ജര്‍മനിയില്‍ സ്‌റ്റൈപെന്‍റോടെ സൗജന്യ ഉപരിപഠനം: സെമിനാര്‍ നാളെ തിരുവല്ലയില്‍ : Deepika.com Nattu Visesham

ഹജ്ജ് തീര്‍ഥാടകര്‍ക്ക് വാക്‌സിനേഷന്‍ ക്യാമ്പ് ഇന്ന്

പത്തനംതിട്ട: ഹജ് തീര്‍ഥാടനവുമായി ബന്ധപ്പട്ട് ജില്ലയില്‍ നിന്നും രജിസ്റ്റര്‍ ചെയ്തിട്ടുള്ള തീര്‍ഥാടകര്‍ക്ക് ഇന്ന് വാക്‌സിനേഷന്‍ ക്യാമ്പ് സംഘടിപ്പിക്കും. രാവിലെ 8.30 മുതല്‍ പത്തനംതിട്ട ജനറല്‍ ആശുപത്രിയിലാണ് ക്യാമ്പ്. സര്‍ക്കാര്‍ പട്ടികയിലുള്ള തീര്‍ഥാടകര്‍ തിരിച്ചറിയല്‍രേഖ, മറ്റ് അനുബന്ധ രേഖകള്‍ സഹിതം ക്യാമ്പില്‍ പങ്കെടുക്കണമെന്ന് ജില്ലാ മെഡിക്കല്‍ ഓഫീസര്‍ ഡോ. എല്‍. അനിതകുമാരി അറിയിച്ചു.

കാർ അപകടത്തിൽ അധ്യാപിക മരിച്ചു

വെണ്ണിക്കുളം: കാർ അപകടത്തിൽ അധ്യാപിക മരിച്ചു. പെരുന്പാവൂർ കീഴില്ലം മാർത്തോമ്മ ഹയർ സെക്കൻഡറി സ്കൂൾ അധ്യാപിക ആറന്മുള കാലായിൽ ഡോ.തോമസ് ജോർജിന്‍റെ (പ്രിൻസിപ്പൽ, എംബിറ്റ്സ് എൻജിനിയറിംഗ് കോളജ്, നെല്ലിമറ്റം - കോതമംഗലം) ഭാര്യ റെസി ടൈറ്റസാണ് (52) മരിച്ചത്. ഇന്നലെ പുലർച്ചെ കോട്ടയം - കോഴഞ്ചേരി റോഡിൽ വെണ്ണിക്കളം പാട്ടക്കാലായിലാണ് സംഭവം. പെരുന്പാവൂരിൽ നിന്നും വീട്ടിലേക്കു വരികയായിരുന്നു റെസി ടൈറ്റസ്. പാട്ടക്കാലയ്ക്കു സമീപം നിർത്തിയിട്ടിരുന്ന പിക്കപ് വാനിൽ കാർ നിയന്ത്രണം വിട്ട് ഇടിച്ചാണ് അപകടമുണ്ടായത്. ഭർത്താവ് തോമസ് ജോർജും കാറിലുണ്ടായിരുന്നു. റെസിയാണ് കാർ ഓടിച്ചിരുന്നത്. പത്തനംതിട്ട ചുരുളിക്കോട് തുണ്ടു പറമ്പിൽ പ്രഫ. ടി.എസ്. ടൈറ്റസിന്‍റെയും ആനി ടൈറ്റസിന്‍റെയും മകളാണ് റെസി. സംസ്കാരം പിന്നീട്. മക്കൾ: കിരൺ ജോർജ് തോമസ് (പ്രൈസ് വാട്ടർ ഹൗസ് കൂപേഴ്സ്, ബംഗളൂരു), അജയ് ടൈറ്റസ് തോമസ് (ടിസിഎസ്, തിരുവനന്തപുരം).

ടോറസിലിടിച്ച് പച്ചക്കറി ലോറി മറിഞ്ഞു

അടൂർ: എംസി റോഡിൽ അരമനപ്പടിക്കു സമീപം പച്ചക്കറി ലോറി ടോറസുമായി കൂട്ടിയിടിച്ചുണ്ടായ അപകടത്തിൽ ഡ്രൈവർക്ക് പരിക്ക്. ഇന്നലെ പുലർച്ചെ നാലിനായിരുന്നു അപകടം. അപകടത്തിൽപെട്ട പച്ചക്കറി ലോറി റോഡിന് കുറുകെ മറിഞ്ഞാണ് ലോറിയിലെ ഡ്രൈവർക്ക് സാരമായ പരിക്കേറ്റത്. ക്ലീനർക്കു നിസാര പരിക്കുകളുണ്ട്. റോഡിൽ വീണ പച്ചക്കറികൾ നീക്കം ചെയ്തു ലോറി ക്രെയിൻ ഉപയോഗിച്ച് ഉയർത്തി മാറ്റി. ലോറിയുടെ ഡീസൽ ടാങ്ക് പൊട്ടുകയും ഡീസൽ റോഡിൽ ഒഴുകുകയും ചെയ്തത് ഫയർഫോഴ്സ് സംഘം നീക്കം ചെയ്തു. അടൂർ ഫയർസ്റ്റേഷൻ സീനിയർ റെസ്ക്യൂ ഓഫീസർ അജിഖാൻ യൂസുഫിന്‍റെ നേതൃത്വത്തിലാണ് രക്ഷാപ്രവർത്തനം നടത്തിയത്.

പഹൽ ഗാമിൽ നടന്നത് ഹീനമായ സംഭവം: വെൽഫെയർ പാർട്ടി

പത്തനംതിട്ട: പഹൽഗാമിൽ നടന്നത് അത്യന്തം ഹീനമായ അക്രമണമാണെന്ന് വെൽഫെയർ പാർട്ടി സംസ്ഥാന പ്രസിഡന്‍റ് റസാഖ് പാലേരി പത്രസമ്മേളനത്തിൽ പറഞ്ഞു. സാധാരണക്കാരായ ആളുകളാണ് പഹൽഗാം ആക്രമണത്തിൽ കൊല്ലപ്പെട്ടത്. പൗരന്മാരുടെ സുരക്ഷ ഉറപ്പു വരുത്തേണ്ടത് ഭരണാധികാരികളാണ്. പ്രത്യേകിച്ചും കാശ്‌മീരിനുള്ള പ്രത്യേക പദവി ഇല്ലാതാക്കിയ ശേഷം കേന്ദ്രം നേരിട്ടു നിയന്ത്രിക്കുന്ന സുരക്ഷാ സംവിധാനങ്ങളാണ് അവിടെയുള്ളത്. അതിനാൽ ആക്രമണത്തിനു കാരണമായ സുരക്ഷാവീഴ്‌ചയുടെ പൂർ ഉത്തരവാദിത്തം കേന്ദ്ര സർക്കാറിനാണെന്നും റസാഖ് കുറ്റപ്പെടുത്തി. പൗരന്മാർക്ക് സുരക്ഷ ഉറപ്പാക്കാനാകുന്നില്ലെങ്കിൽ രാജിവെക്കുകയാണ് പ്രധാനമന്ത്രിയും പ്രതിരോധ-അഭ്യന്തര മന്ത്രിമാരും ചെയ്യേണ്ടതെന്നും അദ്ദേഹം അഭിപ്രായപ്പെട്ടു. സംസ്ഥാന വൈസ് പ്രസിഡന്‍റ് പി.എ. അബ്ദുൽ ഹക്കീം, സംസ്ഥാന സെക്രട്ടറി ജ്യോതിവാസ് പറവൂർ, ജില്ലാ പ്രസിഡന്‍റ് ഷാജി റസാഖ്, ജില്ലാ ജനറൽ സെക്രട്ടറി അജിത്ത് മാന്തുക, മാജിദ നൗഷാദ് അടൂർ എന്നിവരും പത്രസമ്മേളനത്തിൽ പങ്കെടുത്തു.

ഇ.വി. വർക്കി വെച്ചൂച്ചിറ ഗ്രാമപഞ്ചായത്ത് പ്രസിഡന്‍റ്

റാന്നി: വെച്ചൂച്ചിറ ഗ്രാമപഞ്ചായത്ത് പ്രസിഡന്‍റായി ഇ.വി. വർക്കി (കോൺഗ്രസ് ) തെരഞ്ഞെടുക്കപ്പെട്ടു. യുഡിഎഫ് ധാരണ പ്രകാരം ടി,കെ. ജയിംസ് പ്രസിഡന്‍റു സ്ഥാനം രാജിവച്ച ഒഴിവിലാണ് തെരഞ്ഞെടുപ്പ് നടന്നത്. ഓലക്കുളം വാർഡിനെ (അഞ്ച്) യാണ് ഇദ്ദേഹം പ്രതിനിധീകരിക്കുന്നത്.

നീലക്കുറിഞ്ഞി ബ്ലോക്ക്തല ക്വിസ് മത്സരം നടത്തി

റാന്നി: ഹരിത കേരളം മിഷന്‍റെ നേതൃത്വത്തിൽ മൂന്നാറിൽ നടക്കുന്ന ജൈവവൈവിധ്യ പഠനോത്സവത്തിനു മുന്നോടിയായി റാന്നി ബ്ലോക്ക്തല ക്വിസ്മത്സരം നടത്തി. റാന്നി ബിആർസി ഹാളിൽ നടന്ന മത്സരം പഴവങ്ങാടി ഗ്രാമപഞ്ചായത്ത് പ്രസിഡന്‍റ് റൂബി കോശി ഉദ്ഘാടനം ചെയ്തു. റാന്നി ഗ്രാമപഞ്ചായത്ത് പ്രസിഡന്‍റ് കെ. ആർ. പ്രകാശ് അധ്യക്ഷത വഹിച്ചു. ഉപജില്ലാ വിദ്യാഭ്യാസ ഓഫീസർ പ്രീതി ജോസഫ് മുഖ്യപ്രഭാഷണം നടത്തി. ബിപിസി ഷാജി എ. സലാം, ക്വിസ്മാസ്റ്റർ എഫ്. അജിനി, ഹരിത കേരളം മിഷൻ റിസോഴ്സ് പേഴ്സൺ ലക്ഷ്മി കോമൾ, പ്രഥമാധ്യാപകൻ ജോമോൻ എന്നിവർ പ്രസംഗിച്ചു. ഏഴ്, ഏട്ട്, ഒന്പത് ക്ലാസുകളിലെ കുട്ടികളാണ് മത്സരത്തിൽ പങ്കെടുത്തത്. മത്സരത്തിൽ ടി. ആകാശ് (ജിഎം ടിവിഎച്ച്സ്എസ് കുന്നം), ഷെല്ലി ഷിബു (ജിയുപിഎസ് പുതുശേരിമല), അനന്യ സജി തോമസ് (സെന്‍റ് തോമസ് എച്ച്എസ് റാന്നി) , വി.എൽ. അലീന മോൾ (എസ്എൻഡിപി എച്ച്എസ് വെൺകുറിഞ്ഞി) എന്നിവർ ഒന്ന്, രണ്ട്, മൂന്ന് നാല് സ്ഥാനങ്ങൾ കരസ്ഥമാക്കി. മേയ് 29നാണ് ജില്ലാതല മത്സരം നടക്കുന്നത്.

മൈലപ്ര ശാലേം മാർത്തോമ്മ ഇടവക ശതാബ്ദി ഉദ്ഘാടനം നാളെ

പത്തനംതിട്ട: മൈലപ്ര ശാലേം മാർത്തോമ്മ ഇടവക ശതാബ്ദി ആഘോഷങ്ങൾക്ക് നാളെ തുടക്കമാകും. രാവിലെ എട്ടിന് റാന്നി - നിലയ്ക്കൽ ഭദ്രാസന അധ്യക്ഷൻ ഡോ. ജോസഫ് മാർ ബർന്നബാസ് സഫ്രഹൻ മെത്രാപ്പോലീത്തായുടെ മുഖ്യ കാർമികത്വത്തിൽ വിശുദ്ധ കുർബാന. ഇടവക വികാരി റവ. അജിത് ഈപ്പൻ തോമസിന്‍റെ അധ്യക്ഷതയിൽ പൊതുസമ്മേളനം നടക്കും. ശതാബ്ദി ആഘോഷങ്ങൾക്ക് തുടക്കം കുറിച്ചുകൊണ്ടുള്ള വിളംബര ജാഥ ഇന്ന് 3.30ന് മരുതേലി മുരുപ്പേൽ പൂർവ ദേവാലയത്തിൽ നിന്ന് ആരംഭിച്ച് മൈലപ്ര ശാലേം മാർത്തോമ്മ ദേവാലയ അങ്കണത്തിൽ എത്തിച്ചേരും. ശതാബ്ദി ലോഗോ പ്രകാശനം റവ. സിജി തോമസ് പൂർവ ദേവാലയത്തിൽ നിർവഹിക്കും. ഉദ്ഘാടന സമ്മേളനത്തിൽ മാർത്തോമ്മ സഭ അല്മായ ട്രസ്റ്റി അൻസിൽ സഖറിയ കോമാട്ട്, ഭദ്രാസന ട്രഷറർ അനു ഫിലിപ്പ്, മുൻവികാരി റവ. ടി. ടി. തോമസ്, മുൻ വികാരിമാർ എന്നിവർ പ്രസംഗിക്കും. സാക്ഷ്യ സമൂഹമായി വിശ്വാസയാത്രയിൽ എന്ന ചിന്താവിഷയവുമായി ഒരു വർഷം നീണ്ടുനിൽക്കുന്ന ശതാബ്ദി ആഘോഷങ്ങൾക്ക് ഇടവകയിലെ വിവിധ ആത്മീയ സംഘടനകൾ നേതൃത്വം നൽകും. ശതാബ്ദി ആഘോഷങ്ങളുടെ സമാപനം 2026 ഏപ്രിൽ 12 നു നടക്കും.

വെണ്ണിക്കുളം ഗോപാലക്കുറുപ്പ് സ്മാരക പുരസ്കാരം ഡോ. സോണിയ ചെറിയാന്

പത്തനംതിട്ട: പ്രവാസി സംസ്കൃതി അസോസിയേഷന്‍റെ 2024ലെ മഹാകവി വെണ്ണിക്കുളം ഗോപാലകുറുപ്പ് സ്‌മാരക പുരസ്‌കാരം എഴുത്തുകാരിയായ ലെഫ്. കേണൽ ഡോ. സോണിയ ചെറിയാന്‍റെ സ്നോ ലോട്ടസ് എന്ന നോവലിന് ലഭിച്ചു. 10,001 രൂപയും മഹാകവിയുടെ പേരിലുള്ള ശില്‌പവും പ്രശസ്‌തിപത്രവും അടങ്ങുന്ന അവാർഡ് മേയ് ഒന്പതിനു രാവിലെ 10 ന് വെണ്ണിക്കുളം സെന്‍റ് ബെഹനാൻസ് ഹയർസെക്കൻഡറി സ്‌കൂളിൽ നടക്കുന്ന ചടങ്ങിൽ ഗവൺമെന്‍റ് ചീഫ് വിപ്പ് ഡോ. എൻ. ജയരാജ് സമ്മാനിക്കും. കണ്ണൂർ ജില്ലയിലെ പേരാവൂർ സ്വദേശിനിയാണ് ഡോ. സോണിയ ചെറിയാൻ. സാഹിത്യകാരിയും നോവലിസ്റ്റുമായ സോണിയ ചെറിയാൻ ഇൻഡ്യൻ കരസേനയുടെ ലെഫ്. കേണലായി വിരമിച്ചു. ഒരു പട്ടാളക്കാരിയുടെ ഓർമക്കുറിപ്പുകൾ, അവളവൾ ശരണം തുടങ്ങി നിരവധി നോവലുകളുടെയും പുസ്‌തകങ്ങളുടെയും ഗ്രന്ഥകർത്താവാണ്. ഡോ. സജി ചാക്കോ, ബിജു ജേക്കബ് കൈതാരം, സാമുവേൽ പ്രക്കാനം എന്നിവർ പത്രസമ്മേളനത്തിൽ അവാർഡ് പ്രഖ്യാപനം നടത്തി.

പഹൽഗാം ആക്രമണത്തിൽ മരണമടഞ്ഞവർക്ക് ആദരാഞ്ജലി അർപ്പിച്ച് മഹിളാ കോൺഗ്രസ്

പത്തനംതിട്ട: പഹല്‍ഗാമില്‍ തീവ്രവാദികള്‍ നിരപരാധികളായ വിനോദ സഞ്ചാരികളെ ക്രൂരമായി കൊലപ്പെടുത്തിയ സംഭവം രാജ്യത്തിന്‍റെ ഐക്യത്തിനും അഖണ്ഡതയ്ക്കും നേരെയുള്ള കടന്നാക്രമണത്തിന്‍റെ ഭാഗമാണെന്ന് ഡിസിസി പ്രസിഡന്‍റ് പ്രഫ. സതീഷ് കൊച്ചുപറമ്പിൽ. പഹല്‍ഗാം ഭീകരാക്രമണത്തില്‍ കൊല്ലപ്പെട്ടവര്‍ക്ക് ആദരാഞ്ജലികള്‍ അര്‍പ്പിച്ചുകൊണ്ട് മഹിളാ കോണ്‍ഗ്രസ് പത്തനംതിട്ട ജില്ലാ കമ്മിറ്റിയുടെ നേതൃത്വത്തില്‍ നടത്തിയ മൗന ജാഥയും തുടർന്നു ഗാന്ധി സ്ക്വയറില്‍ നടന്ന അനുസ്മരണ സമ്മേളനവും ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. മഹിളാ കോണ്‍ഗ്രസ് ജില്ലാ പ്രസിഡന്‍റ് രജനി പ്രദീപ് അധ്യക്ഷത വഹിച്ചു. കോണ്‍ഗ്രസ് നേതാക്കളായ എ. ഷംസുദ്ദീന്‍, ജെറി മാത്യു സാം, അബ്ദുള്‍കലാം ആസാദ്, മഹിളാ കോണ്‍ഗ്രസ് നേതാക്കളായ ലാലി ജോണ്‍, സുധ നായര്‍, മഞ്ജു വിശ്വനാഥ്, ലീല രാജൻ, സുജാത മോഹന്‍, അന്നമ്മ ഫിലിപ്പ്, വസന്ത ശ്രീകുമാര്‍, സജിത, പ്രസീത രഘു, ഓമന സത്യൻ, സുധാ പത്മകുമാര്‍, ഉഷാ തോമസ്, വിനി സന്തോഷ്, സുശീല അജി, സലീന, വിജയലക്ഷ്മി, ഷീബ വര്‍ഗീസ്, റോസമ്മ ബാബുജി, ബീന സോമൻ, ശ്രീകുമാരി, ഇന്ദിരാ പ്രേം, ഓമന വര്‍ഗീസ്, ജസി മോഹന്‍, സജിനി മോഹൻ, എം.വി. അമ്പിളി, സ്വപ്നാ സൂസൻ‌, പ്രിയ പ്രസാദ്, ലത ചെറിയാന്‍ എന്നിവര്‍ പ്രസംഗിച്ചു.

അടൂർ എൻജിനിയറിംഗ് കോളജിൽ അന്താരാഷ്ട്ര കോൺഫറൻസ്

പത്തനംതിട്ട: അടൂർ മണക്കാല എൻജിനിയറിംഗ് കോളജിലെ മെക്കാനിക്കൽ എൻജിനിയറിംഗ് വിഭാഗം സംഘടിപ്പിക്കുന്ന അന്താരാഷ്‌ട്ര കോൺഫറൻസ് അടൂർ ഹോട്ടൽ ലാൽസ് റസിഡൻസിയിൽ 28 ന് നടക്കും. കൊല്ലം ശ്രീനാരായണഗുരു ഓപ്പൺ യൂണിവേഴ്സിറ്റി വൈസ് ചാൻസലർ ഡോ. വി.പി. ജഗതി രാജ് ഉദ്ഘാടനം ചെയ്യും. ഐഎച്ച്ആർഡി ഡയറക്ടർ ഡോ. വി.എ. അരുൺ കുമാർ അധ്യക്ഷത വഹിക്കും. പ്രശസ്തമായ സ്ഥാപനങ്ങളിൽ നിന്നുള്ള ഗവേഷകരും അധ്യാപകരും പ്രബന്ധങ്ങൾ അവതരിപ്പിക്കും. കോൺഫറൻസിൽ പ്രബന്ധങ്ങൾ നേരിട്ടോ, ഓൺലൈനായോ അവതരിപ്പിക്കാൻ സൗകര്യം ഉണ്ടായിരിക്കുമെന്ന് പ്രിൻസിപ്പൽ ഡോ. കെ. സുനിൽ കുമാർ പത്രസമ്മേളനത്തിൽ പറഞ്ഞു. ഡോ. കെ.പി.വെങ്കിട്ടരാജ്, ഡോ. എ. കെ. മധു എന്നിവർ പത്രസമ്മേളനത്തിൽ പങ്കെടുത്തു.

ഓംബുഡ്‌സ്മാന്‍ 61 പരാതി തീര്‍പ്പാക്കി

പത്തനംതിട്ട: മഹാത്മാഗാന്ധി ദേശീയ തൊഴിലുറപ്പ് പദ്ധതി ജില്ലാ ഓംബുഡ്‌സ്മാന്‍ 72 പരാതികൾ പരിഗണിച്ചതിൽ 61 എണ്ണം തീര്‍പ്പാക്കി. ഗ്രാമപഞ്ചായത്തുകളുടെ സോഷ്യല്‍ ഓഡിറ്റ് റിപ്പോര്‍ട്ടിലെ ക്രമക്കേടുകളില്‍ കേസെടുത്തു. തൊഴിലാളികള്‍ക്ക് അധികമായി നല്‍കിയ 22,412 രൂപ ഈടാക്കുന്നതിനും അടിസ്ഥാന സൗകര്യങ്ങളും സുരക്ഷാ ഉപകരണങ്ങളും ലഭ്യമാക്കാത്ത പഞ്ചായത്തുകള്‍ക്ക് അവ ഉറപ്പാക്കാനും നിര്‍ദേശം നല്‍കി. സീതത്തോട് പഞ്ചായത്തിലെ അര്‍ഹതയില്ലാത്ത ഗുണഭോക്താവിന് വിവിധ ആവശ്യങ്ങള്‍ക്കായി നല്‍കിയ 1,07,752 രൂപ ഉദ്യോഗസ്ഥരില്‍ നിന്നും ഒമ്പത് ശതമാനം പലിശ സഹിതം ഈടാക്കുന്നതിന് ഉത്തരവായി. സീതത്തോട് ഗ്രാമപഞ്ചായത്തില്‍ പ്രവൃത്തി സമയത്ത് സ്ഥാപിക്കേണ്ട സിറ്റിസണ്‍ ഇന്‍ഫര്‍മേഷന്‍ ബോര്‍ഡിന്‍റെ കരാറിലെ ക്രമക്കേടിന് ഉന്നതതല അന്വേഷണത്തിന് ശിപാര്‍ശ ചെയ്തു. പന്തളത്തെ ഓംബുഡ്‌സ്മാന്‍ ഓഫീസ് ജില്ലാ ആസ്ഥാനത്തേക്ക് മാറ്റുന്നതിന് സര്‍ക്കാരിനോട് ആവശ്യപ്പെട്ടു.

തിരുനാളാഘോഷം

ചന്ദനപ്പള്ളി കത്തോലിക്കാ പള്ളിയിൽ പത്തനംതിട്ട: ചന്ദനപ്പള്ളി സെന്‍റ് ജോർജ് മലങ്കര കത്തോലിക്കാ ദേവാലയത്തിൽ തിരുനാളിന് നാളെ കൊടിയേറും. രാവിലെ എട്ടിന് പുത്തൂർ രൂപതാധ്യക്ഷൻ ഡോ. ഗീവർഗീസ് മാർ മക്കാറിയോസിന്‍റെ കാർമികത്വത്തിൽ വിശുദ്ധ കുർബാന. പത്തിനു തീർഥാടന വാരാഘോഷം ജില്ലാ കളക്ടർ എസ്. പ്രേംകൃഷ്ണൻ ഉദ്ഘാടനം ചെയ്യും. ഫ്രാൻസിസ് മാർപാപ്പ അനുസ്മരണ സമ്മേളനം തുടർന്നു നടക്കും.11 ന് തിരുനാൾ കൊടിയേറ്റ് നടക്കും. മാർപാപ്പയുടെ ദേഹവിയോഗത്തേ തുടർന്ന് ഈ വർഷം തിരുനാളിന് ആഘോഷങ്ങൾ പരിമിതപ്പെടുത്തിയതായി വികാരി ഫാ. ബെന്നി നാരകത്തിനാൽ പത്രസമ്മേളനത്തിൽ പറഞ്ഞു. ആചാരാനുഷ്ഠാനങ്ങൾ, വിശ്വാസ കാര്യങ്ങൾ എന്നിവ മാത്രമേ ഉണ്ടാകൂ. ആഘോഷങ്ങളിൽ ലാളിത്യം പുലർത്തും. ദിവസവും രാവിലെ കുർബാന, കുട പ്രദക്ഷിണം, കുട സമർപ്പണം തുടങ്ങിയവ തിരുനാളിന്‍റെ ഭാഗമായി നടക്കും. മേയ് ആറ്, ഏഴ് തീയതികളിലാണ് പ്രധാന തിരുനാൾ. ആറിനു രാവിലെ 7.30 ന് കുർബാന, രാത്രി 7.30 ന് റാസ. ദേവാലത്തിൽനിന്നും റാസ ആരംഭിച്ച് ഗവ.ആശുപത്രി റോഡ്, വളത്തുകാട്, ഇടത്തിട്ട സെന്‍റ് ജൂഡ് കുരിശടി, ഇടത്തിട്ട ജംഗ്ഷൻവഴി തിരികെ ദേവാലയത്തിലേക്ക്. ഏഴിനു രാവിലെ 7.30 ന് ചെമ്പിൽ അരി സമർപ്പണം, 8.30 ന് ബിഷപ് ഡോ. സാമുവൽ മാർ ഐറേനിയോസിന്‍റെ മുഖ്യ കാർമികത്വത്തിൽ കുർബാന, പ്രഥമ ദിവ്യകാരുണ്യ സ്വീകരണം,12.30 ന് വെച്ചൂട്ട്, 3.30 ന് ഫ്രാൻസിസ് മാർപാപ്പയ്ക്ക് ആദരാഞ്ജലി അർപ്പിച്ച് അനുസ്മരണ റാലി. 11ന് കൊടിയിറക്കോടെ പെരുന്നാൾ സമാപിക്കും. സഹവികാരി സനു സാം തെക്കേ കാവിനാൽ, ട്രസ്റ്റി വിൽസൺ പാലവിള, സെക്രട്ടറി ഫിലിപ്പ് കിടങ്ങിൽ, പ്രോഗ്രാം കൺവീനർ ബാബു കെ. പെരുമല, ഫെബിൻ സാം എന്നിവരും പത്രസമ്മേളനത്തിൽ പങ്കെടുത്തു. കോന്നി സെന്‍റ് ജോർജ് പള്ളിയിൽ പത്തനംതിട്ട: കോന്നി സെന്‍റ് ജോർജ് ഓർത്തഡോക്‌സ് മഹാ ഇടവകയുടെ പെരുന്നാൾ നാളെ മുതൽ മേയ് ഏഴുവരെ നടക്കുമെന്ന് ഭാരവാഹികൾ പത്രസമ്മേളനത്തിൽ പറഞ്ഞു 7.30ന് കുർബാന തുടർന്ന് പെരുന്നാൾ കൊടിയേറ്റ്. വൈകുന്നേരം നാലിന് വിളംബര ഘോഷയാത്ര. 28 ന് സെന്‍റ് ജോർജ് യുവജനപ്രസ്ഥാനത്തിന്‍റെ നേത്യത്വത്തിലുള്ള ഷട്ടിൽ ടൂർണമെൻറ് ജില്ലാ പഞ്ചായത്തംഗം റോബിൻ പീറ്റർ ഉദ്ഘാടനം ചെയ്യും. 29 ന് സഭാകവി സി.പി. ചാണ്ടി സ്‌മാരക സംഗീത സമൂഹ ഗാന മത്സരം രഞ്ജു എം.ജോയ് ഉദ്ഘാടനം ചെയ്യും. 30 ന് മർത്തമറിയം സമാജം സമ്മേളനം. മേയ് ഒന്നു മുതൽ രാവിലെ വിശുദ്ധ കുർാന ഉണ്ടാകും. ഒന്നിനു രാവിലെ പത്തിന് അഖില മലങ്കര ക്വിസ് മത്സരം. വൈകുന്നേരം 6.30ന് കലാസന്ധ്യ കെ.യു. ജനീഷ് കുമാർ എംഎൽഎ ഉദ്ഘാടനം ചെയ്യും. രണ്ടിനു വൈകുന്നേരം യുവജന സംഗമം. മൂന്നിനു രാത്രി ഏഴിന് ഫാ. ഗീവർഗീസ് കോശി വചന ശുശ്രൂഷ നിർവഹിക്കും. നാലിനു രാവിലെ 7.30ന് ഡോ.യുഹാനോൻ മാർ തേവോദോറസ് മെത്രാപ്പോലീത്ത വിശുദ്ധ മൂന്നിന്മേൽ കുർബാനയ്ക്കു മുഖ്യകാർമികത്വം വഹിക്കും. പത്തിന് ഇടവകദിനാഘോഷം ഡെപ്യൂട്ടി സ്പീക്കർ ചിറ്റയം ഗോപകുമാർ ഉദ്ഘാടനം ചെയ്യും. രാത്രി ഏഴിന് ഫാ. ജോൺ റ്റി. വർഗീസും അഞ്ചിനു ഫാ.ഡോ.അല്കസ് ജോണും വചന ശുശ്രൂഷ നിർവഹിക്കും. ആറിനു വൈകുന്നേരം അഞ്ചിന് മണിമാളിക സമർപ്പണം ഡോ. ഏബ്രഹാം മാർ സെറാഫിം മെത്രാപ്പോലീത്ത നിർവഹിക്കും. രാത്രി ഏഴിന് പെരുന്നാൾ പ്രദക്ഷിണം. പ്രധാന പെരുന്നാൾ ദിനമായ ഏഴിനു രാവിലെ അഞ്ചിന്മേൽ കുർബാനയ്ക്ക് ഡോ.ഏബ്രഹാം മാർ സെറാഫിം മുഖ്യകാർമികത്വം വഹിക്കും. തുടർന്ന് ആശിർവാദവും നേർച്ച വിളമ്പും. കൊടിയിറക്കോടെ പെരുന്നാൾ സമാപിക്കും. ഇടവക വികാരി ഫാ. ജോർജ് ഡേവിഡ്, സെക്രട്ടറി ബെന്നി തോമസ്, ജനറൽ കൺവീനർ ജോസ് വർഗീസ്, പബ്ലിസിറ്റി കൺവീനർ ബിജിൽ ബി. മാത്യു എന്നിവർ പത്രസമ്മേളനത്തിൽ പങ്കെടുത്തു. ചന്ദനപ്പള്ളി ഓർത്തഡോക്സ് പള്ളിയിൽ ചന്ദനപ്പള്ളി: ആഗോള തീർഥാടന കേന്ദ്രമായ സെന്‍റ് ജോർജ് ഓർത്തഡോക്‌സ് വലിയ പള്ളിയിലെ പെരുന്നാളിന് നാളെ കൊടിയേറും. രാവിലെ 6.45ന് തുന്പമൺ ഭദ്രാസനാധിപൻ ഡോ. ഏബ്രഹാം മാർ സെറാഫിമിന്‍റെ കാർമികത്വത്തിൽ മൂന്നിന്മേൽ കുർബാന. തുടർന്ന് തീർഥാടന വാരാചരണം ഉദ്ഘാടനം, 10.30ന് പള്ളിയങ്കണത്തിലെ സ്വർണക്കൊടി മരത്തിലും വിവിധ കുരിശടികളിലും ഭവനങ്ങളിലും കൊടിയേറ്റ്, ഉച്ചകഴിഞ്ഞ് മൂന്നിന് ഇടഭാഗം കരയിൽ നിന്ന് കൊടിമര ഘോഷയാത്ര, ആറിന് കൽക്കുരിശിങ്കൽ കൊടിയേറ്റ്. മേയ് ഏഴിനു രാവിലെ ന് 6.45 നു കുര്യാക്കോസ് മാർ ക്ലീമിസ് വലിയ മെത്രാപ്പൊലീത്തയുടെ കാർമികത്വത്തിൽ മൂന്നിന്മേൽ കുർബാന, 10 നു പൊന്നിൻകുരിശ് സമർപ്പണം, മൂന്നിനു പദയാത്ര സംഗമം, അഞ്ചിന് ജംഗ്ഷനിൽ സ്വീകരണം, ആറിനു സന്ധ്യാ നമസ്കാരം, അനുഗ്രഹ പ്രഭാഷണം, ശ്ലൈഹിക വാഴ്‌വ്, രാത്രി എട്ടിനു റാസ, ഗാനമേള എന്നിവ ഉണ്ടാകും. പ്രധാന പെരുന്നാൾ ദിനമായ എട്ടിനു രാവിലെ ആറിനു ചെമ്പിൽ അരിയിടീൽ കർമം, ഏഴിന് ബസേലിയോസ് മാർത്തോമ്മ മാത്യൂസ് തൃതീയൻ കാതോലിക്കാ ബാവയുടെ പ്രധാന കാർമികത്വത്തിൽ മൂന്നിന്മേൽ കുർബാന, 11ന് തീർഥാടക സംഗമം പശ്ചിമബംഗാൾ ഗവർണർ ഡോ. സി. വി. ആനന്ദബോസ ഉദ്ഘാടനം ചെയ്യും. ചലച്ചിത്ര സംവിധായകൻ ബ്ലെസിക്ക് ഓർഡർ ഓഫ് സെന്‍റ് ജോർജ് പുരസ്കാരം നൽകി ആദരിക്കും. മന്ത്രി വീണാ ജോർജ്, ഡെപ്യൂട്ടി സ്‌പീക്കർ ചിറ്റയം ഗോപകുമാർ എന്നിവർ പ്രസംഗിക്കും. ഉച്ചകഴിഞ്ഞ് ചന്ദനപ്പള്ളി ചെന്പെടുപ്പ് റാസ. മൂന്നിന് റാസയ്ക്ക് ജംഗ്ഷനിൽ സ്വീകരണം, മന്ത്രി പി പ്രസാദ് പ്രസംഗിക്കും. അഞ്ചിനു പ്രസിദ്ധമായ ചന്ദനപ്പള്ളി ചെമ്പെടുപ്പ്, എട്ടിനു താളവിസ്‌മയം, നാടകം എന്നിവ നടക്കും.

കോന്നി ഇക്കോ ടൂറിസം കേന്ദ്രം നവീകരണത്തിൽ ക്രമക്കേട്

കോന്നി: കോന്നി ഇക്കോ ടൂറിസം കേന്ദ്രം നവീകരണവുമായി ബന്ധപ്പെട്ട ക്രമക്കേടുകളിൽ അന്വേഷണം അട്ടിമറിച്ചു. ഒരാഴ്ച മുന്പ് നാലുവയസുകാരന്‍റെ ദാരുണാന്ത്യത്തിനു കാരണമായത് ആനത്താവളത്തിലെ ജീവനക്കാരുടെ നിഷ്ക്രിയത്വവും നിർമാണത്തിലെ അപാകതയുമാണെന്നു വ്യക്തമായതാണ്. ഇതിനു മുന്പും കുട്ടികൾക്ക് ആനത്താവളത്തിലെ കളി ഉപകരണങ്ങളുമായി ബന്ധപ്പെട്ട് അപകടങ്ങൾ പലതും ഉണ്ടായിട്ടുണ്ട്. നിലവാരം കുറഞ്ഞ കളി ഉപകരണങ്ങൾ അശാസ്ത്രീയമായി സ്ഥാപിച്ചതു സംബന്ധിച്ച പരാതികളിലാണ് അന്വേഷണം അട്ടിമറിച്ചത്. ആനത്താവളത്തിൽ കുട്ടികൾക്കായി നിർമിച്ചിരിക്കുന്ന പാർക്കും അതിലെ കളി ഉപകരണങ്ങൾ കളിപ്പാട്ടങ്ങൾ, വിനോദോപാധികൾ എന്നിവയെല്ലാം കാലപ്പഴക്കം ചെന്നതും അശാസ്ത്രീയമായി നിർമിച്ചവയുമാണ്. കുട്ടികൾക്കായുള്ള സീസോ പാർക്ക് തുടക്കത്തിൽ മാത്രമാണ് കുഴപ്പമില്ലാതെ പ്രവർത്തിച്ചത്. കുട്ടികൾ തെന്നി ഇറങ്ങുന്ന കളി ഉപകരണത്തിന്‍റെ നിർമാണവും അശാസ്ത്രീയമായാണ്. കുത്തനെയുള്ള പൈപ്പിൽ ഇരുമ്പ് പാളിയിലുടെ ഉയരത്തിൽ നിന്നും തെന്നി ഇറങ്ങിയ രണ്ട് കുട്ടികൾക്ക് നട്ടെല്ലു സംബന്ധമായ പ്രശ്നം മുമ്പ് ഉണ്ടായിട്ടുണ്ട്. ഇതിലേക്ക് കയറിയ ഒരു കുട്ടി പടികളിൽ നിന്നും തെന്നി വീണു കൈകൾക്കു സാരമായ പരിക്കേറ്റ സംഭവവും മുമ്പ് ഉണ്ടായിട്ടുണ്ട്. ഫൈബർ ഉപകരണങ്ങൾ നല്ല നിലവാരത്തിൽ നിർമിച്ചവ വിപണിയിൽ ലഭ്യമാണെങ്കിലും കമ്മീഷൻ തുകയും എസ്റ്റിമേറ്റ് തുകയുടെ ഇരട്ടിയും തട്ടിയെടുക്കാൻ തത്പരരായ ചിലരാണ് ഇത്തരത്തിൽ പാർക്ക് ഒരുക്കിയിട്ടുള്ളത്. നിരവധി സഞ്ചാരികൾ എത്തുമ്പോഴും അവർക്ക് ആവശ്യമായ സംവിധാനങ്ങൾ ഒന്നുംതന്നെ ആനത്താവളത്തിൽ ലഭ്യമല്ല. പരിസ്ഥിതി സൗഹാർദ്ദ വിനോദ സഞ്ചാര കേന്ദ്രം ആയിരുന്നിട്ടും നിർമാണ പ്രവർത്തനങ്ങളിൽ പലപ്പോഴും ഇതുണ്ടാകാറില്ല. പല നിർമിതികളുടെയും എസ്റ്റിമേറ്റ് തുകയും ചെലവായ തുകയും താരതമ്യം ചെയ്താൽ ക്രമക്കേടുകൾ വ്യക്തമാകുമെന്ന് നാട്ടുകാരനായ വിജയൻ നായർ പറഞ്ഞു. ഇക്കോടൂറിസം കേന്ദ്രത്തിന്‍റെ പ്രവർത്തനങ്ങളിൽ പ്രദേശവാസികൾക്ക് പങ്കാളിത്തം ഉണ്ടാകുന്നില്ലെന്ന് കോന്നി ഗ്രീൻ നഗർ റസിഡൻസ് അസോസിയേഷൻ പ്രസിഡന്‍റ് ജോർജ് വർഗീസ് തേയിലശേരിയിൽ, ട്രഷറാർ രാജീസ് കൊട്ടാരം എന്നിവർ ആരോപിച്ചു. പരിസര വാസികൾക്ക് തൊഴിൽ ഇല്ല ഹരിതചട്ടങ്ങളും പരിസ്ഥിതി സൗഹാർദവുമായ ഇക്കോ ടൂറിസം പദ്ധതിക്ക് തുടക്കമിട്ടപ്പോൾ പ്രാദേശിക തൊഴിൽ അവസരങ്ങൾ ധാരാളം ഒരുക്കുമെന്നായിരുന്നു പ്രഖ്യാപനം. എന്നാൽ കോന്നിക്ക് പുറമേനിന്നുള്ളവരാണ് കേന്ദ്രത്തിലെ വിവിധ ജോലികളിൽ നിലവിലുള്ളത്. അമിതമായ പാർക്കിംഗ് ഫീസും പ്രവേശന ടിക്കറ്റ് നിരക്കുമാണ് മറ്റൊരു പ്രശ്നം. നാല് ആനകളെ മാത്രം കാണാവുന്ന സ്ഥലത്തു വനം വകുപ്പ് പല തരത്തിലും ജനങ്ങളെ പിഴിയുകയാണ്. മിനി തിയേറ്ററിന്‍റെ പേരിലും അമിത നിരക്കാണ് ഈടാക്കുന്നത്. ആനത്താവളം വൈകുന്നേരം 5.30ന് അടയ്ക്കും. എന്നാൽ പാർക്ക് രാത്രി എട്ടുവരെ തുടരണമെന്ന ആവശ്യവും പരിഗണിച്ചിട്ടില്ല. സമഗ്രമായ അന്വേഷണം വേണം കോന്നി ഇക്കോ ടൂറിസം കേന്ദ്രത്തിന്‍റെ മേൽനോട്ടവും സുരക്ഷാ ക്രമീകരണങ്ങളും കൃത്യമായിനിർവഹിക്കേണ്ട വന വികാസ ഏജൻസിയുടെ ഉത്തരവാദിത്വപ്പെട്ട ഉദ്യോഗസ്ഥരെ പൂർണമായി ഒഴിവാക്കി താഴെ തലത്തിലുള്ള ഉദ്യോഗസ്ഥർക്കെതിരേ മാത്രം സസ്പെൻഷൻ നടപടി സ്വീകരിച്ചത് പുന:പരിശോധിക്കണമെന്ന് ദേശീയ മനുഷ്യാവകാശ സംഘടനയായ വിജിൽ ഇന്ത്യ മൂവ്മെന്‍റ് ജില്ലാ കൺവീനർ സലിൽ വയലത്തല ആവശ്യപ്പെട്ടു. വേലിക്കല്ല് വീണ് നാലു വയസുകാരൻ മരിച്ചതിന് ഉത്തരവാദികളായ എല്ലാവരേയും അന്വേഷണ പരിധിയിൽ കൊണ്ടുവരുന്നതിനും മാതൃകാപരമായ ശിക്ഷ ഉറപ്പാക്കുന്നതിനും ബന്ധപ്പെട്ട അധികാരികൾ തയാറാകണമെന്ന് സലിൽ ആവശ്യപ്പെട്ടു. സുരക്ഷാ ഭീഷണിയും ഏറെ നൂറുകണക്കിന് സന്ദർശകർ വരുന്ന ആനത്താവളത്തിൽ അപകടകരമായി നിൽക്കുന്ന മരങ്ങളും ശിഖരങ്ങളും മുറിച്ചുമാറ്റണമെന്നതാണ് പ്രധാന ആവശ്യങ്ങളിലൊന്ന്. പാർക്കും ആന നിൽക്കുന്ന സ്ഥലങ്ങളും പാർക്കിഗ് സ്ഥലങ്ങളുംഅടിയന്തരമായി സുരക്ഷിതമാക്കി എത്രയും വേഗം അവധിക്കാല സഞ്ചാരികൾക്ക് ഉപയോഗപ്പെടുത്താൻ തുറന്നുകൊടുക്കണമെന്ന് കേരള കോൺഗ്രസ് -എംകോന്നി മണ്ഡലം കമ്മിറ്റി ആവശ്യപ്പെട്ടു.

അൽസ്ഹൈമേഴ്സ് ബാധിച്ചു കിടപ്പിലായ രോഗിക്ക് ഹോം നഴ്സിന്‍റെ ക്രൂരമർദനം

കൊടുമൺ: അൽസ്ഹൈമേഴ്സ് ബാധിച്ച് കിടപ്പിലായ രോഗിയെ ശുശ്രൂഷിക്കാൻ നിയോഗിച്ച പുരുഷ ഹോംനഴ്സ് ക്രൂരമായി മർദിച്ച ദൃശ്യങ്ങൾ പുറത്ത്. മർദനത്തെ തുടർന്ന് അബോധാവസ്ഥയിലായ തട്ട, പറപ്പെട്ടി സന്തോഷ് ഭവനിൽ ശശിധരൻ പിള്ളയെ (60) പരുമലയിലെ സ്വകാര്യ ആശുപത്രിയിൽ പ്രവേശിപ്പിച്ചു. വിമുക്തഭടനായ ശശിധരൻ പിള്ള കുറച്ചു നാളുകളായി രോഗം ബാധിച്ച് കിടപ്പിലാണ്. ഒന്നര മാസം മുമ്പാണ് പത്തനാപുരം സ്വദേശി വിഷ്ണുവിനെ അടുരിലെ ഏജൻസി വഴി രോഗിയെ പരിചരിക്കാനായി വീട്ടുകാർ നിയമിച്ചത്. ശശിധരൻ പിള്ളയുടെ ഭാര്യ തഞ്ചാവൂരിലെ ജോലി സ്ഥലത്താണ്. ഏക മകൾ പoനാവശ്യത്തിന് തിരുവനന്തപുരത്തുമാണ്. വീണ് പരിക്കേറ്റുവെന്ന് ഹോംനഴ്സ് പറഞ്ഞതിനെ തുടർന്ന് സ്വകാര്യ ആശുപത്രിയിൽ ചികിൽസ തേടിയപ്പോൾ ഡോക്ടറുടെ സംശയത്തെ തുടർന്ന് ശശിധരൻ പിള്ളയുടെ വീട്ടിലെ സിസി ടിവി ദൃശ്യങ്ങൾ ബന്ധുക്കൾ പരിശോധിച്ചു. ഇതിലാണ് ശശിധരൻപിള്ളയെ വിഷ്ണു നഗ്നനാക്കി മർദിച്ച് തറയിലൂടെ വലിച്ചിഴയ്ക്കുന്ന ഞെട്ടിക്കുന്ന ദൃശ്യങ്ങൾ ബന്ധുക്കൾക്ക് ലഭിച്ചത്. ഇതുസഹിതം കൊടുമൺ പോലീസിൽ പരാതി നൽകിയിട്ടുണ്ട്. ഒന്നര മാസം മുൻപാണ് ഹോം നഴ്സിനെ നിയമിച്ചത്. മൂന്ന് ദിവസം മുൻപാണ് ശശിധരൻ പിള്ളയെ അവശനിലയിൽ കണ്ടെത്തിയത്.

59 പേർ പ്രതികളായ പോക്സോ കേസിൽ കുറ്റപത്രം സമർപ്പിച്ചു

പത്തനംതിട്ട: പോക്‌സോ വിഭാഗത്തിൽ സംസ്ഥാനത്ത് ഏറ്റവും കൂടുതൽ ആളുകൾ പ്രതികളായ പത്തനംതിട്ട പീഡനക്കേസിൽ കുറ്റപത്രം സമർപ്പിച്ചു. പത്തനംതിട്ട അഡീഷണൽ സെഷൻസ് കോടതി ഒന്നിലാണ് കുറ്റപത്രം സമർപ്പിച്ചത്. വിദേശത്തുളള രണ്ടു പ്രതികൾ മാത്രമാണ് ഇനി പിടിയിലാകാനുളളത്. ഇവർക്കായി ലുക്ക് ഔട്ട് നോട്ടീസിറക്കി കാത്തിരിക്കുകയാണ് പോലീസ്. പ്രായപൂർത്തിയാകാത്ത പെൺകുട്ടിയെ പീഡിപ്പിച്ച കേസിൽ അയൽവാസിയും നാട്ടുകാരും സഹപാഠികളും അടക്കം 59 പ്രതികളാണുള്ളത്. അഞ്ചു പോലീസ് സ്റ്റേഷനുകളിലായി 30 കേസുകളിലാണ് കുറ്റപത്രം സമർപ്പിച്ചിരിക്കുന്നത്. കൂട്ട ബത്സംഗം, തട്ടിക്കൊണ്ടുപോകൽ, ലൈംഗിക പീഡനം, പോക്‌സോ നിയമത്തിലെ വിവിധ വകുപ്പുകൾ എന്നിവയാണ് പ്രതികൾക്കെതിരേചുമത്തിയിരിക്കുന്നത്. അഞ്ച് കേസുകളിൽ പ്രതികൾക്കെതിരേ പട്ടിക ജാതി, വർഗ പീഡന നിരോധന നിയമം ചുമത്തിയിട്ടുണ്ട്. സൗഹൃദം നടിച്ച് സമീപവാസിയായ യുവാവാണ് പെൺകുട്ടിയെ ആദ്യം ദുരുപയോഗം ചെയ്തത്. ദൃശ്യങ്ങൾ പകർത്തി പ്രചരിപ്പിച്ചു. പീഡന ദൃശ്യങ്ങൾ കണ്ടവർ പലരും കുട്ടിയുമായി സമൂഹമാധ്യമം വഴി സൗഹൃദം സ്ഥാപിക്കുകയും ദുരുപയോഗം ചെയ്യുകയുമാണ് ഉണ്ടായതെന്ന് കുറ്റപത്രത്തിൽ പറയുന്നു. പ്രതിപട്ടികയിൽ പ്രായപൂർത്തിയാകാത്ത അഞ്ചുപേരുണ്ട്. 17 കേസുകൾ ഇലവുംതിട്ട പോലീസ് സ്റ്റേഷനിൽ മാത്രം രജിസ്റ്റർ ചെയ്തു. പത്തനംതിട്ടയിൽ 12, മലയാലപ്പുഴ, പന്തളം, കല്ലമ്പലം സ്റ്റേഷനുകളിൽ ഓരോ കേസുകളും രജിസ്റ്റർ ചെയ്തു. പത്തനംതിട്ടയിൽ രജിസ്റ്റർ ചെയ്ത ഒരു കേസിലാണ് രണ്ടു പ്രതികളെ പിടികൂടാനുള്ളത്.

കോഴഞ്ചേരി പ്രസംഗം: ഒരു വർഷം നീളുന്ന സാംസ്കാരിക പരിപാടികളെന്ന് മന്ത്രി വീണാ ജോർജ്

കോഴഞ്ചേരി: തിരു-കൊച്ചി മുഖ്യമന്ത്രിയായിരുന്ന സി.കേശവന്‍റെ കോഴഞ്ചേരി പ്രസംഗത്തിന്‍റെ 90-ാം വാർഷികത്തോടനുബന്ധിച്ച് ഒരു വർഷം നീണ്ടു നിൽക്കുന്ന സാംസ്കാരിക പരിപാടി ജില്ലയിൽ സംഘടിപ്പിക്കുമെന്ന് മന്ത്രി വീണാ ജോർജ്. കോഴഞ്ചേരിയിൽ നവീകരിച്ച സി. കേശവൻ സ്ക്വയറിന്റെ ഉദ്ഘാടനം നിർവഹിച്ചു പ്രസംഗിക്കുകയായിരുന്നു മന്ത്രി. കേരളത്തെ ഇന്നത്തെ നിലയിലെത്തിക്കുവാനും ജനതയെ അവകാശങ്ങൾക്കു വേണ്ടി സംസാരിക്കുവാനും പഠിപ്പിച്ച വ്യക്തിത്വമാണ് സി. കേശവൻ. പിന്നാക്ക വിഭാഗങ്ങൾക്ക് തൊഴിൽ ഇടങ്ങളിൽ ഉൾപ്പെടെ നിലനിന്ന അസമത്വങ്ങളും അനീതിയും അധികാര വർഗത്തിന്‍റെ തെറ്റുകളും അദ്ദേഹം തന്‍റെ പ്രസംഗത്തിലൂടെ തുറന്നടിച്ചു. പബ്ലിക് സർവീസ് കമ്മീഷന്‍റെ രൂപീകരണം ഉൾപ്പെടെയുള്ള മാറ്റങ്ങൾക്ക് കാരണമായ കോഴഞ്ചേരി പ്രസംഗത്തിന്‍റെ സ്മരണയ്ക്കായി നിർമിച്ച സി. കേശവൻ സ്‌ക്വയർ ചരിത്രത്തെ ഓർമിപ്പിക്കുമെന്നും മന്ത്രി കൂട്ടിച്ചേർത്തു . റീ ബിൽഡ് കേരള പദ്ധതിയിൽ ഉൾപ്പെടുത്തി 20 ലക്ഷം രൂപ വിനിയോഗിച്ചാണ് സ്മാരകം നവീകരിച്ചത്. 2018 പ്രളയത്തെ തുടർന്ന് ശോചനാവസ്ഥയിൽ ആയിരുന്നു. ഇലന്തൂർ ബ്ലോക്ക്‌ പഞ്ചായത്ത്‌ പ്രസിഡന്‍റ് ജെ. ഇന്ദിരാദേവി അധ്യക്ഷത വഹിച്ചു. എസ്എൻഡിപി യോഗം ജനറൽ സെക്രട്ടറി വെള്ളാപ്പള്ളി നടേശൻ മുഖ്യാഥിതിയായിരുന്നു. എൽഐ ഡി ആൻഡ് ഇഡബ്ല്യു അസ്സിസ്റ്റന്റ് എൻജിനിയർ ജി. വിജയകൃഷ്ണൻ റിപ്പോർട്ട് അവതരിപ്പിച്ചു. മുൻ എംഎൽഎ കെ. സി. രാജഗോപാൽ, കോഴഞ്ചേരി ഗ്രാമപഞ്ചായത്ത് മുൻ പ്രസിഡന്റ്‌ വിക്ടർ ടി. തോമസ്, ഗ്രാമ പഞ്ചായത്ത് അംഗങ്ങളായ ബിജിലി പി. ഈശോ, മോഹൻ ബാബു, എൽഐഡി ആൻഡ് ഇഡബ്ല്യു എക്‌സിക്യൂട്ടീവ് എൻജിനിയർ എസ്. അനിത, എസ്എൻഡിപി യോഗം കോഴഞ്ചേരി താലൂക്ക് യൂണിയൻ പ്രസിഡന്‍റ് മോഹൻ ബാബു, വൈസ് പ്രസിഡന്‍റ് വിജയൻ കാക്കനാടൻ എന്നിവർ പ്രസംഗിച്ചു.

പ്രചോദിനി 2025

കാഞ്ഞിരപ്പള്ളി: രൂപത മാതൃവേദിയുടെ നേതൃത്വത്തിൽ അമ്മമാരുടെ സമഗ്രമായ വളർച്ച ലക്ഷ്യമാക്കി ഒരു വർഷം നീണ്ടുനിൽക്കുന്ന പ്രചോദിനി 2025 പൊടിമറ്റം നിർമല റിന്യൂവൽ സെന്‍ററിൽ നടത്തി. വികാരി ജനറാൾ ഫാ. ബോബി അലക്‌സ് മണ്ണംപ്ലാക്കൽ ഉദ്ഘാടനം ചെയ്തു. രൂപത മാതൃവേദി പ്രസിഡന്‍റ് ജിജി ജേക്കബ് അധ്യക്ഷത വഹിച്ചു. രൂപത മാതൃവേദി ഡയറക്‌ടർ ഫാ. മാത്യു ഓലിക്കൽ, ഫാ. വർഗീസ് കാക്കല്ലിൽ, രൂപത അനിമേറ്റർ സിസ്റ്റർ ജ്യോതി മരിയ സിഎസ്എൻ, ജുബി വേഴമ്പശേരി, ബ്രദർ കെവിൻ നീറണാക്കുന്നേൽ എന്നിവർ പ്രസംഗിച്ചു. രൂപതയുടെ വിവിധ ഇടവകകളിൽ നിന്നുള്ള മാതാക്കൾ പരിശീലന പരിപാടിയിൽ പങ്കെടുക്കുകയും രൂപത, ഫൊറോന എക്‌സിക്യൂട്ടീവ് അംഗങ്ങൾ പരിപാടിക്ക് നേതൃത്വം നൽകുകയും ചെയ്തു.

അസാധാരണ നിലപാടുകളിലൂടെ ഫ്രാൻസിസ് മാർപാപ്പ ശ്രദ്ധേയനായി: എം.എ. ബേബി

പത്തനംതിട്ട: മനുഷ്യ ജീവിതവും സമൂഹവും തുടങ്ങി വിവിധ പ്രശ്നങ്ങളിൽ സുവ്യക്തമായ നിലപാടുകൾ ആവിഷ്കരിച്ച് ഫ്രാൻസിസ് മാർപാപ്പ അസാധാരണ നിലപാടുകളിൽ എന്നും ശ്രദ്ധേയനായിരുന്നുവെന്ന് സിപിഎം അഖിലേന്ത്യ ജനറൽ സെക്രട്ടറി എം.എ. ബേബി. പത്തനംതിട്ട പ്രസ് ക്ലബിൽ മീറ്റ് ദ പ്രസ് പരിപാടിയിൽ പങ്കെടുക്കുകയായിരുന്നു അദ്ദേഹം. വേദനിക്കുന്നവരോടും നിരാലംബരോടും ന്യൂനപക്ഷങ്ങളോടും ചേർന്നു നിന്നുകൊണ്ടുള്ളതായിരുന്നു അദ്ദേഹത്തിന്‍റെ നിലപാടുകൾ. പട്ടിണി കിടന്ന് തെരുവിൽ മരിക്കുന്ന മനുഷ്യനെക്കുറിച്ച് മാധ്യമങ്ങളൊന്നും പറയുന്നില്ല, മറിച്ച് ഓഹരി കമ്പോളത്തിൽ ഓഹരി വിലനിലവാരത്തിൽ ചെറിയ ഏറ്റക്കുറച്ചിലുകളുണ്ടായാൽ മാധ്യമങ്ങൾ വലിയതോതിൽ ചർച്ച ചെയ്യുന്നതായി മാർപാപ്പ ഒരു പ്രസംഗത്തിൽ ചൂണ്ടിക്കാട്ടി. സ്ത്രീകളുടെ പുരോഗതിക്കായി കൃത്യമായ ഇടപെടലുകൾ നടത്തിയാളാണ് ഫ്രാൻസിസ് മാർപാപ്പയെന്ന് എം.എ. ബേബി പറഞ്ഞു. സ്വതന്ത്ര രാഷ്ട്രമായ വത്തിക്കാൻ നഗരത്തിൽ ആദ്യമായി ഭരണച്ചുമതല സ്ത്രീക്കു നൽകിയ അദ്ദേഹം സ്ത്രീകളെ നേതൃരംഗത്തേക്ക് ഉയർത്തിക്കൊണ്ടു വന്നു. ഫ്രാൻസിസ് മാർപാപ്പയുടെ നിര്യാണം പുരോഗമന പ്രസ്ഥാനങ്ങൾക്ക് തീരാ നഷ്ടമാണ്. സിപിഎമ്മിന്‍റെ അഖിലേന്ത്യാ തലത്തിലെ പ്രസിദ്ധീകരണമായ പീപ്പിൾസ് ഡെമോക്രസിയിൽ ഫ്രാൻസിസ് മാർപാപ്പയെക്കുറിച്ച് ലോകപ്രശസ്ത ചിന്തകനായ പ്രഫ. പ്രഭാത് പട്നായിക് ലേഖനം എഴുതി. മാർപാപ്പ മുതലാളിത്തതിന് എതിര് എന്നായിരുന്നു ലേഖനത്തിന്‍റെ ശീർഷകം. ഫ്രാൻസിസ് മാർപാപ്പയെ കുറിച്ച് താനും ചിന്താ വാരികയിൽ ലേഖനം എഴുതിയിട്ടുണ്ടെന്ന് എം.എ ബേബി പറഞ്ഞു. ചുമതല ഏറ്റതിനു പിന്നാലെ പോപ്പ് പുറത്തിറക്കിയ ആദ്യ പ്രസ്താവനകളിൽ തന്നെ ലോകത്തോടുള്ള അദ്ദേഹത്തിന്‍റെ സന്ദേശവും നിലപാടുകളും വ്യക്തമായിരുന്നുവെന്നും ബേബി അഭിപ്രായപ്പെട്ടു.

പ്രത്യാശയുടെ തീര്‍ഥാടകന്‍ ഫ്രാന്‍സിസ് പാപ്പായ്ക്ക് പ്രണാമമര്‍പ്പിച്ച് ചങ്ങനാശേരി അതിരൂപത

ചങ്ങനാശേരി: പ്രത്യാശയുടെ തീര്‍ഥാടകന്‍ യശഃശരീരനായ ഫ്രാന്‍സിസ് പാപ്പായ്ക്ക് പ്രണാമമര്‍പ്പിച്ച് ചങ്ങനാശേരി അതിരൂപത. സെന്‍റ് മേരീസ് മെത്രാപ്പോലീത്തന്‍പള്ളിയില്‍ നടന്ന വിശുദ്ധകുര്‍ബാനയ്ക്കും അനുസ്മരണ ശുശ്രൂഷകള്‍ക്കുംശേഷം പാരിഷ്ഹാളില്‍ സംഘടിപ്പിച്ച സമ്മേളനം ഓര്‍ത്തഡോക്‌സ് സഭയുടെ പരമാധ്യക്ഷന്‍ ബസേലിയോസ് മാര്‍ത്തോമ്മാ മാത്യൂസ് തൃതീയന്‍ കാതോലിക്കാ ബാവ ഉദ്ഘാടനം ചെയ്തു. ഈശോയുടെ വിനയവും സ്‌നേഹവും സ്വജീവിതത്തിലൂടെ ലോകത്തെ പഠിപ്പിച്ച ക്രിസ്തുശിഷ്യനാണ് ഫ്രാന്‍സിസ് പാപ്പായെന്ന് കാതോലിക്കാ ബാവ അനുസ്മരിച്ചു. ജീവിതത്തിന്‍റെ വ്യത്യസ്തമായ അനുഭവങ്ങളിലും പ്രതിസന്ധികളിലും ദൈവികകരുണയില്‍ ആഴമായി ആശ്രയിച്ച് ജീവിച്ച മഹാമനുഷ്യനായിരുന്നു പാപ്പായെന്നും അദ്ദേഹത്തെ രണ്ടുതവണ സന്ദര്‍ശിക്കാനും സഹോദര തുല്യമായ സ്‌നേഹം അനുഭവിക്കാനും തനിക്കു സാധിച്ചുവെന്നും കാതോലിക്കാ ബാവ കൂട്ടിച്ചേര്‍ത്തു. ആര്‍ച്ച്ബിഷപ് മാര്‍ തോമസ് തറയില്‍ അധ്യക്ഷത വഹിച്ചു. ഈശോ എല്ലാവരുടേതുമാണെന്നും സഭ എല്ലാവരുടേതുമാകണമെന്നും പഠിപ്പിച്ച പാപ്പാ വിശാലമായ മാനവിക ദര്‍ശനങ്ങളുടെ ഉടമയായിരുന്നുവെന്നും ആര്‍ച്ച്ബിഷപ് അഭിപ്രായപ്പെട്ടു. ആര്‍ച്ച്ബിഷപ് മാര്‍ ജോസഫ് പെരുന്തോട്ടം, മാര്‍ത്തോമ്മാ സഭയുടെ പ്രതിനിധി ആര്‍ച്ച്ബിഷപ് മാത്യൂസ് മാര്‍ സെറാഫിം, യാക്കോബായ സഭാപ്രതിനിധി ആര്‍ച്ച്ബിഷപ് തിമോത്തിയോസ് മാര്‍ മാത്യൂസ്, സിഎസ്‌ഐ സഭാപ്രതിനിധി ബിഷപ് ഡോ. തോമസ് സാമുവല്‍, കുറിച്ചി അദ്വൈത വിദ്യാശ്രമം അംഗം സ്വാമി വിശാലാനന്ദ, പുതൂര്‍പള്ളി മുസ്‌ലിം ജമാ അത്ത് പ്രസിഡന്‍റ് ടി.പി. അബ്ദുള്‍ ഹമീദ്, അതിരൂപതാ വികാരി ജനറാള്‍ മോണ്‍. ആന്‍റണി എത്തക്കാട്ട്, പാസ്റ്ററല്‍ കൗണ്‍സില്‍ ജോയിന്‍റ് സെക്രട്ടറി ബിജു സെബാസ്റ്റ്യന്‍ എന്നിവര്‍ പ്രസംഗിച്ചു. അതിരൂപത വികാരി ജനറാള്‍മാരായ മോണ്‍. മാത്യു ചങ്ങങ്കരി, മോണ്‍. സ്‌കറിയ കന്യാകോണില്‍, പ്രൊക്യുറേറ്റര്‍ ഫാ. ആന്‍റണി മാളിയേക്കല്‍, ചാന്‍സലര്‍ ഫാ. ജോര്‍ജ് പുതുമനമൂഴിയില്‍, കത്തീഡ്രല്‍ വികാരി ഫാ. ജോസഫ് വാണിയപുരയ്ക്കല്‍ എന്നിവര്‍ നേതൃത്വം നല്‍കി. അതിരൂപതയിലെ വൈദികര്‍, സന്യസ്തര്‍, അത്മായപ്രതിനിധികള്‍ തുടങ്ങി വലിയ വിശ്വാസിസമൂഹം അനുസ്മരണ ചടങ്ങില്‍ പങ്കെടുത്തു.

മാർപാപ്പയ്ക്ക് ആദരാഞ്ജലി അർപ്പിച്ച് തിരുവല്ല നഗരം

തിരുവല്ല: മനുഷ്യർ പരസ്പരം സ്നേഹിക്കുവാനും, ക്ഷമിക്കുവാനും ആഹ്വാനം ചെയ്ത വലിയ ഇടയനായിരുന്നു ഫ്രാൻസിസ് മാർപാപ്പയെന്ന് ഡോ.തിയഡോഷ്യസ് മാർത്തോമ്മ മെത്രാപ്പോലീത്ത. തിരുവല്ല അതിരൂപതയുടെയും പൗരാവലിയുടെയും ആഭിമുഖ്യത്തിൽ എസ് സിഎസ് അങ്കണത്തിൽ നിന്നും സെന്‍റ് ജോൺസ് മെത്രാപ്പോലീത്തൻ കത്തീഡ്രലിലേക്ക് നടത്തിയ ഫ്രാൻസിസ് മാർപാപ്പ അനുസ്മരണ മൗന ജാഥയിൽ പ്രാരംഭ സന്ദേശം നൽകുകയായിരുന്നു മെത്രാപ്പോലീത്ത. സമാധാനത്തിന്‍റെ സന്ദേശ വാഹകനായി ലോകമെന്പാടും സഞ്ചരിച്ച വ്യക്തിയായിരുന്നു ഫ്രാൻസിസ് മാർപാപ്പ. അശരണർക്കുവേണ്ടി എന്നും നിലകൊള്ളുകയും ലോകം മുഴുവനും സമാധാനം നിലനിർത്തണമെന്ന് ആഗ്രഹിക്കുകയും ചെയ്ത വ്യക്തിത്വമായിരുന്നു അദ്ദേഹത്തിന്‍റേത്. മാർപാപ്പയ്ക്ക് തിരുവല്ല നഗരത്തിന്‍റെ ആദരാഞ്ജലി അർപ്പിച്ച് നൂറു കണക്കിനാളുകൾ അണിനിരന്ന മൗനജാഥ സെന്‍റ് ജോൺസ് കത്തീഡ്രലിൽ സമാപിച്ചു. തിരുവല്ല അതിരൂപതാധ്യക്ഷൻ ആർച്ച് ബിഷപ് ഡോ. തോമസ് മാർ കൂറിലോസ് അധ്യക്ഷത വഹിച്ച സമ്മേളനത്തിൽ ബിഷപ് ഗീവർഗീസ് മാർ അപ്രേം, ആന്‍റോ ആന്‍റണി എംപി, ശ്രീരാമകൃഷ്ണ ആശ്രമം മഠധിപതി സ്വാമി നിർവിണാനന്ദ, മാത്യു ടി. തോമസ് എംഎൽഎ, ഓർത്തഡോക്സ് സഭ സെക്രട്ടറി ബിജു ഉമ്മൻ, പ്രഫ. ജേക്കബ് എം. ഏബ്രഹാം, ബിജു പാലത്തിങ്കൽ, സിറിയക് ജോൺ എന്നിവർ പ്രസംഗിച്ചു. അതിരൂപത വികാരി ജനറാൾ റവ. ഡോ. ഐസക് പറപ്പള്ളിൽ, മുൻ എംഎഎ ജോസഫ് എം.പുതുശേരി, ഫാ. മാത്യു പുനക്കുളം, നഗരസഭ വൈസ് ചെയർമാൻ ജിജി വട്ടശേരി, മുൻ ചെയർമാൻ ആർ.ജയകുമാർ, ഫാ.സന്തോഷ് അഴകത്ത് , ഫാ. ഈപ്പൻ പുത്തൻപറമ്പിൽ, ഫാ. ബിനീഷ് കാഞ്ഞിരത്തുംപറമ്പിൽ, ഷിബു പുതുക്കേരിൽ, സജി എബ്രഹാം, ഫാ. ഫിലിപ്പ് തയില്യം , ബാബു കല്ലിങ്കൽ, ഷാജി മാത്യു, എം.കെ. വർക്കി, ജിനു തുമ്പുംകുഴി, എജി പറപ്പാട്ട്, ബിജു ജോർജ്, ഫാ. വർഗീസ് ചാമക്കാലയിൽ, ഫാ. തോമസ് പാറക്കൽ എന്നിവർ നേതൃത്വം നൽകി. മാർപാപ്പ അനുസ്മരണ യാത്ര ഇന്ന് റാന്നിയിൽ റാന്നി: കാത്തലിക് ഫെലോഷിപ്പിന്‍റെയും റാന്നി പൗരാവലിയുടെയും സംയുക്താഭിമുഖ്യത്തിൽ ഫ്രാൻസിസ് മാർപ്പാപ്പ അനുസ്മരണ യാത്രയും സമ്മേളനവും ഇന്ന് റാന്നിയിൽ നടക്കും. രാവിലെ 9.30ന് നീരാട്ടുകാവ് സെന്‍റ് തോമസ് ദേവാലയത്തിൽ നിന്നുംആരംഭിക്കുന്ന അനുസ്മരണയാത്ര ടൗൺ ചുറ്റി ചെത്തോങ്കര ക്രിസ്തുരാജ ദേവാലയത്തിൽ സമാപിക്കും. തുടർന്നു നടക്കുന്ന അനസ്മരണ സമ്മേളനത്തിൽ പ്രമോദ് നാരായൺ എംഎൽഎ, ഡിവൈഎസ്പി ആർ. ജയരാജ് തുടങ്ങിയവർ വിശിഷ്ടാതിഥികളായി പങ്കെടുക്കും. റാന്നി മേഖലയിലെ വിവിധ ഇടവകകളിൽ നിന്നുള്ള വൈദികരും അല്മായ പ്രതിനിധികളും നേതൃത്വം നൽകും.

ഹൃദയത്തിൽ ദൈവത്തിന്‍റെ കൈയൊപ്പുമായി ജീവിച്ച ഫ്രാൻസിസ് മാർപാപ്പ

വാസ്തുവിദ്യാ ഗുരുകുലത്തിന് ഭാരതീയജ്ഞാന പദവി നഷ്ടമായി

പുനഃ പ്രതിഷ്ഠയും സുവർണ ജൂബിലി സമാപനവും

റാന്നി: ഇടമുറി എബനേസർ മാർത്തോമ്മ ഇടവകയുടെ പുനഃപ്രതിഷ്ഠാ ശുശ്രൂഷയും സുവർണ ജൂബിലി സമാപനവും ഇന്നു നടക്കും. റാന്നി - നിലയ്ക്കൽ ഭദ്രാസനാധിപൻ ഡോ.ജോസഫ് മാർ ബർണബാസ് സഫ്രഗൻ മെത്രാപ്പോലീത്തയുടെ മുഖ്യകാർമികത്വത്തിൽ കുർബാനയേ തുടർന്ന് അഞ്ചിന് പൊതു സമ്മേളനം.

മെഗാ മ്യൂസിക്കൽ ഷോ 27ന്

തിരുവല്ല: ലയൺസ് ക്ലബിന്‍റെ വജ്രജൂബിലി ആഘോഷങ്ങളുടെ ഭാഗമായി 27 ന് വൈകുന്നേരം 6.30ന് മെഗാ മ്യൂസിക്കൽ ഷോ നടക്കും. ചീഫ് വിപ്പ് ഡോ. എൻ.ജയരാജ് ഉദ്ഘാടനം ചെയ്യും. ലയൺസ് ഡിസ്ട്രിക്‌ട് ഗവർണർ ആർ. വെങ്കിടാചലം ഭദ്രദീപം തെളിക്കും. തിരുവല്ല പ്രസിഡന്‍റ് കെ.ജി. തോമസ് കരിക്കനേത്ത്, ജൂബിലി കൺവീനർ ചെറിയാൻ പോളച്ചിറയ്ക്കൽ, സെക്രട്ടറി ജോണി ജോർജ് എന്നി വർ പ്രസംഗിക്കും.

ഈസ്റ്റർ സ്നേഹസംഗമം സംഘടിപ്പിച്ചു

കവിയൂർ: വൈഎംസിഎ തിരുവല്ല സബ് - റീജിയൻ സംഘടിപ്പിച്ച ഈസ്റ്റർ സ്നേഹ സംഗമം ദേശീയ ട്രഷറാർ റെജി ജോർജ് ഉദ്ഘാടനം ചെയ്തു. ചെയർമാൻ ജോജി പി. തോമസ് അധ്യക്ഷത വഹിച്ചു. മാത്യൂസ് മാർ സിൽവാനിയോസ് മുഖ്യപ്രഭാഷണം നടത്തി. റീജണൽ യൂത്ത് വർക്ക് കമ്മിറ്റി ചെയർമാൻ ലിനോജ് ചാക്കോ, മുൻ സബ് - റീജിയൻ ചെയർമാൻമാരായ വർഗീസ് ടി. മങ്ങാട്, ജോസഫ് നെല്ലാനിക്കൽ, കെ.സി. മാത്യു, ജനറൽ കൺവീനർ സുനിൽ മറ്റത്ത്, വൈസ് ചെയർമാൻ നിതിൻ വർക്കി ഏബ്രഹാം, വൈഎംസിഎ പ്രസിഡന്‍റ് ജേക്കബ് മാത്യു, പ്രോഗ്രാം കൺവീനർ സജി വിഴലയിൽ, ബ്ലോക്ക് പഞ്ചായത്ത് അംഗം ജോസഫ് ജോൺ, ഭാരവാഹികളായ കുര്യൻ ചെറിയാൻ, റോയി വർഗീസ്, എലിസബേത്ത് കെ. ജോർജ്, സജി മാമ്പ്രക്കഴിയിൽ, റെജി പോൾ എന്നിവർ പ്രസംഗിച്ചു.

അറസ്റ്റ് ചെയ്തു

അടൂർ: ഗുരുമന്ദിരത്തിന്‍റെ പ്രതിഷ്ഠാ വാര്‍ഷികത്തോടനുബന്ധിച്ച് പ്രസാദമായി വിതരണം ചെയ്ത ഉണ്ണിയപ്പം മോശമാണെന്ന് ആരോപിച്ച് അസഭ്യം പറഞ്ഞുവെന്ന പരാതിയിൽ യുവാവ് അറസ്റ്റിൽ. ഏനാത്ത് കടമ്പനാട് വടക്ക് പാലത്തുണ്ടില്‍ വീട്ടില്‍ ഷൈജുവാണ് അറസ്റ്റിലായത്. 17 നായിരുന്നു പ്രതിഷ്ഠാ വാര്‍ഷികം നടന്നത്. അന്നു പ്രസാദമായി വിതരണം ചെയ്ത ഉണ്ണിയപ്പം മോശമാണെന്ന് പറഞ്ഞാണ് ഇയാള്‍, ശാഖാ സെക്രട്ടറി കടമ്പനാട് വടക്ക് നെല്ലിമുകള്‍ അരുണ്‍ നിവാസില്‍ അരുണ്‍ സുദര്‍ശനനെ ഫോണിലൂടെ അസഭ്യം വിളിച്ചത്. തുടര്‍ന്ന് വീട്ടിലെത്തി കൊല്ലുമെന്ന് ഭീഷണിപ്പെടുത്തുകയും ചെയ്തതായും പറയുന്നു. എസ്ഐ ആർ. ശ്രീകുമാര്‍, സി പിഒ ഷാനു പോലീസ് നടപടിക്ക് നേതൃത്വം നല്‍കി.

ശതാബ്ദി ആഘോഷവും മതസൗഹാർദ സമ്മേളനവും നാളെ

റാന്നി: റാന്നി കരിമ്പനാംകുഴി സെന്‍റ് ആൻഡ്രൂസ് മാർത്തോമ്മ ഇടവക ശതാബ്ദി ആഘോഷം 'അഗാപ്പെ - 2025' നാളെ വിവിധ പരിപാടികളോടെ ആഘോഷിക്കും. ശതാബ്ദി ആഘോഷത്തിന്‍റെ ഭാഗമായി മതസൗഹാർദ്ദ സമ്മേളനവും, ജീവകാരുണ്യ പ്രവർത്തനങ്ങളുടെ ഉദ്ഘാടനവും നടത്തും. റാന്നി നിലയ്ക്കൽ ഭദ്രാസനാധിപൻ ഡോ. ജോസഫ് മാർ ബർണബാസ് സഫ്രഗൻ മെത്രാപ്പോലീത്ത അധ്യക്ഷത വഹിക്കും, ശാന്തിഗിരി ആശ്രമം ജനറൽ സെക്രട്ടറി സ്വാമി ഗുരുരത്നം ജ്ഞാന തപസ്വി മുഖ്യപ്രഭാഷണം നടത്തും. പത്തനംതിട്ട രൂപതാധ്യക്ഷൻ ഡോ. സാമുവേൽ മാർ ഐറേനിയോസ്, ക്നാനായ അതിഭദ്രാസനം റാന്നി മേഖല മെത്രാപ്പോലീത്ത കുര്യാക്കോസ് മാർ ഇവാനിയോസ്, ആന്‍റോ ആന്‍റണി എംപി, പ്രമോദ് നാരായൺ എംഎൽഎ, ഹരി പത്തനാപുരം, ഫാ.എ.ജെ. ക്ലീമിസ്, സംവിധായകൻ കെ. മധു തുടങ്ങിയവർ പ്രസംഗിക്കും. ശതാബ്ദി കാരുണ്യ പദ്ധതിയുടെ ഭാഗമായി കിഡ്നി രോഗികൾക്കായുള്ള ധനസഹായ വിതരണത്തിന്‍റെ ഉദ്ഘാടനം തോമസ് ഫിലിപ്പ് ഡെൽറ്റ നിർവഹിക്കും.

ഫ്രാൻസിസ് മാർപാപ്പ അനുസ്മരണം ഇന്ന് തിരുവല്ലയിൽ

തിരുവല്ല: കാലം ചെയ്ത ഫ്രാൻസിസ് മാർപാപ്പയോടുള്ള ആദരസൂചകമായി തിരുവല്ല അതിഭദ്രാസനത്തിന്‍റെയും തിരുവല്ല പൗരാവലിയുടെയും ആഭിമുഖ്യത്തിൽ അനുസ്മരണ പരിപാടികൾ ഇന്ന് നടക്കും. വൈകുന്നേരം നാലിന് എസ്‌സിഎസ് കാമ്പസിൽ നിന്ന് ആരംഭിക്കുന്ന മൗനജാഥയുടെ ആരംഭത്തിൽ ഡോ. തിയഡോഷ്യസ് മാർത്തോമ്മ മെത്രാപ്പോലീത്ത ആമുഖ സന്ദേശം നൽകും. തുടർന്നുള്ള മൗനജാഥ എസ് സിഎസ് കാമ്പസിൽനിന്ന് ആരംഭിച്ച് സെന്‍റ് ജോൺസ് മെത്രാപ്പോലീത്തൻ കത്തീഡ്രലിൽ സമാപിക്കും. തുടർന്ന് ആർച്ച് ബിഷപ് ഡോ. തോമസ് മാർ കൂറിലോസിന്‍റെ അധ്യക്ഷതയിൽ നടക്കുന്ന അനുസ്മരണ യോഗത്തിൽ സിഎസ്ഐ ബിഷപ് തോമസ് സാമുവൽ, ബിഷപ് ഗീവർഗീസ് മാർ അപ്രേം, മാത്യു ടി. തോമസ് എംഎൽഎ, സ്വാമി നിർവിണാനന്ദ, ഇമാം ഹാഫിസ് മുഹമ്മദ് റിഫാൻ ബഖവി, ഓർത്തഡോക്സ് സഭ അസോസിയേഷൻ സെക്രട്ടറി ബിജു ഉമ്മൻ, നഗരസഭാധ്യക്ഷ അനു ജോർജ് എന്നിവർ പ്രസംഗിക്കും. മുഖ്യ വികാരി ജനറൽ റവ. ഡോ. ഐസക് പറപ്പള്ളിൽ, കത്തീഡ്രൽ വികാരി ഫാ. മാത്യു പുനക്കുളം, ഫാ. ചെറിയാൻ കുരിശുമൂട്ടിൽ, ബിജു പാലത്തിങ്കൽ, സിറിയക് വി ജോൺ എന്നിവരുടെ നേതൃത്വത്തിൽ വിവിധ കമ്മിറ്റികൾ പ്രവർത്തിക്കുന്നു.

പുതമൺ പാലത്തിന്‍റെ നിർമാണം ഓണത്തിനു മുന്പ് പൂർ‌ത്തിയാക്കും

റാന്നി: പുതമൺ പാലത്തിന്‍റെ നിർമാണം ഓണത്തിനു മുമ്പ് പൂർത്തിയാക്കണമെന്ന് പ്രമോദ് നാരായൺ എംഎൽഎ നിർദേശം നൽകി. പാലം നിർമാണം എംഎൽഎ നേരിട്ടു സന്ദർശിച്ച് നിർമാണ പുരോഗതി വിലയിരുത്തി. നിർമാണം പൂർത്തിയാക്കുന്നതിനു വേണ്ട നടപടി സ്വീകരിക്കണമെന്നാണ് കരാറുകാരനോട് എംഎൽഎ നിർദ്ദേശിച്ചത്. 2.61 കോടി രൂപ ചെലവഴിച്ച് നിർമിക്കുന്ന പാലത്തിന്‍റെ ആറു പൈലുകളും മൂന്ന് പൈൽ ക്യാമ്പുകളും പൂർത്തിയായിട്ടുണ്ട്. ഇരുകരകളിലെയും അബട്മെന്‍റുകളുടെയും നടുക്കുള്ള പിയറിന്‍റെയും നിർമാണം പുരോഗമിക്കുകയാണ്. 35 ശതമാനം നിർമാണ ജോലികളും പൂർത്തീകരിച്ചു. എട്ടു മീറ്റർ വീതം നീളമുള്ള രണ്ട് സ്പാനുകളോടു കൂടിയ പാലത്തിന് വാഹന യാത്രയ്ക്കായി 7.50 മീറ്റർ വീതി ഉണ്ടാകും. കൂടാതെ 1.5 മീറ്റർ വീതിയിൽ ഇരുവശത്തും നടപ്പാതയും നിർമിക്കും. ആകെ 11 മീറ്ററാണ് പാലത്തിന്‍റെ വീതി കോഴഞ്ചേരി - റാന്നി റോഡിൽ പുതമൺ പെരുന്തോടിന് ഉണ്ടായിരുന്ന 70 വർഷത്തിലധികം പഴക്കമുള്ള പാലം അപകടാവസ്ഥയിൽ ആയതിനേത്തുടർന്നാണ് ഇപ്പോൾ പുതിയ പാലം നിർമിക്കുന്നത്. യാത്രക്കാർക്ക് 30 ലക്ഷം രൂപ ചെലവഴിച്ച് താത്കാലിക പാതയും ഒരുക്കി നൽകിയിട്ടുണ്ട്. പാലം നിർമാണം നേരത്തേ ടെൻഡർ ചെയ്തിരുന്നെങ്കിലും എസ്റ്റിമേറ്റ് തുകയുടെ 20 ശതമാനം അധികം തുകയാണ് കരാറുകാരൻ നൽകിയതെന്ന കാരണത്താൽ നിർമാണം മൂന്നു തവണ ടെൻഡർ ചെയ്യേണ്ടി വന്നു. പിന്നീട് പ്രത്യേക മന്ത്രിസഭാ യോഗമാണ് പുതിയ തുകയ്ക്ക് നിർമാണാനുമതി നൽകിയത്.

വലിയപതാൽ ഉന്നതയുടെ വികസനം; ഊരുകൂട്ടം യോഗം ചേർന്നു

റാന്നി: വലിയ പതാൽ പട്ടികവർഗ ഉന്നതയുടെ വികസന പ്രവർത്തനങ്ങൾ ചർച്ച ചെയ്ത് പദ്ധതി തയാറാക്കുന്നതിന് ഉപഭോക്താക്കളുടെ ഊരുകൂട്ടം ചേർന്നു. ഒരുകോടി രൂപയാണ് കോളനിയുടെ വികസനത്തിനായി അംബേദ്കർ സെറ്റിൽമെന്‍റ് പദ്ധതി വഴി വകയിരുത്തിയിരിക്കുന്നത്. വീടുകളുടെ അറ്റകുറ്റപ്പണികൾ, വീടുകൾക്ക് സംരക്ഷണഭിത്തി, റോഡ് നിർമാണം, വൈദ്യുതീകരണം തുടങ്ങിയ പൊതു ആവശ്യങ്ങൾക്കാണ് ഫണ്ട് വിനിയോഗിക്കുക. ജില്ലാ നിർമിതി കേന്ദ്രം മുഖേനയാണ് പദ്ധതി നടപ്പാക്കുന്നത്. യോഗം പ്രമോദ് നാരായൺ എംഎൽഎ ഉദ്ഘാടനം ചെയ്തു. ഗ്രാമപഞ്ചായത്ത് പ്രസിഡന്‍റ് സോണിയ മനോജ് അധ്യക്ഷത വഹിച്ചു.

കുരിശുമല തീർ‌ഥാടന സമാപനം ഞായറാഴ്ച

ചുങ്കപ്പാറ: മധ്യതിരുവതാംകൂറിലെ കുരിശുമല തീർഥാടന കേന്ദ്രമായ ചങ്ങനാശേരി അതിരൂപതയുടെ നിർമലപുരം - കരുവള്ളിക്കാട്ട് സെന്‍റ് തോമസ് കുരിശുമല തീർഥാടനത്തിനു പുതുഞായറാഴ്ച തിരുനാളോടെ 27നു സമാപനമാകും. അന്പതു നോന്പ് കാലയളവിൽ വിവിധ ഇടവകകളുടെയും ഭക്തസംഘടനകളുടെയും നേതൃത്വത്തിൽ വിവിധ ദിനങ്ങളിൽ ആയിരകണക്കിനാളുകളാണ് മലമുകളിലേക്ക് കുരിശിന്‍റെ തീർ‌ഥാടനം നടത്തിയത്. പുതുഞായറാഴ്ച രാവിലെ ഒമ്പതിന് മലമുകളിലെ ചാപ്പലിൽ ചങ്ങനാശേരി അതിരൂപത പ്രൊക്കുറേറ്റർ ഫാ. ജയിംസ് ആന്‍റണി മാളിയേക്കൽ വിശുദ്ധ കുർബാന അർപ്പിക്കും.ഫാ. ജേക്കബ് വട്ടക്കാട്ട് വചന സന്ദേശം നൽകും. തുടർന്ന് സമാപന ആശിർവാദം നേർച്ച സമർപ്പണത്തോടെ ഈ വർഷത്തെ കുരിശുമല തീർഥാടനത്തിനു സമാപനമാകും. തീർഥാടന കേന്ദ്രം ഫാ. മോബൻചുരവടിയുടെ നേതൃത്വത്തിൽ വിവിധ കമ്മിറ്റി ഭാരവാഹികൾ തീർഥാടന ക്രമീകരണങ്ങൾക്കു ചുക്കാൻ പിടിക്കുന്നു

ഫേസ്ബുക്ക് പരിചയം; വീട്ടമ്മയില്‍നിന്ന് 6.81 ലക്ഷം രൂപ തട്ടിയ യുവാവ് അറസ്റ്റില്‍

മല്ലപ്പള്ളി: ഫേസ്ബുക്കില്‍ സൃഷ്ടിച്ച പ്രത്യേകഗ്രൂപ്പിലൂടെ പരിചയപ്പെട്ട വീട്ടമ്മയില്‍നിന്നു ലക്ഷങ്ങള്‍ തട്ടിയ യുവാവിനെ കീഴ്‌വായ്പൂര് പോലീസ് അറസ്റ്റ് ചെയ്തു. കോഴിക്കോട് മാവൂര്‍ കന്നിപ്പറമ്പ് പെരുംകൊല്ലം തൊടി വീട്ടില്‍ സി. കെ. പ്രജിത്താണ് (39) പിടിയിലായത്. തൂവല്‍ കൊട്ടാരം എന്ന പേരിലുള്ള ഫേസ്ബുക്ക് ഗ്രൂപ്പിലൂടെ പരിചയപ്പെട്ട ആനിക്കാട് സ്വദേശിനിയായ 52 കാരിയില്‍നിന്നു പലതവണയായി 6,80,801 രൂപ പ്രജിത്ത് കൈക്കലാക്കിയെന്നാണ് പരാതി. ഗ്രൂപ്പിന്‍റെ അഡ്മിന്‍ ആയ ഇയാൾ പല ആവശ്യങ്ങള്‍ പറഞ്ഞും, തിരിച്ചുകൊടുക്കാമെന്ന് ഉറപ്പുകൊടുത്തുമാണ് ഇത്രയും തുക സ്വന്തം അക്കൗണ്ടിലേക്കും ഇയാള്‍ നല്‍കിയ മറ്റ് അക്കൗണ്ടുകളിലേക്കും ഗൂഗിള്‍ പേ ചെയ്തു വീട്ടമ്മയില്‍നിന്നു വാങ്ങിയത്. സാമ്പത്തിക തട്ടിപ്പിനിരയായ വീട്ടമ്മ 2024 നവംബര്‍ 24ന് കീഴ്‌വായ്പൂര് പോലീസില്‍ പരാതി നല്‍കി. പോലീസ് ഇന്‍സ്പെക്ടര്‍ വിപിന്‍ ഗോപിനാഥന്‍ കേസ് രജിസ്റ്റര്‍ ചെയ്ത് അന്വേഷണം ആരംഭിച്ചു. സൈബര്‍ സെല്ലിന്‍റെ സഹായത്തോടെ ഇയാളെ കോഴിക്കോട്ട്നിന്ന് അറസ്റ്റ് ചെയ്യുകയായിരുന്നു.

മുന്‍വിരോധത്താല്‍ വീടുകയറി അതിക്രമം: യുവാവ് അറസ്റ്റിൽ

തിരുവല്ല: കൊലപാതക കേസലെ പ്രതിയുടെ കുടുംബവുമായി സഹകരിക്കുന്നതിലെ വിരോധം കാരണം വീട്ടില്‍ കയറി അതിക്രമം കാട്ടിയ സംഘത്തിലെ ഒരാളെ തിരുവല്ല പോലീസ് പിടികൂടി. ഇരവിപേരൂര്‍ കിഴക്കന്‍ ഓതറ തൈക്കാട് അമ്പഴത്താംകുന്നില്‍ രതീഷാണ് (37) അറസ്റ്റിലായത്. 22ന് രാത്രി ഒന്പതിനാണ് സംഭവം. കഴിഞ്ഞ 13 ന് കിഴക്കന്‍ ഓതറയിലുണ്ടായ കത്തിക്കുത്തില്‍ മനോജ് (48) കൊല്ലപ്പെട്ടിരുന്നു. ഈ കേസിലെ പ്രതി ഈസ്റ്റ് ഓതറ തൈക്കാട്ടില്‍ വീട്ടില്‍ വിക്രമന്‍റെ കുടുംബവുമായി, നക്രാംപുറത്തുപടി തൈക്കാട് കിഴക്കന്‍ വീട്ടില്‍ രാജനും വീട്ടുകാരും സഹകരിക്കുന്നതില്‍ പ്രകോപിതരായി മൂവര്‍ സംഘം ഇയാളുടെ വീട്ടില്‍ കമ്പിവടിയും മരക്കമ്പുകളുമായി അതിക്രമിച്ചു കയറുകയായിരുന്നു. പ്രതികള്‍ രാജനെയും സഹോദരനെയും കൊല്ലുമെന്ന് ഭീഷണിപ്പെടുത്തുകയും ചെയ്തതായും മൊഴിയില്‍ പറയുന്നു. എഎസ്ഐ മിത്ര വി. മുരളി രേഖപ്പെടുത്തി. എസ്ഐ പി. എസ്. സനില്‍ കേസ് രജിസ്റ്റര്‍ ചെയ്ത് അന്വേഷണം ആരംഭിച്ചു.

പോക്സോ കേസെടുക്കുന്നതിൽ വൈകിപ്പിച്ചു; സിഡബ്ല്യുസി നോട്ടീസ് നൽകും

പത്തനംതിട്ട: പോക്സോ കേസ് സംബന്ധിച്ച പരാതിയിൽ നടപടി വൈകിപ്പിച്ച പത്തനംതിട്ട വനിതാ സ്റ്റേഷനിലെ എസ്എച്ച്ഒ കെ.ആർ. ഷെമിമോളിൽ നിന്നും വിശദീകരണം തേടി നോട്ടീസ് നൽകുമെന്ന് സിഡബ്ല്യുസി. ഇതു സംബന്ധിച്ച പരാതിയിൽ അന്വേഷണം നടത്തി വിശദീകരണം തേടാൻ പത്തനംതിട്ട ഡിവൈഎസ്പിക്കാണ് നോട്ടീസ് നൽകുകയെന്ന് സിഡബ്ല്യുസി ജില്ലാ ചെയർമാൻ എൻ. രാജീവ് അറിയിച്ചു. ഏഴ് വയസുകാരിയെ ട്യൂഷന്‍ ടീച്ചറുടെ പിതാവ് ലൈംഗികമായി ഉപദ്രവിച്ചെന്ന പരാതിയിലാണ് എസ്ഐ നടപടി എടുക്കാതിരുന്നത്. സ്റ്റേഷനില്‍ എത്തിയപ്പോള്‍ ഷെമിമോള്‍ പരാതി സ്വീകരിക്കാത്തതിനേ തുടര്‍ന്ന് പെണ്‍കുട്ടിയുടെ രക്ഷിതാക്കള്‍ ചൈല്‍ഡ് ലൈന്‍ വഴി പരാതി നല്‍കുകയായിരുന്നു. തുടര്‍ന്ന് എഴുപതുകാരനെ പോലീസ് അറസ്റ്റു ചെയ്തു. എസ്ഐക്ക് മുന്നില്‍ പിതാവും കുട്ടിയും എത്തിയപ്പോള്‍പരാതി വിശദമായി കേട്ട എസ്ഐ കേസെടുക്കാതെ ഇവരെ പറഞ്ഞു വിട്ടതായി പറയുന്നു. വനിതാ സ്റ്റേഷനില്‍ നിന്ന് നീതി ലഭിക്കില്ലെന്ന് മനസിലാക്കിയ പിതാവ് വിവരം ചൈല്‍ഡ് ലൈനില്‍ അറിയിച്ചു. അവിടെ നിന്നുള്ള നിര്‍ദേശപ്രകാരമാണ് പോലീസ് തുടര്‍ നടപടി സ്വീകരിച്ചത്. ഷെമിമോൾക്കെതിരേ സമാനമായ മറ്റു പല പരാതികളും ലഭിച്ചിട്ടുള്ളതിനാലാണ് സിഡബ്ല്യുസി വിശദീകരണം തേടുന്നത്.

ക്രിസോസ്റ്റം മെത്രാപ്പോലീത്തയുടെ പേരിൽ സിപിഎം രാഷ്‌ട്രീയം കളിക്കുന്നെന്ന് കോൺഗ്രസ്

കോഴഞ്ചേരി: ലോകം ആദരിക്കുന്ന ഡോ. ഫിലിപ്പോസ് മാർ ക്രിസോസ്റ്റം മാർത്തോമ്മ വലിയ മെത്രാപ്പോലീത്തയെ രാഷ്‌ട്രീയ ലക്ഷ്യത്തിനായി സിപിഎമ്മിലെ ഒരു വിഭാഗം ഉപയോഗിക്കുന്നുവെന്ന് കോൺഗ്രസ് ആരോപണം. ഇന്നലെ മാരാമണ്ണിൽ നടന്ന പുരസ്കാരദാന ചടങ്ങ് യുഡിഎഫ് ബഹിഷ്കരിച്ചു. ആന്‍റോ ആന്‍റണി എംപി, ഡിസിസി പ്രസിഡന്‍റ് സതീഷ് കൊച്ചുപറമ്പിൽ, കോഴഞ്ചേരി, തോട്ടപ്പുഴ ശേരി, ഗ്രാമപഞ്ചായത്തു പ്രസിഡന്‍റുമാരായ സാലി ഫിലിപ്പ്, കൃഷ്ണ കുമാർ, കോയിപ്രം ബ്ലോക്ക്‌ പഞ്ചായത്തു പ്രസിഡന്‍റ് സൂസൻ തോമസ്, ബ്ലോക്ക്‌ പഞ്ചായത്തു അംഗം ക്രിസ്റ്റഫർ തോമസ് ഉൾപ്പെടെ കോൺഗ്രസുകാരായ ജന പ്രതിനിധികളും പ്രവർത്തകരും സമ്മേളനത്തിൽ പങ്കെടുത്തില്ല. അവാർഡുദാനം സിപിഎമ്മിലെ ചില നേതാക്കളുടെ പരിപാടിയായി മാറിയെന്നും ഇതിനായി രൂപീകരിച്ചിട്ടുള്ള ഫൗണ്ടേഷൻ നിലനില്പുള്ളതല്ലെന്നും കോൺഗ്രസ് ബ്ലോക്ക് പ്രസിഡന്‍റുമാരായ ജെറി മാത്യു സാം, ഈപ്പൻ കുര്യൻ, സഭകൗൺസിൽ മുൻ അംഗം ജേക്കബ് ഇമ്മാനുവേൽ എന്നിവർ ആരോപിച്ചു. സിപിഎം ജനറൽ സെക്രട്ടറിയായി തെരഞ്ഞെടുക്കപ്പെട്ട എം.എ. ബേബിയ്ക്കു മാരാമണ്ണിൽ സ്വീകരണം നൽകാനാണ് ഇത്തരമൊരു ഫൗണ്ടേഷൻ രൂപീകരിച്ചതെന്നും കോൺഗ്രസ് നേതാക്കൾ ആരോപിച്ചു.

മാർ ക്രിസോസ്റ്റം പകർന്നു നൽകിയത് കാരുണ്യത്തിന്‍റെ സന്ദേശം: മുഖ്യമന്ത്രി

കോഴഞ്ചേരി: ജീവിതം സ്‌നേഹത്തിന്‍റെയും കാരുണ്യത്തിന്‍റെയും സന്ദേശമാക്കി മാറ്റിയ വ്യക്തിത്വമായിരുന്നു പത്മഭൂഷൺ ഡോ. ഫിലിപ്പോസ് മാർ ക്രിസോസ്റ്റം വലിയ മെത്രാപ്പോലീത്തയെന്ന് മുഖ്യമന്ത്രി പിണറായി വിജയൻ. പദ്മഭൂഷണ്‍ മാര്‍ ക്രിസോസ്റ്റം ഫൗണ്ടേഷന്‍ പുരസ്‌കാര സമര്‍പ്പണ സമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. വേദനിക്കുന്നവരുടെ കണ്ണീരൊപ്പാനും മനുഷ്യന്‍റെ യാതനകള്‍ക്ക് പരിഹാരം കാണാനും ജീവിതം ഉഴിഞ്ഞുവച്ച ആളായിരുന്നു മാര്‍ ക്രിസോസ്റ്റം വലിയ മെത്രാപ്പോലീത്ത. മതങ്ങളുടെ യഥാര്‍ഥ അർഥം നീതിയും സഹാനുഭൂതിയാണെന്നും സമൂഹത്തെ പഠിപ്പിക്കാനും അദ്ദേഹത്തിന് കഴിഞ്ഞിരുന്നു. വർഗീയതയും വെറുപ്പും ആളിക്കത്തിക്കാനുളള ശ്രമം നടക്കുമ്പോള്‍ ക്രിസോസ്റ്റം തെളിയിച്ച മാനവികത വെളിച്ചം നല്‍കുന്നതാണ്. എംജി സര്‍വകലാശാലയില്‍ ആരംഭിച്ചിരിക്കുന്ന ക്രിസോസ്റ്റം ചെയറിന്‍റെ പ്രവര്‍ത്തനം കൂടുതൽ ശക്തമാക്കാനുള്ള നടപടികള്‍ സര്‍ക്കാരിന്‍റെ ഭാഗത്തുനിന്നുണ്ടാവുമെന്നും മുഖ്യ മന്ത്രി പറഞ്ഞു. ഫൗണ്ടേഷന്‍റെ പ്രഥമ പുരസ്‌കാരം സിപിഎം ജനറല്‍ സെക്രട്ടറി എം.എ. ബേബിക്ക് മുഖ്യമന്ത്രി നൽകി. മാരാമണ്‍ കണ്‍വന്‍ഷന്‍ നഗറിന് സമീപമുള്ള പദ്മഭൂഷണ്‍ മാര്‍ ക്രിസോസ്റ്റം നഗറില്‍ നടന്ന യോഗത്തില്‍ ഡോ. തോമസ് മാര്‍ തീത്തോസ് എപ്പിസ്കോപ്പ അധ്യക്ഷത വഹിച്ചു. മന്ത്രി വീണാ ജോര്‍ജ്, ഡെപ്യൂട്ടി സ്പീക്കര്‍ ചിറ്റയം ഗോപകുമാർ, എംഎല്‍എ മാരായ മാത്യു ടി. തോമസ്, ജനീഷ് കുമാർ, പ്രമോദ് നാരായണ്‍, മുന്‍ എംഎല്‍എ രാജു ഏബ്രഹാം, ത്രിതല ജനപ്രതിനിധികളായ സാറാ തോമസ്, ആര്‍ അജയകുമാർ, ജിജി മാത്യു, ബിജിലി പി. ഈശോ, കെഎസ്എഫ്ഇ മുന്‍ ചെയര്‍മാന്‍ ഫിലിപ്പോസ് തോമസ്, ദേവസ്വം ബോര്‍ഡ് മുന്‍ പ്രസിഡന്‍റുമാരായ എ. പത്മകുമാർ, കെ. അനന്തഗോപന്‍, മാര്‍ത്തോമ്മ സഭ ട്രസ്റ്റി അന്‍സില്‍ സഖറിയ, ഫൗണ്ടേഷന്‍ സെക്രട്ടറി രാജന്‍ വര്‍ഗീസ് എന്നിവര്‍ പ്രസംഗിച്ചു. ഡോ. വര്‍ഗീസ് ജോര്‍ജ് രചിച്ച പ്രതിരോധത്തിന്‍റെ കൂട്ടായ്മ എന്ന പുസ്തകം എം.എ. ബേബി പ്രകാശനം ചെയ്തു.

കാടിറങ്ങി നാട്ടിലെത്തിയ പന്നികൾക്ക് കോയിപ്രം വയലേലകൾ താവളം

പുല്ലാട്: വനമേഖലയിൽ നിന്നു കിലോമീറ്ററുകൾക്കപ്പുറമുള്ള കോയിപ്രം ഗ്രാമപഞ്ചായത്തിലെ പൂവത്തൂർ മേഖലകളിൽ വ്യാപിച്ചു കിടക്കുന്ന ചെമ്പിൽ കണ്ടം, പടമണ്ണ്, അനിക്കാട് പുഞ്ച എന്നിവിടങ്ങൾ കാട്ടുപന്നികളുടെ താവളമായി മാറി. പകൽ സമയം വയലുകളിൽ കുഴി എടുത്ത് പതിയിരിക്കുന്ന പന്നികൾ രാത്രി ആകുന്നതോടെ പുറത്തിറങ്ങും. തുടർന്ന് കൃഷി ഇടങ്ങളിൽ തേർവാഴ്ച നടത്തുന്ന ഇവ നേരം പുലരുന്നതോടെ വീണ്ടും കുഴികളിൽ ഇറങ്ങി പതിയിരിക്കും. അതിനാൽ ഇവയെ കണ്ടെത്താൻ ബുദ്ധിമുട്ടാണ്. കാട്ടുപന്നികളെ ഭയന്നു വയലേലകൾക്ക് നടുവിലൂടെയുള്ള വഴികളിലൂടെ നടക്കാൻ പോലും നാട്ടുകാർ ഭയപ്പെടുകയാണ്. കാട്ടുപന്നികൾക്കൊപ്പം മുള്ളൻപന്നികളുടെയും വിഹാര കേന്ദ്രമായി വയലുകൾ മാറിയിരിക്കുകയാണ്. കൃഷി ഇല്ലാതായതോടെ വയലേലകൾ പന്നികളും താവളമാക്കി. മുന്പ് വയൽ നിറയെ നെൽകൃഷി ഉണ്ടായിരുന്നു. എന്നാൽ കൃഷി നഷ്ടമായതോടെ ഇവിടമാകെ തരിശു കിടക്കാൻ തുടങ്ങിയിട്ട് കാലങ്ങളായി. കർഷകർ കൃഷി ഇടത്തിൽ വരാത്തതിനാൽ പന്നികൾ ഒളിത്താവളമാക്കുകയായിരുന്നു. പത്തു വർഷം മുമ്പ് ചിലർ നെൽകൃഷിക്ക് പകരം പടമണ്ണിൽ റബർ നട്ടിരുന്നു. ടാപ്പിംഗ് നടക്കാത്തതിനാൽ ഇപ്പോൾ റബർ മരങ്ങൾക്കിടയിലും പന്നിക്കൂട്ടം പതിയിരിക്കുകയാണ്. ഏത്തവാഴ, ചേന, ചേമ്പ് തുടങ്ങിയ കൃഷികൾ പന്നിക്കൂട്ടം ഇറങ്ങി ഒറ്റ രാത്രി കൊണ്ട് ഒന്നില്ലാതെ നശിപ്പിച്ചു. തോക്ക് ലൈസൻസുള്ളവർ വിരളം ശല്യക്കാരായ കാട്ടുപന്നികളെ വെടിവച്ചുകൊല്ലാൻ സ്വന്തമായി ലൈസൻസുള്ള തോക്കു വേണം. പഞ്ചായത്തിൽ പ്രത്യേകം അപേക്ഷ സമർപ്പിച്ച് എം പാനൽ ചെയ്ത് ലിസ്റ്റിൽ കയറണം. ഇത്തരത്തിലുള്ളവരുടെ ഒരു പാനൽ ഡിവിഷണൽ ഫോറസ്റ്റ് ഓഫീസർ, വൈൽഡ് ലൈഫ് വാർഡൻ എന്നിവർ തയാറാക്കിയിട്ടുണ്ട്. വനം വകുപ്പ്, പോലീസ്, മറ്റ് യൂണിഫോം സർവീസിൽപ്പെട്ട ഉദ്യോഗസ്ഥർ, സ്വന്തമായി തോക്ക് ഉപയോഗിക്കാൻ ലൈസൻസുള്ളവർ എന്നിവരെയാണ് എം പാനൽ ചെയ്യുന്നത്. പഞ്ചായത്ത് പ്രസിഡന്‍റിന്‍റെ അനുമതിയോടെ ഇവർക്ക് പന്നിയെ വെടിവയ്ക്കാം. അനുമതി ഇല്ലാതെ കാട്ടുപന്നിയെ ഇപ്പോഴും കൊല്ലാൻ കഴിയില്ല. കൊല്ലുന്നവൻ അടുത്ത കാലത്ത് പുറം ലോകം കാണില്ല. അനുമതിയോടെ കൊന്നാൽ പന്നിയുടെ ജഡം ഉദ്യോഗസ്ഥരെ ബോധ്യപ്പെടുത്തി കുഴിച്ചിടുക മാത്രമാണ് പരിഹാരം. ഇറച്ചിയാക്കി വിൽക്കുകയോ കഴിക്കുകയോ ചെയ്താൽ പിടിവീഴും എന്ന കാര്യം ഉറപ്പ്. സാധാരണക്കാരായ കൃഷിക്കാർക്ക് മാത്രമാണ് നിയമം ബാധകമായിട്ടുള്ളത്. കാടിറങ്ങി നാട്ടിൽ പെറ്റുപെരുകിയ കാട്ടുപന്നികൾ‌ വന്യമൃഗ സംരക്ഷണ പരിധിയിൽ എങ്ങനെ വരുമെന്നാണ് കർഷകരുടെ ചോദ്യം വർഷങ്ങളായി കാർഷിക മേഖലയെ വെല്ലുവിളിച്ചുകൊണ്ടുള്ള പന്നിശല്യം നേരിടാൻ ആകെ അവലംബിക്കുന്നത് തോക്ക് ഉപയോഗിച്ച് കൊല്ലുകയെന്നതു മാത്രമാണ്. എന്നാൽ ലൈസൻസുള്ളവർ വിരളമാണ്. കോയിപ്രം പഞ്ചായത്തിൽ മൂന്നു പേർ മാത്രമാണ് പന്നിയെ കൊല്ലാൻ എം പാനൽ ചെയ്തിട്ടുള്ളത്. കേരള ഇൻഡിപെന്‍ഡന്‍റ്ഫാർമേഴ്സ് അസോസിയേഷന ് (കിഫ) പ്രത്യേകം ഷൂട്ടേഴ്സ് ക്ലബുണ്ട്. ഇവർക്ക് നൂറിലധികം ലൈസൻസുള്ള ഷൂട്ടർമാരുണ്ട്. പഞ്ചായത്തുകൾ ഇവരെ എം പാനൽ ഷൂട്ടർമാരായി നിയമിച്ചിട്ടുണ്ട്. ഇവരുടെ സഹായത്തോടെ പന്നികളെ കൊന്നൊടുക്കാം. എന്നാൽ ഇക്കാര്യങ്ങൾ ഒന്നും സാധാരണക്കാരായ കർഷകർക്ക് അറിയില്ല. പഞ്ചായത്തുകൾ മുൻകൈയെടുക്കുന്നതുമില്ല. തെരഞ്ഞെടുപ്പോ ഉപതെരഞ്ഞെടുപ്പോ പ്രഖ്യാപിച്ചു കഴിഞ്ഞാൽ തോക്ക് അധികൃതർക്ക് മുന്നിൽ സറണ്ടർ ചെയ്യണം. തെരഞ്ഞെടുപ്പ് കഴിഞ്ഞ് ഫലം വന്ന് രണ്ടാഴ്ച കഴിഞ്ഞു മാത്രമേ തോക്ക് തിരികെ ലഭിക്കു. തോക്ക് ഇല്ലാത്ത സാഹചര്യം. പന്നി പെറ്റുപെരുകാൻ ഈ ഇടവേള ധാരാളം. കൊ ന്നു തള്ളുന്ന പന്നികളുടെ മൂന്നിരട്ടി ഇതിനോടകം ജന്മം കൊണ്ടുകഴിയും. പന്നി ഒന്നിന് 1000 രൂപായായിരുന്നു അടുത്ത കാലം വരെ ഷൂട്ടർമാർക്കുള്ള ഓണറേറിയം . ഇത് 1500 ആയി ഇപ്പോൾ വർധിപ്പിട്ടുണ്ട്.

ഭീകരവാദത്തിനെതിരേ പ്രതിഷേധവും അന്ത്യാഞ്ജലിയും

കോന്നി : ജമ്മു കാശ്മീരിലെ പഹൽഗാമിൽ ഭീകരവാതികളുടെ അക്രമണത്തിൽ മരണപ്പെട്ടവർക്ക് അന്ത്യാഞ്ജലി അർപ്പിച്ച് കോന്നി ടൗണിൽ കോൺഗ്രസ് മണ്ഡലം കമ്മിറ്റിയുടെ ആഭിമുഖ്യത്തിൽ ദീപം തെളിച്ചു. ഭീകരവാദത്തിനെതിരേ പ്രതിജ്ഞയുമെടുത്തു. കോൺഗ്രസ് മണ്ഡലം പ്രസിഡന്‍റ് പ്രവീൺ പ്ലാവിളയിൽ അധ്യക്ഷത വഹിച്ച യോഗം കെപിസിസി അംഗം മാത്യു കുളത്തിങ്കൽ ഉദ്ഘാടനം ചെയ്തു. മോഹനൻ മുല്ലപ്പറമ്പിൽ, ശ്യാം എസ്. കോന്നി, തോമസ് കാലായിൽ, രാജീവ് മള്ളൂർ, സുലേഖ വി. നായർ, അർച്ചനാ ബാലൻ, ഷിജു അറപ്പുരയിൽ, ഫൈസൽ കോന്നി, റോബിൻ കാരാവള്ളിൽ, ബഷീർ കോന്നി, റോബിൻ ചെങ്ങറ സാബു മഞ്ഞക്കടമ്പൻ, മനു എന്നിവർ പ്രസംഗിച്ചു.

ഫ്രാന്‍സിസ് പാപ്പായ്ക്ക് ചങ്ങനാശേരി അതിരൂപതയുടെ പ്രണാമം ഇന്ന് മെത്രാപ്പോലീത്തന്‍ പള്ളിയില്‍

ചങ്ങനാശേരി: ആഗോള കത്തോലിക്കാ സഭയെ ഒരു വ്യാഴവട്ടക്കാലം നയിച്ച് നിത്യതയിലേക്കു കടന്നുപോയ ഫ്രാന്‍സിസ് പാപ്പായ്ക്ക് പ്രണാമമര്‍പ്പിച്ചു ചങ്ങനാശേരി അതിരൂപത സെന്‍റ് മേരീസ് മെത്രാപ്പോലീത്തന്‍ പളളിയില്‍ പ്രര്‍ഥനാശുശ്രൂഷകളും അനുസ്മരണ സമ്മേളനവും നടത്തും. ഉച്ചകഴിഞ്ഞ് മൂന്നിനു നടക്കുന്ന വിശുദ്ധകുര്‍ബാനയ്ക്കും തുടര്‍ന്നുള്ള ഒപ്പീസിനും ആര്‍ച്ച്ബിഷപ് മാര്‍ തോമസ് തറയില്‍ മുഖ്യകാര്‍മികനായിരിക്കും. തുടര്‍ന്നു നടക്കുന്ന അനുസ്മരണ സമ്മേളനത്തില്‍ ആര്‍ച്ച്ബിഷപ് മാര്‍ തോമസ് തറയില്‍ അധ്യക്ഷത വഹിക്കും. മന്ത്രി വി.എന്‍. വാസവന്‍ ഉദ്ഘാടനം ചെയ്യും. മലങ്കര ഓര്‍ത്തഡോക്സ് സഭാധ്യക്ഷന്‍ ബസേലിയോസ് മാര്‍ത്തോമ മാത്യൂസ് തൃതീയന്‍ കാതോലിക്കാ ബാവ അനുഗ്രഹപ്രഭാഷണവും അനുസ്മരണവും നടത്തും. ആര്‍ച്ച്ബിഷപ് മാര്‍ ജോസഫ് പെരുന്തോട്ടം, മാര്‍ത്തോമാ സഭ അടൂര്‍ ഭദ്രാസനാധിപന്‍ മാത്യൂസ് മാര്‍ സെറാഫിം എപ്പിസ്‌കോപ്പ, സുറിയാനി ഓര്‍ത്തഡോക്‌സ് സഭ ജറൂസലേം പാത്രിയര്‍ക്കല്‍ വികാര്‍ മാത്യൂസ് മാര്‍ തിമോത്തിയോസ് മെത്രാപ്പോലീത്ത, റവ.ഡോ. തോമസ് സാമുവല്‍, കുറിച്ചി അദ്വൈത വിദ്യാശ്രമത്തിലെ സ്വാമി വിശാലാനന്ദ, പുതൂര്‍പള്ളി മുസ്‌ലിം ജമാ അത്ത് പ്രസിഡന്‍റ് ടി.പി. അബ്ദുള്‍ ഹമീദ്, ചങ്ങനാശരി അതിരൂപത മുഖ്യ വികാരി ജനറാള്‍ മോണ്‍. ആന്‍റണി ഏത്തക്കാട്ട്, പാസ്റ്ററല്‍ കൗണ്‍സില്‍ ജോയിന്‍റ് സെക്രട്ടറി ബിജു സെബാസ്റ്റ്യന്‍ എന്നിവര്‍ പ്രസംഗിക്കും. അതിരൂപതാ വികാരി ജനറാള്‍മാരായ മോണ്‍. മാത്യു ചങ്ങങ്കരി, മോണ്‍. സ്‌കറിയ കന്യാകോണില്‍, പ്രൊക്കുറേറ്റര്‍ ഫാ. ആന്‍റണി മാളേക്കല്‍, ചാന്‍സിലര്‍ ഫാ. ജോര്‍ജ് പുതുമനമൂഴിയില്‍, കത്തീഡ്രല്‍ വികാരി ഫാ. ജോസഫ് വാണിയപുരയ്ക്കല്‍ എന്നിവര്‍ നേതൃത്വം നല്‍കും. അനുസ്മരണ കുർബാനയിലും സമ്മേളനത്തിലും എല്ലാ ഫൊറോനാ വികാരിമാരും അതിരൂപത-സന്യസ്ത വൈദീകർ, സമർപ്പിതർ, പാസ്റ്ററൽ-ഫൊറോനാ കൗൺസിൽ അംഗങ്ങൾ, പാരീഷ്കൗൺസിൽ അംഗങ്ങൾ, സംഘടനാ ഭാരവാഹികൾ, മതാധ്യാപകർ, കുടുംബകൂട്ടായ്മ ഭാരവാഹികൾ തുടങ്ങിയവർ പങ്കെടുക്കും.

ചങ്ങനാശേരി അതിരൂപത കോര്‍പറേറ്റ് മാനേജ്മെന്‍റ് അധ്യാപക കണ്‍വന്‍ഷനുകള്‍ക്ക് തുടക്കം

ചങ്ങനാശേരി: ചങ്ങനാശേരി അതിരൂപത കോര്‍പറേറ്റ് മാനേജ്മെന്റ് അധ്യാപക കണ്‍വന്‍ഷനുകള്‍ക്കു തുടക്കമാകുന്നു. 110 സ്‌കൂളുകളിലെ 2,000 അധ്യാപകര്‍ക്ക് ഏഴ് സോണുകളിലായാണു കണ്‍വന്‍ഷന്‍ സംഘടിപ്പിച്ചിരിക്കുന്നത്. ഈശോമിശിഹായുടെ മനുഷ്യാവതാര ജൂബിലിയുടെ പ്രധാന പ്രമേയമായ പ്രത്യാശയുടെ തീര്‍ഥാടകര്‍ എന്നത് സന്ദേശമായി സ്വീകരിക്കുന്ന കണ്‍വന്‍ഷനുകളില്‍ കാലത്തിന്‍റെ മാറ്റങ്ങള്‍ക്കൊത്ത് വിദ്യാഭ്യാസരംഗത്ത് നിര്‍ണായക ശക്തിയാകുന്നതിനുള്ള പരിശീലനങ്ങളും പ്രത്യാശയുടെ തീര്‍ഥാടകരായി മാറുവാന്‍ അധ്യാപകരെ പ്രചോദിപ്പിക്കുന്ന ക്ലാസുകളും വിദ്യാഭ്യാസ സംബന്ധമായ ചര്‍ച്ചകളും നടക്കും. വിദ്യാഭ്യാസ മേഖലയിലെ പ്രഗത്‌ഭര്‍ ക്ലാസുകള്‍ക്കും ചര്‍ച്ചകള്‍ക്കും നേതൃത്വം നല്‍കും. 25ന് എടത്വാ സോണില്‍ ആരംഭിച്ച് മേയ് 6നു ചമ്പക്കുളം സോണില്‍ അവസാനിക്കുന്ന ഏഴു സോണല്‍ കണ്‍വന്‍ഷനുകളിലും ചങ്ങനാശേരി ആര്‍ച്ച്ബിഷപ് മാര്‍ തോമസ് തറയില്‍ സന്ദേശം നല്‍കും. അതിരൂപത വികാരി ജനറാള്‍മാര്‍ സന്നിഹിതരാകും. ചങ്ങനാശേരി അതിരൂപത കോര്‍പറേറ്റ് മാനേജ്മെന്‍റും ടീച്ചേഴ്‌സ് ഗില്‍ഡും സംയുക്തമായി സംഘടിപ്പിക്കുന്ന കണ്‍വന്‍ഷന്‍റെ മുന്നൊരുക്കങ്ങള്‍ പൂര്‍ത്തിയായതായി കോര്‍പറേറ്റ് മാനേജര്‍ റവ.ഡോ. ആന്‍റണി മൂലയില്‍, അസിസ്റ്റന്‍റ് മാനേജര്‍ റവ.ഡോ. ടോണി ചെത്തിപ്പുഴ, ടീച്ചേഴ്‌സ് ഗില്‍ഡ് പ്രസിഡന്‍റ് ഈശോ തോമസ്, ഗില്‍ഡ് ഭാരവാഹികള്‍ എന്നിവര്‍ അറിയിച്ചു. അമൃതം ലഹരിവിരുദ്ധ പദ്ധതി ലഹരിക്കെതിരേ സ്‌കൂളുകള്‍ കേന്ദ്രീകരിച്ചുള്ള ശക്തമായ പോരാട്ടത്തിന് കണ്‍വന്‍ഷനില്‍ തുടക്കം കുറിക്കും. ലഹരിക്കെതിരേ ജീവന്‍റെ സംസ്‌കാരത്തിനായി വിദ്യാര്‍ഥികളെ അണിചേര്‍ത്ത്, സര്‍ക്കാരിന്‍റെ ലഹരിവിരുദ്ധ പരിപാടികളോടു ചേര്‍ന്ന് ചങ്ങനാശേരി അതിരൂപത കോര്‍പറേറ്റ് മാനേജ്‌മെന്‍റ് 110 വിദ്യാലയങ്ങളില്‍ 2025-26 അക്കാദമിക വര്‍ഷത്തില്‍ അമൃതം എന്ന പേരിലാണ് ലഹരിവിരുദ്ധ കാമ്പയിന്‍ സംഘടിപ്പിക്കുന്നത്. കുട്ടികള്‍ക്കു വിവിധ ബോധവത്കരണ പ്രവര്‍ത്തനങ്ങള്‍, കൗണ്‍സലിംഗ്, പിടിഎയോട് ചേര്‍ന്ന് ലഹരിവിരുദ്ധ മുന്നേറ്റങ്ങള്‍, ജാഗ്രതാ സെല്ലുകള്‍ തുടങ്ങിയവ അമൃതം പദ്ധതിയില്‍ ഉണ്ടായിരിക്കുമെന്ന് കോര്‍പറേറ്റ് മാനേജര്‍ ഫാ. ആന്‍റണി മൂലയില്‍ അറിയിച്ചു.

ഫ്രാൻസിസ് മാർപാപ്പ സ്മരണയിൽ കാഞ്ഞിരപ്പള്ളി രൂപതയിൽ പ്രാർഥനാദിനം

കാഞ്ഞിരപ്പള്ളി: ഫ്രാൻസിസ് മാർപാപ്പയുടെ കബറടക്ക ശുശ്രൂഷകൾ നടത്തപ്പെടുന്ന നാളെ കാഞ്ഞിരപ്പള്ളി രൂപതയിൽ പ്രത്യേക പ്രാർഥനാദിനമായി ആചരിക്കുന്നതിന് കാഞ്ഞിരപ്പള്ളി രൂപതാധ്യക്ഷൻ മാർ ജോസ് പുളിക്കൽ നിർദേശം നൽകി. രൂപതയിലെ എല്ലാ ഇടവകകളിലും പരിശുദ്ധ പിതാവിനെ അനുസ്മരിച്ച് വിശുദ്ധ കുർബാന അർപ്പിക്കുകയും ഒപ്പീസ് നടത്തുകയും ചെയ്യുന്നതാണ്. യാമ ശുശ്രൂഷകളിലുൾപ്പെടെ കുടുംബ നമസ്കാരങ്ങളിൽ പരിശുദ്ധ പിതാവിനെ പ്രത്യേകം സ്മരിക്കും. രൂപതയിലെ എല്ലാ ഓഫീസുകൾക്കും വിദ്യാഭ്യാസ സ്ഥാപനങ്ങളുൾപ്പെടെയുള്ള സ്ഥാപനങ്ങൾക്കും അവധിയായിരിക്കും. മുൻകൂട്ടി നിശ്ചയിച്ച പരീക്ഷകൾ നടത്തപ്പെടുന്നതാണ്. പരിശുദ്ധ പിതാവിന്‍റെ കബറടക്ക ശുശ്രൂഷയിൽ ദൃശ്യ- ശ്രാവ്യ മാധ്യമങ്ങളിലൂടെ ആത്മനാ പങ്കുചേരുന്നതിനും നിർദേശം നൽകിയിട്ടുണ്ട്. പ്രാർഥനാദിനങ്ങളായാചരിക്കുന്ന ഒന്പതു ദിവസങ്ങളിലും രൂപതയിലെ ഇടവകകളിലെയും സ്ഥാപനങ്ങളിലെയും എല്ലാ ആഘോഷ പരിപാടികളും ഒഴിവാക്കേണ്ടതാണ്. മുൻകൂട്ടി നിശ്ചയിച്ച തിരുനാളുകളും പ്രത്യേക പ്രാധാന്യമുള്ള പരിപാടികളും മാറ്റി വയ്ക്കാനാവാത്ത സാഹചര്യമാണെങ്കിൽ മാത്രം പരിശുദ്ധ പിതാവിനെ അനുസ്മരിച്ചും അദ്ദേഹത്തോടുള്ള ആദരവ് പ്രകടിപ്പിച്ചും ആഘോഷങ്ങൾ ഒഴിവാക്കി നടത്താവുന്നതാണെന്ന് രൂപത കേന്ദ്രത്തിൽ നിന്ന് അറിയിച്ചു.

ഗവി യാത്രക്കാരുമായി ബസ് വീണ്ടും വനത്തിൽ കുടുങ്ങി

പത്തനംതിട്ട: ഗവി റൂട്ടിൽ പോയ കെഎസ്ആർടിസി ബസ് വീണ്ടും കൊടുംവനത്തിൽ കുടുങ്ങി. പത്തനംതിട്ട കെഎസ്ആർടിസി ഡിപ്പോയിൽ നിന്ന് ഇന്നലെ രാവിലെ ആറരയോടെ മൂഴിയാർ വഴി കുമളിക്ക് യാത്ര തിരിച്ച ആർഎസി 497 നമ്പർ ബസാണ് തകരാറിലായി അരണമുടിക്ക് സമീപം സർവീസ് മുടങ്ങിയത്. ഗവി റൂട്ടിലെ സ്ഥിരം സർവീസായതിനാൽ യാത്രികരിൽ അധികവും ആങ്ങമൂഴി , മൂഴിയാർ, കൊച്ചു പമ്പാ , വണ്ടിപ്പെരിയാർ, കുമളി മേഖലയിൽ ഉള്ളവരായിരുന്നു. ഗവി വഴിയുള്ള കാനനയാത്ര ആസ്വദിക്കാനായി പുറപ്പെട്ട ഏതാനും സഞ്ചാരികളും ബസിലുണ്ടായിരുന്നു. 38 യാത്രക്കാരും മൂന്നര മണിക്കൂറുകളോളം വഴിയിൽ കുടുങ്ങി. പത്തനംതിട്ട ഡിപ്പോയിൽ നിന്ന് പകരം അയച്ച ബസ് ഒന്നരയോടെ അരണമുടിയിൽ എത്തി യാത്രക്കാരുമായി ഗവി, കുമളി റൂട്ടിലേക്ക് തിരിച്ചു. പകരമെത്തിയ ബസിലാണ് കെഎസ്ആർടിസി മെക്കാനിക് വിഭാഗം ജീവനക്കാരും ഉണ്ടായിരുന്നത്. തകരാറായ ബസിന് പത്തുവർഷത്തിൽ താഴെയെ പഴക്കമുള്ളു എന്നാണ് വിശദീകരണം. കഴിഞ്ഞ 17ന് കൊല്ലം ചടയമംഗലത്തു നിന്നും വിനോദ സഞ്ചാരികളുമായി എത്തിയ കെഎസ്ആർടിസി ബസ് അരണമുടിക്കു സമീപം തകരാറിലായി. തുടർന്ന് യാത്രക്കാർ അഞ്ചു മണിക്കൂറാണ് മഴയത്തു വനത്തിൽ കഴിച്ചു കൂട്ടിയത്. വിവരം അറിഞ്ഞ് പത്തനംതിട്ട ഡപ്പോയിൽ നിന്നും മറ്റൊരു ബസ് അയച്ച് യാത്രക്കാരെ അതിൽ കയറ്റിയെങ്കിലും പത്തുമീറ്റർ മാത്രം ഓടി ആ ബസും നിശ്ചലമായിരുന്നു. ഭക്ഷണം കഴിക്കാതെ മണിക്കൂറുകൾ വലഞ്ഞ യാത്രക്കാർ കുമളിയിൽ നിന്ന് വന്ന മറ്റൊരു കെഎസ്ആർടിസി ബസിലാണ് അന്ന് ചടയമംഗലത്തേക്ക് തിരിച്ചത്. അടിക്കടി ബസുകൾ വനത്തിൽ കുടുങ്ങാനുള്ള പ്രധാന കാരണം ബസുകളുടെ പഴക്കവും മെക്കാനിക്കൽ വിഭാഗത്തിന്‍റെ പിടിപ്പുകേടുമാണെന്ന് ആക്ഷേപം. പത്തനംതിട്ട കെഎസ്ആർടിസി മെക്കാനിക്കൽ വിഭാഗത്തിനെതിരേ പല തവണ ഇത്തരത്തിൽ ആരോപണം ഉയർന്നിട്ടുണ്ട്. ഹൈറേഞ്ചിലൂടെ ഓടുന്ന വാഹനത്തിന്‍റെ അവസ്ഥ ശരിയായ രീതിയിൽ വർക്ക് ഷോപ്പിൽ പരിശോധിക്കാറില്ല. രാത്രി ഓട്ടം കഴിഞ്ഞെത്തുന്ന വാഹനത്തിന്‍റെ കണ്ടീഷൻ പരിശോധിച്ച് അറ്റകുറ്റപ്പണി നടത്തിയ ശേഷമേ അടുത്ത ദിവസത്തെ ഓട്ടത്തിന് വിട്ടുകൊടുക്കാവൂ എന്നാണ് നിർദ്ദേശം. പലപ്പോഴും പരിശോധന വഴിപാടായി മാറുകയാണ്. അവശ്യം മാറേണ്ട സ്പെയർ പാർട്സുകളുടെ അഭാവമാണ് കാരണമെന്ന് ആക്ഷേപമുണ്ട്.

മുഖ്യമന്ത്രിയുടെ വാഹനത്തിനു നേരേ കരിങ്കൊടി യൂത്ത് കോൺഗ്രസിന്‍റെ അപ്രതീക്ഷിത പ്രതിഷേധം പോലീസിനെ വെട്ടിലാക്കി

പത്തനംതിട്ട: മന്ത്രിസഭയുടെ നാലാം വാർഷിക ആഘോഷത്തിന് പത്തനംതിട്ടയിലെത്തിയ മുഖ്യമന്ത്രി പിണറായി വിജയന്‍റെ വാഹനത്തിനു നേരേ യൂത്ത് കോൺഗ്രസിന്‍റെ കരിങ്കൊടി.യൂത്ത് കോൺഗ്രസ് ജില്ലാ പ്രസിഡന്‍റ് വിജയ് ഇന്ദുചൂഡന്‍റെ നേതൃത്വത്തിൽ അഴൂരിലെ സർക്കാർ ഗസ്റ്റ് ഹൗസിനു സമീപമാണ് കരിങ്കൊടിയുമായി പ്രതിഷേധിച്ചത്. കരിങ്കൊടി കാണിച്ചവരെ അറസ്റ്റ് ചെയ്തെങ്കിലും യൂത്ത് കോൺ‌ഗ്രസിന്‍റ അപ്രതീക്ഷിത പ്രതിഷേധം പോലീസിനെയും വെട്ടിലാക്കി. ജില്ലാ പോലീസ് മേധാവിയടക്കം നേരിട്ടെത്തി സുരക്ഷാച്ചുമതല നിർവഹിക്കുകയും ഇന്‍റലിജൻസ് വിഭാഗം ഉൾപ്പെടെ രംഗത്തുണ്ടാകുകയും ചെയ്തതിനിടെയാണ് യൂത്ത് കോൺഗ്രസുകാർ പ്രതിഷേധിച്ചത്. കരിങ്കൊടി കാണിച്ച ആറ് യൂത്ത് കോൺഗ്രസ് പ്രവർത്തകരെ പിന്നീട് പോലീസ് അറസ്റ്റ് ചെയ്തു. ഇന്നലെ രാവിലെ ഗസ്റ്റ് ഹൗസിൽ നിന്നും സംവാദം പരിപാടി നടക്കുന്ന ഓഡിറ്റോറിയത്തിലേക്ക് വരുന്പോഴായിരുന്നു പ്രതിഷേധം. വാഹനം ഗസ്റ്റ്ഹൗസ് റോഡിൽ നിന്ന് പ്രധാന റോഡിലേക്ക് കയറി അല്പം കഴിഞ്ഞപ്പോഴാണ് മറഞ്ഞുനിന്ന പ്രവർത്തകർ വാഹനത്തിന് മുന്നിലേക്ക് ചാടി കരിങ്കൊടി വീശിയത്. റോഡിൽ ഡ്യൂട്ടിയിലുണ്ടായിരുന്ന പോലീസുകാർ ഇവരെ മൽപ്പിടിത്തത്തിലൂടെ ജീപ്പിലാക്കി. നാലാം വാർഷികത്തിന്‍റെ പേരിൽ സർക്കാർ നടത്തുന്ന ധൂർത്ത് അവസാനിപ്പിക്കണമെന്ന് ആവശ്യപ്പെട്ടായിരുന്നു പ്രതിഷേധം. യൂത്ത് കോൺഗ്രസ് ജില്ലാ പ്രസിഡന്‍റ് വിജയ് ഇന്ദുചൂഡന്‍റെ ഷർട്ട് പിടിവലിക്കിടെ ഊരി പോലീസ് ഉദ്യോഗസ്ഥന്‍റെ കൈയിലായി. സംസ്ഥാന സെക്രട്ടറി റെനോ പി. രാജൻ, ജില്ലാ സെക്രട്ടറി ജിതിൻ ജി. നൈനാൻ, നേസ്മൽ കാവിളയിൽ, സുബിൻ വല്യയന്തി, റോബിൻ വല്യ‌യന്തി എന്നിവരാണ് അറസ്റ്റിലായത്. യൂത്ത് കോൺഗ്രസ് ജില്ലാ സെക്രട്ടറി അൻസർ മുഹമ്മദ്, നിയോജകമണ്ഡലം പ്രസിഡന്‍റ് നേജോ മെഴുവേലി, കുമ്പഴ മണ്ഡലം പ്രസിഡന്‍റ് മുഹമ്മദ് റാഫി എന്നിവരെ കരുതൽ തടങ്കലിൽ ആക്കുകയും ചെയ്തു. മുഖ്യമന്ത്രി ജില്ല വിട്ടശേഷമാണ് ഇവരെ വിട്ടയച്ചത്.

സ്പെഷൽ സ്കൂളുകൾക്ക് ലഭിച്ചത് 1.78 കോടി

പത്തനംതിട്ട: ഭിന്നശേഷി കുട്ടികൾ പഠിക്കുന്ന സ്പെഷൽ സ്‌കൂളുകള്‍ക്കായി 2024-25 സാമ്പത്തിക വര്‍ഷം 50 കോടിരൂപ സംസ്ഥാനത്തു ലഭ്യമാക്കി. 270 കുട്ടികൾക്കാണ് ഇതു നൽകിയത്. പത്തനംതിട്ട ജില്ല‌യില്‍ അപേക്ഷിച്ച ഒമ്പത് സ്‌കൂളുകള്‍ക്കായി 1,78,49,500 രൂപ വിതരണം ചെയ്തു. 18 വയസ് കഴിഞ്ഞ ഭിന്നശേഷി കുട്ടികള്‍ക്ക് നിലവിലെ പദ്ധതികള്‍ സംബന്ധിച്ചും ദീപ്തി സ്പെഷല്‍ സ്‌കൂള്‍ പ്രിന്‍സിപ്പള്‍ ഡോ. സൂസന്‍ മാത്യുവിന്‍റെ നിര്‍ദേശത്തിന് മുഖ്യമന്ത്രി പിണറായി വിജയൻ മറുപടി നല്‍കി. പൊതുവിദ്യാലയങ്ങളില്‍ വിജ്ഞാന കേരളത്തിന്‍റെ നേതൃത്വത്തില്‍ സ്‌കില്‍ ഡവലപ്മെന്‍റ് പദ്ധതി നടപ്പിലാക്കുമെന്ന് മുഖ്യമന്ത്രി പറഞ്ഞു. ഓരോ കുട്ടികളുടെയും ഇഷ്ടങ്ങള്‍ തിരിച്ചറിഞ്ഞ് പരിശീലനം നല്‍കും. പാഠഭാഗങ്ങളില്‍ ആവശ്യമായവ ഉള്‍പ്പെടുത്തുവാനും നിര്‍ദ്ദേശം നല്‍കിയിട്ടുണ്ടെന്നും അധ്യാപകര്‍ക്ക് കൗണ്‍സിലിംഗ് പരിശീലനവും മാതാപിതാക്കള്‍ക്ക് കൗണ്‍സിലിംഗും നല്‍കുമെന്നും മുഖ്യമന്ത്രി പറഞ്ഞു. പൊതു വിദ്യാലങ്ങളില്‍ സ്‌കില്‍ ഡവലപ്മെന്‍റ്, ക്രിട്ടിക്കല്‍ തിങ്കിങ്, എഐ, കമ്യൂണിക്കേറ്റീവ് ഇംഗ്ലീഷ് പഠനങ്ങള്‍ക്ക് അവസരം ഒരുക്കണമെന്ന അധ്യാപകനായ സാബു പുല്ലാട്ട് നിർദേശിച്ചു. കുട്ടികളിലും മുതിര്‍ന്നവരിലും മാനസിക സമ്മര്‍ദ്ദം കുറക്കുവാനുള്ള ശാരീരിക മാനസിക വ്യായാമം നല്‍കുവാനുള്ള പദ്ധതികള്‍ നടപ്പിലാക്കുമെന്ന് യോഗാചാര്യന്‍ എം.ജി ദിലീപിന് മുഖ്യമന്ത്രി മറുപടി നല്‍കി. വിജ്ഞാനകേരളത്തിന്‍റെ രണ്ടാംഘട്ടം എന്ന നിലയില്‍ വിജ്ഞാന പത്തനംതിട്ടയുടെ ആഭിമുഖ്യത്തില്‍ സ്‌കില്ലിംഗ് പൈലറ്റ് അടിസ്ഥാനത്തില്‍ നടപ്പിലാക്കുന്നു. ഗുരു നിത്യ ചൈതന്യയുടെ പേരില്‍ സ്മാരകത്തിന്‍റെ പ്രവര്‍ത്തനങ്ങള്‍ വേഗത്തിലാക്കാനുള്ള നടപടികള്‍ സര്‍ക്കാര്‍ സ്വീകരിക്കുമെന്നും മുഖ്യമന്ത്രി മറുപടി നൽകി.

ദുരന്തഘട്ടത്തിൽ സഹായിക്കണമെന്ന ഭരണഘടന ഉറപ്പു പോലും ലംഘിക്കപ്പെട്ടു: മുഖ്യമന്ത്രി

പത്തനംതിട്ട: ദുരന്തമുണ്ടായാല്‍ സംസ്ഥാനങ്ങളെ സഹായിക്കണമെന്ന ഭരണഘടന ഉറപ്പ് പോലും കേന്ദ്ര സര്‍ക്കാര്‍ പാലിച്ചില്ലെന്ന് മുഖ്യമന്ത്രി പിണറായി വിജയൻ. സംസ്ഥാന സർക്കാരിന്‍റെ നാലാം വാർഷികത്തോടനുബന്ധിച്ച് എൽഡിഎഫ് സംഘടിപ്പിച്ച പൊതുസമ്മേളനം ഉദ്ഘാടനം ചെയ്തു പ്രസംഗിക്കുകയായിരുന്നു അദ്ദേഹം. വയനാട് ദുരന്തവുമായി ബന്ധപ്പെട്ട് കേരളത്തെ അവഗണിച്ചപ്പോൾ കേന്ദ്ര സര്‍ക്കാരിനെതിരേ ശബ്ദമുയര്‍ത്താന്‍ പ്രതിപക്ഷത്തിനായില്ല. തനതു വരുമാനത്തിൽ വർധന വരുത്തിയാണ് കേരളം ഈ ഘട്ടത്തിൽ പിടിച്ചു നിന്നതെന്ന് മുഖ്യമന്ത്രി പറഞ്ഞു. 2016ൽ സംസ്ഥാനത്തിന്‍റെ തനതു വരുമാനം 16 ശതമാനം ആയിരുന്നുവെങ്കിൽ 2025ൽ 73 ശതമാനമായി ഉയർന്നു. ആഭ്യന്തര ഉത്പാദനരംഗത്തും കുതിച്ചുചാട്ടം ഉണ്ടായി. സാന്പത്തികമായി കേന്ദ്രം ഞെരുക്കിയപ്പോഴും കിഫ്ബി മുഖേനയുള്ള പദ്ധതികളിലൂടെ കേരളം വികസന രംഗത്തും കുതിച്ചു ചാട്ടം നടത്തിയെന്ന് മുഖ്യമന്ത്രി ചൂണ്ടിക്കാട്ടി. ഐടി മേഖലയിൽ 9000 കോടി രൂപയുടെ മുതൽമുടക്ക് നടത്തി. പുതുതായി രണ്ട് ഐടി പാർക്കുകളും മൂന്ന് ഐടി ഇടനാഴികളും സ്ഥാപിക്കുകയാണ്. 6090 സ്റ്റാർട്ട് അപ്പുകൾ കേരളത്തിൽ ആരംഭിച്ചു. 60000 തൊഴിൽ അവസരങ്ങൾ ഇതിലൂടെ ഉണ്ടായി. 2026ൽ 15000 സ്റ്റാർട്ട് അപ്പുകളാണ് ലക്ഷ്യം. ഇതിലൂടെ ഒരു ലക്ഷം തൊഴിൽ അവസരങ്ങൾ ലക്ഷ്യമിടുന്നു. ആയുർവേദ റിസർച്ച് ഇൻസ്റ്റിറ്റ്യൂട്ട് അടക്കം മികവിന്‍റെ കേന്ദ്രങ്ങൾ സ്ഥാപിക്കപ്പെടാൻ പോകുകയാണ്. മൂന്ന് സയൻസ് പാർക്കുകളും കേരളത്തിൽ വരുന്നതോടെ സംസ്ഥാനം ആധുനിക വിജ്ഞാന ഉത്പാദന കേന്ദ്രമായി മാറുമെന്നും മുഖ്യമന്ത്രി ചൂണ്ടിക്കാട്ടി. കേരളത്തിന്‍റെ വികസനം അട്ടിമറിക്കാൻ ശ്രമിക്കുന്നവരാണ് ബിജെപിയും യുഡിഎഫുമെന്നും അദ്ദേഹം കുറ്റപ്പടുത്തി. സിപിഐ ജില്ലാ സെക്രട്ടറി സി.കെ. ശശിധരൻ അധ്യക്ഷത വഹിച്ചു. മന്ത്രി വീണാ ജോർജ്, ഡെപ്യൂട്ടി സ്പീക്കർ ചിറ്റയം ഗോപകുമാർ, എംഎൽഎമാരായ മാത്യു ടി. തോമസ്, പ്രമോദ് നാരായൺ, കെ.യു. ജനീഷ് കുമാർ, ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം, സിപിഎം ജില്ലാ സെക്രട്ടറി രാജു ഏബ്രഹാം, എൽഡിഎഫ് കൺവീനർ അലക്സ് കണ്ണമല, കെ.പി. ഉദയഭാനു, സജി അലക്സ്, ജിജി വട്ടശേരിൽ തുടങ്ങിയവർ പ്രസംഗിച്ചു.

ജെ.ബി. കമ്മീഷൻ റിപ്പോർട്ടിലെ 152 ശിപാർശകൾ നടപ്പിലാക്കിയെന്ന്

ജെ.ബി. കോശി കമ്മീഷന്‍ റിപ്പോര്‍ട്ട് വേഗത്തിലാക്കണമെന്ന് പാസ്റ്റര്‍ ഷിബു നെടുവേലി പുല്ലാട്, ഫാ. പി.വൈ. ജെസൻ എന്നിവർ മുഖ്യമന്ത്രിയോട് ആവശ്യപ്പെട്ടു. കമ്മീഷന്‍ റിപ്പോര്‍ട്ട് പ്രാവര്‍ത്തികമാക്കാനുള്ള ശ്രമത്തിലാണ് സര്‍ക്കാരെന്ന് മുഖ്യമന്ത്രി പറഞ്ഞു. 152 ശിപാര്‍ശകള്‍ ഇതിനോടകം നടപ്പിലാക്കി. 12 എണ്ണം മന്ത്രിസഭയുടെ പരിഗണനയിലാണ്. ചീഫ് സെക്രട്ടറിയുടെ അധ്യക്ഷതയില്‍ പദ്ധതി പഠിക്കുന്നതിനായി കമ്മിറ്റി രൂപീകരിച്ചിട്ടുണ്ട്. മന്ത്രിസഭാ പരിഗണനയ്ക്ക് വിടേണ്ടവ, കേന്ദ്രസര്‍ക്കാരുമായി ചര്‍ച്ച ചെയ്യേണ്ടവ എന്നിവയ്ക്കു പുറമേ നടപ്പാക്കാന്‍ കഴിയാത്ത ശിപാർശകളുമുണ്ടെന്ന് മുഖ്യമന്ത്രി ചൂണ്ടിക്കാട്ടി. ഇവ തരംതിരിച്ച് ചീഫ് സെക്രട്ടറിയുടെ നേതൃത്വത്തില്‍ സെക്രട്ടറിമാരുടെ യോഗം ചേര്‍ന്ന് ക്രോഡീകരിച്ച പട്ടിക തയ്യാറാക്കും. മറ്റ് വിഷയങ്ങളില്‍ കേന്ദ്രവുമായി ബന്ധപ്പെടുമെന്നും മുഖ്യമന്ത്രി പറഞ്ഞു.

വന്യമൃഗ ശല്യം പരിഹരിക്കാന്‍ നടപടി

പത്തനംതിട്ട ജില്ലയിലെ മലയോര മേഖലയിലെ രൂക്ഷമായ വന്യമൃഗ ശല്യം പരിഹരിക്കാന്‍ സര്‍ക്കാര്‍ നടപടി സ്വീകരിക്കുമെന്ന് മുഖ്യമന്ത്രി പിണറായി വിജയന്‍. വന്യമൃഗങ്ങള്‍ക്ക് വനത്തിനുള്ളില്‍ തന്നെ വെള്ളം ലഭ്യമാകുന്നതിന് അവിടെയുള്ള ജലസ്രോതസ് ശക്തമാക്കും. ഭക്ഷ്യയോഗ്യമായ സസ്യങ്ങള്‍ വനത്തില്‍ വളര്‍ത്തും. വന്യമൃഗങ്ങള്‍ നാട്ടിലെത്താതിരിക്കാന്‍ വനം വകുപ്പ് വഴി തടസം സൃഷ്ടിക്കുമെന്നും മുഖ്യമന്ത്രി പറഞ്ഞു. ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം, പി. എസ്. സതീഷ് കുമാർ, മണ്ണടി മോഹന്‍ തുടങ്ങിയവര്‍ ഉന്നയിച്ച വിഷയത്തില്‍ മറുപടി നല്‍കുകയായിരുന്നു മുഖ്യമന്ത്രി. വന്യമൃഗ ശല്യം മൂലം കര്‍ഷകരുടെ ജീവനും സ്വത്തിനും ഭീഷണി ഉണ്ടാകുന്നു. മലയോര മേഖലയ്ക്ക് പുറമേ ജില്ലയിലെ അടൂർ, പന്തളം ഭാഗങ്ങളിലും വന്യമൃഗആക്രമണം നേരിടുന്നുണ്ട്. കര്‍ഷകര്‍ക്കുവേണ്ടി സമഗ്രമായ ഒരു പദ്ധതി നടപ്പാക്കുന്നതിന് സര്‍ക്കാര്‍ മുന്‍കൈ എടുക്കണമെന്ന് ജില്ലാ പഞ്ചായത്ത് പ്രസിഡന്‍റ് അഭ്യര്‍ഥിച്ചു. വനമേഖലയോടു ചേര്‍ന്നു കിടക്കുന്ന വില്ലേജുകളില്‍ തേക്ക് ഉള്‍പ്പെടെയുള്ള മരങ്ങള്‍ വെട്ടുന്നതിന് അനുവാദം ലഭിച്ചിട്ടില്ല. പട്ടയ ഭൂമിയിലെ മരങ്ങള്‍ വെട്ടാനോ, വെട്ടിയിട്ട മരങ്ങള്‍ നീക്കം ചെയ്യാനോ ഉള്ള അനുമതി കിട്ടുന്നില്ല. കച്ചവടക്കര്‍ മരങ്ങള്‍ വാങ്ങിയാലും കര്‍ഷകര്‍ക്ക് ഭീമമായ നഷ്ടമാണ് ഉണ്ടാകുന്നത്. ഇതിനു സര്‍ക്കാരില്‍ നിന്നും ഇടപെടല്‍ ഉണ്ടാകണമെന്ന് ജോര്‍ജ് ഏബ്രഹാമിന്‍റെ ആവശ്യം പരിഗണിക്കുമെന്ന് മുഖ്യമന്ത്രി അറിയിച്ചു. വനമേഖലയോടുചേര്‍ന്ന പ്രദേശങ്ങളിൽ മരങ്ങള്‍ മുറിക്കുന്നതു സംബന്ധിച്ചുള്ള തടസം എന്തെന്ന് പരിശോധിച്ചു നടപടി സ്വീകരിക്കും. പട്ടയത്തില്‍ ആശങ്ക വേണ്ടെന്നും പട്ടയ നടപടികള്‍ വേഗത്തിലാക്കുമെന്നും അദ്ദേഹം വ്യക്തമാക്കി.

ലഹരിക്കെതിരേ കൂട്ടായ പ്രവര്‍ത്തനം ആവശ്യം: മുഖ്യമന്ത്രി

പത്തനംതിട്ട: ലഹരിക്കെതിരേ സമൂഹം ഒന്നിക്കണമെന്നും കൂട്ടായ്മയാണ് വേണ്ടതെന്നും മുഖ്യമന്ത്രി പിണറായി വിജയൻ. ലഹരി വേണ്ട എന്ന് പറയാനുള്ള ആര്‍ജവം യുവതലമുറ നേടണം. പൊതുസമൂഹത്തിന്‍റെ പൂര്‍ണ പിന്തുണ ഇതിനാവശ്യമാണ്. രണ്ടാം പിണറായി വിജയന്‍ സര്‍ക്കാരിന്‍റെ നാലാം വാര്‍ഷികത്തോടനുബന്ധിച്ച് നടന്ന പത്തനംതിട്ട ജില്ലാതല സംവാദത്തില്‍ സംസ്ഥാന പാഠപുസ്തക നിര്‍മാണ സമിതി അംഗം ഡോ. അജിത് ആര്‍ പിള്ളയുടെ കുട്ടികളിലെ ലഹരി ഉപയോഗത്തിനെതിരേ എന്തു നടപടിയാണ് സര്‍ക്കാര്‍ സ്വീകരിക്കുകയെന്ന ചോദ്യത്തിന് മറുപടി പറയുകയായിരുന്നു മുഖ്യമന്ത്രി. ലഹരിക്കെതിരായ പ്രവര്‍ത്തനം പൂര്‍ണ ഫലപ്രാപ്തിയിലെത്തിയിട്ടില്ല. ബോധവത്കരണമാണ് പ്രധാന മാര്‍ഗം. കുട്ടികള്‍ ലഹരി ഉപയോഗിക്കാതിരിക്കാനുള്ള ശ്രമമുണ്ടാകണം. അധ്യാപകരുടെയും രക്ഷാകര്‍ത്താക്കളുടെയും പിന്തുണ ആവശ്യമാണ്. രക്ഷിതാക്കള്‍ക്ക് പരിശീലനം നല്‍കണം. വിദ്യാർഥികള്‍ക്ക് കൗണ്‍സലിംഗ് നല്‍കാന്‍ അധ്യാപകര്‍ക്കാകണം. ലഹരിക്കെതിരായ പ്രവര്‍ത്തനം പാഠഭാഗങ്ങളില്‍ ഉള്‍പ്പെടുത്താന്‍ കഴിയുമോയെന്ന് പരിശോധിക്കും. കുട്ടികളുടെ സാമൂഹിക വളര്‍ച്ച മനസിലാക്കണം. ലഹരിയിലേക്ക് കുട്ടികള്‍ എങ്ങനെ എത്തുന്നുവെന്ന് തിരിച്ചറിഞ്ഞ് അവ തിരുത്തണം. കലാ, കായിക പഠനത്തിന് സ്‌കൂളുകളില്‍ സമയം കണ്ടെത്തണം. സ്‌കൂള്‍ വിടുന്നതിന് മുമ്പ് കുട്ടികളെ ഒന്നിച്ചു ചേര്‍ത്ത് വ്യായാമവും സ്‌കൂബാ ഡാന്‍സും ചെയ്യിക്കണം. പഠനത്തിന്‍റെ ഭാഗമായുള്ള മാനസിക സമര്‍ദം ഒഴിവാകാന്‍ ഇത് സഹായിക്കും. ഇതിനായി അധ്യാപകര്‍ക്ക് പരിശീലനം നല്‍കണം. ലഹരി ഉപയോഗിക്കുന്നവരെ കൗണ്‍സലിംഗിലൂടെ മാറ്റാന്‍ ശ്രമമുണ്ടാകണം. ഇതിന് സാധിക്കാത്തവരെ ഡി അഡിക്ഷന്‍ സെന്‍ററിലാക്കണം. ഇവരെ അകറ്റുകയല്ല ചേര്‍ത്തുപിടിക്കുകയാണ് വേണ്ടതെന്ന് മുഖ്യമന്ത്രി അഭിപ്രായപ്പെട്ടു. വിദ്യാലയങ്ങളുടെ അടുത്ത് ലഹരി വില്‍ക്കുന്നവര്‍ക്കെതിരേ അധ്യാപക. രക്ഷാകർത്തൃ സമിതി ജാഗ്രത പുലര്‍ത്തണം. ഇവ ശ്രദ്ധയില്‍പ്പെട്ടാല്‍ ടോള്‍ ഫ്രീ നമ്പറിലൂടെ പരാതിപ്പെടാം. പരാതിപ്പെടുന്നവരുടെ വിവരം രഹസ്യമായിരിക്കും. സര്‍ക്കാര്‍ പര്യസങ്ങളില്‍ ഈ നമ്പര്‍ ഉള്‍പ്പെടുത്തും. പരാതിക്കാരെക്കുറിച്ച് വിവരം പുറത്തറിഞ്ഞാല്‍ ഉത്തരവാദിത്വപ്പെട്ട ഉദ്യോഗസ്ഥന്‍ സര്‍വീസില്‍ ഉണ്ടാകില്ലെന്നും മുഖ്യമന്ത്രി പറഞ്ഞു.

മലയോര മേഖലയിലെ പ്രശ്‌നം പരിഹരിക്കും; വിമാനത്താവളം യഥാര്‍ഥ്യമാകും: മുഖ്യമന്ത്രി

പത്തനംതിട്ട: അസാധ്യമെന്ന് കരുതിയതു പലതും യാഥാർഥ്യമാക്കിയ സര്‍ക്കാരാണ് കേരളം ഭരിക്കുന്നതെന്ന് മുഖ്യമന്ത്രി പിണറായി വിജയന്‍. എൽ‌ഡിഎഫ് സര്‍ക്കാരിന്‍റെ നാലാം വാര്‍ഷികത്തോടനുബന്ധിച്ച് പ്രത്യേക ക്ഷണിതാക്കളുമായി പത്തനംതിട്ടയില്‍ നടത്തിയ ജില്ലാതല കൂടിക്കാഴ്ചയില്‍ സംസാരിക്കുകയായിരുന്നു മുഖ്യമന്ത്രി. 2016 ലെ കേരളത്തിന്‍റെ അവസ്ഥയും നിലവിലെ സാഹചര്യവും താരതമ്യം ചെയ്താല്‍ വ്യത്യാസം മനസിലാകുമെന്നും അദ്ദേഹം ചൂണ്ടിക്കാട്ടി. നിപ, ഓഖി, പ്രളയം, കോവിഡ്, നിരവധി പ്രകൃതിദുരന്തങ്ങള്‍ തുടങ്ങി നിരവധി പ്രതികൂല സാഹചര്യങ്ങളെ നേരിട്ടാണ് സംസ്ഥാനം അതിശയിപ്പിക്കുന്ന വികസന മുന്നേറ്റങ്ങള്‍ നടത്തിയതെന്നും മുഖ്യമന്ത്രി പറഞ്ഞു. പത്തനംതിട്ടയുടെ മലയോര മേഖലയിൽ നിലനിൽക്കുന്ന പ്രശ്നങ്ങൾക്കു പരിഹാരമുണ്ടാകും. കാട്ടുമൃഗശല്യം, പട്ടയ വിതരണം ഉൾപ്പെടെയുള്ള വിഷയങ്ങളിൽ തീരുമാനമുണ്ടാകും. ശബരിമല വിമാനത്താവളം യാഥാർഥ്യമാകുമെന്നതിലും സംശയം വേണ്ടെന്ന് പിണറിയാ വിജയൻ ചൂണ്ടിക്കാട്ടി. സംതൃപ്തിയോടെയാണ് സംസ്ഥാന സര്‍ക്കാര്‍ 10-ാം വര്‍ഷത്തിലേക്ക് പ്രവേശിക്കുന്നത്. 2016 ന് മുമ്പ് എല്ലാ മേഖലയിലും തകര്‍ന്നടിഞ്ഞ നാട്ടില്‍ നിന്ന് ഉയര്‍ത്തെഴുന്നേറ്റു. തകര്‍ച്ചയുടെ വക്കിലായിരുന്ന ഉന്നത വിദ്യാഭ്യാസ മേഖല മെച്ചപ്പെട്ടു. പൊതുവിദ്യാഭ്യാസ രംഗത്ത് ആശങ്കയില്ല. സ്കൂളുകൾ ഹൈടെക് നിലവാരത്തിലെത്തിയതോടെ കൊഴിഞ്ഞുപോയ കുട്ടികളിൽ നല്ലൊരു പങ്കും തിരികെവന്നു. ആരോഗ്യരംഗത്ത് ജില്ലയുടെ വികസനമടക്കം മുഖ്യമന്ത്രി വ്യക്തമാക്കി. കോവിഡ് മഹാമാരിയില്‍ മുട്ടുകുത്താത്ത സംസ്ഥാനമായിരുന്നു നമ്മുടേത്. രാജ്യവും ലോകവും അത്ഭുതത്തോടെയാണ് കേരളത്തെ നോക്കിയത്. കോവിഡ് മൂര്‍ധന്യാവസ്ഥയിലായപ്പോള്‍ നമ്മുടെ ആശുപത്രികളില്‍ വെന്‍റിലേഷന്‍ സൗകര്യം ഉള്‍പ്പെടെ ഒഴിവുണ്ടായിരുന്നു. മറ്റു സംസ്ഥാനങ്ങള്‍ പ്രായമേറിയവരെ കോവിഡ് മരണത്തിലേക്ക് തള്ളിവിട്ടപ്പോള്‍ 100 വയസ് കഴിഞ്ഞവര്‍ക്കും ഇവിടെ ചികിത്സ ലഭ്യമാക്കി. ആര്‍ദ്രം മിഷനിലൂടെ പ്രാഥമിക ആരോഗ്യകേന്ദ്രങ്ങളടക്കം വികസനപാതയിലായി. പ്രകൃതി ദുരന്തങ്ങളെ അതിജീവിക്കാന്‍ നമുക്കായെന്നും പിണറായി വിജയൻ പറഞ്ഞു. മന്ത്രി വീണാ ജോർജ് അധ്യക്ഷത വഹിച്ചു. മന്ത്രി കെ.എൻ. ബാലഗോപാൽ, ഡെപ്യൂട്ടി സ്പീക്കർ ചിറ്റയം ഗോപകുമാർ, എംഎൽഎമാരായ മാത്യു ടി. തോമസ്, കെ.യു. ജനീഷ് കുമാർ പ്രമോദ് നാരാൺ, ജില്ലാ പഞ്ചായത്ത് പ്രസിഡന്‍റ് ജോർജ് ഏബ്രഹാം, ജില്ലാ കളക്ടർ എസ്. പ്രേംകൃഷ്ണൻ തുടങ്ങിയവർ പ്രസംഗിച്ചു. 23 പേർക്കാണ് സംവാദത്തിൽ ചോദ്യങ്ങൾ ഉന്നയിക്കാൻ അവസരം ലഭിച്ചത്.

വാര്‍ഷിക പദ്ധതി അംഗീകരിച്ചു

പത്തനംതിട്ട: 23 തദ്ദേശ സ്വയംഭരണ സ്ഥാപനങ്ങളുടെ 2025-26 വാര്‍ഷിക പദ്ധതി ജില്ലാ ആസൂത്രണ സമിതി അംഗീകരിച്ചു. ശുചിത്വ പ്രൊജക്ടുകള്‍ക്ക് തദ്ദേശസ്വയംഭരണസ്ഥാപനങ്ങള്‍ കൂടുതല്‍ ശ്രദ്ധ നല്‍കണമെന്ന് അധ്യക്ഷത വഹിച്ച ജില്ലാ പഞ്ചായത്ത് പ്രസിഡന്‍റ് ജോര്‍ജ് ഏബ്രഹാം പറഞ്ഞു. ഏറത്ത്, മല്ലപ്പള്ളി, ഇലന്തൂർ, കോന്നി, കോയിപ്രം, പന്തളം, റാന്നി ബ്ലോക്ക്പഞ്ചായത്തുകളുടെയും പ്രമാടം, റാന്നി, കോയിപ്രം, മൈലപ്ര, സീതത്തോട്, ആനിക്കാട്, മല്ലപ്പുഴശേരി, കോന്നി, ഓമല്ലൂര്‍ , പന്തളം തെക്കേക്കര, മെഴുവേലി, കോഴഞ്ചേരി, ചെന്നീര്‍ക്കര, മലയാലപ്പുഴ, കല്ലൂപ്പാറ, തുമ്പമണ്‍ ഗ്രാമപഞ്ചായത്തുകളുടെയും വാര്‍ഷിക പദ്ധതിയാണ് അംഗീകരിച്ചത്. പത്തനംതിട്ട, പന്തളം നഗരസഭകളുടെ അയ്യന്‍കാളി തൊഴിലുറപ്പ് പദ്ധതി - ലേബര്‍ ബജറ്റ്, പുറമറ്റം ഗ്രാമപഞ്ചായത്തിന്‍റെ ഹെല്‍ത്ത് ഗ്രാന്‍റ് പദ്ധതി എന്നിവയ്ക്കും സമിതി അംഗീകാരം നല്‍കി. ജില്ലാ പഞ്ചായത്ത് വൈസ് പ്രസിഡന്‍റ് ബീനാ പ്രഭ, ഡെപ്യൂട്ടി പ്ലാനിംഗ് ഓഫീസര്‍ ജി. ഉല്ലാസ്, ആസൂത്രണ സമിതി അംഗങ്ങൾ, തദ്ദേശ സ്വയം ഭരണസ്ഥാപന അധ്യക്ഷന്മാർ, അംഗങ്ങള്‍, സെക്രട്ടറിമാര്‍ തുടങ്ങിയവര്‍ പങ്കെടുത്തു.

Deepika.com

The Largest Read Malayalam Internet Daily

Quick Links

Rashtra Deepika LTD

Deepika.com

The Largest Read Malayalam Internet Daily

Local News

Quick Links

Rashtra Deepika LTD