അബുദാബിയിൽ വിഷവാതകം ശ്വസിച്ച് രണ്ടു മലയാളികൾ ഉൾപ്പെടെ മൂന്ന് ഇന്ത്യക്കാർ മരിച്ചു
Thursday, October 24, 2024 1:00 AM IST
അബുദാബി: അബുദാബിയില് മാലിന്യടാങ്കിലെ വിഷവാതകം ശ്വസിച്ച് രണ്ടു മലയാളികള് ഉള്പ്പെടെ മൂന്ന് ഇന്ത്യക്കാര് മരിച്ചു. പത്തനംതിട്ട വള്ളിക്കോട് മണപ്പാട്ട് വടക്കേതില് അജിത് രാമചന്ദ്രൻ (40), പാലക്കാട് ചെർപ്പുളശേരി നെല്ലായ മാരായമംഗലം സൗത്ത് ചീരത്തള്ളിയായിൽ രാജ്കുമാർ (39) എന്നിവരാണു മരിച്ച മലയാളികള്.
പഞ്ചാബ് സ്വദേശിയാണ് മരിച്ച മൂന്നാമത്തെയാൾ. അൽഗ്രീം ഐലൻഡ് ദ്വീപ് മേഖലയിലെ സിറ്റി ഓഫ് ലൈറ്റ്സ് എന്ന കെട്ടിടത്തിലെ മാലിന്യടാങ്ക് വൃത്തിയാക്കുന്നതിനിടെ ചൊവ്വാഴ്ച ഉച്ചയോടെയായിരുന്നു അപകടം.
മാലിന്യടാങ്കിലെ വാതകം ശ്വസിച്ച് പഞ്ചാബ് സ്വദേശിയായ തൊഴിലാളി ടാങ്കിലേക്ക് വീണു. ഇയാളെ രക്ഷിക്കാൻ ശ്രമിക്കുന്നതിനിടെ രണ്ടു മലയാളികളും ഇതിനുള്ളിലേക്ക് വീഴുകയും മരിക്കുകയുമായിരുന്നു.
മൃതദേഹങ്ങൾ അബുദാബിയിലെ ആശുപത്രിയിലേക്കു മാറ്റിയിട്ടുണ്ട്. നടപടിക്രമങ്ങൾ പൂർത്തിയാക്കി രണ്ടു ദിവസത്തിനുള്ളിൽ മൃതദേഹങ്ങൾ നാട്ടിലെത്തിക്കും. അശ്വതിയാണ് അജിത് രാമചന്ദ്രന്റെ ഭാര്യ. മകന്: അശ്വജിത്.
ഒരാഴ്ച മുന്പാണ് രാജ്കുമാർ നാട്ടിൽനിന്ന് ലീവ് കഴിഞ്ഞു തിരിച്ചുപോയത്. അച്ഛൻ: പരേതനായ ഉണ്ണിക്കൃഷ്ണൻ. അമ്മ: ശാന്തകുമാരി. ഭാര്യ: രേവതി. മക്കൾ: നീരജ്, നേഹ. സഹോദരങ്ങൾ: മണികണ്ഠൻ, സുരേഷ്, ഗീത, സുധ.