നസറുള്ളയുടെ പിൻഗാമി കൊല്ലപ്പെട്ടു; സ്ഥിരീകരിച്ച് ഹിസ്ബുള്ള
Thursday, October 24, 2024 12:00 AM IST
ടെൽ അവീവ്: ഹിസ്ബുള്ളയുടെ പുതിയ നേതാവാകുമെന്നു പ്രതീക്ഷിക്കപ്പെട്ട ഷിയാ പുരോഹിതൻ ഹാഷിം സഫിയുദ്ദീനെ വധിച്ചതായി ഇസ്രേലി സേന അറിയിച്ചു. മൂന്നാഴ്ച മുന്പ് ലബനന്റെ തലസ്ഥാനമായ ബെയ്റൂട്ടിൽ വ്യോമാക്രമണം നടത്തിയാണു വധിച്ചത്. ഹിസ്ബുള്ളയും ഇക്കാര്യം സ്ഥിരീകരിച്ചു.
മൂന്നു പതിറ്റാണ്ട് ഹിസ്ബുള്ളയെ നയിച്ച ഹസൻ നസറുള്ള സെപ്റ്റംബർ 27ന് ഇസ്രേലി വ്യോമാക്രമണത്തിൽ കൊല്ലപ്പെട്ടിരുന്നു. നസറുള്ളയുടെ ബന്ധുവായ സഫിയുദ്ദീൻ പുതിയ നേതാവാകുമെന്ന് വാർത്തകളുണ്ടായിരുന്നു.
ഒക്ടോബർ നാലിനു ബെയ്റൂട്ടിലുണ്ടായ ഇസ്രേലി വ്യോമാക്രമണത്തിൽ സഫിയുദ്ദീനും കൊല്ലപ്പെട്ടതായി സൂചനകളുണ്ടായിരുന്നു. ഇതിനു ശേഷം ഇയാളുമായി ബന്ധപ്പെടാൻ കഴിയുന്നില്ലെന്ന് ലബനീസ് വൃത്തങ്ങൾ പറഞ്ഞിരുന്നു.
സഫിയുദ്ദീനൊപ്പം ഹിസ്ബുള്ള ഇന്റലിജൻസ് വിഭാഗം കമാൻഡർ അലി ഹുസൈൻ ഹാസിമയെയും വധിച്ചതായി ഇസ്രേലി സേന ഇന്നലെ അറിയിച്ചു.