കാഞ്ഞാർ: കുടയത്തൂർ പഞ്ചായത്തിലെ റോഡുകളുടെ ശോചനീയാവസ്ഥ പരിഹരിക്കാത്തതിൽ പ്രതിഷേധിച്ച് യുഡിഎഫ് നടത്തിയ മാർച്ചിൽ പോലീസുമായി ഉന്തും തള്ളും.
പ്രതിഷേധ മാർച്ച് പോലീസ് തടഞ്ഞതിനെത്തുടർന്നാണ് പ്രവർത്തകരും പോലീസും തമ്മിൽ ഉന്തുംതള്ളും ഉണ്ടായത്. എന്നാൽ നേതാക്കൾ ഇടപെട്ട് ശാന്തമാക്കിയതോടെ സംഘർഷത്തിന് അയവു വന്നു.
പഞ്ചായത്ത് ഓഫീസിനു മുന്പിൽ ചേർന്ന സമ്മേളനം കെപിസിസി വൈസ് പ്രസിഡന്റ് റോയി കെ. പൗലോസ് ഉദ്ഘാടനം ചെയ്തു.യുഡിഎഫ് കണ്വീനർ അബ്ദുൾ അസീസ് അധ്യക്ഷത വഹിച്ചു. കേരള കോണ്ഗ്രസ് ജില്ലാ പ്രസിഡന്റ് പ്രഫ. എം.ജെ. ജേക്കബ് മുഖ്യപ്രഭാഷണം നടത്തി.
സംസ്ഥാന ജനറൽ സെക്രട്ടറി എം. മോനിച്ചൻ, പഞ്ചായത്ത് മുൻ പ്രസിഡന്റ് കെ.കെ. മുരളീധരൻ, എം.കെ. പുരുഷോത്തമൻ, ഫ്രാൻസിസ് പടിഞ്ഞാറേടത്ത്, ജിൽസ് മുണ്ടയ്ക്കൽ, പഞ്ചായത്ത് വൈസ് പ്രസിഡന്റ് ആഞ്ജലീന സിജോ, പുഷ്പ വിജയൻ, ലത ജോസ്, നസിയ ഫൈസൽ, ആശ റോജി എന്നിവർ പ്രസംഗിച്ചു.
Tags : LOCAL