ചെമ്പേരി: വൈഎംസിഎ ചെമ്പേരി യൂണിറ്റിന്റെ ആഭിമുഖ്യത്തിൽ സ്വാതന്ത്ര്യ ദിനാചരണത്തോടനുബന്ധിച്ച് ജില്ലാതല സ്വാതന്ത്ര്യദിന മൾട്ടി മീഡിയ ക്വിസ് മത്സരം നടത്തി. ഇതോടൊപ്പം കാർഗിൽ യുദ്ധ വിജയത്തിന്റെ രജത ജൂബിലി പ്രമാണിച്ച് യുദ്ധത്തിൽ പങ്കെടുത്ത ഏരുവേശി പഞ്ചായത്തിൽപ്പെട്ട സൈനികരെ ആദരിക്കുകയും ചെയ്തു. നിർമല ഹയർ സെക്കൻഡറി സ്കൂൾ ഓഡിറ്റോറിയത്തിൽ നടന്ന ക്വിസ് മത്സരം സ്കൂൾ പ്രിൻസിപ്പൽ സി.ഡി. സജീവ് ഉദ്ഘാടനം ചെയ്തു. ചെമ്പേരി വൈഎംസിഎ പ്രസിഡന്റ് ജോമി ചാലിൽ അധ്യക്ഷത വഹിച്ചു. ഹയർ സെക്കൻഡറി, ഹൈസ്കൂൾ, യുപി എന്നീ രണ്ടു വിഭാഗങ്ങളിലായി നടന്ന മത്സരങ്ങളിൽ കണ്ണൂർ, കാസർഗോഡ് ജില്ലകളിൽ നിന്നുള്ള അറുപതോളം ടീമുകൾ പങ്കെടുത്തു.
യുപി വിഭാഗത്തിലെ ഒന്ന്, രണ്ട്, മൂന്ന് സ്ഥാനങ്ങൾ യഥാക്രമം കുടിയാന്മല ഫാത്തിമ യുപി സ്കൂളിലെ ആൻ മരിയ ബെന്നി, പി.ബി. ബിസ്മി, വീർപ്പാട് സെന്റ് സെബാസ്റ്റ്യൻസ് യുപി സ്കൂളിലെ എഡ്വിൻ വർഗീസ്, അയാൻ സന്തോഷ്, വയത്തൂർ യുപി സ്കൂളിലെ ധ്യാൻദേവ്, പി.എസ്.വിനോദ് അദ്വൈത് എന്നിവർക്കാണ് ലഭിച്ചത്.
ഹയർ സെക്കൻഡറി, ഹൈസ്കൂൾ വിഭാഗത്തിൽ നടുവിൽ സ്കൂളിലെ ക്ലാരിസ് ജോജോ, ടോം തോമസ് എന്നിവർ ഒന്നാം സ്ഥാനം നേടി, വായാട്ടുപറമ്പ് സെന്റ് ജോസഫ് സ്കൂളിലെ അർജുൻ രാജേഷ്, എസ്.അനന്യ എന്നിവർ രണ്ടാം സ്ഥാനവും ചെമ്പേരി സെന്റ് തോമസ് പബ്ലിക് സ്കൂളിലെ ആന്റണി ജോസഫ്, ജോസ്ന ജോസഫ് എന്നിവർ മൂന്നാം സ്ഥാനവും കരസ്ഥമാക്കി.
കാർഗിൽ യുദ്ധത്തിൽ പങ്കെടുത്ത ധീര ജവാൻമാരായ റിട്ട. ഹവിൽദാർ യു.ബി. രാജീവൻ, റിട്ട. സുബേദാർ ടി.പി. ഡൊമിനിക്ക് താളംപ്ലാക്കൽ എന്നിവർക്കാണ് ആദരവ് നൽകിയത്. ചെമ്പേരി ലൂർദ് മാതാ ഫൊറോന പള്ളിക്ക് ബസിലിക്ക പദവി ലഭിച്ചതിനെ തുടർന്ന് പ്രഥമ റെക്ടറായി നിയമിതനായ റവ. ഡോ. ജോർജ് കാഞ്ഞിരക്കാട്ടിനെ പൊന്നാടയണിയിച്ച് ആദരിച്ചു.