വിദ്യാലങ്ങളില്‍ സ്‌കില്‍ ഡവലപ്മെന്‍റ്, ക്രിട്ടിക്കല്‍ തിങ്കിങ്, എഐ, കമ്യൂണിക്കേറ്റീവ് ഇംഗ്ലീഷ് പഠനങ്ങള്‍ക്ക് അവസരം ഒരുക്കണമെന്ന അധ്യാപകനായ സാബു പുല്ലാട്ട് നിർദേശിച്ചു. കുട്ടികളിലും മുതിര്‍ന്നവരിലും മാനസിക സമ്മര്‍ദ്ദം കുറക്കുവാനുള്ള ശാരീരിക മാനസിക വ്യായാമം നല്‍കുവാനുള്ള പദ്ധതികള്‍ നടപ്പിലാക്കുമെന്ന് യോഗാചാര്യന്‍ എം.ജി ദിലീപിന് മുഖ്യമന്ത്രി മറുപടി നല്‍കി. വിജ്ഞാനകേരളത്തിന്‍റെ രണ്ടാംഘട്ടം എന്ന നിലയില്‍ വിജ്ഞാന പത്തനംതിട്ടയുടെ ആഭിമുഖ്യത്തില്‍ സ്‌കില്ലിംഗ് പൈലറ്റ് അടിസ്ഥാനത്തില്‍ നടപ്പിലാക്കുന്നു. ഗുരു നിത്യ ചൈതന്യയുടെ പേരില്‍ സ്മാരകത്തിന്‍റെ പ്രവര്‍ത്തനങ്ങള്‍ വേഗത്തിലാക്കാനുള്ള നടപടികള്‍ സര്‍ക്കാര്‍ സ്വീകരിക്കുമെന്നും മുഖ്യമന്ത്രി മറുപടി നൽകി.

ദുരന്തഘട്ടത്തിൽ സഹായിക്കണമെന്ന ഭരണഘടന ഉറപ്പു പോലും ലംഘിക്കപ്പെട്ടു: മുഖ്യമന്ത്രി

പത്തനംതിട്ട: ദുരന്തമുണ്ടായാല്‍ സംസ്ഥാനങ്ങളെ സഹായിക്കണമെന്ന ഭരണഘടന ഉറപ്പ് പോലും കേന്ദ്ര സര്‍ക്കാര്‍ പാലിച്ചില്ലെന്ന് മുഖ്യമന്ത്രി പിണറായി വിജയൻ. സംസ്ഥാന സർക്കാരിന്‍റെ നാലാം വാർഷികത്തോടനുബന്ധിച്ച് എൽഡിഎഫ് സംഘടിപ്പിച്ച പൊതുസമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. വയനാട് ദുരന്തവുമായി ബന്ധപ്പെട്ട് കേരളത്തെ അവഗണിച്ചപ്പോൾ കേന്ദ്ര സര്‍ക്കാരിനെതിരേ ശബ്ദമുയര്‍ത്താന്‍ പ്രതിപക്ഷത്തിനായില്ല. തനതു വരുമാനത്തിൽ വർധന വരുത്തിയാണ് കേരളം ഈ ഘട്ടത്തിൽ പിടിച്ചു നിന്നതെന്ന് മുഖ്യമന്ത്രി പറഞ്ഞു. 2016ൽ സംസ്ഥാനത്തിന്‍റെ തനതു വരുമാനം 16 ശതമാനം ആയിരുന്നുവെങ്കിൽ 2025ൽ 73 ശതമാനമായി ഉയർന്നു. ആഭ്യന്തര ഉത്പാദനരംഗത്തും കുതിച്ചുചാട്ടം ഉണ്ടായി. സാന്പത്തികമായി കേന്ദ്രം ഞെരുക്കിയപ്പോഴും കിഫ്ബി മുഖേനയുള്ള പദ്ധതികളിലൂടെ കേരളം വികസന രംഗത്തും കുതിച്ചു ചാട്ടം നടത്തിയെന്ന് മുഖ്യമന്ത്രി ചൂണ്ടിക്കാട്ടി. ഐടി മേഖലയിൽ 9000 കോടി രൂപയുടെ മുതൽമുടക്ക് നടത്തി. പുതുതായി രണ്ട് ഐടി പാർക്കുകളും മൂന്ന് ഐടി ഇടനാഴികളും സ്ഥാപിക്കുകയാണ്. 6090 സ്റ്റാർട്ട് അപ്പുകൾ കേരളത്തിൽ ആരംഭിച്ചു. 60000 തൊഴിൽ അവസരങ്ങൾ ഇതിലൂടെ ഉണ്ടായി. 2026ൽ 15000 സ്റ്റാർട്ട് അപ്പുകളാണ് ലക്ഷ്യം. ഇതിലൂടെ ഒരു ലക്ഷം തൊഴിൽ അവസരങ്ങൾ ലക്ഷ്യമിടുന്നു. ആയുർവേദ റിസർച്ച് ഇൻസ്റ്റിറ്റ്യൂട്ട് അടക്കം മികവിന്‍റെ കേന്ദ്രങ്ങൾ സ്ഥാപിക്കപ്പെടാൻ പോകുകയാണ്. മൂന്ന് സയൻസ് പാർക്കുകളും കേരളത്തിൽ വരുന്നതോടെ സംസ്ഥാനം ആധുനിക വിജ്ഞാന ഉത്പാദന കേന്ദ്രമായി മാറുമെന്നും മുഖ്യമന്ത്രി ചൂണ്ടിക്കാട്ടി. കേരളത്തിന്‍റെ വികസനം അട്ടിമറിക്കാൻ ശ്രമിക്കുന്നവരാണ് ബിജെപിയും യുഡിഎഫുമെന്നും അദ്ദേഹം കുറ്റപ്പടുത്തി. സിപിഐ ജില്ലാ സെക്രട്ടറി സി.കെ. ശശിധരൻ അധ്യക്ഷത വഹിച്ചു. മന്ത്രി വീണാ ജോർജ്, ഡെപ്യൂട്ടി സ്പീക്കർ ചിറ്റയം ഗോപകുമാർ, എംഎൽഎമാരായ മാത്യു ടി. തോമസ്, പ്രമോദ് നാരായൺ, കെ.യു. ജനീഷ് കുമാർ, ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം, സിപിഎം ജില്ലാ സെക്രട്ടറി രാജു ഏബ്രഹാം, എൽഡിഎഫ് കൺവീനർ അലക്സ് കണ്ണമല, കെ.പി. ഉദയഭാനു, സജി അലക്സ്, ജിജി വട്ടശേരിൽ തുടങ്ങിയവർ പ്രസംഗിച്ചു.

ജെ.ബി. കമ്മീഷൻ റിപ്പോർട്ടിലെ 152 ശിപാർശകൾ നടപ്പിലാക്കിയെന്ന്

ജെ.ബി. കോശി കമ്മീഷന്‍ റിപ്പോര്‍ട്ട് വേഗത്തിലാക്കണമെന്ന് പാസ്റ്റര്‍ ഷിബു നെടുവേലി പുല്ലാട്, ഫാ. പി.വൈ. ജെസൻ എന്നിവർ മുഖ്യമന്ത്രിയോട് ആവശ്യപ്പെട്ടു. കമ്മീഷന്‍ റിപ്പോര്‍ട്ട് പ്രാവര്‍ത്തികമാക്കാനുള്ള ശ്രമത്തിലാണ് സര്‍ക്കാരെന്ന് മുഖ്യമന്ത്രി പറഞ്ഞു. 152 ശിപാര്‍ശകള്‍ ഇതിനോടകം നടപ്പിലാക്കി. 12 എണ്ണം മന്ത്രിസഭയുടെ പരിഗണനയിലാണ്. ചീഫ് സെക്രട്ടറിയുടെ അധ്യക്ഷതയില്‍ പദ്ധതി പഠിക്കുന്നതിനായി കമ്മിറ്റി രൂപീകരിച്ചിട്ടുണ്ട്. മന്ത്രിസഭാ പരിഗണനയ്ക്ക് വിടേണ്ടവ, കേന്ദ്രസര്‍ക്കാരുമായി ചര്‍ച്ച ചെയ്യേണ്ടവ എന്നിവയ്ക്കു പുറമേ നടപ്പാക്കാന്‍ കഴിയാത്ത ശിപാർശകളുമുണ്ടെന്ന് മുഖ്യമന്ത്രി ചൂണ്ടിക്കാട്ടി. ഇവ തരംതിരിച്ച് ചീഫ് സെക്രട്ടറിയുടെ നേതൃത്വത്തില്‍ സെക്രട്ടറിമാരുടെ യോഗം ചേര്‍ന്ന് ക്രോഡീകരിച്ച പട്ടിക തയ്യാറാക്കും. മറ്റ് വിഷയങ്ങളില്‍ കേന്ദ്രവുമായി ബന്ധപ്പെടുമെന്നും മുഖ്യമന്ത്രി പറഞ്ഞു.

വന്യമൃഗ ശല്യം പരിഹരിക്കാന്‍ നടപടി

പത്തനംതിട്ട ജില്ലയിലെ മലയോര മേഖലയിലെ രൂക്ഷമായ വന്യമൃഗ ശല്യം പരിഹരിക്കാന്‍ സര്‍ക്കാര്‍ നടപടി സ്വീകരിക്കുമെന്ന് മുഖ്യമന്ത്രി പിണറായി വിജയന്‍. വന്യമൃഗങ്ങള്‍ക്ക് വനത്തിനുള്ളില്‍ തന്നെ വെള്ളം ലഭ്യമാകുന്നതിന് അവിടെയുള്ള ജലസ്രോതസ് ശക്തമാക്കും. ഭക്ഷ്യയോഗ്യമായ സസ്യങ്ങള്‍ വനത്തില്‍ വളര്‍ത്തും. വന്യമൃഗങ്ങള്‍ നാട്ടിലെത്താതിരിക്കാന്‍ വനം വകുപ്പ് വഴി തടസം സൃഷ്ടിക്കുമെന്നും മുഖ്യമന്ത്രി പറഞ്ഞു. ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം, പി. എസ്. സതീഷ് കുമാർ, മണ്ണടി മോഹന്‍ തുടങ്ങിയവര്‍ ഉന്നയിച്ച വിഷയത്തില്‍ മറുപടി നല്‍കുകയായിരുന്നു മുഖ്യമന്ത്രി. വന്യമൃഗ ശല്യം മൂലം കര്‍ഷകരുടെ ജീവനും സ്വത്തിനും ഭീഷണി ഉണ്ടാകുന്നു. മലയോര മേഖലയ്ക്ക് പുറമേ ജില്ലയിലെ അടൂർ, പന്തളം ഭാഗങ്ങളിലും വന്യമൃഗആക്രമണം നേരിടുന്നുണ്ട്. കര്‍ഷകര്‍ക്കുവേണ്ടി സമഗ്രമായ ഒരു പദ്ധതി നടപ്പാക്കുന്നതിന് സര്‍ക്കാര്‍ മുന്‍കൈ എടുക്കണമെന്ന് ജില്ലാ പഞ്ചായത്ത് പ്രസിഡന്‍റ് അഭ്യര്‍ഥിച്ചു. വനമേഖലയോടു ചേര്‍ന്നു കിടക്കുന്ന വില്ലേജുകളില്‍ തേക്ക് ഉള്‍പ്പെടെയുള്ള മരങ്ങള്‍ വെട്ടുന്നതിന് അനുവാദം ലഭിച്ചിട്ടില്ല. പട്ടയ ഭൂമിയിലെ മരങ്ങള്‍ വെട്ടാനോ, വെട്ടിയിട്ട മരങ്ങള്‍ നീക്കം ചെയ്യാനോ ഉള്ള അനുമതി കിട്ടുന്നില്ല. കച്ചവടക്കര്‍ മരങ്ങള്‍ വാങ്ങിയാലും കര്‍ഷകര്‍ക്ക് ഭീമമായ നഷ്ടമാണ് ഉണ്ടാകുന്നത്. ഇതിനു സര്‍ക്കാരില്‍ നിന്നും ഇടപെടല്‍ ഉണ്ടാകണമെന്ന് ജോര്‍ജ് ഏബ്രഹാമിന്‍റെ ആവശ്യം പരിഗണിക്കുമെന്ന് മുഖ്യമന്ത്രി അറിയിച്ചു. വനമേഖലയോടുചേര്‍ന്ന പ്രദേശങ്ങളിൽ മരങ്ങള്‍ മുറിക്കുന്നതു സംബന്ധിച്ചുള്ള തടസം എന്തെന്ന് പരിശോധിച്ചു നടപടി സ്വീകരിക്കും. പട്ടയത്തില്‍ ആശങ്ക വേണ്ടെന്നും പട്ടയ നടപടികള്‍ വേഗത്തിലാക്കുമെന്നും അദ്ദേഹം വ്യക്തമാക്കി.

ലഹരിക്കെതിരേ കൂട്ടായ പ്രവര്‍ത്തനം ആവശ്യം: മുഖ്യമന്ത്രി

പത്തനംതിട്ട: ലഹരിക്കെതിരേ സമൂഹം ഒന്നിക്കണമെന്നും കൂട്ടായ്മയാണ് വേണ്ടതെന്നും മുഖ്യമന്ത്രി പിണറായി വിജയൻ. ലഹരി വേണ്ട എന്ന് പറയാനുള്ള ആര്‍ജവം യുവതലമുറ നേടണം. പൊതുസമൂഹത്തിന്‍റെ പൂര്‍ണ പിന്തുണ ഇതിനാവശ്യമാണ്. രണ്ടാം പിണറായി വിജയന്‍ സര്‍ക്കാരിന്‍റെ നാലാം വാര്‍ഷികത്തോടനുബന്ധിച്ച് നടന്ന പത്തനംതിട്ട ജില്ലാതല സംവാദത്തില്‍ സംസ്ഥാന പാഠപുസ്തക നിര്‍മാണ സമിതി അംഗം ഡോ. അജിത് ആര്‍ പിള്ളയുടെ കുട്ടികളിലെ ലഹരി ഉപയോഗത്തിനെതിരേ എന്തു നടപടിയാണ് സര്‍ക്കാര്‍ സ്വീകരിക്കുകയെന്ന ചോദ്യത്തിന് മറുപടി പറയുകയായിരുന്നു മുഖ്യമന്ത്രി. ലഹരിക്കെതിരായ പ്രവര്‍ത്തനം പൂര്‍ണ ഫലപ്രാപ്തിയിലെത്തിയിട്ടില്ല. ബോധവത്കരണമാണ് പ്രധാന മാര്‍ഗം. കുട്ടികള്‍ ലഹരി ഉപയോഗിക്കാതിരിക്കാനുള്ള ശ്രമമുണ്ടാകണം. അധ്യാപകരുടെയും രക്ഷാകര്‍ത്താക്കളുടെയും പിന്തുണ ആവശ്യമാണ്. രക്ഷിതാക്കള്‍ക്ക് പരിശീലനം നല്‍കണം. വിദ്യാർഥികള്‍ക്ക് കൗണ്‍സലിംഗ് നല്‍കാന്‍ അധ്യാപകര്‍ക്കാകണം. ലഹരിക്കെതിരായ പ്രവര്‍ത്തനം പാഠഭാഗങ്ങളില്‍ ഉള്‍പ്പെടുത്താന്‍ കഴിയുമോയെന്ന് പരിശോധിക്കും. കുട്ടികളുടെ സാമൂഹിക വളര്‍ച്ച മനസിലാക്കണം. ലഹരിയിലേക്ക് കുട്ടികള്‍ എങ്ങനെ എത്തുന്നുവെന്ന് തിരിച്ചറിഞ്ഞ് അവ തിരുത്തണം. കലാ, കായിക പഠനത്തിന് സ്‌കൂളുകളില്‍ സമയം കണ്ടെത്തണം. സ്‌കൂള്‍ വിടുന്നതിന് മുമ്പ് കുട്ടികളെ ഒന്നിച്ചു ചേര്‍ത്ത് വ്യായാമവും സ്‌കൂബാ ഡാന്‍സും ചെയ്യിക്കണം. പഠനത്തിന്‍റെ ഭാഗമായുള്ള മാനസിക സമര്‍ദം ഒഴിവാകാന്‍ ഇത് സഹായിക്കും. ഇതിനായി അധ്യാപകര്‍ക്ക് പരിശീലനം നല്‍കണം. ലഹരി ഉപയോഗിക്കുന്നവരെ കൗണ്‍സലിംഗിലൂടെ മാറ്റാന്‍ ശ്രമമുണ്ടാകണം. ഇതിന് സാധിക്കാത്തവരെ ഡി അഡിക്ഷന്‍ സെന്‍ററിലാക്കണം. ഇവരെ അകറ്റുകയല്ല ചേര്‍ത്തുപിടിക്കുകയാണ് വേണ്ടതെന്ന് മുഖ്യമന്ത്രി അഭിപ്രായപ്പെട്ടു. വിദ്യാലയങ്ങളുടെ അടുത്ത് ലഹരി വില്‍ക്കുന്നവര്‍ക്കെതിരേ അധ്യാപക. രക്ഷാകർത്തൃ സമിതി ജാഗ്രത പുലര്‍ത്തണം. ഇവ ശ്രദ്ധയില്‍പ്പെട്ടാല്‍ ടോള്‍ ഫ്രീ നമ്പറിലൂടെ പരാതിപ്പെടാം. പരാതിപ്പെടുന്നവരുടെ വിവരം രഹസ്യമായിരിക്കും. സര്‍ക്കാര്‍ പര്യസങ്ങളില്‍ ഈ നമ്പര്‍ ഉള്‍പ്പെടുത്തും. പരാതിക്കാരെക്കുറിച്ച് വിവരം പുറത്തറിഞ്ഞാല്‍ ഉത്തരവാദിത്വപ്പെട്ട ഉദ്യോഗസ്ഥന്‍ സര്‍വീസില്‍ ഉണ്ടാകില്ലെന്നും മുഖ്യമന്ത്രി പറഞ്ഞു.

മലയോര മേഖലയിലെ പ്രശ്‌നം പരിഹരിക്കും; വിമാനത്താവളം യഥാര്‍ഥ്യമാകും: മുഖ്യമന്ത്രി

പത്തനംതിട്ട: അസാധ്യമെന്ന് കരുതിയതു പലതും യാഥാർഥ്യമാക്കിയ സര്‍ക്കാരാണ് കേരളം ഭരിക്കുന്നതെന്ന് മുഖ്യമന്ത്രി പിണറായി വിജയന്‍. എൽ‌ഡിഎഫ് സര്‍ക്കാരിന്‍റെ നാലാം വാര്‍ഷികത്തോടനുബന്ധിച്ച് പ്രത്യേക ക്ഷണിതാക്കളുമായി പത്തനംതിട്ടയില്‍ നടത്തിയ ജില്ലാതല കൂടിക്കാഴ്ചയില്‍ സംസാരിക്കുകയായിരുന്നു മുഖ്യമന്ത്രി. 2016 ലെ കേരളത്തിന്‍റെ അവസ്ഥയും നിലവിലെ സാഹചര്യവും താരതമ്യം ചെയ്താല്‍ വ്യത്യാസം മനസിലാകുമെന്നും അദ്ദേഹം ചൂണ്ടിക്കാട്ടി. നിപ, ഓഖി, പ്രളയം, കോവിഡ്, നിരവധി പ്രകൃതിദുരന്തങ്ങള്‍ തുടങ്ങി നിരവധി പ്രതികൂല സാഹചര്യങ്ങളെ നേരിട്ടാണ് സംസ്ഥാനം അതിശയിപ്പിക്കുന്ന വികസന മുന്നേറ്റങ്ങള്‍ നടത്തിയതെന്നും മുഖ്യമന്ത്രി പറഞ്ഞു. പത്തനംതിട്ടയുടെ മലയോര മേഖലയിൽ നിലനിൽക്കുന്ന പ്രശ്നങ്ങൾക്കു പരിഹാരമുണ്ടാകും. കാട്ടുമൃഗശല്യം, പട്ടയ വിതരണം ഉൾപ്പെടെയുള്ള വിഷയങ്ങളിൽ തീരുമാനമുണ്ടാകും. ശബരിമല വിമാനത്താവളം യാഥാർഥ്യമാകുമെന്നതിലും സംശയം വേണ്ടെന്ന് പിണറിയാ വിജയൻ ചൂണ്ടിക്കാട്ടി. സംതൃപ്തിയോടെയാണ് സംസ്ഥാന സര്‍ക്കാര്‍ 10-ാം വര്‍ഷത്തിലേക്ക് പ്രവേശിക്കുന്നത്. 2016 ന് മുമ്പ് എല്ലാ മേഖലയിലും തകര്‍ന്നടിഞ്ഞ നാട്ടില്‍ നിന്ന് ഉയര്‍ത്തെഴുന്നേറ്റു. തകര്‍ച്ചയുടെ വക്കിലായിരുന്ന ഉന്നത വിദ്യാഭ്യാസ മേഖല മെച്ചപ്പെട്ടു. പൊതുവിദ്യാഭ്യാസ രംഗത്ത് ആശങ്കയില്ല. സ്കൂളുകൾ ഹൈടെക് നിലവാരത്തിലെത്തിയതോടെ കൊഴിഞ്ഞുപോയ കുട്ടികളിൽ നല്ലൊരു പങ്കും തിരികെവന്നു. ആരോഗ്യരംഗത്ത് ജില്ലയുടെ വികസനമടക്കം മുഖ്യമന്ത്രി വ്യക്തമാക്കി. കോവിഡ് മഹാമാരിയില്‍ മുട്ടുകുത്താത്ത സംസ്ഥാനമായിരുന്നു നമ്മുടേത്. രാജ്യവും ലോകവും അത്ഭുതത്തോടെയാണ് കേരളത്തെ നോക്കിയത്. കോവിഡ് മൂര്‍ധന്യാവസ്ഥയിലായപ്പോള്‍ നമ്മുടെ ആശുപത്രികളില്‍ വെന്‍റിലേഷന്‍ സൗകര്യം ഉള്‍പ്പെടെ ഒഴിവുണ്ടായിരുന്നു. മറ്റു സംസ്ഥാനങ്ങള്‍ പ്രായമേറിയവരെ കോവിഡ് മരണത്തിലേക്ക് തള്ളിവിട്ടപ്പോള്‍ 100 വയസ് കഴിഞ്ഞവര്‍ക്കും ഇവിടെ ചികിത്സ ലഭ്യമാക്കി. ആര്‍ദ്രം മിഷനിലൂടെ പ്രാഥമിക ആരോഗ്യകേന്ദ്രങ്ങളടക്കം വികസനപാതയിലായി. പ്രകൃതി ദുരന്തങ്ങളെ അതിജീവിക്കാന്‍ നമുക്കായെന്നും പിണറായി വിജയൻ പറഞ്ഞു. മന്ത്രി വീണാ ജോർജ് അധ്യക്ഷത വഹിച്ചു. മന്ത്രി കെ.എൻ. ബാലഗോപാൽ, ഡെപ്യൂട്ടി സ്പീക്കർ ചിറ്റയം ഗോപകുമാർ, എംഎൽഎമാരായ മാത്യു ടി. തോമസ്, കെ.യു. ജനീഷ് കുമാർ പ്രമോദ് നാരാൺ, ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം, ജില്ലാ കളക്ടർ എസ്. പ്രേംകൃഷ്ണൻ തുടങ്ങിയവർ പ്രസംഗിച്ചു. 23 പേർക്കാണ് സംവാദത്തിൽ ചോദ്യങ്ങൾ ഉന്നയിക്കാൻ അവസരം ലഭിച്ചത്.

വാര്‍ഷിക പദ്ധതി അംഗീകരിച്ചു

പത്തനംതിട്ട: 23 തദ്ദേശ സ്വയംഭരണ സ്ഥാപനങ്ങളുടെ 2025-26 വാര്‍ഷിക പദ്ധതി ജില്ലാ ആസൂത്രണ സമിതി അംഗീകരിച്ചു. ശുചിത്വ പ്രൊജക്ടുകള്‍ക്ക് തദ്ദേശസ്വയംഭരണസ്ഥാപനങ്ങള്‍ കൂടുതല്‍ ശ്രദ്ധ നല്‍കണമെന്ന് അധ്യക്ഷത വഹിച്ച ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം പറഞ്ഞു. ഏറത്ത്, മല്ലപ്പള്ളി, ഇലന്തൂർ, കോന്നി, കോയിപ്രം, പന്തളം, റാന്നി ബ്ലോക്ക്പഞ്ചായത്തുകളുടെയും പ്രമാടം, റാന്നി, കോയിപ്രം, മൈലപ്ര, സീതത്തോട്, ആനിക്കാട്, മല്ലപ്പുഴശേരി, കോന്നി, ഓമല്ലൂര്‍ , പന്തളം തെക്കേക്കര, മെഴുവേലി, കോഴഞ്ചേരി, ചെന്നീര്‍ക്കര, മലയാലപ്പുഴ, കല്ലൂപ്പാറ, തുമ്പമണ്‍ ഗ്രാമപഞ്ചായത്തുകളുടെയും വാര്‍ഷിക പദ്ധതിയാണ് അംഗീകരിച്ചത്. പത്തനംതിട്ട, പന്തളം നഗരസഭകളുടെ അയ്യന്‍കാളി തൊഴിലുറപ്പ് പദ്ധതി - ലേബര്‍ ബജറ്റ്, പുറമറ്റം ഗ്രാമപഞ്ചായത്തിന്‍റെ ഹെല്‍ത്ത് ഗ്രാന്‍റ് പദ്ധതി എന്നിവയ്ക്കും സമിതി അംഗീകാരം നല്‍കി. ജില്ലാ പഞ്ചായത്ത് വൈസ് പ്രസിഡന്‍റ് ബീനാ പ്രഭ, ഡെപ്യൂട്ടി പ്ലാനിംഗ് ഓഫീസര്‍ ജി. ഉല്ലാസ്, ആസൂത്രണ സമിതി അംഗങ്ങൾ, തദ്ദേശ സ്വയം ഭരണസ്ഥാപന അധ്യക്ഷന്മാർ, അംഗങ്ങള്‍, സെക്രട്ടറിമാര്‍ തുടങ്ങിയവര്‍ പങ്കെടുത്തു.

ബാലികയ്ക്കു നേരേ പീഡനം: യുവാവിന് 11 വര്‍ഷം കഠിനതടവും ഒന്നര ലക്ഷം രൂപ പിഴയും

പത്തനംതിട്ട: എട്ട് വയസുകാരിയെ ലൈംഗികചൂഷണത്തിന് ഇരയാക്കിയ കേസില്‍ യുവാവിന് 11 വര്‍ഷം കഠിനതടവും ഒന്നരലക്ഷം രൂപ പിഴയും. അയിരൂര്‍ കാഞ്ഞീറ്റുകര വാസുദേവപുരം വീട്ടില്‍ വാടകയ്ക്ക് താമസിക്കുന്ന ലിജു തോമസിനെയാണ് (32) ശിക്ഷിക്കപ്പെട്ടത്. പത്തനംതിട്ട അതിവേഗ സ്പെഷല്‍ കോടതി ജഡ്ജി ഡോണി തോമസ് വര്‍ഗീസിന്‍റെതാണ് ശിക്ഷാ ഉത്തരവ്. പിഴത്തുക അടച്ചില്ലെങ്കില്‍ ആറു മാസത്തെ അധികകഠിന തടവ് അനുഭവിക്കണം. പിഴത്തുക കുട്ടിക്ക് നല്‍കാനും കോടതി വിധിച്ചു. 2024 മേയ് 29ന് ഉച്ചയ്ക്ക് കുട്ടിയെ ഇയാള്‍ സ്‌കൂട്ടറില്‍ കയറ്റി കടയിലേക്ക് എന്നുപറഞ്ഞ് കൊണ്ടുപോയ ശേഷം കാഞ്ഞീറ്റുകരക്ക് സമീപത്തുളള കനാല്‍ പാലത്തില്‍ വച്ച് ദേഹത്ത് കടന്നുപിടിച്ച് ലൈംഗിക അതിക്രമം കാട്ടുകയായിരുന്നു. എസ്‌ഐ ആയിരുന്ന പി.സുരേഷ് കുമാര്‍ രജിസ്റ്റര്‍ ചെയ്ത് അന്വേഷണം ആരംഭിച്ച് പ്രതിയെ പിടികൂടി. തുടര്‍ന്ന്, അന്വേഷണം പൂര്‍ത്തിയാക്കി കോടതിയില്‍ കുറ്റപത്രം സമര്‍പ്പിച്ചത് എസ് ഐ മുഹ്സിന്‍ മുഹമ്മദ് ആയിരുന്നു.

ലൈംഗികാതിക്രമം: വയോധികന് മൂന്നുവര്‍ഷം കഠിനതടവ്

പത്തനംതിട്ട: ശബരിമല ദര്‍ശനത്തിനെത്തിയ പെണ്‍കുട്ടിയോടു ലൈംഗികാതിക്രമം കാട്ടിയ വയോധികന് മൂന്നു വര്‍ഷം കഠിനതടവും 50,000 രൂപ പിഴയും. മലപ്പുറം പൂക്കോട് നെല്ലാട് വീട്ടില്‍ സുബ്രഹ്‌മണ്യനെയാണ് (63) പത്തനംതിട്ട അതിവേഗസ്പെഷല്‍ കോടതി ജഡ്ജി ഡോണി തോമസ് വര്‍ഗീസ് ശിക്ഷിച്ചത്. മലപ്പുറത്തുനിന്നും അച്ഛനൊപ്പം ദര്‍ശനത്തിനെത്തിയ കുട്ടിക്കാണ് ഒപ്പം വന്ന ബന്ധുവില്‍ നിന്നും ദുരനുഭവമുണ്ടായത്. 2023 ഡിസംബര്‍ 22ന് പുലര്‍ച്ചെ മൂന്നിന് നടപ്പന്തലില്‍ വച്ചായിരുന്നു ലൈംഗികാതിക്രമം. പിതാവ് മലപ്പുറം കുളത്തൂര്‍ പൊലീസ് സ്റ്റേഷനില്‍ പരാതി നല്‍കി. പിന്നീട് കേസ് പരാതികാസ്പദമായ സ്ഥലപരിധി ഉള്‍പ്പെടുന്ന പമ്പ പൊലിസിന് കൈമാറുകയും ചെയ്തു. അന്നത്തെ എസ്‌ഐ ബി. എസ്. ആദര്‍ശ് കേസ് രജിസ്റ്റര്‍ ചെയ്തു. അന്വേഷണം പൂര്‍ത്തിയാക്കി പ്രതിക്കെതിരേ കോടതിയില്‍ കുറ്റപത്രം സമര്‍പ്പിച്ചത് .

പൊന്മേലില്‍ പോത്ത ഏബ്രഹാം കത്തനാരുടെ അനുസ്മരണം 26ന്

കോഴഞ്ചേരി: പൊന്മേലില്‍ പോത്ത ഏബ്രഹാം കത്തനാരുടെ 90-ം ചരമവാര്‍ഷികവും അനുസ്മരണ സമ്മേളനവും 26ന് രാവിലെ ഒമ്പതിനു കാട്ടൂര്‍ സെന്‍റ് ആല്‍ബര്‍ട്ട് മലങ്കര കത്തോലിക്കാ ദേവാലയത്തില്‍ നടക്കും. മലങ്കര കത്തോലിക്ക സഭ മാവേലിക്കര ഭദ്രാസനാധിപന്‍ ഡോ.ജോഷ്വാ മാര്‍ ഇഗ്നാത്തിയോസ് ഉദ്ഘാടനം ചെയ്യും. ന്യൂഡല്‍ഹി ഗുഡ്ഗാവ് രൂപത വികാരി ജനറല്‍ മോണ്‍‌. വിനയാനന്ദ് അധ്യക്ഷത വഹിക്കും. ഡോ.ഏബ്രഹാം മാത്യു പൊന്മേലില്‍ ചരിത്രാവതരണം നിര്‍വഹിക്കും. സെബാസ്റ്റ്യന്‍ ആമ്പശേരില്‍ കോര്‍ എപ്പിസ്‌കോപ്പ മുഖ്യപ്രഭാഷണം നടത്തും. ഫാ. തോമസ് മേപ്പുറത്ത്, ഫാ. സ്‌കറിയ പതാലിൽ, തിരുവനന്തപുരം മാര്‍ തെയോഫിലോസ് ട്രെയിനിംഗ് കോളജ് മുന്‍ പ്രിന്‍സിപ്പല്‍ സിസ്റ്റർ‌. ഡോ. സ്ബീഹാ പൊന്മേലില്‍, ഫാ. ഏബ്രഹാം പൊന്മേലില്‍, ഫാ. തോമസ് പൈങ്ങോട്ട്, ഫാ.ജേക്കബ് ഇളമ്പല്ലൂർ, ഫാ. ജോസഫ് പ്ലാക്കൂട്ടം, ഫാ. ഡോ. റെനീഷ് ഗീവര്‍ഗീസ് ഏബ്രഹാം, സിസ്റ്റര്‍ ചെറുപുഷ്പം പൈങ്ങോട്, തോമസ് ഫിലിപ്പ്, ജോസ് ഏബ്രഹാം എന്നിവര്‍ പ്രസംഗിക്കും. സമ്മേളനത്തിന് മുന്നോടിയായി ദേവാലയത്തില്‍ ഡോ. ജോഷ്വാ മാര്‍ ഇഗ്നാത്തിയോസിന്‍റെ മുഖ്യ കാര്‍മികത്വത്തില്‍ സമൂഹ ബലിയും നടക്കും.

ശാലേം മാര്‍ത്തോമ്മ ഇടവക ശതോത്തര രജതജൂബിലി ഉദ്ഘാടനം 26ന്

പത്തനംതിട്ട: അയിരൂര്‍ ശാലേം മാര്‍ത്തോമ്മ ഇടവകയുടെ ശതോത്തര രജതജൂബിലി ഉദ്ഘാടനം 26ന് ഉച്ചകഴിഞ്ഞ് മൂന്നിനു നടക്കും. ജൂബിലി ഉദ്ഘാടനം ഡോ. ജോസഫ് മാര്‍ ബര്‍ണബാസ് സഫ്രഗന്‍ മെത്രാപ്പോലീത്ത നിര്‍വഹിക്കും. വികാരി റവ. സന്തോഷ് തോമസ് അധ്യക്ഷത വഹിക്കുന്ന സമ്മേളനം മന്ത്രി വീണാ ജോര്‍ജ് ഉദ്ഘാടനം ചെയ്യും. ആന്‍റോ ആന്‍റണി എംപി മുഖ്യാതിഥിയായിരിക്കും. പ്രമോദ് നാരായണ്‍ എംഎല്‍എ മുഖ്യപ്രഭാഷണം നടത്തും. മുന്‍ ഡിജിപി ജേക്കബ് പുന്നൂസ് ശതോത്തര രജതജൂബിലി സന്ദേശം നല്‍കും. ജൂബിലിയോടനുബന്ധിച്ച് വിവിധ ജീവകാരുണ്യ പ്രവര്‍ത്തനങ്ങൾ, മിഷന്‍ ഫീല്‍ഡുകള്‍ക്കുള്ള സഹായം, ഇടവകയുടെ വികസന പ്രവര്‍ത്തനങ്ങള്‍ തുടങ്ങിയ പദ്ധതികള്‍ ഏറ്റെടുത്തിട്ടുണ്ടെന്ന് ജനറല്‍ കണ്‍വീനര്‍ സാം കെ. ജോസഫ് പത്രസമ്മേളനത്തില്‍ പറഞ്ഞു.

പരിശോധനയ്‌ക്കെത്തിയ ആരോഗ്യവകുപ്പ് ജീവനക്കാരെ തടഞ്ഞതായി പരാതി

പത്തനംതിട്ട : മലേറിയ രോഗത്തിന്‍റെ പരിശോധനയുമായി ബന്ധപ്പെട്ട് പത്തനംതിട്ട ആനപ്പാറ തോലിയാനിക്കരയില്‍ പരിശോധനയ്ക്കായി എത്തിയ ആരോഗ്യവകുപ്പ് ഉദ്യോഗസ്ഥരെ തടസപ്പെടുത്തിയതായി പരാതി. ആരോഗ്യ പ്രവര്‍ത്തകരുടെ ജോലി തടസപ്പെടുത്തിയവരെയും അറസ്റ്റ് ചെയ്യണമെന്ന് വിവരാവകാശ പ്രവര്‍ത്തകന്‍ റഷീദ് ആനപ്പാറ ആവശ്യപ്പെട്ടു. ഉദ്യോഗസ്ഥര്‍ ജില്ലാ പോലീസ് മേധാവിക്കു പരാതി നല്‍കിയിട്ടുണ്ട്. മുന്‍കൂര്‍ നോട്ടീസ് നല്‍കിയ ശേഷമാണ് ഉദ്യോഗസ്ഥര്‍ പരിശോധനയ്ക്കായി എത്തിയത്. 80ലധികം ബംഗാളികളെ പാര്‍പ്പിച്ചിരിക്കുന്ന വിവരം മറക്കാന്‍ വേണ്ടിയാണ് ഉദ്യോഗസ്ഥരെ വീട്ടില്‍ കയറി പരിശോധന നടത്താന്‍ അനുവദിക്കാതിരുന്നതെന്ന് റഷീദ് ആനപ്പാറ പറഞ്ഞു.

അണ്ടര്‍ 9 ഓപ്പണ്‍ ചെസ് ചാമ്പ്യന്‍ഷിപ്പ്

പത്തനംതിട്ട: കേരളാ സ്‌പോര്‍ട്‌സ് കൗണ്‍സിലിന്‍റെ സ്റ്റേറ്റ് ചെസ് ടെക്നിക്കല്‍ കമ്മിറ്റിയുടെ നേതൃത്വത്തില്‍ കേരളാ സ്റ്റേറ്റ് അണ്ടര്‍ 9 ഓപ്പണ്‍ ആന്‍ഡ് ഗേള്‍സ് ചെസ് ചാമ്പ്യന്‍ഷിപ്പ് ചുട്ടിപ്പാറ സ്‌കൂള്‍ ഓഫ് ടെക്‌നോളജി ആൻഡ് അപ്ലൈഡ് സയന്‍സസ് കോളജില്‍ 26, 27 തീയതികളില്‍ നടക്കുമെന്ന് ഭാരവാഹികള്‍ വാര്‍ത്ത സമ്മേളനത്തില്‍ പറഞ്ഞു. 26 ന് രാവിലെ ഒമ്പതിന് ജില്ലാ കളക്ടര്‍ എസ്. പ്രേം കൃഷ്ണന്‍ ഉദ്ഘാടനം ചെയ്യും. ജില്ലാ സ്‌പോര്‍ട്സ് കൗണ്‍സില്‍ പ്രസിഡന്‍റ് കെ. അനില്‍കുമാര്‍ അധ്യക്ഷത വഹിക്കും. വിമുക്തി ജില്ലാ മാനേജര്‍ സനല്‍ മുഖ്യ പ്രഭാഷണം നടത്തും. കേരളത്തിലെ 14 ജില്ലകളില്‍ നിന്നും ഇരു വിഭാഗങ്ങളിലുമായി 56 കുട്ടികള്‍ പങ്കെടുക്കും. 27ന് ഉച്ചയ്ക്ക് ഒന്നിന് സമാപനസമ്മേളനം നടക്കും. പത്തനംതിട്ട നഗഭസഭ ചെയര്‍മാന്‍ ടി.സക്കീര്‍ ഹുസൈൻ, നഗരസഭ കൗണ്‍സിലര്‍ എ. സുരേഷ്‌കുമാർ, ചുട്ടിപ്പാറ സ്‌കൂള്‍ ഓഫ് ടെക്‌നോളജി ആൻഡ് അപ്ലൈഡ് സയന്‍സസ് കോളജ് പ്രിന്‍സിപ്പല്‍ ആന്‍.വി. ഈശോ എന്നിവര്‍ പങ്കെടുക്കും. ജില്ലാ സ്‌പോര്‍ട്സ് കൗണ്‍സില്‍ പ്രസിഡന്‍റ് കെ. അനില്‍കുമാര്‍, സ്റ്റേറ്റ് ചെസ്‌ടെക്നിക്കല്‍ കമ്മിറ്റി അംഗം ഡോ. മനോജ്കുമാർ, ജില്ലാ ഓര്‍ഗനൈസിംഗ് കമ്മിറ്റി അംഗങ്ങളായ വീണാ ശ്രീലാൽ, രാജശ്രീ. ജി, ബിനി വര്‍ഗീസ്, അല്‍ത്താഫ് ഹുസൈൻ, ഷിജിത്ത് എന്നിവര്‍ പത്രസമ്മേളനത്തില്‍ പങ്കെടുത്തു.

കോഴഞ്ചേരി സി. കേശവന്‍ സ്‌ക്വയര്‍ ഉദ്ഘാടനം നാളെ

കോഴഞ്ചേരി: കോഴഞ്ചേരി ടൗണില്‍ നവീകരിച്ച സി. കേശവന്‍ സ്‌ക്വയറിന്‍റെ ഉദ്ഘാടനം നാളെ വൈകുന്നേരം നാലിന് മന്ത്രി വീണാ ജോര്‍ജ് നിര്‍വഹിക്കും. എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശന്‍ മുഖ്യാതിഥിയായിരിക്കും. ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം അധ്യക്ഷത വഹിക്കുന്ന യോഗത്തില്‍ ജില്ലാ പഞ്ചായത്ത് അംഗം സാറാ തോമസ്, ഇലന്തൂര്‍ ബ്ലോക്ക് പഞ്ചായത്ത് പ്രസിഡന്‍റ് ജെ. ഇന്ദിരാദേവി, ഗ്രാമപഞ്ചായത്ത് പ്രസിഡന്‍റ് സാലി ഫിലിപ്പ്, മുന്‍ എംഎല്‍എ രാജു ഏബ്രഹാം, ഗ്രാമപഞ്ചായത്തംഗം ഗീതു മുരളി, ഡിസിസി പ്രസിഡന്‍റ് സതീഷ് കൊച്ചുപറമ്പില്‍, ബിജെപി ജില്ലാ പ്രസിഡന്‍റ് വി.എ. സുരാജ്, ഗ്രാമപഞ്ചായത്ത് അംഗം ബിജിലി പി. ഈശോ, എസ്എന്‍ഡിപി യോഗം താലൂക്ക് യൂണിയന്‍ പ്രസിഡന്‍റ് മോഹന്‍ ബാബു, വൈസ് പ്രസിഡന്‍റ് വിജയന്‍ കാക്കനാടന്‍ എന്നിവര്‍ പ്രസംഗിക്കും. കേരളീയ രാഷ്‌ട്രീയ-സാമൂഹ്യ മണ്ഡലത്തിലെ നിവര്‍ത്തന പ്രക്ഷോഭ കാലത്ത് സി. കേശവന്‍ കോഴഞ്ചേരിയില്‍ നടത്തിയ പ്രസംഗത്തിന്‍റെ സ്മരണാര്‍ഥം നിര്‍മിച്ച സ്‌ക്വയര്‍ 2018ലെ മഹാ പ്രളയത്തേത്തുടര്‍ന്ന് തകർന്ന അവസ്ഥയിലായിരുന്നു. റിബില്‍ഡ് പദ്ധതിയില്‍ ഉള്‍പ്പെടുത്തിയാണ് സി.കേശവന്‍ സ്‌ക്വയര്‍ നവീകരിച്ചിരിക്കുന്നതെന്ന് തദ്ദേശ സ്വയംഭരണവകുപ്പ് പത്തനംതിട്ട ഡിവിഷന്‍ എക്സിക്യുട്ടീവ് എന്‍ജിയര്‍ എസ്. അനിത പറഞ്ഞു.

മാര്‍ത്തോമ്മ സ്റ്റുഡന്‍റ്സ് കോണ്‍ഫറന്‍സ് തിരുവല്ലയില്‍

തിരുവല്ല: മാര്‍ത്തോമ്മ സഭയിലെ ആഗോള കലാലയ വിദ്യാര്‍ഥികളുടെ കൂട്ടായ്മയായ മാര്‍ത്തോമ്മ സ്റ്റുഡന്‍റ്സ് കോണ്‍ഫറന്‍സിന്‍റെ 113-ാമത് സെക്‌ഷന്‍ 29 മുതല്‍ മേയ് രണ്ടുവരെ തിരുവല്ലയില്‍ നടക്കും. അടൂര്‍ ഭദ്രാസനം ആതിഥേയത്വം നല്‍കുന്ന ഈ വര്‍ഷത്തെ സമ്മേളനം ബിലീവേഴ്‌സ് കണ്‍വന്‍ഷന്‍ സെന്‍ററിലാണ് ക്രമീകരിക്കുന്നത്. 29നു വൈകുന്നേരം അഞ്ചിന് മലങ്കര മാര്‍ത്തോമ്മ സഭയുടെ പരമാധ്യക്ഷന്‍ ഡോ. തിയഡോഷ്യസ് മാര്‍ത്തോമ്മ മെത്രാപ്പോലീത്ത കോണ്‍ഫറന്‍സ് ഉദ്ഘാടനം ചെയ്യും. ജീവിതത്തിനായുള്ള അഭിലാഷങ്ങളും പ്രചോദനങ്ങളും എന്ന വിഷയമാണ് സമ്മേളനം പഠനവിധേയമാക്കുന്നത്. വിഷയാനുബന്ധ ചര്‍ച്ചകൾ, കരിയര്‍ ഗൈഡന്‍സ്, മയക്കുമരുന്നിന് എതിരേയുള്ള ബോധവത്കരണ ക്ലാസുകള്‍ എന്നിവയും സമ്മേളനത്തില്‍ നടത്തപ്പെടും. വിദ്യാര്‍ഥികള്‍ക്കായി ഉപന്യാസം, പ്രസംഗം തുടങ്ങിയ മത്സരങ്ങളും ക്രമീകരിച്ചിട്ടുണ്ട്. 500 ലധികം വിദ്യാര്‍ഥികള്‍ പങ്കെടുക്കും. ഡോ. തിയഡോഷ്യസ് മാര്‍ത്തോമ്മാ മെത്രാപ്പോലീത്ത രക്ഷാധികാരിയും, അടൂര്‍ ഭദ്രാസന അധ്യക്ഷന്‍ മാത്യൂസ് മാര്‍ സെറാഫിം എപ്പിസ്‌കോപ്പ ഉപരക്ഷാധികാരിയും, റവ. പോള്‍ ജേക്കബ് പ്രസിഡന്‍റും പ്രഫ. ഷൈജു കെ. ജോണ്‍ സെക്രട്ടറിയും സുരേഷ് തോമസ് ട്രഷററും സയന സാം, എ.ആര്‍ റോഹൻ, ഏബല്‍ ജോസ് എന്നിവര്‍ സ്റ്റുഡന്‍റ് സെക്രട്ടറിമാരും, ഏബല്‍ തോമസ് നൈനാന്‍ ജോയിന്‍റ് സെക്രട്ടറിയായും പ്രവര്‍ത്തിക്കുന്ന കമ്മറ്റിയും വിവിധ സബ് കമ്മിറ്റികളും സമ്മേളത്തിന് നേതൃത്വം നല്‍കും. മേയ് രണ്ടിന് ഉച്ചകഴിഞ്ഞ് സമ്മേളനം സമാപിക്കും.

വീരോചിത ജീവിതം നയിക്കണം: മാര്‍ സേവേറിയോസ്

കൊറ്റനാട്: തിന്മകളോടു പൊരുതുകയും ആവശ്യമുള്ളവ മാത്രം ശ്രവിച്ച് അതിനനുസരിച്ച് ജീവിക്കുകയും ചെയ്യുന്ന വീരോചിത ജീവിതം നയിക്കണമെന്ന് സഖറിയ മാര്‍ സേവേറിയോസ്. കൊറ്റനാട് സെന്‍റ് ജോര്‍ജ് ഓര്‍ത്തഡോക്‌സ് പള്ളിയില്‍ പെരുന്നാള്‍ സന്ദേശം നല്‍കുകയായിരുന്നു അദ്ദേഹം. വിശുദ്ധ ഗീവര്‍ഗീസിന്‍റെ പാതയെ മനസിലാക്കുമ്പോള്‍ അത്തരം ഒരു അനുഭവം ജീവിതത്തിലേക്കു കൊണ്ടുവരാന്‍ കഴിയും. ഇന്ദ്രിയങ്ങളെ മനസുകൊണ്ട് കടിഞ്ഞാണിട്ട് വിവേകത്തെ അവബോധമനസില്‍ കുടിയിരുത്തുകയാണ് വേണ്ടതെന്നും മാര്‍ സേവേറിയോസ് അഭിപ്രായപ്പെട്ടു. തോമസ് ജോണ്‍സണ്‍ കോര്‍ എപ്പിസ്‌കോപ്പ, മാത്യൂസ് റമ്പാൻ, ഫാ. സൈമണ്‍ വര്‍ഗീസ്, ഫാ. എം. ജെ. ജോണ്‍, ഫാ. ഏബ്രഹാം ശാമുവേല്‍, ഫാ. ജോജി മാത്യൂസ്, ഫാ. ജോബി ജോസഫ് മാത്യു, ഫാ.സിജു മാത്യൂസ് എന്നിവര്‍ ശുശ്രൂഷകള്‍ക്ക് നേതൃത്വം നല്‍കി. പെരുന്നാളിന്‍റെ സമാപനദിവസമായ ഇന്നലെ കുര്‍ബാനയേ തുടര്‍ന്ന് പ്രദക്ഷിണവും മധ്യസ്ഥ പ്രാര്‍ഥനയും നടന്നു. കൊടിയിറക്കോടെ പെരുന്നാള്‍ സമാപിച്ചു.

തെങ്ങേലി പള്ളി പെരുന്നാള്‍ കൊടിയേറ്റ് 27ന്

തിരുവല്ല: തെങ്ങേലി സെന്‍റ് ജോര്‍ജ് ഓര്‍ത്തഡോക്‌സ് പള്ളിയില്‍ കാവല്‍ പിതാവായ വിശുദ്ധ ഗീവര്‍ഗീസ് സഹദായുടെ 61-ാം ഓര്‍മപ്പെരുന്നാളിന് 27നു രാവിലെ കൊടിയേറും. കുര്‍ബാനയേതുടര്‍ന്ന് വികാരി ഫാ. ഷിബിന്‍ തോമസ് വര്‍ഗീസ് കൊടിയേറ്റും. 27, 28, 29 തീയതികളില്‍ രാത്രി ഏഴിനു ഫാ. ഡോ. ഷാജന്‍ വര്‍ഗീസ്, ഫാ. ജോണ്‍ ടി. വര്‍ഗീസ് കുളക്കട, ഫാ. കെ. എം. സുനില്‍ എന്നിവര്‍ വചനശുശ്രൂഷ നിര്‍വഹിക്കും. 5.45നു സന്ധ്യ നമസ്‌കാരവും 6.30നു ഗാന ശുശ്രൂഷയും നടക്കും. 30നു വൈകുന്നേരം 5.15നു സന്ധ്യ നമസ്‌കാരവും രാത്രി ഏഴിനു തലയാര്‍ ചേരിയില്‍ വര്‍ഗീസ് കോശിയുടെ ഭവനത്തില്‍ നിന്നും ഭക്തിനിര്‍ഭരമായ പ്രദക്ഷിണം 9.30നു ആശീര്‍വാദം. മേയ് ഒന്നിന് രാവിലെ 8.15നു റാന്നി നിലയ്ക്കല്‍ ഭദ്രാസനാധിപന്‍ ഡോ. ജോഷ്വാ മാര്‍ നിക്കോദിമോസ് മെത്രാപ്പോലീത്തയുടെ പ്രധാന കാര്‍മികത്വത്തില്‍ വിശുദ്ധ മൂന്നിന്മേല്‍ കുര്‍ബാനയും ശ്ലൈഹീക വാഴ് വും വെച്ചൂട്ട് നേര്‍ച്ചയും ഉച്ചകഴിഞ്ഞ് മൂന്നിന് കൊടുന്തറയില്‍ അനില്‍ കെ. ഈപ്പന്‍റെ ഭവനത്തില്‍ നിന്നും പ്രദക്ഷിണം, സെമിത്തേരിയില്‍ ധൂപപ്രാര്‍ഥന, ആശീര്‍വാദം, കൊടിയിറക്ക് എന്നിവയോടെ പെരുന്നാള്‍ സമാപിക്കും.

വേനല്‍മഴയ്‌ക്കൊപ്പം കാറ്റും; കരിങ്ങാലിപ്പാടത്ത് കൂടുതല്‍ സ്ഥലത്ത് നാശനഷ്ടം

പന്തളം: ശക്തമായ വേനല്‍മഴയും മഴയ്ക്കൊപ്പം വീശിയടിച്ച കാറ്റും കരിങ്ങാലിപ്പാടത്ത് കൂടുതല്‍ പ്രദേശങ്ങളില്‍ നാശനഷ്ടത്തിനു കാരണമായി. കരിങ്ങാലി പാടശേഖരങ്ങളില്‍ വെള്ളക്കെട്ടു കാരണം കൊയ്ത്ത് പ്രതിസന്ധിയിലാണ്. വേനല്‍മഴ തുടങ്ങിയതുമുതല്‍ ഡീസല്‍ പമ്പുപയോഗിച്ച് പാടത്തെ വെള്ളം ചാലിലേക്ക് അടിച്ചുവറ്റിച്ചുകൊണ്ടിരിക്കുകയാണ് കര്‍ഷകർ. വെള്ളം നിറഞ്ഞ് കിടക്കുന്നതിനാല്‍ യന്ത്രം ഇറക്കാനാകാതെ കൊയ്ത്ത് തടസപ്പെട്ട പാടങ്ങളുമുണ്ട്. പാടത്ത് വിളഞ്ഞ് പാകമായി കിടക്കുന്ന നെല്ല് വെള്ളം കയറുന്നതിന് മുമ്പ് കൊയ്തെടുക്കാനാകുമോ എന്ന ആശങ്കയിലാണ് കര്‍ഷകർ. കരിങ്ങാലി പാടത്തിന്‍റെ ചില ഭാഗങ്ങളില്‍ വെള്ളം അടിച്ചുവറ്റിച്ച് കൃഷിയെ രക്ഷിക്കാനുള്ള ശ്രമമാണ് ഇപ്പോള്‍ കര്‍ഷകര്‍ നടത്തുന്നത്. എല്ലാ പാടശേഖരങ്ങളിലും ഡീസല്‍ മോട്ടോറും വൈദ്യുത മോട്ടോറും മുഴുവന്‍ സമയം പ്രവര്‍ത്തിപ്പിച്ചുകൊണ്ടിരിക്കുകയാണ്. മാവരപ്പാടത്ത് നെല്ല് കിളിര്‍ത്തുതുടങ്ങി കൊയ്യാന്‍ പാകമായിക്കിടക്കുന്ന പന്തളം തെക്കേക്കരയിലെ മാവരപ്പാടത്ത് നെല്ല് കിളിര്‍ത്ത് കതിരിന് മുകളിലേക്ക് ചാഞ്ഞത് കൃഷിനാശത്തിന് കാരണമായി. നെല്ലിനൊപ്പം കിളിര്‍ത്തുപൊങ്ങിയ വരിനെല്ലാണ് വിളഞ്ഞുകിടക്കുന്ന പാടത്ത് മുഴുവന്‍ ഇക്കുറി നാശം വിതച്ചത്. നെല്ലിനേക്കാള്‍ പൊക്കമുള്ള വരിനെല്ല് കാറ്റില്‍ ചാഞ്ഞു വീണതുകാരണം അടിയില്‍ കിടക്കുന്ന നെല്‍ക്കതിര്‍ അളിഞ്ഞ് നശിക്കുകയാണ്. നാളെ പാടം കൊയ്യാന്‍ കാത്തിരിക്കുമ്പോഴാണ് കാറ്റില്‍ നെല്‍ച്ചെടി ചാഞ്ഞുപോയത്. കൊയ്ത്ത് മെതിയന്ത്രമുപയോഗിച്ച് ഇത് കൊയ്തെടുക്കാനും പ്രയാസമാണ്. വേനല്‍മഴയില്‍ പാടത്ത് വെള്ളം നിറഞ്ഞതും കര്‍ഷകര്‍ക്ക് തിരിച്ചടിയായതായി കര്‍ഷകന്‍ വരിക്കോലില്‍ മോഹനന്‍പിള്ള പറഞ്ഞു. 15 ഹെക്ടര്‍ പാടത്താണ് ഇക്കുറി ഉമ, പൗര്‍ണമി എന്നീ വിത്തുകള്‍ കൃഷിചെയ്തിട്ടുള്ളത്. വേനല്‍മഴ ശക്തിപ്രാപിക്കുന്നതും കൃഷിനാശം കൂടാന്‍ കാരണമാകും.

കളക്ടറേറ്റിനു നേരേയുള്ള ബോംബ് ഭീഷണി: അന്വേഷണം എങ്ങുമെത്തിയില്ല

പത്തനംതിട്ട: കളക്ടറേറ്റിനു നേരേയുണ്ടായ ബോംബ് ഭീഷണി സന്ദേശം ലഭിച്ച് ഒരു മാസം പിന്നിട്ടിട്ടും അന്വേഷണം എങ്ങുമെത്തിയില്ല. പത്തനംതിട്ട. തിരുവനന്തപുരം, തൃശൂര്‍ കളക്ടറേറ്ററുകള്‍ക്കു നേരെയാണ് ഒരു ദിവസംതന്നെ ഭീഷണി ഉണ്ടായത്. ഇ മെയിലിലൂടെ എത്തിയ ഭീഷണിയെ സംബന്ധിച്ച് സൈബര്‍ സെല്‍ കേസ് അന്വേഷിക്കുന്നുവെന്ന് പോലീസ് പറയുന്നുവെങ്കിലും ഒരു തുമ്പും കിട്ടിയില്ല. മാര്‍ച്ച് 18നായിരുന്നു ജില്ലാ കളക്ടറുടെ ഇ-മെയില്‍‍ ഭീഷണി സന്ദേശമെത്തിയത്. കളക്ടറേറ്റില്‍ മണിക്കൂറുകളോളം പരിഭ്രാന്തി പരത്തിയ സംഭവത്തില്‍ പത്തനംതിട്ട പോലീസ് കേസ് രജിസ്റ്റര്‍ ചെയ്തു. ഡിവൈഎസ്പി എസ്. നന്ദകുമാറിനാണ് അന്വേഷണച്ചുമതല. ഇംഗ്ലീഷില്‍ എത്തിയ ഭീഷണിസന്ദേശം വ്യാജമാണെന്നാണ് പോലീസ് നിഗമനം. എന്നാൽ, സന്ദേശത്തിന്‍റെ ഉറവിടം കണ്ടെത്താന്‍ കഴിഞ്ഞില്ല. ഇ-മെയില്‍ അധികൃതര്‍ക്ക് വിവരം തേടി കത്തയച്ചിട്ടുണ്ടെന്നാണ് പോലീസിന്‍റെ സൈബര്‍ വിഭാഗം പറയുന്നത്. മാര്‍ച്ച് 18ന് രാവിലെ 6.48നാണ് കളക്ടര്‍ക്ക് സന്ദേശമെത്തിയത്. 9.45ന് കളക്ടറുടെ ഇ - മെയില്‍ പരിശോധിച്ച ഓഫീസ് ജീവനക്കാരനാണ് ഇംഗ്ലീഷിലുള്ള സന്ദേശം കണ്ടത്. കളക്ടറേറ്റില്‍ ആര്‍ഡിഎക്‌സ് പൈപ്പ് ബോംബ് പൊട്ടിത്തെറിക്കുമെന്നും മുന്‍കരുതലായി ജീവനക്കാരെ ഉടന്‍ ഒഴിപ്പിക്കണമെന്നുമായിരുന്നു സന്ദേശം. 2001ലെ പാര്‍ലമെന്‍റ് ആക്രമണക്കേസിലെ മുഖ്യപ്രതി അഫ്‌സല്‍ ഗുരുവിനെ തൂക്കിലേറ്റിയതിന്‍റെ ഓര്‍മയ്ക്കായാണ് ഇതെന്നുമായിരുന്നു സന്ദേശത്തിൽ. ആസിഫ് ഗഫൂര്‍ എന്ന പേരിലായിരുന്നു സന്ദേശം. കളക്ടര്‍ എസ്. പ്രേംകൃഷ്ണന്‍ സിവില്‍ സര്‍വീസ് പരിശീലനവുമായി ബന്ധപ്പെട്ടു ഗോവയിലായിരുന്ന സമയത്താണ് സന്ദേശം എത്തിയത്. കളക്ടറുടെ ഹുസൂര്‍ ശിരസ്തദാറാണ് പോലീസില്‍ വിവരമറിയിച്ചത്. തുടര്‍ന്ന്, ഡോഗ്, ബോംബ് സ്‌ക്വാഡുകള്‍ എത്തി പരിശോധിച്ചെങ്കിലും ഒന്നും കണ്ടെത്താനായില്ല. തീവ്രവാദികളുടേതെന്നോ അവരെ പിന്തുണയ്ക്കുന്നവരുടേതെന്നോ സംശയിക്കാവുന്ന മെയില്‍ സന്ദേശം പോലീസ് വളരെ ലാഘവത്തോടെയാണ് കൈകാര്യം ചെയ്യുന്നതെന്ന് ആക്ഷേപമുണ്ട്. ആസിഫാ ഗഫൂര്‍ എന്ന മെയിലില്‍നിന്നാണ് സന്ദേശമെത്തിയത്. ഭീഷണിസന്ദേശത്തിന്‍റെ ഉറവിടം തേടി ഇ മെയില്‍ അധികൃതര്‍ക്കും ഫേസ്ബുക്കിനും കത്തു നല്‍കിയിരുന്നുവെങ്കിലും മറുപടി ലഭിച്ചിട്ടില്ലെന്ന് ജില്ലാ പോലീസ് മേധാവി വിനോദ് കുമാര്‍ പറഞ്ഞു.

സഞ്ചാരികള്‍ക്ക് രുചിയിടമൊരുക്കി കക്കി ഡി കഫെ

കോന്നി: ഗവിയില്‍ എത്തുന്ന വിനോദ സഞ്ചാരികള്‍ക്ക് രുചികരമായ ഭക്ഷണം ഒരുക്കിക്കൊണ്ട് വനംവകുപ്പിന്‍റെ കക്കി ഡി കഫെ പ്രവര്‍ത്തനം ആരംഭിച്ചു. കെ. യു. ജനീഷ് കുമാര്‍ എംഎല്‍എ ഉദ്ഘാടനം നിര്‍വഹിച്ചു. റാന്നി വനം വികസന ഏജന്‍സിയുടെ നേതൃത്വത്തില്‍ ഗവിയില്‍ എത്തുന്ന സഞ്ചാരികള്‍ക്കായി കക്കി ഫോറസ്റ്റ് സ്റ്റേഷന് സമീപത്തായിട്ട് 40 പേര്‍ക്ക് ഒരേ സമയം ഭക്ഷണം കഴിക്കാവുന്ന തരത്തിലാണ് ഭക്ഷണശാല ക്രമീകരിച്ചിരിക്കുന്നത്. ഭക്ഷണം കഴിക്കുന്ന എല്ലാവര്‍ക്കും ഡാമിന്‍റെ സൗന്ദര്യം ആസ്വദിച്ച് ഭക്ഷണം കഴിക്കാമെന്നതും പ്രത്യേകതയാണ്. ഗവിയില്‍ എത്തുന്ന വിനോദസഞ്ചാരികള്‍ക്ക് ആങ്ങമൂഴിയില്‍ നിന്നും ഗവിയില്‍ എത്തുമ്പോള്‍ മാത്രമാണ് ഭക്ഷണം കഴിക്കാനുള്ള സൗകര്യങ്ങള്‍ ഉണ്ടായിരുന്നത്. വിനോദസഞ്ചാരികള്‍ ഗവിയില്‍ എത്തുമ്പോഴേക്കും സമയം വൈകുന്നേരം ആകാറുണ്ട്. ഇതിനു പരിഹാരമായിട്ടാണ് എംഎല്‍എയുടെ നിര്‍ദ്ദേശപ്രകാരം കക്കി ഫോറസ്‌റ് സ്റ്റേഷന് സമീപം ഡാമിന്‍റെ എതിര്‍വശത്ത് പുതിയ ഭക്ഷണശാല ആരംഭിക്കുന്നത്. ഉച്ചഭക്ഷണവും ലഘു ഭക്ഷണവും ഇവിടെ ലഭിക്കും. വാഹനങ്ങള്‍ പാര്‍ക്ക് ചെയ്യുന്നതിനുള്ള ക്രമീകരണവും ഒരുക്കിയിട്ടുണ്ട്. ജില്ലാ പഞ്ചായത്തംഗം ലേഖ സുരേഷ് അധ്യക്ഷത വഹിച്ചു. റാന്നി ഡിഎഫ്ഒ പി. കെ. ജയകുമാര്‍ ശര്‍മ, ബ്ലോക്ക് പഞ്ചായത്ത് വൈസ് പ്രസിഡന്‍റ് പി.എസ്. സുജ, ഗ്രാമപഞ്ചായത്ത് വൈസ് പ്രസിഡന്‍റ് ബീനാ മുഹമ്ദ് റാഫി, ഗ്രാമപഞ്ചായത്തംഗം ഗംഗമ്മ മുനിയാണ്ടി, റാന്നി എസിഎഫ് ജിയാസ് ജമാലുദ്ദീന്‍ ലബ്ബ, റേഞ്ച് ഫോറസ്റ്റ് ഓഫീസര്‍മാരായ ബി.ആര്‍. ജയന്‍, ശശീന്ദ്രകുമാർ, എ. അശോക്, വനം വികസന ഏജന്‍സി കോര്‍ഡിനേറ്റര്‍ കെ. സുരേഷ് ബാബു എന്നിവര്‍ പ്രസംഗിച്ചു.

ശ്രീനാരായണ ദര്‍ശനങ്ങള്‍ക്ക് പ്രാധാന്യമേറെ: മന്ത്രി

പത്തനംതിട്ട: ശ്രീനാരായണ ദര്‍ശനങ്ങള്‍ക്ക് ഏറെ പ്രാധാന്യം അര്‍ഹിക്കുന്ന കാലഘട്ടത്തിലൂടെയാണ് നാം കടന്നു പോകുന്നതെന്ന് മന്ത്രി രാമചന്ദ്രന്‍ കടന്നപ്പള്ളി. തെങ്ങുംകാവ് എസ്എന്‍ഡിപി ശാഖാ ഓഡിറ്റോറിയത്തില്‍ ഗുരുശ്രീ പുരസ്‌കാര വിതരണ സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. സമൂഹം നേരിടുന്ന ആപത്തുകളും വിപത്തുകളും ഗുരുദേവന്‍ വളരെ നേരേത്തേ കണ്ട് ഇതിനെല്ലാം പരിഹാര നിര്‍ദേശങ്ങള്‍ അദ്ദേഹം തന്നെ നിര്‍ദ്ദേശിച്ചിരുന്നുവെന്ന് മന്ത്രി ചൂണ്ടിക്കാട്ടി. കെ.യു. ജനീഷ് കുമാര്‍ എംഎല്‍എ മുഖ്യ പ്രഭാഷണം നടത്തി. ശ്രീനാരായണാ ശാസ്ത്ര കലാ പരിഷത്തിന്‍റെ ആഭിമുഖ്യത്തിലാണ് പുരസ്‌കാര വിതരണം നടന്നത് സുനില്‍ മംഗലത്ത് അധ്യക്ഷത വഹിച്ച യോഗത്തില്‍ വിവിധ രംഗങ്ങളില്‍ കഴിവ് തെളിയിച്ചവര്‍ക്ക് മന്ത്രി ഗജരാജശില്‍പം നല്‍കി ആദരിച്ചു. കലാമത്സരങ്ങളില്‍ വിജയികളായവര്‍ക്ക് ജനീഷ് കുമാര്‍ എംഎല്‍എ സമ്മാനദാനം നിര്‍വ്വഹിച്ചു. കലാതിലകം, കലാപ്രതിഭ എന്നിവരെ പി.വി. ജയന്‍ സ്വര്‍ണ മെഡല്‍ നല്‍കി ആദരിച്ചു. വിനോദ് ഇളകൊള്ളൂർ, ബിനു കെ.സാം, കരുണാകരന‍ പരുതിയാനിക്കൽ, എസ്.വി. പ്രസന്നകുമാര്‍, പി.ജി. സുനില്‍കുമാർ, ടി.എസ്. ശ്രീകുമാര്‍, രാജി മഞ്ചാടി, രമേശ് ആനപ്പാറ, വി.എൻ.ശാന്തകുമാര്‍, ബി.ഷാഹുല്‍ ഹമീദ് എന്നിവര്‍ പ്രസംഗിച്ചു.

എന്‍റെ കേരളം പ്രദര്‍ശന വിപണനമേള മേയ് 16 മുതല്‍

പത്തനംതിട്ട: സംസ്ഥാന സര്‍ക്കാരിന്‍റെ നാലാം വാര്‍ഷികത്തിന്‍റെ ഭാഗമായി എന്‍റെ കേരളം പ്രദര്‍ശന വിപണനമേള മേയ് 16 മുതല്‍ 22 വരെ പത്തനംതിട്ട ഇടത്താവളത്തില്‍ സംഘടിപ്പിക്കും. ഒരാഴ്ച നീളുന്ന പ്രദര്‍ശനത്തില്‍ സര്‍ക്കാരിന്‍റെ വികസന ക്ഷേമപ്രവര്‍ത്തനങ്ങളുടെയും പദ്ധതികളുടെയും വിശദീകരണമുണ്ടാകും. സര്‍ക്കാര്‍ വകുപ്പുകളുടെ തീം സ്റ്റാളുകളും വാണിജ്യ സ്റ്റാളുകളും ക്രമീകരിക്കും. കുടുംബശ്രീയുടേതുള്‍പ്പെടെ ഭക്ഷ്യസ്റ്റാളുകളുണ്ടാകും. സര്‍ക്കാര്‍ സേവനങ്ങള്‍, പദ്ധതികള്‍ തുടങ്ങിയവയെക്കുറിച്ച് ജനങ്ങളില്‍ അവബോധം വളര്‍ത്തുകയാണ് ലക്ഷ്യം. ദിവസവും സാസ്‌കാരിക പരിപാടികള്‍, സെമിനാറുകള്‍, പുസ്തകപ്രദര്‍ശന മേള തുടങ്ങിയവ സംഘടിപ്പിക്കും.

സിപിഎം ജനറല്‍ സെക്രട്ടറി എം.എ. ബേബി ഇന്ന് ജില്ലയില്‍

പത്തനംതിട്ട: സിപിഎം അഖിലേന്ത്യാ ജനറല്‍ സെക്രട്ടറിയായി തെരഞ്ഞെടുത്ത ശേഷം ആദ്യമായി പത്തനംതിട്ടയില്‍ എത്തുന്ന എം.എ. ബേബിക്ക് ഇന്ന് സിപിഎം ജില്ലാ കമ്മിറ്റിയുടെ നേതൃത്വത്തില്‍ സ്വീകരണം നല്‍കും. രണ്ടിന് ജില്ലാ കമ്മിറ്റി ഓഫീസില്‍ നല്‍കുന്ന സ്വീകരണത്തില്‍ ജില്ലാ സെക്രട്ടറി രാജു ഏബ്രഹാം, സംസ്ഥാന കമ്മിറ്റിയംഗം കെ.പി. ഉദയഭാനു, ജില്ലാ സെക്രട്ടേറിയറ്റംഗങ്ങള്‍, ജില്ലാ കമ്മിറ്റിയംഗങ്ങള്‍ തുടങ്ങിയവര്‍ പങ്കെടുക്കും. ജില്ലയില്‍ വിവിധ പരിപാടികളിലും രക്തസാക്ഷി സ്മാരകങ്ങളിലും കുടുംബങ്ങളിലും അദ്ദേഹം സന്ദര്‍ശനം നടത്തും. രാവിലെ 7.30ന് കടമ്മനിട്ട സ്മാരകത്തില്‍ പുഷ്പാര്‍ച്ചനയോടെയാണ് സന്ദര്‍ശനം തുടങ്ങുന്നത്. ഉച്ചകഴിഞ്ഞ് മൂന്നിന് മൂലൂര്‍ സ്മാരകം സന്ദര്‍ശിക്കും. തുടര്‍ന്ന് മാരാമണ്ണില്‍ ഫിലിപ്പോസ് മാര്‍ ക്രിസോസ്റ്റം പുരസ്‌കാരം മുഖ്യമന്ത്രി പിണറായി വിജയനില്‍ നിന്ന് ഏറ്റുവാങ്ങും.

സംസ്ഥാന സര്‍ക്കാരിന്‍റെ നാലാം വാര്‍ഷികം: മുഖ്യമന്ത്രിയുടെ ജില്ലാതല അവലോകന യോഗം ഇന്ന്

പത്തനംതിട്ട: സംസ്ഥാന സര്‍ക്കാരിന്‍റെ നാലാം വാര്‍ഷികാഘോഷത്തിന്‍റെ ഭാഗമായി മുഖ്യമന്ത്രിയുടെ നേതൃത്വത്തില്‍ പത്തനംതിട്ടയിലെ ജില്ലാതല അവലോകന യോഗം ഇന്നു നടക്കും. ജില്ലയിലെ വിവിധ മേഖലകളില്‍നിന്നുള്ള പ്രത്യേക ക്ഷണിതാക്കളായ 500 പേരുമായി മുഖ്യമന്ത്രി സംവദിക്കും. രാവിലെ 10.30 മുതല്‍ 12.30 വരെ ഇലന്തൂര്‍ നന്നുവക്കാട് തൂക്കുപാലം പെട്രാസ് കണ്‍വന്‍ഷന്‍ സെന്‍ററിലാണ് യോഗം. മന്ത്രി വീണാ ജോര്‍ജിന്‍റെ നേതൃത്വത്തില്‍ അവസാനവട്ട ഒരുക്കം വിലയിരുത്തി. ജില്ലാ കളക്ടര്‍ എസ്. പ്രേം കൃഷ്ണന്‍, വിവര പൊതുജനസമ്പര്‍ക്ക വകുപ്പ് മേഖലാ ഡയറക്ടര്‍ കെ. പ്രമോദ് കുമാർ, എഡിഎം ബി. ജ്യോതി, ജില്ലാ ഇന്‍ഫര്‍മേഷന്‍ ഓഫീസര്‍ സി. ടി. ജോൺ, ജില്ലാതല ഉദ്യോഗസ്ഥര്‍ തുടങ്ങിയവര്‍ പങ്കെടുത്തു. സര്‍ക്കാര്‍ സേവനങ്ങളുടെ ഗുണഭോക്താക്കൾ, തൊഴിലാളി പ്രതിനിധികള്‍, യുവജനങ്ങൾ, വിദ്യാര്‍ഥികള്‍, സാംസ്‌കാരിക രംഗത്തുനിന്നുള്ളവർ, കായികപ്രതിഭകള്‍, വ്യവസായികൾ, പ്രവാസികള്‍, സമുദായ നേതാക്കള്‍ തുടങ്ങിയവരുമായാണ് മുഖ്യമന്ത്രിയുടെ കൂടിക്കാഴ്ച. മന്ത്രി കെ.എൻ. ബാലഗോപാല്‍, നിയസഭാ ഡെപ്യൂട്ടി സ്പീക്കര്‍ ചിറ്റയം ഗോപകുമാർ, എംഎല്‍എമാരായ മാത്യു ടി. തോമസ്, കെ.യു. ജനീഷ് കുമാർ, പ്രമോദ് നാരായണ്‍, ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം, മറ്റു ജനപ്രതിനിധികള്‍ പങ്കെടുക്കും.

മരിയൻ കോളജിൽ 10-ാമത് അന്തർദേശീയ കിക്ക്‌ബോക്സിംഗ് പരിശീലന ക്യാമ്പ് ആരംഭിച്ചു

കുട്ടിക്കാനം: മരിയൻ കോളജിൽ 30 വരെ നടക്കുന്ന 10-ാമത് അന്തർദേശീയ കിക്ക്‌ബോക്സിംഗ് പരിശീലന ക്യാമ്പ് ആരംഭിച്ചു. വാക്കോ ഇന്ത്യ കേരള അസോസിയേഷനും മരിയൻ കോളജിലെ ഹെൽത്ത് ആൻഡ് വെൽനെസ് ഡിപ്പാർട്ട്മെന്‍റും ചേർന്നാണ് പരിശീലന ക്യാമ്പ് സംയുക്തമായി സംഘടിപ്പിച്ചിരിക്കുന്നത്. ദേശീയ, അന്തർദേശീയ തലത്തിൽ അംഗീകരിക്കപ്പെട്ടിട്ടുള്ള പരിശീലകരുടെ നേതൃത്വത്തിലാണ് ക്യാമ്പ് നടത്തപ്പെടുന്നത്. ഏകദേശം 200 കായികപ്രതിഭകൾ പരിശീലനത്തിൽ പങ്കെടുക്കുന്നുണ്ട്. കിക്ക്‌ബോക്സിംഗിനെ പറ്റി ആഴത്തിൽ പഠിക്കാൻ സാധിക്കുന്നതോടൊപ്പം ആഗോള തലത്തിൽ അംഗീകരിക്കപ്പെടുന്ന പരിശീലന മാതൃകകൾ വഴി താരങ്ങൾക്ക് അത്യുന്നതമായ പരിശീലനം ലഭ്യമാകുന്നു. വിവിധ സംസ്ഥാനങ്ങളിൽ നിന്നുമെത്തിയ കായികതാരങ്ങൾക്കും ഉയർന്ന നിലവാരത്തിലുള്ള പരിശീലനം നേടാൻ ആഗ്രഹിക്കുന്നവർക്കും ഈ ക്യാമ്പ് പുതിയ അനുഭവങ്ങളും അറിവുകളും പകരുന്ന പ്രധാന വേദിയായിരിക്കുമെന്ന് സംഘാടകർ വ്യക്തമാക്കി.

ആരോഗ്യമന്ത്രിയുടെ ഓഫീസിലേക്ക് മാര്‍ച്ച് നടത്തി

പത്തനംതിട്ട: കേന്ദ്ര- സംസ്ഥാന സര്‍ക്കാരുകള്‍ നാടിനെ കോര്‍പ്പറേറ്റുകള്‍ക്ക് തീറെഴുതി നല്‍കിയതായി എസ്ഡിപിഐ സംസ്ഥാന പ്രവര്‍ത്തകസമിതി അംഗം ജോര്‍ജ് മുണ്ടക്കയം. പത്തനംതിട്ട ജില്ലാ ആസ്ഥാനത്തോടുള്ള അവഗണനയില്‍ പ്രതിഷേധിച്ച് ആരോഗ്യമന്ത്രി വീണാ ജോര്‍ജിന്‍റെ ഓഫീസിലേക്ക് എസ്ഡിപിഐ ജില്ലാ കമ്മിറ്റി സംഘടിപ്പിച്ച ബഹുജന മാര്‍ച്ച് ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. ജില്ലാ പ്രസിഡന്‍റ് എസ് മുഹമ്മദ് അനീഷ് അധ്യക്ഷത വഹിച്ചു. ജില്ലാ വൈസ് പ്രസിഡന്‍റുമാരായ എം. ഡി.ബാബു, മുഹമ്മദ് പി. സലീം, ജില്ലാ സെക്രട്ടറി ഷഫ്ന റാഷിദ് എന്നിവര്‍ പ്രസംഗിച്ചു. ആരോഗ്യമന്ത്രിയുടെ ഓഫീസിനു സമീപം പോലീസ് ബാരിക്കേഡ് ഉപയോഗിച്ച് മാര്‍ച്ച് തടഞ്ഞു.

പോക്‌സോ കേസെടുക്കുന്നതിന് വനിതാ എസ്‌ഐ വിസമ്മതിച്ചതായി പരാതി

പത്തനംതിട്ട: വനിതാ സ്റ്റേഷനിലെ എസ്ഐ പോക്സോ കേസ് എടുക്കാന്‍ വിസമ്മതിച്ചെന്ന് പരാതി. പത്തനംതിട്ട വനിതാ സ്റ്റേഷന്‍ എസ്എച്ച്ഒ കെ.ആർ. ഷെമിമോള്‍ക്കെതിരെ ആണ് ആരോപണം. ഏഴ് വയസുകാരിയെ ട്യൂഷന്‍ ടീച്ചറുടെ പിതാവ് ലൈംഗികമായി ഉപദ്രവിച്ചെന്ന പരാതിയിലാണ് ഷെമിമോള്‍ നടപടി എടുക്കാതിരുന്നത്. സ്റ്റേഷനില്‍ എത്തിയപ്പോള്‍ ഷെമിമോള്‍ പരാതി സ്വീകരിക്കാത്തതിനെ തുടര്‍ന്ന് പെണ്‍കുട്ടിയുടെ രക്ഷിതാക്കള്‍ ചൈല്‍ഡ് ലൈന്‍ വി പരാതി നല്‍കുകയായിരുന്നു. തുടര്‍ന്ന് എഴുപതുകാരനെ പോലീസ് അറസ്റ്റു ചെയ്തു. എസ്ഐക്ക് മുന്നില്‍ പിതാവും കുട്ടിയും എത്തിയപ്പോള്‍ പരാതി വിശദമായി കേട്ട എസ്ഐ കേസെടുക്കാതെ ഇവരെ പറഞ്ഞു വിടുകയായിരുന്നു. വനിതാ സ്റ്റേഷനില്‍ നിന്ന് നീതി ലഭിക്കില്ലെന്ന് മനസിലാക്കിയ പിതാവ് വിവരം ചൈല്‍ഡ് ലൈനില്‍ അറിയിച്ചു. അവിടെ നിന്നുള്ള നിര്‍ദേശപ്രകാരമാണ് പോലീസ് തുടര്‍ നടപടി സ്വീകരിച്ചത്.

ഭീകരവാദത്തെ ഒറ്റക്കെട്ടായി നേരിടണം: ആന്‍റോ ആന്‍റണി

പത്തനംതിട്ട: അയല്‍രാജ്യം സ്പോണ്‍സര്‍ ചെയ്യുന്ന ഭീകരവാദത്തെ നമ്മുടെ രാജ്യം ഒറ്റക്കെട്ടായി നേരിടണമെന്ന് ആന്‍റോ ആന്‍റണി എംപി. കാശ്മീരിലെ പഹല്‍ഗാമില്‍ ഭീകരവാദികള്‍ നടത്തിയ ആക്രമണത്തില്‍ പ്രതിഷേധിച്ചും മരണപ്പെട്ടവര്‍ക്ക് ആദരാഞ്ജലികള്‍ അര്‍പ്പിച്ചും ജില്ലാ കോണ്‍ഗ്രസ് കമ്മിറ്റിയുടെ നേതൃത്വത്തില്‍ പത്തനംതിട്ട ഗാന്ധി സ്‌ക്വയറില്‍ സംഘടിപ്പിച്ച യോഗവും മെഴുകുതിരി ദീപം തെളിക്കലും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. കാശ്മീര്‍ ഇന്ത്യയുടെ അഭിവാജ്യ ഘടകമാണെന്നും അതിനെ ആരുവിചാരിച്ചാലും അടര്‍ത്തി മാറ്റാനാകില്ലെന്നും എംപി പറഞ്ഞു. രാജ്യസുരക്ഷയുടെ കാര്യത്തില്‍ കാശ്മീര്‍ ജനതയെ വിശ്വാസത്തില്‍ എടുത്ത് കേന്ദ്ര സര്‍ക്കാര്‍ കൂടുതല്‍ ഗൗരവത്തോടും ജാഗ്രതയോടും പ്രവര്‍ത്തിക്കേണ്ട സമയമാണെന്നും ആന്‍റോ ആന്‍റണി പറഞ്ഞു. ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പില്‍ അധ്യക്ഷത വഹിച്ചു. മുന്‍ എംഎല്‍എ മാലേത്ത് സരളാദേവി, ഡിസിസി ഭാരവാഹികളായ എ. സുരേഷ്‌കുമാർ, സാമുവല്‍ കിഴക്കുപുറം, കെ. ജാസിംകുട്ടി, ജോണ്‍സണ്‍ വിളവിനാൽ, എം.ആര്‍ ഉണ്ണികൃഷ്ണന്‍ നായർ, റോജി പോള്‍ ഡാനിയേൽ, ബ്ലോക്ക് പ്രസിഡന്‍റ് ജെറി മാത്യു സാം, നേതാക്കളായ അബ്ദുള്‍കലാം ആസാദ്, റെജി താഴമൺ, പി.കെ ഇക്ബാല്‍, അജിത് മണ്ണിൽ, അന്‍സര്‍ മുഹമ്മദ്, റെനീസ് മുഹമ്മദ്, ടൈറ്റസ് കാഞ്ഞിരമണ്ണിൽ, ജോമോന്‍ പുതുപറമ്പില്‍, സജി അലക്സാണ്ടർ, ബിനു മൈലപ്ര, എസ്. അഫ്സൽ, പി.കെ ഗോപി, എം. സുബൈർ, അബ്ദുള്‍ ഷുക്കൂര്‍, എം.എ ഷെര്‍ഖാൻ, ഹനീഫ താന്നിമൂട്ടില്‍, രാജു വെട്ടിപ്പുറം, ജിനു ഓമല്ലൂര്‍ എന്നിവര്‍ പ്രസംഗിച്ചു.

വിശ്വാസീ സമൂഹം പുതുക്കപ്പെടേണ്ടത് കാലഘട്ടത്തിന്‍റെ അനിവാര്യത: മാര്‍ത്തോമ്മ മെത്രാപ്പോലീത്ത

വെണ്ണിക്കുളം: വിശ്വാസി സമൂഹം പുതുക്കപ്പെടേണ്ടത് കാലഘട്ടത്തിന്‍റെ അനിവാര്യതയാണെന്ന് ഡോ. തിയഡോഷ്യസ് മാര്‍ത്തോമ്മ മെത്രാപ്പോലീത്ത. വെള്ളാറ എബനേസര്‍ മാര്‍ത്തോമ്മ ഇടവകയുടെ നവീകരിച്ച ദേവാലയത്തിന്‍റെ കൂദാശ നിര്‍വഹിച്ച ശേഷം നടന്ന ശതാബ്ദി സമാപന സമ്മേളനം ഉദ്ഘാടനം ചെയതു പ്രസംഗിക്കുകയായിരുന്നു അദ്ദേഹം. ആന്‍റോആന്‍റണി എംപി പൊതുസമ്മേളനം ഉദ്ഘാടനം ചെയ്തു. മാത്യു ടി. തോമസ് എംഎല്‍എ മുഖ്യസന്ദേശം നല്‍കി. ഇടവക വികാരി റവ. അനീഷ് സാമുവേല്‍ ജോണ്‍ അധ്യക്ഷത വഹിച്ചു. സഭാ സീനിയര്‍ വികാരി ജനറാള്‍ റവ. മാത്യു ജോൺ, സഭാ ട്രസ്റ്റി അന്‍സില്‍ സഖറിയ കോമാട്ട്, റവ. ഏബ്രഹാം പണിക്കർ, റവ. പ്രെമിന്‍ ഐപ്പ് വേങ്ങൽ, റവ. ഉമ്മന്‍ പി. ഏബ്രഹാം, ജില്ലാ പഞ്ചായത്ത് സ്റ്റാന്‍ഡിംഗ് കമ്മിറ്റി ചെയര്‍മാന്‍ ജിജി മാത്യു, പുറമറ്റം ഗ്രാമപഞ്ചായത്ത് പ്രസിഡന്‍റ് ജൂലി കെ. വര്‍ഗീസ്, ബ്ലോക്ക് പഞ്ചായത്ത് മെംബര്‍ ലാലു തോമസ്, ഭദ്രാസന ട്രഷറാര്‍ അനീഷ് കുന്നപ്പുഴ, എ. ടി. തോമസ്, പി.ജെ. തോമസ്, ജോര്‍ജ് ഈപ്പൻ, ബിനു ജോണ്‍ എന്നിവര്‍ പ്രസംഗിച്ചു. സഖറിയ ദാനിയേല്‍, മാത്യു ഫിലിപ്പ്, ഡാനിയേല്‍ ഫിലിപ്പ്, ഈപ്പന്‍ ചാക്കോ, തോമസ് ഫിലിപ്പ്, ഫെബിന്‍ ജോണ്‍, ഡോക്ടര്‍ ടോം തോമസ് തുടങ്ങിയവര്‍ നേതൃതം നല്‍കി.

Deepika.com

The Largest Read Malayalam Internet Daily

Quick Links

Rashtra Deepika LTD

Deepika.com

The Largest Read Malayalam Internet Daily

Local News

Quick Links

Rashtra Deepika LTD