കണ്ണൂർ: സന്യാസത്തെ അധിക്ഷേപിക്കുന്നതിനായി ബോധപൂർവമായ ശ്രമങ്ങൾ നടക്കുന്നതായി തലശേരി ആർച്ച്ബിഷപ് മാർ ജോസഫ് പാംപ്ലാനി. ക്രൈസ്തവ സന്യാസത്തെ അവഹേളിക്കുന്ന കക്കുകളി നാടകത്തിനെതിരെയും ആവിഷ്കാര സ്വാതന്ത്ര്യത്തിന്റെ പേരിൽ ക്രൈസ്തവ വിശ്വാസത്തെ അവഹേളിക്കുന്നതിനെതിരായും മലബാർ ക്രൈസ്തവ സമൂഹത്തിന്റെ നേതൃത്വത്തിൽ കണ്ണൂർ കളക്ടറേറ്റിലേക്ക് നടത്തിയ മാർച്ചും പ്രതിഷേധ സംഗമവും ഉദ്ഘാടനം ചെയ്തു പ്രസംഗിക്കുകയായിരുന്നു ആർച്ച് ബിഷപ്.
സന്യാസമെന്നത് ക്രിസ്തു സ്ഥാപിച്ച ഒരു ജീവിതക്രമമാണ്. മരിക്കുന്നതിനു മുന്പ് ക്രിസ്തു ഭൂമിക്കു സമ്മാനിച്ച ഏറ്റവും വലിയ പുണ്യമാണ് സന്യാസം. അന്നുമുതൽ സന്യസ്തർ ചെയ്തുവരുന്നത് ക്രിസ്തു പറഞ്ഞേല്പിച്ച കാര്യങ്ങളാണ്. സമർപ്പിതർ ഇല്ലായിരുന്നുവെങ്കിൽ കേരളത്തിലെ തെരുവുകളിൽ എത്രയോ ബാല്യങ്ങൾ അലഞ്ഞുതിരിഞ്ഞേനെ. കക്കുകളി എഴുതിയവരോ, അഭിനയിച്ചവരോ എന്നെങ്കിലും ഇതിന്റെ കണക്കെടുത്തിട്ടുണ്ടോ. മഠത്തിന്റെ അകത്തളങ്ങളിലേക്കു വന്നാൽ സന്യാസത്തിന്റെ മഹത്വങ്ങൾ കാണാം.
ആവൃതി പൊളിച്ച് മഠത്തിൽ അക്രമങ്ങൾ കാണിച്ച് പുറത്താക്കപ്പെടുന്നവർ വിളിച്ചുപറയുന്ന വൈകൃതങ്ങൾ കേട്ട് സന്യാസത്തെ വിലയിരുത്തരുത്. സന്യാസത്തിന്റെ ചിന്താധാര തെറ്റാണെന്നു പറഞ്ഞാൽ കാറൽ മാർക്സിന്റെ കമ്യൂണിസവും തെറ്റാണെന്നു പറയാൻ കഴിയും. കാറൽ മാർക്സിന്റെ ആശയം എല്ലാം എല്ലാവർക്കും പൊതുവായി ഉപയോഗിക്കുക, അധ്വാനത്തിലൂടെ കൈവരുന്നത് തുല്യമായി വീതിക്കുക എന്നതാണ്. ഈ ആശയം ക്രൈസ്തവ സന്യാസിമാരിൽ നിന്നു കടമെടുത്തതാണ്. കാറൽ മാർക്സിനോടു ചോദിച്ചാൽ സന്യാസത്തിന്റെ യഥാർഥ അർഥം എന്തെന്നറിയാൻ പറ്റും. അവിടെയാണു പുരോഗമനകലാസാഹിത്യകാർ പരാജയപ്പെട്ടത്. കക്കുകളി എന്ന നാടകം കണ്ടാൽ സന്യാസം ആവിയായി പോകുമെന്ന് ഞങ്ങൾ വിചാരിക്കുന്നില്ല. കക്കുകളിയല്ല, എന്തു കളി കളിച്ചാലും സന്യാസത്തിന്റെ അടിത്തറ ഇളക്കാൻ സാധ്യമല്ലെന്നും ബിഷപ് പറഞ്ഞു.
മഹാത്മാമന്ദിരത്തിനു സമീപത്തുനിന്നും പ്ലക്കാർഡുകളുമേന്തി സന്യാസിനിമാരുടേയും വൈദികരുടെയും അല്മായ പ്രതിനിധികളുടെയും നേതൃത്വത്തിൽ ആരംഭിച്ച പ്രകടനം കളക്ടറേറ്റിനു മുന്നിൽ സമാപിച്ചു. പ്രതിഷേധ സംഗമത്തിൽ കെസിവൈഎം തലശേരി അതിരൂപത ഡയറക്ടർ ഫാ. ജിൻസ് വാളിപ്ലാക്കൽ ആമുഖാവതരണവും സിസ്റ്റർ ആൻസി പോൾ എസ്എച്ച് ആമുഖപ്രസംഗവും നടത്തി. റവ. ഡോ. ടോം ഓലിക്കരോട്ട് വിഷയാവതരണം നടത്തി. സിസ്റ്റർ ഡോ. വന്ദന എംഎസ്എംഐ മുഖ്യപ്രഭാഷണം നടത്തി. കണ്ണൂർ രൂപത വികാരി ജനറാൾ മോൺ. ക്ലാരൻസ് പാലിയത്ത്, ബത്തേരി രൂപത പ്രതിനിധി ഫാ. ചാക്കോ ചേലന്പറന്പിൽ എന്നിവർ അനുഗ്രഹ പ്രഭാഷണം നടത്തി. റവ. ഡോ. സിബി സിഎംസി വിഷയ വിശകലനം നടത്തി. മോൺ. ആന്റണി മുതുകുന്നേൽ, ഫാ. ജോയ് കൊട്ടിയാങ്കൽ, സിസ്റ്റർ മേരി കാഞ്ചന ഒഐസി, തലശേരി അതിരൂപത പാസ്റ്ററൽ കൗൺസിൽ സെക്രട്ടറി ജോർജ് തയ്യിൽ, സിസ്റ്റർ വീണ യുഎംഐ എന്നിവർ പ്രസംഗിച്ചു. സിആർഐ കണ്ണൂർ യൂണിറ്റ് പ്രസിഡന്റ് ഫാ. വിൻസെന്റ് എടക്കരോട്ട് സ്വാഗതവും സിആർഐ കണ്ണൂർ യൂണിറ്റ് സെക്രട്ടറി സിസ്റ്റർ സോണിയ എംഎംഎം നന്ദിയും പറഞ്ഞു.
മോൺ. ജോസഫ് ഒറ്റപ്ലാക്കൽ, മോൺ. മാത്യു ഇളംതുരുത്തിപടവിൽ, റവ. ഡോ. ഫിലിപ്പ് കവിയിൽ, ഫാ. ജോയ് പൈനാടത്ത്, ഫാ. തോമസ് കൊച്ചുകരോട്ട്, ഫാ. ജോസഫ് കാവനാടി, ഫാ. ആന്റണി മഞ്ഞളാംകുന്നേൽ, ഫാ. ബെന്നി മണപ്പാട്ട്, ഫാ. റോയി നെടുന്താനം, അഡ്വ. ടോണി പുഞ്ചക്കുന്നൽ, ഫാ. ജോസഫ് തണ്ണിക്കോട്ട്, ഫാ. സ്കറിയ കല്ലൂർ, ആന്റണി നൊറോണ, രതീഷ് ആന്റണി, സിസ്റ്റർ ജെസീന്ത, സിസ്റ്റർ അഞ്ജലി എഫ്സിസി, സിസ്റ്റർ ജൂലിയഎസ്എംഎസ്, സിസ്റ്റർ ആൻസി മാത്യു, സിസ്റ്റർ അനില എസ്എബിഎസ്, സിസ്റ്റർ ലിറ്റിൽ തെരേസ സിഎംസി, സിസ്റ്റർ കൊച്ചുറാണി എസ്വിഎം, സിസ്റ്റർ മെർസിൻ എസ്ജെസി, സിസ്റ്റർ ട്രീസ പാലക്കൽ എസ്എച്ച്, സിസ്റ്റർ എമിലി എസ്കെഡി, ഫാ. ജെയിംസ് മേലേടത്ത്, ഫാ. സാമുവൽ പുതുപ്പാടി, ഫാ. ബിജു മുടംപള്ളി, ഫാ. ജോയ് സിആർ, സിസ്റ്റർ അഖില യുഎംഐ, സിസ്റ്റർ ജീവലത എസി, സിസ്റ്റർ റോസ് തെരേസ് എംഎസ്എംഐ, ഫാ. ബോബിൻ ഒപി, സിസ്റ്റർ ജെസി ഡിഎസ്എസ്, ഫാ. ജേക്കബ് ഒറവക്കൽ തുടങ്ങിയവരുടെ സാന്നിധ്യം വേദിയിൽ ഉണ്ടായിരുന്നു.