എംഡിഎംഎയുമായി ആവള സ്വദേശി പിടിയിൽ : Deepika.com Nattu Visesham

വയോധികർക്ക് ആദരമൊരുക്കി നൊച്ചാട് പഞ്ചായത്ത്

പേരാമ്പ്ര: നൊച്ചാട് പഞ്ചായത്ത് നാലാം വാർഷികാഘോഷത്തിനോടനുബന്ധിച്ച് നടത്തുന്ന ജനകീയ ഫെസ്റ്റിന്‍റെ ഭാഗമായി കാരണവർ സംഗമം സംഘടിപ്പിച്ചു. വെള്ളിയൂരിൽ നടന്ന സംഗമം ജില്ലാ പഞ്ചായത്ത് പ്രസിഡന്‍റ് ഷീജ ശശി ഉദ്ഘാടനം ചെയ്തു. പഞ്ചായത്ത് പ്രസിഡന്‍റ് പി.എം. ശാരദ പട്ടേരിക്കണ്ടി അധ്യക്ഷത വഹിച്ചു. പഞ്ചായത്തിലെ 80 കഴിഞ്ഞ നൂറിൽപരം വയോധികരെ ആദരിച്ചു. എഴുത്തുകാരനും ചിത്രകാരനുമായ സോമൻ കടലൂർ മുഖ്യ പ്രഭാഷണം നടത്തി. പഞ്ചായത്ത് വൈസ് പ്രസിഡന്‍റ് പി.എം. കുഞ്ഞിക്കണ്ണൻ, സ്ഥിരം സമിതി അധ്യക്ഷരായ ബിന്ദു അമ്പാളി, ശോഭന വൈശാഖ്, ബ്ലോക്ക് പഞ്ചായത്ത് അംഗം പ്രഭാ ശങ്കർ, എസ്. രാജീവ്, ഷിജി കൊട്ടാരക്കൽ എന്നിവർ പ്രസംഗിച്ചു. നാടൻപാട്ട് കലാകരൻ മജീഷ് കാരയാടിന്‍റെ കലാവിരുന്നും അരങ്ങേറി.

കേരള യൂത്ത് ഫ്രണ്ട് -എം സംസ്ഥാന ഐടി കോർഡിനേറ്റർക്ക് മർദനമേറ്റു

പേരാമ്പ്ര: കേരള യൂത്ത് ഫ്രണ്ട് -എം സംസ്ഥാന ഐടി കോർഡിനേറ്റർ ഇ.ടി. സനീഷിന് മർദനമേറ്റു. കായണ്ണ വെളിച്ചം അസോസിയേഷന്‍റെ ചടങ്ങിൽ പങ്കെടുത്തു പുറത്ത് ഇറങ്ങിയ സമയത്ത് ചില ആളുകൾ സംഘം ചേർന്ന് മർദിക്കുകയായിരുന്നു. ആശുപത്രിയിൽ ചികിത്സ തേടി. സംഭവത്തിനുത്തരവാദികളായവരുടെ പേരിൽ ശക്തമായ നടപടി സ്വീകരിക്കണമെന്ന് കേരള കോൺഗ്രസ് -എം കായണ്ണ മണ്ഡലം കമ്മിറ്റി ആവശ്യപ്പെട്ടു. മണ്ഡലം പ്രസിഡന്‍റ് എൻ.പി. ഗോപി അധ്യക്ഷത വഹിച്ചു. സംസ്ഥാന സെക്രട്ടറിയേറ്റ് അംഗം കെ.കെ. നാരായണൻ, കെ.കെ. സന്തോഷ്‌, ഷാജു അറക്കൽ, ബിനീഷ് പടയാട്ട് പൊയിൽ, സതീശൻ കൈതാപൊയിൽ, പ്രദീപൻ പൂക്കുണ്ടുകര എന്നിവർ പ്രസംഗിച്ചു.

ഡയറ്റില്‍ അധ്യാപകരുടെയും ജീവനക്കാരുടെയും ശമ്പളം മുടങ്ങി

കോഴിക്കോട്: പൊതുവിദ്യാഭ്യാസ വകുപ്പിന് കീഴില്‍ പ്രവര്‍ത്തിക്കുന്ന ജില്ലാ അധ്യാപക പരിശീലന കേന്ദ്രമായ ഡയറ്റിലെ അധ്യാപകരും ജീവനക്കാരും ശമ്പളം ലഭിക്കാതെ ദുരിതത്തില്‍. അധ്യാപക പരിശീലന കേന്ദ്രങ്ങളില്‍ മാര്‍ച്ചിലെ ശമ്പളവിതരണമാണ് മുടങ്ങിയത്. ഡയറ്റിന്‍റെ സാലറി ഹെഡ് ഉള്‍പ്പെടെയുള്ള 13 ശീര്‍ഷകങ്ങള്‍ ഈ സാമ്പത്തികവര്‍ഷം ബജറ്റില്‍ ഉള്‍പ്പെടുത്തിയിട്ടില്ല. അതിനാല്‍ ട്രഷറികളില്‍ ട്രഷറികളില്‍ ഡയറ്റുകളുടെ ബില്ല് സമര്‍പ്പിക്കാന്‍ കഴിയാത്ത അവസ്ഥയാണുള്ളത്. ശമ്പളം നല്‍കുന്ന ശീര്‍ഷകങ്ങള്‍ മരവിപ്പിച്ചിരിക്കുന്നത് വഞ്ചനയാണെന്നും ധനകാര്യവകുപ്പും പൊതു വിദ്യാഭ്യാസവകുപ്പും ഇടപെട്ട് ജീവനക്കാരുടെ ശമ്പളം കിട്ടാന്‍ സാഹചര്യം ഒരുക്കണമെന്നും എന്‍ജിഒ അസോസിയേഷന്‍ ആവശ്യപ്പെട്ടു.

ബാർബർ ഷോപ്പുകളിൽ ആരോഗ്യവകുപ്പ് മിന്നൽ പരിശോധന നടത്തി

കൂടരഞ്ഞി: വേണ്ടത്ര ശുചിത്വമില്ലാതെ പ്രവർത്തിക്കുന്നുവെന്ന പരാതിയിൽ ബാർബർ ഷോപ്പുകളിൽ ആരോഗ്യവകുപ്പ് മിന്നൽ പരിശോധന നടത്തി. മൗണ്ട് ഹീറോസ് ജനകീയ കൂട്ടായ്മയിലൂടെ ഉയർന്നുവന്ന പരാതിയുടെ അടിസ്ഥാനത്തിൽ പഞ്ചായത്ത് പ്രസിഡന്‍റ് ആദർശ് ജോസഫിന്‍റെ നിർദേശത്തെ തുടർന്നായിരുന്നു ബാർബർ ഷോപ്പുകളിൽ മിന്നൽ പരിശോധനയും ശുചിത്വ ബോധവത്കരണവും നടത്തിയത്. ശുചിത്വ മാനദണ്ഡങ്ങൾ ഇല്ലാതെ പ്രവർത്തിച്ച ബാർബർ ഷോപ്പുകൾക്ക് നോട്ടീസ് നൽകി. വൃത്തിഹീനമായതും കാലാവധി കഴിഞ്ഞ ക്രീമുകൾ ഉപയോഗിക്കുന്നതായും പരിശോധനയിൽ കണ്ടെത്തി. ലൈസൻസ് ഇല്ലാതെ പ്രവർത്തിച്ച ബാർബർ ഷോപ്പുകൾ ലൈസൻസ് എടുത്തേ പ്രവർത്തിക്കാൻ പാടുള്ളുവെന്ന് പഞ്ചായത്ത് സെക്രട്ടറി അറിയിച്ചു. കൂടരഞ്ഞി കുടുംബാരോഗ്യ കേന്ദ്രം ഹെൽത്ത് ഇൻസ്പെക്ടർ സി. രാജീവൻ, ജൂനിയർ ഹെൽത്ത് ഇൻസ്പെക്ടർ കെ. സന്ദീപ് തുടങ്ങിയവരുടെ നേതൃത്വത്തിലാണ് പരിശോധന നടന്നത്.

നവീകരിച്ച ആയുർവേദ ആശുപത്രി ഉദ്ഘാടനം ചെയ്തു

മുക്കം : 2024-2025 വാർഷിക പദ്ധതിയിൽ ഉൾപ്പെടുത്തി നവീകരിച്ച കൊടിയത്തൂർ പഞ്ചായത്തിലെ ആയുർവേദ ആശുപത്രി ഉദ്ഘാടനം ചെയ്തു. ആശുപത്രിയിലെത്തുന്നവർക്കും ജീവനക്കാർക്കും കൂടുതൽ അടിസ്ഥാന സൗകര്യങ്ങൾ ഒരുക്കുക എന്ന ലക്ഷ്യത്തോടെ ചുറ്റുമതിൽ, മുറ്റം ഇന്‍റർലോക്ക് കട്ട വിരിക്കൽ, ഗേറ്റ് നവീകരണം, പെയിന്‍റിംഗ് എന്നിവയാണ് പൂർത്തിയാക്കിയത്. പഞ്ചായത്ത് പ്രസിഡന്‍റ് ദിവ്യ ഷിബു ഉദ്ഘാടനം നിർവഹിച്ചു. വൈസ് പ്രസിഡന്‍റ് ഫസൽ കൊടിയത്തൂർ അധ്യക്ഷത വഹിച്ചു. സ്റ്റാൻഡിംഗ് കമ്മിറ്റി ചെയർപേഴ്സൺമാരായ മറിയം കുട്ടി ഹസൻ, ആയിഷ ചേലപ്പുറം, വാർഡ് മെമ്പർ കോമളം തോണിച്ചാൽ തുടങ്ങിയവർ പ്രസംഗിച്ചു.

തിരുവമ്പാടിയിൽ ഡെങ്കിപ്പനി പ്രതിരോധം ഊർജ്ജിതം; "തോട്ടങ്ങളിലേക്ക് നീങ്ങാം' കാമ്പയിൻ ഉദ്ഘാടനം ചെയ്തു

തിരുവമ്പാടി: തിരുവമ്പാടി പഞ്ചായത്തിന്‍റെയും കുടുംബാരോഗ്യ കേന്ദ്രത്തിന്‍റെയും സംയുക്താഭിമുഖ്യത്തിൽ ഡെങ്കിപ്പനി പ്രതിരോധ പ്രവർത്തനങ്ങൾ ഊർജ്ജിതമാക്കി. തിരുവമ്പാടി ആൻസിലാ ഭവനിൽ നടന്ന "തോട്ടങ്ങളിലേക്ക് നീങ്ങാം' കാമ്പയിൻ പഞ്ചായത്ത് പ്രസിഡന്‍റ് ബിന്ദു ജോൺസൺ ഉദ്ഘാടനം ചെയ്തു. കാമ്പയിന്‍റെ ഭാഗമായി റബർ, കമുങ്ങ്, കൊക്കോ തുടങ്ങിയ തോട്ടങ്ങളിൽ പരിശോധന, തോട്ടം ഉടമകൾക്ക് നോട്ടീസ് നൽകൽ, കൊതുകിന്‍റെ ഉറവിട നശീകരണം, ബോധവത്കരണം എന്നീ പരിപാടികൾ നടക്കും. വേനൽ മഴ പെയ്തതിനാൽ കൊതുക് വളരുന്ന സാഹചര്യം ഒഴിവാക്കുന്നതിനായി എല്ലാവരും കൊതുകിന്‍റെ ഉറവിട നശീകരണ പ്രവർത്തനങ്ങളിൽ പങ്കാളികളാകണമെന്ന് മെഡിക്കൽ ഓഫീസർ ഡോ. കെ.വി. പ്രിയ അറിയിച്ചു. സ്ഥിരം സമിതി അംഗങ്ങളായ റംല ചോലക്കൽ, പഞ്ചായത്ത് സെക്രട്ടറി കെ. ഷാജു, ഹെൽത്ത് ഇൻസ്പെക്ടർ എം. സുനീർ, അജാസ്, ജൂണിയർ ഹെൽത്ത് ഇൻസ്പെക്ടർമാരായ റോഷൻലാൽ, സെൽവകുമാർ, മുഹമ്മദ് മുസ്തഫ ഖാൻ, യു.കെ. മനീഷ, ശരണ്യ ചന്ദ്രൻ എന്നിവർ പങ്കെടുത്തു.

പ്രത്യാശയുള്ളവർ നിരാശരാകുന്നില്ല: ബിഷപ് ഇഞ്ചനാനിയിൽ

കൂരാച്ചുണ്ട്: നമ്മൾ പ്രത്യാശയുള്ളവരായിരിക്കണമെന്നും പ്രത്യാശയുള്ളവർ നിരാശരാകുന്നില്ലെന്നും താമരശേരി ബിഷപ് മാർ റെമീജിയോസ് ഇഞ്ചനാനിയിൽ പറഞ്ഞു. കൂരാച്ചുണ്ട് സെന്‍റ് തോമസ് ഫൊറോന ഇടവകയുടെ പ്ലാറ്റിനം ജൂബിലി ഉദ്ഘാടനവും ഇടവകയിൽ പുതുതായി നിർമിച്ച വൈദീക മന്ദിരത്തിന്‍റെ വെഞ്ചരിപ്പ് കർമ്മവും നിർവഹിച്ച് സംസാരിക്കുകയായിരുന്നു ബിഷപ്. പ്രത്യാശയുടെ ജൂബിലി ആഘോഷിക്കാമെന്ന് ആഹ്വാനം ചെയ്തുകൊണ്ടാണ് ഫ്രാൻസിസ് മാർപ്പാപ്പ നിത്യതയിലേക്ക് കടന്നു പോയത്. അതിനാൽ പ്രത്യാശയുടെ സന്ദേശം നമുക്ക് ഹൃദയത്തിൽ സൂക്ഷിക്കാമെന്നും ബിഷപ് പറഞ്ഞു. ചടങ്ങിനോട് അനുബന്ധിച്ച് നടന്ന വിശുദ്ധ കുർബാനയ്ക്ക് രൂപത ചാൻസലർ സെബാസ്റ്റ്യൻ കവളക്കാട്ട് മുഖ്യ കാർമികത്വം വഹിച്ചു. ഫാ. സായി പാറൻകുളങ്ങര, ഫാ. ലിതോഷ് കരിങ്ങട, വികാരി ഫാ. വിൻസെന്‍റ് കണ്ടത്തിൽ, അസിസ്റ്റന്‍റ് വികാരി ഫാ. മൈക്കിൾ നീലംപറമ്പിൽ എന്നിവർ സഹകാർമികരായി.

അങ്കണവാടികൾ അമ്മയുടെയും കുഞ്ഞുങ്ങളുടെയും സംരക്ഷണ കേന്ദ്രങ്ങൾ: എളമരം കരീം

താമരശേരി: അങ്കണവാടികൾ അമ്മമാരുടെയും കുഞ്ഞുങ്ങളുടെയും ഗർഭിണികളുടെയും സംരക്ഷണകേന്ദ്രങ്ങളാണെന്ന് മുൻ എംപി എളമരം കരീം അഭിപ്രായപ്പെട്ടു. കൊടുവള്ളി മുനിസിപ്പാലിറ്റിയിലെ പതിനെട്ടാം ഡിവിഷൻ കരുവൻപൊയിലിൽ രാജ്യസഭ എംപിയായിരുന്ന എളമരം കരീം അനുവദിച്ച 30 ലക്ഷം രൂപ ഉപയോഗിച്ച് നിർമിച്ച മോയോട്ടുകടവ് അങ്കണവാടി പുതിയ കെട്ടിടം ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം. അദ്ദേഹത്തിന്‍റെ തന്നെ ഫണ്ട് ഉപയോഗിച്ച് നിർമാണം പൂർത്തിയാക്കിയ പതിനേഴാം ഡിവിഷനിലെ കളത്തിങ്ങൽ - പേരൂർ മുണ്ടോട്ട് റോഡിന്‍റെ ഉദ്ഘാടനവും അദ്ദേഹം നിർവഹിച്ചു. ചടങ്ങിൽ അങ്കണവാടിക്ക് സൗജന്യമായി സ്ഥലം നൽകിയ നടുവിൽ കണ്ടി മുഹമ്മദിനെയും സർവീസിൽ നിന്നും വിരമിക്കുന്ന അങ്കണവാടി വർക്കർ ശോഭനയെയും ആദരിച്ചു. പരിപാടിയിൽ പിടിഎ റഹീം എംഎൽഎ അധ്യക്ഷത വഹിച്ചു. മുൻ എംഎൽഎ കാരാട്ട് റസാക്ക്, ഷറഫുദ്ദീൻ, മുനിസിപ്പൽ സെക്രട്ടറി കെ. സുധീർ, മാതോലത്ത് അബ്ദുല്ല, ഡോ. എ.കെ. അബ്ദുൽ ഖാദർ, പി.പി. മുഹമ്മദ്‌, പി.പി. ഹുസൈൻ, ഡിവിഷൻ കൗൺസിലർ വായോളി മുഹമ്മദ്, പി. സുരേഷ് ബാബു എന്നിവർ പ്രസംഗിച്ചു.

പുഴയിൽ ഇറച്ചി മാലിന്യം തള്ളിയ സ്ഥാപനം അടപ്പിച്ചു

പേരാമ്പ്ര: ചേനായി ടൗണിൽ പ്രവർത്തിക്കുന്ന ചിക്കൻ സ്റ്റാളിൽ നിന്നുള്ള അറവു മാലിന്യം ചേനായി പുഴയിൽ തള്ളിയതിനെ തുടർന്ന് പേരാമ്പ്ര താലൂക്കാശുപത്രി ഹെൽത്ത് ഇൻസ്പെക്ടർ പി.കെ. ശരത് കുമാർ നടത്തിയ പരിശോധനയിൽ സ്ഥാപനം അടച്ചു പൂട്ടാനും പിഴയീടാക്കാനും നിർദ്ദേശം നൽകി.

ജില്ലയിലെ പട്ടയ പ്രശ്നങ്ങള്‍ വേഗത്തില്‍ പരിഹരിക്കും: മന്ത്രി കെ. രാജന്‍

കോഴിക്കോട്: കേരളത്തില്‍ അഞ്ചു ലക്ഷം പട്ടയങ്ങള്‍ വിതരണം ചെയ്യുകയെന്ന ലക്ഷ്യം ഈ വര്‍ഷത്തോടെ പൂര്‍ത്തീകരിക്കാനാണ് സര്‍ക്കാര്‍ തീരുമാനമെന്നും ജില്ലയിലെ പട്ടയവുമായി ബന്ധപ്പെട്ട വിഷയങ്ങള്‍ പരിഹരിക്കുന്നതിനുള്ള നടപടികള്‍ വേഗത്തിലാക്കുമെന്നും റവന്യു മന്ത്രി കെ. രാജന്‍. പട്ടയ വിതരണവുമായി ബന്ധപ്പെട്ട റവന്യു വകുപ്പിന്‍റെ അവലോകന യോഗത്തില്‍ സംസാരിക്കുകയായിരുന്നു അദേഹം. ഭൂമി ലഭ്യമാകുന്ന മുറയ്ക്ക് അതിദരിദ്രര്‍ക്കും ഭൂരഹിതര്‍ക്കും വിതരണം ചെയ്യാനുള്ള നടപടികള്‍ വേഗത്തിലാക്കാനും ഇതിനായി താലൂക്ക് തലത്തിലും വില്ലേജ് തലത്തിലും ഇടപെടാനുള്ള പ്രത്യേക ടീം തയാറാക്കാനും മന്ത്രി നിര്‍ദേശം നല്‍കി. കളക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന യോഗത്തില്‍ പുഴ, പാറ, കടല്‍ പുറമ്പോക്ക്, വനഭൂമി, മിച്ചഭൂമി, കോളനി പട്ടയം എന്നിങ്ങനെ 175 പട്ടയ പ്രശ്നങ്ങളില്‍ ചര്‍ച്ച നടന്നു. നിയമപ്രശ്നങ്ങളുള്ള പട്ടയങ്ങളില്‍ സര്‍ക്കാര്‍ ഇടപെടലുകള്‍ വേണ്ടതിനെ കുറിച്ചുള്ള വിവരശേഖരണവും മന്ത്രി നടത്തി. ജില്ലാ കളക്ടര്‍ സ്നേഹില്‍ കുമാര്‍ സിംഗ്, സബ് കളക്ടര്‍ ഹര്‍ഷില്‍ ആര്‍. മീണ, എഡിഎം സി. മുഹമ്മദ് റഫീഖ്, ലാന്‍ഡ് റവന്യു ഡെപ്യൂട്ടി കളക്ടര്‍ പി.എന്‍. പുരുഷോത്തമന്‍, ഡെപ്യൂട്ടി കളക്ടര്‍ ഇ. അനിത കുമാരി, തഹസില്‍ദാര്‍മാര്‍, ഉദ്യോഗസ്ഥര്‍ തുടങ്ങിയവര്‍ യോഗത്തില്‍ പങ്കെടുത്തു.

കര്‍ഷക സേവനകേന്ദ്രം ഉദ്ഘാടനം ചെയ്തു

മുക്കം: കൊടിയത്തൂര്‍ സഹകരണ ബാങ്കിന്‍റെ വിപുലീകരിച്ച ഗ്രീൻലാന്‍റ് കര്‍ഷക സേവന കേന്ദ്രത്തിന്‍റെ ഉദ്ഘാടനം ബാങ്ക് പ്രസിഡന്‍റ് സന്തോഷ് സബാസ്റ്റ്യന്‍റെ അധ്യക്ഷതയില്‍ ലിന്‍റോ ജോസഫ് എംഎല്‍എ നിര്‍വഹിച്ചു. സര്‍ക്കാര്‍ സഹകരണ വകുപ്പ് മുഖേന കുന്നമംഗലം ബ്ലോക്കുതലത്തില്‍ കൊടിയത്തൂര്‍ സര്‍വീസ് സഹകരണ ബാങ്കിന് അനുവദിച്ച കര്‍ഷക സേവനകേന്ദ്രം എടവണ്ണ-കൊയിലാണ്ടി സംസ്ഥാന പാതയില്‍ എരഞ്ഞിമാവിന് സമീപമാണ് പ്രവര്‍ത്തിച്ചുവരുന്നത്. കാര്‍ഷിക ഉല്പാദനം വർധിപ്പിക്കുന്നതിനായി ഗ്രാമപഞ്ചായത്തുകളിലെ കാര്‍ഷിക പ്രവര്‍ത്തനങ്ങള്‍ ബ്ലോക്കുതലത്തില്‍ ഏകോപിപ്പിക്കുക, കര്‍ഷകര്‍ക്ക് ഗുണമേന്മയുള്ള വിത്ത്, വളം, കീടനാശിനി എന്നിവ ലഭ്യമാക്കുക, ആധുനിക രീതിയില്‍ ശാസ്ത്രീയമായി കൃഷി ചെയ്യുന്നതിന് കര്‍ഷകര്‍ക്ക് പരിശീലനവും നിര്‍ദ്ദേശങ്ങളും നല്‍കുക, കര്‍ഷകര്‍ക്ക് ആവശ്യമായ കാര്‍ഷികോപകരണങ്ങള്‍ ലഭ്യമാക്കുക എന്നീ ലക്ഷ്യങ്ങളോടെ പ്രവര്‍ത്തിക്കുന്ന കര്‍ഷകസേവന കേന്ദ്രത്തില്‍ കൃഷിക്കാവശ്യമായ എല്ലാവിധ ഹൈബ്രീഡ് വിത്തുകള്‍, തൈകള്‍, വിവിധ തരം ഫലവൃക്ഷ തൈകള്‍, ആകര്‍ഷകമായ അലങ്കാര ചെടികള്‍, ചെടി ചട്ടികള്‍, കാര്‍ഷിക മേഖലക്കാവശ്യമായ ഉപകരണങ്ങള്‍, ജൈവ വളങ്ങള്‍ തുടങ്ങിയവയെല്ലാം ഇവിടെ ലഭ്യമാക്കിയിട്ടുണ്ട്. നവീകരിച്ച കര്‍ഷക സേവനകേന്ദ്രത്തിലെ ആദ്യ വില്പന കൊടിയത്തൂര്‍ കൃഷിഭവനിലെ കൃഷി അസിസ്റ്റന്‍റ് നിഷക്ക് നല്‍കി ലിന്‍റോ ജോസഫ് എംഎല്‍എ നിര്‍വഹിച്ചു. ചടങ്ങില്‍ ബാങ്ക് ഡയറക്ടര്‍മാരായ ഷാജു പ്ലാത്തോട്ടം, എം.കെ ഉണ്ണിക്കോയ, കെ.സി. മമ്മത്കുട്ടി, നൂര്‍ജഹാന്‍, എം. കുഞ്ഞിപ്പ എന്നിവര്‍ പ്രസംഗിച്ചു.

കൂരാച്ചുണ്ടിൽ മഴക്കാല രോഗപ്രതിരോധ പ്രവർത്തനങ്ങൾ ആരംഭിക്കുന്നു

കുരാച്ചുണ്ട്: പഞ്ചായത്ത്, കൂരാച്ചുണ്ട് സാമൂഹിക ആരോഗ്യ കേന്ദ്രം, കക്കയം കുടുംബാരോഗ്യ കേന്ദ്രം എന്നിവ സംയുക്തമായി പഞ്ചായത്ത് തല മഴക്കാല രോഗപ്രതിരോധ പ്രവർത്തനങ്ങൾക്ക് തുടക്കമിട്ടു. പഞ്ചായത്ത് ഹാളിൽ ചേർന്ന യോഗം പഞ്ചായത്ത് പ്രസിഡന്‍റ് ഒ.കെ. അമ്മദ് അധ്യക്ഷത വഹിച്ചു. വൈസ് പ്രസിഡന്‍റ് വിൻസി തോമസ്, വികസന കാര്യ സ്റ്റാൻഡിംഗ് കമ്മിറ്റി ചെയർമാൻ സണ്ണി പുതിയകുന്നേൽ, പഞ്ചായത്ത് അംഗങ്ങളായ അരുൺ ജോസ്, സിമിലി ബിജു, ജെസി ജോസഫ്, വിൽസൺ പാത്തിച്ചാലിൽ, പഞ്ചായത്ത് സെക്രട്ടറി ഇ. ഷാനവാസ്, മെഡിക്കൽ ഓഫീസർമാരായ ഡോ. നൗഷാദ്, ഡോ. ബിനീഷ്, ഡോ. അനു സി. മാത്യു, വിവിധ രാഷ്ട്രീയ സംഘടന പ്രതിനിധികളായ അഗസ്റ്റിൻ കാരക്കട, വി.ജെ. സണ്ണി, വി.എസ് ഹമീദ്, എം.സി ജോയ്, ഷിബു ജോർജ്, സുപ്പി തെരുവത്ത്, സണ്ണി പ്ലാത്തോട്ടം, ജോസ് ചെരിയൻ, കാർത്തിക വിജയൻ, ഇ.ടി നിതിൻ എന്നിവർ പങ്കെടുത്തു. പ്രതിരോധ പ്രവർത്തനങ്ങളുടെ ഭാഗമായി വാർഡ് തല അയൽക്കൂട്ടങ്ങൾ കേന്ദ്രീകരിച്ച് വിപുലമായ യോഗങ്ങൾ വിളിച്ചുചേർക്കുന്നതിനും വെള്ളം കെട്ടി കിടക്കുന്നതും കൊതുകിന്‍റെ ഉറവിടങ്ങൾ നശിപ്പിക്കുന്നതിനുള്ള നടപടികൾ സ്വീകരിക്കും. എല്ലാ വാർഡുകളിലെയും കുടുംബശ്രീ, ആരോഗ്യ വോളണ്ടിയർമാർ അടങ്ങുന്ന സന്നദ്ധസേന അംഗങ്ങൾ വീടുകളിൽ ബോധവത്ക്കരണം നടത്തും. വ്യാപാരികളുടെയും സന്നദ്ധ സംഘടനകളുടെയും സഹകരണത്തോടെ അങ്ങാടി ഉൾപ്പെടെയുള്ള പൊതുസ്ഥലങ്ങളിൽ ശുചീകരണ പ്രവർത്തികൾ നടത്തും.

ഇന്ത്യന്‍ ഭരണഘടനയെ കൂട്ടിയോജിപ്പിക്കുന്നത് ബഹുസ്വരത: മന്ത്രി കെ. രാജന്‍

കോഴിക്കോട്: വൈവിധ്യങ്ങളുടെ ബഹുസ്വരതയാണ് ഇന്ത്യന്‍ ഭരണഘടനയെ കൂട്ടിയോജിപ്പിക്കുന്നതെന്ന് റവന്യു മന്ത്രി കെ. രാജന്‍. ഭരണഘടനയുടെ 75-ാം വാര്‍ഷികാഘോഷത്തിണന്‍റെ ഭാഗമായി കോഴിക്കോട് ജില്ലാ പഞ്ചായത്ത് അങ്കണത്തില്‍ പണി പൂര്‍ത്തീകരിച്ച ഭരണഘടന ചത്വരം അനാച്ഛാദനം ചെയ്ത് സംസാരിക്കുകയായിരുന്നു മന്ത്രി. ഫെഡറല്‍ തത്വങ്ങള്‍ക്കും ജനാധിപത്യ വ്യവസ്ഥകള്‍ക്കും ഭരണഘടനാ മൂല്യങ്ങള്‍ക്കും എതിരാണെന്നത്‌കൊണ്ട് കേന്ദ്രം നടപ്പാക്കിയ പല ബില്ലുകള്‍ക്കെതിരേയും കേരള നിയമസഭ ഐകകണ്‌ഠ്യേന പ്രമേയങ്ങള്‍ പാസാക്കാന്‍ നിര്‍ബന്ധിതമായിട്ടുണ്ടെന്നും രാജ്യത്തിന്‍റെ ഭരണഘടനയെ മുറുകെ പിടിക്കേണ്ട കാലത്ത് ജില്ലാ പഞ്ചായത്ത് ഏറ്റെടുത്ത പ്രവര്‍ത്തനം അഭിനന്ദനാര്‍ഹമാണെന്നും മന്ത്രി പറഞ്ഞു. 2024-25 വാര്‍ഷിക പദ്ധതിയില്‍ ഉള്‍പ്പെടുത്തി 4.7 ലക്ഷം രൂപ ചെലവിട്ടാണ് ഭരണഘടന ചത്വരം ഒരുക്കിയത്. ഇന്ത്യന്‍ ഭരണഘടയുടെ ആമുഖം, ദണ്ഡി യാത്ര, അംബേദ്കര്‍, ഭഗത് സിംഗ്, സുഭാഷ് ചന്ദ്രബോസ് തുടങ്ങിയവരുടെ ചിത്രങ്ങള്‍ എന്നിവക്ക് പുറമെ ഇന്ത്യന്‍ കാര്‍ഷിക രംഗത്തെയും സൈന്യത്തെയും ഭരണഘടന ചത്വരത്തില്‍ അടയാളപ്പെടുത്തിയിട്ടുണ്ട്. ലിനീഷ് കാഞ്ഞിലശേരിയാണ് പ്രധാന ശില്‍പി. ചടങ്ങില്‍ ജില്ലാ പഞ്ചായത്ത് പ്രസിഡന്‍റ് ഷീജ ശശി അധ്യക്ഷ വഹിച്ചു. അസിസ്റ്റന്‍റ് എക്സിക്യൂട്ടീവ് എൻജിനിയര്‍ സിന്ധു റിപ്പോര്‍ട്ട് അവതരിപ്പിച്ചു. എം.കെ. രാഘവന്‍ എംപി, തോട്ടത്തില്‍ രവീന്ദ്രന്‍ എംഎല്‍എ എന്നിവര്‍ മുഖ്യാതിഥികളായി. ജില്ലാ കളക്ടര്‍ സ്‌നേഹില്‍ കുമാര്‍ സിംഗ്, ഡെപ്യൂട്ടി മേയര്‍ സി.പി. മുസാഫിര്‍ അഹമ്മദ്, കോര്‍പറേഷന്‍ സ്റ്റാന്‍ഡിംഗ് കമ്മിറ്റി ചെയര്‍മാന്‍ പി.കെ. നാസര്‍, കൗണ്‍സിലര്‍ എം.എന്‍. പ്രവീണ്‍, ജില്ലാ പഞ്ചായത്ത് സ്ഥിരം സമിതി അധ്യക്ഷരായ കെ.വി. റീന, വി.പി. ജമീല, നിഷ പുത്തന്‍പുരയില്‍, സുരേന്ദ്രന്‍, ജില്ലാ പഞ്ചായത്ത് അംഗങ്ങളായ സുരേഷ്, എം. ധനീഷ് ലാല്‍, മുക്കം മുഹമ്മദ്, എം.പി. ശിവാനന്ദന്‍, എഡിഎം മുഹമ്മദ് റഫീഖ്, ജില്ലാ പഞ്ചായത്ത് വൈസ് പ്രസിഡന്‍റ് അഡ്വ. പി. ഗവാസ്, സെക്രട്ടറി ടി.ജി. അജേഷ്, രാഷ്ട്രീയ പാര്‍ട്ടി പ്രതിനിധികള്‍, ഉദ്യോഗസ്ഥര്‍ തുടങ്ങിയവര്‍ പങ്കെടുത്തു. ചത്വരത്തിന്‍റെ നിര്‍മാണത്തില്‍ പങ്കാളിയായവരെ പരിപാടിയില്‍ ആദരിച്ചു.

സര്‍ക്കാരിന്‍റെ ധൂര്‍ത്ത് പാവപ്പെട്ടവരോടുള്ള വെല്ലുവിളി: അനൂപ് ജേക്കബ് എംഎല്‍എ

കോഴിക്കോട്: സര്‍ക്കാരിന്‍റെ നാലാം വാര്‍ഷികാഘോഷത്തിന്‍റെ പേരില്‍ സംസ്ഥാനത്തുടനീളം ധൂര്‍ത്ത് നടത്തുന്നത് പാവപ്പെട്ടവരോടുള്ള വെല്ലുവിളിയാണെന്ന് കേരളാ കോണ്‍ഗ്രസ് (ജേക്കബ്) ലീഡര്‍ അനൂപ് ജേക്കബ് എംഎല്‍എ. പാര്‍ട്ടി നേതൃസംഗമം ഉദ്ഘാടനം ചെയ്യുകയായിരുന്നു അദ്ദേഹം. ന്യായമായ ആവശ്യങ്ങള്‍ക്കായി സമരം നടത്തുന്ന ആശാവര്‍ക്കര്‍മാരുടേയും അങ്കണവാടി ജീവനക്കാരുടെയും പ്രശ്‌നങ്ങള്‍ പരിഹരിക്കുന്നതില്‍ വിമുഖത പുലര്‍ത്തുന്ന സര്‍ക്കാര്‍ ആഘോഷങ്ങളുടെ പന്തലിനും പരസ്യത്തിനുമായി കോടിക്കണക്കിനു രൂപയാണ് ധൂര്‍ത്തടിക്കുന്നത്. പൊതു സമൂഹം ഇത് തിരിച്ചറിയുമെന്നും അനൂപ് ജേക്കബ് പറഞ്ഞു. ജില്ലാ പ്രസിഡന്‍റ് കെ.പി. രാധാകൃഷ്ണന്‍ അധ്യക്ഷത വഹിച്ചു. സംസ്ഥാന ജനറല്‍ സെക്രട്ടറി സി. വീരാന്‍കുട്ടി, രാജന്‍ വര്‍ക്കി, പ്രദീപ് ചോമ്പാല, മനോജ് ആവള, ചക്രപാണി കുറ്റ്യാടി, ഷഫീഖ് തറോപ്പൊയില്‍, സലീം പുല്ലടി, കെ.എം.നിസാര്‍, പ്രദീഷ് കാപ്പുങ്കര, ആഷിക് പി. അശോക്, തോമസ് പീറ്റര്‍, രാജേഷ് കൊയിലാണ്ടി, പൗലോസ് കരിപ്പാക്കുടി, വി.ഡി.ജോസ്, പി.പി.നൗഷാദ്, നാസര്‍ ബേപ്പൂര്‍ തുടങ്ങിയവര്‍ പ്രസംഗിച്ചു. മേയ് 9,10 തീയതികളില്‍ കോട്ടയത്ത് നടക്കുന്ന പാര്‍ട്ടി സംസ്ഥാന സമ്മേളനം വിജയിപ്പിക്കാനും കോഴിക്കോട് ജില്ലയില്‍ നിന്നു 300 പ്രവര്‍ത്തകരെ പങ്കെടുപ്പിക്കാനും തീരുമാനിച്ചു.

"കളക്ടര്‍ക്കൊരു കത്തു'മായി ജില്ലാ ഭരണകൂടം

കോഴിക്കോട്: ലഹരിയുമായി ബന്ധപ്പെട്ട വിദ്യാര്‍ഥികളുടെ ആശയങ്ങളും ആശങ്കകളും ജില്ലാ കളക്ടറുമായി പങ്കുവെക്കാന്‍ "കളക്ടര്‍ക്കൊരു കത്ത്' കാമ്പയിനുമായി ജില്ലാ ഭരണകൂടം. ലഹരി ഉപയോഗത്തിലെ വര്‍ധനവ്, അത് ചെലുത്തുന്ന സ്വാധീനം, ലഹരി ഉപയോഗത്തിന് പ്രേരകമാകുന്ന സാഹചര്യങ്ങള്‍ എന്നിവയെ കുറിച്ച ആശങ്കകള്‍, പരാതികള്‍, മികച്ച പ്രതിരോധ മാര്‍ഗങ്ങള്‍, അവബോധ പ്രവര്‍ത്തനങ്ങള്‍ സംബന്ധിച്ച നൂതന ആശയങ്ങള്‍ തുടങ്ങിയവ ഹൈസ്‌കൂള്‍, ഹയര്‍ സെക്കന്‍ഡറി വിദ്യാര്‍ഥികള്‍ക്ക് കളക്ടറെ കത്തിലൂടെ അറിയിക്കാം. ലഹരി ഉപയോഗം വര്‍ധിക്കുന്ന സാഹചര്യത്തില്‍ പൊതുജന കൂട്ടായ്മയില്‍ പ്രചാരണ, പ്രതിരോധ മാര്‍ഗങ്ങള്‍ ഒരുക്കുന്നതിന്‍റെ ഭാഗമായാണ് കാമ്പയിന്‍. ലഹരി പ്രതിരോധ പ്രവര്‍ത്തനങ്ങളുടെ ഭാഗമായി ജില്ലാ ഭരണകൂടം നടപ്പാക്കി വരുന്ന പുതുലഹരിയിലേക്ക് #Sharelove notdrugs പരിപാടിയോടനുബന്ധിച്ച് നശാ മുക്ത് അഭിയാന്‍ കേന്ദ്ര പദ്ധതിയുടെ പിന്തുണയിലാണ് കാമ്പയിന്‍. കത്തുകള്‍ 30നകം ജില്ലാ കളക്ടര്‍, നമ്മുടെ കോഴിക്കോട് മിഷന്‍ റൂം, സി ബ്ലോക്ക്, രണ്ടാംനില, കോഴിക്കോട്, 673020 വിലാസത്തില്‍ അയക്കണം. ഫോണ്‍: 0495-2370200.

കൊടുവള്ളിയില്‍ വില്ലേജ് ഓഫീസറില്ല; ജനങ്ങള്‍ ദുരിതത്തില്‍

താമരശേരി: കൊടുവള്ളി വില്ലേജ് ഓഫീസില്‍ മൂന്ന് മാസത്തിലധികമായി വില്ലേജ് ഓഫീസറില്ല. വില്ലേജ് ഓഫീസില്‍ വിവിധ ആവശ്യങ്ങള്‍ക്കായി എത്തുന്നവര്‍ വില്ലേജ് ഓഫീസറില്ലാത്തതിനാല്‍ ദുരിതം പേറുകയാണ്. നീറ്റ് പരീക്ഷയ്ക്ക് അപേക്ഷിക്കാന്‍ വില്ലേജ് ഓഫീസില്‍നിന്ന് വരുമാന സര്‍ട്ടിഫിക്കറ്റ് ലഭിക്കാത്തതിനാല്‍ പരീക്ഷയ്ക്ക് അപേക്ഷിക്കാന്‍ സാധിക്കാത്ത അവസ്ഥ ഉണ്ടായതായി പരാതിയുണ്ട്. ജനങ്ങളെ ഏറെ ബാധിക്കുന്ന ഈ വിഷയത്തില്‍ പ്രതികരിക്കാന്‍ രാഷ്ട്രീയ പാര്‍ട്ടികളും തയാറാകുന്നില്ലെന്നും നാട്ടുകാര്‍ ആരോപിക്കുന്നു. പുത്തൂര്‍ വില്ലേജ് ഓഫീസര്‍ക്കാണ് കൊടുവള്ളി വില്ലേജ് ഓഫീസറുടെ താത്കാലിക ചുമതല നല്‍കിയിരിക്കുന്നത്. അദേഹത്തിന് ചുരുങ്ങിയ സമയം മാത്രമേ കൊടുവള്ളിയില്‍ പ്രവര്‍ത്തിക്കാന്‍ സാധിക്കുന്നുള്ളു. എത്രയും വേഗം പ്രശ്‌ന പരിഹാരമുണ്ടാക്കണമെന്നാണ് നാട്ടുകാരുടെ ആവശ്യം.

വിലങ്ങാട് ഉരുള്‍പൊട്ട‌ല്‍: വീട് നഷ്ടപ്പെട്ടവര്‍ക്ക് തുക നല്‍കിത്തുടങ്ങി

നാദാപുരം: വിലങ്ങാട് ഉരുള്‍പൊട്ടലില്‍ വീട് നഷ്ടമായ കുടുംബങ്ങള്‍ക്ക് സര്‍ക്കാര്‍ ധനസഹായം ലഭ്യമായി തുടങ്ങി. വീട് പൂര്‍ണമായും നഷ്ടമാവുകയും ഭാഗീകമായി തകര്‍ന്ന് വാസയോഗ്യമല്ലാതായി മാറുകയും ചെയ്ത കുടുംബങ്ങള്‍ക്കാണ് പുനരധിവാസ പദ്ധതിയുടെ ഭാഗമായി പ്രഖ്യാപിച്ച 15 ലക്ഷം രൂപ ധനസഹായം അനുവദിച്ചിരിക്കുന്നത്. വയനാട് പക്കേജിന് സമാന തുകയാണ് വിലങ്ങാട്ടെ ദുരിതബാധിതര്‍ക്കും ലഭിച്ചിരിക്കുന്നത്. ആദ്യ പരിഗണനയിലുള്ള 31 കുടുംബങ്ങളുടെ ലിസ്റ്റാണ് ജില്ല ദുരന്തനിവാരണ വിഭാഗത്തിന് കൈമാറിയത്. ഇതില്‍ 29 കുടുംബങ്ങള്‍ക്ക് ശനിയാഴ്ച്ച മുതല്‍ പണം ലഭിച്ചു തുടങ്ങി. രണ്ട് കുടുംബത്തിന് തുക അനുവദിക്കാന്‍ കൂടുതല്‍ അന്വേഷണം നടത്തണമെന്നാണ് റവന്യു വിഭാഗത്തിന്‍റെ കണ്ടെത്ത‌ല്‍. രണ്ടാം ഘട്ടത്തില്‍ 35 പേരുടെ ലിസ്റ്റ് ജില്ല ദുരന്തനിവാരണ അഥോറിറ്റിക്ക് കൈമാറിയിട്ടുണ്ട്. ഉരുള്‍പൊട്ടലില്‍ ഒറ്റപെട്ടു പോയ വീടുകള്‍, വഴിയില്ലാത്ത വീടുകള്‍ ഉള്‍പെടെയുള്ളവയാണ് രണ്ടാം ഘട്ട ലിസ്റ്റില്‍ ഉള്‍പ്പെട്ടിരിക്കുന്നത്. ഇതിന്‍റെ പരിശോധന പൂര്‍ത്തിയാവേണ്ടതുണ്ട്. അതിന് ശേഷമാണ് അന്തിമ പട്ടിക പ്രസിദ്ധീകരിക്കുകയുള്ളൂ. സ്ഥലം വാങ്ങാനുള്ള തുക അനുവദിച്ചെങ്കിലും വിലങ്ങാട്, കരുകുളം ഉള്‍പെടെയുള്ള പ്രദേശങ്ങളില്‍ നിര്‍മ്മാണ പ്രവര്‍ത്തികള്‍ക്ക് വിലക്കുള്ളത് കാരണം വീട് നിര്‍മ്മാണം തുടങ്ങാന്‍ കഴിയാത്ത അവസ്ഥയുണ്ട്. കളക്ടര്‍ വാക്കാല്‍ ഏര്‍പ്പെടുത്തിയ നിര്‍മ്മാണ വിലക്ക് പിന്‍വലിക്കണമെന്ന ആവശ്യവും പ്രദേശവാസികളില്‍ ശക്തമാണ്

കുറ്റ്യാടി ബൈപാസ്: 20 ഭൂവുടമകള്‍ക്ക് നഷ്ടപരിഹാര തുക കൈമാറി

കുറ്റ്യാടി: കുറ്റ്യാടി ബൈപാസ് പ്രവൃത്തിക്കായി ഭൂമി വിട്ടുനല്‍കിയ 20 ഭൂവുടമകള്‍ക്ക് നഷ്ടപരിഹാര തുക കൈമാറി. ഒന്നാംഘട്ട നഷ്ടപരിഹാര തുകയായ 4,64,68,273 രൂപയാണ് ഉടമകളുടെ അക്കൗണ്ടുകളിലേക്ക് കൈമാറിയത്. നഷ്ടപരിഹാര തുക കൈമാറാനുള്ള നടപടികള്‍ വേഗത്തിലാക്കാന്‍ കെ.പി. കുഞ്ഞമ്മദ് കുട്ടി എംഎല്‍എ ധനകാര്യ മന്ത്രി കെ.എന്‍. ബാലഗോപാലിനെയും പൊതുമരാമത്ത് മന്ത്രി പി.എ.മുഹമ്മദ് റിയാസിനെയും സമീപിച്ചിരുന്നു. ഇതിന്‍റെ അടിസ്ഥാനത്തില്‍ ധനകാര്യ വകുപ്പിന്‍റെ അനുമതി ലഭിക്കുകയും കൊയിലാണ്ടി ലാന്‍ഡ് അക്വിസിഷന്‍ തഹസില്‍ദാര്‍ മുഖേന തുക ഭൂവുടമകളുടെ അക്കൗണ്ടുകളിലേക്ക് കൈമാറുകയുമായിരുന്നു. ബാക്കി ഭൂവുടമകളുടെ നഷ്ടപരിഹാരത്തുകയും അടുത്ത ദിവസങ്ങളില്‍ കൈമാറും. ഇതിന്‍റെ നടപടികള്‍ പുരോഗമിക്കുകയാണ്. ശരാശരി ആറ് മീറ്റര്‍ മാത്രമുണ്ടായിരുന്ന റോഡാണ് 12 മീറ്ററില്‍ ആധുനിക രീതിയില്‍ വികസിപ്പിക്കുന്നത്. ബൈപാസ് യാഥാര്‍ഥ്യമാകുന്നതോടെ കുറ്റ്യാടിയിലെ ഗതാഗതകുരുക്കിന് പരിഹാരമാകും.

നൈറ്റ് ലൈഫ് സുരക്ഷിതം; പൊതു ഇടങ്ങളുടെ എണ്ണം വര്‍ധിപ്പിക്കണം: മന്ത്രി മുഹമ്മദ് റിയാസ്

കോഴിക്കോട്: കോഴിക്കോട് ബീച്ച് ഉള്‍പ്പെടെയുള്ള ജില്ലയിലെ ടൂറിസം കേന്ദ്രങ്ങള്‍ നൈറ്റ് ലൈഫിന് സുരക്ഷിതമായ ഇടങ്ങളാണെന്നും പൊതു ഇടങ്ങള്‍ വര്‍ധിപ്പിക്കാന്‍ സമൂഹത്തിന് ഉത്തരവാദിത്തമുണ്ടെന്നും വിനോദസഞ്ചാര, പൊതുമരാമത്ത് മന്ത്രി പി.എ.മുഹമ്മദ് റിയാസ്. ഫറോക്ക് പഴയ പാലം 'നമ്മള്‍' പാര്‍ക്കിനോട് ചേര്‍ന്ന് നടത്തിയ സൗന്ദര്യവത്കരണത്തിന്‍റെയും ഫ്ളോട്ടിംഗ് ബ്രിഡ്ജ് ജെട്ടിയുടെയും ഉദ്ഘാടനം നിര്‍വഹിക്കുകയായിരുന്നു അദേഹം. നഗരവത്കരണത്തിന്‍റെ ഭാഗമായും കോവിഡാനന്തരം മാറിയ ജീവിത സാഹചര്യവും കാരണം പൊതു ഇടങ്ങളുടെ ആവശ്യം വര്‍ധിച്ചിരിക്കുകയാണ്. എന്നാല്‍, ആവശ്യമായ പൊതു ഇടങ്ങള്‍ ഇല്ലാത്തത് ലഹരി ഉപയോഗം ഉള്‍പ്പെടെയുള്ള പ്രവണതകളിലേക്കാണ് വഴിയൊരുക്കുന്നത് കുടുംബത്തിനും സുഹൃത്തുക്കള്‍ക്കുമൊപ്പം സമയം ചെലവിടുന്നതിനുള്ള സാമൂഹിക സാഹചര്യങ്ങള്‍ ഉറപ്പാക്കാനാവണം. മാനസിക ഉല്ലാസം നേടുന്നതിനും പിരിമുറുക്കം കുറക്കുന്നതിനും കരുത്താര്‍ജിക്കുന്നതിനും കളിക്കളങ്ങള്‍ ഉള്‍പ്പെടെയുള്ള പൊതു ഇടങ്ങള്‍ക്ക് നിര്‍ണായക പങ്കുണ്ടെന്നും മന്ത്രി ചൂണ്ടിക്കാട്ടി. പ്രവൃത്തികളുടെ ഭാഗമായി, പഴയ പാലത്തിന് സമീപം പുഴയോട് ചേര്‍ന്ന് റെയില്‍വേ ബ്രിഡ്ജിന് താഴെ മധുര ബസാറിലേക്കുള്ള റോഡ് ഇന്‍റര്‍ലോക്കിടുകയും കാടുപിടിച്ച് കിടന്ന പൊതുമരാമത്ത് വകുപ്പിന്‍റെ സ്ഥലം വെട്ടിത്തെളിച്ച് ലൈറ്റുകള്‍ സ്ഥാപിച്ച് രാത്രിയും സുഗമമായ സഞ്ചാരം ഉറപ്പുവരുത്തുകയുമാണ് ചെയ്തത്. ഇതോടെ പുഴയോട് ചേര്‍ന്ന് പ്രകൃതിഭംഗി ആസ്വദിക്കാനും കുട്ടികള്‍ക്കും കുടുംബങ്ങള്‍ക്കും ഒരുമിച്ച് സമയം ചെലവിടാനും ഒത്തുചേരാനുമാകും. 1.17 കോടി രൂപ ചെലവിലാണ് പ്രവൃത്തി പൂര്‍ത്തിയാക്കിയത്. പഴയ പാലത്തിന് സമീപവും മമ്മിളിക്കടവ് ഫറോക്ക് പുതിയ പൊതുമരാമത്ത് വിശ്രമകേന്ദ്രത്തിന് സമീപവുമായാണ് 35.50 ലക്ഷം രൂപ ചെലവില്‍ വിനോദ സഞ്ചാര വകുപ്പിന് കീഴില്‍ രണ്ട് ഫ്ളോട്ടിംഗ് ബോട്ട് ജെട്ടികള്‍ സ്ഥാപിച്ചത്. കെഎസ്ഐഎന്‍സിയാണ് നിര്‍മാണ പ്രവൃത്തികള്‍ നടത്തിയത്. 10 മീറ്റര്‍ നീളവും 3 മീറ്റര്‍ വീതിയിലുമാണ് ബോട്ട് ജെട്ടി ഒരുക്കിയത്.

അനധികൃത കച്ചവടം: വേറിട്ട പ്രതിഷേധവുമായി വ്യാപാരികള്‍

മുക്കം: മുക്കം ടൗണിലെ അനധികൃത തെരുവ് കച്ചവടങ്ങള്‍ നിയന്ത്രിക്കാന്‍ നടപടിയില്ലാത്തതിനെതിരെ വ്യാപാരികളുടെ വേറിട്ട പ്രതിഷേധം.കേരള വ്യാപാരി വ്യവസായി ഏകോപന സമിതി മുക്കം യൂണിറ്റ് കമ്മിറ്റിയുടെ നേതൃത്വത്തിലാണ് പ്രതിഷേധം സംഘടിപ്പിച്ചത്. ചെറുകിട വ്യാപാര മേഖലയെ തകര്‍ക്കുന്ന വിധത്തില്‍ മാനദണ്ഡം പാലിക്കാതെ സംസ്ഥാന ഹൈവേയുടെ ഇരുവശത്തും മുക്കം ടൗണിലും വര്‍ദ്ധിച്ചുവരുന്ന തെരുവോര കച്ചവടങ്ങള്‍ നിയന്ത്രിക്കാന്‍ നടപടിയില്ലന്ന് വ്യാപാരികള്‍ പറയുന്നു. ഇതില്‍ പ്രതിഷേധിച്ച് നഗരസഭാ സെക്രട്ടറി ബിപിന്‍ ജോസഫിന് വാര്‍ഡ് കൗണ്‍സിലര്‍ പ്രജിത പ്രദീപിന്‍റെ സാന്നിധ്യത്തില്‍ തെരുവോര കച്ചവടത്തിന് അപേക്ഷ നല്‍കിയാണ് പ്രതിഷേധിച്ചത്. തങ്ങളുടെ കടകളുടെ മുമ്പില്‍ വ്യാപാരം നടത്തുന്നതിന് അനുമതി നല്‍കണം എന്നാണ് വ്യാപാരികള്‍ അപേക്ഷയിലൂടെ ആവശ്യപ്പെട്ടത്. യൂണിറ്റ് പ്രസിഡന്‍റ് പി. അലി അക്ബര്‍, ജില്ലാ വൈസ് പ്രസിഡന്‍റ് റഫീഖ് മാളിക, സംസ്ഥാന സമിതി അംഗം കപ്പിയെടത്ത് ചന്ദ്രന്‍, യൂണിറ്റ് ജനറല്‍ സെക്രട്ടറി വി.പി അനീസ്, ഡിറ്റോ തോമസ്, എം.ടി. അസ്ലം, ചാലിയാര്‍ അബ്ദുസലാം, ഹാരിസ് ബാബു, എം.കെ ഫൈസല്‍, പി.എ ഫൈസല്‍തുടങ്ങിയവര്‍ നേതൃത്വം നല്‍കി.

ലൈംഗികാതിക്രമം കൂടുന്നു ; ജില്ലയിൽ മാത്രം രജിസ്റ്റർ‍ ചെയ്തത് 123 പോക്സോ കേസുകൾ

കോഴിക്കോട്: സുശക്തമായ നിയമങ്ങളുണ്ടായിട്ടും കുട്ടികൾക്കെതിരായ ലൈംഗികാതിക്രമം കൂടുന്നു. മൂന്നുമാസത്തിനിടെ ജില്ലയിൽ മാത്രം രജിസ്റ്റർ‍ ചെയ്തത് 123 പോക്സോ കേസുകൾ. നഗരത്തിൽ 53ഉം റൂറലിൽ 70ഉം കേസുകൾ രജിസ്റ്റർ ചെയ്‌തെന്നാണ്‌ സംസ്ഥാന ക്രൈം റെക്കോഡ്സ് ബ്യൂറോയുടെ കണക്ക്. റെയിൽവേ പോലീസ് പരിധിയിൽ ഒരു കേസും രജിസ്റ്റർ ചെയ്തിട്ടില്ല. ഈ വർഷം ജനുവരി മുതൽ മാർച്ച് വരെയുള്ള കണക്കാണിത്. പോക്സോ കേസുകൾ കൂടിയ രണ്ടാമത്തെ ജില്ലയാണ് കോഴിക്കോട്. കൂടുതൽ തിരുവനന്തപുരത്താണ് - 174. സംസ്ഥാനത്താകെ 12,01 കേസുകളാണ് ഈ വർഷം രജിസ്റ്റർ ചെയ്തത്. കഴിഞ്ഞ വർഷം സംസ്ഥാനത്തുണ്ടായ 4,594 പോക്സോ കേസുകളിൽ 460 എണ്ണവും ജില്ലയിലാണ്. മൊത്തം കേസിന്‍റെ 10 ശതമാനമാണിത്. 2020ൽ 255 കേസായിരുന്നു ജില്ലയിൽ രജിസ്റ്റർ ചെയ്‌തത്‌. ഇത്‌ 2021ൽ 287, 2022ൽ 451, 2023ൽ 421 എന്നിങ്ങനെ വർധിച്ചു. ലൈംഗികാതിക്രമം, ലൈംഗിക പീഡനം, അശ്ലീല ചിത്രങ്ങളെടുക്കൽ, അശ്ലീല ചിത്രങ്ങൾ കാണിക്കൽ എന്നിവയുൾപ്പെടെയാണ് കേസുകൾ രജിസ്റ്റർ ചെയ്തത്. ഏഴ് വര്‍ഷം മുതൽ ജീവപര്യന്തം തടവുശിക്ഷ വരെ ലഭിക്കാവുന്ന കുറ്റകൃത്യങ്ങളാണിവ.

പോലീസ് പിടികൂടിയത് എംഡിഎംഎ അല്ലെന്ന് പരിശോധനാ ഫലം: റിമാന്‍ഡിലായിരുന്ന പ്രതികള്‍ക്ക് കോടതി ജാമ്യം നല്‍കി

വടകര: പോലീസ് പിടികൂടിയത് എംഡിഎംഎ അല്ലെന്ന് പരിശോധനാ ഫലം. പ്രതികള്‍ക്ക് കോടതി ജാമ്യം അനുവദിച്ചു. 58.53 ഗ്രാം എംഡിഎംഎ കണ്ടെടുത്തുവെന്ന് ആരോപിച്ച് കഴിഞ്ഞ ഓഗസ്റ്റ് 23ന് പുതുപ്പാടി അനോറേമ്മലുള്ള വാടക വീട്ടില്‍ നിന്നു തച്ചംപൊയില്‍ ഇരട്ടകുളങ്ങര പുഷ്പ എന്ന റെജീന(42)യെ താമരശേരി പോലീസ് പിടികൂടി എന്നാണ് കേസ്. പിന്നീട് പരപ്പന്‍ പൊയില്‍ സ്വദേശി തെക്കെ പുരയില്‍ സനീഷ് കുമാറിനേയും (38) കേസില്‍ പ്രതിചേര്‍ത്ത് അറസ്റ്റ് ചെയ്തു ജയിലടച്ചിരുന്നു. പിടിച്ചെടുത്ത വസ്തുവിന്‍റെ രാസ പരിശോധനാ ഫലം വന്നപ്പോഴേക്കും എട്ടുമാസം കഴിഞ്ഞു. രാസ പരിശോധനയില്‍ മയക്കുമരുന്ന് അല്ലെന്നു കണ്ടെത്തിയതിനെ തുടര്‍ന്നാണ് വടകര നാര്‍ക്കോട്ടിക്ക് സ്പെഷല്‍ കോടതി ജഡ്ജി വി.ജി.ബിജു ഇരുവര്‍ക്കും സ്വന്തം ജാമ്യം അനുവദിച്ചത്. അന്യായമായി പുഷ്പയേയും സനീഷ് കുമാറിനേയും ജയിലിലടച്ച താമരശേരി പോലീസ് സ്റ്റേഷന്‍ ഹൗസ് ഓഫീസര്‍ക്കെതിരെ നിയമനടപടി സ്വീകരിക്കുമെന്നു പ്രതികളുടെ അഭിഭാഷകന്‍ പി.പി.സുനില്‍ കുമാര്‍ പറഞ്ഞു.

ബിരിയാണിയില്‍ പുഴു; ഹോട്ടല്‍ അടപ്പിച്ചു

പേരാമ്പ്ര: പേരാമ്പ്രയിലെ ഹോട്ടലില്‍ ബിരിയാണിയില്‍ പുഴുവിനെ കണ്ടെത്തിയതിനെ തുടര്‍ന്ന് ആരോഗ്യ വകുപ്പ് അധികൃതര്‍ ഹോട്ടല്‍ അടപ്പിച്ചു. പഴയ ബൈപാസ് റോഡിലെ വനിത മെസില്‍ നിന്നും വാങ്ങിയ ബിരിയാണിയിലാണ് പുഴുവിനെ കണ്ടത്. പന്നികോട്ടൂര്‍ സ്വദേശികളായ രണ്ട് യുവതികളാണ് ബിരിയാണി വാങ്ങിയത്. ഇവര്‍ ഉടന്‍ പേരാമ്പ്ര താലൂക്ക് ആശുപത്രിയില്‍ ചികിത്സ തേടി. വിവരം ആശുപത്രി അധികൃതരെ അറിയിക്കുകയും ചെയ്തു. തുടര്‍ന്ന് ആരോഗ്യ വകുപ്പ് അധികൃതര്‍ ഹോട്ടലിലെത്തി പരിശോധന നടത്തി. ഹോട്ടല്‍ തത്ക്കാലത്തേക്ക് അടയ്ക്കാന്‍ നിര്‍ദേശം നല്‍കിയതായി അധികൃതര്‍ അറിയിച്ചു. അതിനിടെ യുവതികള്‍ക്ക് പണം നല്‍കി സംഭവം ഹോട്ടല്‍ അധികൃതര്‍ ഒതുക്കിത്തീര്‍ക്കാന്‍ ശ്രമം നടത്തുന്നതായി ആക്ഷേപം ഉയര്‍ന്നിട്ടുണ്ട്.

കാന്തലാട് വില്ലേജിലെ പാറ പുറമ്പോക്കിലെ കുടുംബങ്ങള്‍ക്ക് ഭൂമി പതിച്ചുനല്‍കും

കോഴിക്കോട്: കാന്തലാട് വില്ലേജിലെ പാറ പുറമ്പോക്കില്‍ കാലങ്ങളായി താമസിച്ചുവരുന്നവര്‍ക്ക് ഭൂമി പതിച്ചുനല്‍കാനൊരുങ്ങി സര്‍ക്കാര്‍. കാന്തലാട് വില്ലേജിലെ തലയാട്, മണ്ടോപ്പാറ പ്രദേശങ്ങളിലെ 54 കുടുംബങ്ങള്‍ക്കാണ് ഭൂമി നല്‍കുന്നത്. റവന്യൂ മന്ത്രിയുടെ നിര്‍ദേശപ്രകാരം വിഷയം പ്രത്യേകമായി പട്ടയ ഡാഷ്ബോര്‍ഡില്‍ ഉള്‍പ്പെടുത്തി നടപടികള്‍ സ്വീകരിച്ചുവരികയായിരുന്നു. 1920/1, 1926/1 സര്‍വേ നമ്പറുകളില്‍പ്പെട്ട പാറ പുറമ്പോക്ക് സര്‍ക്കാരിന്‍റെ സവിശേഷ അധികാരം വിനിയോഗിച്ച് തരിശിലേക്ക് ഇനം മാറ്റി അര്‍ഹതയുടെ അടിസ്ഥാനത്തിലാണ് കൈവശക്കാര്‍ക്ക് പതിച്ചുനല്‍കുന്നത്. ഈ പ്രദേശങ്ങളില്‍ പാറ ഖനനത്തിന് സാധ്യതയില്ലെന്ന് ജിയോളജി വകുപ്പ് കണ്ടെത്തിയിരുന്നു. സര്‍വേ നമ്പറുകളില്‍ ചെറുകിട ധാതുവായ കരിങ്കല്ലിന്‍റെ ചെറിയതോതിലുള്ള നിക്ഷേപം ഉണ്ടെങ്കിലും ഇവയുടെ അവകാശം സര്‍ക്കാരില്‍ നിലനിര്‍ത്തിക്കൊണ്ടാണ് പട്ടയം നല്‍കുക. ഒരങ്കോകുന്ന് കോളനിയിലെ ഭൂമി കൈവശം വെച്ചുവരുന്ന 14 കുടുംബങ്ങള്‍ക്ക് ലാന്‍ഡ് ട്രൈബ്യൂണല്‍ പട്ടയവും തലയാട്, മണ്ടോപാറ കോളനിയിലെ പാറ, പാറ പുറമ്പോക്ക് കൈവശം വയ്ക്കുന്ന 54 കുടുംബങ്ങള്‍ക്ക് ലാന്‍ഡ് അസൈന്‍മെന്‍റ് ചട്ടങ്ങള്‍ പ്രകാരമുള്ള പട്ടയവും അനുവദിക്കുന്നതിനുള്ള പട്ടികയാണ് തയാറാക്കിയത്. അപേക്ഷകരുടെ അര്‍ഹത പരിശോധിച്ച് ഉടന്‍ പട്ടയം വിതരണം നടത്താന്‍ നടപടി സ്വീകരിക്കുമെന്ന് ജില്ലാ ഭരണകൂടം അറിയിച്ചു.

മാനാഞ്ചിറയിലെ ജിം പരിശീലകനു മര്‍ദനമേറ്റു

കോഴിക്കോട്: ജില്ലാ സ്‌പോര്‍ട്‌സ് കൗണ്‍സിലിനു കീഴിലുള്ള മാനാഞ്ചിറ മൈതാനത്തെ ഓപ്പണ്‍ ജിം പരിശീലകനു അജ്ഞാതന്‍റെ മര്‍ദനമേറ്റു. പരിശീലകന്‍ കോട്ടൂളി സ്വദേശി എം.പി അനില്‍കുമാറിനാണ് മര്‍ദനമേറ്റത്. വെള്ളിയാഴ്ച വൈകിട്ട് നാലിനാണ് സംഭവം. ജിം തുറന്നപ്പോള്‍ അതിനുള്ളില്‍ കിടന്നുറങ്ങുകയായിരുന്നു അക്രമി. ഇയാളെ വിളിച്ചുണര്‍ത്തി ഇറക്കി വിട്ടു. ജിം പ്രവര്‍ത്തിച്ച് തുടങ്ങി അഞ്ചുമിനിറ്റിനകം തിരിച്ചെത്തിയ അക്രമി അനില്‍കുമാറിനെ യാതൊരു പ്രകോപനവുമില്ലാതെ മര്‍ദിക്കുകയും മൊബൈല്‍ ഫോണ്‍ ഉപയോഗിച്ച് കുത്തുകയുമായിരുന്നു. പിന്നീട് ഇയാള്‍ ഓടി രക്ഷപ്പെട്ടു. ഇയാള്‍ക്കൊപ്പം വേറെയും ആളുകള്‍ ഉണ്ടായിരുന്നതായി സംശയിക്കുന്നു. അനില്‍കുമാര്‍ നല്‍കിയ പരാതിയില്‍ ടൗണ്‍ പോലീസ് കേസെടുത്ത് അന്വേഷിച്ചുവരുന്നു.

സാംസ്‌കാരിക നിലയം ഉദ്ഘാടനം ചെയ്തു

മുക്കം: മുക്കം നഗരസഭ നീലേശ്വരം വയലക്കോട്ടുപറമ്പില്‍ പണികഴിപ്പിച്ച മുറ്റോളി രാമന്‍ -ചിരുത സ്മാരക സാംസ്‌കാരിക നിലയത്തിന്‍റെ ഉദ്ഘാടനം നഗരസഭാ ചെയര്‍മാന്‍ പി.ടി. ബാബു നിര്‍വഹിച്ചു. വയലക്കോട്ടുപറമ്പില്‍ വി.പി. രാഘവന്‍ സൗജന്യമായി നല്‍കിയ സ്ഥലത്താണ് നഗരസഭ സാസ്‌കാരിക നിലയം പണികഴിപ്പിച്ചത്. ഡിവിഷന്‍ കൗണ്‍സിലര്‍ എം.ടി. വേണുഗോപാലന്‍ അധ്യക്ഷത വഹിച്ച ചടങ്ങില്‍ ഡെപ്യൂട്ടി ചെയര്‍പേഴ്‌സണ്‍ കെ.പി. ചാന്ദ്‌നി, വിദ്യാഭ്യാസ സ്റ്റാന്‍ഡിംഗ് കമ്മറ്റി ചെയര്‍മാന്‍ ഇ. സത്യനാരായണന്‍, വികസന സ്റ്റാന്‍ഡിംഗ് കമ്മറ്റി ചെയര്‍പേഴ്‌സണ്‍ റുബീന മുസ്തഫ, മരാമത്ത് സ്റ്റാന്‍ഡിംഗ് കമ്മറ്റി ചെയര്‍മാന്‍ മജീദ് ബാബു നഗരസഭാ കൗണ്‍സിലര്‍മാരായ ഗഫൂര്‍ കല്ലുരുട്ടി, അബ്ദുള്‍ ഗഫൂര്‍, വിവിധ കക്ഷിനേതാക്കളായ സി.ടി. ജയപ്രകാശ്, ലത്തീഫ് എടത്തില്‍, ടി.കെ.പ്രകാശന്‍, ഇ.കെ. വിബീഷ്, കെ.പ്രഹ്ളാദന്‍, രജിത കുപ്പോട്ട് തുടങ്ങിയവര്‍ സംസാരിച്ചു.

ചെറുവാടി ഫെസ്റ്റ് 2025 സമാപിച്ചു

മുക്കം: ചെറുവാടി ഫെസ്റ്റ് 2025 കാര്‍ണിവല്‍ സമാപിച്ചു. കൊടിയത്തൂര്‍ പഞ്ചായത്തിന്‍റെ സഹകരണത്തോടെ വ്യാപാരി വ്യവസായി ഏകോപന സമിതി ചെറുവാടി യൂണിറ്റാണ് കാര്‍ണിവല്‍ സംഘടിപ്പിച്ചത്. മൂന്ന് ആഴ്ചക്കിടെ അറുപതിനായിരത്തോളം പേര്‍ ഫെസ്റ്റ് നഗരി സന്ദര്‍ശിച്ചു. സമാപനം ഇ.ടി. മുഹമ്മദ് ബഷീര്‍ എം.പി ഉദ്ഘാടനം ചെയ്തു. കൊടിയത്തൂര്‍ പഞ്ചായത്ത് വൈസ് പ്രസിഡന്‍റ് ഫസല്‍ കൊടിയത്തൂര്‍ അധ്യക്ഷത വഹിച്ചു. വ്യാപാരി വ്യവസായി ഏകോപന സമിതി ജില്ല പ്രസിഡന്‍റ് ബാപ്പു ഹാജി, ഏകോപന സമിതി ജില്ല വൈസ് പ്രസിഡന്‍റ് റഫീഖ് മാളിക എന്നിവര്‍ മുഖ്യാതിഥികളായി. സംഘാടകരായ ഇ.എന്‍ യൂസഫ്, പി.സി മുഹമ്മദ് എന്നിവരെ ആദരിച്ചു. ആയിഷ ചേലപ്പുറത്ത്, എം.ടി റിയാസ്, അഷ്‌റഫ് കൊളക്കാടന്‍, മജീദ് പുതുക്കുടി, കെ.ടി ഹമീദ്, ഇ.എന്‍ യൂസഫ്, പി.സി മുഹമ്മദ്, ഷരീഫ് അമ്പലകണ്ടി, സി.പി. ഷമീര്‍ തുടങ്ങിയവര്‍ സംസാരിച്ചു. കാര്‍ണിവലിനോടനുബന്ധിച്ച് മാധ്യമ പുരസ്‌കാരങ്ങള്‍ വിതരണം ചെയ്തു. അച്ചടി മാധ്യമ വിഭാഗത്തില്‍ എ.പി. മുരളീധരന്‍, വഹാബ് കളരിക്കല്‍ എന്നിവര്‍ പുരസ്‌കാരത്തിന് അര്‍ഹരായി. ദൃശ്യമാധ്യമ വിഭാഗത്തില്‍ സി. ഫസല്‍ ബാബുവും മികച്ച കാമറമാനായി റഫീഖ് തോട്ടുമുക്കവും അവാര്‍ഡ് കരസ്ഥമാക്കി.

പാണ്ടിപ്പാടം-പാലക്കല്‍ തീരദേശ റോഡ് ഉദ്ഘാടനം ചെയ്തു

കോഴിക്കോട്: തീരദേശ ഉള്‍നാടന്‍ മത്സ്യബന്ധന മേഖലയെ മറ്റു മേഖലയുമായി ബന്ധിപ്പിക്കുകയും മത്സ്യവിപണനം സുഗമമാക്കുകയും ലക്ഷ്യമിട്ട് നിര്‍മിച്ച പാണ്ടിപ്പാടം-ചീര്‍പ്പിങ്ങല്‍-പാലക്കല്‍ തീരദേശ റോഡ് മന്ത്രി പി.എ. മുഹമ്മദ് റിയാസ് ഉദ്ഘാടനം ചെയ്തു. ഹാര്‍ബര്‍ എന്‍ജിനിയറിംഗ് വകുപ്പ് മുഖേന 2021-2026 പദ്ധതിയില്‍ ഉള്‍പ്പെടുത്തി 43,39,285 രൂപ ചെലവിട്ട് നിര്‍മിച്ച റോഡിന് 378 മീറ്റര്‍ നീളവും 3.5 മീറ്റര്‍ വീതിയുമാണുള്ളത്. റോഡിന് ഇരുവശവും സംരക്ഷണ ഭിത്തി, കോണ്‍ക്രീറ്റ് ബെല്‍റ്റ്, ഓവുചാല്‍, തോടിനോട് ചേര്‍ന്ന ഭാഗത്ത് കരിങ്കല്‍ പാര്‍ശ്വഭിത്തി, ഗാര്‍ഡ് സ്റ്റോണ്‍, ഇന്‍റര്‍ലോക്ക്, മെയിന്‍ റോഡില്‍നിന്ന് 85 മീറ്റര്‍ നീളത്തില്‍ ഡ്രെയിനേജ് കം കോണ്‍ക്രീറ്റ് ഫൂട്ട്പാത്ത് എന്നിവയും നിര്‍മിച്ചിട്ടുണ്ട്. ഫറോക്ക് നഗരസഭ ചെയര്‍മാന്‍ എന്‍.സി. അബ്ദുല്‍ റസാഖ് അധ്യക്ഷനായിരുന്നു.

ഓരോ കുട്ടിക്കും മികച്ച അടിസ്ഥാന സൗകര്യങ്ങള്‍ ലഭിക്കുന്നുവെന്ന് മന്ത്രി

കോഴിക്കോട്: പൊതുവിദ്യാലയങ്ങളിലെ ഓരോ കുട്ടിക്കും മികച്ച അടിസ്ഥാന സൗകര്യങ്ങള്‍ ലഭിക്കുന്ന നിലയിലാണ് കേരളത്തിലെ വിദ്യാഭ്യാസ മേഖല വളരുന്നതെന്ന് പൊതുമരാമത്ത്- ടൂറിസം മന്ത്രി പി.എ.മുഹമ്മദ് റിയാസ്. ബേപ്പൂര്‍ വെസ്റ്റ് ജിഎല്‍പി സ്‌കൂളിലെ മള്‍ട്ടി പര്‍പ്പസ് ഓഡിറ്റോറിയം ഉദ്ഘാടനം ചെയ്യുകയായിരുന്നു മന്ത്രി. 79.31 ലക്ഷം രൂപ വിനിയോഗിച്ചാണ് 31,800 ചതുരശ്ര മീറ്റര്‍ വിസ്തൃതിയില്‍ മള്‍ട്ടിപര്‍പ്പസ് ഓഡിറ്റോറിയം നിര്‍മിച്ചത്. കൗണ്‍സിലര്‍ രജനി തോട്ടുങ്ങല്‍ അധ്യക്ഷത വഹിച്ചു. പൊതുമരാമത്ത് വകുപ്പ് എക്‌സിക്യൂട്ടീവ് എന്‍ജിനീയര്‍ എന്‍. ശ്രീജയന്‍ റിപ്പോര്‍ട്ട് അവതരിപ്പിച്ചു. ഉപജില്ലാ വിദ്യാഭ്യാസ ഓഫീസര്‍ കെ. ജീജ, പ്രധാനാധ്യാപകന്‍ പി. അലി അഷ്‌റഫ്, യുആര്‍സി സൗത്ത് ബിപിസി സി. പ്രവീണ്‍ കുമാര്‍, സ്റ്റാഫ് സെക്രട്ടറി ജയന്‍ മലയില്‍, പിടിഎ പ്രസിഡന്‍റ് വി. ഉബൈദ് തുടങ്ങിയവര്‍ സംസാരിച്ചു.

ഉലക്ക കൊണ്ട് തലയ്ക്കടിച്ച പ്രതി അറസ്റ്റില്‍

കോഴിക്കോട്: കുന്നമംഗലം പോലീസ് സ്റ്റേഷന്‍ പരിധിയിലെ മുറിയനാലില്‍ വച്ച് ഉലക്ക കൊണ്ട് അടിച്ചു പരിക്കേല്‍പ്പിച്ചുവെന്ന കേസിലെ പ്രതി ചെമ്മേരി പുല്ലാളൂര്‍ സ്വദേശി വിജയകുമാറി(50)നെ പോലീസ് അറസ്റ്റു ചെയ്തു. മാര്‍ച്ച് 23ന് മുറിയനാലുള്ള കോടമ്പാട്ടില്‍ സുരേഷിനെ സ്ഥല സംബന്ധമായ തര്‍ക്കത്തെ തുടര്‍ന്ന് വിജയകുമാര്‍ വീട്ടില്‍ അതിക്രമിച്ച് കയറി ഉലക്കകൊണ്ട് തലക്ക് അടിച്ച് പരിക്കേല്‍പ്പിക്കുകയും കൊടുവാള്‍കൊണ്ട് വെട്ടാന്‍ ശ്രമിക്കുകയും ചെയ്തുവെന്നാണ് കേസ്. കേസിലെ കൂട്ടുപ്രതിയെ പിടികൂടാനുണ്ട് കോടതിയില്‍ ഹാജരാക്കിയ വിജയകുമാറിനെ റിമാന്‍ഡ് ചെയ്തു.

അമ്മയോടൊപ്പം ഉറങ്ങിക്കിടന്ന പിഞ്ചുകുഞ്ഞ് മരിച്ച നിലയില്‍

കുറ്റ്യാടി: കക്കട്ടില്‍ അമ്മയോടൊപ്പം ഉറങ്ങിക്കിടന്ന ഒന്നര മാസം പ്രായമുള്ള കുഞ്ഞ് മരിച്ച നിലയില്‍. അരൂര്‍ ഒതയോത്ത് സ്വദേശി റിയാസിന്‍റെ മകള്‍ നൂറ ഫാത്തിമയാണ് മരിച്ചത്. കക്കട്ടില്‍ പൊയോല്‍മുക്ക് സ്വദേശിനിയായ അമ്മയുടെ വീട്ടില്‍ വച്ചാണ് മരണം സംഭവിച്ചത്. ഇന്നലെ രാവിലെ 9.30ഓടെയാണ് സംഭവം ശ്രദ്ധയില്‍പെട്ടത്. ഈ സമയം കുഞ്ഞിന് സമീപത്തായി അമ്മ ഉറങ്ങുകയായിരുന്നു. ഉടന്‍ തന്നെ സമീപത്തെ ആശുപത്രിയില്‍ എത്തിച്ചെങ്കിലും നേരത്തേ മരണം സംഭവിച്ചതായി ഡോക്ടര്‍മാര്‍ വ്യക്തമാക്കി. റിയാസിന്‍റെ പരാതിയില്‍ കുറ്റ്യാടി പോലീസ് അന്വേഷണം ആരംഭിച്ചു. എന്താണ് സംഭവിച്ചതെന്ന് അറിയില്ലെന്നും ഞായറാഴ്ച രാത്രി നിര്‍ത്താതെ കരഞ്ഞ കുഞ്ഞ് പുലര്‍ച്ചെ രണ്ടുമണി വരെ പാല്‍ കുടിച്ചിരുന്നതായും രാത്രി ഉറക്കം ലഭിക്കാത്തതിനാല്‍ അമ്മ രാവിലെ ഉറങ്ങിപ്പോയതാണെന്നുമാണ് ബന്ധുക്കള്‍ പറയുന്നത്.

ഇ ഡിവിഷൻ ലീഗ് ഫുട്ബോളിന് തുടക്കം

കോഴിക്കോട്: ജില്ലാ ഫുട്ബോൾ അസോസിയേഷനും കാലിക്കട്ട് എഫ്സിയും സംയുക്തമായി സംഘടിപ്പിക്കുന്ന ഇ ഡിവിഷൻ ലീഗ് ഫുട്ബോൾ ചാമ്പ്യൻഷിപ്പിൽ ഇന്നലെ നടന്ന ആദ്യമത്സരത്തിൽ മലബാർ ക്രിസ്ത്യൻ കോളജും സീക്വീൻ കാലിക്കട്ട് സോക്കറും ഗോൾരഹിത സമനിലയിൽ പിരിഞ്ഞു. രണ്ടാമത്ത മത്സരത്തിൽ വിസ്ഡം സ്പോർട്സ് അക്കാദമി കളിയുടെ രണ്ടാം പകുതിയിൽ മുഹമ്മദ്‌ ഷമിഖ് നേടിയ ഏകഗോളിന് എംജിഎം ഈങ്ങാപ്പുഴയെ പരാജയപ്പെടുത്തി.

വഖഫ് ഭേദഗതി; 26ന് പ്രതിഷേധ സംഗമം

കോഴിക്കോട്: ആൾ ഇന്ത്യാ മുസ്‌ലിം പേഴ്സണൽ ബോർഡ് രാജ്യ വ്യാപകമായി വഖഫ് ഭേദഗതി നിയമത്തിനെതിരെ നടത്തുന്ന പ്രക്ഷോഭങ്ങളുടെ ഭാഗമായി 26-ന് വൈകുന്നേരം നാലിന് എംഎസ്എസ് ഹാളിൽ പ്രതിഷേധ സംഗമം സംഘടിപ്പിക്കുന്നു. വഖഫ് സംരഭങ്ങൾ നിർത്തലാക്കുന്നതിനും കയ്യേറ്റം ചെയ്യുന്നതിനും സഹായകമായ വഖഫ് നിയമം പിൻവലിണക്കമെന്ന് ആവശ്യപ്പെട്ട് നടത്തുന്ന സംഗമത്തിൽ വിവിധ മത-രാഷ്ട്രീയ മേഖലകളിലുള്ളവർ പങ്കെടുക്കും. മുസ്‌ലിം ലീഗ് സംസ്ഥാന പ്രസിഡന്‍റ് സയ്യിദ് സാദിഖലി ശിഹാബ് തങ്ങൾ, ദേശീയ ജനറൽ സെക്രട്ടറി പി.കെ കുഞ്ഞാലിക്കുട്ടി, സമസ്ത കേരള ജംഇയ്യതുൽ ഉലമ മുശാവറംഗവും പേഴ്സണൽ ബോർഡ് ക്ഷണിതാവുമായ ഡോ. മുഹമ്മദ് ബഹാഉദ്ദീൻ നദ്‌വി ഉള്‍പ്പെടെയുള്ളവര്‍ പങ്കെടുക്കും.

നവീകരിച്ച ചീർപ്പ്പാലം -കിഴക്കുംപാടം -തോണിച്ചിറ റോഡ് ഉദ്ഘാടനം ചെയ്തു

കോഴിക്കോട്: നവീകരണം പൂർത്തിയാക്കിയ ബേപ്പൂർ നിയോജക മണ്ഡലത്തിലെ ചീർപ്പ്പാലം -കിഴക്കുംപാടം -തോണിച്ചിറ റോഡ് (ശിവപുരി ഈസ്റ്റ് റോഡ്) മന്ത്രി പി.എ മുഹമ്മദ് റിയാസ് ഉദ്ഘാടനം ചെയ്തു. വീതി കുറവും മഴക്കാലത്തെ വെള്ളക്കെട്ടും കാരണം ഗതാഗതം ദുഷ്‌കരമായ റോഡാണ് നവീകരണ പ്രവൃത്തികൾ പൂർത്തീകരിച്ച് തുറന്നു നൽകിയത്. പൊതുമരാമത്ത് വകുപ്പ് ഫണ്ടിൽനിന്ന് 1.6 കോടി രൂപ ചെലവിട്ടായിരുന്നു നവീകരണം. റോഡിന് ഇരുവശങ്ങളിലും ഓടകൾ നിർമ്മിച്ച് വീതികൂട്ടുകയും വശങ്ങൾ കോൺക്രീറ്റ് ഭിത്തി കെട്ടി സംരക്ഷിക്കുകയും ഇന്‍റർലോക്ക് പാകി സൗകര്യമൊരുക്കുകയും ചെയ്തിട്ടുണ്ട്. ചടങ്ങിൽ കോർപറേഷൻ കൗൺസിലർ ഗിരിജ അധ്യക്ഷയായി. അസി. എക്സിക്യൂട്ടീവ് എൻജിനീയർ ബി. ഷിജിത്ത് റിപ്പോർട്ട് അവതരിപ്പിച്ചു. കോർപറേഷൻ കൗൺസിലർ കെ. രാജീവ്, റസാഖ് പള്ളത്ത്, കാർത്തികേയൻ അന്നങ്ങാട്ട്, സതീഷ്കുമാർ നെല്ലിക്കോട്ട്, ടി. ഉണ്ണികൃഷ്ണൻ, പി. സൈനുദ്ദീൻ, കോഴിക്കോട് റോഡ്സ് ഡിവിഷൻ എക്സിക്യൂട്ടീവ് എൻജിനീയർ വി.കെ ഹാഷിം, റോഡ് വികസന കമ്മിറ്റി സെക്രട്ടറി ശശിധരൻ മേക്കുന്നത്ത് തുടങ്ങിയവർ സംബന്ധിച്ചു.

വികസന വരകൾ; തദ്ദേശ സ്ഥാപനതലത്തില്‍ ചിത്രരചനാ മത്സരങ്ങള്‍

കോഴിക്കോട്: സംസ്ഥാന സര്‍ക്കാരിന്‍റെ നാലാം വാര്‍ഷികാഘോഷത്തിന്‍റെ ഭാഗമായി കോഴിക്കോട് ജില്ലയിലെ തദ്ദേശസ്ഥാപനങ്ങളില്‍ "വികസന വരകള്‍' എന്ന പേരില്‍ ചിത്രരചനാ മത്സരങ്ങള്‍ സംഘടിപ്പിക്കും. 23 മുതല്‍ 27 വരെയാണ് ജില്ലയിലെ പഞ്ചായത്തുകളിലും നഗരസഭകളിലും മത്സരം നടക്കുക. അഞ്ചാം ക്ലാസിന് മുകളിൽ പഠിക്കുന്ന വിദ്യാര്‍ഥികള്‍, ചിത്രകലാ അധ്യാപകര്‍, പ്രാദേശിക ചിത്രകാരന്മാർ തുടങ്ങിയവര്‍ക്ക് ‍ പങ്കെടുക്കാം. നാട്ടിലെ വികസനവുമായി ബന്ധപ്പെട്ട വിഷയങ്ങളാണ് ചിത്രരചനയുടെ പ്രമേയം. തദ്ദേശ സ്ഥാപന തലത്തില്‍ നടക്കുന്ന മത്സരത്തില്‍നിന്ന് തെരഞ്ഞെടുക്കുന്ന ചിത്രകാരന്‍മാരെ പങ്കെടുപ്പിച്ച് "എന്‍റെ കേരളം' പ്രദര്‍ശന വിപണന മേളയുടെ വേദിയായ കോഴിക്കോട് ബീച്ചില്‍ വെച്ച് ‍ ‘വികസന വരകൾ’ ജില്ലാതല സമൂഹ ചിത്രരചനാ പരിപാടി സംഘടിപ്പിക്കും. വലിയ കാന്‍വാസില്‍ വരയ്ക്കുന്ന ചിത്രങ്ങള്‍ എന്‍റെ കേരളം എക്‌സിബിഷനില്‍ പ്രദര്‍ശിപ്പിക്കും. തദ്ദേശസ്ഥാപന വകുപ്പ്, വിദ്യാഭ്യാസ വകുപ്പ്, സമഗ്ര ശിക്ഷാ കേരള (എസ്എസ്‌കെ), ജില്ലാ ഇന്‍ഫര്‍മേഷന്‍ ഓഫീസ് എന്നിവയുടെ സംയുക്താഭിമുഖ്യത്തിലാണ് "വികസന വരകള്‍' സംഘടിപ്പിക്കുക. ഇതുമായി ബന്ധപ്പെട്ട് തദ്ദേശ സ്ഥാപന അധ്യക്ഷന്മാരുടെയും സെക്രട്ടറിമാരുടെയും പ്രത്യേക യോഗം ഓണ്‍ലൈനായി ചേര്‍ന്നു. തദ്ദേശ സ്ഥാപന തലത്തില്‍ ചിത്രരചനാ മത്സരം സംഘടിപ്പിക്കാന്‍ ഉദ്ദേശിക്കുന്ന സ്ഥലം, തീയതി, സമയം എന്നിവ 22നകം എല്‍എസ്ജിഡി വകുപ്പിന് ലഭ്യമാക്കാന്‍ യോഗത്തില്‍ തീരുമാനമായി. തദ്ദേശ സ്ഥാപന തലത്തില്‍ ചിത്രരചനാ മത്സരവുമായി ബന്ധപ്പെട്ട പ്രവര്‍ത്തനങ്ങള്‍ ഏകോപിപ്പിക്കാൻ ബന്ധപ്പെട്ട ബ്ലോക്ക് റിസോഴ്‌സ് സെന്‍ററുകള്‍ക്ക് (ബിആര്‍സി) നിര്‍ദ്ദേശം നല്‍കിയതായി എന്‍റെ കേരളം മേളയുടെ പ്രീ ഇവന്‍റുകളുടെ നോഡല്‍ ഓഫീസര്‍ കൂടിയായ എസ്എസ്‌കെ ജില്ലാ പ്രോഗ്രാം കോഓഡിനേറ്റര്‍ എ.കെ അബ്ദുല്‍ ഹക്കീം അറിയിച്ചു. യോഗത്തില്‍ ജില്ലാ പഞ്ചായത്ത് പ്രസിഡന്‍റ് ഷീജ ശശി, തദ്ദേശ സ്ഥാപന അധ്യക്ഷന്‍മാര്‍, സെക്രട്ടറിമാര്‍, തദ്ദേശ സ്വയംഭരണ വകുപ്പ് ഡെപ്യൂട്ടി ഡയരക്ടര്‍ ബൈജു ജോസ്, അസിസ്റ്റന്‍റ് ഡയരക്ടര്‍ കെ.വി രവികുമാര്‍, ജില്ലാ ഇന്‍ഫര്‍മേഷന്‍ ഓഫീസര്‍ സി.പി അബ്ദുൾ കരീം തുടങ്ങിയവര്‍ സംബന്ധിച്ചു.

മാലിന്യമുക്തം നവകേരളം ; കായണ്ണയിൽ ജലാശയങ്ങൾ ശുചീകരിച്ചു

പേരാമ്പ്ര: മാലിന്യമുക്തം നവകേരളം പദ്ധതിയുടെ തുടർ പ്രവർത്തനങ്ങൾ നടപ്പിലാക്കുന്നതിനായി തെളിനീരൊഴുകട്ടെ എന്ന കാമ്പയിനിലൂടെ കായണ്ണ ഗ്രാമ പഞ്ചായത്തിലെ ജലാശയങ്ങൾ ശുചീകരിക്കുന്നതിന്‍റെ ഉദ്ഘാടനം കുറ്റിവയലിൽ പേരാമ്പ്ര ബ്ലോക്ക് പഞ്ചായത്ത് പ്രസിഡന്‍റ് എൻ. പി. ബാബു നിർവ്വഹിച്ചു. പഞ്ചായത്ത് പ്രസിഡന്‍റ് സി.കെ. ശശി അധ്യക്ഷത വഹിച്ചു. ജലാശയ ശുചീകരണത്തിലൂടെ മാലിന്യങ്ങൾ നീക്കം ചെയ്യാനും നീരൊഴുക്ക് സുഗമമാക്കി വെള്ളപ്പൊക്കം തടയുവാനും കഴിഞ്ഞതായി ഗ്രാമപഞ്ചായത്ത് പ്രസിഡന്‍റ് വിശദീകരിച്ചു. ചടങ്ങിൽ വൈസ് പ്രസിഡണ്ട് പി.ടി. ഷീബ, ആരോഗ്യ വിദ്യാഭ്യാസ സ്റ്റാൻഡിംഗ് കമ്മറ്റി ചെയർമാൻ കെ.കെ. നാരായണൻ, വികസന കാര്യ ചെയർമാൻ എ.സി. ശരൺ, ഗ്രാമപഞ്ചായത്ത് അംഗങ്ങളായ പി.സി ബഷീർ, സി.കെ. സുലൈഖ, പി.കെ.ഷിജു, കെ. സി. ഗാന, ബ്ലോക്ക് പഞ്ചായത്ത് മെമ്പർ പി.കെ. രജിത, സി.പി. ബാലകൃഷ്ണൻ, കെ.പി. ചന്ദ്രൻ, എൻ.പി. ഗോപി, അനഘ, ഷിബുലാൽ, അർഷകൃഷ്ണ തുടങ്ങിയവർ നേതത്വം നൽകി.

പദ്ധതി നിർവഹണത്തിൽ മികച്ച നേട്ടവുമായി ഓമശേരി

മതസാഹോദര്യം നിലനിർത്താൻ കൂട്ടായഇടപെടലുകൾ വേണം: മന്ത്രി

കോഴിക്കോട്: മതനിരപേക്ഷതയാണ് നമ്മുടെ സൗന്ദര്യമെന്നും മതസാഹോദര്യം നിലനിർത്താൻ കൂട്ടായ ഇടപെടലുകൾ ഉണ്ടാകണമെന്നും മന്ത്രി പി.എ മുഹമ്മദ് റിയാസ്. തീർത്ഥാടന ടൂറിസം വികസനത്തിന്‍റെ ഭാഗമായി പള്ളിത്തറ ശ്രീ കുറുംബ ഭഗവതി ക്ഷേത്രത്തിൽ പൂർത്തീകരിച്ച പ്രവൃത്തികളുടെ ഉദ്ഘാടനം നിർവഹിക്കുകയായിരുന്നു അദ്ദേഹം. ഒരു മതവും മനുഷ്യരെ തമ്മിൽ അകറ്റുകയോ ആക്രമണങ്ങൾക്ക് ആഹ്വാനം ചെയ്യുന്നോ ഇല്ല. മനുഷ്യരായി നിലകൊള്ളാനും അപരന് കൈത്താങ്ങാവാനുമാണ് മതങ്ങൾ താത്പര്യപ്പെടുന്നതെന്നും മന്ത്രി പറഞ്ഞു. ഭക്തജനങ്ങൾക്ക് കൂടുതൽ സൗകര്യങ്ങൾ ഒരുക്കുന്നതിനൊപ്പം ഇത്തരം കേന്ദ്രങ്ങളുടെ ചരിത്രപരമായ പ്രാധാന്യം ഉയർത്തിക്കാണിക്കാനാണ് തീർത്ഥാടന ടൂറിസം പദ്ധതികളിലൂടെ സർക്കാർ ലക്ഷ്യമിടുന്നത്. കോവിഡിന് ശേഷം തീർത്ഥാടന ടൂറിസം മേഖലയിൽ ഉൾപ്പെടെ വലിയ സാധ്യതകളുണ്ടായി. അത് പ്രയോജനപ്പെടുത്തി കൂടുതൽ ചരിത്രാന്വേഷികളെയും വിദേശത്ത് നിന്നുൾപ്പെടെയുള്ള സഞ്ചാരികളെയും ആകർഷിക്കാനും നാടിന്‍റെ പൊതുവായ വികസനത്തിനുമാണ് സർക്കാർ ശ്രമിക്കുന്നത്. കോഴിക്കോട് ജില്ലയിൽ ഇതിനകം വടകര ലോകനാർകാവ്, മാലിക് ബിൻ ദീനാർ മസ്ജിദ്, നല്ലൂർ ശിവക്ഷേത്രം, തളി ക്ഷേത്രം, പുതിയമ്പലം ശ്രീ കണ്‌ഠേശ്വര ക്ഷേത്രം, സിഎസ്ഐ ചർച്ച്, കുറ്റിച്ചിറ മിഷ്കാൽ പള്ളി, പട്ടാള പള്ളി തുടങ്ങിയവ തീർത്ഥാടന പൈതൃക ടൂറിസം വികസന പദ്ധതിയുടെ ഭാഗമായി. ഇത്തരം വികസന പ്രവൃത്തികൾ പ്രദേശത്തിന്‍റെ സാമൂഹികവും സാമ്പത്തികവുമായ വളർച്ചയ്ക്ക് വഴിവെക്കും. അവയുടെ പവിത്രതയും പ്രൗഢിയും സംരക്ഷിക്കാൻ കൂട്ടായി സാധിക്കണം. പഴമയുടെ തനിമ ചോരാതെയുള്ള വികസന പ്രവൃത്തികൾക്കാണ് ഇത്തരം കേന്ദ്രങ്ങളിൽ ശ്രദ്ധ ചെലുത്തുന്നതെന്നും മന്ത്രി കൂട്ടിച്ചേർത്തു. 99.50 ലക്ഷം രൂപ ചെലവിലാണ് പ്രവൃത്തി പൂർത്തീകരിച്ചത്. വിശാലമായ ഗ്രീൻ റൂം സൗകര്യത്തോട് കൂടിയ ഓപ്പൺ സ്റ്റേജ്, ആകർഷകമായ ഗേറ്റ് വേ, ചുറ്റുമതിൽ, സ്റ്റോൺ പേവിങ് എന്നിവയാണ് ഒരുക്കിയത്. ചടങ്ങിൽ ഫറോക്ക് നഗരസഭ ചെയർമാൻ എൻ.സി അബ്ദുൽ റസാക്ക് അധ്യക്ഷത വഹിച്ചു. കൗൺസിലർമാരായ പി. ദീപിക, കെ. വിനോദ് കുമാർ, വിനോദ സഞ്ചാര വകുപ്പ് ഡെപ്യൂട്ടി ഡയറക്ടർ സത്യജിത് ശങ്കർ, ഡിടിപിസി സെക്രട്ടറി ടി. നിഖിൽദാസ്, ടി. രാധാഗോപി, വാളക്കട ബാബു, അഡ്വ. കെ.എം ഹനീഫ, വി. മോഹനൻ, പി. മുരളീധരൻ, കെ.ടി മുരളീധരൻ, എം.എം മുസ്തഫ, അസ്‌ലം പുളിയാളി, ബഷീർ പാണ്ടികശാല, ബാസിദ് ചേലകോട്ട്, കെ. ബീരാൻകുട്ടി, കെ. സുബ്രഹ്മണ്യൻ, വിനോദ് കുമാർ പറന്നാട്ടിൽ, വിനോദ സഞ്ചാര വകുപ്പ് മേഖല ജോയന്‍റ് ഡയറക്ടർ ഡി. ഗിരീഷ് കുമാർ, ക്ഷേത്ര സംരക്ഷണ സമിതി പ്രസിഡന്‍റ് ബാലകൃഷ്ണൻ ഓർക്കുഴി തുടങ്ങിയവർ സംസാരിച്ചു. നിർമ്മാണ പ്രവൃത്തികൾക്ക് നേതൃത്വം നൽകിയ യുഎൽസിസിയുടെ ടി.പി രാധാകൃഷ്ണൻ, പി.പി ജിതേഷ്, പ്രൊജക്ട് എൻജിനീയർ വി. അജേഷ്, പദ്ധതിയുടെ രൂപകല്പന നിർവഹിച്ച ജിതിൻ പൊന്നേംപറമ്പത്ത്, അനുഷ്ഠാന തിറയാട്ട കലാസമിതി സാരഥി മുരളി വാഴയൂർ, ശിൽപ്പി മുണ്ടോളത്തിൽ കിളിയാടി ദേവദാസൻ എന്നിവരെ ചടങ്ങിൽ ആദരിച്ചു

നൊച്ചാട് ഫെസ്റ്റിനു തുടക്കമായി

പേരാമ്പ്ര: നൊച്ചാടിന്‍റെ സാംസ്കാരികോത്സവമായ നൊച്ചാട് ഫെസ്റ്റ് തുടങ്ങി. 26 വരെ നടക്കുന്ന വിവിധ പരിപാടികളുടെ ഭാഗമായി ലഹരി കലയോട് എന്ന വിഷയം പ്രമേയമാക്കി ചിത്രകാരൻമാരുടെ കൂട്ടായ്മ വെള്ളിയൂർ സുഭിക്ഷക്ക് സമീപം സംഘടിപ്പിച്ചു. ചിത്രകാരൻ അഭിലാഷ് തിരുവോത്ത് ഉദ്ഘാനം ചെയ്തു. വാർഡ് മെമ്പർ ലിമ പാലയാട്ട് അധ്യക്ഷത വഹിച്ചു. നടൻ മുഹമ്മദ് പേരാമ്പ്ര മുഖ്യാതിഥിയായി. വാർഡ് മെമ്പർമാരായ ശോഭന വൈശാഖ്, ഷിജി കൊട്ടാറക്കൽ, കെ. മധു കൃഷ്ണൻ, സുമേഷ് തിരുവോത്ത്, ബ്ലോക്ക് പഞ്ചായത്ത് മെമ്പർ പ്രഭാശങ്കർ, ഫെസ്റ്റ് ജനറൽ കൺവീനർ വി.എം. മനോജ്, പ്രോഗ്രാം കമ്മറ്റി കൺവീനർ എടവന സുരേന്ദ്രൻ, വി.എം. അഷറഫ്, കെ.കെ.ഹനീഫ തുടങ്ങിയവർ സംബന്ധിച്ചു. പങ്കെടുത്ത ചിത്രകലാ അധ്യാപകർക്ക് സ്നേഹോപഹാരവും നൽകി. ക്യാൻവാസിൽ വരച്ച ചിത്രങ്ങൾ ഫെസ്റ്റ് നടക്കുന്ന സ്ഥലത്തും പിന്നീട് പഞ്ചായത്ത് കോൺഫറൻസ് ഹാളിലും പ്രദർശിപ്പിക്കും. സി.കെ. കുമാരൻ, ആർ.ബി. ബഷീർ ചിത്രകൂടം, ശ്രീധർ ആർട്സ്, കെ.ബവീഷ് , കെ.സി. രാജീവൻ തുടങ്ങി 30 ചിത്രകാരൻമാർ പങ്കെടുത്തു

കൂരാച്ചുണ്ട് ഇടവക പ്ലാറ്റിനം ജൂബിലി ആഘോഷവും വൈദീക മന്ദിര ഉദ്ഘാടനവും നാളെ

കൂരാച്ചുണ്ട്: സെന്‍റ് തോമസ് ഫൊറോന ഇടവകയുടെ പ്ലാറ്റിനം ജൂബിലി ആഘോഷങ്ങൾക്ക് തുടക്കവും ഇടവകയിൽ പുതിയതായി നിർമിച്ച വൈദീക മന്ദിരത്തിന്‍റെ ഉദ്ഘാടനവും വെഞ്ചിരിപ്പ് കർമ്മവും നാളെ താമരശേരി ബിഷപ് മാർ റെമീജിയോസ് ഇഞ്ചനാനിയിൽ നിർവഹിക്കും. വൈകിട്ട് 4.50ന് ബിഷപ് മാർ റെമീജിയോസ് ഇഞ്ചനാനിയിലിന് സ്വീകരണം, അഞ്ചിന് വിശുദ്ധ കുർബാന, തുടർന്ന് ഇടവകയുടെ പ്ലാറ്റിനം ജൂബിലി ഉദ്ഘാടനവും വൈദീക മന്ദിരത്തിന്‍റെ വെഞ്ചിരിപ്പ് കർമ്മവും ബിഷപ്പ് നിർവഹിക്കും.

സൂപ്പർ സ്‌പെഷാലിറ്റി ഓപറേഷൻ തിയറ്ററുകൾ ഇന്നുമുതല്‍ പ്രവര്‍ത്തനമാരംഭിക്കും

കോഴിക്കോട്: കോഴിക്കോട് മെഡിക്കൽ കോളജിലെ പിഎംഎസ്എസ് ബ്ലോക്കിൽ ഇന്നുമുതല്‍ 14 സർജിക്കൽ സൂപ്പർ സ്പെഷാലിറ്റി ഓപറേഷൻ തിയറ്ററുകൾ പ്രവർത്തനം ആരംഭിക്കുന്നു. ഒരു കോടി 36 ലക്ഷം ചെലവ് വരുന്ന അമേരിക്കൻ നിർമിത ഹാർട്ട് ലെങ്ങ് മെഷീൻ ഇവിടെ സജ്ജമാക്കിയിട്ടുണ്ട്. ഒരെണ്ണം കൂടി ഉടൻലഭ്യമാകും. നിലവിൽ ഇവിടെയുണ്ടായിരുന്ന മെഷീൻ കാലപ്പഴക്കം വന്നതായിരുന്നു. ശസ്ത്രക്രിയകൾ കാലതാമസംകൂടാതെ നടത്താനാകുമെന്നാണ്‌ ഏറ്റവും പ്രധാനം. ആഴ്‌ചയിൽ രണ്ട്‌ ദിവസമാണ്‌ സൂപ്പർ സ്പെഷാലിറ്റിയിലെ ഒപി. ഒരുമാസം 1,500ലേറെ രോഗികൾ ഒപിയിലും അത്യാഹിത വിഭാഗത്തിലുമായി എത്തുന്നുണ്ട്. നിലവിൽ ഒരുമാസം അമ്പത്തഞ്ചോളം ബൈപാസ് സർജറികൾ നടത്തുന്നുണ്ട്. ലക്ഷങ്ങൾ ചെലവുവരുന്ന ശസ്ത്രക്രിയ ആരോഗ്യ ഇൻഷുറൻസിൽ ഉൾപ്പെടുത്തി സൗജന്യമായാണ് ചെയ്യുന്നത്. രോഗികളുടെ ബാഹുല്യത്താൽ ശസ്ത്രക്രിയക്കായി സെപ്‌തംബർവരെ തീയതി നൽകിയിട്ടുണ്ട്‌. നിലവിൽ 13 ബെഡ് മാത്രമാണ് ഐസിയുവിൽ ഉണ്ടായിരുന്നത്. മൂന്ന് ദിവസം തുടർച്ചയായി ശസ്ത്രക്രിയ നടത്തിയാൽ ഐസിയുവിൽ സ്ഥലമില്ലാത്ത അവസ്ഥയായിരുന്നു. പുതിയ തിയറ്ററിനൊപ്പം 20 ബെഡ്‌ വീതമുള്ള ഐസിയുവും രണ്ട് വാർഡുകളും തുറന്നതോടെ ഈ പ്രശ്നത്തിന് പരിഹാരമായി. കേന്ദ്രീകൃത ഓക്സിജൻ വിതരണ സംവിധാനവും ആധുനിക രീതിയിലുള്ള ബെഡുകളും എംആർഐ ഉൾപ്പെടെ മറ്റ് ചികിത്സാ സംവിധാനങ്ങളും രോഗികൾക്ക് ഏറെ ആശ്വാസമാകും. സ്റ്റാഫ് നഴ്സ്, ശുചീകരണ ജീവനക്കാർ ഉൾപ്പെടെ 150 പേരെ ലഭ്യമാക്കും.

ട്രെയിനുകൾക്ക് വേഗം കൂടും; പാത ബലപ്പെടുത്തൽ തുടങ്ങി

ഫറോക്ക്: ട്രെയിനുകളുടെ വേഗം കൂട്ടുന്നതിനു മുന്നോടിയായി റെയിൽപാത സുരക്ഷിതമാക്കുന്ന പ്രവൃത്തികൾക്ക് തുടക്കമായി. ഭൂനിരപ്പിൽ നിന്നു പാത ഉയർന്ന നിലയിലുള്ള ഭാഗങ്ങളിൽ അരികു ഭാഗത്ത് മണ്ണിട്ട് നിരപ്പാക്കുന്ന പ്രവൃത്തിയാണ് തുടങ്ങിയത്.പാതയോരത്ത് ആവശ്യമായ ഇടങ്ങളിലെല്ലാം മണ്ണിട്ട് വീതി കൂട്ടി ബലപ്പെടുത്തും.ഫറോക്ക് പഴയ പാലത്തിനു സമീപം റെയിലോരത്ത് 5 മീറ്ററോളം താഴ്ചയുണ്ട്. ഇവിടെ മണ്ണിടിച്ചിൽ തടയുക ലക്ഷ്യമിട്ടുള്ള പണികൾ പുരോഗമിക്കുകയാണ്. ഫറോക്ക് റെയിൽവേ സ്റ്റേഷൻ വളപ്പിൽ രണ്ടാം പ്ലാറ്റ്ഫോം പരിസരത്തു നിന്നു മണ്ണ് എത്തിച്ചാണ് താഴ്ചയുള്ള ഭാഗങ്ങളിൽ കൊണ്ടിടുന്നത്. നിലവിൽ 110 കിലോ മീറ്റർ വേഗത്തിലാണ് ഇതുവഴി ട്രെയിനുകൾ കടന്നു പോകുന്നത്. വേഗം 130 കിലോമീറ്ററാക്കി വർധിപ്പിക്കാൻ റെയിൽവേ പദ്ധതിയിടുന്നുണ്ട്. ഇതിന്‍റെ ഭാഗമായാണ് വീതിയില്ലാത്ത ഭാഗങ്ങൾ മണ്ണിട്ട് നിരപ്പാക്കുന്നത്. ആദ്യഘട്ടത്തിൽ ഫറോക്ക് റെയിൽപാലം പരിസരം മുതൽ ചെറുവണ്ണൂർ കമാനപാലം പരിസരം വരെയാണ് റെയിൽപാത ബലപ്പെടുത്തുന്നത്

ബീച്ച് ഫയർ സ്റ്റേഷന് വേണം, രക്ഷ

കോഴിക്കോട്: അത്യാഹിതങ്ങളില്‍ രക്ഷയാകേണ്ട ബീച്ച് ഫയർ സ്റ്റേഷൻ ദുരവസ്ഥ കയത്തിൽ. നഗര സുരക്ഷയിൽ പ്രധാന പങ്കുവഹിക്കുന്ന ബീച്ച് ഫയർ സ്റ്റേഷന് കെട്ടിടം ഇല്ലാതായിട്ട് മാസങ്ങളായി. കാലപ്പഴക്കത്താൽ നിലം പൊത്താറായ കെട്ടിടം പൊളിച്ചു നീക്കുകയായിരുന്നു. സ്ഥലത്ത് പുതിയ കെട്ടിടം നിർമിക്കാൻ പദ്ധതി തയാറാക്കിയെങ്കിലും നിർമാണം ഇതുവരെ തുടങ്ങാനായിട്ടില്ലജീവനക്കാരുടെ ക്വാർട്ടേഴ്സ് ഉണ്ടായിരുന്ന ഭാഗത്ത് ടാർപോളിൻ ഷീറ്റ് വലിച്ചുകെട്ടിയാണ് മാസങ്ങളായി ഫ പ്രവർത്തനം. പഴയ ക്വാർട്ടേഴ്സിലാണ് ഓഫിസ് പ്രവർത്തനവും ജീവനക്കാരുടെ വിശ്രമവുമെല്ലാം. ഫയർ സ്റ്റേഷൻ കെട്ടിടം അപകടാവസ്ഥയിലായതോടെ പുതിയ കെട്ടിടം നിർമിക്കാനാവശ്യമായ പദ്ധതി തയാറാക്കി സർക്കാറിന് സമർപ്പിച്ചശേഷം താൽകാലിക സൗകര്യം ഒരുക്കി നൽകാൻ ജില്ലാ ഫയർ ഓഫിസർ ജില്ലാ കളക്ടര്‍ക്കും മേയർക്കും നേരത്തെ കത്ത് നൽകിയിരുന്നു. സ്റ്റേഡിയത്തിനടുത്ത് താൽകാലിക സൗകര്യമൊരുക്കാമെന്ന് ആദ്യം കോർപറേഷനും മത്സ്യത്തൊഴിലാളി ക്ഷേമനിധി ബോർഡ് ഓഫിസ് കെട്ടിടം ലഭ്യമാക്കാൻ ജില്ല ഭരണകൂടവും ആദ്യം ഇടപെട്ടെങ്കിലും പിന്നീട് ഒന്നും നടന്നില്ല. ഇതോടൊയണ് നിലവിലെ കെട്ടിടം പൊളിച്ചതിന്‍റെ തൊട്ടടുത്തുതന്നെ ടാർപോളിൻ ഷീറ്റ് വലിച്ചുകെട്ടി താൽകാലിക സൗകര്യമൊരുക്കിയത്.

ലഹരി ഉപയോഗവും വിൽപ്പനയും : കേസുകൾ കൂടുന്നു, പിടിയിലാകുന്നവരുടെ എണ്ണവും

കോഴിക്കോട്: ജില്ലയില്‍ ലഹരി വസ്തുക്കൾ സഹിതം പിടിയിലാകുന്നവരുടെ എണ്ണത്തിലും ഇതേ തുടന്നുള്ള കേസുകളുടെ എണ്ണത്തിലും വന്‍ വര്‍ധനവാണുള്ളത്. ഈ മാസം മാത്രം 62 കേസുകളിലായി 66 പേരാണ് അറസ്റ്റിലായത്. അറസ്റ്റിലായവർ ഏറെയും എംഡിഎംഎ കേസുകളിലാണ്. ലഹരി മാഫിയയ്ക്കെതിരെ നടപടി ശക്തമാക്കിയതിന് ശേഷം 1,157 പേരാണ് പോലീസ് വലയിലായത്. സിറ്റിയിൽ മാത്രം 1,101 കേസുകള്‍ രജിസ്റ്റര്‍ ചെയ്തു. 2037.44 ഗ്രാം എംഡിഎംഎയാണ് പിടികൂടിയത്. ഗ്രാമിന് പതിനായിരത്തിലധികം രൂപയാണ് ഇവയുടെ വില. ഹാഷിഷ്, കഞ്ചാവ്, മെത്താഫിറ്റമിൻ തുടങ്ങിയവും പിടികൂടിയവയിലുണ്ട്. 40.296 കിലോ ഗ്രാം കഞ്ചാവാണ് പിടികൂടിയത്.ജില്ലയിൽ ലഹരിക്കടത്തും വിതരണവും പിടികൂടുന്നതിനായി വിവിധ വകുപ്പുകളെ ഏകോപിപ്പിച്ച് പൊലീസ് ശക്തമായ പരിശോധന തുടരുകയാണ്. ലഹരി കടത്തുകാരുടെയും ഹോട്ട് സ്‌പോട്ടുകളുടെയും സമഗ്രമായ പട്ടിക തയ്യാറാക്കി ഇവിടങ്ങളിൽ കൃത്യമായ ഇടവേളകളിൽ പരിശോധന നടത്തുകയും ഇടപാടുകളിൽ ഉൾപ്പെട്ടിട്ടുണ്ടെന്ന് സംശയിക്കുന്നവരെ നിരീക്ഷണത്തിലാക്കുകയും ചെയ്തു. താമരശ്ശേരി ചുരം ഭാഗങ്ങളിലും അതിർത്തി പ്രദേശങ്ങളിലും പൊതുഗതാഗതം, ടൂറിസ്റ്റ് ബസുകൾ, ആഢംബര വാഹനങ്ങൾ എന്നിവയുൾപ്പെടെ എല്ലാ സംശയാസ്പദമായ വാഹനങ്ങളിലും പ്രത്യേക പരിശോധന നടന്നുവരികയാണ്. ലഹരി വസ്തുക്കളുമായി പിടികൂടുന്ന കുറ്റവാളികളെ ജയിലിൽ അടക്കുകയും സ്ഥിരം കുറ്റവാളികളായി കാപ്പ ചുമത്തി നാടുകടത്തുകയും ചെയ്യുകയാണ്. മയക്കുമരുന്ന് കടത്താൻ ഉപയോഗിക്കുന്ന വാഹനവും ലഹരി വിൽപ്പനയിലൂടെ സമ്പാദിച്ച മുഴുവൻ സ്വത്തു വകകളും പിടിച്ചെടുക്കുന്നുണ്ട്.

മെഡിക്കൽ കോളജിൽ രോഗിയുടെ കേസ് ഷീറ്റ് നഷ്ടപ്പെട്ടതായി പരാതി

കോഴിക്കോട്: കോഴിക്കോട് മെഡിക്കൽ കോളജിൽ പ്രവേശിപ്പിച്ച രോഗിയുടെ കേസ് ഷീറ്റ് നഷ്ടപ്പെട്ടതായി പരാതി. മഞ്ഞപ്പിത്തത്തെ തുടർന്ന് ചികിത്സ തേടിയ കൊയിലാണ്ടി സ്വദേശി മണിയുടെ കേസ് ഷീറ്റാണ് നഷ്ടപ്പെട്ടത്. ചികിത്സാ സഹായത്തിനും ഡിസ്ചാർജിനുമടക്കം കേസ് ഷീറ്റ് ആവശ്യമാണ്. ഒരുമാസം മുന്പാണ് മണിയെ കോഴിക്കോട് മെഡിക്കൽ കോളജിൽ പ്രവേശിപ്പിച്ചത്. കൂട്ടിന് ഭാര്യ മിനിയാണുള്ളത്. ചികിത്സ പൂർത്തിയായി വരുന്നതിനിടെയാണ് കഴിഞ്ഞ ദിവസം ചികിത്സാ വിവരങ്ങളുള്ള കേസ് ഷീറ്റ് കാണാതെ പോയത്. ഡോക്ടറുടെ കൈയിൽ നിന്നാണ് നഷ്ടപ്പെട്ടതെന്ന് മിനി ആരോപിക്കുന്നു.ആശുപത്രിയിൽ നിന്ന് ഡിസ്ചാർജിന് മാത്രമല്ല, ഇൻഷ്വറൻസ് തുക ലഭിക്കണമെങ്കിലും കേസ് ഷീറ്റ് വേണമെന്നാണ് നിബന്ധന.

വാഹനങ്ങൾ തമ്മിൽ ഉരസിയതിനെ ചൊല്ലി തർക്കം : ദമ്പതികൾക്ക് മർദനമേറ്റു, കാർ തകർത്തു

നാദാപുരം: കല്ലാച്ചി-വളയം റോഡിൽ വിഷ്ണുമംഗലം പാലത്തിന് സമീപം കാറിന് നേരെ അക്രമം. ഏഴ് മാസം പ്രായമായ കുട്ടി ഉൾപ്പെടെ നാല് പേർക്ക് പരിക്കേറ്റു. ചെക്യാട് പുളിയാവ് സ്വദേശികളായ ചാലിൽ നിധിൻ ലാൽ (28), ഭാര്യ ആതിര (24) മകൾ നിതാര (എഴ് മാസം), മുസ്‌ലിം ലീഗ് നേതാവ് അഹമ്മദ് കുറുവയിൽ (48) എന്നിവർക്കാണ് പരിക്കേറ്റത്. ഞായറാഴ്ച്ച ഉച്ചയ്ക്ക് 2.30 ഓടെയാണ് സംഭവം. വിഷ്ണുമംഗലത്തെ വധുഗൃഹത്തിൽ നിന്ന് പുളിയാവ് ഭാഗത്തെ വരന്‍റെ വീട്ടിലേക്ക് പോവുകയായിരുന്നു കാർ യാത്രക്കാർ. വളയം ഭാഗത്ത് നിന്ന് കല്ലാച്ചി ഭാഗത്തേക്ക് വരികയായിരുന്ന മറ്റൊരു വിവാഹ സംഘം ഓടിച്ച ഥാർ ജീപ്പ് ചെക്യാട് സ്വദേശികൾ സഞ്ചരിച്ച കാറിൽ ഇടിച്ചു. ഇത് ചോദ്യം ചെയ്തതാണ് സംഘർഷത്തിനിടയാക്കിയത്. ഥാർ ജീപ്പിൽ ഉണ്ടായിരുന്ന ആറ് പേർ അടങ്ങുന്ന സംഘം കാർ യാത്രക്കാരായ കുടുംബത്തെ അക്രമിക്കുകയായിരുന്നു. കാറിന്‍റെ ഗ്ലാസ് ഇരുമ്പുവടി കൊണ്ട് അടിച്ച് തകർക്കുകയും യാത്രക്കാരെ അക്രമിക്കുകയും ചെയ്തെന്നാണ് പരാതി. പ്രദേശത്ത് സംഘർഷം നടക്കുന്നത് അറിഞ്ഞ് സ്ഥലത്ത് എത്തിയതായിരുന്നു മുസ്‌ലിം ലീഗ് നേതാവ് അഹമ്മദ് കുറുവയിൽ. സ്ഥലത്ത് വൻ പോലീസ് സന്നാഹവും എത്തിയിരുന്നു. ഇതിനിടയിലാണ് കുറുവയലിന് മർദനമേറ്റത്. നെഞ്ചുവേദന അനുഭവപ്പെട്ട ഇദ്ദേഹത്തെ നാദാപുരം ഗവ. ആശുപത്രിയിലും പിന്നീട് കോഴിക്കോട് മെഡിക്കൽ കോളജിലും പ്രവേശിപ്പിച്ചു. പരിക്കേറ്റ കാർ യാത്രക്കാർ നാദാപുരം ഗവ. ആശുപത്രിയിൽ ചികിൽസ തേടി. സംഘർഷത്തെ തുടർന്ന് വളയം റോഡിൽ മണിക്കൂറുകളോളം ഗതാഗതം സ്തംഭിച്ചു. സംഘർഷ സാധ്യത കണക്കിലെടുത്ത് നാദാപുരം, വളയം, കുറ്റ്യാടി, എടച്ചേരി, വടകര എന്നിവിടങ്ങളിൽ നിന്നുള്ള വൻ പോലീസ് സംഘം സ്ഥലത്ത് ക്യാമ്പ് ചെയ്തു.

മലബാർ മാക്സി വിഷൻ ഐ ഹോസ്പിറ്റൽ ലോഞ്ചിംഗ്

"ഫാമിലി മദ്യശാലകളും സർക്കാർ വക മദ്യം വിളമ്പലും നാടിന് ദുരിതം'

തിരുവമ്പാടി: മുൻ സർക്കാരിന്‍റെ മദ്യനയം തട്ടിപ്പാണെന്നും സമ്പൂർണ മദ്യനിരോധനം തങ്ങൾ നടപ്പിലാക്കുമെന്നും വീരവാദം മുഴക്കി അധികാരത്തിൽ കയറിയവർ നാട് മുഴുവൻ മദ്യപ്പുഴ ഒഴുക്കുകയാണെന്ന് കെസിബിസി മദ്യ ലഹരിവിരുദ്ധ സമിതി താമരശേരി രൂപതാ കമ്മിറ്റി ആരോപിച്ചു. ഇത്രയും അപക്വവും നാടിനെ മദ്യ മാഫിയയ്ക്ക് തീറെഴുതി കൊടുക്കുകയും ചെയ്ത ഒരു ഭരണം കേരളചരിത്രത്തിൽ തന്നെ ആദ്യമാണെന്ന് കമ്മിറ്റി ആരോപിച്ചു. കെസിബിസി മദ്യ ലഹരിവിരുദ്ധ സമിതി രൂപതാ സംഗമം ഡയറക്ടർ ഫാ. ജിന്‍റൊ മച്ചുകുഴിയിൽ ഉദ്ഘാടനം ചെയ്തു. രൂപതാ പ്രസിഡന്‍റ് കുര്യൻ ചെമ്പനാനി അധ്യക്ഷത വഹിച്ചു. സെക്രട്ടറി ജോളി ഉണ്ണിയേപ്പിള്ളിൽ, സംസ്ഥാന സെക്രട്ടറി റോയ് ജോസ് മുരിക്കോലിൽ, വി.ജെ. മത്തായി, സിസ്റ്റർ ഗീത സിഎംസി, കെ.സി. ടോമി തുടങ്ങിയവർ പ്രസംഗിച്ചു.

വാഹനാപകടം: സ്ത്രീക്ക് ഗുരുതര പരിക്ക്

മാനന്തവാടി: ടെംപോ ട്രാവലറുമായി കൂട്ടിയിടിച്ച സ്കൂട്ടറിലെ യാത്രക്കാരിക്ക് ഗരുതര പരിക്ക്. ആറാട്ടുതറ കരിങ്കളോട്ടിൽ സിന്ധുവിനാണ് (45) പരിക്കേറ്റത്. ഇന്നലെ ഉച്ചയോടെ വള്ളിയൂർകാവ് കണ്ണിവയലിലാണ് അപകടം. സിന്ധുവിനെ മേപ്പാടി അരപ്പറ്റയിലെ സ്വകാര്യ മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.

പരോളിൽ ഇറങ്ങിയ പ്രതി അയൽവാസിയെ വെട്ടിപ്പരിക്കേൽപ്പിച്ചു

കേണിച്ചിറ: പരോളിൽ ഇറങ്ങിയ കൊലക്കേസ് പ്രതി അയൽവാസിയെ വെട്ടിപ്പരിക്കേൽപ്പിച്ചു. വട്ടത്താനി കട്ടാന്പിള്ളി അനൂപിനാണ് വെട്ടേറ്റത്. ഇതുമായി ബന്ധപ്പെട്ട് വട്ടത്താനി മഠത്തിപ്പറന്പിൽ മെജോ ആന്‍റണിയെ പോലീസ് കസ്റ്റഡിയിലെടുത്തു. കഴിഞ്ഞ ദിവസം രാത്രിയാണ് സംഭവം. വ്യക്തിവിരോധത്തിലാണ് അനൂപിനെ മെജോ ആക്രമിച്ചതെന്നു പോലീസ് പറഞ്ഞു. അനൂപിനെ കോഴിക്കോട് സ്വകാര്യ ആശുപത്രിയിൽ പ്രവേശിപ്പിച്ചു.

Deepika.com

The Largest Read Malayalam Internet Daily

Quick Links

Rashtra Deepika LTD

Deepika.com

The Largest Read Malayalam Internet Daily

Local News

Quick Links

Rashtra Deepika LTD