ടോക്കിയോ: സുരക്ഷാ-സാങ്കേതികവിദ്യ വിഷയങ്ങളിൽ കൂടുതൽ പങ്കാളിത്തത്തിന് ഇന്ത്യ-യുഎസ് ധാരണ.
ഇരുരാജ്യങ്ങളുടെയും മുൻനിര രഹസ്യാന്വേഷണ ഏജൻസികൾ തമ്മിൽ പുതുയുഗ സാങ്കേതികവിദ്യകളുടെ സഹകരണം ശക്തമാക്കാൻ പ്രധാനമന്ത്രി നരേന്ദ്ര മോദിയും യുഎസ് പ്രസിഡന്‍റ് ജോ ബൈഡനും തമ്മിലുള്ള കൂടിക്കാഴ്ചയിൽ തീരുമാനമായി. ജപ്പാൻ തലസ്ഥാനമായ ടോക്കിയോയിൽ നടന്ന ക്വാഡ് ഉച്ചകോടിക്കിടെയാണ് ഇരുനേതാക്കളും ചർച്ച നടത്തിയത്.
ഇന്ത്യ-യുഎസ് ബന്ധത്തെ "വിശ്വാസ്യതയുടെ പങ്കാളിത്തം’എന്നു വിശേഷിപ്പിച്ച മോദി, ആഗോളസമാധാനത്തിനും സുസ്ഥിരതയ്ക്കുംവേണ്ടി ഈ ബന്ധം തുടരുമെന്നു പ്രത്യാശ പ്രകടിപ്പിച്ചു. സുരക്ഷയുൾപ്പെടെയുള്ള വിഷയങ്ങളിൽ ഇരു രാജ്യങ്ങൾക്കും ഏറെക്കുറെ സമാനമായ താത്പര്യങ്ങളുണ്ടെന്ന് അദ്ദേഹം ചൂണ്ടിക്കാട്ടി.
മേക്ക് ഇൻ ഇന്ത്യ പദ്ധതിക്കു കീഴിൽ പ്രതിരോധ മേഖലയിൽ ഉൾപ്പെടെ നിക്ഷേപം നടത്താൻ യുഎസ് വ്യവസായികളെ പ്രധാനമന്ത്രി ക്ഷണിച്ചു. ഉഭയകക്ഷി വ്യാപാരം, നിക്ഷേപം എന്നിവയുടെ വ്യാപ്തി വർധിക്കുന്നുണ്ടെങ്കിലും ഇവ ഇപ്പോഴും പരിധിയുടെ ഏറെ താഴെയാണെന്നു പ്രധാനമന്ത്രി കൂടിക്കാഴ്ചയ്ക്കിടെ ചൂണ്ടിക്കാട്ടി. അമേരിക്കയുമായുള്ള ബന്ധത്തിനു കൂടിക്കാഴ്ച കരുത്തു പകർന്നതായി വിദേശകാര്യമന്ത്രാലയം ട്വീറ്റ് ചെയ്തു.
ഇന്ത്യയും അമേരിക്കയും ഉൾപ്പെടുന്ന ബയോമെഡിക്കൽ ഗവേഷണ പദ്ധതിയായ വാക്സിൻ ആക്‌ഷൻ പ്രോഗ്രാം (വിഎപി) 2027 വരെ ദീർഘിപ്പിക്കാൻ തീരുമാനിച്ചതു നിർണായക നീക്കമായി. ബഹറിൻ കേന്ദ്രമാക്കി പ്രവർത്തിക്കുന്ന അന്താരാഷ്‌ട്ര നാവികസേനയിൽ ഇന്ത്യയും അംഗമാകുമെന്നു ബൈഡൻ-മോദി കൂടിക്കാഴ്ചയ്ക്കു പിന്നാലെ വൈറ്റ് ഹൗസ് അറിയിച്ചു.
കൂടിക്കാഴ്ചയ്ക്കു പിന്നാലെ ഇന്ത്യ-യുഎസ് ഇനിഷ്യേറ്റീവ് ഓണ്‍ ക്രിട്ടിക്കൽ ആൻഡ് എമർജിംഗ് ടെക്നോളജീസ് (ഐസെറ്റ്) സംബന്ധിച്ച് ഇരുരാജ്യങ്ങളും പ്രഖ്യാപനം നടത്തി. ഇരുരാജ്യങ്ങളുടെയും ദേശീയ സുരക്ഷാസമിതികളാണ് ഈ സംരംഭത്തിനു നേതൃത്വം നൽകുന്നത്. നിർമിതബുദ്ധി, ക്വാണ്ടം കംപ്യൂട്ടിംഗ്, 5 ജി, 6 ജി, ബയോടെക്, ബഹിരാകാശം, സെമി കണ്ടക്ടർ എന്നിവയിൽ ഇരു രാജ്യങ്ങളും സഹകരിച്ചു പ്രവർത്തിക്കും.
ഇന്ത്യയുടെ ടെക്നോളജി ഇന്നവേഷൻ ഹബ്ബിൽ അമേരിക്ക പങ്കാളിയാകും. 25 സംയുക്ത ഗവേഷണ പ്രോജക്ടുകൾക്ക് ഈ വർഷം അമേരിക്ക സഹായം നൽകും.
നിർമിത ബുദ്ധി, ഡേറ്റ സയൻസ്, ആരോഗ്യം, കാലാവസ്ഥ എന്നിവയിലാണ് ഈ ഗവേഷണങ്ങൾ.
ചൈനയ്ക്കു മുന്നറിയിപ്പ്
ടോക്കിയോ: ചൈനയ്ക്കു ശക്തമായ മുന്നറിയിപ്പുമായി ക്വാഡ് ഉച്ചകോടി. നിലവിലെ സ്ഥിതിയിൽ മാറ്റംവരുത്താൻ പ്രകോപനപരമോ ഏകാധിപത്യപരമോ ആയ നടപടികളുണ്ടാകരുതെന്ന് ഉച്ചകോടി പുറത്തിറക്കിയ സംയുക്ത പ്രസ്താവനയിൽ പറഞ്ഞു.
തർക്കമേഖലകളിലെ ചൈനയുടെ സൈനികവത്കരണം, തീരരക്ഷാസേനയുടെ ദുരുപയോഗം, മറ്റു രാജ്യങ്ങളുടെ വിഭവങ്ങളുടെ ചൂഷണം എന്നിവയിൽ അതൃപ്തി രേഖപ്പെടുത്തിയ ഉച്ചകോടി, നിലവിലെ പ്രശ്നങ്ങൾ ഭീഷണിയോ ബലപ്രയോഗമോ കൂടാതെ പരിഹരിക്കണമെന്ന് ആവശ്യപ്പെട്ടു.
അടുത്ത അഞ്ചു വർഷത്തിനുള്ളിൽ ഇന്തോ-പസിഫിക് മേഖലയിൽ 5000 കോടി ഡോളറിന്റെ നിക്ഷേപം നടത്താൻ ഉച്ചകോടി തീരുമാനിച്ചു. ഇതിനൊപ്പം പ്രഖ്യാപിച്ച സമുദ്ര നിരീക്ഷണ പദ്ധതി മുഖ്യമായും ചൈനയെയാണു ലക്ഷ്യമിടുന്നത്.
യുഎസ് പ്രസിഡന്‍റ് ജോ ബൈഡൻ, പ്രധാനമന്ത്രി നരേന്ദ്ര മോദി, ജാപ്പനീസ് പ്രധാനമന്ത്രി ഫുമിയോ കിഷിഡ, ഓസ്ട്രേലിയൻ പ്രധാനമന്ത്രി ആന്‍റണി ആൽബനീസ് എന്നിവർ ഉച്ചകോടിക്കിടെ വ്യക്തിഗത കൂടിക്കാഴ്ചകൾ നടത്തി.
ഇന്തോ-പസിഫിക് മേഖലയിലെ പുതിയ സംഭവവികാസങ്ങളും ഉഭയകക്ഷി താത്പര്യമുള്ള ആഗോളവിഷയങ്ങളും കൂടിക്കാഴ്ചയിൽ ചർച്ചയായി. യുക്രെയ്ൻ വിഷയവും ചർച്ചയ്ക്കു വന്നു.
നയതന്ത്ര,വാണിജ്യ വിഷയങ്ങളിൽ ക്വാഡ് രാജ്യങ്ങളും ചൈനയും തമ്മിലുള്ള ബന്ധം മുന്പെങ്ങുമില്ലാത്തതിനേക്കാൾ വഷളായിരിക്കുന്പോഴാണ് ഉച്ചകോടി ചേരുന്നതെന്ന പ്രത്യേകതയുണ്ട്.
കീവ്: കിഴക്കൻ യുക്രെയ്നിലെ ഡോൺബാസ് മേഖല പിടിച്ചെടുക്കാനായി റഷ്യ പോരാട്ടം തുടരുന്നു. ലുഹാൻസ്ക്, ഡോണറ്റ്സ്ക് പ്രവിശ്യകൾ ഉൾപ്പെടുന്ന ഡോൺബാസ് പിടിച്ചെടുത്തശേഷം വിജയപ്രഖ്യാപനം നടത്താനാണു റഷ്യൻ പ്രസിഡന്‍റ് പുടിന്‍റെ പദ്ധതിയെന്നു വിലയിരുത്തപ്പെടുന്നു.
ലുഹാൻസ് പ്രവിശ്യയിലെ സെവ്റോഡോണറ്റ്സ്ക് നഗരത്തിൽ രൂക്ഷ ആക്രമണമാണു റഷ്യൻ പട്ടാളം നടത്തുന്നത്. ഈ നഗരം വീണാൽ ലുഹാൻസ് പ്രവിശ്യ പൂർണമായി റഷ്യയുടെ നിയന്ത്രണത്തിലാകും.
രണ്ടാം ലോകമഹായുദ്ധത്തിനു ശേഷം യൂറോപ്പിൽ നടക്കുന്ന ഏറ്റവും വലിയ പോരാട്ടമാണു സെവ്റോഡോണറ്റ്സ്കിലേതെന്നു യുക്രെയ്ൻ വിദേശകാര്യമന്ത്രി ദിമിത്രോ കുളേബ പറഞ്ഞു.
റഷ്യയെ ചെറുക്കാനായി സഖ്യരാജ്യങ്ങൾ യുക്രെയ്ന് എത്രവും വേഗം കൂടുതൽ ആയുധങ്ങളും വെടിക്കോപ്പുകളും നല്കണം. റഷ്യ മുഴുവൻ ശക്തിയുമെടുത്താണ് സെവ്റോഡോണറ്റ്സ്കിൽ ആക്രമണം നടത്തുന്നതെന്ന് ലുഹാൻസ് പ്രവിശ്യാ ഗവർണർ സെർഹി ഹെയ്ഡെയ് പറഞ്ഞു. നഗരകേന്ദ്രത്തിൽ ഇടതടവില്ലാതെ ഷെല്ലിംഗ് നടത്തുകയാണ്.
സ്വീഡിഷ്, ഫിന്നിഷ് പ്രതിനിധികൾ തുർക്കിയിൽ
അങ്കാറ: റഷ്യയുടെ യുക്രെയ്ൻ അധിനിവേശത്തിന്‍റെ പശ്ചാത്തലത്തിൽ പാശ്ചാത്യ സൈനിക സഖ്യമായ നാറ്റോയിൽ ചേരാൻ തീരുമാനിച്ച സ്വീഡന്‍റെയും ഫിൻലാൻഡിന്‍റെയും പ്രതിനിധികൾ തുർക്കിയിലെത്തി. തുർക്കിയെ അനുനയിപ്പിക്കുകയാണു ലക്ഷ്യം.
ഇരു രാജ്യങ്ങളെയും ചേർക്കുന്നതിൽ നാറ്റോ അംഗമായ തുർക്കിക്കു കടുത്ത എതിർപ്പാണ്. നാറ്റോയുടെ ചട്ടം അനുസരിച്ച് ഏതെങ്കിലും ഒരു അംഗരാജ്യത്തിന്‍റെ എതിർപ്പു മാത്രം മതി പ്രവേശനം അസാധ്യമാക്കാൻ.
ഫിൻലൻഡും സ്വീഡനും കുർദിഷ് തീവ്രവാദികൾക്ക് അഭയം നല്കുന്നതിനാലാണ് എതിർപ്പെന്നാണു തുർക്കി പ്രസിഡന്‍റ് എർദോഗൻ വ്യക്തമാക്കിയിരിക്കുന്നത്. ഇരു രാജ്യങ്ങളും കഴിഞ്ഞയാഴ്ചയാണു നാറ്റോയിൽ ചേരാൻ അപേക്ഷ നല്കിയത്.
ചൈനയുമായി സഹകരണം വർധിപ്പിക്കും: റഷ്യ
മോസ്കോ: പാശ്ചാത്യരാജ്യങ്ങളുമായി ബന്ധം പുനഃസ്ഥാപിക്കുന്നതിനേക്കാൾ ചൈനയുമായി ബന്ധം ശക്തിപ്പെടുത്തുന്നതിനാണു റഷ്യ ഇപ്പോൾ പരിഗണന നല്കുന്നതെന്ന് അവരുടെ വിദേശകാര്യമന്ത്രി സെർജി ലാവ്റോവ്. പാശ്ചാത്യരാജ്യങ്ങൾ ‘റഷ്യാഭീതി’ വളർത്തുകയാണെന്നും അദ്ദേഹം ആരോപിച്ചു.
എണ്ണ: തീരുമാനം ഉടൻ
ബെർലിൻ: റഷ്യയിൽനിന്നുള്ള എണ്ണ, പ്രകൃതിവാതക ഇറക്കുമതി പൂർണമായി നിർത്തുന്നതു സംബന്ധിച്ച യൂറോപ്യൻ യൂണിയന്‍റെ തീരുമാനം ദിവസങ്ങൾക്കകം ഉണ്ടാകുമെന്നു ജർമൻ ധനമന്ത്രി റോബർട്ട് ഹാബെക് അറിയിച്ചു.
അതേസമയം, ഈ നടപടി റഷ്യക്ക് സമീപകാലത്തു തിരിച്ചടിയാകില്ലെന്ന് അദ്ദേഹം മുന്നറിയിപ്പു നല്കി. അന്താരാഷ്‌ട്ര വിപണിയിൽ എണ്ണവില ഉയർന്നു നിൽക്കുന്നതിനാൽ കുറഞ്ഞ അളവിലെ വില്പനകൊണ്ടു റഷ്യക്കു കൂടുതൽ വരുമാനം ലഭിക്കും.
യൂറോപ്യൻ യൂണിയൻ രാജ്യങ്ങൾ ഇറക്കുമതി ചെയ്യുന്ന പ്രകൃതിവാതകത്തിന്‍റെ 40ഉം എണ്ണയുടെ 27ഉം ശതമാനം റഷ്യയിൽനിന്നാണ്.
ഊർജകാര്യത്തിൽ റഷ്യയോടുള്ള ആശ്രിതത്വം ഘട്ടംഘട്ടമായി വർഷാവസാനത്തോടെ അവസാനിപ്പിക്കുമെന്നാണു യൂണിയൻ നേരത്തേ അറിയിച്ചിരുന്നത്.
ക്വാഡ് ഉച്ചകോടിക്കിടെ ജപ്പാൻ കടലിൽ റഷ്യ-ചൈന വ്യോമാഭ്യാസം
ടോക്കിയോ: അമേരിക്കൻ പ്രസിഡന്‍റ് ജോ ബൈഡനും പ്രധാനമന്ത്രി നരേന്ദ്ര മോദിയും അടക്കമുള്ള നേതാക്കൾ ജപ്പാനിൽ ക്വാഡ് ഉച്ചകോടിയിൽ പങ്കെടുക്കവേ ജപ്പാൻ കടലിൽ ചൈന-റഷ്യ വ്യോമാഭ്യാസം.
ഇന്ത്യ, അമേരിക്ക, ജപ്പാൻ, ഓസ്ട്രേലിയ എന്നീ രാജ്യങ്ങൾ ഉൾപ്പെട്ട ക്വാഡ് സഖ്യത്തിന്‍റെ രൂപീകരണ തന്നെ ഇന്തോ-ചൈനാ മേഖലയിലെ ചൈനയുടെ സ്വാധീനം ചെറുക്കുകയെന്നതാണ്.
ഇന്നലെ രാവിലെ നടന്ന സംയുക്ത അഭ്യാസത്തിൽ ബോംബറുകൾ അടക്കം റഷ്യയുടെ നാലും ചൈനയുടെ രണ്ടും യുദ്ധവിമാനങ്ങൾ പങ്കെടുത്തതായാണു റിപ്പോർട്ട്. ഈ വിമാനങ്ങൾ തങ്ങളുടെ വ്യോമാതിർത്തിക്ക് അടുത്തെത്തിയെന്നു ദക്ഷിണകൊറിയ അറിയിച്ചു.
വാർഷിക സൈനിക സഹകരണ പദ്ധതിയുടെ ഭാഗമായി നടന്ന സംയുക്ത ആകാശ പട്രോളിംഗ് ആയിരുന്നു ഇതെന്ന് ചൈനീസ് പ്രതിരോധമന്ത്രാലയം അറിയിച്ചു. ജപ്പാൻ കടൽ, കിഴക്കൻ ചൈനാക്കടൽ, പടിഞ്ഞാറൻ പസഫിക് സമുദ്രം എന്നിവയ്ക്കു മുകളിലൂടെ വിമാനങ്ങൾ പറന്നു.
യുക്രെയ്നിൽ റഷ്യ അധിനിവേശം ആരംഭിച്ചശേഷം ചൈനയുമായി നടത്തുന്ന ആദ്യ സൈനികാഭ്യാസമാണിത്. യുദ്ധത്തിന്‍റെ പശ്ചാത്തലത്തിൽ ചൈനയുടെയും റഷ്യയുടെയും സൗഹൃദത്തിൽ ഉടവു തട്ടിയിട്ടില്ലെന്ന വ്യക്തമായ സൂചന അഭ്യാസം നല്കുന്നതായി വിലയിരുത്തപ്പെടുന്നു.
യുക്രെയ്ൻ യുദ്ധം ആഗോള പ്രശ്നമായി: ബൈഡൻ
ടോക്കിയോ: യുക്രെയ്ൻ യുദ്ധം ആഗോളപ്രശ്നമായി മാറിയെന്നും ലോകം അന്ധകാരത്തിന്‍റെ മണിക്കൂറുകളിലൂടെയാണു കടന്നുപോകുന്നതെന്നും യുഎസ് പ്രസിഡന്‍റ് ജോ ബൈഡൻ. ജപ്പാനിൽ നടക്കുന്ന ക്വാഡ് (ഇന്ത്യ, അമേരിക്ക, ജപ്പാൻ, ഓസ്ട്രേലിയ രാജ്യങ്ങളുടെ സഖ്യം) ഉച്ചകോടിയിൽ സംസാരിക്കുകയായിരുന്നു അദ്ദേഹം.
ജനാധിപത്യവും ഏകാധിപത്യവും തമ്മിലുള്ള പോരാട്ടമാണ് ഉച്ചകോടിയിലെ പ്രധാന ചർച്ചാവിഷയമെന്നു ബൈഡൻ പറഞ്ഞു. യുക്രെയ്ൻ തുറമുഖങ്ങളെ റഷ്യ ഉപരോധിക്കുന്നതു മൂലമുള്ള ഭക്ഷ്യപ്രതിസന്ധി ലോകത്തെ മുഴുവൻ ബാധിച്ചുകഴിഞ്ഞു. റഷ്യക്കെതിരായ ആഗോളനീക്കത്തിൽ അമേരിക്കയും സഖ്യകക്ഷികളും മുന്നിലുണ്ടാകുമെന്ന് അദ്ദേഹം കൂട്ടിച്ചേർത്തു.
ഇതുപോലൊരു അധിനിവേശം ഏഷ്യയിൽ സംഭവിക്കരുതെന്ന് ജാപ്പനീസ് പ്രധാനമന്ത്രി ഫുമിയോ കിഷിഡ പറഞ്ഞു. നിയമവാഴ്ച, രാജ്യങ്ങളുടെ പരമാധികാരവും അഖണ്ഡതയും അംഗീകരിക്കൽ തുടങ്ങിയ വിഷയങ്ങളിൽ ക്വാഡ് നേതാക്കൾ അഭിപ്രായ ഐക്യത്തിലാണെന്ന് അദ്ദേഹം കൂട്ടിച്ചേർത്തു.
ചൈന തായ്‌വാൻ പിടിച്ചെടുക്കാൻ ശ്രമിച്ചാൽ അമേരിക്ക രംഗത്തിറങ്ങുമെന്ന് ബൈഡൻ കഴിഞ്ഞദിവസം പറഞ്ഞിരുന്നു.
ഭക്ഷ്യ പ്രതിസന്ധി അതിരൂക്ഷം
ദാവോസ്: യുക്രെയ്ൻ യുദ്ധം ആഗോളതലത്തിൽ ഭക്ഷ്യ പ്രതിസന്ധി രൂക്ഷമാക്കിയെന്ന് സ്വിറ്റ്സർലൻഡിലെ ദാവോസിൽ നടക്കുന്ന ലോക സാന്പത്തികസമിതിയുടെ വാർഷിക ഉച്ചകോടി വിലയിരുത്തി. കാലാവസ്ഥാ വ്യതിയാനത്തിനൊപ്പം ഭക്ഷ്യപ്രതിസന്ധി യും നേരിടേണ്ട അവസ്ഥയിലാണു ലോകം.
എൺപതു കോടി പേർക്ക് അത്താഴത്തിനു വഴിയില്ലാതായെന്ന് ഐക്യരാഷ്‌ട്രസഭയുടെ ലോക ഭക്ഷ്യപദ്ധതി എക്സിക്യൂട്ടീവ് ഡയറക്ടർ ഡേവിഡ് ബേസ്‌ലി ചൂണ്ടിക്കാട്ടി. ഭക്ഷ്യപ്രതിസന്ധിക്കും ക്ഷാമത്തിനും പരിഹാരം കാണാനുള്ള ശ്രമങ്ങൾക്കു കോവിഡ് വ്യാപനം വലിയ വെല്ലുവിളിയായിരുന്നു. യുക്രെയ്ൻ യുദ്ധം പ്രശ്നം കൂടുതൽ സങ്കീർണമാക്കി. വിശക്കുന്നവന്‍റെ ഭക്ഷണം പട്ടിണി കിടക്കുന്നവന് എടുത്തുകൊടുക്കേണ്ട അവസ്ഥയാണ് ഇന്നുള്ളത്.
റഷ്യൻ ഉപരോധം മൂലം യുക്രെയ്നിൽനിന്നുള്ള ധാന്യക്കയറ്റുമതി നിലച്ചതും വളത്തിനു വില വർധിച്ചതുമാണ് പ്രതിസന്ധി രൂക്ഷമാകാൻ കാരണം. യുക്രെയ്ൻ തുറമുഖങ്ങൾക്കു നേർക്കുള്ള റഷ്യൻ ഉപരോധം ആഗോള ഭക്ഷ്യസുരക്ഷയ്ക്കു നേർക്കുള്ള യുദ്ധപ്രഖ്യാപനമാണ്.
ഭക്ഷ്യ പ്രതിസന്ധി ത്വരിതഗതിയിൽ പരിഹരിക്കാനുള്ള ശ്രമങ്ങൾ, കാലാവസ്ഥാവ്യതിയാനം രൂക്ഷമാക്കിയേക്കുമെന്ന മുന്നറിയിപ്പ് ഉച്ചകോടി നല്കി.
കാലാവസ്ഥാ വ്യതിയാനത്തിനു കാരണമാകുന്ന ഹരിതവാതകങ്ങളുടെ ബഹിർഗമനത്തിന്‍റെ മൂന്നിലൊന്നും കാർഷികവൃത്തിയുമായി ബന്ധപ്പെട്ടാണ്.
തായ്‌വാനിൽ കോവിഡ് വ്യാപിക്കുന്നു
തായ്പെയ്: തായ്‌വാനിൽ കോവിഡ് വ്യാപനം അതിരൂക്ഷം. ഒരിക്കൽ കോവിഡ് വ്യാപനം വരുതിയിലാക്കുന്നതിനു പേരുകേട്ട രാജ്യമാണ് തായ്‌വാൻ.
2021ൽ 15,000 പേർക്കു മാത്രമാണ് രോഗം പിടിപെട്ടത്. ഇപ്പോൾ പ്രതിദിനം 80,000ത്തിനു മുകളിൽപേർക്കു രോഗം പിടിപെടുന്നു. ഓമിക്രോൺ വൈറസാണു പടരുന്നത്.
അതിർത്തികൾ അടച്ചാണു തായ്‌വാൻ കോവിഡ് വ്യാപനം നിയന്ത്രിച്ചിരുന്നത്. രോഗവ്യാപനം കൂടിയെങ്കിലും കർശന നിയന്ത്രണങ്ങൾ ലഘൂകരിക്കാനാണു സർക്കാരിന്‍റെ തീരുമാനം.
ആരാധനാക്രമജീവിതം പ്രേഷിതപ്രവർത്തനപരമാണ്: ആർച്ച്ബിഷപ് ഗുജറോത്തി
ലണ്ടൻ: ഗ്രേറ്റ് ബ്രിട്ടൻ സീറോ മലബാർ രൂപതയുടെ 2022-2027 ലെ പഞ്ചവത്സര അജപാലന പദ്ധതിയുടെ രൂപീകരണത്തിനായുള്ള രണ്ടാം എപ്പാർക്കിയൽ സമ്മേളനം വെയിൽസിലെ കഫെൻലി പാർക്ക് കണ്‍വൻഷൻ സെന്‍ററിൽ ആരംഭിച്ചു.
രൂപതാധ്യക്ഷൻ മാർ ജോസഫ് സ്രാന്പിക്കലിന്‍റെ അധ്യക്ഷതയിൽ വൈദികരും ഡീക്കന്മാരും സന്യസ്തരും അൽമായ പ്രതിനിധികളും പങ്കെടുത്ത സമ്മേളനം ഗ്രേറ്റ് ബ്രിട്ടനിലെ അപ്പോസ്തലിക് നൂണ്ഷ്യോ ആർച്ച്ബിഷപ് ഡോ. ക്ലൗഡിയോ ഗുജറോത്തി ഉദ്ഘാടനം ചെയ്തു.
ബ്രിട്ടനിലേക്കു കുടിയേറിയെത്തിയ സീറോ മലബാർ വിശ്വാസികളുടെ ആരാധനാക്രമ ജീവിതവും പ്രവർത്തനങ്ങളും തദേശീയരെ പ്രചോദിതരാക്കുന്ന വിധത്തിൽ സഭയുടെ തനതു സ്വഭാവമായ പ്രേഷിത പ്രവർത്തനപരമാണെന്ന് ഉദ്ഘാടന പ്രസംഗത്തിൽ ആർച്ച് ബിഷപ് ഗുജറോത്തി പറഞ്ഞു.
പ്രോട്ടോ സിഞ്ചെല്ലൂസ് റവ. ഡോ. ആന്‍റണി ചുണ്ടെലിക്കാട്ട്, സിഞ്ചെല്ലൂസുമാരായ ഫാ. സജിമോൻ മലയിൽ പുത്തൻപുര, ഫാ. ജോർജ് ചേലക്കൽ, ഫാ. ജിനോ അരീക്കാട്ട് എംസിബിഎസ്, ചാൻസലർ റവ. ഡോ. മാത്യു പിണക്കാട്ട്, റവ. ഡോ. വർഗീസ് പുത്തൻപുരയ്ക്കൽ, റവ. ഡോ. ജോസഫ് കറുകയിൽ, റവ. ഡോ. ജോണ് പുളിന്താനത്ത്, ഡോ. മാർട്ടിൻ ആന്‍റണി, പാസ്റ്ററൽ കൗണ്‍സിൽ സെക്രട്ടറി റോമിൽസ് മാത്യു,ജോയിന്റ് സെക്രട്ടറി ജോളി മാത്യു എന്നിവർ പ്രസംഗിച്ചു.
രൂപതയുടെ മുൻപോട്ടുള്ള പ്രവർത്തനങ്ങൾക്കുതകുന്ന രീതിയിൽ വിശുദ്ധമായത് വിശുദ്ധർക്ക് എന്ന ആപ്തവാക്യത്തിൽ അധിഷ്ഠിതമായിസീറോ മലബാർ സഭയുടെ ആരാധനക്രമം, ദൈവശാസ്ത്രം, ആധ്യാത്മികത ശിക്ഷണക്രമം, സംസ്കാരം എന്നീ വിഷയങ്ങളിൽ ആർച്ച്ബിഷപ് സിറിൽ വാസിൽ, പ്രഫ. ഡോ. സെബാസ്റ്റ്യൻ ബ്രോക്ക്, റവ. ഡോ. പോളി മണിയാട്ട് ,റെവ. ഡോ. ജേക്കബ് കിഴക്കേവീട്, പ്രഫ. പി.സി. അനിയൻകുഞ്ഞ് എന്നിവർ പ്രബന്ധങ്ങൾ അവതരിപ്പിച്ചു.
യുഎഇയിൽ കുരങ്ങുപനി സ്ഥിരീകരിച്ചു
ദുബായ്: യുഎഇയിൽ കുരങ്ങുപനി സ്ഥിരീകരിച്ചു. ആഫ്രിക്കയിൽനിന്നെത്തിയ ഇരുപത്തിയൊന്പതുകാരിക്കാണ് രോഗം സ്ഥിരീകരിച്ചത്. ആരോഗ്യമന്ത്രാലയമാണ് ഇക്കാര്യം അറിയിച്ചത്.
സിവറോഡോൻസ്റ്റക്ക് വളഞ്ഞ് റഷ്യ
കീവ്: യുക്രെയ്നിന്‍റെ കിഴക്കൻ വ്യവസായ മേഖലയായ സിവറോഡോൻസ്റ്റക്കിലേക്ക് റഷ്യൻ സൈന്യം ആക്രമണം വ്യാപിപ്പിച്ചു. കിഴക്കൻ ഡോണ്ബാസ് മേഖല, ലുഹാൻസ്ക് എന്നിവ പിടിച്ചടക്കിയതിനു സമാനമായാണ് റഷ്യ ആക്രമണം കടുപ്പിക്കുന്നത്.
ഡോണ്ബാസ് മേഖലയിലാണു സിവറോഡോൻസ്റ്റക്ക്. യുദ്ധം ആരംഭിക്കുന്നതിനു മുന്പ് ഒരു ലക്ഷത്തിലധികംപേർ താമസിച്ചിരുന്ന സിവറോഡോൻസ്റ്റക്കിനെ, മരിയുപോൾ തകർത്തതിനു സമാനമായി ഇല്ലാതാക്കാനാണ് റഷ്യ ലക്ഷ്യമിടുന്നതെന്ന് നിരീക്ഷകർ ആശങ്ക പ്രകടിപ്പിച്ചു. നഗരത്തിലെ സ്കൂളിന്‍റെ ബങ്കറിൽ അഭയം തേടിയവരെ ലക്ഷ്യമിട്ടു റഷ്യ ഷെല്ലാക്രമണം നടത്തിയതായും റിപ്പോർട്ടുകളുണ്ട്.
റഷ്യയെ സംബന്ധിച്ച്് സിവറോഡോൻസ്റ്റക്ക് നിർണായകമാണ്. കാരണം, ലുഹാൻസ്കിനെ മൊത്തമായി സിവറോഡോൻസ്റ്റക്കിൽനിന്നു നിയന്ത്രിക്കാൻ കഴിയും. ലുഹാൻസ്ക് മുഴുവനായി പിടിച്ചെടുക്കുമെന്നു റഷ്യൻ സൈന്യം കഴിഞ്ഞദിവസം പ്രഖ്യാപിച്ചിരുന്നു.
സെലൻസ്കി ദാവോസിൽ
വടക്കൻ യുക്രെയ്നിലെ ഡെസ്ന സൈനിക കേന്ദ്രത്തിൽ റഷ്യ നടത്തിയ ആക്രമണത്തിൽ 87 പേർ കൊല്ലപ്പെട്ടതായി പ്രസിഡന്‍റ് വൊളോഡിമിർ സെലൻസ്കി ദാവോസിൽ നടക്കുന്ന ലോക സാന്പത്തിക ഉച്ചകോടി വേദിയിൽ പറഞ്ഞു. റഷ്യക്കെതിരേ കൂടുതൽ ഉപരോധങ്ങൾ ഏർപ്പെടുത്തണമെന്ന് ലോകരാജ്യങ്ങളോട് ആവശ്യപ്പെട്ട സെലൻസ്കി, ക്രൂരശക്തികളെ ലോകം നിയന്ത്രിക്കാൻ അനുവദിക്കരുതെന്നും ആവശ്യപ്പെട്ടു.
ഈ മാസം പതിനേഴിനായിരുന്നു ഡെസ്നയിലെ ആക്രമണം. ചെർണിഹിവീലെ നഗരമായ ഡെസ്നയുടെ നിയന്ത്രണം റഷ്യ പിടിച്ചിരുന്നെങ്കിലും യുക്രെയ്ൻ പിന്നീട് നിയന്ത്രണം വീണ്ടെടുത്തു. ഇതിനുശേഷം ഈ ഗ്രാമം സൈനിക കേന്ദ്രമായാണു പ്രവർത്തിക്കുന്നത്.
വിചാരണ ചെയ്യും
മരിയുപോളിലെ അസോവ്സ്റ്റലിൽ കീഴടങ്ങിയ യുക്രെയ്ൻ പോരാളികളെ വിചാരണയ്ക്കു വിധേയമാക്കുമെന്ന് വിമത ഡോണ്സ്റ്റക് മേഖലയുടെ മേധാവി അറിയിച്ചു. ഇവരെ ഡോണ്സ്റ്റക്കിൽ തടവിൽ പാർപ്പിച്ചാകും വിചാരണ നടത്തുക. ഇവിടെ രാജ്യാന്തര ട്രൈബ്യൂണൽ നടത്താൻ ഉദ്ദേശിക്കുന്നുണ്ടെന്നും മേഖലാ മേധാവി ഡെനിസ് പുഷിലിൻ അറിയിച്ചു. കീഴടങ്ങിയ പോരാളികൾക്കെതിരേ എന്തു കുറ്റമാണ് ചുമത്തുക എന്നു വ്യക്തമല്ല.
വെടിനിർത്തൽ ഇല്ല
രാജ്യത്തിന്‍റെ മണ്ണ് റഷ്യക്കു കൈമാറിയുള്ള വെടിനിർത്തൽ പരിഗണനയിലില്ലെന്നു പ്രസിഡന്‍റ് സെലൻസ്കിയുടെ ഉപദേഷ്ടാവ് മിഖായിലോ പൊഡോലിക് വ്യക്തമാക്കി. യുക്രെയ്ന്‍റെ പരമാധികാരവും സുസ്ഥിരതയും പുന:സ്ഥാപിച്ചാൽ മാത്രമേ യുദ്ധം അവസാനിക്കുകയുള്ളുവെന്നു പ്രസിഡൻഷ്യൽ ചീഫ് ഓഫ് സ്റ്റാഫ് ആൻഡ്രി യെർമക് ട്വീറ്റ് ചെയ്തു. സിവറോഡോൻസ്റ്റക്ക് പിടിച്ചടക്കാൻ റഷ്യ ശ്രമങ്ങൾ തുടരുന്നതിനിടെയാണ് യുക്രെയ്ൻ നിലപാട് വ്യക്തമാക്കുന്നത്.
റഷ്യൻ സൈനികന് ജീവപര്യന്തം
കീവ്: റഷ്യൻ ടാങ്ക് കമാൻഡർക്കു ജീവപര്യന്തം തടവുവിധിച്ചു യുക്രെയ്ൻ കോടതി. കൊലക്കുറ്റത്തിനാണു കേസ്. റഷ്യൻ അധിനിവേശം ആരംഭിച്ചശേഷം നടക്കുന്ന ആദ്യ യുദ്ധക്കുറ്റ വിചാരണയാണിത്.
ഫെബ്രുവരി 28ന് ചുപാഖിവ്കയിൽ 62വയസുള്ള ഒലെക്സാണ്ടർ ഷെലിപോവിനെ കൊലപ്പെടുത്തിയ കേസിലാണു റഷ്യൻ സൈനികനായ വാദിം ഷിഷിമരിനെ തടവിനു ശിക്ഷിച്ചത്. ഒലെക്സാണ്ടറിനു നേരേ വെടിയുതിർത്തതായി സമ്മതിച്ച 21കാരനായ റഷ്യൻ സൈനികൻ, താൻ ഉത്തരവുകൾ അനുസരിച്ചാണു പ്രവർത്തിച്ചതെന്നു വാദിച്ചു. കൊല്ലപ്പെട്ടയാളുടെ വിധവയോട് ഇയാൾ മാപ്പപേക്ഷിച്ചു.
അധിനിവേശത്തിനിടെ യുക്രെയ്നിലെ സാധാരണക്കാരെ ആക്രമിച്ചിട്ടില്ലെന്നാണ് റഷ്യ അവകാശപ്പെടുന്നത്. 11,000ൽ അധികം സംഭവങ്ങളുണ്ടെന്ന് യുക്രെയ്ൻ അവകാശപ്പെടുന്നു.
ഇന്ത്യയും ജപ്പാനും സ്വാഭാവിക പങ്കാളികൾ: മോദി
ടോക്കിയോ: ഇന്ത്യയും ജപ്പാനും സ്വാഭാവിക പങ്കാളികളാണെന്നു പ്രധാനമന്ത്രി നരേന്ദ്ര മോദി. ക്വാഡ് ഉച്ചകോടിക്കായി ജപ്പാനിലെത്തിയ പ്രധാനമന്ത്രി, ടോക്കിയോയിൽ ഇന്ത്യൻ സമൂഹത്തെ അഭിസംബോധന ചെയ്യുകയായിരുന്നു. ജാപ്പനീസ് നിക്ഷേപങ്ങൾ ഇന്ത്യയുടെ വികസനത്തിൽ സുപ്രധാന പങ്കുവഹിച്ചിട്ടുണ്ടെന്നും അദ്ദേഹം പറഞ്ഞു.
ബിജെപി സർക്കാർ കഴിഞ്ഞ എട്ടു വർഷംകൊണ്ട് ഇന്ത്യൻ ജനാധിപത്യത്തെ ശക്തിപ്പെടുത്തുകയും അതിജീവനശേഷിയുള്ളതാക്കി മാറ്റുകയും ചെയ്തു. എല്ലാവരെയും ഉൾക്കൊള്ളുന്നതും ആരെയും വിട്ടുപോകാത്ത തരത്തിലുള്ള അധികാരനിർവഹണം സാധ്യമാക്കുന്നതുമായ സംവിധാനമുണ്ടാക്കാനുള്ള ശ്രമമാണ് നടത്തുന്നത്. ജനങ്ങൾ നയിക്കുന്ന സർക്കാരാണ് ഇന്ന് ഇന്ത്യയിലുള്ളതെന്നും പ്രധാനമന്ത്രി അവകാശപ്പെട്ടു.
ഇന്ത്യ, അമേരിക്ക, ജപ്പാൻ, ഓസ്ട്രേലിയ എന്നീ രാജ്യങ്ങൾ ഉൾപ്പെട്ടതാണ് ക്വാഡ്. മോദിയെ കൂടാതെ അമേരിക്കൻ പ്രസിഡന്‍റ് ജോ ബൈഡൻ, ജപ്പാൻ പ്രധാനമന്ത്രി ഫുമിയോ കിഷിദ, ഓസ്ട്രേലിയൻ പ്രധാനമന്ത്രി ആന്‍റണി ആൽബനീസ് എന്നിവരാണ് ദ്വിദിന ക്വാഡ് ഉച്ചകോടിയിൽ പങ്കെടുക്കുന്നത്.
ഹിന്ദിയിൽ അദ്ഭുതപ്പെട്ടു മോദി
ടോക്കിയോ: ജപ്പാൻ സന്ദർശനത്തിനിടെ കുട്ടിക്ക് ഓട്ടോഗ്രാഫ് നൽകി പ്രധാനമന്ത്രി നരേന്ദ്ര മോദി. ടോക്കിയോയിലെ ഹോട്ടലിൽനിന്നു പുറത്തുവരുന്പോഴാണ് റിറ്റ്സ് കീ എന്നു പേരുള്ള കുട്ടിയുമായി മോദി ആശയവിനിമയം നടത്തുന്നതും കൈയിലുണ്ടായിരുന്ന ത്രിവർണ ചിത്രത്തില്‍ ഓട്ടോഗ്രാഫ് നൽകുന്നതും. മോദിയുടെ ചോദ്യങ്ങൾക്കു കുട്ടി ഹിന്ദിയിൽ മറുപടി നൽകി. കുട്ടിയുടെ ഒഴുക്കോടെയുള്ള ഹിന്ദിയെ മോദി പ്രശംസിച്ചു. സ്വാഗതം എന്നു മലയാളത്തില്‍ എഴുതിയ പ്ലക്കാർഡുകളുമായെത്തിയ മറ്റു കുട്ടികളുമായും മോദി ആശയവിനിമയം നടത്തി.
ചൈന തായ്‌വാനെ ആക്രമിച്ചാൽ അമേരിക്ക പ്രതിരോധിക്കും: ബൈഡൻ
ടോക്കിയോ: തായ്‌വാൻ വിഷയത്തിൽ നയംമാറ്റ സൂചന നൽകി അമേരിക്കൻ പ്രസിഡന്‍റ് ജോ ബൈഡൻ. ചൈന തായ്‌വാനെ ആക്രമിച്ചാൽ സൈനികമായി പ്രതിരോധിക്കുമെന്നു ബൈഡൻ പ്രഖ്യാപിച്ചു. ക്വാഡ് ഉച്ചകോടിക്കായി ജപ്പാനിലെത്തിയപ്പോഴാണു ബൈഡൻ നിലപാട് പ്രഖ്യാപിച്ചത്. പ്രസിഡന്‍റായശേഷം ബൈഡൻ ആദ്യമായാണ് ഏഷ്യ സന്ദർശിക്കുന്നത്. എന്തെങ്കിലുമൊരു ബലപ്രയോഗത്തിലൂടെ പിടിച്ചടക്കുകയെന്ന നയം ശരിയല്ലെന്നും ബൈഡൻ മുന്നറിയിപ്പു നൽകി.
പരാമർശത്തെ അപലപിക്കുകയും തള്ളിക്കളയുകയുമാണെന്നായിരുന്നു ചൈനീസ് വിദേശകാര്യ വക്താവ് വാംഗ്‌ വെൻബിന്നിന്‍റെ പ്രതികരണം. ചൈനീസ് പ്രവിശ്യയുടെ അവിഭാജ്യഭാഗമാണു തായ്‌വാൻ. തായ്‌വാനെക്കുറിച്ചുള്ള ചോദ്യങ്ങൾ തീർത്തും ചൈനയുടെ ആഭ്യന്തരകാര്യമാണ്. ഇക്കാര്യത്തിൽ വിദേശ ഇടപെടൽ അനുവദിക്കില്ല.
ചൈനയുടെ പരമാധികാരവും സുരക്ഷയും സംരക്ഷിക്കുന്നതിൽ ഒത്തുതീർപ്പുകൾക്കോ ഇളവുകൾക്കോ സ്ഥാനമില്ല. സുരക്ഷാതാത്പര്യങ്ങളിൽ ശക്തമായ നടപടികൾ സ്വീകരിക്കുമെന്ന മുന്നറിയിപ്പും അദ്ദേഹം നൽകി.
ശ്രീലങ്ക: ഭരണഘടനാ ഭേദഗതിബിൽ പരിഗണിച്ചില്ല
കൊളംബോ: ശ്രീലങ്കയിൽ പ്രസിഡന്‍റ് ഗോത്താബയ രാജപക്സെയുടെ ചിറകരിയാനായി പ്രധാനമന്ത്രി റനിൽ വിക്രമസിംഗെയുടെ നേതൃത്വത്തിൽ തയാറാക്കിയ ഭരണഘടനാ ഭേദഗതിബിൽ മന്ത്രിസഭ പരിഗണിച്ചില്ല.
ഭരണഘടനയുടെ 21-ാം ഭേദഗതി ഇന്നു മന്ത്രിസഭ പരിഗണിക്കുമെന്നായിരുന്നു സൂചനയെങ്കിലും ഭരണകക്ഷിയായ എസ്എൽപിപി അംഗങ്ങൾ എതിർക്കുകയായിരുന്നു.
ഇപ്പോഴത്തെ രൂപത്തിൽ ബിൽ ഇനി മന്ത്രിസഭയുടെ മുന്പാകെ എത്തുകയില്ല എന്നു വ്യക്തമായി. കാബിനറ്റ് പരിഗണിക്കുംമുന്പേ അറ്റോർണി ജനറലിന്‍റെ അംഗീകാരം വാങ്ങണമെന്നാണു എതിർപ്പുയർത്തിയ ഭരണകക്ഷി അംഗങ്ങൾ ആവശ്യപ്പെട്ടത്.
പ്രസിഡന്‍റിന് അനിയന്ത്രിതമായി അധികാരങ്ങൾ ഉറപ്പാക്കുന്ന ഭരണഘടനയുടെ 20 എ റദ്ദാക്കാനാണ് 21-ാം ഭേദഗതിയിലൂടെ ലക്ഷ്യമിടുന്നത്. പാർലമെന്‍റിന് പരമാധികാരം നൽകുന്ന 19-ാം ഭരണഘടനാ ഭേദഗതി റദ്ദാക്കിയാണ് പ്രസിഡന്‍റ് ഗോത്താബയ രാജപക്സെ 20 എ ഭേദഗതി കൊണ്ടുവന്നത്.
ഭരണഘടനയിലെ ഭേദഗതി സംബന്ധിച്ച് ഗോത്താബയയുമായി ധാരണയായ ശേഷമാണു കഴിഞ്ഞ 12 നു പ്രധാനമന്ത്രിയായി റനിൽ വിക്രമസിംഗെ ചുമതലയേറ്റത്. തുടർന്ന് രാജ്യത്തെ അഭിസംബോധന ചെയ്യുന്പോഴും ഭരണഘടനാ ഭേദഗതിയെക്കുറിച്ച് അദ്ദേഹം സൂചന നൽകിയിരുന്നു.
അതിനിടെ എട്ട് മന്ത്രിമാരെക്കൂടി പ്രസിഡന്‍റ് ഗോത്താബയ രാജപക്സെ മന്ത്രിസഭയിൽ ഉൾപ്പെടുത്തി. എന്നാൽ സാന്പത്തിക പ്രതിസന്ധി രൂക്ഷമായി തുടരുന്ന രാജ്യത്ത് ധനമന്ത്രിയുടെ കസേര ഒഴിഞ്ഞുകിടക്കുകയാണ്.
ലോകത്ത് 10 കോടി അഭയാർഥികൾ
ബെർലിൻ: അക്രമം, മനുഷ്യാവകാശ ലംഘനം, പീഡനം എന്നിവയെത്തുടർന്നു പലായനം ചെയ്യേണ്ടിവന്നവരുടെ എണ്ണം 100 ദശലക്ഷം കടന്നെന്ന് ഐക്യരാഷ്‌ട്രസഭ അഭയാർഥി ഏജൻസി. ആദ്യമായാണ് എണ്ണം 10 കോടി കടക്കുന്നത്.
യുക്രെയ്ൻ യുദ്ധമാണ് അഭയാർഥികളുടെ എണ്ണം ഇത്രയുമുയരാൻ കാരണമെന്ന് യുഎൻ റഫ്യൂജി ഹൈക്കമ്മീഷണർ ഫിലിപ്പോ ഗ്രാൻഡി അറിയിച്ചു. കഴിഞ്ഞ വർഷം അവസാനത്തോടെ നിർബന്ധിതമായി നാടു വിടേണ്ടിവന്നവരുടെ എണ്ണം 90 ദശലക്ഷം പിന്നിട്ടു. എത്യോപ്യ, ബുർക്കിനോ ഫാസോ, മ്യാൻമർ, നൈജീരിയ, അഫ്ഗാനിസ്ഥാൻ, കോംഗോ തുടങ്ങിയ രാജ്യങ്ങളിലെ സംഘർഷങ്ങളാണ് ഇതിനു പ്രധാന കാരണം.
റഷ്യൻ അധിനിവേശം തുടരുന്ന യുക്രെയ്നിൽനിന്ന് 60 ലക്ഷം പേർക്ക് പലായനം ചെയ്യേണ്ടിവന്നു. 80 ലക്ഷം പേർ രാജ്യത്തിനകത്തുതന്നെ അഭയാർഥികളായെന്നും ഗ്രാൻഡി പറയുന്നു.
നൈജീരിയയിൽ 20 ക്രൈസ്തവരെ ഐഎസ് ഭീകരർ കൊലപ്പെടുത്തി
അബുജ: നൈജീരിയയിൽ 20 ക്രൈസ്തവരെ ഇസ്‌ലാമിക് സ്റ്റേറ്റ് ഇൻ വെസ്റ്റ് ആഫ്രിക്ക (ഐഎസ്ഡബ്ല്യുഎപി) ഭീകരർ കൊലപ്പെടുത്തി. മേയ് 10നാണു നിഷ്ഠുര കൃത്യം അരങ്ങേറിയത്. ഇതിന്‍റെ വീഡിയോ ഐഎസിന്‍റെ അമാഖ് വാർത്താ ചാനലിൽ സംപ്രേഷണം ചെയ്തിരുന്നു. ലോകത്തെ ക്രൈസ്തവർക്കെതിരേ നിരന്തരയുദ്ധം നടത്തുമെന്നുള്ള ഐഎസിന്‍റെ ഭീഷണിയും വീഡിയോയിൽ കാണാം. ബിബിസിയിൽനിന്നുള്ള മാധ്യമപ്രവർത്തകർ ക്രൈസ്തവരെ കൊലപ്പെടുത്തിയ സംഭവം സ്ഥിരീകരിച്ചിട്ടുണ്ട്.
വടക്കൻ നൈജീരിയയിലെ ബോർണോ സംസ്ഥാനത്താണു ക്രൈസ്തവർ ഐഎസ് ഭീകരരുടെ കൂട്ടക്കുരുതിക്കിരയായത്.
മൂന്നു ഗ്രൂപ്പുകളായിട്ടാണു ക്രൈസ്തവരെ വീഡിയോയിൽ കാണുന്നത്. ആദ്യ ഗ്രൂപ്പിൽ നാലു പേരാണുണ്ടായിരുന്നത്. ലോകാവസാനം വരെയും ക്രൈസ്തവർക്കെതിരേ യുദ്ധം ചെയ്യുമെന്നു സമീപത്തുണ്ടായിരുന്ന ഭീകരൻ ഭീഷണി മുഴക്കുന്നതു വീഡിയോയിൽ കാണാം. ഫെബ്രുവരിയിൽ ഐഎസ് നേതാവ് സിറിയയിൽ കൊല്ലപ്പെട്ടതിന്‍റെ പ്രതികാരമാണിതെന്നും ഭീകരൻ പറഞ്ഞു. തുടർന്ന്, നിലത്തിരിക്കുകയായിരുന്ന നാലു ക്രൈസ്തവരെ മുഖംമൂടിധാരികളായ ഭീകരർ വെടിവച്ചു കൊന്നു.
രണ്ടാമത്തെ ഗ്രൂപ്പിൽ 11 ക്രൈസ്തവരെയാണു കൊന്നത്. ക്രൈസ്തവർക്കെതിരെ പ്രതികാരം ചെയ്യാതെ തങ്ങൾക്കു വിശ്രമമില്ലെന്നും ലോകം മുഴുവൻ മുസ്‌ലിംകളെ കീഴ്പ്പെടുത്താൻ ക്രൈസ്തവർ ശ്രമിക്കുകയാണെന്നും ഭീകരർ പറയുന്നതു വീഡിയോയിലുണ്ട്. മൂന്നാമത് അഞ്ചു പേരാണു ഭീകർക്കിരയായത്.
നൈജീരിയയിൽ ക്രൈസ്തവർക്കെതിരേ ഇസ്‌ലാമിക ഭീകരരുടെ ആക്രമണം വർധിച്ചുവരികയാണ്. ബോർണോ സംസ്ഥാനത്താണു ക്രൈസ്തവർ ഏറ്റവുമധികം ആക്രമണം നേരിടുന്നത്. 2022ലെ വേൾഡ് പേർസിക്യൂഷൻ ഇൻഡെക്സ് പ്രകാരം ലോകത്തു ക്രൈസ്തവർക്കെതിരേയുള്ള അതിക്രമങ്ങളിൽ നൈജീരിയ ഏഴാം സ്ഥാനത്താണ്.
ഏപ്രിലിൽ കിഴക്കൻ നൈജീരിയയിലെ ഇവാരെയിലെ മാർക്കറ്റിൽ ഐഎസ് ഭീകരരുടെ ആക്രമണത്തിൽ 20 പേർക്കു ജീവഹാനി സംഭവിച്ചിരുന്നു. “അവിശ്വാസികളായ ക്രൈസ്തവരുടെ സമ്മേളനത്തെ മധ്യ നൈജീരിയ കാലിഫേറ്റിലെ പോരാളികൾ ആക്രമിച്ചു” എന്നായിരുന്നു അന്ന് ടെലഗ്രാമിൽ ഐഎസിന്‍റെ പ്രതികരണം. ഐഎസിനെക്കൂടാതെ ബോക്കോ ഹറാം, ഫുലാനി ഭീകരരും നൈജീരിയയിൽ ക്രൈസ്തവരെ കൊന്നൊടുക്കുന്നു.
വെടിനിർത്തലിനില്ലെന്നു യുക്രെയ്ൻ
കീവ്: റഷ്യയുടെ യുക്രെയ്ൻ അധിനിവേശം ചൊവ്വാഴ്ച നാലാംമാസത്തിലേക്കു പ്രവേശിക്കാനിരിക്കെ ആയിരങ്ങളെ കൊന്നൊടുക്കിയ യുദ്ധം അവസാനിക്കാനുള്ള സൂചനകൾ ഉരുത്തിരിയുന്നില്ല. കീവിൽനിന്നു പിൻവാങ്ങിയ റഷ്യൻസേന യുക്രെയ്ന്‍റെ കിഴക്ക്, തെക്കൻ മേഖലയിൽ ആക്രമണം കടുപ്പിച്ചിരിക്കുകയാണ്. യുക്രെയ്ൻ സേനാകേന്ദ്രങ്ങളും ആയുധസംഭരണ സംവിധാനങ്ങളും ലക്ഷ്യമിട്ട് വ്യോമാക്രമണം തുടരുകയാണെന്നു റഷ്യൻ പ്രതിരോധമന്ത്രാലയം അറിയിച്ചു. മൂന്ന് കമാൻഡോ പോസ്റ്റുകളിൽ മിസൈൽ ആക്രമണം നടത്തി. ഡോണ്ബാസിലെ നാല് ആയുധസംഭരണകേന്ദ്രങ്ങൾ തകർത്തുവെന്നും പ്രതിരോധമന്ത്രാലയം വ്യക്തമാക്കി.
റഷ്യ ആക്രമണം കടുപ്പിക്കുകയാണെങ്കിലും വെടിനിർത്തലിനില്ലെന്നു യുക്രെയ്ൻ വ്യക്തമാക്കി. നയതന്ത്രനീക്കത്തിലൂടെ മാത്രമേ പ്രശ്നപരിഹാരമുണ്ടാകൂ എന്ന് പ്രസിഡന്‍റ് വോളോഡിമിർ സെലൻസ്കി പറഞ്ഞു. മരിയുപോളിൽ നടപ്പാക്കിയതിനു സമാനമായി ഡോൺബാസിലും എല്ലാ വശവും വളഞ്ഞ് സൈനികരെ ബന്ദിയാക്കാൻ റഷ്യ ശ്രമിക്കുകയാണെന്ന അഭ്യൂഹങ്ങളും ഉയർന്നിട്ടുണ്ട്. മേഖലയിലെ തീർത്തും ബുദ്ധിമുട്ടേറിയതാണെന്നും സെലൻസ്കി സ്ഥിരീകരിച്ചു.
അതിനിടെ, മരിയുപോളിലെ അസോവ്‌സ്റ്റാൾ ഉരുക്കുനിർമാണശാലയിൽ കീഴടങ്ങിയ 2500 ഓളം യുക്രെയ്ൻ സൈനികരുടെ ഭാവിയിൽ അനിശ്ചിതത്വം തുടരുകയാണ്. ഉരുക്കുനിർമാണ ശാലയുടെ നിയന്ത്രണം പൂർണമായി ഏറ്റെടുത്തതായി റഷ്യ കഴിഞ്ഞദിവസമാണു പ്രഖ്യാപിച്ചത്. മാസങ്ങളായി യുക്രെയ്ൻ സേനയുടെ മേഖലയിലെ ചെറുത്തുനിൽപ്പ് ഉരുക്കുനിർമാണശാല കേന്ദ്രീകരിച്ചായിരുന്നു. ഏകദേശം ഇരുപതിനായിരത്തോളം ആളുകൾ നഗരത്തിൽ കൊല്ലപ്പെട്ടതായാണു കണക്കാക്കപ്പെടുന്നത്. അസോവ്‌സ്റ്റാൾ ഉരുക്കുശാലയിൽനിന്നു പുറത്തുവന്ന സൈനികരെ ചോദ്യംചെയ്യുന്നതിന്റെ വീഡിയോ റഷ്യ പുറത്തുവിട്ടിട്ടുണ്ട്. 2439 സൈനികർ കീഴടങ്ങിയെന്നാണു റഷ്യയുടെ ഒൗദ്യോഗികഭാഷ്യം.
യുദ്ധത്തടവുകാർക്കുള്ള അവകാശങ്ങൾ നൽകി ഇവരെ തിരിച്ചയയ്ക്കണമെന്നു ബന്ധുക്കളും മനുഷ്യാവകാശ, നിയമ സംവിധാനങ്ങളും ആവശ്യപ്പെടുന്നുണ്ട്. മുഴുവൻ സൈനികരെയും തിരിച്ചെത്തിക്കുംവരെ പോരാട്ടം തുടരുമെന്നു യുക്രെയ്ൻ ഉപപ്രധാനമന്ത്രി ഐറിന വെറീഷ്ചുകും പറഞ്ഞു.
പിടിയിലായ സൈനികർ യുദ്ധക്കുറ്റത്തിനു വിചാരണ നേരിടേണ്ടിവരുമെന്നതിൽ തർക്കമില്ലെന്നു റഷ്യൻ അനുകൂല വിമതനേതാവ് ഡെന്നിസ് പുഷ്ലിൻ പറഞ്ഞു. പിടിയിലായ സൈനികരിൽ വിദേശികളും ഉണ്ട്. നവനാസികളായി സൈനികരെ മുദ്രകുത്താനുള്ള ശ്രമങ്ങൾ റഷ്യൻ മാധ്യമങ്ങളും സ്വീകരിക്കുന്നുണ്ട്.
ശ്രീലങ്കയിൽ ഭരണഘടനാഭേദഗതിക്കു നീക്കം; ലക്ഷ്യം ഗോത്താബയ
കൊളംബോ: ശ്രീലങ്കയിൽ പ്രസിഡന്‍റിനു പരാമാധികാരം ഉറപ്പാക്കുന്ന ഭരണഘടനാഭേദഗതി ഇല്ലാതായേക്കും. പ്രസിഡൻഷ്യൽ ഭരണക്രമം ഇല്ലാതാക്കുന്ന 21 ാം ഭേദഗതി നിർദേശമാണു കാബിനറ്റ് പരിഗണിക്കുന്നതെന്നു നിയമമന്ത്രി ഡോ.വിജയദാസ് രാജപക്സെ പറഞ്ഞു. പ്രസിഡന്‍റിനെക്കാൾ അധികാരം പാർലമെന്‍റിനു നൽകുന്ന ഭരണഘടനയുടെ 19-ാം ഭേദഗതി റദ്ദാക്കി 20 എ ഭേദഗതിയിലൂടെയാണു ഗോത്താബയ രാജപക്സെ രാജ്യത്തെ ചോദ്യംചെയ്യാനാകാത്ത അധികാരകേന്ദ്രമാവുകയായിരുന്നു.
സെൻട്രൽ ബാങ്ക് ഗവർണറുടെ നിയമനം ഭരണഘടനാ കൗൺസിലിനു കീഴിലാക്കുന്നതുൾപ്പെടെ നിർദേശങ്ങൾ പുതിയ ഭേദഗതിയിലുണ്ട്. ഇരട്ടപൗരത്വമുള്ളവർ പാർലമെന്‍റിൽ മത്സരിക്കുന്നതു വിലക്കുന്നതിനും ചട്ടങ്ങൾ ഉൾപ്പെടുത്തിയിട്ടുണ്ട്. യുഎസ് പൗരത്വം ഉപേക്ഷിച്ചാണ് 2019ലെ പ്രസിഡന്‍റ് തെരഞ്ഞെടുപ്പിൽ ഗോത്താബയ രാജപക്സെ മത്സരിച്ചത്.
സാന്പത്തിക പ്രതിസന്ധിയും തുടർന്നുള്ള കുഴപ്പങ്ങളും മൂലം പ്രസിഡന്‍റ് ഗോത്താബയ രാജപക്സെയുടെ രാജിയാവശ്യപ്പെട്ട് പ്രക്ഷോഭം തുടരുന്നതിനിടെയാണു ഭരണഘടനാ ഭേദഗതി. പ്രധാനമന്ത്രി റനിൽ വിക്രമസിംഗെയുടെ നേതൃത്വത്തിലുള്ള സർക്കാർ രാജപക്സെ ഭരണത്തിലെ വീഴ്ചകൾ പരിഹരിക്കാനുള്ള ശ്രമത്തിലാണ്.
ബ്രിട്ടനിൽ ഇന്ത്യൻ വംശജൻ മേയർ
ലണ്ടൻ: സൗത്ത്‌വാർക്ക് ലണ്ടൻ ബറോ പ്രാദേശിക ഭരണകൂടത്തിന്‍റെ മേയറായി ഇന്ത്യൻ വംശജനായ ബിസിനസുകാരൻ സുനിൽ ചോപ്ര തെരഞ്ഞെടുക്കപ്പെട്ടു. ശനിയാഴ്ച സൗത്ത്‌വാർക്ക് കത്തീഡ്രലിൽ സത്യപ്രതിജ്ഞ ചെയ്തു. ഡൽഹിയിൽ ജനിച്ച ചോപ്ര, 2014-15ലും ഇവിടെ മേയറായിരുന്നു. 2013-14ൽ ഡെപ്യൂട്ടി മേയറുമായിരുന്നു.
ഗ്രേറ്റർ ലണ്ടന്‍റെ ഭാഗമായ 32 പ്രാദേശിക ഭരണകൂടങ്ങളാണ് ലണ്ടൻ ബറോകൾ. ഇവിടെ മേയറാകുന്ന ആദ്യ ഇന്ത്യൻ വംശജനാണ് ചോപ്ര.
കാലാവസ്ഥാ വ്യതിയാനം: നയം മാറുമെന്ന്‌ ആന്‍റണി ആല്‍ബനീസ്
കാന്‍ബറ: കാലാവസ്ഥാ വ്യതിയാനത്തിൽ പുതിയ നയത്തിലൂടെ രാജ്യത്തെ പുതിയ ദിശയിലേക്കു നയിക്കുമെന്നു ഓസ്ട്രേലിയയിൽ ഭരണം ഏതാണ്ട് ഉറപ്പിച്ച ആന്‍റണി ആല്‍ബനീസ്. പുനരുപയോജ്യ ഊര്‍ജ്ജമേഖലയിലെ വന്‍ശക്തിയായി ഓസ്‌ട്രേലിയയെ മാറ്റുമെന്നും മധ്യ-ഇടതുപക്ഷ ലേബര്‍ സര്‍ക്കാരിന്‍റെ തലവനായ അദ്ദേഹം പറഞ്ഞു.
ഇന്നു പ്രധാനമന്ത്രിയായി സത്യപ്രതിജ്ഞ ചെയ്യുമെന്ന് ആല്‍ബനീസ് പ്രഖ്യാപിച്ചിട്ടുണ്ടെങ്കിലും ലേബര്‍ പാര്‍ട്ടിക്കു പാര്‍ലമെന്‍റില്‍ ഭൂരിപക്ഷം ലഭിക്കുമോ എന്നതില്‍ വ്യക്തതയുണ്ടായിട്ടില്ല. മൂന്നു വര്‍ഷത്തിനിടെ ഉണ്ടായ അസംഖ്യം കാട്ടുതീയും വെള്ളപ്പൊക്കവും ഉള്‍പ്പെടെ പ്രശ്‌നങ്ങള്‍ മൂലം കാലാവസ്ഥാ വ്യതിയാനമായിരുന്നു തെരഞ്ഞെടുപ്പിലെ പ്രധാന ചർച്ചാവിഷയം.
പാർലമെന്‍റ് തെരഞ്ഞെടുപ്പിൽ വോട്ടെണ്ണല്‍ പുരോഗമിക്കുകയാണ്. 151 അംഗ പാര്‍ലമെന്‍റിന്‍റെ അധോസഭയില്‍ ഭൂരിപക്ഷം ഉറപ്പാക്കാന്‍ ആവശ്യമായ 76 സീറ്റുകൾ ഞായറാഴ്ചയും ലേബർ പാർട്ടി ഉറപ്പിച്ചിട്ടില്ല. മുപ്പത് ലക്ഷത്തോളം തപാല്‍ വോട്ടുകള്‍ എണ്ണുന്നതുള്‍പ്പെടെയുള്ള കാരണങ്ങൾ ഫലപ്രഖ്യാപനം വൈകിപ്പിക്കുകയാണ്.
മതനിന്ദ ആരോപിച്ച് നൈജീരിയയില്‍ ക്രൈസ്തവർക്കുനേരേ ആക്രമണം
ബൗച്ചി: വടക്കൻ നൈജീരിയയിലെ ബൗച്ചിയിൽ മതനിന്ദ ആരോപിച്ച് ക്രൈസ്തവര്‍ക്കുനേരേ ആക്രമണം. മുസ്‌ലിം ഭൂരിപക്ഷമേഖലയായ ബൗച്ചിൽ ഏതാനുംദിവസങ്ങൾക്കുള്ളിൽ പലതവണയാണ് ക്രൈസ്തവ വിശ്വാസികള്‍ ആക്രമിക്കപ്പെടുന്നത്.
റോഡാ ജാട്ടു എന്നയാള്‍ സമൂഹമാധ്യമത്തില്‍ പോസ്റ്റ്‌ചെയ്ത സന്ദേശം മതനിന്ദയാണെന്നാരോപിച്ചാണ് ബൗച്ചിയില്‍നിന്നു നൂറുകിലോമീറ്റര്‍ അകലെ വാര്‍ജിയില്‍ ആക്രമണം നടന്നത്. വീടുകള്‍ക്കും കടകള്‍ക്കും അക്രമികള്‍ തീവയ്ക്കുകയായിരുന്നു. ആറ് വീടുകളും ഏഴ് കടകളുമാണ് കത്തിച്ചത്. നിരവധിപേര്‍ക്കു പരിക്കേറ്റു.
സമൂഹമാധ്യമത്തിലെ പോസ്റ്റിൽ മതനിന്ദ ആരോപിച്ച് രണ്ടാഴ്ച മുന്പാണ് സോകോടോയിലെ ഷെഹുഷാഗരിയിൽ കോളജ് വിദ്യാർഥിനി ഡെബോറ യാക്കൂബിനെ സഹപാഠികൾ കൊലപ്പെടുത്തിയത്.
അടിയന്തരാവസ്ഥ പിൻവലിച്ചു ; ശ്രീലങ്കയിൽ പെട്രോളിനായി ജനം തെരുവിൽ
കൊളംബോ: സാന്പത്തിക പ്രതിസന്ധിയും സർക്കാർ വിരുദ്ധ കലാപവും പിടിമുറുക്കിയ ശ്രീലങ്കയിൽ രണ്ടാഴ്ചയായി തുടരുന്ന അടിയന്തരാവസ്ഥ വെള്ളിയാഴ്ച പിൻവലിച്ചു. കഴിഞ്ഞ ആറിനാണ് ഒരുമാസത്തിനിടയിലെ രണ്ടാംതവണയും പ്രസിഡന്‍റ് ഗോത്താബയ രാജപക്സെ അടിയന്തരാവസ്ഥ പ്രഖ്യാപിച്ചത്.
ആളുകളെ ഏകപക്ഷീയമായി അറസ്റ്റ്ചെയ്തു ചോദ്യംചെയ്യാൻ പോലീസിനും സുരക്ഷാസേനകൾക്കും നൽകിയിരുന്ന അധികാരമുൾപ്പെടെ എടുത്തുകളയുന്നതു ക്രമസമാധാനനില മെച്ചപ്പെട്ടതിനാലാണെന്നു സർക്കാർ അവകാശപ്പെട്ടു.അതേസമയം, ഇന്ധനത്തിനു കടുത്ത ക്ഷാമം തുടരുന്നതിനിടെ പെട്രോൾ ആവശ്യപ്പെട്ട് ജനങ്ങൾ തെരുവിൽ ഇറങ്ങിത്തുടങ്ങി.
തലസ്ഥാനമായ കൊളംബോയിലേക്കുള്ള പ്രധാന പാതകളെല്ലാം വാഹനങ്ങളുമായി ജനം ഉപരോധിച്ചിരിക്കുകയാണ്. ഒരുദിവസത്തേക്കുള്ള പെട്രോൾ മാത്രമാണു സ്റ്റോക്കുള്ളതെന്നു വിതരണക്കന്പനികൾ അറിയിച്ചതോടെയാണു പ്രതിഷേധം ശക്തമായത്.
ശ്രീലങ്ക നേരിടുന്ന അതിരൂക്ഷമായ സാന്പത്തിക പ്രതിസന്ധി പരിഹരിക്കുന്നതിനായി അടിയന്തര സാന്പത്തികസഹായം നൽകുമെന്നു ലോകബാങ്കും എഡിബിയും ഏഷ്യൻ ഇൻഫ്രാസ്ട്രക്ചർ ഡെവലപ്മെന്‍റ് ബാങ്കും ചേർന്നു രൂപീകരിച്ച കർമസമിതി അറിയിച്ചു. മരുന്നും ഭക്ഷണവും വാങ്ങുന്നതിനുള്ള സഹായമാണു നൽകുക. ഐഎംഎഫുമായി വായ്പാ ചർച്ചകൾ തുടരുകയുമാണ്.
സർക്കാർവിരുദ്ധ പ്രക്ഷോഭത്തിനിടെ പത്തുപേർ കൊല്ലപ്പെട്ട കലാപത്തെക്കുറിച്ച് അന്വേഷിക്കുന്ന സംഘം മുതിർന്ന പോലീസ് ഓഫീസറെ ചോദ്യംചെയ്തു. കഴിഞ്ഞ ഒന്പതിനുണ്ടായ കലാപത്തിൽ ഇരുനൂറിലേറെപ്പേർക്കു പരിക്കേറ്റിരുന്നു.
പ്രക്ഷോഭകരും മുൻ പ്രധാനമന്ത്രി മഹിന്ദ രാജപക്സെ അനുകൂലികളും തമ്മിലുള്ള ഏറ്റുമുട്ടലാണു കലാപമായി വളർന്നത്. നേരത്തേ മൂന്ന് മുൻ മന്ത്രിമാരുൾപ്പെടെ ഭരണകക്ഷി എംഎൽഎമാരെയും അന്വേഷണസംഘം ചോദ്യംചെയ്തിരുന്നു.
ഇന്ത്യ 40,000 ടൺ ഡീസൽകൂടി നല്കി
കൊളംബോ: ഇന്ധനക്ഷാമം രൂക്ഷമായ ശ്രീലങ്കയ്ക്ക് ഇന്ത്യ ഇന്നലെ വായ്പാ വ്യവസ്ഥയിൽ 40,000 ടൺ ഡീസൽകൂടി നല്കി. വിദേശനാണ്യശേഖരമില്ലാത്തതിനാൽ ഇന്ധനം വാങ്ങാൻ വഴിയില്ലാത്ത ലങ്കയ്ക്ക് ഇന്ത്യ കഴിഞ്ഞമാസം 50 കോടി ഡോളർ കൂടി വായ്പയായി അനുവദിച്ചിരുന്നു.
ലങ്കൻ ജനതയ്ക്കുള്ള അവശ്യസാധനങ്ങളുമായി ചെന്നൈയിൽനിന്ന് വെള്ളിയാഴ്ച പുറപ്പെട്ട കപ്പൽ ഇന്നെത്തിച്ചേരുമെന്നും കൊളംബോയിലെ ഇന്ത്യൻ ഹൈക്കമ്മീഷൻ അറിയിച്ചു.
9,000 ടൺ അരി, ഇരുനൂറു ടൺ പാൽപ്പൊടി, 24 ടൺ മരുന്നുകൾ എന്നിവ അടക്കം 45 കോടി രൂപ വിലവരുന്ന വസ്തുക്കളാണ് കപ്പലിലുള്ളത്. തമിഴ്നാട് മുഖ്യമന്ത്രി എം.കെ. സ്റ്റാലിനാണ് കപ്പൽ ഫ്ലാഗ് ഓഫ് ചെയ്തത്.
ഖെർസൺ ഒഴിപ്പിക്കൽ തടസപ്പെടുത്തി റഷ്യ
കീവ്: യുക്രെയ്ൻ നടത്തിയ ചെറുത്തുനിൽപ്പിന്‍റെ നേർ ഉദാഹരണമായ മരിയുപോളിൽ വിജയം അവകാശപ്പെട്ട് റഷ്യ. മൂന്നുമാസം നീണ്ട പോരാട്ടത്തിൽ വ്യാപകനാശം നേരിട്ട നഗരത്തിൽ ഇരുപതിനായിരത്തോളം ആളുകൾ മരിച്ചുവീഴുകയും ചെയ്തു. യുക്രെയ്ൻ സൈനികർ തന്പടിച്ചിരുന്ന മരിയുപോളിലെ അസോവ്‌സ്റ്റാൾ ഉരുക്കുശാല പൂർണമായും മോചിപ്പിച്ചുവെന്നു പ്രതിരോധമന്ത്രി സെർജി ഷോയ്ഗുവ് പ്രസിഡന്‍റ് പുടിനെ അറിയിക്കുകയായിരുന്നു. എന്നാൽ, ഇക്കാര്യത്തിൽ യുക്രെയ്ൻ പ്രതികരിച്ചിട്ടില്ല.
കഴിഞ്ഞ തിങ്കളാഴ്ചയ്ക്കുശേഷം ഉരുക്കുശാലയിൽ തുടർന്ന സൈനികരിൽ 2,439 പേർ കീഴടങ്ങി. വെള്ളിയാഴ്ചമാത്രം 500 സൈനികരാണു പോരാട്ടം അവസാനിപ്പിച്ചത്. കീഴടങ്ങിയ യുക്രെയ്ൻ സൈനികരിൽ ഏതാനുംപേർക്കെതിരേ യുദ്ധക്കുറ്റത്തിന് അന്വേഷണം നടത്തുമെന്നു റഷ്യ ഭീഷണിപ്പെടുത്തിയിട്ടുണ്ട്. അതിനിടെ, തുറമുഖ നഗരമായ ഖെർസണിൽ ആളുകളെ ഒഴിപ്പിക്കുന്നതിനു റഷ്യ തടസം നിൽക്കുകയാണെന്നു യുക്രെയ്ൻ സൈനികമേധാവി കുറ്റപ്പെടുത്തി.
ഖെർസൺ മേഖലയിൽ ജനജീവിതം കടുത്ത പ്രതിസന്ധിയിലേക്കു നീങ്ങുകയാണെന്നു യുക്രെയ്ൻ പ്രസിഡന്‍റ് വോളോഡിമിർ സെലൻസ്കിയുടെ ഓഫീസും അറിയിച്ചു. മരുന്നുകൾക്കു കടുത്ത ക്ഷാമം ഉണ്ട്. റഷ്യൻ സൈന്യത്തിന്‍റെ പീഡനത്തിനുപുറമേ ആളുകൾ അപ്രത്യക്ഷരാകുന്നതും സാധാരണമാണ്. റഷ്യൻസേനയുടെ ക്രൂര പീഡനങ്ങൾ ഏറ്റുവാങ്ങിയതു നിരവധിയാളുകളാണ്.
യുക്രെയ്ൻ അധിനിവേശത്തിനു മുന്പേ റഷ്യൻസേന ഖെർസൺ കൈടക്കിയിരുന്നു. ഈ മേഖലയിൽ നിന്ന് ആളുകളെ ക്രിമിയയിലേക്കു നീങ്ങണമെന്നാണു റഷ്യയുടെ നിർദേശം. രക്ഷപെടാൻ കാറുകളുമായി ആളുകൾ റോഡിൽ തുടരുകയാണെന്ന് രാജ്യാന്തരമാധ്യമമായ സിഎൻഎൻ റിപ്പോർട്ട് ചെയ്യുന്നു. ചിലസമയത്ത് വെടിയൊച്ചകളും കേൾക്കാമെന്ന് റിപ്പോർട്ടിൽ പറയുന്നു.
റഷ്യൻ സേനയുടെ സംഘടിതമായ ആക്രമണവും കുറ്റകരമായ നടപടികളും മേഖലയിലെ ജനങ്ങളെ അതിഗുരുതരമായ ജീവിതസാഹചര്യങ്ങളിൽ എത്തിച്ചിരിക്കുകയാണെന്നു ഖെർസൺ റീജണൽ കൗൺസിൽ ഡെപ്യൂട്ടി തലവൻ യൂരി സബോൾസ്കി പറഞ്ഞു. പ്രാദേശികഭരണകൂടങ്ങൾ റഷ്യയുമായി സഹകരിക്കുന്നതിനു വിസമ്മതിക്കുകയാണ്. ഇതുവഴി മേഖലയിൽ നേതൃത്വപ്രതിസന്ധി ഉടലെടുത്തിരിക്കുകയാണെന്നും അദ്ദേഹം വ്യക്തമാക്കി.
അതിനിടെ, സെവെറോഡോൺസ്റ്റെക് നഗരത്തിൽ റഷ്യ നടത്തിയ ആക്രമണത്തിൽ ആറുപേർ കൊല്ലപ്പെട്ടുവെന്നു യുക്രെയ്ന്‍റെ പ്രാദേശിക സൈനികനേതൃത്വം അറിയിച്ചു. പരിക്കേറ്റ മൂന്നുപേർ ആശുപത്രിയിൽ ചികിത്സയിലാണ്. ഒരു സ്കൂളിൽ അഭയം തേടിയിരുന്ന രണ്ടുപേരും കൊല്ലപ്പെട്ടവരിൽ ഉൾപ്പെടും.
ആന്‍റണി ആൽബനീസ് തിങ്കളാഴ്ച അധികാരമേൽക്കും
കാൻബറ: ഓസ്ട്രേലിയയിൽ ആന്‍റണി ആൽബനീസിന്‍റെ മധ്യ-ഇടതുപക്ഷ ലേബർ പാർട്ടി അധികാരത്തിൽ. സ്കോട്ട് മോറിസന്‍റെ നേതൃത്വത്തിലുള്ള ലിബറൽ സർക്കാരിനെ പരാജയപ്പെടുത്തിയാണ് രാജ്യത്തിന്‍റെ 37 മതു പ്രധാനമന്ത്രിയായി ആന്‍റണി ആൽബനീസ് ചുമതലയേൽക്കുന്നത്. ക്വാഡ് നേതാക്കളുടെ യോഗം നടക്കുന്നതിനാൽ പുതിയ മന്ത്രിമാർ തിങ്കളാഴ്ച മുതൽ പ്രവർത്തനം തുടങ്ങുമെന്നു പാർട്ടി ആസ്ഥാനത്ത് വോട്ടർമാരെ അഭിസംബോധന ചെയ്ത് നിയുക്ത പ്രധാനമന്ത്രി പറഞ്ഞു.
പകുതിയിലേറെ വോട്ടുകൾ എണ്ണിക്കഴിഞ്ഞപ്പോൾത്തന്നെ ലേബർ അധികാരം ഉറപ്പിച്ചിരുന്നു.
കാലാവസ്ഥാ വ്യതിയാനം ഉൾപ്പെടെ പ്രശ്നങ്ങളിലെ അനാസ്ഥയാണു സ്കോട്ട് മോറിസന്‍റെ നേതൃത്വത്തിലുള്ള ലിബറലുകളുടെ പരാജയത്തിനു വഴിതെളിച്ചത്.
2007 നുശേഷം ആദ്യമായാണു ലേബർ പാർട്ടി ഓസ്ട്രേലിയയിൽ അധികാരത്തിലെത്തുന്നത്. 151 അംഗ പാർലമെന്‍റിൽ 76 സീറ്റുകളാണു കേവലഭൂരിപക്ഷത്തിനു വേണ്ടത്.
ഭൂണഹത്യ നിലപാട്: വിശുദ്ധ കുർബാന സ്വീകരിക്കുന്നതിൽ നിന്നു നാൻസി പെലോസിക്കു വിലക്ക്
വാഷിംഗ്ടൺ: ഭൂണഹത്യക്ക് അനുകൂല നിലപാട് സ്വീകരിക്കുന്നതിനാൽ യുഎസ് ജനപ്രതിനിധി സഭാ സ്പീക്കർ നാൻസി പെലോസിയെ വിശുദ്ധ കുർബാന സ്വീകരിക്കുന്നതിൽനിന്നു വിലക്കുന്നതിനായി സാൻഫ്രാൻസിസ്കോ ആർച്ച്ബിഷപ് പ്രഖ്യാപിച്ചു.
ഭ്രൂണഹത്യ നിയമവിധേയമാക്കണമെന്ന നിലപാടിൽനിന്ന് നാൻസി പെലോസി പരസ്യമായി പിന്തിരിയുന്നതുവരെ അവർക്കു വിശുദ്ധ കുർബാന നൽകരുതെന്ന് ആർച്ച്ബിഷപ് സാൽവത്തോറെ ജെ. കോർഡിലിയോൺ അറിയിച്ചു. പെലോസിയുമായി നിരവധിതവണ സംസാരിച്ചു.
തീരുമാനത്തിൽനിന്നും പിൻമാറാൻ തയാറാകാതെ അവർ ആത്മാവിനെ അശുദ്ധമാക്കുകയാണെന്നും അതിനാൽ വിശുദ്ധ കുർബാനയിൽനിന്നു വിലക്കുകയാണെന്നും ആർച്ച് ബിഷപ് കോർഡിലിയോൺ പറഞ്ഞു. താൻ കത്തോലിക്കാ വിശ്വാസിയാണെ ന്നു പ്രഖ്യാപിച്ചുകൊണ്ടായിരുന്നു നാൻസി പെലോസി ഭ്രൂണഹത്യയെ അനുകൂലിച്ചിരുന്നത്.
പാക്കിസ്ഥാനിൽ സ്പാനിഷ് സഹോദരിമാരെ പിതൃസഹോദരൻ കൊലപ്പെടുത്തി
ഇസ്‌ലാമാബാദ്: പാക്കിസ്ഥാനിലെ പഞ്ചാബ് പ്രവിശ്യയിൽ പാക് വംശജകളായ സ്പാനിഷ് സഹോദരിമാരെ പിതൃസഹോദരൻ കൊലപ്പെടുത്തി. ഭർത്താക്കന്മാരെ സ്പെയിനിലേക്കു തിരിച്ചുകൊണ്ടുപോകാതിരുന്നതിൽ ഇരുവരും ഗൂഢാലോചന നടത്തിയെന്ന സംശയത്തിലാണ് ഇയാൾ കൊല നടത്തിയതെന്ന് പാക് പത്രം ഡോൺ റിപ്പോർട്ട് ചെയ്തു.
നാദിയയിൽ വെള്ളിയാഴ്ചയാണു സംഭവം. അരൂജ് അബ്ബാസ്(21), അനീസ അബ്ബാസ് (23) എന്നിവരാണ് പിതൃസഹോദരന്‍റെ വെടിയേറ്റു മരിച്ചത്. ഇരുവരും ക്രൂരപീഡനങ്ങൾക്കിരയായിരുന്നതായി പോലീസ് പറഞ്ഞു. പ്രതി ഒളിവിലാണ്.
വെസ്റ്റ്ബാങ്കിൽ പലസ്തീൻ കൗമാരക്കാരൻ വെടിയേറ്റു മരിച്ചു
ജറുസലേം: വെസ്റ്റ്ബാങ്കിൽ ഇസ്രയേലി സേനയുടെ റെയ്ഡിനിടെയുണ്ടായ സംഘർഷത്തിൽ പലസ്തീൻ കൗമാരക്കാരൻ വെടിയേറ്റുമരിച്ചു. പതിനേഴുകാരനായ അജ്മജ് അൽ ഫയാദാണ് കൊല്ലപ്പെട്ടത്. മറ്റൊരു കൗമാരക്കാരൻ വെടിയേറ്റു ഗുരുതര പരിക്കുകളോടെ ആശുപത്രിയിലാണ്. വടക്കൻ വെസ്റ്റ്ബാങ്കിലെ ജനീൻ പട്ടണത്തിലായിരുന്നു വെടിവയ്പ്.
മേഖലയിൽ സമീപനാളുകളിൽ ഇസ്രയേൽ സൈനികനടപടികൾ അടുത്തിടെ വ്യാപകമാക്കിയിരുന്നു. ഇതിനെതിരേ പലസ്തീൻ പ്രതിഷേധവും ശക്തമാണ്.
ഡോൺബാസിൽ റഷ്യൻ മുന്നേറ്റം
കീവ്: കിഴക്കൻ ഡോൺബാസിൽ റഷ്യൻ സേന മുന്നേറ്റം നടത്തുന്നതായി യുക്രെയ്ൻ സൈന്യം അറിയിച്ചു. യുക്രെയ്ന്‍റെ പ്രതിരോധം നശിപ്പിക്കാനായി റഷ്യ വ്യാപകമായി ബോംബിംഗ് നടത്തുന്നു.
ഡോൺബാസിന്‍റെ ഭാഗമായ ലുഹാൻസ്ക് പ്രവിശ്യയിൽ കനത്ത ആക്രമണമാണു റഷ്യ നടത്തുന്നത്. റഷ്യൻ പട്ടാളം ഡോൺബാസ് മേഖല പൂർണമായി നശിപ്പിച്ചുവെന്ന് യുക്രെയ്ൻ പ്രസിഡന്‍റ് സെലൻസ്കി ആരോപിച്ചു.
റഷ്യാ അനുകൂല യുക്രെയ്ൻ വിമതർക്കു ശക്തമായ സ്വാധീനമുള്ള ലുഹാൻസ്കിന്‍റെ മോചനം ഏതാണ്ടു പൂർത്തിയായെന്ന് റഷ്യൻ പ്രതിരോധമന്ത്രി സെർജി ഷോയ്ഗു മോസ്കോയിൽ പറഞ്ഞു.
വിമതരും റഷ്യൻ പട്ടാളവും ചേർന്നു കൂടുതൽ ഭൂമി പിടിച്ചെടുത്തു. ഡോൺബാസിന്‍റെ പുനർനിർമാണ പ്രവർത്തനങ്ങൾക്കായി അവിടെ പ്രത്യേക ഹെഡ്ക്വാട്ടേഴ്സ് സ്ഥാപിച്ചതായും റഷ്യ അറിയിച്ചു.
തെക്കൻ തുറമുഖ നഗരമായ മരിയുപോൾ പൂർണമായി റഷ്യൻ നിയന്ത്രണത്തിലായി. ഇവിടുത്തെ ഉരുക്കുശാലയിൽ അഭയംതേടി അന്തിമ പോരാട്ടം നടത്തിയിരുന്ന യുക്രെയ്ൻ സൈനികരിൽ രണ്ടായിരത്തോളം പേർ ഇതുവരെ കീഴടങ്ങിയതായി റഷ്യൻ വൃത്തങ്ങൾ അറിയിച്ചു.
ഇതിനിടെ, ഫിൻലാൻഡും സ്വീഡനും പാശ്ചാത്യ സൈനിക സഖ്യമായ നാറ്റോയിൽ ചേരുന്ന സാഹചര്യത്തിൽ റഷ്യയുടെ പടിഞ്ഞാറൻ അതിർത്തിയിൽ പുതിയ സൈനിക താവളം സ്ഥാപിക്കുമെന്ന് പ്രതിരോധമന്ത്രി ഷോയ്ഗു വ്യക്തമാക്കി.
റഷ്യൻ പടക്കപ്പലുകളെ നേരിടാനായി യുക്രെയ്ൻ സേനയ്ക്ക് അത്യാധുനിക ഹാർപൂൺ മിസൈലുകൾ നല്കാൻ അമേരിക്ക പദ്ധതിയിടുന്നുണ്ട്. യുക്രെയ്ൻ തുറമുഖങ്ങളെ റഷ്യൻ പടക്കപ്പലുകൾ ഉപരോധിക്കുന്നതുമൂലം ലോകം ഭക്ഷ്യപ്രതിസന്ധിയിലേക്കു നീങ്ങുന്ന പശ്ചാത്തലത്തിലാണിത്.
ശ്രീലങ്കയിൽ ഒന്പതു മന്ത്രിമാർകൂടി
കൊളംബോ: സാന്പത്തിക പ്രതിസന്ധിമൂലമുള്ള അനിശ്ചിതത്വത്തിൽനിന്നു കരക‍യറാനുള്ള ശ്രമങ്ങൾ തുടരുന്ന ശ്രീലങ്കയിൽ റെനിൽ വിക്രമസിംഗെ മന്ത്രിസഭയിൽ ഒന്പത് അംഗങ്ങൾകൂടി സത്യപ്രതിജ്ഞ ചെയ്ത് അധികാരമേറ്റു.
പുതിയ പ്രധാനമന്ത്രിയായി റനിൽ വിക്രമസിംഗെയെ നിയമിച്ച് ഒരാഴ്ചയ്ക്കുശേഷമാണ് പുതിയ മന്ത്രിമാർ അധികാരമേറ്റത്. മുഖ്യപ്രതിപക്ഷമായ സമാഗി ജന ബാലവിഗെയ (എസ്ജെബി)യുടെ രണ്ടംഗങ്ങളും പ്രസിഡന്‍റ് ഗോത്താബയ രാജപക്സെയുടെ ശ്രീലങ്ക പൊതുജന പെരുമുന (എസ്എൽപിപി)യുടെ ഏഴ് അംഗങ്ങളുമാണു പുതുതായി മന്ത്രിസഭയിലെത്തിയത്. കഴിഞ്ഞയാഴ്ച നാല് മന്ത്രിമാർ സത്യപ്രതിജ്ഞ ചെയ്തിരുന്നു.
അതിനിടെ രാജ്യം അതിഗുരുതരമായ ഭക്ഷ്യക്ഷാമത്തെ അഭിമുഖീകരിക്കുകയാണെന്നു പ്രധാനമന്ത്രി വ്യക്തമാക്കി. അവശ്യമരുന്നുകളുടെയും ഭക്ഷ്യവസ്തുക്കളുടെയും ക്ഷാമവും രൂക്ഷമാണ്. വിളകളുടെ നടീൽ സീസണ്‍ തുടങ്ങുന്പോൾ രാസവളം ലഭ്യമാക്കുമെന്നും അദ്ദേഹം വ്യക്തമാക്കി. രാസവളം നിരോധിച്ച് ജൈവവളത്തിലേക്കു നീങ്ങാൻ നേരത്തേ ഗോത്താബയ രാജപക്സെയാണ് ആഹ്വാനം ചെയ്തത്.
ഇപ്പോഴത്തെ ഭക്ഷ്യപ്രതിസന്ധിക്ക് ഈ നയവും കാരണമായെന്നാണു വിലയിരുത്തിയത്. വിളവു കുറഞ്ഞതിനെത്തുടർന്നു വിവാദ തീരുമാനം സർക്കാർ പിൻവലിച്ചുവെങ്കിലും ഇറക്കുമതി ഇതുവരെ നടന്നിരുന്നില്ല. അവശ്യസാധനങ്ങളുടെ വില കുതിച്ചുയരുന്നതും പെട്രോൾ ക്ഷാമം രൂക്ഷമാകുന്നതുമാണ് രാജ്യത്തിനു വെല്ലുവിളിയാകുന്നത്.
സെലൻസ്കി ഏറ്റവും സ്വാധീനം ചെലുത്തുന്ന വ്യക്തി
ന്യൂയോർക്ക്: ലോകത്തിലെ ഏറ്റവും സ്വാധീനമുള്ള നൂറു വ്യക്തികളെ തെരഞ്ഞെടുക്കാനായി അമേരിക്കയിലെ ടൈം മാഗസിൻ വായനക്കാരുടെ ഇടയിൽ നടത്തിയ വോട്ടെടുപ്പിൽ യുക്രെയ്ൻ പ്രസിഡന്‍റ് വോളോഡിമിർ സെലൻസ്കി ഒന്നാമത്.
33 ലക്ഷം പേരാണ് വോട്ടു ചെയ്തത്. അഞ്ചു ശതമാനവും സെലൻസികിക്കാണു ലഭിച്ചത്. അമേരിക്കയിലെ വ്യവസായ പ്രമുഖനും ശതകോടീശ്വരനുമായ ഇലോൺ മസ്ക് 3.5 ശതമാനം വോട്ടുമായി രണ്ടാം സ്ഥാനത്തെത്തി.
ദക്ഷിണ ചൈനാ കടലിൽ ചൈനീസ് അഭ്യാസം
ബെയ്ജിംഗ്: യുഎസ് പ്രസിഡന്‍റ് ജോ ബൈഡന്‍റെ ദക്ഷിണ കൊറിയ, ജപ്പാൻ സന്ദർശനം നടക്കവേ ചൈന ദക്ഷിണ ചൈനാ കടലിൽ സൈനികാഭ്യാസം ആരംഭിച്ചു. വ്യാഴാഴ്ച ആരംഭിച്ച സൈനികാഭ്യാസം തിങ്കളാഴ്ച വരെ തുടരുമെന്നു ചൈനയുടെ മാരീടൈം സുരക്ഷാ അഡ്മിനിസ്ട്രേഷൻ ഓഫീസർ അറിയിച്ചു.
വിമാനങ്ങളോ കപ്പലുകളോ മേഖലയിലേക്കു പ്രവേശിക്കരുതെന്നു ചൈന അറിയിച്ചു. ബ്രൂണയ്, മലേഷ്യ, ഫിലിപ്പീൻസ്, തായ്‌വാൻ രാജ്യങ്ങൾ ദക്ഷിണ ചൈന കടലിൽ അവകാശ വാദം ഉന്നയിക്കുന്നുണ്ട്.
യൂറോപ്പിൽ കൂടുതൽ രാജ്യങ്ങളിൽ കുരങ്ങുപനി
പാരിസ്: യൂറോപ്പിൽ കൂടുതൽ രാജ്യങ്ങളിൽ കുരങ്ങുപനി സ്ഥിരീകരിച്ചു. സ്പെയിനും പോർച്ചുഗലിനും പിന്നാലെ ജർമനിയിലും ഫ്രാൻസിലും രോഗം കണ്ടെത്തി. തലസ്ഥാനമായ പാരീസ് ഉൾപ്പെടുന്ന ഇൽ ദെ ഫ്രാൻസ് മേഖലയിൽ ഇരുപത്തൊമ്പതുകാരനിലാണു രോഗം സ്ഥിരീകരിച്ചത്.
കുരങ്ങുപനിയുടെ ലക്ഷണങ്ങളോടെ എത്തിയ ഒരാളിൽ രോഗം സ്ഥിരീകരിച്ചതായി ജർമൻ സേനയുടെ മൈക്രോബയോളജി ഇൻസ്റ്റിറ്റ്യൂട്ട് അറിയിച്ചു. രോഗികളുടെ എണ്ണം ഉയരുന്ന സാഹചര്യത്തിൽ പടിഞ്ഞാറൻ ആഫ്രിക്കൻ രാജ്യങ്ങളിൽനിന്നെത്തുന്നവർ വൈദ്യസഹായം തേടണമെന്ന് അധികൃതർ നിർദേശിച്ചു.
കഴിഞ്ഞദിവസം സ്‌പെയിനിലും പോര്‍ച്ചുഗലിലും നാല്‍പ്പതിലധികം പേര്‍ക്കു രോഗം സ്ഥിരീകരിച്ചതിനു പിന്നാലെ കാനഡയിലും രോഗബാധിതനെ കണ്ടെത്തിയിരുന്നു. കാനഡയില്‍നിന്നു യുഎസിലെത്തിയ ഒരാള്‍ക്കും രോഗം സ്ഥിരീകരിച്ചു.
ഷിക്കാഗോയിൽ വെടിവയ്പിൽ രണ്ടുമരണം: എട്ടുപേർക്കു പരിക്ക്
ഷിക്കാഗോ: യുഎസിലെ ചിക്കാഗോയിൽ ഭക്ഷണശാലയിലുണ്ടായ വെടിവയ്പിൽ രണ്ടുപേർ മരിച്ചു. എട്ടുപേർക്കു പരിക്കേറ്റു. വ്യാഴാഴ്ച പ്രാദേശികസമയം രാത്രി 10:40 ഓടെ നഗരത്തിന്‍റെ വടക്കൻമേഖലയിലെ മക്ഡൊണാൾഡ് സ്റ്റാളിലായിരുന്നു അതിക്രമം.
ഒരാളെ പോലീസ് കസ്റ്റഡിയിലെടുത്തു. ഇയാളിൽനിന്ന് ആയുധവും കണ്ടെത്തി. റസ്റ്ററന്‍റിനു പുറത്തുനടന്ന തർക്കം വെടിവയ്പിൽ കലാശിക്കുകയായിരുന്നുവെന്ന് ദൃക്സാക്ഷികൾ പറഞ്ഞു. മരണമടഞ്ഞവരുടെ വിശദാംശങ്ങളും വെടിവയ്പിന്‍റെ കാരണവും പോലീസ് പുറത്തുവിട്ടിട്ടില്ല.
ഗോതന്പു കയറ്റുമതി നിയന്ത്രണം ഭക്ഷ്യസുരക്ഷയ്ക്ക്: വി. മുരളീധരൻ
യുണൈറ്റഡ് നേഷൻസ്: രാജ്യത്തു ഭക്ഷ്യസുരക്ഷ ഉറപ്പുവരുത്തുക, അയൽരാജ്യങ്ങളെയും ദരിദ്രരാജ്യങ്ങളെയും സഹായിക്കുക എന്നീ ലക്ഷ്യങ്ങളോടെയാണ് ഗോതന്പു കയറ്റുമതിക്കു നിയന്ത്രണം ഏർപ്പെടുത്തിയതെന്ന് ഇന്ത്യ ലോകത്തോടു വ്യക്തമാക്കി.
കോവിഡ് പ്രതിസന്ധിക്കാലത്ത് സന്പന്നരാജ്യങ്ങൾ ആവശ്യത്തിലധികം വാക്സിനുകൾ സംഭരിച്ച പരിപാടി ഗോതന്പിന്‍റെ കാര്യത്തിൽ നടക്കില്ലെന്ന് വിദേശകാര്യ സഹമന്ത്രി വി. മുരളീധരൻ പറഞ്ഞു. യുഎൻ രക്ഷാസമിതിയുടെ ഭക്ഷ്യസുരക്ഷായോഗത്തിൽ സംസാരിക്കുകയായിരുന്നു അദ്ദേഹം. ഇന്ത്യയിലെ താഴ്ന്ന വരുമാനക്കാർ വിലക്കയറ്റത്തിനൊപ്പം ഭക്ഷ്യധാന്യങ്ങളുടെ ലഭ്യതക്കുറവ് നേരിടുന്നു. ആവശ്യത്തിനു ധാന്യശേഖരം രാജ്യത്തുണ്ടായിട്ടും വില ഉയരുന്നു.
പൂഴ്ത്തിവയ്പ്പും ഊഹക്കച്ചവടവും സജീവമാണ്. ഇന്ത്യക്ക് ഈ പ്രതിസന്ധി നേരിട്ടേ മതിയാകൂ എന്നു മുരളീധരൻ പറഞ്ഞു. ഭക്ഷ്യധാന്യങ്ങളുടെ കാര്യത്തിൽ തുല്യത, ലഭ്യത, വിലക്കുറവ് എന്ന സമീപനത്തിന്‍റെ പ്രാധാന്യം എല്ലാവരും അംഗീകരിക്കണം. കോവിഡ് വാക്സിന്‍റെ കാര്യത്തിൽ ഈ തത്വം ലംഘിക്കപ്പെട്ടതിന്‍റെ വില എന്തായിരുന്നുവെന്നു നമുക്കറിയാമെന്ന് അദ്ദേഹം കൂട്ടിച്ചേർത്തു.
ദരിദ്രരാജ്യങ്ങൾക്ക് ഒന്നാം ഡോസ് നല്കാൻപോലും വഴിയില്ലാതിരുന്ന സമയത്താണു സന്പന്നരാജ്യങ്ങൾ വേണ്ടതിൽക്കൂടുതൽ വാക്സിൻ സംഭരിച്ചത്.
ഇന്ത്യ കഴിഞ്ഞ വെള്ളിയാഴ്ചയാണ് ഗോതന്പു കയറ്റുമതി നിരോധിച്ചത്. നിരോധനം ഇന്ത്യ പിൻവലിക്കുമെന്ന് പ്രതീക്ഷിക്കുന്നതായി അമേരിക്ക പറഞ്ഞിരുന്നു. ഗോതന്പ് ഉത്പാദനത്തിൽ ഇന്ത്യ ലോകത്തു രണ്ടാമതാണെങ്കിലും കയറ്റുമതി കുറവാണ്; ആഭ്യന്തരവിപണിയിൽത്തന്നെയാണു ഭൂരിഭാഗവും വിറ്റഴിക്കുന്നത്. ഭക്ഷ്യധാന്യങ്ങളുടെ പ്രധാന കയറ്റുമതിക്കാരായ യുക്രെയ്നെ റഷ്യ ആക്രമിക്കുന്നതാണ് ലോകത്തിൽ ഭക്ഷ്യ പ്രതിസന്ധി സൃഷ്ടിച്ചിരിക്കുന്നത്.
മരിയുപോളിൽ പോരാട്ടം അവസാനിക്കുന്നു: ഡോൺബാസിൽ പ്രതിരോധം
കീവ്: റഷ്യൻ അധിനിവേശത്തിനെതിരേ യുക്രെയ്ൻ നടത്തിയ ചെറുത്തുനിൽപ്പിന്‍റെ പ്രതീകമായ മരിയുപോളിൽ പോരാട്ടം അവസാനിച്ചു. മരിയുപോളിലെ അസോവ്‌സ്‌റ്റോള്‍ ഉരുക്കുശാലയിൽ അവശേഷിച്ചിരുന്ന ആയിരത്തോളം സൈനികർ കീഴടങ്ങിയതായി റഷ്യ അവകാശപ്പെട്ടു.
എന്നാൽ മരിയുപോളിലെ സ്ഥിതിഗതികളെക്കുറിച്ച് യുക്രെയ്ൻ സൈന്യം വ്യാഴാഴ്ച പുലർച്ചെവരെ പ്രതികരിച്ചിട്ടില്ല. കിഴക്കൻ മേഖലയിലെ വിവിധയിടങ്ങളിൽ റഷ്യയുടെ ആക്രമണം തുടരുകയാണെന്നും വിജയകരമായി തിരിച്ചടിക്കുന്നുണ്ടെന്നുമാണു യുക്രെയ്ന്‍റെ വിശദീകരണം.
കിഴക്കൻ ഡോൺബാസ് മേഖലയിൽ റഷ്യയുടെ ബോംബ് ആക്രമണത്തിൽ നാലു പേർ കൊല്ലപ്പെട്ടതായി യുക്രെയ്ൻ പറഞ്ഞു. ലുഹാൻസ്കിലെ സിവിറോഡോനെറ്റക്സിൽ നടന്ന ആക്രമണത്തിൽ മൂന്നു പേർക്കു പരിക്കേറ്റു. വ്യാഴാഴ്ച പുലർച്ചെയും ഷെല്ലാക്രമണം നടന്നു. അതിർത്തിയിൽ യുക്രെയ്ൻ നടത്തിയ ആക്രമണത്തിൽ ഒരു ട്രക്ക് ഡ്രൈവർ കൊല്ലപ്പെട്ടുവെന്നു റഷ്യയിലെ കുർസ്ക് പ്രവിശ്യാ ഗവർണർ ആരോപിച്ചു. ഏതാനുംപേർക്കു പരിക്കേറ്റുവെന്നും ഗവർണർ വ്യക്തമാക്കി.
അധിനിവേശത്തിനിടെ റഷ്യയുടെ നിയന്ത്രണത്തിലായ സാപ്പോറിഷ്യ ആണവനിലയത്തിലെ വൈദ്യുതിയുടെ ഉപയോഗം സംബന്ധിച്ച് ഇരുരാജ്യങ്ങളും അവകാശവാദം തുടരുകയാണ്. ആണവനിലയത്തില്‍ നിന്നുള്ള വൈദ്യുതിക്കു യുക്രെയ്ന് പണം നല്‍കേണ്ടിവരുമെന്നു റഷ്യ സൂചന നൽകി. പ്രസിഡന്‍റ് പുടിന്‍റെ നിര്‍ദേശപ്രകാരം കഴിഞ്ഞ ഫെബ്രുവരി 24ന് പ്രത്യേക സൈനികനീക്കത്തിലൂടെയാണ് ആണവനിലയത്തിന്‍റെ നിയന്ത്രണം റഷ്യ സ്വന്തമാക്കിയത്. ആണവനിലയത്തില്‍നിന്നുള്ള വൈദ്യുതി തുടര്‍ന്നും ദേശീയഗ്രിഡിലേക്കു അയയ്ക്കുമെന്നാണു യുക്രെയ്ന് ആണവ ഏജന്‍സിയായ എനര്‍ഗോആറ്റത്തിന്‍റെ മറുപടി.
അതിനിടെ യുക്രെയ്ൻ അധിനിവേശത്തിന്‍റെ പശ്ചാത്തലത്തിൽ നാറ്റോ അംഗത്വം തേടുന്ന സ്വീഡനെയും ഫിൻലൻഡിനെയും തുർക്കി എതിർക്കുകയാണ്. ഇരു രാജ്യങ്ങളുടെയും ആവശ്യം അംഗീകരിക്കില്ലെന്നു തുർക്കി പ്രസിഡന്‍റ് റജബ്ബ് ത്വയിബ് എർദോഗൻ പറഞ്ഞു.
വൈറലായി മാർപാപ്പയുടെ നർമം
വത്തിക്കാൻ സിറ്റി: തന്‍റെ മുട്ടുവേദനയെക്കുറിച്ചു ചോദിച്ച മെക്സിക്കൻ വിശ്വാസികളോടു ഫ്രാൻസിസ് മാർപാപ്പ പറഞ്ഞ നർമം സമൂഹമാധ്യമങ്ങളിലടക്കം വൈറലായി. മെക്സിക്കോയുടെ ദേശീയപാനീയമായിഅറിയപ്പെടുന്ന ടെക്വില എന്ന മദ‍്യം കാൽമുട്ടുവേദനയ്ക്ക് ആശ്വാസം പകരുമെന്നായിരുന്നു ഫ്രാൻസിസ് മാർപാപ്പ ചിരിച്ചുകൊണ്ടു തമാശയായി പറഞ്ഞത്.
വത്തിക്കാനിൽ പോപ്പ്മൊബൈലിൽ വിശ്വാസികളുമായി കൂടിക്കാഴ്ച നടത്തുന്നതിനിടെയാണ് രണ്ടു മെക്സിക്കൻ വിശ്വാസികൾ മുട്ടുവേദന എങ്ങനെയുണ്ടെന്നു മാർപാപ്പയോടു ചോദിച്ചത്. “എന്‍റെ മുട്ടുവേദനയ്ക്ക് എന്താണു വേണ്ടതെന്ന് നിങ്ങൾക്കറിയാമോ? അല്പം ടെക്വില”- മാർപാപ്പയുടെ മറുപടി ഉടൻ വന്നു. ഇതുകേട്ടു പൊട്ടിച്ചിരിച്ച മെക്സിക്കോക്കാർ, നാട്ടിൽനിന്നു ടെക്വില എത്തിക്കാമെന്നു മാർപാപ്പയോടു പറഞ്ഞു.
വലതുകാൽമുട്ടുവേദനയെത്തുടർന്ന് മാർപാപ്പ ജൂണിൽ നടത്താനിരുന്ന ലെബനൻ സന്ദർശനം റദ്ദാക്കിയിരുന്നു. വാതരോഗവും മാർപാപ്പയെ അലട്ടുന്നുണ്ട്. ഇതുമൂലം കാലിനും വേദനയുണ്ട്. പൊതുപരിപാടികൾക്കു മാർപാപ്പ വീൽചെയറിലാണ് എത്തുന്നത്.
ശ്രീലങ്കയിലെ കലാപം: മൂന്നു മുൻമന്ത്രിമാരെക്കൂടി ചോദ്യംചെയ്തു
കൊളംബോ: ശ്രീലങ്കയിൽ പത്തുപേരുടെ മരണത്തിനിടയാക്കിയ കലാപത്തിൽ മൂന്നു മുൻമന്ത്രിമാരെക്കൂടി ചോദ്യംചെയ്തതായി പോലീസ്. പ്രക്ഷോഭകരും മുൻ പ്രധാനമന്ത്രി മഹിന്ദ രാജപക്സെ അനുകൂലികളും കഴിഞ്ഞ ഒന്പതിനു നടത്തിയ ഏറ്റുമുട്ടലിൽ ഇരുനൂറിലേറെപ്പേർക്കു പരിക്കേറ്റിരുന്നു. പാർലമെന്‍റിലെത്തിയാണു മുൻ മന്ത്രിമാരെ ചോദ്യംചെയ്തതെന്നു പോലീസ് വക്താവ് നിഹാൽ താൽദുവ പറഞ്ഞു.
നേരത്തെ അറസ്റ്റിലായ രണ്ടു മുൻമന്ത്രിമാരെ 25 വരെ റിമാൻഡിൽ അയച്ചിരിക്കുകയാണ്. പ്രക്ഷോഭകർക്കുനേരെയും പാർലമെന്‍റ് അംഗങ്ങൾക്കുനേരെയും നടന്ന അക്രമസംഭവങ്ങളിൽ 1059 പേരെ അറസ്റ്റ്ചെയ്തു. ആക്രമണത്തിൽ പരിക്കേറ്റ് ചികിത്സയിലായിരുന്ന ഒരാൾ വ്യാഴാഴ്ച മരിച്ചു. ഇതോടെ കലാപത്തിൽ മരിച്ചവരുടെ എണ്ണം പത്ത് ആയി.
അതേസമയം, പാർലമെന്‍റ് അംഗങ്ങളുടെ വസതി ഉൾപ്പെടെ ആക്രമിക്കപ്പെടാൻ ഇടയായതു പോലീസിന്‍റെ അനാസ്ഥയാണെന്ന് എംപിമാർ കുറ്റപ്പെടുത്തി. പ്രതിപക്ഷമായ ജനത വിമുക്തി പെരുമുന (ജെവിപി)യാണ് സംഘർഷത്തിനു വഴിമരുന്നിട്ടെന്നും അവർ പറയുന്നു.
വനിതാ ടിവി അവതാരകർ നിർബന്ധമായും മുഖംമറയ്ക്കണമെന്നു താലിബാന്‌!
കാബൂൾ: വനിതാ ടെലിവിഷൻ അവതാരകർ മുഖംമറച്ചു മാത്രമേ ടെലിവിഷനിൽ പ്രത്യക്ഷപ്പെടാവൂ എന്ന് അഫ്ഗാനിസ്ഥാനിലെ താലിബാൻ ഭരണകൂടം. അന്തിമനിർദേശമാണിതെന്ന് വാർത്താവിതരണ-സാംസ്കാരിക മന്ത്രി വ്യക്തമാക്കിയിട്ടുണ്ടെന്നും അഫ്ഗാൻ കേന്ദ്രമായുള്ള ടോലോ ന്യൂസ് ട്വിറ്ററിൽ അറിയിച്ചു. അഫ്ഗാനിസ്ഥാനിലെ എല്ലാ മാധ്യമസ്ഥാപനങ്ങൾക്കും ഉത്തരവ് അ‍യച്ചുനിൽകിയിട്ടുണ്ടെന്നും ട്വീറ്റിൽ പറയുന്നു.
എല്ലാ സ്ത്രീകളും പൊതുസ്ഥലത്ത് മുഖാവരണം ധരിക്കണമെന്ന ഉത്തരവ് പുറത്തുവന്ന് രണ്ടാഴ്ചയ്ക്കുശേഷമാണ് ടെലിവിഷനിൽ പ്രത്യക്ഷപ്പെടുന്നവരുടെ കാര്യത്തിലുള്ള നിർദേശം.
യൂറോപ്പിലും വടക്കന്‍ അമേരിക്കയിലും കുരുങ്ങുപനി വ്യാപിക്കുന്നു
ബ്രസല്‍സ്: യൂറോപ്പിലും വടക്കന്‍ അമേരിക്കയിലും കുരങ്ങുപനി വ്യാപിക്കുന്നു. അണ്ണാന്‍ ഉള്‍പ്പെടെ മൃഗങ്ങളിൽനിന്നു പടരുന്ന വൈറസ്ബാധയുടെ പശ്ചാത്തലത്തില്‍ ആരോഗ്യപ്രവര്‍ത്തകര്‍ക്കു ജാഗ്രതാനിര്‍ദേശം നല്‍കിയതായി ലോകാരോഗ്യസംഘടന അറിയിച്ചു.
സ്‌പെയിനിലും പോര്‍ച്ചുഗലിലും നാല്‍പ്പതിലധികം പേര്‍ക്കു രോഗം സ്ഥിരീകരിച്ചതിനു പിന്നാലെ കാനഡയിലും രോഗബാധിതനെ കണ്ടെത്തി. കാനഡയില്‍ നിന്ന് യുഎസിലെത്തിയ ഒരാള്‍ക്കും രോഗം സ്ഥിരീകരിച്ചു. കഴിഞ്ഞ ആറാം തീയതിക്കുശേഷം ബ്രിട്ടലില്‍ ഒമ്പതുപേര്‍ക്കു വൈറസ്ബാധിച്ചു.
ലണ്ടനിലേക്കുള്ള ഇന്ത്യൻ നഴ്സുമാരുടെ റിക്രൂട്ട്മെന്‍റിൽ വർധന
ലണ്ടൻ: യുകെ നാഷണൽ ഹെൽത്ത് സർവീസിൽ രജിസ്റ്റർ ചെയ്ത ഇന്ത്യൻ നഴ്സുമാരുടെ എണ്ണത്തിൽ വൻ വർധന. നഴ്സിംഗ് ആൻഡ് മിഡ്‌വൈഫറി കൗൺസിൽ ഡേറ്റ അനുസരിച്ച് 2021-2022 വർഷം 37,815 ഇന്ത്യൻ നഴ്സുമാർ കൗൺസിലിൽ രജിസ്റ്റർ ചെയ്തു.
കഴിഞ്ഞവർഷം 28,192 പേരാണ് രജിസ്റ്റർ ചെയ്തത്. നാലു വർഷം മുന്പ് 17,730 പേർക്കാണ് രജിസ്ട്രേഷൻ നേടാൻ സാധിച്ചത്. 2021-2022 വർഷം 41,090 നഴ്സുമാർ രജിസ്റ്റർ ചെയ്ത ഫിലിപ്പീൻസ് ഒന്നാം സ്ഥാനവും 7,256 പേരുമായി നൈജീരിയ മൂന്നാം സ്ഥാനവും നേടി. ഇന്ത്യക്കാണു രണ്ടാംസ്ഥാനം.
ആഗോള ഭക്ഷ്യപ്രതിസന്ധി മറികടക്കാൻ പദ്ധതികൾ
ബോൺ: റഷ്യയുടെ യുക്രെയ്ൻ അധിനിവേശവും കാലാവസ്ഥാ വ്യതിയാനവും മൂലം ഉടലെടുത്തേക്കാവുന്ന ഭക്ഷ്യ പ്രതിസന്ധി മറികടക്കാൻ യുഎസും വിവിധ വികസന ബാങ്കുകളും പദ്ധതികൾ തയാറാക്കുന്നു. ഇതിനായി അതിവേഗ കർമപദ്ധതികളാണ് ഒരുങ്ങുന്നതെന്നു യുഎസ് ട്രഷറി ഡിപ്പാർട്ട്മെന്‍റ് പറഞ്ഞു.
അഫ്ഗാനിസ്ഥാനിലെയും ശ്രീലങ്കയിലെയും ഭക്ഷ്യ പ്രതിസന്ധിക്കു പരിഹാരമായി ഏഷ്യൻ ഡെവലപ്മെന്‍റ് ബാങ്കിന്‍റെ സഹായപദ്ധതി ഉടൻ നടപ്പാക്കും. ആഫ്രിക്കയിലെ കോടിക്കണക്കിനുവരുന്ന കർഷകർക്കായി 1.5 ബില്യൻ ഡോളർ നീക്കിവയ്ക്കാനാണ് ആഫ്രിക്കൻ ഡെവലപ്മെന്‍റ് ബാങ്കിന്‍റെ തീരുമാനം. യൂറോപ്യൻ വികസന ബാങ്ക്, ഇന്‍റർ അമേരിക്കൻ വികസന ബാങ്ക്, ലോകബാങ്ക് എന്നിവയും ഉടൻ സഹായപദ്ധതികൾ പ്രഖ്യാപിക്കുമെന്ന് ട്രഷറി വകുപ്പ് അറിയിച്ചു.
കപ്പലിനു കൊടുക്കാൻ പണമില്ല; ജനങ്ങൾ ഇന്ധനത്തിനായി ക്യൂ നിൽക്കേണ്ടെന്നു ലങ്കൻ സർക്കാർ
കൊളംബോ: ശ്രീലങ്ക നേരിടുന്ന ഇന്ധനക്ഷാമത്തിന്‍റെ ഭീകരത പാർമെന്‍റിൽ വെളിപ്പെടുത്തി ഊർജ മന്ത്രി കാഞ്ചന വിജശേഖര. ഓർഡർ ചെയ്ത പെട്രോളുമായി രണ്ടു മാസമായി ലങ്കൻ തീരത്തു കാത്തുകിടക്കുന്ന കപ്പലിനു നല്കാൻ വിദേശനാണ്യശേഖരമില്ലെന്നു ജനങ്ങൾ പെട്രോളിനായി പന്പുകളിൽ കാത്തുനിൽക്കേണ്ടെന്നും മന്ത്രി പറഞ്ഞു.
മാർച്ച് 28നാണ് കപ്പലെത്തിയത്. ഇവർ നേരത്തേ നല്കിയ പെട്രോളിന്‍റെ വിലയും നല്കിയിട്ടില്ല. ആദ്യത്തെ കുടിശിക വീട്ടാതെ ഇത്തവണ പെട്രോൾ നല്കില്ലെന്നാണ് അവരുടെ നിലപാട്. കുടിശിക വീട്ടാമെന്ന് ശ്രീലങ്കാ സെൻട്രൽ ബാങ്ക് ഉറപ്പു നല്കിയതിനുശേഷം നിലപാട് മയപ്പെടുത്തിയിട്ടുണ്ട്. പക്ഷേ, അവർക്കു നല്കാനുള്ള ഡോളർ കണ്ടെത്താനായിട്ടില്ല.
രണ്ടു ദിവസത്തിനകം പെട്രോൾ ഇറക്കുമതി ചെയ്യാനുള്ള നടപടികൾ ഊർജമന്ത്രാലയം സ്വകരിച്ചുവരുന്നു. പെട്രോളിന്‍റെ കുറച്ചു കരുതൽ ശേഖരമുള്ളത് ആംബുലൻസ് അടക്കമുള്ള അവശ്യസേവനങ്ങൾക്കായി നീക്കിവച്ചിരിക്കുകയാണ്. രണ്ടു ദിവസത്തിനകം പെട്രോൾ വിതരണം പുനഃസ്ഥാപിക്കാനാകുമെന്ന് പ്രതീക്ഷിക്കുന്നു.
ഇന്ധനത്തിനായി കാത്തുനിൽക്കുന്ന ജനങ്ങളോട് സർക്കാർ മാപ്പു ചോദിക്കുന്നു. ജനങ്ങൾ ഇന്ധനം സംഭരിച്ചുവയ്ക്കുന്നത് അവസാനിപ്പിക്കണമെന്ന് അഭ്യർഥിക്കുന്നു. ഡീസലിന്‍റെ കാര്യത്തിൽ ക്ഷാമമില്ല- മന്ത്രി കൂട്ടിച്ചേർത്തു.
മഹിന്ദയും മകനും പാർലമെന്‍റിൽ
കൊളംബോ: സാന്പത്തികപ്രതിസന്ധിയിൽ രാജിവയ്ക്കുകയും തുടർന്നുള്ള കലാപത്തിൽ കുടുംബത്തോടൊപ്പം നാവികതാവളത്തിൽ അഭയം തേടുകയും ചെയ്ത മുൻ ലങ്കൻ പ്രധാനമന്ത്രി മഹിന്ദ രാജപക്സെ ഇന്നലെ പാർലെന്‍റിലെത്തി. അദ്ദേഹത്തിന്‍റെ മകനും മുൻ മന്ത്രിയുമായ നമൽ രജപക്സെയും പാർലമെന്‍റ് സമ്മേളനത്തിൽ പങ്കെടുത്തു.
കഴിഞ്ഞ തിങ്കളാഴ്ചയാണ് മഹിന്ദ പ്രധാനമന്ത്രിപദം രാജിവച്ചത്. ഇതിനു പിന്നാലെ അദ്ദേഹത്തിന്‍റെ അനുയായികൾ ജനങ്ങളെ ആക്രമിച്ചത് കലാപത്തിനു തിരികൊളുത്തി. പ്രധാനമന്ത്രിയുടെ ഔദ്യോഗികവസതി പ്രക്ഷോഭകർ ആക്രമിച്ചതോടെ സൈന്യം മഹിന്ദയെയും കുടുംബത്തെയും ട്രിങ്കോമാലി നാവികതാവളത്തിലേക്കു മാറ്റി. കലാപത്തിൽ ഒന്പതു പേർ കൊല്ലപ്പെട്ടു. മഹിന്ദയുടേതടക്കം സർക്കാരിലെ ഉന്നതരുടെ വീടുകൾ അഗ്നിക്കരയാക്കപ്പെട്ടു.
മരിയുപോളിൽ റഷ്യ ആശ്രമം ഭരണകേന്ദ്രമാക്കി
കീവ്/റോം: മരിയുപോളിലെ പോളൈൻ വൈദികരുടെ ആശ്രമം റഷ്യൻ സേന പിടിച്ചെടുത്ത് “ഡോണെസ്ക്ക് ജനകീയ റിപ്പബ്ലിക്കി’’ ന്‍റെ ഭരണസിരാകേന്ദ്രമാക്കി മാറ്റിയതായി ഇറ്റാലിയൻ വാർത്താ ഏജൻസിയായ എസ്ഐആർ റിപ്പോർട്ട് ചെയ്തു. നഗരഭരണകേന്ദ്രമായി ആശ്രമത്തെ മാറ്റിയതായി ആശ്രമാംഗമായിരുന്ന ഫാ. പൗളോ തൊമാസെസ്ക്കി പറഞ്ഞു.
മാർച്ച് 17നുതന്നെ റഷ്യൻ സൈനികർ ആശ്രമം കൊള്ളയടിച്ചിരുന്നു. ദേവാലയത്തിലെ തിരുപ്പാത്രങ്ങൾ ഉൾപ്പെടെ ആശ്രമത്തിലെ ജംഗമവസ്തുക്കളെല്ലാം അവർ തട്ടിയെടുക്കുകയും ആശ്രമവാസികളെ പുറത്താക്കുകയും ചെയ്തിരുന്നു.
മാർച്ച് അഞ്ചിനു പട്ടണത്തിൽനിന്നു പലായനം ചെയ്ത ഫാ. പൗളോ ഇപ്പോൾ പശ്ചിമ യുക്രെയ്നിലാണുള്ളത്. മൊബൈൽ ഫോണോ ഇന്‍റർനെറ്റോ പ്രവർത്തിക്കാത്ത മരിയുപോളിൽനിന്ന് വാർത്തകൾ ശേഖരിക്കുക ദുഷ്കരമാണ്.
വെള്ളവും വൈദ്യുതിയും ദുർലഭമാണ്. ഒന്നേമുക്കാൽ ലക്ഷം പേർ കൊടുംപട്ടിണിയിലാണ്.
ദിവസേന ടൺകണക്കിനു ബോംബുകളാണ് പട്ടണത്തിൽ വർഷിക്കുന്നതെന്നും ഫാ. പൗളോ പറഞ്ഞു.
റഷ്യൻ നിർമിത എസ്-400 മിസൈലുകൾ ഇന്ത്യ അടുത്തമാസത്തോടെ സജ്ജമാക്കും
വാഷിംഗ്ടൺ: ചൈനയുടെയും പാക്കിസ്ഥാന്‍റെയും ഭീഷണിമറികടക്കാൻ അതിർത്തിയിൽ അടുത്തമാസത്തോടെ ഇന്ത്യ റഷ്യൻ നിർമിത എസ് -400 മിസൈലുകൾ സ്ഥാപിച്ചേക്കാമെന്ന് യുഎസ്. കര, വ്യോമ, നാവികസേനകളുടെയും തന്ത്രപ്രധാനമായ ആണവായുധങ്ങളുടെയും നവീകരണവും ഇന്ത്യ നടത്തുന്നതായി യുഎസ് രഹസ്യാന്വേഷണ വിഭാഗം. കഴിഞ്ഞ ഡിസംബർ മുതൽ റഷ്യയിൽനിന്ന് ഇന്ത്യക്കു മിസൈലുകൾ ലഭിച്ചുതുടങ്ങിയെന്നു പ്രതിരോധ രഹസ്യാന്വേഷ വിഭാഗം ഡയറക്ടർ ലഫ്.ജനറൽ സ്കോട്ട് ബെരിയർ യുഎസ് സെനറ്റിന്‍റെ സായുധസേനാ കമ്മിറ്റിയെ അറിയിച്ചു.
അതിർത്തികളുടെ സംരക്ഷണത്തിനും ആക്രമണത്തിനും പ്രതിരോധത്തിനുമുള്ള സൈബർശേഷി വർധിപ്പിക്കുന്നതിനായി 2021 ഒക്ടോബർ മുതൽ ഇന്ത്യൻസേന അത്യാധുനിക നിരീക്ഷണസംവിധാനങ്ങൾ സംഭരിച്ചുവരികയാണ്. കഴിഞ്ഞ ഡിസംബറിലാണ് വ്യോമപ്രതിരോധ സംവിധാനമായ എസ്-400 മിസൈൽ ഇന്ത്യക്കു ലഭിച്ചത്.
ജൂൺമാസത്തോടെ ചൈനാ-പാക്കിസ്ഥാൻ അതിർത്തിയിൽ ഇവ സജ്ജീകരിക്കും. ഹൈപ്പർസോണിക്, ബാലിസ്റ്റിക്, ക്രൂയിസ് മിസൈലുകൾ ഉൾപ്പെടെയുള്ളവയുടെ നവീകരണത്തിനായി നിരവധി പരീക്ഷണങ്ങളാണ് നടത്തിയത്. ഭ്രമണപഥത്തിൽ ഉപഗ്രങ്ങളുടെ സാന്നിധ്യം വർധിപ്പിച്ചതും വ്യോമമേഖലയിലെ പ്രതിരോധം ശക്തമാക്കും. സന്പദ്ഘടന ശക്തിപ്പെടുത്തുന്നതിനായി പ്രതിരോധ ഉത്പന്നങ്ങൾ തദ്ദേശിയമായി സംഭരിക്കുന്നതിനു മോദി ഊന്നൽനൽകി. പ്രതിരോധമേഖലയിൽ റഷ്യയുമായി ഇന്ത്യക്കുള്ള ദീർഘകാല സൗഹൃദത്തെക്കുറിച്ചും റിപ്പോർട്ടിലുണ്ട്.
മരിയുപോളില്‍ 959 സൈനികര്‍ കീഴടങ്ങിയതായി റഷ്യ
മോസ്കോ: യുക്രെയ്നിലെ മരിയുപോളിൽ അസോവ്‌സ്‌റ്റോള്‍ ഉരുക്കുനിര്‍മാണ ശാലയില്‍ മാസങ്ങളായി ചെറുത്തുനിന്നിരുന്ന സൈനികരില്‍ 959 പേര്‍ ഈയാഴ്ച കീഴടങ്ങിയതായി റഷ്യന്‍ പ്രതിരോധമന്ത്രാലയം. പരിക്കേറ്റ 29 സൈനികരുള്‍പ്പെടെ 649 പേര്‍ ബുധനാഴ്ചയാണു കീഴടങ്ങിയതെന്ന് റഷ്യൻ പ്രതിരോധമന്ത്രാലയം വക്താവ് മേജർ ജനറൽ ഇഗോർ കൊനാഷെങ്കോവ് പറഞ്ഞു.
മേയ് 16നുശേഷം 959 പേരും കീഴടങ്ങി. ഇതില്‍ 80 പേര്‍ പരിക്കേറ്റവരാണ്. റഷ്യന്‍ നിയന്ത്രണത്തിലുള്ള നാവോഅസോവ്‌സ്‌കിയെ ആശുപത്രിയില്‍ ഇവര്‍ക്കു ചികിത്സാസൗകര്യം നല്‍കിയെന്നും റഷ്യ വ്യക്തമാക്കി.
ഫിൻലൻഡിനും സ്വീഡനുമായി അതിവേഗം നാറ്റോ
ബ്രസൽസ്: റഷ്യയുടെ യുക്രെയ്ൻ അധിനിവേശത്തിന്‍റെ പശ്ചാത്തലത്തിൽ നാറ്റോയിൽ ചേരാനുള്ള ഫിൻലൻഡിന്‍റെയും സ്വീഡന്‍റെയും തീരുമാനത്തിനു സൈനികകൂട്ടായ്മയുടെ പൂർണപിന്തുണ.
ഇരുരാജ്യങ്ങളുടെയും അംഗത്വ നടപടികൾ അതിവേഗത്തിൽ പൂർത്തിയാക്കുമെന്നു നാറ്റോ സെക്രട്ടറി ജനറൽ ജീൻസ് സ്റ്റോളൻബർഗ് പറഞ്ഞു. ഇരുരാജ്യങ്ങളുടെയും അംബാസഡർമാർ അപേക്ഷ കൈമാറിയതിനു പിന്നാലെയായിരുന്നു പ്രതികരണം.
അഹമ്മദി വിഭാഗക്കാരനായ യുവാവിനെ പാക്കിസ്ഥാനിൽ കുത്തിക്കൊന്നു
ലാഹോർ: പാക്കിസ്ഥാനിലെ മതന്യൂനപക്ഷമായ അഹമ്മദി വിഭാഗത്തിലെ മുപ്പത്തിയഞ്ചുകാരനായ യുവാവിനെ മതത്തിന്‍റെ പേരിൽ കുത്തിക്കൊന്നതായി പോലീസ്. ഒകാര ജില്ലയിലാണ് അബ്ദുൾ സലാം എന്ന യുവാവിനെ കൊത്തിക്കൊന്നത്. കൃഷിയിടത്തിൽനിന്നു മടങ്ങുകയായിരുന്ന യുവാവിനെ ഹാഫിസ് അൽ റാസ എന്നയാളാണ് ആക്രമിച്ചത്. സലാം സംഭവസ്ഥലത്തു വച്ചുതന്നെ മരിച്ചു. പ്രതിക്കെതിരേ കൊലക്കുറ്റത്തിനും ഭീകരപ്രവർത്തനത്തിനും പോലീസ് കേസ് ഫയൽ ചെയ്തു.
ഗോത്താബയയ്ക്ക് എതിരായ അവിശ്വാസം പരാജയപ്പെട്ടു
കൊളംബോ: ശ്രീലങ്കൻ പ്രസിഡന്‍റ് ഗോത്താബയ രജപക്സെയ്ക്കെതിരേ പ്രതിപക്ഷം കൊണ്ടുവന്ന അവിശ്വാസപ്രമേയം പാർലമെന്‍റിൽ പരാജയപ്പെട്ടു.
തമിഴ് നാഷണൽ അലയൻസിലെ സുമന്ദിരനാണ് പ്രമേയം അവതരിപ്പിച്ചത്. മുഖ്യപ്രതിപക്ഷമായ എസ്ജെബി പിന്തുണച്ചു. 119 പേർ പ്രമേയത്തെ എതിർത്തപ്പോൾ 68 പേർ മാത്രമാണ് അനുകൂലിച്ചത്. എതിർത്തു വോട്ടു ചെയ്തവരിൽ പുതിയ പ്രധാനമന്ത്രി റനിൽ വിക്രമസിംഗെയും ഉൾപ്പെടുന്നു.
മരിയുപോൾ സ്റ്റീൽ പ്ലാന്‍റിൽനിന്ന് യുക്രെയ്ൻ സൈനികരെ രക്ഷിച്ചു
കീവ്: മരിയുപോളിലെ സ്റ്റീൽ പ്ലാന്‍റിൽ കുടുങ്ങിക്കിടക്കുന്ന അവസാന സൈനികനെയും രക്ഷിക്കുന്നതിനുള്ള നീക്കം യുക്രെയ്ൻ നടത്തുന്നു.
തിങ്കളാഴ്ച 260 സൈനികരെ അസൊവ്സ്റ്റാൾ സ്റ്റീൽ പ്ലാന്‍റിൽനിന്ന് രക്ഷപ്പെടുത്തി പുറത്തെത്തിച്ചതായി യുക്രെയ്ൻ ഉപപ്രതിരോധമന്ത്രി പറഞ്ഞു. റഷ്യയുടെ നിയന്ത്രണത്തിലുള്ള പ്ലാന്‍റിൽനിന്ന് കുറച്ചു സൈനികരെക്കൂടി പുറത്തെത്തിക്കാനുണ്ട്. സൈനികരെ പ്ലാന്‍റിൽനിന്നു രക്ഷിക്കുമെന്നും നടപടികൾക്ക് സമയമെടുക്കുമെന്നും യുക്രെയ്ൻ പ്രസിഡന്‍റ് വ്ളോഡിമിർ സെലൻസ്കി പറഞ്ഞു.
ഇതിനിടെ, റഷ്യയുടെ അയൽരാജ്യങ്ങളായ സ്വീഡനും ഫിൻലൻഡും നാറ്റോ സൈനിക സഖ്യത്തിൽ ചേരുമെന്നു പ്രഖ്യാപിച്ചു. ഖർകീവിൽ റഷ്യൻ സൈന്യത്തെ അതിർത്തിയിലേക്ക് ഓടിക്കാൻ യുക്രെയ്നായി. കിഴക്കൻ യുക്രെയ്നും ഡോൺബാസും കേന്ദ്രീകരിച്ചാണ് റഷ്യ ഇപ്പോൾ ആക്രമണം നടത്തുന്നത്.
അസോവ്സ്റ്റൽ സ്റ്റീൽ പ്ലാന്‍റിൽനിന്ന് ഗുരുതരമായി പരിക്കേറ്റ് 53 യുക്രെയ്ൻ സൈനികരെ ആശുപത്രിയിൽ പ്രവേശിപ്പിച്ചു. മാനുഷിക ഇടനാഴിയിലൂടെ 211 സൈനികരെ രക്ഷിച്ചതായും ഉപപ്രതിരോധമന്ത്രി ഓലേനിക പറഞ്ഞു.
ഗോതന്പ് കയറ്റുമതി റദ്ദാക്കിയ നടപടി ഇന്ത്യ പുനഃപരിശോധിക്കുമെന്ന് യുഎസ്
ന്യൂയോർക്ക്: യുക്രെയ്നിൽ റഷ്യൻ അധിനിവേശം നടക്കുന്ന സാഹചര്യത്തിൽ രാജ്യങ്ങൾ കയറ്റുമതി റദ്ദാക്കരുതെന്ന് യുഎസ്. ഗോതന്പ് കയറ്റുമതി ഇന്ത്യ റദ്ദാക്കിയ സാഹചര്യത്തിലാണ് യുഎസിന്‍റെ പ്രതികരണം.
ലോകത്ത് ഗോതന്പ് ഉത്പാദനത്തിൽ രണ്ടാം സ്ഥാനത്താണ് ഇന്ത്യ. ഉഷ്ണതരംഗത്തെത്തുടർന്ന് ഗോതന്പ് ഉത്പാദനത്തിൽ കുറവ് വന്നതിനാലാണ് ഇന്ത്യ കയറ്റുമതി റദ്ദാക്കിയത്. ഇന്ത്യയുടെ നീക്കം ആഭ്യന്തരവിപണിയിൽ ഭക്ഷ്യധാന്യത്തിന്‍റെ വിലവർധന തടഞ്ഞെങ്കിലും അന്താരാഷ്‌ട്ര വിപണയിൽ വൻതോതിൽ വിലവർധനയ്ക്കു കാരണമായി.
ഗോതന്പു കയറ്റുമതി റദ്ദാക്കിയ ഇന്ത്യയുടെ നീക്കം പരിശോധിക്കുന്നുണ്ടെന്നും രാജ്യങ്ങൾ കയറ്റുമതി റദ്ദാക്കരുതെന്നും യുഎന്നിലെ യുഎസ് അംബാസഡർ ലിൻഡ തോമസ് ഗ്രീൻഫീൽഡ് പറഞ്ഞു.
യുഎൻ സുരക്ഷാസമിതിയിൽ യുഎസിനൊപ്പം യോഗങ്ങളിൽ പങ്കെടുക്കുന്ന രാജ്യമാണ് ഇന്ത്യ. ഭക്ഷ്യ പ്രതിസന്ധി ഉണ്ടാകുന്നത് സംബന്ധിച്ച ആശങ്ക ഇന്ത്യ കേൾക്കുന്നുണ്ടെന്നും അതു പരിഹരിക്കപ്പെടുമെന്നും അവർ പറഞ്ഞു. ലോകത്തിന്‍റെ ഭക്ഷ്യകലവറയായ യുക്രെയ്നിൽ റഷ്യ അധിനിവേശം നടത്തി തുറമുഖം കൈയടക്കുകയും കൃഷിസ്ഥലം നശിപ്പിക്കുകയും ചെയ്തതോടെ ആഫ്രിക്കയിലെയും മധ്യകിഴക്കൻ ഏഷ്യയിലെയും രാജ്യങ്ങൾ ദാരിദ്ര്യത്തിലാണെന്നും യുഎസ് പ്രതിനിധി മാധ്യമപ്രവർത്തകരുടെ ചോദ്യങ്ങൾക്കു മറുപടിയായി പറഞ്ഞു.
ഈ പ്രതിസന്ധിഘട്ടത്തിൽ ലോകത്തിലെ ജനങ്ങൾക്ക് ആഹാരം നൽകേണ്ട ബാധ്യത യുഎന്നിനുണ്ടെന്നും പ്രശ്നം ഈയാഴ്ച പരിഹരിക്കുമെന്നും ഗ്രീൻഫീൽഡ് വ്യക്തമാക്കി.