ആശുപത്രിക്കു കീഴെ സ്വർണം; തെളിവു കണ്ടിട്ടില്ലെന്ന് യുഎസ്
Wednesday, October 23, 2024 11:59 PM IST
റോം: ബെയ്റൂട്ടിലെ ആശുപത്രിക്കു കീഴെയുള്ള ബങ്കറിൽ ഹിസ്ബുള്ള ഭീകരർ പണവും സ്വർണവും ഒളിപ്പിച്ചിട്ടുണ്ടെന്നതിനുള്ള തെളിവ് അമേരിക്ക കണ്ടിട്ടില്ലെന്നു പ്രതിരോധ സെക്രട്ടറി ലോയ്ഡ് ഓസ്റ്റിൻ. ഇക്കാര്യത്തിൽ വ്യക്തത വരുത്താൻ ഇസ്രേലി അധികൃതരുമായി സഹകരിക്കുമെന്ന് അദ്ദേഹം കൂട്ടിച്ചേർത്തു.
ലബനീസ് തലസ്ഥാനത്തെ ആശുപത്രിക്കു കീഴെയുള്ള ബങ്കറിൽ ലക്ഷക്കണക്കിനു ഡോളറിന്റെ പണവും സ്വർണവും ഹിസ്ബുള്ള ഭീകരർ ഒളിപ്പിച്ചിട്ടുണ്ടെന്നാണ് ഇസ്രേലി സൈന്യം തിങ്കളാഴ്ച പറഞ്ഞത്.
വധിക്കപ്പെട്ട ഹിസ്ബുള്ള തലവൻ ഹസൻ നസറുള്ളയാണു ദീർഘകാലം വസിക്കാൻ ഉദ്ദേശിച്ചുള്ള ബങ്കർ നിർമിച്ചത്. എന്നാൽ ആശുപത്രി ആക്രമിക്കില്ലെന്ന് ഇസ്രേലി സൈന്യം കൂട്ടിച്ചേർത്തു.